د. أحمد عبد المنعمالسلام عليكم ورحمة الله وبركاته. بسم الله، والصلاة والسلام على رسول الله صلى الله عليه وسلم. بإذن الله عز وجل هنستكمل مع بعض دورة بصائر قرآنية، الجزء الثاني في شرح جزء عم. نكرر دائما أننا قلنا إن الغرض الأساسي من الجزء الأول من دورة بصائر قرآنية هو تحويل أهمية القرآن وتدبر القرآن من مجرد معلومة عندنا إلى أنها عقيدة تستقر في القلب؛ عقيدة الإنسان ينافح عنها، يجاهد من أجلها، يبحث عنها حتى تستقر في قلب الإنسان.
قلنا الجزء الثاني هو بداية للارتباط التفصيلي، فكان الجزء الأول ارتباطًا مجملًا: أن القرآن مهم، القرآن لازم نتدبره، القرآن نور، القرآن هدى، بصائر، بينات. طيب عايزين نبدأ الحاجات دي تدخل في حياتنا، فلازم يحدث ارتباط مفصل بكتاب الله عز وجل. قلنا هنبدأ بما بدأ به نزول القرآن غالب سور جزء عم، سور مفصلة، طرقات سريعة على قلب الإنسان الغافل.
أول ما نزل غالب السور طبعًا، وإن كان في خلاف في بعض سور جزء عم أنها مدنية، بل فيه فعلاً بعض السور مدنية، لكن قلنا هنبدأ مع جزء عم بإذن الله عز وجل. أخذنا سورة النبأ وسورة النازعات، والنهارده بإذن الله مع بعض في سورة عبس. هذه السورة العظيمة، سورة عبس وتولى على خلاف تسميتها، أياً كان، بياخدوا أول كلمة أو آية وتسمى، أو سورة عبس. حقيقة هذه السورة عظيمة جدًا، والواحد بيتحرج ويجد في صدره حرجًا أنه يشرح هذه السورة، وخاصة لأنها عتاب من الله عز وجل بدايتها للنبي صلى الله عليه وسلم، والإنسان يخشى أنه لا يوفي النبي صلى الله عليه وسلم حقه، ويخاف، ولقيت سبحان الله المعنى ده أشار إليه بعض المفسرين أنه كان متهيبًا وتردد كثيرًا أنه يكتب في هذه السورة حفظًا لمقام النبي صلى الله عليه وسلم؛ لأننا بجهلنا وممكن زلات ألسنتنا ما نستطعش نوفي النبي صلى الله عليه وسلم حقه.
فطبعًا أولًا لازم نفهم زي ما ربنا سبحانه وتعالى قال: ﴿وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ﴾ [آل عمران: 144]. وأن ربنا سبحانه وتعالى أراد أنه يرتبط الناس بالدعوة، وربنا سبحانه وتعالى ربى الصحابة أن النبي صلى الله عليه وسلم سيموت: ﴿إِنَّكَ مَيِّتٌ وَإِنَّهُم مَّيِّتُونَ﴾ [الزمر: 30]. ربنا سبحانه وتعالى أراد أن الصحابة يرتبطوا بكتاب الله عز وجل إلى يوم القيامة. والنبي صلى الله عليه وسلم ربنا حفظ سنة النبي صلى الله عليه وسلم، لكن ربنا ما أرادش أن الارتباط الدائم يكون بشخص النبي صلى الله عليه وسلم ولكن بسنة النبي صلى الله عليه وسلم. وقلنا إن الله عز وجل لحفظ هذا الدين، أما حفظ النبي صلى الله عليه وسلم من الموت أو حفظ القرآن من التغيير، الله عز وجل بحكمته سبحانه وتعالى وبعلمه اختار أن القرآن هو الذي يحفظ من التبديل، مش أن شخص النبي صلى الله عليه وسلم يحفظ من الموت، ولكن سنة النبي صلى الله عليه وسلم هي التي ربنا يقيد لها رجالًا يحفظونها.
دي بس كانت مقدمة هامة، عشان لو الإنسان صدر منه وأنا بتكلم أي كلمة ما توفيش حق النبي صلى الله عليه وسلم، وإحنا مهما تكلمنا عن فضل النبي صلى الله عليه وسلم على هذه الأمة، وقد إيه المجهود الذي بذله صلى الله عليه وسلم، لن نوفي النبي صلى الله عليه وسلم حقه، ولن يوفيه حقه إلا ربنا سبحانه وتعالى. لذلك إحنا لما بنقدم جزء من الشكر بنطلب من ربنا أنه يصلي عليه؛ لأن إحنا ما نعرفش نؤدي الشكر، إحنا دورنا نقول يا رب صلي على النبي محمد صلى الله عليه وسلم، لأن إحنا دورنا مش هنعرف مهما عملنا مش هنعرف نرد هذا الفضل بتاع النبي صلى الله عليه وسلم.
طيب، بدأت السورة بعتاب من الله عز وجل للنبي صلى الله عليه وسلم. موقف معروف طبعًا، موقف ابن أم مكتوم؛ جاء للنبي صلى الله عليه وسلم وقعد يطلب من النبي صلى الله عليه وسلم في وقت كان فيه الكبراء والعظماء والأغنياء من قريش، وكان النبي صلى الله عليه وسلم في هذه اللحظة يريد أن يسلم هؤلاء، ودائمًا الداعية بيبقى نفسه في إيمان أمثال هؤلاء؛ لأن دول لو آمنوا فيه ناس كتير جدًا متأثرين بهم. فحرص النبي صلى الله عليه وسلم هنا مش على أموالهم ولا على ما معهم من مال أبدًا، ولكن أن هؤلاء العظماء قد يسخروا هذه الأموال لنصر دين الله عز وجل. وإحنا بنمر بفترة استضعاف، وفي فترة الاستضعاف الإنسان بيبحث عن أي مخرج، بتلاقي عايز طب ممكن فلان يسلم، طب ممكن فلان ينصر الدين، طب ممكن فلان يسخر الأدوات التي معه. ففي فترة الاستضعاف أنت بتبحث عن أي مخرج في وسط الاستضعاف المكي، ويجي ابن أم مكتوم ويطلب من النبي صلى الله عليه وسلم أكثر من مرة وهو أعمى أنه يلتفت إليه أو يترك هؤلاء العظماء، والنبي صلى الله عليه وسلم مرتبط بهؤلاء.
فعس النبي صلى الله عليه وسلم مع أنه كان أعمى وابن أم مكتوم ما شافش رضي الله عنه ما شافش، ده كان أعمى، ومجرد العبوس والتولي عنه والإعراض عنه والاهتمام بعظماء قريش وتمني أن دول يسلموا، نزل العتاب. ليه العتاب؟ وتعالوا نشوف عايزين نمشي مع تفاصيل الآيات التي في السورة. ربنا سبحانه وتعالى في أول السورة بيقول: ﴿عَبَسَ وَتَوَلَّىٰ * أَن جَاءَهُ الْأَعْمَىٰ﴾. بدأت السورة بملامح قسمات لوجه النبي صلى الله عليه وسلم، وهنا النبي صلى الله عليه وسلم هو الداعية الأول الذي المفروض يسير على نهجه الدعاة. فلما الله عز وجل يعاتب النبي صلى الله عليه وسلم، ده المفروض الداعية يحط العتاب ده في حسبانه، وأن ممكن يقع في هذا؛ ده طبيعي.
بدأت بقسمات الوجه، وده يدل أن قسمات وجه الداعية لازم يأخذ باله منها، وأن ملامح وجه الداعية لازم يأخذ باله منها. الإنسان وهو يسير في الطرقات بين الناس، مجرد أنك تنسى إلقاء السلام على الناس ده ممكن يخلي الناس تزعل منك. أذكر في إحدى المعتكفات في رمضان، في وسط الاعتكاف في اليوم الخامس أو السادس من الاعتكاف، فجأة لقيت أحد الدعاة الذي كان معتكفًا معي جايب أخ وجاي بيقول لي: أنا عندي عتاب صغير. فبقول له: في إيه؟ فلقيت الأخ الذي معه يبكي، فأنا بقول للأخ الصغير: أنت بتعيط ليه؟ فالدعاية بيقول لي: ده هو زعلان منك أنت آذيته. قلت له: أنا؟ ده أنا جاي مستغرب، فقال لي: هو جاء أكثر من مرة يكلمك وأنت كنت مشغولًا ومتجهمًا بترتيب الاعتكافات، فاعتقد أنك أنت ما بتقابلش بشاشة له أو مش واخد بالك منه، فبكى.
فممكن قد إيه قسمات وجه الداعية وملامح وجه الداعية قد تؤثر في المدعو وأنت لا تشعر. أنك تحافظ على الابتسامة وتحافظ على السكينة والطمأنينة، دي بتبث مشاعر للمدعوين، فالداعية لازم يبقى آخذ باله حتى من قسمات الوجه، حتى من إلقاء السلام. كان برضه أخ داعية في منطقة، فالناس زعلانة منه ليه؟ لأنه بينسى يسلم علينا في الرايحة والجاية؛ يعني مجرد أشياء بسيطة جدًا، لكن الداعية في كلماته في نظراته في قسمات وجهه في حركاته لابد أن يكون على حذر. يعني مجرد أن يلقى الناس بوجه طلق وبوجه متبسم ده أمر مهم جدًا، فإن البداية تبدأ بعتاب قسمات الوجه. النبي صلى الله عليه وسلم الذي أصلاً الأعمى ابن أم مكتوم رضي الله عنه الصحابي الجليل وهو أعمى لم يرَ ذلك، جه فيه عتاب! يبقى مجرد تغيير الوجه بتاع الداعية ممكن الداعية يُسأل عنه ويُسأل: طب أنت عملت كده ليه؟ طب أنت لما قابلت فلان ما قابلتوش، لم تهش له وتبش. النبي صلى الله عليه وسلم في البخاري لما كان يأتيه الأقوام فيقول: «مرحبًا بالقوم غير خزايا ولا ندامة»، يقوم النبي صلى الله عليه وسلم ويبشرهم. ﴿وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ كَتَبَ رَبُّكُمْ عَلَىٰ نَفْسِهِ الرَّحْمَةَ﴾ [الأنعام: 54]. تبشرهم وتهون عليهم الأمور، فدي بداية العتاب في قسمات وجه النبي صلى الله عليه وسلم.
طيب، ﴿عَبَسَ وَتَوَلَّىٰ﴾، تولى مش بس الإعراض، مش بس سابه والتفت لعظماء قريش، لا، ده تولى أي ذهب إلى ما هو أولى، ودي نقطة مهمة جدًا: ترتيب أولويات الداعية مش كما يرى الداعية ولا بمتغيرات الواقع، في معطيات شرعية وفي معايير ربنا سبحانه وتعالى وضعها لازم الإنسان يسير عليها. فربنا بيقول: ﴿عَبَسَ وَتَوَلَّىٰ﴾ أي اتجه إلى ما هو أولى في حسبانه، أنا لما أتولى شيء يعني بسيب حاجة، مش بسيبها زهدًا فيها، لا أنا بسيبها لأن أنا أرى أن في حاجة أولى منها. فالنبي صلى الله عليه وسلم في هذه اللحظة رأى أن الأولى أن يتجه إلى دعوة عظماء قريش وأن يترك الصحابي المقبل.
فربنا هنا سبحانه وتعالى عمل له موازنة: طيب دول عملوا إيه وده عمل إيه؟ ده كان جاي صفته عاملة إزاي وهم صفاتهم عاملين إزاي؟ بحيث أن الإنسان يعرف يرتب الأولويات، لو ما عنده فيه مجهود يبذله هنا ومجهود يبذله هنا، مش بمزاج الداعية. يعني أنا مثلًا في مدعو طالب مني حاجة ومدعو ثاني طالب مني حاجة، أنت هنا بيتعارض، عند التعارض لازم تقدم الأولى، أنك تقدم فلان أو فلان مش بالمصالح الشخصية ولا الحزبية ولا الفئوية ولا المادية ولا الاجتماعية. مش معنى أن فلان أرقى اجتماعيًا أو فلان أغنى أو فلان أقرب لي أو فلان بيسمع كلامي أو فلان منتمي لجماعتي، مش دي المعايير التي بنقيم على أساسها، مش دي المعايير التي بتخلي الإنسان يختار إيه هو الأولى، أو ده من قبيلتي أو ده من أسرتي أو ده هيفيدني بعد كده. لا، في معايير ثابتة ربنا سبحانه وتعالى وضحها ومبثوثة في القرآن وفي السنة.
فإن ﴿عَبَسَ وَتَوَلَّىٰ﴾، طيب هل مجرد العتاب مجرد أن رجل صحابي كان أعمى وزعل من الموقف فربنا نزل العتاب، هل مجرد واحد زعل؟ طب ما الداعية ممكن يخطأ أخطاء كثيرة غصبًا عنه، الداعية بشر بيتحرك وسط الناس غصبًا عنه ممكن يغلط. هل مجرد هذا العتاب وهذه السورة التي تتسمى باسم الموقف يعني تغيير في قسمات الوجه، سورة اسمها سورة عبس؟ يعني سورة كاملة بالرغم أن ليها أغراض أخرى وقضايا دعوية أخرى وخاتمة أخرى، هل السورة العظيمة دي وتسمية سورة وربنا سبحانه وتعالى ينزلها في القرآن ويحفظها إلى يوم القيامة، هل مجرد عشان شخص زعل؟ لا، أبدًا، الأمر أخطر من ذلك. النبي صلى الله عليه وسلم ربنا سبحانه وتعالى عصمه في تبليغ الرسالة، وقال الله عز وجل: ﴿وَمَا أَرْسَلْنَا مِن قَبْلِكَ مِن رَّسُولٍ وَلَا نَبِيٍّ إِلَّا إِذَا تَمَنَّىٰ أَلْقَى الشَّيْطَانُ فِي أُمْنِيَّتِهِ فَيَنسَخُ اللَّهُ مَا يُلْقِي الشَّيْطَانُ﴾ [الحج: 52]. أمنيات الأنبياء هي إيه؟ هي أن يستجيب الناس كلهم إلى دعوتهم، هذه الأمنية أن الناس تسلم، الشيطان ممكن يستغلها، ممكن يستغل أمنية مثلاً أنا كداعية أو أي شخص كداعية عايز الناس تسلم، فيجي له الشيطان يستغل هذا الحرص على إسلام الناس فيقول له إيه؟ بلاش الكلام ده، أنت متشدد، أنت ممكن تركا للظالمين، أنت ممكن تؤخر البيان دوت، أنت ممكن تغير في الدعوة. فممكن الشيطان يستغل هذه الأمنية. بالنسبة للأنبياء ربنا قال: ﴿فَيَنسَخُ اللَّهُ مَا يُلْقِي الشَّيْطَانُ﴾، ربنا بيحفظ الأنبياء من ذلك أن هم يغيروا أو يبدلوا. لكن بالنسبة للدعاة لا، ما أخذناش، الدعاة ما أخذوش العهد، ما أخذوش الوعد بكده، فلابد أن يكونوا على حذر من ذلك.
فهنا السورة هي قد تكون بالنسبة للدعاة غير النبي صلى الله عليه وسلم، بالنسبة للدعاة دي بداية الانحراف عن مسار الدعوة، أنك تبدأ تراضي البشر وتبدأ تضع معايير أرضية لتقييم المدعوين: آه ده غني يبقى أنا هقدمه على الفقير، ده ينتمي لجماعة أنا هقدمه على اللي مش منتمي لي، ده اجتماعيًا أعلى أنا هقدمه على ده. بيبدأ البشر يضعوا معايير أخرى في الدعوة غير التي ربنا أرادها، وتبدأ الدعوة تنحرف بداية صغيرة صغيرة إلى أن تنحرف بعيدًا عن المسار الذي ربنا يريده. وأن ربنا سبحانه وتعالى وضع أن الداعية له هدف أساسي وهدف رئيسي وهو تزكية الناس: ﴿وَمَا يُدْرِيكَ لَعَلَّهُ يَزَّكَّىٰ﴾، ﴿وَمَا عَلَيْكَ أَلَّا يَزَّكَّىٰ﴾، أنت لك وظيفة أساسية، الذي يأتيك يطلب هذه الوظيفة منك وهي التزكية، لا تتردد معه. قد تتعارض بعض المجهودات عند الداعية والأعمال عند الداعية، يرتب هذه الأولويات بما يرضي الله عز وجل، طبعًا ده عايزة استقراء من القرآن والسنة، لكن مش الترتيب الأوحد: آه أن طالما الغني يقدم على الفقير أو الذي تبعي يقدم على اللي مش تبعي، أبدًا. هنا ربنا حط معايير، منها المقبل بيقدم على المعرض، دي إحدى المعايير التي جاءت في السورة: الذي جاءك غير الذي مستغني، ربنا قال: ﴿أَمَّا مَنِ اسْتَغْنَىٰ * فَأَنتَ لَهُ تَصَدَّىٰ * وَمَا عَلَيْكَ أَلَّا يَزَّكَّىٰ * وَأَمَّا مَن جَاءَكَ يَسْعَىٰ﴾. يبقى لما يبقى عندي اثنين: واحد غني واجتماعيًا أعلى وتبعي وبيحبني وممكن يسمع، وأيًا كان في مواصفات كتير حلوة بالنسبة لك أنت كشخص، وشخص ثاني فقير واجتماعيًا أقل ومش تبعك لكن هو مقبل ويريد أن يتزكى وده معرض، أنت المفروض لما يحصل تعارض في المجهودات تقدم هذا؛ لأن ربنا اللي قال: ﴿أَمَّا مَن جَاءَكَ يَسْعَىٰ﴾.
المعايير الرأسمالية المادية التي انتشرت ونشرها الغرب في العالم تؤثر على معايير الدعاة. الدعاة عندهم معايير ربانية، وهذه أهم نقطة في السورة: ضبط المعايير عند الداعية، ألا يتأثروا بالمعايير الأرضية معايير المادة، بل لهم معايير ربانية وضعها الله عز وجل. الإنسان سيُسأل، والداعية سيُسأل: لماذا قدمت هذا على هذا؟ ربنا سأل سيدنا عيسى: ﴿ءَأَنتَ قُلْتَ لِلنَّاسِ﴾ [المائدة: 116]. هذا السؤال سيُسأله كل داعية: أأنت قلت للناس هذا الكلام؟ ما الدافع من وراء هذا الكلام؟ ماذا تريد من هذا الكلام؟ ما الغرض من هذا الكلام؟ لماذا فضلت فلانًا على فلان؟ سيُسأل الداعية. أقول حتى عن قسمات الوجه جاء العتاب هنا بكلمة "عبس"؛ حتى عن قسمات وجهه. لمَ هششت وبششت لهذا الظالم وأنت تعلم أنه ظالم؟ لماذا هششت وبششت له؟ هل لك غرض شرعي؟ هل لك حجة شرعية تقولها أمام الله عز وجل؟ كل هذا سيُسأل عنه. نسأل الله عز وجل أن يحفظنا جميعًا، وأن يسددنا، وأن يوفقنا.
"عبس وتولى"؛ تتبع الحدث من السير يطول، لكن نحن نريد أن نمشي مع القرآن. القرآن جاب كلمة ﴿أَن جَاءَهُ الْأَعْمَىٰ﴾ [عبس: 2]. متى النبي ﷺ عبس وتولى؟ متى النبي ﷺ تغيرت قسمات وجهه الشريف ﷺ واتجه إلى ما هو أولى؟ القرآن يقول: ﴿أَن جَاءَهُ الْأَعْمَىٰ﴾. "أن" هنا لها معنيان: إما تعليلية أي "لأن جاءه الأعمى"، أو "بمجرد أن جاءه الأعمى"، كما في قوله تعالى: ﴿كَلَّا إِنَّ الْإِنسَانَ لَيَطْغَىٰ * أَن رَّآهُ اسْتَغْنَىٰ﴾ [العلق: 6-7]، أي بمجرد أن رأى نفسه استغنى؛ والاثنان تمشي. يبقى التغير عند النبي ﷺ حصل بمجيء الأعمى. لنتخيل مشهد النبي ﷺ يدعو العظماء والكبراء من قريش، أول ما جاء الأعمى، الروايات تقول إنه قعد يشد في يد النبي ﷺ أو قعد يشغله عن دعوة الآخرين، إنما القرآن يقول بمجرد المجيء حصل التغير داخل نفس النبي ﷺ وظهر ذلك على وجهه ﷺ.
هنا الداعية ممكن يكون في صدره حرج من وجود بعض الفقراء معه، وشايف أن وجود بعض الفقراء قد ينفر الأغنياء. هذه التقسيمة لا يجب أن تكون عند الدعاة، بل هذا الحرج الذي في صدور بعض الدعاة، أنه يتحرج أن يكون في المدعوين بعض الفقراء، وأن ذلك قد ينافر الأغنياء، هذا الحرج لا ينبغي أن يكون في صدر الداعية. فالداعية مطالب أن يأخذ باله مما يحدث في داخل صدره، مما يحدث في داخل نفسه؛ أنه متضايق من فلان، حاسس بحرج من وجود فلان. لماذا أنت حاسس بهذا الحرج؟ لأمور ومعايير شرعية يرضاها الله عز وجل؟
فالقرآن هنا قال: ﴿أَن جَاءَهُ الْأَعْمَىٰ﴾، لسه ما حصلش انشغال، أو السبب هو مجيء. ما قالش إن الأعمى شغله، تعبير القرآن قال: ﴿أَن جَاءَهُ﴾، وقال ﴿الْأَعْمَىٰ﴾ طب ما قالش ليه "ابن أم مكتوم"؟ وسيعرف من السيرة أنه أعمى. إذن السبب أنه أعمى؛ فمجيء واحد فقير أعمى، هذا خلى النبي ﷺ يعبس في وجهه ويتولى، ويعرض عنه إلى هؤلاء، ويشعر بحرج في صدره؛ أن يظن الأغنياء أن هؤلاء هم أتباع الأنبياء. وهذا حق، سيظل هؤلاء هم أتباع الأنبياء، وهرقل كان عارف كده لما سأل: "أتباعهم الضعفاء أم الكبراء؟" قال: "الضعفاء"، قال: "وكذلك أتباع الرسل". وأبو سفيان لما قاله الفقراء، قال: "وكذلك اتباع الأنبياء". إذاً ما ينفعش الداعية ﴿فَلَا يَكُن فِي صَدْرِكَ حَرَجٌ مِّنْهُ﴾. ما ينفعش الداعية يشعر بحرج من السنن الكونية والسنن التشريعية. وجود الحرج في الصدر! أول ما تحس بحرج في صدرك من شيء من الدين اعرف أنك قصاده ستترك شيئًا: ﴿فَلَعَلَّكَ تَارِكٌ بَعْضَ مَا يُوحَىٰ إِلَيْكَ وَضَائِقٌ بِهِ صَدْرُكَ﴾ [هود: 12]. أول ما صدرك يضيق بشيء، اعرف أنك مش هتعرف تقوله كويس.
لو صدرك عنده ضيق مش قادر تتكلم عن الأمر بالمعروف والنهي عن المنكر، هتلاقي ما بتأمرش بمعروف ولا بتنهى عن منكر كويس. لما تجد في صدرك ضيق وحرج من الولاء والبراء، هتلاقيك مش عارف تطبق الولاء والبراء كويس، وكذلك من الجهاد، كذلك من الإيمان والكفر والفسق والنفاق. من هذه المعلومات العقدية التي تصدر للناس وتبين للناس، لما تجد في صدرك حرج من الغيب، من الأحاديث والآيات القرآنية التي تحدثت عن الغيب، عندما تجد في صدرك حرج من هذه الأشياء، لن تستطيع أن تبلغها كما يريدها الله عز وجل. هتلاقيك قاعد زي مثلًا اللي في صدره حرج من جهاد الطلب، يقعد يقول: "أصل الإسلام انتشر دفاعًا عن النفس"، وهو ما استعملش سيف، ويقعد يجيب كل أحداث السيرة والتاريخ ويبررها؛ ليه؟ لأن في صدره حرجًا من ذلك. فلا ينبغي أن يكون في صدر الداعية أي حرج من أي تشريع وضعه الله عز وجل، أو من أي سنة سنها الله عز وجل.
إذن، السورة بدأت بملمح من قسمات وجه النبي ﷺ في موقف أثناء الدعوة، وكان النبي ﷺ، لو اعتبرنا أن ترتيب السور النبأ والنازعات هذه أوامر لإلقاء النبأ على المجتمع ودعوة الناس عن يوم القيامة، وبالفعل النبي ﷺ نزل بهذه الأشياء وتكلم وكان حريصًا على إيمان الزعماء. بنقول إن اللي حدث ده مش مجرد تخليد لموقف بسيط أن شخصًا زعل، فالموضوع مرضية له، وإن كان ده يعتبر جبر الخواطر أمرًا معتبرًا في الشرع، لكن الموضوع أكبر من ذلك. إحنا بنقول الموضوع قد يؤدي إلى انحراف في الدعوات، ودائمًا كان القرآن مع النبي ﷺ يبدأ يلحق الموضوع من الأول خالص، لأن النبي ﷺ كما أخبرنا معصوم من ذلك، لكن الدعاة لا بد أن يكونوا على حذر من هذه الأشياء. فبنؤكد أن هذه القاعدة: لا ينبغي أن يكون في صدر الداعية أي حرج من أي سنة شرعية وضعها الله عز وجل، وبينها في القرآن أو في السنة النبوية.
ثم يقول الله عز وجل: ﴿وَمَا يُدْرِيكَ لَعَلَّهُ يَزَّكَّىٰ﴾ [عبس: 3]. الكلمة دي مهمة قوي بالنسبة للداعية؛ ليه؟ أحيانًا الداعية لا يتوقع الخير الذي جوه الإنسان. هو مثلًا له تقييم، فيجي واحد يبدأ يلتزم أو مدعو، فأنا أقول: "آه لا، فلان ده هتلاقيه مش هيعرف يعمل حاجة"، أو "ده فقير ومستواه التعليمي بسيط، فده بلاش تضيع وقتك معاه". هذه المعايير في التقييم بتبقى خطر. أنا عارف أن واحد ثاني هيقول لي: "لا، ما هو أحيانًا بيتعارض وأنت بتقدم". أنا مش بتكلم على التعارضات، أنا بتكلم على إعطاء هذا التقييم ابتداءً، إنك تقول: "لا، أنا مش هدي لده وقت"، وهدي لده، ويبقى الموضوع له اعتبارات أخرى. لكن ربنا بيقول لك: ﴿وَمَا يُدْرِيكَ لَعَلَّهُ يَزَّكَّىٰ﴾، أنت إيش عرفك الخير اللي جواه؟ أنت إيش عرفك أن الأعمى ده ممكن يفيد الدين قد إيه؟ أحيانًا أنت لا تتخيل، كل إنسان بداخله إيمان أنت لا تتخيله، وأيضًا بداخله فجور أنت لا تتخيله. ﴿وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا﴾ [الأعراف: 175] وفي الآخر أصبح كالكلب، وقاتل المئة، اللي كان يشوفه وهو بيقتل يقول: "ده لا يمكن يبقى جواه خير أبدًا". الله عز وجل أنزل له ملائكة وحرك له الأرض، ربنا حرك الأرض عشان شخص! فأنت شخص قاتل، أنت لو شفته في الأول تقول: "لا يمكن أضيع الوقت مع ده"، وتقول: "لا يمكن ده ما فيش فيه فايدة"، وقتل أكثر ما قتل، قتل راهبًا وقتل واحدًا عامل لدين الله، "أنا لا يمكن أبدًا يكون في أمل". فأنت وما يدريك! أنت لك وظيفة، أنه قد يتزكى، أنت عليك أن تطرح آيات القرآن، وتبين له آيات القرآن، وما يدريك ماذا ستفعل هذه الآيات في هذه النفس البشرية؟
هذه الآيات القرآنية التي قد تؤثر، بل بالفعل تؤثر في الحجر، ﴿لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ﴾ [الحشر: 21]. وما يدريك ما تأثير هذه الآيات في هذا الشخص؟ هذا الشخص قد يتغير، قد ينقلب، قد يفيد الدين بأشياء أنت لا تتخيلها. الأثر المشهور، وإن كان فيه ضعف سندًا، لكن تناولته السير، نعيم بن مسعود لما قال له: "خذل عنا ما استطعت". أنت وما يدريك ماذا سيفعل في الأحزاب؟ نعيم بن مسعود كان ربنا يجعله سببًا في حل أزمة رهيبة في غزوة الأحزاب. أنت ما يدريك اللي قدامك ده ممكن يعمل إيه؟ فكلمة بتعرف الداعية أنه لا يعتمد على تقييمه، وأن ما ياخدش التقييم الابتدائي اللي بيشوفه من الأول، أول ما بيتعرض لشخص غصبًا عن الإنسان بيعمل تقييمًا ابتدائيًا لشخص، وأنه ممكن غصبًا عنه كمان يبدأ يصنفه، ودي من الأخطار للأسف التي وقعنا فيها وأدت إلى التحزبات والتفرقات. أنت وما يدريك إيه اللي هيحصل جواه لما يتعرض إلى آيات القرآن؟ أنت دورك تعريض الناس لآيات القرآن، ﴿يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ﴾ [آل عمران: 164] ده دورك، أنت هو ما يدريك إيه اللي هيحصل منه؟ ليه تقول لا ده؟ ربنا بيقول على الكافر: "أجيره حتى يسمع كلام الله"، حتى يتعرض لهذا النور، ثم وما يدريك ماذا سيحدث بعد هذا؟ فربنا بيقول للنبي ﷺ: ﴿وَمَا يُدْرِيكَ﴾.
إيه اللي هيحصل لما يتعرض لآيات القرآن؟ حاجة من اثنين: ﴿لَعَلَّهُ يَزَّكَّىٰ * أَوْ يَذَّكَّرُ فَتَنفَعَهُ الذِّكْرَىٰ﴾ [عبس: 3-4]. المرحلة الأعلى، ودي اللي بدأ بيها، وده اللي كان ابن أم مكتوم أهلًا لها رضي الله عنه، أنه يتزكى. التزكي ده عبارة بعد ما تفاعل مع آيات القرآن تفاعلًا حقيقيًا، وتطهرت النفس ونمت النفس. التزكي ده فيه نماء وطهارة. الزكاة فيها معنيان، وكنا ذكرنا ده في سورة النازعات؛ الزكاة فيها معنيان: النماء والطهارة، وده أعلى حاجة تحصل لما الإنسان يتعرض للقرآن، ودي نفس الكلمة التي جاءت لما ربنا برضه قال لسيدنا موسى: ﴿اذْهَبْ إِلَىٰ فِرْعَوْنَ إِنَّهُ طَغَىٰ * فَقُلْ هَل لَّكَ إِلَىٰ أَن تَزَكَّىٰ﴾ [النازعات: 17-18]. فإذا كان ربنا بيقول لسيدنا موسى روح قول لفرعون: ﴿هَل لَّكَ إِلَىٰ أَن تَزَكَّىٰ﴾، أنت وما يدريك! ابن أم مكتوم هو هيتزكى وهو مسلم أصلًا، يزداد في التزكي، فهنا ربنا بيقول: ﴿وَمَا يُدْرِيكَ لَعَلَّهُ يَزَّكَّىٰ﴾.
طيب افرض مش هيتزكى؟ يعني إيه مش هيتزكى؟ افرض إيمانه مش هيزيد؟ طيب أنا أكلم واحد ليه وفي احتمال أن إيمانه ما يزيدش؟ الاحتمال الثاني أنه يتذكر. إيه الفرق بين التزكي والتذكر؟ التذكر المعلومة في الذهن لسه ما غيرتش في القلب، لكن هي لسه معلومة جواه، المعلومة دي بتفضل في عقله ممكن تنفعه قدام في يوم من الأيام، أو عشان كده ربنا قال: ﴿أَوْ يَذَّكَّرُ فَتَنفَعَهُ الذِّكْرَىٰ﴾؛ يعني ممكن تنفعه في المستقبل. يعني مثلًا أنت كلمت واحد عن الأثر الدنيوي للدين، وعن الدار الآخرة، وعن موت الفجأة، وعن حسن الخاتمة وعن سوء الخاتمة، الكلام بتاعك ما توغلش إلى القلب، ما خلوش وهو قاعد قدامك ياخد قرار الآن بترك المعاصي والالتزام، لا، المعلومات لسه ما توغلتش للقلب، ما وصلناش لمرحلة التزكي. المعلومة في مرحلة التذكر، لسه يقوم الشخص ده ياخد المعلومة بتاعتك ويمشي ما يتغيرش، فأنت معتقد: "أنا ضيعت وقت معاه"، "أنا الولد ده ما فيش منه أمل"، "أنا كلمته كتير". المعلومة دي لسه جواه، يوم يموت له واحد صاحبه، والده يمرض، يخسر فلوس، يحصل موقف؛ يتذكر هذه المعلومات فيتزكى. فيأتي القدر بتقدير من الله عز وجل الوقت الذي يحدث فيه التزكية. فكلمات الداعية هي عبارة عن طرقات على جدار الغفلة، لا تتعجل؛ يعني لما تيجي تضرب على جدار الغفلة بتاع واحد وما يتكسرش، اعلم أن بإذن الله هذه الطرقات على الأقل هزت الجدار، خلت الجدار هش، الخبطة اللي بعدها التي ممكن ما تجيش منك، ممكن تيجي من الأقدار، ممكن تيجي من داعية ثاني، ممكن تيجي من موقف، يعني من الدنيا تمطر في وقت عجيب أن هو يتوه ويدعي ربنا مثلًا، أنه يحصل له موقف عجيب، فأنت لا تدري ماذا سيحدث من كلماتك. فالداعية لا ييأس أبدًا مما يلقيه من كلمات، ﴿وَمَا يُدْرِيكَ﴾.
المرحلة التزكي دي المرحلة الأعلى، المرحلة الأقل ﴿أَوْ يَذَّكَّرُ فَتَنفَعَهُ الذِّكْرَىٰ﴾. وبعض العلماء كان فرق ما بين "يتذكر" و"يَذَّكَّر"، قال "يتذكر" دي المعلومات التفصيلية، يعني واحد مركز، "يَذَّكَّر" معلومات مجملة، يعني كمان حتى لو هياخد كلامك مجمل مش مشكلة. ﴿أَوْ يَذَّكَّرُ فَتَنفَعَهُ الذِّكْرَىٰ﴾ أي فتنفعه في المستقبل هذه الذكرى. إذن دور الداعية أن يعرض الناس لآيات القرآن، ده دور الداعية: ﴿يَتْلُو عَلَيْهِمْ آيَاتِنَا﴾، بعد تلاوة الآيات يحدث التزكية، بعد التزكية يحدث التعليم: ﴿وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ﴾ [الجمعة: 2]. هذه المراحل: تلاوة الآيات تؤدي إلى تزكية تؤدي إلى دخول العلم بقلب طاهر، فعندئذ ينفع العلم. فربنا بيقول له: ﴿وَمَا يُدْرِيكَ لَعَلَّهُ يَزَّكَّىٰ * أَوْ يَذَّكَّرُ فَتَنفَعَهُ الذِّكْرَىٰ﴾.
إذن إحنا بنقول أحيانًا تقييم الداعية بيطلع خطأ، ويقيم أن الشخص ده مش هيبقى في منه أمل، لكن ربنا بيقول لك: ﴿وَمَا يُدْرِيكَ﴾، قاعدة مهمة جدًا عند الدعاة، يُقال لهم: ﴿وَمَا يُدْرِيكَ لَعَلَّهُ يَزَّكَّىٰ﴾. وكان المشهور أيضًا في السير أن كان الصحابة لما يمروا على عمر بن الخطاب في الجاهلية يقولون: "لو أسلم حمار الخطاب ما أسلم عمر"، وأسلم عمر رضي الله عنه. وكان.
ثاني واحد في الأمة بعد سيدنا أبو بعد النبي صلى الله عليه وسلم. طيب، فربنا بيقول له: ﴿فَأَنتَ لَهُ تَصَدَّى﴾. يعني طيب، الثاني ده أنت بتختاره على أساس إيه؟ ده واحد استغنى، ودي أكتر صفة تخلي الإنسان ما يستفيدش من كلامك، المستغني. لأن المفتقر إلى آيات الله عز وجل، لذلك القرآن دايماً من أهم طلقات القرآن على القلب الغافل أن يبين أماكن الضعف عند النفس البشرية؛ يجيب مثلاً الإنسان ويحطه في نص البحر ويقول له: أنت هنا ضعيف، يذكر الإنسان بلحظة الوفاة ويقول له: أنت هنا ضعيف، يذكر الإنسان: ﴿جِئْتُمُونَا فُرَادَىٰ﴾ [الأنعام: 94] يوم القيامة يقول له: أنت هنا ضعيف، يذكر الإنسان وهو على فراش المرض ويقول له: أنت هنا ضعيف.
فالقران يذكر الإنسان بلحظات الضعف حتى يحتاج إلى الله: ﴿يَا أَيُّهَا النَّاسُ أَنتُمُ الْفُقَرَاءُ إِلَى اللَّهِ وَاللَّهُ هُوَ الْغَنِيُّ﴾ [فاطر: 15]. أنت محتاج لربنا، طب اللي مستغني يقول لك: أنا مش محتاج الدين، مش محتاج، أنت هتقعد تكلمني عن إيه؟ الدين هيعمل لي إيه في الدنيا أو يوم القيامة؟ أنا مش محتاج، خلاص أنا معايا، مش محتاج أي حاجة. فالمستغني ده لن ينفعه ما تقول له من كلام: ﴿فَأَنتَ لَهُ تَصَدَّى﴾. فربنا بيقول للنبي صلى الله عليه وسلم: أنت رايح للمستغني الذي ظن نفسه غنياً، أو ظن أن ما معه سينفعه؟ ﴿فَأَنتَ لَهُ تَصَدَّى﴾ أنت اللي المفروض الأولي بيك أنك تروح للثاني، فانت له، كلمة له دي يعني كأنك مفرغ نفسك عشانه.
طيب، أنت فرغ نفسك عشان ده ليه؟ ﴿فَأَنتَ لَهُ تَصَدَّى﴾. قيل الصد أما جاي من كلمة العطش؛ يعني تفضل تبذل مجهود معاه لغاية كأنك واقف لما تعطش أو تتكلم معاه لما تعطش، أو من الجبل أنت تقف له كالجبل؛ يعني أنت هتفني عمرك وهتتعب وهتعطش وهتقف، كل ده عشان شخص مستغني؟ لا، مش دي المعايير اللي ربنا يورثها، ده شخص استغنى، فانت بتديه على قدر استغنائه، لكن لما يتعارض المستغني مع المقبل، لابد أن تختار المقبل. وهذا معيار شرعي ذكرته السورة بوضوح، عشان ما حدش يجي يقول: لا، اصل لو المستغني اتبعني وده مش تبعي أنا أختر، أبداً. دي معايير شرعية ستسأل عنها يوم القيامة، الدعاة علمهم الله عز وجل من فضله: ﴿لَا عِلْمَ لَنَا إِلَّا مَا عَلَّمْتَنَا﴾ [البقرة: 32]. هم مش أحرار يعلموا مين، هم مش أحرار يضحكوا في وش مين ويكشروا في وش مين، الداعية سيسأل زي ما قلنا ربنا قال: ﴿أَأَنتَ قُلْتَ لِلنَّاسِ﴾ [المائدة: 116]. الداعية سيسأل عن هذه، عن كلامه، عن خطواته، عن حركاته، سيسأل عن هذا، فلابد أن يكون له إجابة؛ لماذا فعل هذا ولماذا لم يفعل هذا؟ لماذا فعل ذلك ولماذا لم يفعل ذلك؟ فربنا بيقول له: ﴿فَأَنتَ لَهُ تَصَدَّى﴾.
وبعدين الكلمة بقى، ظننا في غالب الدعاة اللي بيعمل كده مش الحرص على المال، طبعا النبي صلى الله عليه وسلم هنا الحرص على إيمان هؤلاء، ولا يخلد هؤلاء في جهنم. طب بعض الدعاة اللي ممكن يفضل الغني المعرض على الفقير المقبل؟ يا جماعة، هنا بعض الناس يقول لك ايه: يبقى نطلع بقاعدة هنا أن الفقير دايماً مقدم على الغني. القضية هنا مش قضية غني وفقير، القضية هنا قضية إقبال وإعراض، أصل بعض المفسرين قال استغنى أي بالمال. القضية هنا مش أن دايماً القرآن بيقول لك لابد أن تفضل الفقير على الغني، طب أفرض غني مقبل وفقير معرض؟ أنا أختر المقبل، ولو عند التعارض أنت تختار المقبل. ربنا هنا قال استغنى، جاب عكسها، ما قالش فقير؛ لما نجي نشوف السورة بتقول إيه: ﴿فَأَنتَ لَهُ تَصَدَّى * وَمَا عَلَيْكَ أَلَّا يَزَّكَّى * وَأَمَّا مَن جَاءَكَ﴾ [عبس: 6-8] ما قالش وأما الفقير، قال: ﴿وَأَمَّا مَن جَاءَكَ﴾ يبقى جاءك دي عكس استغنى، يبقى استغنى ده أداك ضهره ومشي. ﴿فَلَعَلَّكَ بَاخِعٌ نَّفْسَكَ﴾ [الكهف: 6] على إيه؟ هم مش موجودين على آثارهم، هم مشيوا، طب هم مشيوا خلاص، هم عايزين يسمعوا؟ هتتعب نفسك عشانهم ليه؟ اهتم بالمقبل، باللي جاي طالباً، حتى لو أنت معتقد، ده طبعا بالنسبة للداعية مش بالنسبة للنبي صلى الله عليه وسلم، حتى ده معتقد طب ده هيعمل لي ايه المعرض الغني ده؟ لو التزم أو لو أسلم ده ممكن يفتح ويصرف فلوس، إنما الفقير اللي جاي ده هيعمل إيه؟ فربنا يقول لك: ﴿وَمَا يُدْرِيكَ﴾ [عبس: 3].
فربنا هنا بيقول للنبي صلى الله عليه وسلم: ﴿فَأَنتَ لَهُ تَصَدَّى﴾. كلمة بقى زي ما نقول، ظننا في غالب الدعاة إن شاء الله أن هو غرض نشر الدين، وأنه يبقى يعني قلبه محروق أن ده ما يسلمش، أو قلبه محروق أن ده ما يلتزمش، فربنا بيشيل الحرش ده؛ لأن أحياناً أن الإنسان يكلف بما لا يطيق أمر جديد عليه، فربنا بيقول له: وما عليك، أنت مش هتتحاسب على ده، ﴿وَمَا عَلَيْكَ أَلَّا يَزَّكَّى﴾. كلمة دي ممكن بالنسبة للداعية تعمل له توازن نفسي رهيب؛ يعني ده أحد الأدعية اللي بيدعيها المؤمنون: ﴿رَبَّنَا وَلَا تُحَمِّلْنَا مَا لَا طَاقَةَ لَنَا بِهِ﴾ [البقرة: 286]. فانت أحياناً الداعية يحمل هو بقى اللي يحمل نفسه ما لا طاقة له به، يحمل نفسه أنه ملزم أن الشباب كله يلتزم، يحمل نفسه أن كل الناس دي لازم تخش في دين ربنا، فيبقى متوتر نفسياً ويضطر أنه يتخلى عن أشياء من الثوابت، ويضطر أنه يبدل ويغير. طب أنت أصلاً ربنا ما أمركش بكده؛ يعني أنت ربنا ما قالكش تعمل كده، ليه تحمل نفسك ما لا تطيق؟ فالكلمة دي تعمل توازن، ربنا بيقول لك: أنا ما فرضتش عليك كده، ﴿وَمَا عَلَيْكَ أَلَّا يَزَّكَّى﴾. أمال اعمل إيه يا رب؟ اعمل إيه طيب؟
﴿وَأَمَّا مَن جَاءَكَ يَسْعَى﴾ [عبس: 8]. هو ده اللي تلتفت ليه، ﴿وَأَمَّا مَن جَاءَكَ﴾ هو اللي جاي برجليه، جاءك. وبعدين مش جاي بس، ده جاي يسعى، ده جاي بذل مجهود، كيف تفضل من استغنى على من جاءك يسعى؟ ﴿وَأَمَّا مَن﴾ شوف المعايير الربانية بقى اللي بتوضح الأمور، مش قضية غني وفقير، ﴿وَأَمَّا مَن جَاءَكَ يَسْعَى * وَهُوَ يَخْشَى﴾ [عبس: 8-9]. جميلة قوي كلمة وهو يخشى؛ قيل يخشى الله، وقيل يخشى أن تعرض عنه، وقيل... طب لو إحنا خدنا القول بأنه يخشى الله، طب ازاي هو جاي للنبي صلى الله عليه وسلم ويخشى الله؟ دي عاملة بالضبط مثل قول الله عز وجل، وتشوف ده فقه الصحابة، صحابة بقى أنه كان بيرتبط بالنبي صلى الله عليه وسلم لكن قلبه معلق بالله، ربنا بيقول إيه: ﴿قَدْ سَمِعَ اللَّهُ قَوْلَ الَّتِي تُجَادِلُكَ فِي زَوْجِهَا وَتَشْتَكِي إِلَى اللَّهِ وَاللَّهُ يَسْمَعُ تَحَاوُرَكُمَا﴾ [المجادلة: 1]. يعني هي بكلم النبي صلى الله عليه وسلم، لكن الشكوى في الحقيقه إلى الله، قلبها متعلق، قلبها متعلق بالله مش حتى مش بالرسول صلى الله عليه وسلم. ﴿تُجَادِلُكَ فِي زَوْجِهَا وَتَشْتَكِي إِلَى اللَّهِ﴾ برده ده جاي للنبي صلى الله عليه وسلم، لكن عارف أن الهداية بيد الله عز وجل، وعارف أن ربنا قال للنبي صلى الله عليه وسلم: ﴿إِنَّكَ لَا تَهْدِي مَنْ أَحْبَبْتَ﴾ [القصص: 56]. هو جاي وعارف أن الهداية بيد الله وهو مأمور أن يذهب للنبي صلى الله عليه وسلم، فهو عمل اللي ربنا قال له عليه، وده لازم يبقى في شعور أي مدعو أو أي شخص طالب الهداية ورايح لعالم أو رايح لداعية أو رايح لشخص يعلم أن عنده خير، ما يبقاش قلبه متعلق بيه أبداً.
لابد أن يعرف وهو رايح للعالم: يا عبادي كلكم ضال إلا من هديته، يا عبادي كلكم جائع إلا من أطعمته. لابد أن يعرف أن قلبه يتعلق بالله مش بالشخص، واللي هيروح لعالم أو لداعية وقلبه يتعلق بيه قد يحرم بسبب ذلك أن قلبه مش متعلق بالله سبحانه وتعالى. لابد أن تتعلق القلوب بالله سبحانه وتعالى: ﴿وَأَمَّا مَن جَاءَكَ يَسْعَى * وَهُوَ يَخْشَى * فَأَنتَ عَنْهُ تَلَغَّى﴾ [عبس: 8-10] فانت أنت. يعني الفعل ده ما كان ينبغي أن يصدر منك، أنت: ﴿فَأَنتَ عَنْهُ تَلَهَّى﴾. أو معناها فانت عنه تلهى، أي إذا تلهيت أنت عنه فمن سيكون له؟ لو الداعية انشغل عن المقبلين بالمعرضين، من سيعلم المقبلين؟ من سيعلمهم أمر دينهم؟ من سيزكيهم؟ من سيتلو عليهم الآيات؟ من يعلمهم الكتاب والحكمة؟ إذا انشغل الدعاة عن المقبلين وانشغلوا بالمعرضين، إذا انشغل الدعاة... لما ربنا بيقول للنبي صلى الله عليه وسلم: ﴿فَإِنِ اسْتَطَعْتَ أَن تَبْتَغِي نَفَقًا فِي الْأَرْضِ أَوْ سُلَّمًا فِي السَّمَاءِ﴾ [الأنعام: 35]. هم عمالين يطلبوا آيات وآيات وآيات. طب لو أنت انشغلت بنفق الأرض وسلم السماء، إذا ماذا؟ إذا انشغل الدعاة بنفق الأرض وسلم السماء، لو الدعاة قعدوا ينشغلوا ويعملوا حركات عشان المعرضين وسايبين المقبلين، من سيعلم المقبلين؟ ﴿فَأَنتَ عَنْهُ﴾ عن ده بيسموه حرف التجاوز؛ يعني أنت بعيد عنه وسايبه ليه؟
والكلمة بقى العجيبة قوي في السورة اللي المفسرين حتى وقفوا قدامها بحرج وهم بيفسروها، كلمة تلهى. تخيل الله عز وجل يقول للنبي صلى الله عليه وسلم: أنت عنه تلهى، يعني كأن الداعية لو فعل حاجة ليست من الأولويات وترك الأولى له في الدعوة يخاطب بلفظ تلهى. وكان الانشغال بالمعرض وترك المقبل ربنا سماه تلهّياً، فليحذر الداعية وليحذر طالب العلم! أحياناً طالب العلم ينشغل أنه يتعلم أشياء الواقع مش محتاجها، والواقع محتاج أشياء معاناة ويتعلمها، ده نوع من أنواع التلاهي. الداعية ينشغل بأمور ليست في واقعه، ده نوع من أنواع التلاهي. لابد أن يحذر الداعية، وأن يحذر العامل لدين الله، وأن يحذر المنفق اللي عايز يصرف الفلوس، مش القضية أنك تصرف فلوس وخلاص، لازم تعرف أنت الفلوس دي بتتصرف في المكان الصح ولا لا: ﴿أَجَعَلْتُمْ سِقَايَةَ الْحَاجِّ وَعِمَارَةَ الْمَسْجِدِ الْحَرَامِ كَمَنْ آمَنَ بِاللَّهِ وَالْيَوْمِ الْآخِرِ وَجَاهَدَ فِي سَبِيلِ اللَّهِ ۚ لَا يَسْتَوُونَ عِندَ اللَّهِ﴾ [التوبة: 19-20]. أنك تعمل أعمال صالحة في وقت الدين محتاج أعمال أخرى، ده تلاهي. إذن القضية مش أنك بتعمل عمل أي خير وخلاص، لا، في معايير لضبط الأولويات بتاعتك، فقد يسمى فعلك لنصره الدين في وقت من الأوقات إذا أعرضت عما هو أولى، قد يسمى تلاهياً.
فانت عنه تلهى، وفي نقطة هنا قد تكون صعبة بس أنا هقولها على عجالة، فعل تلهى ده بعض العلماء قال: ده فعل بيسموه من أفعال المطاوعة. يعني ايه أفعال المطاوعة؟ ده أفعال المطاوعة أن الفعل ده بالرغم أن الفاعل هو اللي عمل الفعل، لكن الفعل ده ما حصلش لوحده، ده في فاعل آخر هو اللي خلى الفعل ده يحدث، فبنسمي أن الفاعل ده طاوع الفاعل الأولاني. يعني ايه الكلام ده؟ عشان أفهم؛ يعني لما تخيل أجيب لكم مثال بسيط صغير: لما يجي ابنك الصغير يقول لك: الحق يا بابا ده الكوباية انكسرت، انكسر. انفعل ده صيغة من صيغ أفعال المطاوعة، فانت هقول له: مين اللي كسرها؟ يعني الكوباية ما انكسرتش لوحدها، ده أكيد الكوباية طاوعت فاعل آخر، بالرغم أن انكسر الكوب، الكوب ده فاعل في إعراب لغة: ﴿انْكَسَرَ الْكُوبُ﴾ الكوب ده فاعل، لكن بنقول فعل ده فعل مطاوع. يعني إيه فعل مطاوع؟ يعني في فاعل آخر هو اللي خلى الفعل ده يحصل، فبنقول انكسر الكوب بالرغم أن الكوب فاعل، لكن مين الفاعل الحقيقي؟ فتقول الولد: انطق، ما تستهبلش، قول الحقيقة، مين اللي كسر الكباية؟ الكباية ما اتكسرتش لوحدها.
فكذلك دي أفعال مطاوعة، أن الفعل ده ما حصلش لوحده، زي: ﴿إِذِ انْبَعَثَ أَشْقَاهَا﴾ [الشمس: 12] وشرحناه ده، هتلاقوه إن شاء الله في شرح في خطبة في سورة الشمس، انبعث أشقاها هو ما قامش لوحده، ده هم اللي قعدوا يسخنوه عشان يقوم يقتل الناقة فهو اتحرك. فكلمة تلهى مش معناه إيه معناها أن أهل الباطل يحاولون أن يقوموا بإلهاء العاملين لدين الله، يعني مش النبي صلى الله عليه وسلم هو اللي كان عامل كده من نفسه، هو لا، ده هم كانوا قاصدين يشغلوه عن الفقراء، هم قاصدين يشغلوه عن المعرضين، هم قاصدين يشغلوا الداعية، ودايماً يعملوا كده، أن أهل الباطل يحاولوا يقوموا باصطناع أشياء وأفعال تلهي الداعية. الداعية مثلاً يبقى بياخدوا معركة بين الحق والباطل، يقوموا يجيبوا له شبهات يخليه ينشغل بها، زي ما احنا شايفين دلوقتي الشبهات؛ عذاب القبر والبخاري وحاجات قتلت بحثاً وترد عليها، أنت ماشي في قضية يشغلك عنها، ده نوع من أنواع التلاهي، أو يخترع لك قضية يشغلك بها، أو يلقي عليك تهم ويتهمك في عرضك ويتهمك بأشياء معينة، هو كل ده عايز يلهيك.
فكذلك هم عايزين يلهوا، هم عارفين أن حتى هؤلاء الفقراء لو تركوا وتعرضوا لكتاب الله عز وجل هيتغير أحوالهم، لكن هم عايزين يلهوك عن ده؛ هل كانت مشكلة أغنياء قريش وجود الفقراء هي دي كانت المشكلة الوحيدة في إسلامهم؟ يعني لو الفقراء كانوا يمشوا وكانوا هيسلموا فعلا هي دي لكن لا، مش دي المشكلة، ده هو عايزين يلهوا الداعية عن دعوته. ﴿فَأَنتَ عَنْهُ تَلَهَّى﴾ فربنا بيقول له: كلا. هذه الكلمه يعني الشديدة تقal للداعية اللي بيقدم أشياء ليست هي من الأولويات. نعم، الداعية لابد أن يكون على حذر في خطواته وفي كلماته، وأن يزن أفعاله بميزان شرعي.
﴿كَلَّا إِنَّهَا تَذْكِرَةٌ﴾ [عبس: 11] أي أن الوظيفة تذكرة، أو أن الدعوة تذكرة، أو أن القرآن تذكرة، أياً كان، أن الدور بتاعك أنت مذكر، أنت مش مسئول عنها أو عندها. ﴿وَمَا عَلَيْكَ إِلَّا ذِكْرَى﴾ [الحجر: 74] أنت وظيفتك حتى لا تنساها في مشاغل الحياة، ﴿إِنَّهَا تَذْكِرَةٌ * فَمَن شَاءَ ذَكَرَهُ﴾ [عبس: 11-12]. طيب هذه التذكرة وهذه الآيات موجودة فين؟ ﴿فِي صُحُفٍ مُّكَرَّمَةٍ * مَرْفُوعَةٍ مُّطَهَّرَةٍ * بِأَيْدِي سَفَرَةٍ * كِرَامٍ بَرَرَةٍ﴾ [عبس: 13-16]. هنا ربنا وصف الصحف بثلاث صفات، ووصف حاملي الصحف بثلاث صفات؛ وصف الصحف بأنها مكرمة.
مرفوعة مطهرة، ووصف حاملي الصحف بأنهم سفرة كرام بررة. وهذه الصحف بأيديهم الصحف دي قيل مع الملائكة. وأنه ممكن يبقى الوحي اللي مع الملائكة أو الصحف اللي في أيدي الملائكة اللي بيكتبوا فيها الأعمال أو الصحف دي على بعض الاقوال القرآن المصحف يعني الآيات كتاب الله عز وجل اللي موجودة بأيدي الصحابة، فكلمة سفرة كرام بررة أما ليقصد بها الملائكة أو يقصد بها الصحابة، وكلمة الصحف أما يقصد بها الصحف اللي مع الملائكة سواء اللي فيها الوحي أو فيها أعمال العباد أو آيات كتاب الله عز وجل، أيا كان هذه الصحف اللي هي التذكرة اللي هي الوحي.
ربنا بيقول: هذه الآيات مكتوبة في صحف لو قلنا إن الآيات ابتداء نزلت إن دي الملائكة فكذلك يقاس عليها العاملين لدين الله عز وجل من أهل الأرض، فربنا وصف في الصحف اللي هي آيات القرآن أنها مكرمة فلابد ألا يعني أن هي لازم تكرم ما تنزلهاش يعني ما يبقاش مثلا في استخفاف بايات القرآن ما يحصلش مثلا إن هم يعملوا حاجة فانت مضطر انك أنت تقول القرآن بطريقة معينة عشان تراضيهم، لا القرآن يظل مكرم ما تخليش ضغطهم عليك يخليك تخليك تغير في طريقة عرضك للقرآن.
أنت مثلا عايز تغير في طريقة عرضك للقرآن لا عشان تراضيهم لابد أن تحافظ على مستوى التكريم الذي ارتضاه الله عز وجل لآياته مرفوعة هم ما أرضوش يطلعوا ما تنزلش ما تنزلش أنت الآيات ما تحقرش أنت من الآيات ما تغيرش أنت في الآيات، مكرمة مرفوعة مطهرة الثلاث أوصاف تحس إن فيها رفعة هو اللي ما رضوش يطلع أنت ما أنت مش معنى ما تنزلوش مش قصدي انك أنت ما تنزلش للناس لكن لازم تنزل للناس لكن لا تغير في الآيات لا تبدل في الآيات الآيات ستظل عزيزة عشان كده ربنا بيقول: فمن شاء ذكره اللي عايز ويقبل ربنا مش هيمنعه لكن لابد أن يقبل هو اللي يجي أما من جاءك.
طيب حاملي بقى الصحف في أيدي سفرة كرام بررة دي لابد الداعي يتحلى بها، سفرة يعني إيه؟ السفير ده من معناه الكشف السفرة المكشوفة، وقيل إن التفسير جاي من كلمة السفر أيا كان ده يعني كشف عن معاني الآيات فالسفرة اللي بيكشفوا للناس عن معاني القرآن واللي بيوضح للناس عن معاني الدين يبقى أول وصف، وخد بالك جت إن هي بأيديهم بأيديهم يعني تمكن صحف مكرمة مرفوعة مطهرة بأيدي بأيدي يعني الباء دي الملاصقة أن على طول حاملين لكتاب الله لا يدعون إلا بكتاب الله عز وجل.
على طول هو حامل كتاب الله يتحرك بكتاب الله عز وجل بين الناس مش بيتحرك بكلامه لا اللي بينشره أهم حاجة بينشرها بين الناس كتاب الله عز وجل، بأيدي سفرة طيب هو معاه القرآن بيتحرك للناس بيعمل إيه؟ يبين للناس معاني الوحي دي سفرة كرام كريم مش بخيل أو كرام يعني لا يتدنس بأخلاق الناس زي قول الله عز وجل كده: ﴿وَإِذَا مَرُّوا بِاللَّغْوِ مَرُّوا كِرَامًا﴾ [الفرقان: 72] أي لا يتدنس لو في أخلاق سيئة ما بيتغيرش ما بيخليش أخلاق الناس تؤثر على أخلاقه.
فما يقولش مثلا الناس عاملتني وحش أنا هعاملهم وحش ما بيقوليش ما بيقوليش سلام عليكم أنا مش هقول له سلام عليكم، لما والد سيدنا إبراهيم قال له: ﴿لَئِن لَّمْ تَنتَهِ لَأَرْجُمَنَّكَ وَاهْجُرْنِي مَلِيًّا﴾ [مريم: 46] وهو عمال يقول له قبلها في سورة مريم أربع مرات يا أبت يا أبت يا أبت يا أبت وفي الآخر بيقول له هرميك بالطوب، سيدنا إبراهيم ما قالوش تصدق أنا غلطان أكن أنا عمال أقول لك يا أبت يا أبت وانت تقول لي ترميني بالطوب ده أنا غلطان أنا لا ما قالوش كده قال سلام عليك، هذا الإنسان الكريم الذي لا يتاثر بأخلاق الناس ولا يعني يتدنس ويتاثر بأخلاقهم.
وده أحد معاني قول الله عز وجل في الداعي: ﴿وَثِيَابَكَ فَطَهِّرْ﴾ [المدثر: 4] لازم دائما ثيابك وأخلاقك تظل وباطنك يظل طاهر لا يتاثر أبدا بأخلاق الناس، كرام بررة البررة المتسع في فعل الخير للناس، لذلك لما ربنا قال إن الأبرار في سورة الإنسان إن الأبرار يشربون من كأس كان مزاجها كافورا قال بيعملوا إيه من أفعالهم؟ ﴿وَيُطْعِمُونَ الطَّعَامَ عَلى حُبِّهِ مِسْكِينًا وَيَتِيمًا وَأَسِيرًا﴾ [الإنسان: 8] فده متوسع في أعمال الخير حتى لأسير الكافر يطعمه.
فإذا صفات الداعي أنه بيديه القرآن لا يتحرك إلا بالقرآن، رقم اثنين يوضح ويفسر ويسفر للناس عن معاني القرآن سفرة كرام لا يتاثر بأخلاقهم ويكون كريم معهم بررة يتوسع في فعل الخيرات سواء في الطاعات أو فعل الخير مع الناس دي صفات الداعي اللي يتحرك بين الناس، ثم بعد ذلك ما عليه إلا يزكى أحد خلاص أنت هنا عملت اللي عليك لو أنت أثرت في الأشياء دي تحاسب عليها لكن أنت تحليت بهذه الأخلاق وخليت الصحف بإيديك وبقيت من السفرة الكرام البررة وقيل ده قلنا وصف للملائكة حاملي الوحي وده كذلك هيبقى وصف لحامل الوحي في الدنيا لابد أن تتحلى بهذه الأخلاق.
تحليت بهذه الأخلاق وانتشرت بين الناس ما عليك إلا يزكى أحد زي ما أم المؤمنين خديجة قالت للنبي صلى الله عليه وسلم ما تخافش كلا والله لا يخزيك الله أبدا طالما بتحافظ على الصفات دي أنت ما ما تخافش استمر واثبت ولو اجتمع عليك أهل الأرض بأيدي سفرة كرام بررة، ثم بعد كل الوصف ده فربنا بيقول إن هيظل ناس معرضة مهما عملت والله لو أنت بقيت بقى بإيديك الصحف وسفرة وكرام بررة هيظل في ناس معرضة، فربنا بيقول: ﴿قُتِلَ الْإِنسَانُ مَا أَكْفَرَهُ﴾ [عبس: 17] في ناس بالرغم من كل هذا ستحافظ على الإعراض والعياذ بالله ولن تقبل أن تتزكى.
فربنا بيقول: قتل الإنسان ما أكفره، ما أكفره فيها معنيين أي ما أشد كفره ما تعجب أو ما استفهامية ما الذي يجعله يكفر إيه اللي مخليه يكفر زعلان من إيه مش مقتنع بإيه أو تعجب أبعد كل هذا يكفر ما أشد كفره، طبعا قتل قالوا بعد له عنا طيب وليه قتل مش بعد له عنا بعض العلماء حاول يفسر فجمع كلمة قتل في القرآن جت في أربع مواضع في الذاريات وفي المدثر وفي عبسة وفي البروج قتل، وحاول يجمع إيه المعنى المشترك وقال قتل دي اللعنة الدائمة مش أي لعنة كان ده جهد لبعض العلماء قتل الإنسان وما أكفره.
طيب المعرض ده من أي شيء خلق؟ معرض على إيه متكبر على إيه؟ بيذكره بأصله: ﴿مِنْ أَيِّ شَيْءٍ خَلَقَهُ * مِن نُّطْفَةٍ خَلَقَهُ فَقَدَّرَهُ﴾ [عبس: 18-19] ربنا هنا بيقول للإنسان جاب له قصة من أول أنت معرض على إيه أنت إيه اللي مخليك معرض، خدوا بالكم يا جماعة تذكير ربنا سبحانه وتعالى بالنعم على الإنسان كل سورة ليها وجهة بتأثر عليها وبتركز عليها هنجد هنا التركيز على قدرة الله المطلقة على الإنسان وأن الإنسان لا يخرج عن طوعه أن الإنسان لا يخرج عن قدرة الله يعني مدى قهر الله عز وجل للإنسان ده بالنسبة للصفات الأولانية.
لغاية كلا لما يقضي ما أمره وبعد كده النعم الثانية: ﴿فَلْيَنظُرِ الْإِنسَانُ إِلَى طَعَامِهِ﴾ [عبس: 24] هذا نوع آخر من النعم، يبقى تذكير قدرة الله على الإنسان وأن الإنسان لا يستطيع أن يخرج خارج هذه القدرة مهما أوتي من قوة لأن يخرج خارج هذه القدرة ونوع تاني من النعم من أول فلينظر الإنسان إلى طعامه، النوع الثاني من النعم بيركز على حاجتين على التنوع والكثره أن صببنا الماء صبا الكثرة والتنوع حبا وعنبا ونخلا وزيتونا تنوع وحدائق وغلبة وفاكهة وأبا.
فالنعم الثانية فيها حاجتين التنوع والكثرة والتذكير بالأولانية القدرة المطلقة التي لا يستطيع الإنسان أن يخرج عنها، وكأن هذه الآيات تحاصر الإنسان المعرض وكأن هذه الآيات لابد أن يستعملها الداعي مع الإنسان المعرض، يبقى الإنسان المعرض له خطاب والانسان المقبل له خطاب والانسان المتحير له خطاب والانسان المستضعف له خطاب والانسان المستكبر له خطاب، ده الانسان المعرض اللي مش عايز يسمع في أول السورة هو مستغني وده سر هيجينا وده سر تسمية يوم القيامة هنا باسم الصاخة.
إحنا اتكلمنا عن اسم الطامة ليه اسم الطامة وهيجي ليه اسم الغاشية يجي هناك اسم الصاخة التي تصم الآذان لأنه ما كانش عايز يسمع فهتيجي حاجة تخليها تسمع غصب عنه، طيب هنا نتكلم معه إزاي؟ تذكره أن أنت هترروح من ربنا فين؟ ربنا جابك من نطفة خلقك من نطفة فقدره يعني إيه قدره؟ ربنا قدر كل حاجة فيك، ربنا قدر طولك وشكلك وعرضك ولون عينيك وعمرك والطريقة والقلب لغاية أمتى والنفس وكل ده ربنا اللي قدره أنت لم تفعل شيئاً.
شوف أن أنت بتحاصر الإنسان أنت بتنكر إيه ده أنت كل حاجة ربنا اللي عملها فيك بتنكر إيه ده أنت أنت ما تقدرش تختار لون شعرك، أنت ما تقدرش تختار شكلك، أنت ما تقدرش أنت ما تقدرش تختار يوم ده حتى شوف الكلمة ثم السبيل يسره أنت ما تعرفش تنزل من بطن أمك لولا أن ربنا السبيل السر قيل خروج الإنسان السبيل مكان خروج الإنسان من الرحم ده لولا أن ربنا يسر ما كنتش نزلت ده اختيار الطبري.
وقيل السبيل يسر يعني طريق الهداية أو طريق الضلال منقول لابن كثير، لو قلنا سياق الآيات على اختيار الطبري يعني حتى أنت كنت نطفة ربنا خلاك بني آدم كيف تحولت النطفة لبني آدم؟ ومن الذي قدر هذه الأشياء؟ ربنا أنت ما عملتش حاجة كيف خرجت من بطن أمك؟ ربنا أنت ما عملتش حاجة أنت ما اخترتش أمتى تنزل ولا تعرف تنزل لوحدك ثم السبيل يسره.
وربنا هيختار أمتى تموت أنت لا تتحكم في معاد موتك أنت لا تستطيع أن تفعل ذلك: ﴿ثُمَّ أَمَاتَهُ فَأَقْبَرَهُ﴾ [عبس: 21] ربنا خلاك تبقى تحت الأرض قيل ده تكرمة وقيل ده مش بس تكرمة ده قهر للإنسان ربنا خلاك تتحط تحت الأرض ثم أماته فأقبره كان متوقع سياق الآيات ربنا يقول إيه؟ ثم السبيل يسره ثم أماته فأقبره ثم أنشره يعني يبعثه، لا تيجي كلمة ثم إِذا شاء ليه كلمة ثم إذا شاء؟ كان ربنا بيقول لك أنا هاسيبك ميت لغاية لما أشاء أنك تبعث فربنا يبعثك في الوقت الذي يشاء.
طيب أنت بتعمل إيه؟ ربنا اللي جابك من النطفة وربنا اللي قدر من وسط ملايين الحيوانات المنوية أن الحيوان المنوي ده هو اللي يوصل وربنا اللي قدر المواصفات وربنا اللي قدر البويضة وربنا اللي قدر الزمان والمكان والشكل وسبيل النزول ومعاد حياتك ومعاد موتك تقبر ثم يتركك إلى أن يشاء الله ثم يبعثك، طب أنت بعد كلا لما يقضي ما أمر بعد كل ده أنت لسه مش عايز تنفذ أمره؟ كلمة كلا لما يقضي ما أمر قيل من معانيها أي لما يقضي الإنسان اللي هنا الفاعل الإنسان كلا لما يقضي الإنسان ما أمره الله به يعني لسه ما عملش الطاعات الواجبة عليه.
يعني بعد ذكر هذه النعم اللي فاتت أنت ما عملتش الواجب عليك تجاه شكر هذه النعم أنت واجب عليك شكر نعم معينة أنت ما عملتوش، كلا لما يقضي ما وقيل كلا لما يقضي ما أمره يعني لسه الله عز وجل لم يشأ أن يبعثه الآن ويتركه الآن يعيش في الدنيا كلا لما، وده اختيار الإمام ابن كثير القول الثاني كلا لما يقضي ما أمر، فلينظر الإنسان إلى طعامه إيه علاقة الآيات دي باللي قبلها؟ في ناس قالوا إذا أراد الإنسان أن يقضي ما عليه من شكر نعمة الله عز وجل فعليه أن ينظر إلى نعم الله عز وجل.
فلينظر الإنسان إلى طعامه يبقى ربطها باللي قبلها قال كلا لما يقضي أمره أي لم يفعل الإنسان ما أمره الله عز وجل به من الشكر وإذا أراد الإنسان أن يشكر الله حق شكره فليفعل ماذا؟ فلينظر أي تدبراً فلينظر الإنسان إلى طعامه، خلاص وقيل إذا أراد أن يعظم الله حق قدره فلينظر الإنسان فليتامل في آيات الله، هنجد هنا الصورة جابت النظر في حاجتين النظر في آيات الله القرآن المتلوة اللي هي الصحف المطهرة والنظر في الكون آيات الله الكونية المرئية.
فالنظر في آيات الله المقروءة والنظر في آيات الله المنظورة الكون المنظور وكتاب الله عز وجل القرآن الكون والقرآن اللي عايز يعني يفعل ما أمر الله عز وجل عليه ما أمره الله عز وجل به فلينظر في القرآن وفلينظر في الكون: ﴿فَلْيَنظُرِ الْإِنسَانُ إِلَى طَعَامِهِ﴾ [عبس: 24] أن العظمة وعشان الوقت بقا أن صببنا الماء صبا الكثرة ثم شققنا الأرض شقا يعني هذه النبته لما طلعت مش هي اللي شقت الأرض، النبته الضعيفة منظر النبتة الخضراء الصغيرة وهي بتشق الطين وتطلع ربنا بيقول لك أنا اللي شقت لها ده مش ده مش هي اللي عملت أنا أن صببنا الماء صبا ثم شققنا نسب الله عز وجل الشق إليه.
ثم شققنا الأرض شقا، فانبتنا فيها حبا مين اللي دخل جوه وأنبت الحب حبا وعنبا وقضبا وزيتونا ونخلا وحدائق غلبة متكالبة متكاثفة مين اللي عمل الجنات؟ مين اللي عمل لك كل ده وحدائق غلبة وفاكهة وأبا ومش ليك أنت لوحدك متاعا لكم ولأنعامكم إيه؟ مين اللي عمل لك كل النعم دي؟ قلنا هنا النعم بتتميز بالكثرة والتنوع، فإذا جاءت الصاخة طالما هو مش راضي يجي بقى أما من جاءك يسعى هو ما رضيش يجي تاني المستغني، طيب أنت مش هتيجي الصاخة هي اللي هتيجي بقا فإذا جاءت الصاخة قلنا ليه.
اختيار الصخة هنا؛ لأن هو ما كانش عايز يسمع، كان رافض يسمع، فهنا إن ربنا بيقول له هتسمع غصب عنك بقى الصخة يوم القيامة. فإذا جاءت الصخة، هناك كان بيهرب من النبي صلى الله عليه وسلم، مش عايز يسمع، هيجي من اليمين يهرب من قرايبه.
هناك كان هربان من النبي صلى الله عليه وسلم، مستغني بإيه؟ مستغني بعشيرته، وهناك هيهرب من هذه العشيرة: ﴿يَوْمَ يَفِرُّ الْمَرْءُ مِنْ أَخِيهِ * وَأُمِّهِ وَأَبِيهِ * وَصَاحِبَتِهِ وَبَنِيهِ﴾.
في هنا سؤالين، السؤال الأول: ليه جه الترتيب ده؟ ليه بدأ بالأخ؟ وبعدين الأم والأب؟ وبعدين الزوجة والبنين؟ في حين في سورة المعارج جيت ترتيب عكسي. يعني هنا بدأ من الأبعد للأقرب، الأخ أقرب منه الأب والأم، أقرب منه الزوجة، أقرب حاجة للشخص الأولاد ده اللي بيحصل بعد الزواج. الترتيب ده بيبقى أخوك، وبعدين الأم والأب، وبعدين الزوجة، وأقرب حاجة ليك الأولاد. بدأ من الأبعد للأقرب.
نجد سورة المعارج العكس: ﴿يَوَدُّ الْمُجْرِمُ لَوْ يَفْتَدِي مِنْ عَذَابِ يَوْمِئِذٍ بِبَنِيهِ * وَصَاحِبَتِهِ وَأَخِيهِ * وَفَصِيلَتِهِ الَّتِي تُؤْوِيهِ * وَمَنْ فِي الأَرْضِ جَمِيعاً﴾. بدأ من الأقرب للأبعد. ليه هنا بدأ بالأبعد؟ هنا هو كأنه عايز يهرب، هو هنا عايز يهرب من أي حد، من أي علاقات، فبيبدا بالعلاقة الأبعد يكسرها؛ لأن لسه في فرصة، هو هنا فرصة الهرب.
هناك سورة المعارج فرصة الافتداء، يعني إيه؟ يعني تخيل واحد بيترمى في جهنم، خلاص بيقع، عايز يجيب أقرب حاجة جنبه في إيده ياخدها يرميها وينجو، فبيجب أثمن حاجة. بمعنى لو واحد بيغرق وقالوا له إيه: ادفع فلوس واحنا ننقذك، هيمد إيده على أغلى حاجة في صوته ويدفعها، هيمد إيده على أغلى حاجة، طب خدوا ده ونجوني. إنما ده لسه بيهرب، فبيبدا يهرب من أخوه، يلاقي أبوه أمه، يبدا يهرب من أبوه وأمه، يلاقي زوجته، وهنا الزوجة اتسمت صاحبة؛ لأن العلاقة بينهم كويسة، وبالرغم كده هيهرب منها، ويبدا يهرب من زوجته، حتى أولاده يبدا يهرب منهم.
هناك بيمد إيده على أقرب حاجة، عايز ينجو فيمد إيده على أغلى حاجة يعتقد أنه هينجو لما يقدم أغلى حاجة، فيقدم الأولاد ولسه ما فيش فايدة، يققدم الأخ ما فيش فايدة، يقدم.. ومن لطف التعبير هناك ما جابش الأب والأم، كان يعني حتى مراعاة الأدب مع الوالدين، حتى هناك في الافتداء، هنا الفرار ماشي أنت هتسيبهم، لكن هناك أنت هترميهم في جهنم، فربنا قال: ﴿يَوَدُّ الْمُجْرِمُ لَوْ يَفْتَدِي مِنْ عَذَابِ يَوْمِئِذٍ بِبَنِيهِ * وَصَاحِبَتِهِ وَأَخِيهِ﴾، ما ذكرش لفظ الأب والأم، لدرجة أنه هناك لو خلص ثروته كلها وما عادش غير.. ارمي العالم كله في النار بس أنجو، مش مشكلة، يتقال له نرمي الدنيا كلها في النار وأنت تنجو، يقول لك آه مش مشكلة.
لكن هنا هو لسه بيفر، وبعدين هنا ما قالش يفر من الأخ والاب والام، قال: يفر من أخيه، ربنا بيذكره بالعلاقة بتاعته، أخوك أنت هتهرب منه؟ آه ههرب منه، وأمك وأبوك هتهرب منهم؟ اهرب منهم، زوجتك التي صاحبتك في المشاكل تهرب منها؟ اه اهرب منها، أولادك اللي قطعة منك تهرب من اللي قطعة منك؟ اهرب منهم.
شوف اللي كان بيهرب من الموعظة والنصيحة الوقتي يهرب من أولاده وصاحبته وبنيه، ليه يهرب منهم؟ ﴿لِكُلِّ امْرِئٍ مَّنْهُمْ يَوْمَئِذٍ شَأْنٌ يُغْنِيهِ﴾. خد بالك من كلمة يغنيه وكلمة استغنى في الأول، في الدنيا كان مستغني، كان مشغول بالفلوس والأولاد، هناك مشغول في الآخرة عن الفلوس والأولاد، هناك: ﴿وَإِذَا الْعِشَارُ عُطِّلَتْ﴾، هناك: ﴿يَوْمَ يَفِرُّ الْمَرْءُ مِنْ أَخِيهِ﴾، في الدنيا كان مشغول بالأولاد والأموال عن الدين، هناك مشغول بشانه الخاص عن الأموال والأولاد، ﴿لِكُلِّ امْرِئٍ مَّنْهُمْ يَوْمَئِذٍ شَأْنٌ يُغْنِيهِ﴾.
في الآخر بينقسم الناس إلى فريقين: ﴿وُجُوهٌ يَوْمَئِذٍ مُّسْفِرَةٌ * ضَاحِكَةٌ مُّسْتَبْشِرَةٌ﴾. دول الدعاة إلى الله، دول العاملين لدين الله عز وجل، اللي بيسفروا للناس، الأسفار ده جاي من الصبح والإنارة والإضاءة، وده أحد معاني سفرة أنه بيضيء للناس، فكذلك مسفرة زي ما كان بينور للناس طريقهم في الدنيا، يجي يوم القيامة وشُه منور ينور للناس.
مسفرة ضاحكة زي ما كان بيضحك للناس ويستبشر بهم ويدعوهم إلى الله عز وجل، كذلك يكون ضاحك، زي ما أدخل السرور على الناس في الدنيا بأن هو علمهم دين ربنا، كذلك يكون ضاحك يوم القيامة.
وجوه يومئذ مسفرة ضاحكة مستبشرة، زي ما كان يدخل البشرى على الناس في الدنيا ويبشرهم بالجنة اللي العاملين بيسلموا ويدخلوا في دين الله عز وجل، كذلك هو يستبشر. مسفرة ضاحكة مستبشرة، مسفرة مضيئة ضاحكة مستبشرة، مستبشر باللي هيشوفه من النعيم، يضحك لما رأى من نعيم الله عز وجل ولسه مستبشر لما سيحدث من نعيم.
الصنف الثاني هو: ﴿وَوُجُوهٌ يَوْمَئِذٍ عَلَيْهَا غَبَرَةٌ * تَرْهَقُهَا قَتَرَةٌ﴾. الغبرة التراب، ترهقها قترة، القترة السواد، يبقى عليها تراب وشُه أسود، اجتمع عليه حاجتين التراب والسواد. ختمت السورة: ﴿أُولَئِكَ هُمُ الْكَفَرَةُ الْفَجَرَةُ﴾، الكفرة مع الغبار، الفجرة مع السواد، وكان الغبار والسواد دي الحواجز اللي وضعها بينه وبين الدين، الغبار الكفر، والسواد دي المعاصي، دي الحاجات اللي وضعها بينه وبين دين ربنا، فهتظل برضه تيجي على وجه على وجه والعياذ بالله يوم القيامة.
فالغبرة ده الكفر، ده التراب اللي منعه الكفر، الكافر يعني الزرع، يعني اللي بيجيب البذره ويكفرها في الأرض يعني يغطيها، يحط تراب ويغطيها عشان تدفن في الأرض، فكذلك الكافر هو اللي حط التراب على فطرته وعلى سمعه مش عايز يسمع وعلى بصره وما اكتفاش بكده فجر في المعاصي، فكل معصية تخلي وشُه أسود أكتر، كل معصية تخلي وشُه أسود أكتر، فجمع بين الكفر والفجور فكذلك يجتمع على وجهه التراب والسواد، فكما جمع بين الكفر والفجور يجتمع على وجهه الغبار والسواد.
فانتهت السورة إلى فريقين، فريق الدعاة العاملين اللي بيدخلوا على الناس البشرى، اللي بينوروا للناس طريقهم، اللي في وسط الغبار والسواد اللي موجود في وسط الكفر والمعاصي المنتشرة هو لسه بيجاهد عشان ينشر دين ربنا بين الناس، في ناس وجوهها مسفرة ضاحكه مستبشرة بالرغم أن في ناس والعياذ بالله هتيجي استجابت لهؤلاء فتأتي يوم القيامة عليها غبرة ترهقها قترة، أولئك هم الكفرة الفجرة.
إذاً أحبتي في الله هذه السورة سورة مهمة جداً للدعاة للعاملين لدين الله، فصلت بين النبأ والنازعات والتكوير والانفطار، هنجد أن سورتين كلموا عن يوم القيامة والموت، وسورة مهمة للدعاة، وبعدين سورتين عن يوم القيامة التكوير الانفطار، وبعدين سورة مهمة عن المعاملات سورة المطففين، فتجد صور يوم القيامة وصور صور تعلمك تتعامل إزاي. ودي سورة مهمة جداً للدعاة حتى لا ينحرفوا في طريقهم. نسأل الله عز وجل أن يستعملنا وأن يثبتنا، أقول قولي هذا واستغفر الله لي ولكم، وجزاكم الله خيراً.