مرحلة الفرقان | د. أحمد عبد المنعم

السلام عليكم ورحمة الله وبركاته. الحمد لله وحده، والصلاة والسلام على من لا نبي بعده، محمد صلى الله عليه وسلم. اللهم أرنا الحق حقاً وارزقنا اتباعه، وأرنا الباطل باطلًا وارزقنا اجتنابه. اللهم استعملنا لنصرة دينك في الأرض.

اللهم عز وجل ارزقنا فهماً في كتابك وعملاً به يا رب العالمين. اتكلمنا في المرة الماضية عن موضوع ماذا لو غاب القرآن؛ كنا سألنا سؤالاً: نتخيل ماذا لو غاب القرآن عن حياتنا؟ وبالفعل احنا بنتغيب عن القرآن.

فذكرنا أن بتكثر الفتن والاضطرابات، وأصول الدين تحرف؛ كثير من الأشياء وكثير من الأشياء تحدث بمجرد ولو آية واحدة بس اللي لو غابت من القرآن عننا. وذكرنا مثالاً لغياب آية واحدة، قول الله عز وجل: ﴿وَمَا مُحَمَّدٌ إِلَّا رَسُولٌ قَدْ خَلَتْ مِنْ قَبْلِهِ الرُّسُلُ﴾ [آل عمران: 144]. قلنا: هذه الآية هي التي أنقذت المجتمع في المدينة.

يوم موت النبي صلى الله عليه وسلم، مجرد قراءة أبو بكر لهذه الآية أنقذت المجتمع كله أن ينقسم فرقاً، وتظهر فرق ضالة تتبنى آراء في موت النبي صلى الله عليه وسلم؛ فكانت آية واحدة تنقذ. فبنقول: ما بالنا لما بيغيب عننا سور من القرآن ويواجه المجتمع من غير قرآن؟ عايزين النهارده نتكلم، يعني لأن المفروض إن شاء الله أنا معاكم لقاءين لغاية لما يجي الدكتور حازم، اللقاء اللي فات واللقاء ده -والله أعلم- اللقاء القادم يعني إن شاء الله يكون الدكتور حازم رجع. فاحنا عايزين بس نطلع بمنظومة معينة، بفكر معين نكون خرجنا به. الإشكالية أن الناس بتقول: احنا مش عارفين الحق من الباطل. اللي هو التعبير الذي ذكره القرآن في سورة الأنعام: حيران. له أصحاب يدعونه إلى الهدى ائتنا. كنا ذكرت في سلسلة تفسير سورة الأنعام شرحنا هذه الآية بالتفصيل. الشاهد يعني أن طلعت كلمة حيران، ده أصبح عند كتير من الناس، وله أصحاب يدعونه إلى... على القولين في التفسير: أن الأصحاب دول أصحاب حق أو أصحاب ضلالة، ينادي عليه فريق بيقول له: تعال الحق معي. احنا عايزين نكسر هذه الحالة في المجتمع، عايزين نصل إلى مرحلة الحق الواضح البرهان الذي لا شك فيه.

عزين المجتمع يوصل يعرف الحق من الباطل واضحاً ما فيش فيه خلل، نعمل إيه؟ يعني كلنا بنأذى لما بنشوف ناس بيتضحك عليها، كلنا بنأذى نفسياً أن أهل الحق يتهموا بالتزوير والغش والخداع، وأهل الباطل يبقوا هم القدس عند الناس والأسوة، الإنسان بنأذى جداً. والنبي صلى الله عليه وسلم أخبر أن ده هيحصل: سنوات خداعات، يصدق فيها الكاذب ويكذب فيها الصادق، يؤتمن فيها الخائن ويخون فيها الأمين. الموازين المعكوسة دي، أول ناس بدأت بها وأسست الموازين المعكوسة هم المنافقون في المدينة.

قالوا على أنفسهم وهم المفسدون: ﴿إِنَّمَا نَحْنُ مُصْلِحُونَ﴾ [البقرة: 11]. قالوا على الصحابة: ﴿أَنُؤْمِنُ كَمَا آمَنَ السُّفَهَاءُ﴾ [البقرة: 13]، اتهموا الصحابة بالسفاهة ووسموا أنفسهم بالمصلحين. وقال ربنا: ﴿سَيَقُولُ السُّفَهَاءُ﴾ [البقرة: 142]. سيقول السفاهة من الناس: ﴿مَا وَلَّاهُمْ عَنْ قِبْلَتِهِمُ الَّتِي كَانُوا عَلَيْهَا﴾ [البقرة: 142]. وأخبر الله عز وجل مقياس معيار؛ هم بيقولوا إن دول إيمان السفهاء، والقرآن بيقول: لا، دول السفهاء. إيه المعيار؟ سيدنا إبراهيم: ﴿وَمَنْ يَرْغَبُ عَنْ مِلَّةِ إِبْرَاهِيمَ إِلَّا مَنْ سَفِهَ نَفْسَهُ﴾ [البقرة: 130]. عايزين معايير نخرج بها من حالة الحيرة.

كل التراب الموجود في المجتمع، الحالة دي، الوضوح ده القرآن سماه إيه؟ سماه الفرقان. القرآن سمى المرحلة التي يحصل فيها وضوح للناس كلها، سماها مرحلة إيه؟ الفرقان. لذلك في عندنا سورة اسمها سورة إيه؟ الفرقان. بتتكلم من معانيها ومواضعها كيف نصل بالمجتمع إلى حالة من حالات الفرقان؟ ما عادش حد في المجتمع يقول: لا، اصل أنا متهيأ لي، لا، اصل أنا ما عدتش عارف الصح من غلط، لا، أنا مش ضامن الشيخ الفلاني جايز بيکذب. الحالة دي بتنكسر لما بنوصل لمرحلة الفرقان. سورة الفرقان بتتكلم من مواضيعها: كيف نصل بالمجتمع -مش أنت كفرد؟ كتير من الصور أنت كفرد تصل إلى هذه الحالة؟ كتير- لكن ازاي ننتقل بالمجتمع معنا إلى هذه إيه؟ إلى هذه المرحلة. مرحلة الفرقان مرحلة مهمة جداً ولازم الأمة الإسلامية تمر بها. كلمة يوم الفرق، ربنا سماه على إيه؟ يوم إيه؟ يوم لا مش يوم القيامة، يوم إيه؟ يوم بدر. ﴿إِنْ كُنْتُمْ آمَنْتُمْ﴾ لا، ﴿يَوْمَ أَنْزَلْنَا عَلَى عَبْدِنَا يَوْمَ الْفُرْقَانِ يَوْمَ الْتَقَى الْجَمْعَانِ﴾ [الأنفال: 41]. سورة الأنفال: يوم الفرقان يوم التقى الجمعان. ربنا سمى بدر يوم...

الآية اللي بعدها على طول ربنا يقول إيه؟ ﴿لِيَهْلِكَ مَنْ هَلَكَ عَنْ بَيِّنَةٍ وَيَحْيَى مَنْ حَيَّ عَنْ بَيِّنَةٍ﴾ [الأنفال: 42]. يعني إيه هلك من هلك عن بينة؟ ويحيى من حي عن بينة؟ يعني إيه؟ يعني اللي مات مات وهو عارف إنه على باطل، واللي فضل عايش -سواء من المسلمين أو المشركين- المسلمين عرفوا إنهم على بينة حق، والمنافق عرف إنه منافق، والكافر فضل عرف إنه كافر؛ خلاص. لم يتبقى إلا إما الإيمان أو الجحود. الجحود ده يعني يعرف ويرفض. التعامل بالقرآن مع ناس بيوصل اللي قدامك لحالة من اتنين: إما أن يكون مؤمناً أو يكون جاحداً، مش رافضا، جاحداً. يبقى إيه أهم شيء في مرحلة الفرقان؟ ﴿لِيَهْلِكَ مَنْ هَلَكَ عَنْ بَيِّنَةٍ وَيَحْيَى مَنْ حَيَّ عَنْ بَيِّنَةٍ﴾ [الأنفال: 42]. لما بنوصل بالمجتمع لمرحلة الفرقان يأتي النصر؛ زي ما حصل غزوة بدر، معي ولا إيه؟ لازم نوصل الطرح القرآني على المجتمع لمرحلة الفرقان، الوضوح. ما يبقاش فيه تدليس على الناس في طرح الدين، ما نطرحش جزء من الدين ونخبي جزء، سواء لضغوط أمنية، ضغوط سياسية، ضغوط اجتماعية، ضغوط في الرزق، أياً كان، ده خطر، ده تدليس يعاقب الله عز وجل على ذلك. التدليس ده الطرح الجزئي للدين يعمل تدليس عند الناس. الشاهد: كيف نصل إلى مرحلة الفرقان؟

نيجي نبص في سورة الفرقان، هنلاقي فيها شيئاً عجيباً؛ نجد أن سورة الفرقان خصها الله عز وجل أن فيها تلات مواضع فيها كلمة تبارك، وتبدأ السورة سورة الفرقان بكلمة تبارك: ﴿تَبَارَكَ الَّذِي نَزَّلَ الْفُرْقَانَ عَلَى عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]. ﴿تَبَارَكَ الَّذِي إِنْ شَاءَ جَعَلَ لَكَ خَيْرًا مِنْ ذَلِكَ جَنَّاتٍ تَجْرِي مِنْ تَحْتِهَا الْأَنْهَارُ وَيَجْعَلْ لَكَ قُصُورًا﴾ [الفرقان: 10]، بل كذبوا بالساعة، ده الموضع التاني في سورة الفرقان. الموضع التالت: ﴿تَبَارَكَ الَّذِي جَعَلَ فِي السَّمَاءِ بُرُوجًا وَجَعَلَ فِيهَا سِرَاجًا وَقَمَرًا مُنِيرًا * وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِمَنْ أَرَادَ أَنْ يَذَّكَّرَ أَوْ أَرَادَ شُكُورًا * وَعِبَادُ الرَّحْمَنِ﴾ [الفرقان: 61-63].

يعني إيه الأول كلمة تبارك؟ وإيه الفكرة أن تيجي التلات مواضع مبدوءين بكلمة تبارك؟ يعني إيه الأول كلمة تبارك؟ تبارك قالوا أصلها جاي من البركة. وقالوا إيه أصل كلمة البركة؟ قال لك: البركة المكان اللي تجتمع فيه المياه ويبقى ثابت ومستقر، استقر الماء في مكان بيسموها بركة. فكلمة البركة أن الخير مستقر ما بيروحش، تلاقي معه شوية تمر صغيرين أو أكل صغير أو شوية فلوس يقول لك: ربنا مبارك. ربنا مبارك يعني إيه؟ الخير متجمع ما بيخلصش، دي البركة. لكن ربنا يبارك لك في وقتك تحس أن وقتك ما بيخلصش، مش تيجي تسأل النهارده إيه؟ تلاقي فات أسبوع وأنت مش واخد بالك، تلاقيك سنة ألف وأربعتاشر وأنت فاكرها ألف واتناشر، سنين بتعدي من عمرها ما فيش بركة. فالبركة استقرار الخير، معي؟ يبقى كلمة البركة استقرار زي استقرار الماء في مكان، استقرار الخير، ده كلمة البركة؛ الباء والراء والكاف.

طب وزن كلمة تبارك: تفاعل. يعني بيفيد إيه الوزن ده في الفعل؟ بيفيد إيه؟ قالوا: بيفيد كذا حاجة، يفيد الظهور والانتشار، ويفيد الاستمرار والاستقرار. تاني، يفيد إيه؟ الظهور والانتشار. أي يبقى كلمة تبارك معناها: ظهر خير الله عز وجل على الأرض كلها، واستقر خير الله عز وجل على العالمين، وانتشر خير الله عز وجل على كل مخلوق، وظهر وبدا، ولا ينكر ذلك إلا جاحد. كل ده بمعنى كلمة تبارك، معي؟ يبقى كلمة تبارك بتفيد أن فيه بركة من ربنا، البركة دي أنزلها الله عز وجل على العالمين، أنزلها الله عز وجل على العالمين، هذه البركة استقرت وانتشرت وثبتت.

يبقى إذن المعنى اللي احنا عايزينه من كلمة تبارك: الظهور والانتشار والوضوح والاستقرار والاستمرار. امتى ده يحصل في العالم؟ في تلات مواضع في السورة. امتى يحصل أن تملى العالم والخير يبقى واضح والشر يبقى واضح للناس عشان الناس تبقى على بينة؟ امتى يحصل البركة دي؟ وزن تبارك ده في تلات... يبقى لو احنا استطعنا أن يبقى في... عشان كده خد بالك من كلمة تبارك وكلمة للعالمين: ﴿تَبَارَكَ الَّذِي نَزَّلَ الْفُرْقَانَ عَلَى عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1].

هنا للعالمين عايزين تركيز، الكلام تقيل ولا إيه؟ نكمل؟ طيب، توكلنا على الله. عايزين تلات مواضع سورة تبارك يبقى في ذهنك، سورة الفرقان في ذهنك. الموضع الأول: ﴿تَبَارَكَ الَّذِي نَزَّلَ الْفُرْقَانَ عَلَى عَبْدِهِ لِيَكُونَ لِلْعَالَمِينَ نَذِيرًا﴾ [الفرقان: 1]. التلات مواضع بيحكوا لك كيف نصل إلى مرحلة الفرقان، إزاي نوصل بالمجتمع للوضوح التام؟ ما يبقاش فيه تدليس ولا تلبيس، ولا فلان المذيعة الفلانية تطلع تضحك عليهم ببرنامج، ولا فلان الفلاني يعمل له برنامج سخري يضيع له ثوابت الدين، ولا غلطة الشيخ الفلاني تخليه يشك في الأصول، ولا غلطة الجماعة الفلانية تخليه يرجع يراجع... لا، لا، لا، هو على هنا والمجتمع واضح ومستقر. إزاي؟ بالتلات مواضع دول.

الموضع الأول: التعامل مع القرآن. اللي ربنا هنا في الموضع ده بالذات سماه إيه؟ سماه فرقان: ﴿تَبَارَكَ الَّذِي نَزَّلَ الْفُرْقَانَ عَلَى عَبْدِهِ﴾ [الفرقان: 1]. إذا تقييم أي شيء في الكون بدون أسس قرآنية يؤدي إلى التدليس وعدم وضوح الرؤية. وهي دي الفكرة بتاعة الدرس اللي فات كله: ماذا لو غاب القرآن؟ يعني حصل موقف، ما فيش أصول نقيم بها الموقف ده قرآنية، ما فيش أصول قرآنية، ده هيعمل عند الناس تدليس بعد كده.

يبقى أول حاجة لابد من وجود الطرح القرآني بوضوح وقوة في كل حدث من الأحداث. سواء مشكلة فلسطين، سواء أفغانستان، سواء مشكلة مصر، سواء مشكلة الشام في سوريا أياً كان، سواء التقسيم المعاصر للدول وهل الحدود ديت احنا ملزمين بها ولا لا؟ قضية الولاء والبراء، قضية الجهاد في سبيل الله. كل القضايا التي تصيب بعض الناس بحساسية مفرطة، هذه القضايا أصول قرآنية نزل فيها الفرقان واضحاً، وحطوا فيها حدود بينة وفواصل بينة. عدم طرح ده من القرآن يعمل خلل عند الناس. لذلك في نفس السورة يشتكي أن النبي صلى الله عليه وسلم: ﴿وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُورًا﴾ [الفرقان: 30]. كلمة هذا القرآن، معقول في حد يسيب القرآن ده؟ اللي بعدها على طول: وكذلك جعلنا... في نفس السورة: ﴿وَكَذَلِكَ جَعَلْنَا لِكُلِّ نَبِيٍّ عَدُوًّا مِنَ الْمُجْرِمِينَ﴾ [الفرقان: 31]. شوف الربط ما بين أول لما ناس اتخذت القرآن مهجوراً يظهر الأعداء على طول بيستغلوا الفرصة دي: ﴿وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَذَا الْقُرْآنَ مَهْجُورًا * وَكَذَلِكَ جَعَلْنَا لِكُلِّ نَبِيٍّ عَدُوًّا مِنَ الْمُجْرِمِينَ وَكَفَى بِرَبِّكَ هَادِيًا وَنَصِيرًا﴾ [الفرقان: 30-31]. الصنف اللي عايز يسمع دين، والصنف المحارب، ونصيراً. وكفى بربك هادياً ونصيراً. يبقى الشيء الأول: القرآن.

الشيء التاني اللي يجيب مرحلة فرقان في الواقع: ﴿تَبَارَكَ الَّذِي إِنْ شَاءَ جَعَلَ لَكَ خَيْرًا مِنْ ذَلِكَ جَنَّاتٍ تَجْرِي مِنْ تَحْتِهَا الْأَنْهَارُ وَيَجْعَلْ لَكَ قُصُورًا﴾ [الفرقان: 10]. يعني إيه بقى؟ جزاك الله خيراً. يعني إيه الكلام ده؟ المشركين بيقولوا للنبي صلى الله عليه وسلم وللصحابة: احنا مش مصدقين إن أنتم إلا على الحق، عايزين آية، خلي حاجة تحصل، آية اتنين تقول لي على الحق. زي فرعون كده ما كان بيقول: ﴿ذَرُونِي أَقْتُلْ مُوسَى وَلْيَدْعُ رَبَّهُ﴾ [غافر: 26]. أما تشوف كده الدين بتاعه هيعمل له إيه؟ زي ما قالوا المنافقون: ﴿غَرَّ هَؤُلَاءِ دِينُهُمْ﴾ [الأنفال: 49]. فراحوا قالوا: عايزين آية، احنا مش مصدقين إن أنتم على الحق، عايزين آية حسية: ﴿لَوْلَا أُنْزِلَ إِلَيْهِ مَلَكٌ فَيَكُونَ مَعَهُ نَذِيرًا * أَوْ يُلْقَى إِلَيْهِ كَنْزٌ﴾ [الفرقان: 7-8]. عايزين آية حسية. فربنا بيقول له: أنا قادر، أنا قادر إن أنا أعمل لك آية حسية. ﴿تَبَارَكَ الَّذِي﴾ إيه؟ ﴿إِنْ شَاءَ﴾ [الفرقان: 10]، ربنا قادر إنه يعمل لك آية حسية.

طيب تخيل معي لو الوقتي جه مجموعة من أهل الباطل قالوا: احنا مش مصدقين أن القرآن ده حق، فقلنا لهم: طب استنوا كده، هنجمع كل الناس في صعيد واحد، ونقول لهم الدليل إن القرآن ده حق: احنا هنمسك القرآن ونضرب به البحر يوم البحر يتشق نصين، ساعتها تصدقوا؟ أليست هذه حالة من حالات الفرقان؟ مش ده ممكن يبقى فرقان؟ طب ده اللي ما بيحصلش. ليه ربنا ما عملش للأمة حالة يعني أن لو كان ربنا جعل للنبي صلى الله عليه وسلم جنات تجري من تحتها الأرض... خد بالك وصف كلمة من تحتها الأنهار وصف خاص بالجنة التي في الدار الآخرة. يعني كلمة جنة أو جنات بتيجي في القرآن عادي، إنما لما بييجي وصف تجري من تحتها الأنهار، وصف معجز. فربنا بيقول له: أنا قادر إن أنا أعمل لك جنات معجزة وقصور معجزة. لكن الله عز وجل لم يرد ذلك؛ لو كان ربنا عمل كده مش كان الموضوع خلص؟ ولكن كان ساعتها اللي يكفر هينزل عليه العذاب.

وبكثرة الضغط على النبي صلى الله عليه وسلم من طلب آية، فالنبي صلى الله عليه وسلم طلب من ربنا آية، فربنا قال له: إن شئت -لو أنت تريد يا رسول الله- جعلت لهم أي... الله عز وجل جعلت لهم الصفا ذهباً. جعلت لهم الصفا إيه؟ ذهباً. وإن شئت يا محمد أن أستأني بهم، يعني أسيبهم تدعوهم يوم ويوم. فقال: لا يا رب، بل أستأني بهم، لا سيبهم، لأن لو الصفا اتعمل ذهب وما أمنوش هينزل عذاب عام يهلك كل الناس. لذلك جه معنا في سورة الفرقان سور من العذاب كلمة دمرناهم تدميراً. الله عز وجل لم يرد لهذه الأمة الوصول للفرقان عن طريق الآيات الحسية، لا. طب نعمل إيه؟ طب ما القرآن

وأنا لوحده موجود وما بنوصلش لحالة الفرقان، وربنا قال لنا إن القرآن مش هيبقى آية حسية. نعمل إيه عشان نوصل للناس لحالة تيجي الكلمة التالتة اللي تفهمك كيف نصل بالفرقان اللي هو القرآن إلى مرحلة الفرقان؟

ودي تكملة الدرس اللي فات، إن القضية مش بس في القرآن، مش بس في المنهج. لازم منهج ولازم تطبيق للمنهج، لما سئلت أمنا عائشة رضي الله عنها عن خلق النبي صلى الله عليه وسلم قالت كان إيه؟ خلقه القرآن. التخلق بالقرآن، ناس بتطبق القرآن في المجتمع، المجتمع ده هيبقى وصل لحالة الفرقان. مباشرة خلل في المنهج خلل في التطبيق هيحصل تدليس عند الناس. النبي صلى الله عليه وسلم استطاع.

المشركين يوم الهجرة رايحين يقتلوا النبي صلى الله عليه وسلم وسايبين الأمانات بتاعتهم عنده، هو النبي صلى الله عليه وسلم ساب سيدنا علي ليه؟ من إحدى الحكم إنه يرد الأمانات. طب أنتم رايحين تقتلوه تسيبوا الأمانات ادكو عنده إزاي؟ لأن هم عارفين إنه صادق، عارفين إنه ما بيكذبش، عارفين إنه أمين. التطبيق الصحيح للقرآن خلاهم يكفروا عن بينة، ملوش عذر. التطبيق الخاطئ للقرآن والفهم الخاطئ للقرآن بيخلي الناس بيدلس عليها الأمر. لذلك كلمة حيران لما جت في سورة الأنعام جت بعد آيات: ﴿وَإِذَا رَأَيْتَ الَّذِينَ يَخُوضُونَ فِي آيَاتِنَا فَأَعْرِضْ عَنْهُمْ حَتَّىٰ يَخُوضُوا فِي حَدِيثٍ غَيْرِهِ ۚ وَإِمَّا يُنسِيَنَّكَ الشَّيْطَانُ فَلَا تَقْعُدْ بَعْدَ الذِّكْرَىٰ مَعَ الْقَوْمِ الظَّالِمِينَ﴾ [الأنعام: 68].

وجود دعاة يجلسوا في مجالس يخاض فيها في آيات الله دون إنكار بيخلي الناس توصل لمرحلة الحيران. التدليس في طرح الدين يخلي الناس توصل لمرحلة الحيران. الطرح الجزئي للدين يخلي الناس توصل لمرحلة الحيران. التطبيق الخاطئ للدين غياب أخلاق المتدينين يخلي الناس توصل لمرحلة الحيران. إيه المرة التالتة اللي جت فيها تبارك؟ قال ربنا: ﴿تَبَارَكَ الَّذِي جَعَلَ فِي السَّمَاءِ بُرُوجًا وَجَعَلَ فِيهَا سِرَاجًا وَقَمَرًا مُنِيرًا * وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِمَنْ أَرَادَ أَنْ يَذَّكَّرَ أَوْ أَرَادَ شُكُورًا﴾ [الفرقان: 61-62]. وعباد الرحمن.

إيه العلاقة الأول ما بين سراجا وقمرا منيرا وبين عباد الرحمن؟ ها إيه رأيكم؟ إيه العلاقة بين سراجا وقمرا منيرا خليكم معي خليكم معي. إيه العلاقة بين سراجا وقمرا منيرا وبين عباد الرحمن؟ إيه رأيكم يوم القيامة؟ طب ما فيش قبل يوم القيامة علاقة؟ هم زي كما أن من سنة الله عز وجل حتى لا يأتيه في الأرض عمل لهم يستضيئوا بالنجوم وبالشمس وبالقمر ويستنيروا وعلامات وبالنجم هم يهتدون.

كما أن الله عز وجل وضع نجوما في السماء يهتدي بها الناس، كذلك لله عز وجل نجوم في الأرض يهتدي بها الناس. وإذا كان هذه النجوم والنور الشمس والقمر نهتدي بها ونستضيء بها في الأمور الحسية المادية الطرق الحسية، فهؤلاء يستضاء بهم في الأمور المعنوية. ده الرابط بين الآيتين. إن زي ما في سراج وقمر منير في السماء عشان الناس ما تتوهش زي ما قال الله عز وجل وعلامات وبالنجم هم يهتدون، كذلك هؤلاء بهم يقتدي الناس عباد الرحمن في الأرض. وعباد الرحمن الذين يمشون على الأرض هونا.

إذا كلمة تبارك هنا معناها الظهور والانتشار للدين لن يكون إلا بوجود الطائفة المطبقة للفرقان. يبقى احنا عندنا تلات حالات نوصل بها للفرقان: وجود منهج صحيح الفرقان، آية حسية تنزل تكسر أهل الباطل وتقطمهم ويبقى الأمر واضح، أو أناس مطبقة. المرحلة اللي في النص مش لأمة ما قدمناش غير المرحلة الأولى والتانية؛ الإيمان بالفرقان والتعايش مع القرآن ثم تطبيق ده في الواقع. لا يكتفى بواحدة عن الأخرى. يعني لو في طائفة جيل حماسي عايز ينصر الدين وعايز يثور وينصر دين ربنا من غير قرآن مش هيعمل حاجة مش هينفع منه أي حاجة، ولا هينفع أي حاجة ولا هينفع أي تغيير حقيقي. لازم تطبيق لكتاب الله عز وجل. لو في قرآن ومن غير ناس بتطبق هذا القرآن، طب وبعدين؟ هيظل كلام لا يطبق. المنهج تكفل الله عز وجل بحفظه، لكن التطبيق أمرنا نحن به.

يبقى احنا عشان نغير الواقع لازم مرحلتين: المرحلة الأولى معايشة القرآن معايشة صحيحة وفهم القرآن فهم صحيح، رقم اتنين تطبيق هذا في الواقع. يعني لما أمنا عائشة تقول كان النبي صلى الله عليه وسلم قرآنا يمشي. يا سيدي خليك آية تمشي. شف شف العلاقة بين قرآن ويمشي. لذلك قالوا على النبي صلى الله عليه وسلم في نفس السورة إن واحد عايش وسط المجتمع يأكل الطعام ويمشي في الأسواق. ما اكتفاش أن القرآن لنفسه، لأ هو طبق القرآن في نفسه، تخلق بأخلاق القرآن زي ما أمنا عائشة قالت فخلقه القرآن، وبعدين عمل إيه؟ عاش وسط الناس.

كل واحد فينا في شغله في مكانه لو هو قرآن لو كل واحد فينا هو قرآن أو آيات من القرآن عاشها وطبقها وسط ناس ده هيبقى فرقان إن هو ده الحق. في واحد كده تشوفه في الشغل يذكر الله، لا يغتاب، حريص شغلي، أمين ما خدش رشوة، ما يقبلش وسايط، ما مش ظالم، يصلي الصلاة في وقتها، حسن الخلق مع الناس. الناس بتبقى عارفة إن ده صح حتى لو خالفته حتى لو بتغير منه حتى لو بتحسده حتى لو عايزة تعمل معه مشاكل هي من جزيئة سابه الأمانات عند النبي صلى الله عليه وسلم رايحين يقتلوه؟ هي عارفة إن ده صح.

لذلك هرقل ملك الروم لما راح لأبي سفيان، أبو سفيان يقول له في عندنا نبي جديد طلع واحد بيدعي نبوة وبينزل عليه رسالة من السماء. هرقل سأله إيه؟ سأله على تطبيق ده في الواقع، بيطبقوا ولا ما بيطبقوش؟ لذلك من الأسئلة العجيبة اللي سألها هرقل لأبي سفيان قال له إيه؟ أسئلة كتير بقى اللي بيتبعه الضعفاء ولا الأغنياء؟ الناس بتعود ساخطة عن الدين الناس بعد ما بتسيب معه بترجع تسيبه ولا بيتمسكوا؟ قال له بيتمسكوا. اتباعه ضعفاء؟ سأله سؤال قال له إيه؟ قال هل يغدر؟ بيغدر؟ بيقول كلامه يرجع ينقضه؟ بيلعب بالمبادئ يقول كلام وبعدين يرجع يغيره عشان مصالحه؟ ولا بيطبق الحق حتى على نفسه؟ زي كده: «لو أن فاطمة بنت محمد سرقت لقطعت يدها». قال هل يغدر أبو سفيان اللي بيحاربه؟ قال لا. تطبيقنا الحقيقي للدين يخلي الكافر يقول لك أنت اللي على الحق، بس يفضل ممكن يجحد لأن ده هيفضل موجود: ﴿وَجَحَدُوا بِهَا وَاسْتَيْقَنَتْهَا أَنْفُسُهُمْ ظُلْمًا وَعُلُوًّا﴾ [النمل: 14]. يبقى ما فيش فرقان في الواقع. أنت عشان تبقى فرقان في شغلك لازم المرحلتين: القرآن ثم التخلق به.

وخلف من بعدهم خلف، كلمة خلف هنا مقصود بها الجيل الفاسد. خلف من بعدهم خلف جت مرتين في القرآن، مرة في الأعراف ومرة في مريم، بتاعة الأعراف: ﴿فَخَلَفَ مِنْ بَعْدِهِمْ خَلْفٌ وَرِثُوا الْكِتَابَ﴾ [الأعراف: 169] وبتاعة مريم: ﴿فَخَلَفَ مِنْ بَعْدِهِمْ خَلْفٌ أَضَاعُوا الصَّلَاةَ﴾ [مريم: 59]. أمتى الجيل يبقى فاسد؟ ما فيش قرآن ما فيش صلاة يبقى جيل فاسد. الخلف ده الحاجة اللي بتبوظ من اللبن وخلاص وبتترمي ما بيبقاش لها قيمة. يبقى من غير قرآن ومن غير تطبيق للقرآن جه الفاسد، مش هيعمل أي حاجة مش يجي منه أي إصلاح، أي مناهج أخرى ستأتي بالإصلاح لن تكتمل: ﴿وَمَا يُبْدِئُ الْبَاطِلُ وَمَا يُعِيدُ﴾ [سبأ: 49].

لذلك لما تيجي تشوف صفات عباد الرحمن، وازن الدكتور حازم شرحها قبل كده بالتفصيل، صفات عباد الرحمن في آخر سورة الفرقان تتعجب! أنا عايزك على أشياء فيها كده وأنت بتقرا تفاجأ ربنا بيقول إيه: ﴿وَإِذَا خَاطَبَهُمُ الْجَاهِلُونَ قَالُوا سَلَامًا﴾ [الفرقان: 63] ده عايشين في مجتمع فيه جهلة بيجهلوا عليهم. ﴿وَالَّذِينَ لَا يَدْعُونَ مَعَ اللَّهِ إِلَهًا آخَرَ﴾ [الفرقان: 68] ده عايشين في مجتمع فيه مشركين. ﴿وَلَا يَقْتُلُونَ النَّفْسَ﴾ [الفرقان: 68] ده عايشين في مجتمع فيه قتّالين قتلة. ﴿وَلَا يَزْنُونَ﴾ [الفرقان: 68] عايشين في مجتمع فيه زنا. ﴿وَإِذَا مَرُّوا بِاللَّغْوِ﴾ [الفرقان: 72] عايشين في مجتمع فيه لغو. واستطاعوا أن يطبقوا الدين! نعم، عشان ما تقوليش أصل هم كانوا عايشين في المدينة الفاضلة، لأ ما كأنوش عايشين في المدينة الفاضلة. هتقول لي ده أصل هم ما كأنوش قاعدين في المنصورة، لأ كانوا قاعدين في أسوأ من المنصورة. قلت له لأ أصل هم دول طبقوه أصل كانت الظروف المحيطة، لأ مش الظروف المحيطة استطاعوا أنهم يجاهدوا نفسهم.

لذلك شف جمعوا بين صفات قوة العبادة والطاعة: ﴿يَبِيتُونَ لِرَبِّهِمْ سُجَّدًا وَقِيَامًا﴾ [الفرقان: 64]، الخوف من ربنا: ﴿اصْرِفْ عَنَّا عَذَابَ جَهَنَّمَ﴾ [الفرقان: 65]. الأخلاق مع الناس: ﴿وَإِذَا خَاطَبَهُمُ الْجَاهِلُونَ قَالُوا سَلَامًا﴾ [الفرقان: 63]. التوازن في حياته: ﴿لَمْ يُسْرِفُوا وَلَمْ يَقْتُرُوا﴾ [الفرقان: 67]. إنسان متوازن في دنيا لا مسرف في الدنيا ولا بيضيع دنيته، إنسان متوازن، لا تلاقيه متشدد الناحية دي ولا الناحية دي، إنسان متزن في الطرح بتاعه. الإنسان يأكل من عمل يده، عايش وسط الناس يأكل الطعام ويمشي في الأسواق. ده بيغير المجتمع. في سرقة في قتل في زنا في شرك هو لا يتأثر بذلك هو يدعوهم ولا يتأثر، هو يغير فيهم وهم لا يغيرون فيه.

لذلك يقول الله عز وجل: ﴿وَإِذَا مَرُّوا بِاللَّغْوِ مَرُّوا كِرَامًا﴾ [الفرقان: 72]. يعني إيه مروا باللغو مروا كراما؟ طيب. كنا بنقول وإذا مروا باللغو مروا كراما، يعني وهو بيعدي من على مجالس -خد بالك من كلمة إذا- يعني لو حتى فجأة كده معدي على مجلس ما يتأثرش، وده صعب جدا. أنا كنت بقول كان فيه أحد الناس يذكر إنه كان بيعلم الناس وبعدين تغير أخلاقه تغيرت، فسأله لماذا تغير؟ فقالوا كلمة مشروعة: ما زال به الناس حتى ساء خلقه. الكلمة دي خطيرة أوي، ما زال به الناس حتى إيه؟ الناس قعدت تضغط عليه ده يعمل في موقف وحش، وده ياخد حاجته وما يرجعهاش، وده يكسر له حاجته، وده يضغط عليه نفسيا، فجأة بقت أخلاقه وحشة، ده المجتمع! اسمع، هو اللي غير فيك؟ لأ، أنت اللي لازم تبقى أخلاقك قوية، أنت تبقى ثابت على مبادئك، ما تغيرهاش، مش من ناس عمالة تغير إن أنت تغير، إن أنت بتمشي مع الناس الكتير وخلاص، لأ، تتبع الحق حتى لو قلة. لذلك وإذا مروا باللغو وإذا فجأة عدى من اللغو مروا كراما.

لذلك النبي صلى الله عليه وسلم -صلوا عليه- يحذر أن أنت أخلاقك تتغير من غير ما تشعر. يقول النبي صلى الله عليه وسلم: «مثل الجليس الصالح والجليس السوء كحامل المسك ونافخ الكير». ليه النبي صلى الله عليه وسلم شبه التغير الأخلاقي للشخص من أصدقائه بانتقال الروائح؟ شبه النبي صلى الله عليه وسلم التغير الأخلاقي اللي بيحصل للشخص بانتقال الروائح، لأن الروائح بتنتقل دون أن تشعر. تلاقيك مروح بعد الصلاة وقفت خمس دقايق مع ناس سلمت عليهم وروحت البيت يقول لك إيه ده أنت ريحتك سجائر؟ قلت لهم أنا؟ حاشا أنا ما شربتش سجائر. الرائحة انتقلت دون أن تشعر، ريحتك اتغيرت، زي ما النبي صلى الله عليه وسلم شبه انتقال الرائحة: أنت ممكن تقعد مجلس تقوم بخلق طيب، انتقلت الرائحة الطيبة، ريحة المسك انتقلت دون أن تشعر. الإنسان بيتغير لو ساب نفسه المجتمع اللي يغيره هيتغير، لأ أنت عندك مبادئ.

جبت المبادئ دي كلها منين اللي موجودة في السورة؟ وعباد الرحمن الذين إزاي مشوا على الأرض هونا؟ ربنا بيقول إيه: ﴿يَبِيتُونَ لِرَبِّهِمْ سُجَّدًا وَقِيَامًا﴾ [الفرقان: 64]. طول الليل مع القرآن يتغذى قرآن في جو إيماني يصلي قيام، جمع بين الصلاة والقرآن اللي احنا قلنا عكس كلمة إيه؟ ها احنا قلنا الجيل الفاسد اللي ترك اللي ربنا سماه كلمة إيه؟ خلف: ﴿فَخَلَفَ مِنْ بَعْدِهِمْ خَلْفٌ أَضَاعُوا الصَّلَاةَ﴾ [مريم: 59]. هو بيجمع عكس الاتنين دول بالليل، طول الليل يصلي بالقرآن يستضيء بنور القرآن يكتسب قوة معنوية قوية، ينزل بالنهار نفسه احتقر الدنيا يمشي على الأرض هونا، تخلق بأخلاق دول.

لو وجدوا بكثرة في مجتمع، المجتمع يوصل لمرحلة الفرقان مباشرة على طول، الناس تبقى عارفة الحق من الباطل، لكن للاسف جزء -يعني مش هقول كبير عشان ما أبقاش كاذب- ولكن جزء غير صغير من التدليس اللي بيحصل على الناس بسبب أخطاء العاملين للدين، لكن هذا ليس عذرا لهم أيضا. أنا مش معنى أن أنا بقول إن احنا نوصل لمرحلة الفرقان أن ما دون مرحلة الفرقان اللي بيقف في صف أهل الباطل معذور، لا، ليس معذورا.

سلمان الفارسي رضي الله عنه لما حب كان يعني في الدين الباطل بتاعه وعبادة النار كان هو ملك ابن ملك، هو اللي كان خادم النار، وبعدين قال لا ده مش ده مش دين، عايز أوصل للحق، فسأل: من أعظم أهل الأرض؟ دلوني على أصل هذا الدين. دلوا الناس على قسيس معين عالم من علماء النصارى راهب. شف هو سأل عن أفضل واحد في الأرض، راح عنده قال له أنا هخدمك لغاية لما تموت. اكتشف سيدنا سلمان الراجل ده نصاب! تخيل بتاع الدين ده طلع نصاب! طلع بيكلم الناس لازم تتصدقوا والزكاة وياخد الفلوس يحطها في جيبه، بص يا عيني فضل ملازمه ما فيش بديل، فضل ملازمه سيدنا سلمان إلى أن مات. طلع قال للناس الراجل ده كان نصاب، قايلين له أنت بتقول إيه؟ قال لهم الدليل اهو، لشوية الذهب اهي.

كان ممكن سيدنا سلمان يقول: أكن أنا سايب أبويا وسايب القصور هادا يا عم الدين يا عم هدى بتوع الدين أنا ما عدتش عايز حاجة من الدين ده، ده فيه واحد يدخل كوافير يتسرق بس يقول لك أنا ما عدتش داخل تاني! يبقى إذن الابتلاءات اللي بتقابلك من أخلاق أهل الدين.

ليست عذرًا أنك تلف وترجع، لكن أنا بقول ازاي نوصل بالمجتمع لمرحلة إن ما عدش حد يدلس عليه! ما فيش عذر أبدا لأي حد. ارزقنا، هو مش معذور أمام الله أن يبقى فيه تدليس. التطبيق الفعلي أن احنا نمشي وسط الناس بالقرآن، نعيش وسطهم، نأكل الطعام ونمشي بالأسواق. يبقى فيه واحد في السوق ما بيغشش، بيبقى معروف وساعة الصلاة يقوم ويقفل ويصلي، ده عايش وسط الناس. واحد يأمر بالمعروف وينهى عن المنكر بخلق، يمشي وسط الناس، نبقى عايشين بدينا وسط الناس، مش الدين له مكان؛ تلاقي واحد في المسجد قاعد بيسمع الأخلاق ويعيط، وطلع في التجارة يقوم شايل علامة الصلاة وقلع الدقن ويمارس حياته عادي بقى خلاص؛ يكذب ويتاجر ويدلس ويرجع بقى المسجد يقوم إيه لابس وداخل المسجد. بقت إيه؟ بقت بالنسبة له مجرد إكسسوارات.

لأ، ده اللي بيحصل عند إيه؟ للأسف جزء من الناس يقول لك: أوعى تتعامل مع الناس دي، الناس دي حرامية. لذلك التطبيق الخاطئ يدلس على الناس، ما يوصلناش لمرحلة الفرقان. فربنا قال إن عباد الرحمن دول لو وجدوا في مجتمع حتى لو مستضعف، دي مرحلة فرقان تجلب النصر. دي مرحلة فرقان تستجلب النصر من ربنا سبحانه وتعالى، ينزل النصر. فيه ناس يالربهم سجدًا وقيامًا، أخلاقهم طيبة مع الناس، يقولون سلامًا، خافوا من عذاب ربنا، متوازن في حياته لم يسرف ولم يقتر، أخلاق الباطن ما بتأثرش فيه؛ لا يدعون مع الله إلهاً آخر، لا يقتلون، لا يزنون. إذا مروا باللغو مروا كرامًا. لا يشهدون الزور؛ الزور أعياد الباطل. يعني المجتمع من حواليه بيعيد ومبسوط وفرحان وهو منعزل، طب ما يمشي معهم وخلاص؟ لأ، ثابت على مبادئه؛ لا يشهدون الزور. وجود هؤلاء دليل إن فيه حق.

ليه قوم لوط قالوا: ﴿أَخْرِجُواْ ءَالَ لُوطٍ مِّن قَرْيَتِكُمْ ۖ إِنَّهُمْ أُناسٌ يَتَطَهَّرُونَ﴾ [النمل: 56]. ليه عايز يطرده؟ لأن وجود ده دليل إن هو فاسد. لما يبقى فيه مصلحة حكومية، دخلت مكان فيه خمس مكاتب، أربعة بيخدوا رشوة وواحد لأ، تلاقيهم عايزين يمشوه! ما هو شكلهم وحش، مطلعهم إن هم وحشين، وهتلاقي الناس ده الشخص ده هو بس الطوابير واقفة عنده وكده، هو من غير ما يكلمهم. يعني لو جه واحد ادى له فلوس ما خدش منه وهو لسه ما قالش حاجة، يقوم واحد يقول له: يعني أنت عايز تقول علي إن أنا وحش؟! يا عم أنا جيت جنبك؟! أنا قلت لك حاجة؟! أومال أنت ما بتاخدش رشوة ليه؟! يا عم أنت مالك؟! أولاً دي مش رشوة. يا سيدي فاللي ما بيعملش الحاجة تلاقيه عايز كل الناس تبقى زيه عشان ما يبقاش وحش ودت إزاي؟ ثانياً: ﴿وَدُّواْ لَوْ تَكْفُرُونَ كَمَا كَفَرُواْ فَتَكُونُونَ سَوَاءً﴾ [النساء: 89].

فبقيت عباد الرحمن على المبادئ حتى لو أصيب بأذى، حتى لو خالف المجتمع كله، ده دليل إن فيه حق. أهل الباطل ما يستحملوش؛ مش بيقولوا: ﴿أَخْرِجُواْ ءَالَ لُوطٍ مِّن قَرْيَتِكُمْ ۖ إِنَّهُمْ أُناسٌ يَتَطَهَّرُونَ﴾ [النمل: 56]؟ ما يستحملش يبقى فيه ناس بتتعامل بالعدل. زي ما قلت لكم السؤال، هرقل ده هل يغدر؟ سؤال واحد بيفهم، استغراق لملك شغال في السياسة وعارف إن السياسة كلها غدر، فقال: يجي حد في السياسة وما يبقاش بيغدر؟ فقال: هل يغدر؟ قال: لا. قال له: إزاي؟ ليه ما بتجيش غير بدر؟ قال: لا. قال له: ده يبقى نبي.

زي التجارة كده، التاجر الصدوق الأمين، الصدوق مع النبيين والصديقين والشهداء. التجارة أنت ممكن كلمة تدليس تفرق معك ألف جنيه، خمسمائة جنيه، مائة جنيه، مائة ألف جنيه، على حسب. والله أحد الإخوة كان بيسألني يقول لي: أنا ممكن إشارة مني بس، واحد يسال يعني حاجة في البضاعة، أشاور بس ما أتكلمش، تفرق معي ألف جنيه ألفين جنيه. ﴿يَعْلَمُ خَائِنَةَ الْأَعْيُنِ وَمَا تُخْفِي الصُّدُورُ﴾ [غافر: 19]. هو أنا لازم أقول؟ وأنا لازم أتعامل؟ المعاملات أصعب. تطبيق الدين في الواقع صعب، أنك تعيش بالدين لا سيما في الأمور الاجتماعية، في الأمور التجارية، في الأمور السياسية؛ أصعب شيء تعيش فيه في الدين الثلاثة دول. أصعب شيء أنك تطبق الدين في خلاف مع زوجتك، مع قرايبك.

الواحد لما بيقرأ قول الله عز وجل: ﴿وَإِن طَلَّقْتُمُوهُنَّ مِن قَبْلِ أَن تَمَسُّوهُنَّ وَقَدْ فَرَضْتُمْ لَهُنَّ فَرِيضَةً فَنِصْفُ مَا فَرَضْتُمْ﴾ [البقرة: 237]، يعني الواحد عقد على امرأة ولما يبني بها، لسه لم يدخل بها، وبعدين طلقها، فربنا بيقول يعمل إيه؟ ﴿فَنِصْفُ مَا فَرَضْتُمْ﴾، المفروض يديها نص المهر، ﴿إِلَّا أَن يَعْفُونَ﴾، يعفون هنا النون دي نون النسوة، يعني إلا أن يعفو النساء، ﴿أَوْ يَعْفُوَ الَّذِي بِيَدِهِ عُقْدَةُ النِّكَاحِ﴾ [البقرة: 237]، اللي هو الزوج على أحد الأقوال. تعفو أقرب للتقوى. ﴿وَلَا تَنسَوُا الْفَضْلَ بَيْنَكُمْ﴾ [البقرة: 237]. إيه ده! حالة طلاق وربنا بيقول: ﴿وَلَا تَنسَوُا الْفَضْلَ بَيْنَكُمْ﴾! تخيل وخد بالك، ﴿وَلَا تَنسَوُا الْفَضْلَ بَيْنَكُمْ﴾ دول مش قعدوا مع بعض عشر سنين مثلاً فيه حب، لأ لأ، ده ده لسه في العقد. الواحد بيتعجب، ممكن زوجة تعيش مع زوجها سنين في الخير ويحبوا بعض ومشكلة واحدة تفرقهم كلهم عن بعض! إزاي؟ ربنا خلى في الآية دي: ﴿إِلَّا أَن يَعْفُونَ أَوْ يَعْفُوَ الَّذِي بِيَدِهِ عُقْدَةُ النِّكَاحِ﴾ [البقرة: 237]. سباق من الذي يعفو؟ المجتمع المسلم الصحيح لما يحصل حالة زي دي، حالة طلاق، المرأة تقول: لأ، أنا مصممة أنازل عن المهر كله. هو يقول: لا، أنا مصمم أفع المهر كله. شفتم ده قبل كده؟ في الأحلام صح؟ ده لما يحصل ده دين. القصص اللي اللي بنسمعها عن السلف في الأمانة والمال.

زي الدين انتشر في شرق آسيا وفي جنوب شرق آسيا بالأخلاق! إزاي نتاجر؟ صدق التاجر وأمانة التاجر كانت هي السبب في انتشار الدين في كثير من الأماكن. ده اللي احنا محتاجينه. إذاً تطبيق مرحلة التطبيق عندنا مرحلتين للدين، مش عايزين نخلط أبدا. عندنا مرحلتين: مرحلة التبيين ومرحلة إيه؟ التطبيق. عايزين نفهم المعادلة دي كويس. عندنا مرحلتين: مرحلة التبيين، مرحلة التطبيق. أي خلل في الاثنين يؤدي إلى عدم الوصول إلى مرحلة الفرقان.

مرحلة ناس فاهمة قرآن صح وبتعرض على الدين من القرآن. الخلل في التبيين صعب، خطر. والخلل في التبيين ما فيش فيه عذر. طيب، الخلل في التطبيق ماشي مش قادر تطبق دلوقتي أو مش خلل بقى نقص في التطبيق، ممكن تعذر به. يعني احنا مش قادرين نطبق الدين كاملاً، احنا معذورين في ضغط في هيمنة عالمية في كذا، إنما التبيين ما لكش عذر؛ مرحلة التبيين لسنا معذورين فيها. لازم معايشة الفرقان وتوصيل مفاهيم القرآن الواضحة للناس بدون تدليس، قلنا البيان الكلي. المرحلة الثانية أن ييجي جيل اسمه إيه؟ عباد الرحمن، مش مهم اسمه، مكانه مش مهم، جنسيته مش مهم، المهم تطبيق هذه المبادئ في أرض الواقع. السلام عليكم ورحمة الله وبركاته.

الحمد لله وحده، والصلاة والسلام على من لا نبي بعده، محمد صلى الله عليه وسلم. كنا بنقول إن في مرحلتين لازم نفهمهم. المرحلة الأولى مرحلة التبيين، المرحلة الثانية مرحلة التطبيق. ربنا سبحانه وتعالى بيقول في القرآن: ﴿أَنزَلَ مِنَ السَّمَاءِ مَاءً فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَدًا رَّابِيًا﴾ [الرعد: 17]. دي مرحلة. المرحلة الثانية: ﴿وَمِمَّا يُوقِدُونَ عَلَيْهِ فِي النَّارِ ابْتِغَاءَ حِلْيَةٍ أَوْ مَتَاعٍ زَبَدٌ مِّثْلُهُ ۚ كَذَٰلِكَ يَضْرِبُ اللَّهُ الْحَقَّ وَالْبَاطِلَ﴾ [الرعد: 17]. دول مثلين لصراع الحق والباطل، ماشي؟ دول مثلين لصراع الحق والباطل.

المثل الأول صراع الماء اللي بينزل من السماء، الماية بتنزل من السماء مع القاذورات والزبد اللي موجود في في الأودية وفي الأرض، ينزل الماية يحصل الصراع، قوة دفع الماية وهي نازلة ترمي هذه الأشياء القذرة المبهرجة على الفاضي، الزبد ده ترميه: ﴿فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ﴾ [الرعد: 17]. يبقى إذا المرحلة الأولانية صراع الماء ده ممكن يشبه أن الماء ده هو الوحي. زي ما النبي صلى الله عليه وسلم قال: «مثل ما بعثني الله به من الهدى والخير كمثل غيث أصاب أرضاً». خد بالك من كلمة أنزل جت بصيغة الإيه؟ الماضي. ﴿أَنزَلَ مِنَ السَّمَاءِ مَاءً فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَدًا رَّابِيًا﴾ [الرعد: 17].

المثل الثاني يجيب بصيغة الإيه؟ المضارع: ﴿وَمِمَّا يُوقِدُونَ عَلَيْهِ فِي النَّارِ﴾ [الرعد: 17]. طب ليه الأولاني يجيب بصيغة الماضي ﴿أَنزَلَ مِنَ السَّمَاءِ﴾؟ ليه ربنا ما قالش عشان المثل كله يبقى بصيغة المضارع: ينزل من السماء ماء فتسيل أودية بقدرها، أو أنزل من السماء ماء ومما أوقد الناس؟ ليه جات الأولانية بالماضي والتانية بالمضارع؟ لأن الأولانية دي معركة التبيين، معركة الوحي. يعني معركة القرآن قصاد الأفكار الضالة، كل الأفكار الضالة العلمانية الاشتراكية أي فكرة ضالة، معركة القرآن جت بصيغة الماضي ليه؟ لأن المعركة خلصانة. القرآن كسبان كسبان. أي حركة فكرية القرآن كسبان فيها.

القضية في التطبيق. دي بقى ﴿وَمِمَّا يُوقِدُونَ عَلَيْهِ فِي النَّارِ﴾ أهل الحق بقى لازم يخشوا الفرن اللي هو الابتلاء. زي ما الدهب يدخل الفرن كده ويتحط في النار والخبيث يسقط من الدهب. كذلك أهل الإيمان اللي ادعوا الإيمان كلهم لازم هيخشوا الفرن عشان الخبيث اللي منهم يسقط والعياذ بالله. ﴿وَمِمَّا يُوقِدُونَ عَلَيْهِ فِي النَّارِ ابْتِغَاءَ حِلْيَةٍ أَوْ مَتَاعٍ زَبَدٌ مِّثْلُهُ﴾ [الرعد: 17]. يبقى فيه زبد للأفكار وفيه زبد للأشخاص. الصراع الفعلي العملي التطبيقي الحرب سجال، هم ممكن يكسبوا مرة وأحنا ممكن يكسبوا مرة، زي ما هرقل سأل كده سفيان: مين اللي بيكسب في الحرب؟ قال له: مرة بدر ومرة أحد. ده وارد لأي سبب تقصير مننا، زي معصية الرسول في أحد، عدم إعداد العدة. لكن معركة الوحي لا يمكن نخسر فيها إلا بسوء فهم منا بقى من القرآن، يعني أما تلاقي مناظرة ويخسر فيها قال الحق، ده تقصير من الفهم؛ لأن القرآن ﴿لَا يَأْتِيهِ الْبَاطِلُ مِن بَيْنِ يَدَيْهِ وَلَا مِنْ خَلْفِهِ تَنزِيلٌ مِّنْ حَكِيمٍ حَمِيدٍ﴾ [فصلت: 42]. وأنت بتلقى القرآن من لدُن حكيم، أنت بتلقى يعني خلاصة الوحي على سنين، أم الكتاب، أم الكتب، القرآن كلام الله عز وجل لا يأتيه الباطل من بين يديه ولا من خلفه.

إذاً في معركتين عندنا: معركة تبيين ثم معركة التطبيق. معركة التبيين اتكلمنا فيها في ماذا لو غاب القرآن؟ معركة التطبيق محتاجين فيها عباد الرحمن. دول المرحلتين، ده ملخص الصراع الموجود. الفرقان مش هنوصل، ربنا جاب صراعين: ﴿أَنزَلَ مِنَ السَّمَاءِ مَاءً﴾ ومما يوقدون عليه في النار. المثل المائي والمثل الناري. المثل المائي ده الوحي، وأن الوحي كسبان كسبان، جه بصيغة الماضي. ومما يوقدون عليه ليه بصيغة المضارع؟ لأن لسه الحرب هتفضل إلى يوم القيامة، لا تقوم الساعة حتى يقاتل المسلمون اليهود، هيفضل القتال ماضياً إلى يوم القيامة، ويفضل الحرب سجال بيننا وبينهم.

إذاً أنا واحد عايز أساهم في المعركة دي، خد آية واحدة بس عشانها وطبقها وسط الناس. قال النبي صلى الله عليه وسلم: «بلغوا عني ولو آية». لو أنت مش قادر تبقي قرآن يمشي على الأرض، خليك نص القرآن، ثلت القرآن، سورة، آية، تمشي. أنا مش عايز تبقى قرآن أو صورة مع نفسك، لأ، أنا عايزك تمشي بين الناس. ﴿وَيَجْعَل لَّكُمْ نُورًا تَمْشُونَ بِهِ﴾ [الحديد: 28] النور ده لازم إيه؟ تمشي به وسط الناس. الناس لما هتشوف أخلاق أهل القرآن هتقول: آه، الراجل ده على حق، حتى لو هم أظلموا وبنسرقوا، احنا عارفين أن هو صح. دي مرحلة البينة.

إذاً مرحلة الفرقان مش معناها أن الناس كلها تؤمن، لأ. ربنا أثبت أن في ناس بعد الفرقان هموتوا على الباطل؛ ﴿لِيَهْلِكَ مَنْ هَلَكَ عَن بَيِّنَةٍ﴾ [الأنفال: 42]. أوعى تفتكر أن مرحلة الفرقان معناها أن الناس كلها هتؤمن، لأ. والله متم نوره ولو كره. فيه ناس هتفضل كارهة لآخر لحظة، يعني النور هيتم وهينتشر وفيه ناس هتفضل كارهة. أوعى تعتقد أن لازم الموضوع يتم كله وسلام، لأ، لازم فيه جهاد وفيه قتال وفيه صراع. مرحلتين صراع التبيين ثم صراع التطبيق.

غياب عباد الرحمن في الواقع، طب على قد مستواي أنا. حتى شوف هنا عباد الرحمن وكأن الواقع كله رافضهم. طب قالوا نعمل إيه بقى؟ الواقع كله جاهلية حواليهم؟ قالوا خلاص: ﴿رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ﴾ [الفرقان: 74]. على الأقل أصلح بيتي. قرة، واجعلني شف بقى، مش معنى أن أنا أصلح بيتي أن أنا ما لليش طموح ديني، لأ: ﴿وَاجْعَلْنَا لِلْمُتَّقِينَ إِمَامًا﴾ [الفرقان: 74]. شوف في آية واحدة جمع ما بين الواجب العملي عليه وبين طموحه الديني، بين المثالية في تصور هدفه وبين واقعية في تطبيق اللي هو عايزه. أنت ممكن تطبيق شريعة تطبيق الشريعة، امتى تطبق الشريعة في بيتك؟ أنا مش معنى أن احنا لا نسعى بصفة جماعية للشريعة، يسعى لذلك بكل وسيلة، كل وسيلة مشروعة يسعى لذلك، لكن أنا أقصده أن ممكن تجد من اللي بيطالب بتطبيق الشريعة في الواقع هو متبشر قاعد في بيته، في خلاف مع في مشاكله مع أولاده.

قال النبي صلى الله عليه وسلم: «كلكم راع وكلكم مسؤول عن رعيته، الرجل راع في بيته». ويقول النبي صلى الله عليه وسلم: «ما من راع يسترعيه الله رعية يموت يوم يموت وهو لها غاش إلا حرم الله عليه الجنة». نعوذ بالله! الراعي أب في البيت، رئيس على دولة، مدير. المرأة في بيتها راعية. الراعي، أي راعي يغش الرعية يحرم الله عز وجل عليه الجنة، حتى يعذب يعني بالذنب ده. يعني مثلاً حب يساعد على فساد الأولاد، يهيئ لهم ظروف الفساد، ما فيش رقابة، ما فيش تربية، ده مفسد، ده غاش شير الرعية، ليس ناصحاً أميناً له. طب فين بقى الشريعة؟

ذلك هم دول بدأوا بأنفسهم، بدأوا بأولادهم: ﴿رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ﴾ [الفرقان: 74]. فبالتالي ابدأ صح عشان تمشي صح: ﴿وَاجْعَلْنَا لِلْمُتَّقِينَ إِمَامًا﴾ [الفرقان: 74]. زي ما ربنا قال: ﴿وَإِذْ غَدَوْتَ مِنْ أَهْلِكَ تُبَوِّئُ الْمُؤْمِنِينَ مَقَاعِدَ لِلْقِتَالِ﴾ [آل عمران: 121].

فمن أهلك تبوأ المؤمنين مقاعد القتال. أنا اطلع الأول من بيت مستقر. من أهلك تبوء المؤمنين مقاعد القتال. لن تكون إماماً للمتقين قبل ما تصلح بيتك. ابدأ بمن تعول، والأقربون أولى بالمعروف، وأنذر عشيرتك الأقربين. إذاً أنت لست معذوراً في السعي لتطبيق الدين، ولو بآية.

يا سيدي انت راجل بتعمل عمل بسيط جداً جداً في حياتك خليك فيه صادق خليك في أمين، رح صل في المواعيد، ابتسم في وجه الناس، انصحهم نصائح بسيطة، مش قادر تكلم مطويات صغيرة وتوزعها؟ لست معذوراً. ممكن تعمل أي عمل تساهم فيه في هذه المعركة.

إذاً هناك معركة حقيقية هي موجودة صراع بين الحق والباطل، معركة على مرحلتين. مش لازم يعني الأولانية ثم التانية الاتنين يجتمعا في شيء واحد. قد يجتمع تبيين ثم تطبيق، معركة التبيين مفروغ منها نصر فيها قطعي للقرآن، لا يأتيه الباطل من بين يديه ومن خلفه. معركة التطبيق قد يشوبها بعض نقص بسبب أفعالنا، بسبب ذنوبنا، قد شبه بعض الناس. لكن المفروض النتيجة اللي تظهر للناس طائفة عايشة، الناس تمشي في الأسواق عباد الرحمن، عليهم سمت الدين، يطبقون الدين فعلاً ليس كلاماً.

عايشين وسط الناس يأكل الطعام ويمشي في الأسواق، قرآن يمشي على الأرض، نوراً تمشون به في الناس، ويجعل لكم نوراً يمشون به. نور من غير ما تمشي به لن يحدث به تغيير. أحبتي في الله أرجو أن إحنا نرجع نقرأ سورة الفرقان تاني، أببحث أسعد مواضع تبارك فيها، نعيد قراءتها. كان في كلام لكن الوقت دهمنا في هذه السورة العظيمة. لو ربنا قدر إن شاء الله ممكن لقاء آخر ممكن نشرح فيه أشياء أخرى.

أسأل الله عز وجل أن يرزقنا فهم كتابه وأن يرزقنا العمل به. اللهم اجعلنا من أهل القرآن أهلك وخاصتك. اللهم اجعلنا من أهل العمل بالقرآن والجهاد بالقرآن. اللهم ارزقنا تلاوته آناء الليل وأطراف النهار على الوجه الذي يرضيك عنا. اللهم استعملنا لنصرة دينك في الأرض. اللهم استعملنا ولا تستبدلنا. اللهم اهدنا واهد بنا واجعلنا سبباً لمن اهتدى. اللهم ربنا آتنا في الدنيا حسنة وفي الآخرة حسنة وقنا عذاب النار. أقول قولي هذا واستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك، وأقم الصلاة.