بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على محمد النبي وأزواجه أمهات المؤمنين وذرياته وآل بيته كما صليت على آل إبراهيم، إنك حميد مجيد. أما بعد:

سورة النمل تتحدث أو كثر استخدام مفردة العلم في تلك السورة. وقبل ذلك تكلمنا عن قصة النملة في سورة النمل، يلي هذه القصة قصة الهدهد، وتبدأ من قوله سبحانه وتعالى: ﴿وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾ [النمل: 20]، إلى آخر القصة. لكننا نريد اليوم أن نتأمل بعض التأملات في قصة الهدهد، ولكن نريد أن نبتدئ من قبل ذلك بآية.

قال سبحانه وتعالى: ﴿فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ * وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾ [النمل: 19-20].

أول الوقفات في قوله سبحانه وتعالى: ﴿وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ﴾. هذا المشهد، نتخيل هذا المشهد من سليمان عليه السلام؛ هل هو مشهد إخبات وسكون، أم مشهد فيه حركة وانتقال وروحة وجية؟ ما رأيكم؟ ﴿وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ﴾، ده مشهد إيه؟ تكلموا، أنتم حاسين إنه مشهد إيه؟ مشهد إخبات، ليس كذلك؟ رجل قاعد يدعو، وهذا المشهد تحيطه أجواء السكينة والهدوء والإخبات والإقبال على الله عز وجل والإنابة بين يديه سبحانه وتعالى.

﴿وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾؛ ده مشهد حركة، وكأنه خرج من المحراب إلى ترتيب الملك، ترتيب شؤون الملك. وفي هذا إشارة إلى المسألة التي كثيراً ما نكررها وكثيراً ما نسأل عنها، وهي مسألة الجمع بين الدين والدنيا. أنتم ترون هنا صورة حية من سليمان عليه السلام، كيف يجمع بين أمور الدين وأمور الدنيا، وكيف أنه جمع بين المحراب وبين تنظيم شؤون الملك عليه السلام، وكيف أنه جمع بين مشهد الإنابة والإخبات والسكون والإقبال على الله عز وجل، ومشهد ترتيب الجند والحرم والذهاب والمجيء. والاثنان وراء بعض على طول: ﴿رَبِّ أَوْزِعْنِي أَنْ أَشْكُرَ نِعْمَتَكَ﴾، ثم ﴿وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾.

هذه الحتة يا جماعة هي المفقودة في الأمة الآن؛ حتة أننا نجد النموذج الذي جمع بين الدين والدنيا. غالب الناس الآن إما يكون كذا أو كذا؛ إما يكون بتاع دنيا صرف، وبعدين مدي الدين فضل الوقت، وده غالب الناس، ولما أقول غالب الناس يعني حتى اللي دخل شوية في الدين برضه بتلاقيه كده، يعني تلاقي قلبه مايل للدنيا وراكن للدنيا. طب فين دعوته لما يبقى في وقت للدعوة؟ طب فين حفظه للمصحف لما يبقى في وقت للمصحف؟ طب فين البر والصلة والعمل لهذا الدين من أجل هذا الدين لما نلاقي وقت؟ فده مش الجمع الذي نريده خالص.

أو العكس؛ أن واحداً انقطع للدين فضرب بالدنيا، ضر بالدنيا ضرراً ياتي على ضرورياته وضروريات من يعول. أما إذا خلاص حقق الكفاية، خلاص؛ إحنا برضه مش بندعو للرفاهيات. واحد استغنى، يعني حقق الكفاية التي بها يستغني، ما يمدش إيديه للناس، خلاص، هذا هو المطلوب في الدنيا. إحنا عاوزين إيه أكتر من كده في الدنيا؟ ولا حاجة، مش محتاجين أكتر من كده. إشكال كبير، وهنا هنلاقي سليمان عليه السلام جمع بين الأمرين جميعاً؛ محراب وملك. والمحراب في روح المحراب في الخشوع بتاع المحراب، ما هواش في المحراب ودماغه في ترتيب الملك، لا؛ وهو في المحراب مخبت لله عز وجل منيب له سبحانه وتعالى.

هذه النماذج تجدونها حتى في السلف، من أول أبي بكر رضي الله عنه؛ خير هذه الأمة أبو بكر كان يتاجر. بل العجيب يا جماعة، يعني أنا في موقف عجيب جداً في حياة أبي بكر؛ موقف موت النبي عليه الصلاه والسلام. هو النبي عليه الصلاه والسلام مات فجأة؟ يعني صابحين النبي عليه الصلاه والسلام سليم وفي صحة وقوة وعافية، وفجأة قُبض؟ ولا لا، مرض مرضاً شديداً لدرجة أنه أُقعد وما بقاش يصلي حتى في الجماعة، ليس كذلك؟ فخلاص في إرهاصات لدنو الأجل. ومع ذلك لما النبي مات عليه الصلاة والسلام أبو بكر كان فين؟ كان في العوالي، كان يصلح تجارته، مع وجود الإرهاصات بدنو أجل النبي عليه الصلاه والسلام. عارفين القصة أنه جاء وكان في العوالي وما كلمش حد وشق الصف ودخل.

في هذا أبو بكر، سيدنا عمر رضي الله عنه كان له تجارة، وكان هو وصاحبه يتناوبون؛ ما يقدرش عمر رضي الله عنه كل يوم ينزل يجلس إلى النبي عليه الصلاه والسلام عشان التجارة، فيتناوب هو وأخ له؛ هو ينزل يوم ثم يرجع إلى صاحبه بخبر ذلك اليوم، واليوم اللي بعده سيدنا عمر هو اللي يجلس للتجارة وصاحبه ينزل ثم يرجع إليه بخبر ذلك اليوم. فكانوا يهتمون بهذا، وما يتركوش ده ولا يتركوا ده، وهذا هو الوسط الذي نريده. إحنا عاوزين ناس ما تبقاش منكبة على الدنيا، منشغلة بها، كل همها الدنيا وتعمل من أجل الدنيا، حتى أمور الدين الآن ولا حول ولا قوة إلا بالله دخل فيها الدنيا، بقينا نعمل أمور الدين لأجل الدنيا، فمصيبة كبيرة جداً. ولا العكس أننا نتبتل وننقطع للدين انقطاعاً يضر بالدنيا، فلا نصبر أو لا يصبر من نعول على تلك الحياة، وده أيضاً ما هواش المطلوب. إحنا مش بنقول الرفاهيات والدلع والزيادة، ما هواش خالص. ولذلك كنا نحن أمة وسطاً، زي ما إحنا وسط في كل شيء، إحنا وسط حتى في ده، بين اليهود والنصارى. اليهود يا جماعة مايلين لجانب الدنيا، والنصارى مايلين لجانب الرهبانية، ورهبانية اليهود طبعاً... ﴿وَلَا تَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ﴾ [الحديد: 16] دول اليهود، طب والنصارى؟ ﴿وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ﴾ [الحديد: 27]. يبقى دول مايلين لجانب الدنيا ودول مايلين لجانب الدين، فجاءت أمة الإسلام وسطاً، لا في ميل لده ولا في ميل لده.

ولذلك يا جماعة في آخر سورة محمد صلى الله عليه وسلم ضرب الله عز وجل مثلين لهذه الأمة؛ مثلاً في التوراة ومثلاً في الإنجيل. لو لاحظتوا هتلاقوا أن المثل الذي ضربه الله عز وجل لليهود في التوراة ضرب لهم مثلاً بالذي ينقصهم، والمثل الذي ضربه في الإنجيل ضربه للنصارى بالذي ينقصهم. إحنا قلنا اليهود بتوع إيه؟ دنيا، مش كده؟ ﴿مُّحَمَّدٌ رَّسُولُ اللَّهِ ۚ وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ ۖ تَرَاهُمْ رُكَّعًا سُجَّدًا يَبْتَغُونَ فَضْلًا مِّنَ اللَّهِ وَرِضْوَانًا ۖ سِيمَاهُمْ فِي وُجُوهِهِم مِّنْ أَثَرِ السُّجُودِ ۚ ذَٰلِكَ مَثَلُهُمْ فِي التَّوْرَاةِ ۚ وَمَثَلُهُمْ فِي الْإِنجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَىٰ عَلَىٰ سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ﴾ [الفتح: 29]. وكأنه ضرب مثلاً لليهود بالذي ينقصهم، ومثلاً للنصارى بالذي ينقصهم.

فإحنا أمة وسط بين هذا وذاك. عاوزين اللي هو إيه بقى؟ عاوزين الطالب اللي في المدرسة أو في الجامعة، وعاوزين الموظف اللي في الشركة أو في المصنع، وعاوزين الست اللي في عمل البيت، واللي أول ما يأتِ أمر من أمور الدين خلاص يترك الدنيا ويذهب إلى الدين بقلب مقبل على هذا الدين. فالأذان يؤذن هو في المسجد بين يدي الله عز وجل، خاشع، منيب، ناسي الشغل خالص، ورامي المذاكرة وراء ظهره، زي حال سيدنا سليمان كده: ﴿وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ﴾. خلصنا، طلع على طول: ﴿وَتَفَقَّدَ الطَّيْرَ﴾، ينظم أمر المملكة، ينظم أمر الجيش. لا ده يطغى على ده، ولا ده يطغى على ده. فهذه أول الفوائد.

الفائدة الثانية في هذا الدعاء يا جماعة: الدعاء ده كان في موطن إيه دلوقتي؟ لو تفتكروا، أو اللي سمع قصة النملة، هو لما سمع قول النملة، سليمان نفسه هاجت واستحضر نعم الله عز وجل التي أنعم بها عليه فابتدى يشكر. يبقى سليمان عليه السلام في مقام الشكر الآن، صح؟ ﴿فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ﴾. إيه دخل دول في مقام الشكر؟ الذي يظهر والله أعلم، طبعاً المعنى الذي سأقوله هو معنى موجود في الشرع لكن لم أجد من ينص عليه من العلماء هنا، فأنتم دوروا واللي يلاقي ندي له هدية. المعنى أن بعض السلف ورد عنه أنك لما تجد إقبالاً من نفسك على الله عز وجل أو على الدعاء، اغتنم ذلك الوقت لأنه أحرى أن يكون وقت إجابة.

فهنا كان سليمان عليه السلام لما وجد هذا الإقبال على الله عز وجل من نفسه، اغتنم الوقت؛ هو صحيح ده دعاء شكر: ﴿رَبِّ أَوْزِعْنِي أَنْ أَشْكُرَ نِعْمَتَكَ﴾، لكن هشكر وهدعي دعوتين ثلاثة جنب الشكر اغتناماً لذلك الوقت، أو دعني أقول اغتناماً لتلك الحالة التي أجد من نفسي فيها إقبالاً على الله عز وجل. وإحنا بنحس بده؛ لما تجد من نفسك نوع إقبال ادعُ، ولو هو مثلاً موطن استغفار استغفر وخذ دعوتين ثلاثة جنب الاستغفار، موطن شكر اشكر وخذ دعوتين ثلاثة جنب الشكر، فأحرى أن يجاب لك. سليمان عليه السلام عمل نفس الموقف أو عمل نفس الحركة دي، أنه يستغل تلك الحالة فيدعو بدعاء ما هواش مناسب قوي للمقام في موطن تاني، اللي هو موطن إيه؟ موضوع الآية: ﴿فَطَفِقَ مَسْحًا بِالسُّوقِ وَالْأَعْنَاقِ﴾ [ص: 33]، المهم هو ده كان إيه؟ موطن كان سليمان عليه السلام وقع في مخالفة، فموطن استغفار.

ماشي كده؟ طيب بأي شيء دعا سليمان؟ قال: ﴿رَبِّ اغْفِرْ لِي وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي ۖ إِنَّكَ أَنتَ الْوَهَّابُ﴾ [ص: 35]. ده موطن استغفار، فكان سليمان لما أنس من نفسه إقبالاً ما عداش تلك الحال، فأردف أو ألحق بسؤال الاستغفار سؤال الملك: ﴿وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي ۖ إِنَّكَ أَنتَ الْوَهَّابُ﴾. طب ربنا استجاب؟ استجاب، وأعطاه ملكاً ما ينبغي لأحد من بعده، حتى إن النبي عليه الصلاه والسلام لما حصل قصة كده مع جن وقال إيه؟ كان النبي عليه الصلاه والسلام ناوي يربطه في سارية من سواري المسجد في عمود، لولا أنه تذكر دعاء أخيه سليمان أنه قال: ﴿وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي﴾، فرجع النبي عليه الصلاه والسلام عن أن يفعل ذلك بالجن، فاستجاب الله عز وجل له لاغتنامه لتلك الحال.

﴿وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾. من الفوائد في هذه القصة الحقيقة هي مسألة تفقد الطير؛ التفقد. وهذا المعنى يا جماعة نحن نحتاجه بشدة، خصوصاً في أزمنة الغربة، أزمنة الغربة التي الفساد منتشر، والديانة بتاعة الناس خفيفة وقليلة، فالواحد ما بيصدق صحبة ممكن تأخذ بإيديه شوية ولا حاجة. فمحتاجين يبقى في غير أننا بنعين بعض على الطاعة أننا نتفقد بعض؛ نتفقد بعض، يعني يا جماعة ما ينفعش أن واحداً بيصلي معانا الخمس فروض وبعدين يغيب يوم واثنين وثلاثة واحنا ما نعرفش عنه حاجة! طب فلان ده ماله؟ ما هو فلان ده ممكن يبقى مريض مرضاً شديداً محتاج اللي يزوره، ممكن عنده حاجة محتاج اللي يساعده.

أو فلان الذي معنا في المقرأة، أو فلان الذي معنا في الدرس، لا يأتي منذ أسبوعين أو ثلاثة؛ ما يمكن في حالة إيمانية واقعة الآن ومحتاج من يأخذ بيده، فلو نحن لم نفعل ذلك فمن سيفعل؟ هذا من الدين؛ ابن مسعود كان يقول: كنا إذا فقدنا الأخ أتيناه، فإن كان مريضاً كانت عيادة، وإن كان مشغولاً كانت عوناً، وإن كان غير ذلك كانت زيارة. فأين هذا الآن؟ وتفقد الطير، فمحتاجون لهذه الروح.

النبي عليه الصلاة والسلام في غزوة تبوك منتبه للصحابة، حتى يقول: ما فعل كعب بن مالك؟ هو أين كعب؟ نحن في غزوة وحرب وجيش، لا، النبي عليه الصلاة والسلام منتبه، مفتقد كعب: ما فعل كعب بن مالك؟ فهذه مسألة مهمة على مستوى الأفراد، يعني أنت مع صاحبك، أو مع وجه تألفه، ليس لازماً أن يكون صاحبك، وجه تألفه؛ يعني واحد متعودون نراه كثيراً في المسجد، غاب فردين أو ثلاثة أو أربعة، نبتدئ: هو فلان الذي كان معنا الذي شكله كذا وكذا وكذا، أين هو؟ طيب لماذا لا نزوره؟ طيب لماذا لا نرى ماله وأحواله؟ يمكن محتاج.

البخاري رحمه الله مما جاء فيه تراجع وشبهها، جاءت معنا مع أويس القرني في درس أويس، أنه الإمام البخاري كان يحضر مجلس الحديث وهو بعده طالب؛ كان عنده ثماني سنين هكذا، يقولون البخاري جلس للتحديث وهو عنده 11 سنة، أصبح خلاص هو الشيخ وهو عنده 11 سنة، وكان يحضر مجلسه 100 ألف عمامة من الأكابر، ليس 100 ألف شخص، لا، 100 ألف عمامة من الأكابر، غير طلاب العلم الصغار، وهو عنده 11 سنة. البخاري كان آية؛ الإمام محمد بن إسماعيل البخاري هذا واحد ليس له مثيل، كان آية في الحفظ وفي توقد الذهن وشيء عجيب جداً، فالمهم وهو ما زال طالباً يطلب الحديث افتقدوه، ذهبوا ليروه في البيت، ماله؟ لماذا لا يأتي؟ وجدوه عرياناً؛ الثوب الذي كان في حيلته لا أعرف ماذا حصل فيه، قاعد في البيت لا يخرج للصلاة ولا يخرج لمجلس الحديث، ما عنده شيء يلبسه. شايفين يا جماعة الناس هذه كانت تعيش كيف؟ الرواية أصلاً تقول ماذا الآن لو قلت لكم رحنا تفقدنا واحداً من إخواننا وجدناه ما عنده شيء يلبسه؟ أبسط شيء تروح فاتح الدولاب ومطلع شيئاً من الهدوم التي عندك؛ عندك هدوم كثيرة في الدولاب. لما وجدوا البخاري عرياناً عملوا ماذا أصحابه؟ قال: فجمعوا له حتى يحضروا له ثوباً؛ يعني لا يوجد واحد عنده ثوب زيادة مثلاً في البيت يذهب ويحضر؟

لا يوجد، قعدوا يجمعون من بعض حتى يحضروا للبخاري ثوباً يلبسه. فمسألة التفقد هذه محتاجينها بيننا، وبيننا هذه يعني ماذا يا جماعة معلش؟ يعني لا يوجد في المسجد خالص، لا، التفقد كما قلنا هو خلق من خلق الإسلام، ابن مسعود يقول: كنا إذا فقدنا الأخ أتيناه، الأخ هذا ليس الأخ الذي في المسجد، الأخ هذا يعني أخوك في الإسلام، أخوك في الإسلام كان في المدرسة، كان في الجامعة، كان في الشركة، كان في المصنع؛ أصلنا يا جماعة العلمانية مؤثرة، نحن علمانيون بالحق، يعني أخلاق الدين أين؟ في الجامع، نذهب للمصنع والشركة لا، أخلاق ثانية خالص، اركن الدين على جنب واللحية هذه فكك منها، لا، هذا مش دين، لو لم يكن هذا ديناً فماذا تكون العلمانية؟ عمالون يقولون لك العلمانية وفصل الدين عما يعلم الله، طيب أنت ماذا تعمل؟ أين أخلاق الدين في الشركة؟ أين أخلاق الدين مع من ينافسك على منصب؟ يعني يا أنت يا هو، ستنال المنصب هذا وغاب يوماً أو يومين، وجواك فرحان طبعاً الحمد لله المنصب، لا ليس هكذا، هذا ليس ديناً، لا، تفقد: يا فلان مالك؟ حتى لو لسه في نفس روح التفقد. فلازم تظهر تلك الأخلاق في كل الميادين.

خلاص قلنا لكم من قبل أن الخلق هذا موجود حتى عند النصارى، في الكنيسة المصرية عندهم من الطقوس التفقد أو الافتقاد، هم يسمونه الافتقاد، الذي هو واحد لا يأتي الكنيسة منذ فترة، يذهبون ليروه ماله. أنا هذا رأيته بعيني، كان لنا جيران نصارى في شبرا وكنت أرى هذا بعيني، يأتي وفد من الكنيسة: مالكم في ماذا؟ لماذا منذ وقت طويل لا تأتون الكنيسة؟ نعمل، وبعدين دورت وقعدت أبحث وجدت أنه أصل عندهم في سفر الرسل يقول: ثم بعد أيام قال بولس -بولس الرسول يعني-: لنرجع ونفتقد إخوتنا في كل مدينة نادينا فيها بكلمات الرب كيف هم. يعني نحن ذهبنا دعونا الناس للكفر نتركهم هكذا يسلموا؟ لا، كل شوية نمر عليهم: ما أخباركم يا جماعة؟ لسه كفار؟ وهكذا. فالخلق نحن أولى به، هو في ديننا: كنا إذا فقدنا الأخ أتيناه، فإنا محتاجون لهذا الخلق.

وتفقد الطير، كذلك طبعاً سليمان -سيدنا سليمان- هو ملك، يعني هو نبي صحيح فنتعلم ديناً، لكن هو ملك فنتعلم إدارة، إدارة ملك وإدارة جيش وإدارة؛ فلازم نتعلم هذه الأمور أيضاً، يبقى كذلك المدير أو الرئيس أو القائد عليه عبء أكبر من العبء الذي على الأفراد. أنا قلت لكم من قبل قليل أن التفقد بين الأفراد، يعني بين الناس وبعضهم، القائد بقى، الداعية إلى الله، طالب العلم الذي معه مجموعة ناس مركز معهم، محافظ القرآن، أنت ليس دورك فقط الدرس وخلصنا أو الحلقة بتاعة القرآن وخلصنا، لا، فلان هذا الذي لا يأتي وأنت فيه، يعني مش سأقول لك لو يحضر الآلاف ولا ماذا ستكون حافظ الآلاف، لكن على الأقل الناس القريبة والملتصقة، طيب واحد لا يأتي أين هو؟ تسأل عليه مرة واثنين وثلاثة، فذا مهم جداً.

يبقى وتفقد الطير، وتفقد الطير هنا هل سليمان -سيدنا سليمان عليه السلام- تفقد كل الطير؟ فوجد أنه انتبه أن الهدهد ليس موجوداً؟ أولاً قبل أن نرى هل تفقد كل الطير أم لا، هو أصلاً ماذا الطير الذي كان مع سيدنا سليمان؟ يعني سيدنا سليمان كان خارجاً في معركة، أليس كذلك؟ كان جيشاً، والنملة قالت: ﴿لَا يَحْطِمَنَّكُمْ سُلَيْمَانُ وَجُنُودُهُ﴾، فهو كان جيشاً خارجاً، فهل سيدنا سليمان كان مأخوذاً بكل الطير معه أم مأخوذاً بطير مخصوص؟ قولان للعلماء، بعض العلماء قال: لا، هو كان مأخوذاً بالطير الذي ينفعه في الحرب، مثل بالضبط لو أنت خارج في جيش لن تأخذ أناساً لا تنفعك؛ واحد أعمى، واحد أعرج، لن تأخذ هذه الناس لأنها لن تنفعك في الحرب، فقالوا كذلك الطير كان سليمان -سيدنا سليمان عليه السلام- آخذاً الطير الذي سينفعه في الحرب، مثل ماذا؟ قالوا مثل الحمام الزاجل يستخدمه في المراسلات، مثل الصقر، طبعاً الصقر ليس يعني صقراً، جيشاً من الصقور، لماذا؟ لكي وقت ما يجوع الجيش هم الذين سيصطادون الفرائس من الصحراء، الصقر هذا، ويحضر له الأشياء هذه، ومثل الهدهد. طيب الهدهد محتاجه في ماذا في الحرب؟ حد يعرف؟ يجيب الأخبار، يعني ما الجن أو الـ... يجيب الأخبار، هو الهدهد الجن أسرع، وصح الهدهد أيوة، قالوا في خاصية كذا في الهدهد أنه يرى الماء في باطن الأرض كما يراه الإنسان في الزجاجة، هكذا المياه مثلما أنت ترى الزجاجة، لا تخطئه عينك؛ الهدهد يرى الماء في باطن الأرض، فكان الهدهد وجوده في الجيش لماذا؟

لكي لو نزلوا منزلاً ومحتاجين المياه، أين الهدهد؟ يستكشف المنطقة وينزل يقعد ينقر بمنقاره، ويعرفوا أن هنا المياه، فيجيء الجن يبتدئ يحفر هذا المكان للجيش، يلاقوا المياه، فقالوا هذه فائدة الهدهد. وبعض العلماء قالوا إن سليمان عليه السلام خرج بالطير كله، وإن كان الطير له فائدة أخرى وهي أنه يعمل مثل ظل للجيش، نحن قلنا في درس النملة -ما كان هنا يعني- بس قلنا إن الجيش هذا كان مساحته كم؟ 500 كيلو في 500 كيلو، هذه المساحة التي الجيش واقف فيها، وساعتها عشان بس نقرب، نحن قلنا الطريق من بوابة الإسكندرية لبوابة القاهرة تقريباً 150 كيلو تقريباً، من البوابة للبوابة، من القاهرة للإسكندرية أكثر، بس من البوابة تقريباً 150 كيلو، فـ 500 كيلو هذه يعني ماذا؟ يعني تقريباً ثلاث مرات من البوابة للبوابة كان جيش سليمان، احسبها هكذا مربع ضلعه 500 كيلو في 500 كيلو، هذا شيء مرعب، فكان الطير يظلل على هذا الجيش، جيش سليمان.

طيب إذا كان هو خارج في هذا الطير، سواء طير مخصوص ولا طير، سيدنا سليمان يعمل ماذا الآن؟ يتفقد الجيش، ومن تفقده للجيش أن تفقد الطير، يبتدي بقى يرى كل واحد في مكانه، فاكتشف أن فيه هدهد ليس موجوداً، ﴿مَالِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾، فيبقى القائد يتفقد الرعية، هذه أول حاجة. المسألة الثانية، هو تفقده أو يعني انتباهه أن الهدهد ليس موجوداً، كان هو الذي ابتدأ سليمان عليه السلام ينظر، أم حصل شيء؟ أيضاً قولان للعلماء، نحن نحاول قصصاً بفوائد، بعض العلماء قالوا: لا، هو من الأول، لا، إن الهدهد ليس موجوداً من تفقده هذا ظاهر القرآن، وبعض العلماء قالوا إن حصل قصة هنا أنهم نزلوا فعلاً منزلاً وبعدين عاوزين مياه للوضوء وللشرب، فابتدأ يقول: أين الهدهد؟ لم يجد الهدهد، خلاص، طيب وتفقد الطير، فقال: ﴿مَالِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾، هنا يا جماعة درس مهم جداً، ما هو الدرس؟ أنك لست المعصوم ورأيك ليس الرأي المعصوم، سيدنا سليمان وهو الملك المعظم، والكلام في الآخر على هدهد، يعني ليس حتى جناً مثلاً، عفريت مثلاً، ولا هدهد، لكن سيدنا سليمان يبدأ بماذا يا جماعة؟ يبدأ يرجع باللوم أو بالخطأ أو يعني بالمسألة على نفسه هو الأول، قال: ﴿مَالِيَ لَا أَرَى الْهُدْهُدَ أَمْ كَانَ مِنَ الْغَائِبِينَ﴾، يعني أنا الذي لا أراه، ولا هو الذي ليس موجوداً؟ مفهومة هذه يا جماعة؟ ونحن قاعدون نتحاور محتاجون هذا، محتاجون الشخص، محتاجون النفسية هذه؛ نفسية الذي جالس يتناقش وليس عنده أي مشكلة يطلع غلطان، حتى نحل، حتى الدنيا تمشي، ليس فقط هكذا، لا، هذا ليس عنده مشكلة أنه يبتدئ في أثناء المناقشة يناقش الأول أنه هو الذي ممكن يكون غلطان، ما عندي مشكلة خالص، وهو الذي يبادر بهذا، عادي جداً، بل هذه من صفات قوي النفس، يعني يا جماعة الذي أقوله هذا ليس أي أحد يعرف يعمله، النظري هذا سهل، عارفين من الذي يعرف يعمل هذا؟

واحد فعلاً قوي النفس، هذا الذي ليس عنده مشكلة خالص؛ سأطلع غلطان، وماذا يعني؟ ماذا يعني ما أطلع غلطان؟ الذي نفسه مهزوزة لا يقبل هذا، فسليمان عليه السلام ليس عنده مشكلة خالص، مالي، هو أنا الذي غلطان؟ أنا الذي لا أراه؟ وبعض المفسرين قالوا: ﴿أَمْ﴾ هنا بمعنى بل، يعني كأنه قال: مالي لا أرى الهدهد، ثم استيقن أن الهدهد مفقود، قال: بل كان من الغائبين، لما استيقن أنه ليس موجوداً، فكأنه ما جاب سيرة الهدهد في الأول أصلاً، مالي لا أرى الهدهد؟ هو أنا لماذا لا أرى الهدهد؟ وهذه يا جماعة من المهم جداً جداً، بالذات لو أنت قائداً، قائد هذه يعني ليس لازماً رئيساً ولا ملكاً، قائد هذه يعني ممكن أباً، أنت الأب قائد، داعية، إمام مسجد، ماسك قراءة قرآن، أي اسمك قائد، تحتك ناس، اختيار ألفاظك، اختيار ألفاظك، أنت ممكن تعمل كل حاجة من غير ما تعطي أمراً مباشراً، ممكن تعمل كل حاجة من غير ما تبكت الذي أمامك: مالي لا أرى الهدهد، هو أنا لماذا لا أرى الهدهد؟ لفظ لا يزعل أحداً، لا يزعل، فمحتاجون أيضاً يا جماعة نأخذ وقتاً في اختيار الألفاظ.

ماشي، كما قلنا المسألة الأولى لأنها مهمة جداً بين الأزواج، مهمة جداً فكرة أنك بالذات الرجال، يعني المرأة في الطبيعي -طبعاً فيه أيضاً العكس- بس الطبيعي أن المرأة سهل أن تعترف بخطئها، هذا الطبيعي، يعني ممكن يكون فيه العكس، في نساء لا، لا تقول أنا غلطانة أبداً، بس الراجل هو الذي ممكن لا يحب يعمل هذا، لا، عادي جداً، ها هو سليمان عليه السلام. عارفين لما حصل في مرة بين أبي بكر رضي الله عنه وبين عمر، ما يحدث بين الناس، اختلفوا، فالنبي عليه الصلاة والسلام غضب غضباً شديداً، لماذا؟ أبو بكر لا أحد يأتي ناحيته، حتى لو سيدنا عمر، ما سيدنا أبو بكر لا أحد يلمسه، غضب وقال: ﴿هَلْ أَنْتُمْ تَارِكُوا لِي صَاحِبِي﴾، حتى الرواية تقول: فما أوذي بعدها، سيدنا أبو بكر بعد الموقف هذا لا أحد جاء ناحيته ثانية، وكان من الذي يختلف معه؟ مش واحداً هكذا، لا، سيدنا عمر. أبو بكر طبعاً عمل ماذا في الموقف هذا؟ جثا على ركبتيه وبكى وقال: يا رسول الله، كنت أنا الأظلم، كنت أنا الأظلم، عادي جداً، عادي أن تعترف بخطئك، بل أن تعترف بخطئك هذا.

أول خطوات التغيير: هل ستفضل بحالك؟ لو كل شيء غلط في حياتك تظن أنه جاي من براك، وأنا ما بغلطش واصل، هو اللي غلطان، هو اللي ما ترباش، الحكومة هي اللي عملت، أنت هتتغير إمتى؟ لما كل شيء له حجة عندك وله شماعة، فإنت هتتغير إمتى؟

قال الله تعالى: ﴿وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ * لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ﴾ [النمل: 20-21]. هنا سيدنا سليمان، الملوك والرؤساء والكبار كلامهم محسوب؛ ليه؟ علشان ما ترجعش تلزمهم بشيء أو تركبهم غلط، فتلاقي كلامهم كلام موزون. فسيدنا سليمان قال: لَأُعَذِّبَنَّهُ أو لَأَذْبَحَنَّهُ أو لَيَأْتِيَنِّي، ثلاث حاجات أهم، كان ممكن يقول لَأُعَذِّبَنَّهُ أو لَأَذْبَحَنَّهُ ويقف.

سيدنا سليمان خلي بالكم، تعالوا نشوف الجيش ونفسية الجيش، الجيش اللي خارج مع سليمان هو جيش ما هواش جيش من الأتقياء الورعين خالص، جيش سليمان كان فيه جن، والجن ده في قصة النملة إنه أصلاً سليمان لما سمع النملة، كان في نفر من الجن يكيدون له، بيدبروا له مكيدة، فأمر الله الريح أن تحمل كل صوت لأذن سليمان علشان يسمع كلام الجن اللي بيكيدوا له، فسمع كلام النملة. فالجيش ما هواش جيش تقي خالص، والجن ده مش كلهم موافقين على ملك سليمان، ولذلك لما سليمان أمرهم بأمر وبعدين قعد واتكأ على منسأته: ﴿فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهَيْنِ﴾ [سبأ: 14]. أكبر دليل يا جماعة إن سليمان عليه السلام أُعطي الجن، ومع ذلك وآخرين مقرنين في الأصفاد؛ طيب دول لو اتفكوا هيعملوا إيه؟ هو أُعطي ملك الجن ومع ذلك مربوطين، فالجيش خليط من ناس مطيعة وناس ثانية لا، مش كده؟

فأول درس معانا إن الهدهد غايب، هنا لازم يظهر حزم الملك، ما فيش هزار وما فيش دلع؛ لَأُعَذِّبَنَّهُ أو لَأَذْبَحَنَّهُ. ما فيش هزار، ودي مش بس رسالة للهدهد، هنا الملك بيرسل رسالة لكل فرد في الجيش: دي إدارتي، فلازم يبقى في نوع من الحزم. ولذلك الحكمة قالوا: الحكمة هي وضع كل شيء في موضعه، فإن وضعت الطيبة واللين موضع السيف هذا يضر، والعكس؛ أن تضع السيف والصوت والعصا موضع اللين والرحمة يضر. ولذلك سيدنا النبي عليه الصلاة والسلام من صفته: ﴿بِالْمُؤْمِنِينَ رَءُوفٌ رَّحِيمٌ﴾ [التوبة: 128]، ومع ذلك الله عز وجل يقول له: ﴿يَا أَيُّهَا النَّبِيُّ جَاهِدِ الْكُفَّارَ وَالْمُنَافِقِينَ وَاغْلُظْ عَلَيْهِمْ﴾ [التوبة: 73]، هذا لا ينافي هذا؛ ده موطن الغلظة وما ينفعش فيه الرأفة والرحمة، وده موطن الرحمة ولا يصلح فيه الغلظة. بل لما النبي عليه الصلاة والسلام مال إلى قول ظاهر أقرب للرحمة في الأسرى، عاتبه الله عز وجل.

فمهم أننا نبقى عندنا الحتة دي لأن كتير من الناس ما بيعرفش يضبط المسألة دي. فسيدنا سليمان أول حاجة: ﴿مَا لِيَ لَا أَرَى الْهُدْهُدَ﴾، ﴿لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ﴾، ودي قلنا رسالة للجيش كله عشان اللي بيفكر يلم نفسه، أنا ما عنديش دلع. قالوا لو كان سليمان عليه السلام قال لأعذبنه أو لأذبحنه وسكت، وبعدين جه الهدهد بسلطان مبين، كان سليمان عليه السلام لازم يعمل واحدة من الاثنين، ده ملك؛ فهو حط خيارين لا ثالث لهما، يا هعذبه يا هذبحه. طيب طلع للهدهد عذر ساعتها هيتحط في خانة، هيعمل إيه سليمان؟ خلي بالكم، ممكن سليمان يعفو عليه السلام، لكن لما يعفو الجن هيدخل يقول شفتوا الملك العفو، أو هيدخل يكتب رجع في كلامه لا ذبح ولا عذب، الملك اللي هي دي اللي هتحصل في الخلخلة اللي هتحصل. ما هو يا جماعة وجود هذه الفئة خطير جداً، اللي احنا دلوقتي طبعاً الجن خلاص معروف أنه جن، إنما الفئة دي اللي هي المنافقين اللي أنت ما إنتش عارف إنه كاره، وفي نفس الوقت يحدث بلبلة ويحدث فرقة في الصف بأشياء شبه كده.

في بعض الناس ما تفهمش ده، يبقى عاوز عدد كتير وخلاص، نبقى 100 ولا 1000 طبعاً يا سلام، والقرآن حسم تلك القضية ما سابهاش ليا وليك، ماذا قال عنهم؟ ﴿لَوْ خَرَجُوا فِيكُم مَّا زَادُوكُمْ إِلَّا خَبَالًا وَلَأَوْضَعُوا خِلَالَكُمْ يَبْغُونَكُمُ الْفِتْنَةَ وَفِيكُمْ سَمَّاعُونَ لَهُمْ﴾ [التوبة: 47]. فإيه اللي هيحصل؟ بصوا يا جماعة اعتبار المآلات، سيدنا سليمان ملك يرى اللي هيحصل قدام، فيقوم حاطط الخيار الأخير ده، كلامه موزون جداً، ليه؟ علشان الجن مش هيقول أصل هو ملك طيب ورحيم، مش هيتقال كده. ولو تفتكروا قلنا قبل كده في موضوع اعتبار المآلات لما قلنا سيدنا النبي عليه الصلاة والسلام لما جاء عمر وقال يا رسول الله دعني أضرب عنق هذا المنافق، فماذا قال له النبي عليه الصلاة والسلام؟ «يتحدث الناس أن محمداً يقتل أصحابه». هيقولوا كده، يعني أنت النهارده هتقوم تقتله لأنه منافق وأذى النبي صلى الله عليه وسلم، بكرة صفحات الفيسبوك وبرامج التوك شو هتقول محمد صلى الله عليه وسلم يقتل أصحابه، مش هتقول يقتله لأنه منافق، مش هتقول كده. طيب النبي عليه الصلاة والسلام اعتبر هذا؟ آه اعتبر هذا وتوقف عن قتله وهو مستحق للقتل، النظر للمآلات؛ فالكلمة محسوبة عند الملوك وعند القادة وعند الكبار، ما إنتش عمال تقول أي كلام وخلاص، كلمتك بميزان.

ولذلك يا جماعة الفائدة دي هتلاقوها فين بعد شوية، مش هتيجي معانا النهارده، هي قصة بقى ممكن نسميها قصة ملكة، يعني في بلقيس لما جاب العرش ونكّر العرش وسألها: "أهكذا عرشك؟" هكذا عرشك هنا حطها في خانة برضو؛ ليه بقى؟ الأول شوفوا الجن برضو بلقيس قالوا إن أمها كانت من الجن، فأبوها من الإنس وأمها من الجن، فالجن خاف أن سليمان يتزوج بلقيس، فحبوا ينفروه عنها فابتدوا يقولوا شوية إشاعات عن بلقيس، فمما قالوه أنها مجنونة مالهاش عقل، فأراد سليمان أن يختبر عقلها، فقال نكّروا لها عرشها، وبعدين جت قال أهكذا عرشك؟ فهي قدام حاجة، إما تقول آه وهو وقد نكّر العرش يعني في تغيرات كتير جداً، فهي لو معقولة ما انتبهتش للتغيرات، أو تقول لا مش هو تبقى ما هياش حافظة عرشها، يعني في كلتا الجوابين في إشكال، فقال أهكذا عرشك؟ قالت: كأنه هو، والعلماء هنا وقفوا قدام الكلمة دي وقالوا إن ده أحسن جواب يقال في مثل هذا، كأنه هو، لا قالت هو ولا قالت مش هو، فحينها علم سليمان عقلها، دي مش واحدة عادية.

طيب ده نستفيد منه إيه بالذات الرجال؟ يعني احنا ما نلومش على النساء في موضوع الكلام ده يا جماعة ودي حقيقة، يعني المرأة في حتة الكلام دي ما فيش لوم عليها، يعني إيه ما فيش لوم عليها تقول اللي تقوله لا مش كده، بس يعني يُغتفر لها ما لا يُغتفر للرجال الحقيقة، ويسامح في حقها ما لا يسامح في حق الرجال، ولو رجعنا لعصر النبوة هنلاقي كلام ما يتقالش خالص واتقال لمين؟ لسيدنا النبي عليه الصلاة والسلام، وسامح فيه؛ ليه؟ لأن المرأة مشاعرها تغلب، دي أول حاجة، أنت عارف لما الراجل كده يغضب غضب شديد فتلاقيه عمال يتكلم بكلام، بعد لما يقعد مع نفسه بعد كده يزعل إنه قال ده، طيب هو ليه اتكلم بيه؟ عشان في مشاعر عنده معينة غلبت، ده في الراجل قليل، إن مشاعره تغلب لدرجة إنه يقول كلام دون تفكير ودون إرجاعه للعقل ودون.. قليل، المرأة بقى مشاعرها تغلب ده الطبيعي بتاعها، سواء بقى مشاعر غضب، مشاعر حزن، مشاعر غيرة، مشاعر تغلب، فيُغتفر لها خلاص، إنما الراجل لا المفروض الراجل ما يبقاش كده الحقيقة، كلامه محسوب موزون، فاهم بيقول إيه وبيتكلم إزاي.

فقال: ﴿مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ * لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ﴾. لَأُعَذِّبَنَّهُ أو لَأَذْبَحَنَّهُ، إمتى هعمل ده وإمتى هعمل ده؟ فقال بعض أهل العلم إنما ذكر العذاب والذبح ليه؟ قالوا إنه هيعذبه لو رأى مصلحة في إبقائه، ويذبحه إن لم يرى مصلحة في إبقائه، فبرضو ده من فقه سليمان؛ إني هعذبه أو هذبحه، إمتى هعذبه؟ والله لو لقيت في مصلحة في إبقائه هعذبه، نفسي أعرف الهدهد ده يتعذب إزاي، أربطه من الجناحين مثلاً، أو لاذبحنه لو ما لقيتش مصلحة، ودي فائدة إدارية يا جماعة مهمة جداً. لما بيجوا يعملوا إنترفيو للمناصب الكبيرة، الكبيرة اللي هي الكبيرة فعلاً، يعني إيه؟ هنعين سي إي أو مثلاً في الشركة، فالمفروض في سؤال مشهور لو هي شركة محترمة بتسأله في الإنترفيو، بيقولوا له احكيلنا موقف اضطريت فيه إنك تفصل حد من شغل أو ترفد، فلو كانت الإجابة إنه لا ما فيش، ده بيكون حاجة مش في صالحه، مش حاجة حلوة إنك ما رفدتش حد مع إنه ممكن فعلاً ما يكونش قابله الموقف، إنما لو في موقف يستدعي يرفد وذكره دي بتكون حاجة في صالحه، إنه قوي كفاية إنه ياخد القرار ده.

ليه؟ لأن في بعض الأوقات، المنافقون أو العنصر الفاسد ده ممكن وجوده مضر بالمؤسسة، وأنت وجودك هنا لمصلحة المؤسسة، فده ما ينفعش، ده خلاص هنقعد نحاول نصلح، إنما فكرة أصله حرام، طب ما هو حرام هيفضل يؤذي وهيفضل ينشر اللي بينشره في الموظفين وهيفضل بيدمر نفسياتهم، وكل شوية أصله حرام ما ينفعش، لا إنت هنا مش عشان مصلحة الموظف بس، إنت هنا عشان الكيان اللي إنت فيه ده، وده مؤذي للكيان مؤذي للمؤسسة. فكان سليمان واعي لهذه القضية، لَأُعَذِّبَنَّهُ أو لَأَذْبَحَنَّهُ، ممكن يظهر لي المصلحة في عدم إبقاء هذا العنصر في الجيش، ساعتها أذبح ما عنديش مشكلة خالص، مش بنقول لك اذبح بقى يعني، بس إنك تتخلص من هذا العنصر ممكن يبقى القرار ده من ضمن اختياراتك، أنا ليه بقول الكلام ده؟ في بعض الناس الاختيار ده أصلاً ما هواش اختيار عندهم، يعني فكرة إن الاختيار ده يتحط على الترابيزة ويناقش ده مستحيل، ده غلط.

فقال: ﴿لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ * فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِط بِهِ وَجِئْتُكَ مِن سَبَإٍ بِنَبَإٍ يَقِينٍ﴾ [النمل: 21-22]. كنا اتكلمنا في قصة نملة على معنى هنعيده بسرعة، وهو الله عز وجل ذكر الدابة في سورة النمل، قال سبحانه وتعالى: ﴿وَإِذَا وَقَعَ الْقَوْلُ عَلَيْهِمْ أَخْرَجْنَا لَهُمْ دَابَّةً مِّنَ الْأَرْضِ تُكَلِّمُهُمْ أَنَّ النَّاسَ كَانُوا بِآيَاتِنَا لَا يُوقِنُونَ﴾ [النمل: 82]. وبعدين استشكل الناس ذلك، دابة تكلمنا وعندها إدراك وعندها وعي وعندها كلام، والعجيب أن ذلك التعجب زواله في سورة النمل برضو، الآية دي في آخر سورة النمل خالص. آية الدابة في سورة النمل، ذكر الله عز وجل قصة النملة وقصة الهدهد، ولو تأملنا في القصتين هنلاقي حاجتين: إدراك عالي جداً للنملة، وإدراك عالي جداً للهدهد، وبعدين عندهم قاموس من المصطلحات اللي يعبروا به عن ذلك المدرك. يعني النملة شوفوا إدراك النملة، واللي هقوله ده يا جماعة عجيب؛ النملة بتقول إيه؟ ﴿قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ﴾ [النمل: 18]. هي مدركة إن اللي جايين دول أول حاجة جيش، ده نوع إدراك تاني، يعني أنا لو في كلاب ماشية، قلت لك إيه وظيفة الكلاب؟ ما تقدرش تحدد، هي أدركت إن دول وظيفتهم أنهم جيش، يبقى عندها إدراك لكونهم جيش.

للقائد والجنود مدركة، فاهمة أن في قائد وفي جنود، ومدركة أن القائد ده فلان الفلاني، ﴿لَا يَحْطِمَنَّكُمْ سُلَيْمَانُ وَجُنُودُهُ﴾. وبعدين مدركة أن هم صلحاء، ﴿وَهُمْ لَا يَشْعُرُونَ﴾، لو عملوا كده هم، يعني بتعتذر لهم وهم لا يشعرون، ده كله إدراك عالٍ جداً من النملة، أول حاجة. ثاني حاجة عرفت تصيغ الإدراك ده للنمل.

الهدهد بقى اللي معانا دلوقتي نفس القضية، قال: ﴿أَحَطتُ بِمَا لَمْ تُحِط بِهِ﴾، هنجي لها دلوقتي برضه إن شاء الله، ﴿وَجِئْتُكَ مِن سَبَإٍ بِنَبَإٍ يَقِينٍ﴾. الهدهد فاهم أنه طاير دلوقتي مثلاً فوق إيه، فوق القاهرة، وبعد شوية دخل على إسكندرية، وبعد شوية راح لليمن، فهو عنده إدراك بالأماكن. بنبأ يقين أني وجدت امرأة، عنده إدراك بالاختلاف الجنسي؛ يعني عارف أن دي امرأة وده رجل، زي ما أقول لكم، ممكن ناس كتير ما لهاش دراية مع الحيوانات لو قلت لهم بعيد القطة دي ذكر ولا أنثى ما يعرفش يجاوب، العصفور ده ذكر ولا أنثى ما يعرفش يجاوب. الهدهد مدرك، ﴿وَجِئْتُكَ مِن سَبَإٍ بِنَبَإٍ يَقِينٍ * إِنِّي وَجَدتُّ امْرَأَةً تَمْلِكُهُمْ﴾، عنده إدراك بوظيفتها إيه، ﴿وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ﴾؛ فعنده فكرة أنه فاهم أن ده عظيم وده حقير وده صغير وده كبير، عارف يحدد المسائل دي.

فعنده الإدراك ده، ومش بس عنده الإدراك، عارف يصيغ الإدراك، أنتم عارفين أنكم ممكن تبقوا عارفين حاجة بس مش عارفين تقولوها، يعني أبسط مثال عشان تفهموا: الطفل اللي عنده تلات سنين أو أربع سنين، تقول له اشرب يشرب، اقعد يقعد، هو عنده الإدراك، يعرف يصيغ ده؟ ما يعرفش ينطقه. ففي فرق كبير بين أنك تبقى مدرك وأنك تعرف تصيغ إدراكك. اللي بيربي كلب، يديله أوامر، الكلب مدرك معنى الأمر إيه، طب الكلب يعرف يقوله؟ يعرف يصيغ الأمر ده؟ ما يعرفش يصيغه. ففي فرق بين أنك تبقى مدرك للحاجة وأنك تعرف تصيغ الحاجة دي. فالنملة عندها الإدراك وعندها صياغة المدرك، والهدهد عنده الإدراك وإدراك عالٍ وتمييز عالٍ زي ما شفنا، وعنده كيف يصيغ ذلك المدرك. ففين بقى العجب أن تيجي دابة تخرج تكلم الناس وتعرف تميز أن ده مؤمن وده كافر؟ أين العجب؟

فـ قال الهدهد: ﴿أَحَطتُ بِمَا لَمْ تُحِط بِهِ﴾. جامدة قوي، أنت يا جماعة الهدهد بيكلم سليمان، سليمان ده اللي هو ملك ملك عجيب، وبعدين من جنوده الجن، أنتم فاهمين يعني إيه، ويجي هدهد يقول له: ﴿أَحَطتُ بِمَا لَمْ تُحِط بِهِ﴾. فهنا سيدنا سليمان يعمل إيه بقى، يفعل فعل الملوك، فعل الكبار اللي هو إيه؟ ولا كأنه قال حاجة، إحنا بنناقش القضية دلوقتي. فده برضه مهارة ينبغي أن نتعلمها، إحنا بنناقش قضية، طب في أثناء القضية دي صوته علي، ممكن خلي بالكم ممكن يبقى الصح أني ولا كأني صوته علي، خلي بالك ممكن في وقت تاني مع شخص تاني في حالة ثانية يبقى الصح أنك تسكته، وأنك تفهمه أنه غلطان، آه طبعاً، إنما دي أداة معاك، أنك كأنه ما فيش حاجة، إحنا بنناقش القضية، بالذات لو أنت عارف أن هو مثلاً ده طبعه.

ما هو في يا جماعة ناس طبعها كده، صوته عالي، يأتي إلى النبي عليه الصلاه والسلام ويتكلم بصوت عالي جهوري: يا محمد متى الساعة؟ فالنبي بيعمل إيه عليه الصلاه والسلام، يجيبه بنحو من صوته. شوفوا يا جماعة، تخلص القضية خلاص، ليه؟ هو كده صوته عالي، أو قابلته كده، في بيوت صوتها عالي، يعني تدخل البيت تحس كله بيزعق، هو ده ما فيش حد بيزعق لحد، هم صوتهم عالي، وفي بيوت ما بيتكلموش، طباع. من المواقف اللي حصلت بيقولوا أن المكان كل ما كان أقرب للتبدن وكده يبقى ريتم حياته أسرع. فطبعاً اللي عايش في الريتم ده ما يبقاش دريان.

أنا فاكر زمان مرة سافرت مطروح، وبعدين زمان بقى أيام ما كانت مطروح بحر وشط وخلاص على كده ما فيش حاجة تاني، وبعدين بنزل من التاكسي، العربية بتاعة الولد واخد وقت شوية، فأنا عمال متصربع ولا بسرعة، فبص لي كده، يقول لي: أنت مستعجل ليه؟ إحنا هنا ما بنستعجلش. أنا أصلاً ارتحت، أنا حسيت! طب إحنا لو عندنا في القاهرة تاكسي يعني دقيقتين تنزل، تنزله والباقي أنا هاخده وأمشي بقى، تتقابله بعدين بقى في أي مكان يعني مش هقف لك كتير. فمن الطرائف بقى اللي حصلت، أنا من القاهرة وتزوجت من إسكندرية، إسكندرية برضه كان من حوالي 20 سنة برضه ما هياش زي دلوقتي، ما هياش بالزحمة دي، ما هياش بال، فكان برضه رتمها أهدى كتير، وبعدين أول مرة نزلت أنا وزوجتي في محطة القطر، فأنـا عادي نزلت مافيش ما عنديش مشكلة، وبعدين نزلنا المترو، برضه هي عندها صدمة حضارية، يعني واقفة، أقول لها في إيه؟ قالت لي: هم كله بيجري ليه كده؟ الناس كلها بتجري ليه؟ فأنا وقفت انتبهت، هو فعلاً الناس كلها بتجري، بس أنا عشان واحد من المنظومة اللي بتجري فأنا مش دريان أننا بنجري، بس هو لما حد يجي من بره يلاقيك بتجري. فالشاهد، طباع، هي طباع، ممكن واحد يبقى صوته عالي، ممكن واحد يبقى ما بيحسنش الكلام، ما بيحسنش صياغة الكلام، فده من المهارات اللي عاوزين نتعلمها، أن هو لا بيهينك ولا هو يقصدك بحاجة، عدي.

كلمة الهدهد دي تقيلة، ﴿أَحَطتُ بِمَا لَمْ تُحِط بِهِ﴾، أنت بتكلم مين يا عم؟ أنت بتكلم سليمان عليه السلام. الجميل أن سليمان عليه السلام ما وقفش عند الكلمة، ما وقفش عندها، خلاص. ﴿أَحَطتُ بِمَا لَمْ تُحِط بِهِ﴾، هنا من الحاجات الجميلة اللي قالوها، إحنا قلنا سورة النمل أصلاً بتتكلم عن قيمة العلم، ومفردة العلم جاءت كثيراً في سورة النمل، مما قيل هنا أن سليمان عليه السلام علم ما لا يعلم، وجهل ما لا يجهل. سليمان علم ما لا يعلم، علم قول النملة، هو مين يعرف النملة بتقول إيه؟ سليمان علم قول النملة، وجهل ما لا يجهل، اللي هو إيه أن في مملكة على بعد، أنتم عارفين سبأ كانت في اليمن، ومقر ملك سليمان كان في الشام، فيعني فرضة كعب مش مسافة كبيرة، قالوا تلات مراحل أو حاجة زي كده، أنه على بعد تلات مراحل منه، أو في اليمن في مملكة صفاتها كذا وكذا، لا وفيها عرش عظيم، ومما قيل أن عرش سبأ، عرش بلقيس، كان أعظم من عرش سليمان.

فسليمان ماعرفش، فكان المعنى هنا أن فكرة أن سليمان عليه السلام لما سمع قول النملة، أراد الله عز وجل أنه يعمل إيه؟ يعني يخفض قليلاً من رؤية، طبعاً حاشاه أنه يرى نفسه سليمان عليه السلام، لكن المعنى ده معنى مهم، اللي هو لما يحصل موقف كبير كده ممكن يجي بعديه موقف تاني ينزلك شوية، فاعرف رسالة ربنا ليك سبحانه وتعالى ليه، علشان ما تشوفش نفسك. أنتم عارفين الحتة دي؟ لا موسى عليه السلام، الرحلة اللي جت في سورة الكهف كلها مع الخضر أصلاً سببها إيه؟ حاجة زي كده، سيدنا موسى واقف بيخطب في قومه، وبعدين يسأل: هل تعلم أحداً في الأرض أعلم منك؟ قال: لا، فعاتبه الله عز وجل إذ لم يرجع الأمر إليه، أنت مين قال لك أن ما فيش حد في الأرض أعلم منك؟ ثم أُمر بتلك الرحلة التي ذكرها الله عز وجل لنا في قصة في سورة الكهف. فلما سليمان سمع قول النملة يجي بعدها على طول الهدهد يقول له: ﴿أَحَطتُ بِمَا لَمْ تُحِط بِهِ﴾، أنا عارف حاجة أنت ما تعرفهاش. ماشي، فمحتاجين ده، محتاجين نبقى هادئين ونناقش الموضوع. ﴿وَجِئْتُكَ مِن سَبَإٍ بِنَبَإٍ يَقِينٍ * إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ﴾.

قبل الآية دي، الآية اللي قبليها برضه من الفوائد اللي فيها، الهدهد لما قال عنه سليمان ﴿لَأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي﴾، هنا يا جماعة في مسألة مهمة جداً وهي مسألة للحقيقة للقائد ومسألة كذلك للتابع، فكرة أنه من الحاجات التي لا تغتفر أن يكون في عمل يجمعنا، وبعدين كل واحد يمشي بدماغه، أو واحد يرى أنه ممكن يمشي بدماغه، ودي فكرة تدمر أصل العمل، يا جماعة، والفكرة دي نفسها اللي بيجوز ده مش شرعاً، يعني يجوز عقلاً وواقعاً وكده أنه يقدر يمشي بدماغه، هو نفسه ما يقبلش ده في شيء هو يرأسه. يا جماعة شركة ولا مصنع ولا كيان قائم على هدف مشترك، إزاي كل فرد يمشي بدماغه إزاي يعني؟ ما ينفعش. ماشي، فمن المعاني اللي اتقالت هنا برضه الموضوع ده، أنه ما ينفعش القائد يسيب كل واحد كده يمشي بدماغه، والقرآن أشار إلى هذا المعنى، قال سبحانه وتعالى: ﴿وَإِذَا كَانُوا مَعَهُ عَلَىٰ أَمْرٍ جَامِعٍ لَّمْ يَذْهَبُوا حَتَّىٰ يَسْتَأْذِنُوهُ﴾ [النور: 62]، وإذا كانوا معه على أمر جامع، أمر يجمعهم كحرب أو صلاة، ما ينفعش أجي أنا في الوقت ده أنا مش لاعب، ما فيش كده، أنت خلاص أنت دخلت في عمل في تلك المنظومة وقبلت بذلك، ما ينفعش.

في ناس كده، في ناس مرهقة، نيجي نعمل عمل دنيوي أو عمل ديني عمل دعوي مثلاً، فيلا هنقعد ونتناقش واتفقنا خلاص، فهنشتغل 1، 2، 3، خلاص، نقوم من هنا، واحد بدماغه، ملوش دعوة خالص باللي اتقال، طب يا ابني أنت ليه من الأول؟ ليه قعدت طالما أنت هتمشي بدماغك ما تقعدش. يعني هو حرام، أنا ما أقولكش حرام، بس ما فيش عمل في الدنيا هيقوم كده، لأن أنت لو خدت حتة تعملها خلاص غيرك سايبها على أن أنت اللي هتعملها، فتجيء أنت بدماغك مش عامل، ما ينفعش. طيب القائد ما ينفعش يسيب دي كده وإلا هينهار، لو ما لقوش حزم من القائد في هذه الأمور، القائد زي ما بقول مش لازم ملك ولا رئيس ولا رئيس مؤسسة، مدير المصنع، ماسك الدعوة، ماسك المقرأة، ماسك إدارة المسجد، فمهم جداً الموضوع ده.

المسألة الثانية وهي بقى أصلاً الفائدة الكبرى من قصة الهدهد، بقى فكرة يا جماعة ده الدرس، يعني بص اللي فات كله لو عاوز يعني ابتدي بقى من دلوقتي وخد الدرس ده، ده الدرس الأعظم في قصة الهدهد اللي هو إيه؟ اللي هو أنك بتسخر ملكاتك لخدمة دين. إحنا يا جماعة في قصة النملة شفنا إزاي النملة لما لقت الخطر اللي جاي كان ممكن تعمل إيه، أنا والطوفان من بعدي، تخلع ومالهاش دعوة بالنمل يعني المهم أنا مش كده، أو تدخل على أسرتها يلا يا عيال ده سليمان وتاخذ عيالها وتخلع، لا هو في مسؤولية تجاه قرية النمل، وكان المعنى النملة يعني على ضعف قوتها وقلة حجمها وكده عملت اللي تقدر عليه. الهدهد لما كان ليه جناحين استغلهم برضه، لا أنا هفضل قاعد زي النملة، هطير وأروح هنا وهنا وهنا وهنا لدين الله، سخر الملكات لخدمة دين الله عز وجل.

فأنت دورك فين بقى في الدين؟ ملكاتك فين؟ تسخيرها لدين ربنا سبحانه وتعالى، يعني ممكن يكون واحد الملكات بتاعته مثلاً عنده ملكة أنه يقعد يبقى هو يعرف ياكل الجو مثلاً، بملكته استخدمها في دين ربنا سبحانه وتعالى، واحد عنده ملكة يعرف يكتب كويس استخدمها، عنده منصة عليها آلاف الناس ولا ملايين استخدمها لدين ربنا سبحانه وتعالى، اللي حصل لغة من اللغات وشاطر فيها، يعني مصروف عليه في التعليم، فعنده الإنجليزي كويس، عنده الفرنساوي، عنده الألماني، عملت بيه إيه؟ فين ده للدين؟ فين تسخير ده للدين؟ فعندك ملكة حتى لو حصلت ملكة دنيوية استخدمها لدين ربنا سبحانه وتعالى.

أنا من الطرائف حصلت لي مرة، كنت في بطولة القاهرة، أنا كنت بلعب كاراتيه زمان، كوميتيه يعني فايت ماتشات يعني، فكنت في بطولة القاهرة والحمد لله أنا كنت أول ميزاني، سنين كتير أنا أول الميزان بتاعي، بنسميه راكب الميزان، ميزاني معروف، فكنت في بطولة القاهرة، وبعدين في واحد برضه من التقائل، وهو كان نادي هليوبوليس، عارفين بتوع هليوبوليس طبعاً أقوياء وكده، فجيت في أول البطولة الصبح يعني وقت الظهر كده، إحنا طبعاً كنا ما عندناش تيجي وقت الأذان في الاستاد نأذن بصوت عالي والبساط كله يقف، خمس ست أبسطة شغالين يقفوا كلهم ونقف نصلي جماعة وكده، بس البطولة دي كانت في نادي الزهور، وبعدين جه في وقت صلاة الظهر، فرايح أصلي الظهر، فقلت له يا فلان تعالى صلِ الظهر إحنا لسه ما لعبناش، فراح بص لي من فوق لتحت كده، وسخر كده وبتاع، سبته رحت صليت، وبعدين قدر الله عز وجل أن أنا قابلته في أول وثاني نهائي الميزان، فكسبته.

مهين شوية، وبعدين جه وقت صلاة العصر فلقيته جاي مشمر، وإيديه بتشر مية ومكعب الجزمه، وجاي يصلي العصر. قلت له: وأنت بتعمل إيه؟ قال لي: بتمرن عشان بطولة الجمهورية.

فالشاهد؛ لو ربنا سبحانه وتعالى منّ عليك بشيء من أي حاجة، فاتح عليك في أي حاجة في الدنيا، استغل ده في الدين. الهدهد عمل كده؛ عندي جناحين بيطيروا، هطير لأجل الدين، أنا شايل هم الدين. ﴿وَجِئْتُكَ مِن سَبَإٍ بِنَبَإٍ يَقِينٍ * إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ﴾ [النمل: 22-23]. وهنا جاءت الإسرائيليات كتير أوي في فكرة المملكة دي، كان فيها إيه؟ واوتيت من كل شيء، ولها عرش عظيم. العرش ده بمقاييس اليوم قالوا كان طول في عرض 35 متر في 35 متر، أنتم متخيلين الرقم ده؟ الرقم ده تقريبًا ارتفاعه مثلا 12 دور، بيبقى 3 متر ولا كام؟ صح، 3 في 12 ب 36؛ يعني عمارة ارتفاعها 12 متر، تخيلوا كده ده عرض العرش. طبعًا هي كانت قاعدة بتتلذذ في العرش، إنما عظم العرش دليل على عظم المملكة، وبعدين لما العرش 35 في 35، القصر كان شكله إيه؟ لها عرش عظيم.

الفائدة الثانية الكبرى؛ إحنا قلنا أول فائدة هي فائدة الدرس أصلاً، فكرة تستغل ملكاتك. باختصار كده النهارده كل واحد فينا اللي عارف الملكة اللي عنده إيه؛ أصل أنت مش لازم، مش كلنا هنبقى قدامنا حديدة ونتكلم، مش هيحصل. طب بس فينا اللي يقدر يعرف يشغل كاميرا، وفينا اللي يقدر يعرف يكتب كلمتين حلوين وينزلهم، وفينا اللي يقدر يبقى ممكن في الكواليس بس يعرف يدير؛ يعني إيه يدير؟ يعني هو اللي ينظم المسجد، ويتصل بفلان اللي هيتكلم، وأي عمل مش هينتج إلا بكده؛ محتاجين ده ومحتاجين ده ومحتاجين ده. فشوف أنت تقدر تسد فين، وبرضه أنا مش بحجر الدين على الدرس، لا ما هو الدين ده فيه منه القيام على حوائج المسلمين؛ الناس المرضى في المستشفيات، الأرامل، المساكين، من لهم؟ ده دين ولا مش دين؟ ده دين. ففي ثغور كتير جدا في الدين إحنا ممكن نبقى بس مش منتبهين لها.

يبقى أول حاجة شوف ملكاتك اللي تعرف تسخرها، وشوف الثغور بتاعة الدين، ووفق بقى الملكات معها. ممكن واحد يبقى عنده مثلًا هو بيعرف يشبك الدنيا في بعض، يعني يعرف يعمل نتورك كويسة جدا، والله دي بتحل حاجات، مجرد إن تلاقيه دائمًا هو مصب كل حاجة، فتلاقي واحد بيكلمه: ده أنا عندي مشكلة، ده أنا أعرف فلان اللي في المصلحة الفلانية، وقعد في مكانه يلينك ده مع ده الدنيا تخلص. أنا أعرف واحد كده وواحد كبير، واحد سنه كبير ومقامه كبير، واحد من طلاب الشيخ ابن باز؛ كان ملازم الشيخ ابن باز فوق الـ 11، 12 سنة، ودي حاجة عجيبة فيه؛ يعرف يربط أي حد بأي حد، تبقى أنت عارف بتكلمه فهو عنده الحل، ملكة. واحد تاني عنده جاه؛ يعني إيه عنده جاه؟ يعني يعرف، فيبذل من جاهه، والله ده أنا كذا، طب هكلم لك فلان الفلاني، أيوه أنا فلان الفلاني، خلاص يتحل الموضوع بجاهه، وده نوع من أنواع البذل، بذل الجاه. وهكذا شوف ملكتك إيه، واستخدمها في دين ربنا سبحانه وتعالى.

الفائدة الثانية؛ أن الهدهد لما راح وشاف الدنيا دي، الدنيا دي ما فتنتوش عن الدين. ﴿إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ * وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ﴾ [النمل: 23-24]. ما انبهرش بقى بالدنيا وبالمولات وناطحات السحاب، وما شافش الكفر والشرك، لا، الهدهد شاف الدنيا وشاف الدنيا على قدرها، هي دنيا كبيرة فعلًا، أوتيت من كل شيء، ولها عرش عظيم. اللي شاغله إيه بقى؟ وجدتها وقومها يسجدون للشمس من دون الله. أهي دي بيقع فيها كتير من المتدينين، مش هقول لكم من الناس، من المتدينين؛ أول ما يطلع بره حظيرة الإيمان خلاص يفتن بالدنيا، وبعد شوية ممكن تلاقيه هو اللي مدافع عنها، ويقول لك: يا عم ده في القلب، والمهم مش عارف إيه، يا ابني ده كافر، يا ابني ده ملحد، بيشتم ربنا! مش شايف ده خالص، يذوب في المجتمع، لا، هنا الهدهد عنده الثوابت، المهم الدين.

وكل اللي ذكره الهدهد كتوطئة؛ يعني يا جماعة هو لم يفتن بالأمور دي، كان الكلام: يعني بعد كل اللي ربنا أداه لهم ده يروحوا يعبدوا الشمس؟ هو ده المعنى، وعشان كده جاي في الآخر: ﴿وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لَا يَهْتَدُونَ * أَلَّا يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَاوَاتِ وَالْأَرْضِ﴾ [النمل: 24-25]. الخبء في السماوات والأرض، اشمعنى الخبء في السماوات والأرض؟ عشان هدهد، هو إيه اللي هم الهدهد؟ النبتة والمية وخلاص، هو عاوز ياكل ويشرب، فمزقطط كده، فشوفوا يا جماعة الاستدلال البسيط؛ يسجدوا لربنا اللي بيخرج الخبء في السماوات والأرض، اللي بيخرج لنا النبتة والمية، وهو ده اللي قالوه العلماء، الخبء النبات والماء. فاستدل بالربوبية على الألوهية، هو الذي يطعمنا، هو الذي يسقينا، هو الذي يخرج لنا النبات؛ الحب اللي باكله، والمية اللي بشربها، فهو اللي هعبده.

فلم يفتن الهدهد بذلك؛ ﴿إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ * وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ وَزَيَّنَ لَهُمُ الشَّيْطَانُ﴾ [النمل: 23-24]. شوفوا يا جماعة إدراك الهدهد عالي إزاي؛ الهدهد واعي للمعركة اللي إحنا بنغفل عنها أصلاً. ده إدراك عالي جدا، يعني مش بس إدراك لظواهر الأمور، لا ده مدرك للظواهر ومدرك لتلك المعركة الخفية. يعني هو الهدهد راح بص كده فلقى الشيطان بيزين لهم، لا خالص ما فيش كده، لكن هو مدرك إن في معركة خفية دائرة، المعركة دي إحنا بنغفل عنها، وجزء مهم جدا من إيمانك إنك تبقى دائمًا واعي لتلك المعركة. يا جماعة الشيطان واعي ليها من أول لحظة أنت بتيجي فيها الدنيا، إيه اللي بيحصل؟ أي مولود بيولد بيعمل إيه؟ ينزغه الشيطان، ولذلك يستهل صارخًا؛ ليه بيعيط؟ ينزغه الشيطان، إظهارًا للعداوة لك من أول لحظة. أنت فينك بقى من المعركة اللي دايرة دي؟ الشيطان عمال يرتب لك ويكيد لك، وأنت بتحضر مع المصيدة، يعني بتساعده. الهدهد واعي لتلك المعركة: ﴿وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ﴾ [النمل: 24].

أنتم تعبتوا صح كده، عدينا الساعة، خلاص نقف هنا. أقول قولي هذا، واستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.