دورة الوعي اللغوي - محاضرة خاصة

السلام عليكم ورحمة الله وبركاته، هذه أول تجربة لاستخدام البث المباشر على الفيسبوك، من باب التجريب وتجريب الفاعلية. أهلاً بكل من يشاهدنا الآن. الكلام بشكل مختصر عن دورة الوعي اللغوي، كنا نحن دورة أديناها قبل كده من كذا سنة في بعض الأنشطة في المانيل، ثم راجعنا فيها الرأي، وراينا إعادة بثها مرة أخرى، أو إعطائها في شيخ العمود.

الدورة كانت عايزة تجاوب على شوية أسئلة، أهمها هو: هل للغة أي علاقة ما بين الهوية؟ ما هي الهوية؟ ما هي الثقافة؟ ما هي الحضارة؟ إيه علاقة اللغة بالهوية والثقافة والحضارة؟ هل ده بيغير شيء؟ يعني أنا لو أنا رجل عربي ولا مصري بدرس هندسة ولا طب ولا صيدلة ولا أي حاجة من العلوم الحديثة باللغة العربية، هتفرق إن أنا أدرسها باللغة الإنجليزية؟ ده هيغير شيء من انتمائي للحضارة، للديانة، للثقافة؟ ده جزء أساسي كانت المفروض الدورة بتجيب عليه.

بعد كده انتقلنا إلى السؤال الأكثر خطورةً الذي مرت به الأمة: هو هل الاستعمار استخدم اللغة كسلاح قوي جداً ضد الأمة، سواء في الدول التي نجح في أن يغير اللغة الدارجة أو اللغة العامية أو اللغة الرسمية؟ طيب هل المستبد المحلي الذي ورث مهمة المستعمر، هل بيستخدم اللغة أيضاً كسلاح برضه مؤثر، وسلاح للسيطرة ولا ممارسة السلطة؟

طيب هل لو كانت اللغة فعلاً سلاح في إيد المستعمر أو المستبد، هل استخدام اللغة دي بيكون عن أنهي طريق؟ عن طريق التغريب، ولا أحياناً عن طريق توطين اللغة المحلية؟ عشان يتضح المثال مثلاً، في مستعمر زي المستعمر الإنجليزي أو الفرنسي في مصر أو في الشمال الإفريقي، سواء المغرب أو تونس أو الجزائر، حاول إن هو يحل لغة المستعمر الفرنسية أو الإنجليزية محل اللغة المحلية.

في بعض المستعمرين زي الاستعمار البلجيكي في الكونغو، لا، حاول يكرس لحالة التشتت الداخلي عن طريق المحافظة على اللغات المحلية. دخل دولة، الدولة فيها أديار أو مجتمع فيه خمس لغات، فحافظ على التفر المجتمعي بأن هما ما يجتمعوش على لغة، فخلى كل واحد يتكلم لغته، يدرس بلغته؛ منها يعمل حاجتين: يعمل فصل باستخدام اللغة، يعني اللغة كأداة مستعمر أداة فصل، والامر الثاني هو حجز المتحدث بهذه اللغة المحلية الفقيرة عن كل المعطى العلمي المكتوب بلغات أخرى.

طيب، اللغة من ناحية المحور الثالث في الدورة: هل اللغة من ناحية التربية والتعليم والإبداع لو أنا طفل عندي طفل حاليا في العصر الحديث؟ اللغة الإنجليزية بتمثل تسعين في المية من الوثائق على الإنترنت، بتمثل معظم الأوراق البحثية والمؤتمرات وكل العلوم التقنية الحديثة، العالم كله بيضخ في اللغة الإنجليزية.

طيب، أنا عندي ما بين أمريني أحلهما مر: أُعلّمه باللغة العربية فيفقد كل هذا المخزون العلمي والتقني، وكمان فرص العمل والتحقق الاجتماعي وكذا؛ ولا أُعلّمه باللغة الإنجليزية فأفقد هويته وثقافته وحضارته، كما في المحور الأول؟ طيب، في طريقة أقدر أوازن ما بين تعليم اللغات الأجنبية -التي نرى أن تعليم اللغات الأجنبية واجب حضاري وشرعي- والتعلم باللغات الأجنبية وهو خطيئة حضارية وشرعية؟ طيب، إيه الفرق بين الاثنين؟ ده محور ثالث في دورة الوعي اللغوي.

هل اللغة أداة من أدوات الإصلاح الاجتماعي؟ إحنا دايماً بنتكلم مثلاً في مصر من أيام الملك فاروق، أول اهتمام رسمي أو من قبل مؤسس الدولة بفكرة محو الأمية. طيب، أنا دايماً بتكلم إن في أمية، وأنا باحاول أمحو هذه الأمية، طب الأمية دي بتزيد؟ آه، طب ده أصلاً مشروع إيه؟ مشروع مجتمعي، ولا لغوي، ولا ديني، ولا شرعي، ولا سياسي؟

طيب، اللغة دي، اللغة ممكن تكون أداة للإصلاح الاجتماعي، ممكن تكون أداة لرفع الوعي العام، للمقاومة؛ مقاومة -سواء بكل أنواعها- المقاومة الحضارية، والمقاومة الثقافية، والمقاومة السياسية، وهكذا. فاللغة كمشروع إصلاح اجتماعي، أو بوصفها أو باعتبارها مشروع إصلاح اجتماعي، ده محور من محاور الدورة.

السؤال المتعلق باللغة كمهاره: أنا دلوقتي عايز أتعلم لغات، الواقع الحالي بيقول إن في عشر لغات من اللغات المهمة جداً في العالم؛ الست المشهورين بتوع الأمم المتحدة، هم العربية، والصينية، والإنجليزية، والفرنسية، والأسبانية، والروسية، دول الست لغات الأساسية. وأربع لغات أخرى: البرتغالية، والإيطالية، والألمانية، والكورية -أو بعض الناس بيحلوا لهم أنهم يضعون لغات أخرى-.

العشر لغات دول، أنا لو عايز أتعلم هذه اللغات، طب هذا في أمر تفنى فيه الاعمار! أنا عايز في ناس كمان عندها همة عالية، فنفسه يتعلم لغات أكتر، عايز يضيف عليهم لغات العالم الإسلامي، عايز يتعلم فارسي، عايز يتعلم أردو، عايز يتعلم لغة الإندونيسي. في لغة مثلاً لو اتعلم لغة إندونيسيا، كده بيتكلم مع ثلاثمائة مليون مسلم، لو اتكلم أردو بيتكلم مع اربعمائة مليون أو خمسمائة مليون مسلم، لو اتكلم لغات زي اللغات الهوسة واللغة السواحلية أو اللغات الإفريقية -يعني مسلمي إفريقيا- فبرضه كم كبير جداً من إخوانه في الإسلام وفي الديانه. عايز يتعلم هذه اللغات، طيب، إزاي أتعلم لغة بسرعة وفي نفس الوقت أصل لدرجة من الإتقان، يعني درجة جيدة أو درجة مقبولة؟

طيب، إيه هو حد الإتقان في اللغة؟ هل في معيار ده للإتقان ده؟ هل المعيار ده معمم عالمياً على كل اللغات؟ هل كل اللغات متساوية في الصعوبة؟ طب لو هي مش متساوية في الصعوبة، إيه المعيار اللي بيقول إن اللغة دي صعبة أو سهلة بالنسبة لمين؟ يعني أنا لو بتكلم باللغة العربية، أسهل أتعلم فارسي ولا فرنسساوي؟ أتعلم أسهل سنسكريتي ولا هوسة؟ إيه المعايير لده؟ وإزاي أتعلم لغة بسرعة؟

في برنامج مشهور جداً إحنا بنشرح جزء منه أثناء الدورة، وهو تعلم أي لغة في تسعين يوم. إزاي خلال تسعين يوم أي لغة؟ أي لغة ممكن أصل فيها لدرجة مقابلة لحد اللي هو إحنا بنسميه بي واحد أو بي اثنين في معيار عالمي، أو المعيار الأوروبي لإتقان اللغات، اللي هو إيه واحد، إيه اثنين، بي واحد، بي اثنين، سي واحد، سي اثنين. فلو أنت وصلت سي واحد أو سي اثنين، خلاص المتحدث باللغة ده بيبقى أقرب للمتحدث للمتحدثين الأصليين. لو أنا وصلت لبي واحد أو بي اثنين، يبقى أنا كده مقبول؛ ده لدرجة أن ممكن في سفر أو مِنَح أو تعامل مع بعض اللغات، مع بعض الدول، بيشترط إن هو لو بي اثنين كويس ممكن يلتحق.

فإحنا بنزعَم أن ممكن معظم اللغات بتاعت اللغات العالمية خلال تسعين يوم بطريقة معينة بترتيب معين بمواد دراسية معينة تصل لدرجة بي واحد أو بي اثنين في تسعين يوم أو مية يوم. المحور ده اللي هو اللغة بوصفها مهارة، كيف يمكن أن تتعلم لغة أجنبية بسرعة، ده محور من محاور دورة الوعي اللغوي.

طيب، اللغة إيه علاقتها بالتقانة؟ إحنا حالياً دلوقتي العالم الحالي يسمى بعالم -إحنا داخلين في عصر المعرفه- عصر المعرفة متعلق بشبكة الإنترنت. شبكة الإنترنت حالياً وعلوم الحاسب الآلي بتغير جميع التخصصات في العالم، لدرجة أن في نسخة حاسوبية من كل التخصصات، يعني أي تخصص ممكن يخطر على بال المستمعين في نسخة حاسوبية منه.

طيب، علاقة اللغة بالتقانة إيه؟ يعني إيه معالجة لغات طبيعية؟ يعني إيه مهندس أو متخصص في معالجة اللغات الطبيعية؟ يعني إيه مهندس لغة؟ أنا كان توصيفي في أحد الأعمال التي قمت بها مهندس لغة عربية، يعني إيه مهندس لغة عربية؟ كيف يستطيع الإنسان أن يصبح مهندساً للغة؟ أي بقى لغة: مهندس لغة عربية ينفع، مهندس أي لغة تانية ينفع. إيه مجال هندسة اللغة؟ إيه مجال معالجة اللغات الطبيعية؟

ليه جوجل تعتبر شغاله في كنز يشابه بالضبط حكمة اكتشاف البترول حالياً؟ اللي هو البيانات، التعامل مع البيانات، لغات حوسبية. ده محور من المحاور اللي بنغطيها في دورة الوعي اللغوي: اللغة وعلاقتها بالتقنية، أو كيف تصبح مهندساً لغوياً، خطوات واضحة إزاي أدرس؟ إيه العلوم أدرسها بانهي تتابع؟ إيه الكتب أو المقررات أو المساقات الدراسية اللي ممكن أتعرض ليحيث أصبح متخصصاً في هندسة اللغة أو في معالجة اللغات الطبيعية؟

طيب، اللغة والاقتصاد: أنا دلوقتي عايز أحول المعارف اللغوية -سواء إتقاني للغة، سواء لغة الأم، يعني إتقان فقط للغة العربية إتقان تام أو إتقان مقبول- ده لوحده يمثل دخل مادي جيد جداً جيد جداً بل ممتاز، سواء واحد شاب أو شاب مش لاقي شغل أو بيدور على شغل أو عايز يشتغل شغل مرن من البيت ويجيب له فلوس كويسة جداً. فايه العمل الحر المرتبط باللغة؟ أو إيه علاقة اللغة بالاقتصاد عموماً عالمياً؟ وعلاقة اللغة العربية بالذات بالاقتصاد أو باجتلاب المال أو صناعة المال؟ ده محور من المحاور المهمة جداً اللي بنغطيها في دورة الوعي اللغوي.

طيب، إيه علاقة اللغة بعلوم الشريعة؟ إحنا دايماً بنقسم العلوم دائماً العلوم الشرعية: علوم غايات وعلوم آلة. علوم الآلة دي أو وسيلة أن أنا أتوصل بها للفقه: علوم القرآن، وعلوم التزكية، وكذا. طيب، أنا دلوقتي عايز أعرف العلاقة الواضحة المباشرة ما بين اللغة العربية وكافة العلوم الشرعية، واللغة العربية أنهي قدر بانهي طريقة بانهي سلم تعليمي استطيع إتقان هذه اللغة الممهدة لإتقان العلوم الشرعية؟

مثال، عايز الأهم على الإطلاق: باب علم الإيمان أو التزكية أو الأعمال القلبية، إيه علاقة ده باللغة؟ يعني أنا إيه اللي أنا لو أنا عايز أتم، أتعامل مع الله عز وجل فأفهم عن الله عز وجل ما وصف به نفسه، أو أسماء الله، أسماء الله الحسنى الكريمة، فيعني إيه أسماء الله الحسنى؟ فإنا عايز أفهم دلالاتها اللغوية عشان أنفعل بها قلبياً، عشان يتحول ده العمل وإيمان بالله عز وجل. فايه علاقة اللغة بالإيمان؟ ده بنغطي في الدورة. إيه علاقة اللغة بالفقه؟ إيه علاقة اللغة بأصول الفقه؟ إيه علاقة اللغة بالاعتقاد؟ علاقة اللغة ببعض العلوم، مثل علم تأويل الرؤى وتفسير الأحلام، وهكذا. ده من المحاور اللي احنا بنغطيها في الدورة.

بعد كده، طبعاً في محاور بتبقى متقاطعة مع المحاور السابقة، لو في محاور بينية فيما ذكرناه متقاطعة، يعني علاقة الثقافة بالهوية بالحضارة بالتقنية بالاقتصاد بالعلوم الشرعية بكافه المحاور، برضه بنعرض ليها. أحياناً بنقف وقفة طويلة شوية مع فكرة اللغة وتربية الأطفال: كيف يكتسب الطفل اللغة؟ كيف يكسب الطفل العربي المسلم المعاصر لغة القرآن والسنة؟ كيف استطيع الوصول بالطفل المسلم المعاصر، سواء هو عايش في ديار العرب أو في ديار أجنبية؟

عندي طفل أنا مسلم الحمد لله، وعايز أطلع ابني متقن العربية من أجل: واحد، هويته ثقافته؛ واثنين، إتقانه لكتاب الله أو فهمه لكتاب الله وسنة رسول الله. طيب، أعملها ازاي دي؟ سواء داخل ديار العرب أو خارج ديار العرب، فده يمكن من أكتر الحاجات اللي بنقف شوية قدامها في الدورة، فكرة كيف يكسب الطفل العربي أو المسلم في التاريخ المعاصر، سواء كان داخل ديار العرب أو خارج ديار العرب، موجود بقى في اليابان، موجود في الصين، موجود في أوروبا، موجود في أمريكا، كيف يكسب لغة عربية سليمة صحيحة تمكنه من التعرف على كتاب الله وسنة رسول الله؟

ده يمكن المحاور بشكل عام اللي احنا بنحاول أو إن شاء الله نفسنا نغطيها في دورة الوعي اللغوي. ثم يعني يتبقى جزء تطبيقي أو الجانب اللي هو يعني مجاوبة على جواب على الدعاء، إحنا بنعي الدورة فكرة اللي هو ممكن أتعلم أي دورة، أي لغة أوصل فيها لمستوى كويس خلال تسعين يوم أو مية يوم، ففي ناس بيقول لك: لا الكلام ده يا إخواننا، أنتم إيه يعني الكلام ده دعائي وحاجة لطيفة جداً بس ده مش موجود.

فإحنا بنقول له: والله أنت في أول الدورة اكتب اللغة أو اللغة، ثلاث لغات، أي عدد من اللغات اللي أنت عايز تتقنها، فإحنا هنديك حقيبة لغوية، الحقيبة اللغوية دي مقسمة بنقول لك: أدي المادة بتدرس ده عملته بالترتيب الفلاني، خلال من تسعين يوم لمية يوم إحنا بنعي أن أنت هتصل لدرجة كذا. خلاص، فدي من الحاجات اللي برضه إيه يمكن المحور المستقبلي أو التطبيقي اللي إحنا إيه بنعرضه داخل الدورة.

نتمنى أن إحنا إن شاء الله نراكم على خير في هذه الدورة والدورات القادمة تحت مظلة الوعي اللغوي، لو حد عنده أسرع من الحضور يبدا يتفضل.

طيب، إحنا عندنا سؤال، كويس أن هو في محور من المحاور اللي احنا بنغطيها وما قلناش أثناء العرض، وهو مجال تعليم العربية للأجانب. طبعا ده بنتكلم عنه أحياناً داخل علاقة اللغة بالاقتصاد: إيه الوظائف اللي ممكن واحد مشتغل باللغة تعليماً وتعلماً، وبالذات اللغة العربية بالاصالة، إزاي تدر عليه دخل منها دخل، ومنها وظيفة دعوية؟

اللغة العربية هي مفتاح الباب الذهبي أو المدخل الذهبي للإسلام، فتعليم العربية للأجانب مجال مهم جداً وأخذ في التصاعد في العالم. اللغة العربية من أكثر اللغات صعوداً في العالم، عدد المتحدثين باللغة العربية كلغة ثانية بيزيد جداً في العالم. فده من المجالات اللي إحنا بنغطيها، بنقول هو إيه المجال؟ فين الأماكن اللي ممكن الواحد يدرس فيها دراسة أكاديمية؟ فين الأماكن اللي ممكن يدرس فيها دراسة وظيفية لو عايز يشتغل بيها على طول؟ إيه الكتب والسلم التعليمي بتاع تعليم العربية للأجانب؟ فده إحنا برضه بنغطيه في الدورة.

لو حد يعني صاحب السؤال عايز يعني اجابه بسيطة كمدخل -طبعاً التفصيل داخل الدورة- في إحنا عندنا خمس أو ست أماكن في مصر أكاديمية، يعني إيه أكاديمية؟ بتدي شهادة مباشرة، صاحب الشهادة أو الحاصل على الشهادة هو

إنسان مؤهل للعمل أو مجاز للعمل في تعليم العربية للأجانب أو للناطقين بغيرها، أو حسب اسم المكان ده بيحبوا أن هو يطلق على التخصص، يعني منه مركز التميز الألماني بالشراكة مع كلية التربية في جامعة عين شمس بيدي شهادة مهنية، يعني مهنية مش أكاديمية؛ ما تكملش وراها ماجستير ودكتوراه، لكن شهادة دبلومة لمدة سنة واحدة متخصصة.

الميزة الأساسية أن هي عملية جداً، في الدبلومة المكثفة بتاعة الجامعة الأمريكية هي لمدة تلات شهور بتبقى غالية شوية بـ 5000 جنيه ولا حاجة، برضوا تطبيقية عملية في حاجة يعني تعتبر أغلى حاجة وأكثر الحاجات اعتمادية في الخارج، اللي هو بيسموها أحياناً السيلتا في المعهد البريطاني أو البريتش كاونسل برضوا في تعليم العربية أو تعليم اللغات الأخرى كلغة ثانية مطلقة.

في كلية الدراسات العليا التربوية في جامعة القاهرة المقابلة لكلية دار العلوم برضوا بتدي دبلومة خاصة ودبلومة عامة في تعليم العربية للأجانب.

طبعا في طريق أطول وأكثر أكاديمية أن هو الإنسان لو متخصص حصل على شهادة في اللغة العربية دار العلوم أو أزهر أو كلية الآداب أو الألسن أو أي حد بيدرس لغة عربية كدرجة ليسانس أو بكالوريوس بيلتحق بالدبلومة العامة في كلية التربية، أي كلية تربية طبعا أشهرها وأكثرها اعتمادية وأكثرها تخصصية كلية التربية بجامعة عين شمس؛ دبلومة عامة وبعد كده دبلومة خاصة بعد كده بيكمل ماجستير ودكتوراه في التخصص أي تعليم العربية أما للعرب أو تعليم العربية للأجانب.

اتقان اللغة النحو الصرف والبلاغة العلوم التخصصية، طبعا احنا بنفرد ليه محاضره كاملة، لكن برضوا إجابة بشكل مختصر أن احنا بنقسم الطريق لطريقين: الطريق الأول هو طريق التخصص أن هو أنت هتدرس دراسة تخصصية عن طريق المتون وشروحها وحواشيها وكذا، الطريقة الأزهرية القديمة؛ أو طريقة وظيفية أن أنت بيكون هدفك هو الإتفاق، يعني مثلاً حد عايز يشتغل معلق صوتي، حد عايز يشتغل مراجع أو مدقق لغة أو مصحح أو محرر أو مترجم، فاستخدامه للغة أو تعلمه للغة بيبقى لغرض آخر، فبيبقى في مسار آخر مسار موضوعي وظيفي، فاحنا بندل الحضور أو الطلاب على المسارين المسار التخصصي والمسار الوظيفي، وهو يختر لنفسه كيف شاء.

الإتقان الفصاحه لو حد عايز يتقن اللغة العربية القاء، ده بيبقى مسار تدريبي مهاري ليه تطبيق من ناحيه داخل محاضرة اللغة، والاقتصاد أن هو ازاي ممكن تتحصل على مال أن أنت تبقى معلق صوتي أو مؤدي صوتي، فده مجال ليه دوراته.

حتى احنا إن شاء الله بعد الدورة على طول بندل الناس على مسار أو مسارين تلاتة، منها مسارات تدريبية؛ منها دورة هنعلن عنها قريب جداً بعد دورة الوعي اللغوي، دورة متخصصة احترافية لتدريب لمهارة الإلقاء أن أنت تلقي شعر أو نثر أو قران أو حتى اخبار أو أو نص إذاعي أو حتى قصص للأطفال حتى بشكل خاص أو بشكل احترافي، دي دوره تدريبية.

دورة تدريبية على إتقان العربية، طبعا في هنندل على تلات دورات على الأقل بيوصلوا المتدرب لهذه المهارة؛ مهارة إتقان إلقاء العربية الفصحى أو التحدث بها أو القراءة دي.

السؤال عن إتقان اللغات الأجنبية في وقت قصير احنا ده بنغطي محاضرة كاملة اللي هو اللغة بوصفها مهارة أو باعتبارها مهارة، لكن لو حد عايز يقرا حاجة حتى نلتقي في الدورة إن شاء الله، الكتاب المشهور بتاع اسمه إيه ده بيل هاندل أو بيل هاندلي اللي هو طبعة هنداوي اسمه تعلم أي لغة أجنبية أو تعلم لغة أجنبية بسرعة وبسهولة، كتاب مشهور جداً، الراجل ميزته أن هو مدي طرق كثيرة جداً للتدريب والتعلم والإتقان بسرعة.

الميزة الأساسية للكتاب أن هو كتاب صغير، أن هو معروض مجاناً على الإنترنت كعادة مؤسسة هنداوي ربنا تم، أي لغة أجنبية بسهولة أو كيف تتعلم أي لغة أجنبية بسهولة، ومستوه أن الرجل نفسه جرب هذه التقنيات وتعلم أكتر من 15 لغة، وليه موقع مشهور جداً على الإنترنت بالهاندلي والكتاب من مطبوعات هنداوي لو حد عايز يتعلم يشوف تقنيات تعلم أي لغة بسرعة؛ لأن عامل الوقت مهم جداً.

احنا بنقول عايزين خلال تلات شهور أو تلات شهور ونص يعني في حدود 90 يوم أو 100 يوم أصل لدرجة بي واحد أو بي اتنين في الإتقان، محك الاختبار أن كل لغة لها اختبار كفاءة لغوية، أنا عايز أدخل امتحان اختبار كفاءة لغوية ما يشبه البي تي أو البي تي إي أو الآيلتس أو التوفل أو المشابه ليها الدلف أو الضلف في الفرنسية أو اختبار الكفاءة اللغوية في العربية، في عندنا خمس أو ست شهادات أو اختبارات الكفاءة اللغوية في اللغة العربية أو الاختبارات المشابهة في اللغات الأجنبية، الكتاب ده يدل على تقنيات ممتازة كمدخل يعني.

آه لو حد عنده طفل صغير سن صاحب السؤال بيقول سنه أو سنة ونص عايز أعرف هعلمه ازاي، آه طبعا في محاضرة كاملة بنتكلم عن علاقة اللغة وتعليمها للأطفال ومسار مسار يحتوي على إيه الكتب إيه المهارات اللي يجدها الأب والأم إيه المواد اللي ممكن يسمعها إيه السلم اللي ممكن يتعرض له كمواد سمعية أو مقروءة ممكن يقرا عليه الأب أو الأم طبعا فهو وهو في سن مازال لسه طبعا لم يتقن القراءة والكتابة.

الدورة هل ممكن في إمكان الحضور؟ آه طبعا يعني ممكن تشرفونا بكره احنا إن شاء الله هنبدا في تمام التاسعة صباحاً، حضراتكم تشرفونا لو كان الاماكن يعني خلاص الدورة اكتملت يعني فاحنا ممكن ممكن نفتح ممكن نفتح دورة تانية هي الدورة تبدا تسعة آه طيب تمام ممكن تراجعوا ده مع الإدارة، لكن أنا أظن أن مازال لسه في أماكن متاحة للحضور إن شاء الله.

السؤال بتاع السن لو أنا سن معين متعلق بتعلم اللغات، طبعا في في السؤال قسمين، في سؤال متعلق بأن الأطفال الإنسان وهو في سن معين في الطفولة ده بيبقى أفضل سن لالتقاط المهارات اللغوية الأساسية اللي هو إيه، يعني لو أنا اهتميت جداً بالطفل في أول خمس ست لغات ده هيفرق معايا جامد جداً، لو أنا أهملته في الخمس سنوات أو الست سنوات الأولى وجيت بعد كده اهتميت بيه قدر الاهتمام ده لن يعوض الإهمال في الخمس سنوات الأولى أو الست سنوات الأولى.

السؤال لو بيسال على أنا دلوقتي شخص كبير يعني أنا متجاوز الحاجه و30 سنة ينفع أتعلم لغات أجنبية وأنا كبير هقدر أتقنها هقدر أتقن عدد كبير منها لو واحد كمان همته عالية؟ آه من أشهر البولي جلوت اللي هم متعدد اللغات اللي هو بيعرف أكتر من 20 لغة و30 لغة، في ناس بتعرف أكتر من 40 لغة 50 لغة، يعني أشهر بوليغلوت أو متعدد لغة متعدد لغوي في العالم كان يعرف أكتر من 57 لغة، وده معاصرين ممكن لو حد كتب متعدد اللغات على الإنترنت هيلاقي فيديوهات منتشرة لاسماء ناس كتير منهم ناس معاصرين الناس كان بتعرف أكتر من 30 لغة.

أشهرهم في واحدة صاحبة كتاب بنت من بلغاريا عاملة كتاب اسمه بوليغلوت متعدد اللغات كانت بتعرف هي اتعلمت بدات تتعلم لغات أجنبية من بعد ما كان سنها 30 سنة، وهي بتعرف 24 لغة؛ الستة الأولى منهم إتقان تام مثل اللغة الأولى والأربعة التانيين بتعرف تترجم منهم إليهم والـ 14 لغة التانيين بتقدر تستعين بمراجع وكتب وتترجم من أي نص لأي نص من أي لغة لأي لغة.

فدي بدات تتعلم كل اللغات ما عدا لغتها الأولى بعد سننا كان حاجة 30 سنة، فاه لا السن مش عائق ولا حاجة مش عائق للغة واحدة ولا اتنين ولا تلاتة ولا 10، ده ممكن أكتر من كده بكتير، وشيء مجرب مقيس وموجودين، يعني البنت اللي أنا بتكلم عليها صاحبة كتاب بول جلوت موجودة حية وكتاب رائع جداً، وللاسف لم يترجم للغة العربية وموجود باللغة الإنجليزية بس، كتاب صغير ولغته بسيطة يعني.

دراسة حد بيسال عن الدراسة في كلية دار العلوم هل هي كافيه لاتقان اللغة؟ سؤال الإتقان ليس له أي علاقه بالدراسة الأكاديمية للمفاجأة، يعني في مسارين أساسيين لما احنا بنقول إتقان؛ إتقان يعني مهارة ممكن واحد يبقى أستاذ نحو صرف أستاذ نحو صرف ولا يحسن الحديث بالعربية الفصحى، وممكن واحد لم يدرس نحو ولا صرف إطلاقاً وهو لسانه مستقيم جداً لا يلحن يستطيع التحدث بعربية سليمة جميلة بل يلقي شعر بل ينظم شعر بل بل كثير جداً من المهارات اللغوية دون دراسة متخصصة.

فالإتقان مهارة، التخصص في علوم العربية أمر آخر، فأن ابقى متقن جداً للنحو والصرف كقواعد نظرية ولا استطيع أقيم لساني بعربية صحيحة ولا لمده دقيقة واحدة، والعكس ممكن؛ ممكن رجل لم يدرس قط أي نحو ولا صرف ولا بلاغة ولا عروض ولا قافية بشكل متخصص وينظم الشعر، بل يكون شاعر يملا بشعره الآفاق بل ذكر عن محمود سامي البارودي الشاعر الفحل أنه ملا الدنيا شعر بل كتب معظم ديوانه قبل أن يدرس أي دراسة متخصصة في النحو والصرف.

فإتقان اللغة كمهارة؛ كمهارة تحدث وتواصل وقراءة وكذا غير متعلق بالدراسة التخصصية، عشان كده احنا بنقسم نقول إيه، في نحو تخصصي ونحو وظيفي، النحو التخصصي اللي هو القواعد وفلسفة النحو وأصول النحو وكذا ده مالوش علاقة الإتقان أو المهارة أو مهارة الإلقاء والقراءة والكتابة ده مالوش دعوة.

والنحو الوظيفي الوظيفي أن هو لغرض، ممكن واحد يبقى أداءه الصوتي عالي جداً وببيتكلم كلام صحيح لا يلحم فيه وهو لم يدرس نحو تخصصي، بس إيه هو تعرض لنصوص فصيحة كثيرة محفوظ وكبير جداً فيستقيم لسانه ويبقى متقن.

فالدراسة بتخلي بتخلي الإنسان متخصص لو طبعا درس (كما ينبغي) بتخليه متخصص في اللغة العربية، مش لازم يكون متقن للعربية كمهارة تمام كده.

مجال هندسه اللغه احنا لنا محاضرة كاملة اسمها كيف تصبح مهندساً لغوياً بشكل برضوا سريع يعني يناسب المقام، مجال هندسة اللغة هو مجال بيني، المجال يجمع ما بين أن إنسان بيكون متخصص في علوم اللغة، في علوم اللغة يعني إيه؛ يعني دارس تجويد ودارس أصوات حديثة ودارس لسانيات غربية حديثة، ودارس نحو وصرف وبلاغة وعلم وفقه لغة ودلالة قديم، ودارس رياضيات وإحصا احتمالات، ودارس قواعد بيانات وذكاء اصطناعي وبعض خوارزميات في علوم الحاسد، ودارس فلسفة لغة وعلم علم نفس إدراكي أو معرفي.

عدة مجالات أحياناً بتصل لـ 10 مجالات احنا بنتعرض لها في محاضرة كيف تصبح مهندساً لغوياً بنقول أسماء العلوم والتدرج في كل علم، اللي لو الإنسان اتبع هذا السلم التعليمي المتنوع أو المتقاطع ممكن يصبح مهندساً ل... طبعا للاسف حتى الآن لا يوجد قسم واحد مفرد في مصر لهندسة اللغة.

طبعا بالخارج من أكتر من 40 سنة موجود في أقسام متخصصة الإنسان اللي داخلها عارف أن هو داخل متخصص في الكمبيوتر لينغويستيكس أو لسانيات الحاسوبية أو اللانغويج إنجينيرينج هندسة اللغة، بيدرس الأشياء كده على مع يعني على التوازي بيدرس نحو وصرف نحو لغته أو اللغة اللي عايز يدرسها نحو وصرف وبلاغة وبيدرس جنبها ذكاء اصطناعي وإحصا احتمالات ورياضة لغوية رياضيات لغوية وإحصاء لغوي وهكذا.

طيب أيهما أفضل في تدريس في تدريس النحو الطريقة القديمة بقراءة متون وفكها والتدرج بطريقة الآجرومية ثم قطر الندى ثم الـ... أم الطريقة الحديثة النحو الواضح في مجلدين؟ لازم إيه هو غرض الدراسة، لو هي الدراسة تخصصية، الدراسة التخصصية؛ الدراسة التخصصية طبعا الكتب القديمة الطريقة القديمة طريقة مخدومة جداً، مخدومة جداً يعني إيه، يعني اشتغل عليها عقول كثيرة جداً مع اختلاف الجنسيات والأعراق وكذا على إيجاد هذا السلم التعليمي وخدمة هذه المتون وفك عباراتها وكذا.

لكن صعوبة الطريقة القديمة أن هي محتاجة إنسان واحد شيخ متقن زي ما بيقولوا دائماً يقولوا زمان كانوا يقولوا شروط العلم أن هو كتب كتب صحاح وشيخ فتاح، عايزه يعني خلاص لقيت الكتاب الألفية متن مبارك وعليه اشتغال والعلماء لديهم اشتغال عظيم جداً به، طيب فين الشيخ الفتاح، فلو عندك كتاب صحيح يعني متن معتمد في في العلم وشيخ فتاح مع تفنن ليه؛ لانه احنا محتاج دراسة النحو والصرف وعلوم اللغة محتاجة إلمام قوي جداً بععلوم المنطق وأصول الفقه وقدر من علم الكلام.

فالطريقة القديمة هي طبعا أقوى وأوثق في فهم مرادات العلماء القدامى وأرسخ قدما في علوم العربية، لكن محتاجة إلمام وتفنن بالعلوم الأخرى زي المنطق وأصول الفقه وعلم الكلام لإتقان علوم العربية.

الطريقة الموضوعية الطريقة الحديثة طريقة الكتب هي أيسر في فهم في فهم مهارات الإعراب، يعني لو واحد عايز بس يعرف يعني عايز يشتغل مدقق لغوي عايز يلم إلمام سريع بالقواعد، الطريقة الوظيفية الكتب الحديثة تكفيه، لكن الكتب الحديثة في رأيي الشخصي فيها فيها ميزة اللي هي التيسير واللغة البسيطة أن أي حد ممكن يقراها حتى لقراءة ذاتية (بدون الرجوع لشيخ ولا أستاذ وكذا) يستطيع التعامل مع الكتاب.

فيها عيب ضخم جداً أن هي طبعا بتسطح جداً الفن، فلا يستطيع الإنسان فهم القواعد الذي التي بني عليها العلم، ما هي الأصول ما هي فلسفة هؤلاء العلماء الذين تبنوا هذه الآراء ووضعوا هذه الأصول أو اختاروا هذه الاختيارات اللغوية، فالأمور بتبقى بالنسبة له غير معللة، فكأن واحد عايز يدرس أصول فقه مثلاً من كتب حديثة، طبعا يكاد تكون جميع الكتب المعاصره لو واحد درس أصول فقه 10 سنين من كتب معاصرة لن يستطيع فهم الأغراض الأساسية التي أسس عليها العلماء الفن.

فالطريقة المعاصرة بتاعة الكتب زي النحو الواضح والنحو الوافي، ممكن أي حد يتعامل معاها حتى لو غير متخصص، لكن من ناحية بناء الملكة التخصصية وفلسفة الفن والعلم وكذا، لا، مستحيل دي تؤدي إلى التخصص الدقيق. أما الطريق الأول فهو صعب ووعر، لكن لو هيصبح الدراسة بغرض التخصص، الطريقة القديمة مع استثناءات في الكتب المعاصره، يعني تعرف كده زي ما بيقولوا بالمناقيش.

طبعا قدرة التعلم اللغوي بتفرق من شخص لشخص. عندنا في علم النفس، علم نفس الفروق الفردية، وعلم النفس المعرفي، أو بيسموه أحيانا القدرات العقلية، في أحد الذكاءات بيسموها الذكاء اللغوي. ففي حد عنده استعداد لغوي، استعداد ما، دايما الناس بتقسم ما بين شيء حاجة اسمها استعداد وقدرة؛ إيه اللي انت بتعرفه دلوقتي وإلي انت تقدر عندك استعداد فطري، أو بيئي واجتماعي وتربوي وتعلمي إن أنت تكتسبه. ففي ناس ذكائها اللغوي عالي.

يعني أنا مثلاً على الورق، لو أنا متحدث أصيل باللغة العربية، واحنا اتنين واحنا الاتنين عرب وعايزين نتعلم اللغة العبرية، المفروض في كلام واضح بيبقى معايير مكتوبة أن أي حد عربي عايز يتعلم عبرية يصل بها إلى مستوى كذا، يكفيه مثلا مئتا ساعة، ثلثمائة ساعة تدريبية كذا. في اللغة الإنجليزية وده مشهور، ممكن نتعرض ليه أحيانا بالدورة اللي هي إيه جداول الساعات الكافيه لإتقان اللغة أي لغة أو الوصول لمستوى في اللغات لغة بعينها. فلو متحدث باللغة الإنجليزية حتى يصل لمستوى الإتقان في اللغة الألمانية، معمول جدول عشان يصل لمستوى مبتدئ متوسط متقدم عدد ساعات معين، ساعات ثلاثمائة وهو يخلص مائتين، ممكن يكون إيه السبب؟ إنه استعداده اللغوي أهلى أو ذكاؤه اللغوي أعلى.

فالفروق الفردية موجودة فعلا، لكن ده معناه إن هو يجيب في أقل من المتوسط، لكن التاني يوصل للرقم العادي اللي هو يطيع تعلم أي لغة في أي سن ما دام إنسان طبيعي، وحتى لو ذكاء متوسط يعني مش لازم يكون عبقري. حاجة تعليم الطفل لغته الأصلية، هل في الفترة دي بيقدر يتعلم لغة تانية؟ هل ده ممكن يشتت أو يؤثر عليه؟ طبعا احنا عندنا في هذا السؤال، اللي هو الطفل، أنا عندي طفل مصري عربي مسلم، وهو صغير، السن الذهبي بتاع تعلم لغاته وهو صغير أول خمس ست سنوات أو أول سبع سنوات. طيب أعلمه لغة تانية مع العربي؟ أه ولا لا؟ عندنا ابحاث تصل لدرجة التعارض والتناقض عالميا، حتى في ناس بيقولوا لا، ده تعلم لغتين وثلاثة مع بعض مفيد جدا من ناحية الإبداع والذكاء والقدرات وحل المشاكل، وفي ناس بتقول لا، ده بيأثر تأثرا، وده بحث تجريبي معمول على عينات.

وفي ناس بتقول لا، ده حتى لو هو مفيد من الناحية الإبداعية، احنا مش هنعمله عشان ناحية الهواة الثقافة. السؤال هو متعلق بإيه؟ احنا ليه عايزين نعلمه لغة تانية؟ هو ده السؤال، السؤال الأصلي، مش هو يقدر ولا لا، والا هو الطفل يقدر يعمل حاجات كتير جدا. في مشروع زمان كانوا جربوه، أظن مش فاكر علماء ألمان أو أمريكيين كان اسمه الطفل العبقري، قال لك احنا نقدر نعلم الطفل حاجات كثيرة جدا قبل ما يوصل أربع سنين أو خمس سنين، فجمعوا كم معارف ومعلومات مهولة جدا وضخوها للطفل وبتاع. فاكتشفوا أن الأطفال مثلا بقوا لو حفظوا جدول مئة، مش جدول عشرة، جدول مئة، يعني يقول له أربعة وأربعين في ثلاثة وثلاثين، يقول ممكن أحفظه؟ ممكن أحفظه. لما تتبعوا بدراسة طولية الأطفال دول بعدين هيبقوا حاجة عباقرة أو حاجة؟ لا، فقال لك طب احنا الحمل المعلوماتي المهول اللي عملناه على الطفل ده ما كانش مفيد. فنفس السؤال يعرض للغة؛ أنت عايز تعلمه لغة تانية ليه؟ في واحد بيقول والله الابحاث بتقول إن هو مفيد جدا، في واحد اتنين تلاتة.

الواقع أن كثير من الابحاث دي على الحقيقة بتوضع في أحيانا بتجاوب على سؤال لم يسأل، وهو طفل ثنائي اللغة، إن هو أبوه بيتكلم لغة وامه بتتكلم لغة تانية، أو هو عايش في مجتمع أبوه وامه بيتكلموا لغة زي اتنين عرب عايشين في أمريكا، فهو كده كده مضطر إن هو يسمع لغتين في نفس الوقت، أو أبوه إسباني وأمه فرنسية، أبوه عربي وأمه صينية. فأحيانا بيجيبوا بعض الابحاث المتعلقة بالطفل ثنائي اللغة أو ثلاثي اللغة، طفل يكون أبوه وامه وجدته الثلاثة بيتكلموا لغات مختلفة، أو هو أبوه وامه لغتين والمجتمع لغة ثالثة، فبيقول لك اهو نجح والطفل كان ذكي ومش عارف. فاحنا بنقول ده مش محل الاستشكال، أو حد بيجي بيقول بص طفل وعرضنا لغة تانية وطلع غبي قوي وبتاع. أحيانا برضه الابحاث دي بتبقى مغربة أو مأخوذة في سياق مش علمي، إن هو بيجيبها على طبقات فقيرة أصلا، طبقة فقيرة أو طبقة مهاجرة من طبقة ثقافية، هو ما بيسألش على الحقيقة أثر اللغة التانية، ده أثر البيئة وأثر الوسط الاجتماعي وكذا.

لكن احنا المحك بتاعنا إيه؟ ليه أعلمه لغة أجنبية؟ ده واحد. اتنين: هويته وانتماؤه الديني والثقافي، ده اللي يهمني، ده اللي هيحصل له. ودي كم الابحاث اللي عليه قليل جدا، اللي هو أثر على الهويه، أثر اللغة على الهوية. ده بيعمل ايه في الانتماءات، في الاسئله الأخلاقية، في الأسئلة القيمية، في مدى أنا استيعابي لديني وثقافتي فهم صحيح؟ وده محتاج، لكن احنا طبعا بنجاوب، يعني بناقش المساله دي بتوسع. لكن الضابط الأغلبي في ده أن هو بقدر إتقانه للغة الأولى، أقدر أجاوب على السؤال الثاني. إتقانه للغة مش مجرد إتقانه بيعرف يتكلم ولا بيعرف يسمي الأشياء، لا، انتماؤه للغة، إن هو، يعني إيه لغة عربية؟ يعني إاحنا عرب. يعني إيه مسلمين؟ إيه علاقة العربية بالإسلام؟ مش هو إن هو يعبر بده، وهو طفل صغير لا يستطيع أن يعبر ده، يستشعره؛ يستشعره لو استشعره، وبقاء قانون العربية من ناحية الأصوات والاداء وكذا، أنا استشعرت أنه حسن، هو ده السؤال بتاع متى تدخل اللغة الأجنبية، وطبعا ده في تفصيل أكثر داخل الدورة هتعرضه إن شاء الله.

اكتساب مهارة اللغة بدون دراسة تخصصية، عن طريق طبعا الطريق الأهل على الاطلاق هو التعرض؛ التعرض الواسع اللي بيسموه أحيانا طريقة الغمر، إن أنت بتغمر نفسك في بيئة لغوية سليمة بسماع نصوص فصيحة، ابتداء من القرآن قراءة صحيحة مجودة من قارئ متقن، مثل الشيخ الحصري، الشيخ المنشاوي، الشيخ البنا، الشيخ عبد الباسط. وطبعا أجلهم على الإطلاق الشيخ الحصري والشيخ المنشاوي، لأنهم كلهم أجلاء وقراء مميزين، لكن هذا القرآن. اسمع شعر ملقى إلقاء صحيح إبداعي من ناس متقنة للشعر، في أسماء كثيرة نتعرض لها، بندل على بعض قراء وروة والمؤديين للقصائد. اسمع مسلسلات صوتية، إخواننا في رواة عندهم قدر كبير جدا من الأشعار الملقاة والمسلسلات الدرامية الفصيحة وهكذا. احفظ نصوص شعرية ونثراً.

أما الناس أول ما بنقول حفظ، بيجي عنده قرآن أو شعر. حفظ النثر؛ حفظ النثر له أثر السحر! يعني أنا أعرف كثير من العلماء المعاصرين، منهم من توفي إلى رحمة الله، كانوا يحفظون قدر كبير من النثر. يعني واحد يقول لك يعني إيه نثر؟ يحفظ مقامات، خطبات، رسائل العرب، أحاديث النبي صلى الله عليه وسلم، أحاديث كثيرة، بشرط أن يسمعها عن أصل صحيح، يعني حد يكون مؤدي الحديث النبوي أداء حسن، أداء، يعني يفهم منه المعنى اللي بيلقي مش مجرد أداء آلي أو إلكتروني كده. نفس الحكاية لو سمع كتاب ملقى ألقاء حسن. كتاب، واحد يقول لك أحفظ كتاب؟ أه، في ناس زمان كان، يعني مثلا كتاب مثل كتاب الكامل للمبرد، أدب الكاتب، يحفظ منه قطع. البيان والتبيين للجاحظ، وهكذا. في نصوص منقولة عن العلماء أن أحد العلماء في القديم دخل على قرية، قرية غير منتشرة، لا فيها علم ولا فيها عرف فصحاء ولا كذا، فوجد طفل فصيح اللسان يكاد لا يلحن، وكلامه عالي جدا وجميل وفصيح، فسأله قال له استنى لحظه، انت جايب منين الفصاحة دي؟ فقال له: أنا كل يوم بقعد أكرر صفحات طويلة من كتاب من كتب عيون، أظن كتاب للجاحظ أو كتاب للمبرد، كتاب في نصوص أدبية عالية جدا، بيکرر لغاية ما يحفظه، فده بيحسن جدا الملكة.

بل يقال عن محمود سامي البارودي سبب فحولته في الشعر، وهو رجل معاصر، يكاد بعض أشعار البارودي لو واحد مش خبير قوي في الشعر وسمعها، يستشعر أن هو شاعر جاهلي، من كتر متانة الشعر وقوته! يقولوا سبب قوته محفوظه أجل مختارات الشعر ما عدا الجاهلي، يعني طبعا الشعر الجاهلي في مختارات زي المفضليات والاصمعيات والحماسة الصغرى والكبرى وغيره. المختارات المعاصرة، أجل المختارات؛ مختارات البارودي مطبوعة في أربع مجلدات لمؤسسة الباب‌تين السعودية، مختار حافظ شعر مهول جدا، آلاف الأبيات من كافة العصور، مختار أفضل أشعار في كافة العصور بعد الجاهلية، فمحفوظه عالي، فدي من أفضل الطرق للإتقان، اللي هو التعرض لنصوص، حفظ نصوص فصيحه، الإكثار منها مع الدورة أو دورتين يكون عن طريق دليل، اللي هو بيسموه إيه تعليم بالمحاولة والخطأ، أنت تقرأ قدام حد متخصص برضه نصوص حرة، فبيصحح لك مرة واثنين وثلاثة دون الدخول المتخصص في القواعد النظرية. بعد فترة ده مجرب، وحتى ممكن احنا، يعني بعد الدورة على طول بنحيل على دورة تدريبية لإتقان المهارة، إلقاء والتحدث باللغة العربية الفصحى، حتى المهارات الإذاعية برضه متاحة جوه الدورة نفسها، فبدون التعرض لنصوص دراسة تخصصية للنحو والصرف علوم اللغة الأخرى.

الفرق بين المهارة اللغوية واللكنة؛ اللكنة مالهاش أي علاقة بأن أنت متقن للغة ولا لا. يعني مثلاً، لو المشاهد في اللغة الإنجليزية، كثير جدا من ممثلين في السينما الأمريكية هو معلوم من لكنته أنه من أصل لاتيني، من أمريكا اللاتينية، أو من أصل أوروبي، أو من أصل صيني، أو من أصل هندي، أو حتى من أصل عربي. يعني المستمع، لو حد شاف أي أداء سينمائي لعمر الشريف، من أصل عربي، بيتكلم لغة، هو متقن للإنجليزي طبعا، متقن للإنجليزية. وجميل راتب، مش عارف كان إيطالي، متقن للإيطالية، فيسمعه، يفهم، في شيء في كلامه هو متقن، أه، يعني يفهم ويفهم، ويؤدي كتابة وقراءة وبتاع، متقن تماما للغة، لكن أي حد يسمعه يستطيع تمييز منشأه! زي بالضبط اللغة العربية في كثير جدا من المطربين والمطربات وهكذا بيغنوا بالعامية المصرية، فلو واحد مصري، واحد مصري سمعه بيتكلم في حوار عام، يدرك إنه مش مصري، مش معناه إنه مش متقن للعربية ولا إن أنا مش فاهم كلامه.

فالإتقان حد مش متعلق باللكنة، باللكنة يعني أنا مثلاً واحد متقن للإنجليزية وما يعرفش الأمريكان أكسنت أو البريتش أكسنت، خلاص مش مشكلة. لكن طبعا اللكنة ليها أثر وظيفي اجتماعي، لو أنا راجل مثلاً هشتغل في تجارة ولا في أغراض تواصل، لما أنا أتكلم مع رجل أمريكي بلكنة لا أستطيع تمييز أن أنا غير أمريكي، ده طبعا بيديني أفضلية اجتماعية وتجارية، لأغراض أخرى غير السؤال بتاع حد إتقان اللغة، تمام كده.

حد بيقول إن هو بيدرس صيني وإنجليزي وعنده مشكلة أن اللغتين بيدخلوا في بعض. طبعا هو ده غريب شويه ليه؟ لأنه هو دايما بيقولوا إيه، هل يمكن الإنسان يتعلم لغتين في نفس الوقت؟ ففي ناس متخصصين في تعلم اللغات بيقولوا أه ينفع، ممكن لغتين وعلى حد أقصى ثلاثة، لكن دايما يقولوا لا يفضل أن يجمع بين اللغتين إلا لما يقطع شوط في لغة من اللغتين عشان ما يخشوش في بعض. بس الغريب في السؤال أن الصيني والإنجليزي، احنا دايما بيقولوا إيه، لو واحد يتعلم إنجليزي وألماني مع بعض ممكن يدخلوا في بعض، لأنهم من أصل واحد، اللغة الجرمانية، هم منحدرين من الأصل الجرماني، أو يتعلم فرنسي وإسباني وبرتغالي وإيطالي وأي حاجة من اللغات الرومانسية مع بعض، هيحصل له لخبطة جامدة جدا، لأنهم كلهم من أصول لاتينية، أو واحد يتعلم عربي وعبري مع بعض، يكون هو أصلاً إنجليزي ويتعلم عربي وعبري، هيخشوا في بعض لأن العربي والعبري ينتموا لأصل واحد.

لكن صيني وإنجليزي المفروض يكونوا بعاد جدا عن بعض، لكن لو حصل فعلا أن صاحب السؤال أو صاحبة السؤال اللغتين بيتدخلوا مع بعض، توقف شوية في لغة وتقطع شوط جامد جدا في لغة تتقنها من ناحية، على الأقل من ناحية الصوتية الصوتية، عشان الأصوات ما تدخلش، لأنه لو هو هو مبتدئ في اللغتين أو هي صاحبة السؤال مبتدئة في اللغتين، في أول الأمر هتلتبس اللغات، لأن الأول احنا بنكون بندرب الجهاز الصوتي على إخراج الحروف من مخارجها الأصلية عند أهل اللغة، فبيكون الجهاز لسه لا لاقط المخرج في اللغة دي ولا المخرج في اللغة دي، وخاصة اللغة الصينية لغة حساسة جدا من ناحية إيه؟ من ناحية الأداء الصوتي. أي نبر زائد أو ضغط أو تخفيف أو أي حاجة في الصوت بيغير بيحي المعنى بالكلية. فممكن لو كانت صاحبة السؤال مبتدئة في اللغتين، توقف لغة من الاثنين، تقطع شوط جامد جدا في لغة واحدة منهم، يعني تقعد شهرين ثلاثة أربعة شغالة بكثافة شديدة جدا من ناحية التدريب الصوتي والإتقان الصوتي للغة من الصينية أو الإنجليزية، ثم تعود مرة أخرى للغة الأخرى، خاصة لو كانت هي في الغالب صاحبة السؤال ممكن تكون في الألسن، أو صاحب السؤال ممكن يكون في الألسن لأنه إيه في كليات بتجمع بين لغتين، تكون اللغة الأصلية إنجليزي واللغة

في حد بيسال بيقول إن لو واحد تعلم لغة أجنبية غير لغته الأصلية، سيؤثر على هويته ولماذا سيتعلم لغة أجنبية من أجل التهيئة لتتعلم العلوم باللغة الإنجليزية؟ هنا إخواننا، هنا سؤال فارق دقيق جداً ما بين إن تعلم اللغات، تعلم العلوم الأصلية؛ يعني أنا مثلاً وانا طفل هيعلم لي حساب، هيعلم لي الحساب بأي لغة؟ طبعا الحساب ده مش تفرق بقى الابحاث الحديثة والابحاث غير الحديثة، الحساب العمليات الأساسية الجمع والطرح والضرب والقسمة والأمور الأساسية دي مش محتاجة أبحاث حديثة ولا بتاع، فهنعلم بلغة الأم.

طيب، الراجل ده عايز ينتقل إنه يتعلم جبر، جبر خطي ومصفوفات ومحددات وكذا، برضه تعلم باللغة العربية. طيب، عايز أعمده معادلات تفاضلية برضه، طب تحليل هندسي برضه بالكل ده ينفع باللغة العربية. فأنا امتى هاجتاج اللغة الإنجليزية في مستوى متقدم؟ لما أكون عايز بقى أدرس علوم حاسب حاجاتها تنبني على الرياضة، على الرياضيات، وحاجاتها تنبني على الإحصاء والاحتمالات وحاجات، هنا أحتاج الإنجليزية أو لغة أجنبية، وفي الغالب دلوقتي الإنجليزية من أهم اللغات، طبعا في لغات تانية بتنفسها في بعض العلوم، لكن هي الإنجليزية بالأساس.

فهحتاج طبعا لغة أجنبية؟ آه طبعا، هحتاج لغة أجنبية قطعاً، هحتاج لغة أجنبية؛ عشان كده احنا بنقول تعلم اللغات الأجنبية واجب حضاري وشرعي، زي ما هم فعلوا في علوم العربية. يعني هم كان في وقت من الأوقات لا يمكن أن يتعلم أي شيء مفيد إلا بقانون العربية؛ لأن كل حاجة مهمة مكتوبة في هذا العصر لغاية تقريبا القرن 17، لغاية 1600 مافيش حاجة مهمة مكتوبة إلا مكتوبة بالعربي في الرياضيات والفلك والطب وبتاع، ماحدش كان في أوروبا يوثق في علمي إلا ما كان متقناً للعربية.

ده تعلم اللغات الأجنبية واجب حضاري وشرعي، لازم إن أنا أتعلم بيها في الصغر دي خطيئة حضارية وشرعية، هو ده اللي احنا بنفرق بينه. فطب واحد يقول لك: طب مادام كده كده هتعلم عربي، ليه هعوز لغة انجليزية؟ لما تنفد المادة المكتوبة باللغة العربية خلاص؛ في فعلاً يعني مثلاً لو أنا عايز مرجع معين في حاجة معينة في علوم الحاسب مش هلاق ولا مرجع عربي، ولا مرجع عربي في حاجات في علوم، في علم النفس، في حاجات في الطب، بالذات طبعا في الطب وفي التقانة الحديثة، في الميكانيكا، في العلوم العسكرية.

فأنا هبقى محتاج بقى أترجم، أترجم بكثافة، فانا مش ممكن أوصل للترجمة بالكثافة إلا لما أفهم العلم أصلاً باللغة بتاعتها، بس مش هتعلم وانا صغير بده؛ يعني أنا هقعد لغاية ثانوي وجامعة، خلينا ثانوي؛ لأنه بعد كده ممكن يكون عايز يتوسع، ففعلاً هيحتاج لغة انجليزية، فلغاية ثانوي هبقى بغطي كل العلوم باللغة العربية، وفي نفس الوقت هكون من وأنا 10 سنين ولا 8 سنين -على حسب بقى ده حاجة الحد الزمني ده في خلاف هنعرضه أثناء الدورة- أبدا من أنهي عمر اللغة الأجنبية؟ هبقى بدرس لغات أجنبية، لو وصلت للسن اللي أنا محتاج أتعرض للعلوم المختلفة بلغتها الأصلية ومش موجود أي يعني مادة مكتوبة محترمة أو مرئية باللغة العربية، فيبقى معايا اللغات اللي أستطيع أفهم بيها العلم وأترجمه إلى اللغة العربية لإثراء المحتوى العربي.

جدول لدرسته وكتابة وقانون اللغة الإنجليزية؛ طبعا موضوع المقام لا يتسع لسرد، لكن ده احنا بنقوله بشكل واضح وصريح: السلم الكامل للغة الإنجليزية واللغة العربية داخل الدورة، دول اللغتين بس اللي احنا بنعمل كده في إن احنا بنعرضها بالتفصيل، بنقول إن المفروض هتتعلم إنجليزي من الصفر إلى الاحتراف كذا، العربية من الصفر للاحتراف كذا، بقية اللغات بنسمل حقائب، لو واحد يقول لك: أنا عايز أعرف صيني، صيني فلاشة أو هارد تنقل عليه المادة وبقية اللغات الأخرى بالطريقة دي، لكن المقام لا يتسع طبعا الكلام عن إتقان الإنجليزية.

لكن احنا عندنا البرنامج بتاع التسعين يوم أو المية يوم ده مطبق على اللغة الإنجليزية، بنقول أسماء الكتب، أسماء الدورات، وبنوفر لو هو صاحب المادة (يعني بنقول له المادة دي هتكلفك كذا، هات فلاشة أو هات هارد ديسك وننقلها عليه). صاحب سؤال إتقان اللغة الإنجليزية بس بسرعة؛ يعني احنا بنصر في الدورة على محاولة إستثمار الوقت: أنا عايز بسرعة خلال مية يوم أصل لدرجة درجة حسنة بي واحد أو بي اتنين في أي لغة من الصفر، لا ده في ثلاث شهور يعني عمل فوق الممتاز، فان شاء الله يعني نوفي بده في الدورة.

مجال التدقيق اللغوي داخل في المسار الوظيفي؛ يعني أنا مش بتعلم عشان أستب متخصص في النحو والصرف والبلاغة وأحضر في ماجستير ودكتوراه، لا، أنا عايز أعرف المهارات اللي بتساعدني في إن أنا يعطى إلي نص طبقاً لقواعد إملائية متفق عليها؛ لأن الإملاء في قدر من التوافق، ممكن يكون حد بيشتغل في مكان معين يقول له: احنا هنراعي بعض القاعدة الإملائية الخاصة، ممكن يكون مش غلط ولا حاجة غيرها، لكن احنا هنتبدل ده داخل مؤسسة.

فمست التدقيق اللغوي أن هو مجال تدريبي مهاري هنعرض ليه أثناء الدورة، في اللغة والاقتصاد: إزاي تطلع فلوس من تعلم اللغة أو إتقان اللغة؟ منها مجال التدقيق اللغوي والتصحيح اللغوي والتحرير اللغوي والترجم، كلها مجالات تعتبر مختلفة، والأداء الصوتي، ان شاء الله نعرض ليها بالتفصيل إزاي أبدأ، فين، فين الدورات اللي أبدأ بيه. لكن صاحب السؤال لو عايز حاجة سريعة برضه ومش هيتمان، نحضر معانا الدورة.

نوصيكم خيراً بالدكتور العمري، محمد العمري؛ دكتور محمد العمري له أربع محاضرات باسم بعنوان: مدخل لعلوم العربية أو مدخل للغة العربية أو مدخل لعلوم اللغة العربية، وبعد كده عنده دورة اسمها: مهارات الإعراب، دورة فوق الرائعة وهي دورة قصيرة (يعني 15 محاضرة يمكن أو حاجة زي كده)، وبعد كده عنده دورة طويلة جداً في مهارات التدقيق اللغوي أو تصحيح اللغوي باسم المهارات الكتابية، فوق الرائع دكتور محمد العمري.

لو واحد عايز يكتفي بالدكتور محمد العمري في سلم هيبقى كافي جداً إنه يصل لمستوى ممتاز، بعد كده الباقي ممكن يبقى يعني يغطى بقليل من الجهد، لو صاحب السؤال مش هيلحق يحضر معانا الدورة لغاية ما نفصل في الدورة اللغة العربية كمهاره والسلم التعليمي بتاعها سواء الوظيفي أو التخصصي، الدكتور محمد العمري مدخل ومنتهى رائع، ربنا يبارك فيه يعني وطف.

عموم الأطفال اللي في لغات أجنبية في مدارس لغات، آه، هو الناس ما بين أمرين أحلهما مر؛ واحد بيقول لك إيه؟ التعليم في الحكومي أنا عارف وأنتم عارفين إنه تعليم كارثي، فمش من ناحية التعليم بس من ناحية أمور أخرى، فانا عايزه أوديه في مكان يعاملوه كبني آدم، عايز كان اللبس فيه نضيف والتعامل فيه نضيف وآمن على الأقل، والمشكله وكمان اللغة الأجنبية دي مهمة جداً ما احنا أولادنا في الآخر هيطلعوا يتعلموا باللغة الأجنبية، وهكذا مبررات من هذا النوع يعني.

فاحنا بنعرض لده أثناء الدورة في الكلام عن اللغة والتربية واللغة والطفل وخيار التعلم الأجنبي، لكن في العموم نصيحة عامة أن التعلم باللغات الأجنبية كارثة حقيقية من ناحية الهوية، من ناحية الثقافة ومن ناحية الديانة، من ناحية الديانه؛ واحد يقول: طب أنا اعمل إيه؟ أوديه فين؟ دور على أي بديل، أي بديل آخر، لو مافيش غير البديل ده -وخاصة لو في ناس بره مصر أو في محيطه مافيش غير ده- فاحنا بنشوف أقل الأضرار، يعني فين المكان؟

لأن المشكلة يا إخواننا أن هنا بقى حاجة خطيرة جداً أن زي ما هو العمر الذهبي لتعلم اللغات هو أول خمس سنوات، خمس أو ست سنين في عمر الطفل هو السن الذهبي لتكوين المنظومة القيمية اللي احنا أحياناً بنسميها بعد كده الهوية والثقافة، في الخمس ست سنوات الأولى فاللي أنا بعظمه في قلب هذا الطفل ووجدانه ووعي في الأول خمس ست سنين هم اللي بيفضلوا معظّمين طوال عمري، فأنا لو عظمت عنده اللسان العربي والثقافة العربية والهوية بينتمي للعربية والإسلام.

لو أنا عظمت عنده هو شايف اللغة العربية دي إاحنا بس بنقرأ بينها آيتين قرآن كده بنبرك بيتر بيها، وبعد كده أسماء الأشياء، أسماء الأشياء التعبيرات التشجيعية اللي أنا بقولها له باللغة الإنجليزية، الأفلام والمسلسلات والكرتون واللغة واللغة العلمية والمواد اللي بدرسها، لوحة المفاتيح اللي قدامه على الجهاز والموبايل اللي موجود قدامه كل حاجة باللغة الإنجليزية.

بالله عليك، هيخرج إيه؟ يعني هو إيه المعظّم في قلبه؟ هي اللغة الإنجليزية هي لغة التقانة هي، واللغة العربية لغة حقيرة ولغة فقيرة ولغة وهكذا، واحد يقول لك لا بس احنا ما قلناش كده، هو ده اللي هيقوم في قلبه خلاص. فهي المسألة مش مجرد مسألة إتقان من عدمه، لا، هي مسألة زي ما احنا هنشرح في أول محاضرة، احنا بنبدأ بأول محاضرة الثقافة والهوية والدين والحضارة الأربع مفاهيم هم إيه؟ آثار اللغة، فين مكانهم؟

طبعا بنعمل قائمة قراءه، سواء تكليفات قرائية أو كتب موسعة، لو حد عايز يستوعب المسألة بشكل بشكل عميق؛ لأن هي المسألة تستحق فعلاً التدقيق. يعني أرجو أن احنا نكون التجربة الأولى البث المباشر عن من خلال فيسبوك تكون تكون ناجحة إن شاء الله، نتمنى أن نلقاكم على خير في دورة الوعي اللغوي، سواء في هذا الموسم أو في مواسم قادمة، بارك الله فيكم، شكر الله لكم، سبحانك الله وبحمدك، أشهد أن لا إله إلا أنت، استغفرك وأتوب إليك، السلام عليكم ورحمة الله وبركاته.