الشيخ أمجد سميرسيدنا سليمان عليه السلام ذكر في كذا موطن في القرآن، ومن هذه المواطن سورة النمل. ذكر في يعني قصة سليمان نقدر نقسمها لثلاث قصص: يبقى قصة مع النملة، وقصة مع الهدهد، وقصة مع ملكة سبأ.
الحقيقة قبل ما ندخل في إحنا النهارده إن شاء الله هنحاول نتأمل شوية في قصة النملة، لكن قبل ما ندخل في قصة النملة عاوزين نعيش نفسية سورة النمل. سورة النمل سورة مكية، وأول ما نقول إنها سورة مكية يبقى على طول فاهمين إن إحنا هنعيش فترة إيه استضعاف؛ يعني نعيش النفسية دي يا جماعة؛ أن الصحابة رضوان الله عليهم في مكة وهم مستضعفون، ويخافون بطش الكفار، ويتخفون بدينهم. يعني إيه الأجواء دي اللي إحنا كلنا عارفينها؟ في هذه الأجواء تنزل سورة النمل، هي السورة رقم ثمانية وأربعين حسب ترتيب النزول. وكعادتنا عاوزين نبص على سورة قبل وسورة بعد عشان برضه نعيش النفسية بتاعة الفترة دي؛ فسورة النمل هي السورة الثامنة والاربعين، السورة التاسعة والاربعين في ترتيب النزول هي سورة القصص، السورة السابعة والاربعين في ترتيب النزول هي سورة الشعراء. يبقى ترتيب النزول: شعراء، نمل، قصص، وهو هو نفس ترتيب المصحف؛ هتلاقوا برضه المصحف كده: شعراء، نمل، قصص في المصحف. لكن إحنا دلوقتي بنتكلم على ترتيب النزول، فالشعراء نزلت ثم النمل ثم القصص.
سورة النمل زيها زي أي سورة مكية بتتكلم عن القضايا الكبرى اللي القرآن المكي بيتكلم عنها؛ مسألة الجنة والنار، وتوحيد الربوبية، وإزاي نستدل بيه على عبادة الله عز وجل (الخمس آيات بتوع إيه مع الله في سورة النمل). فهي القضايا الكبرى بتاعة القرآن المكي موجودة في سورة النمل. لكن سورة النمل فيها ملحوظة عجيبة جداً، وهي أن سورة النمل مفردة العلم تكررت فيها كثيراً؛ كلمة علم أو مشتقات العلم تكررت في سورة النمل كثيراً. فبداية من أول السورة في فواتح السورة قال الله عز وجل: ﴿وَإِنَّكَ لَتُلَقَّى الْقُرْآنَ مِن لَّدُنْ حَكِيمٍ عَلِيمٍ﴾ [النمل: 6]. وبرضه هنا في حاجة عجيبة وهنتكلم عنها كمان شوية، أن المعتاد في القرآن والأكثر في القرآن: حكيم عليم ولا عليم حكيم؟ حكيم عليم مش كده؟ يعني العليم تأتي قبل الحكيم إلا في مواطن قليلة، الحكيم تأتي قبل العليم، وهذا الموطن من تلك المواطن: حكيم عليم، الحكمة جاءت قبل العلم، هنتكلم على مسألة الحكمة والعلم كمان شوية إن شاء الله. يبقى مفردة العلم موجودة في السورة كتير بمشتقاتها؛ في فواتح السورة: ﴿وَإِنَّكَ لَتُلَقَّى الْقُرْآنَ مِن لَّدُنْ حَكِيمٍ عَلِيمٍ﴾ [النمل: 6]، بعد شوية: ﴿وَلَقَدْ آتَيْنَا دَاوُودَ وَسُلَيْمَانَ عِلْمًا﴾ [النمل: 15]، بعديها على طول: ﴿وَعُلِّمْنَا مَنطِقَ الطَّيْرِ﴾ [النمل: 16]. وتلاقي مفردة العلم موجودة في السورة بكثرة، حتى تختم بها: ﴿بَلِ ادَّارَكَ عِلْمُهُمْ فِي الْآخِرَةِ﴾ [النمل: 66]. فهنلاقي لفظة العلم متكررة في السورة كتير.
والسورة سميت بسورة النمل. طبعا هو موقف سليمان كان مع نملة ولا مع نمل كتير؟ مع نملة، والصورة لم تسمى بسورة النملة وإنما سميت بسورة النمل. دي أول ملحوظة. الملحوظة الثانية أن السورة أتكلمت عن النملة وأتكلمت عن الهدهد، يعني إحنا نتكلم على الآية غير يعني غير الادميين، يعني من الحيوانات والحشرات وكذا التي ذكرت في السورة فذكرت النملة وذكر الهدهد؛ النملة ذكرت في آيتين، الهدهد ذكر في تسع آيات. ومع ذلك لم تسمى بسورة الهدهد، وإنما سميت بسورة النمل. فسمية السورة بسورة النمل برضه مع وهنربطها مع العلم والحكمة وهنيجي بقى للكلام ده يعني إن شاء الله، لأن الصورة بتتكلم عن الموضوع ده، موضوع العلم وموضوع الحكمة وإيه الفرق بين العلم والحكمة وإزاي ظهر ده في قصة النملة بوضوح، فده موضوع كبير هنتكلم عنه إن شاء الله.
يبقى دي نفسية الصحابة وقت ما نزلت عليهم سورة النمل، نفسية الاستضعاف، نفسية الخوف من البطش. وفي مسألة تانية كبيرة مهمة عاوزين برضه نعيشها وهي وقت الاستضعاف يا جماعة، وهي نفسية التعامل مع زينة الدنيا. زينة الدنيا دي أو خلونا نقولها بلفظ تاني، وهو الطغيان المادي؛ سواء الطغيان المادي ده كان في حوزتك أنت (يعني أنت اللي معاك المادة بشكل مبالغ فيه)، أو في حوزه غيرك من الكفار. خلاص محتاجين نعرف إزاي نتعاطى مع هذا الطغيان المادي، سواء أحرزناه نحن أو أحرزه غيرنا، وده موضوع مهم جداً جداً، لأن كتير من الناس ممكن تفتن بالذات في فترات الاستضعاف لوجود مثل هذا الطغيان المادي مع الغير، أو قد يكون فتنة للإنسان أنه بعد ما كان في فترة استضعاف فجأة تفتح عليه الدنيا فيتحول من الطاعة إلى المعصية، ومن العبادة إلى هجر العبادة، ومن الإقبال على الله إلى الإدبار عنه سبحانه وتعالى. ولذلك قال صلى الله عليه وسلم لخير جيل: «ما الفقر أخشى عليكم، ولكن أخشى أن تفتح عليكم الدنيا كما فتحت على الذين من قبلكم، فتنافسوها كما تنافسوها، فتهلككم كما أهلكتهم». ففتح الدنيا على من عاش فترة استضعاف، سواء كان هذا الفتح فتحاً مادياً (مادياً أقصد به المادة، الفلوس)، أو فتحاً سلطوياً (يعني بعد ما كان مضغوط عليه، وبعد ما كان هو اللي يعني بيسيّر وبيُجبر على أفعاله، فجأة يبقى هو اللي في سدة الحكم)، سواء هذا الفتح أو هذا الفتح إزاي نتعاطى معاه وإزاي نتعامل معاه؟ سورة النمل مع سورة الشعراء وسورة القصص بتعالج هذه المواضيع. ففي هذه الحقبة العصيبة من حياة النبي عليه الصلاة والسلام ومن حياة الصحابة رضوان الله عليهم تنزل سورة النمل، تسبقها الشعراء وتليها القصص.
إحنا مش جينا في أمل أو نتدبر سورة النمل فخلونا نخش في قصة النملة. وزي ما قلنا لكم النملة مذكورة في آيتين، إنما خلونا ناخد آيات قبليها كده علشان نفهم برضه الجو العام لقصة النملة مع سليمان. قال الله عز وجل: ﴿وَوَرِثَ سُلَيْمَانُ دَاوُودَ وَقَالَ يَا أَيُّهَا النَّاسُ عُلِّمْنَا مَنطِقَ الطَّيْرِ وَأُوتِينَا مِن كُلِّ شَيْءٍ إِنَّ هَذَا لَهُوَ الْفَضْلُ الْمُبِينُ * وَحُشِرَ لِسُلَيْمَانَ جُنُودُهُ مِنَ الْجِنِّ وَالْإِنسِ وَالطَّيْرِ فَهُمْ يُوزَعُونَ * حَتَّىٰ إِذَا أَتَوْا عَلَىٰ وَادِ النَّمْلِ قَالَت نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ * فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ﴾ [النمل: 16-19]. وتنتهي قصة النملة وتسمى السورة بسورة النمل، حاجة عجيبة جداً.
الأول يا جماعة هذه القصة أن سليمان عليه السلام كان ماشي بالجنود وبعدين الجنود دول ما هماش عدد قليل، وهنعرف عددهم قد ايه كمان شوية إن شاء الله، وجايين على وادي في نمل، فرأت نملة ذلك المشهد فنادت في النمل ذلك النداء: ﴿يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ﴾ [النمل: 18].
لما جينا نتكلم عن الجو العام لسورة النمل مع سورة الشعراء والقصص، هتلاقوا يا جماعة أن قبل تلك الآيات بشويه ربنا سبحانه وتعالى بيذكر في آية واحدة بيشير في آية أو آيتين هي آية لكن تسبقها آية يعني آية تبع لها لقصة موسى مع مين؟ مع فرعون. فقال الله عز وجل: طبعا هو في آيات قبليها بتذكر قصة موسى عليه السلام مع ربنا سبحانه وتعالى، خلاص، لكن فجاه يقول الله عز وجل: ﴿فَلَمَّا جَاءَتْهُمْ آيَاتُنَا مُبْصِرَةً قَالُوا هَذَا سِحْرٌ مُّبِينٌ * وَجَحَدُوا بِهَا وَاسْتَيْقَنَتْهَا أَنفُسُهُمْ ظُلْمًا وَعُلُوًّا ۖ فَانظُرْ كَيْفَ كَانَ عَاقِبَةُ الْمُفْسِدِينَ﴾ [النمل: 13-14]. وبعدين ينتقل الله عز وجل إلى قصة سليمان مع النملة: ﴿وَلَقَدْ آتَيْنَا دَاوُودَ وَسُلَيْمَانَ عِلْمًا﴾ [النمل: 15] وتيجي الآيات اللي قرأناها.
يبقى يشير الله عز وجل إلى قصة فرعون، وأن فرعون لما حصل شيئاً من الطغيان المادي وهنا الطغيان هو طغيان إيه؟ فلوس ولا طغيان سلطة؟ إيه رايكم فرعون سلطة صح ولا الاتنين طبعا، بس أول ما نقول فرعون يجي في دماغك سلطة ولا فلوس؟ سلطة بلا شك. فعنده طغيان في السلطة، وكيف أدى ذلك الطغيان إلى أن يكفر بالله عز وجل ويقول: أنا... شوفوا بقى كلمة أنا دي اللي هتظهر معانا كذا مرة كمان شوية عشان إحنا عاوزين لما ندخل على سليمان عليه السلام دلوقتي نفهم أعظم درس في القصة أصلاً. ففرعون: ﴿أَنَا رَبُّكُمُ الْأَعْلَى﴾ [النازعات: 24]، لفظ الأنا ده موجود عند فرعون.
وبعدين إزاي ربنا سبحانه وتعالى يربط بين العلو والفساد: ﴿وَجَحَدُوا بِهَا وَاسْتَيْقَنَتْهَا أَنفُسُهُمْ ظُلْمًا وَعُلُوًّا﴾ [النمل: 14]. طبعا هنا في تقديم وتاخير في الآية: وجحدوا بها ظلماً وعلواً واستيقنتها أنفسهم. طيب استيقنتها أنفسهم، يعني في علم ولا ما فيش علم؟ في علم، القوة العلمية موجودة (عشان بقول لكم الصورة بتتكلم عن العلم)، استيقنتها أنفسهم، القوة العلمية موجودة، ومع ذلك في حكمة؟ ها، ما فيش حكمة، جحدوا بها واستيقنتها أنفسهم، طب ليه جحدوا؟ ظلماً وعلواً. طيب هنا اهو لفظ العلو، وبعدين: ﴿فَانظُرْ كَيْفَ كَانَ عَاقِبَةُ الْمُفْسِدِينَ﴾ [النمل: 14]. ازاي يا جماعة ربنا يربط بين العلو وبين الإفساد؟ وكأن القاعدة القاعدة التي قد يشز عنها البعض وقد شذ عنها البعض، لكن القاعدة المطردة أن العلو يصاحبه فساد وإفساد: ﴿ظُلْمًا وَعُلُوًّا ۖ فَانظُرْ كَيْفَ كَانَ عَاقِبَةُ الْمُفْسِدِينَ﴾ [النمل: 14]. ده مع فتنه الأيه؟ السلطة، الطغيان السلطوي ده في سورة النمل.
السورة بعديها القصص وكنا اتكلمنا عنها هنا قبل كده. فبسرعة كده سورة القصص في أوائل آياتها بتتكلم عن مين؟ فرعون برضه مش كده؟ ماذا قال الله عز وجل؟ إن فرعون علا... ادي العلو اهو مش كده؟ علا في الأرض وجعل أهلها شيعاً يستضعف طائفة منهم يذبح أبناءهم ويستحيي نساءهم إنه كان من المفسدين. علو وإفساد. وتنتهي بقصة قارون: لو إحنا قلنا أن فرعون بيمثل السلطة فقارون بيمثل المال مش كده؟ وبعدين فتلاقي برضه العلو والفساد موجود في قصة قارون: ﴿إِذْ قَالَ لَهُ قَوْمُهُ لَا تَفْرَحْ ۖ إِنَّ اللَّهَ لَا يُحِبُّ الْفَرِحِينَ * وَابْتَغِ فِيمَا آتَ-اكَ اللَّهُ الدَّارَ الْآخِرَةَ ۖ وَلَا تَنسَ نَصِيبَكَ مِنَ الدُّنْيَا ۖ وَأَحْسِن كَمَا أَحْسَنَ اللَّهُ إِلَيْكَ ۖ وَلَا تَبْغِ الْفَسَادَ فِي الْأَرْضِ ۖ إِنَّ اللَّهَ لَا يُحِبُّ الْمُفْسِدِينَ﴾ [القصص: 76-77]. وتختم سورة القصص بايه: ﴿تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوًّا فِي الْأَرْضِ وَلَا فَسَادًا﴾ [القصص: 83].
فانظروا إلى هذا الرباط الوثيق بين العلو والفساد والإفساد. طب يعني دي قاعدة مطردة؟ لا، ما هياش مطردة، قد تنخرم تلك القاعدة، وانخرمت وذكر الله عز وجل مثالاً لها في هذه السورة، وهو سليمان. سليمان بقى سلطة ولا مال؟ أول ما نقول كده أقول لك سليمان تقول الاتنين على طول. يعني إيه؟ يعني ما أقول لك فرعون، هو فرعون فرعون الاتنين فعلاً بس أول ما أقول فرعون تقول لي سلطة، قارون تقول لي مال، سليمان الاتنين. طب والاتنين؟ يعني سلطانه زي سلطان فرعون، وماله زي مال قارون. شوف أنت بقى!
ومع ذلك كان استثناء القاعدة. فقد يحدث آه؟ قد يحدث، لكن لازم نبقى عارفين أن القاعدة مش كده، ولذلك حذرنا النبي صلى الله عليه وسلم من ذلك. يعني ما أقول لكم ده امتحان لو خش فيه ألف واحد لو دخلوا ألف واحد بينجح اتنين تلاتة، وأنت بتحرضهم تخش الامتحان يا ابني ده في تسعمية وتسعة وتسعين واحد بيسقطوا. يعني هذا ذكرني الآن بايه، وهي دي حقيقة فعلاً، يعني هو ده إحنا إحنا بنعمل كده. النبي صلى الله عليه وسلم لما ذكر في آخر الزمان أنه ينحسر دجلة عن ذهب والناس هتقتتل عليه وأيه، من كل قد قال إيه النبي عليه الصلاة والسلام من كل مئة ولا إيه ألف ولا مئة؟ يعني مش فاكر لو حد يشوف الحديث ويجيب، واحد يعني من كل رقم يا ألف حد لغايه ما حد يجيب الحديث ويقول لنا واحد هيعيش. إحنا مش بنتكلم في في وقت واحد هيعيش والباقي يموت، طيب الناس مش هتروح؟ هتروح وهتقول إيه: لعلي أنا يمكن أنا اللي إحنا اللي هنغجو. ففتنة المال وفتنة السلطة فتنة شديدة. شوف يا جماعة يعني أنا لو جيت قلت لك اللي درس إحصا منكم، يعني قانون الاحتمالات، قانون الاحتمالات حد يوصل للحديث كم مئة صح؟ شفتوا كنتوا هتغلطونا ازاي؟ مئة من كل تسعة وتسعين هيموت واحد هينجو. فبانون الاحتمالات لو بندرس إحصا أنت احتمال انك تعيش واحد في المئة واحتمال انك تموت تسعة وتسعين في المئة. فأي تفكير عقلي سليم يقول لك روح... يعني تروح فين؟ أنتوا إيه شكلكم من الواحد؟ يعني أنت ليه تعمل كده في نفسك؟ إيه اللي بيعمي الناس وقتها؟ الفتنة، فتنة المال فتنة عظيمة عظيمة.
فتبقى إذن العلو والفساد مقترنان مقترنان. ممكن ده يبقى ليه استثناءات؟ ممكن. ولذلك ربنا سبحانه وتعالى أدى الدنيا لأربعة؛ منهم اتنين مؤمنين، ومنهم اتنين كفار. يعني في اتنين حيزت لهم الدنيا، ومع ذلك كانوا ناس أتقياء وملوك صلحاء وكذا وكذا: سليمان ومين؟ وذو القرنين. فأه القاعدة لها استثناءات.
اللي حصل إه بقى؟ قال الله عز وجل: ﴿وَوَرِثَ سُلَيْمَانُ دَاوُودَ وَقَالَ يَا أَيُّهَا النَّاسُ عُلِّمْنَا مَنطِقَ الطَّيْرِ﴾ [النمل: 16]. نبتدي بقى من أول هنا الفوائد من هذه القصة المباركة. أول فارق جوهري بين سليمان اللي معاه... إحنا أنا هرجع بس تاني معلش أنا قلت لكم إيه يا جماعة؟ قلت لكم في فترة استضعاف إحنا محتاجين نحرز أمرين.
أول حاجة، لو أنا اللي أحرزت الدنيا هتعامل معاها ازاي؟ تاني حاجة، لو غيري أحرز الدنيا، فأنَا إزاي أحصن نفسي من أنه ما يكونش فتنة ليّا؟ فإحنا محتاجين نتعامل مع الحاجتين دول، ودي حاجة مهمة؛ لأن دي فتنة كبيرة.
طيب، في أول درس بيطلع لنا من سليمان عليه السلام أنه يقول: ﴿وَوَرِثَ سُلَيْمَانُ دَاوُودَ وَقَالَ يَا أَيُّهَا النَّاسُ عُلِّمْنَا مَنطِقَ الطَّيْرِ﴾ [النمل: 16]، قال كده؟ أول درس: سليمان لا يرى نفسه أصلاً عليه السلام، وينسب الفضل كله لله سبحانه وتعالى. الأنا دي مش مش عند سليمان خالص عليه السلام، ولو كان حد يعني حق له أو يعني جاز له أن ينطق بالأنَا هيبقى مين غير سليمان عليه السلام؟ هيبقى مين يعني؟ ما هو ده ملك العقل لا يتصوره، وده مصداق لقول الله عز وجل: ﴿وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي﴾ [ص: 35]، وقد كان ملك سليمان ما حدش أحرزه بعديه، ومع ذلك ما فيش الأنا دي خالص، مش شايف نفسه.
احنا الواحد منا دلوقتي لو ماشي وجيبه مئتا جنيه يعني سلطان زمانه، مش كده؟ خلاص يعني مش عاوز حاجة من الدنيا. سليمان يا جماعة يعني ملكه -وأحنا هنيجي كمان شوية هنشوف يعني جنوده دي بس في اللقطة دي كانوا عاملين إزاي- فأول حاجة علمنا: مش أنا خالص. الأنا اللي كانت عند فرعون: ﴿أَنَا رَبُّكُمُ الْأَعْلَى﴾ [النازعات: 24] عشان عنده شوية ملك، والأنا اللي كانت عند قارون: ﴿إِنَّمَا أُوتِيتُهُ عَلَى عِلْمٍ عِندِي﴾ [القصص: 78] عشان عنده شوية فلوس، انتفت عند سليمان.
يبقى فأي شيء تحصله في دنيا، علم، أو في آخرة، أو في أمور آخرة يعني؛ حتى قرآن، حتى علم شرعي، حتى أي شيء، أول ما تلاقي جواك حتى لو ما نطقتش، أول ما تلاقي جواك حتة إيه الاستحقاق: أنا أستاهل، أنا بذاكر، أنا بحضر، أنا باجتهد، أنا أعرف أن أنت خلاص أنت رحت. آه، يعني على حسب بقى فلوس، أنت رايح في سكة قارون، سلطان، أنت رايح في سكة فرعون.
سليمان علمنا: مش أنا خالص. علمنا منطق الطير، ها، ﴿وَأُوتِينَا مِن كُلِّ شَيْءٍ﴾ [النمل: 16]، ينسب الفضل لله عز وجل. علمنا منطق طير وأوتينا من كل شيء، مع أنه لو قال إيه: تعلمت منطق طير، تمشي برضه ولا إيه؟ لا، هو هو تمشي آه، يعني تمشي من حيث: تعلمني، ربنا علمني. بس كان فيها برضه نوع إيه؟ لفظ «تعلمت» دي توحي بايه؟ بانه كان في مجهود منه، وذاكر واجتهد. حتى دي نفاها سليمان: ﴿عُلِّمْنَا﴾، علمنا دي توحي بأيه؟ أن يعني شيء إلهي كده، ما أنا لا اجتهدت ولا عملت، كله فضل ربنا سبحانه وتعالى، كله: ﴿عُلِّمْنَا مَنطِقَ الطَّيْرِ وَأُوتِينَا مِن كُلِّ شَيْءٍ﴾، وبعدين: ﴿إِنَّ هَٰذَا لَهُوَ الْفَضْلُ﴾ فضل فضل من الله ونعمة، لا أستحق ولا أستاهل ولا أي حاجة.
يبقى ده أول فارق بين سليمان الذي هو استثناء القاعدة، وبين فرعون وققارون اللي هم أصل القاعدة، خلي بالكم. يعني ايه أصل القاعدة؟ يعني أي حد بيحرز شيئاً من ذلك الأصل أنك بتلاقي فيه الحتة دي. مين بقى يستثنى؟ اه، يستثنى واحد زي سليمان عليه السلام، واحد زي ذي القرنين، زي أبو بكر الصديق، زي عمر، دول يستثنوا من القاعدة. إنما الأصل في القاعدة مش كده.
يبقى ده أول فرق. الفرق التاني هو أن سليمان عليه السلام، الذي هو استثناء القاعدة، لما أحرز ذلك أخضعه للدين، جعله في خدمة الدين. يا جماعة، الدنيا فاضحة وكاشف؛ الدنيا فاضحة وكاشفة. إيه الآية لأصدقن؟ إيه بداية الآية؟ عاوزين الناس بقى يا شطار: ﴿وَمِنْهُم مَّنْ عَاهَدَ اللَّهَ لَئِنْ آتَانَا مِن فَضْلِهِ﴾ [التوبة: 75] اهو، شوف الفضل اهو، خلي بالكم هنا اللي بيتكلم ده واحد إيه؟ شوفوا الألفاظ، ألفاظ سليمانية اهي، صح؟ ﴿وَمِنْهُم مَّنْ عَاهَدَ اللَّهَ لَئِنْ آتَانَا مِن فَضْلِهِ﴾، ألفاظ سليمانية اهو، واحد مش شايف نفسه خالص، ﴿لَنَصَّدَّقَنَّ وَلَنَكُونَنَّ مِنَ الصَّالِحِينَ * فَلَمَّا آتَاهُم مِّن فَضْلِهِ بَخِلُوا بِهِ وَتَوَلَّوًى وَهُم مُّعْرِضُونَ * فَأَعْقَبَهُمْ نِفَاقًا فِي قُلُوبِهِمْ إِلَى يَوْمِ يَلْقَوْنَهُ بِمَا أَخْلَفُوا اللَّهَ مَا وَعَدُوهُ﴾ [التوبة: 75-77]. رعب، رعب.
قبل ما تيجي الدنيا: لئن آتانا من فضله لتصدقن، ربنا هيشوف ال... طيب اتاك من فضله؟ ما فيش. الدنيا كاشفة وفاضحة. فسليمان عليه السلام الاستثناء، استثناء القاعدة، ثاني حاجة كبيرة: أنه ما آتاه الله إياه وفضله على غيره به، أخضعه لخدمة دين الله عز وجل.
خلاص، علمنا منطق طير، يبقى حضرتك رايح تعلم لغات، تعلم اللغات اه مفيد، مفيد. طيب، واحد راح تعلم لغات علشان هو نفسه يحرز اللغة الفلانية، أو يبقى مدرس، أو يبقى مترجم، أي حاجة، حرام؟ مش حرام، ما حدش يقول حرام، عشان بس مباح، يعني خلاص أنا بتتعلم في حته ما فيهاش مخالفات شرعية، وأنت يعني خلاص مباح، بس أنت خلاص يعني يعني الحتة دي ما تجيش، ما هو يا جماعة برده هو الناس عاوزه إيه؟ تخش الدين بالذراع اللي هو إيه: أنا هعمل ده كله وعاوز يوم القيامة برضه سوابق، طب يعني ما هو ما هو غيرك في الوقت ده كان بيعمل لدين، أنت قلت لا، أنا وقتي ده هضيف حاجة مباحة، فيوم القيامة الذي لك إيه؟ أنك ما لا تعاقب على ذلك، إنما كمان جاي عاوز ثواب ليه إن شاء الله؟ عاوز ثواب ليه؟
فيعني تعالوا ناخد المثال ده: واحد داخل ياخد الكورس بتاع اللغة ليه؟ علشان الحاجات اللي احنا قلناها دي، واحد تاني معايا في نفس القاعة بياخد كورس نفس اللغة، بس هو في نيته إيه؟ أنه عاوز يدعو الأجانب مثلا لدين الله عز وجل ويبقى متقن اللغة دي علشان يعرف يدعو إلى الله، آخر السنة يا سيدي أنت طلعت الإيه؟ رقم واحد، أنت الألفا بتاع الفصل، والتاني ده في السبنسا خالص. في قوانين الدنيا أنت الراجل الناجح، وصف وصورتك هتنزل على صفحته على الفيسبوك وشهادة تقدير وده في الدنيا. إنما في الآخرة، في الآخرة ذلك العمل في ميزان حسناته، أنت ممكن تبقى أنت ممكن تبقى احسن منه يعني، ممكن يبقى في حاجات تانية كتير، أنت في الآخرة أحسن؟ الله أعلم، أنا بتكلم في دي عشان بس ما نفتحش في دي، لا، هو الخمس ست ساعات اللي كان بيقضيهم يومياً في الدراسة هو مثاب عليهم، أنت لا، مش مثاب في الحتة دي.
فهم نتعلم؟ اه، مهم نتعلم، طبعا، وبالذات لو هتدعو ناس يبقى لازم تتعلم لغتهم. بندعو شباب، نتعلم لغة الشباب، مش كده؟ ما هو أصل مش لازم لغة يعني إنجليزي ولا يعني لغة الشباب، مهم برضه نبقى فاهمين، ما هو اللغة بيقولوا إيه؟ اللغة وعاء الفكر. فلما نقعد مع الشباب ونسمع مصطلحات جديدة، نعرف أن ده فكرهم، مستوى فكرهم هي الإيه؟
عندي بنتي كانت هي ما زالت يعني، بس هي كانت بيكتبوا فرانكو هم، فأول رسالة بعتت بقى رسالة طويلة كده فرانكو أول مرة، فلاقيه بالإنجليزي بقى سبعة وأربعة وتسعة، وكلام أنا مش أصلاً مش عارف (يعني أنا أنا قلت إيه يعني أول ما وقع يعني: اللهم إن كان هذا سحرا فابطله، أنت أنا مش فاهم حاجة أصلاً)، ده وعرفت بقى أن إيه في فرانكو ودي همزة ودي مش عارف خ ودي كده يعني، فتعلمت فرانكو عشان أعرف أعرف أتعامل، ما أنا مش عارف. وبعدين بعتت لي رسالة وأنا في الشغل، فأنا طبعا متعلم بقى فرانكو خلاص، بس زيي زي إيه العيل اللي عنده خمس سنين مثلا وبيفقط الخط، فعشان أقعد أنا أقرأ رسالة طويلة في الشغل وأنا مش فاهم اللي مكتوب يعني واحدة، فلقيت نفسي لا، أنا هاضيع عمري بقى فأقرأ رسالة، قلت لها لا تكتبي عربي بعد كده إنما مش هأقرا أنا فرانكو. من ساعتها ما بتكتبش خلاص، هم كلمتين ثلاثة بتبعتهم وخلاص على كده. يعني أنا كنت إيه قطعت رزقي، يعني يعني هو كان بيتبعت لي كلام كتير، ما بقاش يتبعت لي حاجة، فلازم نتعلم فرانكو.
عشَان إزاي سليمان عليه السلام كل ما آتاه الله عز وجل إياه، أخضعه لدين واستعمله في دين الله وفي نشر دين الله عز وجل؟ فمحتاجين يا جماعة هذه النفسية وهذه العقلية واحنا في فترة الاستضعاف، واحنا في فترة لسه التكوين، لسه شعور صغير، لسه ما أحرزتش مال، لسه ما أحرزتش مناصب، لسه نتربى على ده.
خد بالك أنا بقول ايه؟ ما بقولش نعاهد ربنا على ده، ما بقولش كده، بقول: نتربى على ده. ليه بقى؟ علشان أنت لو عاهدت ربنا، لكن ما ربيتش نفسك لا تأمن أنك تكون ممن قال: ﴿لَئِنْ آتَانَا مِن فَضْلِهِ لَنَصَّدَّقَنَّ﴾ [التوبة: 75]، ما هو عاهد وألفاظه كانت ألفاظ سليمانية؛ لأن آتانا الله من فضله، ومع ذلك أول ما وقعت الدنيا ووقعت الفتنة بخل وتولى.
الامتحان اللي بيسقط فيه الأكتر (يعني عندنا قصة تقول لنا إن الامتحان ده سقط فيه الثلتين ونجح الثلث، 66% سقوط و33% نجח)، قصة مين؟ الأبرص والأقرع والأعمى، اثنين سقطوا وواحد نجح، مش كده؟ فكل المؤشرات بتقول إن السقوط أكتر.
طيب، فين النجاة؟ مش في أنك تعاهد ربنا، النجاة في أنك تتربى على المعاني، تتربى على البذل من أنت شاب كده، تتربى على أنك مش أهم حاجة أنا، إحنا هنيجي إحنا هنتعلم من النملة النهارده الدرس ده، مش أنا والطوفان من بعدي، مش لقيت سليمان جريت على بيتها ويولع النمل، ما مش كده. لازم تربي نفسك من دلوقتي في الحاجات البسيطة اللي في إيدك، ليه؟ علشان لما يجي لك الأكتر تكون اتعودت على ده، اتدربت على ده.
قال: ﴿وَوَرِثَ سُلَيْمَانُ دَاوُودَ وَقَالَ يَا أَيُّهَا النَّاسُ عُلِّمْنَا مَنطِقَ الطَّيْرِ وَأُوتِينَا مِن كُلِّ شَيْءٍ إِنَّ هَٰذَا لَهُوَ الْفَضْلُ الْمُبِينُ * وَحُشِرَ لِسُلَيْمَانَ جُنُودُهُ مِنَ الْجِنِّ وَالْإِنسِ وَالطَّيْرِ فَهُمْ يُوزَعُونَ﴾ [النمل: 16-17].
يعني ايه يوزعون؟ طبعا وزع الجذر اللغوي وزع جه في القرآن خمس مرات، منهم ثلاث مرات في سورة النمل، منهم مرتين في الآية دي، ماشي، اللي هي يوزعون، واوزعني أن أشكر نعمتك، أو يعني في تلك الآيات أقصد. طيب يوزعون وزع هنا معناها إيه؟ يعني يحبس أولهم على آخرهم. احنا عاوزين بقى دلوقتي هنفهم جيش سليمان ده كان عامل ازاي. فهم يوزعون، يعني إيه يوزعون؟ يحبس أولهم على آخرهم، يعني إيه يحبس أولهم على آخرهم؟ يعني إيه؟ هأقول لكم أنا يعني إيه. تخيل كده حضرتك رايح تعمل قلق في منطقة، ماشي، فالقلق يا دوبك إيه محتاج اثنين ثلاثة معاك، فروحت رايح جايب اثنين ثلاثة من أصحابك وداخل إيه المكان اللي هتتخانق فيه ده، هل هحتاج كل شوية طول ما أنت ماشي تقف وتبص على أصحابك؟ وعشان ما هما اثنين ثلاثة ده فأنتا ماشي مش محتاج لا تقف ولا تبص وراك ولا بتاع، إحنا ماشيّين مع بعض وخلاص، صح كده ولا ايه؟ لغايه ما توصل بقى، وبعدين تبص وراك تقوم إيه؟ ماجوش، تطحن وترجع، ما أنتش محتاج ده.
طب النوش بقى أكبر من كده شوية، فجايِب ألف واحد، جايب ألف واحد علشان داخلين بقى إيه الموضوع كبير، هتلاقي نفسك غصب عنك محتاج كل شوية بتعمل إيه؟ لا، بتقف: استنوا يا جماعه اللي ورا، واستنوا، طب يلا نتحرك. وبعد شوية بتضطر كمان شوية تقف: طب استنوا يا جماعه، الناس العدد كبر، هو ده يوزعون يحبس أولهم على آخرهم؛ لأن العدد كبير.
شوف لفظ يوزعون كمان جه فعل مضارع، الفعل المضارع يفيد الإيه؟ مش الاستمرار، الفعل المضارع يفيد الإيه؟ التكرار، مش كده، أو ممكن التجر... ممكن التكرار (يعني بيتعمل عمل مرة بعد مرة بعد مرة)، محتاجين يوزعوا كتير، ليه؟ أصل عددهم مش بسيط.
آه اللي هو إيه بقى عددهم؟ أنا عاوز حد معلش يعمل لنا كد برده يبحث عن مثلا مساحة القاهرة مثلا أو مساحة إسكندرية، تقول مساحة القاهرة وإسكندرية، عاوزين نعرف مساحتهم، المساحة كام متر مربع أو كم كيلو متر مربع؟
مما ورد في الإسرائيليات أن جيش سليمان، جيش سليمان كان مئتا فرسخ في مئتا فرسخ. الفرسخ ده اللي هو كام؟ خمسة كيلو، هو خمسة كيلو وشوية، خلوها خمسة كيلو. فجيش سليمان اللي كان معاه كان يقف في مربع ضلعه طوله خمسمائة كيلو. طبعا احنا مش مستوعبين قوي اللي أنا بقوله ده، أنا بقى هأقول لكم عشان تستوعبوا (يعني جزء من اللي أنا بقوله): طريق مصر إسكندرية من البوابة للبوابة كام كيلو؟ هو أقل من الـ مئتين، خلوها مئتين، خلوها مئتين. تخيل لو أنا كده قلت لك في جيش في جيش عشان يقف محتاج مساحة قد طريق مصر إسكندرية طول في عرض، أنتو فاهمين احنا بنتكلم في عدد شكله إيه؟ ده عدد مرعب، خلي بالك، ده احنا بنكلم في مئتين في مئتين، هم قالوا مائة فرسخ في مائة فرسخ (يعني خمسمائة كيلو في خمسمائة كيلو)، خمسمائة كيلو في خمسمائة كيلو.
حد جاب مساحة القاهرة أو إسكندرية؟ ٣٨٠، ٣٠٠٠. طب هات بقى تعرف تجيب الجذر؟ إيه الجذر بتاعها عندك في الآلة؟ الجذر الجذر التربيعي مش تكعيبي إيه أنت احنا قاعدين في كورة، الجذر بتاع الرقم ده كام؟ مش مهم الجذر، طب اضرب خمسمائة في خمسمائة، ٧٦، ٥٠٠٠، إيه ٥٠٠٠ دي؟ أنت قلت كام؟ ٣٠٨٥. والله؟ بس كده، بيتهيا لي قليل قوي الرقم ده، فعلا، ماشي، بيتهيا لي قليل، ماشي، المهم يعني هو رقم مرعب يعني، الرقم المساحة اللي أنا بقولها دي يا جماعة مساحة مرعبة، خمسمائة كيلو خمسمائة كيلو دي مساحة مرعبة. فده جيش سليمان، ماشي، حشر لسليمان جنوده من الجن والانس وال...
حتى إذا أتوا على وادي النمل قالت نملة يا أيها النمل ادخلوا مساكنكم لا يحطمنكم سليمان وجنوده وهم لا يشعرون. وهذا هو المشهد العجيب، حتى إذا أتوا على وادي النمل وكان الوادي ده وادي معروف يا جماعة، لأنه ما قالش حتى إذا أتوا على وادي نمل أي وادي، لا، حتى إذا أتوا على وادي النمل، كأنه وادي معروف بعينه، إما لكثرة النمل الذي فيه أو المهم وادي معروف بعينه. عاوزين بس نقف هنا شوية، ونتخيل بقى حياة النمل دي عاملة إزاي، عشان بس برضه نفهم إيه وادي النمل ده.
بصوا يا جماعة، النمل بيوته عجيبة جداً. بيوت النمل، وادي النمل ده بيبقى مش فيه مثلاً آلاف النمل، ملايين النمل، ملايين النمل. خلينا نتكلم عن البيوت بعدين بقى، عقاباً لكم قالت نمله يا أيها النمل ادخلوا مساكنكم لا يحطمنكم سليمان وجنوده وهم لا يشعرون.
تعالوا بقى نبتدي الدرس، هنتعلم بقى من النملة. فكنا قلنا لكم العلم والحكمة، وإيه الفرق بين العلم والحكمة؟ الأول يا جماعة، حد هنا شغال تحليل بيانات أو يعرف حاجة عن تحليل البيانات أو سمع الاسم ده؟ شغال؟ طيب، هسأل سؤال عام وعاوزين جواب: في تحليل البيانات بيفرقوا بين كلمتين، كلمة اسمها داتا وكلمة اسمها إنفورميشن. الاتنين لو هتترجمهم بالعربي تقدر تترجمهم مثلاً إيه؟ معلومات يعني كده. انما هو في فرق بينهم كبير جداً بين كلمة داتا وكلمة إنفورميشن، حد عارف الفرق؟
الفرق بين كلمة داتا وكلمة إنفورميشن إيه؟ إن الداتا دي معلومات لما تشتغل عليها، هنعرف تشتغل عليها تتحول لإنفورميشن، تقدر تسميها بيانات بقى بالعربي أو يعني سميها زي ما تسميها يعني اشتغل عليها. هديكم مثال: لو جيت قلت الاتنين مثلاً احنا عاوزين أنا عاوز معلومات: مين اللي بيحضر مثلاً في السنتر الفلاني ليا ولا في المسجد الفلاني، علشان أعرف أخد قرارات في الدروس اللي جاية.
خلاص، الاتنين خدوا نفس المهمة، راح واحد جاب لي عشر ورقات فلوسكاب كالاتي: اللي بيحضر عندك في السنتر الفلاني ولا في المسجد الفلاني ولا في المركز الفلاني ولا أي حاجة، واحد محمود أحمد عبد العليم، اتنين محمد عمر عتريس، تلاتة كذا كذا. والنساء: واحد فلانة بنت فلان، اتنين فلانة بنت... عشر ورقات.
والتاني جاب لي ورقة كده صغيرة كده، طبعا أول ما أشوف هقول إيه ده؟ ما بيهرج! بفتح الورقة لقيت خمس سطور: اللي بيحضر ليك في المكان الفلاني المركز ولا المسجد ولا كذا ولا كذا، 80% رجال، 95% في مناطق مجاوره للمسجد، 70% من سن 18 لسن 25. خمس سطور. أنا لو عاوز أخد قرار في الدروس اللي هديها، هعرف أخد قرار على ده ولا ده؟ الأول ولا التاني؟
صح، طب أنا هسألكُم سؤال تاني: عشان يوصل للورقة دي الخمس سطور دي، هو جاب المعلومات اللي الأول جابها ولا ما جابهاش؟ هو جابها، نفس المعلومات، معلومات، لكن هو عمل إيه بقى؟ بنسميها عالج تلك المعلومات أو حللها أو اشتغل عليها، يعني اشتغل على المعلومات، فاهمين دي؟ طيب، بعد ما جاب لي بقى الورقة فلقيت مثلاً إنه 80% من الحضور ذكور، ده كده أنا عندي علم، عندي علم ولا ما عنديش علم بالحضور؟ عندي علم. رحت عامل إيه؟ عشرين درس في عشرين أسبوع ورا بعض: مشاكل المرأة المسلمة.
إيه رأيكم هنا؟ في علم، لكن في حكمة؟ أنا ما عنديش حكمة. طيب، يبقى العلم موجود بس ما فيش حكمة، لأن الحكمة باختصار إيه هي؟ وضع الشيء في موضعه. وضع الشيء في موضعه يعني إيه وضع الشيء في موضعه؟ يعني الموضع ده محتاج قوة، هبقى قوي. الموضع ده محتاج مناورة، هناور. الموضع ده محتاج إنك تختفي، هختفي. هي دي الحكمة.
فهمتوا الفرق بين العلم والحكمة يا جماعة؟ طيب، النملة هنا بتعلمنا بقى حكمة. أولاً، النملة عندها علم؟ آه، عندها علم، عندها علم: ﴿قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ﴾. الآية دي عجيبة جداً يا جماعة، قبل ما نخش في الحكمة، وده الدرس الأكبر، عشان كده حكيم جت قبل عليم في السورة دي، وده على غير العاده.
لأن احنا هنتعلم دلوقتي من النملة حكمة، بس الأول عاوزين نشوف هي النملة عندها علم؟ آه، عندها علم. العلماء، علماء اللسانيات، بيقولوا إن في قاموسين عند الكائنات الحية، قاموس بيسموه القاموس الإدراكي، وقاموس بيسموه القاموس النطقي. يعني إيه؟ يعني الولد الصغير، الطفل الصغير اللي عنده خمس سنين، أربع سنين، لو قلت له اقعد، يقعد ولا ما يقعدش؟ يقعد. كل، ياكل ولا ما ياكلش؟ ياكل. هو مدرك أنت بتقول إيه، القاموس الإدراكي عنده هو فاهم أنت بتقول إيه، يعرف يقول الكلام اللي أنت بتقوله بقى؟ ما يعرفش. يبقى القاموس الإدراكي آه، عنده الكلمات دي في قاموسه الإدراكي، إنما القاموس النطقي لسه ما يعرفش ينطق اللي أنت بتقوله.
خلاص، طيب، كذلك مثلاً لو عندك كلب مثلاً، اقعد، يقعد، نط، ينط، يجي، يروح، يروح. يعرف يقول الكلمات اللي أنت بتقولها؟ ما يعرفش يقول الكلمات اللي أنت بتقولها، لكن هو مدرك أنت بتقول إيه، فاهم أنت بتقول إيه. طيب، ويجوا بقى علماء اللسانيات واللي بيتكلموا في الحاجات دي، يقولوا يبتدوا يشوفوا الحيوانات، هي الحيوانات يا ترى قاموسها الإدراكي واصل لغاية فين؟ وقاموسها النطقي واصل لغاية فين؟ ويعملوا أبحاث، واللي درس منكم في أي حاجة خاصة باللغة والأبحاث اللي عملوها مع النحل عشان يفهموا النحلة إدراكها واصل لفين وبتتكلم ولا إزاي، أو يعني إزاي طريقة حوارها مع... القرآن هنا يا جماعة بيقول لنا حاجة عجيبة جداً، القرآن بيقول لنا إن ممكن الحشرة يبقى عندها إدراك عالي جداً، هنشوف إزاي دلوقتي، وكمان عندها كلام في درجة عالية من التفرقة، وهنشوف ده دلوقتي.
فالنملة أول حاجة اهو، عندها إدراك لإيه بقى؟ تعالوا نشوف كده: قالت نملة يا أيها النمل ادخلوا مساكنكم لا يحطمنكم سليمان وجنوده وهم لا يشعرون. فالنملة أول حاجة هي ما قالتش إيه، يعني هي ما قالتش في أجسام كبيرة جاية، لا، دي مميزه إن اللي جاي ده جيش، ومميزه إن الجيش ده له قائد، ومميزه القائد بشخصه: سليمان. كل ده النملة أدركته، شوفوا إدراك النملة واصل لفين.
ومميزه القائد من الجنود. أنا أصلاً لو قلت لك دلوقتي، يعني في كلاب ماشية، في عشرين كلب ماشي، قلت لك تعرف تميز الذكر من الأنثى؟ ما تعرفش. طب الكلاب دول قلت لك لهم قائد؟ فين هو؟ ما تعرفش، ما تعرفش أنت تميز ده أصلاً، يعني الحاجة اللي أنت فاكرها سهلة دي، لا، هو لما يختلف الجنس اللي بنتكلم عنه الموضوع صعب جداً. فإدراك النملة إدراك عالي.
وبعدين هي مدركة، مدركة لده بس؟ لا، ده مدركة لكل ده، ومدركة وإيه وعارفة تصيغ الكلام ده كمان، يعني مش هي مدركة بس مش قادرة تقول زي الطفل اللي عنده أربع سنين، لا، ده هي مدركة ده وعارفة تتكلم بيه، عارفة تقوله. روح للهدهد، أنا بس عشان هقول لكم مفاجأة في الآخر دلوقتي، يبقى النملة الإدراك بتاعها القاموس الإدراكي عالي، القاموس النطقي عالي. الهدهد نفس الكلام: جئتك من سبأ بنبإ يقين، ده عارف سبأ! أنت متخيل؟ يعني الهدهد مثلاً اللي طاير ده عارف إيه؟ أنا دلوقتي فوق مثلاً مدينة نصر، ودلوقتي خلصت مدينة نصر فدخلت على التجمع، وبعدين خرجت على المعادي. هو بيقول: جئتك من سبأ بنبإ يقين. وبعدين: إن وجدت امرأة، ده مميز في الجنس، امرأة مش رجل، وبعدين مميز للوظيفة بتاعتها: تملكهم. ده كله الهدهد مميزه.
وبعدين قادر ينسب، يعني لما يبقى في عرش عظيم، هو قادر يستوعب إن العرش ده عرش عظيم مش عرش عادي. كل ده الهدهد مدركه وعارف يصيغه. قادرين تفهموا ده يا جماعة؟ عشان كده بقى الآية التي ذكر الله عز وجل فيها دابة آخر الزمان جت في سورة إيه؟ في النمل، اللي هو الشيء اللي أنت ممكن تستعجبه: ﴿وَإِذَا وَقَعَ الْقَوْلُ عَلَيْهِمْ أَخْرَجْنَا لَهُمْ دَابَّةً مِّنَ الْأَرْضِ تُكَلِّمُهُمْ﴾ [النمل: 82] مش ده اللي هو الشيء اللي أنت ممكن تستعجبه، دابة وهتتكلم وهتدرك وهتعرف أن ده مؤمن وده كافر؟ لما العجب؟ ادينا ضربنا لكم مثالين بحشره وطائر، إدراكهم عالي جداً ونطقهم عالي جداً، عارفين يصيغوا اللي أدركوه.
فهمتوا دي؟ فهنا النملة عندها العلم وعندها نوعين العلم اهو: العلم الإدراكي، مدركة، والعلم كمان اللغوي النطقي، قدرت تصيغ ده. حتى يا جماعة من العجيب هنا يعني اللي المفسرين ذكروه، قالوا إن الآية دي من عجائب القرآن أصلاً، من عجائب القرآن ليه بقى؟ قالوا لأنها النملة بلفظة "يا" نادت، و"بأيها" نبهت، طبعا أنت "يا" نداء، "أيها" ده للتنبيه، يعني بقى ركز معايا، ده اللي هقولهلك ده إحاجة، "يا" بيا نادت، و"أيها" نبهت. النملة عينت، عاوزاكم أنتم. ادخلوا، أمرت. مساكنكم، نصت. لا يحطمنكم، حذرت. سليمان، خصت. وجنوده، عمت. وهم لا يشعرون، عذرت. كل ده عملته النملة.
طيب، يبقى النملة عندها علم، عندها حكمة، وهو ده اللي يعنينا بقى، يعني عندها علم؟ آه، عندها علم. عندها حكمة؟ آه، عندها حكمة. هنا يا جماعة النملة، وده إحنا بقى اللي بنفتقده دلوقتي، إحنا محتاجين الحكمة، محتاجين الحكمة، حكمة النملة. لما رأت ذلك المشهد، كان ممكن إيه؟ يلا يا نملي هجوم، وإحنا إيه؟ لا، ما عملتش كده النملة، قالت: إحنا لا قبل لنا بهؤلاء، ولا هم أصلاً جايين لينا، يعني فايه الحكمة في إن لا، كل واحد يدخل بيته. ادخلوا مساكنكم، كل واحد يخش بيته.
ليه؟ لأن الحكمة يا شباب، ركزوا في الكلام ده، الحكمة زي ما هتكون في وقت المواجهة كبدر، واحد، فهتكون في وقت انك تخش بيت الأرقم وهتبقى دي الحكمة، وهتكون في وقت انك تنسحب في مؤتة وهتبقى دي الحكمة. ليه؟ لأن الحكمة، يلا بقى عرفوا الحكمة أنا قلتها في النص: وضع الشيء في موضعه. هنا ما ينفعش، هنا إحنا في بيت الأرقم، ومش بس بيت الأرقم ده وإحنا جايين بنستخبى وإحنا راجعين بنستخبى. ولذلك يا جماعة، ديننا أول ما يعني أو الشريعه كده، أول ما نزل الوحي على النبي محمد صلى الله عليه وسلم، نزلت آيات القتال؟ نزلت آيات السيف؟ لا، دي تأخرت جداً. ليه مش الحكمة دلوقتي أن تعمله ده؟ مثلاً سورة النمل أهي سورة النمل معانا، سورة النمل لا منسوخ فيها آية واحدة كما قال العلماء، اللي هي إيه؟ وإن اتلوا، لو القرآن نسخت بآية السيف لأن دي سورة مكية.
ففي الحقبه المكية بذلك الاستضعاف وتلك الإمكانات، الحكمة: كفوا أيديكم. هنا الحكمة كده، في درس اسمه كفوا أيديكم أبقوا اسمعوه عشان ما نطولش في الحتي دي، الحكمة هنا كفوا أيديكم. ليه مش وقته ولا قبل لكم بهؤلاء، لا بالعدة والعدد الإيمانية لسه محتاجين تتربوا، كفوا أيديكم. وبعدين شوية يستعجلوا، شوية يستعجلوا، والله عز وجل يذكر لنا ذلك في كتابه: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77]. وأقعدوا إيه بقى؟ أقعدوا على الفيسبوك وعلى الإنستغرام وعلى التيك توك؟ لا، كفوا أيديكم وروحوا استعدوا، آه، نستعد زي يا رب: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ قُلْ مَتَاعُ الدُّنْيَا قَلِيلٌ﴾ [النساء: 77].
فلما كتب عليهم القتال، إذا فريق منهم يخشون الناس كخشية الناس أو أشد، خشية الله أو أشد خشية، وقالوا ربنا لما كتبت علينا القتال لولا أخرتنا إلى أجل قريب، قل متاع الدنيا قليل. لما كتب القتال، تولى فريق منهم وقالوا ربنا لما كتبت علينا القتال. ركزوا يا شباب في الكلام ده، لولا أخرتنا إلى أجل قريب. جواب السؤال ده إيه؟ ربنا لما كتبت علينا القتال، الجواب: كتبت عليكم القتال للأسباب التالية واحد اتنين تلاتة أربعة، ده الجواب؟ مش كده. ربنا ما قالش كده، ربنا فضح القلوب. ربنا لما كتبت علينا القتال، قل متاع الدنيا قليل. قل متاع الدنيا قليل يعني إيه؟ يعني لولا أن الدنيا في قلوبكم لما سالتم هذا السؤال، أنتوا عشان الدنيا في قلوبكم فبتسالوا ربنا ليه ما كتبت علينا القتال، انما لو كانت الدنيا مش في قلوبكم ما كنتوش سالتوا. ففضح القلوب الله عز وجل.
طيب، كان الحل فين؟ كفوا أيديكم وأقيموا الصلاة وآتوا الزكاة. عشان كده تلاقوا المعنى ده مضطرد. موسى عليه السلام مع فرعون، وعارفين بقى المواجهة اللي هتحصل، ربنا يقول إيه: ﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءَا لِقَوْمِكُمَا بِمِصْرَ بُيُوتًا وَاجْعَلُوا بُيُوتَكُمْ قِبْلَةً وَأَقِيمُوا الصَّلَاةَ وَبَشِّرِ الْمُؤْمِنِينَ﴾ [يونس: 87]. محتاجين نتربى إيمانيا. فالمهم نرجع تاني، ففي وقت، تعالوا بقى نتعلم من نملة، في وقت محتاجين الحكمة دي، حكمة إيه؟ ادخلوا مساكنكم. في وقت محتاجين ده، وهذا فعلته النملة، كانت في غاية الحكمة. فده أول درس تعلمه النملة: علم وحكمة.
طيب، الدرس الثاني اللي بتعلمه من النملة: عقلية النملة في أنها تفكر في الحلول. يعني هنا النملة يا جماعة لم تحتويها المشكلة، بعض الشباب تلاقيه لما يواجه مشكلة هو يحتوى داخل المشكلة، فتلاقيه مش عارف يفكر في حلول.
يثبط ويقعد ويكتئب ويقفل عليه الغرفة، ومش عاوز حد يدخل عليّ. طب يا ابني أنت لو قعدت كده عشر سنين المشكلة هتتحل؟ مش هتتحل. طب أنت ليه مستغرق في المشكلة كده؟ ليه؟ دور على حل. خلي عقليتك عقلية النملة يا جماعة. أنت متخيل النملة؟ نملة واقفة شافت 500 كيلو في 500 كيلو. أنت عارف الـ 500 كيلو دي يعني أنت عينك ما تجيبهاش أصلاً. أنت لو واقف على بوابة إسكندرية هتشوف بوابة القاهرة دي 200 كيلو، أنت مستوعب الشكل؟ فأنت واقف عينك لا جايبة آخر الجيش ولا جايباه يمين وشمال؛ فأنت فجأة شايف حاجة أنت ما تعرفش إيه دي ولا فين أولها من آخرها.
النملة عقليتها حلول على طول: ﴿ادْخُلُوا مَسَاكِنَكُمْ﴾ [النمل: 18]. ومساكن النمل عجيبة؛ عندكم طبعاً النمل آلاف الفصائل، النمل الأبيض بيبني بيته بطين واللعاب بتاعه يوصل لعشرة أمتار ارتفاع، ده لو نسبناه للبني آدم كأنك باني بناء ارتفاعه 3.5 كيلومتر. بقية النمل بيبني تحت الأرض، عملوا تجربة في البرازيل جابوا مادة وصهروها زي الرصاص وصبوها في مكان فيه نمل زي وادي النمل ده، وبعدين سابوه لغاية ما نشف، وبعدين كسروا وحفروا. الشكل النهائي اللي هيلاقوه هو شكل الفراغات اللي كانت موجودة؛ فلقوا حاجة عجيبة، ادخلوا شوفوا الموضوع ده على اليوتيوب عشان تشوفوا بيت النمل ده عامل إزاي.
وإزاي ربنا سبحانه وتعالى أعطى للنمل علماً عجيباً، يعني في أماكن تخزين هم لقوا أماكن تخزين الطعام مصممة بشكل بحيث إن الطعام لا يفسد؛ لأنهم بيخزنوه سنة، الهواء بيخش منين ويطلع منين بحيث إن الطعام ده ما يفسدش. ومن الحاجات العجيبة اللي لقاها العلماء، مثلاً ربنا سبحانه وتعالى ألهمها للنمل، أنتم عارفين النمل بيجيب الحب مثلاً ويخزنه عنده، طيب هتقعد سنة، طيب الحب ده ممكن يحصل له إيه؟ ينبت بقى والجذور وبتاع فالبيت كله يتدمر، فقبل ما يخزنوه يقوموا قاسمين الحبة دي نصين علشان ما تنبتش. العلماء المفسرون ذكروا هذا، والعلماء بتوع دلوقتي لقوا ده فعلاً، وبيقولوا إن حبة الكزبرة لو اتقسمت نصين برضه تنبت، فالنمل عشان يخزن حبة الكزبرة يقسمها أربعة أرباع مش نصين؛ عشان لو اتقسمت نصين هتنبت. فهذا كله من العلم الذي أعطاه الله عز وجل للنمل.
﴿حَتَّىٰ إِذَا أَتَوْا عَلَىٰ وَادِ النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ﴾ [النمل: 18]. الدرس بقى الثالث وهو درس مهم جداً جداً نتعلمه من النملة، يبقى أول درس الحكمة، وأن الموضوع مش دايماً إنك تفتح صدرك خالص. ثاني درس نتعلمه عقلية النملة في إيجاد الحلول، بلاش تستغرق في المشكلة، خليك بره المشكلة عشان تلاقي حل. الدرس الأولاني هتلاقوه على اليوتيوب والمقطع هتلاقوه على التليجرام إن شاء الله، اسمه "الاستغراق في اللحظة الحاضرة"، وهو مهم جداً.
يوسف عليه السلام داخل السجن مظلوم في قضية شرف، وقضية شرف مش عادية يعني المجتمع كله بيتكلم عليها، هي قضية الساعة وصفحات السوشيال ميديا كلها بتتكلم عليها والتوك شو كله بيتكلم عنه، القضية كبيرة والعزيزة قصة. كان ممكن واحد غيره يقعد مهموم وحزين ومكتئب وما حدش يجي ناحيتي، لا، دخل السجن دعا إلى الله، دعا إلى التوحيد، وبعدين تلاقوه وهو على خزائن الأرض يقولون له: ﴿إِنَّا نَرَاكَ مِنَ الْمُحْسِنِينَ﴾ [يوسف: 36]، وهو في السجن يقولون له: ﴿إِنَّا نَرَاكَ مِنَ الْمُحْسِنِينَ﴾ [يوسف: 36]. هو في مشكلة قطعا، يوسف في مشكلة قطعا مؤرقاه، بدليل: ﴿اذْكُرْنِي عِندَ رَبِّكَ﴾ [يوسف: 42]، عاوز يخرج، عاوز يخرج، لكن ما احتوتوش المشكلة، ده اللي بقى يا شباب لازم نتعلمه، ما احتوتوش المشكلة، لا، شايف المشكلة من بره وشايفها في حجمها الطبيعي، مش مضخم المشكلة وبيدور على حلول، وما نسيش وظيفته الأساسية التي هي الدعوة إلى الله لأنه بقى في مشكلة.
﴿حَتَّىٰ إِذَا أَتَوْا عَلَىٰ وَادِ النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ﴾ [النمل: 18]. الدرس الثالث والمهم جداً يا شباب هو فكرة دورك إيه في المجتمع اللي حواليك. هنا النملة مع هذا المنظر ما دخلتش وقفلت الجريت وقالت "يلا نفسي"، أو كان ممكن حاجة تانية تروح تدخل على بيتها غرفتها الصغيرة وتقول المهم أنا وعيالي، لا، النملة شايفة إن ليها دور في المجتمع، فإنه يبقى في خطر أنا عليّ دور، فأنت إيه دورك؟ دلوقتي النملة بتعمل إيه؟ بتحمي وادي النمل من الهلاك، من إزهاق أنفس النمل ودي واحدة من مقاصد الشريعة الخمسة. أنت بقى فين دورك في الشريعة؟ فين دورك في الأمر بالمعروف والنهي عن المنكر؟ فين دورك في بيتك؟ أبوك، أمك، أخوك، أختك؟ فين دورك؟ أنا عارف إن في منا ناس قارئ قرآن فيها دروس علم، فيها دعوة إلى الله ممكن يبقى لها باع في الدعوة، أخوه ما بيركعهاش، طب هو ده ممكن، ما هو نوح عليه السلام كان ابنه كافر مش قضية، بس نوح لآخر لحظة بيدعو ولده، طب أنت فين دورك مع أخوك ولا حد أبوه ما بيركعهاش أمه مش عارف إيه؟ فين دورك؟ ما فيش، اتعلم من النملة.
اتعلم من النملة، طب الدور ده يا جماعة دور ثانوي؟ والله ما هو ثانوي، أولاً في القرآن دي خيرية أمتنا أصلاً: ﴿كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ﴾ [آل عمران: 110]، فدي خيرية هذه الأمة. طيب لو ما أمرناش ولا نهينا؟ والذي نفسي بيده لتأمرن بالمعروف ولتنهون عن المنكر أو ليوشكن الله أن يبعث عليكم عقاباً منه. فلازم يبقى لك دور زي ما النملة كده ليها دور وعملته، وهنا يا جماعة حاجة عجيبة جداً في الآية، الله عز وجل نكّر النملة: ﴿قَالَتْ نَمْلَةٌ﴾ [النمل: 18]، يعني أي نملة، يعني هنا إحنا مش لازم يبقى.. وهذا في ديننا هو مين اللي بيأمر بالمعروف وينهى عن المنكر؟ كلنا، كل المسلمين.
طبعاً هنا في فائدة إدارية، وهي أننا عندنا نظام إداري بنسميه النظام المركزي، اللي هو "سنترلايزد"، اللي هو لازم عشان ناخد أي قرار من تحت لفوق الأول وبعدين من فوق لتحت، يعني مثلاً أنا واحد شايف حاجة أعمل إيه؟ لا، أطلع للمدير وبعدين المدير هو اللي ينزل منشور أو قرار بأننا نعمل الحاجة اللي فلان قالها، ده بيسموه نظام مركزي. وفي نظام لا مركزي، طبعاً كل نظام له مزايا وله عيوب، ودي قصة في الإدارة معروفة. من عيوب النظام المركزي في الإدارة تأخر القرار؛ ليه؟ لأن في عملية كبيرة بتتم عشان يوصل القرار للمجموعة فممكن يتأخر القرار.
اللي أنا عاوز أقوله بقى، أنا ليه حكيت الحدوته دي في مسألة الأمر والنهي عن المنكر؟ يا جماعة عندنا جزء الشرع بيقول كده، جزء هو لا مركزي، وجزء ما ينفعش يكون لا مركزي ده مركزي. الجزء اللامركزي اللي هو مش هيحدث فتن، اللي هو أنت بتنكر بقلبك، ده عمره هيعمل فتنة، فنقول ده مش لازم تطلع لولي الأمر: "بعد إذنك هنكر بقلبي"، ما فيش حاجة اسمها كده. طب هتنكر بلسانك؟ ده مركزي؟ لا مش مركزي في ديننا، مش لازم شفت حد بيعمل حاجة غلط فاستنى الأول أطلع لولي الأمر وأقول له: "بعد إذنك هروح أنكر على فلان"، أقول له: "يا فلان اتق الله اللي بتعمله ده حرام"، ده لا مركزي، ده كلنا ننكره. طب الإنكار هيؤدي إلى إشهار سلاح ودعوة ناس لقتال وكذا، ممكن يبقى إنكار منكر فيه فتنة، يعني بلد مثلاً وقالت كلنا ما بنصليش وما فيش صلاة جمعة ومش هنأذن، ده محتاج إيه عشان ننكر؟ بلد يعني أقصد مدينة أو محافظة، لا ده إحنا هندخل في سلاح هيترفع، ده مركزي، ده مش آحاد الناس تعمله، ما ينفعش، ده بقى مركزي ليه؟ لأنه يحدث فتنة. فأنكارك باللسان، وده اللي يعنيينا، هو لا مركزي.
﴿قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ﴾ [النمل: 18]. مما روي في هذا أثر عجيب جداً، قال أبو إسحاق الثعلبي: رأيت في بعض الكتب أن سليمان قال لها لما حذرت النمل: "أخفتِ ظُلْمي؟ أما علمتِ أني نبي عدل؟"، فقالت النملة: "أما سمعت قولي: ﴿وَهُمْ لَا يَشْعُرُونَ﴾ [النمل: 18]؟"، مع أني لم أرد حطم النفوس، وإنما أردت حطم القلوب، خشية أن يتمنين مثل ما أعطيت، أو يفتن بالدنيا ويشغلن بالنظر إلى ملكك عن التسبيح والذكر.
هذا الأثر في معنى عجيب، هي بتقول له: أنت فاكر إني أقصد ﴿لَا يَحْطِمَنَّكُمْ سُلَيْمَانُ وَجُنُودُهُ﴾ يعني يموتكم؟ أبداً، أنا أقصد حطم القلوب؛ خشية أن يتمنين مثل ما أعطيت لما يشوفوك ماشي في هذا الملك الضخم وكذا فقلوبهم تتمنى الدنيا. طب عشان ما يعوش: ﴿ادْخُلُوا مَسَاكِنَكُمْ﴾، ما تفتحوش عينيكم على ده، ادخلوا مساكنكم حقيقةً وافتراضياً. الكلام ده بنقوله كل درس تقريباً، ادخل بيتك وليسعك بيتك، حديث النبي عليه الصلاة والسلام: «وليسعك بيتك». ما تفتحش عينك على دنيا لا أنت كنت عارف عنها حاجة يا ابن الحلال، ولا رايح، بتحجم ليه؟ وليسعك بيتك وافتراضياً.
مش قاعد بقى في بيتك وعامل فولو لكل الصفحات اللي تودي في داهية، تودي قلبك في داهية، تخلي قلبك حابب الدنيا، تفتح قلبك على حاجات في الدنيا كنت ممكن تعيش وتموت ما تعرفش إنها موجودة أصلاً في الكوكب. ما كنتش تعرف إن في بلد أصلاً اسمها كذا، فضلاً عن إيه اللي في البلد دي. طب ليه عرفت؟ أصل البلوجر الفلاني اللي هو بيسافر وبيع مش عارف إيه، فاشتركت في صفحته فنزل فيديو للبلد اللي مش عارف إيه، فتبنى القلب.
طب يا ابني أنت كنت عارف أصلاً إن في بلد اسمها كده؟ يقول لي والله أول مرة أعرف، ما كنتش أعرف إن في بلد اسمها كده أصلاً. طب أنت عامل كده إيه في نفسك؟ ادخلوا مساكنكم، ليه؟ ﴿لَا يَحْطِمَنَّكُمْ سُلَيْمَانُ وَجُنُودُهُ﴾ [النمل: 18]. قلوبكم ضعيفة، هتشوف الإبهاه والعظمة والملك، هتشوف السفريات، هتشوف الأكل، هتشوف الإكسسوارات والموضة، هتتحطم القلوب.
الحل ادخلوا مساكنكم ﴿لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ﴾ [النمل: 18]. قول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.