دخولتسجيل الدخول

عقلٌ سليم | كيف نفكر وقت الأزمات؟

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذرياته وأهل بيته كما صليت على آل إبراهيم، إنك حميد مجيد. أما بعد.

طبعاً بيعذبوني، حاطين لي الكرسي هنا والمايك هنا؛ فيا ترجع ظهرك يا تتكلم في المايك، كالعادة المؤامرة اللي بتحصل كل درس. عندنا موضوعان كبيران على الساحة؛ موضوع يخص كل مسلم في الأرض وهو موضوع غزة، نسأل الله عز وجل أن يفرج عنهم عاجلاً غير آجل، وموضوع جزئي صغير لكنه برضه كل سنة له زخم، وهو موضوع الثانوية العامة ونتيجة الثانوية العامة. الحقيقة طبعاً موضوع غزة عندنا ملف كامل اسمه ملف غزة، تكلمنا فيه كثيراً، وهم يستحقون ذلك وزيادة، ليس لأننا تكلمنا فيه كثيراً فناموا، بل هو الموضوع الذي لا بد أن يشغل كل مسلم. وموضوع الثانوية العامة كنا تكلمنا فيه قبل ذلك مرتين أو ثلاثة، لكن شغل بالي هذه المرة أن كان فيه شيء جامع بين الموضوعين، أو بين تعاطي الموضوعين دول أو أي موضوع كبير.

فالنهارده الدرس الحقيقة هنتكلم فيه عن خمس أنماط من العقليات التي ينبغي أن نتخلى عنها، أو خلينا نضبط الجملة: أن نحسن إدارتها، لأن في بعض العقليات منها مش مذمومة بإطلاق. عندنا خمس أنواع من العقليات، كل عقلية من دول لما بتيجي تفكر في مشكلة كبيرة أو في أزمة كبيرة تصيب الأمة أو تصيب الفرد نفسه بتوقعه في إشكالات. هتلاقوا العقلية دي لما تفكر في ما يحدث لإخواننا ستخرج مشاكل، ولو فكرت في الثانوية العامة ونتيجتها ستعمل مشاكل، ولو فكرت في أي شيء ستعمل مشكلة؛ سواء مشكلة للفرد نفسه أو مشكلة للي حوله أو مشكلة للأمة.

أول هذه العقليات عشان ما نبقاش بنتكلم كتير في مقدمات هي عقلية الدنيا؛ عقلية الدنيا يعني الدنيا أكبر همها ومبلغ علمها. دي بتعمل إشكالات إزاي؟ أول عقليات الدنيا التي الدنيا أكبر همها ومبلغ علمها، فتلاقي في أحداث غزة أشد ما يسوؤها ويصيبها بإحباط وقلق هو خلل الدنيا لأهل غزة. تلاقي اللي في دماغه دائمًا واللي عامل له أزمة وممكن فعلاً يعمل له اكتئاب هو أن الناس جعانة، الناس عطشانة، الناس مش لاقية بيوت؛ اللي هو في الآخر خلل الدنيا. هل إحنا بنهون من الأمر ده؟ إحنا مش بنهون منه، بل سماه الله عز وجل بلاء في القرآن: ﴿وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ﴾ [البقرة: 155]. فالجوع بلاء سماه الله ذلك، إحنا مش بنهون ونقول أمر بسيط يا جماعة إنتوا اللي متدلعين، مش بنقول كده، لكن بنقول هو إيه اللي عامل له أزمة؟ هل إن دين هؤلاء راح وذهب واختل دينهم؟ لا، مش الدين، أمال إيه؟ الدنيا. فالدنيا عاملة له أزمة فهو بيقيس بمقياس الدنيا، فلما تروح الدنيا سواء ليه أو لغيره يزعل ويجيله إحباط واكتئاب، ونلاقي واحد ممكن لو أفلس ينتحر؛ ليه؟ عقلية الدنيا.

أنا بكرر عشان الاحترازات دي مهمة، هذا لا يعني أن ما هم فيه أمر هين بسيط، لكن إحنا لو نظرنا إلى هذه الأمور بعقلية الدين بقى، إحنا بنقول في عقلية الدنيا دي عقلية مذمومة عاوزين نخرج براها وننظر إلى الأمور ونقومها بعقلية الدين. في أثر عجيب جداً وذكرناه من قبل في قصة يوسف، أن يعقوب عليه السلام لما ابيضت عيناه من الحزن فهو كظيم، وبعدين جم أخوة يوسف بيلوموه، فقال لهم: ليت شعري، هو طبعاً ما يعرفش فين يوسف، فقال لهم: ليت شعري، مؤمن هو أم كافر؟ يعني اللي شاغل بال يعقوب عليه السلام مش هو بياكل كويس، بيشرب كويس، بينام كويس، بيلبس كويس، الحياة مستقرة؛ ليت شعري، مؤمن هو أم كافر؟

فده بيعمل إشكالات، آه هنبص بقى لأهل غزة بعقلية الدنيا -نسأل الله أن يفرج عنهم- إنت هتصاب بإحباط شديد جداً. طيب ما يضيرهم أن اختلت دنياهم وأقام الله بذلك دينهم، وأقام الله عز وجل بذلك ديننا؛ يعني دين الأمة تصحى معاني في الأمة ما كانتش تصحى غير بده. في الحديث يا جماعة: «يوشك أن تداعى عليكم الأمم كما تداعى الأكلة إلى قصعتها». قالوا: أو من قلة نحن يومئذ يا رسول الله؟ قال: «لا، ولكنكم يومئذ كثير، ولكن غثاء كغثاء السيل، ولينزعن الله المهابة لكم من صدور أعدائكم، وليقذفن في قلوبكم الوهن». قيل: وما الوهن؟ قال: «حب الدنيا وكراهية الموت». فلو أزمتنا يا جماعة، طبعا إحنا الآن مش محتاجين نقول إن إحنا في الحالة دي، اللي هو تدعى الأمم إلى القصعة، إحنا في الحالة دي، الأمة كلها مش أهل غزة بس، بل لعل أهل غزة هم الأشاوس الأبطال اللي مش عارفين يعملوا معاهم ده، إنما إحنا في الحالة دي.

فين المشكلة؟ فين الخلل؟ في آخر الحديث حب الدنيا وكراهية الموت. أنا هسألكم سؤال: إحنا ليه بنحب الدنيا وبنكره الموت؟ ليه؟ لما الحسن سئل هذا السؤال قال: لأنكم عمرتم الدنيا وخربتم الآخرة، ولا يحب الإنسان أن ينتقل من العمار إلى الخراب. أجي أقول لك اخرج من العمار وروح اقعد في الخراب هتقول لي ليه أعمل كده؟ فإحنا عمرنا الدنيا وخربنا الآخرة فأحببنا الدنيا وكرهنا الموت. طيب عشان المعادلة دي تتعدل يعني ما نحبش الدنيا ونحب الموت ونحب الآخرة، لا بد أن المقدمة تتضبط، يبقى لا بد أن يكون في نوع من الخلل في الدنيا. وعلى فكرة يا جماعة الخلل ده هو ده اللي عاشه الصحابة أصلاً، يعني الدنيا بتاعة الصحابة يا جماعة ما كانتش مائة فل وأربعة عشر. لو بنتكلم دلوقتي عن الجوع مثلاً، فالصحابة رضوان الله عليهم كانوا عادي جداً بيربطوا الأحجار على بطونهم من الجوع، ويسألوا النبي عليه الصلاة والسلام يلاقوه صلى الله عليه وسلم رابط على بطنه الشريف حجرين من الجوع.

النبي عليه الصلاة والسلام في حديث أنه كان بيجهز جيش سرية، يقوم يديهم الأكل بتاعهم في الطريق فيطلع نصيب كل واحد تمراية في اليوم. أنا مش بقول لك واحد قاعد في بيته وما فيش كالوريز بتتحرق، ده واحد رايح يحارب، فيطلع نصيب كل مجند تمراية في اليوم، في الأربعة وعشرين ساعة نصيبه تمراية! فيعملوا إيه؟ ما ياكلوهاش، يقوموا يمصوها ويقعدوا يعضوا فيها ويشربوا المية بتاعتها ومحافظين على التمراية؛ لأنها هتقعد معايا 24 ساعة ما فيش غيرها. وساعتها لما أدينا الحديث ده في رياض الصالحين في دروس الفجر، قلت لكم دلوقتي بيجهز جيش للغزو فكان نصيب كل واحد تمراية، يبقى اللي في المدينة عندهم أكل؟ يعني هل متصور إحنا قاعدين في بيوتنا في المدينة وعندنا المحمر والمشمر ولما جينا نجهز الجيش طلعنا كل واحد بتمراية في اليوم؟ يعني التصور الطبيعي أن بيوتنا ما فيهاش أكل أصلاً، ده التصور الطبيعي.

نرجع تاني للحديث اللي هو تداعى عليكم الأمم، قال: «وليقذفن الله في قلوبكم الوهن». قيل وما الوهن؟ قال: «حب الدنيا وكراهية الموت». طيب ليه بنحب الدنيا وبنكره الموت؟ لأننا عمرنا الدنيا وخربنا الآخرة. طيب لما نحب بقى نعكس القضية دي؛ ما نحبش الدنيا ونحب الموت ونحب الآخرة، يبقى لا بد أن يحدث نوع خلل في دنيانا، إنما هتفضل عاوز دنيتك مائة فل وأربعة عشر وعلى سنجه عشرة ومائة في المائة، وما تحبش تنزل عن المستوى اللي إنت تقدر تعيش فيه، وتيجي تقول لما ينادى يا خيل الله اركبي تبقى في الأول، مش هيحصل.

طيب ده يحصل إزاي؟ يحصل بحاجة من اثنين، يا إما بإيدينا، يعني إيه بإيدينا؟ يعني نحط في دماغنا كده أن إحنا اللي لازم نتعود أن إحنا ننزل شوية عن المستوى اللي كل واحد فينا عايش فيه. أنا مش بقول كلنا في مستوى واحد، إنما واحد متعود على كذا -من غير ما أقول أمثلة- كل واحد عارف حياته ونمط حياته، يقوم يربي نفسه يقول: لا أنا لازم أنزل شوية عن المستوى ده وأعرف أعيش أدنى من ده، وأربي ولادي على ده، وأربي زوجتي على ده. والمعنى ده موجود في أحاديث، آه ده موجود في الدين. كان صلى الله عليه وسلم ينهى عن كثير من الإرفاه، ينهى عن الدلع والحاجات الرفاهيات، كان ينهى عنها النبي صلى الله عليه وسلم. وبعدين يمشي حافي صلى الله عليه وسلم، ده مش مش جوه بيته ماشي حافي لا، يطلع يمشي حافي في الشارع عادي جداً. وبعدين الصحابة فهموا أن ده حالة مقصودة ومطلوبة، فتلاقي منهم واحد يبقى أمير، أمير زمان زي رئيس دولة دلوقتي؛ يعني أمير مصر أمير العراق، ده معنى أمير مش محافظ، وبعدين يلاقوه ماشي حافي، فيسأل فيقول هذا: الحديث كان صلى الله عليه وسلم ينهى عن كثير من الإرفاه. بقول لك إيه، يلا دلوقتي حالا كله يطلع يمشي حافي من المسجد؟ ما بقولش ده. طيب حد حاب يعمل ده في أحيان، يعمل ده؛ أنا لا بقول ولا بنهى عنه، أنا اللي بقوله يا جماعة دلوقتي أن إحنا لازم الدنيا ما تبقاش أكبر همنا وما تبقاش متعودين على نمط حياة معين ما ينفعش ننزل عنه وبعدين نيجي نقول: إحنا ما بنحبش الدنيا، ده فين ده؟ أو هجتهد إني ما أحبش الدنيا، إزاي ده؟

فإما إحنا نعمل ده بإيدينا، أو إذا أراد الله عز وجل أن يخرج جيلاً يكتب على يديه النصر يفعله ذلك بهم قهراً. الجيل اللي هيكتب على إيديهم النصر جيل لا يركن إلى الدنيا ويحب الآخرة ويحب البذل للآخرة. إحنا بنتكلم على جيل، مش بنتكلم على فرد، لأن ممكن واحد يبقى شاذ في القاعدة، والشاذ لا حكم له. إحنا مش بنحكم على شذوذ القاعدة، ممكن واحد الدنيا مهما تكون معاه هو برضه لا يركن إليها ويحب الآخرة ويعمل؛ موجود آه موجود، نسبته كام؟ مش هقول نسبته كام في المائة. فده مش جيل، إحنا بنتكلم على جيل دلوقتي عاوزين جيل يكتب النصر على إيديهم، ده جيل لا يركن إلى دنيا، ده حديث النبي عليه الصلاة والسلام؛ لأن طول ما الجيل يركن إلى الدنيا، يحب الدنيا، يكره الموت، فالوهن في القلوب فالأعداء يتكالبون على الأمة.

إمتى هتتعدل الدفة؟ لما المعادلة تتعدل، يجي الجيل اللي ما فيش وهن في القلوب، اللي هو حب الدنيا وكراهية الموت. فلا يركنون إلى دنيا ويحبون الموت ويحبون الآخرة. ده إزاي يحصل؟ زي ما قلنا، إما إحنا نحاول واحدة واحدة برفق وبعقل وبحكمة، ننزل في مستوى المعيشة، ندرب ولادنا على ده، ندرب أزواجنا على ده، بحكمة ولطف ورفق، لكن المعنى يكون في دماغنا. طيب أوصل لغاية فين؟ مالهاش حد هنا، إحنا هنا بنكلم أنماط كتير من الناس ومستويات كتير من الناس، مالهاش حد، لكن طول ما إنت المعنى في دماغك وبتسعى إليه فإنت على الطريق.

أو إذا أراد الله عز وجل بجيل خيراً، وقال هو ده الجيل بقى، يفعل بهم ذلك قهراً؛ يخرب دنياهم. ما هو يا جماعة، النبي عليه الصلاة والسلام اللي كان بيربط الحجرين على بطنه، والهلال تلو الهلال ولا يوقد في بيته نار، هو ربنا سبحانه وتعالى ألم يكن قادراً أن حياة النبي ما تكونش كده؟ ويبقى ملك من ملوك الدنيا؟ بل خيره الله عز وجل بين هذه الحال وتلك فاختار الحالة التي كان عليها. لكن لما تنظر في السيرة وتنظر بعد كده في التاريخ تلاقي المعنى ده مضطرد، يعني تلاقوا دائمًا كل ما الناس ركنت إلى الدنيا كانت أضعف قلوباً، لدرجة يوصلوا لإيه؟ يجي التتري، مهانة والله ده موجود في كتب التاريخ، يجي التتري يقول للمسلم: نم هنا، ينام المسلم ما يتحركش لغاية ما التتر يروح يجيب سيف عشان يرجع يقتله! حاجة في منتهى العجب، يعني تقرأ هذا تضرب كفاً بكف، إيه الذل ده وإيه المهانة دي؟ ده ليه؟ لأن الناس انغمست وقتها في الدنيا وفي الشهوات.

فدي عقلية الدنيا تعمل مشاكل كبيرة جداً، كذلك عقلية الدنيا أن الدنيا أكبر الهم ومبلغ العلم تعمل مشاكل في الثانوية العامة أو في غيرها من الأمور، فنلاقي بقت الثانوية العامة قضية حياة بالنسبة للطالب وأسرة الطالب والمحيطين بالطالب من قبل النتيجة ما تطلع.

ماتتكلمش على نتيجة دلوقتي، فبتكلم على مثلا تلاقي حرص الأب والأم، أنا هنا ما بكلمش بقى الطالب مع أن الطالب دي مسألة ثانية، اللي هو في عقلية العيل، بس مش جايبينها في الخمسة، اللي هو الواحد للأسف الشديد إحنا اتربينا على كده عقلية العيل، اللي هي إيه؟ لغاية ما تتخرج من الكلية أنت عيل، وربنا حاكم عليك أنك رجل مكلف محاسب من أنت عندك 12 سنة.

ربنا حاكم عليك بده، أصل راجل وعيل دي مش بتاعتي وبتاعتك، راجل وعيل دي بتاعة ربنا سبحانه وتعالى هو اللي حكم، وأنت عندك 12 سنة بلغت بتتحاسب على الصلاة زيك زي أبوك، وبتتحاسب على الحرام زيك زي أبوك، وترك الواجبات كل حاجة زيك زيه خلاص. إحنا ما تربيناش كده فإحنا مستغربين ده، لكن لما ترجع تبص في التاريخ فتلاقي مثلا في ميدان الجهاد مثلا؛ عندك أسامة بن زيد، مات النبي عليه الصلاة والسلام وأسامة بن زيد قائد جيش.

أولاً كده الجيش ده كان طالع يحارب مين؟ الروم، عارفين أنتم هتتكلم فين دلوقتي، الجيش ده مش طالع قبل ما نشوف بس الصدمة، الجيش ده مش طالع في عيال عاملة نوش على أطراف المدينة فنطلع أسامة بن زيد يخلص عليهم، الجيش ده طالع يحارب الروم، عارفين مين الروم؟ القوة العظمى في الأرض، ما بنهزرش إحنا. أنا أسف أن قلت في ميدان الجهاد، أنا عاوز أخد ده ميدان ثاني، مع أنه هو كذلك جهاد، لكن أنا عاوز أخده بقى في ميدان صنع القرار، أصل أسامة بن زيد مش خارج مجند ده خارج قائد جيش، عارفين يا قائد جيش؟

يعني ده أما يجي ياخد قرار ما عندوش رفاهية أنه يقعد يدرس القرار شهر، ده قرار في أزمة، اللي بيسموه في العلوم الحديثة إدارة أزمات، مش كده يعني إدارة الأزمات دي مش أي حد يعرف يعملها، ده علم لوحده. واتخاذ القرار ده علم بيدرس وآليات اتخاذ القرار، وبعدين زي ما أقول لكم مش خارج يحارب ناس عاملة نوش على أطراف المدينة ده خارج بيحارب الروم، مين القائد؟ أسامة بن زيد اللي هو كان عمره كام؟ 17، 18 سنة.

17، 18 سنة ده يعني هو نايم مدلع، ويا بابا ويا حبيبي ويلا مذاكرتك وسندوتشاتك وجمعتك، صحي لقى نفسه قائد جيش، ولا ده بيتربى من هو عنده كام سنة، ولا هو ما يصلحش أن يبقى قائد جيش والنبي عليه الصلاة والسلام وحاشاه بيضيع الأمة، فعقلية العيل دي عاوزين نتخلص منها يا شباب، هي دي عقلية الدرس، الدرس ده على فكرة جاي من قلبي، ما فيش تحضير ولا حاجة، فاللي يطلع يطلع واللي مش هنقوله نقوله وننسى نقوله عادي.

في الحرب، لو خدناه بعيد عن الحرب شوية وقلنا ده ميدان صنع القرار في الحرب؛ معاذ ومعوذ ابن عفراء، أو معاذ بن عمرو بن جموح ومعاذ بن عفراء على روايتين، اللي قتلوا أبو جهل، صنديد من صناديد الكفر. وبعدين واحد زي أبو جهل ده في الحرب بيبقى ماشي لوحده؟ مش كده قتل أبو جهل؟ قبل ما نقول عمرهم كان قد ايه، هم قتلوه ليه؟ والله يا جماعة حاجة عجيبة، والله إحنا همنا إيه دلوقتي؟ إحنا كـ ناس كبيرة إيه همومنا في الدنيا؟

الصحابي يقول: بصيت يمين وشمال لقيت غلامين، فطبعا أنت في الحرب بتحب يبقى جنبك ناس يدافعوا عنك، فهو قلق أن جنبه طفل هنا وطفل هنا ما يحبش يبقى كده في الحرب، راح منهم مناديه سراً من صاحبه: يا عم، يا عم أين أبو جهل؟ قال: سبحان الله وما تصنع بأبي جهل؟ قال: سمعت أنه يسب رسول الله، والله لئن لقيته لا يفارق سوادي سواده حتى يموت الأعجل منا، يا أنا يا هو. ده همّ، إحنا في عصرنا دلوقتي همّ؟ طفل، الاثنين كان عمرهم قد إيه؟ 13 سنة اللي قتلوا أبو جهل يا جماعة.

أنا مش عارف أقول اللفظ أن هم أطفال، بصراحة والله بجد مش عارف أقوله، ناس عندها هم، رجالة عندهم 13 سنة، ومش القضية أن هم قتلوا أبو جهل، القضية أن عندهم هم شايلينه: سمعت أنه يسب رسول الله، والله لئن لقيته لا يفارقه، وبص هو بيخفي هو عاوز هو اللي يقتل، والثاني بعد كده سأله نفس الكلام، كل واحد عاوز هو اللي يقتل أبو جهل، وأما قتلوه هم الاثنين قتلوه، جم للنبي جري عليه الصلاة والسلام، عارفين القصة، كل يقول: أنا قتلته، أنا قتلته، فقال صلى الله عليه وسلم: «كلاكما قتله». 13 سنة يا جماعة.

في ميدان العلم ابن عباس رضي الله عنهما، برضو نفس الكلام، النبي مات عليه الصلاة والسلام وهو عنده في الحدود دي برضو غلام، وبعدين يبقى فقيه الأمة، ويبقى ما أنتم عارفين ابن عباس وطلب ابن عباس للعلم وكذا وكذا. نرجع تاني عشان دي ما كانتش عقلية معانا أصلاً دي جت في السكة، كنا بنقول إيه بقى؟ عقلية الدنيا في الثانوية العامة، إحنا قلنا عقلية الدنيا إزاي تفسد في ملف غزة، إزاي تفسد بقى عقلية الدنيا في ملف الثانوية العامة؟ هتلاقي الطالب اللي في ثانوية عامة الأب والأم أحرص شيء بيزنوا عليه إيه؟ المذاكرة.

معظم البيوت كده، طب الصلاة شكلها إيه؟ وتجويد الصلاة، مش بس الصلاة، تجويد الصلاة، صلاة ابنك عاملة ازاي؟ لو أنت ممن يصلي في المسجد، طب كل فترة على الأقل يا سيدي مش هقول لك كل ما تيجي، طب ما تحاول، طب ما يا حبيبي، طب ما شغلاك الصلاة أصلاً، يعقوب يقول لي شعري مؤمن هو أم كافر، هي عقلية الدنيا. لو ابنك وقت الامتحانات امتحانه هيقوم له الساعة 7 الصبح فقاعد مطبق عشان يذاكر للامتحان فنام اثنين الفجر 3 الفجر، الفجر أذن أربعة، أنا ما بكلمش الفساق أنا بكلم الناس اللي بتصحى وتنزل تصلي في المسجد.

فأنت هتقوم وتلبس ومش هتصحي ابنك، وشوف بقى الكلمة اللي هتقولها: حرام سيبه، حرام سيبه نايم، لا هو حرام، ادخل صحي ابنك، أصل لو صحي لا، صحيه يصلي الفجر وربنا هيبارك. الإشكال فين؟ عقلية الدنيا، الشاب نفسه بتاع ثانوية عامة ده إيه اللي شاغله؟ إحنا هنيجي بعد كده لعقلية أخرى اسمها عقلية اللحظة الراهنة أو الحاضرة، إنما إيه مشاغله؟ مشاغله دنيا كلها، إنما هل همه دين؟ هل همه آخرة؟ ولو كان ده فعلاً همه (يعني أكبر الهم هو الآخرة)، نفسيته هتتأثر بهذا التأثر الشديد لدرجة أن ممكن يكتئب ولدرجة ممكن حد ينتحر؟ مستحيل، لو هي عقلية آخرة.

ولذلك كان في الدعاء: «اللهم لا تجعل الدنيا أكبر همنا ولا مبلغ علمنا»، أكبر الهم دي جاءت في حديث: «من كانت الدنيا همه جعل الله فقره بين عينيه، وشتت عليه شمله، ولم يؤته من الدنيا إلا ما كتب له منها، ومن كانت الآخرة همه جعل الله غناه في قلبه، وجمع عليه شمله، وأتته الدنيا وهي راغمة». فإحنا محتاجين نتخلص من عقلية الدنيا، ومبلغ العلم إحنا بنقول إيه لا تجعل الدنيا أكبر همنا ولا مبلغ علمنا، مبلغ العلم جت في القرآن مش كده: ﴿ذَٰلِكَ مَبْلَغُهُم مِّنَ الْعِلْمِ﴾ [النجم: 30]، اللي هم مين دول؟

هاتوا لي الثلاث آيات قبليها يلا، مش بيقولوا كده في الامتحانات بتاعة، أيوه: ﴿فَأَعْرِضْ عَن مَّن تَوَلَّىٰ عَن ذِكْرِنَا وَلَمْ يُرِدْ إِلَّا الْحَيَاةَ الدُّنْيَا * ذَٰلِكَ مَبْلَغُهُم مِّنَ الْعِلْمِ﴾ [النجم: 29-30]، فمحتاجين نتخلى عن عقلية الدنيا، ونذهب إلى عقليات الآخرة، ده مهم جداً، طبعاً الدرس رؤوس أقلام، إحنا مش جايبين العقلية دي بقى وهنفصلها وإزاي نتخلى عن عقلية الدنيا وكذا.

أذكر لما مات الشيخ أسامة عبد العظيم رحمه الله، وبحكم سفري كنت انقطعت عن مسجد الشيخ رحمه الله مدة كبيرة، سنوات طويلة، وبعدين لما مات الشيخ وأنا كنت ساعتها في السعودية، نزلت فجأة عشان أصلي على شيخي، فدخلت مسجد الشيخ، مسجد الشيخ طوابق يعني معروف المسجد للناس، وطبعاً ما لحقتش تحت فطلعت، والسلالم بقى والمسجد له كده طابع، اللي راح المسجد يعرف، تحس أنك خلعت الدنيا على باب المسجد، ما فيش لا زخارف في المساجد ولا الحاجات دي خالص، نمط مختلف من المساجد.

وهجم عليّ هذا الهاجم الحقيقة، سرحت بفكر في حياة الشيخ، مش في اختيار الشيخ في نمط مسجده، لا هو اختياره في حياته في نمط حياته، أو عفوا أن أقول اختياره لأن أنا هجم عليّ هاجم وقتها قلت: يعني هو الشيخ هو اللي اختار ده؟ هو اللي كان عمداً مش عاوز يفتح الدنيا عليه، ولا ربنا اللي خرّب له دنياها عشان تصل؟ نحسبه كذلك ولا نزكي على الله أحداً. لكن أيّاً ما كان، هو بقى كان منتبه لده والحقيقة، وكان يعرض عليه أموراً ويأباها، ده اللي إحنا بنقوله بقى.

طب أنا بقول لك أوصل للحالة اللي كان فيها فلان ولا علان؟ ما بقولش كده، لكن برضو فكرة أنك مش عاوز حياتك تضطرب بأي نوع من الاضطراب، ولو اضطربت يبقى فيه مشاكل ويبقى فيه يزهق، ويمكن يبقى فيه قلة أدب في البيت، يعني إزاي ما تعمليش مش عارف إيه؟ ليه النبي عليه الصلاة والسلام يدخل على عائشة في أكل؟ ده يا جماعة يعني في أكل، مش يعني في غداء، والغداء ده اللي هو نشويات وبروتين وفي أكل؟ قالت له: لا ما فيش أكل، وما فيش أكل ده يعني ما فيش أكل، مش يعني الثلاجة هيبقى فيها جبنة بيضا وجبنة رومي ومش عارف وده بنسميه ما فيش أكل، فإحنا بنسميه في بعض البيوت كده هو ما فيش أكل.

فيعمل إيه النبي عليه الصلاة والسلام؟ يقول: «إني إذاً صائم»، خلاص ما فيش أكل هصوم، مين بقى عنده النفسية دي؟ إحنا محتاجين ده نخرج من عقلية الدنيا دي، تعمل مشاكل.

العقلية الثانية اللي عاوزين نتكلم عنها؛ عقلية النتيجة. يعني إيه عقلية النتيجة؟ العقلية اللي دائماً حكمها على الأشياء بالنتيجة، ودي عقلية برضو متعبة وبتعمل مشاكل، فلو جت تفكر في أحداث غزة، وغالباً عقلية النتيجة دي بتبقى غالباً برضو هي ملطوشة في الدنيا، عقلية الدنيا يعني، بس خلونا نفصلهم عشان، فعقلية النتيجة اللي هي إيه؟ اللي هو طالما المسلمين انهزموا يبقى فيه مشكلة، يعني إيه فيه مشكلة؟ يعني أنا هبقى يائس وهبقى محبط، هو طبعاً طالما انهزم فيه مشكلة في المسلمين، دي هنجيلها بعد شوية إن شاء الله، إنما أنا بتكلم على العقلية إزاي بتفكر.

يعني طالما إحنا في وضع استضعاف، وفي وضع خذلان، وفي وضع كذا، أدخل في اكتئاب وأدخل في يأس، ليه؟ لأنك دائماً بتحكم بالنتائج. ربنا سبحانه وتعالى حاجة عجيبة جداً يا جماعة، ربنا سبحانه وتعالى نفى هذا النوع من التفكير، يعني مثلا في سوق الجهاد؛ لأننا بنتكلم عن غزة فهي أقرب العبادات لها تعلق بغزة الجهاد. غزوة بدر مين كسب؟ المسلمين، مش كده؟ فكان ممكن خلاص إحنا كسبنا، فبجرة قلم إيه أمسح كل حاجة، خلاص بقى الدنيا كسبوا والحمد لله والدنيا عادت على كده وده يوم النصر العالمي ويلا نحتفل ونضرب صواريخ.

تقوم تنزل سورة الأنفال اللي هي بتتكلم عن غزوة بدر، ونفاجأ أن أول آية في سورة الأنفال، والكلام ده إحنا شرحناه قبل كده مرة، أنك لو عاوز تحكي غزوة هتحكي أسباب الغزوة، وقائع الغزوة، نتائج الغزوة، ده الترتيب المنطقي اللي أي حد هيحكيه، أسباب غزوة بدر إيه 1، 2، 3، طب وقائع الغزوة 1، 2، 3، طب نتائج الغزوة 1، 2، 3. ساعتها سألناكم الأنفال من النتائج ولا من الأسباب ولا من الوقائع؟ النتائج، الأنفال دي في الآخر خالص صح كده؟ فربنا يفتتح سورة الأنفال بآية عجيبة جداً: ﴿يَسْأَلُونَكَ عَنِ الْأَنفَالِ ۖ قُلِ الْأَنفَالُ لِلَّهِ وَالرَّسُولِ ۖ فَاتَّقُوا اللَّهَ وَأَصْلِحُوا ذَاتَ بَيْنِكُمْ ۖ وَأَطِيعُوا اللَّهَ وَرَسُولَهُ إِن كُنتُم مُّؤْمِنِينَ﴾ [الأنفال: 1]، وبعدين ثلاث آيات وبعدين نبتدي بقى أحداث الغزوة، ﴿كَمَا أَخْرَجَكَ رَبُّكَ مِن بَيْتِكَ بِالْحَقِّ وَإِنَّ فَرِيقًا مِّنَ الْمُؤْمِنِينَ لَكَارِهُونَ * يُجَادِلُونَكَ فِي الْحَقِّ بَعْدَمَا تَبَيَّنَ كَأَنَّمَا يُسَاقُونَ إِلَى الْمَوْتِ وَهُمْ يَنظُرُونَ﴾ [الأنفال: 5-6]، إلى آخر الآيات.

لكن الآية العجيبة افتتاح السورة سلوك على الأنفال. طب ليه؟ ما هو النتيجة إحنا كسبنا خلاص، بقى لا ده في موقف حصل ما ينفعش يعدي، وهو أنهم اختلفوا وساءت الأخلاق؛ هكذا يقول الراوي -مش أنا اللي بقول- الصحابي يقول: «فينا نزلت حين اختلفنا في النفل وساءت فيه أخلاقنا، فنزعه الله من أيدينا وجعله إلى رسول الله صلى الله عليه وسلم». اختلفوا مين ياخد الغنائم ومين ياخد الأنفال، واختلفوا على الدنيا وساءت الأخلاق.

لو إحنا بنحكم بالنتيجة، يبقى الولد زي الفل ليه؟ جايب 95%. الولد غشاش حضرتك وأنت عارف إنه غشاش، وكان بيجي يقول لك: اللجنة سايبة وغشيت، يا راجل يا متدين ويا ست يا متدينة، حضرتك عارف ده كويس وكنت مطنش، ما كنتش بتعظ الولد ليه؟ لأن عقليتك عقلية النتيجة، أو لما تشوف نتيجته حلوة كده تفرح بيها وتبقى فخور بالولد وتخرج وتزقطط.

طب العكس، ابنك عمل اللي عليه فعلاً أو بنتك عملت اللي عليها فعلاً وتعبت ومن أول يوم وبتذاكر ومجتهدة، ومش هقولك كمان جابت نتيجة وحشة، سقطت، إيه أحوالك؟ فخور، المفروض لو أنت عقليتك مش عقلية النتيجة، أنا فخور بالولد وفخور بالبنت، بل وده أنا كررته كتير قبل كده في دروس الخطب من التربية أنك تكافئ ابنك قبل النتيجة أصلاً، ده من التربية. يعني إيه الولد عمل اللي عليه مع آخر يوم امتحان؟ تعالى يا ابني شوف أنت كنت ناوي تعمل معايا إيه أعمله معايا خلاص، ناوي تدي له فلوس أد له فلوس، ناوي تخرجوا خروجة حلوة خرجوا الخروجة الحلوة، أي حاجة بقى كل واحد وإيه، كافؤوه. طب يا بابا النتيجة؟ لا يا حبيبي النتيجة دي لا بتاعتك ولا بتاعتي، أنا شايفك عملت اللي عليك، النتيجة بتاعة ربنا سبحانه وتعالى مش بتاعتنا.

هتربي جوه ابنك المعاني دي بقى، هنيجي بعد شوية هنقول في عقلية ثالثة عاوزين نتخلى عنها، لا هي عقلية الأسباب، العقلية بتعتمد على الأسباب، هنجي لها كمان شوية إن شاء الله، لكن هنقول العقليتين دول في مقابلهم عقلية بقى عاوزين نتحلى بها. إحنا دايماً بنقول عقلية مش عاوزينها وعقلية عاوزينها، فعقلية الدنيا عاوزين قدام عقلية الآخرة، عقلية النتيجة، عقلية السبب، عاوزين نتخلى عن العقليتين دول ويبقى في عقلية هنسميها عقلية السعي، وهذا هو اللفظ القرآني: ﴿وَأَن لَّيْسَ لِلْإِنسَانِ إِلَّا مَا سَعَى﴾ [النجم: 39]. فإنت مطالب بالسعي، طب النتيجة مش بتاعتك، مش بتاعتك.

وفي حديث عندنا يا جماعة واضح جداً في المسألة دي. أولاً النتيجة موجودة في القرآن، النتيجة بتاعتك ﴿لَّيْسَ عَلَيْكَ هُدَاهُمْ﴾ [البقرة: 272]. أمال يا رب أنا على إيه؟ عليك الدعوة إلى الله، عليك السعي، طب النتيجة مش بتاعتك. يا جماعة قبل ما نيجي للسنة هو ربنا سبحانه وتعالى لما النبي عليه الصلاة والسلام مثلاً ذكر أنه هيجي نبي يوم القيامة وليس معه أحد، يأتي النبي معه الرهط، معه الرجلان، معه الرجل، ويأتي نبي ليس معه أحد، السؤال الآن ربنا سبحانه وتعالى ألا يعلم أن هذا النبي لن يؤمن معه أحد؟ يعلم ولا ما يعلمش؟ طب بقانون النتائج ما يرسلوش بقى، أو يرسله لإقامة الحجة ويموت بعديها بشهر، وأقام الحجة، ما هي الحجة تقام بإيه يا جماعة؟ إنك تعرف أن في تسمع أن في إله وفي دين اسمه كذا، قامت عليك الحجة خلاص. ليه بقى يفضل قاعد سنين بيدعو؟ لأن إحنا غير متعبدين بالنتائج، والنبي ده اللي هو دعا ولم يستجب له أحد ما كانش يعرف أن لن يستجيب له أحد، ربنا يا جماعة بيربينا إحنا.

ما تنشغلش بالنتيجة، وإحنا مش عاوزين نسهب زي ما نقول في كل عقلية عشان نلحق نخلص، لكن حديث عجيب جداً: «إذا قامت القيامة وفي يد أحدكم فسيلة فإن استطاع أن يغرسها فليغرسها». ليه؟ ليه تغرس فسيلة والقيامة بتقوم؟ هي الفسيلة دي هتعمل إيه؟ يعني القيامة بتقوم، تغرس فسيلة ليه؟ عشان أنت عقليتك عقلية السعي، مش عقلية النتيجة، اغرس الفسيلة. طب إيه النتيجة؟ مالكش دعوة بالنتيجة، أنت مأمور بغرس الفسيلة فاغرس الفسيلة. فخلونا نسمي العقلية دي عقلية السعي.

فدي عقلية النتيجة دي أهي شوفوا تعمل إشكالات إزاي في الثانوية وتعمل لنا إشكالات برده في ملف غزة، إحنا اتكلمنا فيها ولا ما تكلمناش في غزة في العقلية دي؟ ولا سرحانين؟ في ملف غزة برده تلاقي ناس يصيبها الإحباط ويصيبها الاكتئاب ويصيبها مش عارف إيه، عشان إيه؟ عشان هو بيحكم بالنتيجة، وإحنا النتيجة مش بتاعتنا والله ما بتاعتنا، ولا بتاعة حد، ولا بتاعة النبي عليه الصلاة والسلام: ﴿لَّيْسَ عَلَيْكَ هُدَاهُمْ﴾. مش بتاعة حد، طب النصر إيه؟ مش بتاعة حد، إحنا عقلية سعي، فعقلية سعي دي مريحة جداً جداً وتلاقي نفسيتك مرتاحة خلاص، يعني أنا عملت اللي أقدر عليه معذرة إلى الله عز وجل، انتهى الأمر خلاص.

العقلية الثالثة هي عقلية بقى الأسباب، ودي عقلية، إحنا كده فات قد إيه؟ ساعة إلا ربع. طيب خلونا، لو بقى في وقت ناخد الأسباب، أنا قلت لكم عقلية السعي أهي فوق البيعة، فخلوها، خلوا الأسباب في الآخر عشان إيه؟ يعني في عقليات مهمة محتاجة أتكلم عليها، في عقلية يا جماعة ممكن نسميها عقلية مركز التحكم الخارجي، هي طبعاً لها اسم بالإنجليزي يعني، بس إحنا قبل كده كنت كلمتكم في نمط شخصية مهم أننا نفهمه ونحاول نديره بقى، ده نديره بقى مش هنقول نتخلى عنه تماماً، لما قلت لكم في شخصية بيسموها الإنتيرنال لوكس أوف كونترول، لوكاس دي كلمة لاتيني معناها مركز، فبيسموها إنتيرنال لوكاس أوف كونترول وأكسترنال لوكاس أوف كونترول، اللي هما الشخصيتين دول مهمين جداً نفهمهم.

الإنتيرنال، الشخصية اللي هي عندها مركز تحكم داخلي، دي الشخصية اللي دايماً شايفة نفسها مسؤولة عن أي حاجة، يعني إيه؟ يعني هتلاقي دايماً مش هتسمع منه مصطلحات: "ما أصل الحكومة مش عارف إيه، ما أصل التضخم، ما أصل الحدود مش عارف إيه"، مش هتسمع منه الكلمات دي، مش هو ما بيفهمش الحاجات دي، هو دايماً مركز "أنا أقدر أعمل إيه"، فما بيسحلش نفسه في دايرة بره التحكم بتاعه. خلاص، دايماً شايف الأوضاع هو ليه مش يد في وجود الأوضاع دي، لكن ليه يد في التعامل، كيف أتعامل مع تلك الأوضاع؟ الشخصية "الأكسترنال لوكس أوف كونترول" العكس تماماً بقى، اللي هو دايماً تسمع منه إيه: "حسبي الله ونعم الوكيل في مش عارف مين، أصل فين الأزهر؟ فين الدعاة؟ فين العلماء؟"، فين أنت؟ فين أنت؟ أنت مالك أنت بالدعاة والعلماء والأزهر؟ أنت مالك؟ يوم القيامة الأزهر هيتسأل عن الأزهر، والعالم هيتسأل عن نفسه، والداعية هيتسأل عن نفسه، وأنت هتتسأل عن نفسك. فالعقلية دي عقلية خطيرة خطيرة جداً ومزعجة، ودايماً تلاقيها "محلك سر" بقى، ممكن بقى تقروا عليها أو تبحثوا عنها مفيدة أننا نعرف علامات العقلية دي إيه، وعلامات العقلية دي إيه، وأمتى نستخدم دي وأمتى نستخدم دي، وكيف ندير، الحتة دي لأني أنا ما أقدرش أقول لك دلوقتي أن الأوضاع مالهاش تأثير، لا هو مش كده الموضوع مش كده، إنما دايماً فكر أنا أقدر أعمل إيه.

يقول لك فكر في دائرتين، هما يقولوا لك في ثلاث دوائر: دائرة اللي هو في تحكمك أنت بيسموها "إن كونترول"، ودائرة أنت صحيح مالكش تحكم فيها لكن ليك تأثير عليها، يعني إيه؟ يعني أنا ممكن ما أقدرش أبقى صاحب قرار أن مثلاً ننقل الدرس مسجد كذا، ما عنديش القرار ده، مش بتاعي، لكن أعرف واحد يعرف مثلاً حد عنده مسجد مش عارف إيه، فأقدر أؤثر عليه لأنه بيحبني مثلاً، فأقول له: إيه ما تشوف لنا كذا مثلاً، يعني دي اسمها دائرة التأثير، أنا ما أقدرش آخد القرار ده صحيح لكن أقدر أؤثر فيه. وفي دائرة بقى اللي هي براها خالص، براها خالص يعني لا هي أقدر أؤثر فيها ولا هي تحت تحكمي ولا أقدر أؤثر فيها، هي براها خالص. الشخصية الأكسترنال لوكس أوف كونترول دي دايماً هي حاشرة نفسها في الدائرة الثالثة دي دايماً، "يا ابني أنت قاعد ليه؟ ما أصل السنتين بتوع كورونا منهم، يا ابني إحنا كورونا إيه؟ يا ابني ده في جيل خلاص، كورونا عدت ووقعوا المش، لا ده في ناس كسبت في كورونا". في ناس كسبت في كورونا نفسها، فانت اصحى بقى، اصحى مش كل حاجة غيرك ومش كل حاجة أنت مالكش يد فيها، مش كل حاجة كده. طيب يعني إحنا بننفي العقلية الأكسترنال دي؟ لا مش تماماً، لكن محتاجة حسن إدارة ونضع الأمور في نصابها.

الآية الجميلة جداً في الموطن ده، وأنا الحقيقة عاوز أقول الآية دي بالذات علشان لها تعلق بمسألة عاوز أتكلم عليها، يعني أشير إليها سريعاً عشان أعمل لخبطة عند الناس، قال سبحانه وتعالى: ﴿سَيَقُولُ الَّذِينَ أَشْرَكُوا لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِن شَيْءٍ﴾ [الأنعام: 148]. هنا دلوقتي يا جماعة دول كفار ولاد لذينة مش كده؟ طيب فتقول له: يا كافر إسلام، يقوم هو يعمل إيه؟ بيقول لك: لو شاء الله ما أشركنا. دلوقتي هو بيعمل إيه؟ بيحيل القضية برمتها لحد خارج عنه، ده مش أنا ده ربنا، فاهمين العقلية دي يا جماعة؟ ده مش أنا ده ربنا: ﴿لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِن شَيْءٍ﴾. طيب هل نفعتهم بقى حجتهم دي؟ قال الله عز وجل: ﴿كَذَلِكَ كَذَّبَ الَّذِينَ مِن قَبْلِهِمْ حَتَّىٰ ذَاقُوا بَأْسَنَا ۗ قُلْ هَلْ عِندَكُم مِّنْ عِلْمٍ فَتُخْرِجُوهُ لَنَا﴾. يعني أنتم اللي بتقولوه ده، يعني ربنا أطلعكم على الكتاب وعرفتوا أن أنتم كتبتم كفاراً؟ أخرجوا لنا علمكم. قال سبحانه وتعالى: ﴿إِن تَتَّبِعُونَ إِلَّا الظَّنَّ وَإِنْ أَنتُمْ إِلَّا تَخْرُصُونَ﴾.

طيب الإشكال فين هنا؟ والحقيقة أصل الآية دي بالذات لأن في قضية كبيرة عاملة إشكال عند الناس، هم بيقولوا: لو شاء الله ما أشركنا، فربنا رد عليهم قال: ﴿قُلْ هَلْ عِندَكُم مِّنْ عِلْمٍ فَتُخْرِجُوهُ لَنَا﴾، صح يا جماعة؟ ربنا سبحانه وتعالى نفس اللفظة دي قالها في القرآن: ﴿وَلَوْ شَاءَ اللَّهُ مَا أَشْرَكُوا﴾. الله، طب ليه ربنا ينكر عليهم؟ أهو أهو: ﴿وَلَوْ شَاءَ اللَّهُ مَا أَشْرَكُوا﴾. مسألة القدر يا شباب، مسألة القدر في دقيقة، وأرجوكم أي حد هيحاول يقول لكم كلام غير ده ما تسمعوهوش، ده مش عشان أمجد لا، هو ده اللي العلماء بيقولوه يعني مش أمجد. دلوقتي يا جماعة مسألة المشيئة عشان نخلص في دقيقة، العبد له مشيئة ولا لا؟ له مشيئة، الرب له مشيئة ولا لا؟ له مشيئة. ده منين ده؟ كده بالفهلوة، إحنا قاعدين ما أكيد ربنا ليه مشيئة وأكيد العبد لا، ده في القرآن ربنا أثبت مشيئة لنا وأثبت مشيئة له سبحانه وتعالى، وأثبت أمراً فوق ذلك أن في علاقة بين مشيئتنا ومشيئته، كل ده في آية واحدة.

كل الثلاث مسائل الكبار دول ربنا قالهم في آية واحدة، قال: ﴿لِمَن شَاءَ مِنكُمْ أَن يَسْتَقِيمَ﴾ [التكوير: 28]، يبقى ليك مشيئة، طيب ﴿وَمَا تَشَاءُونَ إِلَّا أَن يَشَاءَ اللَّهُ رَبُّ الْعَالَمِينَ﴾ [التكوير: 29]. إذن ربنا ليه مشيئة، آه، يبقى الإنسان ليه مشيئة، آه، ربنا ليه مشيئة، آه، في علاقة بينهم، آه، ﴿وَمَا تَشَاءُونَ إِلَّا أَن يَشَاءَ اللَّهُ رَبُّ الْعَالَمِينَ﴾. إيه العلاقة بين مشيئتنا ومشيئة ربنا؟ ربنا ما فيش مخلوق يعرف، أي حد هيقعد يفصص في الحتة دي سد ودنك واخرج بره المسجد، تاني أي حد هيحاول يفصص في الحتة دي سد ودنك واخرج بره المسجد وقل صدق الله، ما فيش مخلوق يعرف، يعني إيه ما فيش مخلوق؟ يعني من الجيل ده لا، ولا الصحابة ولا النبي ولا جبريل -صلى الله على النبي محمد، صلى الله على جبريل- ما حدش يعرف، القدر سر الله في خلقه، وقال صلى الله عليه وسلم: «إذا ذُكر القدر فأمسكوا».

هنخش في التفصيلة دي هتضل، اللي نثبته ما أثبته الله في كتابه. في الحتة دي بقى ضلت فئات، فعندك ناس اسمهم القدرية، دول نفوا إيه؟ مين شاطر؟ إحنا عندنا مشيئتين أهه، نفوا أنهي مشيئة؟ مشيئة العبد. نفوا مشيئة العبد، وفي مقابلهم مين؟ الجبرية. الجبرية نفوا مشيئة العبد وقالوا إن حركاتك ما فيش حاجة اسمها حركات، لا أنت صلاتك زي نبض قلبك كده مالكش تحكم، أنت قمت صليت زي كان قلبك بايه؟ فالحاجات دي طبعاً مجالها العقيدة، والناس بتدرس الفرق دي وإزاي نرد عليهم وكده. إحنا بقى أو أهل السنة يعني أثبتوا المشيئتين وأثبتوا العلاقة اللي أثبتها الرب سبحانه وتعالى، شكل العلاقة إيه؟ ما حدش يعرف. يقعد بقى يقول لك إيه: "أصل هو زي المدرس اللي عارف التلاميذ وعارف هيجيبوا إيه"، ما تسمعش لحد، أنا عارف الكلام اللي بيتقال وعارف أنا بقول إيه، ما تسمعش، سد ودنك واخرج، اقفل الفيديو، اقفل المقطع، القدر سر الله في خلقه، ده النبي اللي قال كده عليه الصلاة والسلام، وقال صلى الله عليه وسلم: «إذا ذُكر القدر فأمسكوا». دي النصيحة النبوية، أنت بقى مش عاوز تسمع الكلام أنت حر.

فدي الشخصية "الاكسترنال" اللي كل حاجة هو غيري اللي مسؤول، دي بتعمل بقى مشاكل. أول حاجة مشاكل فين؟ إنك عمرك ما هتتغير. فدي مثلا في ملف غزة: "حسبي الله ونعم الوكيل في الحكومات، حسبي الله ونعم الوكيل في الرؤساء، حسبي الله ونعم الوكيل في الهيئات الدينية، حسبي الله ونعم الوكيل في العلماء".

طيب وأنت؟ البعيد إيه؟ يعني مثلاً ولي من أولياء الصالحين! واللطيف بقى، إنتوا ده ما بتشوفوش إحنا بنشوفه، الرسائل اللي على الخاص اللطيفة بقى؛ واحد يعمل لك "أكونت" لسه عامله من ربع ساعة ويروح باعت لك: "أين الحديث عن..." مش عارف إيه، إنت لو تقصد بقى تبقى هو إنت في كل الأحوال إنت فاسق كافر؛ يعني هو بيديك الخيارات، فإنت لو تقصد كذا تبقى إنت مثلاً فاسق، إنما لو كذا بقى إنت كافر، فاختار! وهو ما عندوش الجرأة إنه يبعت لك من "الأكونت" نفسه، أنا مش بقول له اطلع، قول إنت ابعت لي من "الأكونت" بس.

حاجة في منتهى العجب، يا أخي سبحان الله، كل سيسأل عن فعله. خلاص، وأنا هنا مش قاعد بعتذر عن العلماء ولا عن الدعاة، أنا ما أصلحش أن أعتذر عن هؤلاء، إنما اللي عاوز أقوله إن عقلية إحنا تبقى كده. أنا عليا إيه؟ أنا يوم القيامة مش هتسأل عن الأزهر ولا هتسأل عن العلماء ولا عن الدعاة ولا عن الحكومات ولا عن الرؤساء، أنا هتسأل: أنا اللي كان المفروض عليا أعمله إيه؟ وعملته ولا ما عملتوش؟ ولا مقصر فيه؟

فالوقت اللي حضرتك عملت فيه "فيك أكونت" وشغلت دماغك عشان تروح تبعت للناس مثلاً اللي على الفيسبوك ولا اللي على غيرهم، وقاعد بالساعتين تلاتة بتعمل ده، أكيد ما بعتش "الأمجد"، هو مش حامي حمى الأمة. الوقت ده لو كنت حضرتك قمت صليت لك ركعتين وابتهلت بين يد الله ورأى منك خضوعاً وبكاءً وذلاً وانكساراً كان أولى بك. أو غير ذلك من الأمور، أنا مش عاوز في ده، إحنا عندنا دروس كتير اسمعوها؛ إيه الواجب اللي علينا؟ إيه اللي نعمله؟ لأن دي الأسئلة اللي محيرة دلوقتي للشباب. فعندنا ملف كامل اسمه ملف غزة تقدروا تسمعوه، أظن يمكن أكثر من 50 ساعة بالكتب اللي قريناها.

دي عقلية إيه؟ إحنا كنا في "الاكسترنال"؛ فأنا مش عاوز أقول بقى نتخلى عن العقلية "الاكسترنال" لكن نحسن إدارتها. نحسن إدارتها يعني عارفين إن في جزء ده قدر ربنا سبحانه وتعالى، وكيف نتعامل مع القدر ده؟ التفكير بالعقلية المظبوطة اللي هو: ده قدر ربنا، ده خارج عني، أنا أتعامل إزاي؟ ده اللي في إيدي، ده اللي في إيدي أعمل فيه إيه مع القدر ده؟ واتكلمنا فيه كتير برده في دروس ملف غزة اللي هتلاقوه إن شاء الله. الفكرة هي: إيه الأمر الشرعي في الأمر القدري؟ يا رب، ده أمرك القدري، إيه بقى أمرك الشرعي في الأمر القدري؟ أعمل إيه أنا دلوقتي؟ أنا مش حد غيري، أنا أعمل إيه يا رب؟

العقلية الرابعة، عقلية اللحظة الراهنة أو اللحظة الحاضرة، وده مصطلح إحنا قلناه لكم قبل كده، مين اللي بيحضر معانا من زمان؟ حد فاكر؟ في قصة يوسف، زمان قوي يعني من كم سنة. مصطلح إحنا عاوزين يا جماعة نتخلى عن فكرة عقلية اللحظة الحاضرة أو اللحظة الراهنة، اللي هو بلفظ آخر قلناه برضه: إن المشكلة بتحتويه مش هو اللي بيحتوي المشكلة.

يعني إيه؟ الأول إحنا العقلية "الاكسترنال"، إحنا قلنا في غزة التفكير هيكون عامل إزاي، في ملف الثانوية العامة واضح جداً مش كده؟ "الوزير مش عارف إيه، الامتحانات عاملة إزاي"، ويقعد يعدد حاجات كتير، وتيجي تصدمه بسؤال واحد تقول له: هو إنت ثانوية عامة لوحدك؟ ولا في ناس جابت كذا وناس جابت كذا وناس جابت كذا؟ فيقف يبل ما يعرفش يرد. يبقى المسألة إن إنت في واقع كنت تقدر تحسن التعامل مع الواقع ده، كان عليك حاجة تقدر تعملها ما عملتهاش. دايماً نفكر كده: أنا في إيدي إيه أعمله؟ «مَتَىٰ سَاعَتِي مَا أَعْدَدتُ لَهَا»؟ اسأل الأسئلة: أنا أعمل إيه؟ «مَتَىٰ سَاعَتِي ۖ مَا أَعْدَدتُ لَهَا»؟ ده السؤال المفيد.

طيب العقلية اللي بعد كده، عقلية اللحظة الراهنة أو اللحظة الحاضرة، اللي هو المشكلة بتحتويه مش هو اللي بيحتوي المشكلة؛ بيبقى منغمس في اللحظة الحاضرة. محتاجين يا جماعة برضه نتخلى عن هذا النمط من العقليات. نوع العقلية ده ربنا عز وجل ربى نبيه ﷺ لما انغمس في اللحظة الحاضرة، فين حد فاكر؟ قلناها في درس تاني، فلعلك في أول درس أو ثاني درس في سورة الكهف، إحنا خلصنا سورة الكهف تدبر: ﴿فَلَعَلَّكَ بَاخِعٌ نَّفْسَكَ عَلَىٰ آثَارِهِمْ إِن لَّمْ يُؤْمِنُوا بِهَٰذَا الْحَدِيثِ أَسَفًا﴾ [الكهف: 6]. فربنا لم يقبل ذلك من النبي محمد ﷺ. وفي الآية الأخرى: ﴿فَلَا تَذْهَبْ نَفْسُكَ عَلَيْهِمْ حَسَرَاتٍ﴾ [الكهف: 6].

بلاش نبقى منغمسين في اللحظة الحاضرة، بلاش المشكلة تحتوينا، إحنا اللي نحتوي المشكلة. يعني إحنا اللي نحتوي المشكلة مش المشكلة تحتوينا. طول ما إنت بره المشكلة هتقدر تشوف أولاً تشوف المشكلة في حجمها الطبيعي، مش هتضخم حاجة. ممكن المشكلة تبقى نقطة، لكن إنت غرقان في النقطة دي، لكن هي نقطة، ولو طلعت بره هتشوفها نقطة. لكن إنت غرقان في النقطة دي ليه؟ لأنك مستغرق في اللحظة الحاضرة.

إيه اللي هتعمله؟ إنك بعد ما تشوف المشكلة في حجمها الطبيعي لما تخرج بره، هتشوف حلولها، هتشوف حلولها. إنما طول ما إنت جواها إنت مش شايف، إنت غرقان خلاص. إزاي مثلاً؟ نبي الله يوسف عليه السلام دخل السجن، وممكن واحد في مكان يوسف يا جماعة يستغرق خلاص. يعني إيه؟ أولاً يوسف مش أي حد، هو برضه نفسه نفس شريف، داخل في قضية إيه؟ قضية شرف، وبعدين حواليه بقى مجرمين ولصوص ومش عارف إيه، وبعدين الميديا بره هتقول كلام ولا هتقول كلام امرأة العزيز؟ يعني برامج التوك شو ما يطلعوا، هم بيقبضوا من مين؟ من العزيز، فهيقولوا كلام مين؟ مرات امرأة العزيز، مش كلام يوسف. فيعني في ضغط مجتمعي كمان على يوسف شديد جداً، هو في أكثر من إن الراجل عرف إن يوسف على حقه، راح بعته السجن عشان مراته قالت؟ يروح السجن، هو في أكثر من كده؟ ما هو إمتى راح يوسف السجن يا جماعة؟ مش لما لقوا...

الراجل على الباب. لا، ده يوسف بعد ما لقوه على الباب واكتشف وعرف يوسف فين، لسه في البيت. يعني يا ريته طردوه، لا، لسه في البيت يوسف، لسه في. مش كده؟ ما هي لما سمعت بمكرهن أرسلت إليهن وأعتدت لهن متكئاً وقال اخرج عليهن، يبقى يوسف فين بقى إن شاء الله؟ في البيت.

وبعدين تتلم. قالت: ﴿وَلَمَّا يَفْعَلْ مَا آمُرُهُ لَيُسْجَنَنَّ وَلَيَكُونًا مِّنَ الصَّاغِرِينَ﴾، لو ما عمل، وبتقول ده قدام النساء طبعا. احنا أسهبنا في عشان نعرف نفسية المجتمع ده كانت عايشة إزاي؛ يعني أصل محنة يوسف مش محنة سهلة، بس محتاجه تدبر، وده اسمعوه بقى في سورة يوسف. الشاهد، يدخل السجن يوسف وحداني، هيعمل إيه؟ قاعد في الزنزانة في جنب وحاطط إيده على دماغه ومَالوش دعوة بحد؟ ليه؟ مستغرق في اللحظة الحاضرة. يوسف ما كانش كده عليه السلام، لا، يوسف بيمارس مهامه عادي جداً: أنا مهمتي الدعوة إلى الله، برة بدعو إلى الله وجوة بدعو إلى الله، مهمتي أن أكون محسناً، فلما هكون على خزائن الأرض هيقولوا: ﴿إِنَّا نَرَاكَ مِنَ الْمُحْسِنِينَ﴾، وأما أكون في السجن هيقولوا: ﴿إِنَّا نَرَاكَ مِنَ الْمُحْسِنِينَ﴾.

فأنا مش مستغرق في اللحظة الحاضرة، ده يوسف عليه السلام. خلاص، مات النبي عليه الصلاة والسلام، مثال آخر يعني عشان نخلص من عقلية عشان نفهم إيه عقلية اللحظة الراهنة أو الحاضرة، يموت النبي عليه الصلاة والسلام ويحصل اللي أنتم عارفينه‌؛ عثمان يقعد أو يقعد وعليه ياخد الناس بإيه، الأطفال ياخدوه من إيديه كده يجروه في طرقات، يعني كان عقله ذهل، وعمر رضي الله عنه يرفع سيفه: وما مات محمد، ولكن ذهب إلى كذا كذا كذا، كله استغرق في اللحظة الحاضرة، كله استغرق. ومن لها؟ ما فيش غيره. برة كان في العوالي ما كلمش حد، جه ما كلمش حد خالص، شق الصفوف ودخل وشاف النبي عليه الصلاة والسلام وقال ما قال وطلع، وعارفين بقى القصة كلكم عشان إيه ما نعيطش، فاستغرقوا في اللحظة الحاضرة. الأزمة لما بتشتد ممكن الأكابر يحصل لهم كده، ممكن يحصل كده للأكابر: ﴿حَتَّىٰ إِذَا اسْتَيْأَسَ الرُّسُلُ وَظَنُّوۡاْ أَنَّهُمْ قَدْ كُذِبُوا جَاءَهُمْ نَصْرُنَا﴾ [يوسف: 110]، فممكن الأكابر يحصل لهم كده في وقت، آه، طب ده شيء ممدوح؟ لا، مش ممدوح، يعني ده احنا لازم نحاول نخرج منه.

فملف غزة طبعا واضح جداً إنه يحصل برضه، أو الملفين بقى عشان ما نطولش: غزة وثانوية عامة. لو استغرقنا في اللحظة الحاضرة وما شفناهاش المشكلة على حجمها أصل إيه حجم المشكلة يا جماعة أنتوا عارفين؟ يعني احنا لا نهون من المشكلة، لا نهون أبداً، لكن إيه حجم المشكلة الطبيعي بهدوء كده؟ احنا في حقبة من الحقب، في زمن من الأزمنة، يعني احنا ربنا ما خلقش الدنيا سنة 2023 وهتخلص 2027، مش كده؟ يعني احنا في حقبة وزمن من الأزمنة، ودي بقعة من البقاع، اللي حصل في التاريخ ولسه هيحصل في المستقبل حصل أشنع من كده وهيحصل أشنع من كده، صح ولا لا؟ أنا كده يعني كده بقول إيه؟ فكك من غزة؟ لا، ده ليس منا، ده إيه؟ ولا مش ليس منا؟ اللي هو الحديث، قولوا أي حديث عشان إيه؟ آه، من تبع المسلمين فليس منا؟ هي كده العكس، مش كده؟

والحديث الثاني إيه؟ قولوا أي حاجة يا جماعة أرجوكم أنا تعبت، أيوه: «مثل المؤمنين في توادهم وتراحمهم وتعاطفهم مثل الجسد الواحد إذا اشتكى منه عضو تداعى له سائر الجسد بالسهر والحمى». درسك لو نقح عليك الجسم بينام والدرس بيفضل ينقح هو لوحده صاحي الجسم كله ما بينامش. فأنا مش بقى أهون، لكن بقول لك شوف المشكلة في حجمها الطبيعي، أن ده حصل وبصورة أعنف من كده بكتير للمسلمين -ما بتكلمش عن الكفار- للمسلمين ولسه هيحصل، فتبتدي تهدا لقدر الله عز وجل وتطمئن لقضائه سبحانه وتعالى وتفكر بهدوء عشان تعرف هو أنا إيه المطلوب مني أعمله؟ فدي عقلية اللحظة الراهنة.

كده فات قد إيه؟ طيب، نقف هنا، ما طولش عليكم. قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.