الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله.
اللهم صل على سيدنا محمد النبي، وأزواجه أمهات المؤمنين، وذرياته وآل بيته، كما صليت على آل إبراهيم إنك حميد مجيد. أما بعد:
طبعا أنتم عارفين أن واحد من مشاريعنا الدعوية الكبيرة يعني اللي ماشيين فيها واحدة واحدة، أننا نتطرق للسور والآيات التي تتكرر في اليوم والليلة أو في الأسبوع. وخدنا إيه بقى؟ آية الإنسان بس تدبرنا أولها كده يعني، وخدنا إيه تاني؟ الأنفال، الأنفال بتتكرر في الأسبوع؟ ما أخدناش السجده، أخدنا السجده فين؟ خدنا الكهف في كم محاضرة حوالي خمسة أو ستة مش فاكر، ودي هنعيدها تاني إن شاء الله بعدين لأنها ما تسجلتش. وخدنا الإخلاص (إني أحبها) صح، وخدنا آية الكرسي أعظم آية. والعصر هي ما بتتكرر برضه في اليوم والليلة، ده مش من ضمن المشروع ده يعني.
على كل حال، لما أعلنا هذا المشروع، كان أهم سورة وأخطار سورة المفروض نتناولها، وكان حقها أن نبتدئ بها هي سورة الفاتحة. ولكن كنت أهابها، وكل ما أجي عاوز أديها أخاف وأرجع لورا كده وأحس إنها محتاجة أولا توفيق من ربنا شديد جداً، والواحد حالته زي ما أنتم عارفين ما هواش حال التوفيق والسداد والكلام ده، ومحتاجة برضه تحضير يعني، سورة تهاب الحقيقة، سورة الفاتحة سورة تهاب، الواحد يخاف يدخل عليها إلا وهو مستعد ليها. وباقي ثلاث أسابيع استخير، أنا بستخير كل درس يعني على موضوع الدرس، باقي ثلاث أسابيع المفروض ابتدي سورة الفاتحة وبرضه ما ييسر أن أنا أبدأ الفاتحة. واستخرت هذا الاسبوع والدنيا يعني الحمد لله وجدت انشراحاً وتيسيراً.
احنا عاوزين بقى توبه جماعية كده عشان ربنا يسددنا لما نحن بصددها، أنا خايف لغاية دلوقتي، خايف، سورة الفاتحة سورة تهاب يعني. يعني نبدأ بسم الله.
طبعا ليه هذا الشعور الذي ينتابني؟ لأن الفاتحة ماهياش سورة عادية. لا هي سورة عادية في تنزيلها، ولا هي سورة عادية في فضلها، ولا هي سورة عادية في أحكامها الشرعية، سورة مختلفة يعني. تعالوا كده نتامل ليه الفاتحة لا يتعامل معها زي أصلا القرآن؟ يهاب أصلا، يعني القرآن نفسه يهاب. والفاتحة هي أعظم قرآن.
والفاتحة أعظم سورة في القرآن، وهنجي له ده. فالفاتحة أولا نزولها مختلف. بداية كده نزول الفاتحة مختلف، ازاي مختلفه؟ أول حاجة أن الفاتحة روي أنها أنزلت من كنز تحت العرش. ولذلك من جملة أسماء الفاتحة التي عدها السيوطي (الكنز)؛ السيوطي عد تقريبا 25 اسم للفاتحة في الإتقان، كان من ضمن اسماء الفاتحة عند السيوطي (الكنز). وليه الأثر المروي أنها نزلت من كنز تحت العرش؟ نزول الفاتحة مختلف.
يبقى ده ابتداؤها مختلف، طيب، نزولها ابتداء طبعا يعني نسبي يعني، وإلا فالقران كله من الله سبحانه وتعالى. نزولها مختلف على القول بأن الأثر الوارد في هذه المسالة هو أثر في نزولها، لأن في الأثر اللي هقوله كمان شوية ده العلماء اختلفوا فيه؛ هل هي نزلت في هذا الموقف ولا نزل فضلها في هذا الموقف؟ وعلى كلا التقديرين فالامر مهيب.
في قصة عجيبة جداً: جبريل عليه السلام قاعد مع النبي عليه الصلاه والسلام، سمع نقيضاً (صوت)، فرفع جبريل بصره إلى السماء فقال: هذا باب في السماء لم يفتح إلا اليوم. باب في السماء ما اتفتحش خالص منذ أن خلق، لم يفتح، فتح اليوم. فنزل ملك إلى النبي عليه الصلاه والسلام، فقال جبريل: هذا ملك لم ينزل إلا اليوم. يا جماعة عيشوا عيشوا المشهد ده! والظاهر والله أعلم أن جبريل لم يكن يعلم القصة دي، يعني هو قاعد مع النبي فحصلت فجأة، وهو قاعد مع النبي عليه الصلاه والسلام صوت نقيض، رفع بصره في باب اتفتح في السماء، الباب ده ما اتفتحش قبل كده، نزل ملك، الملك ده أول مرة ينزل الأرض، فأتى الملك النبي صلى الله عليه وسلم وقال: يا محمد أبشر بنورين قد أوتيتهما: الفاتحة وخواتيم البقرة. وإلى آخر بقى الحديث.
فنزولها -على أن الأثر ده في نزولها يعني نزلت في هذا الموقف، أو أنه نزل بفضلها- وعلى كلا التقديرين سورة تهاب، مهابة. نزولها مختلف، وبعدين فضلها مختلف. النبي عليه الصلاه والسلام قال لأبي سعيد: «لأعلمنك أعظم سورة في القرآن». وتخيل كده في هذا الموقف قبل أن أخرج من المسجد، فهذا الموقف مدني، نزل كتير من القرآن، فهم النبي صلى الله عليه وسلم أن يخرج، ما قالوش لسه. فانا يعني كأن في ذهن هذا الصحابي الجليل عمال يقلب في دماغه يا ترى هتطلع إيه؟ هتطلع البقرة؟ هتطلع آل عمران؟ هتطلع إيه سورة إيه اللي هي الاعظم في القرآن دي؟ فقال له لما ساله بقى عن هذه السورة قال: ﴿الْحَمْدُ لِلَّهِ رَبِّ الْعَالَمِينَ﴾ [الفاتحة: 2].
بل سماها ذلك الله عز وجل في كتابه: ﴿وَلَقَدْ آتَيْنَاكَ سَبْعًا مِّنَ الْمَثَانِي وَالْقُرْآنَ الْعَظِيمَ﴾ [الحجر: 87]. في طبعا القرآن العظيم، أما سبعاً من المثاني الفاتحة، والقرآن العظيم اللي هو القرآن، أو سبعاً من المثاني والقرآن العظيم الاثنين وصف للفاتحة، يعني الفاتحة هي السبع المثاني وهي القرآن العظيم، وهذا نص حديث النبي عليه الصلاه والسلام، يعني سيدنا النبي سماها القرآن العظيم، فالفاتحة هي القرآن العظيم، حتى فضلها مختلف.
وبعدين يستشفى بها. يعني مجرد ما الفاتحة تقرا على إيه بقى؟ مش واحد عنده صداع، مش واحد بطنه وجعاه، واحد ملدوغ، واحد عنده سم في جسمه، اللي هو الطب ما يلحقهوش أصلاً. وكلنا عارفين القصة بتاعة أبي سعيد الخدري، وكانوا في سفر ونزلوا على حي من الأحياء، وكان سيدهم سليماً (سليم يعني لديغ)، كانت العرب تسمي اللديغ الذي يلدغ من الثعبان يسموه سليماً تفاؤلاً أنه سيُسلم يعني. فيسموه سليم، والعرب كان عندهم العادة دي أن الحاجه اللي يخافوا منها قوي يسموها اسم حلو، ما يعملوش ده غير مع الحاجة اللي بيخافوا منها قوي، فواحد لدغه ثعبان، أخطر حاجة السم شويه بيسري وخلاص الإنسان بيموت فيسموه سليماً تفاؤلاً، الصحراء يسموها مفازة لأن العرب تخاف من الصحراء لو تهت فيها خلاص تموت فيسموها مفازة تفاؤلاً.
فكان سيد الحي سليم، وقالوا لهم لو فيكم راقي يجي يرقي هذا الرجل. رقاه فقام كأنما نشط من عقال، كأنما كان مربوط واتفك، قام. وأعطاهم عطاء من الغنم، وعارفين بقى الحديث أن جمل النبي عليه الصلاه والسلام فلما أخبر بذلك قال: «وما أدراك أنها رقية؟ اضْرِبُوا لِي مَعَكُمْ بِسَهْمٍ» في هذا الغنم. ففضلها برضه وهي سورة مختلفة وتاثيرها مختلف زي ما شفنا.
أحكامها مختلفة. أحكامها مختلفة يعني هاتوا لي سورة تانية في القرآن في الـ 114 سورة يجب قراءتها في وقت من الأوقات؟ يجب، يعني تأثم إن لم تقراها. إيه؟ ما فيش! 114 سورة في القرآن ما عندناش غير سورة الفاتحة هي اللي يجب قراءتها. ويجب ده مش يعني لو هتكلم على مذهب الحنابله مش يعني واجب لا، ده حاجة أعلى من الواجب كمان، بيسموها إيه؟ ركن. الفاتحة ركن من أركان الصلاة، فأنت لازم كل يوم، كل يوم تقرا الفاتحة على الوجوب 17 مرة على الوجوب؛ 2 فجر، 4 ظهر، 4 عصر، 3 مغرب، 4 عشاء، كل يوم 17 مرة على الوجوب. ومش كفاية في ركعة لا، كل ركعة هتقراها.
طيب خلصنا الصلاة الواجبة، هنبتدي الصلاة المستحبه؛ تلاقي الصلاة المستحبه في أركان تخفف فيها مش كده؟ يعني انت لازم تقف في صلاه الفرض، الصلاة المستحبه عادي ممكن تقعد لو انت في سفر، ممكن تصلي لغير القبلة، مش كده؟ الصلاة المستحبه عادي صلي لغير القبلة حيث توجهت بك راحلتك. ففي أركان أو شروط ممكن يتنازل فيها شيئاً ما، إنما الفاتحة لا، هتقرا الفاتحة.
طيب مش عاوز تقرا السورة اللي بعد الفاتحة؟ ينفع؟ آه ينفع والصلاة صحيحة؟ آه صحيحة، لأن قراءة السورة بعد الفاتحة مستحبة، إنما الفاتحة لا، طيب ما قريتهاش إيه اللي يحصل؟ الصلاة باطلة.
ولو تفتكروا، احنا لما اتكلمنا في السور والآيات التي تتكرر في اليوم والليلة أو في الأسبوع قلنا إيه؟ قلنا يا جماعة بداية الموضوع إيه؟ أن ربنا سبحانه وتعالى لما حكم بذلك أن هذه السورة تقرأ أو هذه الآية تقرأ وتتكرر، يبقى معنى كده أن في معنى زائد على مجرد التبرك بقراءتها، وإلا فالقران كله يتبرك به بقراءته، إنما هنا احنا لا، هو في معاني ملحة في تلك السور محتاجين نعيشها، أُشمعنى السورة دي؟ فكان أعظم سورة لازم نقف معاها سورة الفاتحة بالذات. ليه؟ زي ما قلنا لكم: السورة الوحيدة اللي في القرآن كله التي تجب قراءتها في وقت في حال معينة، ما نعرفش سورة تانية في القرآن كده.
حاجة تانية: أنه من أساميها أم الكتاب وأم القرآن. من أسامي الفاتحة. طيب يعني إيه أم الكتاب وأم القرآن؟ مما قيل في أم الكتاب وأم القرآن (الأم هو ما يرجع إليه الشيء)، فكان القرآن كله معانيه ترجع إلى الفاتحة. يعني معاني القرآن كله في الفاتحة، احنا لسه هنتدبر شوية الكلمه دي جايين لها إن شاء الله، معاني القرآن كله تطلعها من الفاتحة. فاحنا بقى لو عاوزين نعطي الفاتحة حقها في التدبر والتامل والتفكر والشرح، هنحتاج إيه بقى إن شاء الله؟ هنحتاج أعمار، لأن احنا هنشرح الإسلام، هنشرح القرآن كله.
تعالوا بقى كده نتأمل شوية حاجات في الفاتحة أولا. نزول الفاتحة: احنا اتكلمنا عن كيفية نزول الفاتحة أو شيء من ذلك، إنما متى نزلت الفاتحة؟ الفاتحة حسب ترتيب النزول، مش حسب ترتيب المصحف. حسب -مين شاطر يقول؟- حسب ترتيب المصحف الأول نزلت السورة رقم كام؟ في المصحف رقم أربعة؟ شاطر، الأولى. شطار ماشاء الله. طيب هي حسب المصحف هي الأولى طبعا في المصحف، وهنيجي للكلام ده إن شاء الله لما نجي نتكلم نتدبر اسمها الفاتحة يعني.
إنما حسب ترتيب النزول هي الرابعة أو الخامسة. وليه ليه الشك ده؟ على حسب (ن والقلم) نزلت الثانية ولا ما نزلتش؟ فتعالوا كده بقى واحدة واحدة، سواء الرابعة خلينا إنها الخامسة؛ أول سورة نزلت، لما نجي، آه خلي بالكم لما نجي نقول أول سورة نزلت، مش السورة كاملة، يعني لما نقول (اقرأ) مش اقرا كلها نزلت، ده صدر السورة بس اللي نزل، وبعدين بتنزل آيات بعد كده وتوضع في هذا المكان. يبقى أول آيات نزلت: ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]، وبعدين ﴿ن ۚ وَالْقَلَمِ وَمَا يَسْطُرُونَ * مَا أَنتَ بِنِعْمَةِ رَبِّكَ بِمَجْنُونٍ﴾ [القلم: 1-2]، وبعدين ﴿يَا أَيُّهَا الْمُزَّمِّلُ * قُمِ اللَّيْلَ إِلَّا قَلِيلًا﴾ [المزمل: 1-2]، وبعدين فتر الوحي شوية، وبعدين ﴿يَا أَيُّهَا الْمُدَّثِّرُ * قُمْ فَأَنذِرْ﴾ [المداثر: 1-2]، وبعدين ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾ [الفاتحة: 2-4] إلى آخر السورة.
فبداية كده سورة الفاتحة هي أول السور نزولاً كاملاً. أول سورة نزلت كاملة على بعض هي سورة الفاتحة. وبعد الفاتحة: ﴿تَبَّتْ يَدَا أَبِي لَهَبٍ وَتَبَّ﴾ [المسد: 1] وهنيجي ليه أنا قلت ده ماشي، فده ترتيب الفاتحة في النزول.
تعالوا بقى نتأمل شوية كده ترتيب الفاتحة ده. سيدنا النبي عليه الصلاه والسلام نُبِّئ باقرأ وأُرسل بالمدثر. عارفين ده؟ نشرح ده؟ نشرح ده. سيدنا النبي عليه الصلاه والسلام أول الوحي ما نزل عليه نزل عليه باقرأ، فصار نبياً. صار نبياً، خلاص بيوحى إليه مش كده؟ اقرأ باسم ربك الذي خلق. لم يؤمر بالتبليغ لسه، ما فيش ما فيش أمر بالتبليغ. وبعدين: ن والقلم وما يسطرون ما أنت بنعمة ربك بمجنون. ما فيش أمر بالتبليغ لسه. وبعدين: يا أيها المزمل قم الليل إلا قليلاً. ما فيش أمر بالتبليغ لسه. وبعدين فتر الوحي، وبعدين: يا أيها المدثر قم فأنذر. هنا أمر بالتبليغ، فأرسل بالمدثر، صار رسولاً بالمدثر؛ رسول مأمور بأنه يبلغ قومه. مفهوم كده؟
ده الكلمه اللي بتسمعوها كتير اللي بينكم سمعها: نُبِّئ باقرأ وأُرسل بالمدثر. ليه الترتيب ده؟ مش هنشرحه بس مهم جدا تعرفوه ليه. فتقدروا ترجعوا لدرس (أيها المدثر قم)، في درس هتلاقوه على اليوتيوب وهتلاقوه على التليجرام وهتلاقوه على المنصات إن شاء الله: (أيها المدثر قم)، بنشرح صح الترتيب اللي في الأول ده ليه. ليه اقرأ؟ وبعدين ليه؟ وهتلاقوه برضه في دورة (أُمّة)، ده على القناة العلمية في اليوتيوب، في دورة (أُمّة)، هتلاقوا بس هم ست دروس بقى، اسمعوا الستة ومش عارف هتلاقوا في أن درس بنشرح الترتيب ده ليه مقصود هذا الترتيب.
فتر الوحي مدة بعد (يا أيها المزمل) عشان في ترتيبات هتحصل هنا للنبي عليه الصلاه والسلام، وبعدين (يا أيها المدثر قم فأنذر) فأمر بالتبليغ هنا.
ونقف بقى هنا شوية: سيدنا النبي عليه الصلاه والسلام أمر بالتبليغ؛ يعني إيه أمر بالتبليغ؟ أن هيطلع دلوقتي، وده حصل فعلاً، وهيقف على مكان عالي وهيعمل ايه؟ هيجمع الناس، وهيبتدي يقول لهم إيه بقى؟ لو قلت لكم إن ورا هذا الجبل جيش أكنتم مصدقيَّ؟ هو أمر بقى بده، هيقولوا آه، أنت ما جربنا عليك كذباً قط. رسول الله إليكم بين يدي عذاب شديد! فيوم يقول له أبو لهب: الهذا جمعتنا؟ تبّاً لك! فتنزل (تبّت يد) عشان كده قلت لك هنجي لها كمان شوية ولسه هنجي لها تاني، فتنزل ﴿تَبَّتْ يَدَا أَبِي لَهَبٍ وَتَبَّ﴾ [المسد: 1].
فالنبي عليه الصلاه والسلام يا جماعة نُبِّئ باقرأ، وبعدين بعد شوية كده أُرسل بالمدثر.
في الحقبة دي آمن مع النبي قلة. تمام، تعالوا بقى نتأمل كده حاجة، النبي هيقف ينادي ويقول للناس عليه الصلاة والسلام: أنا رسول. فمتوقع حاجات، متوقع حاجات أول حاجة متوقعة إيه؟ إن الناس هابتدي تستنى أول وحي هينزل، عشان نشوف إيه الدين ده.
أول شيء متوقع، سواء بقى اللي مهتم أو اللي مش مهتم، هي حاجة جديدة؛ حاجة جديدة أن واحد يقف -دي بتحصل كل فين وفين دي- أن واحد يقف يقول: أنا نبي، أنا رسول، فكل الناس هتبقى متشوقة لأول وحي هينزل بعد كده، هيقول إيه؟ فلازم أول وحي هينزل بعد كده يبقى أولاً شيء بيلخص رسالة هذا الآية هذا النبي، يعني الوحي اللي نازل اللي نازل بعد الحادثة دي -حادثة الإرسال- لازم يلخص للناس رسالة النبي عليه الصلاة والسلام، لأن هم متشوقين لده أصلاً، عندهم حالة تشوف، هو إليه الرسالة دي وبتدعو لإيه وعاوز يقول لنا إيه؟ فالناس كلها مستنيه تسمع بقى، فتنزل الفاتحة.
كان ممكن حد يقول: الفاتحة يعني بالعقل كده تنزل أول حاجة؟ لا، ما تنزلش أول حاجة. ليه ما تنزلش أول حاجة؟ تعالوا كده نتأمل: اقرأ، نون، يا أيها المزمل، يا أيها المدثر. طبعا احنا قلنا صدور السور اللي نزلت كلها بتكلم مين؟ كلها بتربي النبي عليه الصلاة والسلام، كلها كلها خطابات مباشرة لحامل الدعوة.
اقرأ، نون والقلم وما يسطرون، ما أنت بنعمة ربك بمجنون، وإن لك لأجرا غير ممنون، وإنك لعلى خلق عظيم، فستبصر ويبصرون، كلها بتكلم النبي عليه الصلاة والسلام. يا أيها المزمل قم الليل إلا قليلا، يا أيها المدثر قم فأنذر، كله خطاب للنبي عليه الصلاة والسلام حامل الدعوة، قبل ما هنرسله هنربيه صلى الله عليه وسلم.
ودي فايدة الآيات اللي نزلت قبل الإرسال، وده احنا تأملناه في يا أيها المدثر قم، وفي دروس أمة أن هذا الترتيب، وكمان تدبرنا الترتيب ده ليه، فكلها خطابات للنبي أصلاً عليه الصلاة والسلام، وبعدين خلاص بقى أرسلناه، فالناس أول شيء هتتشوف لمعرفة مضمون الرسالة، فكان لازم تنزل سورة تجمع الرسالة، ولذلك الفاتحة أم القرآن، أم الكتاب، فيها الدين كله.
الكلام ده مش كلام إنشا، احنا هنطلع ده من الفاتحة، هنلاقي الدين كله في الفاتحة هيظهر معانا إن شاء الله بس مش النهارده يعني. فده أول معنى، وكان لازم تنزل كاملة بردو.
طيب حاجة تانية هحصل، الأول هل هو النبي عليه الصلاة والسلام وقف على المكان العالي وقال: أيها الناس كذا وكذا وكذا، الكلام اللي احنا قلناه، وبعدين نزلت الفاتحة؟ قد يكون ذلك، ولا هي نزلت المدثر ونزلت الفاتحة بعد المدثر، ثم كان ما كان من النبي عليه الصلاة والسلام من الوقوف؟ قد يكون ذلك، الله أعلم، يعني هنا مفيش حاجة ترجح، بس في الحالتين: إما يكون المعنى أنك هتقف تقول للناس: أنا رسول، وبعدين الناس هتبقى متشوقة إيه اللي هينزل فتنزل الفاتحة، قد يكون ذلك، أو تكون معاك الفاتحة أصلاً عشان لما الناس تسألك هو رسالتك قالتك إيه؟ تقوم تقرا عليه: الحمد لله رب العالمين الرحمن... وهنعرف الآيات دي العرب يفهموها ازاي لما يسمعوها، احنا مشكلتنا احنا مش احنا مش عرب، يعني احنا احنا أعاجم فاحنا داخلين على القرآن يعني مش فاهم، يعني لو جيت قلت لك: الحمد لله، ليه مش لله الحمد؟ ليه جت الحمد مع أن في آية تانية فلله الحمد موجودة؟ فلله الحمد، ليه الحمد لله مش الشكر لله؟ العرب بقى يفهموا ده، يعني عربي لما يقف «الحمد لله» يفهم إيه الفرق بين الحمد والشكر، وفاهم أن الحمد لله لما جت الأول أفادت إيه، ولو كانت لله الأول تفيد إيه؟ رب العالمين، إشمعنا هنا رب العالمين، وليه مالك يوم الدين؟ دي كلها حاجات احنا هنثور ده إن شاء الله وهنقف معاه إن شاء الله.
طيب ليه أنا بقول الله أعلم الفاتحة نزلت قبل ما يقف صلى الله عليه وسلم ولا بعد ما وقف؟ لأنه الرواية اللي عندنا أنه لما وقف وقال كده، فقيل لهذا جمعتنا: تباً لك، فنزلت: ﴿تَبَّتْ يَدَا أَبِي لَهَبٍ وَتَبَّ﴾ [المسد: 1]. قد يكون نزلت بعد نزول الفاتحة، قد يكون الفاتحة أصلاً نزلت قبل الموقف أنه وقف النبي عليه الصلاة والسلام وكأنه معد يعد أنه معاه ملخص الرسالة، علشان لما يُسأل: أه رسالتي أهي: الحمد لله رب العالمين الرحمن الرحيم مالك يوم الدين إياك نعبد واياك... مش هينفع يبقى رسالته أن إيه أن خطابات موجهه له هو يعني، طب إنت إيه رسالتك؟ أن قيل لي: ﴿يَا أَيُّهَا الْمُزَّمِّلُ * قُمْ اللَّيْلَ إِلَّا قَلِيلًا﴾ [المزمل: 1-2]، ده خطاب لك؛ أن قيل لي: ﴿مَا أَنتَ بِنِعْمَةِ رَبِّكَ بِمَجْنُونٍ * وَإِنَّ لَكَ لَأَجْراً غَيْرَ مَمْنُونٍ﴾ [القلم: 2-3]، ده خطاب لك؛ أن قيل: اقْرَأْ بِاسْمِ رَبِّكَ الَّذِي خَلَقَ * خَلَقَ الإِنسَانَ مِنْ عَلَقٍ، ده خطاب لك. إيه رسالتك؟
ولذلك هتلاقوا كل السور اللي قلناها هي رسالة موجهه لفرد، هتلاقوا الفاتحة فيها الخطاب الجمعي: الحمد لله رب العالمين الرحمن الرحيم مالك يوم الدين ها إياك أعبد... لا، هنا الخطاب جماعي: إياك نعبد وإياك نستعين، ها اهدني... لا، اهدنا الصراط المستقيم. احنا بنتكلم عن رسالة عالمية، رسالة الخطاب مش للنبي عليه الصلاة والسلام عشان يبقى إيه إياك أعبد إياك استعين اهدني الصراط، خالص، الرسالة عامة لكل الناس.
يبقى دي أول حاجة هحصل، أول ما النبي عليه الصلاة والسلام هيقف وهابتدي ينذر الناس أو يكلم الناس أو يدعو الناس، هيحصل يحصل تشوف لمعرفة هذه الرسالة، فكان مناسب أن ده يبقى وقت نزول الفاتحة.
حاجة تانية هحصل، لما النبي عليه الصلاة والسلام يبتدي يجهر بالدعوة، إيه اللي هحصل؟ هيؤذى وهيبتدي الفئة وهيبتدي بقى إيه يتحط تحت المجهر كده ومين اللي آمن واللي معاه، هيؤذى، وهذا حصل. فيبقى احنا محتاجين في الوقت ده سورة تنزل على قلب النبي عليه الصلاة والسلام وعلى قلوب أصحابه، الفئة القليلة المستضعفة اللي بعد الجهر بالدعوة هيبتدوا ينالهم الأذى من قومهم، محتاجين سورة تنزل على قلوبهم تناسب تلك النفسية، تعالج المشاكل اللي هحصل لهم، المشاكل النفسية يعني الوجدانية، فهنلاقي سورة الفاتحة فيها ده.
أرحمك الله. هنلاقي سورة الفاتحة فيها ده، فيها ده ازاي لما نجي ندخل على الفاتحة بنفسية الصحابي المستضعف ونقرا الحمد لله رب العالمين... خلونا نأجل ده، احنا عاوزين ندخل على الفاتحة بثلاث نفسيات: نفسية النبي عليه الصلاة والسلام والصحابي المستضعف لما تنزل في الوقت ده هيشوفوها ازاي، نفسية الكافر اللي هو بيقرا عليه هذا الكلام، ونفسية الذي يدخل على الفاتحة دخولاً أولياً ساذجاً، يعني إيه؟ يعني دخول واحد مش عارف حاجة معدي كده ماعرفش أن في أصلاً حاجة اسمها دين في الدنيا دي كلها لا إسلام ولا غيره، وبعدين سمع الكلام ده فهو يعني هيستفيد إيه من الفاتحة يعني أما يسمع الكلام ده يفهم إيه؟
فاحنا محتاجين نعمل ده إن شاء الله، بس قبل ما نخش هذا الدخول تعالوا نتأمل شوية حاجات تانية أن الفاتحة هي أول السور نزولا إيه، سورة كاملة تنزل، آخر سورة كاملة تنزل سورة إيه؟ النصر، ﴿إِذَا جَاءَ نَصْرُ اللَّهِ وَالْفَتْحُ﴾ [النصر: 1] اللي بعض العلماء بيسميها سورة الفتح. فكان أول سورة تنزل كاملة الفاتحة، وأخر سورة كاملة الفتح، وكان الرحلة النبوية رحلة الداعية إلى الله، لأن هنا احنا بنكمل على النبي عليه الصلاة والسلام من حيث الدعوة أنه داعي إلى الله، إنت بتدعو إلى الله، وبعدين ناس تدخل وناس تكذب وناس تأذي وناس تدافع وعشت إيه يعني حياة بقى عارفين بقى سيرة النبي عليه الصلاة والسلام إلى أن جاء الفتح، وهنا تنزل السورة التي تنعي للنبي نفسه عليه الصلاة والسلام، ده أول نعي ينزل للنبي عليه الصلاة والسلام أن أن أجلك قرب، ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ [النصر: 1-2] فقد أديت ما عليك، فاعمل إيه في آخر أيامك؟ اقعد استغفر.
لا إله إلا الله، احنا كلامنا احنا كلمنا الكلام ده قبل كده، قلنا يعني سيدنا النبي عليه الصلاة والسلام في آخر عمره يؤمر بإيه؟ ﴿فَسَبِّحْ بِحَمْدِ رَبِّكَ وَاسْتَغْفِرْهُ﴾ [النصر: 3]، اقعد بقى استغفر، أجلك قرب فاختم حياتك بالاستغفار، وبادر صحيفتك بالاستغفار، أن آخر حاجة في صحيفتك تبقى الاستغفار.
ده احنا بنتكلم عن مين؟ عن النبي عليه الصلاة والسلام، طب استغفره لأنك رسول الله ولأنك نبي الله ولأنك جهدت ولا أنك دعيت خالص، فسبح بحمد ربك واستغفره إنه كان توابا.
طيب تعالوا نرجع تاني بقى ده معنى على جنب كده بس ما ينفعش ما نقولوش يعني، يبقى خلاص فتحت مكة، دخل الناس في دين الله أفواجا، أديت ما عليك، شوية وهتموت صلى الله عليه وسلم، وقد كان. فكان سؤال هنا: من أين يأتي النصر ومن أين يأتي الفتح؟ بدايتك الفاتحة دي أول سورة كاملة نزلت، ودي آخر سورة كاملة نزلت، فالفتح من الفاتحة، وشوف حتى المشاكلة يعني في الاسم: إذا أردت الفتح فعليك بالفاتحة، دي بداية الطريق، دي الفاتحة، دي الفاتحة.
حاجة تانية، الفاتحة في المصحف هي رقم كام؟ واحد، وأخر سورة في المصحف الناس مش كده؟ وتلاقي بردو معنى عجيب أن سورة الفاتحة بتكلمنا عن صفات للرب، احنا طبعا بردو من الحاجات يعني اللي هنعمله واحنا ماشيين مع بعض الفاتحة أن هنيجي هنقول لكم أن ربنا تعرف إلينا بأسماء وصفات ليه في الفاتحة دون غيرها، إشمعنى دول؟ يعني إشمعنى الله وإشمعنى الرب وإشمعنى الرحمن وإشمعنى الرحيم وإشمعنى مالك يوم الدين، إشمعنى دول، معنى الخمسة دول يعني، ودول اللي هيبقى واجب عليك أنك تقراهم كل يوم وليلة دون غيرهم، إشمعنى دول؟ فده إن شاء الله هنشوفه بعد كده إن شاء الله.
إنما اللي يعنينا الان أن هتلاقي بردو حاجة عجيبة شوية أن إذا كان ربنا سبحانه وتعالى تعرف إلينا في الفاتحة بألوهيته وربوبيته وملكه، هتلاقوا هم دول اللي في الناس: سورة الناس ﴿قُلْ أَعُوذُ بِرَبِّ النَّاسِ﴾ [الناس: 1] ربه الربوبية، ﴿مَلِكِ النَّاسِ﴾ [الناس: 2] الملك، ﴿إِلَهِ النَّاسِ﴾ [الناس: 3] الألوهية، هتلاقيهم في سورة الناس.
وبعدين فكرة أن هنا هو رب العالمين، ففكرة العالمين هيجي لنا إن شاء الله بردو أن في خلاف في كلمة العالمين دي، بس خدوها مني دلوقتي أن العالمين مما قيل فيها الإنس والجن هم دول العالمين، خلاص، إنس والجن فقط دون غيرهم. وفيها خلاف؟ أه، فيها خلاف وهنجي للخلاف بعدين، خلاص، إنما مما يقوي هذا القول أن العالمين هنا الإنس والجن، قول الله عز وجل في الآية الأخرى: ليقوم ولا لتكون، ليكون كذا ﴿لِيَكُونَ لِلْعَالَمِينَ نَذِيرًا﴾ [الفرقان: 1]. طب هو النبي نذير لمين عليه الصلاة والسلام؟ للإنس والجن، مش كده؟ فقالوا: يبقى العالمين هم الإنس والجن، هنحيلها بعدين إن شاء الله ونفصل فيها ونقول ليه قالوا كده.
فلو قلنا أن العالمين هم الإنس والجن، فتلاقي بردو سورة الناس هي فيها ذكر لمين؟ للعالمين دول اللي هم الإنس والجن.
وبعدين وده الأهم بقى وده اللي ذكرت عليه أن الفاتحة ابتدت والناس ختمت. فاكرين لما قلت لكم قبل كده واحنا بنتكلم في دروس من الحج قلنا لكم ساعتها أن أي حد بيدي محاضرة ولا شاطر شوية في في أنه بيعرض حاجات ولا بتاع، في مواطن كده بيبقى معروفة لو عاوز تقول حاجة مهمة بتقولها فيها، قلنا لكم موطن منها اللي هو إيه؟ اللي هو في الآخر خالص وبيسموه التيك هوم مسدج، اللي هو الرسالة اللي قدامك بياخدها هو مروح، فبتختم محاضرتك أو درسك أو كده بحاجة مهمة اللي أنا عاوز اللي قدامي وهو ماشي واخدها معاها بقى ومروح بيه واخدها البيت.
من المواطن اللي بيقولوا عليها بردو مهمة: الافتتاح، لأن اللي قدامك بيبقى قاعد إيه مركز، عاوز يعرف أنت هتقول إيه أصلاً، فباول كم دقيقة هو في قمة تركيزه. فهنلاقي الفاتحة اللي هو إنت بتفتح جلده المصحف كده، فهتلاقي الفاتحة بتقول لك حاجة غريبة قوي، بتقول لك إيه؟ بتقول لك أن احنا عندنا ناس منعم عليهم، وناس مغضوب عليهم، وناس ضالون، ده في الفاتحة. فكان أول سؤال هيبادر لذهنك، احنا احنا هنسال في كل آية في الفاتحة، إيه اللي هيبادر عشان نعرف ازاي الفاتحة شايفة هتشوف الدين كله في الفاتحة؟ فهنسال السؤال اللي هسأله دلوقتي في كل آية إن شاء الله بعد كده، بس أول ما تسمع كده أن في إيه ده، في منعم عليهم وفي مغضوب عليهم وفي ضالون، واحنا فاهمين المنعم عليهم دول ناس كويسة والمغضوب عليهم والضالون دول ناس وحشة، أول سؤال هيجي في دماغك: طب طالما كده، هو الناس دي ليه غضب عليها وليه دول بقوا ضالين، ليه ما يبقوا منعم عليهم زيهم زي غيرهم؟ فيجيلك: لا، أصل هو الموضوع مش كده، هو الموضوع أن احنا لما خلقنا دول خلقنا لهم شيطان، والشيطان ده هو اللي هيخلي دول مغضوب عليهم وهيخلي دول ضالين. هتيجي بقى في سورة الناس هتلاقي نفس الكلام أنك بتستعيذ منين؟ من هذا الشيطان وهذه المعركة بقى الدائرة.
فاكرين لما قلنا في الحد الموطن ده، قلنا لي حد فاكر؟ أحسنت، قلنا أن آخر عباده عندك في بتختم بيها موسم الحج رمي الجمرات، رمي الجمرات، خلاص، بعدين بقى اقعد في مكة براحتك لما تجي ماشي بتطوف وداع ماشي، إنما بنتكلم على أعمال الحج. آخر عبادة بتعملها هي رمي الجمرات. فاكرين وقلناها لكم العبادة دي عجيبة جدا، لو تفتكروا وقتها يعني، قلنا قلنا ليه ليه عجيبة؟ متكررة! ده إنت هترمي سبع سبع جمرات وتروح، نقول لك: لا، إنت رايح فين، هتيجي تاني يوم.
ترمي إحدى وعشرين جمرة، وتروح، فنقول لك: لا تعالى، رايح فين؟ تيجي ثالث يوم إحدى وعشرين جمرة، وبعدين يقول لك رابع يوم إحدى وعشرين جمرة. وساعتها تأملنا هذا وقلنا: ليه ليه متكررة، وليه على مدار الأيام والليالي؟ وقلنا: عشان يبقى تعرف أن معركتك مع الشيطان إيه مستمره، مش ده المعنى اللي احنا عاوزينه؟ قلنا: ليه تختم بها الحج؟ عشان تخرج من الحج مستحضر المعنى ده، معنى إيه؟ أنك في حرب مع الشيطان حياتك.
هتيجي المصحف تفتحه، هتلاقي في الفاتحة إشارة إلى تلك المعركة، إشارة بس؛ ما تقالكش لسه في شيطان، أنت اللي هبتدي تسأل هو ليه يعني طالما في -احنا عارفين أن في منعم عليهم وفي مغضوب عليهم وضالون- ليه دول موجودين؟ ما يبقى منعم عليهم ببساطه! عارفين كده عشان تفهموا أنا عاوز أقول إيه؛ يعني لما أجي أقول لك إيه: والله، أنا عندنا المسجد دورين، دور فيه مكيف واحنا الجو حر وشديد الحرارة وبتاع، ودور ما فيهوش مكيف ولا مراوح ولا أي حاجة وساونة، فيجي واحد يقول لك إيه: أنا قعدت في الدور الحر الساونة ده. فطبيعي نسأله: طب ليه؟ ما هو طالما في دور فيه تكييف، ما تقعد في التكييف؟ يقول لك: لا، ما هو أصلك مليان؛ يعني في حاجة خلته مش قادر يقعد في المكان، فانت أما تعرف أن في الناس ثلاثة، منعم عليهم ومغضوب وضالون، هتقول إيه؟ ما حدش هيبقى مغضوب عليه ولا ضال، بسيطة يعني؛ زي ما سيدنا جبريل عمل كده لما خلقت الجنة وقالوا: وعزتك وجلالك، لا يسمع بها أحد إلا دخلها، لا ما الموضوع مش كده، ده في مكاره، ولما خلقت النار: وعزتك وجلالك، لا يسمع بها أحد فيدخلها، لا، ما هو الموضوع مشكل، ده في شهوات هتخلي الناس تدخل دي وما تدخلش دي، وفي الآخر ورا ده كله شيطان، شيطان بيضخم لك المكاره، وشيطان بيحسن لك الشهوات. فكان في إشارة إلى هذه المعركة، وتقعد تقرا القرآن كله، وتيجي بقى الرسالة الأخيرة اللي هتقفل كده الجلدة بتاعة المصحف وتخرج بيها من المصحف وتفضل فاكرها، اللي هي إيه؟ ﴿قُلْ أَعُوذُ بِرَبِّ النَّاسِ * مَلِكِ النَّاسِ * إِلَهِ النَّاسِ * مِنْ شَرِّ الْوَسْوَاسِ الْخَنَّاسِ﴾ [الناس: 1-4]، نفس رسالة الحج.
فدي كده الفاتحة كأول سورة نزلت كاملة، وسورة الفاتحة أو النصر آخر سورة نزلت كاملة، والفاتحة أول سورة في المصحف مع آخر سورة في المصحف، معنى ثاني هنشير إليه وهنتكلم عليه بعدين برده إن شاء الله. ده كله احنا لسه ما دخلناش في الفاتحة بس بنشوف مكان الفاتحة فين نزولا، ومكان الفاتحة فين مصحفا. مكان الفاتحة في المصحف برده أنك هتيجي بتقول: ﴿اهْدِنَا الصِّرَاطَ الْمُسْتَقِيمَ﴾ [الفاتحة: 6] في الفاتحة، وده شيء عجيب برده. ليه عجيب؟ خليه نقوله بعدين إن شاء الله، بس هو عجيب ماشي، فكاني أول ما تقرا ﴿اهْدِنَا الصِّرَاطَ الْمُسْتَقِيمَ﴾ [الفاتحة: 6]، هتسال أسئلة برده، أولا هو إيه الصراط المستقيم؟ وده مش هنجاوبه دلوقتي، لكن السؤال الثاني: أهدنا، أنا بطلب من ربنا أنه يهديني، طب هو في وسائل للهدايه دي؟ يعني حاجة لو عملتها أهدى أو تساعدني على الهدايه؟ فتيجي سورة البقرة على طول بعد الفاتحة في الأول خالص: ﴿ذَلِكَ الْكِتَابُ لَا رَيْبَ ۛ فِيهِ﴾ [البقرة: 2] وتوصف بوصف واحد: هدى، يعني أنت في الفاتحة قلت: يا رب أهدني الصراط المستقيم، طب الهداية دي تلاقيها فين؟ في المصحف، في القرآن. ليه؟ هو وصف واحد: ذلك الكتاب لا ريب فيه هدى، ذلك الكتاب لا ريب فيه هدى للمتقين، تمشي كده ماشي، كده وكده ماشي، ذلك الكتاب لا ريب فيه هدى للمتقين، كل الوقف ده ماشي، لكن احنا مش بنشرح البقرة دلوقت، لكن في الآخر هو وصف بوصف الهدى.
فده موطن الفاتحة، وبعدين اختار الله عز وجل لها هذا المكان أن تكون في بداية المصحف لتكون فاتحة الكتاب. وترتيب سور القرآن ترتيب توقيفي هكذا، كانت العرضة الأخيرة على جبريل، فده ترتيب توقيفي من الله عز وجل أن الفاتحة تأتي أولا، أول سورة في المصحف، وتسمى فاتحة؛ ليه تسمى فاتحة؟ أنها فاتحة الكتاب، فاتحة المصحف، وفاتحة الصلاة، تفتتح بها الصلاة. أول ذكر واجب في الصلاة هي الفاتحة، يعني أنت ممكن تقول لي: الله أكبر، الحمد لله على طول من غير ذكر، الاستحباب، ذكر الاستفتاح لو حد ما قالوش الصلاه باطله؟ لا، يأثم؟ هو مستحب، فانت ممكن تقول: الله أكبر، تبتدي بالفاتحة على طول، فهي فاتحة الصلاة، فلذلك سميت بالفاتحه.
وكذلك سميت بالمثاني؛ ليه مثاني؟ لأنها تثنى في الصلاة بتتقال كتير، بتثنى، بتعاد في الصلاة، أو لأنها تثنى بغيرها، يعني إيه تثنى بغيرها؟ يعني في الصلاة بتقراها وبعدين تقرا سورة ثانية بعديها، ولذلك في مصحف ابن مسعود رؤي هذا الأثر؛ ابن مسعود ما حطش الفاتحة في مصحفه، ما قالوا له: طب أنت ما حطتش سورة الفاتحة في مصحفك؟ قال: لو أردت أن أثبتها لأثبتها قبل كل سورة، لو أحطها في مصحفي هحط الفاتحة وبعدين البقرة، وبعدين الفاتحة وبعدين آل عمران، وبعدين الفاتحة وبعدين النساء، وهكذا، لأثبتها قبل كل سورة، واكتفيت بحفظ الناس له. ده اجتهاد ابن مسعود، وطبعا مصحف ابن مسعود مش هو المصحف اللي احنا اللي بعد كده كان يعني اجمع عليه، أجمعت عليه الأمة، لكنه كانه تلمح هذا المعنى أن الفاتحة بتثنى دايما، يعني إيه؟ تقراها قبل أي سورة، فسبع المثاني.
ومعنى أني قبل ما نخش برده في الفاتحة، أن الفاتحة يا جماعة هي من أكثر السور والآيات طبعا تكرارًا في اليوم والليلة، ده برده معنى تاني مهم، عشان تعرف أن أنت مش داخل على سورة عادية. خلي بالكم، احنا من تكرار الفاتحة، الناس إيه عمالة تقول: أنت كل ده الفاتحة دي اللي احنا أنت عشان عمال تكررها وهنيجي لمسألة التكرار ده دلوقتي حالا إن شاء الله. الفاتحة أكثر سورة بتكرر في اليوم والليلة، أنت عندك سبعة عشر مرة على الوجوب، إنما تعالوا كده لو دخلنا بس السنن الرواتب، فانت عندك اثنين قبل الفجر، وأربعة قبل الظهر واثنين بعد، أو اثنين واثنين يعني خلينا ماشيين على أربعة واثنين، فعندك ستة، بقى كده ثانية، وعندك المغرب اثنين، عشرة، وعندك العشاء اثنين، اثنا عشر، وسبعة عشر أربعة وعشرين، تسع وعشرين مرة بتقرا الفاتحة. وبعدين عندك ثلاث ركعات بعد كده هتوتر، يبقى اثنان وثلاثون، أربعون.. إزاي اثنان وثلاثون؟ ماشي، ده احنا لسه ما قلناش حد هيقيم ليل، ما قلناش حد هيصلي نفل مطلق كده بالنهار، ما قلناش ضحى، ما قلناش خالص، ما قلناش مسجد، ما قلناش السنن الغير راتبة، فانت فاهم أنت بتقرا الفاتحة كم مره؟
خلونا بقى نفهم حته التكرار دي، ربنا سبحانه وتعالى لما أمرنا بتكرار الفاتحة وجعلها على الوجوب، ما هو كان ممكن يا جماعة إيه: اقرؤوا الفاتحة لكن مستحبة؟ لا، ربنا ما عملش كده. افهموا يا جماعة رسائل الرب لنا، أي صورة ثانية بتكرر هي على الاستحباب، يعني احنا في أي مكان قاعدين هاجي أقول لك: الجمع ده مين فينا اللي بيقرا مثلا سورة الملك قبل ما ينام؟ هتلاقي ناس بتقرا وناس ما تقراش، صح؟ مين فينا بيقرا مش عارف إيه؟ أمتى الناس بتقرا ولا ما تقراش؟ مين فينا بيقرا فجر الجمعة السجدة والإنسان؟ الناس بتقرا وناس ما تقراش. مين فينا ما بيقراش الفاتحة؟ ولا واحد! دي السورة الوحيدة التي ربنا ما وكلش الأمر إلينا؛ اللي حابب يعمل يعمل، واللي مش حابب ما يعملش. لا، السورة الوحيدة التي ربنا جعلها تقرا وجوبًا، ولما جعلها تقرا وجوبًا، ما جعلهاش تقرا مرة في اليوم مرة في الصلاة، لا، في كل ركعة تقرا وجوبًا، طبعا على خلاف بعض العلماء لا يرى ذلك، الجمهور على كده، الجمهور على كده ففي كل ركعة تقراها على الوجوب.
ليه؟ ليه دي هتحل لنا إشكال كبير. خليني بقى أقول لكم حاجة دلوقت لأن أنتوا دلوقت احنا إيه من كتر تكرار الفاتحة ما احناش حاسين بالفاتحة، ولا فاهمين يعني مش حاسين المعاني دي من كتر ما بنقراها. احنا دلوقت الناس بتيجي تدخل، الإمام اللي صوته حلو المشهور اللي الدنيا بتتقفل وراه، مسوايه خلص الفاتحه عشان إيه؟ أنجز، خش في اللي بعده بقى، عاوزين نسخن ونعيط! ما تقف تعيط في الفاتحة، ما تقف تتدبر الفاتحة، مشان تعيط تدبر الفاتحة! ابن تيمية ورد عنه أنه كان يجلس بعد الفجر لغاية بعد الشروق بيقرا الفاتحة يكررها، يكرر الفاتحة بس، ما حاجة ثانية. أبو حنيفة ورد عنه أن ربما قام في الصلاة لم يتجاوز الفاتحة، يعني وقف كده في قيام الليل ابتدى مش عارف يعدي الفاتحة، مش عارف يخلصها، السورة اللي احنا إيه بناخدها كده دي تخلي نفهم معنى مهم جدا يا جماعة.
مين النهارده ما كلش؟ ما فيش أحد صح؟ كله كل، نصاب، كلت طبعا أنا، كله بياكل، يعني كله كل. طب ماشي، بلاش النهارده، مين امبارح ما كلش؟ مين أول أمبارح ما كلش؟ يعني أنت كل يوم بتغدى، كل يوم بتاكل، مش كده؟ هل في واحد سمعناه بيجي يقول: يوه هو أنا كل ما أكل بقى أنا زهقت من تكرار الأكل؟ ما سمعناش أحد بيقول كده أنه زهق من تكرار الأكل. ما حدش بيقول ده ليه؟ لأن الأكل احتياج. ركزوا في اللي بقوله ده، لأن الأكل طعام احتياج، أنت محتاج للطعام، واحتياجك ده بيتكرر، الاحتياج هو اللي بيتكرر، فبيتكرر الطعام بناء على تكرر الاحتياج.
قل مثل ذلك وأعظم في الفاتحة. أنت محتاج للفاتحة، واحتياجك للفاتحة احتياج متكرر ملح لدرجة أنك ما تكفيكش فاتحة واحدة في اليوم ولا اثنين ولا ثلاثة ولا عشرة. مشكلتنا فين؟ أن احنا مش مستشعرين احتياجنا، ما احناش مستشعرين ذلك الاحتياج. وأول ما نستشعر معاني الفاتحة ونفهمها ونتدبر الفاتحة ونستشعر احتياجنا إيه من الفاتحة، هتفهم أن ده: أنا محتاج أقرأ الفاتحة مش سبعة عشر مرة ولا عشرين مرة، محتاجها مئة مرة في اليوم، محتاجها؛ لأنها بتحل لي مشاكل كلها. الشافية يا جماعة الفاتحة، شافيه من مرض يستعصي على الأطباء علاجه، يعني ورد في أثر أبي سعيد السم، وجاء هذا في حديث أنها شافيه من السم، وأظن في أثر ثاني أنها شافت واحد من الجنون، أمراض مستعصية على الطب أصلا. بتاع السم ده لو ما تلحقش في وقتها بمدة بسيطة خلاص مات، وكذلك هي شافيه لما في قلبك. فاكرين لما قلنا لكم أن عاوزين ندخل الفاتحة دخول النبي المستضعف صلى الله عليه وسلم والصحابه المستضعفين؟ محتاجين ندخل على الفاتحة ده؛ لأن ده وقت نزول الفاتحة، ليه نزلت دلوقت؟ فمن هذا.
طيب إحنا كده خلصنا اللي حوالين الفاتحة، المفروض ندخل في الآية، نبتدي بقى نقرا الفاتحة ونعيش مع الفاتحة. فانا كنت فاكر ده بس، الأسئلة سؤالين. فخلونا، يعني حابب بنقرا أسئلة النهارده. أقول قولي هذا وأستغفر الله العظيم لي ولكم. خلونا نشوف أسئلة.
ماشي، واحدة مخطوبة بقالي سنة بتتكلم مع خطيبي في التليفون، هل ده حرام؟ وللعلم بتتكلم معاه مثلا... أنتو بتتخطبوا أنتو في ابتدائي! وللعلم للعلم، أولا كاتبها بالكاف مش بالعين، هتكلم مع مش معاه، لو خاطبها قاعد يفسخ الخطوبة بدايه وخد لك واحدة. تقول: وللعلم بتكلم معه في أن احنا نوقف كلام، وهو رافض، أعمل إيه؟ طبعا بتتكلمي في التليفون مع خطيبك، ده ليه صور، يعني ممكن واحدة بتتكلم مع خطيبها في التليفون أن هو بيقول لها: أنا نازل أشتري السيراميك بتاع الشقة، فمثلا إيه اللون المفضل؟ أو هدهن الحيطة النهارده فندهن لون إيه؟ هجيب السباكة.. يعني في مصلحة الزواج. فلو كان ده كلامك مع خطيبك -وأنا أظن فيه كده، واحدة حاضرة الدرس، فأكيد تبقى بيعملوا حاجات ثانية، مستحيل الناس المتدينين اللي بيجوا الدروس شباب- ما تصدمونيش، أنت بتبص لي ليه كده؟ اتكلموا صح يا شيخ، هو ده اللي بيحصل. فلو كده نقول لك: بلاش، خلوها في مجموعة، في جروب مثلا، يكون في والدك، تكون في والدتك، وتكلموا من خلال هذا الجروب. طب ما مش عارفين نعمل ده لأي حيثية ومضطرين بقى ياخد رأي في حاجة بيجيبها في بتاع؟ ماشي، للضرورة ماشي الحال، ما فيش مشكلة، أنما كلام بقى يتعدى هذا، لا، يبقى حرام.
المخطوبة أجنبية، ماشي، المخطوبة أجنبية؛ أجنبية يعني ما هي.. يعني ما ينفعش زيها زي اللي ماشية في الشارع كده، فمش هنبيح لك أنك تكلمه، ولا أنت تكلميه إلا للضرورات زي اللي احنا بنقول لكم عليها دي، والأحسن برده بلاش تبقوا لوحدكم. ماشي، الخلوة الافتراضية الآن أخطر من الخلوة الحقيقية، يعني ممكن يحصل كل حاجة في الخلوة الافتراضية دي، الافتراضية اللي هو إيه؟ اللي هو بنتكلم فيديو كول، اللي هو مع بعض على الشات، ممكن كل حاجة تحصل، فبلاش نستسهل موضوع الخلوة الافتراضية دي. وحاجة ثانية أتقالت في السؤال، ما تسألتش (يعني، بس أتقالت): أنه بقالها سنة مخطوبة، فأنا بانصح الشباب: بلاش تطولوا مدة الخطوبة، ولا مدة كاتب الكتاب، دي أسوأ فترة هتعدي عليكم في حياتكم. فبلاش تطولوا فترة الخطوبة ولا فترة كاتب الكتاب، حاولوا تقللوا الفترة دي لأنها فترة.
مؤذية نفسياً ليكم، للشباب والبنات؛ ماشي. على قد ما تقدروا تقللوا الفترة دي.
سؤال جاي ظاهر من عند الستات: إزاي نعرف الطفل المميز في المسجد؟ الأطفال بتيجي لغاية ١٢ سنة، نعرف مين ده مميز ولا لأ؟ والأم بتقول: ابني صغير ١٢ سنة، غير. ١٢ سنة ما يدخلش عند الستات. سواءً طبعا مش مميز؟ هو مميز، دي كلمة غلط، هي عايزة تقول: بالغ أو حاجة زي كده، يظهر. إنما المميز ده سبع سنين مميز خلاص، بس سبع سنين ينفع يدخل عند الستات في المسجد؟ آه، يدخل، ما فيش مشكلة. إنما بلغ أو ناهز البلوغ، يعني سواء بلغ أو اقترب من سن البلوغ، خلاص، ما يدخلش ولا يشوف الستات بقى خلاص. فابنك ده ننوس في عينك أنت، هو عشان هو ابنك فأنت شايفاه صغير، ما هو مش صغير.
لبست النقاب، والدتي معترضة ورافضة وجودي في أي مكان بالنقاب، وبتتريق عليا وتسخر مني، اعمل إ ايه مع والدتي؟ أنا بحاول أرضيها بأي شكل.
نفس الجواب اللي قلناه المره اللي فات للي بيحرم الدرس، أنك تخلي لك حل مع ربنا، دي أول حاجه. طبعا أنا الدرس اللي فات ما قلتش كده بس، إنما الناس المؤذية اللي بيقطعوا الريلز بتاعتي، قطعوها على كده وخلوا الناس... أنا قلت بعد كده: ممكن تعرض بالكلام وتقول: أنا رايح أقعد مع أصحابي، وهم أصحابي وإخواتك، رايح أقعد في بيت، وده بيت من بيوت الله. قلت كلام زي كده، قطعوه بقى عشان هما عاملين خطة عليا أن هما يدمروني ويوقعوا دعوتي. دي أول حاجة.
ثاني حاجة: أن الأم محل دعوة. الأم محل دعوة، عاوزين يا جماعة ننظر لكل الناس أن هما محل دعوة. يعني إيه ننظر لكل الناس أن هما محل دعوة؟ يعني الأم، أنت عملت إيه مع أمك في دعوتها إلى الله، إلى التدين؟ فبتلاقي الولد بيتدين، وممكن يقعد يتدين سنوات طويلة، وممكن ابتدى يدي كلمات، وابتدا يلقي في المسجد، وابتدا، ولا عمره كلم أخوه، ولا عمره كلم أمه، ولا عمره كلم أبوه، عمره! طب يا ابني ده هو حتى في بداية الدعوة إيه؟ ﴿وَأَنذِرْ عَشِيرَتَكَ الْأَقْرَبِينَ﴾ [الشعراء: ٢١٤]. ودول أكتر ناس المفروض يبقى قلبك عليهم. فتلاقي لا، البنت اللي بتنتقب دي ما حاولتش مثلاً تقول لمامتك: ما تأخدي تسمعي المقطع ده؟ فأمك محل دعوة. فبرضه إديها حاجات تسمعها، هاتيها معاكي دروس العلم لو هي تقبل بكده، دي حاجة.
ثاني حاجة: حاولي تزيلي المخاوف من عندها؛ الأم اللي مش عاوزه بنتها تنتقب فتقول إيه؟ يا بنتي مش هتتجوزي، يا بنتي مش هيجي لك عُدّلك، يا بنتي كذا. فزيل المخاوف من عندها، يعني قولي لها: يعني احنا نقرب من ربنا وربنا هيسيبنا مثلاً؟ أكيد لا، لما أنا أقرب لربنا ربنا يبارك لي، وربنا يرزقني بالخير، ولو تأخر شوية فأكيد ده الخير برضه، وهكذا يعني. كل دي معاكي إيه؟
السلام عليكم ورحمة الله. وعليكم السلام ورحمة الله وبركاته. زوجي بيمنعني أني أجي المسجد وبيتحجج بحجج تافهة علشان ما أجيش، ممكن توجه له رساله؟ مع العلم هو شخص ملتزم وبيعتكف في المسجد. أولاً، عيب تتكلمي عن جوزك كده، عيب تقولي بحجج تافهة، فده قلة أدب. أن يبقى دي طريقة، (لو كنت آمراً أحداً أن يسجد لأحد لأمرت الزوجة أن تسجد لزوجها لعظيم حقه عليها). فكان ممكن تستخدمي أفاظ تانية، إنما تقولي حاجة تافهة عيب، ده أول حاجة.
ثانياً، اللي تافه بالنسبة لك ممكن ما يبقاش تافه بالنسبة له. يعني حتى بقى لو خلاص تنزلاً بتقولي تافهة، ممكن تبقي أنت شايفاها تافهة وهو شايفها مش تافهة، ده تصور يعني موجود برضه. فرأي مين اللي يمشي بقى ساعتها؟ عموماً، ده في الدنيا كلها يا جماعة، احنا أنا ببقى شايف حاجة واللي قدامي شايف حاجة، ده طبيعي احنا باختلاف البشر، بس لازم في حد في الآخر رأيه بيمشي، يعني في الآخر معروف خلاص، أنت اختلفتي وهو، رأي الست بيمشي، طبعا إيه؟
وبيتك خير لك، هذه مسألة ثالثة؛ يعني لو جوزك بيمنعك المسجد علشان أمور أنت شايفاها كده تافهة، بيتك خير لك، تحتسبي. وزي ما قلنا لأخونا المره اللي فاتت: يبقى لك حل مع ربنا سبحانه وتعالى، ولجئي إليه، وربنا لو راى منك فعلاً أولاً صدق في أن أنت عاوزه تروحي بيت ربنا لمعنى شرعي مهم وكده، هيسر لك الأحوال دي.
بس دي رسالة للبنات أو للنساء، ورسالة للأزواج: مش لازم تبقى حياتك ١٠٠%، عادي، حياتنا هننزل في حياتنا ل٨٠% و٧٠ و٦٠ علشان دينا. فلو مثلاً أنت بتمنعها المسجد علشان أنا عاوز البيت على طول متروق، أو علشان عاوز كل يوم أكل جديد أو على أي حاجة، وهي مش هقول برضه هي مبلطة في الخط يعني، لا، هي بتعمل عليها، بس يعني عادي، أيام هتبقى الدنيا واقعة شوية علشان دينها، فتحمل ده احتساباً لله عز وجل عشان دين زوجتك يعلى. هيعلي فين الدين؟ ما هو في بيوت ربنا سبحانه وتعالى. فبرضه محتاجين ده يبقى عند إخواننا المتدينين، عندهم الفهم ده للبيت. يعني إيه؟ هو تلاقيه هو ممكن يبقى زي الفل في كل ومسجد ودروس قراءة ومخلص قراءات، وزوجته ممكن ما تعرفش أبجديات الدين. احنا عاوزين بقى نطلع كمان لمستوى أعلى، أن ليه زوجتك ما تبقاش من محفظات القرآن؟ ليه ما تبقاش من الداعيات للنساء؟ ليه ما تبقاش من كذا؟ ليه؟ ليه لا؟ ما اصل البيت ممكن هيختل! ما يختل شوية إيه المشكلة لما البيت... إيه المشكلة لما دنيتك تختل شوية؟ هيجرى لك إيه يعني في سبيل إن دين زوجتك يعلى؟ ماشي. وأنت تلمي لسانك بقى شوية، ما فيش حاجة اسمها تافهة وما تنرفزوناش.
هل ربنا ياخد حقي من شخص آذاني ١٠ سنين ودمر شغلي ومش عارف إيه، ولا مجرد أنه استغفر خلاص كده ما فيش عليه ذنب؟ لا، مين قال كده؟ ده ديوان ربنا، مش هيسيب منه حاجه، ده حقوق العباد دي ما فيهاش هزار، التوبة أنك ترجع، أنه يرجع لك حقك. والدرس اللي نزل النهارده، اللي هو بتاع منزلة الإنابة، اتكلمنا عن المعنى ده وأفضنا فيه في أول الدرس.
إزاي أوصل لمرحلة أن أصلي قيام الليل بجزء مثلاً؟ السؤال ده مهم عشان كده عاوز أقرأه؛ بجزء مثلاً أو أكتر، الواحد بيصلي ركعتين أو أربعة، لكن نفسي أطول ويبقى ده حالي رغم أن ربنا منّ عليَّ بحفظ القرآن. أنا عاوز أنصحكم نصيحة يا شباب عشان السؤال ده متكرر، أن هو القيام الليل واقع عند الناس. قيام الليل بين المغرب والعشاء، الليل يبدأ من المغرب، ماشي، وقيل إن ناشئة الليل هي بين المغرب والعشاء أصلاً، الناشئة هي بداية الليل، ناشئة الشيء أوله، ﴿إِنَّ نَاشِئَةَ اللَّيْلِ هِيَ أَشَدُّ وَطْئًا﴾ [المزمل: ٦]، مما قيل في تأويلها أن نشأة الليل بين المغرب والعشاء، وكان من السلف من يقوم هذا الوقت؛ أولاً لأنه قيام ليل، ثانياً لأنه وقت غفلة فيبقى أثوب كمان. فأنا أنصحكم: صلوا المغرب في مسجد وما تطلعوش من المسجد، أعدوا من المغرب للعشاء في المسجد، قوموا صلوا قيام الليل. صليت العشاء، أنت خلصت قيام الليل بتاع الليلة بتاعتك، صلي العشاء، صلي سنة العشاء وأوتر، وخلاص على كده، ماشي، وعدّ خلاص، ماشي.
أهلي حرموني من التعليم بسبب جواز أخويا عشان أشتغل، أنا ما عنديش مشكلة أشتغل وهم قالوا لأ وعايزيني أمنع العلم الشرعي، أنا عندي ثلاث أخوات غيري، إيه رايك؟
يعني أنا هقول أنا فهمت السؤال إزاي؛ فهمت السؤال أن أهلك أحوالهم ضيقة، وأخوك زي... اتجوز أخوك الكبير، وأنت بعد كده عاوزينك تشتغل عشان تساعد في النفقه في البيت، ده اللي أنا فاهمه من السؤال، وأنت ما عندكش مشكلة في كده، فلغاية هنا ما فيش مشكلة عندك، مشكلتك في أن هما عاوزين يمنعوك من العلم الشرعي، وأنت عندك ثلاث اخوات غيرك. فلو أنا فاهم صح، فربما كان هذا بابك للجنة، أنك تبذل عشان ترفع شوية من من ضيق الحياة عن أبيك أو تساعد في تربية أخواتك، احتسب ذلك ولعل ده بابك إلى الجنة. والعلم مش محتاجين منك أكتر من كل يوم ساعة ولا حاجة. ببركه ما تصنع، هذا الذي تصنعه ده كبير، دي مش حاجة صغيرة، اللي أنت بتعمله دلوقتي ده، أنك بتساعد أبوك في تربية أخواتك، أنك بتساعد بتساعده في نفقات البيت، أن دي حاجة كبيرة جداً، فنرجو ببركة ذلك أن توفق إلى أنك تحصل ما تريد من العلم في أقل مدة، نرجو ذلك. طب ما عرفتش تحصل؟ أنت أنت على خير برضه، يعني أنت يعني أنت اللي أنت فيه ده باب كبير من يعني من أبواب الجنة، فما تتاذيش نفسيا لهذا، يعني ماشي.
هل البسمله آية من الفاتحه وهل نجهر بها؟ خلافات بقى بالعلماء، هنجي لها بعدين إن شاء الله.
أشعر أني سأنتكس بعد انقضاء شهر الله المحرم، فماذا أفعَل؟ شعرتها ازاي دي؟ اشمعنى بعد... مش عارف بقى، سؤال هيبقى إجابته طويلة. حد عاوز... في ناس كتير حاسة هتنتكس بعد المحرم.
بيقول أنا ما فهمتش الباب الذي لم يفتح من قبل، أن الفاتحة نزلت قبلها، هل الفضل نزل وألحق بالفاتحة؟ هو هنا الحتة دي فيها خلاف بين العلماء، هل ده دلوقتي يا جماعة الفاتحة متى أُنزلت؟ مكية ولا مدنية؟ أربعة أقوال. بعض العلماء قال: مكية، وده القول الأشهر وقول الجمهور. وبعضهم قال: مدنية. وبعضهم قال: إنها نزلت مرتين، مرة بمكة ومرة بالمدينة. وبعضهم قال: بعضها نزل بمكة وبعضها نزل بالمدينة، ما نزلتش مرة واحدة. دول أربعة أقوال في الفاتحة. القول الأشهر والذي عليه الجمهور: أن الفاتحة مكية، خلاص، وأن هي ترتيبها في في النزول زي ما قلنا لكم كده: الرابعة والخامسة على حسب، في نون والقلم في الموطن ده ولا ما فيش؟
طيب، الإشكال فين؟ في نقيض الباب، أو سامعوا إيه؟ نقيضاً وبصوا، فقالوا: الباب اتفتح وكذا وكذا، أن الملك اللي نزل قال: أُوتيت الفاتحة وخواتيم البقرة، والبقرة مدنية، البقرة مدنية. فهل ده كان الفاتحة أُنزلت في هذا الموطن وخواتيم البقرة أُنزلت بعد، فيبقى ده موطن نزول الفاتحة؟ قد يكون ده ولا لا؟ الفاتحة كانت أُنزلت والبقرة أُنزلت وبعدين فتح هذا الباب ونزل هذا الملك ليبشر النبي عليه الصلاة والسلام بهذه البشارة، بس الفاتحة كانت نزلت أصلاً، والايه وخواتيم البقرة كانت نزلت، قد يكون برضه يعني فيها احتمالات. فبعض العلماء قالوا ده، وبعض العلماء قال لك لا، ده هو ده اللي هما بيقولوا إيه: أن هي مدنية أو نزلت مرة، ومرة قالوا لا، سهلة، هي نزلت مرة في مكة وبعدين في المدينة نزلت مرة أخرى بهذه البشارة. فهي أقوال كتير، يعني، ماشي.
هل سأحاسب إذا اتبعت قولاً لمخالف للجمهور في مسألة ثم تبين يوم القيامة أنه خطأ؟ لأ، يعني أنت لو بتسأل حد بتثق في علمه ودينه وأفتاك، فاتبعت قوله وخلاص. احنا مش متعبدين بأن احنا نبقى متيقنين الحكم في المسألة أصلاً، وإلا يبقى حرج شديد جداً على الأمة، ماشي.
حتى لو قول الجمهور، يعني حتى لو القول المخالف قول الجمهور، لكن الخروج من الخلاف أحمد، يعني لو عرفت تخرج من الخلاف في المسألة اخرج من الخلاف، ما عرفت، ما نقدرش نقول ده ما ينفعش يبقى خطاب عام للناس، لأن هذا الخطاب يوقعهم في الحرج برضه، أنك كل مسألة تخرج فيها من الخلاف، ده ما ينفعش يبقى خطاب عام. ممكن واحد في نفسه متورع وبيعمل ده في كل مسألة، خير، بس ما نقدرش نقول لكل الناس اعملوا كده. ثاني حاجة، أن في بعض المسائل ما تعرفش تخرج فيها من الخلاف، لأنك لو عملت بأحد القولين هتكون وقعت في خلاف التانيين. خلاص مش وقته بقى أن احنا نشرح دي.
هنقيم ولا إيه لسه؟
لو من إيه؟ يعني واحد بيشك أن كرر الفاتحة مرتين في الركعة، يعني يظهر أنك موسوس. قراءة الاستفتاح، مطول في شوية بتاع الص... مش فاهم السؤال ده، أنت اللي باعته، آه. قول... قرأ الاستفتاح مطول شوية في الص... بيقرا الفاتحة مرتين، هو فاكر إنه... الفاتحة ده، قرأ الفاتحة، قرأها تاني في نفس... مش فاهم، يعني خليني أجوب، لو دلوقتي واحد شاكك هو قرأ الفاتحة ولا ما قرأهاش، يعمل إيه؟ على حسب حالته، لو هو بني آدم طبيعي، لو هو بني آدم طبيعي ده نقول له: اقرأها تاني. خلاص طالما شاكك اقرأها تاني.
لو واحد موسوس في حياته، يعني يدخل يتوضى بيغسل إيده ٥٠ مرة، ويتمضمض ٣٣ مرة، وما تضحكوش، ده حاجة حالة صعبة يعني بتبقى، هو فماش، ما فيهاش ضحك، فده بنسميه موسوس. الموسوس ده احنا بنعامله بشكل مختلف في الفقه، فالموسوس يجي يقول: أقرأها تاني؟ يقول لك: ما تقراش تاني. ماشي، فهو ما أعرفش بقى هو حالته إيه ده.
ورقة وش وظهر. هل تفضل الزواج بدون قائمة منقولات؟ لا أفضل الزواج... مش عارف، قائمة المنقولات دي ما عنديش رأي فيها، عندي حاجة بيتعارضوا مع بعض الحقيقه، فمش عارف أطلع برأي فيها. حاجة بفضفض معاكم، مش... ولا بلاش يعني؛ أول حاجة أن احنا بنبقى عاوزين نحفظ حقوق البنت، وفي رجاله ما تتقش من الراجل، فداخل نصبايا، ويخلص واحدة في التانية في التانية في الرابعة، فده معنى يخلينا نفرمل شوية فنقول لا.
بلاش قائمة، والناحية الثانية الراجل يبقى طالع عينه شقيان، وعشان يلم القرشين اللي بيهم مش عارف إيه، ينزل يروح الشغل يرجع يلاقي البيت متشطب، العفش منقول ويمكن مخلوع أصلاً، وبعدين بعدها كله يرفعوا عليه قضية، ما هو القائمة لسه معاهم بقى ده هم خلي بالك هم ما خلصوش الإجرام اللي بحكيه، ده بيحصل يوم رايحين رافعين عليه قضية بالقائمة. فأنَا الحقيقة ما عنديش تصور فيها، ما عنديش رأي فيها خالص.
لو الراجل بقى هيشطب البيت كله ويجيب كل حاجة في البيت مثلاً وبعدين يمهرها مهر مثلها، خلاص ماشي ما يبقى ساعتها ما فيش داعي للقائمة، إنما هو ده تصور بقى، ده تصور جميل، يعني لو الراجل ناوي يعمل ده ماشي، إنما ما يجيش يقول إيه لا النص بالنص وبعدين مش هنكتب، يعني في حاجات كده يعني، إنما لو التصور اللي بيسأل هو تصوره إن أنا هجيب شقتي وهوضب شقتي وهفرش شقتي كلها وهدخل على بنت الناس، مهرك كام يا بنت الناس؟ مهرها كذا كامثالها من النساء أو مثيلتها يعني وهديها المهر بتاعها، خلاص ماشي، لو كده ماشي.
أنت بتسوق لنفسك هنا يعني تيجي يعني أنت عاوزني أعيد الكلمة مثلاً أقول لك طب قوم وريها.
السلام عليكم يا شيخ. وعليكم السلام. هل لو خليت هدفي في الحياة أن أكون مسلماً بين قوسين مؤمن قوي كده أنا تفكيري صحيح ولا لا؟ وأنصحني من فضلك أعمل إيه علشان أوصل لنقطه المؤمن القوي؟
ما هو أنت تقصد إيه بالقوي؟ قوي الإيمان يعني ولا قوي البنية عضلات ومجانس ولا قوي يعني قوي، أنت شايف القوة دلوقتي في المال فعاوز أبقى معايا فلوس؟ مش فاهمك، تقصد إيه بالقوي؟ لو تقصد مؤمن قوي الإيمان فطبعه ده حاجة مطلب شرعي، كلنا عاوزين نبقى أقوياء الإيمان. لو تقصد بقى أن القوة في المال والده محتاج شوية تفكير ومراجعات، يعني أنتم في شوية معاني مغلوطة كده في أذهانكم الحقيقة محتاجة فرمطة، بنحاول واحدة واحدة نفرمطها كده في الدروس من غير ما تحسوا.
بكون مع الناس ده مهم جداً مع الناس في الخارج حسن الأخلاق والسمعة، لكن مع أهل بيتي يضيق صدري. ماذا أفعل يا شيخ لأني أعانى جداً من هذا، أكرمك الله في الدارين؟
دلوقتي يا جماعة السؤال ده مهم جداً، والكلام ده أنا السؤال ده أنا تكلمت عنه قبل كده، أن الواحد لما بيتدين بيجي لنا مشاكل كتير من الشباب اللي بتتدين أن يعني أبوه كره اليوم اللي بقى متعجرف وقليل الأدب وبيشوح وبيقل أدبه مع أبوه وبيزعق فمه ده بعد ما وت، طيب خلونا بقى إيه يعني شوية نتكلم في السؤال ده مهم جداً، يعني دلوقتي اللي بيبقى برة حسن الخلق وراحب الصدر وكده، ومع أهل بيته بيبقى على عكس هذه الصفة له احتمالان، له احتمالان.
الاحتمال الأول احتمال احتمال كويس ومحتاجين نعدله برده، أن هو من خوفه عليهم الشديد ما ما يقدرش نفسيته ما بتسمحش أنه يرى الشيء القليل المخالف فيهم، الناس اللي برة مش كده، فهو من شدة خوفه وشدة قلقه عليهم وشدة أن هو مش مستحمل يرى ذلك منهم يضيق صدره، فيبتدي يخرج إلى إيه الأخلاق المرذولة والرديئة وكده، احتمال موجود على فكرة ماشي.
يعني إيه مثلاً واحد مبتلى أن أمه مش محجبة ويمكن بتلبس لبس وحش جداً مثلاً ابتلاء هو هو ماشي برة في الشارع لما بيشوف النساء كده بفرض الناس راجل متدين ما بيبصش ولا كده شاب متدين وبتاع بيغض البصر وخلاص على كده وانتهينا، يرجع يلاقي أمه بتلبس ونازلة، فهو عنده ضيق شديد أنه شايف المنظر ده، فيبتدي يخرج إلى أخلاق رديئة وسيئة ليه؟ من خوفه على أمه.
لو سمع واحد برة بيسب الدين آه بيتحمق وكده وبتاع، لأن دين ربنا بيسب، لكن لو رجع ولا أبوه اللي بيسب الدين في البيت بيبقى جواه معاني أشد بكتير أن أبويا هو اللي بيسب الدين، مفهوم كده؟ فده احتمال، ده احتمال موجود، فلو ده الاحتمال اللي موجود عندكم يا شباب أو عند بعضنا يعني، فانت أعرف أن نفاذ أنا ما أقدرش أقول لك بلاش صدرك يضيق، ما أقدرش أقول لك كده، هذا شعور بينتابك فينتتابك الشعور، لكن أنفاذ هذا الشعور هو مش هيصلح من القضية، بالعكس سيؤزم القضية، فمحتاجين نتعامل بنفس هادي شوية، وما فيش أكتر من سيدنا إبراهيم شايف أبوه مش بس كافر يعني أمك متبرجة أبوك بيسب الدين، أبو إبراهيم مش بس كافر، أبو إبراهيم يصنع الأصنام، فما فيش بعد، كيف عامل إبراهيم؟ يا أبت، يا أبت، يا أبت، وبعدين إني أخاف، وبعدين أبوه شد عليه: ﴿لَّئِن لَّمْ تَنتَهِ لَأَرْجُمَنَّكَ﴾ [مريم: 46]، وقال: ﴿سَلَامٌ عَلَيْكَ ۖ سَأَسْتَغْفِرُ لَي رَبِّي ۖ إِنَّهُ كَانَ بِي حَفِيًّا﴾ [مريم: 47].
فازاي إبراهيم عامل أبوه؟ ماشي، وبعدين أمر ربنا أمر ربنا في القرآن إيه: ﴿وَإِن جَاهَدَاكَ﴾ ها، كملوا بقى إيه خلاص مش هنطيع ها، ﴿وَصَاحِبْهُمَا فِي الدُّنْيَا مَعْرُوفًا﴾ [لقمان: 15]. فالطريقة دي هي اللي هتجيب إن شاء الله، ولو ما جابتش فالتاانية مش هتجيب.
يبقى ده أول احتمال، الاحتمال الثاني أنه لا ده هو بقى اللي عنده مشكلة نفسية، هو اللي عاوز يقال عليه برة شيخ والأخ فلان راح والأخ فلان جه، ويدخل البيت يرجع لأخلاقه الزفت اللي هي أخلاقه أصلاً، فنقول له لا أقعد بقى راجع نفسك، أنت ممكن يبقى عندك رياء يوديك في داهية، فانت أقعد راجع نفسك يا ابن الحلال أنت أصلاً بتعمل ده ليه؟ اللي أنت بتعمله ده. وقلنا لكم واحد من من عظمة النبي عليه الصلاة والسلام أنه لما أول ما أوحي إليه وجاءته الرسالة أول من آمن بيه الناس الآية القريبة، أنت تقدر تتصنع خارج بيتك، لكن عاوز تعرف أخلاق الراجل الحقيقة اعرفها من مراته، اعرفها من أبوه، من أمه، اعرفها من ابنه، اعرفها من أخوه اللي قاعد معاه في البيت يعني اعرفها بالناس القريبين منه، تعرف أخلاقه. النبي أول ما أول ما قال أنا جالي وحي وقال لي وعدني عليه الصلاة والسلام، مين اللي آمن بيه؟ مراته خديجة صاحبة المقرب، أبو بكر اللي كان في حجره، علي، الناس القريبة جداً كأنه ماهوش إنسان مش متصنع برة زي جوه، ويمكن جوه أحسن من برة كمان.
فدول الاحتمالين في ال يعني اللي بيحصل ده، وفي الآخر استعين بالله سبحانه وتعالى أنه يحسن أخلاقك وأنك تحتمل هذا وأنك تعرف تتعامل معه صح، ممكن التعامل يبقى مش بالمواجهة خالص.
كان ليا واحد صاحبي زمان أبوه كان مبتلى بأنه يفتح التلفزيون وقعد يتفرج على الرقصات عادي ويتفرج على المغنيات وتيت كده يعني يتفرج على الحاجات دي، الحاجات دي طبعا حرام وهو خايف على أبوه، يقوم يعمل إيه؟ يخلا أبوه ينزل الشغل يروح فاتح التلفزيون من ورا يفك الفيوز في التلفزيون تاني، يجي أبوه يفتح التلفزيون التلفزيون إيه باظ، يوم جايب واحد يصلح التلفزيون بعد بقى يكون أسبوع مثلاً عدى، يجي الراجل يصلح له التلفزيون يمشي تاني يوم التليفون التليفزيون يبوظ، مرتين تلاتة الراجل زهق من التلفزيون ماشي، اتفرج على التليفون.
الحب حرام ولا حلال؟ من غير كلام هو نظرة أعجبت بها فقط. اتكلمنا على الموضوع ده قبل كده، قلنا الحب لا لا ما يتوصفش بالحرمة، إنما لو في حاجات قبليها حرام عملتها هي دي اللي حرام، طب حاجات بعديها حرام عملتها هي دي اللي حرام، إنما الحب نفسه مالكش يد فيه، تفصلنا الكلام قبل كده ممكن ترجع للايه؟ للبتاعة دي، وأظن برده الناس قطعتها وإن بيحبوا هم الكلام ده قوي يعني.
خلاص كده ولا إيه؟ واحد عاوز يشتغل مع الفريق مش يبقي يجي يقول لحد بقى من اللي بيصوروا الحاجات الحاجات دي بعد الدرس، يقول لهم جاية فجايبها لي دلوقتي يعني.
التبليغ والدعوة اتكلمنا عليهم كذا مرة قبل كده ومش محتاج نعيد تاني.
واحد بيقول: ممكن اعرف الحاجات اللي اعملها عشان اعرف أن قلبي نظيف؟ بحبك يا مولانا. قلبك نضيف يا ابني. اسمع اسمع ربع المهلكات من مختصر منهاج القاصدين، هتلاقيه على التليجرام اسمع الدروس بتاعتة، ماشي.
طيب نقف هنا كفاية كده، قل قولي هذا واستغفر الله العظيم لي ولكم سبحانك اللهم وبحمدك أشهد أن لا إله إلا أنت نستغفرك ونتوب.