الاستغلال الأمثل لمواسم الطاعات | د. أحمد عبد المنعم

السلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.

بإذن الله عز وجل لقاء اليوم غالبا لقائي الأخير قبل رمضان. أسأل الله عز وجل أن يبلغنا رمضان، وأن يعيننا في رمضان على ذكره وشكره وحسن عبادته، وأن يعيننا في رمضان على قراءة القرآن وتدبر القرآن والعمل بالقرآن، وأن يعيننا على الصيام والقيام والعمل بما يرضيه سبحانه وتعالى.

حقيقة الواحد لما بيرجع من العمرة بيفكر دائما في هذه الفترات؛ بيعمل إعادة محاسبة. يعني دي بتكون الفترات المثلى التي يعيد فيها الإنسان محاسبة نفسه. لذلك أثرت أن يكون درس اليوم بعنوان الاستعداد الأمثل لمواسم الطاعات، وخاصة ونحن مقبلون على هذا الشهر العظيم المبارك. أسأل الله عز وجل أن يبلغنا رمضان، وأن يبلغنا ليلة القدر، وأن يوفقنا لقيام ليلة القدر على الوجه الذي يرضى به عنا سبحانه وتعالى.

كيف نستغل مواسم الطاعات الاستغلال الأمثل؟ أكيد كثير من الدعاة وأهل العلم سبقوا في توضيح كيف نستعد وكيف نستغل مواسم الطاعات، ولا سيما موسم رمضان الذي يعتبر من أكبر المواسم وأفضل المواسم. هذا الشهر العظيم الذي ميزه الله عز وجل بإنزال القرآن فيه. لما أراد الله عز وجل أن يعرفنا القرآن قال: ﴿شَهْرُ رَمَضَانَ الَّذِي أُنزِلَ فِيهِ الْقُرْآنُ﴾ [البقرة: 185]. اسم الموصول الذي جاء للتعريف. هذا الحدث العظيم الذي حدث في رمضان أدى إلى تغيير شامل في الحياة، في كل نواحي الحياة. ونحن الآن مقبلون على هذا الشهر. كيف نستغل مواسم الطاعات ولا سيما رمضان؟

أنا أثرت أن تكون مواسم الطاعات لأجل أن نصلح لرمضان: العشر من ذي الحجة، العمرة. أي موسم يوفق الإنسان أن يلحق بموسم طاعة، سواء زي ما قلنا العمرة أو الحج مثلا. أسأل الله عز وجل أن يتابع لنا بين الحج والعمرة، أو المواسم الزمنية زي العشر الأوائل من ذي الحجة أو رمضان.

في إشكالية هي التي جعلتني أبدأ أفكر في فكرة هذا الدرس. إن الواحد بيلاحظ في نفسه وفي بعض إخوانه أنه حريص أن موسم الطاعة يتأثر فيه؛ يعني هو مشغول إزاي يكون متأثر مثلا في التراويح بتاعت رمضان، كيف يبكي في تراويح رمضان أو كيف يبكي وهو يطوف أو كيف يبكي وهو يقول الأذكار في العشر الأوائل من ذي الحجة؟ ويكون مشغول ويتمنى هذه اللحظات، أو هذا هو الحلم، هذه هي الأمنية. يعني لو سألته: ماذا تشتهي؟ كما قيل لبعض السلف: ما تشتهي؟ وسنذكر هذه الأمنية في سياق حديثنا إن شاء الله اليوم.

فلو سألت هذا الشخص: ماذا تشتهي؟ نفسك تكون إيه في رمضان اللي جاي؟ طموحك إيه عن نفسك في رمضان؟ أو طموحك إيه عن نفسك في العشر الأوائل من ذي الحجة؟ غالبا بتكون الإجابة إنه عايز يعيش مع القرآن، عايز يتأثر، عايز يكون علاقته بالقرآن -خاصة في رمضان- مختلفة، علاقته بالأذكار مختلفة. وده شيء رائع وهدف وطموح مهم جدا جدا الإنسان يسعى إليه. لكن الإشكالية إن من المقاصد الأساسية للعبادات إن الإنسان يتغير. يعني من مقاصد الشريعة أن تصرف الإنسان عن داعية هواه، إن الإنسان يقاوم هذا الهوى الذي بداخله. ﴿وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى﴾ [النازعات: 40] استطاع أن يقول لنفسه: لا، لن أعطيك ما تريدينه من الهوى، لن أعطيك ذلك. خلاص، هو بيوصل إنه مكن الله عز وجل له في نفسه، فأصبحت هذه النفس تنشط في الطاعة، فتنشط حين الخروج في لحظات الموت: ﴿وَالنَّاشِطَاتِ نَشْطًا﴾ [النازعات: 2]. أما النفس التي لا تنشط لا في الطاعة ولا في رضا ربنا سبحانه وتعالى فعند الموت لا تنشط للخروج فتنزع نزعا: ﴿وَالنَّازِعَاتِ غَرْقًا﴾ [النازعات: 1]. لذلك جاء في نفس السورة: ﴿وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَى﴾ [النازعات: 40].

الإشكالية اللي عايز يكون محور الدرس حواليها النهارده: كيف نحول مواسم الطاعات إلى مواسم تغيير وليست مواسم تأثير؟ التأثر مهم، بل هو الزاد للتغيير، وليست فقط مواسم للتأثر. يعني مش الغرض إنك تعيط في رمضان وبس. في بعض الناس بمجرد ما بيبكي بيستريح؛ يعني هو عيط في التراويح فبيحس براحة نفسية وبيروح يمارس حياته كما هي تماما، ما فيش أي تغيير، واليوم اللي بعده يجاهد نفسه يومين ثلاثة أربعة فيبكي. وبعدين بيخرج من رمضان بكى عدد من المرات لكن الوضع كما هو، حياته ما فيش فيها أي تغيير. ليس هذا من المقاصد المثلى للعبادات.

جاءت العبادات لتروض النفس. احنا قلنا قبل كده إن كل عبادة بتصلح وتحسن جزء في نفس الإنسان. والذي يترك عبادة من العبادات أو حتى ألا يحدث نفسه بهذه العبادة، يظل في شعبة من شعب القلب لا تتغير أو تحتاج إلى أن تحسن. قال النبي صلى الله عليه وسلم: «من لم يغزو أو تحدثه نفسه بالغزو مات على شعبة من شعب النفاق». فتارك الغزو، أو الذي لا يحدث نفسه بالغزو في إشكالية في قلبه. تارك الحج والعمرة، أو الذي لا يحدث نفسه بالحج والعمرة في إشكالية. النبي صلى الله عليه وسلم لما قال عن رب العزة سبحانه وتعالى في الحديث القدسي: إن عبدا أعطاه الله عز وجل المال والقدرة والصحة ويستطيع أن يفد إلى الله عز وجل -أي في الحج والعمرة- ولا يفد إليه فهو محروم؛ يعني إنه يعدي عليه خمس سنوات وهو عنده القدرة المادية والبدنية إنه يسافر الحج والعمرة ولا يسافر، فقال الله عز وجل: فهو محروم. يبقى في إشكالية. إنه يمر عليه فترة من الفترات لا يحسن الصلاة، لا يتقن الصلاة، لا يتقن الصيام؛ بيظل في إشكالية في داخل النفس البشرية.

فكل عبادة من العبادات تحسن وتصلح جزء من النفس. لذلك وضعت العبادات مع المعاملات في سورة البقرة وفي غيرها من السور؛ هذا التشابك: أن آيات الصلاة مع آيات الطلاق، آيات الأموال مع آيات الصيام، آيات الحج مع آيات القتال. هذه العبادات زاد حتى يستطيع الإنسان أن يقوم بهذه المعاملات على الوجه الذي يرضى به ربنا سبحانه وتعالى، لن يستطيع إلا بالعبادات.

طيب، الإشكالية إن بيجي الموسم موسم رمضان وبنطلع من رمضان متأثرين مش متغيرين. لا، احنا مش عايزين كده المرة دي. أو يجي موسم العمرة أو العشر الأوائل من ذي الحجة، ويخرج بكى وتأثر لكن لم يتغير. المفروض تكون المواسم دي -ودي أهم نقطة نحطها في ذهننا في التعامل مع مواسم الطاعات- أنها تكون مواسم للمحاسبة. الفترة دي فترة خلوة، فترة العبادات ولا سيما رمضان فترة خلوة مع النفس، فترة البعد عن معايير الواقع ومقاييس الواقع، فترة علو في الإيمان. الإنسان لما الإيمان بيعلى عنده، كلما علا إيمانه استطاع أن يرى إشكاليات لم يكن يراها في حياته. يفاجأ إنه مقصر: إيه ده؟ أنا إزاي كنت بعمل كده؟ لأن هو ما كانش شاغل باله. يعني في واحد حياته ماشية عادي، تقول له: أخبار دينك إيه؟ يقول لك: كويس جدا. تقول له: بتعمل كذا في الدين؟ لا والله. بتعمل كذا؟ لا والله. أمال هو إيه اللي كويس جدا؟ هو شايف إنه مش محتاج العبادات دي، هو كده كويس على قد يا دوبك لو عرف يجيب الخمس فروض في البيت، لو عرف يجيب. فهو حاسس إنه كده كويس، ومش بيزني ومش بيعمل؛ هو شايف كده إنه كويس. لكن كل ما بيسمع عن معاني الدين وبيقرأ القرآن وبيقرأ في سنة النبي صلى الله عليه وسلم، يفاجأ إن في نقص حاد في الدين عنده.

فمواسم الطاعات فرصة للابتعاد عن الشواغل، فرصة للخلوة بالنفس، فرصة للبعد عن معايير الواقع، فرصة لعلو الإيمان؛ فيبتدئ الإنسان يكتشف إشكاليات في حياته. كل هذه الفرص تجتمع عند الإنسان يجلس مع نفسه جلسة صدق، دي أهم حاجة عايزين نطلع بيها من رمضان: جلسة صدق مع نفسك. أين أنا من رضا الله؟ لماذا لا أنطلق؟ لماذا أنا مقصر؟ سؤال محوري: ما هي الكدية المانعة لي من الانطلاق؟

قال ربنا سبحانه وتعالى: ﴿أَفَرَأَيْتَ الَّذِي تَوَلَّى * وَأَعْطَى قَلِيلًا وَأَكْدَى﴾ [النجم: 33-34]. كان واحد ماشي في الطريق ثم رجع، تولى، أعرض. أفرأيت الذي تولى؟ لماذا تولى؟ أعطى قليلا وأكدى. أعطى قليلا، حينما أراد أن يبذل للدين كان يعطي بالقليل، كان بيحسبها مع ربنا. عكس ربنا سبحانه وتعالى بيقول: ﴿فَأَمَّا مَنْ أَعْطَى وَاتَّقَى﴾ [الليل: 5]، ما مفعول أعطى هنا محذوف يفيد العموم؛ كلما استطاع أن يققدم شيئا قدمه. أعطى قليلا، هو داخل من الأول داخل متردد متذبذب. وأكدى، أكدى الألف دي بلغ الكدية، زي أظهر أصبح بلغ الصباح أظهر دخل في الظهر، أمسى دخل في المساء، أكدى أي بلغ موطن الكدية؛ الكدية الحجر الصلب يصعب إنه يكسره. قالوا ده مثل؛ مجموعة من الناس عايزين يحفروا بئر عايزين يطلعوا مية، محتاجين لمية، فجوا يحفروا قابلتهم صخرة كبيرة فأعرضوا عن الحفر. هو قلب يحتاج إلى أن يرتوي بماء الوحي، بماء الإيمان، فحاول يحفر فوجد صعوبات فتوقف عن الحفر. هو ممكن يكون لسه لم يتول.

لكن الإشكالية إنه بقى له سنة نفس مستوى الإيمان، نفس مستوى العبادات، نفس مستوى المشاعر، نفس مستوى التضحية والتفكير. طيب ليه؟ ما المانع من التقدم؟ في إشكالية. أحيانا هو خايف يكتشف الإشكالية، خايف يكتشف إن المشكلة في كذا، لأن لو اكتشف إن المشكلة في كذا يبقى لازم يسيبه، وهو مش قادر. أحيانا يبقى خايف يفكر، عارف المريض اللي خايف يروح يكشف من تبعات العلاج، يقول لك: لا، أنا فرضا رحت كشفت طلع قال لي عندك كذا وهتحتاج عملية وكذا وحقن ولا لا، أنا كده كويس. أيوه بس أنت كده ممكن تموت. أيوه أنا مستريح كده، أموت وأنا مش عارف المرض أنا كده أحسن لي. ده ممكن يتجاوز عنه في البدن، أما في الروح أن يكون الإنسان عنده إشكالية أمر من أمور الدنيا معطله عن الانطلاق إلى الله سبحانه وتعالى، هو مش قادر يتخطاه.

أحيانا أنت مش مطالب إنك تكسر الكدية، ممكن إحنا عندنا ضعف. يعني سيدنا سليمان من قوة إيمانه عليه وعلى نبينا أفضل الصلاة وأتم التسليم لما اتعطل للحظات بسبب الخيل عن الذكر قال: ﴿رُدُّوهَا عَلَيَّ فَطَفِقَ مَسْحًا بِالسُّوقِ وَالْأَعْنَاقِ﴾ [ص: 33]، على قول وأنا أميل إليه إن ما يعني قطع أيدي الخيل. فطفق مسحا بالسوق والأعناق، ليه؟ هذه كدية كانت بتعطله، قال لك: خلاص نشيلها. أحيانا في كدية في حياتنا لا نستطيع أن نفعل فيها هكذا. طيب الحل إيه؟ طب أنا ممكن ألف، ممكن أشوف طريق ثاني، ممكن أشوف طريق موازي، ممكن أحاول أدور على بدائل. عارفين في الطب أحيانًا لما الشريان يتسد في حاجة اسمها الشرايين الجانبية (الكولاتيرالز)؟ من رحمة ربنا سبحانه وتعالى إن في الكولاتيرالز ديت، وإلا كانت أي جلطة أو أي انسداد أو أي حاجة تؤدي إلى موت هذا العضو. كان من رحمة الله سبحانه وتعالى إن في شرايين جانبية بتساعد على وصول الغذاء.

أحيانا الإنسان محتاج يبحث: طب أنا مش قادر، أنا مبتلى بقضية معينة في الدنيا مش قادر وهي فعلا بتعطلني، طب زود الأعمال الصالحة في مكان ثاني عشان الإيمان يزداد، وأنت كل ما بتزود العمل الصالح والإيمان، بعد كده العمل بييَسَّر. ﴿مَنْ تَقَرَّبَ إِلَيَّ شِبْرًا تَقَرَّبْتُ إِلَيْهِ ذِرَاعًا﴾، فهو عمل مجهود شبر، يفاجأ بتيسير السير لمدة الذراع، لأن هو بيسير الآن في المعية. تقربت إليه ذراعًا، هذا الذراع الذي تقربه كان سهلا ليه؟ لأنه ماشي في المعية، هو قدم الشبر. ﴿تَقَرَّبْتُ إِلَيْهِ ذِرَاعًا تَقَرَّبْتُ إِلَيْهِ بَاعًا، وَمَنْ أَتَانِي يَمْشِي أَتَيْتُهُ هَرْوَلَةً﴾، هذه لا تسأل عن معناها. أتيتُه هرولة، هذه المعاملة معاملة مختلفة تماما. الإشكالية نريد أن يعاملنا الله عز وجل بمعاملة الهرولة ونحن من أهل الأشباح، احنا عمالين يا دوبك نتقدم شبر بالعافية، وأنت عايز معاملة الهرولة! طب استمر في الطريق، لا تجعل هذه الكدية التي في الطريق تمنعك من السير. فاستغلال مواسم الطاعات للحظات الصدق: يقف مع نفسه، أنا إيه اللي معطلني؟ أنا ليه عندي إشكالية في القيام؟ ليه عندي إشكالية في العلم؟ هو أنا إيه المطلوب مني؟ أنا محتاج أشخص نفسي، هو أنا إيه المطلوب مني؟ هو أنا بعمل إيه في حياتي؟ هو أنا وقتي بيروح فين؟ هو أنا فين ديني؟ أنا ليه لماذا لا أتقرب من الله سبحانه وتعالى؟ محتاج أقعد مع نفسي كده أحسب، ما أسيبش الحياة تمشي بيا، الأيام والسنين بتعدي وأفاجأ إن أنا بقيت شخص زي ما الناس ماشية وخلاص.

قالوا لي لازم تروح كيدج وان، رحت كيدج وان. قالوا لي بعد كده لازم تروح ابتدائي، رحت ابتدائي. قالوا لي بعد كده لازم تخش ثانوي، دخلت. لازم تخش جامعة، لازم تشتغل، لازم تتجوز، لازم تخلف، لازم تربي عيالك، لازم تصرف، لازم تأمن مستقبلهم، لازم تموت، لازم تتدفن. طب وبعدين؟ طب ما خط الحياة بيدفعني دفعًا للسير في طريق معين، طب ليه أنا ما أملكش أنا الزمام؟ ليه أنا اللي ما أختارش؟ إنك أنت تختار صعب، عايز قوة لأنك أنت ماشي عكس التيار، وبتوصل لمرحلة بفضل الله من قوة الإيمان.

إنك أنت بتقنع التيار كله إنه هو ماشي غلط، ﴿أَلْهَاكُمُ التَّكَاثُرُ * حَتَّى زُرْتُمُ الْمَقَابِرَ﴾ [التكاثر: 1-2]، ده بيحتاج إلى قوة صدق وقوة إيمان. يعني مؤمن آل فرعون وهو واقف يقف بمفرده، لكنه عنده يقين: ﴿يَا قَوْمِ إِنَّمَا هَذِهِ الْحَيَاةُ الدُّنْيَا مَتَاعٌ﴾ [غافر: 39]. ويراها متاع، بيتكلم عن ملك فرعون وعن قصر فرعون، إنه مجرد متاع يذهب. المتاع اللي بيتمتع به لفترة زمنية قصيرة ثم ينتهي.

استغلال مواسم الطاعات لهذه الجلسات جلسات الصدق، وكان هذا من أهم ما يميز الصحابة. إنه كان عنده صدق مع نفسه، ما كانش بيعيش أوضاع مصطنعة متكلفة. لا، هو صادق مع نفسه: أنا عندي إشكالية في كذا. كان يجي الرجل للنبي صلى الله عليه وسلم: ائذن لي في الزنا. واجه مشكلته، حس إن عنده مشكلة، قال: لا خلاص، أنا أروح أواجه مشكلتي، هتكلم مع النبي صلى الله عليه وسلم. النبي صلى الله عليه وسلم وضع يده الشريفة صلى الله عليه وسلم على صدره ودعا له، فأذهب الله عز وجل ما كان يجده في صدره. تخيل لو كان ما واجهش المشكلة وطنش، ما وقفش مع نفسه وقفة، كان ممكن وقع في الزنا.

إن الإنسان يتغافل عن الإشكاليات اللي بيجدها في قلبه أو في نفسه أو في حياته، يتغافل، مش مشكلة، المهم إن حياتي ماشية. الغريب إن المفروض مواسم الطاعات من أهم مقاصدها التغيير. إشكالية إنه ممكن الإنسان حياته فيها تقصير معين في الدين، فيها توقف بلاش تقصير، فيها توقف عن النمو الديني. وبعدين يدخل موسم الطاعات ويبكي، وبعدين يخرج والحياة تستمر كما هي، ما فيش أي تغيير ولا أي مثلًا مواعيد جديدة ولا أي برنامج جديد ولا أي خطة جديدة ولا أي حاجة، حياته مستمرة كما هي، طب أنت استفدت بإيه؟ يعني أنت خرجت من رمضان كما دخلت، خرجت من العمرة كما دخلت، خرجت من الحج، خرجت من مواسم العشر ذي الحجة، خرجت من هذه المواسم كما دخلت فقط.

يعني قضية الحسنات أمر هام جدًا، وهو أصلًا اللي بيعطينا الزاد وهو اللي بينجينا من عذاب الله عز وجل يوم القيامة -نسأل الله عز وجل أن يدخلنا الجنة جميعًا بغير سابقة عذاب ولا حساب-. لكن الإشكالية إن يكون تفكيرك إن أنا هتعامل مع القرآن إنه هو المصحف، الكلمة بحسنات والحرف بعشر حسنات وخلاص، إيه ختمت، إيه ختمت. طب ماذا فعل القرآن فيك؟ حاسس إنك أنت متضايق من نفسك بعد سورة كذا؟ حاسس إن في مشكلة بعد سورة كذا؟

الصحابة لما نزلت عليهم السورة دي: ﴿أَيُّكُمْ زَادَتْهُ هَذِهِ إِيمَانًا﴾ [التوبة: 124]، مين اللي اتغير بعد السورة دي؟ مين اللي اتغير بعد الموسم ده؟ مين اللي حس بـ بنقلة في حياته؟ حس بنقلة كده نوعية في حياته، حس إن تفكيره بقى أنضج، حس إنه بيحمل هموم مختلفة، حس إنه هو يرتقي، فؤجي إنه هو بيسعى في هموم لم يكن يفكر فيها من قبل، يفاجأ إن بدأ يجري على لسانه أدعية لم يكن يدعو بها من قبل في نصرة الدين أو الفردوس الأعلى أو رؤية وجه الله، بيفاجأ إنه همومه اختلفت، وظهر هذا في اهتماماته، في ترتيبه لوقته، في دعائه، في أصدقائه، اتغير. ده أهم مقصد من مقاصد مواسم الطاعات إنك تتوقف شوية.

ومن رحمة ربنا سبحانه وتعالى إن مواسم الطاعات فيها الكل بيسيرك، فأنت التيار المواجه قليل. يعني في رمضان أبواب النار تغلق، أبواب الجنة تفتح، تصفد الشياطين، غالب الناس بيتجه للطاعات، يا باغي الخير أقبل، يا باغي الشر أقصر، غالب الناس بيتجه لكل الناس تقريبًا غالب الناس للصيام، قرآن، عمل الخير، عايزين يفطروا تجد الخير منتشر، والخير في أمة النبي صلى الله عليه وسلم إلى يوم القيامة، تجد الخير بيعم. فإنك أنت في هذه اللحظات تقنعهم أن هذه هي الحياة، أن هذه الطاعة هي ما أتمناه، ما سمعته الآن في القرآن هذا هو طموحي. خلاص، هو بدأ يتغير.

الناس ترجع بعد رمضان وهو ثابت، لأنه كان غرس مش فسحة. هو ما كانش بيتفرج على الإيمان من بعيد ويرجع، لا، هو خطى خطوات ثم وضع الغرس، ما عادش بيرجع ثاني. كل ما ياخد خطوة بيغرس، خلاص، ويقف في المكان ده ثم يرتقي. ده أهم استفادة تعامل مع مواسم الطاعات. لذلك سئل أحد السلف: ماذا تشتهي؟ قال: أشتهي أن يفتح لي صدري، ثم أنظر ماذا فعل القرآن في قلبي وما نكأ القرآن، عمل إيه في صدري وكيف نكأ، نكأ ده الطعن. أنت تروح تزور واحد مريض -اللهم اشف عبدك- ينكأ لك عدوا ويمشي لك إلى صلاة، ينكأ لك عدوا، أنت من مقاصد أنك تدعي لواحد إنه يخف، يخف ليه؟ أنت عايزه يخف ليه؟ وعشان عباداته وعشان نصرة الدين، ويطعن في أعداء الله، وأن يكون غصة في حلوق أعداء الله، أنت ده طموحك، أنت عايز صحة ليه؟ عايز صحة عشان كده.

فبتوم تدعي له زي ما بتفكر نفسك: «لا يؤمن أحدكم حتى يحب لأخيه ما يحب لنفسه». اللهم اشف عبدك فلان ينكأ لك عدوا، شوف النكأ ده، الغرشة دي اللي بتغير في العدو، القرآن ماذا نكأ في قلبك؟ القرآن له ثقل، أفتكر المفروض تحس تنهيدة كده: يعني أنا مطلوب مني أعمل ده؟ ما ينفعش نتعامل مع القرآن وخصوصا في رمضان بنظرية الزحلقة، أنا مالي؟ يعني في ناس بتزحلق الآيات: الكلام ده مش لينا. أيوة، أمال الكلام ده لمين؟ الكلام ده مش مطلوب، يعني إن إحنا أيوة ما هو ده ممكن يكون مش يعني أنت مش قادر تنفذه بكرة، لكن ده هدف، يعني ده طموح، أمنية. ﴿وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ﴾ [النساء: 100]. لو أدركك الموت وأنت في الطريق لتحقيق هذا الطموح، بإذن الله عز وجل، فقد وقع أجرك على الله عز وجل.

لكن الإشكالية إنك أنت ما يكونش عندك هذا الطموح، إن بيتوقف الطموح الإيماني مع أزمات اقتصادية وضغط المجتمع. المجتمع بأغلبه بيتجه للطموح الاقتصادي، طب أين الطموح الإيماني؟ فرصة مواسم الطاعات الإنسان يتوقف مع نفسه ويجلس هذه الجلسة: ما هي الكدية؟ أنا ليه عندي إشكالية في جلسة الضحى؟ أنا ليه عندي إشكالية في طلب العلم؟ إيه اللي موقفني؟

كان أحد الكتب كنت بقرأ كتاب اسمه المرقاة، كتاب جميل للشيخ سليمان العبودي، فبيقول: بعض الناس أحيانا بتتفاوت في طلب العلم والذكاء. فبيقول يعني إن بعض الناس بتحلل دائمًا الظاهرة دي إن دي اختلافات فردية، إن فلان ذكي وعنده إمكانية الحفظ، وفلان ما عندوش الإمكانية دي. فيقول: بس بتفاجئ إن فلان اللي ما بطلبش علم ده وبتسأله: أنت ما بتطلبش علم ليه؟ إن هو ما عندوش موهبة، هو بيدعي ما عندوش موهبة، تفاجئ إنه عارف كل أنواع العربيات وعارف أنواع المحركات وعارف كل أنواع الفرق، وعارف كل أنواع أسماء الفرق، وعارف معلومات ممكن تكون كم هذه المعلومات وتنوعاتها وأفرادها أكثر من كم المعلومات وأفرادها اللي حافظه طالب العلم. يعني ممكن يكون علم الرجال اللي درسه اللي بيتفرج على كورة أكثر من علم الرجال اللي درسه بتاع طالب علم الحديث المبتدئ، على الأقل ده لسه في الأول بيأخذ بدايات المصطلح وبيأخذ الثقات وبعض رجال البخاري، ده عارف رجال إسبانيا وإيطاليا وبريطانيا وأنواع والدوري، وطبعا المحلي والخارجي وغيره، أنا مش عارف يعني، وعارف، فعلم الرجال ده متميز فيه جدا، يقول لك: فلان ده ثقة، فلان ده في الكوميدلس، يعني تسأله عن فلان مباشرة: فلان لا لابس فانلة رقم كذا وحياته كذا، خلاص، عشان يعرف يحكم، هو لازم يبقى عارف حياة الشخص عشان يحكم عليه يأخذ ثقته ثبت ولا، يعني لازم يا ف، يعني المعلومات عندك ما أنت عندك القدرة أهو.

لكن هي الفكرة أنت كيف وجهت هذه القدرة؟ أنت إزاي سخرت ده؟ الطموح والحب بیدبر أفكار لا تخطر ببال الإنسان، يعني الإنسان لما يكون بيحب حاجة وهيموت عشان يعملها، ربنا سبحانه وتعالى بيرزقه أفكار، أفكار من فتوحات من عند ربنا سبحانه وتعالى ينصر بها هذا الدين.

في مرة كان أحد الإخوة توفاه الله عز وجل -أسأل الله عز وجل أن يرحمه- فقبل أن يتوفى كان ابتلي بسرطان في المخ، هذا الورم قعد يكبر وضغط على مراكز السمع ومراكز البصر، أصبح في آخر حياتي لا يستطيع أن يسمع ولا يستطيع أن يبصر. فرحت مع أحد مشايخنا الكرام، رحنا نزور الإيه؟ الأخ ده. كان سبحان الله قبيل وفاته، فوجدنا أمه كانت ما شاء الله لا قوة إلا باله تلهج بالحمد. فتخيل ابنها ما بيسمعش، ما بيشوفش، فإحنا سألناها -الشيخ سألها-: بتتواصلي معاه إزاي؟ يعني أنت لما بتحبي تقولي له حاجة أو هو يقول لك حاجة بتتواصلي معاه إزاي؟ يعني هو مش سامعك وهو مش شايف، أنت عايزة تقولي له حاجة بتوصليها له إزاي؟

فقالت -حتى قالت هعمل لكم تجربة عملية تحبوا تقولوا إيه؟- فإحنا الشيخ قال لها إن ربنا بيحبك، إن ربنا ابتلاك عشان بيحبك، وإن إحنا كمان بنحبك عشان ربنا بيحبك، قال لها: وصلوا ده. فقعدت أخذت يده وقعدت تكتب على يده، تكتب باء، فهو يقول: باء، حاء، حاء، تكتب باء، لو قرأها غلط وقال نون تقوم تمسح كده على يده كأنها مسحت الحرف وتكتب، وبعدين تخلص نقطة، خلصت الكلمة، يقول لها: بحبك. قعدت فالشيخ سألها: مين اللي علمك الطريقة دي؟ ما حدش علمها، هي من حبها لابنها وحرصها أنها تتواصل، ربنا سبحانه وتعالى فتح عليها بهذه الطريقة. اللي بيحب الدين وعايز يوصل، ربنا سبحانه وتعالى بيفتح عليه، هي صدق، قال له النبي صلى الله عليه وسلم: «اصدق الله يصدق».

من المواقف المؤثرة جدا اللي دائما بتتكرر في الحج والعمرة إنك تلاقي طفل تايه. شوف الطفل التايه، يعني في قمة البكاء، يبكي، يعني لا يتوقف عن البكاء إلا لشهقة تكاد أن تخرج روحه، وبعدين يعود للبكاء. الغريب الطفل بيبكي وحواليه الشرطة كلهم، وحواليه ناس، وناس جايبة له عصير وجايبة له حاجة حلوة وبترضي فيه، وبرضه بيعيط ولا يهدأ إلا في حضن أمه. في واحد هو حاسس كده بعلاقته مع ربنا إنه هو تايه، ما بيبطلش عياط لغاية لما يحس إنه بدأ يمشي على الطريق، مهما كان معاه أسباب دنيوية، مهما كان معاه معارف، هو في حاجة ناقصاه.

إي، يعني زرع هذا الشعور ده أهم شيء في مواسم الطاعات، إنك تزرع شعور الاحتياج، إنك تزرع شعور إنك نفسك تعمل حاجة، إن يبقى عندك صدق. أحد الإخوة قابلته، كان من اللي اشتغلوا فترة للدين وبعدين مر مرحلة يعني توقف كده -ربنا يستعملنا جميعا ويثبتنا- فأنا لمست في كلامه حالة من البرود، وهو قال لي كده، قال لي: أنا بأعاني فعلا. يعني قلت له: أنا حاسس، مش ده كلام زمان، مش ده طموحات وكلام زمان في حاجة تغيرت. قال لي: فعلا هو تأثر بأوضاع معينة وبيئات معينة، بدأ حماس الدين يخفت. فبيقول لي: خلاص تعال نشوف حل. قلت له: تعال نشوف حل. قال لي: خلاص نعمل جدول واحد اثنين ثلاثة، أنا هعمل كذا وكذا وكذا وكذا، وخلاص، والموضوع هي، فأنا حاسس إنه هعمل الحاجات دي بنفس البرود ومش هيحصل حاجة، في إشكالية في شعور ناقص. القضية مش بس مجرد أوراد تفعل بقلب ميت، في إشكالية أعمق من كده، هو صحيح العمل الصالح هيزود الإيمان، لكن هو محتاج يمشي في الاثنين مع بعض.

إشكالية إن إحنا ندخل مواسم الطاعات ببعض الأوراد مع قلب بارد هي دي الإشكالية، إن هو خلاص أنا بصلي التراويح، أنا عادي النهاردة كنت مع عزومة، فحظي كده كان فيه محشي وبط وبتاع، فثقلت، فنزلت التراويح، أنا ما شعرتش إلا وهو بيقول: السلام عليكم ورحمة الله، السلام، أو سعيد صحيت على صوت اللي جنبي بيقول: آمين، في آخر حاجة، وكان صوته تخين شوية، خلاص آمين آمين، السلام عليكم السلام عليكم، الله قوم روح، مستشعر حديث: «من صلى مع الإمام كتب له حتى ينصرف كتب له قيام ليلة كاملة». فمروح، طب أنت مش هتصلي قيام؟ لا، كتب له ليلة كاملة. طب أنت مش حاسس إن في حاجة ناقصاك؟ لا، ما أنا قرأت وردي بالنهار القرآن، وبالليل أنا صليت التراويح، أنت عايز مني إيه؟ أنا مش عايز منك حاجة، بس أنا حاسس إن في حاجة ناقصة. أنت كده مش هتتغير، الله أعلم يعني، أنت كده مش دي الأسباب اللي تخليك تتغير.

في حاجة ناقصة، في إشكالية ناقصة، مشكلة إن إحنا نتعامل مع مواسم الطاعات، الأيام عمالة تعدي، وأنا عمال أعمل صح على خانات الأوراد دي إشكالية. أنا رحت عمرة، أنا عايزين كم مني طواف في اليوم؟ ينفع واحد، طيب خلاص طفت، طواف إيه ثاني مطلوب؟ جزء، طيب أهو عملت جزء، إيه ثاني؟ إيه ثاني عشان أبقى أنا كويس وتبطلوا النكد بتاعكم، عايزين إيه ثاني؟ خلاص، طيب، التعامل ده هو بيغير، بيعمل الأوراد وبعدين يطلع يحس إنه ما تغيرش، وبيشكي إنه ما تغيرش، ما هو ما ده مش طريقة التغيير.

دي ممكن بإذن الله عز وجل لو استمر وجاهد نفسه حتى لو مش حاسس، إحنا قلنا فكرة إن أنا مش لاقي قلبي دي ما ينفعش تخليها سبب من التوقف، لكن أنا أقصد أن في محاولات إحياء هذا الشعور مهم، أن لا تتحول الأوراد لمجرد وظيفة، حاجة باردة أنا بعملها بقلب بدأ يخفت، أنا هنا بخاطب اللي عايز اللي.

عايز برنامج لأعمال مواسم الطاعات، بيحصد له كم كبير من الحسنات، وده مهم جدا جدا جدا، ده مش ده اللي أنا بتكلم فيه النهارده، احنا بنقول إن اللي لازم كل شيء يمشي بالتوازي. أنا اللي بتكلم فيه، إزاي الإنسان يحاول قدر المستطاع يخلي الموسم ده موسم تغيير، إنه يطلع بعد رمضان مش يرجع لنفس أصحابه، ويرجع لنفس طريقة التفكير، ونفس الهموم، ونفس الإشكاليات. وأي إشكالية صغيرة جدا في الدنيا تنكد عليه، وتخليه قاعد قرفان، ويبدأ يترك العمل الديني لأبسط الأسباب، وأي شيء مشي فيه في الدين، حفظ القرآن، طلب العلم، يتوقف مع أدنى كدية، مع سُلطة -مش كدية ولا حاجة- يتوقف. هنا في إشكالية. والمواسم بتمر، وبعدين يفاجأ إن المشكلة إن اللي ما بيتداركش نفسه خلاص حياته بقى حصل فيها استقرار دنيوي؛ خلاص اتجوز، وخلف، واشتغل، والدنيا اتظبطت كده، ومفيش مساحة للتغيير الديني في حياته، بيبقى التغيير هنا أصعب. معلش هو الكلام صادم شوية، بس هنا فعلا التغيير بيبقى أصعب، لأن اللي هيواجههم أكثر. الإنسان لوحده ممكن يضغط على نفسه، لكن يبقى فيه زوجة وأولاد، هو بيصعبوا عليه. وفي ناس مرضوش يهاجروا بسبب الزوجة والأولاد، ونزلت فيهم آيات، وكانت المرأة تبكي: وهتسيبنا؟ وهتضيعنا؟ ومرضاش يهاجر. ﴿إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَّكُمْ فَاحْذَروهُمْ﴾ [التغابن: 14]. فانت كل ما بتكثر العلائق كل ما بتحتاج مجاهدة أكبر، فالإنسان ما ما ما يسيبش نفسه يصل إلى حالة الاستكانة. ﴿فَمَا وَهَنُوا لِمَا أَصَابَهُمْ فِي سَبِيلِ اللَّهِ وَمَا ضَعُفُوا وَمَا اسْتَكَانُوا﴾ [آل عمران: 146]، استسلم، بدأ يبحث عن كيانه. بدأ، أحد التوجيهات اللغوية، الألف والسين والتتاء، بدأ يدور عن كونه هو، أنا أكون إيه؟ بدل ما كان بيدور، أنا هعمل إيه للدين. بدأ لا يفكر إلا في نفسه وفقط.

من أجمل ال- زي التويتات كده اللي كانت معمولة على عاملها مركز تدبر، الهيئة العالمية للتدبر، قاموا منزلين كتيب كده جميل اسمه تدبر المفصل. فببص فيه، بقرأ في سورة الحديد، هما جايبين كل آية، وتعليق صغير على الآية كده. فكاتبين آية ﴿لَا يَسْتَوِي مِنْكُمْ مَنْ أَنْفَقَ مِنْ قَبْلِ الْفَتْحِ وَقَاتَلَ﴾ [الحديد: 10]. فعجبني التعليق الصغير بيقول إيه؟ استوى يا في المجهود والبذل، واختلف في الوقت. يعني ده أنفق وقاتل، وده أنفق وقاتل، المجهود والبذل سيان، لكن اختلف فين؟ في التوقيت، فاختلف في الأجر. ده قبل الفتح، ده لحظات الاستضعاف، ده وقت احتياج، ده وقت نفور الناس، ﴿إِذْ تُصْعِدُونَ وَلَا تَلْوُونَ﴾ [آل عمران: 153]، الكل ماشي، وهو ثابت. ده أجره أعظم، حتى لو جه واحد بعده، وعمل نفس العمل، لكن مش هياخد نفس الأجر، زي صلاة الجماعة. واحد دخل قبلك بخمس دقايق، ادرك الجماعة، صلي الله، واحد دخل صلى لوحده. لو متأخر مش لعذر، ده سبعة وعشرين درجة، وده درجة واحدة، نفس الصلاة، أربع ركعات، قرأ فاتحة وسورة، لكن فرقت في الأجر، فالتقيوت مهم. ربنا جعل الليل والنهار، ضبط الوقت مهم، فمسألة أن أنت تبذل، وتتحرك في وقت نفور الناس، وعكس التيار، ده ثوابه أعلى.

فنرجع، أن أنت محتاج في مواسم الطاعات، تقعد مع نفسك جلسات صدق. أنا إيه اللي معطلني؟ طب واللي معطلني ده، افترض أنا شايف أن اللي معطلني ده مستحيل يتغير، يعني أنا مفيش مني أمل؟ لا، أنا ما قلتش كده. أولا، أنت ممكن ت- أنت ممكن اللي معتقد أنه هو مستحيل يتغير، ياما ناس كتير قالت كده؛ مستحيل، ومش هينفع، وعادي بعد كده اتغيرت. وأصلا صيام رمضان ثلاثين يوم، في عز الصيف ده، دليل أن الإنسان بفضل الله، عنده قدرة على التغيير، وأنه بداخله طاقات كامنة، لكن محتاجة أن هي تستخرج. مش الصحابة دول هما هما هم اللي كانوا قبل مجيء النبي صلى الله عليه وسلم، وقبل بعثة النبي صلى الله عليه وسلم، كانوا بيشربوا الخمر، وكانوا يتقاتلون على الناقة، وكان منهم من يعبد الأصنام، وكانوا، وكانوا، وبعدين أصبحوا خير أمة، وخير ناس من اتباع الأنبياء. طب ما هو حصل تغيير، يعني كانت، كان هذا الخير بداخلهم، قاتل المئة، كان بداخله الخير، ليه بتفترض أن أنت مش هتتغير؟ ليه بتفترض أن الحياة اتقفلت على كده؟ مواسم الطاعات بتعطيك قدرة، بفضل الله، وزاد إيماني، أن تاخد قرارات، لذلك القاعدة؛ استغل فترات القوة، واحترم لحظات الضعف.

احترم لحظات الضعف، أنك بتكون ضعيف إيمان، متروحش لمواطن الشهوات، متروحش لمواطن الشبهات، حتى لو كنت بتروحها وأنت في مواطن قوتك، ولا تتأثر، متروحهاش في مواطن الضعف. في مواطن القوة، استغل، خد قرارات، اربط نفسك، ثبت، روح لحد، قوله؛ خلاص، احنا هنبدأ مع بعض كذا، طلب علم، نبدأ حفظ القرآن، ابدأ خد قرارات في رمضان، متبقاش مجرد عزيمة باهتة، أو عزيمة ساخنة، تفطر سريعا، ليه؟ لأن لم يتبعها عمل. لا، خلي مواسم الطاعات، بعد ما تفكر آه، هو أنا ليه، ليه مش بحفظ القرآن صحيح؟ يعني سؤال، هو أنا ليه، يعني ممكن أكون بذاكر، وباخد حاجات في ال- اللغة الإنجليزية، وباخد حاجات كده، طب أنا ليه مش بدي وقت للقرآن؟ يعني، ليه صحيح، ليه ما بعملش كده؟ الإنسان لما بيتوقف مع نفسه هذه الوقفات، بيفاجأ أن في إشكاليات واقعة في حياته، في، في إشكاليات هو كان متجاوزها في التفكير؛ هو أنا ليه بضيع وقت كذا؟ هو أنا ليه، أنا مش عندي يوم كذا فاضي، أنا ليه مش بستغله؟ هو أنا ليه ما اتعلمتش أحكام الصلاة أصلا؟ يعني أنا، أكون راجل بالغ عاقل كده، ومعرفش أحكام الصلاة، ما سمعتش أحكام الصلاة، شرح علمي، وأدعي أن أنا راجل بقى ملتزم، طب إزاي؟ يعني، اقف مع نفسك هذه الوقفات، استشير، خلي مواسم الطاعات فرصة لاكتشاف الكُدى التي هي موجودة في حياتك، قد تكون كدية نفسية؛ يعني كدية، حجر نفسي، منعك من الانطلاق، ممكن يكون خوف، يعني أحد الكُدى النفسية، خايف، أنا سمعت اللي بيمشي في الطريق ده يبتلى، أنا سمعت اللي بيمشي في الطريق ده بيخسر دنيته، أنا، أنا خايف أَمشي فيه، أنا بصراحة، حاسس أن أنا لو زودت أكثر من كده في الدين، الابتلاء هيزيد، لأن يبتلى المرء على قدر دينه، فخلي ديني قليل، عشان إيه؟ الابتلاء ييجي قليل، أنا، آه، فممكن تبقى إشكالية نفسية، دي، دي إشكالية عقلية، بس ممكن تكون إشكالية إيه؟ أنه، أنه هو خايف، فمحتاج حد يفهمه، ويطمنه.

كان، قرأت أثر جميل، الإمام قتادة، في تفسير ابن كثير، آيه، أظنه كان في، ﴿وَلَا يَقْطَعُونَ وَادِيًا﴾ [التوبة: 121]، سورة التوبة، تفسير، ﴿وَلَا يَقْطَعُونَ وَادِيًا﴾، قال، ما ازداد عبد من قومه، ومن أهله، بعدا في سبيل الله، إلا ازداد من الله قربا. اللي سايب، قال، دول ولا، عمالين يبعدوا عن أهاليهم، ويقطعوا الوديان، ليصلوا إلى أعداء الله. فبيقول في تفسير، ﴿وَلَا يَقْطَعُونَ وَادِيًا﴾، ذكر الأثر، الإمام ابن كثير، قال، ما ازداد عبد بعدا عن أهله، أو عن قومه، في سبيل الله، قاعد يبعد عنهم، عشان عايز يرضي ربنا، إلا ازداد في سبيل الله، إلا ازداد من الله قربا. فاحيانا ممكن واحد، مفترض أنه بيبتعد عن مواطن الأمان، لكن هو في حقيقته يقترب منها؛ يعني أحيانا واحد مش فاهم أصلا معاملة ربنا، مش فاهم، أو لسه مش موقن أن لله ملك السماوات والأرض، الله يملك كل شيء. تخيل أن أنت بتقترب- ﴿وَاسْجُدْ وَاقْتَرِبْ﴾ [العلق: 19]- من الملك سبحانه وتعالى، بهذه الطاعات، ثم تخاف. فممكن تبقى إشكالية نفسية، محتاجة معالجة، ممكن تبقى إشكالية حقيقية، هو مش فاهم يتجاوز المعصية دي إزاي؟ هو، هو مش فاهم.

يعني، بتكلم مع أحد الإخوة، يعني، خد قرار رائع في الدين، ساب بيئة معينة فيها فتنة دنيوية يعني، لكن بعد، خد قرار صعب جدا، لكن بعد ما سابها وخد القرار، لكن لسه متواصل معاهم. فانا حسيت، قلتله، يا ابني، أنت ماشاء الله، خدت قرار أشبه بـ حديث الثلاثة والصخرة، فقمت عنها، وهي أحب الناس إلي، لكن بعد كده، فضل على تواصل معاها، طب ليه؟ يعني أنت أحيانا واحد، بياخد القرار الصعب، بس عشان يقوله، يعني كده خلاص؟ طب ما تخلي فيه تواصل، ما أنت كده، بفضل الله، خلاص، قطعت، يعني بعدت عن المشكلة. لا، أحيانا الموضوع يحتاج إلى بتر، أحيانا الموضوع محتاج أنه هو، يبتر العلاقة، بأي بيئة فاسدة، فترة تماما، أن، طول ما في باب متوارب ممكن ترجع منه.

كل هذه إشكاليات كُديا، يقولك أنا جربت مية مرة ووقعت، ما هو أنت جربت غلط، دي، أنك قاعد مع نفسك كده في مواسم الطاعات، قاعد لوحدك، بعد ما سمعت القرآن وصليت وأخذت الزاد الإيماني، تعامل مع الموسم على إنه زاد للتغيير، مش فسحة للتأثير. يعني في ناس بتحس براحة نفسية كده بعد ما بتصلي تراويح، اطلع بقى، لأ، يرجع تاني، يمارس حياته وبعدين إيمانه يزيد وبعدين يحس براحة ويوم نازل تاني، وبعدين ويخلص رمضان على كده. طب أنت خلاص قطعت شوط، اقعد بقى وخذ قرارات، اتغير، فكر، يعني انتقل، ارتقي، اققرأ ال- ال- القرآن فيه رقي، اقرأ وارتقي، معنى إن إحنا بنقرأ ومش بنرتقي في إشكالية في التعامل مع القرآن. اقرأ ورتل، يعني إيه ترتيل القرآن وآيات القرآن بتخلي فيه رقي في درجات الجنة؟ فمعنى و- ولازم يبقى فيه رقي في درجات الدين في الدنيا. طب أنا ختمت ختمة كاملة، وما حصلش أي تغيير، إزاي؟ يعني أنا قرأت القرآن كاملا في رمضان في موسم طاعات، وما حصلش تغيير.

إحنا لما تكلمنا في سورة المزمل، ﴿إِنَّ نَاشِئَةَ اللَّيْلِ هِيَ أَشَدُّ وَطْئًا﴾ [المزمل: 6]، وتعبير الوطء ده أشبه بتعبير النكء اللي استعمله أحد السلف، اللي است- اللي قلناه من شوية، إن هو القرآن بيعمل تغيير كده، يعني لما تسمع آية ﴿وَجَاهِدُوا فِي اللَّهِ حَقَّ جِهَادِهِ﴾ [الحج: 78]، تقول لربنا إيه؟ يعني شعورك إيه وأنت بتتلقتى الآية دي؟ أما تتلقى آية ﴿أَمَّنْ هُوَ قَانِتٌ آنَاءَ اللَّيْلِ﴾ [الزمر: 9]، لما تتلقى آية ﴿يُرِيدُونَ أَنْ يُطْفِئُوا نُورَ اللَّهِ﴾ [التوبة: 32]، كيف نتلقاها؟ يعني إيه اللي بيحصل بداخلي نفسيا؟ يعني جبير بن مطعم سمع سورة الطور قال كاد قلبي أن يطير، حس أن ضغط المعاني بيكسره، فأسلم. طب ضغط معاني القرآن بيعمل فينا إيه؟ المفروض يدفعنا دفعا للارتقاء، وإلا الإنسان بيوصل لحالة من البرود، قاعد بيسمع آيات تهد جبال، ﴿لَوْ أَنْزَلْنَا هَذَا الْقُرْآنَ عَلَى جَبَلٍ لَرَأَيْتَهُ﴾ [الحشر: 21] هتشوفه بعينك كده مشهد جبل خاشعا متصدعا من خشية الله. شعور خشية الله اللي بيعمل تصدع ده شعور مطلوب من القرآن، أنا أدخل مواسم طاعات وأطلع وأطلع من غير ولا مرة الشعور ده؟ يعني أطلع من رمضان ولا مرة أحس إن فيه تصدع كده؟

ابن القيم لما جمع التنهيدات، ليه الإنسان ممكن وهو بيقرأ القرآن ليه؟ ذنب مش قادر يسيبه، مقام إيماني لاح له ولا يستطيع أن يصل إليه، يعني جمع أظن خمس مواقف ممكن الإنسان لما ي- ييجي يقرأ القرآن حاسس أن ال- ال- إخراج ال- النفس ده، حالة التأوه، لما تيجي تقرأ في تفسير ﴿إِنَّ إِبْرَاهِيمَ لَحَلِيمٌ أُوَّاهٌ﴾ [هود: 75]، فقالوا من معاني الأواه كثير التأوه. التأوه ده أن من كثر أنت مضغوط في حالة الضغط النفس ده لما يخرج أشبه بإيه؟ التنفيس، عشان هتنفجر. فأنت إيه المعاني الضاغطة اللي خلت سيدنا إبراهيم يكثر من التأوه؟ كان بيتأوه ليه؟ يعني إيه اللي كان بيخليه يكثر من التأوه؟ لما تيجي تشوف موطن كلمة أواه جه مرتين في القرآن، راجع بقى أنت الموطنين، وشوف جم في مقام إيه؟ جم في سورة إيه وسورة إيه طيب؟ أحسنت، توبة وهود، مرة مع مين ومرة مع مين؟ مرة مع قوم لوط، لما عرف- جزاك الله خيرا- أحسنت، مرة مع قوم لوط لما سمع بنزول العذاب، ومرة مع والده. في الموطنين نزول عذاب على الغير، بيتألم، نفسه ينقذهم، فبيتأوه لأجله.

يعني لو جينا نلاحظ هنا، طبعا هو ال- يعني دائما المفسر لما بييجي مثلا يقول أواه، التأوه، طب ليه؟ هو هنا بيحاول يصل، زي مثلا لما قول الله سبحانه وتعالى ربنا على إبراهيم عليه السلام يقول إيه؟ ﴿رَبَّنَا إِنَّكَ تَعْلَمُ مَا نُخْفِي وَمَا نُعْلِنُ﴾ [إبراهيم: 38]. دي جت سورة إيه؟ سورة إبراهيم. قالوا أن الآية دي موطن السياق يفيد أن هو قالها- ده بعض المفسرين- قالها لحظة ما ساب أمنا هاجر وسيدنا إسماعيل في الصحراء، وهو ماشي فدعا، فمن ضمن الدعاء اللي قاله وهو سايبهم ﴿رَبَّنَا إِنَّكَ تَعْلَمُ مَا نُخْفِي وَمَا نُعْلِنُ﴾. فالعلماء قالوا ماذا كان يخفي إبراهيم؟ فحاولوا، بعضهم قال يا رب تعلم ما أخفي، قالوا ما أعلن اللي هو الدعاء اللي قاله، الدعاء اللي موجود في سورة إبراهيم ده، ده اللي أعلنه إبراهيم، طب إيه اللي كان بيخفيه؟ يعني ﴿وَاجْنُبْنِي وَبَنِيَّ أَنْ نَعْبُدَ الْأَصْنَامَ * رَبِّ إِنَّهُنَّ أَضْلَلْنَ كَثِيرًا﴾ [إبراهيم: 35-36]، ده اللي أعلنه إبراهيم، طب إيه اللي كان بيخفيه إبراهيم عليه السلام؟ فبعضهم قال يا رب أنت تعلم خوفي على هاجر وعلى إسماعيل وأني تركتهم فردا، وبعضهم قال لأ، أتعلم أني لو عندي حاجة أغلى من كده هضحي بيها، تعلم حبي لك. فهنا أنت بتحاول تقترب من المشاعر اللي كانت بداخل- طبعا لن نصل- بس يعني تحاول تقترب لهذا النور اللي كان في قلب إبراهيم عليه السلام في هذه اللحظات. فأنت هنا عايز تعرف سيدنا إبراهيم كان بيتأوه ليه؟ ما أنت بتصلي على النبي صلى الله عليه وسلم كما صليت على إبراهيم، تقول اللهم بارك على محمد كما باركت على إبراهيم، تخلص الطواف بتصلي عند مقام إبراهيم، اختيار هذا الموطن تحديدا أنك تصلي عنده ركعتين بعد الطواف، أنك تسير على الدرب، يعني هو الطواف أشبه زي ما ابن عاشور كان بيقول، طلب الإذن بالدخول. يعني لما، لما أتكلم في ﴿إِنَّ الَّذِينَ اتَّقَوْا إِذَا مَسَّهُمْ طَائِفٌ مِنَ الشَّيْطَانِ﴾ [الأعراف: 201]، قال أن أحيانا من عادة

بعض العرب إنه ما كان ينزل مكان بدل ما بيقتحم بيطوف حتى ينتظر الإذن، أدب. لذلك الطواف قبل السعي، قبل ما تجري وتسعى لتنصر هذا الدين أو تعمل أي حاجة، أنت الأول بتطوف، تطلب من ربنا يأذن ليك ويسمح لك، الموضوع مش كده.

طيب، طفت خلاص وطلبت الإذن من الله عز وجل وجأرت إلى الله وتضرعت ودعوت، خلصت الطواف ويا رب ائذن لي، عايز تروح تسعى بقى، تجري، عشان ييجي الفتح في الآخر. ما بين الطواف والسعي تعمل حاجتين، تصلي عند مقام إبراهيم، يعني أنت هتسعى مش بمزاجك، ده بمنهج، قفينا على آثارهم، أنت ماشي على آثار الرسل، أنت بتسعى على أقدام الانبياء ولا سيما إبراهيم. لذلك أنت بتصلي عند المكان اللي اتغرس فيه قدم إبراهيم في الصخر، رجل سيدنا إبراهيم علمت في الصخر في بناء التوحيد. لذلك أنت بتصلي بتقرأ سور التوحيد، البراءة من المشركين سورة الكافرون، والإقبال التوحيد قل هو الله أحد سورة الإخلاص، تقرأ السورتين دول، ده هدفك، إقامة بناء التوحيد كما أقامه إبراهيم عليه السلام. وبعد كده تروح تشرب من زمزم، ترتوي، وده ممكن يكون ماء الوحي، وبعد كده بقى تسعى، وفي الآخر الفتح جه من تحت قدم طفل رضيع، ما تعرفش الفتح ييجي منين، مش بسعيك، ييجي من تحت قدم إسماعيل عليه السلام، ما تعرفش الفتح ييجي منين. ممكن بقى ما تفترض إن أنت طفت وصليت وسعيت، في الآخر ييجي زي سيدنا هاجر، بعد الماء جاء جبريل عليه السلام بأسباب فوق طاقة البشر في مكان غير ذي زرع، لكن هو عند بيت الله الحرام، وفي الآخر نبع هذا الماء المعين، ماء زمزم.

فالشاهد إن أنت لما تحاول تبحث ليه سيدنا إبراهيم كان بيتأوه؟ لإن أنت عايز تسير على الدرب. هذه المشاعر دي اللي إحنا عايزين نخرج بيها من القرآن في رمضان، إن أنا عايز أصحي مشاعر تدفعني دفعًا للبذل، زي الأم اللي قعدت تدور إزاي تتواصل مع ابنها، في مشاعر لما بتستقر في قلب الإنسان، مشاعر الصدق لما بتستقر في قلب الإنسان بتدفعه دفعًا ويأتي الفتح. لكن أن تتحول مواسم الطاعات لمجرد أوراد باهتة، ده إحنا نتكلم يعني المرحلة دي لشخص ما كانش بيصلي فنقوله صلي حتى لو مش حاسس، طب أنا مش فارقة معايا والصلاة ما بتغيرش في أي حاجة، نقوله طب صلي وهتتغير، لكن شخص بقى له كده سنوات ولا يتغير، لأ، فيه إشكالية، لماذا لا ترتقي؟ يعني ليه فيه مانع من الارتقاء؟ ده المفروض مواسم الطاعات جلسات الصدق مع النفس، إني أقعد كده مع نفسي وأفكر، ما هي الكوديا؟

طيب، أنا إمكانياتي إيه؟ مش بوظف إمكانياتي ليه؟ زي ما تكلمنا في درس إشكاليات اختيار الصغر، أحيانًا بتبقى المشكلة عدم الصدق، يعني أحيانًا واحد ييجي يحكي مشكلة، بيحكيها بصورة عايز يحصل على الرخصة، يعني في واحد جاي أنا عندي وظروفي فخلاص يقول له خلاص يا عم مش لازم تعمل حاجة دي خلاص أنت مضطر، وفي واحد تاني نفس الظروف بس هو بيحكيها بطريقة متزنة ما بيأفور، فأنت بتقول له لا لا أنت اصبر هنا وممكن نشوف حل لكذا. يعني زي الغلام أحيانًا شخص عايز حل للغلام، غلام الأخدود لما جاء للراهب قال له أنا بتدرب على إيتين بروح أهلي يضربوني عشان اتأخرت وأروح للساحر يضربني عشان اتأخرت أعمل إيه؟ ده مش سؤال المتنصل، في واحد بيسأل سؤال عشان الراهب يقول له خلاص ما عدتش تيجي طب الحمد لله أنت اللي قلت أهو، أنا كان نفسي أجي بس أنت اللي قلت ما أجيش خلاص أنت اللي هتشيل هتحاسب أه خلاص طب سلام عليكم. في دائماً في بعض الناس بيسأل سؤال إن عايز يتنصل، وبيصيغ السؤال بطريقة إن أنت تعيط وأنت بتسمع السؤال فتقول له خلاص يعني مش مشكلة.

الصدق هنا مهم، النبي صلى الله عليه وسلم بيقول إن بيأتي أحياناً إليه رجلان يتحاكما إليه صلى الله عليه وسلم فيقول: «لعل أحدكم أن يكون ألحن بحجته من الآخر». أن يكون إيه ألحن بحجته من الآخر؟ يعني واحد جه ده ظالم وده مظلوم بس الظالم بيعرف يتكلم لسِن، يعرف يحكي القصة بطريقة إن أنت إيه يصعب عليك فتحكم للظالم، فالنبي صلى الله عليه وسلم يقول: «فإنما أقضي بنحو ما أسمع». لأن هنا النبي صلى الله عليه وسلم قاضي، مش هينفع إن ربنا يطلعه على الغيب لأن طب وبقية القضاة؟ فأقضي بنحو ما أسمع، فممكن النبي صلى الله عليه وسلم يقضي لشخص لأنه هو ألحن بالحجة لكن هو ظالم، فالنبي صلى الله عليه وسلم يقول: «فإنما أقضي له قطعة من النار، فليأخذ أو فليدع». طبعاً مع الفارق في القياس والتشبيه، لكن أحيانًا شخص هو عايز يتنصل بس عشان ضميره ما يأنبوش عايز يروح لحد يقول له اترك، سيب الدين سيب كذا، فبيحكيها بصورة معينة، هنا دي أزمة صدق.

طب وبعد ما هو قال لك؟ هو يعني أنت بتضحك على مين هنا؟ فدي أحيانًا أزمة صدق، محتاج إنسان يجلس مع نفسه في مجالس الخلوة بعد العبادة ليتأمل، ادي نفسك وقت للتأمل، يعني ما تخليش الموسم كله، ده حتى أنا بكلم المجتهد في الطاعة، مش كله إنك بتدي نفسك وقت كده، أين أنا؟ أنا محتاج أعمل إيه كده؟ وما تطولش في المرحلة دي برضه، يعني باب النصيحة أحيانًا الشيطان يقول لك طب سيب بقى الطاعات ونقعد نفكر، لا ما هو أنت مش هتعرف تفكر صح من غير طاعة أصلاً، إحنا عايزين توازن، يعني أنت أصلاً الطاعة هي اللي بتفتح.

يعني زي ما قلنا السعي يجي بعد الطواف، يعني فترات الطاعة والدعاء إلى الله سبحانه وتعالى وإنك بتلجأ إلى الملك سبحانه وتعالى هو ده أصلاً اللي هيدفعك وهيبقى فيه توفيق، لأن فيه افتقار فيه بذل فيه صدق وقدمت بذل يا رب أنا صليت ودعوت يا رب اهديني يا رب ما تسيبنيش، ابكي بكاء التائه اللي تكلمنا عنه من شوية، قول له يا رب أنا تائه ما حدش عارف إيه اللي مناسبني، عيط لربنا، قول له يا رب أنا تائه، عارف زي ما أظن كان الشيخ يعقوب بيحكي قابل حد في الحرم الساعة 3 مش عارف بيعمل إيه بيقول له ادعي لي، ولا قال له قوم ادعي، قال له مش قادر، قال له قول له يا رب مش قادر، يعني قول له يا رب أنا ضعيف، يا رب أنا نفسي أبقى كويس، أشكو إليك ضعف قوتي وقلة حيلتي، اشتكي نفسك لربنا، قول له يا رب أنا جربت، بس أنا ضعيف أنا ساذج أنا مش فاهم بصرني، تكون صادق، تكون عايز بصدق ما حدش بيضحك على ربنا، تكون عايز بصدق إنك تتغير، أحيانًا الواحد يبقى عايز يتغير أو لسه مش واخد القرار وتيجي فرصة التغيير لا أنا ما كنتش عايز أوي كده، لا أنا ما، لا دي ما، عايز حاجة إيديوم كده ما تبقاش إكس لارج يعني دي واسعة شوية علي، أنا عايز حاجة تبقى أقل من كده شوية. طب يعني فأهم حاجه تكون إيه؟ تكون صادق.

إنك تقعد مع نفسك أنت عايز إيه؟ ﴿تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوًّا فِي الْأَرْضِ﴾ [القصص: 83]. تمحض النية وصفاء النية وخلوص النية، عايز إيه؟ عايز أخش الجنة عايز أخش الفردوس، إن أنا أوصل لهذا الصفاء في الإرادة، من كان يريد، ومن أراد الآخرة، كان يريد العاجلة. إن أنا أطلع من مواسم الطاعة الإرادة عندي واضحة فيها صفاء، شلت الشوائب اللي عليها، شلت ضغط المجتمع وتوجيه الناس والتقاليد، شلت ده، فخليت الإرادة بقت إيه صافية خالصة، ده بيوفق، يسدد، اهدني وسددني، زي ما النبي صلى الله عليه وسلم نصح سيدنا علي قال له: «تذكر هداية الطريق وسداد السهم». يعني يقول له وأنت بتدعي افتكر لما يكون واحد تائه وعايز يوصل، وإزاي ممكن حد يوصله ربنا هيوصلك مهما كانت الطرق في متاهات، وإزاي السهم يخترق وبينطلق وبيصل بسرعة، هو ده السداد، افتكر كيف بيسدد وبوجه السهم وبيصيب، وإزاي في ناس عندها قدرة من بعد إزاي توجه السهم ويخترق وينطلق ويصل إلى الهدف، الله قادر إنه يخليك زي هذا السهم، إذا كان فيه بشر عمل كده مع السهم ربنا قادر إنه يخليك كده. تذكر هداية الطريق وتذكر سداد السهم وقل اللهم اهدني وسددني.

الدعوة دي عايزة صدق، عايزة قلب صادق، استغلال مواسم الطاعات إن الدعوة تخرج من هذا القلب المتعبد الصادق ده أعلى استغلال لمواسم الطاعات، إن دعوة صادقة تتقبل منك في المواسم في مواسم الطاعات ده هو ده الهدف، لأن أحيانًا كثير من الناس بيتوب ليه في مواسم الطاعات؟ لأنها كانت دمعة توبة صادقة، كان طلب صادق إن ربنا ينجيه من الفحشاء والمنكر، ﴿اصْرِفْ عَنِّي كَيْدَهُنَّ﴾ [يوسف: 33] طلعت بصدق، فلما قالها بصدق في الموسم ده في مواسم الطاعات مع علو الإيمان وإقبال الناس فربنا سبحانه وتعالى هداه. فلو إحنا عايزين الاستغلال الأمثل لمواسم الطاعات وده عنوان الدرس، ده الصدق في التغيير، يعني أنت ممكن مش هتقدر تتغير في نفس الموسم، التغيير بيأخذ مراحل ممكن يأخذ أوقات طويلة، إنما إنك تكون توصل لمرحلة إنك حددت هدفك وبقى عندك الصدق في التغيير، يعني ممكن ده وجهات نظر أو يعني ده الواحد شايفه، ده الاستغلال الأمثل لمواسم الطاعات طبعاً مع الاجتهاد في الطاعات زي ما قلنا لما هو الاجتهاد في الطاعات والحسنات هو ده اللي أصلاً هيدي عون للإنسان وتوفيق وهدى وسداد، لأن ولا يزال عبدي يتقرب إلي بالنوافل حتى أحبه، فإذا أحببته كنت سمعه الذي يسمع وبصره، أنت عشان تحدد هدفك محتاج المعية في البصيرة، وعشان تسمع المشورة صح محتاج المعية في السماع، وعشان تسير إلى الله صح محتاج المعية في السير، عشان السعي اللي بتبذله يكون صح محتاج المعية كنت سمعه الذي يسمع وبصره الذي يبصر ويده التي يبطش بها ورجله التي يمشي بها. فده بيجي برضه كثرة النوافل، فهي منظومة على بعضها بتكون موجودة بفضل الله عز وجل في مواسم الطاعات.

السلام عليكم ورحمة الله وبركاته، الحمد لله وحده والصلاة والسلام على من لا نبي بعده محمد صلى الله عليه وسلم. إيه طبعاً مسألة الاستعداد الأمثل لمواسم الطاعات أمر طويل، وزي ما قلنا بتختلف وجهات النظر، وده من رحمة ربنا سبحانه وتعالى بحيث إن كل شخص بيفتح عليه في رؤية نقطة معينة في كيف نستغل الطاعة، مسألة ترتيب الأوقات فيها كتب جيدة، مسألة اقتناص العبادات ذات الثواب الأعلى بحيث إن الإنسان ما يضيعش الوقت، وإزاي مثلاً إنه هو ممكن يصلي مع الإمام عشان يأخذ ثواب الليلة كاملة وبعدين يصلي بمفرده في التراويح، يعني فيه وجهات نظر كثير وفيه دروس بفضل الله وكتيبات في مسألة الاستغلال الأمثل لمواسم الطاعات. إحنا حاولنا نركز النهار ده على مسألة جلسة صدق في محاولة التغيير الصادق، وإن الإنسان لابد أن يستغل مواسم الطاعات فرصة علو الإيمان إقبال الناس إنه هو التيار المقابل بقى ضعيف شوية، إيه فتح ربنا سبحانه وتعالى بسبب الاجتهاد في العبادة كل ده بيستغله الإنسان، أهم شيء إن الإنسان يستغل هذه الأسباب للتغيير، لا يرتضي بمجرد التأثر، يعني زي ما قلنا تبقى المواسم فرصة للتغيير ليست فسحة، يعني مش إن هو مبسوط إنه تأثر، لا، إحنا عايزين تبقى فرصة لهذا التغيير، فإيه عايزين المواسم تكون فرصة إن إحنا نتغير.

طيب، ده بالنسبة لمواسم الطاعات عمومًا، طب بالنسبة لرمضان سريعًا، رمضان قال عنه ربنا سبحانه وتعالى، أسأل الله أن يبلغنا رمضان، ﴿شَهْرُ رَمَضَانَ الَّذِي أُنزِلَ فِيهِ الْقُرْآنُ﴾ [البقرة: 185]. يبقى إذًا من أهم أهم الطاعات في رمضان قضية القرآن، وكان جبريل عليه السلام ينزل للنبي صلى الله عليه وسلم فيدارسه القرآن، فيكون النبي صلى الله عليه وسلم أجود من الريح المرسلة. وهنا أثر ابن عباس في البخاري عقب وجاب أثر تغير النبي صلى الله عليه وسلم كريح مرسلة بعد مدارسة القرآن، إذًا مدارسة القرآن أيضًا أدت إلى التغيير في رمضان، فهنا نفس الفكرة، مسألة الطاعة اللي بتولد تغيير في حياة الإنسان، يبقى إذًا قضية القرآن في رمضان من أعلى القضايا، حتى الصلاة قدر المستطاع يبقى فيه نوع من الإطالة في صلاة التراويح بحيث الإنسان يسمع أكبر قدر من القرآن، إيه أو يصلي قيام حتى لو بمفرده ليلًا بعد ما يصلي مع الجماعة، يقرأ أكبر قدر من القرآن، مع بالنهار إنه بيقرأ أكبر قدر من القرآن، فإذًا العبادة الموجودة تقريبًا طول النهار والليل هي قضية قراءة القرآن.

بالنسبة لعبادة الصيام بتعيد الإنسان على تقليل الشهوات، تقليل انشغال الإنسان، إيه فبالتالي بيتجه بكليته وبقلبه للإقبال على القرآن، ذكرنا ده في كان سلسلة أظن من ثلاث سنوات مع موقع طريق الله، رمضان قرب يلا نقرب، مسألة رمضان والقرآن كانت أربع حلقات، إزاي نستفيد من القرآن في رمضان، وإن حالة الإنسان في رمضان أشبه بإيه يعني اللحظة الأولى التي أنزل فيها القرآن والتي أنزل فيها الوحي عمومًا، لحظات الخلوة ولا سيما في الاعتكاف، البعد عن المشاغل والإقبال على القرآن رقم واحد، ده الاهتمام بالقرآن، رقم اثنين، نحاول شوية يبقى فيه اهتمام كيفي قدر المستطاع، يعني لو فيه شخص اجتهد

بفضل الله عز وجل في السنوات الماضية، كم في القرآن؟ خلي السنة دي كيف. يعني المرة دي خلي فيه اهتمام كيفي شوية بالقرآن. ولا سيما لو شخص أصلًا طوال السنة للأسف مقل في قراءة معاني القرآن، مقل في قراءة التفسير، مقل حتى في فهم مفردات ألفاظ القرآن. لو هو مقل في ده طوال السنة، خلي رمضان بما إن كده كده أصلًا منسوب البذل لا يعلو إلا في هذا الشهر.

حاول خلي السنة دي اهتمام كيفي شوية. كيفي إزاي؟ مش القضية في عدد الختمات. لا، خلي القضية إنك أنت طبعًا قدر المستطاع يبقى فيه موازنة يعني، لكن تفهم، تعايش سورة. تدي لنفسك إنك تصلي مع نفسك حتى لو صليت مع الإمام وانتهت صلاة التراويح، بالليل صلي لوحدك صلاة هادئة. اختار سورة بتحبها وكررها.

ادي لنفسك فرصة معايشة سورة. اقرأ تفسيرها من أي تفسير وقوم صلي بها. ادي لنفسك هذه الفرصة، لو ما عملتهاش في رمضان هتعملها إمتى؟ خلي فيه ارتباط كيفي بالقرآن في رمضان، صاحب سورة. اطلع من رمضان بصحبة بعض السور أو سورة طويلة. يعني اطلع من رمضان، دي كلها اختيارات يعني مش تعملها كلها، شوف أنت إيه المناسب ليك.

إنك أنت صاحبت في رمضان سورة التوبة، سورة يونس، سورة يوسف، أو إيه المفصل. حاسس إني أنا خارج من رمضان في صحبة جديدة في حياتي. أصبحت أترنم وأستشهد بآيات على لساني بتتبادر مباشرةً إلى لساني دون عناء ولا تفكير ولا تكلف من هذه الآيات التي السور التي أصبحت في جو من الصحبة. يعني في واحد بتحتاج تقعد تفكر عشان تفتكر اسمه، لأن علاقة الصحبة ضعيفة. في واحد مباشرةً أول ما بتقع في موقف، فلان اللي هيحل المشكلة.

لكن في القرآن في بعد عهد. للأسف في ناس يعني أولئك ينادون من مكان بعيد. لكن في واحد هو قريب من آيات القرآن، بمجرد أي موقف، على طول هو حديث عهد بهذه السورة. فمسألة إن إحنا عايزين نخلي ارتباطنا بالقرآن ارتباط كيفي، حاول تقرأ تفسير. إيه المشكلة إنك أنت يبقى معاك تفسير حتى على الهامش؟

كان فيه درس، كان فيه مقالة صغيرة كده منشورة على الفيسبوك في مسألة أقرأ تفسير إيه في رمضان. وإن السؤال ده إجابته تختلف حسب المرحلة الشرعية للشخص، حسب المرحلة الزمنية للشخص اللي هيوجهها للقراءة في رمضان. افرض شخص مشغول، عنده امتحانات، عنده شغل في رمضان، فالوقت اللي هيديه للقراءة قليل، مش هينفع يختار تفسير كبير. يبقى يختار تفسير على الهامش المصحف. اختار المختصر في التفسير، التفسير الميسر، القرآن تدبر وعمل، اختار أي حاجة من الموجودة.

لو أعلى شوية؛ زبدة التفاسير، فيه مختصر للقاسمي أو أي مختصر لفتح القدير للشوكاني غير الزبدة، فيه أكثر من واحد. مختصر لابن كثير، أي مختصر من مختصرات التفسير اللي تناسب الشخص إنه يقرأ فيها. حاول تخلي مرة من المرات في رمضان إنك تعمل كده. إنك أنت تهتم بالكيف. في الأول على فكرة بتبقى، إزاي وأنا كنت متعود أختم؟ شخص مجتهد متعود أختم ختمات، أكثر من ختمة، وده مش إيماني، حاسس كده إنه هيقل. جرب مرة.

ولو أنت إيمانك وبتتغير وبتحس بفرق مع كثرة الختمات، خليك مع كثرة الختمات. يعني لو أنت إيمانك بيزيد وبتتغير مع كثرة الختمات، ولا سيما لو أنت ليك علاقة بالقرآن. لو أن لسانك رطب بالقرآن وبيجري بالقرآن وفاهم، ومجرد بتتوقف لفهم بعض المصطلحات وبعض الألفاظ، خلاص، أكثر من الختمات. لكن الإشكالية إن أنا كثير من آي القرآن لا أعرف معناها، وكلمات في القرآن لا أعرف معناها، ومستمر في القراءة.

طب، حتى توقف، بص على الهامش، شوف معنى الكلمة. يعني شوف حتى معنى الآية. خلي يا سيدي معاك التفسير اللي على الهامش ده. آية عايز أعرف معناها، يعني هذا الفضول لا يستثير الإنسان؟ شيء عجيب جدًا. أقرأ أكثر من ستة آلاف آية، ما فيش ولا آية مش عايز تعرف معناها؟ ابن كثير بيقرأ القرآن ولا إيه؟ ما فيش ولا آية عايز تعرف معناها؟ ليه؟ يعني أكيد لو أنت مركز، أكيد فيه أسئلة. عايز أسأل، طب، الآية دي طب معناها؟ طب، ختام الآية عجيب، إيه علاقة الختام؟ أسئلة حتى لو ما لهاش إجابات، يعني بتدل بس إن القلب حي، إن القلب يقظ وهو بيقرأ.

يعني غياب التساؤلات أثناء الورد إشكالية. زي ما قلت لك، يا ابن تيمية بقى اللي بيقرأ يا إيه غافل، مش مركز. غياب الأسئلة والتساؤلات اللي بتيجي في صدر الإنسان أثناء القراءة، ده معناه إن فيه إشكالية. وخاصةً لو استمرت غياب الأسئلة وغياب التساؤلات على مدار الشهر الكامل. يعني واقف طوال التراويح، أسألك؛ تخيل واحد يسألك بعد التراويح، يسألك سؤالين: إيه أكثر آية عايز تعرف معناها، وإيه أكثر آية أثرت فيك؟

ممكن واحد يقول له: لا، كل الآيات أثرت فيا بصراحة. طب، ما فيش حاجة. لا، كل الآيات عارف معناها. طيب، خلينا نسأل حد تاني. فتخيل لو أنت هتتسأل السؤالين دول: إيه أكثر آية أنت حصل لك استفزاز وفضول، عايز أعرف معنى الآية دي، نفسي أفهم مراد الله عز وجل مني من هذه الآية؟ ما هو القرآن ده نزل إلينا، مش نازل لناس تانية، نازل إلينا. فماذا يريد الله مني من هذه الآية؟ مش فاهم.

عياش بن أبي ربيعة لما فتن ورجع مكة تاني وبعد كده ما هاجرش، وسيدنا عمر بن الخطاب كان بيراسله عشان يرجع، ونزلت: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ﴾ [الزمر: 53]. سيدنا عمر عايز يقول لعياش إن أنت حتى لو فتنت وارتديت ليك توبة مرة أخرى، مهما كان الذنب، فيه أمل إنك ترجع. فكتب له الآية بس وبعتها لعياش. فعياش فتح الآية مش فاهم، فطلع على جبل: اللهم أفهمنيها، مش فاهم، عايز أفهم الآية. فألقى الله عز وجل في قلبه فهم هذه الآية، بأن هو فهم آية ونفذها.

فأنت أحيانًا تقول له: يا رب، أنا نفسي أفهم الآية دي. وخاصةً لو أنت قدامك تاخد بالسبب يعني؛ ادعي ربنا سبحانه وتعالى، واسأل بقى أهل الذكر، وابحث. فالشعور إني نفسي أفهم الآية، أو إن آية معينة أثرت فيا، فأصحب الآية دي، أبقى ماشي حاضر الآية في ذهني. ﴿مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ﴾ [ق: 18]. ﴿كُلُّ نَفْسٍ ذَائِقَةُ الْمَوْتِ﴾ [آل عمران: 185]. ﴿وَمَا أَنفَقْتُم مِّن شَيْءٍ فَهُوَ يُخْلِفُهُ﴾ [سبأ: 39]. آيات خلاص أصبحت قواعد في حياتي، مش محتاجة شرح، مش محتاجة حد يفكرني فيها. خلاص، أنا كل ما بأنفق مال، بأفتكر آية: ﴿فَهُوَ يُخْلِفُه﴾، خلاص أصبح شعار قرآني في حياتي.

خلاص، كل ما يقابلني حد يتجاهل علي: ﴿وَإِذَا خَاطَبَهُمُ الْجَاهِلُونَ قَالُوا سَلَامًا﴾ [الفرقان: 63]، أصبح نبراس في حياتي. الليل يجي، خلاص: ﴿يَبِيتُونَ لِرَبِّهِمْ سُجَّدًا وَقِيَامًا﴾ [الفرقان: 64]، أصبحت قواعد في الحياة لا تحتاج إلى شرح، دي جزء من حياتي. اختلط القرآن أو جزء من الآيات بلحمه ودمه. فده أحد أهم وسائل استغلال رمضان إن أنا أقترب من القرآن خطوة، أرتقي مع القرآن.

ملخص درس النهار ده؛ جلسة الصدق والطلب في التغيير بصدق في مواسم الطاعات، وفي رمضان تحديدًا للاقتراب من القرآن، بحيث إنه يكون تغييري تغيير قرآني على مراد الله سبحانه وتعالى مني. أسأل الله عز وجل أن يبلغنا رمضان، وأن يعيننا فيه على ذكره وشكره وحسن عبادته، وأن يوفقنا لقيام ليلة القدر على الوجه الذي يرضى به عنا سبحانه وتعالى، وأن يوفقنا لصيام رمضان على الوجه الذي يرضى به عنا سبحانه وتعالى. أقول قولي هذا وأستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك. ونلتقي بعد رمضان بإذن الله سبحانه وتعالى.