الشيخ أمجد سميربسم الله والحمد لله والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم إنك حميد مجيد. أما بعد.
نستقبل عاماً هجرياً جديداً، والناس اعتادت في هذا الوقت أن تشير إلى بعض فوائد أو دروس من الهجرة. واحنا كنا قبل كده أدينا درس عن الهجرة اسمه "إني مهاجر"، فمهم إن هو يسمع ومش هنكرر كلام جديد أو كلام قديم عفى عليه الزمن. فخلونا نحاول نستنبط بعض الدروس الأخرى المستفادة من الهجرة، ونبدأ بأول درس، وهو أول فعل فعله النبي عليه الصلاة والسلام بعد الهجرة.
طبعا النبي عليه الصلاة والسلام لما سافر من مكة إلى المدينة، نزل أول ما نزل عند أخواله بني النجار. دول كان فين مكانهم؟ عند مسجد قباء دلوقتي. طبعاً النبي عليه الصلاة والسلام أمه يثربية من المدينة، وهو صغير كان مسافر هو وامه يزور اخواله وماتت أمه في الطريق قبل أن يصل. فأخواله دول اللي هم بنو النجار، وكان مكانهم عند مسجد قباء دلوقتي.
فالنبي عليه الصلاة والسلام لما هاجر هو وأبو بكر رضي الله عنه، نزل أولا عند أخواله بني النجار. فأول حاجة عملها النبي عليه الصلاة والسلام أنه بنى مسجد قباء. ولذلك مسجد قباء هو أول مسجد بني ونزل فيه قرآن: ﴿لَمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَنْ تَقُومَ فِيهِ﴾ [التوبة: 108]، ده مسجد قباء في قول كثير من أهل العلم.
فاول الفوائد من حدث الهجرة؛ مركزية المسجد في الدين. ازاي النبي عليه الصلاة والسلام يا جماعة أول شيء يعمله، طبعا ده ما كانش مستقر! والنبي يعرف كده عليه الصلاة والسلام، يعني النبي عارف إن ده مش المكان اللي هيستقر فيه، وأنه قريباً سينتقل من هذا المكان، ومع ذلك أول حاجة يعملها لما ينزل في هذا المكان أن يبني مسجداً!
خلي بالكم يا جماعة، النبي قعد كم يوم عليه الصلاة والسلام؟ النبي قعد وصل الاتنين آخر النهار، ففوت الاتنين ده، قعد تلاتة، أربع، خمس، وتحرك الجمعة الصبح ناحية المدينة اللي هو مسجده، المسجد النبوي. فهو قعد إيه؟ تلاتة وأربع وخخميس بس في هذا المكان عند مسجد قباء، عند أخواله بني النجار. ومع ذلك لم ينشغل بشيء قبل أن يبني مسجداً في هذا المكان! وهذا يدل على مركزية المسجد وأهميته في ديننا. ولذلك يا جماعة هتلاقوا إنه زمان كان، يعني العمارة الإسلامية كانت عبارة عن مسجد وحواليه بيوت. حتى المسجد النبوي في ماكيتات دلوقتي موجودة لو عملتوا عليها بحث على جوجل أو دخلتوا على اليوتيوب، المسجد النبوي أيام النبي عليه الصلاة والسلام كان شكله إيه؟ مسجد وحواليه بيوت، هو المسجد هو المركز، هو السنتر، والبيوت تبنى حوالين المسجد! ليه؟ لأن ده هو المركز بتاعنا.
فكان المسجد مش بس مكان للصلاة، لا؛ المسجد هو مكان للصلاة، ومكان طبعا لدروس العلم وحلقات الذكر، ومكان للتحدث حتى في بعض أمور الدنيا. النبي عليه الصلاة والسلام كان -الحديث في صحيح مسلم- ربما جلسوا بعد الفجر يذكرون أحوال الجاهلية فيضحكون ويبتسم صلى الله عليه وسلم، يعني يقعدوا بعد الفجر يتذكرون ما كانوا عليه أيام الجاهلية، اللي هو حديث الدنيا، أنت فاكر لما كنا بنعمل وبنسوي وبتاع، فيضحكون ويبتسم صلى الله عليه وسلم. وربما نام أحدهم في المسجد، كان في أهل الصفة كلهم أصلاً بيناموا فين؟ في المسجد. وسيدنا علي معروفة القصة: «قم أبا تراب». فكانوا يناموا في المسجد أحياناً. المسافر يبتدئ بالمسجد قبل ما يخش بيته، ألوية الجهاد تعقد في المسجد. فالمسجد ما كانش منفصل عن الحياة، المسجد كان مركز في الدين، مركز في هذا الدين، في دين الإسلام، وأهميته كبيرة في دين الله عز وجل.
وانفصال المسجد عن الحياة هو ده العلمانية، مش كده؟ إن أنت في المسجد أنت تدخل تعبد ربنا؛ زي في المسجد بتصلي، وفي الكنيسة بتصلي، وفي المعبد اليهودي بتصلي، وبعدين تخرج للدنيا، الدنيا لها قوانينها بعيدا عن المسجد! ده ما كانش، ده مش دينا، بل كل شيء كان في المسجد. ولذلك النبي عليه الصلاة والسلام اهتم بذلك، فأول حاجة يعملها لما ينزل على أخواله أن يبني مسجداً، مسجد قباء. وكنا في درس "إني مهاجر" ذكرنا شيئاً نعيده لأهميته.
قلنا إنك إذا عرفت ذلك وعرفت أهمية المسجد في الدين ومركزية المسجد، فلا بد أن يكون له تطبيقاً عملياً في حياتك وإسقاطاً على حياتك. ساعتها قلنا إسقاط واحد بس؛ قلنا الشاب اللي لسه يعني رايح يشتري شقة عشان يتجوز، أو بينقل من شقته عشان يكبر على نفسه وعلى عياله، فقَبْل ما تطلع تبص على الشقة، تروح تبص على المسجد! هو المسجد اللي هنا فين؟ وبعدين تتامل كده مكان المسجد من الشقة؛ هل هقدر أنزل وأصلي في هذا المسجد خمس مرات في اليوم والليلة؟ طيب هخلف والولد هيكبر هيبقى سبع سنين، ثمان سنين، وأنا في الشغل، وهدربه على إنه ينزل يصلي في المسجد، فهل هذا المسجد الطريق بينه وبين الشقة أمان؟ ممكن يبقى أنت آه ينفع تصلي فيه بس في طريق سريع بينه وبين المسجد مثلاً، فابنك مش هيعرف ينزل لوحده، فتكون حرمت ولدك أنه يعتاد المسجد. فيبقى لابد من أن يكون المسجد كما له مركزية في الدين، أن يكون له مركزية عندك في ذهنك.
وفي درجة أعلى من دي يمكن ما قلناهاش المره اللي فاتت، وهي إنه المسجد ده بقى مسجد فيه أنشطه؛ لما أجي عاوز أحفظ ابني قرآن فهلاقي المسجد يحفظ فيه قرآن ولا لا؟ لما أجي عاوز أحضر دروس علم هلاقي المسجد ده فيه دروس علم ولا ما فيهوش؟ دي درجة أعلى يعني، ولكن لو اكتفينا بالأولى أن احنا لو عاوزين شقتنا تبقى جنب مسجد، يعني حكي إنه واحد متدين ومتجوز واحدة متدينة ودينين وعليهم سمت، وبعدين وهو ميسور الحال يعني، كانوا ساكنين في شقة مدينة نصر وبيتدرب عياله على الصلاة، ثم انتقل إلى مجموعة سكنية -اللي هو الكومباوند يعني- وما فيهوش مسجد! فطبعا ابتدى الأمر أن ما فيش صلاة في المسجد خالص إلا صلاة الجمعة، ياخد العيال بالعربية ويطلع بره، ثم ترك الجمعة! وبنتكلم على حد دين، أو كان دينا يعني مش حد هو اصلا ما بيصليش. فمهم جداً أن ننتبه لهذا المعنى؛ مركزية المسجد في دين الله عز وجل، وأن المسجد منه يخرج كل شيء.
وهذه إشارة إلى هيمنة الدين؛ نجي نقول المسجد تعقد فيه ألوية الحرب، والمسجد تعقد فيه حلق الذكر ودروس العلم، وحتى السمر في أحوال الدنيا بعض الصحابه كان يفعل ذلك ويبدأون بالمسجد قبل البيت إذا عادوا من السفر، إلى آخر ذلك من وظائف المسجد. فهذا يدل على هيمنة الدين، أن الدين هو المهيمن، مش أي حاجة أخرى، الدين مهيمن على حياة المسلم. فبدأ النبي عليه الصلاة والسلام ببناء مسجد قباء.
وفي وأثناء البناء كان يفعل شيئاً عجيباً؛ النبي عليه الصلاة والسلام كان يشارك في البناء بنفسه، ويحمل الحجر على كتفه الشريف صلى الله عليه وسلم! فربما اتاه الصحابي يأخذ عنه الحجر فيقول: «دعه معي وخذ غيره»، يعني خلاص أنا أخدت حجر سيبني، سيب لي هذا الحجر وأنت روح خد حجر التمس حجراً آخر. وده برده يعني ما فعله النبي عليه الصلاة والسلام، ودي يعني ما هياش مرة وانتهت، هذه عادته وهذا ديدنه صلى الله عليه وسلم أن يشارك في هذه الأمور الشريفه العظيمة بنفسه صلى الله عليه وسلم. وفيها ما يسمونه الآن بالقيادة بالمثال؛ يعني أن تبقى مثالاً يحتذى به في ما تريد أن تحث عليه غيرك. وهذا يفتقده الكبار أو الرؤوس أو المقدمون في كثير من الأوقات؛ هو بيظن إنه كونه كبير أو مقدم أو له مكانة أو له شرف أو كذا، فهو يكفي أن هو يأمر وينهى ثم يجلس لا يشارك!
النبي عليه الصلاة والسلام ما كانش على تلك الصفة، ويخشى على من تلك حاله أن كانت حالاً دائمة ومن كان ذلك ديدنه، أن يكون في قلبه شيء من كبر! اللي هو أنتوا اشتغلوا وأنا ما بشتغلش، أنا الشيخ أو أنا رئيس العمل أو أنا مش عارف إيه في امور الدين يعني أقصد. النبي ما كانش كده عليه الصلاة والسلام، لا؛ يشارك بنفسه في بناء البيت، في بناء المسجد. أولاً: للثواب، إحرازاً للثواب، فما انتش مستغن عن الثواب وهم اللي محتاجينه! أيها الكبير أو أيها الشريف أو أيها العظيم، ما انتش اللي مستغني عن الثواب، أنت في احتياج للثواب زيك زيهم، فشارك. ثانياً: ليقود بالمثال، يبقى اللي عنده كسل أو اللي شايف نفسه، يعني شايف نفسه يعني، فما يلاقي كبيره يشارك بنفسه ويحمل الحجر بنفسه وما يصاحب ذلك؛ يعني سيدنا النبي عليه الصلاة والسلام لما كان بيشيل الحجر على كتفه يبقى شكله إيه؟ يبقى مطرب مش كده؟ وأكيد يعني ما هو بيبني مسجد، يشارك في بناء مسجد فيظهر أن دي هتبقى حالة في هذا الوقت يعني مغبر صلى الله عليه وسلم، ما هياش يعني. فلما يرى النبي صلى الله عليه وسلم على تلك الهيئة وتلك الصفة، يقوم هذا يعمل عمله في نفوس الاتباع؛ يبقى اللي كان عنده كبر يزول عنه الكبر، واللي كان شايف نفسه تنكسر نفسه، واللي كان مكسل يشتغل هيقوم يشتغل ليه؟ لأن الكبير يشارك.
واحنا من درسين ثلاثة اتكلمنا على قصة بناء البيت، وازاي سيدنا إبراهيم عليه السلام بنى البيت بنفسه مع ولده مش كده؟ اللي عنده بقى سؤال يبعته دلوقتي عشان برده احنا احتمال الدرس النهارده يبقى خفيف كده، عشان ممكن ندي فرصة للاسئله إن شاء الله. فسيدنا إبراهيم احنا ساعتها قلنا لكم إيه؟ قلنا لكم سيدنا إبراهيم ما جابش عمال انفار وقال لهم تعالوا عاوزين نبني هنا بيت والمساحه كذا ويلا اشتغلوا، ما عملش كده سيدنا إبراهيم ولم يؤمر بذلك من الرب عز وجل، بل هو الذي أمر أن يرفع القواعد من البيت بنفسه. فبرده تخيلوا تلك الهيئة التي كان عليها أبو الأنبياء عليه السلام وابنه؛ كان شكله إيه وهو شايل الحجر وهو بيبني، وهو كان شكله إيه عليه السلام؟ وبعدين البيت خلاص ما مش قادر يحط، قام جايب حجر عشان يقف عليه عشان يعلي البيت والولد يناوله، اللي هو برده نبي، بنتكلم على اثنين أنبياء.
فأشرف شيء تفعله أن تشارك في بناء هذا الدين. وبناء المسجد هو بناء للدين في الحقيقه، بناء المسجد بناء للدين في الحقيقة، فانت بذلك تشارك في بناء دين. فهذه أيضاً مسألة لابد أن ننتبه لها وأن نعمل عليها. أبقى في بيته، ما ينفعش أنت تأمر الولاد بحاجة وأنت أول المخالفين! إلا لو حجة في ذلك وتوضحها عشان الولد ما يخرجش عنده انفصام؛ يعني أنا بأمر بشيء والاب- بعضهم بقى يعمل كده، يقعد يزعق في ابنه: يلا قوم انزل روح الجامع! والراجل قاعد في البيت. طب ما تنزل وروح أنت كمان الجامع وخلي ابنك يشوفك بتروح الجامع! ما تكذبش وما تعملش، وهو شايف أبوه ليل نهار بيكذب! آه، فده اللي بيسموه يعني في علم الإدارة: القيادة بالمثال. يبقى أنت تقود، يعني من يقود الأمم لابد أن يكون فيه هذا، يشارك.
المسألة الثالثة في مسجد قباء؛ وهي طبعا يا جماعة الأول قبل ما نقول المسألة الثالثة، لأن النبي عليه الصلاة والسلام أخبر أن فضلاً في مسجد قباء اللي هو إيه؟ أنه من تطهر في بيته ثم أتي مسجد قباء فصلى فيه ركعتين كان له أجر عمرة، مش كده؟ طيب هذا يدفعك لو أنت رحت أنك تعمل إيه؟ تروح قباء، وما أظنش أن في حد خالص بيروح عمرة إلا ولازم يروح قباء مش كده؟ ولولا هذا الفضل ما كانش الناس راحت قباء! مسجد قباء مش المسجد الوحيد اللي النبي صلى فيه عليه الصلاة والسلام، يعني حتى بين قباء والمسجد النبوي في مسجد الجمعة؛ مش احنا قلنا لكم هو مشي من عند أخواله الجمعة الصبح، في الطريق حانت صلاة الجمعة فصلى جمعة بأصحابه، فتبنى مسجد اسمه مسجد الجمعة! مين بيعرف ومين راحوا؟ ممكن تلاقي في كل الموجودين واحد ولا اثنين اللي يعرفوا مسجد الجمعة ده. لكن اللي سافر مين ما راحش قباء؟ مش هتلاقي حد، كله بيروح قباء! ليه بنروح قباء؟ عشان الفضل اللي في قباء، صح كده؟
طيب لماذا جعل الشارع فضلاً في قباء؟ دي مسألة مهمة جداً جداً. يعني ليه الشارع جعل فضلاً في قباء؟ فيبقى لما تروح أنت تلاقي نفسك عاوز تروح قباء عشان تصلي، عشان تصلي ركعتين وتمشي، ولا عشان تتذكر أموراً تكون لك زاداً في حياتك وأنت راجع من قباء؟ يظهر أن الموضوع أكبر من مجرد صلاة ركعتين، لا؛ ده وأنت رايح لازم هتستحضر حاجات، وأنت هناك وأنت واقف في مسجد قباء وأنت بتصلي الركعتين هتتذكر أموراً، منها اللي احنا قلناه: إن هو ازاي مركزية المسجد في الاسلام، تتذكر ذلك، منها أنه النبي عليه الصلاة والسلام شارك في بناء هذا المسجد بنفسه صلى الله عليه وسلم.
فينكسر ما بك من كبر وعجب ورؤية نفس.
من الأمور كذلك أنه النبي عليه الصلاة والسلام يا جماعة بعد أن استقر في المدينة في جوار المسجد النبوي، كان يروح كل أسبوع قباء يصلي هناك، ودي فائدة كبيرة للدعاة إلى الله وللرؤوس ولاصحاب المشاريع الدينية الشرعية، أنك لا تهمل مشروعك القديم. بعض إخواننا جزاه الله خيرا هو ناجح في إنشاء مشاريع دعوية، مشاريع علمية، مشاريع مثلا كفاله الأرامل ولا اليتامى ولا المساكين، هو نشيط في ذلك ينشئ المشروع، هذا المشروع مش لازم يعني مشروع بزنس، مشروع دعوة، مشروع ديني، يعني ينشئ المشروع، ربما ينتقل إلى غيره فيغفل مشروعه الأول، فشوية وينهار ذلك المشروع أو ما يبقاش ماشي بالكفاءة المطلوبة. ازاي النبي عليه الصلاة والسلام لما بنى المسجد، وبعدين طالما في مسجد اعرفوا على طول أن في حوالين المسجد مجتمع، خلاص وهو كان كذلك كان المسجد مسجد قباء وحواليه أخواله بنو النجار وغيرهم من القبائل اللي هي ناحية قباء، ثم انتقل النبي عليه الصلاة والسلام إلى مكان آخر وأنشاء مسجدا آخر المسجد النبوي وبقى في مجتمع ثاني، سيبكم أن دلوقتي المسافة بينهم أنتم شايفينها مسافة قليل بس هو ده كان يعني أفق قباء مش هيمشوا المسافة دي خمس فروض، مش هيعملوا كده عندهم مسجدهم، وأكيد اللي في مسجد مش هروحوا هناك أكيد هم مع النبي عليه الصلاة والسلام، ففي مجتمع حوالين مسجد وبيصلوا هناك مجتمع قائم، وفي مسجد مشروع، وزي ما قلنا المسجد ده مشروع، مشروع ليه؟ لأنه مش بس خمس صلوات وانتهينا، المسجد ده مقر لكل شيء، فازاي النبي عليه الصلاة والسلام لا يغفل مشروعه القديم صلى الله عليه وسلم، لا كل أسبوع في زيارة لمسجد قباء، ليه؟ يتفقد مشروعه القديم.
فالقائد يكفيه ذلك أن مرة في الأسبوع، مرة كل أسبوعين على حسب بقى مشروعك الشرعي أيا كان دعوة ولا علم ولا مقارئ ولا أيا كان، ما تغفلوش. طب أنا باحيل الأمر إلى غيري يعني واحد ثاني مدوره؟ وكان كذلك يعني مسجد قباء يا جماعة كان عطلان، يعني ملوش إمام مثلا؟ ولا كان في إمام وفي صلاة وفي أنشطه المسجد موجودة؟ ما هو المسجد قائم، معنى كده النبي عليه الصلاة والسلام عمل إيه؟ أحال الأمر إلى غيره، في إمام غير النبي عليه الصلاة والسلام، في خطيب غير النبي عليه الصلاة والسلام، في لو في حد بيحقر قرآن، لو في حد بيدي كلمة، لو في حد كل ده موجود، حتى لو مش بالشكل التنظيمي اللي هو زي بتاع دلوقتي كده عادي، صحابة قاعدين واحد بيقول لهم اتعلمت النهارده من النبي كذا عليه الصلاة والسلام، كان موجود كل ده، لكن النبي ما يغفلش مشروعه القديم، وإلا شوية وهيقع المشروع أو هيحصل فيه دخن، وممكن لا يتدارك بعد كده، وده هنجي لها كمان شوية في قصة حصلت كده، ده الدرس الأخير في مسجد قباء.
ده كله بنتكلم النبي عليه الصلاة والسلام أول ما هاجر عمل إيه؟ أول حاجة عملها بنى مسجد قباء، يبقى دي أول حاجة. ثاني حاجة سيدنا النبي عليه الصلاة والسلام كان بيروح قباء يوم السبت، فاشمعنى السبت؟ يعني ما بيروحش الثلاث ليه؟ ما بيروحش الأربع ليه؟ ما بيروحش الخميس ليه؟ اشمعنى السبت؟ بعض العلماء تلمح حكمة في يوم السبت، قالوا أن النبي عليه الصلاة والسلام كان الصحابة اللي حوالين مسجد قباء بيصلوا الصلوات كلها في مسجد قباء، يجي يوم الجمعة يجوا يصلوا الجمعة مع النبي عليه الصلاة والسلام، فربما تخلف منهم بعضهم، واحد مريض مرض شديد ما قدرش يجي الجمعة، واحد عرضت له حاجة وهكذا، فيتخلفوا عن صلاة الجمعة، فيتفقدهم النبي صلى الله عليه وسلم يوم السبت.
يبقى زيارة قباء لها غرضين دلوقتي، وأنت رايح تصلي في قباء لازم تستشعر كل هذه المعاني، يبقى من المعاني أنك لو ليك مشروع قديم لا تغفله وبعدين شوية يهجر المشروع ولا يقل نفعه ولا كذا ولا كذا بس لأنك مكسل تتابع. المعنى الثاني، معنى التفقد، أننا نتفقد إخواننا، وهذا من معاني الأخوة الإيمانية: ﴿إِنَّمَا الْمُؤْمِنُونَ إِخْوَةٌ﴾ [الحجرات: 10]، فاحنا لابد أن يكون فينا هذا المعنى، معنى التفقد يا جماعة، الدنيا اللي واخدانا دي والروابط الإيمانية اللي بينا خفت جدا وضعفت، ربما ينتكس المتدين ولا أحد يشعر به، بعد ما كان معانا في المسجد، معانا في المقرأة، معانا في الدرس، غاب مرة في الثانية في الثالثة ولا حد دريان بيه، واللي دريان ما بيسالش، وشويه يسيب الصلاة وشويه يقتحم الكبائر، وشويه نلاقيه بقى ملحد وشويه نلاقيه بقى مش عارف، وكان بداية الموضوع ايه؟ أنه إذا كنا يتفقد بعضنا بعضا ربما كان هذا درعا واقيا لمثل هذه الأمور.
ولما نقول كده يا جماعة برضو عشان احنا على رأي بعض إخواني يقول لك: احنا علمانيين، فنقعد نتكلم كده يقول لك إيه: كل اللي يجي في دماغنا دلوقتي إيه؟ إخواننا اللي في المسجد. لا، إخواننا ليه؟ إخواننا إخواننا اللي في العمل، إخواننا اللي في الجامعة، إخواننا كل الناس إخواننا، مش كده؟ إنما المؤمنون إخوة، مش إنما اللي في المسجد إخوة، ما حدش قال كده، ولا إنما الملتحون إخوة، ما حدش قال ده، إنما المؤمنون إخوة، فكل مؤمن هو أخوك، كل مسلم هو أخوك، فزميلك اللي في الجامعة اللي غايب بقاله يومين ثلاثة ده وما حدش يعرف عنه حاجه، تفقدوا، ما بتجيش ليه يا فلان؟ يبقى مشغول بامر دنيوي، محتاج مساعدة، محتاج إعانة، محتاج دعم، أو أمر ديني انتكس ولا شيء، لو هو بقى من الناس التدينة أصلا ولا بتاع، وخلاص بيختفي بيزوغ من الناس اللي هتقول له قال الله وقال الرسول صلى الله عليه وسلم، فهذا التفقد كان يفعله النبي عليه الصلاة والسلام، وهذا التفقد في ديننا وذكره ابن مسعود، قال ابن مسعود: كنا إذا فقدنا الأخ أتيناه، كنا إذا فقدنا الأخ مش كبرنا دماغنا، مش الدنيا مشاغل، لا خالص، كنا إذا فقدنا الأخ أتيناه، فإن كان مريضا كانت عيادة، وإن كان مشغولا كانت عونا، وإن كان غير ذلك كانت زيارة.
فمحتاجين تنبعث فينا تلك المعاني مرة أخرى، وهي كما ذكرنا من حقوق الأخوة، وإذا تفقدت غيرك تفقدك غيرك إن فقدت، مش كده؟ يبقى من معاني تثبيتك أنت وقت انتكاسك ولا وقت ضعف الإيمان ولا وقت الفترة أن يكون بين هذه الروح، فلما أنت تبدا بمثل ذلك وأنت اللي تروح تتفقد وأنت اللي تروح تسأل، يقوم لما ما نلاقكش هنسال عليك برده، فييبقى ده من معاني التثبيت.
كذلك من الفوائد الكبيرة جدا جدا في مسألة قباء دي بقى وهي الحقيقة فائدة حصلت في قرب نهاية أجل النبي عليه الصلاة والسلام، فضل مسجد قباء على تلك الصفة، وبعدين في وقت غزوة تبوك حصلت حاجة عجيبة جدا، 12 منافق عملوا حيلة، 12 منافق من الناس من المنافقين اللي مش عايشين جنب النبي عليه الصلاة والسلام، لا، المنافقين اللي عايشين ناحية قباء، عملوا قالوا إيه؟ قالوا: احنا عاوزين نبني مسجدا آخر غير مسجد قباء، ليه؟ ربنا فضحهم في القرآن: ﴿وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِمَنْ حَارَبَ اللَّهَ وَرَسُولَهُ مِنْ قَبْلُ﴾ [التوبَة: 107]، يبقى دي الأهداف المعلنة لهم صح كده؟ لا، دي الأهداف الخفية، هما هيروحوا يقولوا احنا بنينا مسجد ضرار وكفر وتفريق وإرصاد؟ مش هيقولوا كده، دي الأهداف الخفية اللي جواهم اللي بها اللي من أجلها بنوا مسجدا.
خلي بالكم ما راحوش بانوا خمارة، ما راحوش بانوا بيتا للمومسات، راحوا بانوا مسجدا، ركزوا معايا الفائدة دي مهمة جدا، بنوا مسجدا، ليه عشان الحاجات دي؟ طيب هنعلن الحاجات دي؟ مش هينفع نعلن الحاجات دي، طب هنعمل إيه؟ هنقول حيلة كده، هنقول والله احنا بنينا مسجد تاني علشان في الليلة الشات اللي هي بيبقى فيها مطر، الناس ممكن تتزحلق وهي رايحة مسجد قباء فبلينا مسجد بعيد عنه شويه علشان يبقى أقرب للفئه دي، يعني دي حاجة، تاني حاجة المريض الإنسان المريض اللي ما يقدرش يمشي لغاية قباء، يدخل يصلي في المسجد ده، ومثل ذلك بقى الحاجات الطوارئ دي، فدي نية حلوة ولا لا؟ أو يعني لما يتقال الكلام ده كلام جميل مش كده وينطلي على الناس.
طيب عاوزين ندي للمسجد شرعية، ما احنا بنا مسجد تاني وهنقول كذا وكذا وكذا، عاوزين بقى ندي له شرعية، فنعمل إيه عشان ندي له شرعية؟ ما نجيب النبي يصلي فيه ركعتين عليه الصلاة والسلام، يقوم النبي لما يصلي في المسجد ركعتين يبقى المسجد أخد شرعية، يبقى ليه مكانة والناس هتحب تيجي تصلي فيه ده النبي صلى فيه عليه الصلاة والسلام، فبعتوا للنبي عليه الصلاة والسلام أن احنا بنينا مسجد عشان كذا وكذا وكذا الحاجات اللي احنا قلناها في الاول، وعاوزينك تيجي تصلي فيه ركعتين. كان النبي عليه الصلاة والسلام بيستعد للخروج لغزوة تبوك، غزوة تبوك سنة تسعة فده كان خلاص في آخر عمر النبي عليه الصلاة والسلام، قال لهم: طيب أنا دلوقتي رايح الغزوة وأنا راجع إن شاء الله أعد أصلي فيه، فنزل قول الله عز وجل: ﴿وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِمَنْ حَارَبَ اللَّهَ وَرَسُولَهُ مِنْ قَبْلُ وَلَيَحْلِفُنَّ إِنْ أَرَدْنَا إِلَّا الْحُسْنَى وَاللَّهُ يَشْهَدُ إِنَّهُمْ لَكَاذِبُونَ * لَا تَقُمْ فِيهِ أَبَدًا﴾ [التوبة: 107-108]. ألفاظ القرآن يا جماعة شديدة جدا في هذه القضية، ألفاظ القرآن حاسمة وشديدة وهنا مافيات ولا موائمات، مافيش مجال كده، فضحهم أولا القرآن فضحهم، دي سورة إيه؟ الفاضحة، ما هي السورة دي سورة التوبة هي الفاضحة فربنا فضحهم.
طيب احنا نستفيد إيه بقى واحنا ماشيين كده؟ أول حاجة أن المنافقين دي دي طريقتهم، يعني المنافق أو عدو الدين مش شرط يجيلك من الخمارة ويجيلك من بيت دعارة ويجيلك من سينمات ومن مسارح، عدو الدين ممكن يجيلك منين؟ من مسجد يبني مسجد بنية سودا زي اللي عملوها دي، دول بمقراه قرآن، يعمل مقراه قرآن عشان يبوظ عقول الناس اللي هتقعد في المقراه أو عشان يشوش على مقراه أخرى، بتلميع رمز ديني، ليه؟ لأن الرمز ده هيضل الناس، فهلمعه وهنسنده وهندعمه هنيد له فلوس وهنحط له إمكانيات ونفتح له قنوات، شوف جايلك منين؟ هكذا أراد المنافقون أن يفعلوا مع النبي عليه الصلاة والسلام، ولذلك الراس، طبعا كل مسلم لابد أنه يكون واعي لهذا المكر، بل مكر الليل والنهار، وهذا لن يكون إلا بتوفيق الله عز وجل لك، لكن الراس أهم بقى، يعني لو داعية، لو طالب علم، لو شيخ كبير وله أتباع، مهم جدا جدا أن يكون واعي لتلك الحيل وعنده من الفطنة والذكاء أنه يبقى فاهم أن ده مكر وخديعة وأن فتح مثلا القنوات قدامي ولا تكريمي في مش عارف إيه ولا إغداق الأموال عليا ولا يتحط لي ميزانية مفتوحة عشان تعمل مش عارف، إيه مش لازم يكون ده فتح من ربنا، مش لازم، ممكن يبقى مكر دبر بليل، فييبقى الانسان واعي لمثل هذه التصرفات.
ثم أتى الأمر: ﴿لَا تَقُمْ فِيهِ أَبَدًا﴾، هذا المسجد لا يقام فيه، ما تروحش تصلي فيه، أصلك لو صليت فيه هتديله شرعية، لو صليت فيه هتديله شرعية، فكذلك الراس لابد أن ينتبه لمثل ذلك، أنت خروجك في هذه القناة أو خروجك إلى جوار هذا الرجل أو محادثتك له على وجه معين أو كذا، بيطفئ شرعية وممكن يبقى الشخص ده ولا الجهه دي ولا كذا، هي مش عاوزة منك أصلا غير بس الظهور، هذا الظهور والاتباع غلابه مش عارفين حاجة، فجاء الأمر شديد: ﴿لَا تَقُمْ فِيهِ أَبَدًا﴾، ما تصليش فيه، هذا المسجد لا يصلى فيه.
بس لا، عارفين النبي عمل إيه يا جماعة في المسجد ده عليه الصلاة والسلام؟ أرسل الصحابة وامرهم بهدمه، هدوا الجامع، خلي بالكم بقى ساعتها لو في بقى السوشيال ميديا والفيسبوك ومش عارف إيه والتصوير والفيديو هينزل بيهدوا الجامع، النبي عليه الصلاة والسلام يا جماعة عشان بس تفهموا ده، النبي عليه الصلاة والسلام كان يراعي جدا جدا الصخب الإعلامي، كان يراعي هذا، ليه؟ لأنه الإعلام نوع من أنواع السحر، أن من البيان الإعلام إيه؟ ما هو البيان مش كده الكلام، فنوع من أنواع السحر، السحر غاية السحر أنه بيقلب الحقائق، الحبل حبل تشوفه تعبان مش كده مع أنه هو حبل، هو السحر مفعول السحر أنه بيقلب الحقائق في عينك، فجهاز الإعلام كده.
فالنبي عليه الصلاة والسلام مثلا يجي واحد منافق بيطعن في النبي واقع فيه عليه الصلاة والسلام، يقوم سيدنا عمر يقول له إيه: دعني أضرب عنق هذا المنافق هقتله، فالنبي ازاي يراعي عليه الصلاة والسلام الإعلام بقى، برامج التوك شو والبوستات اللي تنزل على الفيسبوك والكويتات اللي تنزل على تويتر والريلز.
يتحدث الناس أن محمدًا يقتل أصحابه، لا ما تقتلوش يا عمر، ليه؟ أصل هو الناس مش هطلع تقول منافق ويقع في النبي ويطعن فيه ويسبه، فعقابه أن يقتل؛ الناس مش هتقول ده حتى لو هما عارفين ده، اه هيبقوا عارفين ده وعارفين دي الحقيقة بس مش هطلعوا يقولوا ده.
حُيي بن أخطب وياسر اليهودي قال له أهو، الحادثة دي على فكرة حصلت بينهم صفية مرأة النبي عليه الصلاة والسلام زوجات النبي هي اللي بتحكي الحكاية دي، أبوها حُيي بن أخطب كان من أحبار يهود وأخوه ياسر لما النبي نزل عليه الصلاة والسلام في عند أخواله في بني النجار وشافوه، عرفوا صفة صفة النبي عليه الصلاة والسلام.
صفية بتحكي بعد ما أسلمت قالت أن أبوها وأخوها دخلوا، أبوها وأخوه اللي هو عمها دخلوا، فسمعت أبوها بيقول لعمها: هو هو ده، ما هو النبي صفة مذكورة في التوراه عليه الصلاة والسلام، قال: هو هو؟ قال: وما أنت فاعل؟ قال: عداوته ما بقيت.
طيب ده في الأروقة والمجالس الخاصة، هو النبي هيطلعوا يقولوا هو النبي؟ مش هيطلعوا يقولوا هو النبي عليه الصلاة والسلام، مش كده؟ فالنبي عليه الصلاة والسلام كان يراعي ذلك جدًا، مسألة مراعاة المآلات، وده بقى اللفظ الشرعي، يعني إيه أن احنا نراعي مآلات الفعل؟
فمن مراعاة المآلات أنه يتحدث الناس أن محمدًا يقتل أصحابه مش هيقولوا قتل واحد منافق، طيب ده في قتل واحد، طيب في هدم مسجد؟ مش ممكن الناس برضه تقول كده؟ تطلع أهو اتفضل بيهد المساجد، هيقولوا كده.
لكن في الموقف ده النبي عليه الصلاة والسلام لم يتوانَ ولم يثنه عن القرار أن ممكن الناس يتحدثون، ليه؟ لأن وجود هذا الكيان مفسد فسادًا أشد، يفرق الصف، ربنا قال كده، قال إيه؟ وتفريقًا، مش كده؟ يبقى هيفرق الصف.
وبعدين لو سبناه لهم هما بس، هيصلوا؟ مش هيصلوا بس، ده هيعملوا مقرأة وهعملوا درس وهيووزعوا حلويات في الدرس وهيعملوا مسابقات للأطفال وهيسقطبوا الناس للمسجد ده، وبعد ما يستقطبوا الناس بقى هيلعبوا في عقولهم ويلقوا عليهم الشبهات والناس تضل.
مش لازم يعملوا كل ده، أنا بقول يعني بإسقاط حديث يعني، فهذا البناء وهذا الكيان لابد أن يهدم، أن يؤتى عليه من أساسه، ما ينفعش، ما ينفعش يفضل.
فين يا جماعة اللي كان بيصلي إمام بيهم في المسجد؟ واحد من الصحابه من أفاضل الصحابة يعني وكان غلامًا، وبعدين لما اتهدم المسجد أنا بس بقى أقول لكم إزاي هذا كلام ينطلي على الناس، هذا الكلام، بل النبي عليه الصلاة والسلام نفسه لولا الوحي لولا الوحي كان النبي قال لهم أنا وأنا راجع هصلي عندكم، لولا الوحي.
فهذه المسألة عشان كده بقول لكم يا جماعة المسألة دي هي مش مسألة سهلة أن أنت تفرق بين العطاء الإلهي أو المنحة وبين الفتنة والبلاء، لأن الفرق بينهم إيه؟ ما هو في الظاهر صورتهم واحدة.
مسجد، بيتفتح لك، قنوات بتقول لك تعالى أه، هي دي إيه؟ ده فتح من ربنا وده نشر للدعوة، ولا دي فتنة وبلاء وفيها حاجة أنا مش واخد بالي منها؟ ولابد من توفيق الله، لابد أن يبقى في حال بينك وبين ربنا سبحانه وتعالى.
حتى ما هو مش لازم بقى يبقى في وحي ينزل يقول لك إيه: لا ده دول نيتهم، مش لازم، بس تنقبض، تستخير، تلاقي نفسك إيه؟ انقبضت، ويبقى كل اللي حواليك بيقولوا لك إيه؟ أنت مجنون، حد يرفض المش عارف إيه وأنت منقبض؟ مش هروح، منقبض، ما عندكش ما عندكش سبب تقوله، بس خلاص أثر الاستخاره أنا منقبض، مش هروح المكان ده، مش عاوز أروح.
لحال بينك وبين ربك سبحانه وتعالى يمنعك، ما هو ما هو ربنا قال للنبي عليه الصلاة والسلام: ﴿وَلَوْلَا أَن ثَبَّتْنَاكَ لَقَدْ كِتّ تَرْكَنُ إِلَيْهِمْ شَيْئًا قَلِيلًا﴾، وهذا الكلام للنبي محمد عليه الصلاة والسلام، فانت محتاج بتثبيت ربنا أكتر من النبي محمد عليه الصلاة والسلام، والا هتركا.
وفي وقت المواءمات فيه مقبولة، وأن احنا نقعد نتفاوض عشان نلتقي في النص مقبول، وفي وقت وأحوال لا، ما فيهاش مواءمات، وفساد المواءمات أشد بكتير من مصالحها، تجيبها منين دي أنت بقى إن شاء الله؟ تجيبها منين بذكائك وجدعنتك وبتاع؟ يبقى خلاص هتلبس في الحيطة، أمَال تجيبها منين؟ من ربنا سبحانه وتعالى.
تستمد قوتك وتستمد قراراتك وتستمد أفعالك وتستمد حركاتك منه سبحانه وتعالى: يا رب أمضي ولا ما أمضيش؟ أمضي يعني أمشي يعني، مش أمضي، أمضي في الأمر يعني، ولا ولا أوقف؟ أعمل ولا ما أعملش؟ هو ده معنى الاستخاره: فإنك تعلم ولا أعلم.
فإن هذا الصحابي اللي كان بيصلي بيهم إمام بعد ما المسجد اتهد طبعا عُزل، وبعدين في عهد سيدنا عمر عاوزينه يصلي بيهم في قباء بقى، بنو النجار والصحابة اللي حوالين المسجد قباء عاوزين هذا الرجل يصلي بهم في قباء، صوته كويس وحافظ، حافظه.
عمر رفض، قال لهم: مش ده كان إمام مسجد درار؟ وهو رجل صالح حتى أتى عمر وقال له يعني أنا ما كنتش يعني أنا كنت أعلم، ما زال بعمر حتى وافق عمر أنه إيه؟ يَمُّب بيهم في قباء.
اللي أنا عاوز أقوله يا جماعة أن الفتنة وأفعال المنافقين ومكر هؤلاء ينطلي على الناس، فلابد أن يحذر، فالنبي عليه الصلاة والسلام مش بس ﴿لَا تَقُمْ فِيهِ أَبَدًا﴾، لا ده ﴿لَا تَقُمْ فِيهِ أَبَدًا﴾ وبعدين هده، دي تاني حاجه.
وبعدين خلاه، في عربية نيسان ج س ه 1430 قفل الطريق، فصاحبها يروح: لو سمحتم، نيسان ج س ه 1430 يطلع ينقلها، وحسبي الله ونعم الوكيل، دي حاجة حلوة دي، وأنا أما شفته، طب مين اللي عاوز يمشي؟ طب من الدرس عشان ما يففضلش قافل عليه ويقعد الدرس، حسب الوكيل في اللي عاوز يمشي.
النبي عليه الصلاة والسلام السلام مش بس هد المسجد، أمر أن مكان المسجد يبقى مزبلة تلقى فيها الجيف، علشان المسلمين طول ما هم ماشيين يفتكروا المكان ده، المكان الجيف ده كان مسجد ضرار، ويتذكرون فعل المنافقين ومكر المنافقين، خلاص يا جماعة.
وقال الله جل: ﴿لَا تَقُمْ فِيهِ أَبَدًا لَّمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ يُحِبُّونَ أَن يَتَطَهَّرُوا﴾ [التوبة: 108]، هؤلاء الأنصار لأن هم كانوا يجمعون بين الماء والحجارة في الاستنجاء، فكانوا يحبون الطهارة، وطبعا العرب ما كانتش تعرف ده، العرب كانت تستنجب بالحجارة عادي اللي هو الاستجمار.
وهُم خدوا هذا الفعل من يهود، أن هم يجمعون بين الحجارة والماء، وهذا شيء مدحه الله عز وجل: ﴿فِيهِ رِجَالٌ يُحِبُّونَ أَن يَتَطَهَّرُوا﴾، ودي برضه مسألة مهمة وهي أن احنا أين نكون؟ أين نكون؟ ﴿لمسجد أسس على التقوى من أول يوم أحق أن تقوم فيه﴾، فدور على البيئة الصالحة، بيئة الإيمان، وثم تكون معه.
آه، في أسئلة ولا؟ طيب خلونا، دي فائدة كده يعني من فوائد الهجرة، وزي ما بقول لكم احنا عاوزين نسمع درس تاني، مهاجر، درس مهم جدا، وفي فوائد أخرى للهجرة، بس أنا النهارده يعني إياه عاوز على أووقف على العصر إن شاء الله، عشان بس عندي حاجة أو على المغرب، أسئلة كتير قوي، لا، على الأذان إن شاء الله نوقف.
دائماً في تشتت في حياتي، في حلقة اسمها «التحرر من التشتت» مهمة على على بودكاست فاهم، مهمة جداً وفيها علاج لده إن شاء الله تتسمع بقى.
بنت عمي من محافظة بره القاهرة، وجايلها تعيين تقعد في القاهرة، والوالدة مصرة أن هي تعيش معاه هو وزوجته، وزوجته منقبضة مثلاً، ولبس البنت مخالف للشريعة، رأي حضرتك إيه؟ يعني في فتنة طبعا يعني، لو هي هتبقى قاعدة معاك في البيت ده مش مناسب، هاتولها أوضة مثلاً تعيش فيها لوحدها ولا شيء، الله أعلم يعني، معرفش شكل البيت إيه برضه يعني مش.
السؤال ده مهم: شاب يظهر عليه الالتزام وله مخطوبه حافظة للقرآن، هو كاتب كده، له مخطوبة ومنتقبة وتطلب العلم، ولكن بدا يتسلل بينهم الحب والعاطفة الظاهرة، طلب من أبيه أنه يعقد الزواج عشان ما يقعوش في المحظور الوارد، رافض تماماً، عشان قلق الإتقان على بنته، فما الجواب على ذلك؟
دلوقتي واحد خاطب واحدة، دي أجنبية عنه، فما يبقاش في بينهم أي تواصل، التواصل قبل الخطوبه يعني هقعد معاها مرة واثنين وثلاثة، وأروح لغايه ما استقريت، هي دي خطيبتي اللي أنا مرتضيها في كل شيء، خطبتها، تنقطع بقى أي اتصالات وأي رسائل وأي حاجة تنقطع، طب عاوزين نتفق على حاجات، أتفق مع أبوها، طب لا حاجات عاوز أخد رايها فيها، يبقى في جروب مجموعة يعني على الواتساب ولا غيره، فيها أخوها، فيها أبوها، ما يبقاش في تواصل بينك وبينها على الخاص تماماً.
الحبتها وحبتك، ده ما هواش في إيدك أنك تحب أو تتحب، ده مش في إيدك، فالحب مش حرام، إنما اللي هيقع بعد الحب هو اللي حرام، أو لو كان وقع شيء قبل الحب هو اللي أدى إلى الحب فهو اللي حرام، إنما الحب نفسه مش حرام، ده غير يعني ده غير مقدور عليه يعني، واحد حب حد ده مش مقدور مش في مقدوره يعني، فطب حبوا بعض يعملوا ايه؟ يتركوا هذا التواصل لله سبحانه وتعالى.
هل الوالد ليه حق أنه ما يعقدش عشان خايف لو الفترة طويلة؟ أه، ليه حق طبعا، يعني واحد عاوز يعقد على البنت وهو مثلاً البناء هيكون بعد خمس ست سنين من دلوقتي عشان بحضر نفسي وبعمل، ده فين ده إن شاء الله؟ فالوالد يبقى ليه حق أنه يخاف على بنته أن يبقى معقود عليها الفترة دي كلها، فانتوا اللي عليكم إيه؟ توقفوا التواصل فوراً، تدعوا ربنا بقى أن ربنا يسر لكم الحال إن شاء الله.
إيه ده؟ الدرس، الدرس الجاي المعذره لو الكلام كتير، لو الكلام، أنت كمان مش عارف أن الكلام أربع صفح يا مؤمن؟ مش عارف أن الكلام كتير؟
السؤال ده مهم ومخالفة تقع كثيراً، فمهم جداً للنساء: والدتي من الناس بتوع زمان لما بتصلي بيبقى رجليها باينة وبعض شعرها باين، اتكلمت معاها كتير أنه لا يجوز في الصلاة وبتعمله.
أه ده لا يجوز، بالذات موضوع الأقدام ده الستات مش منتبهه له، وهي من عورات الصلاة، وهي من عورات الصلاة في المذاهب الأربعة، الأحناف خالفوا بس في باطل القدم، فيبقى الست يا إما هتلبس شيء يعني نازل على الرجل بحيث أن ما يبقاش حاجة من رجليها باينة، أو تلبس الشراب قبل الصلاة، والشعر أظن بقى واضحة أن هو برضه إيه؟ ما يجوزش، إنما الرجل أنا بقولها يعني بأكد عليها عشان فعلاً ده بيحصل كتير من النساء.
درس الفجر ودرس العصر: ادعوا لنا ربنا يغفر لنا ذنوبنا اللي منعانا من الخير، ده الأذان.
أسئلة كتير في أن في شباب ما بتصليش، مش محافظة على الصلاة، لو ماتوا هتروحوا في داهية، ما بهزرش، اللي بالغ وما بيصليش ده ولا مش محافظ على الصلاة، ولا بيفوت فرض، فرض واحد تفوته من أكبر الكبائر، أكبر من أنك تفطر في رمضان، بعض العلماء قالوا أكبر من شرب الخمر والزنا.
الحاجة اللي هي عادي دي اللي هو احنا بننام ونصحى وقت ما نصحى، نصحى الفجر ده ما بنظبطش منبه ولا مهتمين نصحى قبل الشروق، لما نصلي الظهر بعد العصر والمغرب بعد العشاء، طب دي كبيرة أنت فعلتها فتحاسب عليها، فاهتموا بالصلاة يا شباب.
ماشي، ربنا عمل لكم إيه وحش عشان ما تحبوش تصلوا له ولا تقفوا بين إيديه يعني؟ كارهينه ليه؟ كارهين ربنا ليه؟ كل شيء جميل فعله سبحانه وتعالى، فكاره تطواب بين إيديه ليه يعني؟
سؤال عن الخطوبة: هل أفضل تكون فترة الخطوبة قصيرة، مع أني مقتدر مادياً؟ هو بيقول هخطب سنتين، كتير سنتين؟ أه، الأفضل تبقى فترة الخطوبة قصيرة وفترة العقد قصيرة، ده الأفضل لو أنت مقتدر مادياً، أثر الحاجات دي.
ماشي، أنا حاسس في يعني دي كلها سؤال نفس اللي هو الشخص، الثلاث ورقات ست اسئله، شغل الثلاث ورقات ده ما يمشيش علي، وثلاث ورقات إصلاح.
مش عارف أبطل العادة السرية، أقوم واقع وأعمل وكده، ارمي التليفون المحمول، ارمي التليفون السمارت فون ده، ترميه، ثم تستعين بالصبر والصلاة، صوم وصلاة، هذا كلام ربي، ﴿وَاسْتَعِينُوا بِالصَّبْرِ وَالصَّلَاةِ﴾ [البقرة: 45]، يبقى تسرد الصوم وتأتي بمئات الركعات، هو ده الاستعانة بالصوم والصلاة.
تسرد الصوم، ما تفطرش خالص، وعاوز تفطر يوم ولا حاجة في الشهر ماشي، نسمح لك بيوم في الشهر، وتأتي بمئات الركعات بنية أن ربنا سبحانه وتعالى يعينك على ترك ذلك، وترمي تليفونك اللي في إيديك، ماشي، مش هتعمل كده، أنت حر، خلاص، هو ده ده العلاج.
ناس بتسال السفر للبلاد ولاد بره وكده، لا ما تسافرش، اقعد، دراسة هنا حلوة، تنجح وزي كده.
بلاش أسئلة فقهية، عاوزين أسئلة أصل الأسئلة الفقهية دي تبقى للشخص بقى، واحد شغال في أوبر سكوتر وبنات تطلب رحلات، مش متصور المسالة دي يعني بتقعد وراه؟ ده بيحصل جداً، البنت تقعد ورا السواق اللي هو الراجل اللي ما تعرفوش ده، جداير، جدا، طب وبتمسك فيه؟ ماشي ماشي يعني يعني أنا بس بفهم السؤال ده، بيحصل، فانا لو وصلتهم بحكم العمل فقط دون أي نية.
أو علاقة خارج إطار العمل. يعني لو الصورة اللي احنا بنقولها دي أن هي بتقعد ورا السواق وتمسك فيه. إيه، إزاي يبقى جائز شرعاً؟ مش دايماً. تمسك في إيه بقى؟ لا ما توصلش، لا ما توصلش. لو بنتين، ماشي، يعني اللي سايقة بنت. والده سكوتر سبعة راكب. واحدة، يعني زوجها عنده ظروف، وإزاي أربي ابني؟ وندعي ربنا كتير، وربنا اللي بيربي الملك متربي، قال إيه؟ ده من عند ربي، فادعي ربنا كتير، ربنا يربي لك ابنك، وسلميه لحد يساعد في تربيته.
بيصعب عليا والله، ويبقى كاتب كتير، صفحتين تلاتة، وأنا مش عمري ما هقرا ده ولا ده. خط صغير، لسه هقول كل ده، لسه أربع دقايق. أنا بس عاوزكم تحسنوا خطكم لاني مبقاش فيه وقت أن أقعد أفك في الخطوط، خلاص.
واحد بيقول لما بخلص شغل ما بصدق أروح البيت العبادة بتكون ثقيلة، أعمل إيه عشان أنشط؟ أحبك يا مولانا، بحبك يا مولانا، وسايمايلي فيس. أول حاجة، تحاول تقلل من الخلطة فترة وجودك بره البيت، لو أنت شغلك ينفع ما يببقاش فيه خلطة، الخلطة مفسدة للقلب، ممكن واحد يبقى شغله مع الكمبيوتر مثلاً، أو مش يعني مش يبقى فيه خلطة، فتقلل من ده.
تاني حاجة، ما تبتديش العبادة وأنت في بيتك، خلي دايماً وأنت بره البيت في ذكر، فالذكر يقويك لما ترجع لبيتك بقا، قال له إيه: أن شرائع الإسلام تكاثرت علي، فدلني على عمل أتشبث به. بعض العلماء قال أتشبث به، فيعينوني على الشرائع اللي تكاثرت علي، فقالوا: لا يزال لسانك رطباً من ذكر الله. وأنت بره على طول السبحة في إيديك أو العداد في إيديك شغال ذكر، حتى لو مش مركز مع الذكر، مش مهم، شوية تركز وشويه ما تركزش، بس لسانك رطب من ذكر الله طول ما أنت بره البيت، يوم ما ترجع تجد توفيقاً من الله عز وجل وقوة على العمل والعبادة والمهمات الدين يعني.
وما هو قدامي كتير يعني وإيه تاني، بنقول إيه، خلاص دي قطعت ال. واحد ما بيصليش غير الجمعة مع زوج وعندي ثلاث أطفال منه، مش عارف.
حكم حلق اللحية؟ حلق اللحية يعني بالموس حرام، بالموس ده حرام في المذاهب الأربعة. بعضهم يعني فهم أن الشافعية يقولون بالكراهة فقط، وبعض يعني محررين المذهب قالوا لا عند الشافعية برده حرام، فحلق اللحية بالموس حرام، ما حدش يحلق لحيته بالموس. طب هيأخذ من لحيته؟ هنا الأمر فيه سعة، إنما بالموس لا.
قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.