إن فرعون في سورة القصص يمثل السلطة والرئاسة والملك، وقارون يمثل المال. والعنصرين دول في أي مجتمع من أخطر العناصر اللي بتؤثر في المجتمع سلبا وإيجابا، علشان كده قالوا الناس على دين ملوكهم، يعني إذا صلح الملك صلحت الرعية وإذا فسد الملك فسدت الرعية، ده في جانب الملك وكذلك في جانب المال. صاحب المال إذا أراد الإصلاح استطاع بماله ذلك وإذا أراد الإفساد استطاع بماله ذلك، ففتنة السلطان وفتنة المال فتنة عظيمة جدا.
فتنة عظيمة من وجهين؛ الوجه الأول هو وجه في نفس المرء اللي هو معاه السلطان أو معاه المال أنه بتصيبه بكبر، خلونا نقول لفظ آخر بنوع من العلو، يريد أن يعلو على غيره بسلطانه أو بماله، وفتنة في غيره أن هو بيكون سبب لإفساد الغير. يبقى فتنة السلطان وفتنة المال من أعظم الفتن؛ لأنها بتصيب الشخص نفسه بالعلو بالكبر، وبتؤثر على غيره بأنه بيفسد غيره. ولذلك السورة ختمت بقول الله عز وجل: ﴿تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوًّا فِي الْأَرْضِ وَلَا فَسَادًا﴾ [القصص: 83]؛ لأن فتنة السلطان وفتنة المال بتؤدي إلى العلو والفساد.
مش بس كده، تعالوا نرجع لقصة فرعون في الأول ماذا قال الله عز وجل عن فرعون؟ ﴿إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا يَسْتَضْعِفُ طَائِفَةً مِّنْهُمْ يُذَبِّحُ أَبْنَاءَهُمْ وَيَسْتَحْيِي نِسَاءَهُمْ إِنَّهُ كَانَ مِنَ الْمُفْسِدِينَ﴾ [القصص: 4]. شايفين العلو والفساد؟ طب روح لقارون في الآخر والنهارده احنا مع قصة قارون إن شاء الله. قارون في الآخر ماذا قال الله عز وجل؟ إن قارون كان من قوم موسى فبغى، بغى يعني ايه؟ علا وتكبر وتجبر، ادي العلو، وبعد شوية قومهم وهم بينصحوه بيدعوه، هيقولوا له إيه؟ ﴿وَلَا تَبْغِ الْفَسَادَ فِي الْأَرْضِ إِنَّ اللَّهَ لَا يُحِبُّ الْمُفْسِدِينَ﴾ [القصص: 77]. ولذلك كانت تلك الدار الآخرة نجعلها للذين لا يريدون علوا في الأرض ولا فسادا.
قصة قارون قصة عجيبة جدا، مش هنتكلم بقى عن قصة فرعون النهارده، الكلام عن قصة قارون وهي قصة في غاية العجب يا جماعة. قال الله عز وجل: ﴿إِنَّ قَارُونَ كَانَ مِن قَوْمِ مُوسَى فَبَغَى عَلَيْهِمْ﴾ [القصص: 76]. أول درس في قصة قارون وأعظم درس وأكبر درس عاوزين نخرج بيه من هذا المجلس؛ قارون يا جماعة كان ابن عم موسى. احنا مش هنتعرض للخلافات بقى واحنا بنتكلم عشان نتعود، لأن كل حاجة هقولها ممكن يبقى فيها قولين وثلاثة وأربعة، أنا مش هتعرض لده في الغالب؛ قارون كان ابن عم موسى، وكان من علماء بني إسرائيل، وكان يلقب بالمنور؛ لأنه كان من احسن الناس صوتا بالتوراه، وكان من جملة السبعين الذين اختارهم موسى للقاء الله عز وجل في قوله: ﴿وَوَاخْتَارَ مُوسَى قَوْمَهُ سَبْعِينَ رَجُلًا لِّمِيقَاتِنَا﴾ [الأعراف: 155].
وخلونا نقف بس مع الآية دي عشان نفهم يعني إيه من جملة السبعين؟ لما قال الله عز وجل في هذه الآية قال: واختار موسى من قومه سبعين رجلا. طيب هي النسق ده بالنسبة لكم مستغرب؟ واختار موسى قومه سبعين رجلا؟ ولا كان المتصور كان واختار موسى من قومه سبعين رجلا؟ لكن القرآن ما جاش منه، القرآن جه: واختار موسى قومه. ليه؟ ليه اللفظ القراني ليه جه على هذا النسق؟ وكان المعنى أن هؤلاء هم خلص بني إسرائيل، لدرجة أن كان ما فيش غيرهم أصلا. عارفين لما يبقى أستاذ عنده في الفصل طلاب كتير فيقول إيه؟ يقول أنا ما عنديش في الفصل غير أحمد، هو ما عندوش غير أحمد ولا عنده محمود ومحمد وعلي وعمر؟ لكن عاوز يقول إيه؟ يقول الباقي دول كأنهم مش موجودين، هو أحمد الآية اللي فيهم، فكان قارون واحد من هؤلاء السبعين.
وبعدين راح، وده أعظم درس؛ الفتنة قريبة، قريبة من مين؟ قريبة من اللي في المسجد، من اللي بيصلوا الفجر، من اللي خاتمين المصحف، من اللي بيعتمر ويحجوا، من طلاب العلم، من الدعاة؛ الفتنة قريبة مش بعيدة عن حد. فتنة الدنيا يا جماعة فتنة عظيمة جدا، ولذلك ما تقولش أنا جدع وتروح تستشرف لفتن الدنيا هتقع. وفي الحديث: «من استشرف لها تستشرفه»، اللي يقف يشب كده ويقول هبص بس هتجيبه، من استشرف لها تستشرفها. وفي الحديث الآخر: «لا تفتحن، إنك إن تفتح تلج»، أوية تروح تفتح الستر، هتفتح وتقول هبص هتقع، هتخش بعد شوية هتدمن، إنك إن تفتح تلج. هذا كله في التحذير من فتن الدنيا.
فتنة الدنيا أصابت قارون المنور، ابن عم موسى، الذي كان من جملة السبعين، الذي كان يحفظ التوراة، الذي كان من علماء بني إسرائيل، أصابته فتنة الدنيا. والعجيب يا جماعة أن احنا لو تاملنا قصص القرآن في فتنة الدنيا ومن وقع في فتنة الدنيا وسقط في فتنة الدنيا، هنجد حاجة عجيبة جدا؛ أن معظم قصص القرآن في من وقع في فتنة الدنيا تتحدث عن أناس كانوا من جملة المؤمنين. يعني ادي قارون اهو وكان على الوصف الذي ذكرنا، بلعام بن باعوراء، إيه الآيات بتاعته؟ ﴿وَآتَيْنَاهُ آيَاتِنَا فَكَسَلَ﴾ [الأعراف: 175]، فعمل إيه؟ فانسلخ منها.
بلعام بن باعوراء كان رسول موسى عليه السلام لبعض الملوك. عارفين يعني ايه يا جماعة لما نبي من أنبياء الله يثق في واحد أنه يبعثه رسول عنه هيبقى لوحده قدام ملك بيدعوه، بيدعو قوم هذا الملك إلى الله عز وجل؟ فاهمين دي معناها ايه؟ ما فيش بقى لو اتزنقت في حاجة واتساب بقى، ما فيش واتساب. فانا هبعت مين؟ هبعت واحد أنا واثق فيه مليون في المية أنه يسد، ده كان بلعام بن باعوراء، كان رسول موسى لملك يدعوه إلى الله. وصل للملك، أعطاه وخلع عليه الخلع، قال له: تعال خد دي وهدية وتعال أنت. حصل إيه؟ ضاع؛ لما قبل الدنيا، لما فتح بابا للدنيا على قلبه ضاع انتهى، ووصل بيه الحال أنه بقى ضد موسى، وواقف عاوز يدعو على موسى، إلى آخر القصة واحنا مش جايين بقى نحكي قصة ابن باعوراء.
وقع، طب اللي أكتر من كده؛ سورة الأنفال نزلت بتحكينا قصة إيه؟ غزوة بدر، مش كده؟ لو أنا اديت المايك لواحد فيكم دلوقتي وقلت له: يلا أحكينا قصة بدر، الترتيب المنطقي بتاعها، هتحكينا بقى غزوة بدر، الترتيب المنطقي في عقل أي واحد: أول حاجة أسباب الغزو، تاني حاجة وقائع الغزوة، ثالث حاجة وأخير حاجة نتائج الغزوة، ده الترتيب المنطقي مش كده؟ الأنفال أو الغنائم هتيجي تحت إاني واحد من دول؟ ها النتائج مش كده؟ فالترتيب المنطقي لما نجي نتكلم عن الأنفال أو الغنائم متوقعين هنلاقيها فين في سورة الأنفال؟ في الآخر. تبدأ سورة الأنفال: ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ فَاتَّقُوا اللَّهَ وَأَصْلِحُوا ذَاتَ بَيْنِكُمْ وَأَطِيعُوا اللَّهَ وَرَسُولَهُ إِنْ كُنْتُمْ مُؤْمِنِينَ﴾ [الأنفال: 1]. وبعدين شوية صفات للمؤمنين وبعدين نبتدي بقى أسباب الغزوة ووقائع الغزوة. ليه الترتيب ده؟
عارفين ليه الترتيب ده؟ لأن أعظم درس مستفاد في غزوة بدر ما وقع من الصحابه من التنازع والتشاحن في أمر الأنفال في أمر الغنائم. الصحابه كانوا على قلب رجل واحد طول الغزوة، خلصت الغزوة جمعوا الغنائم، اتقسموا ثلاث فرق، الثلاث فرق بيتنازعوا الغنائم. الدنيا! احنا بنتكلم عن مين يا جماعة؟ بنتكلم عن أولياء، أولياء! أول ما الدنيا لاحت، شوفوا عملت إيه فيهم. فرقة؛ الصحابة كانوا ثلاث فرق، فرقة أحاطت بالنبي صلى الله عليه وسلم لا يصيب العدو منه غرة، وفرقة طلعت ورا الكفار يطردوهم، وفرقة راحت تلم الغنائم. رجعوا الثلاث فرق، الفرقة اللي جمعت الغنائم قالوا إيه؟ نحن أولى بالغنائم، نحن جمعناها دي بتاعتنا. الفرقة الثانية: والله ما أنتم بأحق بها منا، نحن أحطنا بالنبي لا يصيب العدو منه غرة. الفرقة الثالثة: والله ما أنتم بأحق بها منا، نحن خرجنا في أثر العدو. فتنازعوا، فنزل قوله تعالى، أول آية في السورة: ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ فَاتَّقُوا اللَّهَ وَأَصْلِحُوا ذَاتَ بَيْنِكُمْ﴾ [الأنفال: 1]. الفتنة مش بعيدة عن حد، أوْعى تقول أنا جدع، أوْعى تقول كده، لا فتنة مال ولا فتنة سلطة ولا فتنة شهرة ولا فتنة نساء ولا فتنة ولا أي فتنة هتقع.
طيب، وتمر غزوة بدر وتيجي غزوة أحد، وغزوة أحد مين ينتصر؟ المسلمون ينتصروا. وبعدين النبي عليه الصلاة والسلام صلوا على النبي يقول للرماة اللي على الجبل: خمسين واحد، لو شفتونا بنتقتل ما تنزلوش، ولو شفتونا بنغنم ما تشاركوناش، أنتوا على الجبل ما حدش ينزل. كسب المسلمون وفر الكافرون، وابتدى المسلمون اللي تحت يجمعوا الغنائم، وابتدى يشوف المشهد ده الرماة اللي على الجبل، وابتدت الدنيا تجد طريقا لقلوبهم مرة ثانية، بعد الدرس اللي كان في بدر، أول ما لاحت الدنيا ابتدت تجد طريقا إلى قلوب القوم.
قبل ما نكمل يا جماعة، لما نجي نتكلم عن الصحابة رضوان الله عليهم أو نبي من أنبياء الله عز وجل، وبعدين نتكلم بشيء يوهم النقص، فلا يقع التنقص في قلوبنا، والعبرة بتمام النهايات لا بنقص البدايات، وهؤلاء رباهم الله عز وجل، يعني دي تربية من الله عز وجل واضحه دي؟ طيب، شافوا النبي عليه الصلاة والسلام والصحابه بيغنموا، حصل إيه؟ على الجبل في كام واحد؟ خمسين، كم واحد ينزل؟ أربعين من الخمسين يخالف أمر النبي صلى الله عليه وسلم. لينا وقفة هنا.
أربعين من الخمسين، عارفين يعني ايه يا جماعة؟ عارفين النسبة دي ايه؟ 80%! 80% من مسلمين مؤمنين أولياء! أولياء! 80% من أولياء لله عز وجل أول ما لاحت الدنيا سقطوا، ينزلوا الأربعين. وتنقلب الدفة، ويكسب مين؟ بس يا ريت يخلص إلى النبي صلى الله عليه وسلم، ويشد رأسه الشريف صلى الله عليه وسلم، وتكسر رباعيته صلى الله عليه وسلم، وكاد أن يقتل، بل أشيء أنه قتل صلى الله على النبي محمد، وينزل تنزل آية عجيبة في سورة آل عمران، قال الله عز وجل: ﴿مِنْكُمْ مَنْ يُرِيدُ الدُّنْيَا وَمِنْكُمْ مَنْ يُرِيدُ الْآخِرَةَ﴾ [آل عمران: 152]. اللي يتكلم عن مين؟ عن الصحابة. منكم من يريد دنيا، ابن مسعود كان بيقسم بالله ما كنت أظن أن أحدا من أصحاب رسول الله صلى الله عليه وسلم يريد الدنيا. ما كان بيقسم بالله ما كنت أظن أن ده صحابي يريد دنيا!
هنا بقى عاوزين نقف وقفة، ركزوا يا شباب في الوقفة دي مهمة جدا، ده قول ابن مسعود أنه ما كان يظن أن صحابيا يريد الدنيا. السؤال الآن؛ ذلك الصحابي الذي أخبر الله عنه أنه يريد الدنيا، تراه يعلم من نفسه أنه كان يريد الدنيا؟ غالب الظن لا. هو الجهل بتلك النفس التي بين جنبيك، أنت بتبقى مش عارف عن نفسك حاجة. لسه واحد من الشباب من كام يوم بيسالني، واحد من اللي ربنا كتب له القبول على السوشيال ميديا، ليه يعني إتباع وكده فكان بيقول لي إيه؟ بيقول لي: بص يا شيخ، أنا هكلمك بصراحة، الكلام ده كان في الأول، اللي هو إيه؟ حب بقى الشهرة وحب الأضواء والناس اللي تيجي تسلم وتتصور وبتاع، وده كان في، دلوقتي ولا فارق معايا حاجة. فقلت له: قد يكون كلامك صحيحا مش فارق معاك حاجة، وقد يكون الجهل بتلك النفس، تكون أنت اللي مش عارف نفسك. وعلامة ذلك، طب أنا عاوز اعرف هو أنا فعلا كده ولا كده؟ قلت له: علامة ذلك أن تفقد ذلك حيث ترجوه. حد فاهم حاجة؟
يعني امتى تعرف بقى أنت بتاع دنيا ولا مش بتاع دنيا، أنت بتفرق معاك الحاجات دي ولا ما بتفرقش معاك؟ لو رايح مكان كنت تظن أنك أول ما هتدخل هتلاقي الناس عارفاك، وتيجي تهش لك وتبش وتصور معاك وتسلم عليك، فدخلت لقيت ولا واحد عبرك؛ لو ساعتها ما حسيتش بحاجة في قلبك، ما حسيتش بزعل، ما حسيتش بضيق، ما حسيتش ب، اعرف أن صح أنت كلامك صح أنت مش فارقة معاك. إنما لو حسيت لا، ده لما حصل ده قلبي انقبض، وحسيت أن مش عايز أبقى في المكان ده، وحسيت أن المفروض كنت أقابل بشكل أفضل من ده؛ اعرف أن المشكلة فيك، بس ايه هو بقى؟ الجهل بتلك النفس التي بين جنبيك. طب هو الجهل بتلك النفس ده بيصيب الجهال؟ أدينا شفنا: ﴿مِنْكُمْ مَنْ يُرِيدُ الدُّنْيَا﴾ [آل عمران: 152]، صحابة!
النقطة الثانية عايزين نقف معاها مع القصة دي بسرعة عشان نرجع لقارون تاني؛ أربعين من خمسين يعني 80% من هؤلاء الأولياء خالفوا أمر النبي صلى الله عليه وسلم، لما خالفوا أمر النبي يا جماعة عشان دنيا خالفوه.
مخالفة صريحة لا تأويل فيها. قالوا: هو قال كذا ونحن سنخالف وننزل. هل الصحابة فعلوا كذا؟ أم هو التأويل المذموم؟ إذًا نحن عندنا حاجتين: الجهل بتلك النفس التي بين جنبيك، والتأويل المذموم الذي به تخالف أوامر الدين. الأمر صريح وتراه، لكن تعمل ماذا؟ لا، ما خلاص الحرب خلصت، لا ما الناس تجمع الغنائم، يلا ننزل ما فيش ما لناش لازمة هنا على الجبل، وكل التاويلات دي مخالفة صريحة لأمر النبي عليه الصلاة والسلام: «لا تبرحوا مكانكم»، ما تنزلوش. فلازم نحذر، المطبين دول بقى ونحن في طريقنا إلى الله عز وجل هترد لنا الدنيا.
لازم تبقى فاهم إنك جاهل بنفسك ما أنت عارف نفسك، وتاني حاجة لما بتخالف انتبه للفخ الشيطاني ده؛ ليه؟ لأنك مفروض من أهل الديانة، واحد مؤمن، فيعز عليك جداً ويصعب عليك إنك تخالف الأمر. فيجي الشيطان يعمل إيه؟ يقوم يؤول لك، يجمل لك، يسول لك المخالفة بنحو هذا.
نرجع بقى لقصة قارون، يبقى أول درس يا جماعة هو أكبر درس وأعظم درس: الفتنة مش بعيدة عن أحد، فبلاش تستشرف لها، فر منها، ابعد، اهرب. قارون وقع، ﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ﴾ [القصص: 76]. الدرس الثاني: إنك تبقى واعي لخطوات الشيطان، أبسط خطوة تخليك تحيد عن الطريق، حيود بعيد، لكن هيبان بعد شوية. خلينا مهندسة بقى كذا، صحصحوا معانا؛ دلوقتي لو أنا رسمت طريق خط مستقيم، الخط ده هو اللي آخره الجنة، اللي آخره ربنا سبحانه وتعالى، وجئت من نقطة في أول الخط، ورحت راسم خط تاني، الزاوية بينه وبين الخط الأولاني درجتين ثلاثة على المنقلة، خليها درجة يا سيدي، درجة واحدة على المنقلة. خلاص، بعد خطوتين أنت شايف الخطين يكاد يكونوا منطبقين، مش كده؟ كل ما تبعد عن الخط ده إيه اللي بيحصل؟ تلاقي الخط بيبعد، مع إن هي الدرجة، أنا ما عملتش حاجة تاني بس مجرد ما رحت درجة واحدة على المنقلة، كل ما أمشي على الخط ده أقل حيود في طريقنا إلى الله عز وجل بعد شوية بتلاقي نفسك بعيد جداً عن الطريق.
ليه بقول ده يا جماعة؟ إن قارون كان من قوم موسى فبغى عليهم، من الأقوال العجيبة في قوله تعالى ﴿فَبَغَىٰ عَلَيْهِمْ﴾ قول عجيب جداً وقول شعر بن حوشب: قال في قوله ﴿فَبَغَىٰ عَلَيْهِمْ﴾: أطال ثيابه عنهم شبراً ترفُّعاً. إيه رأيكم؟ طبعاً في أقوال أخرى ولعلنا نقف عليها، لكن القول ده لما قريته قول عجيب، بداية بغي قارون كان إنه عمل إيه؟ أطال ثيابه عنهم شبراً ترفُّعاً. شوفوا يا جماعة الحيود البسيط بيودي صاحبه فين؟ ﴿إِنَّ قَارُونَ كَانَ مِن قَوْمِ مُوسَىٰ * فَبَغَىٰ عَلَيْهِمْ﴾ [القصص: 76].
طبعاً الأقوال التي قيلت في بغى إنه منع حقوق الفقراء. قارون أتاه الله المال، جاءه موسى قال له: عاوزين من كل ألف دينار دينار، ومن كل ألف درهم درهم، ومن كل ألف شاة، بس يعني واحد في الألف. عمل إيه؟ عمل ثورة ضد موسى، راح جامع بني إسرائيل قال لهم إيه: موسى عاوز ياخد أموالنا، وعمل خطة عليه وجاب واحدة بغي تتهم موسى إنه فجر بها، قصة طويلة. فكان بغيه إنه منع الفقراء حقوقهم، وحق الفقير حاجة بسيطة جداً؛ واحد في الألف. وأسوأ بني آدم في الدنيا هو البخيل، صفة البخل يا جماعة تجر لكل رذيلة، ولذلك البخيل لا تجد بخيلاً محبوباً من أحد.
قلنا لكم اللي بيحضر ولا بيسمع قصة إمام البخلاء عارفينها؟ مين عارفها؟ ولا واحد! طيب، الجاحظ روى في كتاب البخلاء إن كان في واحد يلقب بإمام البخلاء، أنا أوريكم قد إيه البخيل مكروه من أقرب الناس. إمام البخلاء ده بقى كان إيه قصته؟ بيقولوا كان إذا مسك الدرهم كلمه وناجاه وفداه، هيقعد يكلم الدرهم، فدا يقول له: يعني إيه فداك أبي وأمي؟ وبعدين يفتح كيس الدراهم ويحطه يقول له إيه: اهدأ إلى جوار إخوتك، فوالله ما دخل هذا الكيس درهم وخرج، اطمئن مش هتخرج. وبعدين أهله كانوا دايماً عاوزين حاجة حلوة من السوق: يا بابا هات لنا حاجة حلوة، يا بابا هات لنا حلاوة، وهو أبداً. ففي يوم فضلوا يزنوا عليه راح مخرج درهم وقال أجيب لهم إيه؟ حلاوة، وهو ماشي في السوق لقى واحد حاوي واقف أطلق الحية على نفسه، حاوي فالحية عمالة تلف على رقبته على إيده عشان إيه؟ وحاطط طبق جنبه ياخد دراهم. فقال في نفسه: أنفق شيئاً تُبذل الأرواح فيه، يعني الراجل ده عمال يمشي الحية ولو لدغته هيموت عشان ياخد درهم، أنا ببساطة كده أروح أشتري حلاوة بالدرهم؟ أبذل شيئاً تنفق الأرواح فيه أو تُبذل الأرواح فيه؟ والله ما أرى هذا إلا واعظاً من الله ساقه إليه، عدل عن الراجل الحاوي ورجع وما اشترى حاجة.
فبعد شوية مات، ففرح أهله جداً بموته، وده بقى الشاهد، خلاص هيورثوها. جم هيبتدوا بقى ينفقوا من المال، كان له أخ بكر بن بكر غايب رجع عرف إن أبوه مات، رجع وراح حاطط إيده على كل الفلوس، وقالوا إيه: يعني إيه مش هيطلع زي أبونا، يعني هيبقى هيدينا أي حاجة؟ فقال لهم: أين إدام أبي؟ إنما يعرف الرجل من إِدامه. الإدام اللي هو الغموس، يعني أنت بتاكل أي حاجة بالعيش ده اسمه إدام، قال لهم: أين إدام أبي؟ إنما يعرف الرجل من إِدامه. فجابوا له حتة جبنة فيها مثل الأخاديد، خطوط كده حتة الجبنة، فقال لهم إيه الأخاديد دي؟ قالوا له أصل هو لما كان يجي ياكل الجبنة ما يقطعش كده، يمر باللقمة على الجبنة عشان ما تخلصش، فقال: أعوذ بالله من التبذير! فطبعاً سقط في أيديهم، فقالوا: أنت ماذا تصنع؟ قال: أضع الجبن بعيداً وأشير لها باللقمة! فرفشته خلاص.
نرجع بقى لقارون تاني، فالبخيل، صفة البخل من أشد الصفات المذمومة في الإنسان. ﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ وَآتَيْنَاهُ مِنَ الْكُنُوزِ﴾ [القصص: 76]. هنا يا جماعة في تقديم وتأخير في الآية، إن قارون كان من قوم موسى، وآتيناه من الكنوز كذا وكذا، فبغى عليه، يبقى إيه سبب البغي؟ آتيناه. ليه؟ أول ما تحس شعور العلو، شعور الاستغناء، تلاقي نفسك تعمل إيه؟ تطغى على طول. ماذا قال الله عز وجل؟ ﴿كَلَّا إِنَّ الْإِنسَانَ لَيَطْغَىٰ * أَن رَّآهُ اسْتَغْنَىٰ﴾ [العلق: 6-7]. أول ما يحس إنه استغنى يبتدي يطغى. ولذلك يا شباب، من فوائد الابتلاءات في الدنيا إن ربنا بيكسر الحتة دي جواك، ولازم تنتبه لهذه المعاني الشرعية. ويا جماعة اللي دنيته ماشية كده، ما يظن إنه كريم على ربنا، ولا يعني مش دائماً اللي كده برضه يبقى فاسق، لا، مش دائماً بس دي مش علامة حاجة، عشان نكون واضحين، دي مش علامة حاجة.
بل قارون استدل بده: أنا حياتي ماشية تمام، يبقى أنا عند ربنا حاجة كبيرة جداً، ﴿قَالَ إِنَّمَا أُوتِيتُهُ عَلَىٰ عِلْمٍ عِندِي﴾ [القصص: 78]. في أحد الأقوال إن عشان عندي علم كتير بالتوراة فأنا كريم على ربنا فأعطاني الفلوس، وده استدلال فاسد. نفس الاستدلال ده اللي عمله مين المصحصحين؟ صاحب الجنتين، مش كده ولا إيه؟ ﴿وَلَئِن رُّدِدتُّ إِلَىٰ رَبِّي لَأَجِدَنَّ خَيْرًا مِّنْهَا مُنقَلَبًا﴾ [الكهف: 36]. نفس الاستدلال اهو. الاستدلال ده سبحان الله ربنا أسقطه في القرآن، قال إيه: ﴿أَيَحْسَبُونَ أَنَّمَا نُمِدُّهُم بِهِ مِن مَّالٍ وَبَنِينَ * نُسَارِعُ لَهُمْ فِي الْخَيْرَاتِ ۚ بَل لَّا يَشْعُرُونَ﴾ [المؤمنون: 55-56]. في لفظ أوضح من ده: إن الله يعطي الدنيا من أحب ومن لا يحب. فدي مش علامة حاجة.
﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ﴾ [القصص: 76]. وقصة النمرود مع إبراهيم عليه السلام، إيه اللي حصل؟ إيه اللي قبل إيه؟ ﴿أَن آتَاهُ اللَّهُ الْمُلْكَ﴾ [البقرة: 258]، راح عمل إيه؟ حاج إبراهيم في ربه. ﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ﴾ [القصص: 76]. باختصار كنوز عظيمة جداً، المفاتح جمع مفتح، كان في قول بعض الإسرائيليات إن كان يشيلها 60 بغل، المفاتيح مش الكنوز، يشيلها 60 بغل. وبتوع اللغة بقى ﴿لَتَنُوءُ بِالْعُصْبَةِ أُولِي الْقُوَّةِ﴾، في هنا قلب، حد يعرف القلب؟ طب الرئة؟ حد يعرف الرئة؟ إيه القلب في اللغة؟ دلوقتي لما تقول: "الآية تخنت والخاتم ما بيدخلش في صباعي"، الجملة دي صح؟ مش بنقول كده؟ هو إيه اللي بيخش في إيه؟ هو الخاتم بيخش في الصباع ولا الصباع اللي بيخش في الخاتم؟ الصباع اللي بيخش في الخاتم مش كده، لكن أنت تلاقي اللغة الدارجة إيه؟ الخاتم بيدخل في الصباع، الخاتم ما دخلش في الصباع ده، يسموها قلب، ﴿لَتَنُوءُ بِالْعُصْبَةِ أُولِي الْقُوَّةِ﴾، لا هي العصبة هي اللي بتنوء بالمفاتيح، مش مهم يعني اللي في اللغة ياخذها كده على جنب.
﴿إِذْ قَالَ لَهُ قَوْمُهُ لَا تَفْرَحْ ۖ إِنَّ اللَّهَ لَا يُحِبُّ الْفَرِحِينَ﴾ [القصص: 76]. ركزوا بقى يا شباب هنا، ركزوا، فائدة كبيرة جداً. قصة قارون لم تذكر في القرآن إلا في هذا الموطن العجيب، إن موسى لا ذكر له في قصة قارون كله عجيب، موسى لم يذكر إلا تبعاً؛ اللي هو ﴿إِنَّ قَارُونَ كَانَ مِن قَوْمِ مُوسَىٰ﴾ وانتهى ذكر موسى، ملوش أي ذكر بعد كذا. آمال مين اللي بيناقش ومين اللي بيدعو ومين اللي بينكر؟ القوم.
قوم فرعون هينكر على قارون؟ ﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ * إِذْ قَالَ لَهُ قَوْمُهُ لَا تَفْرَحْ﴾ [القصص: 76]. الحوار هنا داير بين قارون وبين قوم قارون، وواضح جداً قوم قارون دول اللي هم أتباع مين؟ موسى عليه السلام. كان دي ثمرة العالم الرباني، أو الداعية إلى الله. لازم يا جماعة إخواننا الدعاة أو طلاب العلم أو اللي لهم بذل في الدعوة في العلم في أي حاجة، يبقى له خطة كده؛ أنا بعد 10 سنين، 20 سنة من النهاردة لازم يبقى في جيل طالع بعدي يشيل مسؤولية هذا الدين. فموسى عليه السلام ربى ناس هي اللي وقفت واتكلمت. وبعدين يا جماعة الناس دي اتربت على محاور كتير؛ يعني نحن لو قلنا إن في حاجة اسمها عطاء، هقف أتكلم وهدعو إلى الله وهكلم قارون، ده لازم يسبقه أمور، لازم يسبقه بناء.
قبل العطاء ده هتلاقي البناء ده موجود في الناس دي، أول حاجة في بناء علمي. وبناء علمي ده مش أنا اللي بقوله، ربنا اللي سماهم كده فين؟ ﴿وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ﴾ [القصص: 80]. الناس دي ما كانتش بتاعة لايفات ولا بتاعة فيسبوك، الناس دي كانت علماء، يعني خدوا وقت في بناء علمي، في تربية علمية، فبقى لهم وصف اسمهم ﴿أُوتُوا الْعِلْمَ﴾، معاهم علم. ثاني حاجة في بناء تربوي تزكوي ظاهر جداً، فين؟ في إن هم ما اتفتنوش مع اللي اتفتن بزينة. هي دي سهلة؟ والله ما سهلة، والله ما سهلة! أنت سهل جداً إنك تقعد وأنت قاعد كده تقول: "الفلوس مع التيوس"، بس أول ما هتجيلك الفلوس، لا مش سهلة. فإيه اللي حصل؟ دول اتفتنوا، دول قال لهم: ﴿وَيْلَكُمْ ثَوَابُ اللَّهِ خَيْرٌ لِّمَنْ آمَنَ وَعَمِلَ صَالِحًا وَلَا يُلَقَّاهَا إِلَّا الصَّابِرُونَ﴾ [القصص: 80]. يبقى كان في تربية، مش بس علم، جنب العلم في تربية. وبعدين في دعوة صحيحة مش هبد، يعني دعاة من الطراز الأول، وهنتكلم شوية عن دعوتهم لقارون كان شكلها إيه، والكلام اللي قالوه ده مش أي حد يعرف يقوله. فدي ناس متعوب عليها، ناس خدت وقت في التربية، ناس خدت وقت في التأسيس، فطلعوا على هذا النحو.
﴿إِنَّ قَارُونَ كَانَ مِن قَوْمِ مُوسَىٰ فَبَغَىٰ عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ * إِذْ قَالَ لَهُ قَوْمُهُ لَا تَفْرَحْ ۖ إِنَّ اللَّهَ لَا يُحِبُّ الْفَرِحِينَ * وَابْتَغِ فِيمَا آتَاكَ اللَّهُ الدَّارَ الْآخِرَةَ ۖ وَلَا تَنسَ نَصِيبَكَ مِنَ الدُّنْيَا ۖ وَأَحْسِن كَمَا أَحْسَنَ اللَّهُ إِلَيْكَ ۖ وَلَا تَبْغِ الْفَسَادَ فِي الْأَرْضِ ۖ إِنَّ اللَّهَ لَا يُحِبُّ الْمُفْسِدِينَ﴾ [القصص: 76-77]. الحقيقة دعوة من الطراز الأول. قارون يا جماعة ما كانش واحد عادي، كان من علماء بني إسرائيل، وصعب جداً دعوة اللي كان على الطريق وانتكس، دي أصعب إنك تروح تجيب واحد من بعيد، واللي مارس ده يعرف ده كويس. فدعوة قارون مش دعوة سهلة، ولذلك هم دخلوا له من كذا مدخل.
﴿إِذْ قَالَ لَهُ قَوْمُهُ لَا تَفْرَحْ ۖ إِنَّ اللَّهَ لَا يُحِبُّ الْفَرِحِينَ﴾. طبعاً أنا الدرس عشان في طوائف شتى، فبحاول أنوع الخطاب؛ يعني ممكن أطلع في حتة وأنزل في حتة عشان يبقى كل واحد ورزقه بقى. من الأمور التي لازم ننتبه ليها بالذات الناس المتصدرة لرد الشبهات، إن كثير من الشبهات التي تطرح حول الإسلام بتدور في فلك بعض المغالطات المعروفة.
عند العلماء منها عشان ندخل في صلب الآية التي معانا؛ أول حاجة أنه يقتطع الآية أو الحديث من سياقه. يعني يجي يقول لك: يا عم ده الدين بيقول لك ما تفرحش! هو ربنا قال إيه؟ ﴿لَا تَفْرَحْ إِنَّ اللَّهَ لَا يُحِبُّ الْفَرِحِينَ﴾ [القصص: 76]، قال كده ربنا ولا ما قالش؟ تقول له: آه قال، يبقى ما فيش فرح في الدين! وهو إحنا عندنا سياق، سواء سياق كلام مقالي أو سياق حالي؛ يعني الآية دي نزلت فين؟ إيه مقتضى نزولها؟ إيه الواقعة التي نزلت فيها؟ لازم تبقى واعي ده.
هديكم مثال واحد عشان نتجاوز دي، وبعتذر لو المستوى علي شوية، معلش استحملونا، المستوى قليل شوية للناس الأعلى، يعني استحملونا وخلونا إيه. ما الآية مثلاً في قول الله عز وجل ﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾ [البقرة: 195]. لما يجي واحد ياخد الآية دي ويقول: يبقى خلاص ما نجاهدش في سبيل الله؛ لأن ده إلقاء باليد إلى التهلكة. ومن حيث اللغة الآية تحتمل، طب ده حصل؟ آه حصل.
بعد فتح القسطنطينية، أو في أثناء فتح القسطنطينية، واحد انغمس في العدو من المسلمين، فقال أحدهم: ألقى بيده إلى التهلكة! فقال أبو أيوب الأنصاري: نحن أو أنا أعلم بهذه الآية، فينا نزلت في الأنصار. وابتدى يحكي بقى، قال إننا ناصرنا النبي عليه الصلاة والسلام ودافعنا عن الدين حتى انتشر الدين وكذا وكذا، قلنا بقى نرجع لأولادنا وأموالنا، خلاص بقى إيه نرتاح. فنزل قول الله عز وجل ﴿وَأَنفِقُوا فِي سَبِيلِ اللَّهِ وَلَا تُلْقُوا بِأَيْدِيكُمْ إِلَى التَّهْلُكَةِ﴾، فكانت التهلكة في ترك الجهاد والركون إلى الأولاد والأموال، عكس المعنى تماماً.
ده أول حاجة. ثاني حاجة من المغالطات أنه يعتمد على جهل الناس باللغة؛ يعني ربنا بيقول إيه: ﴿لَا تَفْرَحْ إِنَّ اللَّهَ لَا يُحِبُّ الْفَرِحِينَ﴾. هو في حاجة اسمها فارح وفي حاجة اسمها فرح، والفارح غير الفرح. الفارح جمعها فارحون، والفرح جمعها فرحون. وجت الهاء هنا ﴿إِنَّ اللَّهَ لَا يُحِبُّ الْفَرِحِينَ﴾، وجت المفرد بتاعها في آية تانية: ﴿إِنَّهُ لَفَرِحٌ فَخُورٌ﴾، برضه على الذم. إيه الفرق بين فارح وفرح؟ الفرح يعني الأشر البطر، ده في اللغة.
يبقى الفرح هو الأشر البطر، فربنا سبحانه وتعالى مش بينهى عن الفرح ولا حاجة، وإلا فقال الله عز وجل: ﴿قُلْ بِفَضْلِ اللَّهِ وَبِرَحْمَتِهِ فَبِذَٰلِكَ فَلْيَفْرَحُوا﴾، يبقى إحنا بنفرح. ﴿إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ﴾. وإحنا بنحاول بقى نعدل الآيات.
﴿وَابْتَغِ فِيمَا آتَاكَ اللَّهُ الدَّارَ الْآخِرَةَ﴾، هنا يا جماعة بيفكروه بمعنى مهم جداً وهو أن اللي أنت فيه ده بتاع ربنا، وكثير يا جماعة منا لما ينعم عليه بشيء بينسى ده، بينسى أنه في نعم ربنا سبحانه وتعالى ويبتدي يستلذ بثناء الناس عليه. الله يا عم الشيخ إيه الصوت الجميل في القرآن ده؟ الله أنت دعوتك دي ما ده أنت أبكيتنا يا عم الشيخ! هو بينسى أن ده كله إيه؟ هو توفيق الله عز وجل، لا بحوله ولا بقوته ولا بأي حاجة، هو توفيقه سبحانه وتعالى.
﴿وَابْتَغِ فِيمَا آتَاكَ اللَّهُ﴾، أنت بقى فكر نفسك بده دايماً، فيما آتاك الله، ربنا اللي أعطاني حسن الصوت، ربنا اللي أعطاني القبول عند الناس، وقول لنفسك كده إن لو فضح الله عز وجل ما ستره من أمري على الناس، هتقابل بتلك الحفاوة؟ وهتقابل؟ أبداً والله، هو جميل ستره سبحانه وتعالى. كلنا كده عايشين بجميل ستره سبحانه وتعالى، وكما قال بعضهم: لو كان للذنوب رائحة ما جالستموني، لو كان الذنوب ليها ريحة ما كانش حد يطيق يقعد جنبي.
فبيفكروه قارون بده ﴿وَابْتَغِ فِيمَا آتَاكَ اللَّهُ الدَّارَ الْآخِرَةَ وَلَا تَنسَ نَصِيبَكَ مِنَ الدُّنْيَا﴾. يعني إيه ولا تنس نصيبك من الدنيا؟ هو هو ناسي نصيبه من الدنيا؟ أمال يعني إيه ولا تنس نصيبك من الدنيا؟ ما هو مش ناسي نصيبه من الدنيا، أمال يكون المعنى إيه نصيبه من الدنيا؟ مش كده، ﴿وَابْتَغِ فِيمَا آتَاكَ اللَّهُ الدَّارَ الْآخِرَةَ وَلَا تَنسَ نَصِيبَكَ مِنَ الدُّنْيَا﴾، أنت هتخرج من الدنيا بإيه؟ بالكفن، مش كده؟ فما تنساش يا قارون أن ده نصيبك من الدنيا. عيش في القصور وجمع الأموال واعمل كل اللي تعمله في الآخر نصيبك من الدنيا إيه؟ هي القماشة التي ستتلف فيها، لا تنس نصيبك من الدنيا.
أو المعنى لا تنس نصيبك من الدنيا يعني لا تترك نصيبك من الدنيا، يعني إحنا مش جايين نقول لك سيب الدنيا كلها، وده مهم جداً في خطاب الناس التي مقبلة على الدنيا، مش جايين نقول لك سيب الدنيا، يا جماعة الدعوة ليها فن، أنت بتدعو مين فهتدعوه إزاي؟ ﴿وَأَحْسِن كَمَا أَحْسَنَ اللَّهُ إِلَيْكَ وَلَا تَبْغِ الْفَسَدَ فِي الْأَرْضِ إِنَّ اللَّهَ لَا يُحِبُّ الْمُفْسِدِينَ﴾، كلمة الله جت أربع مرات وهم بيخاطبوه.
قال ﴿إِنَّمَا أُوتِيتُهُ عَلَىٰ عِلْمٍ عِندِي﴾، ودي آفة التي وقع فيها المتدينون الآن، قال ﴿إِنَّمَا أُوتِيتُهُ عَلَىٰ عِلْمٍ عِندِي﴾، يعني إيه؟ يعني أنا كريم على ربنا سبحانه وتعالى، فللعلم الذي حواه صدري أتاني الله عز وجل هذه الدنيا، هذا المال، وده بيقع فيه كثير من الناس للأسف، وزي ما قلنا لكم دي مش علامة على أي حاجة. أو قال ﴿إِنَّمَا أُوتِيتُهُ عَلَىٰ عِلْمٍ عِندِي﴾ يعني علم الدنيا، يعني إيه؟ أصل أنا شاطر في التجارة فلازم أكسب، أصل أنا دارس معايا ماجستير في مش عارف إيه، أصل أنا حطيت دراسة جدوى ما تخرش الميه، لا يا حبيبي، كل ده بيتعمل وفي الآخر المشروع يخسر، عادي جداً عادي.
انسب الفضل لله عز وجل. يا جماعة إحنا طول ما إحنا في الدنيا إحنا في اختبارات، عمالين ننجح ونسقط، ننجح ونسقط، ﴿وَنَبْلُوكُم بِالشَّرِّ وَالْخَيْرِ فِتْنَةً﴾، الاثنين اختبار، الخير اختبار والشر اختبار. يعني لما حضرتك مثلاً لقيت قبول لصوتك في القرآن، لصوتك في الإنشاد، لدعوتك على الفيسبوك، لمش أي حاجة، ده ممكن يكون طريق للجنة وممكن يكون طريق للنار، هو هو.
يا جماعة مش هيجي ناس يوم القيامة ويتقال لهم: «أنا أغنى الشركاء عن الشرك، من عمل عملاً أشرك فيه معي غيري تركته وشركه»، يقال له: اذهب إلى الذي أشركت، فانظر هل تجد عنده شيئاً؟ روح للفولورز بتوعك، روح للسبسكرايبرز بتوعك، خد منهم بقى يلا خليهم يدخلوك الجنة، فانظر هل تجد عندهم شيئاً؟ مش في ناس هيتقال لها كده؟ بلاش، مش أول من تسعر بهم النار يوم القيامة مين بقى؟ فرعون وأبو لهب و.. دول أول من تسعر بهم النار، أول من تسعر بهم النار يوم القيامة عالم، قارئ، وفي رواية أول ناس هيتجابوا ويتحذفوا في النار عالم، وفي رواية قارئ، علمه دخله النار، مش علمه يعني نيته في علمه، نيته في قرآنه راح في داهية.
المرعب أن ممكن كان في الدنيا مش عارف أنه لابس في الحيط، زي ما قلنا لكم من شوية ﴿مِّنكُم مَّن يُرِيدُ الدُّنْيَا﴾ ممكن من الصحابة، ما كانش يعرف أنه يريد الدنيا، ما يعرفش. ولذلك يا جماعة مجاهدة النفس من أصعب الأمور ومن أخطر الأمور ومن أوجب الأمور، عارفين ليه؟ لأن مشاكل القلوب ومشاكل النفوس قليلها مدمر، وده كلام النبي عليه الصلاة والسلام.
يعني إحنا دلوقتي بنتكلم عن إيه؟ العلو في الأرض، مش كده؟ علو في الأرض يعني كبر. إيه المقياس الذي ذكره النبي في الكبر عليه الصلاة والسلام؟ والله والله الأمر مرعب، الحديث مرعب: «لا يدخل الجنة من كان في قلبه مثقال ذرة من كبر». أنتم فاهمين؟ أنتم فاهمين يعني ممكن الواحد يقعد يفتش في قلبه وينظف، وفي ذرة كده محصورة في البوتين الأيمن كده ما أعرفش عنها حاجة! الأمر ده يعني إيه؟ دوام المجاهدة ودوام المراقبة وعدم الغفلة عن القلب، وأنك ممكن النهاردة تجاهد وتنظف يجي بكرة يرجع يتسخ فترجع، وتفضل كده لغاية ما تموت. ولذلك وإن قال بعضهم: لا يصح، هو الجهاد الأكبر، هو الجهاد الأكبر هتفضل فيه طول عمرك. الأمر مرعب يا جماعة مرعب.
﴿قَالَ إِنَّمَا أُوتِيتُهُ عَلَىٰ عِلْمٍ عِندِي أَوَلَمْ يَعْلَمْ أَنَّ اللَّهَ قَدْ أَهْلَكَ مِن قَبْلِهِ مِنَ الْقُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا وَلَا يُسْأَلُ عَن ذُنُوبِهِمُ الْمُجْرِمُونَ﴾، يعني يا فالح لو كان ده دليل على كرمك على الله ربنا ليه أهلك من قبلك ناس أتاهم المال والدنيا والسلطان؟ طالما هم أحباه أهلكهم ليه بقى؟ فاهمين.
وبعدين يجي الامتحان بقى، ﴿فَخَرَجَ عَلَىٰ قَوْمِهِ فِي زِينَتِهِ﴾ وينقسم الناس لفريقين، فريق راح في الفتنة. ولذلك يا إخواني، من أهم وأنجح الأسباب في أنك ما تقعش في الفتنة أنك ما تتعرضش للفتنة أصلاً، ليه؟ لأن الفتن ليها طبائع، ومن طبائعها التي ذكرناها، من استشرف لها تستشرفها، دي من طبائع الفتن. ولذلك يا جماعة فتنة المسيح الدجال في آخر الزمان ماذا قال النبي عليه الصلاة والسلام؟ «من سمع بالدجال فلينأ عنه، فوالله إن الرجل ليأتيه وهو يحسب أنه مؤمن فيتبعه لما يبعث به من الشبهات».
بلاش المسيح الدجال، الجهاد، ناس تقول الجهاد، وفي باب الجهاد الجهاد ذروة سنام الإسلام، لكن في مشكلة خطيرة جداً في الجهاد أن من أكبر الكبائر الفرار يوم الزحف، مش كده؟ طب أنت هتبقى فين؟ طب ما توجيه النبي عليه الصلاة والسلام في هذا الباب؟ ماذا قال؟ «لا تتمنوا لقاء العدو، وإذا لقيتموهم فاصبروا». ليه لا تتمنوا لقاء العدو؟ لأنه فتنة. لا تتمنوا لقاء العدو وإذا لقيتموهم فاصبروا، فما تروحش تتعرض للفتنة.
التي وقعوا يا جماعة في فتنة قارون، وقالوا ﴿يَا لَيْتَ لَنَا مِثْلَ مَا أُوتِيَ قَارُونُ﴾، لو كانوا قعدوا في بيوتهم وما خرجوش ولا شافوا قارون في زينته كانوا عصموا من الفتنة. لو ما كانوا رايحين عملوا سبسكرايب للصفحة الفلانية كانوا عصموا من الفتن. لو طلع من المسجد قال: أنا اللي موديني في داهية السمارت فون اللي في جيبي، أنا هرميه وهشتري تليفون نوكيا ابن الحلال ده هو ده اللي هكمل بيه حياتي لغاية ما أقابل ربنا سبحانه وتعالى، أو هفضل بقى في الإباحات وهفضل في العادة السرية وهفضل في البلاوي التي أنا فيها دي. لا تفتح، إنك أن تفتح تلج. لما طلعوا قالوا بس هنتفرج، وقعوا فتنة قارون، قالوا ﴿يَا لَيْتَ لَنَا مِثْلَ مَا أُوتِيَ قَارُونُ﴾.
إمتى هيفوقوا؟ لما راحت دنيا قارون، ما فاقوش لما راح دين قارون. قارون خرج على قومه في زينته وهو كافر بالله، وهو مشاق لرسول الله موسى عليه السلام، ومع ذلك قال الذين يريدون الحياة الدنيا: ﴿يَا لَيْتَ لَنَا مِثْلَ مَا أُوتِيَ قَارُونُ﴾، ومش شايفين كفره ومش شايفين فسقه! إمتى هيفوقوا؟ لما هيخسف به وبداره الأرض، ﴿فَأَصْبَحَ الَّذِينَ تَمَنَّوْا مَكَانَهُ بِالْأَمْسِ يَقُولُونَ وَيْكَأَنَّ اللَّهَ يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَوْلَا أَن مَّنَّ اللَّهُ عَلَيْنَا لَخَسَفَ بِنَا وَيْكَأَنَّهُ لَا يُفْلِحُ الْكَافِرُونَ﴾.
إمتى؟ لما راحت الدنيا. نفس ده اللي حصل مع مين مع صاحب الجنة في سورة الكهف، هو دخل الجنة وهو إيه؟ ظالم لنفسه، مش كده؟ ودخل جنته وهو ظالم لنفسه ولا فارق معاه حاجة خالص، بل بجح كمان. وصاحبه قال له إيه في كفره؟ ماشي، صاحبه قال له إيه؟ المؤمن قال له إيه؟ ﴿أَكَفَرْتَ بِالَّذِي خَلَقَكَ مِن تُرَابٍ﴾، يبقى كان كافر، مش كده؟ صحصحه نوقف خلاص. دخل وهو كافر، دخل جنته وهو كافر مش فارقة معاه، إمتى بقى هيقلب كفيه ويقول يا ليت؟ لما الدنيا هتختل.
ليه يا جماعة؟ هو ده من غير مجاملة، هو ده مقدار الدنيا في قلوبنا وده مقدار الدين في قلوبنا، يعني اللي منا دينه عمال كل يوم ينقص وينزل، وبعد ما كان لا يرى إلا في الصف الأول، بعد ما كان لا تفوت تكبيره الإحرام ترديد ورا المؤذن، صلاة النوافل، صيام اثنين وخميس، خاتمة كل شهر، ورد مراجعة مع ورد حفظ، كل ده بيروح منه النهارده، بالكاد لو صلى الفرد في بيته، في مده، السنن ما تسألش، دينه بيروح وهو ولا هو هنا ولا دريان أن دينه بيروح.
طب تعال كده بس الدنيا تختل شيئاً ما، يضطرب قلبه ويبقى متضايق ويبقى متوتر وعاوز يرجع تاني الدنيا ميه فل و14 ما يقبلش أقل اختلال في الدنيا. ده يا جماعة مش صفة المؤمنين، ده اهو قارون وادي صاحب الجنة، فخرج على قومه في زينته، لما طلعوا ووقفوا وقعوا، وقعوا في الفتنة، ﴿قَالَ الَّذِينَ يُرِيدُونَ الْحَيَاةَ الدُّنْيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ﴾. شوفوا التأكيدات، أنه عجيب والله، عجيب يا جماعة، الناس التي واقفة دي شايفين أنه بيتحدى النبي موسى، شايفين ده وبيقولوا إيه؟ ﴿إِنَّهُ لَذُو حَظٍّ عَظِيمٍ﴾، شوف كم مؤكد في الجملة!
﴿وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ﴾، وده من أعظم الدروس في هذه المجالس، اللي بيثبت أمام فتن الدنيا العلماء ده العلماء. يا جماعة الفتن مش سهلة ومش سهل اكتشافها، والفتنة إذا أقبلت عرفها كل عالم، وإذا أدبرت عرفها كل جاهل، يعني بعد ما تخلص وتمشي وتعوز الناس كلها، كانت فتنة والله! طب ما هي الشأن في أنك يعرفها وهي مقبلة عشان ما تتلوثش بها، مين اللي هيعرفها؟ العلماء. العلماء مين اللي ثبت؟ ﴿وَقَالَ الَّذِينَ أُوتُوا الْعِلْمَ﴾، يبقى العلماء هم الزهاد، عاوز تزهد في الدنيا فين علمك؟ فين وردك من العلم؟ العلماء هم العباد، إيه رأيك فين الدليل أن العلماء هم العباد؟ عبادة عاوزين عبادة، دليل للعبادة.
﴿أَمَّنْ هُوَ قَانِتٌ آنَاءَ اللَّيْلِ سَاجِدًا وَقَائِمًا يَحْذَرُ الْآخِرَةَ وَيَرْجُو رَحْمَةَ رَبِّهِ ۗ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ﴾ [الزمر: 9].
ما هو بص أول الآية، إحنا نتكلم عن قيام ليل، فإحنا متوقعين الختم يكون قل هل يستوي الذين يعبدون والذين لا يعبدون، الذين يعملون والذين لا يعملون، ما جتش كدا الآية. إنما هو قانت، مين دول بقى؟ قل هل يستوي الذين يعلمون والذين لا يعلمون؛ العلماء العارفون بالله هم دول، عاوزين نبقى من دول، من العارفين بالله عز وجل.
﴿وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ لِّمَنْ آمَنَ وَعَمِلَ صَالِحًا وَلَا يُلَقَّاهَا إِلَّا الصَّابِرُونَ * فَخَسَفْنَا بِهِ وَبِدَارِهِ الْأَرْضَ﴾ [القصص: 80-81].
في فايدة عظيمة جداً هنا بالذات للدعاة أو المتصدرين للدعوة: ﴿فَخَسَفْنَا بِهِ وَبِدَارِهِ الْأَرْضَ﴾. ليه وبداره؟ وقيل إن داره خسف به بعده بثلاثة أيام، ليه؟ في قصة هنا؛ إنه لما قارون تحدى موسى، وبعدين جاب امرأة بغي تدعي على موسى الفجور بها، وبعدين موسى سألها فقالت له لا، أنت ما عملتش كدا، لا قدام بقى الناس وأنا كذبت وهو قال لي اعملي كدا. المهم موسى دعا على قارون، فابتدي يخسف به شيئاً فشيئاً.
فلما خسف بقارون تحدث بنو إسرائيل، ما هم مقرفين بنو إسرائيل من يومهم، الوحشين فيهم كان فيهم طبعاً أولياء، قالوا إيه؟ قالوا ده دعا عليه عشان ياخد فلوسه وداره، فخسف الله بداره بعد ثلاث أيام عشان ينفي تلك التهمة عن مين؟ عن سيدنا موسى عليه السلام.
فأنت في طريقك إلى الله في الدعوة إلى الله، تحاشى العطايا، وعلى قد ما تقدر تتحاشى الأجور، يعني لو استطعت أن يكون رزقك من غير طريق الدين، هذا أولى؛ هذا أولى ليخلص لك ويسلم عمله. يعني وليته يسلم، يعني إحنا بنحاول. إنما فكرة إنك بعد شوية بقى كل حاجة لا لازم ليها مقابل، يا إما فلوس يا إما عزومة يا إما مش عارف إيه، الحاجات بقى اللي الناس عارفاها، ده أولاً هيؤثر على قلبك، وثانياً سيؤثر على دعوتك.
ولا بد، ولذلك كان من الدروس الواضحة جداً في القرآن إن سيدنا النبي عليه الصلاة والسلام لا يأخذ أجراً، وده مكرر في كذا سورة وفي كذا موطن. بل بين الله عز وجل الحكمة من إنه لا يأخذ الأجر، ماذا قال سبحانه وتعالى: ﴿أَمْ تَسْأَلُهُمْ خَرْجًا فَخَرَاجُ رَبِّكَ خَيْرٌ﴾ [المؤمنون: 72]، و﴿أَمْ تَسْأَلُهُمْ أَجْرًا فَهُم مِّن مَّغْرَمٍ مُّثْقَلُونَ﴾ [الطور: 40]. بعد شوية هتبقى ثقيل، بعد شوية هتبقى ثقيل. ﴿قُل لَّا أَسْأَلُكُمْ عَلَيْهِ أَجْرًا﴾ [الأنعام: 90]. واضح درس واضح.
طيب، يعني يا شيخ أنت بتقول حرام دلوقتي حفظ قرآن وآخد فلوس ده حرام؟ أنا ما قلتش حرام وحلال خالص دلوقتي، الحرام والحلال له حديث آخر. أنا بقول هذا تربية لنفسك، إحنا هنتكلم دلوقتي عن التربية وتهذيب النفس مش عن الحرام والحلال. طيب لو أنا رزقي كدا خلاص، أنا دلوقتي ده شغلي بحفظ قرآن وآخد فلوس، أنصحك إن يكون لك مجال لله، وتكون عليها أحرص من غيرها من اللي بفلوس. حد فاهم أنا بقول إيه؟ لأن دي واحدة من علامات إنك بتعمل لله سبحانه وتعالى.
إنما لما تلاقي المجلس اللي ببلاش ثقيل على قلبك، وأسهل حاجة إنك تعتذر عنه، ولما يجي المجلس اللي بالأخضر تلاقي نفسك قاعد زنهر، لازم يبقى إيه، ده نرجع تاني للجهل بتلك النفس التي بين جنبينا. لازم نقعد كدا، ما أنت مع النفس كدا، هو أنا يا ترى مخلص ولا مانيش؟ ما هو الإخلاص لو كان سهل كدا ما كان خلاص كل الناس أخلصت وكله دخل الجنة، بس هو الموضوع مش كدا، فلازم مجاهدة.
فلينفي الله عز وجل تلك الفرية عن نبيه موسى، خسف بدار مين؟ قارون، عشان ما حدش يقول إيه موسى خد الدار، موسى خد الفلوس، أصله بيتعشى بعد مش عارف إيه، أصله بيتحط له ظرف فيه. كنت مرة بدي درس في شبرا، وبعدين كان عارفين كرسي الشيخ الشعراوي، وأنا قاعد بقى على الكرسي ودخل راجل معاه كيس أسود كدا، كيسة سودا وراح حاططها جنب الكرسي وقعد، كان ساعتها وقت عيد الأضحى، تخيلته طبعاً.
وبعدين خلصت أنا الدرس وهو ما مشيش بقى، فلقيت الراجل بيقول لي إيه: أنت نسيت الشنطة بتاعتك. هو طبعاً مؤدب وعاوز يجيبها بطريقة يعني. قلت له لا أنا مش جايب شنطة، قال لا لا أنت جايب، أنت ناسي الشنطة اللي جنب البتاعة دي بتاعتك. فقلت له أنا مش جايب شنطة، قال لي حتة لحمة ضاني كدا في طبعاً كانت على صينية رز ولا بتاع كدا.
الشيخ نجيب المطيعي رحمه الله من علماء الشافعية، وهو اللي مكمل كتاب إيه؟ حد يعرف؟ اللي هيقول هديله 200 جنيه بس من غير جوجل. لا مش المهذب، المجموع، طب مين صاحب المجموع أصلاً؟ النووي، وبعد النووي السبكي، صح كدا.
فكان الشيخ نجيب رحمه الله كان يحب الأكل، مرة قاعدين بيديهم درس في اللقطة بمناسبة يعني الصينية واللحمة وكدا، فهو عاوز يقول اللقطة إن لو كانت تفسد، اللقطة ممكن ينتفع بها، وقصة في الفقه كدا. فهو عاوز يمثل باللقطة اللي ممكن تفسد، فقال لي يعني أنت ماشي فلقيت صينية بسبوسة على الأرض، وبعدين بقى فيها لوز، هو نسي بقى الدرس وابتدى يوصف ليه وعليها قشطة، والناس قربوك يا عم الشيخ يعني خلاص هي هتفسد وخلاص، القشطة بقى واللوز يعني، هو نسي الدرس وعمال يوصف في البسبوسة، جعتوا؟
فقال: ﴿وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ لِّمَنْ آمَنَ وَعَمِلَ صَالِحًا وَلَا يُلَقَّاهَا إِلَّا الصَّابِرُونَ * فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِن فِئَةٍ يَنصُرُونَهُ مِن دُونِ اللَّهِ وَمَا كَانَ مِنَ الْمُنتَصِرِينَ * وَأَصْبَحَ الَّذِينَ تَمَنَّوْا مَكَانَهُ بِالْأَمْسِ يَقُولُونَ وَيْكَأَنَّ اللَّهَ يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ ۖ لَوْلَا أَن مَّنَّ اللَّهُ عَلَيْنَا لَخَسَفَ بِنَا ۖ وَيْكَأَنَّهُ لَا يُفْلِحُ الْكَافِرُونَ﴾ [القصص: 80-82].
وكلمة ﴿وَيْكَأَنَّ﴾، هي إما عشان وي كأن أو ويك أن، خلاص لو كان يبقى وي دي أداة للإبداء الحسرة، وي كأن الله يبسط الرزق، كدا، أو ويك أن يعني إيه؟ يعني ألم تر أن، يبقى ويك معناها ألم تر، يبقى ويك أن ألم تر أن الله يبسط الرزق لمن يشاء من عباده ويقدر، إلى آخر الآيات. ثم تأتي الآية الخاتمة: ﴿تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوًّا فِي الْأَرْضِ وَلَا فَسَادًا ۚ وَالْعَاقِبَةُ لِلْمُتَّقِينَ﴾ [القصص: 83].
أقول قولي هذا، وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.
الشيخ أمجد سمير