الشيخ أمجد سميرالنهارده الدرس الثالث في سلسلة تأملات في سورة الحجرات، وصلنا لقول الله عز وجل: ﴿إِنَّ الَّذِينَ يَغُضُّونَ أَصْوَاتَهُمْ عِندَ رَسُولِ اللَّهِ أُولَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى لَهُم مَّغْفِرَةٌ وَأَجْرٌ عَظِيمٌ﴾ [الحجرات: 3].
وهؤلاء قيل يعني إن هذه الآية نزلت في أبي بكر وعمر. احنا قلنا قبل كده قول ابن أبي مليكة: كاد الخيران أن يهلكا أبو بكر وعمر، ذلك إن اصواتهما ارتفعت في حضرة النبي صلى الله عليه وسلم، فنزل فيهما قول الله عز وجل: ﴿يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ﴾ [الحجرات: 2] إلى آخر الآية، وده تقدم معه.
فلما نزلت هذه الآية، ماذا فعل أبو بكر؟ كان لا يخاطب النبي صلى الله عليه وسلم إلا كأخي السرار، كان واحد بيكلم واحد سر. وعمر رضي الله عنه كان لا يخاطب النبي صلى الله عليه وسلم بعدها إذا كلم النبي صلى الله عليه وسلم لا يسمعه حتى يستفهمه، يقول له: أنت بتقول إيه؟ مش سامعك، واضح؟
فهذا من سرعة استجابتهم وانفعالهم لأوامر الله عز وجل. فنزل قوله تعالى: ﴿إِنَّ الَّذِينَ يَغُضُّونَ أَصْوَاتَهُمْ عِندَ رَسُولِ اللَّهِ أُولَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى﴾ يعني خلصها وأخلصها للتقوى ﴿لَهُم مَّغْفِرَةٌ وَأَجْرٌ عَظِيمٌ﴾. وعرفنا أن ختم هذه الآية له علاقة بأيه؟ حد فاكر؟ ها، في آخر سورة الفتح، مش كده؟ نفس نفس الختم اهو، مش كده؟ اتكلمنا عن الموضوع ده.
ثم قال تعالى: ﴿إِنَّ الَّذِينَ يُنَادُونَكَ مِن وُرَاءِ الْحُجُرَاتِ أَكْثَرُهُمْ لَا يَعْقِلُونَ * وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ لَكَانَ خَيْراً لَّهُمْ وَاللَّهُ غَفُورٌ رَّحِيمٌ﴾ [الحجرات: 4-5].
طبعا هذه الآية لها قصة، ذلك أن وفدا من بني تميم أتوا النبي صلى الله عليه وسلم فصادوه وهو قائل، قائل يعني نايم القيلولة، يعني وقت القيلولة، فأخذوا يعني ينادون عليه من خلف الحجرات. خلف يا جماعة وراء هنا مش معناه يعني في خلف الحجرة، لا، معناها من خارج سواء من أمام أو من خلف، خلاص كده.
ينادون عليه بصوت مرتفع: يا محمد، يا محمد صلى الله عليه وسلم، فلم يجبهم، فالأقرع بن حابس وكان كبيرا في القوم في بني تميم قال: إن مدحي زين، وإن ذمي شين. فخرج عليهم صلى الله عليه وسلم وقال: إنما ذلكم الله تعالى، يعني الذي مدحه زين وذمه شين هو الله سبحانه وتعالى.
دي أول رواية أو أول سبب قيل. السبب الثاني أن وفدا من بني عنبر حصل بينهم وبين المسلمين قصة كده، أن المسلمين راحوا يحاربوا بني عنبر، هربوا، راحوا واخدين الذراري بتاعتهم ورجعوا المسلمين. فراح بنو عنبر بعتوا وفدا منهم علشان ياخدوا الذراري يفد، يشوفوا هيعملوا إيه بقى، يفدوه ولا النبي عليه الصلاه والسلام يمن، أي حاجة صلى الله عليه وسلم. فجم، فوافق أيضا في وقت القائلة وهو نايم، فابتدروه بنفس القصة، لكن القصة دي ليها نهاية كده هنجي لها بعد شويه إن شاء الله.
على كل حال يا جماعة المشهد واضح اهو، أن النبي عليه الصلاه والسلام نائم وقت القيلولة، وجاء ناس -سواء بقى كانوا على الإسلام في أول الأمر أو هم كفار أصلا- وابتدوا يستخدموا هذه الأخلاق: ﴿إِنَّ الَّذِينَ يُنَادُونَكَ مِن وُرَاءِ الْحُجُرَاتِ أَكْثَرُهُمْ لَا يَعْقِلُونَ﴾.
وهنا تظهر معنى كلمة الآية بقى الحجرات. السورة كلها لم ياتي فيها لفظ الحجرات إلا مرة واحدة، وسميت بها السورة. فاكرين لما قلنا لكم مهم جدا أن احنا ننتبه لتسمية السور خصوصا على قول من يقول إن الأسماء توقيفية؟ قلنا لكم المرة اللي فاتت أن ترتيب السور توقيفي، مش كده؟ توقيفي يعني إيه؟ حد فاكر؟ يعني ده مش باجتهاد، لا، ده توقيفي، يعني بوحي من الله عز وجل. وبعضهم ذهب إلى أن أسماء السور كذلك توقيفية. بالذات بناء على هذا القول، يبقى اسم السورة ما ينفعش يعدي ليه السورة تتسمى الحجرات؟
ماشي، مهم جدا هنا ظهر لفظ الحجرات معانا. الغريب بقى كمان يا جماعة، أن طبعا الحجرات ليه؟ حجرات النبي عليه الصلاه والسلام كانت بيوته شكلها إيه؟ حجرات، مش كده؟ حجرة لعائشة، وحجرة لفلانة، حجرة حجرة، تسع حجرات، هم دول، هي دي بيوت النبي عليه الصلاه والسلام.
الحجرة كانت واسعة وشرحة وبرحة، ولا ضيقة؟ إيه رايكم؟ مش عندنا حديث أن النبي عليه الصلاه والسلام كان يجي يصلي عشان يسجد يعمل إيه؟ يغمز عائشة في رجلها عشان تلمها فيسجد؟ مش كده؟ فالحجره قد إيه؟ إيه الحجرة دي اللي هو عشان يجي يصلي يسجد فيروح بس إيه لمسه كده في رجليه عشان تلم رجليه عشان يعرف يسجد النبي عليه الصلاه والسلام؟ فدي حجرات النبي عليه الصلاه والسلام.
الغريب أن القرآن كله لم يصف حجرات النبي عليه الصلاه والسلام بهذا الوصف، أو لم لم يذكر دار النبي عليه الصلاه والسلام بهذا الاسم. هتلاقوا في القرآن كله بيذكرها باسم البيوت، مش كده؟ مثلا في قوله تعالى: ﴿لَا تَدْخُلُوا بُيُوتَ النَّبِيِّ إِلَّا أَن يُؤْذَنَ لَكُمْ إِلَى طَعَامٍ غَيْرَ نَاظِرِينَ إِنَاهُ﴾ [الأحزاب: 53] مش كده؟ ﴿وَاذْكُرْنَ مَا يُتْلَى فِي بُيُوتِكُنَّ﴾ [الأحزاب: 34] مش كده؟ وقرن في... طبعا الخطاب ده لامهات المؤمنين، اللي هي بيوت النبي عليه الصلاه والسلام. فالقران كله هتلاقوا لفظ الحجرات ده ماجاش فيه غير مرة واحدة هو هنا.
خلاص، طيب ليه هنا حجرات والسورة تتسمى بالحجرات؟ وكأن في تنبيه على أني ركزوا في اللفظ ده، يعني اللفظ ده مقصود وله ما وراءه، واحنا في سورة الآداب دلوقتي.
أول معنى، أول معنى يا جماعة الحجرات واضح جدا هي بيوت النبي عليه الصلاه والسلام هي الحجرات، فتسمية بيوت تسميها حجرات، الأمر بسيط من حيث الإطلاق يعني، سميه بيت، سميه حجره، خلاص الأمر بسيط. أنما هنا ليه بلفظ الحجرات؟
كاني والله أعلم -احنا قلنا ترتيب المصحف: القتال، سورة القتال سورة محمد صلى الله عليه وسلم، وبعدين سورة الفتح، وبعدين سورة الحجرات- وقلنا لكم وقتها إن بالقتال يكون الفتح. فاذا كان الفتح حصل استقرار الدولة، مش كده؟ ولما يحصل استقرار الدولة نحتاج لآداب سورة الحجرات، علشان هي دي اللي هتقيم العلاقات بين افراد المجتمع.
فتلاقي العلاقة بينك وبين ربنا شكلها إيه بعد الفتح واقامة الدولة، وبعدين العلاقة بينك وبين الكبير المعظم اللي هو هنا النبي عليه الصلاه والسلام، وبعدين العلاقة بينك وبين الناس، منهم الفساق (السورة يعني منهم الفساق ومنهم أهل الإيمان مش كده)، فتلاقي السورة بتكلمك بتشير إلى هذا النوع من الأداب: ﴿إِن جَاءَكُمْ فَاسِقٌ بِنَبَأٍ﴾ [الحجرات: 6]، وبعد كده ﴿وَإِن طَائِفَتَانِ مِنَ الْمُؤْمِنِينَ اقْتَتَلُوا﴾ [الحجرات: 9]، وبعدين ﴿يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ﴾ [الحجرات: 11]، وبعدين ﴿يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ﴾ [الحجرات: 12] على التفصيل اللي قلناه قبل كده لو تفتكروا يعني.
يبقى بعد الفتح ستستقر الدولة، ولما تستقر الأوضاع، الناس على طول بتجنح ليه؟ على طول أول ما تستقر الأوضاع والعيشة تبقى مية فل وستاشر، الناس بتجنح ليه؟ التوسعة في الدنيا، مش كده؟ صح.
أه، يبقى مع استقرار، طول ما الأوضاع مضطربة -يعني إخواننا ربنا يفرج عنهم في غزة ولا في السودان ولا في سوريا ولا في لبنان ولا إخواننا اللي هناك- هل نتوقع واحد منهم كده يقول لك إيه بقى: لما أكبر بيتي وأدهن مش عارف إيه وأعمل؟ ما تلاقيش ده يحصل، ده مش في الأذهان في الوقت ده. مش كده؟ أمتى يبتدي الواحد يفكر في ده؟ لما الدنيا تستقر، يحصل الفتح وتستقر الأمور، نبتدي إيه بقى؟ نفكر في الدنيا والتوسع وكذا وكذا وكذا.
كأن المعنى: انتبهوا أن بعد القتال والفتح ظلت بيوت النبي صلى الله عليه وسلم حجرات، هي دي بيوته إلى أن توفي صلى الله عليه وسلم. لا ساع عمره في توسعة ولا في مزيد من الدنيا، بل بالعكس، لما كانت تجيله الدنيا يهتم ويغتم ويبقى مش كده، يعمل ايه؟ لو عنده قد جبل أحد، هو قال كده صلى الله عليه وسلم، ما يسر أن يمر عليه ثلاث ليالي إلا وايه قد أنفق بها هكذا وهكذا وهكذا، ينفقها كلها في سبيل الله ويصلح المفاهيم النبي عليه الصلاه والسلام في الحته دي مش كده.
فكاني الناس هتبتدي بعد الفتح واستقرار الأوضاع تركن إلى الدنيا وتميل إلى الدنيا وإلى التوسعة في الدنيا، كلنا السمع والمتكلم، فياتي هذا المعنى: أن بيوت النبي عليه الصلاه والسلام ظلت حجرات إلى أن قبض صلى الله عليه وسلم.
ولذلك طبعا يا جماعة الحجرات ظلت كما هي إلى أن أدخلت إلى المسجد في عهد عبد الملك بن مروان، وكان بعض العلماء كان كره ذلك. مين؟ ابن السماك أظن قال، مش فاكر ابن السماك ولا غيره، لو حد يجيبها كنت بعتتها عملتها منشور أو على التليجرام، إنه قال: إنه ودته لو ظلت كما هي الحجرات تفضل زي ما هي كده، ليه؟ علشان الناس تشوفها فتتذكر حجرات النبي عليه الصلاه والسلام، وأن دي كانت حياته صلى الله عليه وسلم، فلا كلون إلى الدنيا.
تخيل كده لو كنا احنا كل ما نروح المدينه فنشوف إيه حجرات النبي عليه الصلاه والسلام اللي كان عايش فيها وعلى حالتها بقى، يعني مبنية بايه؟ لأن هي كانت الحجرات كانت كان من جريد النخل يا جماعه، مش مبنية بقى، وكانت السقف تنال بالأيدي، من السماك مش كده؟ ما أعرفش تجيبها ماشي.
أنت كانت سقف الحجرات تناله بالأيدي، يعني وأنت واقف كده ترفع إيدك تجيب السقف بتاع الحجرة دي. دي حياته صلى الله عليه وسلم، فلما أنت تروح وتشوف الحجرة على هذا الوصف، يقوم يحصل لك إيه؟ أكيد هيحصل ولا مش هيحصل؟ هتزهد بقى في الدنيا، يعني أنا اللي عمال وزعلان إني مش عارف أجيب إيه، وزعلان إني عايش في أوضة وصالة، ادي النبي عليه الصلاه والسلام خرج من الدنيا وهذه حجراته صلى الله عليه وسلم.
فكان ده أول معنى والله أعلم أن فكرة لفظ الحجرات هنا مقصود، خصوصا أنه لم يأت في القرآن كله هذا اللفظ، أقصد يعني طبعا الجذر اللغوي أتى في القرآن هنتكلم عنه بعد كده، إنما هذا اللفظ يعني يعني يعني الإشارة إلى بيوت النبي صلى الله عليه وسلم بلفظ الحجرة مش موجود في القرآن غير في السورة دي.
فكان هذا هو المعنى، أو معنى يعني لابد أن يعني نتامل وأن نتدبر. ما حدش جاب سعيد بن المسيب؟ ها، سعيد بن المسيب كان هو اللي بيقول إيه؟ وأنها بقيت على حالها عشان الناس تعتبر بحياة النبي عليه الصلاه والسلام. فده معنى.
المعنى الثاني: الحجرة بقى أصلا مشتقة من إيه؟ الجذر اللغوي اللي هو الحاء والجيم والراء ده، ماشي، يدور في فلك معاني كلها تعود، أو يعني معظمها تعود إلى معنى المنع. معنى المنع.
لما نجي نقول إيه: إن فلان حجر على فلان، حجر عليه يعني إيه؟ منعه من التصرف في ماله. ماشي. والحجر ده عندنا في الشرع، فيبقى الحجر اللي هو المنع من التصرف في المال ماشي؟
هل في ذلك، ها، هل في ذلك قسم لذي حجر؟ الحجر ده اللي هو إيه؟ العقل. ليه تتسمى حجر؟ على عشان بيمنع صاحبه من اقتراف الموبقات، يعني اللي عنده عقل ما يروحش يعمل حاجات غلط. وأصلا اسم العقل برده عشان كده، العقل يعني الربط. العقل في اللغة يعني الربط. يقول لك ايه: اعقلها وتوكل. اعقلها، مش اعقلها، يقول لك يعقلها، مش يعقلها، لا، اعقلها وتوكل، يعني ايه اربطها وتوكل.
يعني ايه اربطها؟ لما يكون معاك ناقة ما تقولش ما تسيبهاش كده وتقول أنا متوكل، لا اعقلها وتوكل، يعني خذ بالأسباب، اربطها وبعدين توكل على الله، برده يعني ما تقولش إيه: عشان ربطتها يبقى مش هتجري ومش هتسرق، لا، مين قال ده؟ تربطها وتتوكل، يبقى أنت خذ بالأسباب وبعدين توكل على الله سبحانه وتعالى، مفهوم؟
فحتى العقل، يعني لفظ العقل نفسه برده من هذا الباب. المهم: ﴿هَلْ فِي ذَلِكَ قَسَمٌ لِّذِي حِجْرٍ﴾ [الفجر: 5] شايفين الحاء والجيم والراء ده؟ يبقى برده أنه يمنع، ماشي، فهو يدور في اللغة حول هذا المعنى، ماشي.
فالحجر ليه تسمت حجرة أصلا؟ الحجرة إيه هي؟ هي الأرض المحجورة. الحجرة نقول حجرة، أنتم عارفين بنبني حيطان، أربع حيطان كده على حته أرض، الأرض دي هي الحجرة بمعنى المحجور. الأرض دي حجرت، يعني ايه؟ حجرت منعت. فهمتوا؟ بالأربع حيطان دي بقى ما حدش بقى يعرف يدخل جوه الحته دي، فيبقى حجرت منعت، فسميت حجرة، أي محجورة، أرض محجورة، حته أرض ممنوعة.
وقيل أنها سميت حجرة لأنها تمنع المال، المال ده مش يعني الفلوس لازم يعني، لو أنت جبت السفرة بتاعتك مثلا والأنتريه حطيتهم في الشارع، تاني يوم مش هتلاقيهم، مش كده؟ كونهم في بيتك حجروا، منعوا بايه؟ كل حاجة بقى في الحجرة بتاعتها محجورة، يعني ممنوعة بالحيطان اللي حواليها دي. فهمتوا؟ فده لفظ الحجرة أصلا في اللغة.
مشتق من ده طيب: ﴿إِنَّ الَّذِينَ يُنَادُونَكَ مِنْ وَرَاءِ﴾. يبقى ليه لفظ الحجرات هنا؟ ليه لفظ الحجرات هنا؟ مما قيل: إن هذه السورة سورة الآداب التي معنا سورة الحجرات هي جاءت بالأساس علشان تقنن العلاقات بين الأفراد، وهي دي الآية النداءات في سورة الحجرات، مش كده؟ كأنها بتشير إلى معنى أن كل واحد ليه حرم كده ممنوع الدخول فيه، والحرم ده مش لازم حجرة يعني حجرة حسية.
لا، احنا هنكتشف حاجة عجيبة جداً يا جماعة، هنكتشف أن الحتة المحجور ليك دي حتى لو أنت مش موجود كفلها لك الشرع: ﴿يَا أَيُّهَا الَّذِينَ آمَنُوا اجْتَنَبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ﴾. وأنا بظن بأخي سوءً بيبقى قدامي؟ مش لازم مش كده؟ ﴿وَلَا تَجَسَّسُوا وَلَا يَغْتَبْ بَعْضُكُمْ بَعْضًا﴾. طب أنا بغتاب؟ بيبقى معايا؟ أنت هنا الشرع بيكفل لك حاجة بعيدة، فين بقى قل لي أنت؟ فين في القوانين الوضعية ده يعني؟
الشرع بيكفل لك أن وأنت قاعد وناس قاعدة في حتة تانية ما تعرفش إن قاعدين ولا لو سيرتك جت الشرع بيكفل لك أن هم يسكتوا فوراً وما يجيبوش سيرتك. فين القانون الوضعي اللي يعرف يكفل ده؟ ما فيش، ما تلاقيش. ليه ما تلاقيش؟ لأن القانون الوضعي لا هيمنة له على الأنفس، القانون الوضعي مالوش هيمنة على النفس. يعني أنت وأنت قاعد كده أنت بتبقى خايف، خايف من إيه في القانون الوضعي؟ من المخالفة، مش كده؟ مخالفة يعني فلوس تيجي عليك، من سجن، من كِدَه، مش كده؟ طب هو القانون الوضعي ده مش مركب لك كاميرات في كل حتة؟ إنما الشرع بقى لا، فهيمان على النفوس، وأنت قاعد لوحدك لوحدك، فتلاقي ظن دار في ذهنك بأخيك، فيجب عليك أن تدافع هذا الظن لوحدك، لا معاك حد ولا كلمت حد: ﴿اجْتَنَبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ﴾.
فكان هنا الشرع أتى عشان يعمل إيه بقى؟ أتى علشان يبين لنا أن كل واحد ليه حتة كده محجورة، حتة ممنوع الدخول فيها، ممنوع تقرب منها، ليه؟ لأن ده حق صاحبك، حق أخيك. فكان لفظ الحجرات يشير إلى هذا المعنى، ما تسمع لفظ الحجرات آه يبقى كل واحد منا له الآية الحجرات الخاصة به، أو الحجرة الخاصة، المنطقة المحجور، المنطقة المحظورة، المنطقة الممنوعة اللي ما ينفعش تدخلها، ماشي؟ ومش لازم أبقى عارف عشان كده يقول لك ايه؟ لا، ما تيجي واحد بيقول لك لا ما هو أصلاً كده مثلاً يعني نقوله ما هو لو كده هي دي الغيبة.
النبي عليه الصلاة والسلام قال كده: «أرأيت إن كان في أخي ما أقول؟» هو فعلاً كِدَه دي الكلمة دايمًا نسمعها، فقال صلى الله عليه وسلم: «إن كان فيه ما تقول فقد اغتبته، وإن لم يكن فيه ما تقول فقد بهتّه». يبقى لو هو اللي أنت بتقوله ده مش فيه كمان، دي قصة دي مش غيبة أصلاً، ماشي؟ أنت كده كمان بتكذب يعني غير الغيبة أنت بتكذب. فناسب أن يكون هنا يعني استخدام لفظ الحجرات لأن الشرع أتى ليضبط تلك الحدود إن صح التعبير، أنت الحجرة اللي بيحدده حدود، حدود اللي هي الجدر، فاتت السورة لتبين ولتضع تلك الحدود بين أفراد الآية الأمة، فناسب أن يأتي بلفظ الحجرات: ﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ﴾.
طبعا يا شباب هذا الأدب يكون مع النبي صلى الله عليه وسلم أصالة ومع ورثته تبعا، وده قلناه قبل كده: العلماء ورثة الأنبياء، العلماء ورثة الأنبياء. فإذا كان هذا هو الأدب مع النبي عليه الصلاة والسلام فهو كذلك الأدب مع العلماء، ولذلك أبو عبيدة القاسم بن سلام رحمه الله قال: ما دققت باب عالم قط. ليه؟ مش حريص على العلم يعني؟ لا، حريص جداً على العلم، لكن أخذ بهذا الأدب: انتظره حتى يخرج إليّ. يعني عمره ما يروح لعالم ويروح مخبط الباب ويقول له قط. طبعا احنا قلنا قبل كده إيه؟ أن كانوا بلغوا الآية القمة في امتثال الأمر، ماشي؟ أنتظر حتى يخرج إليه.
فهذا الأدب يكون مع الكبار، مع الكبار، ما تروحش تنادي على واحد بصوت عالي وهو له حشمة وله مكانة وله كذا وتنادي عليه بصوت عالي من بعيد أو كذا، هذا لا ينبغي. فلا يفعل ذلك مع الكبار: ﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ﴾. أكثرهم لا يعقلون، يعني فيهم ناس بتعقل ويعملوا الحركة دي معقولة؟ ها، إيه رايكم فيهم؟ ما هو ربنا اللي بيقول مش كده؟ ﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ﴾ يبقى إذا مش كلهم لا يعقلون. هنا العلماء قالوا والله احتمالين، الاحتمال الأول أن كلهم لا يعقلون، ده ربنا بيقول أكثرهم أنت تقول كلهم؟ قال لك ما هو جاريا على عادة العرب في الكلام.
طيب، هم العرب كانوا يعملوا إيه بقى؟ ركزوا يا شباب في المعنى ده لأنه معنى مهم. العرب كانوا يتحاشون الكذب، تقصد المسلمين لا؟ العربي كان يتحاشى الكذب أن تؤثر عنه كذباً. حد يجيب بقى أثر يفيد ده وياخد اللي يطلع بقى ما أعرفش فيش حد صغير عشان يخسر؟ فين عاوزين حد صغير؟ إيه اللي حصل؟ قول اسمك إيه؟ ازيك يا إسماعيل؟ قول عمل إيه يا أبو سفيان؟ احكي، احكي، قول أي حاجة، اهبد اهبد أنا هديك الفلوس، أي حاجة، أي كلمة من اللي تتغششتها دي يلا أنا قاعد ما تقلقش سمعت كويس؟ طيب.
تعالى أبو سفيان لما راح مين؟ لهرقل مش كده؟ المحفظة فين يا إسماعيل؟ اديها لبابا. وبعدين أبو هرقل ابتدى يسأله أسئلة، فأبو سفيان في النص قال إيه؟ ولولا أن يؤثر عليَّ الكذب لكذبت، مش كده؟ يعني هو بس هيتقال أبو سفيان كذب دي كبيرة، فالعربي شوف بقى أهو ده عربي ده، كافر مش بس كافر في موقف يعني اشد ما يكون غيظاً على المسلمين وعلى النبي عليه الصلاة والسلام، لكن لا ما كذبش، ما عرفش غير أنه إيه في حتة كده صغيرة يدخل، قال له إيه؟ والله احنا في إيدنا وما نعرفش هيعمل إيه بعد كده يعني يمكن يعمل حاجات وحشة بس ما عرفش يكذب.
طيب، فالعرب ما كانوش يكذبوا، فلما ييجوا يتكلموا ركزوا يا شباب بقى في الحتة دي لأن كتير من الشباب عندهم حتة تضخيم المواضيع ودي آفة الحقيقة عاوزين نتخلص منها وبتدل شوية على خفة الآية يعني نقبلها من النساء، إنما أما يبقى رجل واقف وبيتكلم وبعدين يقول لك إيه: اصل كل الناس كِدَه! إيه كل إيه؟ كل الناس دي يعني جبتها منين كلمة كل دي؟ أنت فاهم أنت بتقول إيه أصلاً؟ فاهم يعني إيه كل؟ فاهم الكلمة اللي أنت بتحكيها دي؟
فكان العربي يتحاشى في كلامه أنه يقول كل دي، ليه؟ ربما يبقى في حد، مش كده؟ فيقول لك إيه: والله أكثرهم كِدَه، وهو يقصد الجميع. خلي بالك هنا المثال مش كل الناس، هو بيقول لك كل اللي هيعمل الفعل ده لا يعقل. فاهمين دي يا شباب؟ ومع شوف بقى كلام العلماء في الحتة دي قالوا: أن ربنا سبحانه وتعالى جرى على عادة العرب استحساناً لعادتهم، يعني ربنا لما جاء في القرآن خلي بالك هو العربي لما بيقول لك كذب ومش كذب ليه؟ لأنه ما يعرفش العربي هم كلهم ولا مش كلهم، فيقول لك أكثرهم يبقى كده خرجت بره العهده، طلع فيهم ناس بتعقل أنا ما كذبتش.
طيب، ربنا سبحانه وتعالى يعلم ولا لا يععلم؟ يعني مش محتاج بقى يعني صح؟ ومع ذلك يعني مما قيل في التفسير أن لا هم كلهم لا يعقلون، فلو ربنا قال: إن الذين ينادونك من وراء الحجرات كلهم لا يعقلون، لوقع محله ما هو كلهم لا يعقلون ربنا بيقول كده سبحانه وتعالى، لكنه جرى على عادة العرب استحساناً لتلك العادة، علشان احنا نيجي بعد كده نفهم المعنى ده بلاش نضخم المواضيع يا شباب، بعض الناس عندهم المشكلة دي فيهم وباقول لكم إن قبلت في النساء عيب تبقى في الرجالة الحقيقة، الراجل يحكم العقل ويعرف يتكلم ويعرف يضع الكلام في موضعه وتلاقي واحد يجي لك -وده بقى عشان الشباب اللي متصدرة للدعوة ولا حاجة تقعد تسمع مشاكل- ما لما تيجي تسمع المشكلة أو حتى المديرين أو كِدَه يعني أو أنت في بيتك أي حد يعني أي حد بيتصدر لهذه المنطقه يعني فرق فرق بين الحقائق المجرده وبين فهم الشخص لتلك الحقائق، ده فرق خطير جداً.
يعني إيه؟ هيجيلك واحد يقول لك إيه: أنا أبويا آذاني أذية شديدة جدا جداً جداً، فانا بصراحة ما بقيتش أكل معاه، هو جاي بيقول لك ده عقوق ولا مش يعني هيدخلك بقى في الحتة دي، شايف بقى كلمة آذاني أذية شديدة جداً جداً جداً دي ما تاخدهاش منه مسلمة كِدَه، قل لي مواقف، احكي لي أبوك ليه بقى؟ الشخصية اللي عندها هيقول لك الشخصية دي ممكن إيه أبوه بص له بصه وحشة مثلاً يعني، فدي الأذية الشديدة جدا جداً جداً اللي هو عمال يحكي فيها دي، أنا مش ببالغ على فكرة يا جماعة أنا بيجي ناس كِدَه، احكي لي الموقف، اصل والله يا شيخ وبعدين أمي مش عارف إيه الصراحه يعني شتمتني شتيمة ما ينفعش تتقال وعيب جدا تتقال في بيوت ويقعد.
فانت طبعا دماغك تروح إيه الأم دي إزاي؟ وطلع في الآخر حاجة عادي في كل بيوتنا يعني عادي ما فيش أم مصرية أصيلة ما قلتهاش، فلا يعني مهم جدا نفرق بين الحقيقة مجردة هو إيه اللي حصل الموقف واحد اتنين تلاتة خلاص، أنت بقى استقبالك للموقف ده موضوع تاني، فهمك للموقف ده موضوع تاني، نفسيتك تجاه الموقف ده موضوع تاني، فلازم نبقى منتبهين لده واحنا بنحكم على الأمور واحنا بنوجه الناس لازم نبقى فاهمين ده كويس.
﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ﴾ يبقى لا هو أكثرهم لا يعقلون، إيه ده؟ يعني فيهم ناس تعقل ويعملوا الحاجة الوحشة دي؟ ينفع؟ آه ينفع. الإمام القاسمي في تفسيره انتبه لمعنى مهم جداً وهو معنى ما يسمى الآن بسلوك القطيع أو العقل الجمعي، اللي هو أنت ممكن توافق مجموع الجهال وأنت مش دريان، وأنت مش دريان، أنتوا عارفين تلاقوا إيه راجل كده محترم كده وستين سنة سبعين سنة وبعدين يجي يتفرج على فرح مش عارف بنت أخته فرح نصه واقف عمال يرقص ويهز، يقول هو أنا أنا عملت كِدَه ازاي؟ هو هو مش عارف هو عمل كده ازاي، انا مستحيل كنت هو إيه اللي حصل؟ هو لما الناس كلها عملت حاجة فتاثر العقل الجمعي ده أو سلوك القطيع هو عملها هو عملها.
فهنا ربنا سبحانه وتعالى كأنه برضه هذه الآية بتورينا شوية خطورة المسألة دي، مسألة سلوك القطيع أو العقل الجمعي إزاي بيؤثر عليك: ﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ﴾ كان يا جماعة جفاة بني تميم أتوا إلى النبي صلى الله عليه وسلم أو بني عنبر، وبعدين ابتدى بقى الذين لا يعقلون منهم ينادوا بصوت عالي، فلما الدنيا هاصت بقى حتى الذين يعقلون ينادوا معهم مع أنهم لو كانوا انفردوا مستحيل يعملوا ده، مستحيل، لكنهم عملوا ده ليه؟ تحت تأثير العقل الجمعي أو سلوك القطيع، مفهومة دي؟
﴿إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لَا يَعْقِلُونَ * وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ لَكَانَ خَيْرًا لَهُمْ وَاللَّهُ غَفُورٌ رَحِيمٌ﴾. طيب يعني إيه بقى: ﴿وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ لَكَانَ خَيْرًا لَهُمْ﴾؟ الأول يا شباب قبل ما نفهم ليه خيراً لهم، هنا برضه في ملمح مهم جداً يا شباب لازم ننتبه ليه، هل قال الله عز وجل: ولو أنهم صبروا حتى تخرج لكان خيراً لهم الآية كِدَه؟ أمال في في حاجة أنا وقعتها اللي هي إيه؟ إِلَيْهِمْ. ﴿وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ لَكَانَ خَيْرًا لَهُمْ﴾. بعض العلماء تنبه لهذا اللفظ، طب ليه؟ ما اصل ما فيش في القرآن حاجة زيادة كِدَه اللي هو إيه يعني حط إِلَيْهِمْ أو شيلها الدنيا لا هو مش كلامنا ده، ده كلام الله سبحانه وتعالى، فتعامل مع كلام الله عز وجل بهذه النفسية ليه الحرف ده جه هنا؟
فقالوا إنه من الأدب مع الكبير، مع العالم، مع أنه لو خارج لحاجته أنك لا تتعرض لها، يعني مش كفاية أن النبي يخرج عليه الصلاة والسلام لا، يعني لو أنتوا قاعدين ولقيتوا النبي خرج عليه الصلاة والسلام بس من عادته أنه بيخرج في الوقت ده عشان يقضي حاجة طبعاً ما كانش فيه حمامات في البيوت مثلاً يعني، فهو رايح يقضي حاجته مثلاً أو من حاله المشرفة صلى الله عليه وسلم تبين كِدَه أنه لا ده هو مستعجل وبيهرش حاجة مثلاً لا تتعرض لوش، سيبه، تقول أنا هنا أصلاً قاعد من مش عارف إيه أنا ده أنا ما صدقت لقيته، هو لم يخرج إليك، هو خرج لحاجته، فهذا أدب يكون مع الكبير كذلك، يبقى إيه: ﴿وَلَوْ أَنَّهُمْ صَبَرُوا حَتَّى تَخْرُجَ إِلَيْهِمْ﴾ ماشي.
آه احنا محتاجين يا جماعة الآداب دي والله محتاجينها فعلاً اصل هو معلش أنتوا عارفين القصة فين؟ القصة أن احنا اتربينا للاسف يعني على فكرة فكرة أن أنا إيه أنا كل واحد فينا يعني محور الكون، محور الكون. وللاسف كثير من وسائل التربية الحديثة أو أو فهمها بقى المغلوط بيعزز ده، وأنا آسف إني أقول إن حتى كثير من الأطباء النفسيين ممكن يعزز ده جوه الـ
بيعاِج وبده اتعرض كتير قبل كده أنه يجي له المريض يقول له: لأ أصل أنت تستحق، أصل أنت المفروض يتعمل معاك كذا، أصل أنت! تلاقي الراجل ده أو المريض ده رجع البيت قالب على الناس كلها؛ قالب على أبوه وأمه وأصحابه واخواته وجيرانه: ليه أنا المفروض تتعاملوا معايا بالطريقة الفلانية؟ الدكتور اللي قال: لأ الحته دي لازم تتوزع صح عند الناس، أنت زي ما ليك واجبات عليك حقوق.
فكرة بقى من أنت وصتر بتتربى على كده أنك محور الكون! وده نمط تربوي خاطئ جداً؛ يعني يجي البنت أو الابن يشتكي –برضو الناس في الدعوة يركزوا في الكلام ده أو في مدارس مدرسين مدرسات أي حاجة– فتيجي البنت: أصل ماما، أصل بابا! لازم يبقى في توجيه الأول بحقوق الآباء والأمهات لازم وبعدين نقعد نسمع؛ أنا مش بقول الاب وإلا ما بقولش كده، لأ طبعا في أباء بتظلم وأمهات بتظلم قولا واحدا موجود، انما عشان نطلع الولد ده سوي نفسياً ما ينفعش نقعد نسمعه وبعدين نصب كل تركيزنا في حل المشكلة اللي هيخرج فيها كلام زي: لأ أصل بابا كان لازم، أصل ماما كان لازم، فالولد بيتربي جوايا إيه دلوقتي أن هو أنت أنت هيتعمل لك اللي أنت عاوزه.
فالنمط ده من التربية أو يخرج لنا الأشكال بقى أو الأشكال دي من الأفعال، مش الأشكال دي اللي هو إيه: أول ما هشوفه هجري وراه وهجيبه وأوقفه! لأ ده في أكتر من كده، والله طيب أنا مستعجل، معلش بس يا شيخ هي مش هتاخد منك دقيقتين؟ أيوه يا حبيبي أنا ورايا. معلش بس ويفضل قافش في مثلا شيخ أو غيره. هو هنا يا جماعة هو هنا فين الخلل؟ الخلل أن أنت ما تربيتش على أن زي ما ليك حقوق عليك واجبات، وزي ما حضرتك ليك حقوق فغيرك ليه حقوق برضو؛ أنت حقك ليه أهم من حقي ليه يعني؟ يعني بتاع إيه بقى ح بقى حقك أهم من حقي ده بقرارك كده يعني؟ يعني أنت أخدت القرار ده خلاص أنا أهم؟ أيوه يا حبيبي أنا ورا... أنا أهم، اقف جاوبني ده ليه إن شاء الله؟ هذا النمط من التربية أفرز ناس كده.
فلا إحنا عاوزين يا جماعة يا شباب عاوزين نحط دائماً حقوق الغير أولوية، مش بقى أقول لك زي حقك لأ حقوق؛ يعني تفكر وتراعي الناس. فكر لسه بنتكلم عن سلوك القطيع من شوية، من أهم الحاجات اللي توقف سلوك القطيع أصلاً التفكير؛ اقف فكر، ادي لنفسك وقت كده هدنة، فكر هو أنا لما أروح، طب هو بيقول مستعجل خلاص ما سيب يمكن وراه حاجة، أي حاجة حتى ﴿تَخْرُجَ إِلَيْهِمْ﴾ [الحجرات: 4] ما أصل هو على طول مشغول، أصل أنا ما بعرفش أمسكه، أصل أنا إن شاء الله ما مسكته (يعني هو على طول مشغول طب نعمله ما هو مشغول).
مرة واحد من الدعاة يعني الكبار وكان بيحكي لي موقف يعني بيحكي موقف بيقول أنه قاعد في وسط ناس بقى متدينه ويعني فبيقول لهم: أنا هسألكم سؤال، لو واحد –نتكلم بقى ناس إيه بقى يعني على قدر من الدين وناس متصدرة للدعوة– واحد منكم راح بيخبط على واحد فقال له إيه: أنا مش فاضي دلوقتي تعال لي بكره. قال له: والله ما أكلمه أبدا! قال له: طب ما هو ده القرآن ﴿وَإِن قِيلَ لَكُمُ ارْجِعُوا فَارْجِعُوا هُوَ أَزْكَىٰ لَكُمْ﴾ [النور: 28]، لو اتقال لك ارجع ما ترجعش؟ قال له: والله ما أكلمه تاني! إحنا يا جماعة إحنا قلنا لكم المره اللي فاتت مشكلتنا فين؟ أن إحنا ما شاء الله بنقرا القرآن وبنحضر ومنا اللي ختم القرآن، لكن أين العمل بالقرآن؟ النبي عليه الصلاة والسلام عائشة لما جت تمدحه قالت: كان... كان يحفظ القرآن؟ قالت كده؟ ما قالتش كده صلى الله عليه وسلم رضي الله عن عائشة، كان خلقه القرآن، خلقه القرآن؛ يعني لما نعرض أخلاقك على القرآن نجد تطابق بين أفعالك وبين آيات ربك سبحانه وتعالى.
فموقف زي اللي معانا ده دلوقتي أدب اهو أدب حتى ﴿تَخْرُجَ إِلَيْهِمْ﴾ [الحجرات: 4]، إحنا كان حد كاتب كده بيقول لك يعني يعني الناس بيجيبوا كده هزار على الفيسبوك والدولة الفلانية والدولة وبعدين مصر إيه يعني حد بيخبط عليه مثلاً فلقيته ما بيردش فايه مش عارف الدولة ال تقول لك ايه خلاص يمكن مش موجوده مصر، خبط تاني يمكن نايم، طب ما هو نايم خبط تاني ليه؟ هو نايم ما هو لو نايم يبقى ما تخبطش يعني الجمله المفروض تبقى كده يعني (يعني هو يمكن نايم فما تخبطش) لأ خبط تاني تلاقيه نايم ما هو تلاقيه نايم تسيبه نايم خلاص يصحى بقى.
أو الاتصال مثلاً يا جماعة إحنا هنا مش ده كله أداب ماشي إحنا محتاجين نسقط دايما فكرة الأداب دي على اسقاطات اليومية؛ يعني هو زمان كانوا ينادوا من وراء الحجرات النهارده بتصل فاتصلت بره لغايه ما الخط قطع تسكت أبدأ تاني وتالت ورسايل، ما هو أنا الخط قطع... يعني هو حاجة من اتنين، حاجة من اتنين: أنا مش أنا يعني الطرف التاني ده يا مش سامع يا مش عاوز يرد عليك، ففي الحالتين بقى أنت هتقعد تتصل كتير هتعمل إيه يعني؟ يعني هتعمل إيه؟ فمهم أن احنا نفهم ده، ماشي ﴿إِنَّ الَّذِينَ يُنَادُونَكَ مِن وَرَاءِ الْحُجُرَاتِ أَكْثَرُهُمْ لَا يَعْقِلُونَ * وَلَوْ أَنَّهُمْ صَبَرُوا حَتَّىٰ تَخْرُجَ إِلَيْهِمْ لَكَانَ خَيْرًا لَّهُمْ﴾ [الحجرات: 4-5].
ليه بقى لكان خيراً لهم؟ في قصة وفد بني عنبر، هما جايين علشان يفوضوا النبي عليه الصلاة والسلام على موضوع الذراري بتاعتهم، فالنبي عليه الصلاة والسلام كان قد نوى أن هو هييه هيمن على الذراري أصلاً يعني أول ما رجع المسلمون بالذراري هو كان في نيته أن إيه هيسيبه لوفد بني عنبر أو هيسيبه لإيه لابائهم وكذا لما ييجوا، فدي كانت نيته، كانت نيته صلى الله عليه وسلم، فلما عملوا اللي عملوه ده اتاه جبريل وقال: «اجعل بينك وبينهم رجلاً»، فاختار رجلاً منه صلى الله عليه وسلم (يعني جبريل جاله قال له إيه: خلي واحد يحكم بينك وبينهم)، فراح النبي عليه الصلاة والسلام اختار في قصة طويلة بقى لأن الراجل ده اختار واحد تاني اللي هو عمه قال: ما لكم وعمي فلان موجود، المهم خلي بالك اللي يحكم واحد منهم ها، طب أيه حكمك؟ طبعا ما كانش حد يعرف نية النبي عليه الصلاة والسلام، قال: تمن على النصف ونفد النصف (يعني ادينا النص كده ببلاش) وإيه وهو التاني اللي بيحكم ده فاكر أنه كده عمل الأيه اللي ما يتعملش، فنزل النبي عليه الصلاة والسلام على رأيه ولذلك قال الله عز وجل: ﴿وَلَوْ أَنَّهُمْ صَبَرُوا حَتَّىٰ تَخْرُجَ إِلَيْهِمْ لَكَانَ خَيْرًا لَّهُمْ وَاللَّهُ غَفُورٌ رَّحِيمٌ﴾ [الحجرات: 5].
﴿يَا أَيُّهَا الَّذِينَ آمَنُوۡا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ * وَاعْلَمُوا أَنَّ فِيكُمْ رَسُولَ اللَّهِ ۚ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ﴾ [الحجرات: 6-7].
﴿يَا أَيُّهَا الَّذِينَ آمَنُوۡا إِن جَاءَكُمْ فَاسِقٌ بِنَبَإٍ فَتَبَيَّنُوا﴾ طبعا يا شباب إحنا لو لو جينا نبص للترتيب برضه هنلاقي الترتيب شوية يعني... يعني إيه الأول؟ الأدب مع الله، وبعدين الأدب مع النبي عليه الصلاة والسلام، وبعد كده هيجي الأدب مع المؤمنين المؤمن الحاضر والمؤمن الغائب، وبعدين الأدب مع الفاسق قبل الأدب مع المؤمن! طيب ليه ما يجيش الترتيب: الله، الرسول صلى الله عليه وسلم، الأدب مع المؤمن بنوعيه بقى المؤمن الحاضر والمؤمن الغائب، وبعدين الأدب مع الفاسق؟ ليه يعني ليه تيجي الفاسق قبل المؤمن؟
علشان عظم تبعات هذا الأدب! دلوقتي يا جماعة الأدب مع الفاسق... هو إحنا هنا ركزوا إحنا قلنا الصورة كلها بتتكلم على الكلام؛ الكلمة، مش كده؟ ومش بس الكلمة ده كيفية أداء الكلمة وكيفية التعاطي مع الكلمة، إحنا الكلام ده قبل كده يعني احنا بنفكر بيه بنفكر بيه الناس، بس النهارده بقى إحنا نفاجأ بحاجة تانية! ده كيفية كيفية بقى إيه اللي أنا اللي قلتها من شوية: التعاطي مع كلمة الغير أصلاً! في المثال اللي معانا ده: ﴿يَا أَيُّهَا الَّذِينَ آمَنُوۡا إِن جَاءَكُمْ فَاسِقٌ بِنَبَإٍ فَتَبَيَّنُوا﴾ [الحجرات: 6] الكلمة هنا خارجه منك ولا من غيرك؟ من غيرك مش كده؟ حد تاني بيتكلم أنا بقى هعمل إيه مع الكلمة دي؟ شوفوا إحنا وصلنا لفين يا جماعة في الآداب.
طيب الفاسق اللي هجي لك بالكلمة ده لو أنت ما تبينت في قراءه فتثبتوا فتبينوا فتثبتوا، لو ما تبينت وما تثبت هيحصل إيه؟ هيحصل إيه؟ ﴿وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا﴾ [الحجرات: 9] ده اللي هيحصل هنوصل أن إيه هيحصل حرب! منين الكلام ده؟ سبب نزول الآية: ﴿إِن جَاءَكُمْ فَاسِقٌ بِنَبَإٍ فَتَبَيَّنُوا﴾ [الحجرات: 6] الآية دي نزلت ليه؟ الوليد بن عقبة بن أبي معيط النبي عليه الصلاة والسلام بعثه علشان يجيب زكاة من بني المصطلق أو يجيب يعني فلوس منهم أو كده، فخرج وكان بينهم إحن (يعني بين الوليد بن عقبة وبين المصطلق في بينهم مشاكل في قلق يعني)، فخرج عرفوا بقدوم رسول رسول الله صلى الله عليه وسلم فخرجوا يستقبلونه خارجين عشان يستقبلوا رسول رسول الله.
فهو جاي سواد من بعيد كده ومش عارفين بقى مين الشخص اللي جاي، رافعين السيوف وأيه هيستقبلوا بقى يعني عرفوا أن فخرجوا ليستقبلوا هذا الآ... فهو شاف المنظر ده من بعيد راح عامل إيه؟ راح رجع للنبي عليه الصلاة والسلام وقال له: ده أنا رحت وهم منعوني الفلوس وكانوا هيقتلوني! طبعا ده ما حصلش، فالنبي عليه الصلاة والسلام عمل إيه بقى؟ ارسل... في رواية أرسل خالد بن الوليد وقال له: أرسل خالد عشان إيه يروح يروح يحاربهم وأمره أنه يتبين أولاً (يعني مش تروح تحارب على طول لأ تبين الأمر أولاً).
فخالد وصل ليلاً فأرسل عيونه عشان الأول يشوف يرجعوا له إيه أخبار الناس دي؟ فرجعوا قالوا: لأ دول ناس مسلمة ما ارتدوش ولا حاجة وسمعنا الأذان عندهم، فخالد انتظر النهار وراح لهم، فأول ما جه خالد أدوا الزكاة والموضوع بسيط جداً، فلذلك قال: ﴿يَا أَيُّهَا الَّذِينَ آمَنُوۡا﴾ طبعا الوليد بن عقبة بن أبي معيط سماه الله فاسقاً، وهذا الوصف ظل ملازماً له حتى مات! وحتى في زمان عثمان رضي الله عنه صلى بهم صلاة الصبح أربعاً وهو سكران! وقال: لو شئت أو لو شئتم زدتم! عاوزين نصلي أكتر من أربعة إيه رايكم كده؟
يعني الشاهد: ﴿إِن جَاءَكُمْ فَاسِقٌ بِنَبَإٍ فَتَبَيَّنُوا فَتَثَبَّتُوا﴾ [الحجرات: 6] إحنا هنا يا جماعة الأدب بياخدنا لحته بعيد بياخدنا لفكره التعاطي مع كلمة الغير. إحنا النهارده يا شباب يا شباب، الشير اللي حضرتك بتعملها على الفيسبوك دي دي مش حاجة سهلة، مش حاجة بسيطة، مش حاجة بسيطة! عملت شير لمنشور، طب الشير دي في ميزانك يوم القيامة ده خير ولا شر؟ حسنات ولا سيئات يا شيخ ما يعني؟ لأ هو ده ربنا سبحانه وتعالى أنزل آية في هذا بس في الشير! أنتم عارفين كده إيه نازلة في الشير؟ ﴿وَإِذَا جَاءَهُمْ أَمْرٌ مِّنَ الْأَمِْ أَوْ الْخَوْفِ أَذَاعُوا بِهِ﴾ [النساء: 83] هو ده! أول ما أ مش عارف قبض على طول ده مش عارف الدولة الفلانية على طول شير من غير ما... ﴿أَذَاعُوا بِهِ﴾.
تروح تبص على المنشور الأساسي منشور آلاف المرات! طب الأيكونت ده بتاع مين؟ ما حدش، ما السنوار مات ما السنوار رحمه الله حصل اللي حصل بقى ولسه الناس مش عارفة أكونت تعمل اسمه عبد الله بن بن السنوار ولا على أنه ابنه، وبعدين ففي البيت عندي بقى زوجتي بتقول: أهو بيقول أن مش عارف إيه، قلت لها: بس اهدي بس مين ده؟ ده ابن السنوار؟ يعني منين عرفنا أن ده ابن السنوار؟ طلع أصلاً بعد كده مش أكونت ولا أي حاجة واحد عمل أكونت وكان عليه يعني وقت ما وريته لي كان عليه مش عارف 6000 مش فاكر، في ساعة زمن بقى عليه حوالي 500 ألف بني آدم! وهو أكونت اتعمل وقتها وقتها وعمال بقى ينزل كل خير... كل شوية إيه: أبي بخير! أبي مين يا عم؟ والناس إيه شير ﴿وَإِذَا جَاءَهُمْ أَمْرٌ مِّنَ الْأَمْنِ أَوْ الْخَوْفِ أَذَاعُوا بِهِ﴾ [النساء: 83].
قالها الله عز وجل مادحاً ولا ذاماً؟ إيه رأيكم؟ إيه رأيكم؟ يعني هذا في سياق المدح ولا الذم؟ يعني إحنا يعني إذاعوا به يعني (يعني كويس يلا ذيع وانشروا وكده)؟ لأ قالها الله ذاماً! طب نعمل ايه؟ ﴿وَلَوْ رَدُّوهُ إِلَى الرَّسُولِ وَإِلَىٰ أُولِي الْأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ﴾ [النساء: 83].
تعالوا كده نشوف بقى مثال واقعي عملي على الآية دي: عمر رضي الله عنه داخل المدينه كله بيشير أن النبي عليه الصلاة والسلام طلق نساءه! طبعا بقى ألفاظ إيه عصرية يعني عشان كله يه بيتكلم كده أن النبي طلق صلى الله على نبي محمد ورضي الله عن أمهات المؤمنين، فراح عمر عامل إيه؟ لايك وشير على طول كده؟ لأ، راح للنبي عليه الصلاة والسلام، قال له: طلقت؟ قال: لم أطلق. وبعدين بقى قصة طويلة بين عمر وبين النبي عليه الصلاة والسلام، كان عمر بعد الموقف ده يقول: أنا ممن يستنبطونه ﴿وَلَوْ رَدُّوهُ إِلَى الرَّسُولِ وَإِلَىٰ أُولِي الْأَمْرِ مِنْهُمْ لَعَلِمَهُ﴾ [النساء: 83].
الذين يستنبطونه منهم؟ قال: أنا، أنا ممن يستنبطونه. يعني إيه يستنبطونه؟ يعني يستخرجونه من معادنه. يعني النبي أُطلق عليه الصلاة والسلام. طب ما النبي عايش، هروح أسأله. قبل ما شير، قبل ما لايك، قبل ما أحط تعليق، نتأكد! طب ما تأكدتش يا أخي، ما تعملش. هو يعني أنت لازم تعمل شير؟ يعني أصل المنشور ده يضرب يا شيخ، يعني لو جاب معايا، دي قصة كبيرة يا جماعة! والله احنا واقعين تحت تأثير شديد جدا. يقول: يعني إيه؟ خصوصاً بقى الناس يعني اللي قدر ربنا سبحانه وتعالى أنهم ينتشروا. أصل ده بلاء، اللي ربنا قدره الانتشار ده، تفرحش! ده بلاء كبير جدا، مش كده قولوا لعبد الوهاب يخمل ذكره، فإني أنا قد ابتليت بالشهرة. أنا دي مين؟ مين هو؟ مش أنا طبعاً، أحمد بن حنبل! قول لعبد الوهاب يخمل ذكره، ما يتعرفش، فإني قد ابتليت بالشهرة. يعني أحمد بن حنبل شايف الشهرة دي إيه؟ بلاء. تتمنى إيه يا أحمد بن حنبل؟ قال: أتمنى مكاناً لا يعرفني فيه أحد. عاوز حتة ما حدش يعرفني فيها. طب دي هتبقى فين دي في الدنيا؟ ما فيش، أحمد بن حنبل روح أي حتة. أحمد بن حنبل يعني طبعاً حتى ما يعرفوش، بس أول ما يسمع اسمه إن ده أحمد بن حنبل هو زمان ما فيش بقى إيه صور ولا بتاع يعني.
أنتم عارفين قصة أحمد بن معين مع الراجل، قتالكم، الراجل اللي هو بتاع القصاص. راجل قصاص قاعد في مسجد، وبعدين القصاص ده اللي هو واعظ كده، يعني إيه اللي هو ما عندوش علم ويقعد إيه الناس تتجمع، زيي كده. الناس تتجمع حواليه، يقول أي كلام، فقاعد بيحكي مع الناس وبتاع. وكان زمن في ناس اسمهم القصاص كده، ناس طيبة بس جهلة ما عندهمش علم، ويقعدوا إيه يقول لك بقى حديث موضوع، يقول أي اللي بيجي على دماغه بيقوله. تقول له: ده حديث موضوع؟ يقول: واحد واحد من إخواننا قاعد راجل طيب، بس ده دلوقتي يعني من زمان بيقول أحاديث وبتاع. فالشيخ مجد أبو الليل رحمه الله كان ليه باع في الحديث وكده، الشيخ مجد وبيبن بيحكي لي فيقول لي إيه؟ فرحت قلت له: الحديث ده ضعيف. قال له: ضعيف! لعلمك يا ابني النبي عمره بيقول حديث ضعيف أبداً! يعني النبي هيقول حديث ضعيف؟ يعني طبعاً اللي ضحك فاهم يعني إيه حديث ضعيف، يعني.
المهم فالقصاص واحد بقى من القصاص دول، واقف عمال يقول إيه في المسجد؟ هو طبعاً عاوز يفخم كلامه، فهيفخم كلامه ازاي؟ يقوم يقول أي كلام ويحط له اسم مشهور. فيقول إيه: حدثنا أحمد بن محمد ويحيى بن معين، طول ما هو واقف حدثنا أحمد بن حنبل ويحيى بن معين، حدثنا.. طبعاً الناس عظمت القص ده بقى، ده واحد إيه بيحضر لأحمد ويحيى. خلص الكلام، أحمد بن حنبل قاعد في الآخر، ناداه قال له: تزعم أن أحمد بن حنبل ويحيى بن معين حدثك بكذا وكذا؟ قال: نعم. قال: فأنا أحمد بن حنبل وهذا يحيى بن معين. يسكت بقى البعيد؟ لا، قال لك: وليس في الدنيا أحمد بن حنبل وأحمد بن معين غيرك؟! يعني أنت بس اللي في الدنيا أحمد بن حنبل واحدين؟ ما في كتير يا أحمد!
فنرجع بقى تاني، فرفشة خلاص. الشهرة بلاء، بلاء. مش الدرس عن الشهرة، لكن من بلاء الشهرة بقى اللي احنا بصدد الآن، اللي هو فكره أنت عارف لما تكون متبوع، لما تكون راساً تقم، لما تعمل حاجة وبالذات إيه؟ تجي بعد ساعة ساعتين تلاقي الإيه الشير ضرب معاك والناس بقى عمالة تخش على الصفحة وبتاع، وأنت تكتشف أنه لا، ما كانش مناسب أني أعمل ده. كم في المية؟ كم في المية بقى من اللي في الموقف ده ممكن يرجع ويشيل ويعتذر؟ هذا أقل القليل، الأكثر هيعمل ايه؟ هينافح ويجادل ويفلسف علشان إيه يطلع صح. إيه رأيك؟ صح! فمهم جداً الناس بقى اللي إيه اللي ربنا قدر لها كده، ألا تنتبه للمعنى ده.
أنتم عارفين في مغالطة بيسموها بالعربي مغالطة التكلفه الغارقة، بالعربي اسمها كده ماشي، اللي هي إيه بقى مغالطة التكلفة الغارقة دي؟ حد عارفها؟ هي اسمها سانك كوست فاليسي بالإنجليزية، بس هو حد يعرف إيه هي؟ طيب ركزوا يا شباب، بالذات الناس اللي ليها أكونتات بقى على الفيسبوك والتيك توك والحاجات الحلوة دي. مغالطة التكلفة الغارقة دي اللي هو أنت حاجة أنفقت فيها كتير، فتجي في نص الطريق ما ترضاش ترجع لما تعرف أنها غلط، فتكمل ليه؟ لأنك مش باصت لقدام، أنت باصت لورا. مثال عشان تفهم دي، مهمة جداً جداً، مثال أن مثلا.. إيه المثال بيضربوه في الإدارة وفي الكتب؟ مثال حرام، يعني سيما وتذكرة وحاجات زي كده، فيعني بلاش منه هنا.
ناخد مثال مثلا حياتي، اللي هو راجل متجوز، واحد متجوز واحدة، وبعدين استحالة الاستحالة فعلاً، استَحالت خلاص عشان بس ما يجيش حد إيه؟ ما نطلع كلنا نطلق! استحالة العشرة، وكل نجيب من هنا ونجيب من هنا وحكم من هنا وحكم وكل حاجة. المهم استحالة العشرة، تقوم الست تفضل قاعدة ليه؟ يقول لك، تقول لك إيه: يعني أنا ضيعت من عمري 10 سنين معاه. شوف هي بتفكر فين؟ مش بتفكر قدام، هي بتفكر ورا، ضيعت من عمري 10 سنين معاه، عمالة تفكر في الإيه؟ في التكلفة الإيه الماضية. نقولها: يا بنتي أنت لو كملت سنة كمان هتموتي، هتتجنني! هي مش بتبص لقدام، هي بتفكر في اللي فات، ماشي؟ فدي بيسموها مغالطة التكلفة الغارقة.
المثال بقى اللي بيضربوه في الكتب يعني هو أوضح الحقيقة، إنه يقول لك إيه؟ واحد راح اشترى تذكرة السينما، دخل الفيلم ممل، ممل! طب هو في نص الفيلم يقول لك ايه؟ يستخسر، مع أن هو.. هو يعني العقل بيقول إيه؟ طب اخرج استفيد بوقتك، يعني ما خلاص أنت زهقان. يقول لك: طب وثمن التذكرة اللي أنا اشتريتها؟ هو هنا بيفكر ازاي؟ بيفكر بالتكلفة اللي إيه اللي أدفعت في الموضوع ده. خلي بالكم، اللي احنا بنضحك عليه دلوقتي ده، ده وقع اقتصاد دول وبتدرس في الإدارة، يعني المغالطة دي ازاي وقعت اقتصاد دول؟ أن واحد يدخل في حاجه مشروع مثلا قومي أو حاجة، وبعدين إيه في النص يكتشف أنه غلطان، يكمل ليه؟ علشان تكلفة أو مغالطة التكلفة الغارقة. اللي عاوز يقرا فيها يقرا فيها.
احنا بقى إشطاتها إيه على واقعنا احنا؟ الناس الطيبة اللي هو كده، اللي هو أنا راجل مشهور، عملت منشور على الفيسبوك، عملت فيديو على التيك توك ضرب، فراح واحد متصل قالي: يا ابني أنت إ ايه اللي أنت بتعجنه ده؟ واحد بقى أنا عارف أنه أثق فيه أنه بيَفهم، اللي أنت كاتبه ده غلط، اللي أنت كاتبه ده غلط. كام في المية بقى ببساطة جداً رايح شايل المنشور؟ هو هيجي يشيل، أول ما يخش إيه ده؟ 10000 شير! يقوم ماسك إيديه، مثلاً يعني إيه ده؟ مش عارف كم ألف لايك! يقوم ماسك إيديه، كم مشاهدة! يقوم ماسك إيديه، هو بيفكر في.. هو غلط يا ابني؟ هو غلط! آه، فدي خطيرة جداً جداً.
﴿يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا﴾ [الحجرات: 6]. يبقى يا جماعة جاءنا فاسق بنبأ، الفاسق ده أو حتى مستور الحال، يعني مش عارفين هو فاسق ولا مش فاسق، ما نعرفش مين ابن السنوار ولا مش ابن، ما نعرفش مين ده.. أَبَى بخير وأَبَى.. ولسا متكلمين. ده كان.. ده كان.. ده مش منشور واحد، ده نزل إيه؟ نعمل إيه؟ فتبينوا فتثبتوا، أهم لفظين، أهم قراءتين. يبقى ده أول حاجه، يبقى قبل ما تجري وتذيع الخبر، خلي بالكم يا جماعة، إذاعة الأخبار دي، ده مين اللي نهج؟ مين ده؟ نهج الشيطان! ختام الآية بقى الثانية، ماذا قال الله عز وجل؟ قال: ﴿وَإِذَا جَاءَهُمْ أَمْرٌ مِّنَ الْأَمْنِ أَوِ الْخَوْفِ أَذَاعُوا بِهِ وَلَوْ رَدُّوهُ إِلَى الرَّسُولِ وَإِلَى أُولِي الْأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ وَلَوْلَا فَضْلُ اللَّهِ عَلَيْكُمْ وَرَحْمَتُهُ لَاتَّبَعْتُمُ الشَّيْطَانَ إِلَّا قَلِيلًا﴾ [النساء: 83]. يبقى اللي بيعمل ده الشيطان، ماشي؟
فأول حاجه نتبين ونتثبت، تبينت، ثبتت، ده بوست الفيسبوك أو غيره. طيب تبينت، انشر بقى يا شيخ؟ لا ما تنشر يا شيخ! أهشر؟ سيبك.. انشر يا شيخ؟ ما تنشر. في نظر آخر، اللي هو إيه بقى؟ هو المصلحة النشر ولا المصلحة أني ما أنشرش؟ ده نظر آخر. شوفوا يا جماعة، يعني لو احنا عملنا ده بالله عليك، الدنيا هتهدى خالص! يبقى أول حاجة نتبين ونثبت، أول حاجة ﴿إِن جَاءَكُمْ فَاسِقٌ بِنَبَإٍ فَتَبَيَّنُوا فَتُثَبِّتُوا﴾.
طيب، تبيننا تبين وتثبت، ده اللي هو.. اللي هو أصلاً هو أتقال ولا ما أتقالش؟ اتعمل ولا ما اتعملش؟ ماشي. طيب، لا ده أتقال وده اتعمل. المصلحة بقى خلاص، تبينت وتثبت، انشر؟ لا، لسه. هو المصلحة في نشره ولا في عدم نشره؟ ده نظر آخر. إيه ده؟ هو ممكن يبقى الحاجة صح والمصلحة أنها ما تنتشر؟ آه، أبو هريرة رضي الله عنه قال: حفظت عن رسول الله صلى الله عليه وسلم وعائين. أبو هريرة قلنا لكم من المكثرين اللي سمعوا كتير من النبي عليه الصلاة والسلام. قال: حفظت عنه وعائين، أما أحدهما فقد بثثته، يعني وعاء من الأحاديث قلته، واما الآخر لو قلته لقطع مني هذا الحلقوم أو هذا البلعوم. يبقى أبو هريرة في وعاء أخذه عن النبي صلى الله عليه وسلم، رأى المصلحة في عدم نشره أصلاً. والعلماء لهم كلام في هذا، علشان ما تقولش إيه؟ طب دي أحاديث احنا ما عرفناهاش؟ لا خالص، يعني هو قالوا إن ده أعيان معينة، يعني ناس بعينها النبي قال عليها حاجات معينة صلى الله عليه وسلم.
وهكذا، زي بالضبط مين؟ حذيفه. حذيفه هو كاتب سر النبي عليه الصلاة والسلام، النبي قال له أسماء المنافقين، حذيفه. النبي قالها له من هنا، صحينا لقينا الأكونت بتاع حذيفه شير لأسماء المنافقين! ما هو هتضرب دي، هتضرب جامد دي، مش كده؟ ما هو احنا قاعدين كده أصلاً على الفيسبوك، احنا كده ما حدش بيفكر لا في المصلحة الشرعية ولا.. احنا قاعدين إيه اللي يضرب؟ حذيفه أخذ السر وكتم السر. مين يشك؟ احنا بقى طبعاً المؤمنين الخُلَّص، احنا في الجنة. حذيفه، احنا مش كده! عمر يشك رضي الله عن عمر: هل سماني لك رسول الله؟ احنا بس الواحد يقرأ له صفحتين في المصحف ولا يصوم له اثنين وخميس أسبوعين ثلاثة ورا بعض، من أولياء الله الصالحين! عمر خاف: أنا اسمي في المنافقين؟! ده المرة الوحيدة اللي حذيفه اضطر قال: لا، ولا أزكي بعدك أحدا، عشان ما يجيش إيه بقى؟ ما هو لو.. لو قال له لا، فيجي له بقى الثاني والثالث والرابع. قال له: لا، ولا أزكي بعدك أحدا، خلاص ما فيش حد يجي لي تاني ولا يسألني.
فإن هنا المصلحة في نشر.. ما هو مش كل علم ينشر، مش كل علم ينشر. حدثوا الناس بما يعرفون، أتحبون أن يكذب الله ورسوله؟! يعني أنت دلوقتي قاعد بتقرا في كتاب ولا وقع قدامك حاجة، اه ده فعلا ده حكم شرعي، مش لازم تنشره بين الناس، مش لازم! ليه؟ عقول الناس ما تستوعب الحكم اللي حضرتك رايح تنشره ده، ما تستوعب. أو الحكم ده لازم يقدم بين يديه بمقدمات طويلة تمهد لهذا الحكم مثلاً.
فيَا شباب اهدوا، اهدوا! يبقى مش أي كلمة تيجي، ماذا قال صلى الله عليه وسلم؟ حديث في مقدمة مسلم، حديث أبي هريرة برضه قال إيه؟ قال: كفى بالمرء كذباً أن يحدث بكل ما يسمع. كل ما يجيلك بوست تنشره! إيه ده؟ وبئس مطية الرجل، زَعَمُوا. زعموا هم بيقولوا: بئس مطية الرجل زعموا. يبقى الأول نتبين ونتثبت، المصلحة فين؟ طيب أنا والله مش باين، يعني أنا بقى بكلم واحد صادق بينه وبين نفسه، يعني أنا فعلا أنا.. خلي بالك، احنا بص هنرجع تاني لنفس الكلام، احنا اتربينا على مصلحتنا الشخصية فوق كل اعتبار، فأنا شايف مصلحتي أن الصفحة هشته بنشر مثل هذا الكلام مثلاً. طب يا ابني اعتبار الدين؟ اعتبار دين الناس؟ الناس دي هفتن في دينها؟ طب يا ابني اعتبار المصلحة الشرعية؟ يا ابني اعتبار مصلحة الآخرين؟ ما فيش! هو عماه مصلحته الشخصية، عماه. نرجع تاني، ده نمط تربية اتربينا كده، أنا والطوفان من بعدي! المهم أنا.
المصلحة بقى أنشر ولا ما أنشر؟ طيب، أنا قعدت بصدق وقعدت أشوف، ينفع أنشر؟ لا، بالذات الحاجات الكبيرة. خلي بالكم يا جماعة هنا إيه؟ ﴿إِن جَاءَكُمْ فَاسِقٌ بِنَبَإٍ﴾، ولا بايه؟ بنبأ. إيه الفرق بين الخبر والنبا؟ النبا الخبر العظيم، ﴿عَمَّ يَتَسَاءَلُونَ * عَنِ النَّبَإِ الْعَظِيمِ﴾ [النبأ: 1-2]. قالوا إن النبا هو الخبر العظيم، مش أي حاجة كده، يعني الحاجات السهل دي بنشرها برضه، يعني إيه؟ ده أضل، هو عاوز ينشر وخلاص، ما تنشر أي حاجة كده.
يبقى تقعد تفكر بصدق وأخلاص وتجرد عن مصلحة نفسك، لقيت بقى المصلحة أنك تنشر، أنشر. لقيت أن المصلحة في عدم النشر، ما تنشر. ترددت؟ الأسلم لك أنك ما تنشرش، لأنك يوم القيامة لن يقال لك أنت ما قلتش ليه، بس هيتقال لك أنت قلت ليه. ما قلتش ليه؟ والله رب.. يا رب ما ظهرتليش المصلحة من المفسدة، أنا ما أعرفش، أنا أجهل من أني أحكم على حاجة زي كده فما قلتش. إنما هيتقال لك أنت ليه قلت ده؟ وسببت في.. خلي بالكم يا جماعة هنا الآية نزلت في إيه؟ الوليد بن عقبة بن أبي معيط كاد أن يتسبب.
خلاص، لولا التبين والتثبت، مفهومة دي يا شباب؟ يبقى: ﴿إِن جَاءَكُمْ فَاسِقٌ بِنَبَإٍ فَتَبَيَّنُوا فَتُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ﴾ [الحجرات: 6]. اللي حضرتك نشرت عنه الكلام ده، إصابته إصابته بقى في عرضه، إصابته في في أي حاجة، آذيته في شغله بايه؟ بشير، دوسة، زرار، ﴿فَتُصْبِحُوا عَلَىٰ مَا فَعَلْتُمْ نَادِمِينَ﴾. هتندم، لو ما ندمتش النهارده هتندم يوم القيامة؛ لأن ده حق وأنت شاركت في إهدار هذا الحق، هتيجي يوم القيامة تُسأل، وهذا ديوان لا يترك الله منه شيئاً. خلي بالكوا، الديوان العباد بينهم وبين بعض ديوان لن يترك منه شيء، الشير دي اللي أذت واحد مش هتتساب، مش هتتساب، المنشور اللي عملته لما اغظت من فلان فنشرت وعرضت بعرضه ولا مش هيتساب؟ ديوان لا يترك الله منه شيئاً.
حقوق العباد تُؤدى يوم لا درهم ولا دينار، أمَال إيه؟ حسنات وسيئات، دي العملة، دي العملة عندك، حسنات تاخد منك، خلصت تاخد من سيئاتهم. طيب، عائِدٌ عليك من ده بايه؟ عائِدٌ عليك من ده بايه بالذات؟ كلما ازدادت شهرتك تخاف أكتر، تترع أكتر، ليه؟ لأن الكلمة دلوقتي يا جماعة يعني يعني أنا عاوزين نتخيل كده ربنا سبحانه وتعالى لما ذم لما ذم فئة من الناس: ﴿وَإِذَا جَاءَهُمْ أَمْرٌ مِّنَ الْأَمْنِ أَوِ الْخَوْفِ أَذَاعُوا بِهِ﴾ [النساء: 83]. تخيلوا كده بعقولكم كده يعني أجَدَع واحد أذاع به، كلمته وصلت لكام بني آدم؟ كام؟ يعني في عهد النبي عليه الصلاة والسلام كام؟ وربنا ينزل فيها قرآناً يتلى: أذَاعُوا به!
احنا النهارده كلمتنا توصل لكل واحد، ده الواحد كلما اشتهر زيادة يزعل بقى يقول لك إيه بقى: معقولة ما شافش غير 3 مليون مرة بس؟ يا ابني خاف، يا ابني خاف! يعني كأن المعالي تزاحم في قلبك، أيوه احمد ربنا سبحانه وتعالى أن وضع لك قبولاً في الأرض بكلم الناس اللي هي بتكلم في دين، ولا وضع لك قبولاً في الأرض يعني ترجو بذلك أن يكون إيه هذا من إيه من عَجَل بشرى المؤمن، لكن في نفس الوقت خاف، دي فتنة كبيرة جداً وعظيمة جداً.
طيب قال: ﴿إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ * وَاعْلَمُوا أَنَّ فِيكُمْ رَسُولَ اللَّهِ﴾ [الحجرات: 6-7]. أه، هنا بقى فايدة مهمة جداً يا شباب، ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾ [الحجرات: 7]. أه، هنا بقى فايدة مهمة جداً يا شباب، واعلموا أن فيكم رسول الله لو يطيعكم في كثير من الأمر لعنتم. نقف هنا ولا إيه رايكم؟ ساعة وخمس دقائق، نقف ولا نكمل دي؟ طيب، تعبتوا، عشان الناس واقفه بره، اللي واقفين بره نكمل ولا زي الفل؟ المرة الجاية تيجوا بدري، ناخد أسماءكم عشان ماشي.
واعلموا أن فيكم رسول الله لو لو يطيعكم في كثير من الأمر لعنتم. أه، ليه بقى الآية دي نزلت؟ قالوا: كان بعض الصحابه أشاروا على النبي عليه الصلاة والسلام لما حصل من الوليد بن عقبة بن أبي معيط ما حدث وقال ما قال، قالوا له: روح حارب على طول -يعني سمعوا كلام الوليد بن عقبة بن أبي معيط- وقالوا للنبي إيه؟ لازم الحرب. فكان النبي عليه الصلاة والسلام رأيه إنه إيه؟ لا، نتبين وننتظر، فهم بقى استعجلوا، فربنا يقول: ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾، لهلكتم.
هنا بقى فيه فايدة إدارية للكبير، ولا الشيخ، ولا المدير، ولا الأب في البيت، ولا جمِيلٌ أن تسمع، جميل جداً، وأن تستشير الناس، لكن في الآخر الرأي رأيك مش رأي حد تاني؛ ليه؟ علشان بعض الناس بالضغط من الناس اللي حواليه يقوم يعمل حاجة هو مش مقتنع بيه، وهو رأس ومَتْبَع، ففعله بيجر -هو مش بيعود عليه هو لوحده؛ لأنه رأس ومَتْبَع- لا ده فعله بيعود عليه وعلى الأتباع. فإياكم أن أنتم تقعدوا تحت التأثير ده، الناس اللي برضه متصدرة لدعوة أو الناس الآباء في البيوت أو المديرين في الشركات: اسمع، ولما أرَ من كل الناس، ودي كانت حياة النبي عليه الصلاة والسلام: ﴿وَشَاوِرْهُمْ فِي الْأَمْرِ﴾ [آل عمران: 159]. طب بعد ما شاورْت؟ ﴿فَإِذَا عَزَمْتَ فَتَوَكَّلْ عَلَى اللَّهِ﴾ [آل عمران: 159]. الآية كده، مين اللي بيشاور الناس؟ واسمع، ﴿فَإِذَا عَزَمْتَ فَتَوَكَّلْ﴾ ليه؟ لأن الرأس الرأس -يعني الرجل الكبير في قومه ولا في كذا- لابد أن هو بيكون عنده معطيات كتير بيستقي منها المعلومات، جميل، برضه شايف حاجات كتير ممكن يبقى غيره مش شايفها. ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾ [الحجرات: 7]. خلي بالكوا يا جماعة، ما قالش: في بَعْض الأمر، في كَثِير من الأمر.
طب الخطاب ده موجه لمين بقى؟ لسادات الناس، ولذلك أظن ابن مسعود أو أبو سعيد الخدري -مش فاكر يا دي ده- كان يقول إيه بقى بعد وفاه النبي عليه الصلاة والسلام؟ يقول: هذا رسول الله يوحى إليه وهؤلاء ساداتكم -أبو بكر وعمر وعثمان وعلي- لو أطُيع في كثير من الأمر لعنتم، فكيف أنتم؟ بيكلم بقى الناس اللي إيه اللي هم برضه أحسن من التابعين دول، اللي هو واحد منهم بأمة، بيقولهم: إذا كان ربنا قال للنبي وهو يوحى إليه صلى الله عليه وسلم والخطاب للصحابة: ﴿لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾ يبقى دي فايدة إدارية بقى معنا دلوقتي.
ولذلك النبي عليه الصلاة والسلام أه كان كان بيسمع، خلي بالكوا يا جماعة، أصل هو فكرة انك تسمع دي جميلة، إنما انك تبقى ده حرك وده بيحركك، ده اللي مش صح، بنسميه احنا إيه في مصر؟ «وُدْنِي»، حد يعرف اللفظ ده؟ اللفظ ده لفظ شرعي، جاء في القرآن، صح؟ ها: ﴿وَمِنْهُمُ الَّذِينَ يُؤْذُونَ النَّبِيَّ وَيَقُولُونَ هُوَ أُذُنٌ ۚ قُلْ أُذُنُ خَيْرٍ لَّكُمْ﴾ [التوبة: 61]، في قراءة طبعا قراءة حفص مش كده؟ ﴿قُلْ أُذُنُ خَيْرٍ لَّكُمْ﴾ يعني إيه هو أذن؟ المنافقين كانوا يقعدوا مع بعض كده يقولوا: ده احنا ما ينفعش نعمل الحاجة دي، فلما يُرَد يقوله: لا، اعملوها عادي، ولما يجيبكم قولوا له إيه ده: احنا نشهد أن لا إله إلا الله محمد رسول الله، وتعتذر كده وخلاص، هو بيسمع لأي حد. ﴿يَقُولُونَ هُوَ أُذُنٌ ۚ قُلْ أُذُنُ خَيْرٍ لَّكُمْ﴾ [التوبة: 61]. هو النبي كان بيعمل كده؟ أه، كان بيعمل كده صلى الله عليه وسلم فعلاً، بس بيعمل كده لأنه مش عارف؟
في قصة توبة كعب، إيه اللي حصل مع كعب؟ قعد بين إيد النبي عليه الصلاة والسلام وقال له: «لو كنت بين يدي غيرك من أهل الدنيا، لا رأيت أن أخرج من سُخطه بعذر، فقد أوتيت جَدَلاً، لكني إن حدثتك اليوم حديثاً ترضى به عني، إني لا أخشى فيه عَطَب الله -أو أخشى فيه عَطَب- أو كما قال، وإن حدثتك حديث صدق تجد فيه عَليّ، إني أرجو فيه عَطَب الله عز وجل. والله يا رسول الله ما كان لي من عذر، وكذا وكذا وكذا». ماذا قال النبي عليه الصلاة والسلام؟ قال: «أما هذا فقد صدق».
يبقى النبي عارف أن التانيين بيعملوا ايه؟ بيكذبوا، طب عمل ايه معاهم؟ استغفر لهم ووكل سرائرهم إلى الله عز وجل. ده من الإدارة، ده من القيادة اللي في وقت من الأوقات هنعمل كده، ده مش معناه أن أنا مش مش صاحي ومش دريان باللي بيحصل، مش معناه كده أبداً، لكن معناه أن المصلحة دلوقتي لا تقتضي إلا هذا: ﴿قُلْ أُذُنُ خَيْرٍ لَّكُمْ﴾ لأن أيها المنافقون لو ما عملش كده هيدبحكم، فلمُّوا نفسكم. ﴿يَقُولُونَ هُوَ أُذُنٌ ۚ قُلْ أُذُنُ خَيْرٍ لَّكُمْ﴾ على قدكم اهو في الدنيا، عندكم فرصة تتوبوا.
فدي فايدة، يبقى إيه: ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾. اتهموا آراءكم يا شباب، وده قلناه لكم قبل كده خلاص، عندك النص الشرعي ورأيك، ما تقعدش بقى إيه أنت شايف رأيك هو أحسن الآراء، يا ابني ربنا بيقول، يا ابني النبي بيقول عليه الصلاة والسلام، ما هو فيكم رسول الله وفينا سنة رسول الله الآن صلى الله عليه وسلم: ﴿لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُمْ﴾ يبقى هنا نص في مقابلة رأي وعقل، عقل من عقل، مش واحد مجتهد معه آلة الاجتهاد وبيجتهد في النصوص الشرعية، لا، ده عقلي وعقلك اللي هو ولا حاجة، خلاص، نقف مع النص ونقف مع فهم العلماء لهذا النص، وانتهى الأمر.
وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ إلى آخر الآية. الآية دي اللي بقى ارتباط بالآية قبل الأخيرة في السورة اللي هي إيه: ﴿يَمُنُونَ عَلَيْكَ أَنْ أَسْلَمُوا ۖ قُل لَّا تَمُنُّوا عَلَيَّ إِسْلَامَكُم بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ﴾ [الحجرات: 17] ناخذها المرة الجاية إن شاء الله. قول قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.