بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد. أما بعد:
كنا ابتدينا الكلام عن الغضب، وده باب مهم جداً جداً، لأن الغضب كما قالوا غول العقل، بيغطي على العقل. فالإنسان يخرج في حالة غضبه إلى أخلاق لم يعهدها من نفسه. وقلنا إنه كتير لما بتغضب تعمل حاجات بعد الغضب ما يروح منك تقول: هو أنا إزاي عملت كذا؟ ما تتخيلش كده، وممكن تصل إن في ناس بتقتل، مش كده؟ بس في حال غضب، تيجي تقول: طب أنت قتلتها ليه؟ طب أنت قتلتيه ليه؟ طب أنت قتلته ليه؟ تلاقي حاجة سبب ما لا يستدعي، لكن هو الغضب.
وقفنا على قول المصنف: فصل في بيان الأسباب المهيجة للغضب وذكر علاج الغضب. قد عرفت أن علاج كل علة بحسم مادتها وإزالة أسبابها. ولذلك يا شباب إحنا دايماً نقول مهم جداً جداً نشخص الداء. الشباب كتير بيجي يشتكي من حاجات ويفتكر أن دي مشكلته ويروح يعالج غلط. وقلنا الكلام ده قبل كده في مسألة الشباب، أكبر مشكلة بتقابلهم غض البصر وما يستدعي، فدايماً أقول للشباب: دي ما هياش الداء، دي أعراض للداء، داؤك في قلبك. دي بالضبط زي السخونية، ما فيش دكتور تروح تقول له: أنا عندي سخونية، فيقوم يعالج السخونية، أو ممكن بسرعة ينزل لك السخونية عشان ما يحصل ما، لكن لازم يعرف سبب السخونية إيه ويعالج السبب. فإيه بقى سبب الغضب؟ لازم نعرف أسباب الغضب عشان نعرف نعالج الغضب.
قال: فمن أسبابه العجب. من أسبابه العجب أن الإنسان يبقى معجب بنفسه ومعجب برأيه، فما يستحملش إن حد تاني يرد عليه رأيه؛ فإذا رُدَّ عليه رأيه غضب، ورأى ذلك انتقاصاً من نفسه. خليني أقول لكم قاعدة كده مهمة جداً قبل ما نبتدي ودي استطردها في اللي جاي. بيقولوا -ركزوا في الكلمتين الجايين دول مهمين جداً وهيفكوا لكم نسبة كبيرة من مشاكل حياتكم الاجتماعية، يعني التعامل مع البشر-: أي حدث بيحدث فبتاخد عليه فعل، هو بيمر بأربع مراحل: أول حاجة حدوث الحدث، ثاني حاجة إنشاء قصة في ذهنك أو في اللاوعي عندك على هذا الحدث، ثالث حاجة تتولد مشاعر، رابع حاجة رد فعل ليك.
فين المشكلة اللي بتحصل عشان نعرف نكسر المشكلة دي ونحاول نفتت المواضيع؟ مثلاً، ندي أي مثال: دلوقتي مثلاً الشيخ محمد جه متأخر، فأقوم على طول في ذهني أقول: آه، يبقى هم أولاد الذين اللي استقطبوه وعملوا علي... شوف أنا عمال أعمل إيه؟ حكاية على الحدث. مش كده؟ فبنيت حكاية على حدث، الحدث إيه هو؟ إنه جه متأخر. الحكاية اللي دخلت في دماغي إن لا، ده في قصة وحدوتة بتحصل من ظهري وهيدمروني. فيتولد مشاعر، مشاعر إيه؟ ما بعرفش بقى دي المشكلة، وأفضل أحبهم برضه يعني هم يعملوا اللي يعملوه وأفضل أحب فيهم، ما أعرفش ليه. طبعاً الشيخ محمد شيخي من زمان، يعني ده على راسي من فوق ما أقدرش، ابن بار ما شاء الله بيسمع الكلام، ربنا يغفر لي يا رب الكذب. فيتولد مشاعر، كره أو حقد ناحية فلان أو مشاعر، فأروح آخد تصرف، أبني تصرف على الشعور ده، اللي هو بقى أقطعه، أتخانق معاه، أغضب منه، أضربه، أياً كان بقى.
المشكلة فين هنا؟ المشكلة في حتة إن الحدث بيتحول لقصة، وهو ما فيش حاجة، الراجل مسكين وجاي ومجتهد إنه يوصل في الميعاد وعمل كل الأسباب، لكن حصل له ظرف، الموضوع بسيط جداً. القصة اللي أنت حولتها في دماغك دي لا هي موجودة، ما مش حقيقية، أنت اللي بنيت قصة على حدث. الحدث ده يحتمل أكثر من احتمال، أنت ليه أخذت احتمال واحد ومشيت وراه لنهاية الخط؟ فاهمين دي يا جماعة؟ يبقى فلان دخل، قلت له: السلام عليكم، ما ردش علي. ده بيقل مني، ده ما بيحترمني، وهو فلان ما سمعكش، بسيطة جداً. فلان وهو داخل دماغه مشغولة في حاجات تاني، فمش منتبه لوجودك أصلاً، فأنت اللي بنيت قصة على الحدث، فالقصة دي ولدت جواك مشاعر، فالمشاعر دي هي اللي أنتجت السلوك أو الفعل.
وده بيحدث كثيراً حتى بين الأزواج، إن يحدث فعل من الزوجة أو فعل من الزوج، يقوم يترجموه لقصة كبيرة، هي الموضوع مش كده، الموضوع أبسط من كده بكتير. يعني لما عملت ده أنا مش مركز، إن كل التبعات دي جت في دماغك وبنيتي حدوتة، فيتولد مشاعر وأنت ما تعرفش حاجة، أنت راجل مسكين قاعد في حالك، أنت مش واخد بالك إن في قصة بتتبني ومشاعر بتتوّلد وفي فعل هيحصل دلوقتي، خناقة هتقوم على حاجة أنت مش دريان، يعني أنت ما تقصدهاش. أو العكس، إن في راجل هيتقمص منك دلوقتي على حاجة أنت ما تقصديهاش أصلاً، أو أنت لما عملتيها عملتيها بنية هو خدها بنية ثانية أو بمحمل آخر. فهمتوا الترتيب ده؟
علاجه فين بقى؟ علاجه في حاجة بيسموها القاعدة الذهبية للتواصل، ما تتوقعش، روح تواصل على طول. يعني إيه؟ يعني دلوقتي حصل الحدث، فأنا هبتدي أبني قصة ويتولد مشاعر، قبل ما تعمل كده يا فلان: هو دلوقتي حصل كذا كذا، فالصراحة لما ده حصل أنا ترجمت واحد اتنين ثلاثة، واسمع من اللي قدامك، واضح؟ اسمع منه. المفروض إن يبقى عندنا الشجاعة إن لو ده: آه، لا ده اللي حاصل، آه هقول لك أنا، أنا عاوز أدمرك وأدمر دعوتك وأنا متفق معاهم وهم أغووني بالفلوس. كده. لكن ده ممكن ما يحصلش في أوقات، يبقى أنت خلاص حطيت نقطة، ومع تكرار نفس المواقف والتنبيه عليها أكثر من مرة، ساعتها ممكن تبتدي تبني تصور، إنما مش من أول موقف تبني التصور اللي عندك ده وتبتدي تاخد قرار وتبتدي يحصل جواك مشاعر سلبية تجاه فلان. تواصل واسمع غيرك، وشوف وجهة نظره إيه، وشوف الموقف يحتمل وجهة النظر دي ولا ما يحتملهاش، وبين أن ده زعلني، وبعد كده نقدر نعمل ده بشكل أفضل.
قبل ما تبني قصة على الحدث، هتلاقوا يا شباب كتير جداً جداً من مشاكلكم الاجتماعية ومشاكلكم في التواصل ده أسس وأساس لوقوع المشكلة، اللي هو مرحلة انتقال الحدث من كونه حدث لكونه قصة. وفي الغالب القصة دي صاحب الحدث ما يبقاش دريان عنها حاجة، يعني هو بيبقى اللي عمل الحدث والحدث ده له كواليس أنت ما تعرفهاش، ويمكن هو حريص عليك أكثر من نفسك، لكن شوف أنت أخذت الحدث وترجمته وعملت به قصة، والمسكين ما يعرفش عنها حاجة، يعني يا ريته أنت واجهته لا، ما يعرفش حاجة خالص. فقل مثل ذلك بقى في الغضب، أنا إيه اللي جاب الموضوع ده في دماغي؟ إنه أول سبب من أسباب هياجان الغضب: العجب.
طيب أنا لما أبقى إنسان معجب برأيي ومعجب بنفسي وشايف ليا قدر، وأجي أقول حاجة فترد علي، يقوم إعجابي بنفسي ده يخليني أغضب، أنا إزاي يترد علي في المجلس؟ إزاي أقول حاجة ويتقال عكسها؟ فأغضب غضب شديد، طبعاً ده علاجه بإيه؟ أول حاجة علاج العجب لأن العجب ده مش حاجة، دي حاجة تودي في داهية. يبقى أنت معجب بنفسك، روح عالج عجبك، وإحنا عندنا باب هنا كامل في علاج العجب، هنجيله إن شاء الله إزاي نعالج العجب لو ظهر عند أحدنا عجب. ثاني حاجة ودي بقى اللي يعني استدعت هذا الكلام الذي قلته، إن أنت برضه فهمت أنه بيرد عليك، شوف ترجمتها لإيه؟ ترجمتها أنه ده بيقل مني، ده ما بيحترمنيش، ده عاوز مش عارف يعمل فيا إيه، وهو مش كده، هو ممكن يكون المسكين بالعكس حريص عليك، ولما اعترض رأيك اعترضه حرصاً عليك، مش إسقاطاً لك. يعني حبه هو اللي دفعه أنه يعترض، مفهوم؟
وطبعاً سيدنا النبي عليه الصلاة والسلام عادي جداً يتكلم وييجي الصحابة يعترض وعادي، وممكن الاعتراض كمان يبقى فيه يعني يكون غيره، إيه اللي منه؟ أنتوا عارفين في غزوة بدر قال له إيه، قال له: ده المنزل ده منزل أنزله الله فليس لنا أن نتقدم ولا نتأخر، أو هو الرأي والمشورة الحرب والرأي والمشورة. قال: بل الحرب والرأي والمشورة، قال له: فإن هذا ليس بمنزل. كلمة شديدة جداً، سيدنا النبي عليه الصلاة والسلام بيقول إحنا هنبقى هنا، فيقول له ده وحي من ربنا؟ سمعنا وأطعنا. ولا لا ده الحرب والمكيدة؟ قالوا لا، حرب ومكيدة وأنا رأيي أن المنزل هنا. فكان ممكن يبقى الرد إيه مثلاً؟ والله مكان جميل وموفق وكذا، لكن ممكن يبقى غيره أولى منه لو رحنا هنا مثلاً ونبتدي أعرض وجهة نظري.
وبالمناسبة دي برضه يا جماعة حاجة مهمة، أنا كل الكلام ده في الغضب، لأني هو إحنا إيه اللي بيشعل الغضب؟ سوء التواصل ده. أنا دلوقتي عاوز أبين رأيي، جميل، عندنا كده برضه قاعدة في التواصل: ما تبتديش جملة بـ "لا"، ما تبتديش جملة بـ "لا"؛ دي أنت حطيت حاجز بينك وبين اللي قدامك وأنت لسه ما اتكلمتش. خلاص، تلاقي ناس دي لازمة بقهم، يعني إيه؟ يقول لك مثلاً: إحنا هنروح، تقول له: "لا"، "لا" دي أنت خلاص حطيت حاجز، ممكن ببساطة: والله جميل فعلاً الطريق ده حلو ولسه مسفلتينه جديد وبتاع، بس في طريق بقى تاني أقرب لو لفينا، في الآخر أنت قلت نفس الكلام بس من غير ما تحط حواجز بينك وبين اللي قدامك. فالصحابي الجليل قال له إيه؟ قال له: ده الحرب والرأي، قال له: آه ده الحرب؟ قال له: فإن هذا ليس بمنزل. غلط، هذا الاختيار خطأ. الشاهد بقى هو ده اللي يعنينا، سيدنا النبي عليه الصلاة والسلام، اللي هو يعني سيد الناس وأفضل الناس وكل حاجة، غضب وإزاي تقول لي كده وما فيش غير المكان ده و... خلاص، سمع منه ونزل على رأيه وكان ده أول انتصار بدر أصلاً، اختيار المكان الاستراتيجي المناسب للمعركة.
فالعجب يدفعنا للغضب، يبقى علاجه أول حاجة أنك تعالج العجب في نفسك، وثاني حاجة تفهم أن اللي قدامك لما خالفك أو بين اعتراض أو كذا، مش شرط يكون يريد أنه ينقص من قدرك، وبرضه تفهم أن ده ما هواش إنقاص من قدرك أصلاً، تفهم أن ده ما هواش إنقاص من قدرك. ولذلك الناس الذكية في التواصل، حتى لو عرفت أن اللي قدامها خلاص هي متأكد أن اللي قدامي ده هو يريد التناقص مني، بتعرف تكسب المواقف دي برضه، يعني هو يريد التناقص مني، لا، أنا هظهر تواضعاً زائداً وقبولاً زائداً للبتاع، وهناقش الفكرة وماليش دعوة خالص بأسلوبه، فيقوم يظهر للي قاعدين... ده أنا بتكلم حتى في يعني حتى مع العدو اللي أنت خلاص عرفت أنه حاقد عليك ولا حاسدك ولا كذا، تقوم بتكسب الموقف وبتكسب الناس. ماشي، يبقى ده سبب من أسباب هياجان الغضب عند الناس، العجب.
والمزاح، المزاح برضه يوقع الغضب بين الأقران، لأن الشيطان... ما إحنا برضه يا جماعة إحنا عمالين نتكلم في التواصل وبتاع، ما تنساش أن في طرف ثالث معانا في القصة: الشيطان. الشيطان ينزغ، ولذلك ربنا سبحانه وتعالى قال إيه: ﴿ادْفَعْ بِالَّتِي هِيَ أَحْسَنُ﴾ [فصلت: 34]، بس مش حاجة حسنة وخلاص، أحسن السيئة. والآية الثانية اللي فيها أحسن برضه إيه؟ ﴿وَقُل لِّعِبَادِي يَقُولُوا الَّتِي هِيَ أَحْسَنُ﴾ [الإسراء: 53]، ليه؟ لأن الشيطان ينزغ، ينزغ بينهم، إن الشيطان ينزغ بينهم. فالشيطان ينزغ. طيب علاج ده إيه؟ أن يقولوا التي هي أحسن، نقوم نغلب الشيطان في حتة النزغ دي، ييجي ينزغ يلاقي الكلمة ما لهاش مدخل خالص، هنزغ منين؟ فمحتاجين نركز في ده. وما فيش حاجة اسمها يا جماعة إحنا في باب الغضب ده كله، إحنا ما خرجناش على الغضب، لأن هو دي الحاجات اللي بتعمل غضب أصلاً بين البشر. ما فيش حاجة اسمها ما هو أنا كده، أنا طيب وعلى نياتي فبقول اللي جوه، بص يا جماعة ما فيش حد بيطلع نفسه غلطان، وكل حاجة وحشة ممكن نلاقي لها فلسفة تطلعها حلو. الشيطان بنفسه جاء له أمر من ربنا مباشر كده: "اسجد"، فيها إيه اللي ممكن يتقال هنا بقى؟ يعني إيه اللي ممكن يتقال؟ لقينا فلسفة برضه، مش كده؟
قال لها فلسفة عادي جدا: «أنا خير منه خلقتني من نار». وبعدين بعزتك عادي جدا يعني ده أنا هحلف بعزتك، وهو في بعد كده أمر مباشر: اسجد؟ هنطلع لها فلسفة برضه. فما فيش حاجة اسمها أصل أنا طيب وعلى نياتي؛ شوف هو كده بيعمل إيه، بيحمل اللي قدامه مشكلة، جالي طلعت طيبة ونية طيبة وأنت بقى اللي عندك سوء ظن، روح عالج نفسك. إيه ده إن شاء الله؟ طيب يا ابني أنت مش عارف تعمل علاقة واحدة سوية في حياتك. كل دول ما بيفهموش وأنت البعيد اللي بتفهم؟ يعني أنت طيبتك دي يعني أنت خلاص من عالم تاني غيرنا؟ طيبة شديدة لدرجة إن ما فيش حد شبهك وأنت في المكان الغلط.
أو الثاني اللي يقول لك إيه: أنا ما عنديش رمادي، أنا يا أبيض يا أسود. هو مش عايز يقول أنا قليل الأدب؛ أنت قليل الأدب. ما عندكش رمادي إيه ويا أبيض يا أسود، والوحش بقول له وحش في وشه؟ آه، ما أنا بقول لك أنت قليل الأدب، روح عالج قلة أدبك؛ مش تفلسف قلة أدبك إنك راجل ما عندكش رمادي ويا أبيض يا أسود، ولا الوحش بقول له وحش في وشه وما أعرفش أبقى منافق زيكم، بس يروح يشتم بقى في القاعدين كلهم. راح خسر الباقيين كده؛ يعني هو كان عنده مشكلة مع بني آدم أو لطش في القعدة كلها خسر كل اللي قاعدين، ما بعرفش أبقى منافق زيكم. أهو كل هي دي الحاجات اللي بتورث الغضب يا جماعة.
منها المزاح بين الأقران، يبقى واحد يدخل يتريق على إنسان، يقوم الثاني يغضب، يعني أنت بقى كل ما تشوفني تستلمني؟ فنعمل إيه؟ ما نعملش كده طبعاً، ولو عملنا ده مع إنسان ممكن إنسان يتقبل ده وإنسان تاني ما يتقبلش ده، فأبقى واعي للكلام ده. ماشي. وبرضه من معلش أنا أي حاجة بفتكرها في مسائل التواصل دي مهمة عشان باب الغضب ده باب شديد، وباب كبير مدخل كبير من مداخل الشيطان. يعني شوفوا حتى ترتيب الشيخ لكتاب الغضب، جه في الأول يعني قبل ما يتكلم عن الكبر والعجب والرياء لسه ما اتكلمناش عن الحاجات دي، جاب لك الغضب قبل كل ده.
كان الناس مستنية نتكلم بقى عن آفات القلوب؛ اتكلمنا عن الرياء، واتكلمنا عن العجب، واتكلمنا عن الحسد، واتكلمنا... لا جاب لك الغضب قبل كل ده، لأنه فعلاً باب كبير في التقاطع بين الناس والتصارم وكذا، وباب كبير للشيطان. إن الشيطان قد أيس أن يعبد في جزيرة العرب ولكن في التحريش بينهم. يحرش بين الناس؛ يبقى ده زعلان من ده، وده زعلان من ده، وده غضبان من ده، وده غضبان من ده، يضيع دينك.
عاوزين نبقى واعيين لحتة هنا برضه في كلمة المزاح دي: إن فلان هزر مع علان فعلان اتبسط وضحك وفرفش، مش معنى كده إن نفس الهزار ده يقبله منك، مفهومة؟ يعني أنا دلوقتي قلت إيه مدمرني وبتاع ومش عارف، ما يجيش بقى أنا أخلص الدرس يا اللي مدمرين دعوة الشيخ ما هيزعلوا، هم يقبلوه مني غصب عنهم يعني. فمش لازم إن فلان طالما فلان اتهزر معاه بكذا وقبل، يبقى أنا لو هزرت معاه نفس الهزار يقبل لا. دي فيها عوامل كتير جداً جداً، هو شايفك إزاي وشايف الثاني إزاي، مكانتك عنده إيه ومكانة الثاني عنده إيه، ففي عوامل كتير غير نفس الهزار. فخلينا واعيين يا جماعة للحاجات دي، يبقى المزاح كذلك من أسباب تهييج الغضب.
قال والمماراة: المجادلة. ولذلك الشرع نهى عن المماراة، «أنا زعيم ببيت في ربض الجنة لمن ترك المراء». أكبر شبهة بتتقال في المماراة إيه؟ أنا عندي حق، مش كده؟ تلاقي واحد بقاله ساعتين عمال يناقش واحد، تيجي تقول له يا عم خلاص ما خلصت يعني، يقول لك لا ما أنا اللي معايا الحق وأنا أسيبه؟ فسيدنا النبي عليه الصلاة والسلام يقول في الحديث: «أنا زعيم ببيت في ربض الجنة لمن ترك المراء وإن كان محقاً». حتى لو معاه الحق يترك المراء لله سبحانه وتعالى.
طيب ليه؟ لأسباب منها ده إن المماراة تورث الغضب وتذهب كل إنسان ينتصر لرأيه، ولذلك الإمام أحمد، دلوقتي أنت لقيت واحد على بدعة، فرحت نصحته وقلت له اللي أنت بتعمله ده بدعة وما ينفعش تعمل كذا وما ينفعش تقول كذا. في أحوال عقلية، الحال الأول إنه يستجيب يقول لك جزاك الله خيراً، ما كنتش أعرف إنها بدعة وخلاص تبت إلى الله، خير وبركة دي ما فيهاش إشكال. الحال الثانية إنه يبتدي يناقشك، ساعتها نعمل إيه؟ لا، لو بيناقشك والظاهر عليه علامات إرادة معرفة الحق، يعني هو بيناقش: يا فلان ده كذا بدعة، فيقول لك والله طيب ليه بدعة؟ طيب مين قال؟ طيب ممكن بس نشوف؟ طيب أصل أنا كان حد قال لي إن فلان بيقول كذا، ابتدى يظهر عليه علامات إنه فعلاً عاوز يعرف، فده تناقشه طالما هو يريد معرفة الحق.
أو تظهر عليه علامات إنه بيماري ويجادل، يعني خلاص أنت بينت له وبينت له الأدلة التي عندك وبينت له كلام أهل العلم وهو مصر يناقش ويجادل، ساعتها تقف. الكلام اللي بقوله ده هو كلام السلف، والإمام الآجري في كتاب الشريعة له باب كامل بيلخص الكلام اللي أنا بقوله ده، فممكن يرجع إليه ويتقري، الباب ده مهم جداً في كتاب الشريعة للآجري، ذم الجدال والخصومات أو حاجة زي كده، ده مهم للشباب إنها تقراه لأن السوشيال ميديا عليها حاجات كتير من الحاجات دي، فافهموا فقه التعامل مع المخالف، فاقرأ هذا الكتاب الباب.
طيب، الإمام أحمد له نص في المسألة دي، إن إنسان جيت ببين له أو أنكرت عليه كان في باب الأمر والنهي وفضل أروح أنكر عليه تاني، وقال: إذا تذهب تنتصر لنفسك، هو الموضوع بعد كده بيبقى إيه؟ بيبقى انتصار للنفس. وفي علامات لكده يا شباب تؤكد كلام الإمام أحمد، أنت عارف لما تلاقي واحد على منكر وبعدين تروح تقول له إيه اتق الله، غالب الشباب بيروح يتكلم بلطف وبتاع فيقول لك إيه، وإحنا ندعو بالمعروف وننهى عن المنكر بغير منكر والكلام طيب صح، فيبتدي يكلمه بلطف وبتاع وسلفي، فالرجل يقول له ابعد أنت مالك أنت، ولو لو شتمه مثلاً بأهله ولا بتاع يقوم الثاني يحصل له إيه؟ يتحول ويضرب ويشتم ويبقى هو اللي بـ... طب أنا هسأل سؤال، التحول ده جه غضباً لله ولا لنفسك؟ ما هو لو كان غضباً لله يبقى أنت من الأول داخل كده، لو هي غضباً لله وأن حرمات الله تنتهك يبقى أنت من الأول داخل الدخلة دي. إنما الظاهر إن هو مش لله، لما ابتدى الموضوع يبقى في نفسك وفي حظ نفسك وحق نفسك غضبك زاد جداً لنفسك، مش لله، أوعى تقول لله، بدليل إن ممكن تعمل كده في تشويحة، ولا هقول لك بقى شتم ولا هقول لها، أو قال لك أنت مالك، اللي هو كلمة ممكن تبقى أبسط بكتير من المعصية اللي أنت شايفها اللي شايف فلان ده عليها، ساعتها يبتدي تقل أدبك بقى وتقول أنت أصل أنت مش متربي وأصل أنا جاي، وبعدين نيجي نقول لك يا فلان أنت ليه عملت كذا؟ ارجعوا بقى زي ما قلنا كل واحد عنده فلسفته، اللي هو إيه تقول ده لله؟ ده مش عارف إيه؟ لله فين؟ هذا لنفسك، ومهم يا جماعة جداً نكشف أنفسنا أمام أنفسنا عشان نعرف نعالج زي ما قلنا لكم.
فالمراء يأخذنا للغضب والمماراة، قال والمضادة، يعني المعاداة، ودي طبعاً درجة أسوأ كمان من المماراة، واضحة طبعاً يا جماعة المماراة. برضه حاجة عاوز أقولها قبل ما نمشي، إن كان الأمر أمر دنيا فأصل لا وجه في المماراة في، أنت بتضيع عمرك في إيه؟ فلان اللي جاب الجون ولا فلان، وتقعدوا تتخانقوا، أنت مضيع عمرك في إيه أصلاً؟ يا عم خلاص الاثنين شاطوها مع بعض ويعني أنت فك كبر دماغك، الدنيا ثقيلة يا عم. فلان عنده العربية الفلانية، لا ما ده عنده كذا، ده أصل باعها لا لسه عنده، وتقعدوا تتخانقوا وتتصارموا؛ فلان عنده، ما عنده اللي عنده، يعني الدنيا أهون من إن إحنا نقعد نجادل فيها أصلاً. وغالباً غالباً الدافع للمجادلة والمماراة مش نفس المسألة، هي برضه طلب إظهار العلو، اللي هو أول حاجة العجب ده، إزاي هو يبقى رأيه صح؟ إزاي أسكت عنه؟ مش نفس المسألة، يعني مش نفس هو العربية كذا ولا كذا ولا الجون جابه فلان ولا علان، مش هي دي المسألة اللي خلتنا نقعد كتير نقاوح. المضادة يعني بقى المعاداة، اتنين متخانقين مع بعض، فطبعاً واضح فكرة الغضب.
سيدنا النبي عليه الصلاة والسلام بقى لما بنقول لكم على فكرة إنك تغضب لنفسك وفي المعاداة والمضادة والمش عارف إيه، سيدنا النبي عليه الصلاة والسلام ما كانش يغضب لنفسه خالص، عجيب. سيدنا النبي عليه الصلاة والسلام فعلاً يا جماعة سيرته عجيبة يعني اللي يتأملها، أنا هديكم مثال واحد عشان تفهموا عظمة سيدنا النبي عليه الصلاة والسلام. الناس بتتكلم عنه كده، أنا دلوقتي لو مثلاً شيخ كبير معظم عند الناس، أو ملك دولة أو رئيس أو وزير أي حاجة حد له قدر عند الناس، وبعدين دعاك باسمك تعالى عاوزك عندي في البيت، أنت مش أنت اللي رايح له هو اللي داعيك، وبعت لك كمان عربية خاصة تجيبك لغاية عنده، وبعدين نزلت ركبت العربية الخاصة ورحت له بيته ودخلت بقيت أنت وهو بس ولا ثالث لكما، يعني مش قاعد في مجلس كبير لقيت داعي فيه شباب كتير وأنت واحد منهم لا ده انفرد بك، وبعدين لما انفرد بك مش انفرد بك مع حاشيته وكبرائه، لا قال لهم لا أنتم ارجعوا بقى كده أنا عاوزه لوحده أنا وهو بس. قلبك بعد هذا المشهد هو هو قلبك قبل هذا المشهد؟ يعني هتخرج عن الناس هتبقى عاوز تدوس على البني آدمين كلهم صح كده؟ أول ما تخرج من ماشي تف على الناس في الشارع، صح ولا لا يا جماعة؟
سيدنا النبي عليه الصلاة والسلام اللي عمل معاه ده ربنا، أنا رحلة المعراج دي العقل بيتشل قدامها والله العقل يصاب بذهول، أمام المشاهد العلوية التي رآها صلى الله عليه وسلم، ثم القرب والدنو لمكان لم يصل إليه غيره، أنتم فاهمين إحنا بنتكلم عن مين وعن إيه؟ مشاهد لا تتصور أصلاً يعني هي غير متصورة فعلاً، يعني الذي رؤي ما ينفعش بشر يوصفه. وبعدين رجع ينام على الأرض ويجلس جلسة العبد، ويأكل أكلة العبد، ويلقى على ظهره بقى اللي مش عارف إيه، وعادي. ده إيه ده؟ إيه ده؟ السيدة عائشة تقول: ما غضب لنفسه قط، ولا مرة يغضب لنفسه، ولا مرة، مع اللي حصل فيه ده مع كل لم يغضب لنفسه قط.
في غزوة أحد كاد يخلص إليه وكسرت رباعيته وشج وجهه الشريف عارفين القصة، وبعدين رفع إيده قالوا بس خلاص هيدي عليهم ويهلكوا ونخلص، قال إيه: «اللهم اهد قومي فإنهم لا يعلمون». وحتى المرات اللي دعا فيها على الكفار غضباً لله مش لنفسه، مش لنفسه، إنما هو في عز تمكنه مش هقول بقى وهو مستضعف، في عز تمكنه يجي له الأعرابي يروح شده من القميص فالرداء علم في رقبته الشريفة صلى الله عليه وسلم، ده في عز التمكن مش مستضعف، يعني ده في المدينة له دولة وله أشياع وله أتباعه وبإشارة منه الأعرابي ده يختفي. أعطني من مالي من مال الله فإنه ليس مالك ولا مال أبيك، فيعطيه غنماً بين جبلين، وكان كافر فيرجع لقومه يا قوم أسلموا فإن محمداً يعطي عطاء من لا يخشى الفقر عليه الصلاة والسلام، فهذه أخلاق نبينا عليه الصلاة والسلام. فأنت كل ما تيجي تغضب لنفسك ارجع وقول دي مش أخلاق النبي عليه الصلاة والسلام.
قال فمن أسبابه العجب والمزاح والمماراة والمضادة والغدر، معروف الغدر، وشدة الحرص على فضول المال والجاه. طيب شدة الحرص على فضول الجاه والمال يعملوا غضب؟ آه يعملوا غضب إذا لم تحصله. افهموا اللعبة الإبليسية يا جماعة، وده إن شاء الله ولا بلاش افهموا اللعبة دلوقتي ومش مهم إيه اللي هيحصل، في إبليسية مهمة جداً جداً افهموها، لو تأملنا وإحنا محتاجين نتأمل الحقيقة ده، نتأمل أول صراع بشري إبليسي، محتاجين جداً نتأمل ده، وده هيحصل قريب إن شاء الله، بس خلونا ناخد مشهد، مشهد قتل أحد الأخوين لأخيه. دلوقتي إيه اللي بيخلي يحصل مشاكل كبيرة بين الناس لدرجة القتل؟ اقعد قول أسباب كتير زي ما تقول هتلاقي معظمها بنسبة تعدي 90% النزاع على مورد نادر، يعني حاجة أنا هاخدها أنت هتاخدها فأنا اللي هاخدها، والمورد ده ممكن يبقى شيء محسوس يعني حاجة مال كده ممكن يبقى شيء ما هواش محسوس يعني الجاه، أو حسن السيرة لدرجة إن مثلاً مثلاً.
لو واحد مشهور بحاجة في بلد من البلدان، بوعظه أو بحسن صوته في القرآن أو أي شيء، ثم عرف أن هناك واحداً آخر أجمل منه صوتاً أو أكثر تأثيراً في وعظه في بلد بعيدة لا هو سيذهب إليها ولا هو سيراه ولا يجمعهما طريق، فيصاب بالنكد. طيب أنت متكد ليه؟ أنا أقول لك في بلاد بعيدة أنت ما ذهبت إليها، ما الذي أصابك هنا بالنكد؟ ما الذي تتضايق منه؟ هو يريد كل ما يقعد في مجلس أن يقال له أنت أجمل صوت، أنت أحسن واعظ، فابتعد يسمع أن فلاناً في تلك البلاد أجمل صوتاً وأندى صوتاً منك أو أعظم تأثيراً، وخذ عندك أن هذا فلان لا يُسجل له ولا ينزل على الإنترنت ولا ستراه، أو في بلد لم يخترعوا فيها الكاميرات بعد، وبرضه ستتعكنن!
هذه علامة من العلامات التي نقولها للناس في فكرة اكتشاف الإخلاص من الرياء. أنت مخلص؟ أنت عارف لو مخلص ويُقال لك في الشارع الذي بجانبك ستفرح وتزقطط؛ لماذا؟ لأن الناس ستحب ربنا على يدي أو على يد غيري، ليس مهماً؛ المهم أن الناس تحب ربنا. يعني لو قيل لك في الشارع الذي بجانبك مباشرة إن هناك واحداً الناس والقلوب مفتوحة له، ستنبسط. لماذا تنبسط؟ لأن الناس سترجع لربنا ولبيوت ربنا، جميل.
فيجي الشيطان بقى لعبة إبليسية خبيثة. قعدت أتأمل موقف قتل أحد الأخوين لأخيه في أرض الكوكب الذي نعيش فيه هذا، الأرض التي نعيش فيها هذه كلها ملك ستة أنفار؛ يعني الموارد لا محدودة. آدم وحواء وبطن جاء فيها ولد وبنت وبطن جاء فيها ولد وبنت، مش كده؟ يبقى ستة أنفار ليكم الأرض كلها بمواردها كلها بتاعتكم. وعلى رواية أنه كان كل أخ يتزوج من بطن الثانية، يقوم يجي إبليس يعمل إيه؟ يزين مورداً نادراً على هذه الرواية، أنه كان واحدة أجمل من واحدة، فالثاني قال أنا أحق بها؛ هذه في البطن التي هي أختي وأنا أحق بها، فيتخانقوا عليها فيقتل أحدهما الآخر على رواية الإسرائيليات. بغض النظر الرواية تثبت ولا تثبت، صح ولا غلط، لكن هذا معنى إبليسي موجود. يجي إبليس يعمل معك إيه؟ يخلي الناس كلها عينيها على مورد نادر ويتخانقوا عليه، مع أنك لو التفت يميناً أو يساراً ستجد موارد كثيرة لا محدودة ما حد سيشاركك فيها ولا أحد ينازعك فيها. مفهوم يا جماعة؟
يعني أعطيكم مثالاً عشان تفهموا وما يبقاش معنى فلسفياً مجعلصاً كده. يجي إبليس يوهم البشرية أن السعادة في كذا حاجة بعينها أو حاجتين أو ثلاث أو أربع، تيجي تبص على الحاجتين ثلاث أربع دول تلاقي أن عشان نوصل لهم لازم أتسحل في الدنيا وأحصل فلوس وأعمل مش عارف إيه، عشان أوصل للحاجات دي وأشعر بالسعادة والرضا، وفي رحلتك بقى في السحلة دي طبعاً كل الموارد بعد كده موارد نادرة بقى، اللي هي ستقعد تتسحل فيها مع زملائك أو أقرانك أو خصومك، فتحصل العداوات والغضب؛ لو رجعنا خطوة لوراء هو أنت عاوز إيه؟ عاوز السعادة! السعادة ممكن تكون في حاجات أبسط بكثير من الأهداف الإبليسية التي محطوطة لنا دي.
وقلنا لكم قبل كده قصة الرجل، قصة أنا أحبها جداً وهي معبرة جداً: السائح الذي راح بلداً من أدغال أفريقيا، لا واصلة لها تكنولوجيا ولا نت ولا غيره، السائح نزل ركب مع صياد مركب ليتفسح، فالصياد بدائي خالص. الصياد قال له، القصة معبرة جداً، السائح لقى الصياد يصطاد بصنارة، فالصنارة تطلع له سمكة؛ قال له أنت بتصطاد ليه؟ قال له أنا متجوز وعندي عيال بجيب ثلاث سمكات في اليوم نروح نتغدى وشكراً على كده. قال له طب ما تصطاد بشبكة؟ قال له إيه الشبكة دي؟ وصف له الشبكة، الشبكة دي حاجة وترميها تجيب لك سمك كثير. فالرجل قال له طب وأنا ما أجيب سمك كثير ليه؟ قال له لا ما أنت لما تجيب سمك كثير هتبيعه، قال له وبعدين؟ قال له تجيب فلوس، قال له وبعدين؟ قال له تبقى غني، قال له وبعدين؟ قال له تعمل اللي نفسك فيه، قال له وبعدين؟ قال له تبقى سعيد، قال له طب ما أنا سعيد! يعني أنت إيه اللفة الطويلة دي عشان أبقى سعيد؟ أنا سعيد أصلاً، أنت مشكلتك فين؟ أنا سعيد. هو السائح جاي بفكر العالم الرأسمالي الذي هو جاي منه، أن السعادة لن نحصلها إلا بهذا النمط من الحياة، والثاني عايش حياة أبسط من البساطة سعيد فيها، وربما كانت سعادته أعظم من سعادة كثير من الناس الذين يعيشون في العالم الرأسمالي ده بمولاتهم وناطحات سحابهم وعربياتهم وكل الهيلمان الذي نحن غارقون فيه ده.
فشدة الحرص على فضول المال والجاه توقع الإنسان في الغضب؛ لماذا؟ لندرة تلك الموارد. وقلنا لكم قبل كده مشكلة الاقتصاديين الرئيسية في إيه؟ أن الموارد محدودة أو نادرة والحاجات لا محدودة، أو هكذا يصورون الدنيا، فهي دي الأزمة التي عندهم. طبعاً نحن نقول أن تلك الاحتياجات أنتم من خلقتموها داخل الناس؛ نحن نقول كده، نقول الاحتياجات ليست لا محدودة، احتياجات البشر احتياجات بسيطة جداً. طب هنبيع إزاي؟ نخلق لهم احتياجات بطريقة دعاية معينة، نخلق جواك احتياجاً ما كانش موجوداً جواك أصلاً؛ أنت كنت ممكن تعيش وتموت وما تعرفش أن في حاجة اسمها أكل جوسي! خلقنا جواك احتياجاً أنك لازم تذوق الأكل الجوسي ويطلع المدهنن في الآخر! وهكذا يعني، قل مثل ذلك في كل شيء.
الحرص على فضول المال والجاه يعمل إيه؟ يولد الغضب وممكن يولد الغضب بعد الرضا، وبرضه ده كان من الحاجات التي قلناها قبل كده. بس كل الأمثلة هذه أنا عمال أكرر فيها عشان في ناس ممكن تكون ما سمعت، واللي سمع يسقطها هنا لأننا قلناها في أبواب أخرى. قلنا لكم مرة تخيل الست التي زوجها دخل قال لها يلا استعدي احنا هنروح نصيف في بلطيم، الست فرحت فرحاً شديداً جداً، وأنا هنصيف في بلطيم وأنا بحب بلطيم، وفرحت فعلاً من قلبها، وفي عز زقططتها وفرحها وهي بتحضر الحاجة قالت أدخل ألعب في الفيسبوك كده، فلقيت صاحبتها الانتيم أقرب واحدة ليها عاملة تشيك إن في المالديف؛ في لحظتها قمة الفرح والسعادة سينزل لقمه عدم الرضا والغضب، مش كده؟ طب ليه؟ هي قيمة بلطيم هي هي، بلطيم ما اتغيرتش، هي هي بلطيم. لكن شوفوا يا جماعة بس فكرة أن الذي هو بقى الحرص على فضول المال، فضول الجاه، فضول السفر، فضول الطعام، يخليك ما ترضاش بالنعمة التي في يدك، أول ما لقيت صاحبتها في المالديف ممكن تطلع تدب خناقة مع زوجها، أنت مش راجل، بلطيم إيه؟ أنا عمري ما شفت معاك يوم! طبعاً هو يقول هي مجنونة دي ولا إيه؟ ما أنت لسه يا بنت الحلال رايحة تحضري شنط وفرحانة! ما يعرفش المصيبة التي حلت عليه.
قال: وهذه الأخلاق رديئة مذمومة شرعاً؛ أخلاق العجب، الإفراط في المزاح، المماراة، المضادة، الغدر، شدة الحرص على المال والجاه، أخلاق رديئة مذمومة شرعاً فينبغي أن يقابل كل واحد من هذه بما يضاده. فيجتهد على حسم مواد الغضب وقطع أسبابه، وأما إذا هاج الغضب فيعالج بأمور. يبقى نحن قررنا حتة مهمة جداً؛ هو بيقول إيه؟ بيقول إنك قبل ما تغضب، دلوقتي عرفت اللي بتوع الذكاء العاطفي يسمونه المحفز.
يسمونه المحفز، الذي هو إيه المحفز؟ الذي هو دلوقتي أنت قاعد، دي حاجة مهمة جداً يا شباب لازم نفهمها: كل واحد فينا في محفزات تحفزه للغضب ممكن ما تحفزني أنا، يعني الذي يغضبك ما يغضبنيش، والذي يغضبني ما يغضبكش. فمن الوعي بالذات وبالنفس أنك تبقى عارف محفزاتك أنت، يعني إيه الذي لو حصل بيخليني أخرج عن شعوري، بيخليني أغضب؟ ولما تعرف ده بقى هنقول لك روح اتعامل مع ده، يعني ممكن واحد الذي يحفزه للغضب - خلينا في الشرع يعني في الألفاظ الشرعية - إيه العجب؟ هو لقى كده كل ما حد يجي ناحية حتة أنه يقلل مني أتحول وما أعرف أمسك نفسي ولساني يفلت مني؛ فيقول له خلاص روح احسم مادة العجب داخلك، يقوم يجي حد بعد كده يستفزك من الناحية دي تلاقي نفسك لا تستفز خلاص. واضحة دي؟
واحد يقول لك لا أنا الحتة دي مش فارقة معايا قوي بس الصراحة ما أحبش صدري يضيق في حتة الجدال والمراء، وأول ما الحوار يزيد عن دقيقتين ثلاثة ألاقي نفسي غضبت وتنرفزت؛ هنقول روح احسم الحتة دي جواك. في حتة ثانية بنقولها لما تبقى واعياً بنفسك، أنك أول ما تلاقي المحفز ده ابتدى يحصل قوم سيب المجلس. يعني أنا عرفت خلاص أنه أول ما حد يبتدي يهزر أنا باتضايق، فقاعد في مجلس لقيت واحد بيهزر ومش هعرف أقطع هزاره، أنا عارف أن دقيقتين ثلاثة وأتضايق وأتنرفز وأغضب وأغلط ويغلطوني والراجل ما قالش حاجة ده بيهزر، قوموا سيبوا المجلس أول ما تلاقي المحفز ده. طبعاً في ناس تعيش وتموت ما تعرفش أصلاً أن إيه محفز، هو بيغضب ويرجع يغضب ويرجع يغضب ويرجع قليل الأدب ويرجع يغلط من اللي حواليه؛ طب يا ابني ما هو وبعدين؟ اقعد مع نفسك وشوف بتغضب ليه، شوف ليه بتخرج عن الأخلاق المحمودة إلى تلك الأخلاق المرذولة وعالج ده.
فهنا بيقول إيه بقى الشيخ؟ بيقول: فينبغي أن يقابل كل واحد من هذه بما يضاده، ليه؟ فيجتهد على حسم مواد الغضب وقطع أسبابه. لما نعمل كده بعد شوية مش هنغضب، صح؟ يبقى دي أول حاجة، يبقى أول علاج أن أنت أصلاً ما توصلش لمرحلة الغضب. وبعدين ابتدى يتكلم قال لك: وأما إذا هاج الغضب، دي حاجة ثانية خالص بقى. يبقى أول حاجة نحن بنحاول نوصل لمرحلة عدم الغضب أن ما أغضبش؛ طب إزاي ما أغضبش؟ طبعاً ما أغضبش لنفسي، إنما نغضب لله، آه. طب أما نغضب لله نروح نعمل إيه؟ لا دي مسألة ثانية، الغضب لله ده جوه قلبك، يترجم إزاي؟ ممكن في وقت نقول لك أنه يترجم بالجهاد في سبيل الله، ممكن في وقت نقول لك يترجم بأنك تضحك في وش اللي قدامك؛ قلنا المرة اللي فاتت في الدرس قول أبي الدرداء: إنا لنكشر في وجوه أقوام وإن قلوبنا لتلعنهم.
يبقى أنا غضبان ومتضايق، لكن فعلي إيه؟ أني هضحك في وشك، ليه؟ لأن ده الأصلح للموقف، الأصلح لك، الأصلح في أني آخذ بيدك إلى الله، أني ما أهاجمكش، أضحك في وشك مع أني متضايق منك، أو الأصلح في أني أكف إذاك عني حتى لو أنت خلاص ما فيش فائدة، إنما على الأقل أحيدك، وده اللي عمله النبي عليه الصلاة والسلام. مش كده؟ فلان يستأذن عليه قال: «بئس أخو العشيرة»، وبعدين خرج ألان له الكلام، فأشكل على السيدة عائشة؛ فكانت تسأل النبي عليه الصلاة والسلام أنت قلت كذا وبعدين عملت كذا؟ قال: «يا عائشة، إن شر الناس يوم القيامة عند الله من يتقى لفحشه». أنا لما رحت وألنته الكلام مش عشان أنا بحبه لا، لأني لو ما عملتش كده هيفحش وهيقل أدبه، من يتقى لفحشه. واضح يا شباب؟
فرقوا بين شعورك وبين إنفاذ الشعور، دي حاجة ودي حاجة، وده فرق مهم جداً بين الإنسان الناجح في حياته الاجتماعية وإنسان ثاني مش قادر ينجح في حياته، أن أي شعور بينفذه كده على عواهنه؛ ماشي، حتى الحب خلي بالك، ممكن من مصلحتي أن لا أبدي حباً شديداً لإنسان مع أني أنا جوايا لو غاب عن عيني لحظة أموت، لكن ده مش الأصلح لعلاقتنا، فيبقى تصرفاتنا تصرفات واعية مدروسة، أنا بعمل التصرف عشان التصرف ده هو الأصلح، مش عشان هو ده الشعور الذي جوايا لا، أقعد أركز كده الأصلح إيه دلوقتي؟ أن أبين ولا ما أبينش؟ أن أعمل كده؟ أن أشد ولا أرخي؟ أن أبين أني زعلان ولا أبين أن أنا في.
في ظهره. ده كتير بيعمل مشاكل، ابنك جاي لك من المدرسة. الحاجة اللي أنا عليها كويس، برضه كتبت منشور ومسحته، أن راجل مدرسة باين ضربت ابنه، فهو قال لا مش هعمل عليها محضر ولا حاجة، دي مدرسة متفوقة وكاتبة مش عارف إيه وبتاع. فأنا قلت الراجل ده يمثلني. يمثلني في إيه؟ مش في، أنا ماليش دعوة بالضرب دلوقتي، أنا ليا دعوة بفكرة أنه إيه مدرسة بيتقبض عليها عشان ضربت عيل بالعصاية، وبعدين الضرب ما هوش الضرب اللي يتلف، ما جيتش ضربته على عينيه، مديته على رجله وعادي جدا ما فيش مشكلة. حتى لو مش عادي، حتى لو الضرب شديد شوية، أنا بغض النظر تقييمي للضرب إيه، عشان ما نزعلش من بعض، حتى يا سيدي لو الضرب شديد شوية تتسجن؟ فده اللي كنت بتكلم فيه.
فخلينا نرجع للحته بتاعتنا: ابنك جاي لك من المدرسة وقال المدرس عمل فيا وبتاع. ممكن الولد يبقى اللي يصلحه دلوقتي أنه أنت عارف من ابنك أنه لا يحترم الكبير وكذا، فاللي يصلح ابنك دلوقتي إيه؟ أنك تعظم قدر المعلم عنده، وتروح أنت من ورا بقى تقول للمعلم: بلاش تشد عليه جامد كده وأنا مش موافق أنك تعمل كده مع الولد لو فعلا هو أجحف. إنما مش قدام ابنك؛ لأنك أنت كده هتبوظ ابنك. في وقت تاني لا، الولد هو من اللي بيحترموا الكبار وجاي مهزوز، وأنت قدرت الموقف وقتها أن الابن عاوز يرى دعما وسندا، ولو ما لقاش ده دلوقتي الولد هيتدمر نفسيا، فتظهر ده للولد، إزاي ده يحصل؟ ده أنا بكرة الصبح أقابلك في المدرسة ولازم. ما احنا يا جماعة بشر، احنا مش روبوتات. يعني ما فيش موقف التصرف يعني كل ما ابنك يجي لك بيعيط يبقى لازم تعمل، لا غلط، غلط. إيه اللي يصلح ابنك؟ إيه اللي جاب ده في الكلام بتاعنا؟ أننا مش بننفذ شعور، ده اللي جاب الكلام. إحنا بنشوف التصرف الأصلح للموقف ونعمل التصرف بغض النظر عن شعورنا إحنا إيه جوه.
يعني شعور النبي عليه الصلاة والسلام في صلح الحديبية وشعور الصحابة، كان صعب في صلح الحديبية ومع ذلك عمل لنا صلح مع ناس بيصدونا عن بيت الله، ليه؟ ده الموقف الأصلح دلوقتي. قال: "وأما إذا هاج الغضب فيعالج بأمور". إحنا كده خدنا وقت قد إيه؟ نقف كده عشان نبتدي المرة الجاية "إذا هاج الغضب".
دلنا على كيفية تدوين الفوائد من الدروس المتنوعة. كويس جدا السؤال ده، دلوقتي يا شباب من التقصير اللي بشوفه الحقيقة عند طلاب العلم أن بعضهم مقصر في حتة تدوين الفوائد دي. أنت لازم يبقى لك كشكول بتاعك أو كراس أو سكتش أو كده، معلش تعالوا على نفسكم، أنا عارف طبعا أننا "أولد سكول" سكتش وكراس والحاجات دي، وبتكتب فيها. اللي بيحصل ده بيخليك تحفظ المسألة بسرعة. أقعدوا يا جماعة، أنتم زهقتوا مني ليه؟ أنا بحبكم. إيديك تشتغل مع عينيك مع ذهنك تخليك، أنا لغاية دلوقتي حافظ حاجات بمكانها في الصفحة اللي كتبتها فيها ممكن من أكتر من 20 سنة، لمجرد أني كنت ساعتها بتوفيق الله عز وجل إيديا شغالة مع عيني مع مراجعتها مرة واتنين وتلاتة، واللي بتكتبه بإيدك استحضاره أسهل. فخلوا لكم كراسات لكم؛ كراس لكل درس، درس الفقه له كراس، درس العقيدة له كراس، أو سكتش كبير وتقسمه، بلاش الفوائد على بعض كده تعجنها في بعض، بلاش.
طب بتقرا في كتاب، إن شاء الله نعمل درس عن طلب العلم، أنت بتقرا في كتاب، خلوا أنتم عارفين أول ما تفتح الكتاب بيبقى فيه صفحات بيض في الأول كده على حسب كل كتاب ممكن يبقى صفحتين، ممكن يبقوا أربعة صفحات بيض، وفي الآخر ممكن تلاقي كده برضه. خلي الصفح دي فهرس لفوائدك؛ أنت عندك فهرس في الكتاب أصلا بتفتح الفصل الأول الفصل الثاني، خلي لك فهرس للفوائد اللي أنت بتطلعها من الكتاب. معاك قلم، لقيت فائدة تقوم تيجي في الصفح الأولى دي وتكتب مثلا كلمتين يفهموك، والصفحة قدامها، بس يفهموك، ساعات إيه من مشاكلنا بقى واحنا في بداية الطلب، آجي أفتح الكتاب ألاقي كلمتين أنا مش فاهم حاجة، هو أنا اللي كاتبها أنا عاوز أقول إيه هنا؟ دي من الحاجات برضه اللي كنت بتحسر عليها كتير، أقولها لكم بالمرة يعني، أن كنت ساعات أكتب بالرصاص ومع طول العمر، طول العمر ده اللي هو 10 سنين و15 سنة ساعات يتمسح، وما تبقى أنت كاتب فوائد ما أنت مش لاقيها بقى؛ لأن الرصاص اتمسح بالذات لو رديء. فاهتموا بتسجيل الفوائد، خلينا في درس، هنعمل يعني درس إن شاء الله أو أكتر عن طلب العلم ونبقى نتكلم في الحاجات دي.
أنت أجدع من دول كلهم، لو أنت أجدع منهم، نرمي الورق، ارمي الورق يا ابني في واحد عاوز يسأل سؤال هنا ومش عاوز يبقى برضه؟ يعني ناس تعبت وكتبت ورقة قد كده في الآخر مش هقرأها عشان كتير، أجاوبك أنت ليه؟ خطه جميل الحقيقة، بس أنت عاوز إيه بقى؟ فين السؤال يا ابني؟ هو خطه حلو يعني فأنا حرام أرمي. هل يجب أن أقضي الصلوات؟ كاتبها غلط، جت على دي. عاوز أي صلاة فاتتتك تقضيها، قعدت 30 سنة ما بتصليش، تقضي 30 سنة صلاة، هتتحاسب عليها يعني صلاة فاتتتك، وده قول جمهور العلماء أن الصلاة الفائتة تقضى. تقضيها إزاي؟ صلي على قد ما تقدر، يعني عاوز تصلي في اليوم تجيب صلاة 10 أيام هات، على قد ما تقدر صلي، عشان تقضي الصلوات الفائتة، إنما الصلاة اللي فايتك من تمام توبتك أن تأتي بها. خلاص؟
الشيخ أمجد سمير