تفسير سورة العلق | د. أحمد عبد المنعم

السلام عليكم ورحمة الله وبركاته. إن الحمد لله نحمده ونستعينه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدا عبده ورسوله صلى الله عليه وسلم.

بإذن الله عز وجل نبدأ اليوم أول جلسة من جلسات التفسير أو جلسات قرآنية، إحنا مش عايزين نسميها مجلس تفسير، ونرجو أن يصدق علينا قول النبي صلى الله عليه وسلم: «ما اجتمع قوم في بيت من بيوت الله يتلون كتاب الله ويتدارسونه إلا حفتهم الملائكة وغشيتهم الرحمة وذكرهم الله فيمن عنده». نسأل الله عز وجل أن يكون المجلس ده مجلس تحفه الآن الملائكة والآن تنزل علينا السكينة والرحمة، وأن ربنا سبحانه وتعالى يذكرنا الآن.

سريعا قبل أن أبدأ هذه المجالس مجالس القرآن؛ إن مجموعة من الناس بيقعدوا في بيت من بيوت الله عز وجل في مسجد؛ يقرأوا سورة معينة ويجيبوا أي تفسير مبسط، أيسر التفاسير للشيخ أبو بكر الجزائري أو تفسير الشيخ السعدي أو مختصر لتفسير الإمام ابن كثير أو أي تفسير مبسط؛ إن هم يجتمعوا في مسجد ويقرأوا السورة ويتدارسوها مع بعض، واحد يقول أنا قريت في الآية دي معنى فلاني أو أنا قرأت في هذه الآية هذا المعنى.

الطريقة اللي ممكن احنا شايفينها بسيطة جدا ديت؛ هذه الطريقة زكاها النبي صلى الله عليه وسلم ويذكرها الله عز وجل. يعني الأحداث اللي بتحصل والقطاعات اللي بتحصل كتير؛ نص النبي صلى الله عليه وسلم على أشياء معينة يذكرها الله عز وجل فيمن عنده، فمنها المجالس القرآنية التي تقام في المساجد. هذه المجالس هي حقيقة فعلا هي الوقود الحقيقي، والزاد الحقيقي للقلب المنطلق إلى الله عز وجل، لأن لازم يكون الغذاء هو القرآن، غذاء القلب هو القرآن.

فلما يبقى الإنسان بيقعد في بيت من بيوت الله وتحفه الملائكة وتنزله السكينة والرحمة ويذكرهم الله عز وجل فيمن عنده؛ يبارك في هذا المجلس ببركة القرآن لأنه كلام الله عز وجل. فالمجالس دي بتبقى مجالس مباركة، مش عشان المتكلم فيها شخص معين أو المسجد مسجد معين أو المستمعين اللي بيستمعوا المجلس مجلس، أو حتى هم لو ما فيش مستمع ده هم كلهم بيتكلموا مع بعض وبيستمعوا لبعض كلهم. وتواصوا؛ صيغة التواصي أن كل هذه المجالس مباركة لبركة القرآن.

فهذه المجالس نرجو أن ربنا سبحانه وتعالى يكتب لها القبول، وأن هي تنتشر في الأرض، وأن نرجع تاني كان زمان الصحابة لما يجلسوا مجلس مع بعض وسيدنا عمر بن الخطاب يقول لأبي موسى الأشعري: ذكرنا ربنا، فيقرأ أبو موسى الأشعري القرآن. وكان سيدنا عمر بن الخطاب يجمع أهل المشورة ويجمع كبار أهل بدر ويجمع كبار الصحابة عشان يتناقشوا في الآيات؛ يسأل في مرة عن ﴿إِذَا جَاءَ نَصْرُ اللَّهِ وَالْفَتْحُ﴾، ويسأل في مرة عن آيات من سورة البقرة، ويسأل في مرة في آيات آخر وتتعدد الأجوبة والرأي في هذه الآيات، كانوا يتدارسوا من القرآن.

فبإذن الله عز وجل نبدأ مجلس مع بعض في سورة العلق، ويعني يكون الأولى والأفضل أن أنتم أن إحن كل مرة مثلا نحدد السورة اللي نتكلم فيها؛ بحيث أن أنت طوال الفترة ديت بتقرأ في تفسيرها، تصلي بها، بترجع حفظها، بترجع تاني تقيم علاقة مع هذه السورة مرة أخرى، لأن أنت لما بتترك سورة من سور القرآن فترة طويلة تجف العلاقة بينك وبين السورة. العلاقة اللي بينك وبين السورة تجف؛ آخر مرة مثلا صليت بسورة فاطر امتى؟ وأخر مرة قرأت تفسير سورة سبأ امتى؟ وأخر مرة فتحت المصحف وقعدت تبص على معاني سورة الأحزاب امتى؟ فالواحد من كتر بعده عن القرآن يجف، فالإنسان يعجب ازاي الإنسان قلبه هيعيش وهو بعيد عن القرآن.

هنبدأ باذن الله عز وجل سريعا كده وقفات مع سورة العلق. والكلام في سورة العلق؛ كلام الواحد لما بدأ يبص الناس اللي كتبت في سورة العلق أو عملت شرايط عن سورة العلق؛ وجد اهتمام بالغ من العلماء والمفسرين بهذه السورة، اهتمام بالغ من العلماء والمفسرين والدعاة بسورة العلق، ليه؟ لأنها البداية.

ولابد أن يكون الإنسان لابد أن تكون بدايته صحيحة، لازم تكون بدايتك صح عشان تعرف تنطلق صح، فلو تخيل انسان من البداية وماشي غلط فمستحيل سيصل، إنما الإنسان لما يبدأ صح والطريق من الأول مسدد وموجه يصل بإذن الله عز وجل، إنما من الأول ماشي في طريق غلط لن يصل. فسورة العلق أهميتها لأنها البداية، ومهما فكر الإنسان ازاي تكون البداية بعقله لن يصل، فالقرآن يععلمك ما لم تعلم وببصرك ما لم تر.

فلما بتبدأ من خلال تنظر إلى العالم وإلى نفسك وإلى صفات الربوبية من خلال سورة العلق؛ بتشوف بتشوف الناس صح، وبتعرف نفسك صح، وبتقدر وبتبدأ تفهم يعني ايه ربوبية، يعني ايه الرب؟ إيه أول علاقة بين الإنسان وبين الرب؟ بين الخالق وبين المخلوق، بين الخالق سبحانه وتعالى وبين المخلوق. فبتبدأ السورة تخليك تشوف صح، نبدأ مع بعض سورة العلق سريعا كده.

بسم الله الرحمن الرحيم: ﴿اقْرَأْ بِاسْمِ رَبِّكَ الَّذِي خَلَقَ * خَلَقَ الْإِنسَانَ مِنْ عَلَقٍ * اقْرَأْ وَرَبُّكَ الْأَكْرَمُ * الَّذِي عَلَّمَ بِالْقَلَمِ * عَلَّمَ الْإِنسَانَ مَا لَمْ يَعْلَمْ * كَلَّا إِنَّ الْإِنسَانَ لَيَطْغَى﴾ [العلق: 1-6]. هذه الآيات لغاية قبل كده لأن الإنسان لما يطغى نزل بها جبريل لأول مرة على النبي صلى الله عليه وسلم وقال له: اقرأ. قال: ما أنا بقارئ. فضمه حتى أبلغ منه صلى الله عليه وسلم الجهد ثم أرسله، فقال: اقرأ. قال: ما أنا بقارئ. فكرر ذلك ثلاثا حتى قال له: ﴿اقْرَأْ بِاسْمِ رَبِّكَ الَّذِي خَلَقَ﴾.

أقف سريعا وقفات مع أول آية ديت؛ أول شيء أن أول كلمة بدأت اقرأ، قيل اقرأ القرآن وكأن البداية في علاقتك بالله عز وجل هي في قراءة القرآن، لأنك أنت هتوصل لربنا ازاي؟ ما هو انت نفسك ترضي الله عز وجل ونفسك تفهم تعمل ايه وايه هي الحقائق الكونية العظيمة الموجودة؟ كل ده موجود في القرآن، فتخيل الإنسان من غير القرآن فعلا انسان أعمى. فلو انسان بدأ بدون اتصال بالقرآن هيبقى انسان تائه، ينظر يقدر الأشياء على غير قيمتها، يغر في الأشياء يبدأ يغر في الأشياء، مش عارف قيمة الأشياء. فأول شيء أول وقفة معنا في السورة قضية القرآن، وأن لا وصول لك بدون القرآن، مش وصولك هيتأخر، لا وصول لك إلى الله عز وجل بدون القرآن. الفوائد كتير فإنا نايه بنجمع فوائد سريعة مع بعض.

ثانيا أن السورة بدأت بأمر اقرأ ما بدأتسن سنقرئك مثلا. فلازم الإنسان يفهم أن عشان ينطلق إلى الله عز وجل تجد أن السورة مفادها اقرأ ولا تطعه واسجد؛ مفادي السورة بتطلع بها كأوامر تنفذها، في أوامر وفي منهيات. فالإنسان اللي مش هيبدأ ينفذ اللي بيقال له من الأول مش هيوصل، يعني اقرأ دي سلم، قم فانذر سلم، قم الليل سلم، معراج وبيصعد بك. لو مش هتطبق الأشياء دي مهما بقعدت تفكر أو تتمنى لا وصول لك، يعني لما ربنا قال لسيدنا موسى: ﴿إني اصطفيتك على الناس برسالاتي وبكلامي فخذ ما آتيتك وكن من الشاكرين﴾ [الأعراف: 144]، لما ربنا قال لمريم: ﴿يَا مَرْيَمُ انقُتِي لِرَبِّكِ وَاسْجُدِي وَارْكَعِي مَعَ الرَّاكِعِينَ﴾ [آل عمران: 43].

يبقى كل تشريف مع أمر، لما يجي تشريف معين ده مش معناه انك وصلت خلاص، لأ ده معناه زيادة الأوامر اللي عليه. فالبداية بدأت باقرأ، انك لازم تتقرب بالشبر، قال الله عز وجل في الحديث القدسي: «من تقرب إلي شبرا تقربت إليه ذراعا»، يبقى أنت اللي بتاخد الشبر الأول، بمشكلتنا في يعني مش في الأغلب ديما مشكلتنا في الشبر الأول لأن ربنا بيقول من تقرب إلي شبرا تقربت إليه ذراعا، فانت عندك ذراع.

سهل ذراع من الطريق إلى الله عز وجل مستنير فيه سهولة لأن فيه معية ربنا، فبتمشي في الذراع ده بسهولة فتتقرب الذراع تقرب الله إليك باع، تمشي في الباع تبدأ تمشي يأتيك الله هرولة تبدأ تجري أنت في الطريق. فكل الطريق سهل ما عدا أول شبر لابد فيه من بذل ومشقة، فلا اقتحم العقبة، لازم في عقبة في الأول بتقتحمها بترمي نفسك فيها، فالشبر بدأ باقرأ وبعدين قم فانذر وبعدين قم الليل.

فهذه الأوامر لابد أن الإنسان يطبقها، العمر دي مش جاية عشان مجرد أن هي تتلى، لا تتلى وتطبق. في أول تخيل أول آية في القرآن أمر اعمل كذا. كتير من الناس مش عايز يسمع كلمة اعمل وما تعملش، يعني هو عايز حتى لو هيسمع مش عايز يطلع بأعمال، عايزين نطلع بكلام لأ، فأول شيء في القرآن أمر.

تاني شيء أن أول شيء في القرآن أمر لا يستطيعه النبي صلى الله عليه وسلم، قال: ما أنا بقارئ. فلما يطلب منك أشياء انت ما عملتهاش قبل كده ما تقولش مش هينفع، فكان الحل إيه اقرأ باسم ربك أنك تستعين بالله حتى لو ما تعرفش، لما يقول لك اشتغل في الدعوة يبقى تستعين بالله وتبدأ تبذل الأسباب، لأن عندنا بعد كده علم بالقلم القلم ده سبب، يبقى لابد أن الإنسان حتى لو طلب منه أشياء ما بيعملهاش قبل كده ما نقولوش صلي قيام يقول لك اصل أنا ما صليتش قبل كده، اقرأ القرآن اصل صعب، اطلب العلم اصل ما أعرفش، ادع إلى الله اصل ما أعرفش. لا، فاول أمر نزل أو أول كلمة نزلت عن النبي صلى الله عليه وسلم أمر.

أمر لا يستطيعه النبي صلى الله عليه وسلم؛ احنا قلنا البداية كانت بيقرأ، كان المتوقع أن البداية تبقى بتقوم الليل أو قم فانذر، لا اقرأ قبل قم الليل وقم فانذر. ليه البداية باقرأ قبل قيام الليل وقم في اندر؟ البداية بالثلاث أوامر دول هم دول أركان الإنسان المسلم الصالح المصلح، ثلاث أركان: يقرأ يتعلم كتاب الله عز وجل سنة النبي صلى الله عليه وسلم، يدعو إلى الله، يقوم الليل. ليه البداية تبقى اقرأ قبل قم الليل وقم فانذر؟

أشرنا أنه عشان يمشي صح، لأن أنت هتدعو إلى الله عز وجل من غير قرآن تضل، تضيع. أنت حتى لو قمت الليل وقلبك انشغل عن معاني القرآن بعض الأسف يعني الناس ممكن قيام الليل يطغيه أصلا يحس أن هو إيه؟ إذا ابن القيم بيتكلم عن أحيانا الإنسان اللي وكثير من السلف لما كان بيقول يعني يعني أن هو يبيت نائما ويصحى نادما أحب إليه من أن يبيت قائما ويصحى معجبا. يعني يصحى الصبح يستيقظ معجبا أو يصبح معجب بقيامه، ده أسوأ من أن هو لو كان راحت عليه نومة وقام ندمان على تقصيره بين يدي الله عز وجل، كان أفضل له أنه يصحى ندمان.

فالشاهد أن البداية باقرأ هي اللي بتديك النور في كل حياتك بعد كده، اللي هو قراءة القرآن زي ما بيقول زي ما بوب الإمام البخاري: العلم قبل القول والعمل، فاعلم أنه لا إله إلا الله واستغفر لذنبك. يبقى لابد أن لما بيقرأ بيتعلم من خلال القرآن.

يبقى أول شيء احنا قلنا البداية بالأمر. تاني شيء: طب أنا ما أقدرش؟ باسم ربك، تستعين بالله عز وجل تذكر اسم الله عز وجل على كل شيء على الصعب وعلى السهل، النبي صلى الله عليه وسلم كان يقول: اللهم لا سهل ما فيش حاجة سهلة إلا ما جعلته سهلا. يعني حتى حفظ الآيات الصغيرة دي مش سهل إلا أن يسهله الله عز وجل. فقضية اقرأ أو أي أمر من أوامر الدين بيبدأ القرآن يعلمك في أول آية آية مش أول آيات أول آية في القرآن أن أي شيء لابد أن تستعين فيه بالله عز وجل وأن تذكروا اسم الله عز وجل عليه، وأن تستحضر دائما معية الله عز وجل لك أثناء السير والطريق إلى الله عز وجل لازم وإلا زي ما قلنا هتنسب الأشياء إلى قدرتك.

وإذا لم يكن من الله عون للفتى كان أول ما يجني عليه اجتهاده. لو ربنا ما أعانش الإنسان أول حاجة تضيع الإنسان في عقله ودماغه واجتهاداته، لو صار بعيدا عن الله عز وجل.

﴿اقْرَأْ بِاسْمِ رَبِّكَ الَّذِي خَلَقَ﴾، هنا بدأ الكلام عن الربوبية وعن صفة الخلق لله عز وجل من صفات الربوبية. ليه ما قالش اقرأ باسم الرحمن الرحيم؟ ليه من الأول في هذا الطريق الطويل اللي بدايته كانت اقرأ والنبي صلى الله عليه وسلم بيحاول يسجد عند الكعبة وأبو جهل بيقول له: لئن رأيت محمدا يعفر وجاؤوا بين دوركم لأطأن عنقه. هذه البداية إلى الطريق الطويل اللي انتهى ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ [النصر: 1-2]، الطريق الطويل ده بدأ باسم ربك. ليه الربوبية وليه الخلق؟

لو جينا نشوف كده أول خمس آيات أو أول ست آيات لو جينا نبص كده على أول خمس آيات وست آيات؛ هنلاقي فيها أن كلمة ربك جت مرتين، وكلمة الإنسان جت مرتين في أول خمس آيات وأول ست آيات، يبقى جت ثلاث مرات، والخلق جه مرتين. خلاص كأن البداية: اعرف نفسك واعرف ربك، والبداية دي اللي بيبدأ من غيرها زي ما قلنا يضل، اللي ما يبقاش عارف قيمة نفسه قد ايه هو فقير قد ايه هو ضعيف، قد ايه هو محتاج؟ اللي ما بيبدأش البداية دي وما بيعرفش قد ايه ربنا قدير، قد ايه ربنا سبحانه وتعالى يخلق من العدم.

قدر أيه ربنا سبحانه وتعالى له فضل على الإنسان، هو الذي رباه بنعمه، هي دي البداية كأن بداية القرآن اعرف ربك واعرف نفسك، لازم تعرف الحقيقة دي. اعرف أن الناس كلهم عُلَق. اعرف أن ربنا جابهم كلهم من عدم، اعرف أن لك رب بيربيك بالنعم، يعني أنت تُربى يعني أنت بتزيد في كل حاجة في جسمك وفي مشاعري وأفكارك وفهمك وفي قوتك وفي أموالك، أي شيء النمو اللي بيحصل ومش أنت بس، الكون كله والسماء بنيناها بأيد وإنا لموسعون. كل الكون يُربى برعاية الله له أن ربنا سبحانه وتعالى رَبَّهُ، عشان كده بتقول الحمد لله رب العالمين.

ربنا خلق الكون ده بصفات معينة من هذه الصفات أن الكون سنة بيكبر تدريجياً، يعني الإنسان لما بيتولد بيقعد تسع شهور، بيبدأ الأول مني ومع البويضة يبقى بعد كده العلقة تتمسك، تمسك العلقة في جدار الرحم، وتبدأ تكبر مضغة تتخلق والعظام يكسو اللحم، وبعدين أنزل أنت مستني تسع شهور مش هينزل لك واحد في سنة ستا مسلاً، مش هينزل يجري لأ ده لسه أنت مستني تسع شهور بقى معتقد بقى أن خلاص وهو ده على فكرة الإنسان الملتزم يعني ممكن يفتكر بقى أنه إيه قاعد بيجاهد بقاله تسع شهور أنه خلاص بقى أن هو بقى ينطلق.

لأ، الإنسان فطر أن هو يُربى إلا أن يشاء ربي شيئاً، فتخيل الإنسان بينزل ولسه بيحتاج يرضع ولسه يبكي ولا يتكلم، وما بيعرفش يمشي ويبدأ يزحف ويبدأ. النبتة تبقى بذرة وتبدأ تطلع الجذور والساق والأوراق وتكبر، فالكون كله يُربى، ليه ربنا خلق الكون كده؟ فيه صفة التدرج دي؟ أن الشمس مش تيجي مرة واحدة وتقفل مرة واحدة، يعني تخيل كده احنا قاعدين فجأة الشمس طلعت، وبعدين مسلاً الساعة خمسة، خمسة وعشرة، خمسة وتلت فجأة الشمس غابت، ما بيحصلش كده، بيبدأ في نوع من التدرج، التدرج ده ليه؟

من حكمة التدرج في الكون كله في النمو ده أنه يظل يحتاج إلى الله عز وجل في كل لحظة من لحظات حياتي، طول ما أنت بتكبر أنت محتاج لربنا، طول ما قلبك بيدق، طول ما الكلية شغالة، طول ما الرئة شغالة، طول ما الخلايا بتاعت جسمك بتنمو، طول ما البذرة بتكبر وتبقى نبتة وبعدين شجرة، طول ما السماء بتتمدد، كل ده يحتاج إلى الله عز وجل في كل لحظة من لحظاته، فالكون كله لا يستغني عن ربه لحظة واحدة، عشان الإنسان بمجرد ما يشعر يظن جاهلا خاطئا مخطئا، يظن أنه استغنى في مرحلة من المراحل، لو ظن لحظة، لو ظن ولو لحظات بالاستغناء هيطغى.

يعني الإنسان وهو في بطن أمه يحتاج إلى ربه، وهو رضيع يحتاج إلى ربه، فدي ممكن تبقى واضحة اه لأن هو ما حدش هيوصل له وهو علقة محتاج لربنا ولسه رضيع، طب لما يبقى شاب وبلغ أشده تلاتين سنة وراجل معه شهادات ومعه أموال، أيضا يحتاج إلى ربه، هو طوال رحلة حياته والكون كله هو أشبه بالعلقة يتعلق بالله عز وجل، الكون كله طوال زمنه يحتاج إلى ربه سبحانه وتعالى، ما تسقطش ورقة إلا بإذنه سبحانه وتعالى، كل شيء يحتاج إلى ربه سبحانه وتعالى، فالبداية برب العالمين اقرأ باسم ربك.

ومن صفات الربوبية الكتير صفة الخالقية، ليه صفة الخلق؟ ليه الكلام دايما في البداية على الخلق؟ الطبيعي الإنسان العاقل أما يروح في أي حتة يسأل أنا ايه اللي جابني هنا؟ ده سؤال منطقي، أما يبص كده الطبيعي أن الإنسان لما يبدأ ينظر، يقف بس تلات دقايق يبصوا على دراعه وعلى قلبه وعلى إيده ورجله والشمس، يبدأ يسأل أول سؤال منطقي يقول مين أداني هنا؟ مين أداني ده؟ مين أداني إيدين؟ مين أداني رجلين؟ مين جابني هنا؟ مين؟ ده طبيعي.

أنت بتدخل بيتك وتلاقي حاجات جديدة، أول سؤال بتسأله مين اللي قبل ما تسأل إيه الحاجة، مين اللي جابها؟ تخيل أنت مروح الوقت دلوقتي البيت، لقيت البيت مليان أكل وشرب وهدوم وكل اللي أنت عايزه، كل ما تتمناه وجدته في بيتك، مش منطقي جداً أن أنتم دخلتم مغير ولابس الهدوم الجديدة وواكل وداخل نايم وعادي؟ ده مش منطقي أبداً، إعدام يعني ده أعزكم الله دي أخلاق الأنعام، تدخل تلاقي أكل تأكل ما فيش مشكلة ما بتقعدش تفكر إيه ده؟ إيه اللي جاب الأكل ده هنا؟ إنما ربنا بيقول فلينظر الإنسان، البني آدم ينظر الأول إلى إيه؟ إلى طعامه، ده طبيعي مش بيتحط له أكل يقوم داخل وأكل وماشي وخلاص، دي بقى إيدين ورجلين قام شغال وخلاص، لأ الطبيعي أن يقف يسأل.

فالفطرة الطبيعية لما تضغط عليها بصفة الخلق تستجيب، ده طبيعي، عشان كده الكفار كانت البداية معهم بالضغط عليهم، ولإن سألتهم من خلق كانوا يقولون ربنا، فتبدأ تقول لهم بقى وبما أن إذا هو اللي خلق إذا له الأمر، الإله الخلق والأمر، لما يفسد فطر الناس، تيجي تقول له مين اللي خلق؟ يقول لك ما أعرفش، ده ضايع ده محتاج بقى أن إيه من قبل الأول، إنما الكفار المشركين أعتى الناس، وبالطبع اليهود والنصارى ودول كانوا أعداء الإسلام، تسأله مين خلق؟ يقول ربنا، تبدأ تكمل.

فبدأ الغرب دلوقتي عايز يمسح من الناس ذكر الخلق طغيان الأسباب اللي وصل له الناس، أعتقد أنه ممكن يعمل كل حاجة، أنه يرجع يكتشف سر الحياة، أنه بيطلعوا في الكون يقول لك بنبحث عن مكان آخر نعيش عليه غير الأرض، حتى اللي يسموه إيه؟ يسموه غزو الفضاء.

غزو ليه مش اكتشاف؟ شوفي خد بالك من التعبيرات الإنسان لما بيبعد عن الاتصال بالقرآن عداي، غزو غزو ليه؟ أنت بتغزو مين؟ أنت بتعادي الله قصدك تغزو الفضاء؟ هو أنت ليه معتقد دايماً؟ أنت ليه ناسي أن لك رب؟ ناس أن لك رب هو اللي خلق كل شيء، يعني أنا شفت فيلم تسجيلي علمي بيشرح الكون والمجرات والمسافات وإيه الكواكب، مبهر، أنت طول ما أنت بتتفرج على الفيلم عمال تقول سبحان الله غصب عنك إجباري.

فتلاقي الراجل اللي عمال يشرح في آخر الفيلم بتاع ساعة ونص بيقول إيه: ولا نعلم من الذي أتى بهذه الأشياء، ولا نعلم إيه اللي هيحصل، ولا كيف أتينا، ولا إيه ولا كيف كانت البداية، ولا إيه اللي هيحصل. يا نهار أبيض! مش عارف، مش عارف! أنا سألت طفل صغير فطرته يقول لك ربنا، أي حد تعال يا عم محمد إيه اللي عمل؟ يقول لك ربنا، أي حد تسأله، وعلماء في الفلك.

فتطغيان الأسباب، وهنا لما نجيء نبص كده نبص على المعادلة ديت: الذي خلق، يبقى دي القدرة المطلقة، خلق الإنسان من علق، بالنسبة للإنسان العلق ده العجز المطلق، ما هو العلقة دي يا جماعة ده شيء كده حتة لحمة متعلقة في جدار والسوائل ودم بينزل وهو في لحظة يعني معرض أنه ينفك وينهار وينزل.

شفت مشهد كده مشهد يعني واحد اترمى في شلال وشلال جارف والشلال عمال يخبط يمين وشمال، وبعدين لقى حتة شجرة طالعة قام ماسك فيها وفي لحظة الشجرة عمالة تبدأ تفك تفك، وحظه بقى جه مسلا أي حاجة بدأت تاكل في عارفين أنتم المشاهد الدراما دي والإثارة دي وعمال بقى يتفرج على الشجرة وهي بتفُك، هو ده الإنسان، متعلق حلقة في كل حاجة، يعني في كل خطوة من خطوات حياتي هو كده، بس هو أحياناً غطاء الأسباب بيعميه.

فالعلق ده العجز المطلق، فالإنسان عاجز، الذي خلق خلق الإنسان من علق، اقرأ وربك الأكرم، ربنا كريم، الذي علم بالقلم، الإنسان جاهل، طب عندنا معادلة: الإنسان عاجز، الإنسان جاهل، الله قدير، الله كريم، كان المتوقع كانوا يطيعوا ربه، تفاجئ أن آية رقم ستة بعد المقدمات الخمسة دي: ﴿كَلَّا إِنَّ الْإِنسَانَ لَيَطْغَىٰ﴾ [العليق: 6]، آه أنا عايز أقول كلمة بس ما ينفعش تسجل ده الإنسان ده، فاهمين أنتم مش أنا، مش ممكن، إيه ده إيه إيه الدنو ده في المعاملة؟ إيه ده عاجز جاهل خلق الإنسان من نطفة فإذا هو خصيم مبين، إيه ده دي بيسموها في اللغة إيه ده الفجائية، من نطفة فإذا هو عارف ابنك مسلا وأنت ما عملتلوش حاجة، أأنتم تخلقونه؟ ابنك بقى أنت عمال جبت له البامبرز ورضعته وتصرف عليه وتوديه حضانة وتدخله ابتدائي ويجيب عايز شنطة وعايز جزمة وعايز مش عارف إيه وتقعد ويطلع، وأول فلما اشتد ساعده رماني.

تخيل أول لما يبدأ يكبر يبدأ يطغى عليك وما يعبركش ويقسو عليك، إيه ده؟ يبقى أنت عايز تقول على الشخصية دي إيه؟ أنتم براحتكم كل واحد يحط بقى اللي هو إيه، فتخيل لما الإنسان يعمل كده مع ربه دي البداية، معقول؟ بصق النبي صلى الله عليه وسلم في يده وقال يقول الله عز وجل: يا ابن آدم أاما تعجزني وقد خلقتك من مثل هذا؟ إيه؟ أنسيت معك إيه؟ إيه اللي أَعْماكَ؟ عشان كده: ﴿كَلَّا إِنَّ الْإِنسَانَ لَيَطْغَىٰ﴾ [العلق: 6].

شوف الإنسان تلات مرات: خلق الإنسان من علق، يبقى الإنسان من علقات، علم الإنسان ما لم يعلم الإنسان جاهل، كان المتوقع الإنسان يطيع، كلا أن الإنسان لا يطغى، إيه ده! إيه المفارقة الرهيبة دي بين المقدمات والنتائج؟ إيه المفارقة الرهيبة دي؟ نسي أنه خلق من عدم، نسي أن ربه أكرمه، نسي حينما كان نطفة كان لا يستطيع أن يدفع عن نفسه أي شيء، حتى الهواء ما يعرفش يعمل حاجة لنفسه.

فالضغط على الفطر بصفة الخالقية تخلي الفطرة اللي فيها بقايا فطرة سليمة تستجيب في البداية في القرآن بدأت بالخلق عشان كده، وأيضاً الخلق: خليك مع ربنا مش خايف من حاجة، الخلق بيديك يقين في قدرة الله، الخلق بالذات، يعني الرحيم واللطيف والرؤوف، كل دي صفات لترحك أو في لطف أو في حاجات مخلوقة ربنا بيرحمك بحاجة معينة بسبب معين، الخلق والإيجاد من عدم حاجة مش موجودة وربنا جابها، لا يستطيعوها إلا الله.

عشان كده لما سيدنا زكريا قال إن قال قد خلقتك من قبل، فكروا بالخلق، اتكلموا عن صفة الخلق، لما تعجب زكريا إزاي يجيء له ولد ومراته عاقر وبلغ من الكبر عتيا، قال: قد خلقتك من قبل ولم تك شيئاً، فالتذكير بصفة الخلق.

صاحب الجنتين شاف الجنات والأنهار والنخيل والعنب والأشجار، قال ما أظن، وأنت معي أسباب، الأسباب دي لا تروح أبدا، قال: أفرت بالذي خلقك؟ أنت نسيت أصلك؟ أنت جاي منين؟ الحاجات دي جت منين؟ أين خالقها، أين مبتدأ خلقها ونشأتها؟ فين صفة الخلق تلاقيها كتير خلق.

وبعدين شوف الجمال: اقرأ باسم ربك الذي خلق، خلق هنا قالوا المفعول محذوف يعني خلق كل حاجة، وبعدين خلق الإنسان، طب ما كان ربنا قال الذي خلقه، الإنسان من ضمن اللي ربنا خلقه، ليه التركيز على الإنسان؟ كان فيه عناية خاصة بخلق الإنسان، وكأن اللي خد العناية الخاصة هو اللي طغى، يعني كان المتوقع ربنا خلق كل حاجة، وخلق الإنسان بعناية خاصة، وسجد لما خلقت بيدي، حاجة خاصة نفخ فيه من روحه سبحانه وتعالى، العناية الخاصة دي كانت تستوجب مزيد شكر، إنما الكون كله يقول: أتينا طائعين، والانسان اللي خد العناية الخاصة يطغى، إيه المفارقات العجيبة دي؟

خلق الإنسان كمال العناية، من علق أصله، وخلق الإنسان يعني كل الناس، فلما تجيء تبص على الوزير والرئيس وفلان والطبيب والمهندس، كلهم عُلَق، ودي مقدمة عشان لما تجيء تتعامل مع أمثال أبي جهل اللي هيجيء دلوقتي، أبو جهل اللي منع، مش هيجيء دلوقتي، يعني هيجيء السلام، أنا قصدي هيجيء يعني هيجيء معنا في الآيات، تتعامل مع أمثاله تعرف أنه أصله علقة، فتعامله على قده، تدي له حجمه الحقيقي، واحنا قلنا القرآن بيخليك تبصر الأشياء على حقيقتها، فتدي لفلان حجمه كده.

سیدنا موسى بيقول لهم بيقولوا لبني إسرائيل أنتم خايفين من الهليمان ده يعني فرعون واللي معه؟ عسى ربكم أن يهلك عدوكم ويستخلفكم في الأرض، يجيبكم بس يعني، هو يشيله ويجيبكم مكانه، ده عند بني إسرائيل إزاي يعني؟ تقعد مش متخيل أن بأسباب بسيطة جداً أن ممكن الموضوع عادي، يهلك عدوكم ويستخلفكم في الأرض.

قالوا من أشد منا قوة؟ ربنا أهلكهم بإيه؟ بهوا، شوية هوا، ما عرفش يقف قدام شوية هوا، فالإنسان بيطغى، يا اخي أنا قرأت أثر مضحك في في الطبري الإسرائيليات أن سيدنا موسى ومعه بني إسرائيل وبيجروا فضرب البحر ففلق البحر، فدخل موسى وبني إسرائيل، أنا متوقع أن فرعون أول لما يشوف المشهد يقول الله، ده إيه ده! ويقول بقى آمنت.

فرعون لما شاف المشهد ده التفت إلى جنوده وقال: ألا ترون البحر فلق فرقاً مني؟ شايفين؟ طب ما هو اتفرق لموسى قبلك يعني مش فاهم يعني إيه؟ كأنه من شدة خوفه من بدري يعني من مسيرة شهر، إيه ده! إيه الغباء ده؟ العجيبة أن اللي معه صدقوه ومشيوا، يعني أنا مش متخيل، يعني أنا مش عايز اطلع بس برة، يعني الواحد لما بيقرأ في سورة الزخرف فرعون بيقول إيه، الآيات: ﴿أَلَيْسَ لِي مُلْكُ مِصْرَ وَهَٰذِهِ الْأَنْهَارُ تَجْرِي مِن تَحْتِي﴾ [الزخرف: 51]، بيقول: لولا القي، ده هو دلوقتي لما بيقول إن موسى نبي، فبيقول لهم بقى شوف بقى الخطاب العقلي اللي بيقنعهم فرعون بيقول لهم إيه؟ فلولا ألقي عليه أسورة من ذهب أو جاء معه الملائكة مقترنين. ده هو بيعمل مقارنة، بيقول لهم: أم أنا خير من هذا الذي هو مهين ولا يكاد يبين؟ فلولا فألقي عليه أسورة من ذهب أو جاء معه الملائكة مقترنين.

أنا حاسس إن ده خطاب أطفال. بيضحك على شوية عيال. بيقول لهم آه لو كان معه دهب أو معه يعني العجيب اللي نلاقيه بعدها إيه؟ إن الناس بتسقف، فاستخف قومه فأطاعه.

ده صدقوه، إيه ده! صدقوا الكلام ده! يعني أنا مش متخيل! صدقوا الكلام إن أُسورة دهب تنزل أو صدقوا الكلام ده! فاستخاف قومه فاستخفوهم، وهم كانوا خفاف العقول فأطاعوه إنهم كانوا قوماً فاسقين.

فالشاهد إن القرآن بيبصرك تعرف حقيقة عاد وفرعون وأي أمثال أبي جهل، حقيقتهم علق. وهتعرف قدر من تعبد وإلى من تسجد ومن أنزل عليك القرآن؛ إنه الذي خلق، قدرة مطلقة يفعل ما يشاء في الكون.

مشكلة سيدي إراهيم شايف النار ومش خايف؛ اللي خلقها يطفئها. الموضوع عنده هو خلاص رأى الأشياء على حقيقتها، فخلق الإنسان من علق، اقرأ وربك الأكرم. يبقى أنت كنت ممتنع عن القراءة عشان حاجتين: عشان عجزك، عشان أنت عاجز، وعشان أنت جاهل، فربنا بيقول لك ربنا قدير وربنا كريم فاسلك هذا الطريق. تخيل أنت ماشي في طريق ربك الذي لطالما رباك بنعمه، الذي لطالما رباك بنعمه سبحانه وتعالى؛ ربك قدير وربك كريم.

يعني لما ربنا قال لسيدنا موسى: ﴿اذْهَبْ إِلَى فِرْعَوْنَ إِنَّهُ طَغَى﴾ [طه: 24]. فسيدنا موسى طلب طلباته: ﴿رَبِّ اشْرَحْ لِي صَدْرِي * وَيَسِّرْ لِي أَمْرِي * وَاحْلُلْ عُقْدَةً مِّن لِّسَانِي * يَفْقَهُوا قَوْلِي * وَاجْعَل لِّي وَزِيرًا مِّن أَهْلِي * هَارُونَ أَخِي * أُشْدُدْ بِهِ أَزْرِي﴾ [طه: 25-31]. فلما طلب الطلبات دي فربنا بيقول له: ﴿قَدْ أُوتِيتَ سُؤْلَكَ يَا مُوسَى * وَلَقَدْ مَنَنَّا﴾ دي مش أول مرة ﴿وَلَقَدْ مَنَنَّا عَلَيْكَ مَرَّةً أُخْرَى * إِذْ أَوْحَيْنَا إِلَى أُمِّكَ مَا يُوحَى * أَنِ اقْذِفِيهِ فِي التَّابُوتِ فَاقْذِفِيهِ فِي الْيَمِّ فَلْيُلْقِهِ الْيَمُّ بِالسَّاحِلِ﴾ [طه: 36-39]. يبقى الذي لطالما رباك بنعمة.

يعني ربنا ابتدى النعم عليك وأنت ما عملتش حاجة، وأنت لسة ما عملتش أي حاجة، أفلا يتم نعمته عليك وأنت تطيعه؟ يعني ربنا لما بيقول للنبي صلى الله عليه وسلم: ﴿أَلَمْ يَجِدْكَ يَتِيمًا فَآوَى * وَوَجَدَكَ ضَالًّا فَهَدَى * وَوَجَدَكَ عَائِلًا فَأَغْنَى﴾ [الضحى: 6-8]. مش دي أنت؟ أنت لسة ما عملتش حاجة وربنا أعطاها لك، فلما تعمل هيديك طبيعي. فالذي رباك بنعمه من قبل أن تفعل شيئاً، أفلا يتم نعمته عليك وأنت تطيعه؟ اقرأ وربك الأكرم. توكل أنت بس على الله وربك كريم. ﴿الَّذِي عَلَّمَ بِالْقَلَمِ * عَلَّمَ الْإِنسَانَ مَا لَمْ يَعْلَمْ﴾ [العلق: 4-5].

بعضهم أشار أن معاملة ربنا قد تكون بأسباب وقد بغير أسباب. ﴿عَلَّمَ بِالْقَلَمِ * عَلَّمَ الْإِنسَانَ مَا لَمْ يَعْلَمْ﴾ ﴿كَلَّا إِنَّ الْإِنسَانَ لَيَطْغَى﴾ [العلق: 6] علم بدون افتقار طغيان. الآيات بتتكلم عن العلم وهو علم الإنسان؛ اللي هيتعلم العلم وهذا العلم لا يزيده سجوداً ويزيده اقتراباً، زي ما في آخر السورة السورة بيقرأ وختمت: ﴿وَاسْجُدْ وَاقْتَرِب﴾ [العلق: 19]. يبقى اللي بيقرأ بيسجد ويقترب، واللي بيتعلم يزداد؛ إنما العلم الخشية زي ما قال ابن مسعود: «إنما يخشى الله من عباده العلماء» سورة فاطر. يبقى العلم الذي لا يزيدك خشية يزيدك طغيان والعياذ بالله.

﴿عَلَّمَ الْإِنسَانَ مَا لَمْ يَعْلَمْ * كَلَّا إِنَّ الْإِنسَانَ لَيَطْغَى﴾ [العلق: 5-6]. ليه الإنسان بيطغى يا جماعة؟ ليه الإنسان يبدأ يحس؟ ليه يبدأ تشوف أفعال الإنسان أنه بيطغى في علاقته بالله؟ إيه السبب الرئيسي؟

﴿أَن رَّآهُ اسْتَغْنَى﴾ [العلق: 7] رآه الهادي؛ عائدة على مين؟ يعني لو عايزين نشيل الهاء ونحط.. ده ضمير، عايزين نشيل الهاء دي ونحط اسم مش ضمير؟ أيوه رأى الإنسان نفسه؛ يعني شاف نفسه.

بمجرد ما تبصر بس وتعتقد في قدراتك هتبدأ تطغى. تشوف مثلاً واحد مريض على السرير: يا رب يا رب يا رب. أول ما رجله بس برة المستشفى، ده هو لأ، ده هو لو كان نايم وبدأ يقعد، بيبدأ ينسى، انسى الاحتياج. أول ما يحس بالاستغناء بالصحّة أو الاستغناء بالمال يبدأ يطغى، غشاوة الأسباب اللي بتخلي الناس تطغى؛ لأن المشركين في نص البحر قالوا: يا رب! المشركين أما جه في نص البحر قالوا: يا رب! لما فقد الأسباب قال: يا رب!

فطبيعي أن أي حد بيفقد الأسباب بيقول: يا رب! إن بقى فيه ناس تدخل نص البحر وما تقولش يا رب دي! دي مصيبة تانية! ده زي لما تيجي تسأله مين اللي خلقك؟ يقول لك: ما أعرفش!

دول أنا عايز أقول دول شواذ الفطرة أصلاً، فطبيعي أن الإنسان لما يبعد عن الأسباب يفتقر. ربنا بيقول لك: لابد أن تنظر إلى الأسباب على أنها لا تساوي شيئاً إلا بالله، لازم.

ولا إيه يا عم علاء؟ مش معنى إن.. يعني مش معنى كده إن لأ، مش معنى إن شوية عضلات أنك لأ، الموضوع مش كده؛ فلازم الإنسان ما يطغاش بالأسباب. ﴿كَلَّا إِنَّ الْإِنسَانَ لَيَطْغَى﴾ السبب الرئيسي:

﴿أَن رَّآهُ اسْتَغْنَى﴾ الإنسان ده بقى تذكره بإيه؟ أو هو يرجع إزاي؟ ﴿إِنَّ إِلَى رَبِّكَ الرُّجْعَى﴾ [العلق: 8]. لازم يفتكر إن يوم هيرجع لربنا. خد بالك أن إلى ربك الرجعى ديت خطاب للإنسان الطاغية.

وخطاب للإنسان اللي هو بقى في الأول أهو إنسان فقير جاهل عاجز، بادئ يجاهد وبادئ يتقرب الشبر إلى الله، فالمجاهدة دي ربنا بيقول لك أنت هترجع لربنا وهيعطيك ثواب كل خطوة خطتها: ﴿وَلَا يُظْلَمُونَ نَقِيرًا﴾ [النساء: 124].

ولا قطميرة، ما فيش حاجة هتظلمها، فإن إلى ربك الرجعى. ربنا بيقول لك الإنسان اللي بيطغى ده افتكر أن فيه يوم هيرجع لربنا وهتتسأل. هذا الإنسان الذي طغى، فعلاج الطغيان تذكر الدار الآخرة.

﴿أَرَأَيْتَ الَّذِي يَنْهَى * عَبْدًا إِذَا صَلَّى﴾ [العلق: 9-10] من أول سورة في القرآن وربنا بيعرفك إن الطريق ده الناس مش هتسيبك تمشي فيه. ربنا من أول سورة بيعرفك أن في أعداء قاعدين لك على الطريق.

والأعداء دول مش مثلاً لما تيجي تدعو إلى الله يمنعوك، أو لما تيجي تطلب العلم هيمنعوك، أو لما تيجي تأمر بالمعروف وتنهى عن المنكر هيمنعوك، لا لا لا! ده بمجرد أن..

تصلي هيمنعوك. ﴿أَرَأَيْتَ الَّذِي يَنْهَى * عَبْدًا إِذَا﴾ إيه؟ ﴿عَبْدًا صَلَّى﴾ [العلق: 9-10] يعني بمجرد ما يبدأ يصلي هيبدأوا ينهوك عن الصلاة. فيه أعداء قاعدين لك، مستنيين لحظة دخولك المسجد يمنعوك. قال النبي صلى الله عليه وسلم: «إن الشيطان قعد لابن آدم بطرقه كلها». قاعد لك بطرقه إيه؟ كلها. مش قاعد لك في سبل الإصلاح وسبل الصلاح سايبك! لأ، فيه ناس هتنهاك حتى عن الصلاة. ﴿أَرَأَيْتَ الَّذِي يَنْهَى * عَبْدًا إِذَا صَلَّى﴾ [العلق: 9-10].

فربنا بيقول له اللي بينهى عبداً إذا صلى ده: ﴿أَرَأَيْتَ إِن كَانَ عَلَى الْهُدَى * أَوْ أَمَرَ بِالتَّقْوَى﴾ [العلق: 11-12] مش جايز اللي أنت بتنهاه ده يكون هو اللي صح؟ وشوف الخطاب؛ يعني واحد بيعادي الإسلام، وشوف الخطاب.

ربنا بيقول له إيه؟ عارف زي سورة سبأ: ﴿وَإِنَّا أَوْ إِيَّاكُمْ لَعَلَى هُدًى أَوْ فِي ضَلَالٍ مُّبِينٍ﴾ [سبأ: 24]. ربنا بيقول لهم: أنت تقول لهم واحد فينا صح وواحد فينا غلط، لأن ما ينفعش حاجة اسمها اتنين صح.

أنت اللي صح يا عم إبراهيم. الحمد لله وحده، والصلاة والسلام على من لا نبي بعده، محمد صلى الله عليه وسلم. مرة تانية السورة دي بتديك البداية الصح، واللي هيبدأ من غير سورة العلق هيضل.

البداية قد إيه الإنسان فقير، وقد إيه الإنسان عاجز، وقد إيه الإنسان جاهل. البداية قد إيه ربنا قدير، قد إيه ربنا كريم، قد إيه ربنا حليم على هذا الإنسان الذي يطغى. البداية أن الأسباب.

يا جماعة دي البداية، يعني يعني ست آلاف آية وشوية، ست آلاف مئتين آية وشوية ومائة وأربعة عشر سورة، دي البداية؛ بداية هذا الطريق الطويل. يعني دي أسس، يعني دي العمود اللي بيغيب منها انهيار.

فيه أركان وفيه واجبات وفيه سنن؛ دي أركان، دي عواميد ما ينفعش تغيب عن قلوب الناس وعن أفعالها. البداية أن في ناس مش هتسيبك، البداية أن الناس دي هتنهاك حتى عن الصلاة، والبداية أهمية الصلاة.

اللي بدايته ما فيهاش صلاة قوية سواء في الفروض أو في قيام الليل، دي بداية ضعيفة، بداية لا تكمل. ﴿عَبْدًا إِذَا صَلَّى﴾ وربنا أمر النبي صلى الله عليه وسلم في الآخر بالسجود.

﴿لَا تُطِعْهُ وَاسْجُدْ وَاقْتَرِب﴾ [العلق: 19] كأنها: واسجد، أي واستمر في السجود؛ كأن النبي صلى الله عليه وسلم يديم السجود. ودي البداية كبداية من غير صلاة بداية لا تثمر، يعني إنسان لا يقرأ القرآن في القيام يعني لا يقوم الليل بالقرآن، دي بداية ضعيفة هيكمل ازاي؟ ما فيش بداية أصلاً، لا مشرقة ولا محرقة ولا أي بداية. ﴿أَرَأَيْتَ الَّذِي يَنْهَى * عَبْدًا إِذَا صَلَّى﴾ [العلق: 9-10] نرجع بقى للخطاب؛ ربنا بيقول له.

بيقول اللي بينهاه يعني: ﴿أَرَأَيْتَ إِن كَانَ عَلَى الْهُدَى﴾ [العلق: 11] اللي أنت ما تقلوش؟ بل هو على الهدى وهو حتماً على الهدى صلى الله عليه وسلم. شوف الخطاب: طب فكر، طب مش جايز هو صح؟

زي ما مؤمن آل فرعون قال لهم: طب في احتمالين، إياكم وصادقاً يصيبكم بعض الذي يعدكم؛ يعني هو إياك كاذباً فعليه كذبه. بس فيه احتمال، والاحتمال التاني عواقبه مش سهلة.

في احتمال، فربنا بيقول له: ﴿أَرَأَيْتَ إِن كَانَ عَلَى الْهُدَى * أَوْ أَمَرَ بِالتَّقْوَى﴾ [العلق: 11-12] وفيه قول مش معناه إن هو كنقاش عقلي! لأ، ده معناه: أرأيت إن كان على الهدى أفتنهاه لأجل أن يصلي ولأجل أن يأمر بالتقوى؟ لأجل هذا تنهاه؟ أي عقل تحتويه؟ إيه اللي يعني؟ وأي تفكير تفكر؟ يعني عشان بيصلي تقوم تنهاه؟ ﴿أخْرِجُوا آلَ لُوطٍ مِّن قَرْيَتِكُمْ﴾ [النمل: 56] ليه؟ ﴿إِنَّهُمْ أُناسٌ يَتَطَهَّرُونَ﴾ [النمل: 56] لأجل أنهم يتطهرون؟ فلاجل أنهم يصلون يعني فلان متشدد ليه؟ أصله بيتكلم عن الدار الآخرة. بجد والله؟

فلان متشدد ليه؟ أصله بيقول حرام وحلال، أمال نخليه الحلال والحلال مش.. فلان متشدد ليه؟ أصل بيقول كلمة كافر. طب ما القرآن مليان كلمة كافر! أمال أمال هو يعني أمال كل واحد يعني ولا إيه؟

فتجد يعني أنت بتنهاه ليه؟ عشان بيصلي؟ المشركين في مكة فزعوا فزعوا من صلاة أبي بكر في ساحة الدار، كان يصلي صوته يبلغ الناس، كان رجل أسيف، فكان النساء والصبيان بيجوا عشان يسمعوا صلاة أبي بكر، فخافوا من صلاته.

شوف خافوا يعني إيه؟ الناس مش خايفة من دعوتنا، احنا مش هم كان زمان صلاتهم تغير مجرد صلاته. عشان كده لما قوم شعيب حسوا أن هو اتغير، فَقعدوا يدوروا إيه الحاجة اللي غيرتهم؟ لقوها الصلاة. فقالوا له: ﴿أَصَلَاتُكَ تَأْمُرُكَ﴾ [هود: 87] كأن ما فيش حاجة اتغيرت فيه غير إيه؟ غير الصلاة، والصلاة دي المحرك الأساسي اللي بيأمره وبينهاه. لقوا إن الصلاة بتغير فيه فعلاً الصلاة تأمر بالمعروف وتنهاك عن المنكر، فقالوا: ﴿أَصَلَاتُكَ تَأْمُرُكَ أَن نَّتْرُكَ مَا يَعْبُدُ آبَاؤُنَا أَوْ أَن نَّفْعَلَ فِي أَمْوَالِنَا مَا نَشَاءُ إِنَّكَ لَأَنتَ الْحَلِيمُ الرَّشِيدُ﴾ [هود: 87] أما قيل أي: لَكَنتَ أنت الحليم الرشيد، وايه اللي غيرك أو استهزاءً انك أنت الحليم بشر.

فالشاهد كانوا ينهونهم عن الصلاة، كانت الصلاة تغير ليس فقط في أنفسهم ولكن في غيرهم. تخيل لما مشهد الصلاة يغير الناس! ﴿أَرَأَيْتَ الَّذِي يَنْهَى * عَبْدًا إِذَا صَلَّى * أَرَأَيْتَ إِن كَانَ عَلَى الْهُدَى * أَوْ أَمَرَ بِالتَّقْوَى﴾ [العلق: 9-12].

﴿أَرَأَيْتَ إِن كَذَّبَ وَتَوَلَّى﴾ [العلق: 13] طب اللي بينها ده بقى طب هو بيعمل ايه؟ طب انت هو انت شايف أنه وحش عشان بيصلي؟ طيب هو وحش. أنت بقى بتعمل إيه؟ عارف لما تيجي مثلاً مذيعة.

قمة التبرج، وبعدين بتستضيف واحد إسلامي، وهي الحلقة كلها أن هو وحش، وأن هو متشدد وجاهل ومخرف ومخرب وهيدمر الاقتصاد. طيب ماشي هو وحش، أنا وحش، إيه الطرح بقى اللي عندك؟

يعني إيه البديل؟ أنا دلوقتي مش أنا أنا وحش. يعني زي سيدنا شعيب بيقول لهم: ﴿وَلَا يَجْرِمَنَّكُمْ شِقَاقِي أَن يُصِيبَكُم مِّثْلُ مَا أَصَابَ قَوْمَ نُوحٍ﴾ [هود: 89] يعني مش معنى انك تكرهه أنك تخش النار. يعني دلوقتي أنا وحش، تقوم ترمي نفسك في جهنم يا سيدي اعبد الله أنت طبق أنت الإسلام! فانت دلوقتي أنت بتكرهني، طب اطرح أنت بقى.. الطرح أنت بتقول مش هو ده الإسلام خلاص، قل بأمال الإسلام أن احنا نقلع يعني ولا إيه مش فاهم؟ يعني إيه علاقة طب وأنا وحش؟ إيه الطرح البديل؟

فربنا بيقول له: ﴿أَرَأَيْتَ إِن كَذَّبَ وَتَوَلَّى﴾ [العلق: 13] طب هو عمل إيه غير أن هو كذب وتولى؟ يعني هو ده البديل؟ يعني أنت بتنهاه وشايف أن هو ده البديل؟ ﴿أَلَمْ يَعْلَم بِأَنَّ اللَّهَ يَرَى﴾ [العلق: 14].

يبقى السورة دي حتى الآن فيها نوعين من التهديد؛ الأول أن إلى ربك الرجعى، ده يوم القيامة، وطوال هذه الفترة: ﴿أَلَمْ يَعْلَم بِأَنَّ اللَّهَ يَرَى﴾. الشعار ده يا جماعة يعني ده مش بس حتى نخاطب به الأعداء، أنت.

لو شعارك قبل أي فعل تفعله: ألم يعلم بأن الله يرى؟ يعني الشعور ده يدفع اللي بيخشى، اللي بيعادي الإسلام أنه يخشى الله؛ خوفه من ربنا أن ربنا شايفك.

ربنا يحاسبك على كل كلمة تفعلها، وزاد للإنسان في الطريق إلى الله عشان يخلص كلامه. يخلص كلامه وأفعاله إلى الله عز وجل. تخيل شعارك في حياتك: ألم يعلم بأن الله يرى؟

أنت مش عارف أن ربنا شايفك؟ ﴿كَلَّا لَئِن لَّمْ يَنتَهِ لَنَسْفَعًا بِالنَّاصِيَةِ﴾ [العلق: 15] إن الله يدافع عن الذين آمنوا. أبو جهل قال: أنا أكثر هذا النادي وادياً، ما حدش يعرف يعمل لي حاجة.

النبي لما نهره وأغلظ له القول عند الكعبة فقال: ألم تعلم بأني أكثر هذا الوادي نادياً؟ لئن رأيت محمداً.. لئن رأيت محمداً يعفر وجهه بين ظهوركم لأطأنا عنقه! إن الله يدافع عن الذين آمنوا.

﴿كَلَّا لَئِن لَّمْ يَنتَهِ لَنَسْفَعًا بِالنَّاصِيَةِ﴾ دفع بقوة ويؤخذ بناصيته ويلقى في جهنم والعياذ بالله. لنستعن بالناصية: ﴿نَاصِيَةٍ كَاذِبَةٍ خَاطِئَةٍ * فَلْيَدْعُ نَادِيَهُ * سَنَدْعُ الزَّبَانِيَةَ﴾ [العلق: 16-18]. تنزل في الخطاب كأنه إذا كان عندك من الناس فإن هناك زبانية ينتظرون.

يدفعونك إلى جهنم دفعاً والعياذ بالله وأنت لا تستطيع أن تدفع عن نفسك. ولا النادي الذي معك يستطيع أن يدفع سندعو الزبانية. الزبانية أصلاً من الزبنة أي من الدفع بقوة.

سندعو الزبانية كلا لا تطعه واسجد واقترب. يبقى ربنا في ختام السورة خاطب خطابين. خطاب للذي نهى وخطاب للذي نهي، خطاب لأبي جهل وخطاب للنبي صلى الله عليه وسلم. خطاب لمن سار على درب أبي جهل وخطاب لمن سار على درب النبي صلى الله عليه وسلم.

خطاب من سار على درب أبي جهل: اعلم أن الله يراك، وأن الله سيعاقبك، ولئن استمريت على ما أنت عليه سوف ينزل بك عقاب الله مهما كان معك من قوة ومن أسباب. قضية الأسباب في السورة واضحة جداً الاستغناء بالأسباب، وأن استغنى بما معه من أقوام.

أبو جهل خطاب لمن سار على درب النبي صلى الله عليه وسلم، لأن النبي صلى الله عليه وسلم ولمن سار على دربه: لا تطعه واسجد.

الجمال في ختام السورة أن أبا جهل قال للنبي صلى الله عليه وسلم ما تسجدش، ما قالوش حتى ما تصليش، قال: لأن رأيتم محمداً إيه يعفر وجهه يعني سجود، فجه الأمر بنفس الشيء اللي نهاك عنه أنك تعمله.

ده الأول يعني هو مثلاً ما تتكلمش في الولاء والبراء مثلاً، تقوم أنت تتكلم في إيه؟ في مش في العقيدة، في الولاء والبراء. يعني نركز؛ لأن هو لما بينهاك عن شيء هو عارف خطورته، تقوم أنت تعمل ده.

يبقى هو لما بينهاك لما يقول لك مثلاً ما تتكلمش مثلاً عن أحكام الإسلام في التعامل مثلاً مع غير المسلمين، تقوم أنت تتكلم في أحكام الإسلام طالما غير مسلم... فهو هو لما بينهاك عن شيء هو مش بينهاك اعتباطاً، ده هو عارف خطورة اللي بينهاك عنه، وعارف تأثير اللي نهاك عنه، تقوم أنت تعرف إيه؟ يعني أحياناً ما تبقاش واخد بالك من قيمة حاجة إلا لما يقول لك ما تعملهاش، أنت مش واخد بالك من قيمتها أصلاً، فهو بيفيدنا.

يعني هو لما يقول لك ما بنعملش حاجة أنت بتستفاد، بتعرف قيمة الحاجة دي بقى تعرف قيمتها، ولما ربنا قال له اسجد عرفه قيمتها، قال له: واسجد واقترب.

يبقى أحياناً أنت ما تبقاش عارف قيمة اللي أعداء الله بينهوك عنه؛ لأن هو جرب تأثير ده في نفسه وفي غيره، هو عرف يعني لما يقولوا لا تسمعوا لهذا القرآن والغوا فيه، هم عارفين تأثير القرآن، لما يقولوا له ائت بقرآن غير هذا، هم عارفين تأثير هذا القرآن وجربه في نفسه وفي غيره، هو جربه فأنت عارف قيمة ده، فده يجعلك تزداد تمسكاً بما نهاك عنه.

دي النقطة الأولى، النقطة التانية: اللي هو مثلاً كلا لا تطعه وجاهده وحاربه خلاص ولا تنشغل به، وكأن وبعدين مش بس واسجد، ده بسجد وايه واقترب، ده ده معاني إيمانية عالية. يعني كأن انشغالك بعلاقتك بالله وبالوصول إلى الله وبالقرب من الله شغلتك عن أي شيء آخر حتى لو كان تهديد بالقتل، أنت متخيل قصدي إيه؟

يعني شعورك أنك نفسك أنك توصل لربنا، وأخيراً لقيت الطاعة اللي هتوصلك إلى ربنا، أول لما تلاقي طاعة هتوصلك لربنا تقوم ماسك فيها، حتى لو كانت هذه الطاعة تحاط بمخاطر منها القتل، إحساسك وانشغالك بنفسك أنك توصل لربنا شغلك عن أي شيء آخر. يعني مثلاً قطراً مثلاً هيوديك إسكندرية وأنت لازم تروح إسكندرية، فيقول لك الطريق ده القطر ده عليه قطاع طرق وناس هتطلع، أنت عملت سؤال: يعني الطريق ده يوصلني؟ يقول لك بس ده فيه ناس يعني القطر ده بيوصل، بس خد بالك أنت لو ركبت في ناس هم يقولوا لك في ناس بتموت، وأنت تقول لهم إيه؟ يعني الطريق ده بيوصل؟ يعني الطريق ده بيقرب؟ يقول لك بس الطريق ده فيه مخاطر، تقول لهم الطريق ده بيقرب.

أنت انشغالك بقربك وبتحصيل أسباب القرب من الله شغلتك عن أي شيء آخر حتى لو كان تهديد بالقتل، أنت مشغول واسجد واقترب، ربنا دلك على وسيلة القرب منه سبحانه وتعالى، أفَتنشغل عنها لامرأة علقة بعد أن دلني الله عز وجل على أمر يقربني منه سبحانه وتعالى؟ أنشغل عن هذا الأمر وعن قربي من ربي الذي خلقني وأكرمني زي ما في أول السورة، أنشغل عنه لأمر شخص كائناً من كان.

والجمال في صورة زي ما كان الدكتور حازم جزاه الله خيراً كان بيعلمنا يعني يقول لك الجمال في شكل السجود بالذات أن السجود ده أنت ساجد دي الحالة الوحيدة اللي أنت ما انتاش شايف فيها اللي وراك، أو شايف اللي حواليك. يعني وأنت صلي وأنت واقف لو جه واحد يضربك ممكن تتحرك بسرعة، وأنت واقع ممكن تتحرك، وأنت جالس وشايف وممكن تتحرك، إنما وأنت ساجد ده أنت قمة الاستغراق في الصلاة، خلاص أنت مش شايف يعني هو هتيجي تموتني وأنا ربنا بيقول لي استمر على السجود.

وكذلك فعل النبي صلى الله عليه وسلم وثبت النبي صلى الله عليه وسلم ساجداً في حديث البخاري يضع عليه سلا الجزور، وثبت النبي صلى الله عليه وسلم ساجداً.

من جمال أيضاً الأمر في كلا لا تطعه واسجد واقترب أن السورة ما بداتش بلا تطعه واسجد واقترب لأ، وده الكلام عن تهيييج المعاني الإيمانية بداخلك، بتديك الطاقة أنك تفعل هذه الأفعال. يعني الكلام اقرأ تتعلم وتقرأ القرآن وتفهم وتقرأ عن صفات الله وتعرف قد إيه ربنا قدير، قد إيه ربنا كريم، وتعرف قد إيه الإنسان علقة وقد الإنسان جاهل وقد إيه الإنسان عاجز، بعد كل هذه المقدمات لما ربنا يقول لك لا تطعه واسجد واقترب تستطيع أن تطبق هذا الأمر بسلاسة.

زي ما أمنا عائشة قالت: أول ما نزل من القرآن المفصل فيه ذكر الجنة والنار، ولو كان أول ما نزل لا تزنوا لقلنا لا، لا تشربوا الخمر إلا قلنا نشرب، فالبداية قبل لا تطعه أنك لازم تعيش في معاني القرآن عشان تطبق هذه الأفعال. الأفعال دي مش زرار بتعمله جواك اه إذا كذا إذا لأ، الموضوع مش كده، الموضوع لابد أنك تتعرض لمعاني القرآن وأنك تعامل ربنا سبحانه وتعالى وتنبأ تصلي عبداً إذا صلى وتبدأ تقف في وجه الأعداء شبراً بشبر وذراعاً بذراع، تبدأ واحدة بواحدة، فهذه المجاهدة وهذه المعاني بتخلي جواك القلب قابل لكلمة لا تطيعة واسجد واقترب.

فلما تنزل لا تطعه واسجد واقترب تقوم أنت تعمل إيه على طول؟ عشان كده آية السجود، تقوم ساجد مباشرة، خلاص أنت الآيات اللي قبلها كأنها سَفْلَتَت قلبك لقبول هذا الأمر، فلما يجي يقول لك لا تطعه واسجد واقترب ما عادش جواك أسئلة، ما عادش طب إزاي؟ طب ما ممكن يضربني؟ طب ما ممكن طب ما ده ممكن أن أنا أموت؟ طب ما أقعش الأسئلة، طب أصل المصالح والمفاسد، ما عادش الأسئلة دي جواك خلاص.

الآيات اللي في السورة خلاص ما هي وطأت أشد وطأة، وطأت داست على كل الأفكار السيئة والموسوسة في قلبك نسفاً، تنزل هذه الآية تجد قلباً يستقبلها، فتنزل بعد هذه السورة لا تطعه واسجد واقترب تقوم تسجد وتقترب فعلاً وتزداد قرباً من الله عز وجل بالسجود بعد هذه المقدمات. ودي خطورة أن الإنسان على طول يبقى منشغل بمعاني القرآن، فيبقى قلبه سريع الاستجابة.

الإنسان المنشغل على طول بمعاني القرآن وبيحاول يجاهد نفسه على تطبيقها ويحاول يتخلق بأخلاق القرآن كما كان النبي صلى الله عليه وسلم خُلقه القرآن، اللي بيحاول يفعل ذلك تجد قلبه وعقله وجوارحه سلس في الاستجابة لأمر الله عز وجل؛ لأنه قلب ممهد ما فيهوش مطبات، مش مليان مطبات لأ، قلب سهل لين في التعامل مع الله عز وجل، سمح في قبول الأوامر والنواهي.

فدي كانت يعني وقفات سريعة مع سورة العلق، أسأل الله عز وجل أن ينفعنا بها، وأن نسأله سبحانه وتعالى أن يمن علينا بفهمه من كتابه سبحانه وتعالى وبالعمل بما فيه وألا يحرمنا من تدبر كتابه سبحانه وتعالى ومن العمل بما فيه.

فزي ما قلنا ختام سورة العلق دي البداية الصحيحة، النظرة الصحيحة، العمل الصحيح، تبدأ معرفة قدر الإنسان والربوبية والخلق وقدرة الله المعجزة، قد إيه الأسباب يحجب الإنسان عن صفات ربنا سبحانه وتعالى، هذا الطريق فيمن سيمنعك حتى عن الصلاة مش بس الدعوة، هذا الطريق لابد فيه من جهاد، هذا الطريق لابد فيه من ثبات، هذا الطريق لابد فيه من سجود واقتراب، هذا الطريق لابد أن تعرض فيه وألا تطيع من يحاول أن يبعدك عن الله عز وجل ولو سجدة تبتعد عنه ولا تطعه.

نسأل الله عز وجل أن يثبتنا وأن يستعملنا في طاعته، أقول قولي هذا واستغفر الله لي ولكم، سبحانك اللهم وبحمدك، أشهد أن لا إله إلا أنت أستغفرك وأتوب إليك.

إن شاء الله الأحد القادم كان المفروض تبقى سورة المدثر، بس إن شاء الله إن ربنا يسر احتمال ربنا يمن علينا ونعفر جباهنا عند الكعبة زي ما إحنا بقى في سورة اقرأ، ربنا يمن علينا بعمرة.

أنا لسه التأشيرة ما جتش، فإن شاء الله الجمعة القادمة الدكتور حازم يقول لكم بقى أنا إيه إذا كان هسافر أو مش هسافر وإن شاء الله يقول لكم هيسافر، يعني إن شاء الله بيقول لكم إن شاء الله يقول لكم الجمعة الجاية ما فيش درس، إن شاء الله الجمعة الجاية يقول لكم الأحد ما فيش درس.

خلاص بإذن الله عز وجل ونكمل بعد كده بإذن الله عز وجل المرة القادمة سورة المدثر، أقول قولي هذا واستغفر الله لي ولكم، جزاكم الله خيراً.