الشيخ أمجد سميركنا قلنا المرة اللي فاتت لو تفتكروا، قلنا لكم إن الفاتحة احتياج، وكون الرب سبحانه وتعالى شرع لنا وجوبا أن نقراها في اليوم والليلة سبع عشرة مرة، ذلك لأننا نحتاج للفاتحة. ويمكن الححة دي ما كانتش واضحة قوي وهي بداية درس اليوم أو انطلاقته، الدرس منها: قلنا لكم مثال إن أنت النهارده فطرت وتغديت أو هتتغدى، وبكرة هترجع تفطر وتتغدى، وبعده هترجع تفطر وتتغدى، وهتفضل كل يوم بتفطر وتتغدى؛ ده لأن هذا الغذاء يسد احتياجا عندك، أنت محتاج لهذا الغذاء، فبتلاقي نفسك بتتناول هذا الغذاء وأنت مبسوط بيه؛ لأنك فاهم إنه بيسد احتياج عندك.
ممكن الشيء اللي بيكون بيسد احتياج عندك ما يكونش على هواك قوي، مثلاً زي الدواء، لكن بتجبر نفسك عليه؛ لأنه برضه بيسد احتياج، أنت محتاج إنك تخف فبتاخد الدواء، تاخده النهارده وبكرة، ولو مرض مزمن بتفضل مواظب عليه خصوصاً لو قطعته فترة وحصل لك انتكاسة، فبتمشي على الصراط المستقيم بعد كده؛ ليه؟ لأنه احتياج.
وممكن يبقى عندك احتياج وأنت غافل عن الاحتياج ده، أنت غافل عنه، عن هذا الاحتياج، فلذلك بتهمِل فيما يسد ذلك الاحتياج عندك. فممكن يبقى عندك احتياج وأنت غافل عن هذا الاحتياج، فما انتش دريان إنك محتاج لكذا فغافل عنه خلاص؛ زي مثلاً واحد عنده مرض لكن كامن، ما هواش عارف أن عنده المرض الفلاني. كتير من الناس يكتشفوا مرض ويمكن خطير، وهم رايحين يكشفوا على حاجة تانية، فبالصدفة يطلع في التحاليل مش عارف إيه وفي مرحلة متأخرة، ولو كنا اكتشفنا بدري كنا عالجنا. طب أنت ليه ما أخدتش علاج؟ ما هو أنا ما كنتش أعرف أن عندي الاحتياج ده، ما أعرفش فأنا غافل عن الاحتياج.
فالفاتحة، إحنا محتاجين لها يا جماعة، إحنا محتاجين الفاتحة، ومحتاجين الفاتحة بتكرر. وربنا سبحانه وتعالى لما يختص الفاتحة دون غير الفاتحة -عندنا مائة وأربع عشرة سورة في القرآن- يختص الفاتحة أن تكون السورة الوحيدة اللي يجب أن تحفظها؛ لأنه يجب أن تقراها، وبعدين ما تجيش تقرا في اليوم مرة مثلاً؛ إحنا عندنا سور تقرا لا على الوجوب كمان -يعني مش على الوجوب، ده مستحب، يعني لو سبتها ما فيش مشكلة- فتلاقيها بتتقرى في اليوم مرة مثلاً، زي سورة الملك مثلاً لما تنام، أو آية الكرسي تقرا خمس مرات بعد الفروض، خمس مرات، ده كله مع الاستحباب كمان، يعني لو ما عملتهاش لا تأثم. أو كل أسبوع، زي سورة السجدة مثلاً في فجر الجمعة.
إنما تيجي السورة تلاقيها بتتقرى وجوبا سبع عشرة مرة. طب واستحبابا؟ كم مرة؟ ما لهاش عدد، مش كده؟ واحد قام الليل بمائة ركعة، هيقرا مائة فاتحة. واحد وقف يصلي نفل مطلق، نفل كده بالنهار مائة ركعة، هيقرا مائة فاتحة. واحد قاعد يقرا الفاتحة من غير صلاة أصلاً، يستحب، هي من جملة القرآن يعني ويثاب عليها؛ فاستحبابا عدد لانهائي، ووجوبا سبع عشرة مرة؛ ليه؟ لأننا محتاجين الفاتحة. ومن احتياجنا للفاتحة، وده درس النهارده بقى، إن الفاتحة من أسمائها الشافية والرُّقية. الشافية والرُّقية؛ ليه اسمها الشافية؟ وليه اسمها الرقية؟
لأن في قصة حصلت فسموا الفاتحة الشافعية وسموها الرقية، وفي حديث روي عن النبي عليه الصلاة والسلام في كونها الشافية. طبعا القرآن كله شفاء، كما أخبر بذلك ربنا سبحانه وتعالى: ﴿وَنُنَزِّلُ مِنَ الْقُرْآنِ مَا هُوَ شِفَاءٌ﴾ [الإسراء: 82]. على أن (من) دي للتبعيض ولا (من) للجنس؟ يعني من القرآن يعني بعض القرآن شفاء وبعض لا؟ ولا (من) دي لبيان الجنس فيبقى كل القرآن شفاء؟ القولين موجودين، لكن في الآخر هي الفاتحة من جملة القرآن كده كده وهي شفاء.
فإحنا محتاجينها ليه؟ أولا محتاجينها أنها تكون شفاء من أمراض البدن، واللي هقوله ده هنيجي عليه إن شاء الله، فمين فينا ما بيمرضش؟ يعني مين فينا من أول ما اتولد لغااية ما هيموت لن يمرض؟ ما فيش، من جملتي الدواء الناجع، وده هنيجي له بالتفصيل ونشوف الفاتحة. فأنت محتاج لها، ومحتاجين لها لأنها شفاء من أمراض القلوب والنفوس. ولو هنرتب كده، فهذا أعظم الدائين، يعني لو قلنا إن في داء يصيب البدن وداء آخر يصيب القلب يصيب النفس، أيهما أعظم؟ داء القلب أعظم؛ ليه؟ داء البدن آخرته إيه؟ يعني هيتلف البدن، تخسر دنيتك وتموت. داء القلب هتخسر إيه؟ آخره لما تموت وفي قلبك رياء، لما تموت في قلبك عجب وكبر، بتخسر آخرة، مش بتخسر دنيا. فهذا أعظم الدائين، والفاتحة شفاء من هذا وذاك.
قال صلى الله عليه وسلم فيما روي عنه: «فاتحة الكتاب شفاء من كل سم».
وفي قصة عجيبة جداً، وتعالوا نتامل بقى القصة -أشرنا إليها في أول درس بس ما قريناش الحديث- عاوزين بقى نقرا الحديث ونتأمله: انطلق نفر من أصحاب النبي صلى الله عليه وسلم في سفرة سافروها حتى نزلوا على حي من أحياء العرب فاستضافوهم فابوا أن يضيفوهم -يعني استضافوهم، الألف والسين والتاء تفيد الطلب في اللغة، يعني طلبوا أن هم يضيفوهم فابوا، وكانوا بخلاء، كان عندهم بخل- قالوا لهم: لا، مش هنضيفكم. فلدغ سيد ذلك الحي. قال: فسعوا له بكل شيء لا ينفعه شيء، يعني كل الأدوية اللي العرب معروفة عندهم، والعرب بالنسبة لهم اللدغ ده متكرر، يعني أنت النهارده لو لدغك تعبان ممكن تعيش وتموت ما تشوفش حد لدغ تعبان أصلاً مش كده، العرب مش كده، العرب اللدغ عندهم هم أصلاً أهل بدو وأهل صحراء، فمعتادين إن اللدغ ده يحصل، وليه بقول ده؟ اللي معتاد على ده يبقى فاهم الدواء كويس. جربوا معاه كل حاجة ما فيش حاجة نافعة.
قال: فقال بعضهم: لو أتيتم هؤلاء الرهط الذين نزلوا -الناس اللي جه ودول واستضافونا وما رضيناش نضيفهم- لعله أن يكون عند بعضهم شيء. فاتوهم فقالوا: يا أيها الرهط، إن سيدنا لدغ، وسعينا له بكل شيء لا ينفعه، فهل عند أحد منكم من شيء؟ فقال بعضهم: نعم والله إني لأرقي، ولكن والله لقد استضفناكم فلم تضيفونا، فما أنا براق لكم حتى تجعلوا لنا جعلا. ما عملتوناش صح من الأول فهي خلاص بقى إيه أرقي يعني هتدوني حاجة. فصالحوهم على قطيع من الغنم. سيد القوم بقى فادوهم إيه؟ قال لهم: خلاص لو خف، لكم قطيع من الغنم.
فانطلق يدفل عليه ويقرا الحمد لله رب العالمين، يقرا الفاتحة ويدفل عليه من بركتها؛ لأن هذا اللعاب يختلط بالقراءة، يختلط بالقراءة فينال من بركتها فكانما نشط من عقال -كأنك كنت رابط واحد وفكيته- قام سيد الحي قام كأنما نشط من عقال، فانطلق يمشي وما به قلبه -يعني ما فيهوش داء خلاص-.
قال: فأوفوهم جعلهم الذي صالحوهم عليه، فقال بعضهم: اقسموا -يعني نقسم بقى قطيع الغنم ده- فقال الذي رقى: لا تفعلوا حتى ناتي النبي صلى الله عليه وسلم فنذكر له الذي كان فننظر ما يأمرنا. فقدموا على رسول الله صلى الله عليه وسلم فذكروا له، فقال: «وما يدريك أنها رقية؟» ثم قال: «قد أصبتم، اقسموا واضربوا لي معكم سهما». وضحك رسول الله صلى الله عليه وسلم. طبعا "اضربوا لي معكم سهما"، النبي صلى الله عليه وسلم ما هوش يعني محتاج لده ولا عمره نفسه تتشوف لهذا، ولكن العلماء قالوا: علشان يطيب خاطر من عنده شك في الموضوع؛ يقول لك ده النبي كان منه عليه الصلاة والسلام.
هنا يا جماعة أول حاجة عاوزين ننتبه لها أن الفاتحة عالجت عرضا خفيفا كده، يعني حد عنده صداع، حد لا، ده واحد سرى السم فيه، ولم ينجع فيه دواء من المعروف عند العرب لعلاج السم، كاد أن يموت. في رواية ثانية أو في حديث آخر: الفاتحة عالجت مرضا عجيبا، ويمكن برضو أشرنا ليه -اللي مصحصح- الجنون. برضه ما قلناش ساعتها الحديث ده؛ وقته بقى لأن الدرس النهارده الشافيه، فعاوزين نخرج من هنا أولا بيقين في الفاتحة، يقين أنها شفاء، ثانيا بقى نشوف هتشفي من إن؟
في الحديث الآخر عن خارجة بن الصلت التميمي، عن عمه أنه مر بقوم وعندهم مجنون موثق في الحديد؛ يعني جنونه شديد لدرجة أنه لو اتساب هيخرب الدنيا فرابطينه بحديد، ذهب عقله بالكلية، مجنون موثق في الحديد. فقال له بعضهم: أعندك شيء يداوى به هذا؟ فإن صاحبكم قد جاء بخير.
انتبهوا انتبهوا لمعنى هنا يا جماعة؛ كان الظاهر أن المعالج هنا من -طبعا المجنون مرفوع عنه القلم هنا، فما ينفعش نقول إنه أنه كافر، هو ده مرفوع عنه القلم، لكن ظاهر الحديث أن هو من قوم كفار- وبيقول "أنتم عندكم صاحبكم خير" اللي هو النبي اللي بتقولوا عليه ده. وظاهر الحديث الأول برضو أنهم كانوا كفار. فهنا الفاتحة عالجت الكافر، وهقول لكم قصة عجيبة بعد ما أخلص الحديث ده إن شاء الله، قصة لوحدة عايشة دلوقتي وكانت كافرة، فالفاتحة شفاء حتى للكافر. ولذلك قالوا إنه هي شفاء بشرط يقين الراقي فقط، يقين الراقي؛ يعني لو الراقي مسلم وعنده يقين في الفاتحة خلاص، حتى لو اللي بيتعالج ده واحد كافر. بل القصة اللي هحكيها لكم هي -لما نحكيها- هي كانت كافرة وهي اللي كانت بتقرا الفاتحة وشفاها الله عز وجل هنعرفها.
قال: أعندك شيء يداوى به هذا؟ فإن صاحبكم قد جاء بخير. قال: فقرات عليه فاتحة الكتاب ثلاثة أيام في كل يوم مرتين فبراه، ذهب ما به من جنون. دي فين في الطب دي بقى؟ فين في الطب إن المجنون يتعالج؟ قرأ ذهب ما به من جنون. قال: فأعطاه مائة شاة، فأتى النبي صلى الله عليه وسلم فذكر ذلك له فقال: «كل» -من هذه الشياه- «فمن أكل برقية فقد أكل برقية حق». وهذا حديث صحيح.
فالفاتحة مش بس بتعالج الصداع وبطني وجعاني، فالفاتحة تعالج السم، تعالج الجنون. ابن القيم رحمه الله يقول في مدارج السالكين: كان يعرض لي آلام مزعجة بحيث تكاد تقطع الحركة مني. ابن القيم بيقول: كان بيجي لي آلام مزعجة جدا لدرجة إني ما أقدرش اتحرك، وذلك في أثناء الطواف وغيره. فآبادر إلى قراءة الفاتحة وأمسح بها على محل الألم، فكانه حصاة تسقط. الحصاة تسقط في وقت ولا أول ما ترميها كده تقع؟ بيقول فجأة أقرا الفاتحة وأمسح مكان الألم كأنها حصاة تسقط فجاه كده، كنت تعبان ما بقيتش تعبان، كأنها... وبعدين تعب إيه؟ أنا عمال أكرر، مش تعب عادي، تعب القيام بيقول يقعدني عن الحركة، ما أقدرش ما أقدرش أمشي، ما أقدرش أتحرك.
قال: فكأنها حصاة تسقط. جربت ذلك مراراً عديدة. وكنت آخذ قدحاً من ماء زمزم فأقرا عليه الفاتحة مراراً فاشربه، فاجد به من النفع والقوة ما لم أعهد مثله في الدواء. يبقى ابن القيم بيأخد دواء عادي يعني، مش مش قاطع الدواء، بس بيقول: الأدويه آخذها ما ألاقيش القوة دي وما ألاقيش العافية دي، أقرا الفاتحة على الماء وأشرب الماء أجد قوة وأجد عافية ما ألاقيهاش بالدواء أصلاً، في ده في مدارج السالكين في الداء والدواء.
قال: ولو أحسن العبد التداوي بالفاتحة لراى لها تأثيرا عجيبا في الشفاء. ومكثت بمكة مدة يعتريني أدواء ولا أجد طبيبا ولا دواء، فكنت أعالج نفسي بالفاتحة فأرى لها تأثيراً عجيباً. وده احنا شرحناه بقى، ذكر تفصيله في المدارج، لكن قال إيه بعدها: وكنت أصف ذلك لمن يشتكي ألما، وكان كثير منهم يبرا سريعا، ما ياخدش وقت أصلاً.
فالفاتحة شفاء. من القصص العجيبة وهي حديثة: امرأة خادمة في دولة خليجية، وفي الخليج وفي مصر ابتدى ينتشر في بعض الأوساط بيجيبوا خادمات من برة البلاد، فهي كانت امرأة أجنبية كافرة وكانت بتخدم في قصر بتاع امرأة مسلمة خليجية مسلمة، وأمرأة دينة مصلية وكذا. وبعدين البنت دي الخادمة دي ما كانتش بتخلف، وبعد مدة كده حست بوجع في بطنها راحت على أن فيها جنين يعني وفرحانة جدا، عملوا التحاليل ومش عارف إيه، ورم سرطاني خبيث في الرحم والرحم هيتشال لازم يتشال، وكانت حزينة جدا جدا لأن هي كانت عندها أامل أنها تنجب هذه المرأة.
وبعدين العملية إمتى؟ بعد يومين مثلاً العملية. الهمها الله عز وجل أنها تذكر -هي قاعدة ما خلاص قلة الحيلة، هتعمل إيه؟ مستنية العملية- أنها كان في مسجد جنبهم كمان، وكان لما يجي يصلي يقوم يفتح المايك الخارجي ولا حاجة، فقالت: إيه أقعد أقول أي حاجة إيه يمكن الدنيا تمشي، الحاجه الوحيدة اللي حافظها سورة الفاتحة من كثرة ما تسمعها من المرأة اللي عندها في البيت وهي بتصلي والجَامع، فهي حافظة الفاتحة. فجلست تكرر الفاتحة وهي في السرير في المستشفى.
وجوم يوم العملية المفروض يعملوا لها فحوصات ثانية قبل دخول العملية مباشرة، وبعدين لقوا أن الورم اختفى تماما! طيب ازاي ده مستحيل يحصل؟ ويجيبوا الأطباء ويعيدوا يشوفوا التحاليل القديمة والتحليل الجديدة والفحوصات القديمة، مستحيل يحصل، مستحيل بالطب ما فيش حاجة تعمل كده أصلاً، فسألوها قالت لهم الكلام ده، وأسلمت هذه المرأة. وفي قصص كتير، يعني أنتوا بس مجرد ما تكتبوا ولا تعملوا بحث ولا قصص كتير لناس كان...
شفاؤها بإذن الله في الفاتحة، أو الفاتحة مع غيرها. وكان يا جماعة الأمر ده كأنه كان مستقر عند السلف؛ فالإمام أحمد مثلاً في الآداب الشرعية، ابن مفلح يقول: قال المروذي -وده صاحب الإمام أحمد بن حنبل-: شكت امرأة إلى أبي عبد الله أنها مستوحشة في بيت وحدها. هنا يا جماعة ما بنتكلمش في مرض عضوي، هنا بنتكلم في مرض يصيب النفس ومش مرض قلبي يعني اللي هو رياء وعجب، لا، قاعدة خايفة في البيت، خايفة مستوحشه في بيت وحدها، فكتب لها رُقعة بخطه، ورقة: بسم الله، وفاتحة الكتاب، والمعوذتين، وآيات الكرسي.
يبقى الفاتحة حتى علاج للنفس، اللي عنده رهبة، اللي عنده خوف يكثر من قراءة الفاتحة. احنا النهارده معظم الدرس في علاج أمراض القلب من الفاتحة مش أمراض البدن. ابن حجر الهيتمي وهو شافعي، قال: يستحب قراءة الفاتحة عند وقوع الطاعون. طب الوباء العام، نزل وباء عام في بلد، كورونا، وباء، تلازم الفاتحة، يستحب قراءة الفاتحة عند وقوع الطاعون لأنها شفاء من كل داء.
في زاد المعاد يقول ابن القيم: احنا هنا يا جماعة عمالين بس نقول إيه؟ هذا الأمر مستقر عند السلف، احنا في إيدينا كنز! ولو تفتكروا، الفاتحة نزلت منين؟ من كنز تحت العرش، ولذلك من أسماء الفاتحة الكنز. فاحنا في إيدينا، المسلمون في إيديهم كنز في الشفاء. يقول ابن القيم في زاد المعاد: فاتحة الكتاب، وأم القرآن، والسبع المثاني، والشفاء التام، والدواء النافع، والرقية التامة، ومفتاح الغنى والفلاح، وحافظة القوة، ودافعة الهم والغم والخوف والحزن. وده هنيجي له إن شاء الله لما نتدبر بقى الفاتحة النهارده؛ هنتدبر الفاتحة تدبراً سريعاً من هذه الحيثية؛ هي إزاي تدفع عنك أمراض القلوب، أو ما يصيب قد يصيب القلب من حزن، من غم، من هم، إزاي الفاتحة تذهب بهذا كله؟
قال: لمن عرف مقدارها، وأعطاها حقها، وأحسن تنزيلها على دائه، وعرف وجه الاستشفاء والتداوي بها، والسر الذي لأجله كانت كذلك. ولما وقع بعض الصحابه على ذلك فهمه، فرقى بها اللديغ فَبْرَأ لوقته. دلوقتي الصحابي ما كانش سمع من النبي عليه الصلاة والسلام أنها رقية، جزاكم الله خيراً، ما كانش سمع من النبي أنها رقية عليه الصلاة والسلام، أمعنى يروح يقرا الفاتحة؟ يعني هذا الصحابي نضن أن معاه غير الفاتحة، على الأقل على الأقل معاه المعوذتين مثلاً. ولو انا جيت قلت لك كده بالعقل كده، تقرا عليه دي ولا دول؟ تحس إن المعوذتين يعني إيه يعني أشبه بأن هم اللي يكونوا رقية، مش كده؟ وهما كذلك، خلي بالكم، بس الصحابي اختار الفاتحة.
آه، ليه الفاتحة بقى؟ ابن القيم يعني كأنه بيتدبر هذه المسألة: أمعنى قرأ الفاتحة؟ يبقى هو فهم في الفاتحة حاجات احنا مش فاهمينها، هو فهم في الفاتحة حاجات احنا مش فاهمينها، يعني إياك نستعين دي، ما هو إياك نستعين دي هنجيلها إن شاء الله، نبتدي بقى نشرح الفاتحة في درس من الدروس أنك تستعين الله عز وجل في كل شيء حتى في إبراء هذا، إياك نستعين أهو ده سر من أسرار الفاتحة.
قال، يقول ابن القيم: ولما وقع بعض الصحابة على ذلك يعني فهم السر، رقى بها اللديغ فبرأ لوقته، فقال له النبي عليه الصلاة والسلام: «وما أدراك أنها رقية؟». ومن ساعده التوفيق، وأعين بنور البصيرة حتى وقف على أسرار هذه السورة، وعلم ارتباط معانيها بجلب مصالحهما ودفع مفاسدهما، وأن العاقبة المطلقة التامة والنعمة الكامله منوطة بها، موقوفه على التحقق بها؛ أُغنته عن كثير من الأدوية والرقى، واستفتح بها من الخير أبوابه، ودفع بها من الشر أسبابه. وهذا أمر يحتاج إلى استحداث فطرة وعقل آخر وإيمان آخر. في كلام كثير لأهل العلم في هذه المسألة.
يبقى احنا يا جماعة أول احتياج لنا إلى الفاتحة أن ما فيش حد ما بيتعبش بدنياً، أو ما لوش قريب بتعب أو صديق بتعب، أين أنت من الفاتحة؟ نعمل إيه؟ اقراها وتكثر من قراءتها. ضم كفيك واقرا في الكفين وانفث فيهما وامسح على مكان المرض، اقراها على ميه وكررها واشرب الميه، اقراها على زيت زيتون، اقراها على عسل وكل العسل ده أو استخدم زيت الزيتون ده أو ادهن بزيت الزيتون مكان المرض، كل ذلك مجرب، وهذا الباب يدخله التجربة.
هذا الباب باب طب بهذه الآيات أو هذه السور يدخله التجربة، يعني ما تقوليش إيه، فين في السنة أن النبي عليه الصلاة والسلام قرأ على زيت ومية؟ لا، العلماء القدامى كأنهم متفقون، حتى لو الإجماع ما هواش يعني إيه، ولكن في باب العمل متفق؛ يعني الإمام أحمد يشرب عادي على مية، يقراها على مية ويشرب المية، وغيره يعني روي عنه غير ذلك. فالمهم، كل الصور اللي احنا قلناها دي نعملها علشان أمراض البدن.
الاحتياج الثاني، وهو الأهم والأعلى، لكن احنا ابتدينا بده عشان ده فيه نصوص. الاحتياج الثاني لك أن الفاتحة شفاء لأمراض القلب، وهذا ذكره بعض أهل العلم أنها تشفي أمراض القلب كذلك.
طيب، يعني في كلام ابن القيم واحنا قريناه أظن، يقول -مش عارف قرينا ولا لا فخلينا نقولها-: يقول ابن القيم في زاد المعاد: ولعمر الله أن شأنها لأعظم من ذلك، وهي فوق ذلك، وما تحقق بها عبد واعتصم بها وعقل عن من تكلم بها -يعني عن ربه سبحانه وتعالى- وأنزلها شفاء تاما -من تكلم بها وأنزلها يعني الله- وهي فوق ذلك هي شفاء شفاء تاماً وعصمة بالغة ونوراً مبيناً، وفهمها وفهم لوازمها كما ينبغي؛ قلما يقع في بدعة ولا شرك من فهم الفاتحه، ولا أصابه مرض من أمراض القلوب إلا لماماً غير مستقر.
هنا ابن القيم بيقول كلمة عجيبة جداً، بيقول: أمراض القلوب كلها ما يجيلكش منها مرض لو فهمت الفاتحة وفهمت أسرار الفاتحة إلا لماماً لا استقرار له؛ آه ممكن ترقى شوية وبعدين ترجع تاني، ممكن تعجب بنفسك بس ترجع تاني، طول ما أنت فاهم فاتحة ليه؟ ترجع تاني ليه بسرعة؟ ها، أنك بتكررها. عشان بقول لكم احنا محتاجينها الـ سبع عشرة مرة، محتاجينها! يبقى اتعوجت كده تسك، جيت تكررها في العصر أربع مرات بتقرا الفاتحة، كان ممكن يبقى وجوبها مرة واحدة في الصلاة، لا، أربع مرات في العصر، عصر. طب من العصر والمغرب اصاب قلبك شيء؟ هتيجي تقراها ثلاث مرات في المغرب. فاحنا محتاجينها.
فمثلاً، الحمد لله رب العالمين، بداية الفاتحة كده الحمد لله رب العالمين، أهي دي تذهب برؤية النفس في النعم، وكذلك تذهب بالحزن إذا أصابتك النقم. يعني أنت لما تيجي واحد نجح، وجنا مخلصين الثانوية لسه الشباب، جبت درجة عالية: أصل أنا كنت بذاكر، وأصل أنا كنت بسهر، وأصل أنا ذكي، وأصل أنا كنت بعمل اللي عليا، وأصل أنا... تيجي تقف في الحمد لله رب العالمين، تقوم تفهم أن مقتضى ذلك الحمد الذي تستفتح به الصلاة وجوباً: إني يا ابني وما بكم من نعمه فمن الله. فأنت فرحان بإيه؟ معجب بإيه؟
فالحمد لله رب العالمين نفت عنك أنك تفرح بشيء وكان وكانه منك، زي قارون كده: ﴿إِنَّمَا أُوتِيتُهُ عَلَى عِلْمٍ عِندِي﴾ [القصص: 78]. لا، تلاقي الحمد لله تنفي ذلك عنك خلاص. وقوم مثل بقى في أي حاجة؛ صفقتك نجحت، اتجوزت اللي أنت عاوز تتجوزها، مش عارف جالك فلوس لأن أنت مش عارف كنت عامل إيه، فتلاقي نفسك معجب بنفسك، شايف نفسك، أول إيه بتقولها في الصلاة: الحمد لله رب العالمين، مقتضى ذلك أن ذلك منك يا رب، وأنت يا رب من يستحق الحمد مش أنا خالص.
ولما تلاقي الناس بقى جاية مبهورة بيك: يا بتاع الثانوية اللي جاي مجموع مش عارف إيه، يا بتاع التجارة اللي نجحت في تجارتك وجبت الصفقة، يا بتاع الشركة اللي كبرت، أصل أنت اللي عملت، أنت اللي سويت، أنت... فتلاقي لسانك على طول: الحمد لله رب العالمين، مش أنا. علاج لقلبك!
أو العكس، ما هو أنت في الدنيا بين نعمة تجيء لك أو نقمة تصيبك، فأول ما تدخل الصلاة: الحمد لله رب... فاكرين الحمد لله دي قلت لكم صاحبك اللي نازل على الفيسبوك إيه: الحمد لله بس كده، ما تبقاش عارف هو، لأن الحمد لله تنفع هنا وتنفّع، تنفع في كل حاجة وتنفّع من غير حاجة. وهيجي لنا حديث في ده بس مش المره دي، إنه إذا قال الحمد لله رب العالمين من قبل نفسه -وهنفعل إيه من قبل نفسه وليه حسنات أزيد من أي ذكر آخر، هيجي لنا حديث بالمعنى ده بس مش المره دي إن شاء الله- فالحمد لله تنفع من غير حاجة أصلاً.
طب أصابتك نقمة فزعلان، فمتضايق، فما كانش نفسك ده يحصل، فتخش وتيجي أول آية: الحمد لله رب العالمين. آه، يعني إيه الحمد لله رب العالمين؟ ما هو أصل الله يعلم وأنتم لا تعلمون، مش كده؟ ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ﴾ [البقرة: 216]. ليه؟ والله يعلم وأنتم لا تعلمون. أنت ما تعرفش حاجة، فتقوم واقف كده تتامل ليه بنقول الحمد لله عند حصول النقم؟ أصل الله يعلم وأنتم لا تعلمون، فرضى بقضاء الله عز وجل، ومش بس يرضى، أحمد سبحانه وتعالى. فالحمد لله رب العالمين فتلاقي قلبك ارتاح واطمن.
احنا لسه ما دخلناش على اللي بعد كده، احنا واخدين بس لسه ما كملناش، بس الحمد، قلت الحمد لله، شوفوا يا جماعه بتحل مشاكل إزاي! شوف قلبك اللي المفروض دخلت بقلب شايف نفسه، خرجت بقلب منكسر؛ دخلت بقلب حزين وناقم ومتضايق، خرجت بقلب مطمئن وراضي بس بالحمد لله! ما كملناش السورة. الحمد لله.
وبعدين الحمد لله رب العالمين. طبعا الحمد لله احنا ممكن نتامل أحوال أخرى للعباد؛ فالحمد لله دي يعني احنا قلنا نعمة وقلنا نقمة، ممكن نقعد نتخيل أحوال ثانية الحمد لله بتعالجها برده، بس يعني خلينا نتجاوز، احنا لسه في أول آية: الحمد لله رب العالمين. تعالج فيك إيه دي بقى؟ أول حاجه أنك رب العالمين، وأنت من جملة العالمين، مش كده؟ أنت واحد من العالمين.
ومعنى الرب إيه؟ احنا هيجي لنا إن شاء الله درس مخصوص في ربنا إزاي عرفنا نفسه في الفاتحة؛ لما تبقى سورة سبع عشرة مرة تقراها وجوبا في اليوم والليلة، ربنا طبعا أهم مهمات دينا إيه؟ أن تعرف ربك. أهم حاجه في دينا أنك تعرف ربنا. فإزاي ربنا عرفنا نفسه في فاتحة كتابه، اللي هيقول لك بعد كده اقراها سبع عشرة مرة وجوباً؟ هنقعد نتامل السورة من هذه الحيثية في مرة لوحدها، فمش هنشرح قوي بقى معنى الرب ونقف على كل معنى.
لكن من معاني الرب: المربي، فهو رب العالمين، وأنت من جملة العالمين، فهو ربك. فمهما كنت خايف من بكره، أول ما تقرا رب العالمين هتطمن ليه؟ هديكم مثال عشان نفهم: دلوقتي أنت صغير، وأبوك عنده ملاءة مالية -يعني مش إيه مش أرزقي، مش يوم بيومه، ومش شغال على دراعه، لا، راجل غني مقتدر، سواء عنده بقى شركة، عنده مصنع، موظف، لكن دايما آخر الشهر في فلوس على جنب- هل عمرك تنام وأنت شايل هم بكره؟ ليه؟ أصل إيه، في أب. مش كده؟ ما هو في رب بقى!
لكن احنا مش بنحس ده للاسف يعني. مثال الاب ده كلنا استحضرناه، لكن مين منا معاه زي ما معهوش وبيدخل ينام عادي؟ مش عشان جبيلة، لا، هو عشان مطمئن لله سبحانه وتعالى. اقول لكم الزيادة بقى، هو مطمئن لله ومش مطمئن لحاجة غير ربنا أصلاً؛ يعني إيه؟ يعني وهو معاه فلوس، هو مش مش مطمئن للفلوس، مش شايفها، قلبه مش راكن ليها. هو معاه زي ما معهوش، في الحالتين هو مطمئن بالله ولله.
فأنت لو في حاجة شايل همها وجيت تقرا رب العالمين، والرب هو المربي، خلاص، خايف من إيه؟ ما هو ربك سبحانه وتعالى. طب معنى أنه ربك دي؟ يعني أنت هتنام وتصحى تلاقي الحاجة اللي أنت كنت عاوزها حصلت؟ لا، مش شرط. ما هو الرب، احنا قلنا إيه؟ المربي، مش المفسد. مش أنت أبوك ساعات تبقى عاوز الحاجة الفلانية ويمنعك منها ليه؟ عشان بيربيك، والحاجة دي لو خدتها هتفسدك فيمنعك منها، أو يمنعها عنك.
فلما تفهم ده وتفهم أنه رب العالمين سبحانه وتعالى، فحاجة من اثنين؛ يا الحاجة دي تيجي ليه؟ لأنه رب العالمين، يا الحاجة دي ما تجيلكش ليه؟ لأنه رب العالمين سبحانه وتعالى يربيك؛ ففي الحالتين الحمد لله رب العالمين. في الحالتين، وبنقولها واحنا إيه، في الحالتين راضيين وفرحانين. وقلنا لكم كلمة زمان، ما أعرفش تفتكروها ولا لا: معنى الرضا بالله أنك لو جيت قلت لك: طيب، يلا نرجع الزمن ونديك أنت مفاتيح الكون، هتختار إيه؟ تقول: اختار اللي اختاره ربنا سبحانه وتعالى. ده أنت كنت هتموت على البنت دي اللي اتجوزت، وبنقول لك: خد مفاتيح الكون؟ مش هاخدها! ليه؟ أصله رب العالمين، ربي اختار ذلك، هو الأصلح. أنا بقى اللي مش العائل، الصغير عمال يرفص في الأرض، ليه؟ عشان عاوز عاوز الحاجة الحلوة، الحاجة الحلوة دي أصلاً اللي هو إيه سم فران جايبين بس ملون! فهو فاكرها حاجة حلوة، الأم تمنعها: أنا بكرهك، أنت وحشة، مش كده؟ أما يكبر شوية ويعقل، يفهم بقى.
مشكلتنا احنا لا كبرنا ولا عقلنا، عشان كده مش فاهمين عن ربنا سبحانه وتعالى، مش فاهمين. ففي الحالتين: اتجوزتها الحمد لله، الحفلة عليك النهارده؛ ما اتجوزتهاش.
الحمد لله جت الشغلانه، الحمد لله يا جماعة، جت الشغلانه، دخلت الانترفيو وجت، أنت نجحت! ما فيش بقا أنا وبتاع، نزلت تصلي الظهر بعد الحمد لله رب العالمين. طيب، اترفضت؟ فرحان، راضي، راضي، الحمد لله رب العالمين، وأنا واحد من العالمين، أنا واحد من هؤلاء العالمين، فهو ربي سبحانه وتعالى اختار لي أن شغلاني ماجيش، بيربيني، عارف مصلحتي، فالحمد لله رب العالمين. رب العالمين! العالمين دول أنت وغيرك ولا أنت بس؟ أنت وغيرك، والرب من معانيه السيد، فهو رب العالمين، فخايف ليه من غيرك بقا وأنت بتقرا الفاتحة كده؟ قلبك في خوف من فلان هياذيني، من فلان هيقطع عيشي! الألفاظ والله ألفاظ مجرمة ما يقولهاش مسلم دي! مين ده اللي يقطع عيشك؟ ﴿وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ﴾ [الطلاق: 2-3]. مين ده اللي يقطع عيشك يا ابني؟ أنت بتقرا فاتحة، أنت بتقرا رب العالمين، رب العالمين يعني هو يرزقه ويرزقك، فمين ده اللي يقطع عيشك؟ ومين ده اللي تخاف وتهاب بعد ما عرفت أنك لك رب هو رب العالمين، زي ما هو ربك، هو رب الظالم، ورب مديرك، ورب جوزك؟ هو رب العالمين سبحانه وتعالى.
فاللي داخل الصلاة خايف من فلان ولا خايف من علان، خارج من الصلاة وقد قوي قلبه، ليه؟ أصل رب العالمين خلاص، واستحضر ما يقوي هذا المعنى بقا عندك. عارفين قصة غلام الأخدود؟ دولة مملكة بحالها عاوزين يقتلوا الولد، ما فيش، ما فيش، ليه؟ أصل رب العالمين لا يريد ذلك. ومن جملة العالمين الملك الكافر، ومن جملة العالمين الجنود، ومن جملة العالمين البحر والجبل، مش كده؟ فيرتجي في الجبل، شوفوا الآية العجيبة! فالجنود اللي هم الرجالة يقعوا كلهم ويبقى الغلام، يهيج البحر فالجنود كلهم يقعوا من المركب ويبقى الغلام، أصله رب العالمين هو رب المركب، ورب البحر، ورب الجبل، ورب الجنود، ورب الملك، أنت خايف من إيه؟ الحمد لله رب العالمين، الرحمن الرحيم.
احنا طبعا بنسيب حاجات لأن يعني مش وقتها، هنرجع بعد كده إن شاء الله بقا نتكلم عن ربنا سبحانه وتعالى الله والرب والرحمن والرحيم ومالك وملك ومعبود ومعين وهادي ومضل، هنقعد نتكلم على الحاجة دي كلها بقا، نعرف ربنا من سورة الفاتحة. لكن احنا دلوقتي بنشوف الفاتحة التي هي شفاء لما في القلوب، الفاتحة شفاء لما في قلبك. طب أنا لازم أداوي قلبي؟ أنت حر، أمرك، ماداتوش هتروح في داهية، هتروح النار زي ما أنت بتجري على طول على الدكاترة عشان تداوي بدنك اللي هو آخره يعني أنه لو تلف أشد التلف مت وخسرت دنيا، قلبك لو ما داويتوش هتخسر آخرة ودنيا، ما هو أنت خايف من غير ربنا، تفضل نايم مرعوب وصاحي مرعوب، والباب يخبط تترعب وتتنفض. هو رب العالمين سبحانه وتعالى، خلاص طمن، الحمد لله رب العالمين الرحمن الرحيم سبحانه وتعالى، عدوها عشان إيه؟ مش عايزين نتكلم عن ربنا يعني المرة الجاية إن شاء الله مالك يوم الدين.
مالك يوم الدين، فيبق فلان اللي فعلا بقى ظلمك ده لما تدخل كده الصلاة وتقول مالك يوم الدين، تقوم تفتكر أن في يوم دين، ويوم الدين ده ما فيش حد هيتساب، قلنا لكم قبل كده في درس الإنابة: ديوان لا يترك الله منه شيئاً، ما فيهاش هزار. فما هتدخل الفاتحة وأنت مقهور من اللي ظلمك، وأنت مقهورة من جوزك اللي كالكل حقك وخد ذهبك وعمل مش عارف إيه؟ مقهور، جواك قهر، تقوم تقول مالك يوم الدين، هتخرج من الفاتحة دي عامل إزاي؟ تفتكر في يوم آخرة. طيب، مالك يوم الدين، يعني إيه بقا مالك يوم الدين؟ هنفصلها بعدين إن شاء الله، لكن المعنى اللي عاوزينه هنا عشان يعالج قلبك هو فلان ده اللي ظلمك وبعدين مش عارف تاخد حقك منه ليه؟ أصل ليه سلطة في الدنيا، ليه منصب، فأجي أروح أشتكي المحضر يطرمخ عليه، مش بيحصل يا جماعة؟ في الآخرة ما فيش طرمخة! ما فيش طرمخة، ليه؟ أصل هو سبحانه مالك يوم الدين وملك يوم الدين، ما فيش بقا ملك معاه ولا ملك معاه لحد، وهنعرف الفرق بينهم بعدين إن شاء الله في درس تاني.
فأنت مطمن، مطمن، كل ملك زائل، ﴿لِمَنِ الْمُلْكُ الْيَوْمَ لِلَّهِ﴾ [غافر: 16]. وقيل أن الله عز وجل بعد أن يميت الخلائق هو يقولها سبحانه وتعالى: لمن الملك اليوم؟ فلا أحد يجيب، كله ميت. فيكررها: لمن الملك اليوم؟ ولا أحد يجيب، فيجيب نفسه: لله رب العالمين. فتطمن، اللي ظلمك في الدنيا ده عشان له نوع ملك أو نوع ملك سيزول عنه ذلك، يجي يوم القيامة زيه زيك، بل هو أحقر منك، ليه؟ لأنه مالك يوم الدين. يبقى دول معنيين مش معنى واحد؛ معنى أن في يوم دين أصلاً، وقلنا لكم قبل كده: لولا يوم القيامة لاكتظت المحاكم بالقضايا، أنا عاوز أقول لكم القضايا اللي هي مرترتة في المحاكم دي، لا، ده في قدها عشر مرات، بس صاحبها بيقول إيه؟ في آخرة، في ربنا. صح يا مالك يوم الدين؟
إياك نعبد وإياك نستعين. إياك نعبد، يبقى أنت داخل الصلاة وعندك رياء، عرفت أن هو سبحانه وتعالى المعبود: إياك نعبد. وإياك نستعين، ده احنا قلناها لكم قبل كده، داخل وشايف نفسك، وأن أنا اللي بعمل وأنا اللي بسوي، لا، إياك نستعين، هو المعين سبحانه وتعالى. فعالجت في قلبك الرياء والعجب وحب ورؤية النفس، كل ده في إياك نعبد وإياك نستعين. وبعدين أنك واحد من جملة الناس. لو تفتكروا يا جماعة قلنا لكم كل السور اللي قبل الفاتحة بتخاطب النبي عليه الصلاة والسلام: يا أيها المزمل، ما أنت بنعمة ربك بمجنون، ن والقلم، يا أيها المدثر. وتيجي الفاتحة تلاقي ظهر العالمين وظاهر، مش كده؟ أنت واحد من جملة العالمين، فانت شايف نفسك ليه من أول السورة: الحمد لله رب العالمين، وأنا يا دوبك واحد من جملة العالمين؟ أنت أصلاً تطلع إيه في الكوكب اللي احنا اللي احنا عايشين فيه ده؟ أنت تساوي إيه؟ وده احنا في عصر في جيل واحد، أنت بقا هتساوي إيه في الكوكب اللي احنا عايشين فيه ولا الـ... احنا ما خرجناش لمجرة وما خرجناش، احنا بس في حته الأرض اللي هو حجمها يعتبر حجم متوسط في المجرة بتاعتنا أو في المجموعة الشمسية يعني، ولسه في مجرة وليه يعني ليله... في ليلة كبيرة، لا، خلينا في الأرض بس، أنت إيه؟ أنت إيه في جملة العالمين؟
فالفاتحة بتكسرك، بتكسرك أول ما تقول الحمد لله رب العالمين، وتستحضر جواك حجم العالمين ده عامل إزاي، وبعدين ده في جيل واحد، لا، من لدن آدم إلى قيام الساعة، تطلع أنت بقا ولا حاجة وأنا ولا حاجة، فهي بتكسرك. إياك نعبد، يعني في جملة العابدين، مش إياك أعبد، إياك نعبد يعني أنا يا رب واحد زيي زي غيري، زي ملايين غيري بنعبدك، وإياك... مش أستعين، إياك نستعين، أنا زيي زي غيري، أنت واحد واحنا كتير، كتير قوي! الفاتحة تكسرك، تكسر رؤيتك لنفسك، تكسر عجبك.
وتيجي بعديها اللي تكسرك زيادة وتفكرك أنك محتاج وعبد وذليل وضعيف، وهو سبحانه وتعالى الرب القاهر القادر المعطي: اهدنا الصراط المستقيم. وكأنك تعترف بين يديه سبحانه وتعالى بانعدام الحول والقوة؛ من غيرك يا رب هضيع، من غيرك هضل، فاهدنا الصراط المستقيم. هذا يتضمن هذه المعاني، أنك قبل ما تقول اهدنا من جواك استشعرت أنك محتاج، ما هو مافيش حد يسأل حاجة وهو مش محتاج، فأول معنى جالك أن أنا محتاج، طالما محتاج أبقى ضعيف، الاحتياج يعني ضعف على طول، أنت محتاج، أنت ضعيف. طب مين اللي عنده؟ ربنا سبحانه وتعالى هو القوي سبحانه وتعالى.
فلو داخل وشايف نفسك، لا يا أبني ده اهدنا الصراط المستقيم، وبعدين إيه؟ مش اهدنا إلى الصراط، ما جاتش إلى، ولا أهدنا في الصراط، ما جاتش في، كل الحروف دي مش موجودة، اهدنا الصراط، اتقال لأنك محتاج أنك تهدى إليه وتهدى فيه، فانت في كل خطوة أنت محتاج هدايه، في كل خطوة! والهدايه دي مش بس هدايه دينية، حتى هدايه دنيوية يا جماعة، ده هنحيله إن شاء الله يعني، نفسر فيه إن شاء الله، أروح الشغلانة دي ولا دي؟ أتجوز دي ولا دي ولا الاتنين؟ فانت أنت محتاج هدايه، محتاج هدايه في إيه؟ في كل حياتك.
اهدنا الصراط المستقيم، وكأنك قد تلمحت تلك الفرق اللي هو يا رب في منعم عليهم وفي مغضوب عليهم وفي ضالين، فانا لو ما كنتش من هؤلاء المنعم عليهم هروح في داهية، أنا مغضوب عليه، صراط الذين أنعم عليهم غير المغضوب عليهم ولا الضالين. فالفاتحة تعالج قلبك، تزيل منه رؤية النفس، تزيل منه الإعجاب بالنفس، تزيل منه الخوف، تزيل منه القلق. الناس يا جماعة اللي مرعوبة على الدنيا ومرعوبة على... اقرا الفاتحة، اقرا الفاتحة، عيش رب العالمين دي عيشها، عيش إياك نستعين.
ما هو إياك نستعين دي مش يعني يستعين... عارفين قصة الولد وأبوه دي اللي لسه قايلها لكم لما يروح يستعين بأبيه يبقى مطمن، الحاجة هتخلص أصل أبويا الغني، أصل أبويا المنصب. الفاتحة تنفي كل معين سواه سبحانه وتعالى، إيه رايك بقا؟ إياك نستعين، ما نستعينش بحد غيرك يا رب، طب هاخد بالاسباب يعني أن أقول أبويا ده سبب من الأسباب، لكن قلبك لا والله والله أبدا، ولا شايف الأب أصلاً، ولا شايفه.
قلنا لكم مثال قبل كده، ما أعرفش تفتكروه ولا لا، قلنا لكم مثال اللي قلبه بيعتمد على الأسباب، زي إيه؟ واحد دخل لملك فطلب منه حاجه نوال ولا عطاء من بيت المال ولا كذا، فراح الملك جاب الحاجب اللي واقف على الباب ده قال له يا حاجب روح للخازن وقول له يدي لفلان مائة ألف جنيه. فراح الحاجب واخد فلان ده وراح للخازن قال له ادي لفلان مائة ألف جنيه، فراح داخل الخازن رايح عمال يعد المائة ألف جنيه، الراجل وهو واقف قلبه شاكر للحاجب والخازن وشايف أن لولا الحاجب ما كانش الفلوس دي جت لي، ولولا الخازن ما كنتش حصلت هذا المال ليه؟ لأن أصل الحاجب اللي راح قال للخازن والخازن هو اللي بيعد، وقلبه ذهل عن الملك وانشغل بالحاجب والخازن. دي ممكن تحصل؟ مستحيل تحصل في المثال اللي قلناه، بتحصل مع ربنا! احنا بنعملها مع ربنا! ده قلت لكم ساعتها أن بعض العلماء لما قال المثال ده قالوا بطريقه عجيبة جداً، ما قالش بقا حاجب وخازن وكده، قال لا، ده أنت دخلت على الملك فراح مطلع رقعة ورقة وجاب وابتدى يكتب لك ورقة بأيه؟ بأنك تروح تصرفها، فانشغل قلبك بالقلم وجريانه على الرقعه، بقيت شايف لولا القلم ولولا الرقعة ما كنتش خدت الفلوس، فابتدا ينشغل قلبك بالقلم وجريانه على تلك الرقعة وذهلت عن الملك.
حد يعمل كده يا جماعة؟ احنا بنعمل كده مع ربنا، ربنا سبحانه وتعالى هي الأسباب اللي بتوفر لك دي مين اللي وفرها لك؟ هو أنا هسالكم سؤال دلوقتي؛ الولد يولد أو البنت تولد يعني المولود يعني، فجأة، فجأة كده بقدرة قادر تلاقي حب عجيب في قلب الوالد والوالدة يخلق مع هذا المخلوق، صح ولا لا؟ لدرجة أنه لو في نفس اللحظة دي حصل حاجة يا الأم تنجو يا الولد ده، تلاقي الأم تقول لا، هو يعيش وأنا أموت. طب أنت وأنت في علاقة بينك وبينه، ولا أنت لسه عشت معاه ولا أنت شفت منه إيه ولا... من خلق هذا؟ ما هو كان ممكن ما يبقاش كده، مش كده؟ كان ممكن أن الولد يتولد وما فيش أي مشاعر تولد مع الولد، لكن لأن احنا محتاجين لتلك المشاعر وإلا كنا متنا كلنا، ربنا يخلق تلك المشاعر في... وحاجة عجيبة جداً تلاقي المشاعر دي في... في البشر في الجنس البشري تستمر، لأن احنا كبشر منوط بنا أمور في الدنيا مش هتنفع غير بكده. في بقية الأجناس مش كده؟ اللي منكم بيربي قطط ولا يعرف أن ممكن الولد يتجوز أمه في القطط! هو الأم علاقتها النفسية والوجدانية بالمولود بتنتهي أول ما خلاص يبعد عنها ويتفطم، وكده خلاص، العلاقة النفسية الوجدانية دي ما بقتش موجودة، مش هيفضل ابنها لغاية ما تكبر وتموت وهي عارفة أن ده ابنها، ولو بعد عنها تتخض عليه، ما تلاقوش ده في ال... في أجناس كتير من الحيوانات.
الحفدة بقا، الأحفاد، بيقولوا ما فيش جنس على وجه الأرض يعرف حفيده، ليه تعلق بحفيده غير البني آدم، وعشان كده ربنا امتن بها نعمة علينا. ربنا قال إيه؟ ﴿وَجَعَلَ لَكُم مِّن أُزْوَاجِكُم بَنِينَ وَحَفَدَةً﴾ [النحل: 72]. ليه حفدة تيجي هنا؟ طبعا على أما بنقول أي تفسير بيبقى في تفسيرات أخرى، لكن احنا عاوزين تفسير بعينه؛ فليه تيجي حفدة هنا؟ عشان هذا المعنى الذي قلناه، أنه الجنس الوحيد الذي يشعر بالحفيد ومش بس كده، ويفرح بيه، وحتى في المثل دي بيقولك: أعز الولد ولد الولد، يعني تلاقي الجد يفرح بالحفيد ويحتفي بيه احتفاء عجيباً جداً. هات لي كده مخلوق آخر يشعر أصلاً بالحفيد ده!
نرجع تاني، نرجع لمرجوعنا، فأبوك ده اللي أنت بقيت شحت عشرين سنة ولسه في قلبه حبك، وفي قلبه حب البذل لك، لدرجة أن وأنت نايم عارف أن أنا لو ميلت على أبويا مش هيقول لي لا، مين اللي مخلي في قلبه ده أصلاً؟ ربنا سبحانه وتعالى! ويا جماعة شذوذ القاعدة لإثبات القاعدة، خلي بالكم، يعني لما تلاقي أب جاحد وقاسي ومجوع عياله، ليه ربنا بيعمل كده؟ عشان يثبت القاعدة، لولا الشذوذ ما تبانش القاعدة، لكن لما
ليه يبقى الابن عنده عشرين سنة والاب بيطفح الكوتة عشان عاوز يجيب شقة شقة لابنه مثلا، أو بيطفح الكوتة عشان يدفع له مصاريف الجامعة، عشان يجيب له لبس ما يبقاش شايف نفسه أقل من زمايله في الجامعة، وعشان وكل واحد على مقدرته طبعا يعني.
ليه ده كله؟ منه سبحانه وتعالى منه.
الفاتحة بتكسر دي جواك ﴿إِيَّاكَ نَعْبُدُ وَإِيَّاكَ نَسْتَعِينُ﴾ [الفاتحة: 5]، يبقى أنت كنت داخل الفاتحة وقلبُك متوكل على غيره، مستعين بغيره، مائل لغيره، خرجتَ من الفاتحة: يا رب إياك نستعين؛ لأن دي فيها تخصيص: إياك نستعين، مش نستعين بك، إيه الفرق؟ هنقوله بعدين إن شاء الله، بس خدها مني دلوقتي كده: إياك نستعين يعني إيه؟ يا رب أنا بستعين بك لوحدك، لوحدك، ما فيش غيرك يا رب.
فعالجت قلبك، وعالجت ما في قلبك من أدواء تهلكك إن لم تعالج تلك الأدواء.
قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك.
ما فيش في صلاة العشاء للنساء الاستحباب التأخير لحد إمتى؟ ولو بعد اثنتي عشرة عادي، ولا كده مأخرها عن معادها؟ الحنابلة عندهم لغاية ثلث الليل، ليس نصف الليل، ده مذهب الحنابلة، ازاي؟ وعند بعض العلماء لنصف الليل، ده الوقت المختار، ماشي؟ يعني ما ينفعش نأخرها عن كده، السؤال ده مهم ها، للرجالة والستات.
ما ينفعش نأخر عشاء عن كده لغير عذر وإلا نأثم، طيب نحسب إزاي الليل؟ هنشوف المغرب بيأذن إمتى والفجر بيأذن إمتى، فمثلا مثلا المغرب دلوقتي بيأذن مثلا ثمانية، والفجر مثلا أربعة، أو أربعة وشويه، خليها ثمانية وأربعة، بين ثمانية وأربعة كم ساعة؟ ها، ثمان ساعات، ركزوا معايا، مش عاوز حد، ركزوا معايا، سؤال مهم جدا ممكن الناس تأثم فيه، من ثمانية بالليل لأربعة الفجر ثمان ساعات، طيب لو عايزين نجيب نص الليل نعمل إقسْم ثمانية على كم؟ على اثنين، يبقوا كام؟ أربع ساعات، نجمعهم على الثمانية بتاعة المغرب عشان نعرف نص الليل إمتى، ثمانية وأربعة، اثنتا عشرة، ده بالصدفة، فممكن يبقى نص الليل في وقت الساعة أحد عشر، فهمتوا؟ يبقى مش نص الليل الساعة اثنتا عشرة، ما فيش حاجة اسمها كده، ممكن يجي في وقت نلاقي المغرب بيأذن الساعة كذا، الفجر بيأذن الساعة كذا، نقسم على اثنين نلاقي بقي نص الليل الساعة أحد عشر.
يبقى ده آخرُك أو آخرُكِ في الصلاة، طيب على قول الحنابلة بقى؟ لا، الحنابلة عندهم لثلث الليل مش لنصف الليل، فإزاي نعملها؟ نفس المثال بتاعنا: عندنا ثمان ساعات، نقسم على كم؟ على ثلاثة، تطلع كام؟ ساعتين وكسر، تسعة على ثلاثة بثلاثة مش كده؟ فقول مثلا ساعتين ونص تقريبا يعني، ساعتين ونص نجمعهم على الثمانية، يبقى عشرة ونص، يبقى العشاء بيأذن دلوقتي كام؟ تسعة ونص، آخرك لصلاة العشاء لتخرج من الإثم عشرة ونص، فاهمين دي؟
طب احنا نعمل إيه؟ نخرج من الخلاف رجال ونساء، نساء طبعا الرجال الأصل أن هم بيصلوا في المسجد ده الأصل، إنما ما صلاش في المسجد هيصلي جماعة في البيت، الأصل أن نخرج من الخلاف يبقى نعمل إيه؟ ما نأخرش العشاء لبعد عشرة ونص دلوقتي، يبقى كده خرجنا من خلاف العلماء، مفهومة دي؟
لو أخذت شيئاً من وراء أحد إزاي أرد له حقه؟ ولو ما عرفتش أعمل إيه؟ الأول طبعا الأصل أن إنت تبعت له حاجته، ازاي؟ في صورة هدية، ممكن تدي لحد تاني حاجة يوصلها له، تحطيها قدام البيت وترن الجرس وتجري، المهم تصل له الحاجة دي، ده الأصل، ما نكسلش يعني ونحط عقبات هي مش موجودة، نقدر نشوف طريقة نوصل بيها الحاجة لصاحبها.
ما قدرناش لأي بقى مانع آخر، مانع خارج إرادتنا وخلاص يعني مات هو، سفر بلد بعيدة، وما، أي حاجة بقى، يبقى نتصدق بها بنية أنه يصل ثواب هذا الشيء.
الأطفال من سبعة لتسعة بيدخلوا المسجد، نلبس النقاب قدامهم؟ من سبعة لتسعة الأصل أنه لا يعني لا يلبس النقاب قدامهم، ده الأصل، ممكن واحد عيل يبقى عنده تسع سنين ودقر، ويعرف يوصف، ويعرف، إنما الأصل أنه من سبعة لتسعة دي سن صغيرة، هو مميز آه من سبعة لتسعة مميز، بتقول هو مميز؟ ولا بس التمييز شيء، وأن إحنا نلبس النقاب قدامه شيء تاني؟
ناخد سؤال من عندكم، ما الطريقة التي يمكن من خلالها استحضار الأدعية وقت الاحتياج؟
أنك تدعي ربنا وقت الرخاء، أنه يذكرك وقت الحاجة؛ لأن وقت الأزمة ينفسخ عزم القلب يا جماعة، أول ما يحصل مصيبة ولا ولذلك قال صلى الله عليه وسلم: «إنما الصبر عند الصدمة الأولى».
طب مين يوفق لده؟ وقت المصيبة، وقت المشكلة ينفسخ عزم القلب، شوفوا سيدنا موسى في بعد سيدنا موسى واخد الألواح من ربنا، شيء مقدس ومعظم، يقوم يروح يلاقي قومه كفروا، يعمل إيه؟ يلقي الألواح اتكسرت، من غضبه من الصدمة الأولى ما تحملش ألقى الألواح.
طيب نعمل إيه طيب؟ إحنا غلابة ومساكين، نعمل إيه؟ ندعي ربنا: يا رب ثبتنا وقت الأزمة، يا رب ذكرنا، يا رب كذا، يا رب كذا، نعمل أعمال صالحة، «بادروا بالأعمال فتناً»، ده معنى آخر بقى غير الدعاء اللي يثبتنا وقت الفتن وقت المشكلة أما تنزل، «بادروا بالأعمال فتناً كقطع الليل المظلم».
طيب إيه اللي يثبتنا وقت الفتنة، ويخلينا نتذكر الأدعية ويخلينا نتذكر الثبات؟ بادروا بالأعمال، يبقى ربنا لما يلاقي لك عبادة في الرخاء يثبتك بقى في الشدة.
كيف يصل الزوجان إلى السعادة الزوجية عن طريق خصال أو كتب يقرأها الزوجان؟ في سلسلة شرح حديث أم ذرع، أظن خمس دروس، مش فاكر كم درس، خمسة أظن أو أربعة، حاجة زي كده، اسمعوهم، دي حاجة في، يعني إحنا بنستعد لدورة شاملة في موضوع الزواج ده، من أول بقى وانت طفل صغير لغاية ما تتجوز، وإن شاء الله في كتب ممكن نقراها بعيد عن الدين، آه في وهتلاقوها منزلها في منشور قبل كذا مرة، نزلتها في كتاب الزواج المثالي، دي كلها كتب أجنبية وترجمت، الزواج المثالي، ولغات الحب الخمسة، والقبعات الست للتفكير، ومش فاكر إيه تاني، شوفوا بقى إيه كنت كاتب منشور في الحاجات اللي تتقرأ.
اتفضل، سؤال مهم جدا جاي من عند النساء والبنت اللي كاتباه يظهر أن هي صغيرة في السن، الخط يوحي بده، تقول يا شيخ: أنا بحب ناس من لعيبة منتخب مصر وعايز أنساهم، أعمل إيه؟ وعايز أتوب على أني اتفرجت عليهم وأني شفت فيديوهات ليه، قول لي نصيحة، هي يعني الكلام غلط يعني مكتوب غلط، والخط فيظهر أنها صغيرة، أنا قرأت السؤال ده علشان نشوف خطورة التعرض لمثل هذه الفتن، وده يعني هي باحت به وغيرها لا يبوح، سواء من الولاد أو من البنات، مش تحبوا لعيبة مصر يعني (يعني لو اتفرجتوا على النساء أو كده)، العين منفذ من أكبر المنافذ للقلب، العين، ولذلك أمر الله عز وجل بغض البصر للرجال وللنساء، وبعض النساء بتتهاون في ده، وهتلاقوا حاجة عجيبة في قصة غض البصر دي يا جماعة، إنه إحنا عندنا النساء شقائق الرجال، فتلاقوا الأوامر الشرعية بتيجي تخاطب المؤمنين والمؤمنات بتفهم أنه تبعا للمؤمنين هم مخاطبات بالامر، فاهمين ده؟ تيجوا بغض البصر ما تلاقوش كده، قال سبحانه وتعالى: ﴿قُل لِّلْمُؤْمِنِينَ يَغُضُّوا مِنْ أَبْصَارِهِمْ﴾ [النور: 30]، و﴿وَقُل لِّلمُؤْمِنَاتِ يَغْضُضْنَ مِنْ أَبْصَارِهِنَّ﴾ [النور: 31]، ففصل الأمر للمؤمنات.
فيبقى زي ما الرجال بنقول لهم تحرزوا وغضوا البصر، كذلك النساء يغضضن البصر، طيب عن إيه؟ ما هو، يعني عن عورة الرجل؟ لا، عن كل ما يفتن، يعني لو واحد مجرد النظر في وجهه يفتن، في رجاله كده؟ آه في رجاله مجرد ما تبص في وشة البنت تبص في وشة تفتن، عشان كان في واحد كده قام سيدنا عمر، مش كده؟ آه، وبعدين سيدنا عمر قال: لا ما هنسيبه كده، راح جاي وقال له: أحلا قرع، حلق له زيرو، احلوي زيادة، هو ربنا خلقه كده، سيدنا عمر نفاه بقى، قال له: اخرج بقى إيه ما تقعدش معانا هنا، فممكن رجل يبقى بس النظر في وجهه فتنه للمرأة، تقوم ما تيه، يعني ما تبصيش بقى.
ماشي، طيب ده شيخ؟ حتى لو شيخ ما هو ممكن يبقى شيخ فتنة، طب ده كبير في، إنت كل واحدة بقى هي عارفة يعني مين اللي ممكن يبقى ليفتنة، قلت لكم قبل كده نلاقي حرب في التعليقات يقول لك يا بنات مثلا فيديو نازل لي مثلا يا بنات ما تبصوش غض البصر، فواحدة إيه ده؟ وحش، ساعتها قلت لهم إيه؟ أنت لازم تطلقي حاجة، هتطلقي البصر وتطلقي لسانك، يعني ما ينفعش تقعدوا يعني، فلو واحد وحش زيي خلاص اتفرجوا عليه، واحد حلو بقى زي نادر كده، اتجوز بقى خلاص، يا خسارة خلاص.
فالي عاوزين نقوله بقى، الحل بقى للبنت؟ الحل للبنت أول حاجة تدعي ربنا إنه يشيلهم من قلبك، ثاني حاجة تكثري من الصيام والصلاة، ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: 45] الصبر الصوم، فتكتري من الآية، من الصوم والصلاة، اقعدي كده شهر تصومي الشهر كله، وتصلي كل يوم مثلا مئة ركعة، حتى لو خفاف يعني مش لازم مئة ركعة تطولي، على مدار اليوم كده بتصلي مئة ركعة إن شاء الله بال مثلا بالفاتحة والكوثر وقل هو الله أحد، كل الركعات ما فيش مشكلة، بنية أن ربنا يطهر قلبك ويشيل تلك الصور من قلبك، واقفلي كل المنافذ بقى اللي ممكن تؤدي أنك تبصي على حاجة زي كده، أنا قريت السؤال علشان مهم جدا.
ماشي، المرأة أضعف في الأمور دي من الرجل، خلي بالكم، هي نساء طبعا بقول للنساء: المرأة أضعف وقلبها أميل، يعني يميل بسرعة عن الرجل للأمور دي، وإذا استحكم الأمر من المرأة يبقى صعب أنه يخرج؛ لأن غالبا الغالب أن الرجل في بدايات الأمور بيبقى الدافع له الشهوة، المرأة لا، الحب هو الدافع فهي بتعيش في خيالها قصص حب، وتستحكم، والشيطان يقعد طبعا إيه؟ يزود القصاص دي عندها، فهي بتكون خلاص عاشت حالة مش مش الشهوة المحركة دلوقتي، لا، فيستحكم هذا الأمر عند المرأة ويبقى صعب أنها تنفك عنه، فمن الأول سدوا الباب ده عليكم يا بنات ويا نساء.
حكم تشغيل أغاني المهرجانات بدون موسيقى في الأفراح الإسلامية؟ شغلوا اللبانين في فرح إسلامي.
يعني لو كلامهم كويس، ما فيهوش حماسي مثلا يدعو إلى الجهاد، تعورنا عورك ومش بيقول كده، مش عارف المهرجانات دي بتقول إيه الصراحة يعني، ما عشان أقول ال، يعني ما فيش موسيقى، خلاص يبقى خلصنا من الموسيقى، يبقى الكلام بقى شكله إيه؟ مش عارف.
طيب إيه، في إيه تاني؟ أنا عايشة في بيت مش ملتزم، على طول بيشتموا ألفاظ وحشة وأغاني، ولما أنصحهم يقعدوا يتريقوا عليا، ويفكروني بالقديم أنها كانت مذنبة، أو أنت تعملي عيادة يا شيخة، مش عارفة أعمل إيه؟
ادعي لهم كتير، وربنا إن شاء الله يشرح صدورهم، وخلي لك صحبة صالحة تنفسي عن نفسك معاها.
متقدم لي عريس عنده أربعة وثلاثون سنة، وأنا عندي عشرون، هو بيصلي وبيؤدي العبادات العادية، لكن مش بيدرس علوم شرعية، بيسمع أغاني، أهلي وافقوا عليه، أنا ما كنتش أعرف عنه الحاجات دي، نصيحتك إيه؟
الأول السن، ما أعرفش أربعة وثلاثون سنة ده حاسه كتير شوية يعني، دي أول مسألة. المسألة الثانية أنه بيدرس علوم، بيدرس ما بيدرسش دي مش قضية لو أنت ما مش فارقة معاكي، يعني إحنا لازم يبقى كل الناس علماء؟ يعني مش لازم واحد عارف أساسيات دينه، بيصلي بيدي الصلاة اللي عليه، عنده معاصي؟ كلنا عندنا معاصي، يعني الحاجات دي ما هي إلا لو أنت عاوزة حد كده عشان يعينك على ده، ده موضوع تاني، إحنا مش كل واحدة نقول لها طالما مش علم شرعي ما ينفعش يبقى عريس، لا ما فيش مش كده، عاوزين واحد محافظ على دينه، دينه يعني إيه؟ راجل بيصلي، راجل بار بأبيه وأمه، راجل بياكل حلال، فلوسه حلال مش حرام، إذا بيقع في صغائر فكلنا بيقع في صغائر، ونتوب منها، فإنا ما أعرفش أنت عاوزة إيه، يعني لو، طب أنت عاوزة تبقي بتتعلمي، قولي له: أنا هاتعلم العلم الشرعي ومحتاجة وقت للعلم الشرعي، وافق وافق، ما وافقش خلاص. السن بقى أربعة وثلاثون سنة يعني بيتهالي كبير شوية، لكن برده ده ما يمنعش، ما يعني حسب الشخص مناسب ولا لا.
ممكن أترك معصية بالتدريج؟ عجزت عن ترك المعصية اعتيادا عليها، أقللها وأتركها تدريجيا؟ كلما وقعت في المعصية تبت فورا بعزم على عدم العود، عشان تصح التوبة، طيب رجعت لها بعد خمس دقائق؟ تتوبي تاني بعزم على عدم العود مطلقا. طب رجعت لها بعد عشر دقائق؟ تتوبي تاني بعزم على، عشان التوبة تصح ما هو لازم التوبة عشان تصح يبقى عزم على عدم العود، مفهومة دي؟
الأصل في المرأة أنها تبقى في البيت، فانا دلوقتي بشتغل دوامين، بخرج من بدري وبرجع متاخر، ساعات الساعة تسعة بالليل، أقسم على ده؟ ما أحوالك إيه يعني؟ ما أنا واحدة هي اللي بتصرف على البيت، مثلا يعني ده صورة من الصور، هي اللي بتصرف على بيت وما فيش حد بيساعدها، والرجالة بقت كلها قلة مروءة وقلة دين.
وقلة الأدب ما يصدقوا يلاقوا عندها ظروف يلعبوا بيها. لو هي كانت لقت اللي ممكن يكفيها من غير ما يبقى في مقارب أخرى، يعني هترمي نفسها في الشوارع لوحدها بالليل؟ لكن ما فيش لا مروءة ولا دين ولا أخلاق عند الرجال.
فتعمل إيه هي لو هي دي حالتها؟ أنا ما أعرفش حالتها إيه، إنما بقى إيه ده الكارير بتاعي، وأنا عشان الشغف والحاجات دي، وترجعي لوحدها بالليل تضيعي بيتك وتضيعي عيالك؟ لا طبعا، ما تعمليش كده، فمش عارف أنت أحوالك إيه. لو تقدري تكتفي بشغلانة واحدة والحياة تقل شوية ونتواضع شوية في المأكل والمشرب والملبس، يبقى أحسن.
لا، ده أنا يا دوبك كده وبجيب المصاريف الضرورية بالعافية. هاقول لك إيه يعني؟ ما خلاص تخرجي العمل بقى بشروط العمل، ما تعمليش حاجة حرام.
طيب، واحدة يعني سؤال طويل خلاصته، أخشع في الصلاة إزاي؟ اسمعي كتاب أسرار الصلاة لابن القيم، هتلاقيه إن شاء الله على التليجرام.
كده ها، لا خلاص، وقت لسه؟ ماشي.
واحد هندلّه في الصلاة إن شاء الله، إذا يعرف أن ربنا يعني، مش عارف حاسس أسئلتكم مش مهمة زي الستات. إزاي أبدأ تعلم فقه؟ وايه أفضل المذهب الشافعي أم الحنبلي؟ هل يجب الأخذ بالحديث الضعيف؟ أنت باعت لي سؤالين يعملوا مشاكل، ده مزقوق عليّ ده صح.
إزاي تبدأ تتعلم فقه؟ تتعلم فقه مذهبي قولا واحدا في بداية تعلمك الفقه، قولا واحدا ما عنديش أدنى شبهة في ذلك، تتعلم فقه مذهبي. شافعي بقى، حنبلي، مالكي، حنفي، تعلم أي فقه.
طيب يعني ياخد أنهي مذهب؟ اللي تلاقي فيه شيخ قوي، يعني لو لقيت شيخ قوي في المذهب الشافعي، ولو هاخد مذهب حنبلي هيبقى الشيخ كويس بس مش بقوة الشيخ بتاع الشافعي، روح للشافعي. العكس روح، يعني اللي تلاقي فيه شيخ قوي يعلمك روح له اتعلم. في البداية لازم لازم الفقه يكون في البداية على مذهب.
الحديث الضعيف بقى ده قصة كبيرة.
واحد بيقول، أنا طالب والدراسه محتاجة مني فلوس كتير، ظاهره هو اللي بيصرف على نفسه في الدراسة، أذهب لعملي من 8 صباحاً حتى 11 مساءً. وبتذاكر إمتى؟ ولا أستطيع صلاة الفجر، وفي العمل بصلي أربع فروض بصعوبة. نصيحة من حضرتك في العبادات لأني مقصر جدا، وشكرا.
استعن بالله سبحانه وتعالى، وخلي حد يصحيك للفجر يفضل وراك، وادي له تصريح إنه حتى لو هتصب عليّ مية بس ما تفوتش الفجر، لو مش قادر تنزل تصلي في المسجد يبقى أصلي جماعة مع أي حد في البيت وخلاص، طالما أنت حالتك صعبة كده يعني من 8 الصبح 11 بالليل وطالب وكده يعني.
إنما يعني خلي حد يصحيك، ما تسيبش نفسك لكده، والفروض بقى بتصليها خلاص الحمد لله في الشغل يعني. مش عارف إيه بصعوبة يعني هتسيب الصلاة يعني تقصد ولا إيه؟ شغال في شركة نقل وممكن يفوت الصلاة ولا إيه؟ في المسجد فعادي دي أصلي في البيت لأني بخاف أدخل المسجد المكنة تتسرق. يعني معاه موتوسيكل أو حاجة ويخاف يدخل المسجد الموتوسيكل يتسرق.
دول سؤالين ولا سؤال واحد؟ يعني واحد هيفوت دلوقتي في المسجد علشان هو في شركة نقل يعني بيسوق عربية أو أتوبيس، نقل ذكي يعني معاه مكنة وحد بيركب وراه، في ستات بتركب وراه. المرة اللي فاتت كم مرة كده اكتشفت بيقولوا لي بيركبوا الستات ورا الرجالة. لو بتركب وراك ستات، سيب المكنة بره دايرة وادخل صلي وتتسرق؟
لو الرفقة هتتضرر بالصلاة في الوقت، يبقى دي من الأشياء التي تبيح ترك الجماعة. لكن احنا ممكن لو أنا نقل ذكي أو يعني مش مهم يعني أي شركة، ممكن أعمل إيه؟ وقت الصلاة ما أقبلش، يبقى أنا عارف أن مثلا الظهر خلاص ناقص له دقائق وهياذن، ولو خدت الطلب ده هتفوتني صلاة، ما أقبلوش وأروح على المسجد أصلي الفرض بتاعي. ده أول سؤال.
طيب لا، أنا عامل حسابي في كده فعلا، لكن في نص الطريق زحمة فجأة واتقفل فجأة، وبعدين هقف، أو أوقف المكنة أو أي حاجة للعربية وأقول للزبون اللي معانا هنزل أصلي، هيتضرر بذلك؟ يبقى ده من المبيحات لترك الجماعة، والأولى طبعا تشوف حد تصلي معاه جماعة بعد ما توصل الطلب اللي معاك. المكنة بقى هتتسرق؟ لا، شوف لك مسجد يبقى فيه زي حوش، زي حد تدي له 5 جنيه ولا بتاع، ويفضل محافظ لك على المكنة، يعني هتلاقي لها حل إن شاء الله.
قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.