٤- فيكم رسول الله - تأملات في سورة الحجرات

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته كما صليت على آل إبراهيم إنك حميد مجيد.

أما بعد، المجلس الرابع إن شاء الله من مجالس تدبر سورة الحجرات، وكنا في آخر مرة وصلنا بقول الله عز وجل: ﴿يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا﴾ إلى آخر الآية، وبعدها قال الله عز وجل: ﴿وَاعْلَمُوا أَنَّ فِيكُمْ رَسُولَ اللَّهِ ۚ لَوْ يُطِيعُكُمْ فِي كَثِيرٍ مِّنَ الْأَمْرِ لَعِتِتُّمْ وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ * فَضْلًا مِّنَ اللَّه وَنِعْمَةً ۚ وَاللَّهُ عَلِيمٌ حَكِيمٌ﴾ [الحجرات: 7-8].

هذه الآية تعالج كذا إشكال في نفوس الناس: ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِنَ الْأَمْرِ لَعِتِتُّمْ﴾. يعني إيه الكلام ده بقى؟ احنا كنا أشرنا إليه في آخر مرة بس ما أسهبناش في شرح هذه الآية، والآية دي الحقيقة مهمة لأننا بنخاطب بها فئتين؛ فئة تصرح برد النص مثل العلمانية، وفئة تصرح بده هي ماشية بدماغها بالعقل، وتريد أن يتبعها الشرع؛ يعني لو عاوزين بقى الشرع هاتوا النصوص كده وحاولوا توفقوها على اللي احنا بنقوله.

وفئة أخرى تتكلم بلسان الشرع هي أيضا تقدم عقلها، لكنها تتكلم بلسان الشرع، ما بتقولش احنا بنخلع ربقة الإسلام من أعناقنا، مش بتقول كده، مش بتقول إن الشرع لا يلزمنا، مش بتقول كده برض، لكنها تتحايل على نصوص الشرع لتستتبعها، يعني مثلاً هندي مثال، احنا هنرجع نسحب في ده إن شاء الله وندي أمثلة، لكن مثلاً عشان نبقى فاهمين؛ يعني واحد يجي يقول إن الميراث نسوي فيه بين الرجل والمرأة، طيب أنت كده بتصادم نصاً صريحاً في الشرع الذي جعل للذكر مثل حظ الأنثيين، فيبتدي يعمل إيه؟

خلي بالك، الذي يقول هذا ليس واحد بيقول أنا علماني، أنا في حل من هذا الشرع ومن هذه النصوص، مش كده، لا، ده ربما يكون لابساً زي العلماء، إنما هو بيعمل إيه دلوقتي بقى؟ هو يصادم نصوص الشرع ويشرعن هذا الأمر، فيقول لك المصلحة تقتضي هذا الآن. وهنيجي للكلام ده بعدين، بس أنا بديكم مثال عشان تفهموا يعني إيه، احنا الآية دي بتخاطب فئتين: ﴿وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِنَ الْأَمْرِ لَعِتِتُّمْ﴾.

والآن فينا سنة رسول الله صلى الله عليه وسلم، فلو رحنا نريد أن نستتبعها لنا، تصير السنة تبعا لأهوائنا تبعا لعقولنا، شوفوا بقى إيه اللي هيجي؛ لأن الإنسان الذي يفعل ذلك هو يظن أن عقله فيه المصلحة، مش كده؟ هو يظن كده. طيب، ماذا قال الله عز وجل: ﴿لَوْ يُطِيعُكُمْ فِي كَثِيرٍ مِنَ الْأَمْرِ لَعِتِتُّمْ﴾؛ اللي أنتم فاكرين بعقولكم إنه هو المصلحة هو مش المصلحة ولا حاجة، دي عقولكم القاصرة، المصلحة فيما قاله الله وفيما قاله رسول الله صلى الله عليه وسلم.

وإن رأت عقولكم المصلحة في خلاف ذلك فاتهموا عقولكم، مش تتهموا النصوص الشرعية خلاص، بأي حجة بقى؟ لأن بعض الناس بتتهم النصوص الشرعية بحجج، يعني يقول لك: أصل هي نازلة من ألف وأربعمائة سنة، واحنا دلوقتي العصر! طيب الله عز وجل الذي أنزل تلك النصوص، ألم يكن يعلم أن هيجي عصر وزمان غابر مثل الذي نحن فيه، وأن النصوص دي مش هتصلح ليه يعني؟

ولا هو الذي أنزل الشرع وجعله الشرع الخاتم، ويعلم سبحانه وتعالى أنه يصلح لكل زمان ومكان، بل الجمله دي حتى فيها قصور، بل لا يصلح زمان ولا مكان إلا به أصلاً؛ بهذا الشرع وبهذه النصوص. يبقى من راح يصادم النصوص، وتريد أن تتبعه النصوص لا أن يتبع هو النصوص، حكم الله عز وجل عليه بالعنت، بالمشقه، سيقع في المشقة: ﴿لَوْ يُطِيعُكُمْ فِي كَثِيرٍ مِنَ الْأَمْرِ لَعِتِتُّمْ﴾.

أبسط مثال ذكرناه هنا قبل كده، لكن ما ذكرناش خاتمة هذا المثال، ودي التي تعنينا، لما أراد عمر أن يقتل رأس النفاق عبد الله بن أبي بن سلول، ونهاه النبي صلى الله عليه وسلم عن قتله وقال: «يتحدث الناس أن محمدا يقتل أصحابه». لغاية هنا احنا تاملنا هذا الأثر من قبل مراراً وتكلمنا فيه في فكرة إيه؟ أننا نعتبر المقالات.

فاكرين؟ طيب، في بقى تكمله للأثر ده ذكرت في بعض المصادر، وهو أن لما عمر لم يقتل عبد الله بن أبي وظل عبد الله بن أبي يقع في الرسول صلى الله عليه وسلم، ابتدى قوم عبد الله بن أبي هم الذين يعنفونه ويصدونه عن فعله هذا، وأن النبي صلى الله عليه وسلم أتى بعمر وقال: أرايت؟

طيب، لو كان عمر رضي الله عنه قتل عبد الله بن أبي، كانت هتبقى أولاً يتحدث الناس أن محمداً يقتل أصحابه، خلصنا من دي. وأن الكفار مش هيطلعوا تاني يوم على الفيسبوك ولا على التيك توك ولا برامج التوك شو يقولوا: منافق واتقتل! مش هيقولوا كده، صح؟ المنشور هينزل على الفيسبوك هيبقى إيه؟ أن محمداً يقتل أصحابه، إرهابيين.

مش هيقولوا منافق وواقف يقع في النبي صلى الله عليه وسلم وحكمه القتل، مش هيقولوا كده، مش هيطلعوا يقولوا كده، هيقولوا: رجل يقتل أصحابه الذي يروح له لا يأمن على نفسه، أهو آمن به وفي الآخر قتله. خلصنا من دي، لكن كان حاجة تانية هتحصل يا جماعه، هي إيه بقى؟ أن المؤمنين أنفسهم ربما اقتتلوا فيما بينهم. ليه؟

هم لسه حديث عهد بجاهلية، وأنفَة العرب دي لسه موجودة عندهم، فهيرروح سيدنا عمر يقتل عبد الله بن... الأول عمر رضي الله عنه منين؟ قرشي، من مكة، مش كده؟ وعبد الله بن أبي منين؟ مش مهم منين، مش قبيلة إيه، بس هو من المدينة ولا من مكة؟ من المدينة، مش كده؟ بداية كده، عندنا قرشيين وعندنا يثريبيين.

بداية، خلي بالكم يا جماعه، اللي أنا بقوله ده ما حدش يقول: معقولة ده منافق، قوم المؤمنين آه؟ طب خدوا المفاجأة دي، الآية اللي جاية بعد شوية: ﴿وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا﴾ [الحجرات: 9]، مما قيل في سبب نزولها هو ده! أن عبد الله بن أبي بن سلول وقع في النبي صلى الله عليه وسلم فقام واحد من المؤمنين اتنرفز، وده من الأوس وده من الخزرج، وأصلاً كان بينهم أحن وضغائن أصلاً.

اتنرفز عبد الله بن أبي بن سلول، وقع في النبي وقال إيه؟ كان النبي عليه الصلاة والسلام راكباً يركب حماراً، وبعدين بال الحمار، فقال: نحي حمارك عنا، فقد أصابنا أذاه. فقام واحد من المؤمنين قام وقال: لحماره أطهر منك! فقام إليه عبد الله بن أبي بن سلول فتقاتلا، جئت الأوس والخزرج وصار بينهما قتال بالجريد والنعال، مش بالسيوف، ما طلعش سلاح، ده كله عشان مين؟ عشان عبد... عشان هذا الرجل عبد الله بن أبي بن سلول.

طيب ليه؟ عشان الأنفَة اللي في العرب دي، حديث عهد بجاهلية، وممكن جداً في ثانية الدنيا تولع. هنيجي إن شاء الله للآية دي.

نرجع تاني بقى، فالنبي صلى الله عليه وسلم لما حصل كده وابتدى بقى قوم عبد الله بن أبي بن سلول هم اللي يوقفوه عند حده، أتى بعمر وقال: أرايت؟ خلاص يا جماعه، وده حصل كتير للصُّحابة وذكرنا منه أمثلة قبل كده، فكرة أنك تقدم عقلك على النص، ولا تقف على النص حتى لو أنت ما أنتتاش عارف حكمة النص.

ذكرنا أمثلة كتير في المسجد ده قبل كده، ممكن نذكر مثال أو اثنين علشان برده الدنيا تنور؛ لما مات النبي عليه الصلاة والسلام، ودي كانت فتنة كبيرة جداً، موت النبي عليه الصلاة والسلام كان بلاء شديد على المؤمنين، واللي جاي كمان بقى اللي هو إيه؟ النبي قبل ما يموت عليه الصلاة والسلام، كان قد أنفذ جيشاً خارج المدينة، وبعدين مات النبي عليه الصلاة والسلام -صلوا على النبي-. القبائل حوالين المدينة عرفوا بموته، فبعض القبائل ابتدت يحصل ليها إيه؟ ترتد.

هنا وقف الصحابة وابتدوا يفكروا في المصلحة -احفظوا كلمة المصلحة دي يا جماعه عشان هرجع لها كمان شوية- لأن كل شرع يخالف الآن، يخالف تحت ذريعة المصلحة، كل نص يصادم يصادم تحت ذريعة المصلحة. واشترك في ذلك للأسف الشديد، للأسف، ويعني الواحد حزين وهو بيقول ده، اشترك في ذلك الفئتان جميعاً: من يرفض الدين رأساً، ومن ينافح عن دين.

عندنا فئة هي بتقول: احنا بننافح عن الدين، واحنا هنا علشان نحفظ الدين ونحمي حوزة الدين، لكن تعال نخش في التفاصيل، يخالفون كثيراً من نصوص الدين! طيب يا جماعه، ده في نص المصلحة؟ هنرجع للكلام ده تاني إن شاء الله، بس احفظوا كلمة المصلحة دي عشان هتيجي معانا.

فهنا الصحابة وقفوا وفعلا فكروا، يا جماعه فعلاً، يعني هو أصل أي خبير استراتيجي تجيبه وتقول له دلوقتي الجيش بتاعنا ساب العاصمة وخارج بره، والحِتت اللي حوالين العاصمة ابتدت ترتد، يعني ممكن يحصل إيه والجيش بره بعيد بقى؟ يحصل إيه؟ يجوا علينا، خلاص احنا انتهينا، ما هي العاصمة لو احتلوا العاصمة، خلاص انتهت! فقالوا: خلاص، نرجع الجيش هنا.

دلوقتي الصحابة بتتكلم بإيه يا جماعه؟ بعقل، مش كده؟ أبو بكر الخليفة بقى هو قراره، آه، نقعد نشاور، وده فرق بين الديمقراطية وبين الشُّورى الإسلامية؛ في الشُّورى آه هنقعد نشاور وهسمع كل الآراء، وفي الآخر هو قرار مين؟ الأغلبية؟ لا خالص، ده كل اللي قاعدين قالوا حاجة، لكن ولي الأمر، الخليفة، يرى شيئاً آخر.

شاور في الأمر، مش مستبد بالرأي، لكن في الآخر دي سلطته، دي حتته. قالوا: رجع الجيش، بعقل، بأي شيء أجاب أبو بكر؟ ما رد العقل بعقل، خلي بالكم، هو رد العقل بنص! فهي بيفكروا بعقل، ده وحش؟ لا، مش وحش، في وقت في وقت هنعمل العقل وفي وقت هنتكلم بلفظ المصلحة، هنيجي للكلام ده كمان شوية إن شاء الله ونشوف ترتيب المصلحة ده فين.

لكن مع وجود النص، أبو بكر رضي الله عنه وقفه، قال إيه؟ قال: والله لو دخلت الكلاب فجرت أمهات المؤمنين من أرجلِهِن في سكك المدينة، ما رددت جيشاً أنفذه رسول الله! كان أبا بكر ررى أن إنفاذ النبي صلى الله عليه وسلم للجيش رآه نصاً، النبي عليه الصلاة والسلام قال: سيروا، امضوا، أمر، خلاص، أنا مش هقدر أقول ارجعوا، مش هعرف اعملها.

طيب ده الناس ترتد! طب ده الوضع اختلف! هو ما سلمش نفسه للحته دي، ما سلمش نفسه للحته دي أصلاً، يعني ما قالهمش: طب تعالوا كده بالعقل نفكر. طب لما، خلي بالكم يا جماعه، احنا هنا مش في موطن -انتبهوا يا جماعه- احنا مش في موطن مع تجاوز في اللفظ، يعني مش في موطن دروشة خالص، مش وقته، يعني إيه مش وقته؟ أقل خطأ في قرار شبيه ده يمكن يأتي على إيه؟ على الإسلام! فاحنا مش في موطن ده.

يعني إيه مش الكلام شكله جميل، وأنا بقى بقول بالنص لا؟ يعني أبو بكر لما قال كده، هو مش بيقول كده، مش بيقول كده دروشة، لكن هو فعلاً يرى أن المصلحة هنا حتى لو مش فاهمين -أنتم فاهمين عاوز أقول إيه يا جماعه؟- يعني ممكن يبقى أبو بكر وقتها مش شايف إيه اللي هيحصل، يعني ما عندوش رؤية مستقبلية باللفظ الدارج أو الحادث، ما عندوش رؤية مستقبلية لإنفاذ الجيش.

وعشان كده قال كلمته، هو ما قالش إيه، قال: يا جماعه إن شاء الله يبقى الخير في إنفاذ الجيش، ولا أصل ممكن لو فكرنا بشكل آني؟ هو ما قالش كده، هو قال: لو دخلت الكلاب فجرت أمهات المؤمنين من أرجلِهِن في طرقات المدينة، ما رددت جيشاً أنفذه رسول الله، مش هعمل، مش أخالف نص.

هنا برض عايزين نقف وقفة تانية، لما قال كده الصحابة قالوا إيه بقى؟ حرام عليكم، منك لله وأنت هتضيع الأمة! ما إن رأوا أبا بكر قد شرح الله صدره لهذا، إلا أذعنوا، خلاص، آه هنقعد ونختلف والأمر شورى بيننا، وبعدين صدر الأمر انتهت، خلاص، فريق واحد، يد واحدة على من سوانا.

مش هنعمل إيه بقى؟ مش هننزل تحت نرجف: "وهو لو كان سمع كلامنا ما كانش زمان حصل اللي حصل"! مش كده؟ قلنا ده في الخطبة، خطبة الجمعة، مش في الدرس؛ في غزوة مؤتة قعدوا ليلتين قبل غزوة مؤتة، ليلتين يا جماعه الصحابة، لما راحوا هم كانوا كام واحد؟ 3000، مش كده؟ الكفار 200 ألف!

يعني كل واحد قدامه كام تقريباً؟ 70 بني آدم! الواحد من المسلمين قدامه 70 تقريباً من الكفار! أنتم فاين الرقم ده؟ فاهمين الرقم ده؟ لو واحد قدامه 70 في الحقيقة، طب فاهمين بقى لما يبقوا 3000 قدامهم 200 ألف، يعني تخيلوا المشهد يا جماعه! المشهد ده أول ما حصل، أبو هريره حصل له إيه؟ برق بصره، مش... يعني مش أبو هريرة، ما حضرش غزوة بدر، اللي ثبته بقى؟ اللي حضر غزوة بدر الرقم، يعني الـ 200 ألف دول لو ظهروا لـ 3000 يتبلعوا خلاص! لو حد شاطر فيكم يعرف يعمل ده على أي برنامج، يعني يجيب.

يعني يعملها كده النسبة دي فعلا حقيقية، ويبعتها لي حد يعرف يعمل الكلام ده يعني يوقف 3000، يجيب 3000 واحد قدامهم 200000 يعني عشان نتخيل الشكل هيبقى عامل إزاي بس.

لو حد يعرف يعمل دي يبعتها لي وهننزلها إن شاء الله على القناة؛ عشان بس نشوف المنظر، نتخيل المنظر ده شكله إيه.

المهم يا جماعة، إيه اللي حصل؟ فضلوا ليلتين أول ما عرفوا 200000 دي، فضلوا ليلتين بيتناقشوا أمر كبير، يعني إحنا مش في موطن دروشة، إحنا مش جايين هنا نقول كلام شكله حلو لكن في الآخر يبقى القرار خاطئ ونتأكل كلنا.

إحنا لما بنقعد نتناقش بنتناقش وعينينا شايفة المصلحة، ليه أنا بقول الكلام ده؟ عشان لما نجي لكلمة مصلحة دي كمان شوية، اللي بيتكلموا بالمصلحة فاكرين إن التانيين ما يعرفوش حاجة عن المصالح، دراويش دول بتوع جوامع.

فليقولوا مثل ذلك على أبي بكر رضي الله عنه! فليقول مثل ذلك على من وقف وثبت المسلمين في غزوة مؤتة! مين كان أول واحد منهم الذي يعني وصل إلينا كلامه؟ عبد الله بن رواحة، مش كده؟ وقف: أنتوا في إيثار الذي منه تفرون للذي لأجله خرجتم، أو الذي خرجتم تطلبون الشهادة، أنتوا إيه؟ إحنا واقفين بنتناقش في إيه؟ المهم ثبتهم بكلام مش قضيتنا دلوقتي، اتفقوا على أنهم إيه يغزوا.

ما يجيش بقى واحد يقول لك إيه: لا بقى مش لاعب، ما أنا قلت لهم ما سمعوش كلامي، يروحوا بقى هم إيه؟ ما حدش عمل كده، كلهم راحوا الغزو، صحيح في فئة بعد كده فرت وانحازت إلى النبي في المدينة صلى الله عليه وسلم، وكان منهم ناس يعني عبد الله بن عمر كان من هذه الفئة، ودي مسألة تانية وتكلمنا عنها قبل كده لما قلنا لكم إيه الجهاد زي ما هو ذروة سنام هذا الدين، ما تفرحش قوي لأن إيه الفرار يوم الزحف من أكبر الكبائر، وإن كان في هذه الغزوة لم يكن فراراً من الزحف ليه؟ لأنه انحاز إلى النبي صلى الله عليه وسلم، وقال النبي: أنا فئة كل مؤمن، لقوله تعالى في الآية إيه؟ أو إيه؟ ﴿إِلَّا مُتَحَرِّفًا لِّقِتَالٍ أَوْ مُتَحَيِّزًا إِلَىٰ فِئَةٍ﴾ [الأنفال: 16]، يعني اللي يسيب الميدان عشان يتحيز لفئة من فئات المسلمين ده ما فيهوش مشكلة.

وبعدين أصلاً له إنه يفر طالما العدد أكتر من كام قدام كام واحد؟ قدام اتنين، مش كده؟ كان الأول واحد قدام 10 وبعدين بقى واحد قدام اتنين، مش وقت المسألة الفقهية دي.

واعلَموا أن فيكم رسولَ الله، لو يطيعكم في كثير من الأمر لعنتم، يعني لو كان لو أردتم أن الشرع كلما اقترحت عقولكم اقتراحاً اتبعه الشرع، اعرفوا أن ده مش مصلحة لكم، ده هيكون في عنت ومشقة لكم لو عاوزين الشرع يكون بهذه المرونة، والشرع يا جماعة هو مرن في حتت فعلاً التي تنصلح بها الأحوال، بمرونات الشرع فيها، يعني الشرع الحته اللي ينصلح بها الحال لو كان مرناً فيها هو مرن فيها فعلاً، وتلاقي الكلام فيها في الشرع بعمومات ويختلف فيها العلماء وكذا يعني.

المهم إيه؟ مش وقت ده، إنما في حتت في الشرع ما فيهاش الكلام ده، بلاش تقربوا منها، ليه؟ لأن حتى لو عقولكم شافت أن المصلحة في خلاف الشرع، اعرفوا أن الموضوع مش كده.

أبو بكر لما وقف بالنص، بقى البركة كانت فين؟ في النص، حد كان قال وقتها أن هيحصل كذا كذا؟ ما حدش يعرف اللي هيحصل، طلع الجيش بقى يمر على القرى التي هي إيه؟ ارتدت دي، يبصوا على قوة الجيش، يقولوا بقى الجيش ده كله أنفذوه وهم عارفين أننا بنرتد، أمال إيه اللي محوشينه لنا في المدينة بقى؟ ما يعرفوش في إيه، ما فيهاش حاجة بس هم قالوا إيه: طالما الجيش ده كله طالع يبقى هم شايلين لنا إيه في المدينة؟ فتلموا لما رأوا قوة المسلمين، وكانت البركة في اتباع النص حتى لو خالف العقل.

فاحفظوا يا جماعة القاعدة دي: إحنا بنعمل العقل في فهم النص لا في رد النص، لو كان الدين بالرأي لكان أسفل الخف أولى بالمسح من أعلاه، كلام سيدنا علي.

يعني إيه؟ لو الدين بالرأي لو بالعقل كده أنت بتمشي اللي بتتوسخ اللي تحت ولا اللي فوق في الخف؟ اللي تحت، أما تيجي تتوضأ تمسح تحت ولا فوق؟ تحت، لو كان الدين بالرأي لكان أسفل الخف أولى بالمسح من أعلاه، أمر الدين بإيه؟ سيدنا علي بيقول، وإحنا جايبين الأثر عشان الحته دي، عشان الحته دي بس، قال: ولقد رأيت رسول الله صلى الله عليه وسلم يمسح أعلى الخف، يبقى الدين بالنص لا بالعقل ولا بالرأي.

والله إني لأعلم أنك حجر لا تنفع ولا تضر، كلام مين؟ سيدنا عمر، لإيه؟ الحجر الأسود، طيب يعني بالعقل تروح تبوس الحجر ده؟ بالعقل لا، خصوصاً إحنا بنكلم ناس حديث عهد بإيه؟ بعبادة أصنام، فبالعقل كده: والله إني لأعلم أنك حجر لا تنفع ولا تضر، ولولا أني رايت رسول الله يقبلك صلى الله عليه وسلم ما قبلتك.

سيدنا عمر هنا بيعمل إيه؟ بيلغي عقله، ليه؟ عشان في نص، خلاص يتبع النص، طبعا سيدنا عمر يعني ربي على يد النبي صلى الله عليه وسلم في هذه المنطقة، يعني منطقة إيه تقديم العقل وبتاع في صلح الحديبية، مش كده؟ اه، بالعقل كده لما نعطي الدنية في ديننا، بالعقل، النبي رد رد بنص، عليه وسلم: إني رسول الله ولست أعصيه، يبقى في إيه؟ في نص هنا، في نص من ربنا خلاص، لست أعصيه، ما ردش على عمر بالعقل، ما قالوش ما هو يمكن يحصل يمكن، ما عملش كده النبي عليه الصلاة والسلام، رده إلى النص.

واعلَموا أن فيكم رسولَ الله، لو يطيعكم في كثير من الأمر لعنتم، يبقى اعلموا أن فيكم سنة رسول الله، لو أردتم أن تتبعكم السنة فيما تذهب إليه عقولكم على طول الخط لعنتم.

خلي بالكم يا جماعة، إحنا هنا بنكلم مين بقى دلوقتي؟ بنكلم فئة مارقة، هي بتقول بتقول إحنا مش بتوع دين، إحنا هتلاقينا في الخمارات وهتلاقينا بنزني، وإحنا مش بتوع دين، هم بس بيقولوا إيه: خلوا النصوص تتبعنا، لو أنتم عاوزين عاوزين يبقى الدين ليه إيه شكل في الدولة؟ هو بيقولوا كده عن نفسهم يعني، بيقولوا كده خلاص، مش لازم كلهم يبقوا في الخمارات طبعا ما أقصدش كده يعني خلاص، لكن هم بيقولوا إحنا في حل من ده.

لكن في فئة تانية بقى ودي اللي تعنينا، لا، دول أهل ديانة، أهل ديانة، وأقصد أهل ديانة يعني فعلاً عندهم دين، عندهم دين فعلاً، طيب ممكن يخالفه؟ أه ممكن يخالفه.

إزاي؟ طب شوف الآية كده اللي معانا والآية اللي معانا بتكلم مين؟ هو دلوقتي لما ربنا بيقول: واعلموا أن فيكم رسول الله، يبقى الخطاب لمين يا جماعة؟ لو يطيعكم في كثير من الأمر لعنتم، الخطاب لمين؟ الخطاب للصحابه يا جماعة، وبيقول لهم كده، أبو سعيد الخدري تلمح المسألة دي، قال: هذا رسول الله صلى الله عليه وسلم وخير الأئمة، يعني معاه خير الأئمة الصحابه، واعلموا أن فيكم رسول الله لو يطيعكم في كثير من الأمر لعنتم.

أه، يبقى الصحابة أئمة الهدى قيل لهم هذا، اللي بيخالف ده بيخالف بإيه؟ المصطلح الأشهر طبعا هو في كذا باب بيدخلوا منه، لكن المصطلح الأشهر اللي هتسمعوه كتير: كلمة المصلحة، ماشي؟ وبعضهم يدخلها يدخل حاجات كتير من اللي عايشين دلوقتي في مصطلح لو حد سمعه: المصلحة المرسلة.

حد سمع المصلحة قبل كده؟ ولا واحد في الجوامع سمع كلمة مصلحة مرسلة خالص؟ طيب ما حدش درس أصول فقه هنا خالص؟ أصول فقه، درس أصول فقه؟ طيب أنا هسال سؤال في أصول الفقه، سؤال سهل مش صعب، دلوقتي لما بيجوا في كتب الأصول وبيدرسوا حاجة اسمها المصلحة المرسلة، وفي عندنا حاجة اسمها المصلحة المرسلة هنقولها، بس حد يعرف دي بتيجي فين؟ في الأول، في النص، في الآخر؟ حد يعرف ترتيبها فين في الأدلة؟ اتفضل.

في الآخر خالص، ده آخر حاجة قبل ما ندخل على الأدلة الغير معتبرة كالإستحسان وغيرها، خلاص آخر حاجة.

الأول إيه المصلحة المرسلة دي يا جماعة؟ ركزوا خمس دقائق، أصول الفقه من أصعب العلوم، هنحاول نبسط المسألة بس لازم نفهمها؛ عشان يبقى عندنا حصانة لما نجي نسمع الكلمة دي.

يعني إيه مصلحة مرسلة؟ دلوقتي يا جماعة عندنا المصالح ثلاث أنواع: مصلحة اعتبرها الشرع، ومصلحة لم يعتبرها الشرع، ومصلحة أطلقها الشرع، سكت عنها الشرع، لا اعتبرها ولا ما اعتبرهاش، مفهومة دي لغاية هنا؟

طيب، مثال للمصلحة التي اعتبرها الشرع، دلوقتي لما نجي نقول الجهاد في سبيل الله، في مفاسد ولا ما فيهوش؟ في قتل أنفس، والنفس دي واحدة من خمس ضروريات جاء الدين للحفاظ عليها، الدين كله جه عشان يحافظ على خمس حاجات كبيرة كده منها النفس، فالجهاد في إيهاء تلك الأنفس أصلاً، مش كده؟ وفي ضياع بعض المال، والمال دي واحدة من خمسة اللي الشرع قتل يحفظها أصلاً.

المهم في مفاسد في الجهاد؟ أه، في مفاسد في الجهاد، لكن في مصالح قدام المفاسد دي أعظم: مصلحة حفظ الدين، المصلحة دي في الموطن ده الشرع اعتبرها ولا ما اعتبرهاش؟ إيه رأيكم إيه يا جماعة؟ اعتبرها؛ لأن الشرع شرع الجهاد، مش كده؟ يبقى المصلحة دي معتبرة في الشرع ولا مش معتبرة؟ معتبرة.

طيب، مصلحة ملغية في الشرع زي إيه؟ دلوقتي الخمرة فيها مصالح ولا ما فيهاش مصالح؟ فيها مصالح، فيها مصالح ممكن تكون مصلحة في نفسها، ممكن مصلحة في التجارة تجارة الخمر، نقول إيه بقى؟ يبقى فيها رواج للمش عارف إيه وازدهار للتجارة وكذا وكذا، فيها مصالح، هذه المصالح اعتبرها الشرع؟ لم يعتبرها مع نصه عليها، مع نص، يعني إيه؟ يعني الشرع نص أن في مصالح في الخمر، ﴿يَسْأَلُونَكَ عَنِ الْخَمْرِ وَالْمَيْسِرِ ۖ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَا أَكْبَرُ مِن نَّفْعِهِمَا﴾ [البقرة: 219]، يبقى فيها منافع ولا ما فيهاش منافع؟ فيها منافع، أهدرها الشرع، لغاها الشرع، يسموها مصلحة ملغاة، يبقى في مصلحة اهو بس ملغاة، مفهومة دي؟ واخدين بالكم أن هنا مصلحة اعتبرها الشرع، ومصلحة لغاها الشرع؛ لأن فيها نصوص شرعية دي، نعتبر دي في..

في بقى مصالح الشرع ما تتكلمش عنها، مصالح الشرع ما تتكلمش عنها، فما نبقاش عارفين هي معتبرة ولا ملغاة، بيسموها المصلحة الإيه؟ المرسلة، مرسلة يعني مطلقة، أرسلها الشرع، مش عارفين هي مصلحة ملغية ولا مصلحة.. مش عارفين، فهمتوا يعني إيه مصلحة مرسلة يا جماعة؟ اهو ده من أوسع الابواب اللي بيدخل منها تلك الفئة على في مصادمة النصوص الشرعية.

أنا ليه سالتكم السؤال بتكون فين في كتب أصول الفقه؟ لأن فعلاً يا جماعة المصلحة المرسلة دي أو فكرة كلمة مصلحة دي لا نذهب إليها أصلاً إلا بعد إفراغ الوسع في البحث عن النصوص الشرعية، يعني الأول في أصول الفقه يتكلموا عن الكتاب وعن السنة وعن الإجماع وعن القياس، وبعد ما نخلص كل ده بالخناقات اللي فيه، بالخلافات اللي فيه، بال.. تلاقيهم يتكلموا عن المصلحة المرسلة.

وأصلاً المصلحة المرسلة اختلف العلماء أصلاً في كونها دليلاً، منهم من ذهب إلى أن أه دي دليل، زي الإمام مالك، ومنهم من قال لا، زي الشافعي، ومنهم اللي قال هنروح لها بس بشروط، قيدها قوي زي الغزالي، يعني اعتب.. هيبتدي يروح للمصلحة، لكن بشروط، يقول لك لازم تبقى كلية ضرورية يقينية، وعشان بقى تثبت دي عيش، مش لازم ندخل فيهم دلوقتي، بس يعني قصة كبيرة.

ففي خلاف بين العلماء أصلاً، لا يا سيدي هناخد بالمصلحة المرسلة، يعني إيه هناخد بالمصلحة المرسلة؟ يعني تهجم على المسائل الكبيرة في الأمة واللي هيتبعك عليها اتباعك من باب المصلحة، أنت كده نطيت من الشباك، أنت ما دخلتش من الباب.

أمَالَ المفروض نعمل إيه؟ المفروض الأول نبحث في الكتاب والسنة، ده أول حاجه، مين اللي يبحث؟ المجتهد، يبحث في الكتاب في النصوص، فإذا أعوزتنا النصوص نذهب إلى المصلحة، حد فاهم حاجة؟ مش لازم التفاصيل عشان لو نزلنا بقى في على الأمثله يعني الناس هتزعل.

المهم حد فاهم ده؟ فلما تلاقوا أي حد واقف يقول لك: أصل المصلحة والمفسدة، الكلمة دي هتسمعوها كتير، هو إحنا دلوقتي إحنا دراويش؟ إحنا مش دراويش، اللي قاعدين في الجوامع دول مش ناس دراويش، مش ناس ما تعرفش مصلحة ومفسدة، لكن هي هي ناس تعلم ترتيب المصلحة والمفسدة يجي فين في الشرع.

مثال: أبو بكر مع الصحابة، المصلحة في عدم إنفاذ الجيش، والنص بإنفاذ الجيش، هنقدم إيه؟ هو ده السؤال ببساطة، هنقدم النص، اه بقى المصلحة هنا هذه المصلحة لا ينظر إليها أصلاً؛ لأنها تصادم نصاً.

وتلاقي بقى بعض هؤلاء، أنا بتكلم دلوقتي مين؟ فئة متدينة، فئة فعلاً يعني نحسبها كذلك، هتلاقيها واحدة واحدة خلاص في انحلال في حتت؛ ليه؟ لأن العالم اللي إحنا عايشين فيه يا جماعة بسرعة وتيرته، ما فيش رفاهية أنك لو أقحمت نفسك في شيء في كل تفصيلة منه تقعد تجتهد عشان تشوف حكم التفصيلة دي مع أن ده الواجب الشرعي، يعني أعذروني الدرس ممكن يبقى تقيل شوية، الدرس ده مهم جداً، من أهم الدروس اللي ممكن نكون أديناها في المسجد.

دلوقتي يا جماعة دلوقتي، إذا حدثت حادثة، ركزوا في الكلام ده يا جماعة الله يكرمكم، إذا حدثت حادثة حصلت، خصوصاً بقى لو حادثة تعم الأمة أو تعم فئة من الأمة أو طائفتك أو جماعتك أو حزبك أو حادثة مش لك مش في خاصة نفسك، لا، ده في..

والفرعي تجاه الحادثة دي إيه؟ أن يجلس المجتهد ليحصل أدوات الاجتهاد ويجتهد ليخرج لنا بحكم في تلك الحادثة. مفهوم الكلام ده؟ مفهوم، كله فاهم؟

طيب، اللي بيحصل إيه؟ اللي بيحصل ده لا يا جماعة، ده ما بيحصلش. أنا بقول لكم ده ما بيحصلش. يعني إيه ما بيحصلش؟ يعني إ: حنا خلاص قعدنا واتفقنا هنخش في كذا، هنعمل كذا، بقينا في الحته الفلانية، طب واحنا في الحته الفلانية قابلتنا حادثة، هنروح مكلمين فلان في التليفون نعمل إيه في التليفون؟ بيجي الرد: هذا ليس دينا قولا واحدا بإجماع علماء الأمة، هذا ليس دينا ده بالاجماع. هذه حادثة نازلة بالنسبة لك لم تطرق سمعك إلا الآن، بافتراض أنك راجل مجتهد حصلت أدوات الاجتهاد، المفروض أعمل إيه؟ أقفل، دي حادثة، دي نازلة، أنا يعني ماليش حكم فيها، أنا هقعد وأنكب على نصوص الكتاب والسنة وأقرا كلام العلماء. ما هو الاجتهاد قالوا إيه؟ بذل الوسع، استفراغ... ده تعريف الاجتهاد في أصول... في كتب الأصول، استفراغ الوسع. ده هيحصل في مكالمة إزاي؟

طيب، ليه بنعمل كده؟ بنضطر نعمل كده ليه؟ لأن ما عندناش الرفاهية دي، وتيرة الأحداث أسرع منا. فيحصل إيه مع تراكم هذا خطأ ورا خطأ ورا خطأ بدعوة لإيه بقى؟ المصلحة، اللي هي فين ترتيبها في الشرع؟ في الآخر. يعني أنتم ما بتعتبروش مصالح مفاسد؟ ما فيش مسلم، بلاش ما فيش مسلم، ما فيش عاقل في الدنيا دي يقول: أنا ما بعتبرش المصالح، ما فيش عاقل يقول كده أصلاً، مش مسلم. هات واحد ملحد لا يؤمن بدين، وقول له: أنت بتعتبر المصالح والمفاسد؟ يقول لك: طبعا لازم أعتبر المصالح والمفاسد. فيعني إيه السيف المسلط ده، اللي هو أنتم ما تعرفوش مصالح؟ مين قال كده؟ مين قال كده؟

لكن احنا بنقول: ترتيب المصلحة والمفسدة في دين الله عز وجل، ترتيب أنك تقول دي تحت بند المصلحة المرسلة، يجي امتى؟ لما تستفرغ وسعك وتلاقي أن نصوص الشرع ما فيهاش لا اعتبار ولا إلغاء لتلك المصلحة، ساعتها نقول دي مصلحة مرسلة، يلا بقى نشتغل في المصلحة المرسلة. سلام. فهمتوا الكلام ده؟ الكم دقيقة اللي فاتوا دول طالوا مننا شوية، لكن لو فهموا عصمة بإذن الله عز وجل ل... يعني في وجه كثير من الفتن التي تسمعونها اليوم. خلاص، بس حاولوا بقى تقعدوا وتسقطوا الكلام ده على ما ترونه.

واعلموا أن فيكم رسول الله لو يطيعكم في كثير من الأمر لعنتُم. يبقى احنا هنا اتكلمنا شرع، الآية دي فيها معنى ثاني بقى، معنى إداري. واعلموا أن فيكم رسول الله لو يطيعكم في كثير من الأمر لعنتُم، يعني لو هنا بقى بنتكلم إدارة، وهذا تلمحه بعض المفسرين في هذه الآية قالوا إيه؟ قالوا: لاصبح الرئيس مرؤوساً واختل النظام، فكرة أن يبقى فيه مدير، يبقى فيه رأس وهو ضعيف، فأي حاجة تتقال له يا... يمشي وراها، هنا يختل النظام. يختل النظام ليه؟ لأن الرعية لو عرفت كده أو المرؤوسين أو المدبوعين لو عرفوا كده في... يعني ضعف شخصية القائد أو الرئيس وأنه أي حاجة بيمشي وراها وأنه أي كلمة بيسمعها ويصدقها وأنه أي... مش عارف إيه، هيعملوا إيه؟ هيلعبوا بيه الكورة مش كده؟ فتلمح هذا بعض المفسرين، قال: إذا لصار الرئيس مرؤوساً ولاختل النظام. وعشان كده قال الله عز وجل: ﴿لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ﴾ [الحجرات: 7]، لأن هنا النظام هيختل.

خلاص، ماشي. طيب، النبي عليه الصلاة والسلام ذمه القوم بهذا النوع مش كده؟ ويقولون هو إيه؟ هو أذن بيسمع لأي... قل أذن خير لكم. قلنا لكم دي قراءة قل أذن خير لكم، هو هنا يقولون هو أذن (يعني بيسمع ويصدق)، لكن هو صلى الله عليه وسلم كان بيسمع فعلاً لكن ما بيصدقش يا جماعة. في محتاجين حكمة النبي عليه الصلاة والسلام في التعامل مع المواقف. النبي يسمع عليه الصلاة والسلام وقد لا يبدي تكذيباً، ودي مهاره مش سهل أن حد يوصل لها، أنك تبقى قاعد ووشك زي ما هو مصدق زي مكذب، غضبان زي فرحان، دي مهاره. طب الدليل إيه؟ النبي عليه الصلاة والسلام يرجع من غزوة تبوك، ويجوا المنافقون يقعدوا يعتذروا له ويقولوا له: استغفر لنا. يستغفر لهم ويقوموا، وبعدين يجي مين؟ كعب رضي الله عنه، فيقول الكلام اللي كلنا أعلمه، فالنبي يقول إيه؟ يعقب بكلمة واحدة: أما هذا فقد صدق. يبقى النبي عارف أن الباقيين بيعملوا إيه صلى الله عليه وسلم؟ بيكذبوا.

آه، اتعامل إزاي بقى؟ دي قصة ثانية، أنا عارف أنهم بيكذبوا، المصلحة دلوقتي بقى أن أقول لهم أنتوا كذابين؟ يلا تعالوا ده أنا فاضحكم؟ ده لا، خالص خالص. سئل أعرابي، قلناها في التعامل الزوج مع الزوجه: من العاقل؟ قال: الفطن المتغافل، أنا فاهم بس هعمل إني مش فاهم، الفطن المتغافل. ليه مش وقت دلوقتي أن أعمل إني فاهم؟ مش وقته.

خلاص. ﴿وَاعْلَمُوا أَنَّ فِيكُمْ رَسُولَ اللَّهِ ۚ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ﴾ [الحجرات: 7]. هنا العلماء قالوا: واعلموا أن فيكم رسول الله الخطاب ل... يعني الخطاب في الآية كله للمخاطب، واعلموا أن فيكم رسول الله يبقى مخاطبون وبعدين ولكن الله حبب إليكم أهو؟ هل هم... بعض العلماء ذهب: آيوة الكلام يشمل الجميع. وبعض العلماء قال: لا، دي فئة ودي فئة، الفئة الأولى غير الفئة الثانية، الفئة اللي عاوزه أن الشرع يبقى تبع للهوى وتبع للعقل دي فئة، وفئة تانية بقى قد رسخ الله الإيمان في قلوبها دي فئة تانية خالص. على كل حال: ﴿وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ ۚ أُولَٰئِكَ هُمُ الرَّاشِدُونَ * فَضْلًا مِّنَ اللَّهِ وَنِعْمَةً﴾ [الحجرات: 7-8].

الآية دي بقى فيها يعني فوائد كثيرة جداً، أول فائدة عشان نخش في الموضوع على طول: ولكن الله حبب إليكم الإيمان وزينه في قلوبكم، إيه يا جماعة فائدة كلمة زين هنا؟ يعني واعلموا ولكن الله حبب إليكم الإيمان وكره إليكم الكفر والفسوق والعصيان، بس كده خلاص، أولئك هم الراشدون، حبب وكره وانتهى الأمر، ربنا ما قالش كده، ولكن الله حبب إليكم الإيمان وزينه، إيه لازمة الكلمه دي؟

الحقيقة احنا لو تتبعنا القرآن هنلاقي لفظ التزيين ده جه كتير في القرآن، وهو اللي عامل المشاكل أصلاً، هو اللي عامل المشاكل. احنا بعد شوية: ﴿وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا﴾ [الحجرات: 9]. هو ممكن المؤمن يقاتل المؤمن والاثنين اسمهم مؤمنين خلي بالكم؟ يعني ربنا لم يسلب إحدى الطائفتين لفظ الإسلام أو لفظ الإيمان: ﴿وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا﴾ [الحجرات: 9]، وبعديها هيجي إيه: ﴿إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ﴾ [الحجرات: 10]، هم لسه مؤمنين؟ آيوة لسه مؤمنين، تخيل؟ طب ليه بيعملوا كده؟ زينا، هو دي بقى هتظهر معانا، نقول إيه؟

واحدة عاوزكم بقى تروحوا الواجب شوفوا كده الجذر اللغوي زين ده افتحوا الآيات بتاعتها، عجيبة. لكن إيه واحدة هنقولها دلوقتي، قال الله عز وجل: ﴿وَلَا تَسُبُّوا الَّذِينَ يَدْعُونَ مِنْ دُونِ اللَّهِ فَيَسُبَّ اللَّهَ عَدْوًا بِغَيْرِ عِلْمٍ﴾ [الأنعام: 108]، فانت تقف هنا، خلي بالكم يا جماعة، ولا تسبوا الذين يدعون من دون الله، اللي بيدعونا من دون الله دي اللي هي الأصنام مش كده؟ عباد الأصنام يؤمنون بالله ولا يؤمنون بوجود وجود الرب سبحانه وتعالى ولا لا يؤمنون بوجود الله؟ يؤمنون أن الرب اللي هو في السماء ده هو الأقوى وال... يعني صح ولا لا؟ كم إلهاً تعبد؟ قال: سبعة، ستة في الأرض وواحد في السماء. من تعد لرغبتك ورهبتك؟ قال: الذي في السماء. فهم عارفين، مش كده؟ يشتموه؟ ﴿وَلَا تَسُبُّوا الَّذِينَ يَدْعُونَ مِنْ دُونِ اللَّهِ فَيَسُبَّ اللَّهَ عَدْوًا بِغَيْرِ عِلْمٍ ۗ كَذَٰلِكَ زَيَّنَّا لِكُلِّ أُمَّةٍ عَمَلَهُمْ﴾ [الأنعام: 108].

فكرة التزيين دي يا جماعة فكرة خطيرة جداً جداً، ولذلك... ولذلك هتفهم ليه الشرع نهى عن الجدال والمراء بين الحق. وخلاص أقف هنا، لقيت أن اللي قدامك عمال... خلاص أنا زعيم ببيت في ربض الجنة لمن ترك المراء، أشهر حجة للي ما بيسيبش المراء إيه؟ أنا صح مش كده؟ أشهر حجة، يا ابني سيب يقول: يا عم أنا اللي صح، ليه اسكت؟ هو اللي يسكت، النبي عليه الصلاة والسلام قال إيه؟ أنا زعيم ببيت في ربض الجنة لمن ترك المراء وإن كان... وإن كان محقاً، ده هو النبي اللي قال كده عليه الصلاة والسلام. آيوة سيب الجدال، سيب المراء، ليه؟ أصلك مش هتوصل لحاجة، عارف ليه مش هتوصل لحاجة؟ كَذَٰلِكَ زَيَّنَّا لِكُلِّ أُمَّةٍ عَمَلَهُمْ.

كان... يعني كنت الأول أقول إيه؟ لما نجي نتكلم في المسألة دي، نتكلم عن اللي بيعبد البقرة واللي بيعبد مش عارف إيه ونقعد يعني نخبط كف على كف، مش كده؟ بيعبد بقرة! لغاية بقى ما أخبرت عن حد عجيب جداً في المصنع عن... في المصنع عندنا، يعني واحد بيقول: كان في واحد هندي جاي... جاي من الهند، فندور... يعني جاي من بره، بيعبد إيه بقى؟ بيعبد المج... المج المج المج بتاع المج بتاعه، يعني واحد مدير عندنا في المصنع شافه بعينيه، مش في مصنعنا، شافه في مصنع تاني وبيحكي لي عنه بيقول لي: بيعبد المج بتاعه. وبعدين هو عنده الطقس بتاعه الطقوس بتاعته إيه بقى؟ أنه يشرب المج ما يتغسلش، هو بيشرب المج ده بس ما يتغسلش! ومره عين بتاع البوفيه دخل لقي المج ريحته تقرف، خذوه... غسله! قلب الدنيا وأصر أنه يترفد بتاع البوفيه ده، غسل إلهه.

فحاجة عجيبة، بيعبد المج! أنتم فاهمين أن... يعني طب تعالى، ده هو أنت... احنا بنضحك دلوقتي بس هو السؤال إزاي ده؟ كَذَٰلِكَ زَيَّنَّا... زينا لكل أمة عملهم. يا جماعة التزيين ده مش كلمة سهلة، والله ما كلمة سهلة، وهتلاقي أنت في حتت مزين لك، ففكرة أن ربنا يزين لك الإيمان دي نعمة مش أي حد يشعر بها.

طيب ما هو حبب كفاية؟ لا مش كفاية، أنتم عارفين يا جماعة مش كل شيء محبوب يبقى مزين؟ أكتر ما بنسمع الكلام ده عند البنات، عند النساء، يقول لك ايه؟ تقول لك: تقول لك هو توكسك بس مش قادرة أبطل أحبه. طبعا زوجها... يعني إيه؟ يعني هي هو مش... خلي بالكم في فرق بين إيه؟ بين أن هي مهما يعمل هي شايفه اللي بيعمله حاجة حلوة، ده اللي مزين عندها. لا، هي مش كده، هي بتحب وشايفه أن هو بيذلها وبيكسرها ولكن مش قادرة تخرج من هيمنته. يبقى الحب مش معناها التزيين، حد فاهم حاجة؟ يعني ممكن أحب حاجة لكن مش مزينة ليا؟ آه، ممكن. فالتزيين ده معنى آخر غير الحب.

فالتزيين ده بقى بيعمل إيه؟ بيخليك ما تزهقش لو اللي أنت بتحبه مزين لك، خلي بالك مش لازم يكون هو المناسب، ودي حاجة مهمة جداً يا جماعة في العلاقات بين الزوج والزوجة مثلاً. ربنا سبحانه وتعالى هو اللي بينزل هذا في القلوب، يعني إيه بينزل هذا في القلوب؟ يعني بيخلي الزوجه تشوف أفعال جوزها كويسة. عشان كده يا جماعة ما تخربوش بيوت الناس، وهذا أكثر ما يكون في النساء، الرجال في الحته دي تقريبا... غالباً غالباً بيبقوا ساكتين، إنما اللي بيتكلموا فيها النساء. تدخل الأم فتلاقي مثلا الزوج عصبي شوية، فتنرفز على زوجته اللي هي اللي هي بنتها، البنت مش شايفه ده، مش شايفاه يعني ربنا سبحانه وتعالى هو مزين لها هذا، يعني مش شايفاه. تلاقي الأم: هو بيكلمني ليه؟ هو ليه بيكلم... هي البنت ما اشتكتش. هو... هو مثلا هو جابلك في العيد؟ طب ما يمكن هو ما جابهاش وهي مش شايفه ده؟ طب ليه مش شايفه ده؟ ربنا زين، خلاص ربنا زين، ربنا سبحانه وتعالى أعماها عن أن هو مثلا ما بيجيبلهاش في العيد وهي راضية وعايشة حياتها. ليه بقى تدخلي تخربي على بنتك؟ ليه تدخلي تخربي على صاحبتك ليه؟

ولكن الله حبب إليكم الإيمان وزينه في قلوبكم، فكرة التزيين محتاجين احنا نحب الإيمان ويزين لنا الإيمان في قلوبنا، وكره إليكم الكفر والفسوق والعصيان أولئك هم الراشدون فضلاً من النعمة... فضلاً من الله ونعمة.

أنا هرجع تاني وأروح، بس عاوز أجيب الفوايد المهمة عشان لو الدرس وقته خلص احنا كده فات قد إيه؟ ساعة إلا ربع.

ماشي، ولكن الله حبب إليكم الإيمان وزينه في قلوبكم فضلاً من الله ونعمة. يبقى يا جماعة أن تحب الإيمان، أن تكره الكفر والفسوق والعصيان من الله. الصورة دي نزلت تحل القضية دي وفي أكثر من موطن، لأن ده هيحل جواك إشكالين، إشكالين كبار جداً يصيبوا أهل الإيمان.

أول إشكال: أنا، رؤية النفس. أنا صليت، أنا ختمت، أنا العالم، أنا الداعية، أنا اللي بيحضر لي مش عارف قد ايه، أنا اللي أول ما أنزل المنشور الفلاني بيتشير قد إيه، أنا رؤية النفس. الصورة دي تعالج رؤية النفس بايه؟ أن أنت ولا حاجة، أنت ولا حاجة، ولكن الله حبب إليك الإيمان وزينه في قلبك، إنما أنت يا ابني ولا حاجة. طب ما هو حببه لي وزينه في قلبي عشان أنا أستاهل فضلاً من الله ونعمة؟ أنت ما تستاهلش، لا، أنت ما تستاهلش حاجة فضلاً من الله ونعمة.

وبيعالج آفة تانية وهو وهي المَن. يبقى أنا دي ممكن من غير ما تتكلم، خلي بالك، أنا دي ممكن الواحد ما يتكلمش خالص بس أنا قاعد دلوقتي الدرس، فشايف الناس قاعدين كتير قدامي وواقفين بره، من غير ما أتكلم يدخل لي إيه بقى؟ الزهو، أنا، أنا... أنا ما أتكلمتش، ماشي، خلصت الدرس وبعدين... يروح

عبد الله واقف مشوح لي، يقول له: ده أنا يا أبني اللي بعلمك، كده أنا بعمل إيه بقا، بعمل إيه؟ لا، بربيه بمن فعلا. صح كده؟ أنا بقا بمن عليه فكرة المن، وعشان كده كلمة المن دي جت في الصورة اللي معانا، مش كده؟ في الآخر بقا: ﴿يَمُنُونَ عَلَيْكَ أَنْ أَسْلَمُوا قُلْ لَا تَمُنُّوا عَلَيَّ إِسْلَامَكُمْ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِنْ كُنْتُمْ صَادِقِينَ﴾.

فالصورة دي نزلت تعالج الآفات دي يا جماعة في قلوب المؤمنين، ولكن الله حب... لولا أن ربنا حبب إليك الإيمان وزينه في قلبك، كان زمانك زي دول، زي دول اللي هم مين؟ اللي هم: ﴿وَلَوْ يُطِيعُكُمْ فِي كَثِيرٍ مِنَ الْأَمْرِ لَعَنِتُّمْ﴾، اللي هم عاوزين الشرع يتبع الهوى، الشرع يتبع العقل. هو أنت بعيد عن ده؟ أنت مش بعيد، أمال أنت ليه ما عملتش ده؟ لأن الله زين الإيمان في قلبك وحببه إليك، وكره إليك الكفر والفسوق والعصيان، بس.

طب عشان تستاهل؟ والله ما تستاهل، لا أنا ولا أنت، فضلا من الله ونعمة، ده فضل. فدي تاني فايدة في هذه الآية: أن هذا من الله، وكونه من الله هو فضل منه سبحانه وتعالى أنت لا تستحقه. أول ما نسمع كلمة فضل، يجي في دماغنا على طول الكلمة التانية، اللي هي إيه؟ فضل وإيه؟ لا، مش نعمة دي، الفضل. نتكلم عن مثلا في الأحكام أو في العدل، نتكلم عن الفضل والعدل، عارفين الفرق بينهم ايه؟ عشان هنيجي لهم بعد شوية لو لحقنا في الدرس ده: أن العدل حقي وحقك، طب الفضل دي درجة أعلى ولا أقل من العدل؟

أه، جم يتحاكموا، واحد قال لهم إيه: احكموا بينكم بالعدل أو بما هو أحسن من العدل. فقالوا: طب هو إيه اللي أحسن من العدل؟ قال: الفضل. قالوا: وما العدل؟ قال: العدل أن تأخذ حقك. قال: والفضل؟ قال: أن تتركه. فهمتوا ما فهمتوش؟ اتنين قاعدين بيتخانقوا، العدل إيه؟ أن كل واحد يتشبث بحقه، ده تمام العدل، خلاص هاَحكم بينكم بالعدل، طب لو واحد عاوز يعدي بقى حته العدل دي ويبقى دخل في الفضل، مش إنه ياخد حقه، إنه يترك حقك.

خلي بالك، أنت ممكن تبقى جاي... اتنين أولياء بقى مش هقول مؤمن، أولياء بس، كل واحد فعلا شايف الحق ده بتاعه. الاتنين اللي جوم للنبي عليه الصلاة والسلام بيتخانقوا على إيه؟ حته كده في الآية بين الحديقة بتاعت ده والحديقة بتاع ده، ده بيقول بتاعتي وده بيقول بتاعتي، جم للنبي يحكم بينهم عليه الصلاة والسلام، ماذا قال صلى الله عليه وسلم؟ قال: إنما أنا بشر. دلوقتي هما جايين عاوزين العدل، مش كده؟ عاوزين العدل.

شوفوا بقى آخر الحديث إيه؟ هما عاوزين العدل، يعني إيه اللي هتقوله هيمشي وده العدل بقا، أنا كل واحد متشبث في حقه، قال: إنما أنا بشر أقضي بنحو ما أسمع، وقد يكون بعضكم ألحن بحجته من بعض، فمن قضيت له من حق أخيه شيئا، فإنما هو قطعة من النار، فليأخذ أو ليذر. فقال: كل حقي لصاحبي يا رسول الله. يبقى جايين عشان العدل، قاموا كل منهم بالفضل: أنا مش عاوز حقي، تنازلت عن حقي، ده فضل. ماشي، الفضل هو الشيء الزائد يا جماعة، فضلا من الله.

طيب، ﴿فَضْلًا مِنَ اللَّهِ وَنِعْمَةً﴾، ايه الفضل وإيه النعمة بقا؟ فضلا من الله بالنظر إلى الله عز وجل هو فضل ليه؟ لأنه زائد عند ربنا سبحانه وتعالى، ونعمة بالنظر إلى العبد؛ لأنه العبد فقير إلى هذه النعمة. يبقى فضلا من الله، ونعمة للعبد لأنه فقير ومحتاج لهذه النعمة. خلاص، يبقى دي تاني فايدة في الآية: ﴿وَلَكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ﴾.

الفايدة التالته: علاج لأي شهوة بتقع فيها ومش عارف تبطلها. ما ينفعش... نعمل كل حاجة، واحنا اتكلمنا في الكلام ده كتير قبل كده، اعمل كل حاجة، لكن يا جماعة العلاج الأول والأنجع الله سبحانه... ما ينفعش تترك ربنا سبحانه وتعالى، باب ربنا ما يتسبش؛ لأن: ﴿إِنَّمَا أَمْرُهُ إِذَا أَرَادَ شَيْئًا أَنْ يَقُولَ لَهُ كُنْ فَيَكُونُ﴾. تخيل كده أن ربنا سبحانه وتعالى حكم الآن: فلان ابن فلان يكره العصيان، يكره تلك المعصية، عارفين يكره؟ عارف لفظ يكره ده يعني إيه؟ أنت فاهم؟ يعني أنت من جواك لو اتقال لك: خد فلوس... أنا بكرهها، بكره المعصية، مشاكلنا كلها هتتحل. المشكله فين؟ إنه لسه لم يأذن سبحانه وتعالى بكرهه بتلك المعصية.

طب أنا عاوز يأذن وعاوز أكره؟ دوامة اللجوء، أنت اللي عليك تخبط الباب، يتفتح أمتى؟ مش بتاعتك دي، بتاعة ربنا سبحانه وتعالى، بتاعته. طب هو ليه إيه في حكمته سبحانه وتعالى ختام الآية: ﴿وَاللَّهُ عَلِيمٌ حَكِيمٌ﴾؟ حكمته يا أبني: الباب ده لو اتفتح لك، اللي هو باب إيه؟ باب أن تككره المعصية الفلانية، يمكن ده يبقى باب دخولك النار. إيه ده؟ معقولة؟ أه والله، ممكن أن العبد لا يفعل الطاعة فيدخل بها النار، وأن العبد ليفعل المعصية فيدخل بها الجنيه! إيه رأيكم؟ ازاي يفعل الطاعة فيظل يمن بها على رَبِّه؟

شوف لفظ المن: أهواني أنا اللي... أنا الخاتم، أنا اللي صوتي حلو في القرآن، أنا اللي لما بصلي الناس بتعيط ورايا، أنا اللي بيدي درس المسجد بيتقفل، أنا، أنا. والمسكين فاكر أن ده باب طاعة مفتوح له، يظل يمن بها على الله، وطالما بيمن يبقى شايف نفسه، طالما شايف نفسه هيريح في الخط، مش هعمل حاجة بقا، ما خلاص أنا... ويفعل المعصية، فتظل قدام عينه مستغفر، وتائب، ومنكسر. يعني يمكن أنا مش بحبب لك في المعصية، بس يعني أنا ليه بقول لك ده؟ عشان ما تستعجلش حاجة ربنا لم يأذن بها. اللي عليك إيه؟ أن تدمن طرق الباب، ومن أُدْمِنَ طرق الباب ولُدَّ، هيتفتح لك وهتخش، ما تيأس.

يبقى ربنا اللي بيكره، ﴿حَبَّبَ إِلَيْكُمُ الْإِيمَانَ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ﴾. يبقى إيمان وتلات حاجات في مقابل الإيمان: كفر، وفسوق، وعصيان. أما يكون الترتيب، يعني الإيمان في مقابل دول: الكفر أعلى حاجة، وبعدين فسوق الكبائر، وبعدين العصيان المعاصي الصغيرة. وفي معنى تاني جميل: أن الإيمان يا جماعة، الإيمان إيه هو؟ الإيمان فين؟ الإيمان في القلب ولا فين؟ بس حد بيقول حاجة غير كده، ولا عاوزين نعرف بقى مين المرجئ هنا ومين معتزلي ومين... أه، الإيمان اعتقاد بالجنان، مش كده؟ وقول باللسان، وعمل بالاركان، عارفين ده ولا مش عارفين عارفين؟ لا إه إلا الله، طيب ولا نبتدي من الأول؟ ماشي.

فده الإيمان أهو، يبقى قلب ولسان وجوارح، فهنا لما قال الإيمان جاب تلات حاجات، كل واحدة مختصة بواحدة من التلاتة دول. في قول بعض أهل علم: أن الفسوق هو الكذب خاصة، الكذب، يبقى إيه؟ اللسان. طب اشمعنا ذكر الفسوق ما هو من جملة العصيان؟ قال لك لأن هو ده المشكلة أصلاً، اللي فاكر بقى الدرس اللي فات في الحجرات من قبل رمضان، اللي هو: ﴿إِنْ جَاءَكُمْ فَاسِقٌ بِنَبَإٍ فَتَبَيَّنُوا﴾، أن واحد رجع وقال: ده كانوا هيقتلوني بعد ما كان هياخد الزكاة منهم، وهم النبي عليه الصلاة والسلام أنه إيه؟ يحارب الناس دي، وطلع ما كانوا هيقتلونوهم ولا حاجة، فذكر الفسوق هنا لهذا السبب.

﴿وَكَرَّهَ إِلَيْكُمُ الْكُفْرَ﴾ اللي هو متأصل في القلب، ﴿وَالْفُسُوقَ﴾ في اللسان، ﴿وَالْعِصْيَانَ﴾ في الجوارح؛ لأن الإيمان له تعلق بالثلاث إيه بالثلاث أعضاء دي أو الثلاث أركان دي. فهمتوا؟ ﴿وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُولَئِكَ هُمُ الرَّاشِدُونَ﴾. وانتقل من المخاطب إلى الكلام عن الآية دلوقتي، دلوقتي إنا إيه؟ ﴿أَعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِنَ الْأَمْرِ لَعَنِتُّمْ وَلَكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُولَئِكَ هُمُ الرَّاشِدُونَ﴾.

ما قالش: أنتم الراشدون، ما قالش كده ليه؟ علشان يدخل فيها كل من اتصف بهذه الصفة. خلاص؟ ﴿أُولَئِكَ هُمُ الرَّاشِدُونَ * فَضْلًا مِنَ اللَّهِ وَنِعْمَةً وَاللَّهُ عَلِيمٌ حَكِيمٌ﴾. ﴿وَإِنْ طَائِفَتَانِ مِنَ الْمُؤْمِنِينَ اقْتَتَلُوا﴾، كان المفروض ناخدها النهارده بس إيه؟ الدرس بقى طول نقف هنا. قول قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله.