دخولتسجيل الدخول

5- الأساس | اهدنا | تدبر سورة الفاتحة

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته كما صليت على آل إbrahim إنك حميد مجيد. أما بعد.

تكلمنا في الفاتحة في أربعة مجالس، فاتحة الفاتحة ومقاصد الفاتحة والشافية والصلاة، أليس كذلك؟ من أسامي الفاتحة الأساس. ورووا في ذلك أثراً عن ابن عباس رضي الله عنهما أن لكل شيء أساساً، وأساس القرآن الفاتحة.

وكون الفاتحة أساساً، ففي وجه آخر لتسميتها بالأساس، ذلك أن أساس هذا الدين معرفة رب العالمين سبحانه وتعالى. أساس الدين أن تعرف ربك سبحانه وتعالى، ولذلك كان أول الواجبات أن تعرف الله عز وجل. والفاتحة إذا تاملناها وجدنا أن الله عز وجل عرفنا نفسه فيها بأمور. يعني هتلاقوا الفاتحة كلها تدور في فلك أن تعرف ربك سبحانه وتعالى، إما بأسمائه وصفاته، أو بأفعاله سبحانه وتعالى من أول آية لآخر آية، وقد أشرنا إلى ذلك من قبل.

فقلنا إن الله عز وجل قد عرفنا نفسه في الفاتحة بأنه سبحانه وتعالى محمود ويحب الحمد. الحمد لله رب العالمين، هذه بداية. فهو محمود سبحانه وتعالى، ويحب أن يحمد سبحانه وتعالى، ولذلك أمر عباده بأن يحمدوه وعلمهم كيف يحمدوه لأنه يحب أن يحمد، وأنه إله، وأنه رب، وأنه رحمن، وأنه رحيم، وأنه مالك، وأنه مالك يوم الدين وملك يوم الدين على القراءة الأخرى.

ونرجع تاني، معبود: ﴿إِيَّاكَ نَعْبُدُ﴾ معبود وحده، وأنه معين وحده سبحانه وتعالى: ﴿وَإِيَّاكَ نَسْتَعِينُ﴾، وأنه هادي، وأنه منعم، وأنه يضل، وأنه يغضب سبحانه وتعالى. فتلاقوا الفاتحة كلها من أولها إلى آخرها تعرفك ربك سبحانه وتعالى، فكانت أساساً. فإذا كان أساس الدين أن تعرف ربك، وكانت الفاتحة معرفة لك بربك سبحانه وتعالى، فمن هذا الوجه كانت أساساً.

ومن الأسماء التي جاءت في الفاتحة رب العالمين. طبعا الله هو اسم لله عز وجل، لكن ليس غرضنا الآن أن نتتبع الأسماء ونشرح كل الأسماء شرحاً للاسم. والله كنا أشرنا إليه من قبل لما اتكلمنا عن الحمد لله وقلنا إن الله هو المألوه سبحانه وتعالى، المعبود، وأنه يحمد على كونه إلهاً. خلينا نقولها يعني مش هنخسر حاجة لو عدنا الكلام تاني: الحمد لله، الله هو المألوه المعبود، والله يحمد على كونه إلهاً وعلى كونه رباً سبحانه وتعالى، ولذلك قال: ﴿ٱلۡحَمۡدُ لِلَّهِ رَبِّ ٱلۡعَٰلَمِينَ﴾ [الفاتحة: 2].

وأكثر الناس، أكثر الناس حتى المتدينين، غافلون عن حمد الله لكونه إلهاً سبحانه وتعالى. يعني ايه؟ يعني كم مرة تنبهت انك تحمد ربنا سبحانه وتعالى على شرعه الذي شرع؟ يعني معظم الناس إذا أراد أن يحمد الله أو أن يشكر الله، حمده وشكره على كونه رباً، أنه خلقك، وانه رزقك، وانه يعطيك، وانه يمنع عنك الشر، وأن كل ده من مقتضيات الربوبية، وكل ده، وهنيجي لرب العالمين دلوقتي.

إنما كم مرة أنت في نفسك قعدت كده تحمد ربنا وتشكرك على أنه شرع لك الصلاة؟ ولما شرع الصلاة شرعها على تلك الحيثية. بلاش، إحنا عمالين نعيد ونزيد بقالنا أربع مرات في أهمية الفاتحة وبركة الفاتحة، وأن ربنا سبحانه وتعالى لم يوجب عليك شيئاً في القرآن سوى الفاتحة، ولما أوجبها عليك ما أوجبهاش مرة ولا اثنين في اليوم، سبع عشرة مرة وجوباً! فكأنك رايت شيئاً من حكم تشريعه سبحانه وتعالى، وإلا فشرعه كله حكم.

لكن إحنا بقالنا شهر، أربع مرات، يعني شهر بندندن حول حكمة تشريع وجوب الفاتحة في اليوم والليلة سبع عشرة مرة، هل تحرك قلبك مرة أن تحمد الله على شرع الفاتحه؟ ده معنى أنه يحمد لكونه إلهاً، أن شرعه كله حكم سبحانه وتعالى. ولو تاملنا حكم الشرع، لوجدنا أنه لن تصلح الدنيا إلا بشرعه سبحانه وتعالى، فالحمد لله. الحمد لله لكونه إلهاً سبحانه وتعالى، شرع ذلك الشرع الحكيم سبحانه وتعالى، فده معنى الحمد لله.

فإحنا محتاجين نتامل شرع ربنا سبحانه وتعالى، وبالتالي ساعتها قلت لكم إن في درس اتكلمنا فيه عن أكتر حاجة بتخوف الناس في الشرع، اللي هي الحدود. ولما يجي حد علماني ولا حد لاديني ولا ملحد ولا غيره عاوز يصد الناس عن الإسلام يقول لك: الآية، الحدود! وساعتها في درس بنتكلم فيه عن قلنا لكم، اللي يسمعه هيطلع بيحب الحدود. حد سمعه، ولا إحنا ما قلناش أصلاً؟ طيب، حد سمع الدرس ده قبل كده؟ الدرس الثاني من سلسلة قبسات نور، بس ده هتلاقوه على التليجرام ما نزلش يوتيوب. ذكرته، صح؟

أيوه، قلت لكم اسمعوه، ما حدش سامع حاجة. اسمعوا الدروس يا جماعة، اسمعوا الحاجات دي مهمة، فاسمعوه ماشي. الدرس الثاني من دروس قبسات نور، بس ده هتلاقوه على التليجرام لأن الدرس ما تصورش. تحب الحدود وتشوف حكمة ربنا في تشريع الحدود، وبينا لكم قبل كده، كان جه سؤال عرضاً يعني، سؤال جالي في آخر الدرس، أن حد باين كاره آية حد السرقة أو حاجة زي كده، ساعتها قلنا لكم أن من حكم مثلا تشريع الحد أن لو بصيتوا على كل الحدود التي شرعها الله عز وجل، هتلاقوا الحدود شرعت لذنوب أو مخالفات أو مؤاخذات تتعلق بحقوق البشر، مش بحقوق الله.

فيبقى كده الحدود التي شرعت، اللي هو الناس بتخوفنا منها ويقول لك الإسلام دين مش عارف ايه، نقول لهم يا جماعة، لو تاملنا الحدود كده هتلاقي كلها عشان تحافظ على مين؟ على عليك أنت وعلى ممتلكاتك وعلى عرضك. فشرع حد القذف وشرع حد شرب الخمر؛ لأن اللي هيشرب خمر هيفسد في الأرض، هي الموضوع مش في الخمرة، الموضوع اللي بيغيب عقله ده بيفسد في الأرض، بيعمل أي حاجة. ورووا قصة كده أنه يعني واحد سموه، قالوا له يا تقتل ده يا تزني بدي يا تشرب خمر، فقال والله إيه، لا قتل وزنا إيه، أخف إيه، شرب الخمر. شرب الخمرة قتل وزنا، يعني قصه كده بيحكوها أنه إن الخمر تذهب العقل فبتخليك تعمل كل حاجة. وكذلك بقى باقي الحدود، حد الزنا، وهكذا، فشرع جميل، والله سبحانه وتعالى محمود لألوهيته، كما أنه محمود لربوبيته سبحانه وتعالى.

فإحنا بنحمد ربنا على أنه الله، على أنه الإله الذي شرع لنا ذلك الشرع. خلاص، ولو عاوزين تفهموا معنى وجود الشرع، بصوا على أي دولة يحصل فيها انفلات أمني، وإزاي الناس تتمنى رجوع التشريع الذي يحكم البلاد، حتى لو كان تشريع وضعي، اللي هو لو قسناه إلى تشريع الإله سبحانه وتعالى يترمي في الزبالة. يعني هو عقول البشر هتعمل حاجة مش هقول لك تبقى تساوي، تقترب من تشريع رب البشر؟ مستحيل، مستحيل! اللي يفكر كده أن تشريع الناس، أي تشريع يحطه البشر أياً كان مين هم، مش هيداني تشريع رب العالمين. ده، لا، طبعا، عمر ما ده يحصل، مش كده؟ والايبقى ليك نصيب من قوله تعالى: ﴿أَنَّىٰ تُسَوُّونَ بِرَبِّ ٱلۡعَٰلَمِينَ﴾ [الشعراء: 98]. يبقى أنت هتسوي المخلوق بالخالق، وتسوي نتاج عقل المخلوق بنتاج الخالق، بتشريع الخالق سبحانه وتعالى. فالحمد لله.

ثم قال: ﴿ٱلۡحَمۡدُ لِلَّهِ رَبِّ ٱلۡعَٰلَمِينَ﴾ وده اللي إحنا عاوزين بقى نتكلم عنه، أن الله عز وجل رب العالمين، والرب له عدة معاني في اللغة، منها السيد، ومنها المربي المصلح، فدي من معاني الرب، ومنها المالك. نقول إيه زي ما أبو طالب قال إيه: أنا رب الإبل. يعني أنا مالك الإبل، لما جه الفيل وأبرها، فقال: أنا رب الإبل، يعني أنا مالك الإبل، و"للبيت رب يحميه". فالرب يعني نقول رب البيت، يعني مالك البيت. فهي من معاني الرب: المالك، ومن معاني الرب: المصلح والمربي، ومن معاني الرب: السيد. "إنه ربي أحسن مثواي" سيدي. هنا يوسف بيتكلم على العزيز أنه ربي أحسن مثواي، يعني أنه سيدي أحسن مثواي.

فدي كلها من معاني الرب، والله عز وجل رب بكل هذه المعاني، فهو مالك، وهو مصلحك، وهو سيدك سبحانه وتعالى، فالحمد لله لكونه رباً، يحمد كما يحمد على الألوهية، يحمد على الربوبية سبحانه وتعالى.

ومن الجميل أنك لو تتبعت أدعية القرآن، هتلاقي معظم أدعية القرآن جاءت مفتتحة بالربوبية. يعني مثلاً زي دعاء موسى: ﴿رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ﴾ [القصص: 24]. دعاء ختم البقرة: ربنا لا تؤاخذنا إن نسينا... ربنا ولا تحمل علينا... ربنا ولا تحمله ما لا طاقة لنا به... هتلاقي تتبع بقى أدعية القرآن ماشي. "رب اجعلني مقيم الصلاة ومن ذريتي ربنا وتقبل دعاء" إلى آخر الآية. يعني لو تتبعت أدعية القرآن، هتلاقي معظم أدعية القرآن مفتتحة بالربوبية، مش بالالوهية ولا باسم تاني.

حتى لما افتتحت بالألوهية، ضم إليها الربوبية، كدعاء عيسى عليه السلام: ﴿ٱللَّهُمَّ رَبَّنَآ أَنۡزِلۡ عَلَيۡنَا مَآئِدَةٗ مِّنَ ٱلسَّمَاءِ﴾ [المائدة: 114] فقال: اللهم، وبعدين ربنا.

طيب ليه يا جماعة؟ اشمعنى الرب الذي يدعى به، مع أن الله عز وجل قال: ﴿وَلِلَّهِ ٱلۡأَسۡمَاۤءُ ٱلۡحُسۡنَىٰ فَٱدۡعُوهُ بِهَا﴾ [الأعراف: 180]؟ وقالوا: يعني إيه فادعوه بها؟ يعني تختار من الأسماء الحسنى الاسم المناسب للدعاء، فتقول: يا غفور اغفر لي. ليه؟ لأن مناسب، أنت عاوز مغفرة، فتسأل ربنا باسمه الغفور. يا رحمن يا رحيم، ارحمني، محتاج رحمة، تسأل ربنا بالرحمن الرحيم.

هتلاقوا يعني في المغفرة لما جه سيدنا نوح يدعي بالمغفره قال إيه: ﴿رَبِّ ٱغۡفِرۡ لِي وَلِوَٰلِدَيَّ﴾ [نوح: 28] أهو، رب برضه، ما قالش يا غفور اغفر لي ولوالدي. الرب، ليه بقى؟ علشان إحنا قلنا من معاني الربوبية المصلح، ومن معاني الرب المصلح، وأنت دعاؤك كله تريد به الإصلاح، أما جلب مصلحة أو دفع مفسدة. صح؟ كل الدعاء بتاعنا كده، دعاء المسألة، أنت بتسال ربنا حاجة، الحاجة دي بتسالها ليه؟ لأنك تظن فيها أن هي مصلحة ليك، ولا هتروح تدعي ربنا بحاجة أنت عارف أن ماهاش مصلحة ليك؟ لا، ما فيش كده. تدعي ربنا بأي حاجة لأنك تظن أن فيها مصلحة ليك. ولو دعيت ربنا إنه يصرف عنك شيئاً، فانت بتدعي لأن أنت شايف أن المصلحة في صرف ذلك الشيء لأنه مضار ليك، ومن معاني الرب المصلح، فناسب أنك تفتتح دعاءك باسم الرب سبحانه وتعالى.

فهمتوا دي؟ والمعنى الثاني أن الرب سبحانه وتعالى هو المالك، هو مالك، هو مالك. فكأنك ضمناً وأنت بتقول ربي أو ربنا، كأنك ضمناً بتقول له: يا رب أنا ملكك، أنا ملكك وأنا عبدك، فأصلح لي شاني كله. ما هو أنا ملكك، لأني في عادة الناس، حتى الإنسان لا يفسد ملكه. في عادة الناس، يعني واحد عنده أملاك مش هيروح يدمر أملاكه، صح؟ ولله المثل الأعلى. فكأنك بتقول له إيه: يا رب أنا ملكك وأنا عبدك، فأصلح ملكك. فتبدأ باسمه الرب سبحانه وتعالى، وهو طبعا غير محتاج لهذا الإصلاح، يعني الفرق بين ربنا وبيننا أنك لما بتصلح ملكك لأنك محتاج للملك، لا، هو مش محتاج لك، هو سبحانه وتعالى مش محتاج. فناسب أنك تبدأ بالربوبية في الدعاء: ربنا أو ربي، وهتلاقي بقى تتبعوا دعاء القرآن بقى، هتلاقوا معظم دعاء القرآن كده، سواء دعاء الأنبياء أو... آه، كل، يعني كله هتلاقي معظم الدعاء كده.

فديكوا فهمتوا السر في افتتاح الدعاء بالربوبية. فأنت بقى في الفاتحة، فاتحة تحمد لكونه رباً، وإحنا هنا مش جايين نتكلم على علاقة الحمد بالربوبية، لأن ده في شرح الفاتحة، إحنا لسه ما شرحناش الفاتحة، إحنا بنعرف ربنا يا جماعة دلوقتي، مش بنعرف هو يحمد ليه على أنه رب، بس بنفهم يعني ايه رب.

فلما تعرف أنه رب العالمين، يعني هو مالك للعالمين سبحانه وتعالى، وسيد لهم، ومصلح لهم، ومربي لهم، ده معنى الرب.

طيب، إيه الفرق بين المالك والسيد؟ السيد ده زيّه زي الملك كده. ركزوا عشان هتكتشفوا مفاجأة دلوقتي! يبقى الرب من معانيه أنه مالك ومن معانيه أنه ملك سيد. إيه الفرق بينهم؟ المالك هو المتصرف في الشيء، والملك أو السيد هو ذو السلطان الآمر الناهي. يعني إيه الكلام ده؟ يعني حضرتك عندك بيت ملكك، بتاعك، تعرف تبيعه؟ أه، تعرف تهبه وتديه هدية لحد؟ أه، ما هو أنت بتاعك، ملكك، مكتوب باسمك.

طيب، رئيس الدوله أو ملك المملكة، يعرف يبيع بيتك؟ ما يعرفش يبيع بيتك؛ لأنه ملكك أنت، البيت ده ملكك أنت. يعرف يهبه لحد؟ ما يعرفش يهبه لحد؛ لأنه مش ملك ليه. فهمتوا الفرق بين المالك والملك؟ لكن هو ممكن يعمل إيه؟ يضع قوانين أو يسن قوانين بها ينظم عملية البيع اللي أنت هتباعها دي. فيقول لك أه، لما تبيع بيتك فلازم تروح تسجل في حاجة هنسميها الشهر العقاري، ولما تبيع بيتك ممكن نحط إيه رسوم معينة تدخل في خزانة الدولة، ولما تبي... دي كلها إيه؟ هو أمر ناهي، هو دلوقتي هو ذو سلطان، إنما هو نفسه ما يقدرش يبيع بيتك، لكن ينظم عملية البيع دي، ينظمها بإيه؟ بأمره ونهيه. فهمتوا الفرق بين الملك والمالك؟ فهمتوا دي؟

فالله عز وجل رب العالمين، فهو مالك العالمين وملك العالمين، وهذا في الدنيا. وبعدين تلاقيه بعديها على طول هيقول لك: مالك يوم الدين وملك يوم الدين، فهو سبحانه وتعالى مالك الدنيا والاخرة وملك الدنيا والاخرة سبحانه وتعالى، فهو رب العالمين، ومالك وملك يوم الدين سبحانه وتعالى. وهنجلها دلوقتي، وتتوسط الآيتين: ﴿ٱلرَّحۡمَٰنِ ٱلرَّحِيمِ﴾ [الفاتحة: 3].

هذا ترتيب عجيب! ولما نجي للرحمن الرحيم هنفهم ليه، بس إحنا كده فهمنا أنه رب الدنيا والاخرة؛ لأنه ملك الدنيا والاخرة ومالك الدنيا والاخرة جل وعلا، فهو رب الدنيا والاخرة.

فيبقى ربنا عرفنا نفسه بأنه رب العالمين. ولما تعرف أن رب العالمين، قلنا لكم قبل كده يثمر في قلبك إيه؟ أنت بتقرأ الفاتحة ليه 17 مرة؟ يعني هو ما فيش قرآن نقرأه، خصوصاً خصوصاً أن التكرار؛ التكرار ده في العادة بيولد عدم الشعور بالمقروء وعدم التدبر في المقروء، صح؟ طبيعة الناس كده، اللي هتقعد تكرره كتير هتلاقي نفسك مش، يعني حتى الإمام يقرأ الفاتحة، حتى لو صوته حلو ولا حاجة، الناس ما تأثرش، تبتدي تأثر بما بعد الفاتحة.

فكان لو احنا عاوزين بقى مصلحة الناس، نقول لهم كل ركعة اقرأوا حاجة جديدة، فتلاقي ربنا ما عملش كده، خلى كل ركعة وجوباً تقرا الفاتحة، وبعدين اقرأ ما شئت، ولو اقتصرت على الفاتحة صحت صلاتك، يعني اللي بعد الفاتحة ده سنة، ما قريتوش صلاتك صحيحة. الله! طب ليه يا رب؟ ليه نكرر؟ إذا كان التكرار يقول لك: لا بقى، أنت أحمل نفسك على أنك تتدبر دي بالذات، يبقى في معاني في دي، وإلا كان يبقى الأصلح لك أنك تقرا أي قرآن مختلف. فربنا قال لك: لا، الأصلح لك -وأنا أعلم بالأصلح لك- أنك تقرا الفاتحة كل ركعة، وتجاهد نفسك أن تتدبر الفاتحة، وأن توقن بمعاني الفاتحة، التي منها أنه جل وعلا رب العالمين.

طب تثمر إيه في قلبك أنك عرفت أن هو رب العالمين؟ قلنا طبعا ده معاد، بقى الكلام ده احنا قلناه في غير محله قبل كده، لما تعرف أن رب العالمين، أول حاجة تطمن لتدبيره ليك في نفسك، لأنك واحد من العالمين، صح؟ فتفوق وتعرف أن اللي بيقدره أمرك هو الله الذي هو رب العالمين، فتقوم تطمن، حتى وإن جرت المقادير بما لا تشتهيه، أو بما كنت ترغبه في عكسه، وتعرف أن ده تقدير ربنا سبحانه وتعالى الذي هو رب العالمين، وأنك واحد من هؤلاء العالمين، تقوم تطمن لتدبيره سبحانه وتعالى لأنه رب العالمين.

يبقى دي أول حاجة وأنت بتقرا الفاتحة تطمن لها. قلنا لكم ساعتها: تبقى رايح تتقدم لعروسه، وبعدين ما يوافقوش، نازل متضايق، تيجي صلاة الظهر تقوم داخل مصلي الظهر، تفتتح الصلاة: الحمد لله رب العالمين، تقوم تطمن كده وينشرح صدرك لأنهم ما وافقوش، تقول: خلاص هو اللي دبر لي أمري سبحانه وتعالى. وظيفة ونفسك فيها، واترفضت في الإنترفيو، ونزلت صلاة العصر: الحمد لله رب العالمين، خلاص، هو مدبر الكون، ومن تدبيره سبحانه وتعالى أنك ما تبقاش في الوظيفة دي، أنك ما تاخدش البنت دي، أنك ما تاخديش الراجل ده، تقوم تطلع من صلاة بقلب غير القلب اللي دخلت به، فهو رب العالمين، يبقى دي أول حاجة.

تاني حاجة: تخاف ليه من العالمين بقى؟ تخاف ليه وترجو العالمين؟ يبقى رب العالمين تنفي عنك الخوف والرجاء إلا منه سبحانه وتعالى، ليه؟ أصل رب العالمين، فهو سيدهم، وهو مالكهم، فأنت خايف منهم ليه؟ ده نواصيهم بيده سبحانه وتعالى، مش كده؟ عشان كده هود سيدنا هود قال إيه؟ ﴿فَكِيدُونِي جَمِيعًا ثُمَّ لَا تُنظِرُونِي * إِنِّي تَوَكَّلْتُ عَلَى اللَّهِ رَبِّي وَرَبُّكُم ۚ مَّا مِن دَابَّةٍ إِلَّا هُوَ آخِذٌ بِنَاصِيَتِهَا﴾ [هود: 55-56]. هود بيتحدى لوحده القوم كلهم: كيدوني جميعاً، جميعاً يعني مجتمعين، يعني مش واحد وراء الثاني، مش كيد وراء كيد، لا، كلكم كده اجتمعوا وكيدوني جميعاً، ثم لا تنظِروني، أنا مش عاوز مهلة حتى، ليه؟ أني توكلت على الله ربي وربكم، ومن مقتضيات الربوبية: ما من دابة إلا هو آخذ بناصيتها. أنت عارف لما تمسك واحد من دماغه كده لو أنت يعني استحكمت الماسكة تقدر تسوقه في أي حته، ده معنى الناصية.

ومما قيل بقى بعد الطب ما اكتشفوا حاجات وبتاع، قالوا أن مراكز التفكير واتخاذ القرار في الناصية في مقدم الراس، فربنا آخذ بالناصية، فيخليك ويخلي العالمين تفكر فيما يؤدي إلى قضائه وقدره، ما هو هو اللي آخذ بالناصية. ولما يكون مراكز التفكير ومراكز اتخاذ القرار في الناصية، يبقى إيه؟ يبقى أنت فاكر أنك حادق وأنك بتفكر ومش عارف إيه، وأنت يا مسكين في الآخر لم تخرج عن قضائه وقدره، فهمتوا دي؟ وقل مثل ذلك في كل البشر، هو آخذ بنواصي العباد كلهم، فتخاف ليه من حد ولا ترجو ليه حد، وهو رب العالمين جل في علاه؟

يبقى ده معنى رب العالمين، أنه أنت ملك، ولذلك: أنا لله، إن عبيد لله، وأنا مملوكون لله سبحانه وتعالى، فتنفي عنك رؤية أي استحقاق لنفسك، أنت في الآخر حتة عبد، في الآخر أنت حتة عبد، لا رحت ولا جيت، ومنك كتير، فما تشوفش نفسك وما تشوفش استحقاقاً. أنا لله سبحانه وتعالى عبيد له، مملوكون له، مربوبون له، مقهورون تحت سلطانه جل وعلا، فهذا رب العالمين جل في علاه مالك، سيد، مصلح سبحانه وتعالى.

ماشي، يبقى يعني مش عاوز إيه؟ احنا الدرس مش شرح الأسماء، لأن رب العالمين لوحدها ممكن تاخد كذا درس، الرحمن لوحدها والرحيم لوحدها، احنا بس بنقف على بعض المعاني التدبرية التي وأنت بتعرف بها ربنا، لأن ربنا هو اللي عرفنا نفسه بهذا في الفاتحة. الرحمن الرحيم، وقبل ما ندخل في الرحمن الرحيم، موقع الرحمن الرحيم من السورة عجيب، هتلاقوا رب العالمين، مالك يوم الدين، بينهم الرحمن الرحيم، كان فيها إشارة إلى أن الله عز وجل رحمن الدنيا والآخرة ورحيمهما، وجاء ذلك في حديث. فإذا كان هو سبحانه وتعالى رب العالمين في الدنيا، وإذا كان هو سبحانه وتعالى مالك يوم الدين وملك يوم الدين في الآخرة، فهو رحمن رحيم فيهما.

طيب، إيه الفرق بين الرحمن والرحيم؟ أقوال للعلماء، من أشهر تلك الاقوال: أن الرحمن وزن فَعْلَان، وهذا الوزن في اللفظ يفيد السعة والامتلاء، فلا يقال: فلان غضبان، إلا إذا امتلا غضباً، يعني ده من حيث اللغة يعني. طب لو غضبان بس غضب قليل؟ يقولوا إيه؟ فلان غاضب، فلان غاضب يقولوا كده، إنما لو امتلا غضباً يعني الغضب بقى شديد قوي، يقولوا: فلان غضبان، ده من حيث اللغة، عشان كده قالوا: لا يقضي القاضي وهو غضبان، لأنه وهو غضبان مش هيبقى مركز في الحكم اللي هيطلعه، فده من حيث اللغة.

فقالوا أن الرحمن -طبعا كلا الاسمين الرحمن الرحيم مشتق من الرحمة، فواضح ودي واضحة الرحمن الرحيم الاثنين من الرحمة، وهما اسمان لله عز وجل- أما يكون بقى الرحمن يعني واسع الرحمة بهذا، والرحيم على وزن فَعِيل معناها عظيم الرحمة. واديناكم مثال قبل كده لو تفتكروا، فاكرين الفرق بين الواسع والعظيم؟ أيوه، مثال المئة ألف جنيه لو تفتكروا، قلنا لكم: لو أنا طلعت من جيبي دلوقتي مئة ألف جنيه، وبعدين وزعت عليكم فأديت لكل واحد مئة جنيه، أنا كده واسع العطاء ولا لا؟ واسع العطاء، يعني شملت الجميع بالعطاء. عظيم العطاء؟ يعني كل واحد بالنسبة له العطاء ده عطاء عظيم؟ لا، المئة جنيه يعني رقم مش ضخم.

طيب، لو طلعت من جيبي مئة ألف جنيه ورحت اخترت واحد وأديته المئة ألف جنيه، أنا كده واسع العطاء؟ لا، إنما عظيم العطاء، عظيم العطاء لهذا الشخص. الله جل وعلا واسع الرحمة، عظيم الرحمة، فهمتوا دي؟ يبقى هو الرحمن يعني واسع الرحمة: ﴿وَرَحْمَتِي وَسِعَتْ كُلَّ شَيْءٍ﴾ [الأعراف: 156]، وهو سبحانه وتعالى عظيم الرحمة، جعل الرحمة مئة جزء، أنزل منها إلى الدنيا جزءاً واحداً، به يتراحم الخلق، حتى أن الدابة ترفع حافرها عن ولدها، كل الرحمه اللي بينا في الدنيا دي جزء من مئة جزء، فإذا كانت الآخرة، رد الله ذلك الجزء ورحم الناس بالمئة جزء، فرحمته سبحانه وتعالى رحمة عظيمة ورحمة واسعة سبحانه وتعالى.

وقيل: إن الرحمن متصف بالرحمة، والرحيم موصل لتلك الرحمة، يبقى الرحمن صفة ذات، والرحيم صفة فعل. لا، مش فاهمين؟ تعالوا أفهمكم. دلوقتي أنا واحد شفت مثلاً اتنين عيال صغيرين بيضربوا بعض بره، فعيِّل صغير ماسك العيل التاني، اتنين صغيرين عيال ماسك العيل التاني طاحنه، وجايب دم من كل حتة، فرحمته، فأنا كده متصف بالرحمة مش كده؟ وبعدين رحت رايح حاجب الصغير ده عنه، وخدته كده إيه بقى، أديته بونبوني ولطفت معه الجو، فأنا كده متصف بالرحمة؟ أه. وصلت له رحمتي دي ولا ما وصلتهاش؟ وصلتها، حجبت عنه الظلم، ورضيته وضحكته، فوصلت له رحمتي، مفهومة دي؟

نفس المثال، أنا طالع لقيت نفس العيل الصغير تاني بيضربه، بس لقيت سبعة ثمانية بلطجية ماسكين سلاح، هم اللي بيضربوه، رحت واخد بعضي وإيه ولا كأني شفته. طيب، أنا رحمته؟ أه، رحمته يعني هو صعب عليا، عرفت أوصل له رحمتي دي؟ ما عرفتش أوصل له رحمتي، مع أني رحيم، يبقى أنا متصف بالرحمة؟ أه، متصف. وصلت رحمتي؟ ما عرفتش أوصل رحمتي.

طب ليه ما عرفش أوصل رحمتي في المثال ده؟ علشان أنا أضعف من أني أوصل له رحمتي، فهمتوا الفرق بين واحد متصف بالرحمة وواحد يعرف يوصل الرحمة دي؟ خلاص. ممكن برده ما اعرفش أنا رحيم يعني أنا أه متصف -أو عفواً- أنا متصف بالرحمة خلوني أسيبكم الرحمن الرحيم دلوقتي، متصف بالرحمة، لكن الولد اللي بيضرب ده بيتضرب في الشارع اللي ورا، وأنا ما أعرفش أن في حد بيتضرب في الشارع اللي ورا، ولو كنت أعرف كنت عرفت أوصل له الرحمة، فأنا ما عرفتش برده أوصل له رحمتي ليه؟ للجهل هنا مش للضعف، هنا لأني جاهل أن في واحد محتاج رحمتي.

أنا عملت الأمثله دي ليه؟ عشان بعد كده لما نرجع لربنا نقول له المثل الأعلى، فأقول ربنا بقى هتفيدكم الحاجات دي، لما أجي أقول لك: ربنا بقى متصف بالرحمة وموصل للرحمة، ليه؟ لأنه سبحانه وتعالى لا يعجزه شيء، سبحانه وتعالى لا يجهل شيئاً، فلذلك كان رحمن رحيماً، يبقى متصف بالرحمة ويصل الرحمة، مين هيمنع؟ ربنا قال في القرآن: ﴿مَّا يَفْتَحِ اللَّهُ لِلنَّاسِ مَحْرَمَةٍ فَلَا مُمْسِكَ لَهَا﴾ [فاطر: 2]. مين ده اللي هيمسك رحمته؟ ولا مين ده اللي هيعرف يمنع رحمته؟ ده من الإجرام الناس تقول، يقول لك إيه؟ يقول لك إيه: لا بيرحم ولا بيخلي رحمة ربنا تنزل! مين ده اللي لا يخلي رحمة ربنا تنزل؟ مين ده إن شاء الله؟ ﴿مَّا يَفْتَحِ اللَّهُ لِلنَّاسِ مِن رَّحْمَةٍ فَلَا مُمْسِكَ لَهَا﴾ [فاطر: 2]. مين ده اللي يمنعها ده؟

فالله عز وجل رحمن رحيم ليه؟ لأنه قوي، ولانه عليم، سميع بصير. شوفوا الأسماء بتنفذ على بعض إزاي؟ أول ما تعرف أنه رحمن متصف بالرحمة، والرحيم موصل للرحمة، على طول من غير ما أقول لك أنت تستنتج أن هذا الإاله قوي، ما فيش حاجة تعجزه، وأنه عليم ما فيش حد هيبقى في موطن يحتاج للرحمة وهو ما يعرفش جل وعلا، فده فرق بين الرحمن والرحيم.

فلذلك لكونه رحماناً سبحانه وتعالى يرحم أهل الكفران، ما احنا لو قلنا إن الرحمن واسع الرحمة، يبقى برحمته الواسعة دي يرحم أهل الكفران، ومن رحمته بهم أنه سايبهم عايشين، دي رحمة. وأن من رحمته بهم أن لو واحد منهم تاب ونطق الشهادة يقبله، حتى لو كان من أعدى أعداء الدين قبل كده يقبل، ودي رحمة منه سبحانه وتعالى. ومن رحمته بهم أنه قسم لهم أرزاقاً في الدنيا، مش كده؟ دي برده من رحمته، ما هو في الحديث: «لو أن الدنيا تزن عند الله جناح بعوضة ما سقى منها كافراً شربة ماء»، ويستطيع سبحانه وتعالى أنه ما يسقيش الكافر، لكن ده من جملة رحمته بهم الواسعة التي وسعت كل شيء، فكل ده من رحمته سبحانه وتعالى، إنما رحمته العظيمة بقى قالوا: دي خاصة بالأيمان، باهل الإيمان، ولذلك: ﴿وَكَانَ بِالْمُؤْمِنِينَ رَحِيمًا﴾ [الأحزاب: 43]، مش رحماناً، ﴿وَكَانَ بِالْمُؤْمِنِينَ رَحِيمًا﴾.

خلاص يا جماعة، فيبقى ده أهم الفروق بين الرحمن والرحيم، وقالوا: إن الرحمن يسمى به غير ربنا سبحانه وتعالى، إنما الرحيم ممكن يتقال على البشر، نقول: فلان رحيم، بل ربنا ذكر أن النبي عليه الصلاة والسلام ذكر أنه رحيم، قال إيه؟ بالمؤمنين رؤوف رحيم ولا إيه؟ أه، بالمؤمنين رؤوف رحيم، مش كده؟ بالمؤمنين رؤوف رحيم، ﴿لَقَدْ جَاءَكُمْ رَسُولٌ مِّنْ أنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَّحِيمٌ﴾ [التوبة: 128]. في كده: من أنفسكم، قراءة شاذة دي معناها حلو برده، من أنفسكم، عزيز عليه ما عنتم، يعني صعب عليه جداً وشديد وشاق هلاكنا صلى الله عليه وسلم، حريص عليكم. شوف سيدنا النبي ورحمته عليه الصلاة والسلام، في الحديث: «أنا آخذ بحجُزكم عن النار، وأنتم تبتدرونها وتقتحمون فيها»، عمال يقول لكم: ابعدوا عن النار، ابعدوا عن النار، هتدخلوا النار، واحنا بجهلنا وغطراستنا عمالين نقتحم في النار، فللمؤمنين رؤوف رحيم.

ولذلك ما نعرفش حد اتسمي رحمن إلا المخذول مسيلمة الكذاب، سمى نفسه رحمن اليمامة وخذله الله وأخذه. خلاص، فيبقى ده الفرق بين الرحمن والرحيم، فالله عز وجل عرفنا نفسه بأنه رب العالمين، وأنه رحمن رحيم، وأنه مالك يوم الدين، ومالك يوم الدين.

يقع في نفس شيء والله أعلم، ومحله بحث عاوزين نشوف حد قال اللي أنا هقوله ده ولا لا، أن يعني أنا لما بقرا الرحمن الرحيم، يقع في نفسي أنها أرجى آية في كتاب الله عز وجل، طبعا العلماء لهم أقوال في أرجى آية في كتاب الله، وفي آيات كتير العلماء اتكلموا فيها أن هي أرجى، لكن كل ما أقرأ الرحمن الرحيم في الفاتحة -في الفاتحة خاصة- يقع في نفسي أنها أرجى آية في كتاب الله عز وجل، لأن الله عز وجل لما أراد أن يعرفنا نفسه في فاتحة كتابه، اختار هذين الاسمين: الرحمن الرحيم، ما جابش اسمين تانيين.

يعني كان ممكن يعرفنا أنه القوي أنه الجبار، لا، لما أراد أن يعرفنا نفسه، عرف نفسه بهذين الاسمين خصوصا يا شباب على قول من يقول من أهل العلم وهم كثير أن البسملة آية من الفاتحة، على هذا القول بالذات يبقى ربنا كرر الاسمين الشريفين في البسملة أو ذكرهما ثم أعادهما مرة أخرى في قوله الرحمن الرحيم فتقول في الفاتحة بسم الله الرحمن الرحيم تبقى أول آية من الفاتحة فتقول الرحمن الرحيم الحمد لله رب العالمين الرحمن الرحيم.

فلما تعرف أن دول الاسمين اللي ربنا اختار يعرفنا نفسه بهما في فاتحة كتابه اللي بعد كده هيوجبها علينا 17 مرة في اليوم والليلة، تجد أن تلك الآية آية عظيمة جدا جدا في الرجاء، لأن بمفردها تدلك على أن الرحمة سابقة ده بمفردها لو ما فيش أي نصوص أخرى، يعني أما تقرا كده تقوم أنت تعرف أن أعظم صفة لله عز وجل وتسبق جميع الصفات هي صفة الرحمة، لأنه لما جه عرفنا نفسه، عرفنا نفسه بتلك الصفة مش كده.

طب المعنى ده موجود أصلاً في نصوص؟ آه، موجود في نصوص أن الله عز وجل لما خلق الخلق كتب كتاباً فهو عنده على العرش: «أن رحمتي سبقت غضبي».

فرحمة ربنا سابقة سبحانه وتعالى، لو لم تأتي تلك النصوص وغيرها، لو لم تأتي تلك النصوص لكنا استفدنا هذا فقط بملاحظة اختيار الاسمين الشريفين ليعرفنا ربنا نفسه بهما في فاتحة كتابه، فهي أرجى آية وأنت بتقرا كده الرحمن الرحيم ترجو رحمة ربنا اللي ما عرفناش نفسه غير بدول بعد كده هنعرفه بحاجات تانية لكن دي فاتحة الكتاب اللي هو المقدمة لكتاب الله عز وجل اللي هي هتبقى واجبة عليك 17 مرة تقراها في اليوم والليلة، عرف ربنا نفسه لنا فيها بأنه رحمن رحيم سبحانه وتعالى.

الرحمن الرحيم ثم هو ملك يوم الدين ومالك يوم الدين، وقلنا لكم إيه الفرق بين الملك والمالك، خلاص خلصنا من الفرق، فكما أنه مالك الدنيا وملك الدنيا فهو رب العالمين، هو كذلك ملك الآخرة ملك يوم الدين ومالك الآخرة مالك يوم الدين، فلا ملك لأحد يوم القيامة يعني في الدنيا ممكن يبقى في ملك صوري، ما هواش ملك حقيقي، خلي بالكم اللي أنا بقوله ده مش كلامي، ده كلام ربنا، ربنا لما جه يأمرك بالانفاق قال: ﴿وَأَنفِقُوا مِمَّا جَعَلَكُم مُّسْتَخْلَفِينَ فِيهِ﴾ [الحديد: 7]، فاصحى اصحى، ملكك ده ملك صوري ملك صوري، ربنا اللي بيقول لك كده، ده مال الله، أمال أنت آخرتك إيه أو آخِرك إيه في المال؟ أنك مستخلف فيه.

وقل مثل ذلك في الدنيا كلها، قال صلى الله عليه وسلم: «إن الدنيا حلوة خضرة، وإن الله مستخلفكم فيها فينظر كيف تعملون، فاتقوا الدنيا»، فلا الفلوس فلوسك ولا العقار عقارك ولا الدنيا دنيتك، أنت جاي شوية وماشي، والفلوس اللي في جيبك النهارده في جيب غيرك بكره، والعقار اللي باسمك النهارده بكره هيقسموه الورثة، فاصحى كده وفوق، اصحى وفوق.

الملك السوري بقى اللي في الدنيا ده منفي يوم القيامة، ومنفي لدرجة بعيدة جداً، يعني بداية كل ملك ليك في الدنيا ما هواش بتاعك بقى وخلاص، ما فيش حد يجي يقول إيه يصحي يوم القيامة يقول إيه هو فين البيت بتاعي اللي كان فيها، فين القصر بتاعي، قصر إيه وبيت إيه اصحى، قصر إيه وبيت إيه وفلوس إيه ولا هتلاقي ده وده أدنى شيء، لا خد المفاجأة ده، ملكك لأعضائك ينتفي.

يعني هل في الدنيا يتصور أن حد يملك أعضائك يعني أنا عاوز أحرك إيدي فألاقي حد تاني له قدرة على يدي يخليها ما تتحركش أو العكس ما دي مش موجودة بقى في الدنيا دي، أهو يوم القيامة حتى ملكك لأعضائك منتفي، فتلاقي فجاه كده عمال تقاوح ربنا يطلق لسانك على فكرة إطلاق اللسان ده عشان بس إقامة الحجة وإلا فأنت حتى لسانك ما هواش ملكك يوم القيامة، لكن ربنا يقيم الحجة عليك، تعالوا يا ملايكة عمل إيه عمل واحد اتنين تلاتة، إيه رأيك كذب، كذب، وبعدين أنا لا أرضى إلا شاهداً من نفسي، يختم الله على فيه وتتكلم الأعضاء، تتكلم الأعضاء.

طبعاً ده مش برغبته ولا بإرادته، ملكه لأعضائه خلاص انتفى، فتقول اليد عمل بها كذا، وتقول الرجل عمل بها كذا، ويقول الفرج عمل بها كذا، وتول العين عمل بها كذا، ثم يطلق الله لسانه فيقول قول ويحكن عن كن كنت أجادل أو أناضل أو كما قال، فتقول: ﴿أَنطَقَنَا اللَّهُ الَّذِي أَنطَقَ كُلَّ شَيْءٍ﴾ [فصلت: 21]، فملكك لأعضائك حتى هيختفي.

ونفى الله الملك والملك جميعاً يوم القيامة، ﴿لِّمَنِ الْمُلْكُ الْيَوْمَ لِلَّهِ الْوَاحِدِ الْقَهَّارِ﴾ [غافر: 16] يجيب نفسه فلا ملك لأحد يوم القيامة والملك قال سبحانه وتعالى وبنفس اللفظ: ﴿وَمَا أَدْرَاكَ مَا يَوْمُ الدِّينِ * ثُمَّ مَا أَدْرَاكَ مَا يَوْمُ الدِّينِ * يَوْمَ لَا تَمْلِكُ نَفْسٌ لِّنَفْسٍ شَيْئًا﴾ [الانفطار: 17-19].

يبقى لا في ملك ولا في ملك، هنا بيقول مالك يوم الدين وفي الآية الثانية وما أدراك ما يوم الدين ثم ما أدراك ما يوم الدين يوم لا تملك هنا بقى ملك مش ملك نفس لنفس شيئاً، وقالوا أن النكرة في سياق النفي تفيد العموم، يعني يوم لا تملك أي نفس لأي نفس شيئاً.

تعالوا نفهم الآية كده يوم لا تملك نفس لنفس شيئاً يبقى نفسي لا تملك لنفس غيري شيئاً صح، ونفسي لا تملك لنفسي شيئاً، يوم لا تملك نفس أي نفس لنفس أي نفس، فهمتوا دي؟ يبقى نفسك لا تملك لنفس غيرك شيئاً ونفسك لا تملك لنفسك شيئاً، لأنها داخلة في عموم النفس برضه، فلا تملك لنفسك شيء ولا تملك لغيرك شيء يوم القيامة، ما حدش يملك لحد لحد حاجة، انتهى، انتهى.

فالله مالك يوم الدين وملك يوم الدين، نستفيد إيه؟ نستفيد اللي سيدنا النبي قاله عليه الصلاة والسلام في الآية دي، إذا قال مالك يوم الدين في رواية قال: «فوض إلي عبدي»، أن تفوض الأمر لله عز وجل، وهذا ربما يفعله بعض الناس الطيبة، قلنا لكم الكلام ده قبل كده قلنا لكم لولا يوم القيامة لكتظت المحاكم بالقضايا، القضايا اللي في المحاكم دي يا جماعه ما تيجي عشر معشار المظالم اللي في الدنيا، لكن كتير من الناس يقول لك إيه يقول لك في آخرة، صح؟ طب روح ارفع عليه قضية اعمل فيه محضر، يقول لك في آخرة، هو ده المعنى، أنه عرف أنه في مالك يوم دين، والدين في اللغة تأتي بمعنى الجزاء، وده هنجي له بقى لما نجي نشرح الفاتحة إن شاء الله مالك يوم الجزاء، فده يفيدك إيه؟ أن تفوض الأمر لله، إذا قال مالك يوم الدين قال الله: «فوض إلي عبدي دي».

فعرفناه أنه رب العالمين سبحانه وتعالى وأنه رحمن وأنه رحيم وأنه مالك يوم الدين وملك يوم الدين سبحانه وتعالى، ودي الأسماء التي جاءت في الفاتحة، يبقى احنا قلنا ربنا عرفنا نفسه في الفاتحة بأسماء وصفات وبأفعل مش كده؟ فالأسماء اللي جت في الفاتحة هي دي الله أكلمنا عنه سريعاً ورب والرحمن والرحيم ومالك يوم الدين وملك يوم الدين، وعرفنا نفسه سبحانه وتعالى بأنه المعبود ﴿إِيَّاكَ نَعْبُدُ﴾ وأنه المعين ﴿إِيَّاكَ نَسْتَعِينُ﴾ وأنه الهادي ﴿اهْدِنَا الصِّرَاطَ الْمُسْتَقِيمَ﴾ وأنه المنعم ﴿صِرَاطَ الَّذِينَ أَنْعَمْتَ عَلَيْهِمْ﴾ وأنه يضل وأنه يغضب جل وعلا.

وفوق عرفنا نفسه أنه محمود ويحب الحمد سبحانه وتعالى وأنه يحب الثناء سبحانه وتعالى، ودول أتكلمنا عليهم قبل كده في مش فاكر أمتى بقى أنتم عارفين ماشي، ودول الباقيين بقى هنتكلم عنهم بعد كده إن شاء الله واحنا بنشرح الفاتحة.

قولي قولي هذا واستغفر الله العظيم لي ولكم سبحانك اللهم وبحمدك نشهد أن لا إله إلا أنت نستغفرك ونتوب إليك.

أنا منتقبة وامي عاوزة أخلع النقاب أسمع كلام أمي ولا لا؟ ما تسمعيش كلام أمك، وسمعي أمك الكلام ده اللي أنا بقوله ده يا الآباء والأمهات يتقوا الله عز وجل في أبنائهم، مش كل بقى شوية يجينا شكاوى الاب والام عاوزين الولد يحلق اللحية وعاوزين البنت تقلع النقاب وعاوزين يعني إيه اتقوا الله في أولادكم.

والأبناء والبنات نصيحتنا ليه واحدة، معركتك مش مع الأم، معركتك مع في في حلبة الصراع مش هنا خالص، قلب أمك في بين أصبعين من أصابع الرحمن، فأنت أصلحي أحوالك مع ربنا سبحانه وتعالى، وشوفي بقى حاجة أنت مأثرة فيها فربنا بيسلط أمك علي بيها، منتقبة مثلاً بس النقاب مش قد كده، مش بتلبسي النقاب المضبوط، أو منتقبة لكن بتتنططي في الشوارع ليل نهار وأمر ربنا كله أمر ربنا، يعني أنت أنت ملتزمة بالنقاب ومش ملتزمة بقرن في بيوتك ليه وأقرب ما تكون المرأة من رحمة ربها وهي في قعر بيتها ليه، فربنا يقوم يسلط الأم عليك علشان ينبهك على مواطن خلل فيك محتاجة تتصلح، لما تصلحي المواطن دي مع ربنا ويبقى لك حال مع ربنا سبحانه وتعالى يقوم ربنا يقلب قلب أمك فجاه كده فجاه تبقى من من أن هي عاوزاكي تقلي النقاب لأ، أن هي عاوزاكي تفضلي بالنقاب وفرحانة بالنقاب، ماشي.

واحدة كانت ما كانتش متدينة وكانت بتلعب رياضة معينة اعتزلت وانتقبت الحمد لله ربنا رزقها حفظ القرآن، الحمد لله، هل من يتزوجني سينظر إلى أهلي أنهم ليسوا ملتزمين والي سابقاً أم لا؟ لأني أريد ملتزماً حقاً.

لا، احنا يعني ما كده يبقى الصحابة كانوا كفار، يعني أنت ما كنت مثلا مش محجبة مثلا ولا حاجة هاتي لي صحابي ما كانش كافر، الصحابة كانوا كفار ده ماضي الصحابة مش كده، فلا يعني خلاص التوبة تجب ما قبلها، واللي هينظر لك النظرة دي ما تاخديهوش أصلاً يبقى هو مش فاهم دين.

الافلام والمسلسلات والكرتون حرام نشاهدها؟ الأفلام المسلسلات حرام؟ يعني أصل أنا مش عارف إيه الأفلام المسلسل يعني ما حرام يعني السؤال بتاعى واضح أصلاً مش ولا في أفلام مسلسلات مش حرام مثلاً؟ خلاص هنا لجنة الفتوى هنا بتقول كل المسلسلات والأفلام حرام، أصل أنا مش عارف إيه الأفلام والمسلسلات الموجودة دلوقتي يعني السؤال شايفه بديهي فخايف يبقى في حاجة مش حرام، يعني مثلاً لو أخوكي بيعمل فيلم على أبوه عشان يعدي بقرشين، ده يجوز تقعدي تشاهدي كده وتتعلمي من أخوكي إزاي؟

النقاب فرض ولا سنة؟ النقاب فرض، النقاب واجب، وفي خلاف طبعا القول قول المذهب عندنا النقاب واجب جميع بدن المرأة عورة.

هل لعبة الكونغفو حرام؟

الضرب في الوجه بقوة قوة، لا يجوز ضرب في الوجه بقوة والكنفو في ضرب في الوجه بقوة، فإذا هنلعبها وهنتجنب الكلام ده ماشي، طبعاً لو لو السؤال بتاع لست فانا ما أعرفش بقى بتتمرنوا فين، وزمان مرة واحد بعت لشيخي ودرس شيخي كان في مصر الجديدة فبرده المستوى غير شوية، أنا من شبرا أصلاً فمصر جديدة كان بالنسبة لي برده يعني، فجاله سؤال قال له دلوقتي أنا بتمرن سباحة ومعانا بنات في التمرين الأذان يأذن وما بنطلعش نصلي ويجي علينا الأذان الثاني عشان التمرين طويل في حاجة حرام في في كده؟ الشيخ قال له أنا مش شايف حاجة حرام مش في السؤال يعني أنت جمعت الحرام كله وحاطه في سؤال واحد، فانا مش عارف بصراحة تلعبوا كونغفو فين وعامل إزاي ده مش عارف، لكن لو لأولادك لأن هي بتقول رسالة لأولاد يسمعوا الكلام ويحفظوا على مش عارف إيه، ماشي.

يعني الكونغفو زي ما قلنا لكم كده، ميزة الكراتيه شوية أن هو الضرب في الوجه بانضباط، يعني الضربة الشديدة تاخد عليها إنذار، دي ميزة شوية في لعبة الكراتيه أن هي الضربة الجامدة ضرب الجامد ممنوع ولو ضربت جامد في الوجه تاخد إنذار وممكن تطرد، فمن هذه الحيثية الكراتين ممكن يكون أنسبية، اللي بيدور على الحلال والحرام من حيثية أخرى برده ممكن الألعاب التانية تكون أعنف فايه يعني تبني بناء أقوى أو كده يعني الله أعلم.

من الحاجات اللي حصلت أن مساعد كبير المدربين في أحد النوادي مش هقول اسم النادي يعني جيت أحداني كان أنا كنت بلعب كراتيه وهو كان بلعب كونغفو، وجيت أحداني عاوز أنزل لك منافسة يعني العب بالكراتيه ولاعب بالكونغفو، كونغفو معروف أن هو ضربة أقوى فعلا، يعني الكراتيه من مزايا الكونغفو عاوزين تعرفوا الحاجات دي ولا ماتش الكونغفو لما يبتدئي نادراً لما الحكم يوقف هو بييدخلوا الإتنين يتقشوا في بعض لغاية ما الوقت ينتهي، وبعدين في حكام بيقيموا مين ضرب أكتر في الماتش ده الكونغفو، الكراتيه مش كده، الكراتيه ممكن تلاقي الماتش تلات دقايق ما فيش غير هجمة واحدة بس هو الإنسان بمركز في الهجمة عشان يعرف هيضرب إزاى وفين وكده، فالكراتيه شوية بيبني بيساعد على التركيز أكتر من الضرب العشوائي، كونغفو بضربة أقوى، فهو جه قعد يتحداني وأنا يعني بتحاشى الكلام ده وفضل يستفزني، اسمه أمجد، يستفز بي لغاية ما قلت له طب تعالى، وكان بقى يوم إيه مشهود بقى دول جايين يتفرجوا، دول جاي يتفرجوا مين هيكسب ومين طحنته طبعا، مش أنا اللي بتكلم، يجي بقى هو لأ فعلا كسبته، فعلاً كسبته لأن هو زي ما بقول لكم كده يعني أنا كان بالنسبة لي هو كتاب مفتوح هو بيدخل يضرب.

على طول ومش مركز في الضربات، وانا متعود على التركيز، فانا شايف الضربات وقدر اتفاداها وكده وفي الوقت المناسب بدخل اضرب. نستفيد ايه من الكلام ده؟ ولا حاجة، يعني بدردش معاكم بس، يعني ما فيش حاجة نستفيدها من الكلام ده خالص. ابعت سؤالك في ورق، مش هرد.

ايه السؤال الكتير بيجي لنا؟ مش عارف اخشع في الصلاة. اسمعوا كتاب (أسرار الصلاة) لابن القيم هتلاقوه على التليجرام، وإن شاء الله قريبا هو في الخطة أن ده هعيد شرحه تاني مصور؛ لأنه كتاب مهم، بس ابداوا بده، اسمعوا شرح (أسرار الصلاة) لابن القيم هتلاقوه على التليجرام.

علاج التسويف ايه؟ علاج التسويف اسمعوا حلقة فاهم التحرر من الغفلة.

واحدة بتقول: عندي مشكلة، دايما بخاف وحاسة أن أعمالي غير خالصة لله. الموضوع صعب شوية، بيخليني دايما خايفة. لو خايفة خوف يدفعك لمزيد من تحقيق العمل، فده كويس. لو خوفك عدى ده وبقى خوف يدفعك إلى القنوط من رحمة الله، وأن انا مش نافعة، فخلاص خربانة خربانة، فمحتاجة تسمعي في الرجاء. الخوف حلو ولا وحش؟ السؤال غلط، السؤال غلط. الخوف الذي يدفع إلى مزيد من العمل أو مزيد من تحقيق العمل، ده خوف محمود. الخوف اللي بيدفع إلى القنوط من رحمة الله والياس، وأن انا انسان مش فالح، فيقعدك عن العمل، ده خوف مذموم، لازم تقف وترجع تسمع في الرجاء وكده. وعشان كده كتير من الناس ببعت لي يقول لي: أنا بسمعك بقالي، أقول له: ما ينفعش تسمعني أنا، خطابي أنا متعمد أخليه في ناحية التخويف أكتر. أنا متعمد ده؛ لأن ده الأصلح للجمهور، جمهور الناس يعني مش الجمهور، يعني معظم الناس. في ناس مش كده، في ناس هي خوفها أصلا شديد، ما ينفعش يسمع خطاب شديد، ده محتاج يسمع عن الرجاء وعن الرحمة عشان الدنيا تعتدل معه ماشي.

طب يعني حد باعت بيقول: بلاش السؤال بصوت عالي عشان الخصوصية، فانا اعمل ايه؟ طب هقرا السؤال بصوت، هجاوب ازاي؟ يعني مش عارف أجاوب.

في أسئلة مكررة بقى: عاوز ألبس الحجاب الشرعي وأهلي مش موافقين. جاوبنا عليه خلاص.

دلوقتي في شباب لما بيجوا بيقربوا لربنا ويزودوا في الطاعات، في ذنوب كانوا بيعملوها بيعانوا علشان يسيبوها زي الشتيمة والسجائر، فلو نصيحة سيبوا الشتيمة والسجائر. يعني ايه المعاناة في أنك تسيب الشتيمة والسجائر؟ ماشي، متفهم، إنما إيه مش عارف تسيب الشتيمة ليه؟ يعني مش فاهم. لسانه خد عليها، مش بيعرف يسيب الشتيمة؟ معقولة! دي حاجة صعبة، مش عارف، يعني ما جربت ما كنتش بشتم، فما مش عارف الصراحة. الشتيمة دي بقيت أشتم بقى بعد كده، يعني لما اديت دروس وكده. مش عاوز أقول معرفتكم، يعني أقول مادام... أنتوا حبايبي.

برده ما تقراش الصوت برده بصوت عالي الخصوصية. طب أنا اعمل ايه؟ نفس الورقة مقطوعة حتتين نفس الشخص. هقراهم في البيت بقى.

ما فيش حاجة بتمشي غير بالفلوس، هتودونا في داهية يلا ماشي في مكان ما يعني. فهل هذا ينطبق عليه الراشي والمرتشي؟ يعني لو في حاجة مكان، ده سؤال مهم، حاجة أنت عاوز تاخد حقك. أنت عاوز تاخد حقك، هو الذي هو حقك، يعني هو مش حق غيرك، وبعدين الحق ده ما بيمشيش غير بالرشاوي أو بالفلوس، فلو دفعت لتأخذ حقك، فلا إثم عليك إذا ما كانش بيمشي غير كده. لكن أنا شوية بتحدى في ده، يعني المكان ده أو غيره، يعني ما أقصَدْش المكان بعينه، هو ممكن الواحد يبقى عاوز يستسهل.

فيقوم ياخد حق غيره، ازاي بقى؟ أن هو بيدخل يلاقي طابور طويل، فالطبيعي عشان تاخد حقك هتقف في الطابور ده، الطبيعي. يقوم هو يجي يدفع رشوة علشان اللي هياخد الرشوة يدخل يخلص له من الشباك ما يوقفش في الطابور، أنت كده ما أخدتش حقك، أنت خدت حق غيرك، ده مش حقك. حقك أنك وقت ما وصلت هتقدم لك الخدمة بناء على ترتيبك في الوصول، فاهمين ده يا شباب؟ طب دفعت رشوة عشان أنجز؟ أنت كده أخدت حق غيرك. بدليل أنك لو أنت اللي واقف على الشباك، خلاص وصلت بعد يومين ثلاثة للشباك، وبعدين واقف كده فلقيت إيه حد داخل من ورا فراح العامل أو يعني مقدم الخدمة سابك وابتدى يخلص له، فشعورك إيه؟ هتتضايق جدا. ما هو أنت عملت ده في غيرك بقى، مفهوم؟ فده مش حقك.

يعني خط صغير، ورقة صغيرة ولون أخضر، واحد بيشتكي معاملة الأب والأم ربنا يهديهم بقى. وحد تالي سؤال صفحتين، أنت متخيلين أنا هقرا ده مثلا يعني؟ اللي باعت ده والله أنتوا بتصعبوا عليا، يعني بيبقى كاتب صفحتين ومراقمهم يعني واحد اتنين عشان ما تلخبطش، فانا إيه هقرا؟ ما هو مستحيل هقرا ده، ما حدش يكتب حاجة تانية كبيرة عشان يعني.

بحب بنت مثلا وعايز اتجوزها مع العلم لا يوجد اي كلام محرم. ولا بحب منه ده اسمها؟ مش عارف، يعني بتحب واحدة وعايز تتجوزها وما فيش اي كلام محرم، ربنا يصبرك. ولأنه بلاء طبعا، طالما ما فيش اي حاجة محرمة بينكم فربنا يعينك، استمر على ذلك واسأل ربنا وجاهد نفسك أن ما يحصلش اي شيء محرم منكم، اي تواصل محرم. الدعاء بقى بيقول لي: ادعي لي أتجوزها، ربنا يعني يكتب لك الصالح، ربنا يوفقك للصالح، ما تعرفش الخير فيها ولا لا، ما بقاش عارفين.

قول قولي هذا واستغفر الله العظيم ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.