الشيخ أمجد سميربسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم، إنك حميد مجيد. أما بعد.
قبل ما نبدأ، في المرة اللي فاتت حصل موقف، وأجر الله عز وجل على اللسان كلاماً. والموقف زي ما أنا قلت؛ هو المرة اللي فاتت كان في عربية قافلة على، أو عربيتين تلاتة قافلين على عربيات بره، وأنا يعني بعد الدرس قلت: يعني يمكن يبقى فيه حد مريض. هو كان يعني واحدة عندها جلطة؛ ست كبيرة في السن وزوجها نازل يوصلها لمستشفى، ونزل لقي العربية بتاعته مقفولة عليها.
فنحن في صورة الأداب، يعني أنا تعمدت أن أقول الكلام ده يعني بعد الاستفتاح؛ علشان يبقى فيه الدرس ده من الدرس يا جماعة، من أهم ما يميز جيل الصحابة رضوان الله عليهم -وده درس معانا النهارده ان شاء الله هيأتي معنا- يعني سرعة الامتثال. فكرة إن أنا متأكد إن معظم الناس اللي قاعدة معانا في المسجد دلوقتي المعلومات الشرعية اللي عندهم أكتر من المعلومات اللي عند بعض الصحابة رضوان الله عليهم. يعني في من الصحابة؛ صحابي أسلم راح قاتل اتقتل، ده عرف قد إيه من الدين؟ يقيناً في ناس قاعدة معانا دلوقتي عارفة -لو قلنا كمعلومات كحجم معلومات- أه، فينا ناس عارفة أكتر من بعض الصحابة ما كانت عارفة في الدين. طب هم إيه اللي ميزهم؟ ميزهم أمور؛ منها إن هم كانوا يعني كانوا بسرعة بيمتثلوا الأمر.
فخليني أسألكم سؤال بديهي: هل فينا حد -ما احنا طبعا في صورة الأداب- فهل فينا حد ما يعرفش إن إذاء المسلم حرام؟ إذاء المسلم حرام، إنك تكون سبب في إذاء مسلم شيء حرام، وده معروف عند الناس كلها. طيب، اللي هيجي يركن عربية بره وهو شايف إن عربيته -طبعا أنا ما بقولش يعني عشان ما بحدد الكلام لحد بعينه، أنا بقول يعني ننتبه للمعنى ده؛ لأن ممكن واحد بيركن مش منتبه يعني- بس مهم ننتبه يعني. اللي سايق ده هو فاهم كويس جداً إنه لما وقف هنا فهو قفل على عربية أو عربيتين أو كذا. طيب ليه يعني ما فيش أي عذر يسمح بده؟ مش لمجرد إن عاوز أرقد قدام المسجد، طب ما أطلع قدام شوية، أرجع ورا شوية، وأركن في مكان ما تكونش سبب فيه إنك تؤذي غيرك.
فمهم جداً إن احنا يعني نحاول إيه؟ نمتثل تلك الآداب والأخلاق، ما نكونش في إذاء المسلمين. فخلونا يا جماعة يعني ده درس مهم جداً، مش الدرس العربيات، الدرس اللي هو إن احنا نعمل بما نعلم؛ عرفنا حاجة نطبقها. لأن التطبيق هو ده اللي هيرفع الإيمان أول حاجة، تاني حاجة هو اللي هينهض بالأمة، مش العلم. العلم بلا عمل إيه لازمته؟ حجة عليك، خلاص كده؟ مش كده؟ فلابد أن نعمل؛ فاعمل ولو بالعشر. العلم من ظلومتي، فَعَالِمٌ بعلمه لم يَعْلَمَنْ؛ معذب من قبل عباد الوثنْ. وكل من بغير علم يعلمُ؛ أعمالُه مردودةٌ لا تُقْبَلُ. يبقى فعالم بعلمه لم يعملن، معذب من قبل عباد الوثن، أول من تسعر بهم النار ثلاثة، مش كده؟ العالم القارئ والمجاهد والمنفق، مش كده؟ دول أول من تسعر بهم النار ليه؟ عرفوا ما عملوش.
فاحنا عاوزين ناخد هذا الخلق؛ خلق الامتثال. خلاص؟ يبقى أنا وأنا بركن عارف إن أذية المسلم حرام، وعارف إن ممكن احتمال ولو ضعيف إني أكون بؤذي الراجل اللي أنا قافل عليه ده، هتتصرف إزاي لمجرد إن ده بيتعارض مع مصلحة شخصية؟ ما هو للاسف احنا متربيين كده؛ يعني احنا متربيين أنا مليش دعوة خالص بالعربيات اللي المره اللي فاتت -خلي بالكم يعني هو ده يعني هو معنى عام مالوش دعوة، قد يكون صاحب السيارة مش منتبه أصلاً إن ده، قد يكون معنى تاني يعني- لكن أنا بقول لينا كلنا، يعني الكلام مش لشخص.
زي مثلاً عند النساء برض كذا مرة ننبه المسجد ونظافة المسجد وكذا وكذا، فممكن تلاقي واحدة معاها طفل مثلاً، طيب هي حريصة على السماع، دي مصلحة شخصية، ابنها مبهدل المسجد خالص، مدي له مثلاً لقمة ولا بسكوته ولا بتاع في إيده، وده ماشي رايح جاي مبهدل المسجد، طيب ما في دلوقتي هو بياذي الناس اللي قاعدة فوق، وبعدين المسجد هيتوسخ، وبعدين هنلغي الدرس. فليه؟ ليه كل دي؟ طيب ما تعارضت المصلحة الشخصية مع مصلحة عامة، يبقى نفكر في الناس، مش كده؟ أه، مش بقول نلغي المصلحة الشخصية في مثل هذا، لكن نحاول نطلع بحلول اللي بيها برض نكون محافظين على المصلحة العامة؛ مصلحة المسلمين. ليه نؤذي المسلمين؟ فيعني مهم الحاجات دي يا شباب إن احنا ننتبه ليها.
طيب، إحنا لسه مع سورة الحجرات، وهو الدرس الثاني في تدبر هذه السورة المباركة. وقلنا المره اللي فاتت إنها سورة مدنية، وحسب ترتيب المصحف فهي أتت بعد سورة القتال ثم سورة الفتح. وقلنا ليه؟ علشان بالقتال يكون الفتح. فاذا كان الفتح واستقرت الدولة، احتجنا لقواعد واداب وأخلاق تنظم العلاقات بين أفراد الدولة، مش كده؟ فاتت سوره الآداب؛ سورة الحجرات. فاكرين الكلام ده؟ الكلام ده قلناه قبل كده.
وكنا بدانا في أول آية من هذه السورة المباركة: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ ۚ إِنَّ اللَّهَ سَمِيعٌ عَلِيمٌ﴾ [الحجرات: 1]. وقلنا إن هذه الآية لها سبب نزول، واختلفوا على سبب النزول على عدة أقوال، وكان منها قول ما وقفنا معاه كتير، أشرنا إليه ومررنا عليه مروراً سريعاً عشان كان في معنى تاني أكبر عاوزين نقف عليه المره اللي فاتت، وهو معنى من يظن إنه معظم لله عز وجل ولرسوله صلى الله عليه وسلم، وعلى التحقيق هو مش كده؛ هو معظم لعقله ورايه. فاكرين الكلام ده؟ ده معظم الدرس المره اللي فاتت.
لكن من أسباب النزول التي نزلت فيها هذه الآية: أن العرب كانوا على عادتهم في المشاركة في الرأي، فعادي جداً يعودوا مع النبي عليه الصلاه والسلام فيقول: والله لو نزل كذا، وبعضهم يقول: لو نزل في كذا كمان -عاون ينزل فيه هو شخصياً- قرآن. فربما خرج هذا مخرج التقدم بين يدي الله ورسوله، فنزل: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ ۚ إِنَّ اللَّهَ سَمِيعٌ عَلِيمٌ﴾ [الحجرات: 1].
الحقيقة يا شباب، لو نظرنا بقى بين سورة الفتح -ترتيب المصحف- سورة الفتح وياتي بعدها سورة الحجرات، وتبدأ بهذه الآية: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ﴾ [الحجرات: 1]. سورة الفتح ليها قصة، الفتح ده اللي هو فتح ايه؟ اللي هو فتح ايه حد يعرف؟ صلح الحديبية، مش كده؟ أه، قول الجماهير. طبعا بعض العلماء قال فتح مكة، لكن قول الجماهير ده مش فتح مكة، ده صلح الحديبية سماه الله عز وجل فتحاً. خلي بالكم يا جماعه، أسماء السور لابد أن احنا نقف ونتدبر؛ ليه سورة الفتح تسمى الفتح؟ وليه سورة الحجرات تسمى الحجرات؟ -لفظ الحجرات لم ياتي في سورة الحجرات إلا مرة- طب ليه السورة تسمى الحجرات؟ طب ليه الفتح اتسمت الفتح؟ خلونا في الفتح دلوقتي، ولما نيجي للحجرات بقى نشوف الحجرات دي.
هو صلح الحديبية باختصار بس يا شباب، عشان مش عارف. صلح الحديبية كان صلح في ظاهره؛ في ظاهر الصلح صلح في منتهى الظلم للمسلمين. في ظاهر الصلح اللي حصل إيه يا شباب بسرعة؟ النبي عليه الصلاه والسلام في العام السادس من الهجرة رايح يعتمر هو والصحابه، الكفار عرفوا -كفار قريش، ده طبعا ما كانش لسه في فتح مكة- فراحوا قالوا: لا مش هيدخل مكة. وراحوا باعتين له واحد، سهيل بن عمرو، من الكفار يعقد معاه صلحاً، ماشي؟ ده باختصار يعني.
فكانت شوفوا بقى بنود الصلح؛ من بنود الصلح طبعا إن يبقى في بينهم هدنة عشر سنين، وإن أنتوا ترجعوا -خلي بالكم النبي عليه الصلاه والسلام صلوا على النبي والصحابة محرمون، لابسوا الإحرام، وبعدين بقى عيش نفسية الصحابي؛ الصحابي عربي يعني عنده أنفة، وعنده المعاني دي، وبعدين من الصحابة ناس مهاجرين أصلاً، يعني مكة بلدهم، فعيشوا الأجواء دي معلش يعني- حاولوا تعيشوا بنفسية العربي اللي عنده أنفة، اللي عنده عزة، اللي لا يقبل الضيم ولا الظلم. وبعدين معاه عزة الإسلام فوق عزة العروبة بقى؛ كونوا عربي معاه عزة الإسلام كمان. وبعدين منهم مهاجرون خارجين من مكة دي بلدهم. ويجيلهم الأمر إن مافيش حد هيخش وهم محرمين، مافيش حد رايح يعمل عمرة، عاوزين تعملوا عمرة روحوا وتعالوا السنة الجاية اعملوا عمرة. الكفار بعتوا كده، وبعدين أو يعني ده كان من بنود الصلح.
وأيه تاني؟ اللي هيجيلنا منكم -يعني من الصحابة أسلم وارتد عياذاً بالله ورجع لنا- مش هرده لكم، وأنتم اللي يجيلكم مننا مسلم تردوه. يا جماعة، الشروط صعبة إزاي؟ اللي يجيلكم مسلم مننا ترجعوه لنا تاني، واللي يجيلنا منكم وقد كفر -هالوش كفر يعني- مش هنرجع لكم، ماشي؟ فطبعا الشروط مجحفة، والي عاوز -يعني شرط تاني بس ده يعني إيه في يعني عدل إن عاوز يدخل في حلفنا يدخل، عاوز يدخل فيفك يدخل-. فالصحابة اتضايقوا جداً.
وزاد الموقف اللي جاي ده بقى يا جماعة؛ موقف صعب جداً، زاد بقى من حدة هذا الأمر على الصحابة: أن قدر الله أن يحصل موقف عجيب جداً وهم قاعدين بيتكلموا. يقوم ييجي واحد، أبو جندل، جاي كان الكفار ربطوه سلاسل وبتاع، مسلم هو جاي عمال إيه بيتجعل في السلاسل والقيود بتاعته لغاية ما رمى نفسه بين المسلمين. أبو جندل ده يبقى ابن مين؟ ابن سهيل بن عمرو اللي هو بيعقد الصلح مع النبي عليه الصلاه والسلام، راح رامي نفسه بين المسلمين. فقال سهيل: وهذا أول ما أسألك، ده أول واحد ترجعه. موقف صعب.
فالنبي عليه الصلاه والسلام يأمر بأنه يرجع إليه. صحابي اسمه سهل بن حنيف بعد الموقف ده بسنين كان يقول: اتهموا الرأي، فلقد رايتني يوم أبي جندل، ولو أستطيع أن أرد أمر رسول الله لرددت. صلى الله على النبي محمد. ما هو موقف صعب جداً على الأنفس، لأن أبو جندل ما سكتش، أبو جندل لما النبي أمر بده عليه الصلاه والسلام راح راح منادي على المسلمين وقال لهم: تردوني إليهم يفتنونني في ديني؟ فالأمر صعب.
الصلح ده بقى شايفين الشروط الجائرة الظالمة المجحفة اللي تخلي واحد زي عمر -رضي الله عن عمر- يقف ويتكلم: يا رسول الله، ألسنا على الحق؟ أليس عدونا على الباطل؟ فلما نعطي الدنية في ديننا؟ فقال رسول الله صلى الله عليه وسلم: «إني رسول الله ولست أعصيه وهو ناصري». يسكت عمر محروق، يسيب النبي عليه الصلاه والسلام ويرروح لأبي بكر: ألسنا على الحق؟ أليس عدونا على الباطل؟ فلما نعطي الدنية في ديننا؟ فقال: «إنه رسول الله وليس يعصيه وهو ناصره». يا هذا، استمسك بغرسك! يقول عمر: فعملت لذلك أعمالاً -حس إن اللي عمله ده ما يكفروه عمل ولا اثنين، عملت لذلك أعمال- وكان عمر يعتق -فضل سنين كده- يعتق رقاباً عشان هذه المسألة.
وفي صلح الحديبية الموقف اللي ذكرناه لكم كتير قبل كده، أن الصحابة بقى كلهم -مش بقى عمر وقف اعتراض ولا سهل بن حنيفة قال: ولقد رايتني يوم أبي جندل ولو أستطيع أن أرد أمر رسول الله صلى الله عليه وسلم رددت- لا، ده حصل موقف اتفق فيه الصحابة على مخالفة الأمر، وهو موقف إيه؟ الحلق، مش كده؟ النبي عليه الصلاه والسلام خلاص، ما فيش عمرة، قال لهم: اذبحوا الهدي وتحللوا احلقوا. فكم صحابي عمل كده؟ ولا صحابي! ما فيش حد عمل كده تاني. بقول لكم عيشوا بنفسية الصحابة، ماشي؟ الموقف صعب عليهم جداً جداً.
وبعدين هم لما ما عملوش كده قالوا -يعني تاول اهل العلم لهم- إنهم قالوا يعني: شوية ممكن يرجع في الرأي ونروح نحارب. ولما دخل على أم سلمة رضي الله عنها وأشارت عليه بقى إيه؟ اطلع وما تكلمش حد واذبح واحلق، فلما علموا أنها خلاص ما فيش مفر، النبي عليه الصلاه والسلام تحلل، خلاص ما فيش عمرة، راح كله حلق.
فتأتي على حسب بقى ترتيب المصحف سورة الحجرات بعد سورة الفتح: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ ۚ إِنَّ اللَّهَ سَمِيعٌ عَلِيمٌ﴾ [الحجرات: 1]. ختم الآية عجيب، ركزوا يا شباب؛ ختم الآية عجيب: ﴿إِنَّ اللَّهَ سَمِيعٌ عَلِيمٌ﴾ [الحجرات: 1]. طبعا سميع عليم، معظم المفسرين تكلموا على حته سميع عليم يعني لا تقدموا بين يدي الله ورسوله؛ لأنكم إن فعلتم ذلك فالله سميع لأقوال، عليم بأحوال.
لكن تعالوا كده أسالكم سؤال عشان نستشعر هذا الختم مع الآية: إيه أعظم حجة أو أعظم شماعة بيعلق عليها اللي عاوز يخالف الأمر فعله؟ إيه؟ المصلحة، مش كده؟ المصلحة. يعني ايه؟ يعني نقول له: قال الله كذا، قال النبي صلى الله عليه وسلم -خلي بالك إنا مش بنتكلم فساق، الآية ما قالتش: يا أيها الفساق، خلي بالكم! ولا يا أيها الناس، يا أيها الذين آمنوا- فركزوا، إحنا بنكلم ناس مؤمنة، فالمؤمن ده اللي هيروح يخالف أمر الله أو أمر يقدم بين يدي الله أو بين يدي النبي صلى الله عليه وسلم، أكبر حجة بتتقال إيه؟ المصلحة. يعني هي المصلحة في كذا، نبتدي بقى إيه؟ نؤول النصوص، مش كده؟
فيختم الله عز وجل الآية: ﴿لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ﴾ [الحجرات: 1]. يبقى مين اللي يعرف المصلحة فين، إنت ولا السميع العليم؟ السميع العليم، يعني إذا جال في ذهنك هذا الخاطر، فادفعه بختام الآية: إن الله سميع عليم. فطالما ربنا أمر بده، أو أجري على لسان نبيه صلى الله عليه وسلم هذا الحكم، الله سميع عليم، فاتهم رأيك.
وتنزل أول آية في سورة الفتح: ﴿إِنَّا فَتَحْنَا لَكَ فَتْحًا مُّبِينًا﴾ [الفتح: 1] بس كده، عجيب جداً، فتح مبين! مبين ده ولا واحد شايفه، ولا واحد شايف الفتح ده؟ إنا فتحنا لك فتحاً مبيناً، واضح واضح، مش بس فتح، كأن الآية دي نزلت راجعين من الصلح، يعني هما راجعين في الطريق؛ لأن ما كانوش هيستحمل، خلي بالكم يا شباب، ما كانوش هيستحملوا أكتر من كده، يعني كان لازم ينزل القرآن بقى إيه يحل القضية دي. فالله عز وجل مش بس سمى الصلح فتحاً، لا، ده وصف الفتح بالمبين، واضح، واضح لمين بقى؟ مش ليكوا بس، هو فتح، وفعلاً كان فتحاً، خلي بالكم، أقول لكم أبسط، الأرقام ما بتكذبش ماشي، كان صحابي مع النبي عليه الصلاة والسلام في صلح الحديبية ١٤٠٠، وتمر سنتين ويجي فتح مكة، كم واحد يروح يفتح مكة؟ ١٠٠٠٠.
بسبب هذا الصلح الناس دي دخلت في الدين ليه؟ كان الأول، هو طبعاً كان من شروط الصلح الشرط الوحيد العادل الوحيد، الصلح جائر، وربنا سبحانه وتعالى، خلي بالكم، النبي عليه الصلاة والسلام لما شاف، هو طبعاً هو يعني الدرس مش الصلح، لكن هو يا جماعة تدبير ربنا، اطمئن ليه؟ اطمئنوا لتدبير الله عز وجل، يعني واحنا واقفين كده مع الصحابة، كده عيشوا كده النفسية وأبو جندل جاي بقى في الأغلال، وبعدين بينادي علينا، يا ريته يعني سكت ورجع، ينادي علينا: هتسيبوني أروح أفتن في ديني؟ موقف صعب جداً. النبي عليه الصلاة والسلام أول ما شاف سهيل بن عمرو قال إيه، جاي من بعيد؟ قال: سهل أمركم، استبشاراً باسمه سهيل، فقال: سهل أمركم، الدنيا هتعدي، جه سهيل لقينا الموضوع مش كده، ده ابتدى يدقق في تفاصيل، مش كده؟ اكتب يا علي: بسم الله الرحمن الرحيم. قال: والله ما ندري ما الرحمن ولا الرحيم، إحنا لسه ما ابتديناش، ده إحنا، يعني المصريين يقول: ده إحنا لسه بنقول بسم الله الرحمن، يعني إيه؟ ده إحنا ما دخلناش في تفاصيل صلح، ما ابتديناش، قال لك: ما نعرفش إيه الرحمن الرحيم دي، اكتب: باسمك اللهم. فشوفوا النبي عليه الصلاة والسلام قال: سهل أمركم، يقول له: اكتب: باسمك اللهم، هذا ما صالح عليه محمد رسول الله. قال: والله لو نعلمك رسولاً ما قتلناك، إيه رسول الله دي؟ اكتب: هذا ما صالح عليه محمد بن عبد الله. قال: امحها يا علي. فواضح قوي أن ما فيش سهولة، يعني في تعنت من بسم الله الرحمن الرحيم أصلاً، لسه ما دخلناش في تفاصيل صلح.
وتفاصيل الصلح زي ما أنتم شفتوا، إلّا بند واحد، يمر بند واحد: اللي عاوز يدخل في حلفنا في الصلح ده يجي، اللي عاوز يدخل في حلفك يروح. بند واحد، وكان فيه الفتح: ﴿إِنَّا فَتَحْنَا لَكَ فَتْحًا مُّبِينًا﴾ [الفتح: 1]، في سنتين من ١٤٠٠ لـ ١٠٠٠٠ يروحوا يفتحوا مكة. طيب، هنا بقى الصحابة، إحنا دلوقتي كعادتنا بقى بنأيه بنعيش النفسية اللي واقفين في صلح الحديبية، يا جماعة، عمر أتكلم رضي الله عن عمر، أن الباقي يعني مقتنع، ما هو عمر أتكلم، خلي بالكم، عمر يعني اللي في مقام عمر يتكلم، فأكيد ده كان في نفوس ناس كتير من اللي واقفة، لكن عمر اللي عنده الجرأة والقوة أنه يقف يتكلم فده كان موجود وسهل اتكلم بعد سنين بيقول ده بيقول ايه بقى: اتهموا الرأي، اتهموا عقولكم، فلقد رايتني يوم أبي جندل، ولو أستطيع أن أرد أمر رسول الله صلى الله عليه وسلم لرددته، لو أقدر أقول له: لا، مش هنرجع، كنت قمت وقلت كده، فاتهموا الرأي، اتهموا العقل.
فهذا الموقف من الصحابة رضوان الله عليهم، وطبعاً طبعاً يا جماعة قبل ما نكمل كعادتنا برضه بنقول دايماً كده: هذه المواقف ما تقدح في نفوسنا أن إيه ننتقص من قدر الصحابة رضوان الله عليهم، الصحابة تربوا على يد النبي صلى الله عليه وسلم شيئاً فشيئاً، مش كده؟ بل إحنا اتكلمنا قبل كده عن أنبياء صدر منهم أمور في البدايات وبعدين بيتربوا على بتربية الله عز وجل لهم سبحانه وتعالى، فده وارد عادي جداً، الأولياء يتربوا واحدة واحدة، ونصلح أحوالهم واحدة واحدة، وهكذا. ما ينقضش في أذهاننا أنه هذا تنقص من الصحابة رضوان، لا أبدا، أنت ما تعرفش أنت لو واقف كنت ممكن ترتد أصلاً في موقف زي ده.
فتأتي بقى سورة الحجرات لتضبط هذا -أنا بقول على ترتيب المصحف؛ لأن الحجرات في ترتيب النزول قبل الفتح، لكن ترتيب المصحف، ما هو الترتيب، ترتيب المصحف، جماعة، ترتيب توقيفي، عارفين إيه توقيفي؟ توقيفي يعني ده مش اجتهاد، لا، هي دي لما كان جبريل يأتي ليدارس النبي صلى الله عليه وسلم القرآن كان بيدارسه على هذا الآية على، فالترتيب توقيفي فله حكم وأسرار. فزي ما مهم نتامل الترتيب حسب حسب النزول، مهم جداً نتامل برضه، تقدموا شوية عشان بس الناس تلاقي مكان وبالتالي في أماكن بتبقى على الأطراف يعني، فبس عشان في ناس واقفه بره فمهم برضه أن إحنا نتامل ترتيب المصحف؛ لأنه مهم.
فتجي بقى سورة الفتح، سورة الفتح اللي هي بتدور حول فلك صلح الحديبية بالشكل اللي احنا قلناه ده، ياتي بعدها سورة الحجرات وتبدا بهذا الأمر: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ﴾ [الحجرات: 1]. ولو عقلك وداك أنك بتقدم أو بتتقدم بين يدي الله ورسوله صلى الله عليه وسلم علشان المصلحة، وعلشان كذا، وعلشان ده أحسن، وعلشان ما مصلحة الدعوة، مين هنا بيقول كده؟ ونقول له إيه: ﴿إِنَّ اللَّهَ سَمِيعٌ عَلِيمٌ﴾ [الحجرات: 1].
طبعاً إحنا مش بنقفل باب الاجتهاد خالص، لكن من الذي يجتهد؟ دي بقى قلناها المره اللي فاتت، عشان كده الدرس مكمل بعضه، يعني مش لينا إحنا، مش إحنا نجي نقول إيه: والله أنا شايف المصلحة كذا فأنَا هعمل كذا، أي مين حضرتك إنت؟ إنت تأثم، إن أجتهدت تأثم، حرام عليك؛ لأنك مش مجتهد، إنت واجبك أنك تقلّد. طب والله، واحد مجتهد وعنده أدوات الاجتهاد، وجال هنجمع كل النصوص ونشوف روح الشريعة العامة بتقول إيه، ونجمع بين النصوص ونجتهد، والله إن أصاب له أجران، إن أخطأ هياثم؟ لا، له اجر اجر الاجتهاد. ماشي، فده دي مسألة تانية.
أنما إحنا دلوقتي بنتكلم اللي في المسجد، إلا لو في حد مجتهد بقى يعني يرفع، حد مجتهد هنا ولا في المدرسة يعني ماشي، اللي مجتهد يعني أظن مش هيبقى معانا هنا، فانما كلنا: لا تقدموا بين يدي الله ورسوله. طب ابتدى جواك، أصل ممكن يحصل، أصل كده أحسن، أصل: ﴿إِنَّ اللَّهَ سَمِيعٌ عَلِيمٌ﴾ [الحجرات: 1]. وتبدأ الآية: ﴿يَا أَيُّهَا الَّذِينَ آمَنُوا﴾ [الحجرات: 1]، وقلنا هتتكرر في القرآن في السورة خمس مرات. طب ليه؟ ليه بقى يا أيها الذين آمَنُوا؟ طبعاً إحنا قلنا المرة اللي فاتت أثر ابن مسعود، مش كده؟ إذا سمعت الله يقول: يا أيها الذين آمنوا، فارعها سمعك، فإنه خير تؤمر به أو شر تنهى عنه.
لكن يا جماعة في فوائد في في البداية: يا أيها الذين آمنوا، دي أولاً كأنه استدعاء للصفة التي تقتضي منك امتثال الأمر واجتناب النهي، فاهمين دي؟ يعني لما تيجي تقول لابنك إيه: إنت مؤدب ومحترم، يلا روح اعمل كذا، إنت كده بتعمل إيه؟ بتثبته، مش كده؟ بتقول له الصفة اللي فيه الكويسة اللي تقتدي أنه يمتثل الأمر ويجتنب النهي، زي كده إيه في القرآن: ﴿يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا﴾ [مريم: 28]. هو هنا ما قالوش ليه يا مريم في الموقف ده؟ هما مستغربين، تيجي بولد فبيقولوا لها بقى الحاجات اللي فيها، ينادوها مش باسمها، ينادوها بالحاجات اللي يعني ما يصحش: ده إنت أخت هارون، فاهمين ده؟
فدي أول حاجة، يبقى يا من وصفهم الإيمان، من مقتضى الإيمان ألا تقدموا بين يدي الله ورسوله، ده من مقتضى الإيمان. تاني فايدة هنا وهي فايدة إدارية انتبه لها القشيري في إشاراته في التفسير، فاكرين التكنيك اللي سميناه الساندوتش؟ فاكرينه؟ آه، ده تكنيك معروف يعني في أنك وأنت بتدي فيدباك لأي واحد تعملُه الساندوتش، مش ساندوتش، يعني ممكن يبقى إيه، توست حته واحدة وعليها لو مش فاكرين ساندوتش أن إحنا إيه أي فيدباك، أي حاجة عاوز تقولها لواحد مرقوس ليك أو حاجة، يعني منطقة تحسين يعني فبتقوله حاجة حلوة الأول فيه، وبعدين تقوله الحاجة دي اللي هي محتاج تحسن فيها، وبعدين تختم بحاجة حلوة، يبقى عملتله ساندوتش كده، واضح؟
يعني كأنك الأول بيه بتمهيد، عشان لو في أي تحفز من ناحيتك لا يفك، وبعدين ما تمشوش يبقى دماغه مشوشة في آخر حاجة اسمعها حاجة وحشة، لا، اقفلّه كمان بحاجة كويسة. من الحاجات اللي بيعملها تكنيك معروف يعني عند المفروض أي حد في الإدارة يبقى عارفه، مش لازم التكنيك ده بس، بس من من التكنيكات بقى اللي بتستخدم أنك تبدأ بحاجة كويسة وبعدين تقول الحاجة الإيه منطقة التحسين. خلاص، هو طبعاً الإدارة الحديثة بتقول: ما تقولش حاجة وحشه، يعني اللفظ ده ما يتقالش ماشي. حتى إيه في السمات أن الدبليو دي بتاع إيه آه، الويكز الضعفة وكده لغوها في الإدارة الحديثة، ما فيش حاجة اسمها كده، بيسموها إيه بقى؟ أرت، يعني منطقة تحسين، عشان حتى اللفظ وأنت بتقوله ما يحملش معاني سلبية. طب إحنا ولا بنحس، عادي يعني، هما حتى الألفاظ يعني بيدققوا فيها جداً، يعني ماشي.
المهم القشيري بقى في إشاراته في التفسير سبحان الله قال الفايدة دي، قال إنه تقديم يا أيها الذين آمنوا هو بيقدم معنى كويس قبل ما يقول اللي هي بقى منطقة التحسين دي، منطقة التحسين أن ما هو يقول: لا تقدموا بين يدي الله ورسوله، لحاجة حصلت منهم، إحنا مش بنفترض أن ممكن يحصل فبنقول لكم أوعوا تعملوا، لا، ده في مواقف حصلت، وإحنا جايين نقول لكم اللي اتعمل غلط، فبداية نقول لكم: يا أيها الذين آمنوا، نقوم إيه الدنيا تهدى، وبعدين بقى تعالوا شوفوا الغلط ده عشان ما تعملوش تاني: لا تقدموا بين يدي الله ورسوله. خلاص، خصوصاً أن في مواقف تانية حصلت وقالت في أسباب النزول قلناها المرة اللي فاتت، اللي ذبحوا قبل النبي عليه الصلاة والسلام، اللي قتلوا الناس، اللي صاموا يوم الشك، مواقف كتير حصلت من الصحابة فنزل القرآن يضبط هذه المسألة: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ﴾ [الحجرات: 1].
يبقى يا جماعة اتهم رأيك واتهم عقلك، وهأقول لكم موقف عجيب جداً، مش عارف قلته لكم هنا قبل كده ولا لا، يعني، لكن هو موقف الحقيقه هو في السيرة، وموقف في غاية العجب، لما النبي عليه الصلاة والسلام مات كان قد أنفذ جيشاً وبعدين مات، فلما مات حصل حاجه شوية غريبة، القبائل القريبة ابتدت ترتد، فأي خبير عسكري يقول لك: رجع الجيش، مش وقت، أحمي المدينة، إنت إنت باعث جيش يحارب بعيد وبعدين القبائل القريبة منك ارتدت، فطيب اللي ارتدوا دول إنت لا تأمن غائلتهم، مش كده؟ يعني ممكن فجأة يهاجموا إيه بقى مقر الخلافة دلوقتي، اللي هي المدينة. فأي خبير عسكري في الموقف ده يقول لك: لا، مش وقت إيه فتوحات وبُعاد، ورجع الجيش، أحمي مقر الخلافة، وده كان رأي الصحابة فعلاً، رجعهم، ما هو مين دلوقتي الخليفة؟ أبو بكر رضي الله عنه. رجع بقى الجيش ده، فأبو بكر رضي الله عنه وقف وقال كلمة عجيبة جداً، خلي بالك، هما عم هما بيقولوا له رجع ليه؟ علشان بالعقول كده، بالعقل أنه لو ده لو اللي أنا حكيته ده.
أبو بكر رضي الله عنه ما ردّش بعقل خالص، قال: والله لو دخلت الكلاب إلى المدينة تجر أمهات المؤمنين من أرجلُهن في سكك المدينة، ما رددت جيشاً أنفذه رسول الله. انتهت، هذا أمر رسول الله صلى الله عليه وسلم، أنا مش، يعني النبي قال: روح يا جيش، أنا أقول للجيش: ارجع، مش هعرف أعملها. خلي بالك، هنا أبو بكر ما بيردش بعقل ولا بيجادل الحجة بحجة، حجة عقلية، يعني هنا أبو بكر كأنه مسدد وموفق لاتباع النص. النبي عليه الصلاة والسلام ده نص في المسالة، هنا نص، يعني إيه نص؟ نص يعني قطعية الدلالة، يعني ما فيهوش كلام، يعني النبي قال: روح يا جيش، انتهت، أنا ماقولش ماقبلش نص النبي عليه الصلاة والسلام، النص قطعية الدلالة ده، وطبعا قطعية الثبوت، قطعي من بوق النبي للجيش، لا في بقى واسطة بينه، ما فيش، خلاص، مش كده، ما مش هرد النص.
البركة تطلع فين بقى؟ الجيش وهو ماشي، القبائل اللي ارتدت استغربت، ما هو ما هو أي خبير عسكري يقول: رجع الجيش، مش كده؟ فقالوا: لو لم يكن بهم قوة بالمدينه لما أنفذوا هذا الجيش، يعني كل الجيش ده طالع وهم عارفين إحنا بنرتب، أمّال شايلين لنا إيه هناك؟ هما طبعا مش شايلين، يعني هما إيه ما فيش حاجة في المدينة، هو طلعوا الجيش، فالقبائل مش عارفة، بيقولوا: لا، ده أكيد المدينة بقى ده.
فده موقف عجيب جدا لهذه المسألة، لا تقدم بين يدي الله ورسوله. تاني يا جماعة، عشان ما يبقاش الدرس عاطفي زيادة عن لزوم، في ضغط على مسائل شرعية، المجتهد له أن ينظر في الأدلة. مش له، ده يجب عليه! مش له يعني ممكن ما ينظر، هو يجب عليه أن ينظر في الأدلة وأن يجمع بين الأدلة وأن يحشد الأدلة في المسألة الواحدة، ويجتهد حتى يخرج برأي. ماشي؟ ما يخرج برأيه، ده مش معناه أنه قدم بين يدي الله ورسوله، لا مش معناها كده، بالعكس، هو لأنه معظم للأدلة فنظر في مجموع الأدلة، ممكن أنت بقى لقصور نظرك تفتكر أن المجتهد الفلاني ده قدم بين يدي الله ورسوله، ليه؟ تقول: أصل في حديث في المسألة مش بيقولوا كده، خالف الحديث. ما هو خالف الحديث عشان وافق عشرات الأحاديث التانية اللي أنت ما تعرفهاش وعمرك ما سمعت عنها، بس هي القضية كده.
واضح يا جماعة؟ فنزل قوله تعالى: ﴿يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ * يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ﴾ [الحجرات: 1-2]. هنا الآية الأولى أتت بوصف الرسول: لا تقدموا بين يدي الله ورسوله. والآية الثانية أتت بوصف النبي: يا أيها الذين لا ترفعوا أصواتكم فوق صوت النبي. ليه الأولى بذكر الرسول والثانية بذكر النبي؟ وده مهم، هنخرج منه بفائدة إن شاء الله. الآية الأولى لو تفتكروا قلنا الأصل فيها من الأدب مع مين؟ مع الله سبحانه وتعالى، مش كده؟ والرسول تبعاً صلى الله عليه وسلم، فالرسول لا يقدم بين يديه لأنه رسول الله صلى الله عليه وسلم فهو لا ينطق عن الهوى، فالحكم اللي بيقوله ما ينفعش تقدم بين يديه، خلاص، لأن ده حكم الله، فناسب وصف الرسالة هنا لأنه رسول من الله سبحانه وتعالى.
طيب، الآية الثانية الأصل فيها النبي عليه الصلاة والسلام. طبعا، احنا الأول بس بعد المقدمة اللي قلناها في الأول، فاللي راكن عربية عنده ولو وهم بنسبة 1% أنه قافل على العربية يتحرك ويروح يشيلها دلوقتي، ويحتسب هذه الخطوات أنه يعني لله عز وجل ويثاب عليها إن شاء الله ماشي، حتى لو هيركن بعيد، حتى لو كده، بس ما يؤذيش الناس.
النبي يا جماعه قد يكون مشتقاً من النبوة. النبي، اختلفوا، النبي مشتق من إيه؟ لفظ النبي مشتق من إيه؟ فقيل: من النبأ، لأنه ينبأ من الله ولذلك في بعض القراءات: النبيء بالهمز، مش كده؟ وقد يكون النبي مشتق من النبوة، النبوة اللي هو إيه؟ المكان المرتفع. وقالوا: اشتق من النبوة لعلو منزلته، لعلو منزلة أي نبي يعني، فلفظ النبي مشتق من النبوة لعلو منزلته ورفع هذه المنزلة، فناسب في الآية الثانية -اللي هي بقى الأصل فيها الأدب مع النبي عليه الصلاة والسلام- أن تأتي بوصف النبوة، يعني أنتم وأنتم تتأدبون معه تفعلون ذلك علو منزلته صلى الله عليه وسلم. فقيل: ﴿يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ﴾ [الحجرات: 2].
لها سبب نزول، هذه الآية في صحيح البخاري حديث ابن أبي مليكة قال: كاد الخيران أن يهلكا: أبو بكر وعمر. يا خبر أبيض! إحنا بنتكلم عن مين بقى؟ ما فيش بعد كده ها. اللي حصل إيه؟ ركب من بني تميم جئوا للنبي عليه الصلاة والسلام، أبو بكر رضي الله عنه قاعد، عمر رضي الله عنه قاعد، أبو بكر قال: أمر عليهم فلاناً، فقال عمر: بل فلان. فقال، يعني واحد قال: الأقرع بن حابس، والتاني قال: القعقع. ماشي؟ واختلفت الروايات مين اللي قال ده ومين اللي قال ده، فقال أبو بكر: ما أردت إلا خلافي. فقال عمر: ما أردت خلافك. وارتفعت أصواتهما، فنزل قوله تعالى: ﴿يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ﴾ [الحجرات: 2].
فلما نزلت هذه الآية، إحنا قلنا في درس هيجي معانا المره دي وإحنا في الأول، الامتثال بقى، ده الفرق يا جماعة أو ده فرق من الفروق اللي بينا وبين هذا الجيل الذهبي، أنهم كانوا يسمعوا ويعملوا، إحنا بنسمع كتير وما بنعملش، لا نعمل إلا بالقليل، ده فرق أساسي. يعني أنت عارف لو أخدت مسألة فروحت عملت بيها خلاص ترتقي في درجات الإيمان ويوفقك الله عز وجل لغيرها من المسائل، لغيرها من أبواب العمل. انما فكرة انك تجي تحضر الدرس وتسمع كلام كتير ماشي في دماغك انك تعمل، الأمر خطير.
أبو هريرة لما يجي له واحد يساله عن، طبعا أبو هريرة من المكثرين، يعني من المكثرين اللي رووا أحاديث كثيرة وهذا لفظ يعني معروف عند علماء الحديث، فهو من المكثرين لأنه كان قاعد للحديث، فكان واحد يجي يساله عن أحاديث النبي عليه الصلاة والسلام وكان يكثر عليه عاوز ياخد أحاديث كتير، فمر أبو هريرة قال: يا ابن أخي، أتعمل بكل ما تسمع؟ أنت كل ما تاخد من بتروح تعمل بيه؟ قال: لا. قال: فلم تكثر من حجة الله عليك؟ الناس بقى الجهابذة يقولوا لي: طب خلاص، ما نسمعش. أقول لك: مش ده المعنى، المعنى انك تسمع وتعمل، ماشي أه، تسمع وتعمل، مش ما تسمعش لا، هتيجي يوم القيامة تقول لربنا إيه بقى؟ أنا ما سمعتش! لا طبعا، العلم كان موجود، العلم كان موجود، أنت ما سمعتش دي مش مش حجة، مش كده؟
فيابيا أيها الذين آمنوا لا ترفعوا أصواتكم فوق صوت النبي، كاد الخيران أن يجهل أن يهلكا. نزلت الآية، شوف بقى الامتثال! شوف الامتثال يا شباب! نزلت الآية، بعدها عمر رضي الله عنه كان إذا كلم النبي صلى الله عليه وسلم لا يسمعه حتى يستفهم، يعني بعد من بعد الآية دي ما نزلت عمر رضي الله عنه ما كلمش النبي مرة عليه الصلاة والسلام إلا ويخفض صوته لدرجة النبي يقول له: أنت بتقول إيه مش سامعك؟ أبو بكر كان بعد هذه الآية لا يخاطب النبي صلى الله عليه وسلم إلا كأخي السرار، يعني من يسر صاحبه، يوشوش ليه؟ خلاص، لا ترفعوا أصواتكم، لن نرفع الأصوات، انتهت.
ومن أسباب النزول أو مما قيل في هذه الآية أنها لما نزلت، ثابت بن قيس، ثابت بن قيس كان صوته فيه حدة، يعني صوته عالي وكان خطيب النبي صلى الله عليه وسلم، مين شاعر النبي وخطيب النبي؟ ثابت بن قيس. فكان خطيب النبي صلى الله عليه وسلم وكان صوته فيه علو، وقيل إن هو كان أصلص أصلاً عشان كده صوته عالي ماشي؟ فأول ما نزلت الآية جلس في بيته واعتزل الناس، وفي رواية إنه جاب واحدة من أقاربه وقال لها إيه: دقي مسمار في الضبة بتاعة الباب ولما يطلع اتنيه من الناحية التانية. يعني إيه؟ مش عاوز حد خلاص، يعني اعتزل في بيت الفرس في الاسطبل خلاص وقال: مش هخرج من هنا خالص إلا إن يسامح عني النبي صلى الله عليه وسلم، لأن هو شايف صوته عالي وكده.
افتقدوا النبي عليه الصلاة والسلام وعد مرة قال: افتقدت ثابت بن قيس؟ شوف يا جماعة الافتقاد، فاكرين لما اتكلمنا عن في المسجد برضه صح؟ اتكلمنا قبل كده في المسجد موضوع إيه افتقاد إخوانكم؟ يعني فلان ما بيجيش، مش خلاص لا، ليه ما بيجيش؟ كنا إذا فقدنا الأخ -كلام مين ده؟ ابن مسعود- كنا إذا فقدنا الأخ أتيناه، فإن كان مريضا كانت عيادة، وإن كان مشغولا كانت عونا، وإن كان غير ذلك كانت زيارة. مش اللي يجي يجي، واللي ما يجيش ما يجيش، واللي ينتكس ينتكس، واللي مريض مريض، واللي فقير فقير! ما ينفعش كده يا شباب، ما ينفعش. يعني لابد أننا نوجد تلك المحاضن، نفتقد بعض ماشي. الإمام البخاري مرة افتقدوه لقوه إيه؟ هو لسه طالب وافتقد، في البخاري ما بيجيش محمد بن إسماعيل! راحوا يشوفوه لقوا إيه ماله؟ ما عندوش هدوم! مش كده، قاعد عريان في البيت، ما عندوش، عارفين ما عندوش هدوم يا جماعة مش يعني الهدوم راحت عليها الموضة وبيفتح الدولاب فعنده بنطلونين تلاته فهو زهقان كده أنا ما عنديش هدوم، طب لما لقوه ما عندوش ثوب يخرج بيه عملوا ايه؟ واحد راح جاب له ثوب، جمعوا له عشان يجيبوا له ثوب. شوف يا جماعة حال طلاب العلم كان عامل ازاي؟ جمعوا له، يعني إيه؟ يعني هما ما فيش واحد فيهم عنده ثوبين يروح يجيبله الثوب التاني ويجي مثلا لا، جمعوا له كلهم عشان يجيبوا له ثوب يلبسه يخرج يحضر مجلس الحديث، فمحتاجين هذا الخلق.
المهم، افتقد ثابت بن قيس، راح واحد من جيرانه راح ساله قال له: أنا هلكت. وقال له الآية دي: ﴿يَا أَيُّهَا الَّذِينَ آمَنُوا لَا تَقَدِّمُوا... لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ﴾ [الحجرات: 2]. فبشره النبي صلى الله عليه وسلم قال: بل، قال: أنا في النار. قال: بل أنت في الجنة! فكان بعد كده الصحابه يقولون إيه؟ ينظرون إليه وكأنهم ينظرون إلى رجل من أهل الجنة، خلاص ثابت رايح ثابت جاي، أده واحد من الجنة عايش معانا. قال: بل تعيش حميداً، بل تعيش سعيداً وتموت شهيداً. وبالفعل قتل يوم اليمامة ماشي، وهو بقاتل مسيلمة الكذاب، وكان ليه موقف بطولي كمان في اليمامة، يعني لما انكشف المسلمون قال: ما كنا في عهد في عهد الرسول صلى الله عليه وسلم نقاتل هكذا، إحنا ما كناش بنقاتل زيكم كده. وراح في الحفره، نزل بنصه في الحفره وردم على نفسه عشان إيه ما يجري، ليثبت في وجه العدو وقاتل وقاتل حتى قتل.
وليه كرامة ثابت، روي أنه لما قتل كان عليه درع غالية، فأتى لأحدهم في المنام بعدما قتل وقال له: الدرع بتاعتي فلان خدها، والخيمة بتاعته في آخر الجيش، هتلاقي فرس في الطول بتاعه في الحبل بتاعه رايح جاي كده وهو حاطط الدرع وعليه برمة، برمة أكل، وفوق البرمة مش عارف، وصف له وصف دقيق جداً لمكان الدرع، وقال له: إياك أن تقول هذا منام فتكسل، أو عا تقول ده إيه ده منام وما تروحش تعمل ده. ثم أتي خليفة رسول الله صلى الله عليه وسلم -ارجع بقى للخليفة وكان أبو بكر- وقول له إن أنا علي دين لفلان، هو الدرع ليه عشان نبيعه ونسد الدين، وعبدي الفلاني عتيق وكذا وكذا. واداله إيه؟ وصية، فنفذوا، ولا يعلم رجل نفذت وصيته بعد موته إلا ثابت. الوصية بعد ما مات وأنقذها أبو بكر، خلاص.
شاهد سرعة أولاً فهم فهم الصحابة للآيات، إسقاط الصحابة للآيات اللي بيسمعوها على أنفسهم. يا جماعة أنت النهارده لما تيجي تقرا سورة التوبة، ماشي، تقف كده ورا الشيخ أسامة حامد وهو بيقرا سورة التوبة يقعد يعيط ما يقدرش يكمل، وأنت تبقى واقف هو بيعيط ليه؟ ربنا بيكلم على المنافقين! هو بيعيط ليه ما هو البعيد إيه يا عم صفات المنافقين دي، ما هو أنت شوف أنت بقى فين من الصفات دي، مش كده؟ يعني لما ربنا يتكلم عن المنافقين ويقول إيه: ﴿وَلَا يَذْكُرُونَ اللَّهَ إِلَّا قَلِيلًا﴾ [النساء: 142]، ها، ﴿وَإِذَا قَامُوا إِلَى الصَّلَاةِ قَامُوا كُسَالَى﴾ [النساء: 142]، ها، فأنت فين بقى حضرتك؟ فمهم جداً إسقاط الآيات على أنفسنا وإلا يبقى إحنا في خذلان، كل ما نسمع آيات فيها بقى الكلام عن المنافقين والكفرة إحنا إيه؟ كأننا قاعدين بره بنشرب شاي ونتفرج على المنافقين والكفار.
وأول بقى يا أيها، يعني صفات المؤمنين، أه، طبعا إحنا بقى المؤمنين، طب أهي، يا أيها الذين آمنوا أهي يلا بالمرة عاش! فهو الصحابة يسمعوا الآيات يسقطوها على أنفسهم على طول، وبعدين بقى يبادروا في الامتثال يا جماعة، مش بس يمتثل، الصحابة أصلي مش فكرة امتثال لا، يمتثل ده معنى، يبادر بالامتثال ده معنى. عارفين يعني ايه يبادر بالامتثال؟ يعني بيبقوا بيصلوا كده، وبعدين وهم راكعين يوم يجي واحد يقول لهم إيه؟ ده نزل على النبي عليه الصلاه والسلام إيه أن القبلة تحولت، يقوموا يعملوا ايه؟ أي واحد هيعمل إيه؟ نخلص صلاه ونروح نشوف الموضوع ده، وهم راكعين يتحولوا، خلاص، سرعة الامتثال. قاعدين بيشربوا خمر فينادي المنادي: ألا إن الخمر قد حرمت، قم يا أنس فأهرقها. الخمر عند العرب مش سهل تتساب، مش سهل، قصائد العرب كلها تبتدي بالايه بالخمرة، مش كده؟ الخمرة عندهم حاجة يعني. فتخيل كده قاعدين بيشربوا الخمر وأنس كان ساقي القوم، يقوم ينادي مناد في سكك المدينة: ألا إن الخمر قد حرمت، في ساعتها: قم يا أنس فأهرقها! سرعة الامتثال.
وبعدين مش بس سرعة الامتثال، تمام الامتثال، مش سرعة الامتثال بس، أنا بديكم أمثلة بسيطة عشان نفهم فكرة السرعة شكلها إيه وصلت. أنت النهارده بنيجي نقول لك ايه: يا ابني حرام تصاحب، خلاص هي آخر واحدة إن شاء الله يعني، بس لما نفركش مش هصاحب بعدها، لا مش أنت كده ما امتثلت سرعة الامتثال، حرام تصاحب يعني دلوقتي وأنت قاعد تطلع التليفون بلوك يلا كله إيه ما فيش، ماشي؟ طبعا اللي هيمسك التليفون دلوقتي ده متجوز، اعرفوا على طول متجوز وبيه بيطلقه الشيخ.
قال على طول في ساعتها في ساعتها: ماشي اه قم يا أنس، فاهر انتهت. مش آخر كاس، آخر بق. طب دي ده احنا معتقها بقنا، ده احنا من الجاهلية الإزازة دي يعني؟ يعني لا ما فيش خلاص، قم يا أنس، فاهر، انتهى الموضوع.
ومن الطرائف بردو أظن ابن مسعود داخل المسجد، والنبي عليه الصلاة والسلام وقف على المنبر قال: «أيها الناس أجلسوا»، فقعد بره المسجد. خلاص هنا بلغني صوته صلى الله عليه وسلم ما فيش، طب أدخل الجامع؟ طب أعد؟ لا خالص، بلغه صوت النبي صلى الله عليه وسلم وهو بره، قعد في مكانه.
سرعة كمان في امتثالهم. تمام الامتثال، أديلكم قصة واحدة عشان نفهم يعني ايه تمام الامتثال يا جماعة، عشان احنا كلنا ده ناقصنا، هو ده بقى، هو ده الأدب. الأدب انك تسمع فتنفذ، سمعنا وأطعنا. أطعنا دي يعني في سرعة، ويعني في تمام امتثال، ماشي. زي كده ربنا في القرآن قال: ﴿وَإِذِ ابْتَلَى إِبْرَاهِيمَ رَبُّهُ بِكَلِمَاتٍ فَأَتَمَّهُنَّ﴾ [البقرة: 124]، مش ففعله، أتم.
قصة واحدة: أبو الهيثم بن التيهان صحابي جليل، وبعدين قصة طويلة، عزم النبي عليه الصلاة والسلام وأبا بكر وعمر عنده على شوية تمر كده وشويه مية، وبعدين فالنبي عليه الصلاة والسلام حب يكافؤه، قال له: عندك خادم؟ قال له: لا ما فيش خادم عندي. قال له: إذا سمعت بسبي أتانا فاتنا. لو سمعت لـ لو في أماكن فاضية معلش نتوزع عشان في ناس واقفة بره. نتوزع مش يعني نطر، يعني ننتشر في المكان اللي بره، ما يتوزعوش اللي بره، يدخلوا، ماشي. تفسحوا تفسحوا في المجالس، سرعة الامتثال.
يلا تمام الامتثال بقى، كل يجي هنا صف أول عشان... كنا بنقول إيه؟ آه، فالنبي عليه الصلاة والسلام قال له: وده طبعا درس نستفيده أن الناس ما تجيش متأخر، يجي متأخر هيتعاقب ويقف بره. قال له: إذا سمعت بسبي أتانا فاتنا، خلاص لما تسمع أن في عندنا سبي تعال نديك خادم. الأول يا جماعة اقفوا هنا شوية، خادم في هذا العصر كانك بالضبط عتقت المرأة. أنت بقى مش عندنا البوتاجاز بإشعال ذاتي، والغسالة فول أتوماتيك ودرَايِر وغسالة أطباق وإيه تاني؟ عندكم إيه تاني؟ أنا في التجمع بقى فلازم يعني كل، مش كده؟ كله.
وبعدين الست تيجي تتاخر، أنا مش قادرة، أنا تعبانة، أنا طول الليل، أنا طول النهار في المِشّ عارف إيه، الله يكون في عونهم، وأنا مش عشان إنما أقصد أقول إيه؟ يعني تخيلوا بقى العصر بتاع زمان، أنا قبل كده لما قعدت أتأمل عصر زمان ده عصر عجيب جداً يعني، خدنا بند واحد اللي هو العيش، مش فاكر كان في المسجد هنا أظن العيش اللي هو أنت بتجيبه من الفرن اللي هو بتنزل خد هات، لا ده هو زمان كانت الست أو الراجل يعني إيان كان بقى مين اللي في البيت ده، احنا اللي بنعمل إيه؟ بنضرب القمح الأول وبعدين احنا اللي نطحن، وبعدين احنا اللي نعجن، ده احنا ده كله بنتكلم في إيه؟ في في بند واحد.
بند احنا اللي بنعجن، واحنا بنسيبه يتخمر، وبعدين احنا اللي بنولع على الفرن، واحنا اللي بنحط في الفرن، واحنا اللي بنطلع، كل حاجة احنا بنعملها عشان نطلع رغيف عيش، وده بند من البندود اللي دلوقتي أسهل ما تكون. واضح؟ فانتم متخيلين بقى أن إيه؟ خادم أنت جاي لمراتها راجع لها يعني أجمل هدية ممكن تديها تجيبها لمراتها في الوقت ده. فقال له: إذا سمعت بسبي أتانا فاتنا.
تمر الأيام، النبي يجيله سبي عليه الصلاة والسلام، يجيله أبو الهيثم يفكره بوعده، قال له: اختر أحد هذين. خد واحد من الاتنين دول، قال: اختر أنت لي. قال: خذ هذا فاني رأيته يصلي، واستوصوا به خيراً. أي واحد منا يفهم الوصية به خيراً يعني إيه؟ يعني تأكله زي ما تاكل، ما تحملوش فوق طاقته. راح رجع أبو الهيثم لمراته، النبي صلى الله عليه وسلم أخدمني هذا وقال: استوصي به خيراً، فماذا تقول المرأة؟ ما أنت ببالغ وصية رسول الله حتى تعتقه.
احنا هنا يا جماعة مش بنمتحن، بنعمل إيه؟ بنبلغ الذروة في امتثال الأمر، بنتم الأمر. يعني النبي عليه الصلاة والسلام، صلوا على النبي، ما أخدمه هذا إلا ليحمل عنه المشاق والأعباء وكذا وكذا. المرأة انتبهت: لا، النبي أمر عليه الصلاة والسلام، مش هنمتثل أي امتثال كده، قال: استوصي به خيراً. طب إيه السقف بتاع استوصي به خيراً بالنسبة للعبد؟ أنه يعتق، مش كده؟ يعتق ولا يعتق؟ يعتق.
تيجي تق يعتق ولا لا؟ يققال عَتق، مش عَتَق، ماشي. عَتق مبني للمجهول، عارفين ده ولا مش عارفين ده؟ دوروا عليها بقى يلا ماشي، ما خلاص بقى قلنا عَتق احنا، ماشي. فخلاص تعتقه، ما أنت ببالغ وصية رسول الله صلى الله عليه وسلم حتى تعتقه، هنا اللي هو إتمام الأمر.
﴿يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ﴾ [الحجرات: 2]. هنا في نهيين: لا ترفعوا أصواتكم فوق صوت النبي، ولا تجهروا له بالقول كجهر بعضكم لبعض.
الأول يا جماعة قبل ما ندخل في هذه المسألة، بعض أهل العلم ذكر أن النبي صلى الله عليه وسلم الأدب معه ميتاً كالأدب معه حياً، ابن العربي المالكي ذكر ذلك وحماد بن زيد. فابن العربي المالكي قال: إن النبي صلى الله عليه وسلم لا يُرفع الصوت وحديثه يقرأ، لو في حديث للنبي مجلس تحديث أو مجلس حديث، ما فيش حد يعلي صوته، خلاص، لأن النبي صلى الله عليه وسلم يتكلم الآن الكلام الذي تسمعونه كلامه صلى الله عليه وسلم.
حماد بن زيد هو قاعد مرة في مجلس تحديث، ضحك أحد الجلوس، فغضب حماد وقطع مجلس التحديث وقام، وذكر هذا الأدب، أن كلامه هذا المستور في الكتب الذي نقراه ككلامه المسموع تماماً. بل بعضهم ذهب أنه لا يرفع الصوت في مسجد رسول الله صلى الله عليه وسلم، اللي بقى بنشوفه، المسخرة اللي بنشوفها هناك، مش في الأصوات كمان، أنت بتقعد في مسجد رسول الله صلى الله عليه وسلم ومشغل التيك توك، ومشغل الريلز، وبتقلب على الفيسبوك، حاجة في منتهى يعني أنت في مسجد رسول الله صلى الله عليه وسلم! فمن الأدب معه ألا يرفع الصوت في مسجده.
وعمر رضي الله عنه أُثر عنه أنه لقى اثنين رجلين رفعا أصواتهما في مسجد رسول الله صلى الله عليه وسلم، قال: من أين أنتما؟ قالا: من الطائف. قال: أما لو كنتما من المدينة لأوسعتكما ضرباً، لأن المفروض الأدب ده تبقوا عارفينه، ما فيش حاجة اسمها نعلي صوتنا في المسجد، في مسجد النبي عليه الصلاة والسلام. فهذا الأدب نتأدب به إذا زرناه صلى الله عليه وسلم.
فـ ﴿يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ أَن تَحْبَطَ أَعْمَالُكُمْ وَأَنتُمْ لَا تَشْعُرُونَ﴾ [الحجرات: 2]. هنا في نهيين: لا ترفعوا أصواتكم فوق صوت النبي، والنهي التاني لا تجهروا له بالقول كجهر بعضكم لبعض. إيه الفرق بينهم؟ إيه الفرق بينهم ما هو لا ترفعوا أصواتكم فوق صوت النبي ولا تجهروا له بالقول كجهر بعضكم لبعض؟
في فرق؟ آه، في فرق، في فروق كتير. حاسبونا أن احنا نقف على كم فرق لأن ذكر فروق كتير. أول فرق أن النهي الأول عن رفع الصوت في حال كلامه صلى الله عليه وسلم، والثانية في حال سكوته. لا ترفع هنا يا جماعة أول أول الآية ﴿لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ﴾ [الحجرات: 2]، تلاحظوا هنا أن في إيه؟ صوت لينا وصوت ليه في الآية واضحة دي، الآية بعد كده ما فيش ذكر لأن هو بيتكلم، ﴿وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لَبَعْضٍ﴾ [الحجرات: 2].
فاهمين الفرق؟ فقالوا: إن صدر الآية لا ترفعوا أصواتكم فوق صوت النبي في حال خطابه، يعني هو بيتكلم واحنا بنتكلم، أو حتى مش في حال خطابه، هو هو بيتكلم بيكلم بيخاطب ناس واحنا بنتكلم في وجوده، فهو بيتكلم واحنا بنتكلم، فاختلطت الأصوات، فأصواتنا لا ترفع فوق صوته صلى الله عليه وسلم تعظيماً وإجلالاً له صلى الله عليه وسلم.
هنا يا جماعة احنا لما بنقول ده، العلماء سحبوه على كل كبير، خصوصاً كبير في القدر في العلم، لأن العلماء ورثة الأنبياء، فقالوا: إن هذه الآداب تسحب على أهل العلم، على العلماء، لأنهم ورثة الأنبياء، هذا بنص كلام النبي صلى الله عليه وسلم. وكذلك احترام الكبير، وده اتكلمنا عنه بقى المره اللي فاتت، انك تحترم الكبير، حتى الكبير في السن، يعني مما أُثر أنه إيه؟ لا يمشي الأصاغر بين يدي الأكابر إلا في ثلاث مواطن، إلا في ثلاثة مواطن هكذا، ماشي.
اللي هم إيه بقى؟ قالوا: إذا ساروا ليلاً، أو راو خيلاً، أو قدموا، أو إيه؟ أو اقتحموا سيلاً. يعني إيه؟ في مواطن الخطر، يعني أنقدم الأصاغر. عشان إذا ساروا ليلاً، يعني بالليل وهم ماشيين، اه يبقى أنا بطلع قدام عشان إيه؟ علشان بحمي الكبير أوي يعني. وإذا راوا خيلاً، يعني حرب يعني، قالوا في الحرب يعني. راوا خيلاً، أو اقتحموا سيلاً، يعني يعني في موطن مخوف، فايه؟ الأصاغر شباب يعني، المقصود الشباب يعني عشان هم الأقدر أن هم يواجهوا هذا وكذا.
فالشاهد يبقى نتعلم هذه الآداب مع النبي عليه الصلاة والسلام ومع ورثته العلماء، ﴿لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ﴾ [الحجرات: 2]، يبقى هو بيتكلم ما حدش يرفع صوته فوق صوته. طب هو ساكت صلى الله عليه وسلم برض لا يجهر أمامه بالقول كجهر بعضكم لبعض، يعني الحد اللي أنت متعودين تتكلموا بيه لما يجي حد يكلم حد وأنتم مع النبي عليه الصلاة والسلام حتى لو هو ساكت، صوتكم ينزل عن هذا الحد تعظيماً له.
بعض أهل العلم ذهب لمعنى آخر في هذه في هذا الأدب، قالوا: إن النبي عليه الصلاة والسلام هذا يشوش خاطره، لأنه موصول بالله عز وجل، هو قاعد مع ربنا صلى على نبينا محمد، فتجي أنت تعمل دوشة حواليه فتقطع هذه الاتصال بالله عز وجل، فهذا مما يشوش خاطره صلى الله عليه وسلم. مفهومة دي يا جماعة؟ يبقى ده مما قيل في هذه الآية، لا ترفعوا أصواتكم فوق صوت النبي، يبقى ده يؤذي النبي عليه الصلاة والسلام، وبعدين مش هيعرف يقول لكم، مش كده؟ فربنا سبحانه وتعالى يتولى هذا. ليه مش هيعرف يقول لكم؟ هيتكسف. ربنا قال كدة ولا ما قالش؟ ﴿إِنَّ ذَلِكُمْ كَانَ يُؤْذِي النَّبِيَّ فَيَسْتَحْيِي مِنكُمْ﴾ [الأحزاب: 53]. شايفين بقى؟
في طبعا ناس دلوقتي بقى يعني إيه هو ما بيتكلمش، خلاص أنا أعمل اللي أنا عاوزه لا، ليه يعني تأذيه عشان هو ما بيعرفش يتكلم، عشان هو محترم يعني فيؤذي، لا لابد أن يراعى ذلك.
أنت عارفين مين هنا شغال مبيعات أو تسويق؟ من الحاجات التحديات اللي بيواجهها بتوع المبيعات أو التسويق حاجة بيسموها الصامت كاستمر، عارفينه ده؟ اللي هو العميل الصامت. العميل الصامت ده تحدي كبير، خلي بالكم، تحدي كبير في المبيعات أو بتوع التسويق. ليه تحدي كبير؟ العميل الصامت ده لا احنا عارفينه راضي ولا مش راضي، متضايق؟ ما هو لو يتكلم نجفه، ما هو بتاع المبيعات كده يعني بس هو يتكلم بس يعني واحنا هنطلعه مبسوط، ماشي، هو ممكن يبقى بعنا له الهوا بس هيبقى مبسوط، فهو يعكنن قوي بقى اللي هو الآية؟ العميل الصامت ده، مش كده؟ ما هو احنا مش عارفين هو مبسوط ولا مش مبسوط.
طبعاً ده عشان في الدنيا فاحنا بنتشقلب عشان يتكلم العميل. طب ما نكون هكذا في الآخرة بقى، يعني في الآخرة أخويا اللي ساكت ده، ولا زوجي اللي ساكت، ولا زوجتي اللي ساكتة، ولا ده مش معناها أنها راضية أو مش معناه أنه راضي، احنا عاوزين نوصل لحته اللي هو إزاي يرضى؟ أو هو راضي أصلاً ولا احنا مش عارفين؟
النبي عليه الصلاة والسلام اهو كان يبقى ساكت بس زعلان، مشوش الخاطر صلى الله عليه وسلم، الصحابه يعملوا حاجات وما يقولهمش. طبعا بتاع التسويق بقى يلا سؤال، هنعمل ايه عشان نعرف نعمل إيه؟ كلكم ساقطين في التسويق ذاكروا تسويق. طب يعني لا يبقى دين ولا دنيا ماشي. في حاجات يعني التسويق اعملوها ماشي مش و لكن عشان الدعا بقى، يعني اللي معانا طبعا في ناس هنا بتدعو إلى الله، مهم جداً أنك تبقى وأنت بتدعو إلى الله منتبه لتعبيرات الوجه، لحركة أعضاء الجسد، ده مهم جداً لأن بيديك انطباع مبدئي عن حالة اللي قدامك، هو زعلان، فرحان، تضايق من الكلام، تأثر؟ ده مهم جداً.
خلاص مهم إيه تاني؟ حاجة تانية، ده للدعاة، ما لناش دعوة بالتسويق، احنا خرجنا بره التسويق. إيه تاني يعني؟ تبقى عاوز يعني عاوز اعرف دلوقتي الدرس ده الناس استفادت، ما استفدتش؟ ببساطة إيه؟ نسال، مش كده؟ ببساطة.
طيب هتسال هيقال لك: إيه ده يا عم الشيخ، أنت أحلى شيخ شفنا في الناس كلها تحب تجامل وتحب تداهن وتحب، مش كده؟ فلما نجي نسال نوجه السؤال، مش كده؟ مين هنا في الدعوة بقى؟ احنا قلنا مين اللي في التسويق؟ حد يرفع إيد ولا طيب؟ نوجه السؤال، يعني إيه نوجه السؤال؟ يبقى.
لا يا أيها الذين آمنوا لا ترفعوا أصواتكم فوق صوت النبي ولا تجهروا له بالقول كجهر بعضكم لبعض أن تحبط أعمالكم وأنتم لا تشعرون. قيل: لا تجهروا له بالقول كجهر بعضكم لبعض، يعني في ندائه؛ لا تنادونه كنداء بعضكم لبعض، وهذا جاء في آية أخرى وتكلمنا عليها في سورة النور، مش كدة؟ ماذا قال الله عز وجل: ﴿لَا تَجْعَلُوا دُعَاءَ الرَّسُولِ بَيْنَكُمْ كَدُعَاءِ بَعْضِكُم بَعْضًا﴾ [النور: 63]، يعني إيه؟ ما يتقالوش يا محمد صلى الله عليه وسلم، النبي ما يتناديش كده يا محمد خالص. والله عز وجل علمنا هذا الأدب في القرآن، القرآن لم تأت فيه قط نداء النبي عليه الصلاة والسلام باسمه قط، مع إن ربنا نادى آدم مش كده؟ ﴿يَا آدَمُ اسْكُنْ﴾ [البقرة: 35] ونادى نوح: ﴿يَا نُوحُ اهْبطْ﴾ [هود: 45] ونادى إراهيم: ﴿يَا إِبْرَاهِيمُ * قَدْ صَدَّقْتَ الرُّؤْيَا﴾ [الصافات: 104-105] ونادى موسى إيه؟ يا موسى، ها إيه؟ اقبل، ونادى عيسى: ﴿يَا عِيسَى إِنِّي مُتَوَفَّيكَ﴾ [آل عمران: 55]، كل دول بأسمائهم، ما جتش يا محمد، ما جتش في القرآن، مش كده؟ أمال ينادى إيه؟ يا أيها النبي، يا أيها الرسول، ما تجيش يا محمد، صح كده؟
يؤتى بها في الإخبار، وباب الإخبار أوسع من باب الخطاب؛ محمد رسول الله، حتى لما قال محمد عطف أو يعني إتباعها بقوله رسول الله ماشي، لكن على كل حال باب الإخبار أوسع، إنما في باب النداء لا، من الأدب أن يققال يا رسول الله يا نبي الله، ما قالوش يا محمد صلى الله عليه وسلم. لا، يبقى إيه؟ ولا تجهروا له بالقول كجهر بعضكم لبعض أن تحبط أعمالكم وأنتم لا تشعرون. أن تحبط أعمالكم وأنتم لا تشعرون، وهذا الختم برضه يا جماعة مهم جداً نقف معاه، مش عشان نفس الآية، ولكن معنى أعم من الآية وبرضه ذكرناه في سورة النور: ﴿وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ﴾ [النور: 15]. يا جماعة يا جماعة إحنا كل إحنا بقالنا أهو ساعة والمرة اللي فاتت ساعة وإن شاء الله في ممكن كمان مرتين يعني أربع ساعات، وده إحنا بنكروه بنتكلم في أدب الكلمه، شفتوا المفاجأة؟
إحنا كل الكلام اللي بنكلمه ده في أدب الكلمة، الكلمة مش إيه؟ الكلمة اللي تقال ولا ما تقالش؟ تتقال إزاي؟ إنتو متخيلين إحنا بنتكلم فين؟ سورة الآداب، كلمة في أدب الكلمة، فالكلمة شأنها خطير في الدين، أن تحبط أعمالكم بإيه؟ بكلمة! بداية دين الإسلام ندخله بإيه؟ بكلمة، ونخرج منه بكلمة، ولقد قالوا إيه؟ كلمة الكفر مش كده؟ يخرج من الدين بكلمة، بكلمة تستحل فرجاً كان حراماً وبكلمة يصير عليك حراماً مرة أخرى، كلمة النكاح وكلمة الطلاق، الكلمة أمرها بكلمة تقذف في ظهرك، كلمة القذف. الكلمة في الإسلام مش حاجة بسيطة، وزي ما قلنا لكم: القلم أحد اللسانين، الكلمة اللي بتكتب على فيسبوك وها ها ها وضحك وشير وطب يوم القيامة هتيجي فين الكلمة دي؟ اغتبت مسلماً، تريقت على مسلم، نشرت إشاعة كذب، وده هيجي معانا، ده أدب بقى لوحده: ﴿إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ﴾ [الحجرات: 6] هتيجي معانا مش النهارده إن شاء الله، كله كلام ختام الآية: أن تحبط أعمالكم وأنتم لا تشعرون، بإيه بقى؟ بكلمة إتقالت ولا بوصف في الكلمة؟
يعني خلي بالكم، الكلمة قد تكون مباحة، الآية دي لا ترفعوا أصواتكم فوق صوت النبي ولا تجهروا له بالقول كجهر بعضكم لبعض أن تحبط أعمالكم وأنتم لا تشعرون. هنا يا جماعة الكلمة اللي إتقالت دي فترفع فيها الصوت، أو الكلمة اللي إتقالت فجهر بها عنده صلى الله عليه وسلم، المشكلة في أصل الكلمة ولا المشكلة في صفة لحقت هذه الكلمة وهي رفع الصوت بها؟ ربنا يختم الآية بإيه؟ أن تحبط أعمالكم وأنتم لا تشعرون. وأول ما نقول كلمة وتحبط وأنتم لا تشعرون، على طول يجي في ذهننا الحديث: «إن العبد ليتكلم بالكلمة» -في رواية: بالساعة بالليلة- «لا يلقي لها بالاً، وأنتم لا تشعرون، يهوي بها في النار سبعين خريفاً».
إنتو فاهمين عارفين ده اللي هو إيه؟ اللي هو حضرتك مش كتبت بوست؟ ده واحد كاتب بوست فرحت إنت داخل معلق على البوست، والتعليق ده مما لا يرضى عنه الله. طب الكلمة دي إنت لا تلقي لها بالاً، لا تلقي لها بالاً، قد تكون هذه الكلمة سبب في أن تهوي في النار سبعين خريفاً، ده كلام النبي مش كلامي عليه الصلاة والسلام. يا جماعة عارفين اللي لا يلقي لها بالاً يعني قالها ولا في دماغه أنه قال، طب يا ترى إحنا في يومنا أصلاً بنقول كم كلمة من دول بقى؟ عرفتوا ليه بعض السلف كان بيقول: ما شيء أحوج إلى طول حبس من لساني؟ ما هو يا جماعة هما فهموا حاجات إحنا مش فاهمينها، فهموا حاجات إحنا مش فاهمينها، ما هو لا يلقي لها بالاً، والله ده رعب، الوصف ده مرعب: أن تحبط أعمالكم وأنتم لا تشعرون.
يا سلام يا سلام، يعني تأتي يوم القيامة يا رب ده أنا عملته، لا ما هو ده أحبط ليه؟ ما هو إنت ما كنتش واخد بالك. يتكلم الكلمة من سخط الله لا يلقي لها بالاً ولا في دماغه، رعب، رعب. فاللي بيتكلم كتير ده بيتكلم كتير ليه؟ واللي بيكتب كتير على الفيسبوك ده بيكتب كتير ليه؟ واللي اشتهر على الفيسبوك وبقى صفحته عليها الآلاف، المفروض يترعب زيادة، مش يبقى فرحان، يترعب زيادة لأن الكلمة دلوقتي بقت خلاص مسؤولية أكبر. الكلام ده يا جماعة فين؟ فين هذه الآداب؟ فين الآداب دي؟ وأنتم لا تشعرون، يبقى تحسبونه هيناً وهو عند الله عظيم. يبقى نخاف من الكلمة.
بعض العلماء انتبه لمعنى في موضوع الكلام ده يا شباب وركزوا فيه بقى، عشان بعد الكلمتين دول هتلاقوا أكثر وقتنا ساكتين ماشي، الستات هيقولوا إيه؟ الستات عاوزين الرجالة تتكلم، طبعا ما بيتكلموش، كمان هيروحوا ساكتين كمان، لا اتكلموا بقى مع الزوجات، طبعا حاجة كويسة، وقالوا إيه بقى؟ قالوا إن الكلام أقسام؛ كلام شر محض، يعني هو الكلام من بدايته كده إيه؟ مصيبة، وكلام فيه خير وشر، وكلام لا خير فيه ولا شر، وكلام خير محض. هل في قسم خامس يا جماعة؟ كلام شر محض يعني كلام هو معصية الكلمة نفسها، الكلمة نفسها معصية لله شر، وكلام فيه خير وشر يعني يحمل الأمرين؛ الكلام نفسه في حاجة لو بصيت له من الناحية تلاقيه خير، ومن ناحية تانية تلاقيه شر، وكلام لا خير فيه ولا شر المباح، وكلام خير محض كلام كله خير دعوة إلى الله ذكر قراءة قرآن خير، مش كده؟
طيب، أول صنف شر المحض يتقال ولا ما يتققالش؟ حد عنده مشكلة في دي؟ ولا حد يقول لا يتقال. كلام فيه خير وشر يتقال ولا ما يتقالش؟ ما هو كلام كتير، إنت جيت على اللي فيه خير وشر وتروح تقوله ليه؟ ما تسيب اللي فيه خير وشر وروح للخير، مش كده؟ طيب وكلام لا خير فيه ولا شر؟ قال: من عرف قدر زمانه تنزه عن كثير من هذا أيضاً، اللي هو كلام لا خير فيه اللي هو المباح. وكلام خير محض يتقال ولا ما يتقالش؟ قالوا برضه وهذا يعتريه ما يعتريه من الآفات؛ حب ظهور ورياء وحاجات بقى اللي هي التسميع والحاجات اللي إنتوا إيه شطار شطار فيها يعني عارفينها مش يعني شطار فيها يعني عارفين أنها ما تعملش ماشي.
فيها هتتكلم قد إيه كده؟ قليل، مش كده؟ أنصف أذنيك من فيك، إنما خلق لك أذنان وفم واحد، ليه؟ لتسمع أكثر مما تتكلم، فهمتوا؟ ربنا خلق لك ودنين اثنين وبق واحد عشان تسمع كتير وتتكلم قليل، أنصف أذنيك من فيك، اسمع كتير واتكلم قليل ماشي. يبقى لا ترفعوا أصواتكم فوق صوت النبي ولا تجهروا له بالقول كجهر بعضكم لبعض أن تحبط أعمالكم وأنتم لا تشعرون. إن الذين يغضون أصواتهم عند رسول الله أولئك الذين امتحن الله قلوبهم للتقوى لهم مغفرة وأجر عظيم. يبقى أن الذين يغضون يعني يخفضون أصواتهم عند رسول الله أولئك الذين امتحن الله قلوبهم للتقوى لهم هو كده فتد إيه ساعة وربع إنت زهقان قوي ده محضر الإجازة، يعني طب قاعدين للمغرب بقى بالعند في هيضربوك بعد الدرس، لهم مغفرة وأجر عظيم.
طيب نقف هنا ماشي خلاص طيب، عاوزين بقى واحد يقول لنا أي حاجة استفادها، يلا قول، قول يا حودة، أحسن حاجة والله حودة جاب من الآخر أهو، محمود بيقول لكم يا جماعة الدرس المستفاد: ما تتكلمش خالص، ماشي طبعا لازم نختم بذي الف. قل أقول قولي هذا واستغفر الله العظيم لي ولكم، سبحانك اللهم وبحمدك نشهد أن لا إله إلا أنت نستغفرك ونتوب إليك، السلام عليكم ورحمة الله وبركاته.