د. أحمد عبد المنعمالسلام عليكم ورحمة الله وبركاته، بسم الله والصلاة والسلام على رسول الله صلى الله عليه وسلم. بإذن الله عز وجل نبتدي سوياً المفروض الجزء الثاني من دورة بصائر قرآنية. احنا قلنا بصائر قرآنية، الغرض الأساسي منها أن احنا نكسر الحاجز اللي أُقيم على مدار سنين بين الناس وبين كتاب الله عز وجل، في حواجز سواء العُجمة؛ أن ما قعدناش فاهمين الكلام، سواء المشاعر، سواء المعاني، سواء الواقع بتاع الصحابة؛ كل ده حصل فيه فجوة بيننا وبين نصوص القرآن.
فاحنا غرضنا في دورة بصائر قرآنية أن احنا نكسر هذه الحواجز ونعود مرة أخرى. قلنا الدورة هتبقى إن شاء الله عز وجل جزئين؛ الجزء الأول كان فكرته اتحطينا له عنوان اسمه القرآن حياتي، القرآن حياتي؛ ست دروس بنحاول فيها الغرض بتاعها كله أن احنا نحول المعلومة بتاعة أهمية القرآن، نحولها من مجرد معلومة إلى عقيدة. في فرق بين المعلومة وبين العقيدة؛ أنا عندي معلومة أن في كذا أو الفلوس دي بتعمل كذا، لكن لما المعلومة دي تتحول عقيدةً يعني ترتبط بالقلب؛ لما المعلومة دي تتحول إلى عقيدة هينبني عليها أفعال، هينبني عليها ردود أفعال، هتلاقيني ببذل المجهود.
فلما أنا أعتقد أنه لا نجاة ولا هدى ولا نور ولا بصيرة إلا في كتاب الله عز وجل، لما دي تتحول إلى عقيدة هتلاقي ردود أفعالي اختلفت. ده الغرض من الست دروس الأولانيين بتوع الجزء الأول من البصائر القرآنية. الجزء الثاني؛ طب عايزين نبدأ خلاص، احنا اقتنعنا، احنا فهمنا، احنا أيقنا، احنا بقى عندنا عقيدة، فنبدأ بمنهجية؛ اخترنا أن احنا نبدأ بجزء عم. ليه جزء عم؟
جزء عم ده، كمقدمة سريعة، ده أول ما نزل على الصحابة؛ من أوائل -طبعا مش كله يعني- من أوائل ما نزل على الصحابة. جزء عم فيه مميزات أن الآيات بتاعته قصيرة، آيات طلقات على القلب الغافل، ودي بتفدنا جداً في الدعوة إلى الله عز وجل. في فارق لما تيجي تكلم إنسان تناقشه في موضوع وعنده خلفية مسبقة وعنده أدلة مسبقة وأنت بتطمح تتناقش معاه، وفي فرق من إنسان غافل. الإنسان الغافل ما ينفعش يشرد منك أثناء الكلام، لذلك تيجي أغلب نصوص الجزء الثلاثين، جزء عم، تلاقي: ﴿عَمَّ يَتَسَاءَلُونَ * عَنِ النَّبَإِ الْعَظِيمِ﴾ [النبأ: 1-2]، و﴿وَالنَّازِعَاتِ غَرْقًا﴾ [النازعات: 1]، و﴿وَالْعَادِيَاتِ ضَبْحًا﴾ [العاديات: 1]، كل الصور ما يديلوش فرصة يفوق، ما ياخدش فرصة يفوق؛ ياخد الآية الأولانية يفكر فيها: النازعات يعني الروح تنزع، يلاقي اللي بعدها على طول أن في ناس روحها بتنشط، اللي بعدها على طول يلاقي القيامة قامت، اللي بعدها على طول يلاقي فرعون أغرق، اللي بعدها على طول يلاقي ربنا خلق السماوات، اللي بعدها على طول يلاقي القيامة قامت، اللي بعدها يلاقي دخل في الصورة اللي بعدها: ﴿إِذَا الشَّمْسُ كُوِّرَتْ﴾ [التكوير: 1].
يجي يبص على الشمس عقبال ما ييجي يفوق من الخبطة بتاعت الآية الأولانية، الآية الثانية نازلة عليه. يخرج هو مش فاهم خرج بأيه، هو بعد الصورة حاسس أن حصل تغيير في حاجة، قلبي حاسس أنه مجهد من الطلقات والضربات اللي نزلت عليه، هو مش فاهم بالضبط إيه اللي حصل، المهم هو اتغير أو قرر يقف مع نفسه وقفة. لذلك هذه الصور لما كانت بتنزل على الصحابة أو حتى على المشركين كانت بتحوله لحاجة من اثنين: أما إنه يؤمن أو إنه يجحد؛ ما بتخليش حد يقف في النص، ما بتخليش حد يقف في النص أن هو شاكك طب احتمال. ده سمة عامة في الجزء الثلاثين، لذلك الجزء الثلاثين ده دايماً ينفع مع الناس الغافلة الغارقة في الشهوات.
لما بقى في مجتمع في المدينة، المجتمع المدني أُقيم، مجتمع وفي أهل كتاب وعندهم تشريع مضاد، وأنت عمال تقنعهم وترد عليهم وتبين لهم الأفضل؛ أصبح سياق الآيات طويل شوية. ودي سمة أحياناً بيستعملها العلماء للتفريق بين المكي والمدني، أن المكي تلاقي الآيات بتاعته قصيرة، سريعة، متتالية في الغالب، أنما الآيات المدنية في الغالب أيضاً ممكن تبقى فيها طول؛ لأن هي بتشرع لناس أيقنت خلاص، ناس قالت لك خلاص احنا موقنين أن القرآن ده حق بس محتاجين بقى تفاصيل، فالقرآن بقى إيه؟ يفهمهم واحدة واحدة وياخدهم واحدة واحدة، أو يرد سياق الردود مع أهل كتاب عندهم تشريع، هم جايبين تشريع مضاد فأنت بتحتاج لنوع من التفصيل. فلذلك، وطبعا في ناس كتير تكلمت عن أهمية الجزء سواء التاسع والعشرين أو الثلاثين كبدايه نبدأ بيها، فاحنا اخترنا كبداية منهجية نبدأ بيها جزء عم.
هنبدأ إن شاء الله عز وجل النهارده سورة النبأ. وسورة النبأ هي مقدمة القاطرة الرهيبة اللي معانا في الجزء الثلاثين، ونجد أن غالب الجزء بيتكلم عن مواضيع معينة ممكن تبقى أُجمعت حقيقةً في سورة النبأ. هنبداً باذن الله عز وجل مع بعض في سورة النبأ النهارده، نبدأ بقول الله عز وجل: ﴿عَمَّ يَتَسَاءَلُونَ﴾ [النبأ: 1].
عجيبة أن الجزء ده بالحقائق الضخمة اللي فيه بدأت بتساؤل وبدأت بسؤال عن السؤال، يعني عَمَّ يَتَسَاءَلُونَ؛ بدأت بسؤال عن التساؤلات اللي في المجتمع. أنا عايزك تتخيل كده معايا مشهد الصورة؛ دايماً يا جماعة عايزين واحنا مع بعض في القرآن أن احنا نعيش الصورة، ما يبقاش مجرد أن أنا إيه؟ فهمت أن العاديات يعني الخيل اللي بتجري، وأني فهمت أن الضبح ده صوت كذا، وأني فهمت أن الزلزلة اهتزاز الأرض، وأني فهمت أن الخلاف في كلمة البينة هل هو النبي صلى الله عليه وسلم ولا القرآن. مش ده بس اللي احنا عايزينه، دي المرحلة الأولى لكسر المفردات المعجمة علينا، المرحلة الثانية أن أنا أعيش الوضع بتاع الصورة، أعيشها.
عايزك أنت كده تتخيل معايا أصلاً كلمة سورة؛ من لطائف كلمة سورة كان في جنينة حواليها سور، فاحنا مع بعض هنعمل إيه؟ هنحاول نتسلق هذا السور عشان ننبهر مع بعض بالجنينة والثمار والحدائق اللي جوه، فتعالوا نتصور صورة صورة لنرى ما فيها من جنات. فاحنا لسه بنفتح سورة النبأ كده يا ترى إيه البدابة؟ بنفتح هنسمع إيه ولا هنشوف إيه؟
في صور تبدأ بمشهد مرعب، زي مثلا الحج: ﴿يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ﴾ [الحج: 1]. في صورة بتبدأ: ﴿الَّذِينَ كَفَرُوا وَصَدُّوا عَن سَبِيلِ اللَّهِ أَضَلَّ أَعْمَالَهُمْ﴾ [محمد: 1]. في صورة بتبدأ خيل بتجري ما انتش عارف رايحة فين: ﴿وَالْعَادِيَاتِ ضَبْحًا﴾ [العاديات: 1]. الصورة بتبدأ معانا أن في ناس قاعدة في مجالس في مكه قاعدين مجموعات وقاعدين إيه؟ همس، وقاعدين يهمهموا، وقاعدين يتكلموا، وقاعدين إيه؟ سمعت اللي حصل ده؟ بيقو كذا. فكأن الصورة عمالة تقرب منهم أكتر وتقرب منهم أكتر. مين دول؟ دول مجموعات من المشركين قاعدين في مكة، إيه الموضوع اللي كل مكة بتتكلم فيه؟ قاعدين بيتكلموا على حقيقة جت جديدة عندهم أو موضوع جه جديد كله عمال يسال، فربنا بيقول: ﴿عَمَّ يَتَسَاءَلُونَ﴾ [النبأ: 1]، المسألة الأعلى.
تخيل مثلاً أستاذ دخل على مجموعة من الطلبة، هو قاعد مراقبهم من بعيد وسامع الطلبة عمالة تقول: يا ترى في امتحانات ولا ما فيش؟ أنا سمعت أن هم هيلغوا الامتحانات! لا يا عم ده ما فيش امتحانات، ده الموضوع كله طلع اشتغالات! لا لا إزاي ما فيش امتحانات، يعني هم معقول هيبنوا المبنى ده كله وفي الآخر ما فيش امتحانات؟ آه يا عم، طلع ما فيش امتحانات، والكلام ده طلع كله. وفجاه جه صوت قطع كل ده، قال لهم: أنتوا بتتكلموا في إيه؟ ﴿عَمَّ يَتَسَاءَلُونَ﴾ [النبأ: 1]، أنتوا لسه قاعدين بتتساءلوا في امتحانات ولا ما فيش؟ أنتوا لسه بعد ما بنيتم المبنى وجبت لكم مدرسين وعلمتكم وصرفت عليكم وبنيت لكم كل المباني دي، هل كل ده عبث؟ أنتوا لسه بتتساءلوا؟ ولله المثل الأعلى.
فربنا بيقول لهم: ﴿عَمَّ يَتَسَاءَلُونَ﴾ [النبأ: 1]؛ أنتوا لسه بتتساءلوا عن سبب الخلق؟ أنتوا لسه هنا بتتكلموا في بعث ولا ما فيش؟ ولا القرآن حقيقة ولا لا؟ ولا ده رسول ولا لا؟ أنتوا لسه بتتكلموا: ﴿أَلَمْ نَجْعَلِ الْأَرْضَ مِهَادًا﴾ [النبأ: 6]، مش أنا عملت لكم الأرض وعملت لكم الجبال وعملت لكم السماء وعملت لكم المطر وطلعت لكم الزرع؟ معقول كل ده ولسه بتتساءلوا؟ فسؤال قاطع لهذه التساؤلات، سؤال استنكاري؛ أنتوا قاعدين بتعملوا إيه؟ فبدأت الصورة مجموعات قاعدة، وعايزين ناخد بالنا من كلمة مجموعات دي؛ لأنها هتتكرر معانا: ﴿يَوْمَ يُنفَخُ فِي الصُّورِ فَتَأْتُونَ أَفْوَاجًا﴾ [النبأ: 18]، المجموعات المتسائلة بنفخة واحدة هينتقل إلى الدار الآخرة.
يوم ينفخ في الصور فتاتون أفواجاً بنفخة واحدة، هذه المجموعات اللي كانت قاعدة بيتساءلوا ويقولوا: يا ترى، وقاعدين بيستهزئوا، وقاعد يقول له: قو لي بقى آخر حاجه سمعتها عن موضوع يوم القيامة بتاعهم ده إيه؟ آخر آية نزلت فينا إيه؟ ده أنا سمعت أن هم بيقولوا أن في جهنم وفي زقوم وفي حاجات حلوة في جهنم كده! آه ما تيجي نجرب الموضوع، لهذه الجلسات. فربنا بيقول: ﴿عَمَّ يَتَسَاءَلُونَ﴾ [النبأ: 1]؛ جت بصيغة المضارع: يتساءلون. يبقى ربنا بيقول لنا أن مكة تحولت إلى مجموعات قاعدين بيتناقشوا؛ بيتناقشوا في إيه؟ ربنا اللي بيعرفنا كانوا بيتكلموا في إيه، ودي بتدي ثقة للمؤمن، زي بداية سورة الأنبياء في قول الله عز وجل: ﴿اقْتَرَبَ لِلنَّاسِ حِسَابُهُمْ وَهُمْ فِي غَفْلَةٍ مُّعْرِضُونَ * مَا يَأْتِيهِم مِّن ذِكْرٍ مِّن رَّبِّهِم مُّحْدَثٍ إِلَّا استَمَعُوهُ وَهُمْ يَلْعَبُونَ * لَاهِيَةً قُلُوبُهُمْ﴾ [الأنبياء: 1-3].
ربنا بيقول: ﴿وَأَسَرُّوا النَّجْوَى﴾ [الأنبياء: 3]، المجموعات المشركة بيتكلموا عشان الكلام ما يوصلش للنبي صلى الله عليه وسلم، قاعدين بيتكلموا مع بعض عشان الكلام ما يوصلش للمؤمنين: ﴿وَأَسَرُّوا النَّجْوَى الَّذِينَ ظَلَمُوا هَلْ هَٰذَا إِلَّا بَشَرٌ مِّثْلُكُمْ ۖ أَفَتَأْتُونَ السِّحْرَ وَأَنتُمْ تُبْصِرُونَ﴾ [الأنبياء: 3]. شوف بقى الرؤساء القادة رايحين يقنعوا الضعفاء يقول له: أنت رايح للسحر برجليك؟ ﴿أَفَتَأْتُونَ السِّحْرَ وَأَنتُمْ تُبْصِرُونَ﴾ [الأنبياء: 3]. شوف بقى النبي صلى الله عليه وسلم، إيه ربنا بيبلغنا النبي بيقول إيه؟ ﴿قَالَ رَبِّي يَعْلَمُ الْقَوْلَ فِي السَّمَاءِ وَالْأَرْضِ ۖ وَهُوَ السَّمِيعُ الْعَلِيمُ﴾ [الأنبياء: 4]، أنت رايح تقول لهم: على فكرة أنا عارف أنت امبارح بالليل كنت بتقول إيه، أنا عارف في مجالسكم الخاصة كنتوا بتعملوا إيه. ﴿قَالَ رَبِّي يَعْلَمُ الْقَوْلَ فِي السَّمَاءِ وَالْأَرْضِ ۖ وَهُوَ السَّمِيعُ الْعَلِيمُ﴾ [الأنبياء: 4]، أقول لكم أنت قلتم إيه؟ ﴿بَلْ قَالُوا أَضْغَاثُ أَحْلَامٍ بَلِ افْتَرَاهُ بَلْ هُوَ شَاعِرٌ فَلْيَأْتِنَا بِآيَةٍ كَمَا أُرْسِلَ الْأَوَّلُونَ﴾ [الأنبياء: 5]، أنا بقى هرد لكم على الشبهات اللي أنا ما سمعتهاش أصلاً، هرد لكم عليها. ﴿مَا آمَنَتْ قَبْلَهُم مِّن قَرْيَةٍ أَهْلَكْنَاهَا ۖ أَفَهُمْ يُؤْمِنُونَ﴾ [الأنبياء: 6].
فتخيل الصدمة اللي تحصل للمشرك: إيه ده؟ عرف إحنا بنتكلم في إيه وجاب إجابات على التساؤلات ديت! فبتخلي فعلاً المجتمع أن يوصل لمرحله إما أنه يؤمن أو أنه يجحد؛ ما عادش واحد بيقول: اصل أنا مش مقتنع، لا، هو قا-, لكن خد قرار والعياذ بالله قرار عداوته، ما بقاش زي اليهود كده هو عرف الحق. فكذلك الصورة هنا بقى زودت مش بس عرفتنا كانوا بيتساءلوا في إيه، ده أنكرت عليهم هذا التساؤل: ﴿عَمَّ يَتَسَاءَلُونَ﴾ [النبأ: 1].
مجموعة تاني كده نعيش المشهد، إحنا بنفتح الصورة لقينا ناس قاعدين مجموعات في مكة قاعدين بيعملوا إيه؟ قاعدين بيتساءلوا. وبعدين كلمة عَمَّ يَتَسَاءَلُونَ فيها حاجتين؛ يتساءلون دي فيها صيغة، عايزكم تركزوا معايا يا شباب، فيها حاجتين: فيها صيغة المضارع، وفيها صيغة الفعل: يتساءل. ربنا ما قالش: عما يسألون؛ ما قالش عما إيه؟ يسألون، وما قالش عما تساءلوا؛ لا، جاب حاجتين، جاب صيغة المضارع وجاب صيغة الفعل. يتساءلون، صيغة المضارع يعني الموضوع كان مستمر، يعني ما كانش قاعدة وخلصت، ده كل يوم تقريباً في برنامج بيسال في الموضوع ده، عارف لما موضوع يجي جديد في زي موضوع الشريعة كده لما خد وقت فترة بقت كل برنامج بتفتحه ماسكين شبهة من شبهات الشريعة قاعدين بيتكلموا فيه وقاعدين عايزين يقنعوا الناس أن الموضوع يعني شبه مستحيل أن الشريعة تطبق. فكل يوم في مجلس بيجمعوا شبهات ضد، سواء إما نتكلم عن الخلاف، عن النبا العظيم، سواء على يوم القيامة أو القرآن أو الرسول؛ كل يوم في جلسات، سواء القادة عمالين يضحكوا على الصغيرين يقول لهم: ﴿أَفَتَأْتُونَ السِّحْرَ وَأَنتُمْ تُبْصِرُونَ﴾ [الأنبياء: 3]، أو جلسات استفزاز للمؤمنين أو جلسات استهزاء أو قعدات مع بعض استنكاريه بينهم وبين بعض. أن ده صيغة المضارع أن الموضوع يومي.
رقم اثنين؛ يتساءلون أن كل واحد يقعد في قاعدة يبقى هو اللي بيسال، وبعدين ياخد إجابات ويروح يسال بيها واحد تاني، وتاني يوم هو اللي يتسأل؛ المجتمع كله عمال يتساءل. طب بيسألوا ليه؟ هل بيسالوا بحثاً عن الحقيقة؟ ودي لازم مهم الداعيه أنه يعرفها، ودي يعني أمر كتير جداً في القرآن لازم تعرف، هل السؤال ده سؤال بحث عن الحق ولا سؤال استهزاء واستنكار؟ واحد بيستهزئ بيك وبيسال أسئلة وخلاص. لو الأسئلة بتاعة اللي قدامك أسئلة استهزاء، ما تجاوبش، ما تضيعش وقتك معاه، تجاوز السؤال على طول أنك أنت تفحمه. لما يجي واحد يسال مثلاً: قول لنا كده يوم القيامة امتى؟ هيجي امتى؟ أنت تقول له: ما تقولوش هيجي امتى، تقول له: يوم القيامة سياتي قطعاً وسيعذب المنكر. أنت تجاوزت مرحلة اللي هو بينكرها لمرحلة الواقع اللي هيحصل للمكذب، وده اللي حصل معانا في الصورة. لما يجي واحد يقول: ها! أنا سمعت أن ما فيش امتحانات، ولا في امتحانات؟ إيه آخر أخبار الامتحانات بتاعتكم؟ تقوم أنت تقول له: يوم النتيجة بتاعت الامتحان اللي هيسقط هيحصل فيه كذا وكذا وكذا. أنت اتكلّمت عن الحاجة اللي بينكرها كأنها أمر واقع، أمر مفروغ منه، أن يوم الفصل كان ميقاتاً، الأمر منتهي أصلاً، الأمر مفروغ منه لوقت ومحدود، وموضوع والامر منتهي؛ بقى تناقشتوا، ما تناقشتوش، تساءلتم، اقتنعتم، ما اقتنعتم؛ الأمر هيحصل.
عما يتساءلون؟ عن النبأ العظيم؛ الذي هم فيه مختلفون. ربنا سبحانه وتعالى يقول: ﴿عَمَّ يَتَسَاءَلُونَ * عَنِ النَّبَإِ الْعَظِيمِ * الَّذِي هُمْ فِيهِ مُخْتَلِفُونَ﴾ [النبأ: 1-3]. ربنا بيعرفنا هم كانوا بيتكلموا في إيه، وبيعرفنا إن الحاجة اللي بيتكلموا فيها دي نبأ عظيم. عايزين نقف مع النبأ العظيم دي كذا وقفة: الوقفة الأولى إن لازم الدعاة إلى الله يعملوا قضية كبيرة اسمها النبأ العظيم يرموها في المجتمع. ومن قوة طرحهم ده لازم المجتمع كله يتكلم عن الموضوع ده، حتى المستنكر مش قادر يبطل الكلام. لذلك دائمًا لما تلاقي أهل الباطل يحسوا بالضعف وخايف من قوتك -حتى لو أنت لسه مستضعف وما معكش أدوات التمكين- تلاقيه عمال يتناقش في الطرح بتاعك، وغرضه إنه يفنّده.
زي مرحلة معينة كده، لما تلاقي كل البرامج عمالة تتكلم عن الشريعة، وتطبيق الشريعة، وخطورة وصول الإسلاميين، عمالين يتكلموا؛ هو أنت لسه ما معكش حاجة، بس هو مرعوب من ده، فأصبحت قضية الساعة عنده. الدعاة إلى الله إيه القضية اللي بيلقوها في المجتمع؟ إيه النبأ العظيم اللي يقولوه للناس يخلي الناس في الميكروباص تتكلم في الموضوع ده، والناس في الشغل تتكلم في الموضوع ده، والناس في الشارع تتكلم في الموضوع ده؟ أنت وأنت بتتكلم عن الناس لازم في نبأ عظيم نتحدث عنه. لو الدعوة إلى الله تجاوزت هذا النبأ العظيم وبدأت بالفروع قبل أن تؤصل لهذا النبأ العظيم، الدعوة دي ماشية غلط، مش ده الطريق بتاعها.
لذلك من معاني سورة الحج: الحج في اللغة القصد؛ فكأن سورة الحج بتقول لك الوجهة والقصد الأساسي بتاع الدعوة إلى الله والدعاة إلى الله: ﴿يَا أَيُّهَا النَّاسُ﴾ [الحج: 1]، يبقى رقم واحد دعوتنا دعوة عالمية للناس كلهم، ﴿اتَّقُوا رَبَّكُمْ إِنَّ زَلْزَلَةَ السَّاعَةِ شَيْءٌ عَظِيمٌ﴾ [الحج: 1]. البوصلة اللي بتضبط الدعوة إنها دعوة أخروية أصالة؛ دي نقطة خطيرة جدًا، اللي بيبدأ مع الناس من الدنيا والمردود الدنيوي قبل ما يكلمهم عن المردود الأخروي، ده بيعكس في الدعوة إلى الله، بيعمل انقلاب في الموازين بتاعة الدعوة إلى الله. بيبدأ غلط، بيمشي غلط، وأي حاجة فيها انقلاب ما بتكملش؛ لأن هي ماشية غلط، فاللي بيقلب في موازين الدعوة عمره ما هيوصل. واحد يقول لي: طب يعني اللي هيبدأ كده مش هيحقق تمكين؟ أنا مش بكلمك في تمكين أو مش تمكين، أنا بكلمك إن مش ده الطريق اللي يرضي ربنا، حتى لو حصل تمكين مبدئي ده يبقى حاجة وهمية، مش هتؤتي أكلها، مش ده اللي يرضي ربنا سبحانه وتعالى، مش دي الدعوة اللي ربنا يسددها ويوافقها؛ لأن هي عملت انقلاب في الموازين بتاعتها.
فالدعوة لازم تبدأ بنبأ عظيم تلقيه في المجتمع. هل الدعاة إلى الله -عشان أنت تقيم الدعوة دي صح ولا لا- ألقت في المجتمع نبأ خلت المجتمع كله يتساءل ما بين مصدق ومكذب وشاك وموقن ومقبل وباحث عن الحق؟ لازم يحسوا إن الدعاة بيطرحوا نبأ عظيم. وبعدين ما قالش عن الخبر العظيم قال عن النبأ؛ في فرق بين النبأ والخبر. النبأ ده الأمر ذو الجلل، الأمر دائمًا صدق، إنما في الغالب في اللغة ما يجيش غير على حاجة صدق، ولا ينبئك مثل خبير. النبأ دائمًا بيجي مع صدق. الفرق بينه وبين الخبر: الخبر مجرد معلومة عابرة ممكن ما ينبنيش عليها رد فعل. احنا قاعدين مثلاً أنا عرفت إن فيه عربية جت أو أي حاجة؛ فخلاص أنا الموضوع عندي معلوم. طب أنا قاعد في مكان معين وسمعت إن البيت بيولع؛ ده نبأ، يبقى لازم هنجري وهنتحرك، ده اسمه نبأ. فربنا بيقول إن النبأ ده محتاج رد فعل، مش محتاج تساؤل. النبأ ده محتاج دعوة، محتاج قيام ليل، محتاج لجوء إلى الله، محتاج تضرع، محتاج عبادة، محتاج بحث، محتاج اجتهاد، محتاج علم، محتاج إنفاق؛ ده النبأ.
يبقى احنا المردود بتاع الكلام لازم له حركة في الواقع، إنما إن أنا أجي أقول لك الإسلام هو شوية معلومات، الإسلام إن اللي عايز يسلم يغتسل، وإنه لو متجوز أكتر من أربعة يطلقهم، وإن ما عادش يوئد بنته عشان وئد البنات بقت حاجة مش كويسة؛ لا ده طرح ناقص عن الإسلام، هو نبأ عظيم ابتداءً بتعرفوا إن فيه دار آخرة، فيه نبأ عظيم. لذلك ابن عاشور بيقول كلمة جميلة قوي، بيقول النبأ العظيم هنا باستقرائه للقرآن بيقول دي أكتر حاجتين هزت المجتمع في مكة: حاجتين، التوحيد: إن ما فيش حد له دور في الكون إلا الله، وإن كل الآلهة دي وهم، وده طبعًا الاقتصاد بتاع مكة كله مبني على الآلهة. رقم اتنين: البعث، إن كل كلمة بتقولها وكل حاجة بتعملها هتحاسب عليها. بيقول ما كانوش قادرين يصدقوا الموضوع ده؛ يعني إيه؟ يعني الآلهة بتاعتنا دي؟ يعني آباؤنا الأولين؟ يعني القبائل اللي مبنية على الآلهة؟ طب التجارة اللي بتجيلنا من كل أنحاء العالم لمكة عشان الآلهة؟ ﴿أَجَعَلَ الْآلِهَةَ إِلَهًا وَاحِدًا﴾ [ص: 5].
وبرضه من الحاجات الجميلة اللي اتقالت في التفسير إن عايز تعرف كانوا بيتساءلوا في إيه أو الأسئلة بتاعتهم سواء استهزاء أو لا، اجمع كل الأسئلة اللي قالها الكفار في القرآن، تعرف المجتمع كان قاعد بيقول إيه: ﴿أَجَعَلَ الْآلِهَةَ إِلَهًا وَاحِدًا﴾، ﴿مَا لِهَذَا الرَّسُولِ يَأْكُلُ الطَّعَامَ﴾، كل الاستنكارات والاستفهامات والتساؤلات اللي قالوها في القرآن تجمعها تعرف المجتمع كان قاعد بيقول إيه، ﴿أَفَتَأْتُونَ السِّحْرَ وَأَنتُمْ تُبْصِرُونَ﴾. تعرف الجلسات اللي كانت بتتم في مكة، اللي الجلسات التضليل الإعلامية اللي كانت بتتم في مكة كان بيتقال فيها إيه؟ اقرأ كده القرآن، اختم كده القرآن، هات ختمة جمع فيها ﴿وَقَالَ الَّذِينَ كَفَرُوا﴾، ﴿وَقَالُوا﴾، جمع فيها أقوال الكفار لإضلال الناس. شوف كده: ﴿هَلْ نَدُلُّكُمْ عَلَى رَجُلٍ﴾، يروحوا كده يعملوا قعدة، تعالوا ده أنا هنقول لكم النهارده حتة نكتة، ده في واحد بيقول إن بعد ما نبقى زي التراب ده هو هنرجع بني آدمين تاني، فيقولوا: معقول في ناس بتقول كده؟ ويعملوا بقى قعدة ويشتغلوا، يقعدوا بقى: قول لنا بقى، يجيب واحد مؤمن يجيبوه بقى في القعدة، قول لنا بقى إيه آخر حاجة عندكم النهارده عن البعث؟ إيه تاني عندكم من النعيم؟ جلسات استهزاء، تساؤلات الأصل فيها استهزاء.
القرآن من قوة الطرح القرآني قلب الموازين عليهم، ما عادش يقول له: طب بس اسمعني، الموضوع ما ينفعش لا؛ الموضوع نقل إن ربنا اللي بيتكلم، ﴿عَمَّ يَتَسَاءَلُونَ * عَنِ النَّبَإِ الْعَظِيمِ﴾، ربنا سبحانه وتعالى اللي بيتكلم، وربنا نسب إلى نفسه الكلام قال: ﴿أَلَمْ نَجْعَل﴾ بنون العظمة. فان دائمًا المهم في الدعوة إلى الله إنك ما تخليش فيه معركة بينك وبين الشخص المدعو أبدًا، أنت بتفهمه إن أنا ناقل الموضوع، بينك وبين ربنا، أنا ماليش دعوة، أنا ناقل؛ لأن دائمًا تدخل الأشخاص في الدعوة بيفسدها، بيربي عند اللي قدامك "نفسنة" وحساسية، تخليه ما يقبلش الكلام. لو أنت بتتكلم إن الله عز وجل يقول، وأنا مأمور زي ما أنتم مأمورون، وإني مجرد مبلغ لكم، وإن الكلام ده أنا أطبقه زي ما أنتم، ﴿وَمَا أُرِيدُ أَنْ أُخَالِفَكُمْ إِلَى مَا أَنْهَاكُمْ عَنْهُ﴾ [هود: 88]، هو كده ممكن يقبل الكلام بتاعك؛ تشيل الحواجز النفسية اللي ممكن تقوم نتيجة إنه خايف يحس إنك أنت هتفرض نفسك عليه، لا ده أنا بنقل ليك كلام ربنا سبحانه وتعالى.
عما يتساءلون عن النبأ العظيم، قلنا فيه نبأ عظيم أُلقي في المجتمع، عمل هزة، المجتمع كله بيتساءل. لما الدعاة إلى الله ينزلوا المجتمع في الدعوة لازم يبقى معاهم نبأ عظيم، لازم لما تنزل تتكلم الناس، سواء هتنزل تكلم الناس في قهوة، هتنزل تكلم ناس في شغلك، هتكلم الناس في الشارع، لازم يحسوا إن فيه نبأ عظيم، أنت مُنذر لشيء عظيم جاي. لو ما حسوش الصدق في ده، هو مش هيتحرك، قبل ما تكلمه في أي تفاصيل للشريعة أو أي طاعات أنت عايزها منه، لازم تكلمه إن وراء ده أمر عظيم سيحدث، كل ده هيتهد، كل السما اللي أنت شايفها دي والأرض، كل ده هيتهد ويبدل، فيه دار آخرة، فيه أمر عظيم، وده لُب الدعوة إن احنا بنكلم الناس عن شيء مستقبلي عظيم. اللي يتخيل أحداث الدار الآخرة في بدايتها، الشمس بتقع والسحاب والجبال، والشق اللي في الأرض، والبحار تسجر نار، مشهد، ﴿وَتَرَى النَّاسَ سُكَارَى وَمَا هُم بِسُكَارَى﴾، والحامل يسقط الحمل، والمرضعة ترمي الرضيع، لما تعيش في المشهد ده كده واحنا ما نكلمش الناس عن ده، احنا مجرمين! لما احنا نبقى موقنين بده وشايفينه في القرآن وما نكلمش الناس، ونقول لهم آه لا عادي كملوا آخر الطريق عادي، ما فيش حاجة، ما فيش عادي، ما فيش مشكلة، أهم حاجة بس تاكلوا وتشربوا كويس، أهم حاجة دنيتكم، أهم حاجة الزبالة تبقى كويسة، وتأكلوا كويس وهنظبط لكم الكهرباء؛ هو ده بس أهم حاجة، إنما المستقبل الأخروي مش مهم؟ ده احنا نبقى مجرمين، ده احنا نبقى نضل الناس عن هذا النبأ العظيم.
فالدعوة كانت قوية لدرجة إحداث الضجة في المجتمع. لو كانوا حاسين إن النبأ العظيم ده مش هياثر في الناس ما كانوش عملوا تساؤلات عنه، ولا كانوا يتكلموا فيه، ولا عملوا جلسات استهزاء، ولا جلسات استنكار، ما يبذلوش المجهود ده إلا لو خايفين من تأثير النبأ العظيم. ما يوزعوش القطن على مشارف مكة الكرسف عشان كحملة مجانية للتضليل، ما يعملوش كده إلا إذا كانوا خايفين. يبقى لازم النبأ ده أمر عظيم، الدعاة إلى الله لازم يحسسوا الناس إن فيه نبأ عظيم هيحدث. عن النبأ العظيم طبعًا العلماء اختلفوا: هل هو البعث؟ أو القرآن؟ أو الرسول صلى الله عليه وسلم؟ وهي التلاتة كلها زي ما قلنا بتصب في حاجتين زي ما ابن عاشور جمعهم، إن نفي الآلهة والبعث. ونجد إن السورة عالجت البعث الأول، وفي آخر السورة ﴿يَوْمَ يَقُومُ الرُّوحُ وَالْمَلَائِكَةُ صَفًّا لَّا يَتَكَلَّمُونَ إِلَّا مَنْ أَذِنَ لَهُ الرَّحْمَنُ وَقَالَ صَوَابًا﴾ [النبأ: 38]، أي تدخل أو أي شفاعة للآلهة، فعالجت القضيتين واهتمت بالبعث.
عن النبأ؛ احنا قلنا الفرق بين النبأ والخبر إيه؟ النبأ بيترتب عليه، هو صدق، أمر ذو جلل، لازم يترتب عليه رد فعل. لازم دائمًا لما أقول لك على نبأ ما ينفعش بعد ما أقول لك النبأ والله نبأ جميل جدًا، لا لازم أنت هتتحرك تعمل حاجة كرد فعل لهذا النبأ. فربنا بيستنكر عليهم إن كل رد فعلهم تجاه هذا النبأ هو مجرد إيه؟ هو مجرد التساؤل. يبقى مجموعات بتتساءل، القرآن زي ما يكون دخل عليهم، عارف أنت دخلة اللي قاعدين بيتساءلوا فجأة، القرآن دخل عليهم: بتعملوا إيه؟ بتتسالوا في إيه؟ ﴿عَنِ النَّبَإِ الْعَظِيمِ * الَّذِي هُمْ فِيهِ مُخْتَلِفُونَ﴾، تعبير القرآن جميل قوي، كل كلمة في القرآن معجزة، ما قالش: الذي تختلفون فيه، قال: ﴿الَّذِي هُمْ فِيهِ مُخْتَلِفُونَ﴾، كان هم بذواتهم وأجسادهم دخلوا جوه الاختلاف، كان هم ما عادش وراهم حاجة غير الكلام في موضوع البعث. كان مجتمع مكة بقى قاعد فاضي لموضوع القرآن والنبي صلى الله عليه وسلم والبعث والمؤمنين، بقى قاعد كل همه: إزاي نخلص من الناس دي؟ إزاي نعمل حملات إعلامية؟ إزاي نعمل تعذيب؟ إزاي إزاي نضل الناس؟ بقى قاعد المجتمع كله مشغول.
لذلك زي ما بنقول أحيانًا كل ما يحس الناس اللي رافضين الشريعة كل ما يحسوا إن فيه مجرد بداية تمكين أو أي حاجة، تلاقي تفريغ كامل، كل البرامج وكل الناس قاعدين، قاعدين الوقت شبهات ضد كذا، أول ما يحسوا إن فيه بدايات تمكين على طول كله حالة الطوارئ تعلن، وكله قاعد بيتكلم شبهات، ﴿الَّذِي هُمْ فِيهِ﴾، أي في النبأ العظيم، قاعدين مشغولين بيه. طب ولما هو مش ذو قيمة ولما أنتم بتنكروه إيه الاهتمام المبالغ ده؟ إلا إذا أنت من جواك عارف إن ده هياثر على.. هم عارفين إن ده هياثر على مصالحهم، هياثر على مصالحهم الاقتصادية، القرآن جه يقول لهم الناس كلها تبعث سواسية، العدل، أو بالتعبير بقى اللي جالنا في السورة: الفصل بين الناس. كل ده هيحصل يوم القيامة، ﴿ذَلِكَ الْيَوْمُ الْحَقُّ﴾ [النبأ: 39].
من الناس اللي القرآن سماهم الوصف اللي جالنا معانا النهارده في سورة النبأ: الطاغين، الطاغي اللي مش عايز حدود، الطاغي ده اللي ما لهوش حد، بيتجاوز الحد. القرآن حط لكل واحد الحد بتاعه، حتى الرئيس يحط له الحد بتاعه، ما ينفعش تتجاوز كذا وكذا وكذا، أنت أصلاً موظف بتعمل كذا وكذا وكذا، أنت عبد، الراجل اللي شغال في الاقتصاد أنت عبد، لك حدود ما تتعدهاش. فجه بقى يوم الفصل يرجع الحدود دي اللي هم تعدوها، فهم رافضين ده طبعًا لأن هي اقتصادهم كله قائم على عكس ده، فلما تيجي تقول له كلكم سواسية وفيه البعث وكله هيتحاسب يرفض، ﴿الَّذِي هُمْ فِيهِ مُخْتَلِفُونَ﴾. فربنا بيقول: ﴿كَلَّا سَيَعْلَمُونَ * ثُمَّ كَلَّا سَيَعْلَمُونَ﴾، كلا يعني إيه؟
توقفوا عن هذه التساؤلات، توقفوا عن هذه الترهات عشان المؤمن ما يستدركش في الكلام معاهم ما يقعدش برنامج ساعة، المذيعة المتبرجة عمالة تتكلم في قضية من قضايا الشريعة الحجاب واحنا اصلا ما أصلناش عقيدة البعث، ما أصلناش عقيدة القرآن إن هو الكلام الحق الأوحد الآن على وجه الأرض، ما أصلناش إن النبي صلى الله عليه وسلم هو خاتم الرسل، ما وصلناش الأصول دي، ده كله ده ترهات ما لوش كلام.
﴿كَلاَّ سَيَعْلَمُونَ﴾ [النبأ: 4]. سيعلمون إيه؟ سيعلمون حقيقة النبأ الذي كانوا فيه مختلفون، هم عاملين يختلفوا ربنا بيقول لهم هتعرفوا بقى كل اللي أنت بتنكره هتعلمه ﴿ثُمَّ كَلاَّ سَيَعْلَمُونَ﴾ [النبأ: 5]. قالوا الأولانية سيعلمون يعني هيشوفوها عيانا، الثانية هيدوقوها، يعني أول مرة سيعلمون يعني هيشوفوا في النار بعينه، الثانية والعياذ بالله أنه هيجيب جوه النار، وقيل كلا سيعلمون أي سيعلم أهل الإيمان أنهم كانوا على الحق، ثم كلا سيعلمون وسيعلم أهل الكفر أنهم كانوا على الباطل.
من حكم إقامة يوم القيامة أن أهل الإيمان يوقنوا أنهم كانوا على الحق وأهل الباطل يوقنوا أنهم كانوا على الباطل، وأن أهل الإيمان يقولوا لأهل الكفر: ﴿لَقَدْ وَجَدْنَا مَا وَعَدَنَا رَبُّنَا حَقًّا فَهَلْ وَجَدْتُمْ مَا وَعَدَ رَبُّكُمْ حَقًّا﴾ [الأعراف: 44]. دي من الحكم اللي بيقوم عليها يوم القيامة.
كلا سيعلمون، بعضهم قال إن سيعلمون الأولى للمؤمنين والثانية للكفار، وبعضهم قال ده ترقي في العلم، يعني لما يموت هيشوف جزء من اللي كان بيتقال له في القرآن في القبر، ولما يبعث هيشوف جزء من اللي كان بيتقال له هتكتمل الحقيقة الكاملة والعياذ بالله لما يلقى في جهنم ساعتها فعلا يقول آه فعلا صدق المرسلون، ده الكلام اللي كانوا بيقولوه ما كانش تخويف، ده الكلام اللي كانوا بيقولوه لنا ما كانش بيضحكوا بيه علينا، ده طلع حقيقة لغاية لما يدوقها بنفسه والعياذ بالله. ﴿كَلاَّ سَيَعْلَمُونَ * ثُمَّ كَلاَّ سَيَعْلَمُونَ﴾ [النبأ: 4-5].
طيب بعد هذه المقدمة الصورة هجمت على الناس اللي قاعدة بتتناقش وتتكلم باستهزاء، نقلت الموضوع جد حسيتهم إن الموضوع نبأ عظيم ما ينفعش فيه خلاف؛ لأن الإنسان ممكن يختلف في معلومة، إنما ازاي يختلف في نبأ عظيم؟ يعني ما ينفعش نختلف هي الشمس بتطلع ولا لا؟ ما ينفعش نختلف الناس بتموت ولا لا؟ يعني واحد يقول إيه والله اصل أنا مش مقتنع إن الناس بتموت! فانت بتستغرب إنكار البعث كإنكار الموت، إنكار البعث كإنكار إن في ناس بتتولد، إنكار البعث كإنكار إن في نبتة بتخرج من الأرض، إنكار البعث كإنكار تداول الليل والنهار، إنكار البعث هو إنكار لكل الظواهر اللي أنت شايفها في الحياة.
كل ده هيجي من الأدلة اللي ربنا ساقها لنا على البعث، ففي حاجات ما ينفعش يبقى فيها خلاف، فالصورة دخلت على المجموعات اللي بتستهزئ وبتتسأل أسئلة مش على وجه الحقيقة، قلبت الموضوع جد وإن كلا سيعلمون ثم كلا سيعلمون. الواحد كان متوقع بقى إن يوم الفصل كان ميقاتا، يوم ينفخ في الصور فتاتون أفواجا، ربنا قبل ما يقول لهم كده من رحمة الله عز وجل بدا الأول معاهم: ﴿أَلَمْ نَجْعَلِ الْأَرْضَ مِهَادًا * وَالْجِبَالَ أَوْتَادًا * وَخَلَقْنَاكُمْ أَزْوَاجًا * وَجَعَلْنَا نَوْمَكُمْ سُبَاتًا * وَجَعَلْنَا اللَّيْلَ لِبَاسًا * وَجَعَلْنَا النَّهَارَ مَعَاشًا * وَبَنَيْنَا فَوْقَكُمْ سَبْعًا شِدَادًا * وَجَعَلْنَا سِرَاجًا وَهَّاجًا * وَأَنْزَلْنَا مِنَ الْمُعْصِرَاتِ مَاءً ثَجَّاجًا * لِنُخْرِجَ بِهِ حَبًّا وَنَبَاتًا * وَجَنَّاتٍ أَلْفَافًا﴾ [النبأ: 6-16]. وبعدين إن يوم الفصل، ربنا الأول جاب لهم مجموعة من الأدلة قبل ما ينقلهم نقلة إلى يوم الفصل ثم جهنم ثم الكلام للمؤمنين الجنة ثم ختام تاني لمنظر إن الخلق كلهم واقفين قدام ربنا سبحانه وتعالى لا يملكون منه خطابا.
فإذا اللي من رحمة ربنا سبحانه وتعالى أنه بدأ معاهم كده وده يفيدنا في الدعوة برضه، قبل لأن يوم الفصل كان ميقاتا قول الم نجعل الأرض مهادا، ذكروا بنعم ربنا سبحانه وتعالى، وكان ربنا بيقول لهم الشوط بتاع الم نجعل الأرض مهاد لغاية وجنات ألفافا كل ده داخل ضمن سؤال بتاع ألم نجعل؛ أي ألم نجعل الأرض مهادا، وألم نجعل الجبال أوتادا، وألم نبني فوقكم سبعا شدادا، وألم... يعني كل ده مش ربنا عمل لكم كده؟ مش ربنا عمل لك كده؟ تيجي تكلم واحد مش ربنا أداك عينين وإيدين ورجلين؟ مش ربنا لطالما أكرمك؟ مش ربنا أنقذك من الموقف الفلاني؟ دي صيغة تساؤل تخلي بعد كل آية يقف مين اللي عمل كده؟ مش ربنا اللي عمل كده؟
طيب هذه الآيات ألم نجعل الأرض مهادا، الكلام عن الأرض والجبال والسماء والزرع، ليه الشوط ده؟ كان ربنا سبحانه وتعالى هنا الكلام عن الآيات الكونية جه في القرآن كتير للاستدلال على البعث. إيه الغرض من الكلام عن الآيات القرآنية للاستدلال على البعث؟ العلماء حاولوا يجمعوا، واللي أنا أقوله ده مجموع من أكتر من تفسير، ليه القرآن بيجيب الآيات الكونية؟ أو إيه الغرض والحكمة للاستدلال على البعث؟
أول حاجة: إثبات القدرة. وأن الذي جعل الأرض مهادا وجعل الجبال أوتادا واللي أنزل المطر والماء من السماء وأخرج الزرع، اللي فعل كل هذه الأشياء قادر على البعث. يبقى دايما في القرآن احنا دي هتفيدنا في القرآن كله، أغراض ذكر الآيات الكونية للاستدلال على البعث بيفيدنا في إيه؟ رقم واحد: إثبات القدرة، يعني كان ربنا بيقول لهم أنتوا بتنكروا البعث ليه؟ عشان مستحيل أو من عجز، حاشاه سبحانه وتعالى، يعني إيه؟ ﴿فَمَا ظَنُّكُمْ بِرَبِّ الْعَالَمِينَ﴾ [الصافات: 87]؟ أظننتم فيه العجز حتى تنكرون البعث حاشاه سبحانه وتعالى؟ أو أظننتم فيه العجز حتى تنكرون البعث؟ فبالتالي أنا بثبت لكم أن الله عز وجل على كل شيء قدير، الله جعل كذا وفعل كذا وفعل كذا، فاثبات القدرة.
رقم اثنين: نفي العبث. من أدلة البعث من استنتاج الأدلة الكونية على اثبات البعث نفي العبث. يعني إيه نفي العبث؟ يعني معقول، مثلا نرجع للمثال بتاع الأستاذ أو المدرس دخل على الطلبة فالاستاذ يقول لهم يعني معقولة المدرسة دي تتبنى والفصول والمدرسين والمرتبات وكل ده عشان في الآخر ما فيش امتحانات ولا شهادات؟ لما يجي يقول أنت بنيتوا الكلية دي ليه؟ نقول كده لا عايزين نخرج حاجة ولا عايزين نعلم حاجة ولا بنعمل امتحانات ولا بندي شهادات! فالناس يقولوا دي مجانين، ده عبث، هو في حاجة اسمها مبنية كده من غير حكمه ولا غرض ولا أي حاجة كده؟ فالله عز وجل جعل الأرض مهادا والجبال أوتادا والسماء والشمس والمطر كل ده كده من غير حكمه؟ وكل ده موجود كده خلاص من غير أي حاجة ولا هتتسالوا عليه؟ والنعم والعين والاذن والقلب وكل اللي عندك ده كده معقول مش هتحاسب عليه؟ ازاي يعني؟ ازاي أنت لو رحت شركة وقالوا لك خد وكذا وكذا وكذا وعربية وفلوس وشقة، تقول لهم إيه المطلوب؟ يقول لك لا ما فيش حاجة مطلوب منك، يعني اعمل اللي أنت عايزه، اشتغل براحتك أنت حر، ده عبث! هتقول ده عبث حاشاه سبحانه وتعالى، فاذا كنتم تنزهون أقل الناس عقلا في الدنيا عن فعل هذا، فالله عز وجل أحق بهذا سبحانه وتعالى.
يبقى إذا إن الإنسان لازم، احنا بنتكلم إن ليه استعمال الأدلة الكونية على إثبات البعث؟ رقم واحد: الحكمة القدرة المطلقة. رقم اثنين: الحكمة ونفي العبث. رقم ثلاثة: إن ربنا سبحانه وتعالى جاب لهم مشاهد من المشاهد اللي بيشوفوها قريبة من البعث؛ مشهد التزاوج وانجاب الطفل، وزي ما النبي صلى الله عليه وسلم يقول، بسط النبي صلى الله عليه وسلم في يده ثم قال: يقول الله عز وجل: يا ابن آدم أنا تعجزني وقد خلقتك من مثل هذا؟ ازاي الإنسان كان نطفة كان ميت وتحول إلى حي؟ ﴿وَخَلَقْنَاكُمْ أَزْوَاجًا * وَجَعَلْنَا نَوْمَكُمْ سُبَاتًا﴾ [النبأ: 8-9]. ﴿لِنُخْرِجَ بِهِ حَبًّا وَنَبَاتًا﴾ [النبأ: 15]. ازاي الأرض كانت ميتة وطلعت؟ فداخل هذه المشاهد أصلا في مشاهد بتدل على البعث. طب أنت بتنكر البعث ليه؟ خلاص انكر التزاوج، انكر إن الكتكوت يطلع من البيضة، انكر إن الأرض تطلع ثمار، ما هو اللي ينكر البعث لازم ينكر هذه الأشياء، وبما أن هذه الأشياء اصبحت واقع أنت بتشوفها، فالله عز وجل بيجيب لهم داخل هذه المشاهد حاجات تناسب ذلك.
رقم أربعة: إن المشاهد الكونية اللي أنت بتشوفها دي كلها مترابطة مع بعض، بمعنى أن الأرض محتاجة للجبال، والأرض بتنتظر الماء من السماء، والسحاب في تناسق بينه وبين الجبال، وحركة المية بتحتاج للشمس، والمية لما تطلع السماء بتستقبلها وتبقى المخلوقات دي متناغمه متناسقه مع بعضها، إذا الذي خلقها واحد. يعني الكون محتاج لبعضه، الذرات اللي هنا، النبات بيحتاج ثاني أكسيد الكربون اللي الإنسان بيخرجه اللي هي بترجع تطلع له أكسجين اللي بترجع تدي له حاجات معينة معينة، يبقى إذا كل الدورات الكونية دي متداخله مترابطة مع بعضها البعض، وأشهر تداخل كلمة التزاوج خلقناكم أزواجا، اللي فعل كل هذا واحد إله واحد، فده دلالة القدرة التي تدل تاني على البعث.
يبقى إذا القدرة المطلقة في العبث، حكمة ربنا سبحانه وتعالى أن أكيد في غرض العمل ده. إيه تاني؟ رقم ثلاثة، استدلال من المشاهد، داخل هذه المشاهد مشاهد تدل على البعث. رقم أربعة، احتياج المخلوقات إلى بعضها، وأن اللي خلق كل ده إله واحد.
رقم خمسة: إن كان ربنا سبحانه وتعالى بيقول لنا هذا خلق الله، يعني الله جعل الأرض مهادا، ماذا لو أراد الإنسان أن يجعل الأرض مهادا؟ شوف لما الإنسان يحب يسفلت شارع بيطلع عين الناس اللي ساكنين والناس عشان يجيبوا ويقعدوا فترة، شوف الأرض بعد ما كان السماوات والأرض كانت رتقا ففتقناهما، شوف بقى مين اللي خلى الأرض دي مهادا؟ مين اللي خلاها ذلولا؟ يعني كان الذلولا دي كأن الأرض هو الذي جعل لكم الأرض ذلولا فامشوا في مناكبها، الذلول دي الدابة اللي كانت مفترسة ربنا خلاها ذلول تذل للإنسان، فكأن الأرض دي كانت مفترسة، يعني إيه كانت مفترسة؟ يعني الأرض دي كان ممكن تضل في الكون تخبط في الشمس ويجي فيها نيازك وتدمر وتقرب من الشمس فتنصهر، وتبارك وتبتعد من الشمس فتبرد، والبراكين اللي فيها تنفجر في أي لحظة، والأنهار اللي فيها تغور في الأرض فتصبح غورا، يعني الأرض ممكن يحصل فيها أي حاجة، مين اللي ظبط الأرض ما تقربش من الشمس ولا تبعد عن الشمس؟ مين اللي ظبط النهار تمشي بنسق معين ودورة الماء تمشي بنسق معين؟ مين اللي ظبط الجبال تبقى في أماكن وأن البراكين تخرج في أماكن وأن الزلازل تحدث في أماكن؟ مين اللي عمل ده؟ مين اللي مدها؟
زي شوف التعبير الجميل: ﴿أَلَمْ نَجْعَلِ الْأَرْضَ مِهَادًا﴾ [النبأ: 6]، المهاد للطفل؛ الأم لما تعمل السرير بتاع طفلها الصغير وتحط طفلها الرضيع، ولله المثل الأعلى، الله عز وجل أرحم بنا الأم بولدها، وكما أن الطفل الصغير ده ما يعرفش يعمل لنفسه حاجة، فكأن ربنا بيقول لنا أنتوا ما تعرفوش تعملوا لنفسكم حاجة، أنا اللي عملت لكم كل حاجة، أنا اللي ظبطت لكم عدد الجزيئات وذرات كل حاجة في الكون أنتم محتاجينها، ولو أي حاجة اختلت كل حاجة تروح، فكان ربنا بيقول لنا شوفوا قدرتكم، فين الشركاء؟ ﴿أَرُونِي مَاذَا خَلَقُوا مِنَ الْأَرْضِ أَمْ لَهُمْ شِرْكٌ فِي السَّمَاوَاتِ﴾ [فاطر: 40]، عملوا إيه؟ عملوا إيه؟ ده لما يحبوا يعملوا وتد للخيمة شوف بيعملوا إيه، لكن الله عز وجل لما عمل وتد عمل الجبال أوتادا، الله عز وجل لما بنى بنى سبعا شدادا، شوف أنت عملتوا إيه السماوات؟ الله عز وجل بنى سبعا شدادا، الله لما نزل الماء نزله ثجاجا يكفي الكون كله إلى يوم القيامة، أنت لما بتجيبوا مية بتعملوا إيه؟ بيطلع عينكم عشان توصلوا مية! الله عز وجل لما خلق طلع من الأرض نباتا وجنات ألفافا، أنت بتطلعوا إيه؟ ازاي لما تجيب لكم تراب تعرف تطلع منها كده؟ فأنت لما تقارن بين قدرة الله عز وجل وقدرة، ما فيش وجه أصلا المقارنة، قدرة الإنسان تقارن، الإنسان ضعيف.
إذا دي أيضا من أدلة قدرة الله على البعث، آخر حاجة: أن في هذه الأشياء التي ربنا ذكرها أن الإنسان يجبر على أشياء، يقهر على أشياء؛ الإنسان يقهر على النوم: ﴿وَجَعَلْنَا نَوْمَكُمْ سُبَاتًا﴾ [النبأ: 9]، الإنسان يقهر على التزاوج، ما الإنسان محتاج يخلف مش هيعرف لازم يتزوج، الإنسان يحتاج في جواة شهوة بتدفعه إلى التزاوج، الإنسان مقهور على أشياء، أن الليل يجيه وأن النهار يطلع، هو في نظام معين هو مجبر عليه هيمنة الله عز وجل، طب ما هو اللي عمل فيك كده وأكبرك على كده قدر أنه يميتك ثم يحييك، إذا أنت معترض على إيه؟ أنت بتصادم إيه؟ بتناطح إيه؟
فالزي ما قلنا اللي عايز يمنع البعث، خلاص امنع أن الشمس ما تطلعش، ﴿فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ﴾ [البقرة: 258]، ولو أنت عايز تنكر البعث ربنا قال إن هو أنت كنت ميت وأحياك وأنه هيميتك ثم يحييك، أنت بتقول لا، أنت هتصادم ده؟ طب ما تصادم الشمس، خلي الشمس ما تطلعش، اجتمعوا أيها الناس وخلوا الشمس ما تطلعش، اجتمعوا أيها الناس وشيلوا كل الجبال اللي في الأرض، اجتمعوا أيها الناس وابحثوا عن مكان آخر غير الأرض، سيبوا الأرض، مش دي الأرض ربنا! روحوا مكان تاني! إذا كل هذه الأشياء بنستفيدها في القرآن كله لما تيجي الأدلة الآيات الكونية على إثبات البعث ألم نجعل الأرض...
سريعا بقى وقفات مع الآية دي بعد ما قلنا المجمل كده، خمس دقائق كده نخلص الآيات: ألم نجعل الأرض مهادا؟ زي ما قلنا الله عز وجل بيقول أنا اللي عملت الأرض كده ما حدش يعرف.
الصبي وهناً رحمة الله عز وجل بالناس. والجبال أوتاده؛ كلمة جميلة برضه كانت قيلت أن كان رب واحد بيقول إيه لما يسمع الأرض مهاداً، فيقول إيه ده الأرض مش مهاداً لأن فيه جبال، فربنا كأنه بيقول لنا الجبال اللي مضايقاك دي سبب حفظك.
فكان فيه حاجات أحياناً تضايق الإنسان زي النوم مثلاً؛ إنسان يتمنى أنه ما كانش ينام، فربنا يقول له النوم ده عشانك، يعني أنا قهرتك بالنوم لمصلحتك. ولو كان الإنسان وكل إلى نفسه كان ضيع نفسه، فالله عز وجل أعلم بمصالح العباد من أنفسهم وأرحم بهم من أمهاتهم بل من أنفسهم. والجبال أوتاده؛ طبعا بتوع الاعجاز العلمي قالوا هنا كلام كتير في الغلاف الجوي وإزاي الجبال لها دور وإزاي الثبات والزلازل، أياً كان ده مش دورنا ده يرجع فيه إلى مضنا، يعني: ألم نجعل الأرض مهاداً والجبال أوتاداً، دول اثنين في الخلق.
طب اثنين للانسان: وخلقناكم أزواجاً وجعلنا نومكم سباتاً. احتياج الإنسان إلى الزوج، احتياج الإنسان إلى النوم، دي احتياجات بيقهر فيها الإنسان ولمصلحته. وخلقناكم أزواجاً دي التوحيد، الكون كله أزواج، الله عز وجل هو الواحد الأحد الفرد الصمد سبحانه وتعالى، وخلق يبقى دي ظاهرة كونية تدل على التوحيد. وخلقناكم أزواجاً وجعلنا، خدوا بالكم دايماً يا جماعة لفظ الجعل ده غير الخلق، يعني ما فيش عند ربنا سبحانه وتعالى، الله قادر على كل شيء بكلمة «كن» كان الأرض دي الأول الخلق، يعني إيه الأرض السماوات والأرض كانت رتقاً ففتقناهما؟ طب تظبيط الأرض دي إنه الجعل، ده عملية معينة لا يستطيعها الإنسان، يعني الجعل ده تحويل مثلاً الترابيزة دي لحاجة ده جعل، نجعل هكذا، يجعل اللبن مثلاً يعمل له منه زبادي، هو بيجعل. فربنا بيقول: أنا جعلت الأرض مهاداً، جعلت الأرض مهاداً، وجعلنا نومكم سباتاً، يعني ربنا بيقول: أنا خليت النوم بتاعك يريحك، كان ممكن النوم بتاعك يتعبك ما يريحكش.
والعجيب سبحان الله شوف تدبير ربنا سبحانه وتعالى؛ الإنسان لما يجي يرتب حاجة، دايماً لما يجي يحط لنفسه جدول يعمل حاجة بينسى، دايماً يرتب أوقات الحركة ما يرتبش أوقات السكون، يعني ممكن الشغل المواعيد ينسى يحط إيه حاجة للراحة، فربنا في تدبيره للكون خلى أوقات النوم قهرية؛ لأن لو كانت وكلت الإنسان كان ضيع نفسه. خلى أوقات النوم بتاعتك، لو حد حاول يسهر يتعب وينام غصب عشان مصلحته، لو كان ربنا خلى الإنسان قادر أنه يسهر وما يحسش بألام السهر كان ممكن يموت فجأة، لذلك دايماً يقولوا أقل الناس نوم مش محافظ على نومه كويس، مش لازم الساعات، أقل الناس عمراً. الشاهد أن ربنا من رحمته بالإنسان خلى النوم سباتاً، وثبات بمعنى القطع، إحساس الريستارت، أن واحد يبقى تعبان وده حاجة عجيبة جداً تلاقيه مصدع ومتضايق وأعصابه مشدودة ومجهد، ممكن يدخل ينام ساعتين يصحى يلاقي كل ده راح، طب إزاي؟ إزاي حصل هذا التجديد؟ وتتعجب بقى وأنت بتقول وأنت داخل تنام تقرأ آية الكرسي وتقول: ﴿اللَّهُ لَا إِلَٰهَ إِلَّا هُوَ الْحَيُّ الْقَيُّومُ لَا تَأْخُذُهُ سِنَةٌ وَلَا نَوْمٌ﴾ [البقرة: 255]. سبحان الله، الله لا إله إلا هو، من أذكره قبل النوم، الله لا إله إلا هو الحي القيوم؛ يعني الذي يقوم على حفظ الأشياء. فمن رحمته هو بيقوم على حفظ الأشياء، ومن كماله سبحانه وتعالى، يعني المسألة دايماً اللي يقوم على حفظ الحاجة تقول له ما ينفعش تنام، يعني لو نامت هتبوظ، فالله لا إله إلا هو الحي القيوم لا تأخذه، خد بالك من لا تأخذه دي، كأن ده ربنا بيقول لنا أنتم تأخذكم يعني غصب عنك بتنام، لكن الله عز وجل هو خالق النوم سبحانه وتعالى، لا ينام سبحانه وتعالى، ﴿لَا تَأْخُذُهُ سِنَةٌ وَلَا نَوْمٌ﴾ [البقرة: 255].
فنرجع تاني: وجعلنا نومكم سباتاً. والتظني بقى؛ الواحد يتخيل كده الأرض تضبط تتحط فيها جبال عشان ما، وبعدين أنتم محتاجين هتحسوا بوحشة، خلاص نعمل لكم تزاوج وتحس بالأنس. طب ما انت بتحتاج فترة تريح فيها، خلاص هعمل لك النوم. طب بالليل بس يا ريت الدنيا تبقى مظلمة، طيب: وجعلنا الليل لباساً. طب النهار بس عشان أعرف أتحرك، خلاص: وجعلنا النهار معاشاً. طب تحس إنك محفوظ: وبنينا فوقكم سبعاً شداداً. طب حركة المطر، طب السراج الوهاج اللي ينور وفي نفس الوقت يبخر الميه يطلع تاني، حركة دورة الماء عشان ما تخلصش، وجعلنا سراجاً وهاجاً، وأنزلنا من المعصرات ماءً ثجاجاً. خد بالك من: وبنينا فوقكم سبعاً شداداً، وبعدين جعلنا سراجاً وهاجاً، وبعدين وأنزلنا من المعصرات ماءً ثجاجاً لنخرج به حباً ونباتاً وجناتٍ. تيجي تقرا الآيات، التناسق والتناغم والتداخل، قدرة ربنا سبحانه وتعالى المبهرة، يعني حاجة مبهرة، حاجة جميلة. وزي ما قلنا، كل بقى إيه من الآيات دي فيها الحاجات اللي احنا قلناها، الأدلة على إثبات البعث.
وجعلنا حاجتين في الأرض؛ حاجتين في الخلق: ألم نجعل الأرض مهاداً والجبال أوتاداً. وحاجتين قهر للإنسان هو محتاجهم: وخلقناكم أزواجاً وجعلنا نومكم سباتاً. وتظبيط لحياة الإنسان: وجعلنا الليل لباساً والنهار معاشاً. وبعد كده بقى المنظومة بتاعة المطر: وبنينا فوقكم سبعاً شداداً وجعلنا سراجاً وهاجاً وأنزلنا من المعصرات ماءً ثجاجاً. تعبير القرآن: ما قالش جعلنا سراجاً وهاجاً، الماء ثجاجاً، الجنات ألفافاً دي زيادة في الرحمة، زيادة في العطاء؛ كان ممكن ربنا سبحانه وتعالى يقول ماء وخلاص، لا، ربنا يقول لك ثجاجاً زيادة في الرحمة.
رقم اثنين: لا يفعل ذلك إلا الله، ما حدش ينزل الماء ده إلا الله، ما حدش يجعل الأرض مهاداً إلا الله، ما حدش يجعل الجبال أوتاداً إلا الله، المواصفات دي لا يفعلها إلا الله. ﴿وَأَنزَلْنَا مِنَ الْمُعْصِرَاتِ مَاءً ثَجَّاجًا﴾ [النبأ: 14]، قيل المعصرات كالسحاب أو الرياح أو السماء على ثلاثة أقوال، لكن الراجح أن هي السحاب؛ لأن هي اللي بتنزل. المعصرات ديت، آخر حاجه هنختم بيها، يقول لك المعصرات الذي حان وقت العصر بتاعها أن هي تعصر وتنزل. في هنا بيسموها همزة الحينونة، يعني إيه؟ يعني المعصرات جايّة من أعصر، الهمزة دي همزة الحينونة. يعني إيه برضه؟ أنا عايز أقول إيه من الكلام ده؟ وأنزلنا من المعصرات، يعني ربنا اللي بيحدد الوقت بالضبط، بالضبط اللي السحاب دي اتنزل فيها. الله عز وجل بيقول: هو الذي يأمر أن السحابة دي ما تمطرش غير في الوقت الفلاني في المكان الفلاني. والنهارده أصلاً يوم عجيب، النهارده احنا قلنا خلاص الصيف والحر وفجأة تلاقي مطر وبرق. الله عز وجل هو الذي يحدد الحين دي اللي بيسموها همزة الحينونة بتاعة المعصرات، الله عز وجل هو الذي يحدد الوقت والزمان والمكان، ولا يقدر أحد كائناً من كان أن يأمر السحاب دي أن هي في المكان ده أو الزمان ده. ﴿وَأَنزَلْنَا مِنَ الْمُعْصِرَاتِ مَاءً ثَجَّاجًا﴾ [النبأ: 14] عشانكم. لنخرج به حباً، كان كفاية حب يا رب، لكن ربنا رزق حب ونبات وجنات ألفافاً، كرم وعطاء. وبعد هذا كله ينكرون البعث.
يبدأ الشوط الثاني، اللي مش عاجبه كل الآيات دي خلاص هيواجه بقى: ﴿إِنَّ يَوْمَ الْفَصْلِ كَانَ مِيقَاتًا﴾ [النبأ: 17]. أكتفي بهذا القدر، سبحانك اللهم وبحمدك، أشهد أن لا إله إلا أنت، أستغفرك وأتوب إليك.