١- لا تقدموا بين يدي الله و رسوله - تأملات في سورة الحجرات

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وآل بيته، كما صليت على آل إبراهيم، إنك حميد مجيد. أما بعد:

نبدأ إن شاء الله سلسلة جديدة بعنوان: تأملات في سورة الحجرات. طبعا سورة الحجرات سورة الآداب، وكان الناس متصورة أن عاوزين بقى رمضان واستعداد لرمضان وكده، مش كده؟ على كل حال، نحن ممكن نعمل حاجة زي كده برضه على التليجرام أو من الحاجات القديمة يعني ننزلها لكم، لكن الحقيقة موضوع الآداب موضوع مهم أننا نتكلم عنه. ليه؟

أول حاجة يا شباب، الواحد لما يعرض نفسه على أحوال السلف، يجد أنه ما فيش أمل لينا في وسط هؤلاء إلا بحسن الخلق. يعني لو عاوزين نبلغ الدرجات العالية وننافس على تلك الدرجات، فقولوا لي كده: هننافس السلف في إيه؟ هننافس في عبادة؟ هنعرف نعمل ده مع السلف؟ هننافس في علم؟ هننافس في إيه؟ هننافس في جهاد؟ فالحقيقة لما الواحد يقعد يتأمل المعنى ده -معنى أنا دلوقتي بكلم اللي عاوز يبلغ درجة عالية ماشي؟ يعني اللي بينافس على تلك المنازل العالية- هيلاقي أن الأقرب أننا ننافس في حسن الخلق. هو حسن الخلق يبلغ صاحبه تلك المنازل.

إيه رايكم في أحاديث؟ مش كده؟ أن من أحبكم إلي وأقربكم مني منزلا يوم القيامة مين؟ «أحاسنكم أخلاقا». وفي حديث تاني: «وإن الرجل ليبلغ بحسن خلقه منزلة القائم بالليل الظامئ بالهواجر». الله أكبر! يعني بححسن الخلق تبلغ منزلة القائم الصائم! فحسن الخلق آه، ده مجال من مجالات المنافسة. بل لو قعدنا نتامل كده أحوال السلف في عبادتهم، في علمهم، في جهادهم، في دعوتهم إلى الله، هنلاقي أن الحتت دي احنا بعيد عنها قوي. يعني بعيد أننا نعرف ننافس في الحتت دي، فالأقرب أننا ننافس فيه حسن الخلق. خلاص ما عندناش غيره بقى دلوقتي، ومع ذلك ومع عظيم ما جاء فيه من نصوص، معظمنا يغفل عن هذا الباب، باب حسن الخلق.

والسوشيال ميديا جت مش علشان تسوق الأخلاق، هي جت تعمل إيه؟ تفضح هذه الأخلاق السيئة اللي فينا أصلا. فبتظهر على السوشيال ميديا وعلى مواقع التواصل، فيسبوك وغيره، ابتدت تظهر هذه الأخلاق السيئة، لكن هي موجودة، هي موجودة فينا. فاحنا محتاجين جداً نسمع على مسألة حسن الخلق والآداب، محتاجين نسمع حوالين الموضوع ده كي نحسن أخلاقنا.

سورة الحجرات سورة الآداب، والحقيقة ترتيب الحجرات برضه ترتيب مهم. يعني أنت لو تأملت في ترتيب المصحف هتلاقي قبلها سورة إيه؟ الفتح. وقبل الفتح القتال، سورة محمد. وكان الترتيب ده برضه له وجه، فبالقتال يكون الفتح. هنلاقي يحصل الفتح، وبعد الفتح تستقر الدولة ونحتاج إلى مثل هذه الآداب فيما بيننا. يبقى هنلاقي يحصل فتح، هتستقر الامور، نحتاج إلى الآداب بقى. واضح؟ فده أول يعني ملمح في هذا الترتيب.

السورة لها تعلق بما قبلها. الآية التي ختمت بها سورة الفتح: ﴿مُحَمَّدٌ رَسُولُ اللَّهِ وَالَّذِينَ مَعَهُ...﴾ [الفتح: 29] -صلوا على النبي عليه الصلاه والسلام- ﴿وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ تَرَاهُمْ رُكَّعًا سُجَّدًا يَبْتَغُونَ فَضْلًا مِنَ اللَّهِ وَرِضْوَانًا سِيمَاهُمْ فِي وُجُوهِهِمْ مِنْ أَثَرِ السُّجُودِ ذَلِكَ مَثَلُهُمْ فِي التَّوْرَاةِ وَمَثَلُهُمْ فِي الْإِنْجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَى عَلَى سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ﴾ [الفتح: 29]. فربنا سبحانه وتعالى ذكر محمداً صلى الله عليه وسلم والذين معه في آخر آية، فكأنك احتجت -أو احتاج الذين معه، احتاج التابعون- إلى جملة آداب مع هذا المتبوع صلى الله عليه وسلم، فجاءت سورة الحجرات لتضبط هذه القضية، هذا التعامل.

لأن بعض الناس يا شباب لا يعطي للكبير حقه، الكبير ده أي كبير بقى، ومن ديننا أن تعطي الكبير حقه؛ كبير في السن كبر السن، أو كبير في القدر والمقام، لابد من ذلك. وبنشوف برضه حاجات على سواء على أرض الواقع الأجيال الشباب اللي طالع، أو على مواقع التواصل برضه، أشياء حقيقة يعني حاجة عجيبة جداً. يعني واحد شاب يدخل عادي جداً أنه يشتم -سيبكم من الدين دلوقتي، ما تكلمش على واحد متدين، مش الشاب أقصد ما بتكلمش على واحد أنه مثلاً ده راجل متدين- لا، راجل كبير عنك، الفرق بينك وبينه على الأقل 10 سنين، 12 سنة، 20 سنة، عادي جداً تلاقي الشاب داخل يقول لك إيه: بطل هبد! مثلاً. يعني إيه بطل هبد؟ أنت بتكلم واحد كبير! أنت بتكلم واحد ممكن يكون أبنه قدك! وعادي هو الشاب مش شايف أنه بيعمل حاجة، عادي! أو كلام بقى زي ده يعني.

الله! طب ده دين؟! هذه الكلمه تحاسب عليها أمام الله ولا مش... يعني خلاص يعني ما هو ﴿مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ﴾ [ق: 18]. والقلم أحد اللسانين. فالكلمة دي فين؟ يعني الكلمه دي يوم القيامة هتبقى فين؟ ده فضلا عن كلام أكبر من كده، ففي بعض الناس ممكن يبقوا محتاجين يتعلموا الأدب ده، الأدب مع الكبير. والله عز وجل هيجي معانا إن شاء الله، سمى بعض من يفعل فعلا معيناً -هيجي معانا إن شاء الله في سورة الحجرات- ذمهم بلفظ أنهم إيه: ﴿لَا يَعْقِلُونَ﴾ [الحجرات: 4]، لأن ده ماهواش الأدب مع الكبير، سواء كبير في السن أو كبير في المقام، فضلا أن يكون النبي صلى الله عليه وسلم. فجاءت سورة الحجرات علشان تبين لنا بقى أدب التابع مع المتبوع، خلاص، وبعض الآداب الأخرى التي نتعرض لها إن شاء الله. فدي مسألة ثانية.

المسألة الثالثة برضه من التعلق أو يعني من المناسبة بين هذه السورة وتلك، أن في آخر سورة الفتح ختم الله عز وجل الآية بقوله: ﴿وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُمْ مَغْفِرَةً وَأَجْرًا عَظِيمًا﴾ [الفتح: 29]. فكان النفوس تشوفت لتلك المغفرة وذلك الأجر العظيم، فأتى الله عز وجل بشيء قد يحبط الأجر، ذلك الأجر العظيم، أن تحبط أعمالكم وأنتم لا تشعرون. ولذلك يا جماعة تلاقوا المغفرة والأجر العظيم جه بعد كده في الحجرات، يعني في الآية الثالثة في الحجرات، قال الله عز وجل: ﴿أُولَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى لَهُمْ مَغْفِرَةٌ وَأَجْرٌ عَظِيمٌ﴾ [الحجرات: 3]. نفس الآية الألفاظ التي ختمت بها سورة الفتح، فكأن أهل الإيمان المفروض يعني لما تسمع كلمة مغفرة وأجر عظيم، تتشوف نفسك وتشتاق لتلك المغفرة وذلك الأجر العظيم، فنبه الله عز وجل على معنى قد يحبط أجرك.

احنا هنعرف احنا كنا تكلمناها قبل كده على مسألة يا جماعة عشان نفهم القرآن، الله عز وجل قد يضرب مثلاً بشيء ينبه به على نوعه. حد فاكر قلنا الكلام ده فين؟ ها؟ خلي لينا 100 جنيه ولا كله هيتكلم؟ قلنا الكلام ده لو تفتكر في آخر سورة الكهف، الخضر مع إيه؟ مع موسى عليه السلام، لما قلنا إنه الغيب أنواع؛ غيب مكاني أو غيب زماني، فاكرين؟ والغيب الزماني أما ماضي واما مستقبل. الغيب المكاني يعني حاجة تحصل دلوقتي في حتة بعيدة احنا مش عارفين، يعني اللي قاعدين في المسجد هنا مش عارفين الحاجة إيه الحاجة اللي بتحصل برة المسجد فده غيب مكاني، هي بتحصل دلوقتي أهو. وغيب زماني؛ حاجة حصلت في الماضي فاحنا مش عارفينها أو حاجة هحصل في المستقبل فاحنا مش عارفينها.

قلنا لو تأملنا الثلاث قصص بتوع الخضر مع موسى هنلاقي كل واحدة من القصوص دول بتختص بنوع من الآيه من الغيب، الغيب بقى اللي تحار فيه العقول اللي هو احنا مش عارفين ده حصل ليه. فتلاقي أول قصة بتاعة السفينة غيب مكاني، وكان وراءهم ملك، دلوقتي في ملك قدام، لو السفينة دي وصلت وهي صالحة هياخدها، فده غيب إيه؟ مكاني. وبعدين القصة الثانية بتاعة الغلام غيب زماني، إيه؟ مستقبل، مش كده؟ ده لو كبر هيقهر وهيرهق أبويه والقصة دي. والثالثة غيب زماني ماضي، ده أبوهم كان صالح، وهنا حفر ودفن كنز، ولو ما عملتش كده الكنز ده هيروح عليهم.

قلنا ساعتها إيه اللي بقى فاكر وبيحضر الدروس، قلنا هنا تنبيه بكل حادثة على نوع هذه الآيه الحادثة، عشان لما تيجي بعد كده عقلك يحار في نوع من أنواع الغيب، تقوم على طول تلحقه بالآيه بهذا النوع. يعني عقلك حار على حاجة هي من الغيب الزماني الماضي أو الغيب الزماني المستقبل أو الغيب المكاني، تقوم تفتكر الآيه الحادثة اللي شبهها، فاهمين يا جماعة؟

كذلك هنجد هنا هذا المعنى ماشي، هنتكلم على يعني كمان شويه إن شاء الله على خمس نداءات لأهل الإيمان في هذه السورة، هي في الآخر بتنبه على أنواع، وده مهم جداً نفهمه واحنا بنتكلم عن الأدب، بنتكلم عن حسن الخلق، مهم جداً.

طبعا لما نجي نقول نداءات اهل الإيمان: يا أيها الذين آمنوا. عندنا كم نداء في القرآن يا أيها الذين آمنوا؟ حد يعرف؟ أحسنت، مين يا شيخ؟ أنت لازم تقول. طب عندنا 89 نداء يا أيها الذين آمنوا في القرآن، خلاص؟ العجيب يا جماعة، العجيب أن السورة دي، السورة دي 18 آية، يعني فيها من الـ 89 خمس نداءات يا أيها الذين آمنوا! يعني تقريبا نسبة كام؟ سرعة كام؟ ها؟ خمسة تلتها. خمسة من 89 للـ خمس نداءات من 89، يبقى النسبة كام كام؟ احسبوها، 7% مثلاً تقريبا في الحدود دي، في سورة في سورة 18 آية، وده رقم هو معظم ال 89 آية جم في 20 سورة في المصحف، خلاص؟ لكن تخيلوا سورة زي سورة الحجرات فيها 5% -أو 7%- من نداءات أهل الإيمان في سورة في سورة الحجرات، اللي هي 18 آية! يعني عشان تفهموا الوزن ده، سورة آل عمران سبع نداءات يا أيها الذين آمنوا، سورة آل عمران كلها سبع نداءات! أنتم فاهمين الوزن يا جماعة؟ وهكذا، يعني احنا إيه أنا عامل حصر بالصور وعدد النداءات التي جاءت فيها.

فدي أول مسألة، يبقى مسألة الآداب مهمة؛ لأن الخمس نداءات في سورة الحجرات كلها يا أيها الذين آمنوا، ويجي بعديها كلها، خلاص؟ لو جينا بقى نتامل أصلاً في نداءات نداءات الرحمن لأهل الإيمان في القرآن؛ لأن يا جماعه في أثر عن ابن مسعود مهم جداً، رجل جاء لابن مسعود يسأله النصيحة، ركزوا بقى في نصيحة ابن مسعود، قال: إذا سمعت الله يقول: يا أيها الذين آمنوا، فأرعها سمعك؛ فانه خير تؤمر به، أو شر تنهى عنه. يعني كلمة "أيها الذين آمنوا" ما تعديش عليك كده، لا؛ أصل مين اللي بينادي عليك الأول؟ ربنا سبحانه وتعالى، وبعدين نداك بوصف الإيمان، فكونك نوديت بوصف الإيمان، لأن وصف الإيمان يقتضي إيه؟ مزيد رحمة ومزيد عناية من الله.

لأن الله عز وجل يرزق أهل الأرض كلهم؛ كافر ومؤمن وفاجر وفاسق، كله بيرزق، مش كده؟ لكن الله عز وجل له عناية خاصة بأهل الإيمان، فيبقى الأوامر والنواهي اللي هتوجه لأهل الإيمان في "يا أيها الذين آمنوا"، لما تيجي "يا أيها الذين آمنوا"، ربنا سبحانه وتعالى له عناية خاصة بأهل الإيمان. فما تعديش علينا كده، الـ 89 نداء دول بقى تقعدوا كده تتأملوا الـ 89 نداء، لكن من تأمل هذه النداءات يا جماعة، هنلاقي حوالي قرب الـ 40 نداء من الـ 89 كلها بتتكلم عن الأدب، متخيلين؟ طبعا الذين آمنوا كلها جت في سور إيه؟ مدنية كلها، خلاص، حتى من علامات السور المدنية تلاقي فيها يا أيها الذين آمنوا، مش كده؟ فالنداءات دي نداءات يا أيها الذين آمنوا منها قرب النص تقريباً، قرب النص كلها نداءات بتتكلم عن الأدب، كلها.

طيب، معنى تاني عاوزين نتكلم، احنا كعادتنا احنا نحب نثور الكلام حوالين الموضوع قبل ما نخش فيه، من المعاني المهمة جداً جداً، وده معنى خلوا بالكم منه يا شباب، أنه "يا أيها الذين آمنوا" بعديها نداءات بأوامر وجت بعديها نداءات بنواهٍ، يعني لا تفعل كذا، سواء نهي صريح أو بالمعنى، ماشي؟ يعني إيه؟ "يا أيها الذين آمنوا إن تطيعوا"، إن تطيعوا دي يعني لا تطيعوا، مش كده؟ ده بالمعنى. أو "يا أيها الذين آمنوا اجتنبوا" -في السورة بتاعتنا: اجتنبوا كثيراً من الظن- أو ده أمر لكن بمعنى النهي، مش كده؟ يعني لا تظنوا، فهمتوا؟

طيب، فجى تقريباً كم موطن؟ 42 موطن من الـ 89 نهي، سواء نهي صريح أو فيه معنى النهي. هنا بقى عاوزين نقف وقفة مهمة جداً، ركزوا معايا، ركزوا معايا، فكرة يا شباب أننا نفهم أن التركة فعل إيه؟ المهم في كده لا دي مهمة جداً وخطيرة جداً، كتير من الشباب مش بينتبه لده، يعني هو يجي يقول لك إيه: هو بالنسبة له الدين يعني أصلي وأصوم، لكن مش منتبه أنك ما تحسدش، مش منتبه لدي، مش منتبه أنك ما تغتبش، مش منتبه أنك ما تغلش على المسلمين، هو مش منتبه لفكره الترك! الحتة دي فيها حديث عجيب جداً، قال صلى الله عليه وسلم: «يطلع عليكم رجل من أهل الجنة»، قاعد هو والصحابه، حديث أنس في المسند. قال لهم: الراجل هيطلع عليكم دلوقتي من أهل الجنة. دخل واحد على صفة كده، يعني الماء يقطر منه، من صفة كده ذكرها الصحابة مش مهمة يعني في المعنى اللي احنا عاوزينه دلوقتي، وبعدين عدى اليوم ده، تاني يوم جه النبي عليه الصلاة والسلام قعد مع الصحابة -صلوا على النبي- قعد مع الصحابة فقال لهم:

يطل عليكم رجل من أهل الجنة. طلع نفس الراجل، ثالث يوم نفس الموضوع طلع نفس الراجل عبد الله بن عمرو بن العاص، قال: أنا عاوز أعرف ليه؟ عمل حيلة عبد الله بن عمرو علشان يبيت مع الراجل ده ثلاث ليالي؛ عاوز يشوف هو بيعمل إيه، فما لقاهوش بيعمل حاجة زيادة، بل بالعكس وصل لمرحلة عبد الله بن عمرو إنه كان هيبتدى إيه يحتقر عبادة هذا الرجل، ما لقاهوش حتى بيقوم الليل غير إنه إذا تعرى من الليل ذكر الله وكبر، يعني لو أعرى بالليل يذكر ربنا فيكبر وخلاص. فما لقاش في عبادة، يعني فبعد ما خلصوا ثلاث ليالي قال له: بيقول لك إيه بقى، هو كان عمل حيلة كده قال له: يعني أنا وأبويا وتخانقنا، قال له: ما فيش حاجة حصلت أنا بس كنت عاوز أعرف إيه، أنت النبي عليه الصلاة والسلام قال: واحد، اتنين، تلاتة، ثلاث أيام أنت بتعمل إيه؟ قال له: هو ما رايت غير إني لا أحسد أحدا من المسلمين ولا أجد في قلبي غلا لأحد من المسلمين. قال له: أنا ما بعملش حاجات، مش بعمل حاجات. قال له: حاجتين، قال له: غير إني لا أجد في قلبي غلا على أحد من المسلمين، ولا أحسد أحدا من المسلمين على خير آتاه الله إياه. شوفوا بقى رد عبد الله! رد عبد الله بن عمرو الرجل الفقيه، قال له: هذه التي بلغت بك، وهذه التي لا نطيق.

عبد الله بن عمرو رجل فقيه، فاهم أن فكرة الترك مش سهل، الإنسان ممكن يبقى فاكر أن الترك سهل، لا، الترك مش سهل. إنما إحنا دلوقتي مش جايين نتكلم عن سهل وصعب، إحنا جايين نتكلم على فكرة أن إحنا ننتبه للترك، محتاجين ننتبه أن من الآداب أن تترك أشياء، مفهوم؟ ولذلك هتلاقي الصورة اللي معانا هي سورة الآداب، فيها خمس نداءات، أربعة منهم ترك، أربعة منهم ترك من أول السورة كده: ﴿يَا أَيُّهَا الَّذِينَ آمَنُوا﴾ ها، لا تقدموا، ترك. ﴿يَا أَيُّهَا الَّذِينَ آمَنُوا﴾ لا ترفعوا أصواتكم، ترك. ﴿يَا أَيُّهَا الَّذِينَ آمَنُوا﴾ لا يسخر قوم، ترك. ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ﴾ [الحجرات: 12] ترك بالمعنى. ونداء واحد بس اللي فيه أمر: ﴿يَا أَيُّهَا الَّذِينَ آمَنُوا﴾ ها، ﴿إِن جَاءَكُمْ فَاسِقٌ بِنَبَإٍ فَتَبَيَّنُوا﴾ [الحجرات: 6]. أربعة ترك، وواحد أمر! فأربعة ترك، الترك يبقى مهم جداً وأحنا بنتكلم عن مسألة حسن الخلق، أن تفهم معنى الترك.

نخش على السورة بقى علشان هي إيه موضوع يعني الدرس، ناخد آية واحدة النهارده: ﴿يَا أَيُّهَا الَّذِينَ آمَنُوا لا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ﴾ [الحجرات: 1]. طبعا بدأ الله عز وجل سورة بنداء أهل الإيمان. هل ده حصل في سور تانية في القرآن؟ ها، عندنا سورتين كمان: سورة المائدة، مش كده؟ ماذا قال الله عز وجل؟ ﴿يَا أَيُّهَا الَّذِينَ آمَنُوا﴾ أدب، إحنا هنا ﴿يَا أَيُّهَا الَّذِينَ آمَنُوا﴾ السورة بتتبدأ ﴿يَا أَيُّهَا الَّذِينَ آمَنُوا﴾ أدب ﴿لَا تُقَدِّمُوا بَيْنَ يَدَيِ اللَّهِ وَرَسُولِهِ﴾ مش كده؟ وبعدين السورة التانية سورة المائدة تبدأ: ﴿يَا أَيُّهَا الَّذِينَ آمَنُوا أَوْفُوا بِالْعُقُودِ﴾ [المائدة: 1] أدب. شوفوا يا جماعة، فكرة الأدب في الدين عاملة إزاي اللي إحنا مش في دماغنا خالص، يعني تلاقي واحد رجل عنده كثير من العلم، رحمه الله ابن المبارك قال إيه: نحن إلى قليل من الأدب أحوج منا إلى كثير من العلم. محتاجين نبقى مؤدبين يا جماعة. ﴿أحاسنكم أخلاقا﴾، إن من أحبكم إلي وأقربكم مني منزلا يوم القيامة أحاسنكم أخلاقا. محتاجين نبقى عندنا هذا الخلق الحسن، خلق حسن مع كل الناس، مع الله عز وجل بداية، مع النبي صلى الله عليه وسلم مع، هيجي معانا إن شاء الله مع أهل الإيمان، مع أهل الفسق، في أدب في التعامل مع الفساق، محتاجين نعرف الآداب دي.

أنتم عارفين الخمس نداءات دول اللي في السورة متقسمين أنواع، زي ما قلنا: أول أدب مع ربنا: ﴿لا تقدموا بين يدي الله ورسوله﴾، هنا الرسول تبع لله عز وجل لأننا لا نقدم بين يدي الرسول لكونه رسول الله صلى الله عليه وسلم، فهنا لا تقدم بين يدي الله يبقى أدب مع ربنا، يبقى ده يخش فيه كل أدب مع ربنا بقا. وبعدين أدب مع النبي صلى الله عليه وسلم: ﴿لا ترفعه أصواتكم فوق صوت النبي﴾، يبقى ده يخش فيه كل أدب مع النبي عليه الصلاة والسلام. وبعدين أدب مع الخارج عن حظيرة الإيمان، الفساق: ﴿يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا﴾، فيبقى ده يخش فيه كل أدب مع الفساق. وبعدين يتبقى أهل الإيمان؛ أهل الإيمان يا أما موجودين يا أما غائبين، فيجي ندائي، نداء لأهل أدب مع أهل الإيمان وهم حضور، ونداء مع أهل الإيمان وهم مش موجودين معاك، فجا: ﴿يَا أَيُّهَا الَّذِينَ آمَنُوا لا يسخر قوم من قوم﴾ دول هم موجودين، طب لو غابوا؟ ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَب بَّعْضُكُم بَعْضًا﴾ [الحجرات: 12]. فكأن هذه السورة شملت كل أنواع الآداب: أدب مع ربنا، أدب مع النبي صلى الله عليه وسلم، أدب مع الفساق، أدب مع المؤمن الحاضر، أدب مع المؤمن الغائب، مفهومة دي؟ وتبدأ السورة: ﴿يَا أَيُّهَا الَّذِينَ آمَنُوا﴾ ماشي. والسورة التالتة بقى هي سورة إيه؟ الممتحنة، وفيها معنى إيه بقى؟ والمعنى ده ملح في ﴿يَا أَيُّهَا الَّذِينَ آمَنُوا﴾ كتير قوي، يجي تبتدي ﴿يَا أَيُّهَا الَّذِينَ﴾ إيه؟ ها إيه آه ﴿لا تتخذوا عدوي وعدوكم أولياء﴾ [الممتحنة: 1] مش كده؟ ومش وقت بقى دي، بس المهم يعني إيه ندائنا هم مبدوء بيه صورتين في الأدب.

أول آية معانا: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ﴾ [الحجرات: 1]. قبل برده ما نبدا، معلش يعني إيه عشان يبقى خلصنا الطواف حوالين الصورة من بره ومن جوه وكده؛ تغيير الخلق سهل ولا صعب، إيه رايكم؟ صعب جداً ماشي، لدرجة أن بعض الناس قال لك، الناس تقول لك يقول لك إيه: بص هو ده طبع بقى، ما حدش بيغير طبعه. أنتم إيه رايكم؟ الطبع يتغير ولا ما يتغيرش؟ يتغير، وإلا كما قال الغزالي: لم يكن للمواعظ فائدة، ما هو لو الطبع مش هيتغير، نقعد ليه نكلمك عن الكرم ونقعد نكلمك عن الصبر ونقعد، يعني طالما البخيل هيفضل بخيل واللي بيغضب هيفضل بيغضب؟ لا، الطباع بتغيير، لكن محتاجة الإنسان يشتغل عليها. لكن سهل ولا صعب؟ صعب، الموضوع مش سهل، محتاج مجاهدة: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا﴾ [العنكبوت: 69].

لو تاملنا ختم أول خمس آيات في السورة دي، هنلاقي حاجة عجيبة جداً يا شباب جداً، هنلاقي الخمس آيات بالترتيب الختم ختم الآيات لها تعلق بحاجات تخليك تترك الآية أو تحسن من أخلاقك؛ فتلاقي أول آية بتختم بايه؟ ﴿إِنَّ اللَّهَ سَمِيعٌ عَلِيمٌ﴾ [الحجرات: 1]. أول حاجة تخليك تحسن أخلاقك: مراقبة، مراقبة الله عز وجل، أن ربنا مطلع عليك، فتحب أن يراك على تلك الأخلاق الرديئة؟ يعني تحب ربنا سبحانه وتعالى لما يطلع عليك يشوفك وأنت بتشوح لأمك وبتزعق في أبوك وبتتقل أدبِك على حد كبير على الفيسبوك، ولا تحب ده؟ ﴿إِنَّ اللَّهَ سَمِيعٌ عَلِيمٌ﴾.

طبعا دي أعلى مرتبة يعني أهل الإيمان لما لما يستشعروا معنى مراقبة الله عز وجل ده دي مرتبة الإحسان دي أعلى حاجة، أن تعبد الله كأنك تراه فإن لم تكن تراه فاعلم أنه يراك فإنه يراك. مش كل الناس تعرف تعمل دي، أو دي تبقى رازع ليه، لأن دي أعلى مرتبة. يقوم يجي الترغيب والترهيب، ختم الآية التانية: ﴿أَن تحبط أعمالكم وأنتم لا تشعرون﴾ [الحجرات: 2] ترهيب، مش قادر تستحضر معنى المشاهدة ومعنى المراقبة، خاف أنك لو أسأت الأخلاق أن عملك يحبط، يبقى ده في الترهيب.

الآية التالتة قال الله عز وجل: ﴿لهم مغفرة وأجر عظيم﴾ [الحجرات: 3] الترغيب، لأن واحد يجي بالترغيب، وواحد يجي بالترغيب، لما نقوله لما تحسن أخلاقك هيبقى في مغفرة وفي أجر عظيم، يقوم يرغب لمثل هذا. الآية الخامسة أو الآية عفواً الرابعة، لا جت بالشهادة والمراقبة ولا جت بالترغيب والترهيب، نقوم نخوفه من مغبة ده في الدنيا، هيتقال عليك قليل الأدب، فيجي ختم الآية: ﴿أكثرهم لا يعقلون﴾ [الحجرات: 4]، فيبقى ده معنى تاني يخليك تترك الخلق السيء؛ هيتقال عليك مش مؤدب، هيتقال عليك قليل الأدب، هيتقال عليك جاهل، هيتقال عليك غلاط. فلا أنت جاي بالمراقبه والمشاهدة، ولا أنت جا بالترغيب، ولا أنت جاي بالترهيب، فممكن الولد يجي بايه؟ أنه عاوز يبقى إيه حسن الذكر في الدنيا. مش كده؟

بعد ده كله بقى لو ما تبَتْش تبقى إيه خلاص توبْت بقى، فتيجي الآية الخامسة: ﴿والله غفور رحيم﴾ [الحجرات: 5] هتوب بقى هتلاقي ربنا غفور رحيم سبحانه وتعالى. ماشي، فده الختم بتاع الخمس آيات اللي في الأول هي سورة الآداب سورة الأخلاق، فعشان تحسن أخلاقك اهو، إزاي أحسن أخلاقي؟ استحضّر المشاهدة المراقبة، أن ربنا لا يراني على هذا الخلق السيء، هذا الأدب السيء، استحضّر معنى الترهيب عمل يحبط، معنى الترغيب أن من أحبكم إلي وأقربكم مني منزلاً يوم القيامة، ثم مذمة الناس في الدنيا، وبعدين أبشر بقى خلاص هتوب ربنا يتوب عليك سبحانه وتعالى.

يأتي النداء الأول: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ﴾ [الحجرات: 1]. الآية دي لها سبب نزول وقالوا أكتر من سبب نزول، فمن أسباب النزول أن بعض الناس ذبحوا الأضاحي قبل النبي صلى الله عليه وسلم وقبل الصلاة، فنزل: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾ الآية. أو السبب الثاني اللي اتكال أن ناس صامت يوم الشك وبنوا الاحتياط لصوم رمضان ولم يصومه النبي صلى الله عليه وسلم، فنزلت الآية: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾. الآية الثالثة أن الناس قتلوا اتنين ظنهم من المشركين وبان أنهم من المؤمنين، فلما رجعوا للنبي صلى الله عليه وسلم أعلمهم بذلك أن دول من المؤمنين، فنزل قوله: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾. السبب الرابع اللي اتكال أنه العرب كانت تجري على عادة العرب، بعض الصحابة يجري على عادة العرب يقولون في اللي هو المشاوره في الرأي يعني في أو المشاركة في الرأي يعني، لو نزل كذا وكذا لكان أليق، لو نزل فينا كذا لكان أحسن، كده، فنزل قوله تعالى: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾.

تعالوا كده يا جماعة نتامل الثلاث حاجات الأولين دول: جنس هذه الأمور حاجة كويسة ولا لا؟ الذبح ذبح الأضاحي الصوم قتل الكفار، إيه رايكم في الحاجات دي؟ جنس هذه أمور شيء طيب مش كده؟ لكن لما فقد شرط الاتباع، لما كان في افتئات على مقام النبوة، صار شيئاً مذموماً، بل نزل فيه قرآن: ﴿لا تقدموا بين يدي الله ورسوله﴾. وعشان كده إحنا دايمًا نقول إيه؟ العلماء يعني، مش إحنا طب بننقل كلام العلماء أنه أي عمل عشان يقبل لازم إيه؟ يبقى في إخلاص وفي الاتباع، مش كفاية الإخلاص مش كده؟ آه بل مما قالوه أنه مشز نطور في الحته دي، إحنا أدينا درس في حصة الدين درس كامل عن الموضوع ده.

الاتباع يا جماعة مهم جداً، اتباع النبي عليه الصلاة والسلام وفي حديث من ثلاث أحاديث عليها مدار الدين: حديث عائشة: «من عمل عملاً ليس عليه أمرنا فهو رد». طيب، ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾ الناس في الحته دي يا شباب، حته اتباع النبي عليه الصلاة والسلام كالعادة طرفين وسط، طرف ولا في الدماغ يعني إيه النبي عليه الصلاة والسلام يقول اللي يقوله وإحنا إحنا بنعمل اللي بنعمله ولا يعيننا كلام النبي عليه الصلاة والسلام فيه شيء، خلاص. ومنهم بقى اللي يعمل حاجة تانية يعمل إيه؟ يبتدي يرد كلام النبي كمان عليه الصلاة والسلام بعقله كده بدماغه. أبو هريرة رضي الله عنه مرة بيحدث حديثا عن النبي صلى الله عليه وسلم: «توضؤوا مما مسّت النار». فواحد قاعد قال: أفنتوضأ من الحميم؟ طبعا طض مسه النار ده، إحنا مش جايين نتكلم في الحكم هو ده منسوخ خلاص، لكن معنى الكلام إيه؟ أي حاجه النار تمسها تتوضأ منها، مفهوم؟ فراح واحد جه لأبي هريرة بيقول له إيه: أفنتوضأ من الحميم؟ الحميم اللي هو إيه يا جماعة؟ الماية السخنة. قال له: يعني إحنا لو في الشتاء فسخنا ماية عشان نتوضأ بيها، فرجعنا نتوضأ تاني علشان هذا مما مسّت النار؟ فاهمين هنا؟ هذا المثال واضح قوي أنه ضربه عشان يعمل إيه؟ يرد حديث النبي صلى الله عليه وسلم. فغضب أبو هريرة، وراح نازل واخد شوية حصا من الأرض، قال: يا ابن أخي، أشهد عدد هذا الحصى أني سمعت رسول الله صلى الله عليه وسلم يقول: «توضؤوا مما مسّت النار». يا ابن أخي، إذا حدثتك حديثا عن رسول الله صلى الله عليه وسلم فلا تضرب له الأمثال.

هنا يا جماعة لو ضرب مثلاً ليفهم، ما فيش مشكله، ما فيش مشكله. لكن كان أبا هريرة تلمح في ضرب المثل أنه يريد أن يرد حديث رسول الله صلى الله عليه وسلم. كتير من الشباب بيعمل ده، بيسيء أدب مع النبي: ﴿لا تقدموا بين يدي الله ورسوله﴾ صلى الله عليه وسلم. طبعا في ناس بقى مكبرة دماغها خالص، هي ما لهاش دعوة بالدين أصلاً، ما لهاش دعوة بالايه؟ لا قال الله ولا قال الرسول صلى الله عليه وسلم، للاسف بقى لما هذا الداء يدب في

المتدينين، وللأسف، لما يدب في بعض من يتبع من أهل التدين يا جماعة، أن تكونك حد يعني سابق بخطوة ولا خطوتين في الدين، فاعرف بالذات بقا على الواقع الافتراضي، على الفيسبوك ولا غيره، أن بينظر إليك يعني إيه بينظر إليك؟ يعني بينظر إلى التعليق بتاعك، مش المنشور كمان، التعليق شكله إيه؟ الرياكت بتاع واحدة علقت لك في ها ها ها! بينظر لده وبيتفكه.

أمور خلاص، إما أن واحد هخذلك الناس، أو واحد هيبتدي يقع فيك ويبقى أنت ساعدته على كده، مش كده؟ ما هو أنت إحنا المفروض نتجنب مواطن التهم، ما تقفش أنت في مواطن التهم وتقول إيه شفت بيتاب؟ شفت بيسيء الظن؟ طب يا ابني أنت ما أنت واقف في موطن تهمة دلوقتي، ليه واقف في موطن التهمة؟ النبي عليه الصلاة والسلام يقول: «على رسلكما إنها صفية»، عارفين الحديث ولا لا؟ طيب، ليه؟ علشان أنت ليه تعين الشيطان على إخوانك؟ ليه تقف مواطن التهم وتقول لهم عارف بقا عارفين لو حد ساء الظن بيا؟ ما انت ما تقفش مواطن التهم، واضح.

فبينزل إليك، فضلا بقا عن المنشور اللي بتكتبه، اللغة اللي بتكتب بيها شكلها إيه؟ لغة سوقية ومبتذلة، فيها ممكن تبقا خارجة عن الأدب أحياناً، بتدعو لإيه؟ طب الحاجة دي أنت ركزت فيها حلال ولا حرام اللي بتدعو الناس ليها؟ المعاني دي مهمة جداً جداً.

أنا ليه بقول الكلام ده؟ لأن بعض الشباب ممكن يعمل حاجات ويبقى بَيُقَدِّم بين يدي الله ورسوله وهو مش عارف إزاي بتقدم بين يدي الله ورسوله، قبل ما أنشر ما عرفتش الحاجة دي صح ولا حرام ولا حلال أصلاً؟ ما هو لو ما كانش ده تقديم بين يدي الله ورسوله يبقى إيه يا جماعة؟ الصحابة منهم اللي ذبح أضاحي، ومنهم اللي صام، ومنهم اللي قتل مشركين من يظن أنهم مشركين، يعني أنهم مشركون، وفي الآخر نزَل اللوم: لا تقدم بين يدي الله ورسوله.

فأنت نشرك للمنشور الفلاني أو دعوتك للناس لحاجة معينة تتعمل، أو دي إيه حلال حرام اللي أنت الحاجة اللي بتقول للناس يعملوها دي؟ لا ما هي عاطفة كده، يعني إيه الناس بتعمل فأنا بعمل، الناس نشرت فأنا بنشر، لا تقدم بين يدي الله ورسوله، فوزين ننتبه للمعنى ده.

المعنى التاني بقا وهو ضد هذا المعنى، وهو المغالاة في هذا الأمر حتى نخرج عن الحد الممدوح شرعاً، اللي هو إيه بقا؟ بعض الشباب العكس تماماً بقا، تقول له والله أصل الجمهور، جمهور العلماء يعني مش جمهور الأهلي، جمهور العلماء قالوا كذا، يقول لك لا أصل ده مخالف للحديث، يا حلاوة! جمهور العلماء مش عارفين الحديث اللي سعادتك عارفه؟ صح كده بيحصل ولا مش بيحصل؟ أنا بغلط كل ما باجي في الكلام هبتدي بقا سوء الأدب يطلع دلوقتي وشتم وفيه، أصل الكاميرا عشان في مجالس العلم، لا لا سيبها سيبها خلاص، خلي الناس اللي في البيوت كل ما حد يقول الكلام ده يتنرفز بقا وأخرج عن يعني إيه يعني هو من الكلام اللي يجنن.

يقول لك إيه أصل الحنابله ولا الشافعية، مش لازم الحنابله أو الشافعية قالوا كذا ولا دليل لهم، إيه ده؟ يعني عاوز أتخيل اللي بيقول الكلمه دي هو متخيل الحنابله دول؟ هو مش بيفرك فلان الفلاني، الحنابله دول إيه؟ فساق! أصل لو كفر مش هيعملوا كده، يقعد يقول لك حلال وحرام ولا دليل لهم! أنت متخيل إيه الناس دي عشان تقول كلمة شبه دي؟ ولا فضلاً مع الجمهور يقول لك جمهور العلماء، الجمهور على كذا، لكن الدليل الدليل إيه بقا؟ يعني أنت يعني حاجة عجيبة جداً يعني، أنا كل ما أسمع الكلام ده أنا يعني أنا بتخيل كده بقا الحنابله دول إيه؟ عندهم قهوة اسمها قهوة الحنابله زي قهوة السوايسة كده اللي في الكربة، عندهم قهوة اسمها قهوة الحنابله، فيقعدوا فيها بالليل ويقعدوا إيه يضربوا بقا إيه أقوال، إيه رأيكم كذا حلال؟ يوا كاتبين حلال، ما هو كده ما هو ما هو الحنابله لما يقولوا كذا ولا دليل لهم، لا دليل لهم! أو الشافعية أو كذا، يبقى هي ما تجيش غير كده؟ ما تجيش غير كده! دي ناس بتتجمع على القهوة بالليل فاضية، مورهمش حاجة، يلعبوا عشرة طاولة ودورين دمرة، ويضربوا يعملوا كتب وينزلوها يبقى اسمها كتب الفقه الحنبلي، والتانيين كتب الفقه الشافعي، أنت بتقول إيه؟ تقول أصل أنا سمعت الكلام ده بيتقال، ما تتكلمش، ما تتكلمش قبل ما تتكلم افهم واتعلم.

ماشي، أول معنى أنك كأنك عظمت عقلك أنت عن عقل هؤلاء، يعني دي أول مصيبة، مش كده؟ آه يعني أنا أنا لا، أصل أصل هو فيها حديث كذا كذا كذا، وتقول الحديث، وتين ترجع للحديث لاقيه في الصحيحين مثلاً، في صحيح البخاري، يعني الحنابله مش عارفين الحديث في صحيح البخاري؟ أحمد بن حنبل سئل: الرجل يكتب ثلاثين ألف حديث يكفيه؟ سكت! يا جماعة مش واحد يرايك يكتب ثلاثين ألف كفاية؟ سكت.

فقيل له: يكتب ستين ألفاً؟ سكت.

فقيل له: يكتب مئة ألف؟ قال: الآن يعلم شيئاً! يا بتاع الأربعين النووية، الآن يعلم شيئاً.

وفي أثر تاني حاولوا تجيبوه كده عن برضه عن أحمد أنه مئة ألف، بيتكلم بقا عن اللي يفتي أو يتكلم، فقال له مئة ألف؟ فسكت، مئتا ألف؟ قال: أرجو.

طيب، أحمد كان يحفظ كم حديث؟ مليون، ألف ألف حديث! يحفظ، مش عنده سي دي عليها حافظ، هم طبعا كانوا يعتبروا الآية كل رواية حديث، يعني عشان بس يعني هو المهم يعني مش قضيتنا، لكنه يحفظ ذلك.

وكان أحمد يقول عن نفسه، يقول: نحن أخذنا الحديث من ستة أوجه ومن سبعة أوجه ولم نضبط، يعني الحديث الواحد بناخده من ست أوجه وسبع أوجه ولسه ما ضبطنا الحديث.

فأنت بقا جاي تقول إيه: أحمد بن حنبل أصل فاته لعله لم يطلع! يا ابني أنت فاهم أنت بتقول إيه؟ وفاهم أنت بتكلم عن مين؟ طيب، أنا إيه اللي جاب الكلام ده يا جماعة؟ إيه اللي جاب الكلام ده دلوقتي؟ فكرة أن ليس ليس من تعظيم سنة النبي صلى الله عليه وسلم أن تهدر قدر العلماء، لن نفهم سنته صلى الله عليه وسلم إلا عن طريق هؤلاء، ودائماً اتهم عقلك أولاً.

قلنا أنت كده بتعظم عقلك، الحديث واضح لأمثالِك، إنما العلماء مش واضح لهم وضوحه ليك! تخيل ما هو الإمام الشافعي قال إيه؟ قال: ما نظرت عالماً إلا وغلبته، وما نظرت جاهلاً إلا وغلبني.

ما هو الجاهل ده الحديث واضح، واضح ليك! واضح ليك أنت، إنما للأسف العلماء ما كانش واضح لهم الوضوح الشديد اللي واضح لك به، ده ليه؟ لأن الحديث اللي حك تعرفه ده هم يعرفوا قدامه عشر أحاديث مخالفين، أو محتاجين لطريقة من طرق الجمع أو اللفظ في الحديث ده اللي أنت شايفه واضح، هم عارفين له عشر معاني في اللغة، فواقفين مش عارفين يحملوا اللفظ على أنهي معنى، فهو بالنسبة لك واضح، أهو الحديث واضح، فنسي بقا إيه؟ ارمي بقا قول الجمهور ده في، ما الحديث أهو، وبعدين بنقول: يوشك أن تنزل عليكم حجارة من السماء، أقول لكم قال رسول الله وتقولون قال أبو بكر وعمر، حافظين ولا مش حافظين؟ طبعا، صح أهو.

الأثر ده الأثر ده دليل دليل على من يقول ذلك؟ ماله الأثر ده يا شباب؟ أثر ابن عباس ده ابن عبد البر ذكره في جامع بيان العلم وفضله، والخطيب البغدادي ذكره في الفقيه والمتفقه، بس الرواية مختلفة أصلاً، مش كده؟ الرواية أن عروة جاء يسأل ابن عباس أو دار بينهم حوار على مسألة المتعة، وكان ابن عباس ينهى عن المتعة، فقال أبو بكر وعمر يفعلانه، مش مهم المسألة الفقهية دلوقتي خالص، فقال ابن عباس يعني بعض الروايات بقا اللي أنتم حافظينها يوشك أن تنزل عليكم حجارة من السماء، أقول لكم قال رسول الله تقولون قال أبو بكر وعمر، وفي رواية في روايات تانية أنه إيه ذمه بمعاني شبه كده، ماشي.

فقال عروة، شوفوا بقا الزيادة دي: لهما أعلم بسنة رسول الله صلى الله عليه وسلم منك! يعني يعني هو المعنى، هو لما أجي أقول لك أما تيجي تقول لي قال رسول الله صلى الله عليه وسلم فأقول لك الجمهور بيقول كذا، هو ده معناه أن الجمهور مخالف للنبي؟ معناه أن جمهور العلماء الاقرب الأقرب مش بنقول هو ماهوش إجماع عشان نقول نققطع أن ده الصواب، لا غلط، إنما الاقرب أن إحنا نتهم عقلك أنت، مش نتهم عقول جمهور العلماء، الأقرب أن إحنا نتهم فهمك أنت، نتهم اطلاعك أنت، مش نتهم اطلاع كل دول على مدار العصور، هذا الأقرب.

شوفوا بقا الحديث ده أو الأثر ده، ابن أبي مليكه لما حصل الكلام ده بين عروة وبين ابن عباس، وهو يروي بقا ما حدث، قال ابن أبي مليكه: فخص عروة، يعني ابن أبي مليكه يرى أن الحق مش في المسألة الفقهية، الحق في طريق الاستدلال.

ركزوا يا شباب بين الفرق بين دي ودي، ركزوا عشان نحل المشاكل دي ونطلع الكلاكيع دي من جوانا، طريق الاستدلال ده مسألة، والحق في نفس المسألة دي مسألة أخرى، وما أحد يقدر أجزم أن الحق في مسألة اختلف فيها مع مين ما نعرفش إلى يوم الدين، ما نعرفش إلا أن حصل الإجماع.

فاهمين دي ولا مش فاهمين؟ ولا نبسط الكلام؟ يعني العلماء اختلفوا في مسألة على قولين، وخليها يا سيدي جمهور وبعض العلماء خالفوا الجمهور، حد يجي يقدر يحلف بالله أن قول الجمهور هو الحق؟ ما أحد يعرف يعملها دي! طب قول التانيين هو الحق؟ ما أحد يعرف يعملها، ما أحد يعرف يعملها! تقول بس ده في ناس بتعمل كده، ماليش دعوة بالناس، أنا ليه دعوة بالعلم، بالعلم ما أحد يعرف يعملها لأنها ما فيهاش إجماع، الحق مع مين؟ ما نعرفش في نفس المسألة، الله أعلم.

إحنا بنتكلم على إيه دلوقتي؟ طريق الاستدلال، ابن عباس قال ما قاله، فعروة رد عليه قال له: لهما أعلم بسنة رسول الله منك، هو أنا بقول لك أبو بكر وعمر يفعلان يعني برد حديث النبي عليه الصلاة والسلام؟ لا، بقول هم أعلم من السنة بيك يا ابن عباس.

ابن أبي مليكه لما روى هذا قال: فخص عروة، يعني يرى أن عروة لما قال كده لابن عباس هو اللي كسب.

الإمام الذهبي في السير علق على هذا الأثر قال: قلت، يعني الذهبي بيقول: ما قصد عروة معارضة النبي صلى الله عليه وسلم، بل راى أنهما يعني أبو بكر وعمر ما نهيا عن المتعة إلا وقد أطلعا على ناسخ.

ماشي، أخطات، أبو بكر وعمر هم اللي ما عملوش المتعة وابن عباس هو اللي كان يقول بالمتعة.

عفواً، الذهبي الذهبي قال إيه بقا؟ عروة ما يقصد يعارض كلام النبي عليه الصلاة والسلام بقول أبي بكر وعمر أو نهي أبي بكر وعمر، لكن بيقول إيه؟ هو فهم كده أن أبو بكر وعمر طالما نهوا عن ده، لعله أطلعا على نسخ.

فأثر حتى الأثر ده في حجة على من يفعل ذلك أو يقول ذلك.

فيَا شباب اهدوا، يا شباب اعرفوا قدر العلماء.

وأنا هقول لكم قصة حصلت من عشرين سنة معايا يعني معاي، في مجموعتنا، كنا عند الشيخ أسامة حامد حفظه الله، كنا بنقرا في حاشية ابن قاسم على الروض، لسه في المقدمة، وأحنا فينا فورة الشباب وبقى إيه ده غلط وده صح، وباع والسنة والحاجات دي، الكلام اللي هو حلو كله حلو، لكن تطبيقه غلط، تطبيقه غلط.

وابن قاسم رحمه الله في المقدمة كان جاب قول الواحد من الأحناف، الكرخي أظن، بيقول إيه؟ هاقول لكم القول زي ما هو كده ماشي عشان تفهموا بقا إحنا حصل لنا إيه جوانا، يعني إحنا طبعا دمنا فار أول، وهو جايبه عشان ينكر عليه ابن قاسم، أن الإمام الكرخي الحنفي قال: الأصل عندنا قول أصحابنا، فان وافقه الكتاب والسنة فذاك، وإلا وجب تأويله! إيه رايكم؟ طبعا ده يخرج من الملة، صح؟ فطبعا كلنا وابن قاسم جاب القول ده عشان ينكر على غلاة المتعصبة، فمعنا حجتنا بقا، ابن قاسم جايبه وبيقول ده متعصب.

والشيخ أنا هذا أذكره من عشرين سنة هذا الموقف، وهذا وده يا جماعه عشان كده بقول لكم روحوا للناس اللي تتعلموا منها الأدب، وتتعلموا منها السمت، وتتعلموا منها الأخلاق، وتتعلموا منها إزاي نوجه الكلام وإزاي نتأمل في الكلام، روحوا للناس دي علشان هتفرق.

والشيخ فضل ساكت كده وبعدين قال إيه بقا وجه كلام هذا الإمام الحنفي؟ قال لنا إيه؟ قال لنا يا جماعة قول الأحناف اللي هو قول الأصحاب ده بيبقى متاخد من مجموع أدلة، يعني هديكم مثال عشان تفهموا، عشان مش عايزين نطول في المسألة دي.

لما أجي أقول لكم في قاعدة فقهية بتقول مثلاً: الضرر يزال، دي قاعدة فقهية معروفة، الضرر يزال، حد فيكم سمع عن آية بتقول الضرر يزال، أو حديث بيقول الضرر يزال بهذا اللفظ؟ ما فيش، طيب، القاعدة دي من كلام مين؟ من كلام مين؟ العلماء، مش كده؟ يعني لو أنا قلت هذه القاعدة من كلام العلماء أنا صح ولا غلط؟ صح، ده من كلام العلماء.

العلماء لما حطوا القاعدة دي كانوا قاعدين على القهوة إياها، ولا أما جئوا يحطوا قاعدة قالوا دي قاعدة في الدين؟ عارفين إزاي بيحطوا القاعدة في؟

الدين أن بيلاقوا أدلة كتير قوي بتدل على هذه القاعدة، أدلة كتير. الأدلة الكتير دي رسخت جواهم معنى أن هذه القاعدة مططردة، يعني في الشريعة كلها موجودة، أن الضرر يزال. قالوا خلاص نلخص كل الأدلة دي في جملة بسيطة لما تتقال تبقى سهلة والناس تفهم، قالوا خلاص الضرر يزال. فهمتوا؟

طيب، بعد ما حصلت هذه العملية، العملية اللي هي إيه؟ اللي هو علماء تعاقبوا وجابوا أدلة، الأدلة الكتير حشدوا الأدلة جمعوها فلوا أن كلها بتدل على هذه القاعدة، فصاغوا هذه القاعدة بصورة بسيطة وخلوها الضرر يزال. فيجي يقولوا بعد كده إيه؟ أي دليل هيخالف القاعدة دي لابد أن نؤوله.

هم هنا بيقولوا الدليل علشان خالف قول العلماء، ولا لأنه خالف الأصول التي عليها بنى العلماء هذا القول؟ فهمتوا أنا بقول إيه؟ فاحنا أنا بقول لكم الموقف ده أنا فاكره من 20 سنة، ازاي لما نهدى ونوجه كلام العلماء ونفهم هم ليه بيقولوا كده؟ أصل يا جماعة أنتم عارفين القصة هنا بقى ركزوا، مش في أن مثلا ابن قاسم النجدي رحمه الله بينكر على الكرخي الحنفي، فلالا، القول ده لو اعتقده معتقد ممكن يكفر.

يعني احنا لو تخيلنا اللحظة أن هذا الإمام الحنفي يقول أن قول الأحناف مقدم على قول رسول الله صلى الله عليه وسلم، ولو النبي يخالف الأحناف نؤول كلام النبي عليه الصلاة والسلام! ده قول ما يقولوش فاسق، مش عالم! فمحتاجة هدوء ونفهم هو لما قال ده، قالوا ليه؟ واضح يا شباب؟

تاني حاجة، أن هؤلاء أتقى لله عز وجل منا، فهم أقرب للصواب. ومن الآثار الجميلة التي أنا دايما أكررها الإمام أحمد لما سئل: من نسأل بعدك؟ نروح نسأل مين بعد ما تموت؟ قال: سلوا عبد الوهاب الوراق. فقالوا: إنه ضيق العلم، يعني علمه مش قد كده، يعني إنه ضيق العلم. قال: رجل صالح مثله يوفق للحق.

خلي بالكم يا جماعة، أحمد هنا مش في مقام المجاملة، يعني مش في مقام أنه هيجامل في الدين. سألوه عن عبد الوهاب وهو لا يصلح للإفتاء؟ لا خلاص. لكن هم بيقيسوا، يعني كان في بدائل عبد الوهاب الوراق في العصر، ممكن يكون أعلم منه رتبة في العلم، فظن أصحاب أحمد أنه هيحيل على هؤلاء، فأحمد لم يحيل على هؤلاء وأحال على عبد الوهاب الوراق، قال لهم: روحوا اسألوا عبد الوهاب الوراق.

فطبعا هم دلوقتي بيقارنوا بين عبد الوهاب الوراق وغيره من المعاصرين فقالوا إنه ضيق العلم. قال: رجل صالح مثله يوفق لإصابة الحق. طيب، احنا فين صَحْنا ودُنَّا من دين هؤلاء العلماء؟ يبقى أول حاجة، عظمت عقلك واطلاعك وشايف نفسك حاجة، فتقول: أنا وقفت على الحديث وهم لم يقفوا؟

وطبعا يعني ده دليل على خفة العقل أصلاً! أنت عظمت عقلك أنت حر، لكن ده دليل على خفة العقل لما تيجي تقول: أنا لقيت حديث في قول مثلا الحنابله ولا الشافعيه ولا كذا ولا كذا، وفي الآخر تلاقي جايبين الأربعين النووية! أنت يا ابني أنت بتعمل إيه؟ أنت فكرت إزاي فيها دي؟ جبتها إزاي يعني؟ أنا عاوز أعرف لما الحديث اللي جه النووية اللي هو حاطتهم أصلاً النووي اللي هو الشافعية، فالنووي مخالف الحديث اللي هو جايبه لك؟ بيقول لك يا ابني تعلم الأربعين دول عشان تدخل الجنة، روح اتعلم الأربعين حديث دول عشان تدخل الجنة يا ابني.

فأنت في الحديث الـ31 رحت تعمل إيه بقى؟ رحت أقصر طريق للنار! أقصر طريق أنك تفتي في دين الله عز وجل، أقصر طريق للنار! أصل أنت دلوقتي بتقول إيه؟ بتصف بلسانك الكذب، تقول: هذا حلال وهذا حرام! لا أنت أهل ده، ولا عندك الملكة دي، ولا عندك الأدوات دي! هو مين يا جماعة اللي يقول هذا حلال وهذا حرام؟

الأصل، يعني سيبكم بقى من العصور الغابرة دي، هو احنا عندنا حاجة اسمها مجتهد، وحاجة اسمها مقلد؟ واحد مجتهد يعني جمع أدوات الاجتهد، عارفين أدوات الاجتهاد ولا مش عارفينها؟ طيب تعالوا عشان بس احنا مش هنشرح أدوات الاجتهاد، هنقرا كم بيت حلوين كده خفاف لزاز عشان تعرفوا يعني إيه مجتهد، وني إيه واحد يقعد يقول حلال وحرام.

ماشي، ومن ابسط، يعني من أصغر ده المفروض يعني أي طالب علم في البداية يحفظ ده أو ما يشابهه. النظم العمريطي للورقات قال إيه بقى: والشرط في المفتي اجتهاد وهو أن ركزوا بقى يعرف من آي الكتاب والسنن عارف القرآن والسنة، والفقه في فروعه الشوارد مش الفقه يعني طهارة وصلاة، فروع الفقه الشوارد وكل ما له من القواعد كل قواعد الفقه، مع ما به من المذاهب التي تقررت ومن خلاف مثبت وعارف الخلاف اللي في المسائل، والإجماع، والنحو والأصول، مع علم الأدب واللغة التي أتت عن العرب، قدرا به يستنبط المسائل بنفسه، لمن يكون سائلا، مع علمه التفسير في الآيات وفي الحديث، حالة الرواة، وموضع الإجماع والخلاف، فعلم هذا القدر فيه كافي كفاية عليه كده يعني مش عاوزين أكتر من كده عشان نقول عليه مجتهد.

المفروض بقى احنا، طبعا احنا كتب أصول الفقه جل كتب أصول الفقه لم تثبت إلا هاتين المنزلتين؛ يا اما واحد اسمه مجتهد بشقاه بقى مجتهد مطلق أو مجتهد مقيد، أو مقلد. فحضرتك لو مش من دول أنت مقلد، يعني إيه مقلد؟ يعني شوف المجتهد ده قال إيه، وحاضر.

طيب أنت لما تعمل كده، لما أنت تعمل كده، يبقى أنت متبع السنة ولا مش متبع السنة؟ متبع السنة. أنت كده متبع السنة، لأن هم دول اللي فاهمين السنة. مفهوم يا شباب؟ فلا تقدم بين يدي الله ورسوله، يعني لا تقدم الله ورسوله عندنا، عندنا لا تفريط ولا غلو.

أنا ليه قلت الكلام ده؟ افتكرت دلوقتي أن اللي بيعمل كده مقدم بين يدي الله ورسوله. خلي بالكم بقى تقول: لا ده أنا عظمت حديث النبي عليه الص... لا أنت ما عظمتش حديث النبي، أنت عظمت عقلك! أنت ما عظمتش حديث النبي عليه الصلاة والسلام، أنت عظمت فهمك لحديث النبي عليه الصلاة والسلام، أنت عظمت اطلاعك اللي بيه قلت ما فيش حاجة مخالفة، أنت كده مش معظم حديث النبي عليه الصلاة والسلام، لأن أمر الله عز وجل في هذه المسألة مش بعينها (يعني في هذه المسألة أن احنا ناخد حكم) ﴿فَسْأَلُوا أَهْلَ الذِّكْرِ﴾ [النحل: 43].

فأنت لا تعلم، أنت مقلد، فالواجب أن تقلد. وقف هنا.

فاذا فعلت ذلك، كنت مقدما بين يدي الله ورسوله صلى الله عليه وسلم. احنا كده فتحنا سعة، طيب نقف هنا ونكمل المرة الجاية إن شاء الله. سبحانك اللهم وبحمدك، أشهد أن لا إله إلا أنت، نستغفرك ونتوب إليك.