الشيخ أمجد سميرالنهارده المجلس الثاني من مجالس تدبر سورة الفاتحه. المرة اللي فاتت لم ندخل في السورة، وإنما طوفنا حول السورة ونزول السورة وترتيب السورة سواء حسب النزول أو حسب ترتيب المصحف، وعلاقة السورة؛ هي الأولى في المصحف علاقتها بالأخيرة، وعلاقتها بسورة البقرة، وكذلك أول السور نزولاً كاملاً فعلاقتها إيه آخر السور نزولاً كاملاً؟ كل ده اتكلمنا عليه المرة اللي فاتت.
الحقيقة؛ النهارده عاوزين نبدأ من أن تلك السورة زي ما قلنا المرة اللي فاتت، مما تختص به أنها السورة الوحيدة التي نعلمها في القرآن يجب قراءتها في شيء، ما عندناش أي سورة تانية في القرآن يجب قراءتها في حتة، مش موجودة دي. فده يعطي السورة أهمية شديدة، وقلنا إن من أساميها أم القرآن وأم الكتاب، ومن المعاني أن جميع معاني القرآن ترجع إلى سورة الفاتحه، فالقرآن كله مفصل لمجملها.
طيب؛ هذا الكلام ده كلام إنشاء يعني كلام بنقوله كده؟ لا، العلماء تاملوا هذا فلقوا أن سورة الفاتحه فعلا تشمل الدين. فمثلاً احنا عندنا الدين؛ إسلام وإيمان وإحسان، مش كده؟ فالإسلام هو الأحكام الظاهرة؛ فالإسلام هو الأحكام الظاهرة، فهنلاقي سورة الفاتحة بتقول: ﴿إِيَّاكَ نَعْبُدُ﴾، فكأن العربي الفصيح الذي يعلم العربية لو سمع دي: ﴿إِيَّاكَ نَعْبُدُ﴾، السؤال اللي هيساله: كيف نعبده؟ وإيه هي العبادة؟ فساعتها هنرد عليه نقول له إيه؟ هنقول له أحكام الدين اللي هي الإسلام، فنقول له: تعال ده في صلاة وفي زكاة وفي صوم وفي حج وفي.. نقعد نقول له بقا أحكام الدين كلها اللي هي الإسلام. فـ ﴿إِيَّاكَ نَعْبُدُ﴾، كلمة نعبد دي لفظ مجمل بيانه وتفصيله في باقي الكتاب في القرآن، ادي الإسلام.
قالوا: الإيمان كذلك، أركان الإيمان موجودة في السورة؛ فإذا كان الإيمان أن تؤمن بالله فبداية السورة: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾؛ تعريف بالله عز وجل الذي يجب أن تؤمن به، فأن تؤمن بالله وملائكته وكتبه ورسله، الثلاثة دول هذه الأركان قالوا إن أيضاً مشمولة في سورة الفاتحة، فين؟ في برضه ﴿إِيَّاكَ نَعْبُدُ﴾ وفي ﴿اهْدِنَا الصِّرَاطَ الْمُسْتَقِيمَ﴾؛ ما هو ﴿إِيَّاكَ نَعْبُدُ﴾ فهيقولوا: طب العبادة دي نعرفها ازاي؟ طب ﴿اهْدِنَا الصِّرَاطَ الْمُسْتَقِيمَ﴾ طب الهدايه دي هتكون ازاي؟ هدايه الإرشاد؛ فهيكون بملك ينزل بكتاب على نبي، فهي برضه مشمولة هذه الأركان في سورة الفاتحه، وأن تؤمن باليوم الآخر وده موجود في ﴿مَالِكِ يَوْمِ الدِّينِ﴾، وأن تؤمن بالقدر.
وقالوا ده أيضاً موجود في، طبعا من مسائل القدر المشهوره والتي يعني ضل فيها أقوام مسألة خلق أفعال العباد، دي مسألة كبيرة بس مش حينفع نتكلم فيها دلوقتي يعني، لكن هي احنا طبعا عقيدة أهل السنة أن الله عز وجل خالق لأفعالنا، دي عقيدة أهل السنة ﴿وَاللَّهُ خَلَقَكُمْ وَمَا تَعْمَلُونَ﴾ [الصافات: 96]، فربنا خلق الذوات وخلق الأفعال كذلك، ففي فعلك خلق الله سبحانه وتعالى، ودي لها تعلق بمسألة القضاء والقدر؛ لأن ضل في هذه المسألة فئتين، من ناحية ناس بيسموهم الجهمية الجبرية، عفواً، ومن ناحية القدرية.
ماشى، فسرورة الـ، مش مهم يعني مش مهم الحتة دي دلوقتي، لكن سورة الفاتحة أتت لتثبت أن الله عز وجل بيده هداية الخلق؛ لأن القدرية المجرمين بيقولوا إن ربنا سبحانه وتعالى ما يعرفش أفعال العباد، ما يعرفش أنت هتعمل إيه غير لما تعمله، فما تعمله ربنا يعلمه، وأن فعلك أنت اللي خلقه مش ربنا مالوش هو سلطان على فعلك، فسورة الفاتحة بترد عليهم: ﴿اهْدِنَا الصِّرَاطَ الْمُسْتَقِيمَ﴾، ما هو لو ربنا سبحانه وتعالى ما فيش في إيديه حاجة تخص فعلك يبقا هذا الدعاء دعاء عبثي، مش كده؟ تقول له: اهدنا، فيجيلك الرد من الرب: وكيف أهديك؟ أهديك ازاي؟ ما هو أنا أنت أنا مالوش سلطان على فعلك. مفهومة دي يا شباب؟ احنا اتكلمنا في المسألة دي قبل كده، وقلنا: نثبت لله عز وجل إرادة ومشيئة، وللعبد إرادة ومشيئة، وإرادتك ومشيتك تبعاً لمشيئته الله وإرادته، اكلمنا في الموضوع ده قبل كده يعني.
فمن هنا كذلك سورة الفاتحة تشير إلى مسألة الإيمان بالقدر. من الطرائف -ده بره الدرس يعني بس افتكرتها فقلت: نفرفش- بيقولوا القدرية -زي ما قلنا لكم- القدرية مجوس هذه الأمة كما جاء في الأثر، لأنهم زي ما قلت لكم بيقولوا إن أنت بتخلق فعلك وأن ربنا ربنا مالوش سلطان على فعلك، بيقولوا: أعرابي اتسرقت الناقة بتاعته فدخل المسجد عاوز حد يدعي له ولا حاجة زي كده، فقال له الشيخ بقا اللي قاعد هناك ده بقا إيه لقي راجل كبير كده فخم وبتاع، قال: بس ده اللي الدعاء وهيجيب الـ.. راح قال له: الناقة بتاعتي اتسرقت وادعي لي. فالراجل كان قدري، فراح رافع إيديه وقال له: اللهم إن ناقة هذا قد سرقت، ولم يرد سرقتها، فردها عليه. فقال الأعرابي: لا حاجة لي بدعائك، مش عاوز دعانك. قال له: ليه؟ قال: أخشى أن يريد ردها فلا يستطيع، ما هو ما كانش ما كانش يريد سرقتها واتسرقت، فلو أراد إنها ترجع ما.. خلاص بقى هو كل حاجة.
على كل حال، فهتلذقوا مراتب الإيمان كذلك موجودة في، أو في إشارة إليها في سورة الفاتحه. طب الإحسان فين؟ في معنى لطيف جداً، طبعا احنا الكلام ده احنا بنقوله بسرعة، ومع بعض بقا في رحلة الفاتحة هنتكلم فيه تفصيلاً يعني، في معنى عجيب جداً يا جماعة؛ سورة الفاتحة بدأت بالكلام عن الله عز وجل، وبعدين حصل حاجة كده علماء البلاغة يسموها الالتفات؛ الحمد لله، احنا هنا بنخاطب الرب ولا بنتحدث عن الرب؟ احنا بنتحدث عنه، ما بنقولش: الحمد لك يا رب، لك دي يبقى احنا بنكلم ربنا سبحانه وتعالى، ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ﴾ لسه بنتحدث عن الله عز وجل، مش بنخاطب الله: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾، فجأة: ﴿إِيَّاكَ نَعْبُدُ وَإِيَّاكَ نَسْتَعِينُ﴾؛ احنا هنا بنعمل إيه؟ بنخاطب الله عز وجل، مش بنتحدث عن الله عز وجل!
ده علماء البلاغة بيسموه التفات، والالتفات ده بيبقى ليه ملمح بلاغي؛ يعني ليه يحصل هنا التفات؟ ليه من الكلام بصيغه الخطاب عن الله عز وجل أو الغيب يعني إلى المشافحة أو المخاطبة؟ فمن المعاني الجميلة اللي اتتقالت: أنك لما أثنيت على الله وحمدت الله ومجدت الله -وده هنجي له إن شاء الله في حديث للنبي عليه الصلاة والسلام- فأذن لك في الدخول عليه سبحانه وتعالى، فكأنك تراه، وده مقام الإحسان؛ كنت الأول بتتكلم عنه، وفجأة كأنك تراه، فبقى إيه؟ ﴿إِيَّاكَ نَعْبُدُ وَإِيَّاكَ نَسْتَعِينُ﴾. ففي هذه اشاره إلى مقام الإحسان، فدي الدين كله أهو إسلام وإيمان وإحسان.
طب في الدين برضه تزكيات وتزكية للقلب، وده قسم كبير في دين الله عز وجل؛ تزكية القلب وتطهيره من الآفات، فين ده في السورة؟ قالوا: أعظم آفات القلب إيه؟ الرياء، ده أعظم آفات على الإطلاق، مش كده؟ العجب ورؤية النفس والكبر، دي الآفات الكبيرة اللي في القلب أصلاً، قالوا: علاجها في إيه؟ ﴿إِيَّاكَ نَعْبُدُ﴾ علاج للرياء، أما نجي لها هنفهم برضه ليه، لأن ما جتش نعبدك هي جت: ﴿إِيَّاكَ نَعْبُدُ﴾، يعني نعبدك ولا نعبد غيرك، عبادتنا لا تصرف إلا لك لا نريد بها سواك، فده الإخلاص هنجي لها إن شاء الله نفصل في ده يعني، فقالوا: أن دي اشاره إلى علاج الرياء، و﴿وَإِيَّاكَ نَسْتَعِينُ﴾ تدفع عنك الكبر ورؤية النفس والعجب، لأن أنا من غيرك مش هعرف أعمل حاجة يا رب، فتعجب بنفسك ليه؟ وتتكبر ليه؟ وترى نفسك ليه؟ فقالوا: حتى تزكية القلوب موجودة في السورة إشارة لها.
احنا قلنا يا جماعة سورة الفاتحة هي مجملة وتفصيلها يأتي في القرآن، زي بالضبط لما بتفتح مقدمة كتاب؛ فكلما كان الكاتب أبرع في الكتابة وأقدر على بيان ما في داخله، تلاقي المقدمة تفهمك أنت هتشوف إيه جوه، فكذلك الفاتحة هتفتح الجلدة بتاعة المصحف، تلاقي الفاتحة تقراها تفهم أنت هتشوف إيه جوه.
حتى قالوا إن القرآن -من ملمح تاتي بقا- عقائد وأحكام وأخبار قصص؛ القرآن كله كده يا بنكلم عن عقيدة يا بنكلم عن أحكام يا بنكلم عن قصص. أحكام اللي هو الإسلام خلصناها، عقيدة اللي هو الإيمان خلصناها، يتبقى إيه؟ القرآن كله كده، والقصص بتخدم في الآخر عقيدة أو حكم يعني في الآخر، بس في قصص في القرآن. قالوا: طب فين بقى القصص اللي في سورة الفاتحة؟ قالوا: لا، موجودة القصص فين؟ قال لك: ما هو أنت لما هتقرا سورة الفاتحة: ﴿اهْدِنَا الصِّرَاطَ الْمُسْتَقِيمَ * صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ﴾، يبقى أنت كده عرفت أن في منعم عليهم ومغضوب عليهم وضالون.
فكانك هتبتدي تسأل: هم مين دول؟ مين دول المنعم عليهم؟ فنقول لك: لا، دول هم.. الآية: ﴿وَمَن يُطِعِ اللَّهَ وَالرَّسُولَ فَأُولَٰئِكَ مَعَ الَّذِينَ أَنْعَمَ اللَّهُ عَلَيْهِم مِّنَ النَّبِيِّينَ وَالصِّدِّيقِينَ وَالشُّهَدَاءِ وَالصَّالِحِينَ ۚ وَحَسُنَ أُولَٰئِكَ رَفِيقًا﴾ [النساء: 69]. فتقول: إيه ده؟ مين النبيين؟ مين دول؟ نقول لك: تعال بقا نقول لك مين دول؟ ده سيدنا موسى وسيدنا عيسى وسيدنا نوح وسيدنا يونس وسيدنا.. وتلاقي قصصهم في القرآن.
طب مين المغضوب عليهم دول؟ فنقول لك: لا، ده المغضوب عليهم دول اللي هم عرفوا الحق ولم يتبعوه زي اليهود كده. تقول: إيه ده؟ مين اليهود دول؟ تقول لك: تعال نقول لك مين اليهود دول. طب مين الضالون؟ نقول لك: ده اللي ما عرفوش الحق زي النصارى. تقول: إيه ده؟ مين النصارى؟ نقول لك: تعال نقول لك مين النصارى، ونحكي لك عن النصارى.
فحتى القصص القرآني في إشارة في الفاتحة لها، لكن مفتاح ذلك كله السؤال اللي هو أنك تفهم فاتحة تفهم لغة عربية، وتبتدي بقى تستفز بتلك الألفاظ المجمله. يعني لما تسمع: ﴿إِيَّاكَ نَعْبُدُ﴾ ما تعديهاش كده، إيه نعبد دي؟ يعني إيه نعبد؟ إيه عبادة؟ يعني إيه العبادة اللي ربنا يريدها مننا؟
ده أنت حتى يا جماعة لو دخلنا في تفاصيل الاعتقاد، أن الإيمان بالله إيمان خبري وإيمان، وتوحيد الله عز وجل توحيد خبري وتوحيد طلبي، أو المشهور دلوقتي عند الناس تقسميه ثلاثة: ألوهية وربوبية وأسماء وصفات، ماشي. الربوبية والأسماء والصفات بيدخلوه في حاجة اسمها إيه؟ التوحيد الخبري، وتوحيد الألوهية بيسموه توحيد طلبي. هتلاقي الثلاثة فين؟ الثلاث أنواع في الفاتحة؛ ﴿الْحَمْدُ لِلَّهِ﴾ توحيد ألوهية، وبعد شوية: ﴿إِيَّاكَ نَعْبُدُ﴾ برضه توحيد ألوهية، ﴿رَبِّ الْعَالَمِينَ﴾ توحيد ربوبية، ﴿الرَّحْمَٰنِ الرَّحِيمِ﴾ إشارة إلى توحيد الأسماء والصفات. فتلاقوا الفاتحة شملت الدين كله، ولذلك كانت أم الكتاب وأم القرآن؛ لأن معاني القرآن كله ترجع إلى الفاتحة.
ولذلك ورد عن بعض السلف أن الله عز وجل جمع التوراة والإنجيل والزبور في القرآن، وجمع القرآن في الفاتحة، وجمع الفاتحة في ﴿إِيَّاكَ نَعْبُدُ وَإِيَّاكَ نَسْتَعِينُ﴾. وطبعاً ﴿إِيَّاكَ نَعْبُدُ وَإِيَّاكَ نَسْتَعِينُ﴾ ابن القيم له تامل في هذه الآية في كتاب إيه؟ مدارج السالكين، له التامل في الآية في اللفظين دول تامل شديد بقى.
فيَبقى الفاتحة تجمع الدين كله، دي أول حاجة. المساله الثانية أن احنا عاوزين اتكلمنا المرة اللي فاتت على ترتيب نزول الفاتحة حسب النزول، وأنه ليه اقرأ وبعدين ﴿ن ۚ وَالْقَلَمِ﴾ [القلم: 1] على قول، وبعدين ﴿يَا أَيُّهَا الْمُزَّمِّلُ﴾ [المزمل: 1]، وبعدين ﴿يَا أَيُّهَا الْمُدَّثِّرُ﴾ [المدثر: 1]، وبعدين كان الناس يتشوفوا إلى هذه الرسالة الهامة؛ لأنه ابتدى ينذر: ﴿يَا أَيُّهَا الْمُدَّثِّرُ * قُمْ فَأَنذِر﴾ [المدثر: 1-2]، فقام أنذر، ده أنا رسول، فكان الناس مستنية بقا أول حاجة هتنزل إيه؟ فكان الكفار مستنيين يسمعوا -فاكرين الكلام ده قلناه- وقلنا حاجة تانية هتحصل: إنه أول ما هيقوم ينذر إيه اللي هيحصل؟ سيؤذى، واللي أسلموا معاه وهي فئة صغيرة ستؤذى، فلما تؤذى أول حاجة تخاطبهم وتقرع أسماعهم الفاتحة.
بعد هذا الإيذاء الذي سينالهم مع الصدع بالدعوة، وهو الإيذاء ابتدى من أمتى؟ أول ما وقف وتكلم ابتدى الأذا والشتيمه، مش كده؟ جمعتنا تبّاً لك سائراً من أول احنا لسه ما قلناش حاجة، ابتدى يناله أذى، لسه ما نزلش من على المكان اللي هو واقف عليه النبي عليه الصلاه والسلام. فابتدى يؤذى، وابتدى الصحابة يؤذوا يؤذون، فأول حاجة بقى تقرا أسماعهم: ﴿الْحَمْدُ لِلَّهِ رَبِّ الْعَالَمِينَ﴾.
فاحنا عاوزين نقرا الفاتحة بنفسية الكافر، النفسية بس يعني احنا يعني، الكافر اللي هو مستني متشوف، متشوف هو إيه اللي هينزل؟ إيه الرسالة؟ طب أنت قلت لنا أنت رسول وفي رسالة وفي رب، وفي.. قول لنا بقا ده وقت ملخص الرسالة، عاوزين نفهم إحsنا هنشوف إيه معاك. فتنزل سورة الفاتحة، وكذلك نفسية الصحابي، ومن قبل الصحابي النبي صلى الله عليه وسلم الذي يؤذى، ابتدى الإيذاء يظهر والعداوة تبان، فينززل أول ما ينزل سورة الفاتحة: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾ إلى آخر الآية إلى آخر الفاتحة.
طبعاً قبل ما برضه نخش في هذه النفسيات، الفاتحة سبع آيات، وده بالإجماع. البسمله آية من الفاتحة ولا ماهيش آية من الفاتحة؟ خلاف. يبقى هي سبع آيات، ده بالإجماع. طب البسمله آية ولا مش آية؟ بعض العلماء هيقولوا البسمله آية من الفاتحة، فاللي هيعد البسمله آية من الفاتحة هيخلي: ﴿صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ﴾ آية واحدة، يبقى: ﴿بِسْمِ اللَّهِ الرَّحْمَٰنِ الرَّحِيمِ * الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ﴾.
اهدنا الصراط المستقيم صراط الذين أنعمت عليهم غير المغضوب عليهم ولا الضالين.
خلاص دي اللي هتعَد البسملة آية من الفاتحة. اللي هيقول لا البسملة ما هياش آية من الفاتحة، هيخلي صراط الذين أنعمت عليهم آية، غير المغضوب عليهم ولا الضالين آية؛ فتظل الفاتحة برضه آية سبع آيات.
فالبسملة قبل ما نخش على النفسية يعني احنا طبعا هي بسم الله الرحمن الرحيم. أولا يا جماعة الفاتحة احنا قلنا من أسمائها الشافية، من أسماء الفاتحة الشافية، ليه؟ لأنها تستخدم في الرقية وتشفي بإذن الله، وقلنا تشفي دي مش يعني من الصداع لا، السم، تؤثر في السم وفي رواية تانية تؤثر في الجنون، هي الحاجات اللي ممكن الطب الحديث ما يلحقهاش بسرعة أصلا الفاتحة تؤثر في هذا.
كذلك العجيب أن البسملة لوحدها برضه لها بركة. البسملة لها بركة. حديث عجيب جدا أن طلحة بن عبيد الله في غزوة أحد لما كان مع النبي عليه الصلاة والسلام وانفض عنه الناس وبعدين قصة طويلة، المهم واحد من الكفار ضرب إيديه فقطعت صوابعه، فقال حس، أو حس، كلمة بتتقال لما الواحد بيوجع زي أي دلوقتي كده أي أو آه أو كده، فقال صلى الله عليه وسلم: «أما لو قلت بسم الله لطارت بك الملائكة في السماء والناس ينظرون».
فالبسملة لها بركة. والنبي عليه الصلاة والسلام في أكثر من موطن يبسمل على الطعام القليل أو على الشراب القليل فيكفي المئات وربما الآلاف من الناس ببركات البسملة. وهذا مصداقا لقول النبي عليه الصلاة والسلام: «كل أمر ذي بال لا يبدأ فيه ببسم الله الرحمن الرحيم فهو أبتر، فهو أقطع، فهو أجذم» مقطوع البركة.
فاحنا عاوزين نعتاد البسملة بسم الله في أي شيء. في رواية تانية: «كل أمر لا يبدأ فيه بالحمد لله». ولذلك الفاتحة بتعلمنا أدب أنك لما انت تبتدي أي أمر له شأن وله أهمية تبدأ بالبسملة ثم الحمد لله، بسم الله والحمد لله، وذلك الخطب بتبتدي بكده أو الدروس بسم الله والحمد لله تبدأ بالبسملة ثم الحمد لله، فيبقى البسملة تبدأ بها بدءاً حقيقياً والحمد لله بدءاً إضافياً، يعني هي أنت ابتدت بها إضافة لما بعدها أو بالنسبة لما بعدها، فكده ابتديت بالاثنين.
وبعض الفضلاء يقول إن الأمر الذي لا يبدأ فيه بالبسملة والحمد لله وإن تم حساً لا يتم معنى. حد فاهم حاجة؟ يعني ابتدت أمر له شأن وما قلتش بسم الله والحمد لله، وتم لقيته تم عادي وعلى الوجه اللي أنت عاوزه، كده تم إيه؟ حساً، إنما لا يتم معنى أبدا.
مثال: قعدنا في درس وأنا ما قلتش، مش أنا يعني، أي حد، شيخ ما قالش أو يعني ما قالش بسم الله والحمد لله وطلع الدرس جميل، نقول آه الدرس تم حساً، لكن لن يتم معنى. هو أنت عاوز إيه من الدرس؟ أن ربنا يبارك في الدرس والناس اللي تسمع الدرس تستفيد وأنه ينتشر على نطاق واسع وأنه ما تلاقيش ده يحصل. فإن تم حساً لا يتم معنى.
فييبقى احنا عاوزين دائما نسمي الله عز وجل في كل شيء. ويكفي أن أول آية تنزل في كتاب الله عز وجل ويسمعها النبي عليه الصلاة والسلام ﴿اقْرَأْ بِاسْمِ رَبِّكَ﴾ [العلق: 1]. يبقى الموضوع مش بسيط يا شباب، يعني أنتم متخيلين أول آية النبي عليه الصلاة والسلام أول حاجة يسمعها اقرأ باسم ربك؟ يبقى دي مش حاجة بسيطة ولا حاجة سهلة أن احنا نكبر دماغنا منها، يبقى نعتاد أي حاجة بنبتديها بسم الله والحمد لله أي حاجة، ماشي.
فده ما يخص البسملة. احنا هنا طبعا مش جايين نفسر الفاتحة، احنا جايين نتدبر الفاتحة ونقف مع بعض الفوائد في الفاتحة، فاحنا مش جايين نتكلمها في إيه الاسم والاسم هو المسمى ولا غير المسمى ومش جايين نقول ده خالص عشان هنا في كلام كتير ممكن يقال يعني.
ويقال إنه أول واحد قال بسم الله الرحمن الرحيم كان سليمان ﴿إِنَّهُ مِنْ سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ﴾ [النمل: 30]. يققال إن سليمان أول من قال بسم الله الرحمن الرحيم، وكان النبي عليه الصلاة والسلام تقول باسمك اللهم حتى نزل قول الله عز وجل ﴿إِنَّهُ مِنْ سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ﴾ [النمل: 30] فبدأ النبي عليه الصلاة والسلام يقول بسم الله الرحمن الرحيم، يعني هذا مما قيل.
النبي عليه الصلاة والسلام دعا قومه، بدأ الدعوة بدأ النذارة، فالكفار مستنيين يسمعوا بقى رسالتك، وأوذي صلى الله عليه وسلم وأصحابه. فالصحابه مستنيين أول حاجه تقرا أسماعهم بعد ذلك الإيذاء بعد مرحلة جديدة في التدين، في الدين، احنا الأول عارفين النبي محمد عليه الصلاة والسلام وعارفين صدقه وأمانته فاسلمنا ومخبين كده وبتاع ومش عارف إيه، دي مرحلة. في مرحلة تانية ابتدت للتو وهي مرحلة الصدع بالدعوة ومعاها الإيذاء وهنفتیش وراك وهنرکز معاك ومين أسلم معاك وهينالهم الأذى، وده كله حصل احنا مش بنتوقعه ده حصل فعلا.
فتنزل الفاتحة الحمد لله رب العالمين. فايه نفسية الكافر وايه نفسية المؤمن؟ أولا يا جماعة سورة الفاتحة بقى نفسية الكافر وكذلك المسلم يعني في هذه الحيثية لأن الصحابه كانوا حديث عهد بكفر أصلا يعني هم الصحابي ده تلاقيه لسه أسلم من يومين تلاتة من شهر، فبرده محتاج اللي هنقوله ده.
احنا عندنا القضاي الكبرى واحنا ادينا هنا درس باسم سؤال المعنى اللي تدبرنا فيه بدايات سورة الإنسان وقلنا أن هذه الأسئلة الفلسفية اللي شغلت الناس من زمان اللي هو من أين وإلى أين ولماذا؟ احنا جايين منين ورايحين فين وليه موجودين هنا عشان نعمل إيه؟ وهذه الأسئلة تذهل أذهان الكفار، وبعضهم ينكر بعض ذلك، يعني يوم الحساب الآخرة الكفار ما كانوا يثبتوه، مش كده قالوا إيه ﴿إِنْ هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا يُهْلِكُنَا إِلَّا الدَّهْرُ﴾ [الجاثية: 24]. ما فيش آخرة ولا بتاع.
نموت ونحيا يبقى كده بيثبتوا البعث ولا لا؟ إيه رايكم؟ نموت ونحيا، يبقى أثبتوا البعث ولا لا؟ ما علينا ماشي، ده قول قالوا نموت يعني هي شوية بييموتوا وشوية بيتولدوا، يعني هي الدنيا ماشية كده، ده قول.
إيه تاني؟ قالوا إن الواو لا تفيد الترتيب نموت ونحيا يعني إيه نحيا ونموت هي الواو لمطلق الجمع يعني مش مراد بها الترتيب ده يعني نحيا ونموت وما يهلكنا إلا الدهر. أو قالوا إنه نموت يعني الموتة اللي هي العدم الأول اللي هو قبل ما أكون موجود ونحيا وبعدين جينا وبس كده خلاص وما يهلكنا إلا الدهر. فالمهم تاني قال إيه موت ثم بعث ثم حشر إيه؟ أساطير الأولين ما كانوش يصدقوا الحاجات دي، اللي هو سؤال من ثلاثة اهو من أين وإلى أين ولماذا.
فنلاقي الفاتحة بتجاوب على ثلاث أسئلة برضه من أين رب العالمين، ربنا اللي خلقنا، وإلى أين مالك يوم الدين، ولماذا إياك نعبد. فنلاقي الفاتحة تشتمل على إجابة الأسئلة الثلاثة برضه اللي هو من أين وإلى أين ولماذا. وكأن برضه هذه الأسئلة يحتاجها الكفار ويحتاجها المسلمين اللي هم حديث عهد بإسلام اللي لسه ممكن عند بعضهم الإشكالات دي، هو قال لا إاله إلا الله محمد رسول الله، لسه بقى واحدة واحدة بنتعلم فجاءت الفاتحة بهذا الأمر، دي أول حاجة.
الممعنى الثاني، طبعا يا جماعة برده عاوز أقول حاجة إنه الكفار زي ما كانوا بينكروا أشياء أو واحدة من الثلاثة دي، إنما كانوا يثبتون أشياء برضه، يعني رب العالمين دي يثبتونها ولا لا؟ ﴿وَلَئِنْ سَأَلْتَهُمْ مَنْ خَلَقَ السَّمَاوَاتِ وَالْأَرْضَ﴾ [الزمر: 38]، ﴿وَلَئِنْ سَأَلْتَهُمْ مَنْ خَلَقَهُمْ﴾ [الزخرف: 87] فده هم يثبتون ده، ربنا اللي خلقنا وربنا اللي خلق السماوات والأرض فيثبتون دون.
الحاجة الثانية أو المعنى الثاني برضه احنا لسه بنتكلم أن الفاتحة هي أول شيء ينزل بعد الصدع بالدعوة، فعاوزين نعرف أنت دينك ده بيقول إيه؟ أنه كان الناس جواها ميل فطري أن في موجد وخالق لهذا الكون، واللي متبقي أن احنا نبحث هو مين؟
خلي بالكم هنا الآية ما قالتش لله الحمد، مع أني لو أتقالت لله الحمد يبقى فيها إيه؟ تخصيص، يعني في قوة هنا أن لله الحمد وليس لغيره، مش كده؟ فالاية ما جتزتش كده مع أن في القرآن جاءت على هذا النسق، في مش كده فلله الحمد. فجت في القرآن فلله الحمد على وجه التخصيص.
أنما الآية هنا ما جتش كده، جت الحمد لله. فبعض العلماء تدبر معنى هنا عجيب جدا، قال لك إنه لما بيكون أنت مثلا في شيء زي القلم مثلا، قلم ومش عارفين مين صاحبه مش عارفين مين صاحبه، وبعدين واحد جه عرف مين صاحب القلم، فيقول إيه؟ القلم لأحمد. هكذا، يبقى احنا أول ما لقينا قلم كان مستقر في أذهاننا جميعا أن طالما في قلم يبقى ليه صاحب. ماشي؟ فلما يجي واحد مش هيقول إيه لأحمد القلم، مش هيقول كده، هيقول إيه القلم لأحمد، هيقولها كده. يعني اللي أنتم بتدوروا عليه بقى هو أحمد، ده القلم لأحمد.
فبعض العلماء قال إن الحمد لله دي فيها معنى عميق جدا، وهو أنه ربنا سبحانه وتعالى لما خلق البشر، خلقهم بفطرتهم يبحثوا عن إله خالق لهذا الكون، وطالما أنه خالق للكون بصوا بقى التدرج هو الأول خالق للكون ومن الكون أنت، أنت واحد من الكون، وطالما هو اللي خالق وهو اللي مدبر وهو اللي متحكم في هذا الأمر وكذا وكذا وكذا، يبقى هذا يستحق أن يحمد.
فكان ده كله مستقر عندنا واحنا دلوقتي بندور على مين اللي يحمد؟ يعني احنا كان مستقر عندنا أن في حمد لابد أنه يصرف لحد، يصرف لمين بقى؟ فجاءت الآية الحمد لله زي القلم لأحمد كده، الحمد لله.
ولذلك يا جماعة الملحد أنتم عارفين الملحدين هم أقل البشرية، يعني نسبة الملحدين في الكون ممكن تبقى، خلي بالك بتكلم عن الملحد اللي هو بيقول ما فيش إله، أنما اللي يقول في بوذة في إله بس ده بوذة ده مش ملحد هو بيقول إن في إله بس الاله عندي هو بوذة، واللي يقول الإله هو البقرة مش ملحد هو بيقول إن في إله، لا مش ملحد، أقصد بمبدأ أن الإلحاد هو إيه؟ نفي وجود الإله أصلا. أنما معظم البشرية تثبت وجود الإله، تضل بقى في إيه؟ في إثبات ذات الإله، تضل في الحتة دي. أنما الفطرة أن في إله للكون دي الفطرة، وبعدين بقى بندور هو مين الإله ده اللي يستحق الحمد؟ فتأتي السورة الحمد لله، ثم يعرف الله نفسه، الحمد لله رب العالمين، الرحمن الرحيم، مالك يوم الدين، وهنجي للكلام ده.
فكان برضه الحمد لله دي بتجيب على سؤال حير الناس. احنا عشان دلوقتي احنا مولودين مسلمين وخلاص في رب وفي فاحنا الدنيا، أنما الكفار كان في منهم ملحدين؟ آه، كان في منهم ملحدين. وكان في منهم عندهم ارتباك في الإله؟ آه، كان في منهم عندهم ارتباك في الإله، ما هو كانوا يعبدوا أصنام، مش كده؟ وكان منهم اللي لما يعوز حاجة يروح للصنم.
ومنهم اللي لا يعبد الصنم صحيح، لكن يعد لرغبة ورهبة الذي في السماء، كم إلها تعبد؟ قال سبعة، ستة في الأرض وواحد في السماء. قال: من تعد لرغبك ورهبِك؟ قال: الذي في السماء. كان في ناس كده، يعني شركهم بس في الألوهية وفي ناس لا، مش بس دي يعني بنحقر لا، يعني أقصد أقول إن وفي ناس لا يعد لرغبة ورهبة الذي في الأرض لما يعوز حاجة يروح للصنم ويطلبها من الصنم.
فجاءت بداية الفاتحة الحمد لله، فكان هذا السؤال، هذه الآية جواب على سؤال محير، يبقى دي ثاني حاجة.
ثالث حاجة، يبقى ده نفسية الكفار بقى إزاي هتتلقى هذه الآيات، وهنتدبر بقى بقية الفاتحة برضه، يعني احنا احنا بس بنأتأمل الحمد لله رب العالمين الرحمن الرحيم مالك يوم الدين إجمالاً.
المسلم بقى والنبي عليه الصلاة والسلام تخيلوا يا جماعة كده بعد الصدع بالدعوة، الأول الصدع بالدعوة دي ده ربوبية ولا ألوهية؟ ألوهية، لأنه أفعل، مش كده؟ يعني إيه؟ يا محمد قم فانذر. ده أمر اهو مش كده، وامتثاله ده ألوهية، مش كده؟
طيب لما قام أنذر، يعني هو كده امتثل الأمر صح ولا لا؟ امتثل الأمر، حصل له إيه؟ أُذِي بامتثاله للأمر، للأمر أُذي والصحابة حصل لهم إيه؟ أُذوا. تخيلوا بعد ما ده يحصل، أول كلمة يسمعوها في التنزيل الحمد لله.
وبعدين الحمد لله لكونه الله، وقلنا الله يعني ألوهية، لكونه أمر والذي من جملة أمره أن أمر بالانذار وامر بالدعوة اللي أُذي منها دي، اه اللي أُذي منها دي، الحمد لله دي يا جماعة دي كلمة عجيبة جدا جدا هفهمكم ليه دلوقتي.
تخيل كده طلعت بره دلوقتي وأنت إيه أول ما طلعت فاتح الفيسبوك أو الانستغرام أو أي حاجة فلقيت واحد صاحبك جدا كاتب على الفيسبوك أو غيره الحمد لله، مش كاتب حاجة تانية الحمد لله، إيه رأيك صاحبك ده أحدثت له نعمة؟ ممكن. أصيب ببلاء؟ ممكن. الحمد لله كلمة عجيبة، يعني ليه؟ لأنها تقال في كل في كل الأحوال. في كل الأحوال تقال الحمد لله، ما تبقاش عارف هو إيه الحمد لله، يعني نعمة ولا بلاء؟ ولا تبتدي تتصل بقى ما أنت عارف تقول له إيه، يعني يعني ما تبقاش عارف تقول له إيه، ماشي، عارف لو زود بس كلمة صغيرة جنبها تبتدي اه.
يعني يقول لك إيه أخيرا وكذا. يبقى أخيرا الحمد لله، مثلا تبقى عارف إنه فرحان إيه خير وبتاع، وتبقى مبسوط. إنما الحمد لله لوحدها تبقى أنت ما أنت ش فاهم إيه اللي حصل.
فأول كلمة تقرع آذان الصحابة والنبي عليه الصلاة والسلام بعد هذا الإذاء الذي أصابهم من جراء امتثال للأمر الإلهي، الحمد لله. أدب مع الله عز وجل، الحمد لله. يبقى امتثلت الأمر، أصابك ما أصابك، الحمد لله.
طيب، الحمد لله ليه؟ لأنه أمر بده. إيه ده؟ ده أنت أذيت! ما هو ده خير، طالما ربنا اللي أمر بيه فده الخير. فاكرين قصة إبراهيم لما أقول لكم: الله أمرك بهذا؟ قال: نعم، خلاص إذا لن يضيعنا. فاكرين هو كده؟ الحمد لله.
وبعدين ترتيب عجيب جداً يا جماعة. الحمد لله رب العالمين. هو إيه في العقل اللي يوجد الأول؟ الخلق ولا الأمر والنهي؟ في الخارج يوجد الخلق، وبعدين الأمر والنهي، مش كده؟ الله! الحمد لله دي تتعلق بالأمر والنهي ولا بالخلق؟ بسرعة، أمر ونهي. وليه رب العالمين تتعلق بالأمر والنهي ولا بالخلق؟
فتلاقي الترتيب هنا عجيب شوية. الترتيب عجيب شوية، يعني لا، أنت الأول اخلق وبعدين، يعني إيه الحمد لرب العالمين؟ الله، ده الترتيب؟ ما تلاقيهاش كده، الحمد لله قبل رب العالمين! اسرح منها بقى، وساعتها هتبتدوا إيه ده، إيه ده؟ صحيح يعني الرحمن سورة الرحمن، ها، إيه ده؟ ﴿ٱلرَّحْمَٰنُ * عَلَّمَ ٱلۡقُرۡءَانَ * خَلَقَ ٱلۡإِنسَٰنَ﴾. هو إيه اللي بيجي الأول؟ تعليم القرآن ولا الخلق؟ الخلق. طب ليه الترتيب؟
لأن لو تأملنا يا جماعة، حبوا بقى دين ربنا، حبوا الشرع. دايماً نقول اللفظ ده، حبوا الأحكام، حبوا الحلال والحرام. هديكم مثال عشان نفهم. دلوقتي واحد بيقيم شركة، فالشركة يعني بالقياس نحن بنقول إيه؟ خلق وأمر ونهي. فهنقول إن الشركة دي عبارة عن بناء هيتبني، مكان هنشتريه أرض وبعدين بناء يتبني ويتقسم من جوه والديكور، الحاجات دي كلها لو هنسقطها يعني على ولله المثل الأعلى، دي تبقى زي إيه؟ الخلق، مش كده؟
وبعدين محتاجين بوليسي يعني بالعربي، سياسات. سياسات وقواعد تحكم نشاط الموظفين مع بعض، اللي هو إيه؟ واحد ضربك، واحد زميلك في الشغل ضربك، هنعمل له إيه كشركة؟ واحد اختلس، هنعمل له إيه كشركة؟ واحد خلاك تروح الحمام وسرق موبايلك، هنعمل له إيه كشركة؟ احنا هنتصرف إزاي مع المواقف اللي شبه كدة؟
فقبل ما بنعين الناس بنحط إيه؟ سياسات للشركة، قواعد تضبط تعامل الموظفين مع بعض، قواعد تضبط تعامل الموظف مع العميل، قواعد تضبط تعامل العميل مع الموظف. وساعات نعلقها للعميل: إنك ما ينفعش تعمل كذا مع الموظف، ما ينفعش تتجاوز مع الموظف بشكل فلاني، لو حصل كدة فمش هنقدم لك الخدمة. دي كلها توازي إيه؟ الأمر والنهي عند ربنا سبحانه وتعالى، مش كده؟
تخيل كدة بنينا لك بقى الشركة وجبنا الموظفين ودخلناهم من غير لا سياسات ولا قواعد ولا أوامر ولا نواهي، هيحصل إيه في الشركة دي؟ هتنهار، مش كده؟ وأنت كموظف هتبقى بتحمد وجودك في تلك الشركة؟ مستحيل. ولذلك الكيانات الكبيرة وجود السياسات والقواعد والحاجات دي ممكن تكون سابقة أصلاً على أننا ننزل ونشتري وبتاع نبتدي نحط فلوس. إيه السياسة اللي هنمشي بيها الشركة؟ إيه القواعد اللي هتضبط التعامل داخل الشركة؟
ولذلك كان هنا مقدم حمد ربنا سبحانه وتعالى على كونه الله الذي له الأمر والنهي، الذي بهما تضبط الحياة على هذه الأرض، على أنه رب العالمين، إنه خلق. لأنه يا جماعة، الخلق لو لم يسبقه الأمر والنهي اللي هنضبط بيه الحياة، كان زمان الحياة انتهت أصلاً، كان زمان الحياة انتهت. فالحمد لله لأنه الله قبل رب العالمين.
الحمد لله، مين فينا -السؤال ده احنا سالناه قبل كده بس زمان- مين فينا قعد كده وقعد يتامل الأحكام الشرعية ولقى نفسه يقول: الحمد لله؟ الحمد لله على إيه؟ الحمد لله أن ربنا لما شرع الصلاة ما شرعهاش كلها في وقت واحد كده، أي نص نص ساعة عندك فاضية قوم صلي الخمس فروض؟ الحمد لله! والله إيه ده؟ الحمد لله بتصحى الساعة 3 الفجر، آه والله الحمد لله. ليه؟ لما تعرف بقى الحكم.
لما تعرف الحكم -لسه أمبارح في درس كنا بنتكلم على مسألة أن ربنا شرع دائرة المكروهات- طب ليه؟ ما هو المكروه ده اللي هو لو عملته مش هتاخد ذنب، تركته لله تاخد ثواب. طب ليه؟ الحمد لله، ما الدنيا دقت علينا كده أن بقى في دايرة مش هنعملها. نقول لك: لا، ما أنت لما تعرف حكمة ربنا من أنه شرع المكروهات أنك تبقى بعيد عن إيه؟ عن دايرة الحرام، فربنا شرع لك مساحة كده ما تخشهاش، رحمة بك مش تضييقا عليك.
فلما تعرف المسألة دي وتيجي تعمل حاجة يقول لك إيه؟ نقول لك: خلي بالك دي مكروهة، يعني لو عملتها ما فيش مشكلة. لا أقصى -يعني ربنا يكرهها صحيح- لكن لو تركتها لله تثاب، بنحفزك أنك تتركها. خلي بالك دي مكروهة، ما تقولش يو بقى ليه التضييق؟ لا، تقول إيه؟ الحمد لله أن ربنا يعلم أن لو أنا دخلت هنا شوية وهروح للحرام، فبعدك عن الحرام بحته كده سمى لك المكروهات. وقل مثل ذلك في كل تفصيلة، الحمد لله.
فدي أول إيه تقرع آذان الصحابة وأذن النبي عليه الصلاة والسلام بعد الجهر بالدعوة، وبعد ما نالهم من الأذى: يا رب لك الحمد على ما شرعت. ومن جملة ما شرعته أن أنا أجهر بالدعوة، ومن جراء ذلك أننا أذينا، الحمد لله، الحمد لله. فدي فيها تسليم لله عز وجل، وفيها يقين أن ما عند الله هو الخير، حتى لو أنت مش شايف ده.
طيب، وكان السؤال اللي دايماً ياتي في الأذهان هو ليه ربنا سايبنا ليه؟ اللي هو سؤال يعني طبعا ما بنقولش احنا كدة، لكن ده سؤال بيجي في آذان الناس: ليه ربنا سايبنا وسايب المسلمين وسايب مش عارف إيه وسايب؟ عشان هو مش ربك لوحدك. ربنا مش ربك لوحدك، ربنا زي ما هو ربك ما هو رب الثانيين برده. ولو ربنا لو يعجل بعجله أحدنا كان زمان خد الثانيين بس، كان زمان وخدنا أنا كمان. هو أنت يعني هو أنت بتعمل عمل إيه مع ربنا؟ ما أنت برده مليان معاصي، مش كده؟
فرب العالمين دي برده بترد على إشكال عند ممكن عند البعض في حالة الاستضعاف، لما أوذي الصحابة من الكفار ونالهم ما نالهم: طب ليه يا رب؟ أصل هو رب العالمين، هو ربك وربه. وتخيل كده أن أول ما النبي قام عليه الصلاة والسلام ودعى قومه فآذوه، فعاجلهم الله بالعقوبة. كان زمان ما عندناش عمر بن الخطاب، ولا -عثمان- آه وأبو بكر آه، بس ما كان زمان ما عندناش عمر بن الخطاب ولا عثمان بن عفان، هما اثنين من الأربعة الخلفاء الراشدين، ولا بقية العشر المبشرين بالجنة بقى، لأن دول ما أسلموش في الأول. كان زمان ما عندناش دول كلهم، ولا بقى حمزة ولا عاد بقى من هنا لبكرة.
الحمد لله رب العالمين، هو زي ما هو ما هو ربك هو ربهم برده. فأمتى ينزل العقاب وإمتى يأخر العقاب؟ ربنا سبحانه وتعالى لام نبيه على شيء من ذلك، مش كدة؟ ﴿لَيْسَ لَكَ مِنَ الْأَمْرِ شَيْءٌ﴾ أو يتوب عليهم، نزلت في غزوة إيه؟ غزوة أحد، مش كدة يا جماعة؟ كيف يفلح قوم ها آذوا نبيهم كدة أو ولا إيه؟ آه، شجوا وجه نبيهم، حاجة زي كدة يعني.
فالنبي قال كدة عليه الصلاة والسلام، وكأنه دعا عليهم، فنزل قوله تعالى: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ﴾ إلى آخر الآية. وربنا تاب. مين قائد جيش الكفار في غزوة، لا قائد الجيش أبو سفيان، حصل له إيه؟ مين صاحب نصر الكفار في غزوة أحد؟ خالد، حصل له إيه؟ أسلم.
رب العالمين هو مش ربك لوحدك، هو زي ما هو ربك فهو رب اليهود اللي ممكن منهم ناس تسلم بعد كده. طبعا أنت متغاص دلوقتي: إيه ده يسلموا؟ ده معنى عادي ممكن يبقى موجود عند أهل الإيمان. عارفين جبريل قلنا لكم قبل كده؟ فرعون وهو بيغرق قال: ﴿آمَنتُ أَنَّهُ لَا إِلَٰهَ إِلَّا الَّذِي آمَنَتْ بِهِ بَنُو إِسْرَائِيلَ﴾. راح جبريل عامل إيه بقى؟ يجيب من قعر البحر ويديه في بقه. جبريل قال كدة للنبي عليه الصلاة والسلام: لو رأيتني أنا آخذه من حال البحر فأضعه -آخذه من حال البحر فأضعه في مخافة أن تدركه الرحمة-. مش عاوزه يرحم، ما أنت بعد كل ده تقول لا إه إلا الله؟ ربنا طبعا آه عند ربنا ممكن. مش فرعون يعني، أقصد أقول فرعون في الحقيقة خلاص، فرعون كافر بالإجماع وفي النار بالإجماع، ولا إيه رايكم؟ حد هنا بيسمع بيقرا لابن عربي ولا إيه؟
فإنما آه، واحد يبقى أعتى العتاة ويسلم ربنا يقبله، ممكن تبقى أنت متغاظ، مش ربنا يقبله؟ مش كده؟ وحشي جه أسلم، ربنا قابل وحشي ولا ما قابلش وحشي؟ نفسية النبي عليه الصلاة والسلام مش مستحمل يشوف وحشي، ما هو قاتل عمه! فنفسية النبي مش مستحمله ده عليه الصلاة والسلام أن ربنا يقبل وحشي، آه قتل خير الناس وشر الناس. فأنت ما تعرفش.
خلي بالكم، مش عايزين نخرج برة الفاتحة، احنا دلوقتي نفسية الصحابي والفاتحة تقرع أذنه: الحمد لله. يبقى كده بتستحضر أن أحكام ربنا اللي نازلة يحمد عليها سبحانه وتعالى. طب ده احنا نالنا أذى برده، الحمد لله برده. طب ده أنا سبت الشغل لأن الفلوس حرام فأنار دلوقتي الحالة ضيقة، الحمد لله. خلي بالك، الحمد لله ليه؟ مش من حيث الربوبية، من حيث الأمر والنهي. اللي هو أنت شايفه تضييق، اللي هو أنت شايفه هو اللي أدى بحالتك لده، أنت بتحمد ربنا على كونه الله الذي أمر ونهى، الحمد لله.
وبعدين إجابة على سؤال: طب ليه سايبهم؟ أصله رب العالمين، مش ربك لوحدك، ما هوش رب المسلمين، ما هوش رب المؤمنين، ما هوش رب الصالحين، هو رب العالمين سبحانه وتعالى. طب يعني وبعدين يا رب، هيفلتوا؟ مالك يوم الدين. في يوم آخرة، فمش هيفلتوا، فما تشغلش نفسك أنت باللي إيه باللي عليه، وانشغل باللي عليك: ﴿إِيَّاكَ نَعْبُدُ وَإِيَّاكَ نَسْتَعِينُ﴾. ما تشغلش نفسك باللي على ربنا، اشغل نفسك باللي عليك.
إياك تربية يا جماعة للصحابة وتربية لنا في عصار الاستضعاف. الفاتحة تربية لينا وبتعالج مشاكل كلاكيع جوانا، كلاكيع والله يا جماعة احنا لو قراناها هذه الفاتحة حق قراءتها، اطمئنان راحه. تبقى أنت ماذي، اللي بيحصل في غزة واللي بيحصل في لبنان واللي بيحصل في سوريا اتضربت برده من فترة، وتلاقي إيه؟ الحمد لله رب العالمين، الرحمن الرحيم، مالك يوم الدين. في يوم آخرة فما فيش حد هيفلت.
ويوم الآخرة، يوم الآخرة ما فيش بقى حكم يظلم ولا فاجر يلغي. ليه؟ ﴿لِمَنِ الْمُلْكُ الْيَوْمَ﴾؟ ما فيش ملك غير ليه، لا رئيس فيفا ولا غيره، لله رب العالمين. فتطمئن، ما فيش ظلم خلاص، لا ظلم اليوم. ما فيش ظلم، فيطمان قلبك ما فيش حد هيفلت بعملته.
طيب أنا يا رب دلوقتي في الدنيا أعمل إيه؟ أنت مالك أنت بربنا ومالك باختصاص ربنا؟ تتالى ليه على ربنا سبحانه وتعالى؟ ليه بتخش في اختصاصه؟ خليك في اختصاصك: ﴿إِيَّاكَ نَعْبُدُ وَإِيَّاكَ نَسْتَعِينُ﴾. انشغل بقى بعبادته وبالاستعانة بيه. وده كله هنجي له بعدين، يعني احنا بس بنشوف نفسية الصحابي اللي بيقرع سمعه أول حاجه بعد الإيذاء اللي حصل، فاطمأن ذلك الصحابي واطمان النبي عليه الصلاة والسلام.
طبعا قبل مالك يوم الدين الرحمن الرحيم. الرحمن الرحيم نفس المعنى برده اللي هو احنا هنجي لها بعد كده إن شاء الله، بس معنى من معاني إيه الفرق بين الرحمن والرحيم؟ من الفروق بين الرحمن والرحيم مما قيل فيها لغايه ما نجي لها إن شاء الله ونتكلم فيها، أن الرحمن ذو الرحمة الواسعة، والرحيم ذو الرحمة العظيمة. إيه ده؟ إيه الفرق؟ أن الرحمن ذو رحمة ذو الرحمة الواسعة. يعني إيه الرحمة الواسعة؟ خلينا الأول آدي مثال بسيط كده وبعدين نرجع.
دلوقتي لو أنا طلعت من جيبي 100 ألف جنيه ورحت موزع على الناس اللي موجودة، فكل واحد طلع نصيبه من 100 ألف جنيه مثلا 100 جنيه. هنا أنا عطائي واسع ولا لا؟ عطائي واسع، مش كده؟ عطائي لكل واحد عظيم -قلة الأدب دي عظيم، طبعا- عطائي لكل واحد مش 100 جنيه يعني، إيه مش قضية يعني. فعطائي واسع صحيح، عم الكل العطاء، مش أنا عم كل، لا، العطاء عم يعني عم الجميع، لكنه لكل واحد ما هواش عطاء عظيم، كل واحد في الآخر أخد 100 جنيه.
طيب لو أنا طلعت ال 100 ألف جنيه ورحت مشاورك، قلت له: تعال خد ال 100 ألف جنيه! عطائي واسع، عطائي عظيم! فهمتوا الفرق بين أن الرحمة الواسعة والرحمة العظيمة؟ ربنا بقى رحمن، رحمته واسعة؛ ورحيم، رحمته عظيمة.
طب رحمته واسعة؟ يبقى تشمل الكل، تشمل المسلم والكافر، لأنها واسعة. فمن رحمته بالكافر مثلا أنه سايبه عايش، دي من رحمته بالكافر أنه بيرزقه، من رحمته بالكافر أنه يمهله، رحمه، ولو شاء ما كانش عمل كده سبحانه وتعالى.
طب رحمته العظيمة بقى؟ لكل الناس؟ لا، ﴿وَكَانَ بِالْمُؤْمِنِينَ رَحِيمًا﴾ مش رحمن. كان شيخنا ربنا يحفظه يقف يدعي في رمضان وبكاء يشتد في الحتة دي، والناس اللي مش فاهمه مش فاهمه هو بيعيط ليه، فكان يقول: اللهم إن لم ترحمنا يا رحيم فارحمنا يا رحمن. فهمتوا؟
يعني كان شيخ يرى، إيه؟ إذا ما كناش أهل إن إحنا ندخل في رحمتك العظيمة؛ لأننا ما احناش أهل إيمان، وأهل تقوى، وأهل صلاح، فارحمنا يا رحمن، أنت يعني رحمتك واسعة، فاشملنا برحمتك؛ لأنك رحمن. فهمتوا؟
طبعا اللي مش فاهم يقول لك هو بيعيط ليه؟ ويا رحيم، ورحمن. فبرضه نرجع بقى تاني، دي ده معنى طبعا، وفي كذا معنى الرحمن الرحيم، الفرق بينهم يعني نتعرض لهم بعدين إن شاء الله. إنما من المعاني بقى، إن الكافر، إن المسلم وهو بيسمع الكلام ده وهو مؤذي وهو في حالة استضعاف، فتلاقي إيه؟ طب يا رب، أنت ليه يا رب ما أخدتهمش؟ ليه يا رب ما تنزلش عليهم؟ ليه يا رب ما تعملش فيهم؟ فيتقال لك: أصل هو رب العالمين ورحمن. طب يعني أنا زيهم؟ لا، هو رحيم.
فرحمن دي تجاوب على سؤال: أنت ليه سايبهم؟ ورحيم تجاوب على سؤال: يعني إحنا بقينا زي بعض خلاص؟ لا، هو رحمن فسايبهم، وأنت من أهل الإيمان ومن أهل الصبر وأهل الرضا، فهو رحيم سبحانه وتعالى. مالك يوم الدين؛ تطمن بقى.
ناقص قد ايه كده؟ في أسئلة ولا؟ إحنا كده قد ايه وقت؟ خمسين دقيقة. ساعة إلا خمسة. نكمل ولا نشوف أسئلة؟ بحس إن أسئلتكم مهم، يعني الناس بتبقى حريصة على الأسئلة ولا إيه رأيكم؟ طيب، أقول قولي هذا، واستغفر الله العظيم لي ولكم. نشوف شوية أسئلة.
السؤال ده مهم: كيف السبيل إلى التفكر والتدبر في آيات الله؟ أنا ليه بسأل السؤال؟ ليه بقرا السؤال ده؟ بعض الشباب يتحمس في مسألة التدبر دي، ويخرج إلى ما لا ينبغي. يا جماعة، يا جماعة، عشان الإنسان يبدأ التدبر في كتاب الله عز وجل، لابد أن يكون محصل لقدر من اللغة، بوعلوم اللغة بقى، يعني مش بس نحو، لا، يبقى فاهم نحو بقدر، وفاهم بلاغة بقدر، وفاهم علوم اللغة كتير.
دي حاجة، تاني حاجة: يبقى عد على أقوال المفسرين في الآية. يعني ما ينفعش بعض إخواننا الشباب يروح عامل إيه؟ يقول لك: إحنا هنجلس جلسة تدبر يمين مع بعض، وكل واحد فاتح المصحف ويقرا، يقول لك: أهي حسيت إيه؟ أحكي لنا كده عن ال... أحكي لنا عن إيه؟ أنت بتتكلم عن كلام الله عز وجل؟ فدي جرأة، وقد يأثم من يفعل ذلك، قد يأثم.
أنتوا لو تلاحظوا إن الدروس بتاعتنا معظمها في فلك القرآن، أنا قبل ما أدي درس في القرآن، أفتح ما لا يقل عن عشرة التفاسير من اتجاهات كتير، يعني مش كلها مدرسة واحدة في التفسير، تفسير مدارس؛ عشان أجمع على قد ما أقدر كل ما قيل في الآية اللي أنا جاي أتكلم عنها. ما فيش جرأة اللي هو أنا بدماغي أنا هطلع ومش عارف، لا، ما فيش كده. وأسمع كمان الناس المتمكنة في التفسير، أسمع برضه مش بس أقرأ.
فما تتجراوش على كلام ربنا. أي أرض تقلني، وأي سماء تظلني إن قلت في كتاب الله بغير علم؟ مين اللي قال ده؟ سيدنا أبو بكر. سيدنا أبو بكر بيقول الكلام ده، ماشي.
حضرتك ممكن تخاطب أولياء الأمور؟ يسروا الزواج على الشباب؛ لأن الوضع بقى صعب. أنا ما اعرفش الجواز ده دماغكم ليه؟ لو راتبي عشرة آلاف مثلا، ما شاء الله، أنت غني، هتجوز إزاي؟ أجلددهم يا مولانا؟ يسروا يا جماعة على الشباب. وأعظم النساء بركة... ها؟ أه، فالمرأة كل ما كانت يعني ما... ما يسروا على الشباب، ربنا يبارك في الزيجة، لكن اختاروا الرجالة؛ لأن في ناس شباب قلة الأصل، وقلة الرباية، وقلة الدين، لما يلاقي إن الدنيا سهلة، يلعب ببنات الناس، ويلاقيها إيه، الموضوع بسيط وسهل، فخلاص نلعب شوية ونرميها عادي. فبرضه اختاروا الشاب خارج من بيت ليه حد كبير يرجع له، ودايمًا أنا بقول ده، بقول إن أهم حاجة في الزواج أن يبقى الشاب أو البنت -لأن برضه في بنات مالهاش كبير، يعني أمها تقول لها حاجة ولا في دماغها أمها ولا في دماغها أبوها، واللي في دماغها هتعمله- أهم حاجة في الجواز يبقى الطرفين كل واحد ليه كبير، ودايمًا أبالغ في الحتة، يقول يعني إيه ليه كبير؟ يعني في حد لو قال له ارمي نفسك في البحر، هيرمي نفسه في البحر.
فما يجي الشاب يدخل، يتقال له أنت مين كبيرك؟ والبنت مين كبيرك؟ عشان وقت المشاكل هم الاتنين عيال، هنقعد بقى إحنا مع عيال صغارة، ده قرصني، دي بصت لي، دي عملت لي، دي عملت لي. طب يا ابني، ما ينفعش، يقوم ماشي وسايب الجلسة. ده بيحصل، عيل صغير لا تربى ولا فاهم يعني ايه كبير بيكلمه، فلو الحكم مش على هواه، يقوم ويسيب المجلس عادي جدا، والبنت برضه كده، لا ما ينفعش. أنا بقول لكم ده من واقع الحياة، ها، اللي بنشوفها، الجيل الجديد طالع كده دلوقتي.
فأنت مين كبيرك؟ يعني إيه كبيرك؟ يعني لو قال لك ارمي نفسك في البحر هترمي نفسك في البحر؟ ما فيش نقاش. فكبيره ممكن يبقى أبوه، ممكن يبقى عمه، خاله، شيخه، المهم ليه كبير. يوم ما هيحصل مشكلة مش هلاقي بنتي راجعة لي ومش عارفة أتكلم، عيل صغير، عيل عنده عشرين سنة ولا اثنين وعشرين سنة، وأنا راجل عندي خمسين سنة ستين سنة، لا محترمني ولا بيرد عليا، وبيعمل لي بلوك ويقفل في وشي. فبرضه يعني اللي باعت الرسالة دايمًا بيبقى الشخص شايف الموضوع من من ناحية واحدة دايمًا، هو عاوز أتجوز وخلاص، وبعدين بقى إحنا ايه يحصل اللي يحصل.
ولي الأمر هو خايف على بنته برضه، خايف على بنته، فولي الأمر بيشوف إن شوية ضمان للبنت، أنه طالما تعب وجاب وصرف، هيبقى الولد حريص على أنه يحافظ على التعبة ده. تفكير أولياء الأمور، أنا مش بقول ده صح ولا غلط، أنا بقول لكم شوفوا وجهة النظر الأخرى عاملة إزاي. هنا ما بتكلمش عن اللي تفكيره غلط من أولياء الأمور اللي هو إيه: لازم تبقى زي بنت خالتها، ولازم، وإن كان ده له يعني وجه في الشرع، إنما أقصى مش بتكلم على اللي بيغالي جدا، لا، بتكلم على إنه تفكيره إن نتعبه؛ عشان لما يتعب يقوم يحافظ على تعبه ده.
عارفين في مثل إنجليزي يقول لك إيه؟ إيزي كم إيزي جو، اللي يجي بسهولة يروح بسهولة، أما لما تبقى تعبان في في الحاجة تقوم تحافظ عليها. فإحنا بنقول إيه دلوقتي؟ أولياء الأمور يسهلوا، والشباب يبقوا رجالة وعارفين قدر... يعني أنا أقول لكم حاجة، لما رحت أنا أتجوز، فحماي يسر جدا عليا، وفضل لغاية وقت العقد ما تكلمش في مؤخر ولا ما تكلمش في حاجة، وأبو... أبويا اتشال وتحط، هو جايبها بيحرجنا، يعني وقت ما هيقول بقى المؤخر وبتاع لازم نعرف، فرحت لحماي قلت له، قال: لا، ما فيش مؤخر ولا حاجة، ويسر جدا في كل حاجة. أنا متجوز بقالي قد إيه دلوقتي؟ حاجة وعشرين سنة. لغاية النهارده، لو في أي مشكلة حصلت مع زوجتي، أشيلها لحماي الحركة دي، وأقول: هو لما اتعامل معايا، اتعامل معايا أن راجل، وإن ما ينفعش أنا إيه يعني أ... يعني أخسره. عادي، ممكن لكل بيوت يحصل فيها مشاكل، فألاقي ذهني على طول لغاية النهارده بفتكر الحركة دي. في عيل تاني بقى يقول لك: مالهاش مؤخر؟ عادي، ارميها و... دي مش مروءة، دي مش مروءة. طب مين النهارده بيتعامل بالمروءة؟ المروءة المفروض كلنا، المفروض الناس الدينة يبقى عندها المروءة، وعندها الأخلاق، وعندها... عندها المعاني دي. للاسف ده ما بقاش موجود كتير.
ماشى يا سيدي، حاضر. اتفضل، ما هو ما فيش حد عاوز يأذن.
الله أكبر، الله أكبر.
بيقول: أنا شغال في مصنع، وأغلبية اللي فيه بيسبوا الدين، وصاحب الشغل بيسب الدين. حكم الشغل في هذا المكان؟ يعني لا يرقى للحرمة الشغل في هذا المكان. لا، ما نقولش إنه حرام، لو في مكان تاني يبقى ناس عندها قدر من الدين، طبعا تشتغل معاه ده أولى. اللي هيسب... يعني برضه تنبههم أن سب الدين حرام، وأنه كفر، ولا إيه رأيكم؟ كفر. كفر. يعني لو بيسب دين الإسلام، كفر طبعا. حد بيسب دين الإسلام، ده كفر. إنما اللي... اللي بيسب الدين بيبقى يقصد دين الإسلام، ولا لو جيت وقفت قلت له: أنت بتشتم الإسلام؟ هيقول لك: إسلام يا عم؟ أنا بشتم الراجل اللي قدامي. كده ولا ايه؟ يعني يظهر أن مجرد سب الدين ما هواش كفر في... يعني بمجرده كده، ماشي.
فهو بيقول له: كذا دينك أو كذا، مش عارف إيه، هو يقصد يشتم الراجل، مش الدين اللي هو الإسلام. ده الظاهر، والله أعلم، يعني يعني نسبة اللي أكدتها أقول للصفر أن واحد يكون عاوز يشتم الإسلام، اللي هو دين ربنا، ولا إيه رأيكم؟ أنتو كفراتية ولا إيه أنتو؟ فهو في كل الأحوال حرام طبعا، يعني مش بنقول إنه... بنقول كفر ولا مش كفر، يعني مخرج من الملة. فأول ما نشوف واحد بيسب، نقول له: أنت كافر، يلا روح بقى. لا، يعني يظهر أن مش كده قوي، وفي الحديث: «إذا جاءكم من ترضون دينه». دينه دي يعني إيه؟ يعني لو مسلم، خدوه، لو بوزي لا. ولا هو أصلا مش هيجي غير وهو مسلم أصلا؟ ماشي، غير هو مسلم، صح؟ يبقى إيه معنى ترضون دينه؟ يبقى دي دينه، يعني إيه؟ التزامه هو أو تعامله هو أو تعاطيه هو مع الدين، فاهمين؟ فما يجي يقول له: كذا دينك. مش دينك اللي هو الإسلام، هو يقصد تعاملك أنت. ده كله حرام، كل ده حرام، ماشي.
انما أتعامل بقى معاهم إزاي؟ تنكر عليهم. روح بلّغ الدين أنت كمان.
محتاجين حكمة بقى في التعامل معاهم، عشان يعني ما تقولوش وهو متنرفز وبيسب الدين، تقول له: أنت مش عارف، يروح... واحد من مشايخنا رحمه الله، وهو معظم في منطقته، الصوت يا جماعة، الصوت! هو معظم في منطقته، يعني وحاجة كبيرة، له قدر، وبعدين واحد جزار بيتناقش ورافع الساطور وبيسب الدين للي قدامه. طبعا الشيخ لو دخل، الساطور ينزل عليه على طول، فقال له: ده أنا هطلع، وراح إيه، فراح الشيخ قال له: على مهلك دوده يا معلم، تعال بس اهدى كده. فالتاني طبعا لقي مكبره معاه، والشيخ كبير في المنطقة، يعني مش حاجة، فلقى الشيخ معظمه، فاحترمه، قعد، هداه وبتاع، وبعدين قال له: بس، هو ينفع أن يسب الدين؟ قال له: استغفر الله العظيم، عندك حق يا عم الشيخ. فالموضوع محتاج شوية إيه؟ حكمة يعني. إمتى أتكلم، وإزاي أتكلم، والشخص ده يتكلم معاه إزاي؟ غير... يعني صاحب العمل هتكلم معاه بطريقة، غير الموظف اللي تحتي وأنا رئيسه هتكلم معاه بطريقة تانية. محتاجة حاجة شوية توفيق من الله، طبعا أولا، وحكمة.
حذر الشباب من تطبيقات التعارف التي تسمى بغير اسمها المنتشرة حاليا. طب نعرفها إزاي طالما بتسمى بغير اسمها؟ إيه تطبيقات التعارف؟ بيقول بتسبب ضياع، وهناك كبار وشباب بيستخدموها. إيه تطبيقات التعارف؟ تقصد إيه بتطبيقات التعارف؟ مش عارفها أنا، تطبيقات التعارف بتظهر، بيتعمل إيه فيها تطبيقات التعارف دي؟ تبقى باينة على أنها حاجة بس إيه، بيعملوا إيه فيها؟ بيتعرفوا على بعض يعني. اللي تعرفوا... مش عارفها أنا، مش هعرف أحذر من حاجة ما اعرفهاش، أدخل فيها أشوف الأول.
إزاي أحفظ حفظ القرآن مع عدم الفراغ زي في الدراسة؟ أنت متأكد بخطك ده أنك في الدراسة؟ خليك مع شيخ ما، مش هتحفظ لوحدك. خليك مع شيخ وربنا يوفقك إن شاء الله.
واحد أمه وأخته متبرجات، يخرج معاهم للتنزه. هو بيبقى ثقيل على قلبه إنه يعمل ده، لكن أبوه بيزعل وبيطلب منه ده، وبتهمه إنه السبب فيه، أبوه بيتهمه بتفريق الأسرة، أن هو مش بيخرج معاهم وأمه وأخته متبرجات. ادعي لهم كتير ربنا يهديهم، واخرج معاهم، ما تفرقش الأسرة. لو المكان اللي أنتوا رايحين ما فيهوش محرمات تانية يعني تأذيك، اخرج معاهم وبين لهم حبك ليهم وخوفك عليهم، وادعي لهم كتير، ويشوفوا بكائك بالليل، ونهنهتك، صوتك بتعيط بالليل في الصلاة وأنت بتدعي لهم، يشوفوا ده منك. بلاش التعامل بقلب قاسي كده، الشباب بيبقى إيه قلوبهم، معرفش جايبين القسوة دي منين الصراحة! لو شافوا ده منك، أكيد يعني هيرفقوا بيك، وربنا يفتح قلوبهم إن شاء الله.
ذهبت لخطبة بنت أنا حاسبها ملتزمة، قعدت معاها ورتبت ترتيبات يعني، وكانت مبهورة بيا ليه؟ إن شاء الله. وفجأة قالت: مش موافقة. أهو كده. بعد ما قالت لي: اعمل، اعمل أي حاجة عشانك، وكلام حلو وكده. وده خلاني أتعهد من الصنف كله؛ لأنها لأنها أول تجربة ليا، فإزاي أختار صح بعد... يعني أنت قعدتوا مع بعض، قالت لك: أنا أعمل أي حاجة عشانك، وكلام حلو، وأنتم ملتزمين أنتم الاتنين. ده مشهور فيكم ده، الأجيال الجديدة دي مشهور كده.
وإزاي أختار صح بعد كده؟ ولو تعرف يا شيخنا ممكن ترشح لي بيت كويس؟ ده رقمي. عاوزين نعمل إن شاء الله حملة نشوف نجوز الناس لبعضيها، يعني نشوف إن شاء الله، كنا عملناها قبل كده يعني، نجيب زي كيو آر كود كده ونحط، تملوا بقى البيانات بتاعتكم، ونوفق راسين في الحلال إن شاء الله، ممكن نعمل ده إن شاء الله.
نفس الكلام، إزاي أختار زوجه صالحة في ظل أخلاق البنات دلوقتي؟ تسعين في المية من البنات مناظرهم وأخلاقهم... إيه؟ شكله بيشتم، مش عارف. يعني أكيد يعني أكيد مش تسعين في المية حاجة حلوة يعني، طالما هو عاوز، أنا وشباب كتير زي، قربنا نتعقد من اللي بنشوفه. ده حقيقي فعلا.
ماشي، برضه نعمل إلّاكيد البنات لو بعتوا هيقولوا نفس الكلام، يعني انتوا بس حظكم أن انتوا قاعدين قدامي فالأسئلة بتوصل، نبقى إن شاء الله نشوف طريقة نجوزكم.
والدي دايماً بيتكلم عن والدتي بطريقة بتأذيني نفسياً، بيشتم فيها وفي أهلها لحد ما للأسف انفعلت عليه، والظاهر كده خلصت وبعدين واعتذرت له، يعني مش انفعلت عليه واعتذرت له لا يعني انفعلت عليه الأول وبعدين اعتذرت له بعدها وهو سامحني لكن مش عارف أتعامل معاه من بعدها، يا دوب بسلم عليه ومش قادر أقعد معاه، تنصحني بأيه؟
يعني ذكر نفسك باللي والدك عمله لك وإنه تعب عشانك، طبعا الخلاف بين والدك ووالدتك ده مش محله دلوقتي إن أكلم والدك، والدك مش سامعني. لكن أنت فكر، ذكر نفسك بأنه له حق عليك وإنه رباك وإنه صرف عليك وإنه تعب عشانك. دائماً نفسية الواحد بتميل للأضعف، دي فطرة كده؛ عارفين زمان كان فيه حاجة اسمها مصارعة حرة، ما أعرفش موجودة ولا لا وأحنا صغار، فيبقى أحنا كنا نجي نتفرج على المسارعة الحرة دي لا عارفين ده ولا ده، بس تلاقي نفسك من جواك عاوز اللي اتضرب في الأول هو اللي يكسب في الآخر، ما تفهمش أنت، ما تعرفش لا ده ولا ده، بس مجرد إن ده في الأول كان يعني مستضعف وما فيش حد غلبان في الآخر هما الاثنين ما شاء الله يعني فحول، تلاقي نفسك من جواك كده نفسك إيه الثاني ده يضرب ضربة، فرحان قوي، طيب أنت فرحان ليه؟
فلان، الست في الغالب برضه أضعف، في ستات طبعا جبروت بس في الغالب الست أضعف، فتلاقي دايماً الأبناء يميلوا ناحية الأم. ده مش معناها إن الاب, وأنا ما لوش دعوة بالحالة دي، أنا بشرح لكم نفسيات الأبناء بتبقى عاملة إزاي، فتلاقي دايماً الابن يميل ناحية الأم لأنه شايفها هي الطرف الأضعف في الغالب يعني، في الغالب ده أنت ما تدخلش فيه خالص. أنت كابن عليك أنك تبر والدك وتبر والدتك، ووالدتك زي ما والدتك تعبت عليك جوه البيت فده أنت شايفه بعينيك، والدك بيسف التراب بره البيت ده أنت مش شايفه، ما أنت شايف هو بيستحمل إيه في شغله وسخافات عاملة إزاي من المدير وسخافات عاملة إزاي من الزملاء، وده كله علشان في الآخر يجي لك آخر الشهر يوفر لك احتياجاتك، فله حق عليك أنت تؤدي حقه وتبره وتدعي ربنا ربنا يصلح بقى أحوالهم الاثنين.
في وقت لسه ولا خلاص؟ صديق ينكر حد السرقة ويقول إنه غير آدمي للتطبيق، فما الرد عليه؟ اسرق منه حاجه. ما بهزرش دلوقتي، استنوا بس، مش يسرق بس دايماً اللي بيعمل حاجات زي كده هو مش مستوعب حكمة الشارع في ذلك، أول بقى ما يناله هو الموضوع ممكن يروح يقتل، يعني هو ده بيقول لك حد السرقة مش عارف إيه، هو حد السرقة ليه شديد؟ لأنه ربنا هنا بيحمى إيه؟ ممتلكاتك أنت. فاهمين يا جماعه؟ يعني ربنا ما خلاش ده مثلاً حد منع الزكاة، ما خلاش ده حد الامتناع عن الصوم، بلاش الزكاة كمان لأن فيها حقوق عباد يعني، أن الصوم اللي هو بينك وبين ربنا ربنا ما خلاش إيه حد منع الصوم قطع اللسان مثلاً أو قطع الإيد أو ما خلاش كده، مش كده؟ إنما خلى ده حد السرقة.
هتلاقوا معظم الحدود لها تعلق مش بربنا، بالناس؛ ربنا بيحميك أنت، فتلاقي في حد القذف، وفي حد الزنا، وفي حد السرقة، وهكذا، فكلها لحمايه الناس. فاللي بيقول لك ده شديد قول له ما هو بقيه القوانين ما منعتش السرقة، لكن الحرامي لما يعرف إنه لو اتمسك هتتقطع إيده يرتدع، مش كده؟ فدي الحكمة. في درس أنا كنت عامله عشان الناس تحب الحدود يعني تفهم حكمة الحدود فتشوف الحدود بمنظور تاني، كان في سلسلة سورة النور قبسات نور، مش فاكر إنهي واحد، يعني يا الأول يا الثاني، غالباً يا أول درس يا تاني درس، اسمعوا الاثنين، يعني أنتوا وراكم؟
اسمع بقى الدرسين دول بس مش هتلاقيهم على اليوتيوب، لأن إحنا سورة النور ابتدينا تصوير من نصها تقريبا، هتلاقوه على التليجرام أو أي قناة بقى منزلة الدروس صوتية يعني، ماشي، قبسات نور واحد واثنين اسمعوها.