الشيخ أمجد سميربسم الله الرحمن الرحيم، الحمد لله والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله.
اللهم صل على سيدنا محمد النبي وأزواجه أمهات المؤمنين وذرياته وأهل بيته كما صليت على آل إبراهيم إنك حميد مجيد.
أما بعد، النهارده درس موسمي استثنائي خدناه قبل كده، لكن هي الدروس الموسمية بتبقى مهمة علشان نذكر بما يجري. يعني هنتكلم عن الأشهر الحرم، ودائماً احنا بنربط بين الأشهر الحرم وإيه؟ حد يعرف؟ المفروض خدنا الدرس ده مرتين قبل كده، بنربط بين الأشهر الحرم وقضية كبيرة في الدين مهمة، وبنقول إن هي قضية محورية يعني مهم تبقى عارفها في الدين؛ قضية الاختيار، قضية الاختيار. فالنهارده الدرس إن شاء الله: شهر رجب وقضية الاختيار. يلا نسميه كده ماشي؟
بداية الأمر يا جماعة إن ربنا سبحانه وتعالى خلق الخلق، ثم اختار من الخلق ما شاء ومن شاء ماشي. فخلق البشر، واختار من البشر الأنبياء، واختار من الأنبياء أولي العزم، واختار من أولي العزم النبي محمد صلى الله عليه وسلم. وخلق الدنيا، واختار من الدنيا مكة علشان تكون الحرم ويبنى فيها بيته سبحانه وتعالى، واختار طبعا بقاعاً أخرى يعني. وخلق الزمان سبحانه وتعالى، ومن جملة ما اختاره من الزمان الأشهر الحرم.
فاحنا عندنا قضية كبيرة كده في الدين يا شباب اسمها قضية الاختيار؛ ذكرها الله عز وجل في كتابه فقال: ﴿وَرَبُّكَ يَخْلُقُ مَا يَشَاءُ وَيَخْتَارُ ۗ مَا كَانَ لَهُمُ الْخِيَرَةُ ۚ سُبْحَانَ اللَّهِ وَتَعَالَى عَمَّا يُشْرِكُونَ * وَرَبُّكَ يَعْلَمُ مَا تُكُدُّ صُدُورُهُمْ وَمَا يُعْلِنُونَ﴾ [القصص: 68-69]. آه، الآية دي مهمة جداً جداً، وهو الدرس بتاع النهارده بقى. احنا نرجع تاني لاختيار ومكة والحرم وهنرجع للكلام ده إن شاء الله والأشهر الحرم.
احنا ليه طبعا الدرس ده النهارده؟ يعني حد يعرف رجب بيبتدي إمتى؟ رجب؟ ها، يوم الأربعاء مش كده؟ الأول. حد يعرف، احنا عاوزين بقى وجوه جديدة يعني ما حدش بقى من اللي قدام خالص يتكلم، يرفع إيديه. عندنا كم شهر حرام حد يعرف يا شباب؟ الشباب، ال... احنا قلنا مش عايزين، أنت جديد، أنت ماشي، لو قلتهم قوم وقف بقى قوم وقف! لو قلت الأربعاء تاخد 100 جنيه قدام الناس دي كلها، أنت جاي تفلسني؟ أنا... طب تعال زي بعضه ماشي. عندك أنستغرام؟ طيب، اسمك ايه بقى؟ ماشي، جدع، ما تجاوبش تاني.
فاحنا عندنا أربع أشهر حرم، زي ما يف قال كده؛ عندنا شهر رجب، وده اللي هيبدا إن شاء الله الأربعاء الجاي إن شاء الله. وعندنا شهر... ثلاثة بقى مع بعض... ده رجب الفرد يسمى، وثلاثة ورا بعض بقى؛ ذو القعدة وذو الحجة والمحرم. طيب، حد يعرف يقول الـ 12 شهر الهجرية ورا بعضهم؟ ها؟ أه، تعرف؟ قوم وقف. تعرف تقولهم كلهم ورا بعض؟ يلا قول. طيب ما شاء الله. طب تعالى بقى، أنت اسمك ايه؟ ناس مذاكرة كلها هو عيال متربية! أنا قلت أول من العيال الصغيرة تلخبط، ماخدوش فلوس بس، في... اسمك ايه؟ محمد، ماشي حبيبي محمد، ماشي خلاص مافيش تاني أسئلة خلاص كده.
فنرجع بقى تاني يلا للدرس، فاحنا ربنا سبحانه وتعالى: ﴿وَرَبُّكَ يَخْلُقُ مَا يَشَاءُ وَيَخْتَارُ مَا كَانَ لَهُمُ الْخِيَرَةُ﴾ [القصص: 68]. الاختيار يا شباب؛ اختيار الله عز وجل نوعان: اختيار قدري واختيار شرعي. خلاص، أنا عارف الدرس ده زي ما قلت لكم مكرر، لأنه درس موسمي لكنه مهم، هي يعني هي قضية من أكبر قضايا الدين؛ قضية الاختيار وازاي نتعامل مع الاختيار.
فاختيار الله عز وجل اختيار قدري واختيار شرعي. يعني ايه اختيار قدري وايه اختيار شرعي؟ يعني يا شباب، كل ما يحدث في الكون اختيار الله القدري؛ يعني طالما حصل يبقى ربنا اختار ولا ما اختارو؟ اختارو. اختارو إيه؟ قدرا؛ أي قدر الله عز وجل أن يحدث كذا وكذا وكذا، والا لو ما كانش قدر ذلك سبحانه وتعالى ما كانش حصل. مفهومة دي؟ حد عنده اعتراض في دي؟ فده بنسميه اختيار قدري لله عز وجل.
أنتم عارفين أول معصية وقعت من إبليس كانت في الاختيار مع التسليم بالخلق؟ يعني هو ربنا بيقول: ﴿وَرَبُّكَ يَخْلُقُ مَا يَشَاءُ وَيَخْتَارُ﴾ [القصص: 68]، ربنا ما قالش: ما كان لهم الخلق، ما قالش كده، قال: ﴿مَا كَانَ لَهُمُ الْخِيَرَةُ﴾ [القصص: 68]، لم يقل ما كان لهم الخلق؛ لأن هو مين بينازع في الخلق أصلاً؟ هو ما فيش حد بينازع في الخلق إلا الشذاذ بقى، ولما بينازع في الخلق بيبقى جواهم عارفين إن إيه؟ إن هم هجاصين، مش كده؟ ولئن سألتهم من خلقهم ليقولن الله، ولئن سألتهم من خلق السماوات والأرض ليقولن الله، وفي الآية الثانية: ليقولن خلقهن العزيز العليم. فهم عارفين من جواهم، حتى فرعون وجحدوا بها واستيقنتها أنفسهم، فحتى اللي بيجادل في الخلق ده هو عارف إنه إيه؟ بيقول أي كلام.
فلذلك ربنا سبحانه وتعالى ما نفاش الخلق عن البشر، ما قالش إيه: ما كان لهم الخلق. لكن بعض الناس بينازع في الاختيار! بعض الناس ينازع في الاختيار! آه، الكفار الوحشين؟ لا لا لا. تقصد الفساق؟ لا لا لا. المسلمين؟ لا لا لا المتدينين! بعض المتدينين ينازع في الاختيار! ينازع الله عز وجل في الاختيار! هنقول كمان شوية إزاي.
ولذلك ربنا سبحانه وتعالى لما قال: ﴿وَرَبُّكَ يَخْلُقُ مَا يَشَاءُ وَيَخْتَارُ مَا كَانَ لَهُمُ الْخِيَرَةُ سُبْحَانَ اللَّهِ وَتَعَالَى عَمَّا يُشْرِكُونَ﴾ [القصص: 68]. وبعدين الآية اللي بعديها بقى كمان أعجب؛ لأن بعض الناس ممكن يبقى جواه بينازع في الاختيار، لكن ما ينطقش، يتكسف يقول أو يحرج يقول، لكن جواه بينازع في الاختيار. فماذا قال الله عز وجل في الآية التالية؟ ﴿وَرَبُّكَ يَعْلَمُ مَا تُكُدُّ صُدُورُهُمْ وَمَا يُعْلِنُونَ﴾ [القصص: 69]. يعني مجرد أنك تنازع الرب في اختياره في صدرك، في قلبك، فهذا شؤم، أو في آخر الآية الأولى: ﴿سُبْحَانَ اللَّهِ وَتَعَالَى عَمَّا يُشْرِكُونَ * وَرَبُّكَ يَعْلَمُ مَا تُكُدُّ صُدُورُهُمْ وَمَا يُعْلِنُونَ﴾ [القصص: 68-69].
ولذلك قلنا أول معصية لإبليس كانت منازعة لله في الإيه؟ مع التسليم بالأيه؟ خلقتني وخلقته! مش إبليس قال كده؟ خلقتني من نار وخلقته من طين، أنت اللي خلقنا احنا الاتنين أهو! تسليم لله عز وجل بالخلق، لكن نزعه في إيه؟ أنا خير منه! دي منازعة لله عز وجل في الإيه؟ في الاختيار.
ابتتدت الدنيا تنور دلوقتي، بتاعة أنا خير منه دي؛ عرفنا المتدينين بقى بيزاعوا ربنا في إيه؟ أه، فتلاقي المغني الفلاني معاه عربية 15، 16، 20، 30 مليون، والممثل الفلاني عنده طياره خاصه وقصر فين وإقامة فين وجنسية فين، والطالب الأزهري قاعد مربع في القطر بين العربيتين عشان محوش يدفع حق كرسي! يقوموا إيه؟ الناس بقى المتدينة الجميلة فاهمة دين بقى، تقوم جايبة الصورة دي حطاها جنب الصورة دي ومنزلاها على الفيسبوك، ويكتبوا الأشعار الجميلة اللي باللغة العربية دي اللي بتجيب لايكات، عارفينها؟ اللي هو إيه: ذو العقل يشقى في النعيم بعقله، وأخو الجهاله في... في... الإيه؟ في الشقاوة يسعد. صح؟ حافظين ما شاء الله! أيوة مش كده، أبيض بقى لغة عربية ومتشكلة وصح وتجيب شير ولايك.
أنت بتعمل إيه كده؟ هو من أعطى هذا ومنع ذاك؟ مين أنت؟ لا تسلم الاختيار الله عز وجل! تقول: لا لا لا، أوعى يا شيخ، أنا ما أقصْدش ربنا، أنا أقصْد أحوال الدنيا اللي متشقلبة. أعوذ بالله، أعوذ بالله! هو من يدبر هذه الدنيا؟ يعني لما تبقى أحوال الدنيا متشقلبة والله عز وجل هو مدبر هذه الدنيا، يبقى إيه؟ عرفتوا أن حتى أهل التدين عندهم إشكال كبير في مسألة الاختيار دي؟ عندهم إشكال كبير.
هو الحقيقة، الإشكال ده في إشكال سابق لهذا الإشكال، وإشكال لا يقل سوءاً عن مشكلتنا في النظر لمسألة الاختيار، اختيار رب سبحانه وتعالى. عارفين إيه هو؟ أن هو إيه اللي زعلك لما لقيت الطالب الأزهري قاعد مربع وجزمته مقطوعة والشنطة مبهدلة، أو الطبيب الفلاني اللي هو بيعالج الناس ببلاش فبدلته مش عارف عاملة إزاي وعيادته على قدها ومافيش، والتاني معاه العربية ومعاه الطيارة؟ إيه اللي زعلك؟ عارف إيه اللي زعلك؟ أن الدنيا في قلبك، وده إشكال سابق أصلاً، يعني فكر أنت أنك اتضايقت أصلاً! أقول لك: تعال بس تعال، أنت مضايق ليه دلوقتي؟ تقول: ما انت شايف ده معاه وده معوش.
طب أنا هسالك سؤال: لو المغني ده ولا الممثل ده اللي معاه الطيارة ومعاه مش عارف إيه وبتاع، متصور وماسك جناح ناموسة كده في إيديه ماشي وبيشاور عليها بقا وأيه ومعمول له بقا فوتوسيشن مع جناح الناموسة ماشي، وطالب الأزهري واقف من غير جناح ناموسة، هتحس بايه وقتها؟ هتحس أن يعني ماذا حصل هذا؟ ولا حاجة، مش كده؟ طيب، وما قدر هذه الدنيا كلها بقا، مش العربية والطيارة والقصر والإقامة والمش عارف إيه، ما قدر هذه الدنيا؟ كل الدنيا عند الله قدرها إيه؟ ما تساويش! ما تساويش جناح بعوضة! لو كانت الدنيا تعدل عند الله، لو تعدل عارفين لو تساوي، ما سقى منها كافرا شربة ماء. هي ما تساويش.
فاحنا مشكلتنا فين دلوقتي بقى؟ قلنا لكم قبل كده أن موازيننا خربانة، عاوزه تتعاير، مش كده؟ احنا بنقيس بالدنيا بموازين الدنيا، لكن الميزان عند ربنا مختلف. فيبقى أول إشكال عندك أيها المتدين -أنا بكلم بقا الناس المتدينة اللي جاية مسجد وسايبة اللي وراها والأشغال والمش عارف إيه- أول مشكلة عندك أن الدنيا لسه في قلبك، فلما لقيت المغني ولا الممثل ولا أي حد في الحِتّة دي، والتاني الراجل طالب الأزهري ولا الطبيب اللي على قد حاله ولا بتاع في الحِتّة دي، عملت جواك إشكال كبير! وأصلاً المفروض الإشكال ده ما يكونش أصلاً، ما يكونش جواك.
وبعد ما عملت الإشكال، رحت رايح اللي راح يعني بسوء أدب مع الله عز وجل، راح يعمل إيه؟ يعدل على ربنا! راح يعدل على ربنا يحط صورتين جنب بعض، ويكتب كلام معناه: أنا مش موافق على القسمة دي، أنا مش موافق! هتقول: لا، ما أنا بصراحه، هو فعلاً بيكتب ما يوصلش ربنا، لا يخرج من الدين يعني، هو ما يقصدش ده، بس يا جماعه هو ما قال الأمر إلى ذلك. هتقول لي: إيه، أنا والله ما أقصد ربنا خالص، أنا بتكلم على الناس اللي ما بتعملش. والناس اللي بتعمل، الإيه بقى اللي كلنا حافظينها وقلناها 100 مرة ها: ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112] مش كده؟
يعني فلان اللي رفع من قيمة الفساق ونزل من قيمة أهل الدين، ﴿وَلَوْ شَاءَ رَبُّكَ مَا فَعَلُوهُ﴾ مش كده؟ فطالما فعلوه، يبقى شاء ربك أن يحدث ذلك، شاء ربك! يبقى إذاً هذا اختيار الله عز وجل القدري، ده اختياره القدري سبحانه وتعالى.
عارفين يا جماعة الإشكال الأول ده، اللي هو موضوع الدنيا ونظرها للدنيا عشان بس ما نقولش إيه يعني ما الناس بتزعل أصلاً من الكلام وتقول أنت يعني دائماً... لا، هو ده حصل لصحابي ومش أي صحابي! الإشكال ده نفسه حصل لصحابي ومش أي صحابي، حصل لمين؟ لعمر رضي الله عنه. عمر، مش كده؟ يدخل على النبي عليه الصلاه والسلام يلاقيه نايم على الحصير، أثر في جنبه الشريف، ومافيش حاجة ترد العين في حجرته صلى الله عليه وسلم، فيزل عمر ويظهر عليه التاثر ويبكي. فالنبي عليه الصلاه والسلام يسأله: أنت إيه ما يبكيك؟ ما يبكيك؟ فقال: أنت وأنت رسول الله فيما أنت فيه، وكسرى وقيصر يتقلبون في الدنيا وكذا وكذا.
فالنبي عليه الصلاه والسلام مش بس يرد، يغضب! هو ده نفسه اهو يا جماعة، هو هو نفس الموقف! سيدنا عمر شاف النبي عليه الصلاه والسلام في الحالة دي، واستحضر في ذهنه صورة كسرى وقيصر، كان صورتين جنب بعض أهو اللي أنت حاططهم على الفيسبوك، فعيط ما... ماشي، فمالك دول معاهم قد كده وأنت ماكش حاجة! غضب النبي صلى الله عليه وسلم وقال: «هؤلاء قوم عجلت لهم حسناتهم في الدنيا. أما ترضى أن تكون لهم الدنيا ولنا الآخرة؟».
فالإشكال ده... يحتاجوا تربية زي سيدنا عمر رضي الله عنه لما حصل له الإشكال واحتاج تربية وتوجيه من النبي عليه الصلاة والسلام. خلاص، أننا بنقيس دلوقتي، بنقيس بالدنيا، فلما قِسنا بالدنيا حصل إشكال تاني! يبقى أول حاجة، أول حاجة لازم تطلع من جوانا واحنا بنقيس واحنا بنوزن واحنا بنعمل الحاجات دي، لازم تبقى شايف الدنيا في مكانها الصحيح، زي ما قلت لكم دلوقتي؛ اللي هو جنب عربية ولا جنب طيارة ولا بتاع، تخيلوا كده اللحظة إنه ماسك... ما ينفعش بنقول جناح ناموسة، جزء من جناح ناموسة، وفي يفخر به، ساعتها هتراه على حقيقته.
فلما ما كانتش الدنيا كده عندنا وهي عند الله على هذا القدر، عملت لنا إشكال تاني بقى اللي هو وقعنا فيه، اللي هو إيه؟ نزعنا الله في الاختيار! يعني كأنك بتقول: لو قُضِيَ الأمر إليَّ، لما كان هذا! أعوذ بالله، أعوذ بالله.
طب أنا أسألك سؤال تاني: هذه القسمة، هل في قسمة، اللي أنت جبتها، اللقطتين اللي جبتهم وحاطين قدام بعض دول، هل في قسمة أحكم وأعدل منها؟ أنت هتفكر؟ ما فيش! ما فيش؛ لأن دي قسمة ربنا سبحانه وتعالى، هذه قسمة الله فلا أحكم ولا أعدل منها، حضرتك بقا عرفت الحكمة، ما عرفتش دي...
قصة ثانية، يعني مش معنى إنك مش عارف الحكمة إن ما فيش حكمة، فاهمين؟ يعني جهلك بالحكمة لا ينفي الحكمة. لا، أنت اللي ما تعرفش الحكمة، صح كده؟ وعشان كده قلنا لكم صورة لازم تقراها كل جمعة، كل جمعة ما تفوتش جمعة غير ما تقرا سورة الكهف، مش كده؟ من فوائد سورة الكهف أنها بتذكرك بالمعنى ده، مش معنى إنك مش عارف الحكمة إن ما فيش حكمة، مش كده؟
يجي النزاع النفسي والشرعي مع القدر. موسى بيمثل النفس البشرية اللي عندها أحكام الشرع؛ الأحكام الظاهرة؛ حلال وحرام، والخضر يمثل القدر، مش كده؟ فأول حاجة السفينة؛ الناس مساكين وأولاد حلال، وخدوه ببلاش. خدوهم ببلاش، لما يعرفوا الخضر هم مش عارفين موسى، لكن عارفين الخضر، ركبهم ببلاش، يعني حاجة في قمة الأخلاق والذوق، يقوم الخضر يغفلهم، وينزل يعمل إيه؟ يشيل لوح من السفينة، فموسى النزاع بقى البشري دلوقتي، وفي أحكام شرع عندنا يعني: أولا لا يجوز اللي بتعمله ده أصلا، مش كده؟ ثانيا: دول أكرمونا، يعني تقابل الإكرام؟ شوف! ما يقدرش يسكت موسى مع أنه وعد أنه هيسكت. هو ده اللي بيحصل لنا يا شباب؟ ده اللي بيحصل لنا في الدنيا؛ عندنا أحكام ظاهرة وعندنا قدر، حكمته فين؟ ما نعرفش، ما نعرفش.
وبعد شوية تظهر بقى الحكمة: أن اللوح ده بعد شوية هيخلي السفينة دي ما تتخدش منهم، وكان وراءهم -يعني أمامهم- ملك يأخذ كل سفينة صالحة غصبا، أي سفينة ما فيهاش عيب هياخدها، فعيب السفينة يعني أنهم ينجوا بسفينتهم. وبعد شوية يأخذ الولد الوضيء ده، كل الناس تحبه لما تشوفه، وياخد القلوب وبتاع، يقتله الخضر! يطلع نفس النزاع أهو النزاع: الأطفال اللي بتموت في غزة، مش عارف مين اللي... النساء اللي بترمل، مش هو هو أهو؟ هو هو النزاع النفسي اللي بيجيلنا ده، وبعدين يخلينا نعترض على الأحكام القدرية، الاختيارات القدرية لله عز وجل، ماشي؟ مش مع كده كل الأطفال اللي ماتت دول، أو أبهم مش عارف إيه، وهو كان هيطلع كذا؟ لا، مش كده.
هنا يا جماعه احنا بس بنشير إن في حكم في هذه الأمور أنت ما تعرفهاش؛ سلم لربنا سبحانه وتعالى، سلم له اختياره القدري، هنيجي كمان شوية نشوف إن شاء الله إيه واجبنا نحو الاختيار القدري. وبعدين فيظهر أن الولد ده لو كان كبر كان هيبقى كافر، وأبوه ناس صالحين ومتدينين ومؤمنين، ولو كان كبر مش بس هيبقى كافر، هيحمل على الكفر، كان هيكفر أبوه وأمه. وكل ما أجي الدرس ده أقول لكم إيه؟ أقول لكم: لعل الأب والأم عايشين عاشوا وماتوا بحسرتهم ومش عارف عارفين الخير اللي ربنا كان شايله لهم، يعني الأب والأم مش عارفين القصة دي، مش عارفين إن الولد ده لو كان كبر كان هيكفينا إحنا، أرهقنا طغيانا وكفرا، كان هيكفر بالله على إيده، ما يعرفوش! ولعلهم ماتوا بالحسرة أنهم يعني متضايقين على ابنهم، ومش عارفين الخير إن كان الخير في موتى هذا الغلام. وبعدين قصة الجدار يعني حكينا القصص دي قبل كده.
فيقى ده الاختيار القدري أن ربنا سبحانه وتعالى يخلق ما يشاء ويختار، فيجي في زمن من الأزمنة يختار علو أهل الدين والتمكين لهذا الدين، ويجي في وقت يختار علو أهل الباطل والتمكين لأهل الباطل، فتيجي أنت في وقت تمكين أهل الباطل وعلو الظلمة والفجرة تقول: ده لو كان الأمر بإيدي ما كنتش هعمل كذا! أيوه، ما عشان أنت جاهل، ما هو اللي يقول كده ده ده أبسط كلمة أقولها يعني كده، مش بجلد... كنت أديك تأشيرة على طول، ولما تقول كده وربنا عمل كذا تاخد تأشيرة على طول، مش كده؟ الجاهل دي كلمة حلوة يعني، ما ربنا سبحانه وتعالى هو اللي ولى فلان، وفي دي بالذات ربنا سبحانه وتعالى بقى نزع الأمر من إيد البشر، مش كده؟ ﴿قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تشَاء وَتَنزِعُ الْمُلْكَ مِمَّن تشَاء﴾ [آل عمران: 26]، مشحت حد تاني دي، لا بتاعة القوة العظمى، ولا بتاعة اللوبي الصهيوني، ولا بتاعة تزوير انتخابات، ولا بتاعة حد! ﴿قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء ۖ بِيَدِكَ الْخَيْرُ﴾ [آل عمران: 26].
يبقي لما تولى فلان بيدك الخير، ما هو الشر ليس إليك، مش كده؟ مش النبي كان يدعي كده يقول كده صلى الله عليه وسلم -صلوا على النبي-: «والشر ليس إليك». يعني: تولي فلان اللي أنت شايفه ده شر ما فيش بعد كده، أو تسلط الدولة الفلانية على العالم بيمينه فانت شايفه شر ما فيش بعد كده، نقول: ربنا سبحانه وتعالى الشر ليس إليه، فكون القدر ده يبقى في طياته خير أنت ما تعرففوش. ولما الناس بيستشكل عليها ده بروح على طول مرجعكم لمين؟ إبليس، أقول لكم: سيبكم بقى من أمريكا وسيبكم من الصهاينه، سيبكم من ده كله؛ ربنا في وقت اختياره أن إبليس يبقى إلى يوم الدين، اختيار الله عز وجل، حد يجرؤ دلوقتي يقول إن ده كان اختيار أنا؟ أنا نفسي مش عارف أقولها، مش عارف أسئل، مش مش عارف أقولها، مش قادر أسأل السؤال، يعني يعني ما ينفعش نقول هذا أفضل اختيار! أفضل اختيار يعني هو أصل الشر وجود إبليس، اللي هو لو كان سأل أنظرني فقال له: لا مش هأنظرك، كان اختفى الشر، مش كده؟ ما كانش في شر لبيوم القيامة، قال: ﴿فَإِنَّكَ مِنَ الْمُنظَرِينَ﴾ [الحجر: 37]، فاختار الله لإبليس أنه يفضل ليوم القيامة، مين دلوقتي يرفع إيده بقى يقول: لا الاختيار ده يعني لو أنا بقى ما كنتش اخترت لإبليس؟ مش عارفين بنتعامل إزاي مع اختيارات ربنا.
كون ربنا سبحانه وتعالى اختار قدرا أن يحدث ذلك، أول حاجة تسلم لاختيار الله عز وجل، وتعرف ده أحكم شيء، تعرف أن ده أحكم شيء. يعني إيه أحكم شيء يا شباب؟ عشان بس الكلمة دي الناس ما بتفهمهاش قوي يعني أو ما بتستوعبش المعنى؛ يعني في ظل وجود الناس دي مع الناس دي بالأوصاف دي والأوصاف دي أحكم شيء أن يكون الوضع كده، لما بقى تتغير الناس دي أو تتغير أوصافهم ساعتها الاختيار هيكون شيء تاني، إنما بالأوصاف دي والأخلاق دي والطباع دي ويعني كيفية العبادة دي أنتوا أحكم شيء تكونوا في الحتة دي، ده أحكم شيء ليكم لأن ربنا سبحانه وتعالى لا يظلم الناس شيئا، لو تستاهلوا أكثر من ده كان حصل، فطالما ما حصلش يبقى ما تستهلوش دلوقتي، يبقى ما تستهلوش دلوقتي وسنن الله عز وجل لا تحابي أحدا، لا تحابي أحدا. فيبقى نسلم للاختيار القدري.
فلانة اتجوزت وأنا متجوزتش ليه يا رب؟ ده أنا أحلى منها، ده أنا أجمل، ده أنا متعلمة مش عارف فين، ده أنا معايا الشهادة الفلانية! حتى لو ما تكلمتيش، جواك، وربك يعلم ما تكن صدورهم وما يعلنون. فلان منافسك في الشركة إتراقى وأنت لأ، مع أن أقل من مواهب والشهادات اللي حصلها مش زي الشهادات اللي حصلتها، وشطرتك في الشغل أكثر من شطارته في الشغل، فتبت تعترض على ما يعني إيه يا جماعة تعترض؟ يعني يجي جواك كده أنه: ليه يا رب؟ حتى لو جواك، حتى لو جواك خلاص؛ فلا، وربك يخلق ما يشاء ويختار، ما كان لهم الخيرة.
خلي بالك، أنت ممكن أنك لو كنت خدت المنصب ده تروح النار، بالمنصب ده تروح النار! الحديث بتاع الأثر بتاع ابن مسعود المفروض كله حافظه بقى يعني قلناه كتير، قال إي: «إن العبد ليهتم بالأمر من التجارة والاماره حتى ييسر له»؛ واحد يهم بحاجة؛ يروح يعمل تجارة سبوبة بتاع قرشين أو إمارة يعني منصب أو مال الاتنين أهم، «حتى ييسر له، فينظر الله إلى ملائكته فيقول: اصرفوه عنه»؛ ليه؟ ربنا بيكرهك؟ «فإني إن يسرته له أدخلته النار». إيه رايكم؟ ربنا بيحبك وأنت ما تعرفش! يعني أنت ما تعرفش أن اللي اتصرف عنك ده، الصفقة اللي خسرت فيها دي لو كنت كسبت فيها كنت هتنشغل بالدنيا، وهتعجب بنفسك، وهتسب النوافل، وشوية تسيب صلاة المسجد، وشوية تسيب الصلاة خالص! أنت ما تعرفش ده كله، أنت أنت ما تعرفش الغيب، فربنا سبحانه وتعالى حجب عن حجب عنك ذاك، يقول الله لملائكته: اصرفوه، اصرفوه عنه، فإني إن يسرته له أدخلته النار. فيظل يتطير يتشاءم يقول: سبقني فلان، دهاني فلان، ما هم عملوا عليا كومبيلة في الشغل وهما مش عارف إيه، وأصل هو هو بيدخل ده العصفورة بتاع سبقني فلان، دهاني فلان، وما هو إلا رحمة الله، وأنت ما تعرفش، شوف أنت الموضوع بيدبر لك ازاي وأنت ما تعرفش، ويا ريتك بقى ما عرفتش فقضيت راسك وسلمت لله.
إزاي تقول إيه؟ تقول كلمة إبليس: آه، ما هي دي كلمة إبليس: أنا خير منه، أنا، فتقول كلمة إبليس وأنت ما تعرفش يا مسكين أن هذا ما صرف عنك إلا لحكمة لله عز وجل. في بعض الآثار أن الله عز وجل يقول: إن من عبادي من لا يصلحه إلا الفقر ولو أغنيته فسد حاله، وإن من عبادي من لا يصلحه إلا الغنى ولو أفقرته فسد حاله، وإن من عبادي من لا يصلحه إلا المرض ولو صححته فسد حاله، وإن من عبادي من لا يصلحه إلا الصحة ولو أمرته فسد حاله. من الآخر: دع تدبير الكون لله، مش بتاعتك، مش بتاعتك ولا بتاعتك أنك تقولي ده بيحصل أنا إيه نفسي أتجوز فلان أو فلان يتجوزني، وبعدين فلان ما يحصلش نصيب ما يتجوزك فلان، فتعيش حياتك كلها في الخانة دي أنه: أنا عاوزه فلان. وما تعرفيش يا مسكينة أنك لو كنت اتجوزتي فلان كان كفرك في عيشتك يعني، مش لازم يعني يطلع فل يعني، ما تعرفيش أنت ما تعرفيش، أو يمكن يقل دينك، أنت عاوزه دين وعاوزه آخرة، هو الراجل ده شوية وهيبقى إيه ما عندوش دين ويسحب مثلا، أو العكس: أنا عاوز فلانة وما تجيش فلانة، وربنا سبحانه وتعالى يقدر لك أمرا آخر، خلاص سلم لاختيار الله عز وجل، وقول ده اختيار ربنا وهذا أحكم وهذا أنسب وهذا أفضل وهذا أجمل.
يعني يا جماعه أنت جواك أنك عاوز حاجة معينة، ما جتش الحاجة المعينة دي، وجت حاجة تانية، حبها أكثر من الحاجة اللي جت، حبها أكثر من الحاجة اللي جت ليه؟ لأن الحاجة اللي أنت كنت عاوزها اختيارك، والحاجة اللي جات لك اختيار ربنا سبحانه وتعالى، فثق في اختيار الله لك عن اختيارك لنفسك. فاهمين دي؟ المعنى ده موجود فين؟ فين في الاستخاره؟ عارفين معنى الاستخاره يا جماعة؟ معنى الاستخاره إيه؟ أنك بتقوله: يا رب أنا ما اعرفش حاجة، الأمر اهو خير لي، هذا معنى الاستخاره باختصار. أنت لما بتيجي تستخير بتقول إيه؟ اللهم إن كنت تعلم أن هذا الأمر -وتسمي حاجتك- خيرا لي في ديني ومعاشي وعاقبة أمري، فاقدره لي ويسره لي، ثم بارك لي فيه، وإن كنت تعلم أن هذا الأمر -تسمي حاجتك- شرا لي في ديني ومعاشي وعاقبة أمري، فاصرفه عني واصرفني عنه، واقدر لي الخير حيث كان، ثم رضني به.
معنى الاستخاره ببساطه: يا رب أنا ما اعرفش، وعشان كده تقولها في أول الاستخاره، صح؟ فإنك تعلم ولا أعمل، أنا ما اعرفش حاجة يا رب، فخير أنت لي. فربنا يختار لك، بعد ما يختار لك: ليه يا رب، أنت إيه يا ابني، أنت ما انت قلت ما تعرفش، بقيت تعرف فجأة؟ فجأة بقيت تعرف؟ خلاص، ما أنت وأنت بتستخير قلت: ما أعرفش، أنا ما أعرفش يا رب، اختار لي، اختار لك. عشان كده يا جماعة الاستخاره دي عجيبة والله، يعني الإنسان إذا استخار وبعدين مشي في الأمر وهو خلاص هموت على الحاجة دي، البنت هتموت على الواد ده، الولد ده اللي هموت على التجارة دي، هموت على الشغلانة دي، عارفين الاستخاره دي لو فعلا بقى أنت يعني فاهم استخارة وما جتش الحاجة دي، والله والله تفرح! أنا مش بقول تصبر، لا تفرح، اللي هو لو فجأة جه واحد قال لك: كان أحسن لك كذا، تيجي تقول له: والله لا، والله لو فهمت معنى الاستخاره تقول له: والله ما كان أحسن لي. طيب ليه؟ ما اصل ده اختيار ربنا، ده اختياره سبحانه وتعالى.
فيفقى حتى أهل التدين، حتى الناس المتدينة عندها إشكال في الاختيار، عندها مشكلة، فوزين المشكلة دي تطلع بقى: وربك يخلق ما يشاء ويختار، ما كان له الخير، سواء بقى اختيار في خاصة نفسك أو في أي حد، أو في العموم زي ما قلنا: مين يتولى مين؟ الدولة أقوى من الدولة، مين كسب في الحرب؟ اختياره سبحانه وتعالى ما كان له الخير، خلاص فانت تسلم لهذا الاختيار.
يبقى اه، يبقى أول حاجة اختيار قدري، نعمل إيه بقى مع الاختيار القدري؟ تسلم لهذا الاختيار القدري، بس كدة؟ في حاجة تانية؟ تنظر في الأمر الشرعي لدفع هذا الاختيار القدري، ما هو يا جماعة من حكم ربنا في الاختيارات القدرية إيه؟ أنك أنك في أمور شرعية تدفع بها هذا الاختيار، يعني يعني مش مثلا إيه الكفرة سلطت على المسلمين، خلاص بقى إرموا السلاح وسيبوا الكفرة مسلطين على نقول لا، هو ده مش المعنى، ما هو من حكم الله سبحانه وتعالى أنك تسأل: يا رب، ما أمرك الشرعي في هذا الاختيار القدري؟ يبقى أنا أول حاجة أرضى باختيار الله القدري، وأراه أحكم الاختيار وأجمل الاختيار في في تلك الظروف، هؤلاء القوم بالتفاصيل كلها كده ما فيش حاجة أحكم من.
كده طب يا رب عشان المعادلة تختلف، يبقى لازم طرف من المعادلة على الأقل يغير. عاوزين الناتج؛ أنتم عارفين المعادلة: حاجة زائد حاجة؛ س زائد ص بتساو ع، خلاص فالنتيجة النهائية ع، صح كده؟ عاوزين ع دي تختلف، لازم تعمل إيه؟ يتغير س يتغير ص، مش كده؟
اه، أنت س بعيد عنك، ركز والله الكلام ده مهم جدا، س دي براك. يعني س مثلا هم الكفرة اللي بيعدوا الأسلحة ليه وبيعملوا الجيوش به؛ هتعمل لهم إيه؟ لكن في إيدك تغير فين؟ في ص، اللي هي أحوالك مع ربنا سبحانه وتعالى، فتبقى من أهل الإيمان اللي بيتنزل عليهم النصر، اللي ربنا وعد بالنصر، أي حد كده؟ أي حد معدي كده ربنا وعده ينصره؟ ولا إيه؟ ﴿وَلَيَنصُرَنَّ اللَّهُ مَن يَنصُرُهُ﴾ [الحج: 40] مش كده؟ مش أي حد معدي بره كده ربنا ينصره، يعني مش كده، في شروط للنصر. يبقى تغير في الحاجة اللي في إيدك، اللي هي ص، اللي هو أنت تبتدي تغير في دي، فلما تغير ص الناتج هيتغير، ع تتغير، ولغاية ما تغير ص، أنت راض بعين ولا مش راض؟ راض بنسبتها إلى الله عز وجل، يعني ترى أن ع دي هو أنسب ناتج ولا لا؟ تراه أنسب ناتج يتحط بعد علامة يساوي، طالما س كدة وص كدة ما تطلعش غير ع، هي ما فيش غير العين دي. عاوز بقى تغير العين دي، تبقى ف ولا تبقى ل، ولا غير حاجة من الاتنين دول؟ دي حكمة من حكم ربنا سبحانه وتعالى، واضح؟
فييبقى أول حاجة مع الاختيار القدري نعمل إيه؟ نسلم لاختيار الله، ونراه أحكم شيء وأجمل شيء، وليس في الإمكان أجمل ولا أحكم مما كان. خلصنا من دي، نسأل بقى نفسنا: هو لما ربنا عمل ده، عمله ليه؟ مش اعتراض يعني؛ ليه يا رب؟ لا يعني يعني رسالة، يعني ماذا يريد سبحانه وتعالى إيه إن احنا نعمله علشان يتغير الموضوع ده؟ تسأل نفسك السؤال ده في كل حاجة بقى، كل تفصيلة، يعني ممكن يبقى في حاجة مثلا لا إن مجرد الصبر، زي ما قلنا كده الجوازة اللي اتفشكلت دي مثلا، أو الست اللي ربنا ما كتبلهاش أنها تخلف أو كذا، خلاص يبقى الأمر الشرعي إيه يا رب؟ إيه أمرك الشرعي ليا في الحالة دي؟ انك تصبري وترضي، خلاص، أمره سبحانه، قدره، اختياره. وما تعرفيش، ما تعرفيش يعني لو كان جه الولد كان هيبقى الحالة شكلها إيه والحياة عاملة إزاي؟ ما تعرفيش، وما تعرفيش عدم الولد ده، يمكن ده سبب دخولك الجنة في الآخرة؟ ما تعرفيش، فتسلمي، وإيه الأمر الشرعي؟ الصبر، خلاص صبرنا يا رب.
في وقت تاني زي ما قلنا، الأمر الشرعي إيه يا رب؟ تغير أحوالك مع ربنا علشان المعادلة تختلف، ﴿وَأَعِدُّوا لَهُم مَّا اسْتَطَعْتُم مِّن قُوَّةٍ﴾ [الأنفال: 60] ما هو ده أمر في القرآن، مش كده؟ ﴿وَأَعِدُّوا لَهُم مَّا اسْتَطَعْتُم مِّن قُوَّةٍ وَمِن رِّبَاطِ الْخَيْلِ تُرْهِبُونَ بِهْ عَدُوَّ اللَّهِ وَعَدُوَّكُمْ﴾ [الأنفال: 60] فييبقى ده أمر شرعي، وهكذا تقعد تدور تدور يا رب إيه الأمر؟ احنا هنا مش جايين نتكلم في أمر بعينه، احنا بنفهم مسألة الاختيار، وإزاي نتعامل مع الاختيار، إزاي نتعامل مع الاختيار؟ يبقى ده الاختيار القدري.
طيب، وربك يخلق ما يشاء ويختار، اختيار قدري وقلنا، واختيار إيه؟ شرعي. إيه الاختيار الشرعي لربنا سبحانه وتعالى؟ كل الأحكام الشرعية، يعني أي أمر ربنا قال لك افعل، فهو اختياره الشرعي سبحانه وتعالى. الاختيار الشرعي ده لازم يحصل؟ لازم يحصل، مش لازم صلي، هل كل الناس بتصلي؟ لا، مش كل الناس بتصلي، مش كده؟ صم، حج، جاهد، عامل زوجتك كويس، عامل أبوك كويس، كل دي أوامر شرعية، اختيارات شرعية لله سبحانه وتعالى. لازم تحصل؟ لا، مش لازم تحصل، بخلاف الاختيارات القدرية لازم تحصل، لازم، خلاص. ففي اختيار شرعي اللي هي أوامر ربنا الشرعية، وربنا سبحانه وتعالى يخلق ما يشاء ويختار، مالكش انك تقول ليه يا رب؟ أو أقنعني الأول، عارفين بقى الكلام ده؟ أقنعني الأول، اتحجبي، أقنعني الأول، حاضر، ربنا بيقول لك اتحجبي بس خلاص، أقنعك أقولك أكتر من كدة؟ هو ربك يخلق ما يشاء ويختار، مش كده؟ تعالى هي اللي بتقول لك أقنعني دي، راحت بكرة الشركة، فراح المدير قال لها إيه؟ والله احنا في قرار جديد نزل بقى، اليونيفورم لازم تحطي حاجة على راسك، هتقول له أقنعني؟ مش هتقول له أقنعني، هتيجي تاني يوم وحاطة حاجة على راسها، صح يا جماعه ولا احنا... أنا عارف اللي بقوله كويس يعني، يعني بلاش المدير.
ماشي، أنا هقول لكم بقى أمثله، علشان نيجي نقول لك إيه: «ما أسفل من الكعبين من الإزار ففي النار» ماشي؟ فيا فلان، يعني ارفع إزارك، وأنق، وكذا والحاجات دي ماشي؟ فتلاقي زمزقة وأقنعني وليه ومش ليه، مثلا يعني، وبعدين تنزل الموضة في سنة من السنين أن الموضة إيه؟ أنك في موضة انك تشمر، في سنة في وقت نزل كده، وفي موضة لكل البنتاكور، وفي موضة، المهم، فتلاقي إيه؟ اللي كان السنة اللي فاتت بيقول لك أقنعني، السنة دي لابس فوق الكعبين، مش كده؟ آه، هتقول للبنت البسي واسع، تقول لك أقنعني، طب لو نزلت موضة الواسع، هتلبس واسع.
اختيار ربنا الشرعي إزاي نتعامل؟ احنا عرفنا الاختيار القدري نتعامل معه إزاي؛ تسلم وترضى، وتراه أحكام الاختيار وأجمل الاختيار، وتذهب تبحث عن الأمر الشرعي لمدافعة هذا الأمر القدري أو الاختيار القدري، مش لازم المدافعة، المدافعة أو التعامل معاه، خليها كلمة تعامل عشان تبقى أوسع. المدافعة دي احنا حصرناك في حته أن الاختيار القدري ده يدافع، مما يدافع، يعني ممكن ما يبقاش مما يدافع، يعني مما يصبر عليه مثلا، وفي اختيار شرعي.
طب إيه بقى واجبنا نحو الاختيار الشرعي؟ ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ﴾ [الأحزاب: 36] الخيرة دي أهي مرة تانية أهو، ما كان لهم الخيرة هنا الخيرة أهي، الآية التانية إيه؟ سمعنا وأطعنا، إيه الآية بتاع سمع وأطعنا؟ ها؟ وما كان، لا مش دي، ﴿إِلَى اللَّهِ وَرَسُولِهِ لِيَحْكُمَ بَيْنَهُمْ﴾ [النور: 48] إيه إيه الآية؟ ﴿إِنَّمَا كَانَ قَوْلَ الْمُؤْمِنِينَ إِذَا دُعُوا إِلَى اللَّهِ وَرَسُولِهِ لِيَحْكُمَ بَيْنَهُمْ أَن يَقُولُوا سَمِعْنَا وَأَطَعْنَا﴾ [النور: 51] فييبقى الاختيار الشرعي أن تقول فيه: سمعنا وأطعنا، سمعنا وأطعنا، هو ده الاختيار الشرعي.
طيب، هيجي الاختيار الشرعي في وقت في مشقة وفي شدة، تعمل إيه؟ سمعنا وأطعنا. حصل للصحابه ولا ما حصلش؟ آه، وتعالوا نرجع لآية الخيرة تاني، ماشي؟ ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ﴾ [الأحزاب: 36] عارفين الآية دي نزلت في مين يا شباب؟ حد يعرف؟ من غير فلوس، في مين؟ في زيد رضي الله عنه وزينب، مش كده؟ هو مش في زيد، هي في زينب. زينب رضي الله عنها، قصة هنا عجيبة جدا كده يا شباب، ركزوا معايا فيها، حكيناها لكم هنا قبل كده، مش كده؟ الأول يا جماعه العرب، العرب كان عندهم مسألة تبني دي موجودة، يعني واحد يتبنى واحد ويسميه باسمه، دي كانت موجودة عند العرب. وبعدين لو تبنيت واحد وبقى باسمي، يعني فلان أمجد بقا باسمي، فبياخد أحكام البنوة، من الأحكام دي: لو أتجوز واحدة وبعدين طلقها، ماينفعش أنا أتجوزها لأنها طليقة ابني، مفهوم؟ ده كان عند العرب، ومسألة الأبضاع عند العرب مسألة كبيرة مش سهلة، مسألة الأبضاع، مسألة الفروج مسألة كبيرة.
لما جه الإسلام في الأول وكان التبني موجود بردو، فالنبي عليه الصلاه والسلام تبنى واحد اللي هو سيدنا زيد، وكان اسمه زيد بن محمد، خلاص. طيب، أراد الله عز وجل أن يبطل التبني، وأن يبطل مع التبني الفكرة دي، فكرة إيه؟ أن زوجه الابن من التبني ماينفعش الاب يتجوزها، لو كان نزل آيات تتلى كان ممكن المسلمين ما يمثلوش، الموضوع محتاج حاجة تزلزل شوية، ليه؟ علشان المسألة خاصة بالأيه؟ بالفروج، بالأبضاع، الناس شايفاك، أو أنت نفسك هتشوف انك رايح تتجوز طليقة ابنك، فدي عند المسلمين العرب يعني هتبقى حاجة كبيرة، مش كفاية فيها أمر الكلام اللي بقوله ده.
حصل في حتة تانية ولا حصلش؟ أنه لما الصحابه أمروا بأمر ولا واحد عمله، صلح الحديبية، مش كده؟ قلنا لكم قبل كده صلح الحديبية ليه؟ عشان إيه اللي غلبهم وقتها؟ نخوة العربي بردو، طباعة العرب كده، يعني إيه؟ لا، ده احنا نروح ونموت، يعني إيه تحللوا هنا ونحلق، وطبع العربي يأبى ده في صلح الحديبية رايحين يعملوا عمرة، منعوا من البيت، فالنبي عليه الصلاة والسلام قال لهم: تحللوا واحلقوا. خلاص، كم واحد حلق؟ ولا واحد. أنتم فاهمين يا جماعه؟ أنت فاهم واقف قدام النبي عليه الصلاة والسلام بيقول لك روح أحلق، وبعدين مين اللي واقف؟ مش أنا وأنت، ده أبو بكر وعمر وعثمان وعلي وطلحة والزبير، الناس دي اللي واقفة، ولا واحد حلق! الطبع العربي بردو، مش كده؟ يعني وعمر نفسه اتكلم بقى، يعني مش بس بتكلم الناس: ألسنا على الحق؟ ألسعدونا على الباطل؟ فلما نعطي الدانية في ديننا؟ ما نروح نموت، اتكلم كده، ليه؟ إيه اللي غلبه؟ ما هو العرب كده، يعني احنا هنيجي كمان شوية نقول لكم ربنا اختار بقعة مكة وحرمها وبعدين الأشهر الحرم، ليه؟ لأنطباع العرب، كانوا على طول في حروب، فالنخوة دي موجودة عندهم، هنقولها لكم بقى ونقول لكم وقتها يعني القصة دي إن شاء الله.
فامتى حلقوا؟ لما حصلت حاجة بقى هزتهم، لما إيه اللي حصل؟ النبي نفسه طلع وحلق، أول ما عمل كده النبي عليه الصلاة والسلام، كله حلق، وهم بيحلقوا لبعض كانوا هيَموتوا بعض، متغاظين! الموس في واحد وبيحلق للي قدام، وهو متغاظ، كانوا هيَموتوا بعض. فممكن في وقت علشان نكسر الحته دي، ما يكفيش نص، ما يكفيش النص حاجة تحصل تزلزل الموضوع ده، لأنه موضوع مترسخ جوه النفوس، فأراد الله عز وجل أن يحدث ذلك، فالنبي عليه الصلاة والسلام تبنى زيد، وبعدين نزل أمر من ربنا أن زينب تتزوج زيداً، ده كان أمر إلهي أن زينب تتزوج إيه؟ من زيد، فزينب ما كانتش عاوزه تتجوز زيد، فالنبي عليه الصلاة والسلام قال: بلى تزوجيه، فقالت: أؤامر في نفسي؟ اللي احنا بنقول: أنا حرة، أنت مالك؟ أنا أنا ألبس الحجاب أصلي؟ أنت مالك؟ أؤامر في نفسي؟ فنزل قوله تعالى: ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ﴾ [الأحزاب: 36].
فزينب عملت كده وامتثلت أمر الله سبحانه وتعالى وامر النبي صلى الله عليه وسلم. ركزوا بقى يا شباب، عشان الدرس اللي جاي بردو درس مهم جدا: اوعى تفتكر انك هتمتثل أمر الله سبحانه وتعالى وربنا يضيعك، اوعى تفتكر كده، واوعى تفتكر أن أمر ربنا في ضياع ليك، اوعى تفتكر كده، حتى لو كان امتثال أمر ربنا في اختلال الدنيا شوية، ما هو ده مش ضياع، الضياع مش ضياع دنيا، ضياع ضياع آخرة، فما هو أنت تيجي تقول إيه؟ ما اصل أنا لو كنت أخدت القرض من البنك كان هيحصل كذا وكذا، وكان زمان عشت فلابي وبتاع، نقول لك: اصل هو اختلال الدنيا ده مش ده الضياع، هو الضياع انك تحارب ربنا بقى، مش كده؟ ﴿فَأْذَنُوا بِحَرْبٍ مِّنَ اللَّهِ﴾ [البقرة: 279] في موضوع الربا. فاوعى تفتكر كده انك هتمتثل أمر ربنا وربنا يضيعك، ده ده لو واحد يا جماعه من البشر عمل كده هنقول عليه قليل الأصل، مش كده؟ يعني واحد من ما يقول لك روح ولا تعالى حاضر، راح جاي مسلمك، هتقول عليه إيه؟ ده قليل الأصل، مش كده؟ ده ده في الآخر بني آدم، ولا حاجة.
فربنا سبحانه وتعالى لله المثل الأعلى، بقى ربنا في كل حاجة حاضر يا رب، سمعت وطعت يا رب، ويسلمك، مستحيل مستحيل يضيعك، مستحيل! طب ما احنا بنشوف ده بيحصل؟ هو أنت اللي مش شامم ريحة ضياع ده مسألتك بقى أنا، أنت حر بقى، لو أنت شايف أن الغلام لما الملك قتله بالسهم هو كده ضاع، أنت ده ده موضوعك، فانت مش فاهم يعني ايه ضياع أصلا، ماشي؟
فدي قصة تانية، زي ما كده قلنا لكم لو أنت شايف أن الطالب الأزهري اللي قاعد بين العربيتين وشنطته مقطوعة وجزمته مش عارف إيه ده ضياع، فده موضوعك، روح بقى عالج قلبك أنت اللي مش فاهم يعني إيه ضياع، أنت اللي مش فاهم، والا كده بقى لو كنت عايش وقت النبي، أنا نفسي يعني اللي بقا متضايق بقى من صورة الأزهري، اللي هو لابس، ويعني لابس هدوم، يعني عنده هدوم يلبسها، وعنده طوقة بياكلها عيش وجبنة، ولا عيش وطعمية، قرص طعمية ولا أي حاجة، كنت هتعمل إيه أنت بقى يا اللي زعلان قوي، وانت شايف النبي كده طالع بإزار ولا رداء عليه ورابط على بطنه حجرين؟ نفسي أفهم بقى كنت هتشوفها ازاي دي؟ هتشوفها ازاي؟ النبي عليه الصلاة والسلام كان في وقت يطلع بإزار بلا رداء، يعني لابس تحت وما فيش حاجة لابسها فوق، صلى الله على النبي محمد عليه الصلاه والسلام، وبعدين في الغزوة كل واحد، كل كل صحابي رابط حجر على بطنه، ليه؟ عشان بطنه تلزق في ظهره ما يحسش بالجوع، ما فيش أكل، ما فيش أكل، مش مش ما فيش بروتين، مش صنف في واحد جبن في الثلاجة، ما فيش أكل، فالنبي عليه الصلاة والسلام يقول لهم: أما أنا فإنظروا! يرفع، فبطنه الشريفة مربوطة
عليها كم حجر؟ حجرين من الجوع.
كنت هتعمل إيه بقى وقتها؟ قول لي كده. فزينب رضي الله عنها توافق أول ما تنزل الآية أن يكون لهُم الخِيرة من أمرهم. خلاص، وَفَقَت. شوف بقى بركات امتثال الأمر. بركات؛ طبعا ده كله تهيئة أن بعد شويه يحصل إشكال بين زيد وبين زينب، وبعدين يطلقها زيد. شوف يا جماعة التدبير الكوني من فوق. ولعل زينب بتتجوز زيد يعني ضغط على نفسها لأنه أمر خلاص هعمله، فيحصل لزينب حاجتين الاتنين أجمَل من بعض: أول حاجة إيه اللي يحصل؟ النبي يتجوزها عليه الصلاة والسلام. القصة، أنتوا نسيتوا القصة كلها معموله ليه أصلاً في تدبير الله؟ النبي عليه الصلاة والسلام ما يعرفش إيه اللي هيحصل، هو ماشي خطوة بخطوة. يتبنى زيد، فيقدر الله ذلك أن النبي يتبنى زيد من زمانين، زيد يكبر فيقدر الله عز وجل ويأمر أن زينب تتجوز زيد. وبعد كده يحصل إشكال بينهم يقدره الله عز وجل، فزيد يطلق زينب.
وده كله ليه؟ علشان في تقدير إلهي يحصل، لازم حاجة تزلزل الحتة دي عند العرب المسلمين. فزينب أول ما تمتثل تلاقي البركات حاجتين أعجب من بعض: أول حاجة أن النبي يتجوزها عليه الصلاة والسلام، والتانية إيه؟ التانية أن مين؟ مين اللي جوزها للنبي عليه الصلاة والسلام؟ يعني مين ولي زينب؟ ما فيش ولي لزينب، النبي عليه الصلاة والسلام دخل على زينب على طول. ليه اللي جوزها؟ ربنا. وكانت تفخر على أمهات المؤمنين بده: زوجكن آباؤك وزوجني الله. ﴿فَلَمَّا قَضَىٰ زَيْدٌ مِّنْهَا وَطَرًا زَوَّجْنَاكَهَا﴾ [الأحزاب: 37]. ربنا اللي جوزها، لزيد اللي جوزها للنبي عليه الصلاة والسلام ببركة إيه؟ الامتثال. ببركة الامتثال. أوحى تفتكر أنك هتمتثل وربنا يضيعك. دايماً نقول لكم الموقف بتاع مين؟ هاجر، مش كده؟ إمرأة معاها الصبي وبقي... امرأة لو... لو ينفع نتقدم شوية عشان الناس واقفة بره بس، يبقى جزاكم الله خيراً. الناس عاوزة تقعد ولا أنتوا عايزين توقفوا بره؟ أنا مش عارف أنا... اللي واقف بره وعاوز يدخل يقعد يتفضل يدخل.
كنا بنقول إيه بقى؟ السيدة هاجر، والقصة بقى معروفة مش هنحكي القصة، وإبراهيم عليه السلام ياخدها ويحطها مع الولد الرضيع، وامرأة ضعيفة. امرأة ضعيفة. أهي الناس مشيت عشان ناس تانية تدخل. كويس. الشاهد: احنا عاوزين نروح على طول على الجملة. إبراهيم عليه السلام ماشي، فتقول له إيه؟ إلى... من... إيه؟ تتركنا في هذا الواد الذي ليس فيه أنس ولا شيء؟ ما يردش. المرة التانية، التالثة، تقول له: يا إبراهيم، آلله أمرك بهذا؟ قال: نعم. قالت: إذاً لن يضيعنا.
عيب، عيب، عيب تتعامل مع ربنا كده! عيب تتعامل مع ربنا أن: يا رب أنا لو تركت الكذا، الحرام مثلاً، البيعة مش هتمشي لأن لازم أعمل... أنصب وأحتال. الماركتنج، التسويق هيقف لأن لازم الموسيقى ولازم البنات في الإعلان ولازم الما... عارف إيه؟ على المقطع الفيديو بتاع التيك توك وده اللي بي... بيخليه فايرل. عيب! عيب تتعامل مع ربنا كده، أنك تقرب له وهو يضيعك! تقول: طب أهيرك بقى يا شيخ لما عملت كده فعلا مش عارف... يبقى أنت اللي مش عارف يعني إيه ضياع. فيمكن أنت ماشي في هلاك نفسك يا ابني! فلما ابتديت تقرب، بعدك عن الحاجة دي أصلاً أنت اللي مش فاهم يعني إيه ضياع.
فالمراة، كل ما أقول الموقف ده أقول لكم إيه؟ أقول لكم هاجر ما قالتش ده وهي قاعدة في مسجد سناء الخير على الموكيت والعربية مستنياها بره، هاجر قالت ده وهي امرأة ضعيفة معاها ابنها الرضيع في صحرا ما فيهاش حاجة، وجوزها سايبها وماشي. طيب معاها إيه؟ شوية تمر وشويه مية بس، وقالت الكلمتين دول: إذاً لن يضيعنا. ليه لن يضيعنا؟ لأننا عملنا إيه مع اختياره الشرعي؟ امتثلنا، سمعنا وأطعنا، فربنا مش هيضيعني.
يبقى ادي الاختيار الشرعي اللي هو: افعل ولا تفعل. يعني ربنا سبحانه وتعالى اختار شرعاً، اختار نبقى عندنا... مش هنتكلم في... عندنا صلاة، لا، عندنا حاجة اسمها صلاة فجر بتجيلك في عز نومك في أوقات... يعني الفجر ساعات بيبقى الساعة 3 الفجر، فصلاة فجر هتجيلك في عز نومك. وبعدين صلاة ظهر وعصر في عز ما أنت في الشغل أو في المدرسة أو في الجامعة. وبعدين صلاة مغرب وأنت لسه بتفتح الباب باب البيت داخل عميان. ربنا اختار كده، هو اختار كده، اختار التوزيعة كده، ما تجيش أنت تقول: ليه يا رب؟ طب ما أنا إيه؟ أبقى أصلي الفجر من ما أصحى وأجمع الظهر والعصر خطفهم بعد الجامعة أو بعد المدرسة أو بعد الدرس، والمغرب أما أنام وأصحى أصليلي مع العشا. أنت ده دينك أنت، ده مش دين ربنا. أمال إيه واجبك؟ سمعنا وأطعنا. 3 الفجر هقوم 3 الفجر يا رب. طب ليه؟ من غير ليه! من غير ليه أيوه، يعني إيه الحكمه؟ طب ما عرفتش الحكمة هتعمل إيه؟ سمعنا وأطعنا. ويا جماعة هو ده... هو ده الإيمان بقى، أنك سمعنا وأطعنا، عرفنا حكمة أو ما عرفناش. ندور على الحكمة؟ آه، ندور على الحكمة ونعرف الحكمة علشان نحب ربنا سبحانه وتعالى. إنما ما عرفناش الحكمة؟ سمعنا وأطعنا برضه.
عشان كده احنا عندنا شوية أحكام في الشرع العلماء فضلوا يعصروا دماغاتهم عشان يطلعوا حكمة مش لاقيين حكمة، قالوا: خلاص دي هنسميها أحكام إيه؟ تعبدية. في عندنا في الشرع كده أحكام بنسميها أحكام تعبدية. يعني إيه أحكام تعبدية؟ يعني العلماء مش لاقيين لها حكمة يقولوها فقالوا: خلاص دي اسمها... عارفين إيه؟ عارفين إيه بقى معنى الكلمة دي؟ أحكام تعبدية يعني شرعها الله عز وجل ليختبر عبوديتنا. يعني كده ما لهاش حكمة؟ لا، لها حكمة بس احنا مش عارفينها، حجبها الله عنا. فاهمين دي؟ مثال إيه؟ مسح الخف. مسح الخف لو أنا جيت قلت لك: يلا تعال أنت اكتب الشرع، يلا خد ورق اكتب أنت الدين، فقلنا لك إيه؟ بقول لك إيه؟ عاوزين كده لما يبقى واحد لابس شراب ولا خف ولا بتاع يعني ممكن يمسح، إيه رأيك؟ يمسح من فوق ولا من تحت؟ لو أنت اللي هكتب الدين هتقول: هيمسح منين؟ من تحت، أنت بتمشي تحت بيتوسخ وبتاع، مش كده؟ فيجي الشرع يقول لك: لا، هتمسح من فوق. طب ليه يا رب؟ من غير ليه، سمعنا وأطعنا. مين اللي انتبه لده؟ سيدنا علي، مش كده؟ لو كان الدين بالراي لكان أسفله الخف أولى بالمسح من أ... من أعلاه. أمال الدين بإيه؟ هو علي، علي قال: ولقد رأيت رسول الله صلى الله عليه وسلم... يبقى الدين بالشرع، بالأمر، بالنص. لو كان دينه بالرأي لكان أسفل الخف أولى بالمسح من أعلاه، ولقد رأيت رسول الله صلى الله عليه وسلم يمسح أعلى الخف.
سيدنا عمر يقبل الحجر ويقول: والله إنِّي لأعلم أنك حجر لا تنفع ولا تضر، طب بتقبله ليه؟ ولولا أني رأيت رسول الله صلى الله عليه وسلم يقبلك ما قبلتك. امتثال، سمعنا وأطعنا. خلي بالك، لو أنا جيت قلت لك: يلا أنت بقى بتكتب الدين اهو، وبعدين قلت لك: أنت طالع من جاهلية وبتخطف عرب كانوا بيعبدوا أصنام وأحجار، وعندنا حجر اسمه الحجر الأسود، أنت هتكتب أن هذا الحجر يقبل؟ مش هتكتب ده. ليه؟ وهتلاقي بقى المصلحة والحكمة في كده: ما دول ناس بيعظموا أحجار وحديث عهد بكفر، أروح أقول لهم قبلوا حجر؟! فهمتوا كلام عمر يا جماعة؟ كلام عمر إيه؟ لولا أني رأيت رسول الله صلى الله عليه وسلم يقابلك ما قبلتك، لأني بعقلي، بعقل عمر هيقول: ما فيش حجر يقبل، بالذات في الحقبة دي، يعني بالذات في الحقبة دي حجر إيه اللي يقبل؟ لكن هو في الآخر إيه؟ سمعنا وأطعنا، خلصت. يبقى تاني: واجبك نحو الاختيار الشرعي: سمعنا وأطعنا.
ماشي، طيب، إيه دخل ده بقى في الأشهر الحرم؟ وإيه دايماً قضية الاختيار مع الأشهر الحرم؟ عشان اللي احنا قلناها من شويه، قلنا: ربنا سبحانه وتعالى خلق الخلق واختار. فمما خلقه، خلق الدنيا، البقاع واختار مكاناً فجعلها حراماً آمناً سبحانه وتعالى. خلي بالكم يا جماعة، يعني أنت تخش في تفاصيل اختيار الرب عجيبة، مثلاً مكة مش أرض سهلة، أنتوا عارفين لما تروحوا هناك الأبراج يعني برج الساعة، برج... أبراج زمزم هي واقفة عبد العزيز أبراج مكة والحته دي اللي منكم زمان بقى اللي كان يروح زمان، الحته دي كانت إيه؟ كانت جبال، يعني احنا حضرناها وهي بتنسف بالديناميت، كنا بنشوفها، دي كانت جبال مكة. اللي يشوف الصور القديمة، صور متصورة، يعني هي كعبة وما فيش كام متر منك وكلها جبال مكة. مكة مش أرض سهلة، فربنا يختار البقعة دي. وبعدين جو مكة مش أحسن جو، حر شديد جداً، منطقة حارة. طب ما تخلينا إيه في اللطيف كده في الطائف مثلاً ولا على البحر ولا بتاع؟ فاختيار البقعة دي اختيار الله عز وجل بمدى صعوبة الوصول ليها، بأجوائها الصعبة، اختياره سبحانه وتعالى. طب اشمعنى اختيار؟ اختيار قدري اهو، اختار ربنا سبحانه وتعالى البقعة دي وحرمها وجعلها أماناً. طيب، يعني إيه جعلها أماناً الأول؟ اختيار ربنا البقعة دي واختيار يعني جعله لتلك البقعة أنها آمنة، ده اختيار قدري ولا شرعي؟ قدري، مش كده؟ حد يقول: شرعي. طيب، هما الاتنين. هو اختيار قدري وشرعي: ﴿وَمَن دَخَلَهُ كَانَ آمِنًا﴾ [آل عمران: 97]. يعني ومن دخله كان آمناً قدراً، يعني قدرتُ أنه يكون آمن، أو من دخله فأمنه، يبقى ده شرعاً. يعني إيه بقى: ومن دخله كان آمناً؟ قدرته أنه يكون آمن.
دلوقتي يا جماعة أنا هسألك سؤال: ربنا سبحانه وتعالى قال: يا جماعة الحتة دي حرم. خلاص، مش ممكن وهم كفار بقى -يعني أنا بتكلم على ناس كافرة في الجاهلية- يقول لك: حرمي. احنا مين اللي قذف المهابة في قلوب هؤلاء؟ ربنا. أنتوا عارفين يا جماعة في الجاهلية، كان الرجل يرى قاتل أبيه متعلق بأستار الكعبة فلا يقربه! أنت فاهمين؟ يعني واحد شايف اللي قتل أبوه، واحنا لسه نقول لكم العرب بقى والقِفة والمش عارف إيه، يشوف قاتل أبوه جوه في الحرم ما... مين اللي خلى ده في قلوبهم؟ ربنا سبحانه وتعالى، مش كده؟ يبقى ده اختيار قدري واختيار شرعي، ومن دخله كان آمناً يعني فأمن.
فربنا اختار ده، البقعة دي ليه؟ ليه جعلها كده؟ عشان البيت يزار، فاهمين؟ ربنا سبحانه وتعالى يريد أن البيت يزار. طيب، بس عندنا مشكلة تانية. إيه هي المشكلة التانية؟ أن دلوقتي احنا جايين، في قطاع طرق وبطجية هيثبتوك، الناس اللي جاية تعتمر أو تحج فهيثبتوا ويخدوا مالنا وياخدوا نسائنا وياخدوا... فمش جايين البيت، فيعطل البيت. فربنا سبحانه وتعالى خلق الزمان واختار من الزمان أشهراً حرماً. تعالوا بقى نبص للأشهر عشان نفهم اختيار الأشهر دي ليه. معظم أعمال الحج أو أعمال الحج في شهر إيه؟ في شهر ذي الحجة، مش كده؟ طيب، وبعدين زمان مش طيارة وعربية وكد، جمال وقافلة، وهناخد شهر رايح وشهر جاي، فمحتاج وقت، فتلاقي ربنا سبحانه وتعالى حرم ذا الحجة وحرم شهر قبله وشهر بعده، اللي هو شهر ذو... ذو القعدة قبل ذي الحجه وشهر بعده، اللي هو شهر الله المحرم. ليه؟ علشان القوافل تطلع براحتها، تمشي للكعبه، تخلص حج، ترجع من الكعبه، توصل بيوتها، فما يجيش قطاع الطرق... والله العظيم أنا بتكسف وأنا بقول الكلام ده! ما يجيش قطاع الطرق يهجموا عليهم. قطاع الطرق الكفرة كانوا بيعظموا الأشهر الحرم أكتر مننا.
النهارده دخل رجب، واحد رجب غير 30 جمادى الآخرة. يعني لو كنت أنت في معاصي بتعملها، يجي واحد رجب تترعش... تترعش ليه؟ لأن الذنب بيضاعف في الأشهر الحرم، أنتوا عارفين كده ولا لا؟ ما هو هي... سميت أشهر حرم أصلاً، قالوا: أشهر حرم، شهر حرام يعني شهر عظيم، شهر عظيم. فسميت أشهر حرم لعظم هذه الأشهر ولعظم الذنب فيها، لعظم الذنب فيها. ولذلك ربنا خصها بالذكر في موضوع الذنب ده، قال سبحانه وتعالى: ﴿إِنَّ عِدَّةَ الشُّهُورِ عِندَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالأَرْضَ مِنْهَا أَرْبَعَةٌ حُرُمٌ ذَلِكَ الدِّينُ الْقَيِّمُ فَلا تَظْلِمُوا فِيهِنَّ﴾ [التوبة: 36] -يعني في الأشهر الحرم، في قول بعض المفسرين- ﴿أَنفُسَكُمْ﴾. يعني إيه فلا تظلموا فيهن أنفسكم؟ يعني بالذنوب والمعاصي في الأشهر دي بالذات. فيبقى الذنب بيضاعف في الأشهر الحرم، زي ما الذنب كده بيضاعف فين؟ في الحرم، في مكة: ﴿وَمَن يُلْحِدْ فِيهِ بِظُلْمٍ نُّذِقْهُ مِنْ عَذَابٍ أَلِيمٍ﴾ [الحج: 25]. الآية جئت كده: ﴿وَمَن يُرِدْ فِيهِ بِإِلْحَادٍ بِظُلْمٍ نُّذِقْهُ مِنْ عَذَابٍ أَلِيمٍ﴾، يرد الذنب في الحرم يضاعف.
ولذلك كان بعض السلف لا يجاور... عارفين المجاورة إيه هي؟ أنك تسكن في مكة. بعض السلف ما كانش يحب يجاور في مكة، يخلص عمرة ويمشي، يخلص حج ويطير، ما يحبش يقعد في مكة، لا يجاور عشان المعنى ده؛ أن... آه، الطاعات هناك مضاعفة، لكن برضه الذنوب مضاعفة. فاهمين؟ واحد قلت له: هديك الجنسية السعودية روح أقعد في مكة. بيقول لك: لا، مش أقعد في مكة، خلص عمرتي وأمشي. أنت فاهم يعني إيه؟ يعني أنت... أنت قاعد في الحرم دلوقتي بتسكرول على الفيسبوك، أنت فاهم أنت بتعمل إيه؟ أنت فاهم أنت فين؟ أنت فاهم طلعت الفندق ففرحت فاتح الـ إم بي سي عشان قعدت تتفرج على... أنت فاهم أنت فين؟ أنت فاهم اللي هو الحاجات العادية؟ أنا بتكلم في الحاجات اللي هو إيه؟ الناس بتعملها عادي عادي خالص، قاعد بسكرول على الفيسبوك وأنا عارف إن هيجيلي واحدة متبرجة وعارف إن في موسيقى وعارف إن في مش عارف إيه، ده.
ممكن يكون عد بيشات مع صاحبته جوه الحرم. أنت فاهم أنت فين؟ أنت فاكر الذنب هنا زي ذنب في أي حته؟ كذلك بقى الأشهر الحرم. يعني أنت بتشات مع صاحبتك يوم 30 جمادى الآخرة، دخل واحد رجب بلوك على طول. ماشي، طبعا بلوك من دلوقتي يعني، بس يعني بقولك الذنب أعظم. الذنب يضاعف في الأشهر الحرم.
فربنا سبحانه وتعالى راح عامل إيه بقى؟ اختار من الزمان الأشهر دي، يبقى القوافل تطلع عشان تروح الكعبة، وقطاع الطرق ما يتعرضوش ليه؛ تعظيمًا. ولذلك تعظيم الأشهر الحرم قدري ولا شرعي؟ الاثنين. برض أنت مأمور شرعًا أنك تعظمها، وربنا قذف في قلوب العرب تعظيم الأشهر.
يا جماعة، العرب، اللي كنت بقوله لكم بقى، العرب حياتهم كانت إزاي؟ يصحوا كده على إيه؟ على الريق كده، حرب بين قبيلة فلان وقبيلة فلان على الريق كده. هي دي حياتهم على طول، في حروب. ليه؟ هي قبيلة على بير مية، فقبيلة تانية تيجي عاوزه بير المية، كده يعني. حروبهم حروب بدائية برض، بس حروب يعني على طول عايشين في حروب.
ولذلك كانوا حتى يفخروا بده في في الشعر يعني. زهير بن أبي سلمى قال إيه في البتاعة بتاعتي قال إيه: ومن لا يذد عن حوضه بسلاحه يهدم، ومن لا يظلم الناس يُظلم. هم كانوا عايشين على الظلم يعني، ومن لا يظلم الناس يُظلمِ. عمرو بن كلثوم قال إيه: ألنا الدنيا وما أمسى عليها، ونبطش حين نبطش قادرين بغاة ظالمين، وما ظلمنا، ولکنا سنبدأ ظالمين. شوف بيفتخروا بإيه يعني، هي دي حياتهم.
بيقولوا إن من أفخر الأبيات، وبعضهم قال إن أفخر بيت قالته العرب بيت عمرو بن كلثوم، اللي هو إيه بقى: إذا بلغ الفطام لنا صبي، تخر له الجبابر ساجدين. بيقولوا ده أفخر، يعني العقل ما وصلش لحته زي دي في عند العرب يعني. يعني يا دوبك العيل بتاعنا يتفطم، الجبابر.. طبعا هو بيهجص، خلي بالكم، العرب دول كلهم كانوا أوباش يعني، هم هم مع بعض كده.
إنما يعني تعالى بقى الفرس والروم، يعني فاهم، يعني أنتم عارفين لما مين رستم؟ لما راح له ربعي، أظن، آه، عارفين في الحوار رستم قال له إيه؟ قال له: هديْك جلابية لكل واحد من الجيش، وتخلع. آه والله، كده في الروايات كده، هديْك إيه؟ جلابية لكل واحد. أنت الجيش بتاعك كام؟ جايز جيش قد ايه؟ عم كل واحد جلابية، هو دي فكرتهم عن العرب. وقاله: وأنت هديك، وزوده شوية مثلا، جلابيتين ثلاثة عشان القائد. فدي فكرة الروم والفرس عن العرب.
لكن يعني إيه؟ لكن هم إيه؟ عايشين مع بعض كده، يفخروا على بعض بالشعر. المهم، دول العرب، ماشي. فقطاع الطرق دول بقى تلاقي القافلة جاية، قطاع طرق، يرفعوا إيدهم، خلاص، ليه؟ أشهر حرم. القافلة مروحة، خلاص.
يبقى كده ربنا جعل البيت يحج. طب عاوزين عمرة في نص السنة؟ يجي شهر رجب، الشهر الكام؟ شهر رجب الشهر الكام؟ السابع، نص السنة بالضبط؛ عشان يبقى في عمرة في نص السنة، يبقى رايح وراجع برض ما حدش يتعرض له، يروح يعمل عمرته في رجب ويرجع. فهمتوا التقسيمة دي؟
طيب، ابن الجوزي بقى له نظر آخر في التقسيمة دي. ركزوا بقى عشان دي مهمة جدا، التقسيمة اللي جاية دي، عشان تعرفوا اختيار ربنا. هي البداية إيه؟ وربك يخلق ما يشاء ويختار. أمعنى الأربع شهور دول؟ أمعنى الأربع شهور دول؟ ابن الجوزي له نظر مهم جدا جدا يا شباب.
لو بصينا للأشهر دي، بس بترتيب شوية ملخبط، هنلاقي شهر المحرم هو الشهر رقم كام في السنة؟ أول شهر. شهر رجب؟ نص السنة. ذو القعدة وذو الحجة؟ 11 و12، آخر السنة. وكان عندك شهر محرم أول السنة، وشهر في نص السنة، وشهرين في آخر السنة.
طب إيه ده؟ معناه إيه؟ لو قمنا بحق الأشهر الحرم لأثرتك. يجي دلوقتي شهر شهر الله المحرم يدخل عليك، اللي هو أول السنة، أنت عارف بقى أن إيه: لازم نلم نفسنا، ما فيش حرام، الذنب بيضاعف، المعصية كبيرة، تقوم محجم نفسك. ما أعتقدش يعني. يخرج شهر الله المحرم، ترجع يعني بتبتدي تتحسن شوية، ويرجع بعد كده الكيرف ينزل تاني.
يجيلك رجب في النص، يفوقك، تقوم ماسك نفسك تاني. وبعدين طبعا يدخل رمضان، طبعا. وبعدين تبتدي تنزل تنزل تنزل، يجيلك في الآخر ذو القعدة وذو الحجة، يفوقوك. أنت بتعمل إيه؟ بتدرب نفسك على ترك المعاصي. فده نظر آخر في اختيار هذه الأشهر. يعني مش معنى الترتيب ده بهذا الترتيب علشان تطلع أنت كده كده، يعني الإنسان في صعود وهبوط، زي ما قلنا لكم قبل كده. لكن تدريب، تدريب ليك أنك تمسك عن الذنوب والمعاصي، خلاص.
فيبرجب، رجب إن شاء الله يوم الأربعاء، واحد رجب، وراس السنة إن شاء الله يوم إيه؟ الأربعاء برضه، الأربعاء، مش كدة؟ فيبقى ليلة راس السنة إن شاء الله هي ليلة إيه؟ واحد رجب، مش كدة؟ هنعمل فيها إيه بقى؟ تعملوا إيه في ليلة رأس السنة كده؟ يبقى عاوزين نعبد ربنا في الليلة دي.
ليه نعبد ربنا في الليلة دي؟ آه، يبقى أول معنى أن ليلة رأس السنة دي ما نعرفش ليلة في الدنيا ربنا بيعصى فيها زي الليلة دي. ما فيش في الدنيا ليلة بيجتمع معظم الناس على.. على بقى مالهم، على جنسياتهم، على أي حاجة، ليلة مرعبة، مرعبة. ومش بيعصى ربنا بالذنوب، لا، ده خمرة ومخدرات وزينة. وفين؟ مش في بلد ولا اثنين في العالم، في العالم. فازاي مؤمن يتعدى عليه كده؟ إزاي؟ تبقى عبادة في الهرج كهجرة إليّ.
آهو، ممكن نعبد ربنا عشان كده. وبعدين يبقى إحياء زمان غفلة، يبقى الشباب في الليلة دي رايحين يصيعوا ورايحين يفجروا، ربنا يهديهم، قولوا آمين. وأنت بقى راجل مؤمن وتقي، قول آمين برض، أنت لا مؤمن ولا تقي، يعني قول آمين. فتخاف بقى، تخاف أن إيه؟ ربنا سبحانه وتعالى ينظر إلى الأرض فينقطنا، ويرسل علينا العذاب. العذاب لو نزل هياخد دول بس ولا هياخد الناس كلها؟ هياخد الناس كلها، مش كدة؟
فتفزع إلى أنك.. أنك تنشئ عبادة في هذه الليلة لهذا المعنى، لهذا المعنى. يعني إحساس مش بنقول إيه: ليلة رأس السنة يعني ميري كريسمس، أنا هصلي النهارده. يعني إحشن.. يعني إحنا مش بنحتفل بليلة رأس السنة، إحنا يعني إيه؟ تلمحنا أمورًا تفزعنا إلى العبادة، بس، بس.
يعني أنا لو جيت قلت لك إيه، أنت فجأة كده لقيت نفسك في وسط ناس، في مثلاً يعني اضطرك الموضوع أنك تبقى في مكان، رحت فندق فلقيته بقى بار وخمارة ومالها ليلي ومش عارف إيه، ففزعت أن إيه ده؟ رحت واقف في أوضتك: أنا ترعبت أن أنا في المكان ده! إزاي في المكان ده؟ أنا خفت أن ينزل عليك حاجة من السما، رحت واقف مصلي. يقول لك دي بدعة! أنت مش بدعة ولا حاجة، ما فيش بدعة، ماشي.
يبقى ده معنى. وفي الأثر: إني لأهم بأهل الأرض عذابًا، فأنظر.. فأنظر إلى عمار بيوتي، والمستغفرين بالأسحار، فأصرف عنهم عذابي. عشان ربنا يصرف عنا العذاب عن الأرض كلها، أهل الإيمان يفزعوا إلى الله عز وجل في هذا الأمر.
وتاني حاجة، ليلة.. أول ليلة في رجب بعض السلف روي عنهم أنهم كانوا يتحرون هذه الليلة، من ضمن أربع ليالي تتحرى: ليلة الأضحى، وليلة الفطر، وليلة النصف من شعبان، وليلة أول رجب. مروي عن بعض السلف؟ في خلاف، آه، في خلاف، لكن مروي.
فقدر الله عز وجل أن الليلة دي السنة دي هي هي نفس ليلة رأس السنة، فيبقى هذه الليلة ما تمرش كده، يبقى فيها عبادة لله عز وجل بهذه النوايا التي ذكرناها. قول قولي هذا، واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.