تفسير سورة الأنعام (24) | الآيات (153-165) | د. أحمد عبد المنعم

السلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.

باذن الله عز وجل نستكمل تفسير سورة نعم كنا توقفنا عند قول الله عز وجل: ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ وَتَفْصِيلًا لِّكُلِّ شَيْءٍ وَهُدًى وَرَحْمَةً لَّعَلَّهُم بِلِقَاءِ رَبِّهِمْ يُؤْمِنُونَ﴾ [الأنعام: 154]. آية مية أربعة وخمسين سورة الأنعام.

اتكلمنا في المرة الماضية عن تلات آيات متتاليات، والتلات آيات متتاليات بتتكلم عن أسس وقواعد ومقاصد عامة للشريعة. هذه الأسس وهذه الأصول وهذه القواعد لا تتغير مع الزمان. هذه الأسس ثابتة في كل دين، في كل ملة، في كل وقت، في استضعاف، في تمكين، هذه الأسس لا تتغير. في بعض الشرائع التفصيلية الصغيرة الدقيقة قد تتغير من شريعة إلى شريعة، لكل جعلنا منكم شرعة ومنهاجا. قد تتغير بعض تحريم الأطعمة، بعض الأشياء، قد تتغير ووضح الله عز وجل، وضح الله عز وجل لنا في الصورة في بعض الأطعمة كان لسبب ما معين على اليهود حرم عليهم بظلم منهم. إذاً أن هذه التفاصيل في بعض التفاصيل قد تتغير، لكن في أصول ما ينفعش تتغير أبداً، أصول ثابتة. بين الله عز وجل أن هذه الأسس وهذه القواعد لا تتغير أبداً مع الزمان ولا المكان، وهذه الأخلاق ليست أخلاق نسبية ولكنها ثابتة. وصى الله عز وجل في الوصايا دي، الوصايا العشر، بالوصية اللي اتكلمنا عنها، الوصية الجامعة، السياج اللي لازم يوضع عند الأمة الإسلامية حتى لا تتفرق بها، وأن الأمة لو تركت من غير هذا السياج الطريق هيتفرق بها.

واتكلمنا المرة اللي فاتت عن الفرق بين فتفرقكم السبل أو فتفرق بكم السبل، وأن القرآن اختار كلمة فتفرق بكم، وأن الطريق ممكن يحود بك غصب عنك وأنت مش واخد بالك. إذاً لابد من وضع السياج، وضع علامات تحذير زي لمبات كده حمرا تنور أول لما تبدأ تخرج خارج الطريق المستقيم يقول لك انتبه، ده دور العلماء العاملين أنهم يحفظوا على الناس دينهم، كما أنهم برضه يحفظوا عليهم دنياهم، أيضاً يحفظوا عليهم دينهم. ذلكم وصاكم به لعلكم تتقون.

بعد كده ربنا سبحانه وتعالى بيقول: ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ وَتَفْصِيلًا لِّكُلِّ شَيْءٍ﴾. العلماء وقفوا عند كلمة ثم آتينا موسى الكتاب. استغربوا، لو الأحكام اللي فاتت دي للنبي صلى الله عليه وسلم، العشر وصايا اللي في التلات آيات، جت في القرآن للنبي صلى الله عليه وسلم، إزاي تيجي ثم آتينا موسى الكتاب؟ والكتاب بتاع سيدنا موسى قبل القرآن، التوراة قبل القرآن. فقالوا أكيد ثم دي مش ثم للترتيب الزمني. بعض العلماء إن حصل الاشكال ده قال إذاً ثم هنا مش للترتيب الزمني، وقال ثم هنا بتفيد نوع من التدرج، أن دي قواعد عامة، وبعد كده نزل نوع من أنواع التفصيل، التفصيل ده جه في التوراة وجه في القرآن، لذلك بدأ بالقواعد العامة اللي في كل دين، وبعدين قال ثم آتينا موسى تماما على الذي احسن وتفصيلا، يبقى هنا الأحكام التفصيلية مش القواعد العامة المجملة، وبعدها الآية اللي بعدها: ﴿وَهَٰذَا كِتَابٌ أَنزَلْنَاهُ مُبَارَكٌ﴾، أيضاً وهذا الكتاب أيضاً يحتوي على أحكام تفصيلية كما احتوت التوراة على أحكام تفصيلية.

بعضهم قال دي بتفيد نوع من التدرج أو التراخي الرتبي، اتكلمنا عنها في أول السورة: ﴿الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ وَجَعَلَ الظَّلُمَاتِ وَالنُّورَ ثُمَّ الَّذِينَ كَفَرُوا بِرَبِّهِمْ يَعْدِلُونَ﴾ [الأنعام: 1]. وبعضهم قال لا، الأحكام ثم هنا بتفيد الزمان، تخيلوا إزاي بتفيد الترتيب الزمني؟ قالوا الأحكام العشر ديت، الوصايا العشر دي وصى الله عز وجل بها سيدنا إبراهيم عليه وعلى نبينا أفضل الصلوات وأتم تسليم، وجاءت لملة إبراهيم ثم موسى ثم النبي صلى الله عليه وسلم، ولبعد الزمان ما بين إبراهيم عليه وعلى نبينا أفضل الصلاة وأتم التسليم لبعد الزمان ما بين إبراهيم وموسى عليهما السلام جت كلمة ثم، وبعد كده قال وهذا كتاب اللي هي بقى القرآن: ﴿وَهَٰذَا كِتَابٌ أَنزَلْنَاهُ مُبَارَكٌ﴾.

وببعضهم قال الآيات ديت الوصايا العشر وصى الله عز وجل بها إبراهيم، وامر الله عز وجل بها إبراهيم عليه السلام، ثم أتى موسى زيادة على الوصايا الإجمالية تفصيل ما كانش عند سيدنا إبراهيم، ثم جاء القرآن بزيادة من التفصيل لم يكن في القرآن، عشان كده قال كلمة مبارك. يبقى إذاً التفصيل بيزداد مع مر الزمان حتى اكتمل وقال الله عز وجل: ﴿الْيَوْمَ أَكْمَلْتُ لَكُمْ دِينَكُمْ﴾ [المائدة: 3]. حتى اكتمل التفصيل التام في القرآن. يبقى إذاً الوصايا العشر ديت من أيام سيدنا إبراهيم العالم كله يوصى بها لا ينازع ولا ينازع فيها أحد. ثم آتينا موسى الكتاب.

طيب ربنا قال إن إيتاء الكتاب هنا: ﴿ثُمَّ آتَيْنَا مُوسَى الْكِتَابَ﴾ نعمة عظيمة شكر. ثم آتينا موسى الكتاب تماماً على الذي أحسن. مين الذي أحسن؟ وهم اختلفوا في الذي أحسن على تلات أقوال: إما أحسن بمعنى أحسنوا (يعني بني إسرائيل كلهم) أو تماماً على الذي أحسن أي أن الله عز وجل هو الذي أحسن وأتم النعمة من إحسانه على موسى. القول الأشهر والارجح تماماً على الذي أحسن أي موسى عليه السلام، أي أن الله عز وجل آتى موسى الكتاب تفصيلا ده ليه؟ عشان سيدنا موسى أحسن في الأعمال، أحسن في أي أعمال؟ أحسن في الأعمال في الوصايا العشر. يبقى لما سيدنا موسى أحسن في تطبيق ما أمره الله عز وجل به من وصايا، آتاه الله عز وجل زيادة في التفصيل.

تاني المعنى ده وعكسه هيقابلنا إن شاء الله، أن ربنا أتم علينا النعمة في سورة الأعراف، أن بني إسرائيل لما أعرضوا عن تطبيق بعض الشرع التفصيلي اللي في التوراة نزع ورفع منه. إذاً التفصيل اللي في الشرع، الأحكام التفصيلية اللي موجودة في الشرع دي نعمة من ربنا، أن ربنا يفسر لك في الأحكام، كل ما الأحكام تزداد في التفصيل والوضوح كل ما الخلاف يقل، كل ما دي تبقى نعمة، كل ما النور يزداد، بس بيقول لك أنت تطبق الأول الوصايا الأولى عشان يجي لك التفصيل، فلما سيدنا موسى طبق وصايا معينة من الله عز وجل، الله عز وجل أتم عليه النعمة. طب ليه الكتاب من الأول؟ ومن تقرب إليه شيئاً تقربت إليه ذراعا. طب ليه الكتاب من الأول ما جاش مفصلة؟ له فترة في الأول زي القرآن كده التفصيل بتاعه جه في المرحلة المدنية، وهنا نفهم إيه معنى كلمة ثم آتينا موسى الكتاب.

وأيتاء موسى الكتاب بييجي في مواضع كتير من القرآن له معنى، عايزين نوضح المعنى ده. له دلالة والله أعلى وأعلم، يعني هذه الدلالة فيها بشرى، إيه البشرى دي؟ إيه البشرى في كلمة آتينا موسى الكتاب؟ برضه في في سورة السجدة: ﴿وَلَقَدْ آتَيْنَا مُوسَى الْكِتَابَ فَلَا تَكُن في مِرْيَةٍ مِّن لِّقَائِهِ﴾ [السجدة: 23]. فالعلماء اختلفوا فلا تكن في مرية من لقائه، الهاء دي عائدة على إيه؟ الله عز وجل يخبر أنه آتى موسى الكتاب وبيقول للنبي صلى الله عليه وسلم فلا تكن في مرية من لقائه، دي بشرى يعني بيقول له اطمن انك هتلاقيه، الهاء دي إيه؟ بعضهم قال ولا تكن في مرية من لقائه أي لقاء الله. بعضهم قال فلا تكن في مرية من لقائه أي لقاء موسى في الإسراء والمعراج. بعضهم قال فلا تكن في مرية من لقائه أي لقاء الكتاب، كما آتى الله عز وجل موسى الكتاب تفصيلا سيؤتيك الكتاب تفصيلا.

طب إيه البشرى في إيتاء الكتاب؟ عايزين نفهم النقطة ديت. نجيب مثل تالت برضه، يقول الله عز وجل: ﴿سُبْحَانَ الَّذِي أَسْرَىٰ بِعَبْدِهِ لَيْلًا مِّنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا ۚ إِنَّهُ هُوَ السَّمِيعُ الْبَصِيرُ * وَآتَيْنَا مُوسَى الْكِتَابَ وَجَعَلْنَاهُ هُدًى لِّبَنِي إِسْرَائِيلَ أَلَّا تَتَّخِذُوا مِن دُونِي وَكِيلًا * ذُرِّيَّةَ مَنْ حَمَلْنَا مَعَ نُوحٍ ۚ إِنَّهُ كَانَ عَبْدًا شَكُورًا﴾ [الإسراء: 1-3]. ليه ربنا في بداية سورة الإسراء يجيب تلات مواضع؟ يجيب الإسراء، آتينا موسى الكتاب، لحظة إنقاذ سيدنا نوح ومن معه ذرية إيه؟ طب ما بني إسرائيل ذرية إبراهيم (يعني ذرية إسحاق وذرية يعقوب)، ليه اختار سيدنا نوح وليه اختار لحظة الحمل على السفينة؟ ﴿ذُرِّيَّةَ مَنْ حَمَلْنَا مَعَ نُوحٍ﴾، وتيجي في مقابلة لإيتاء موسى الكتاب.

إيه العلاقة بين إيتاء موسى الكتاب وبين حمل الناس مع سيدنا نوح؟ وده عشان نفهم هنا إيه الفكرة في ثم إيتاء موسى الكتاب؟ فيه بشرى بالتمكين. إيه العلاقة بقى ببشرى بالتمكين؟ طول ما أنت مستضعف، أحكام الكتاب التفصيلية ما كتش نزلت في مكة لأن ما فيش واقع يطبق فيه هذه الأحكام، لذلك إيتاء التوراة والكتاب لم ينزل مفصلاً على موسى، أمتى؟ أمتى الله عز وجل أنزل الكتاب على سيدنا موسى؟ هل بعد ما جاوزوا البحر وتركهم عشان يروح في لقاء العزاز أن يأخذ التوراة؟ يبقى أمتى؟ بعد إهلاك فرعون، فكان إهلاك فرعون وكان بشرى بداية التمكين أن هيبقى فيه أرض يطبق فيها الكتاب. إذاً نزلت الكتاب، الأحكام التفصيلية لم تنزل في مكة لأن لم يكن هناك واقع تطبق فيه هذه الأحكام، فنزلت السور المدنية في المدينة بأحكام تفصيلية لما جه واقع يطبق فيه الأحكام.

إذاً إيتاء الكتاب بشرى بالتمكين. يبقى موسى الكتاب فلا تكن في مرية من لقائه، أي أيضاً سيكون لك واقع كما كان لموسى واقع طبق فيها فيه الكتاب تفصيلا سيكون لك واقع، بشرى أنك ستمكن وستذهب إلى أرض تطبق فيها الأحكام التفصيلية. معايا كده وضحت المعنى؟ أن في أن الأحكام التفصيلية نزلت لما بقى في أرض تطبق فيها، وده من معانيه أن القرآن النقاشات في الأحكام ما تبقاش نقاشات ساذجة. القرآن بيطبق مع (يعني لما راحوا أحد العلماء قالوا له حطوا لنا دستور إسلامي كامل ما يتعدلش، قال لهم أنتم واخدين البلاد مئات السنين تبوظوها، وجاي الواد تقول لي حطوا لي؟ لأ، اديني أحط لك قواعد عامة وطول ما أنا ماشي بحط لك بقى القواعد التفصيلية واحنا ماشيين بالتطبيق، أن العمل ييجي مع العلم)، وده أسلوب القرآن.

طب بعد ما تم القرآن خلاص الأحكام واضحة، لكن لما بنمر مرحلة استضعاف تاني بنرجع نمر بنفس المراحل. وده الفارق ما بين بعض الآيات اللي قال فيها بعض الناس بالنسخ وبعضهم قال بالنسء (النسء يعني تؤخر). فأحكام الاستضعاف اللي في القرآن، بعض العلماء قال دي منسوخة تماماً، بعضهم قال لا، دي منسوءة يعني إيه؟ يعني لو مريتوا بمرحلة استضعاف كما كانت من قبل، تؤجل، مش الوقف التام للعمل بآيات الكتاب لأ، تؤجل إلى أن يأتي الواقع بتاعها.

خلاص؟ يبقى إذاً إيتاء الكتاب بشرى للتمكين. يبقى ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾، يبقى اللي بيحسن في مرحلة الاستضعاف يؤتيه الله عز وجل كتاب تفصيلا لكل شيء. وهذا كتاب مبارك، هذا الكتاب مبارك أعظم من كتاب موسى، مهيمن على كتاب موسى، فيه كل الأحكام في الاستضعاف وفي التمكين، فاللي هيحسن في تطبيق هذه الأحكام في الاستضعاف يمن الله عز وجل عليه بالتمكين.

طيب في نقطة ما جاوبناش عليها: مقدمة سورة الإسراء لما ربنا جاب لحظة الإسراء، كأن ربنا بيقول للنبي صلى الله عليه وسلم إن الأقوام على مدار الزمان من أول سيدنا نوح إلى يوم القيامة نوعين. نهاية الأقوام أو معاملة الله عز وجل للأقوام الأنبياء نوعين: النوع الأول هو الإبادة التامة. تجد أن كل الأنبياء اللي ذكروا في القرآن قبل سيدنا موسى (سيدنا نوح، وسيدنا هود، وسيدنا صالح، وسيدنا شعيب، وسيدنا إبراهيم، وسيدنا لوط)، كل هؤلاء الأنبياء اللي ذكروا، غير داود سليمان دول ذكروا بعد سيدنا موسى، دول دول بعد سيدنا موسى خلاص، دول أنبياء بني إسرائيل وزكريا ويحيى. لكن الأنبياء اللي قبل سيدنا موسى لم يذكر الله عز وجل ماذا حدث بعد أن أنجاهم؟ كانت النهاية في القصة إيه اللي بيحصل؟ أن عذاب ينزل وخلاص. الله عز وجل لم يذكر طب بعد ما ربنا نجاهم هل بقى أقاموا مجتمع ونزل أحكام تفصيلية؟ ربنا ما ذكرش، فكانت النهاية بالإهلاك.

من بعد سيدنا موسى ونزول التوراة كانت لحظة فاصلة، أن كما أخبر الله عز وجل في القرآن في بعض الآيات، روي حديث عن النبي صلى الله عليه وسلم وفسرها زي ما شيخ الإسلام ابن تيمية وغيره نقل الكلام ده ابن كثير والسعدي وغيره من المفسرين، أن في آيات بتدل في القرآن وأحاديث مروي عن النبي صلى الله عليه وسلم بعض العلماء حسنها أن ما فيش عذاب تام هينزل من بعد إهلاك فرعون. من بعد نزول التوراة فيه عذاب تام هينزل خلاص؟ فمقدمة سورة الإسراء جابت الإسراء وجابت إيتاء الكتاب اللي هي اللحظة الفاصلة اللي بتقول ما عادش فيه إهلاك تام، وجابت ذرية من حملنا مع نوح.

فكأن ربنا بيقول للنبي صلى الله عليه وسلم الإسراء دي علامة أنك أنت هتنتقل من مرحلة -كأن الزمان عايزك تخيل معي الزمان كده من سيدنا نوح لسيدنا موسى ده زمان، ومن سيدنا موسى لآخر الزمان ده نوع تاني-. اللي قبل سيدنا موسى من أول سيدنا نوح دي تعتبر نسبياً -لو حبينا نطلق ايش- كنوع من مرحلة الاستضعاف اللي ما حصلش فيها كتاب تفصيلي نزل. من بعد سيدنا موسى نزل الكتاب التفصيلي لأن خلاص بقى مجتمع والجهاد بقى بدأ يفرض، والأمر بالمعروف والنهي عن المنكر، وبقى فيه أحكام تفصيلية، بقى فيه تمكين، لذلك أكثر أمة ذكرت في القرآن أمة بني إسرائيل.

ليه؛ عشان دي أمة متكاملة مرت بكل المراحل: استضعاف، والنجاة، والتمكين. مرت بالتلات مراحل، كل الأمم التانية مرت بمرحلة أو اتنين بس، وأمة النبي صلى الله عليه وسلم هتفضل تمر بالتلات مراحل على مدار الزمان: استضعاف ثم نجاة ثم تمكين. فلنا فيها أسوة.

لنا فيها أسوة إن هما مروا فغلطوا؛ أخطأوا في أخطاء أثناء الاستضعاف، وأخطأوا في أخطاء أثناء النجاة، وأخطأوا في أخطاء أثناء التمكين، فتم استبداله. الله عز وجل استبدله، حتى لا نقع في هذه الأخطاء. عندنا أخطاء ما ينفعش نسقط فيها في الاستضعاف، عندنا أخطاء أثناء النجاة، عندنا أخطاء أثناء التمكين ما ينفعش نخطئ فيها، وعندك ده نبراس لهذه الأمة.

فيقول الله عز وجل: ﴿ثُمَّ آتَيْنَا مُوسَى الْكِتَابَ﴾ [الأنعام: 154]. وفي سورة الإسراء؛ إن الإسراء ده -وإنك تروح السورة، ما ذكرتش المعراج، مش القضية الصعود للسماء- الإسراء إنك تروح المسجد الأقصى. يعني سورة النجم ذكرت المعراج لغرض آخر، هنا ذكرت الإسراء فقط. الإسراء هو الذهاب للمسجد الأقصى، والمسجد الأقصى دايمًا هو ترمومتر التمكين في الأرض؛ اللي بيسيطر على المسجد الأقصى -وفي الغالب اللي بيسيطر هو بيبقى له التمكين في الأرض- ده ترمومتر التمكين في الأرض.

فذهابك للإسراء معناه ذهابك للمسجد الأقصى، معناه أنك هتننتقل من مرحلة ﴿حَمَلْنَا مَعَ نُوحٍ﴾ إلى مرحلة ﴿ثُمَّ آتَيْنَا مُوسَى الْكِتَابَ﴾. بشرى أنك ستؤتى الكتاب، لذلك جاءت الوصايا أيضًا العشر في سورة الإسراء في أول سورة الإسراء زي ما جت هنا الوصايا العشر، وبعدين جت البشرى بالتمكين: ﴿ثُمَّ آتَيْنَا مُوسَى الْكِتَابَ﴾.

طبعا الكلام صعب، انسوه بقى خلاص، هي دي كده تتمسح بقى خلاص خلاص، مش مشكلة. ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾؛ نعم الله عز وجل عليك الدينية على حسب إحسانك في اللي موجود. بعض الناس بيعامل ربنا بالعكس؛ هو دلوقتي فيه واقع، الواقع مثلا مغلق مش مفتوح، واحد نفسه يجاهد في سبيل الله، واحد نفسه يتعلم، واحد نفسه يعمل أعمال في الدين، نفسه ينتشر في الدعوة، لكن الواقع اللي حواليه مغلق.

ربنا يقول لك: أحسن في هذا الواقع أفتح لك ما تريد من واقع أقول. احنا نقول لربنا: افتح لي واقع أخر عشان أحسن! لأ، الله عز وجل اختارك تبقى موجود في الزمان ده تحديدًا، هو بيتعبدك بوجودك في هذا الزمان، كل زمان له عبودية، زي ما كل وقت في اليوم له عبودية؛ التلت الأظهر غير ساعة الظهر غير ساعة الضحى. ممكن من العبودية أنك في فترة ما تقومش تصلي، يكره فيها الصلاة، دي عبودية! زي عبودية أنك ما تاكلش فترة، صيام، وعبودية أنك تاكل، ما تأجلش الإفطار؛ أنك انت يكره أنك تأجل الإفطار، يبقى فيه عبودية أنك تمسك وعبودية أنك تاكل.

زي ما العبوديات بتختلف؛ عبودية أنك ما تصليش والعبودية أنك تصلي مع الأزمنة في اليوم الواحد، كذلك على مر الزمان العبوديات تختلف؛ أنك انت تقوم بالعبودية المطلوبة منك وتحسنها، يفتح الله عز وجل عليك. ﴿آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾؛ لأنه أحسن في معاملة الله عز وجل وفي تطبيق أوامر الله عز وجل، ﴿وَتَفْصِيلًا لِّكُلِّ شَيْءٍ﴾ -والتفصيل ده في سورة الأعراف أن هو رفع وحرموا منه- ﴿وَهُدًى وَرَحْمَةً لَّعَلَّهُم بِلِقَاءِ رَبِّهِمْ يُؤْمِنُونَ * وَهَٰذَا كِتَابٌ أَنزَلْنَاهُ مُبَارَكٌ﴾. ربنا جاب وصفين في الكتاب: أنه من عند الله أنزلناه وأنه مبارك.

مبارك؛ أي أكثر بركة من كتاب التوراة ومهيمن عليه. والبركة تكلمنا -كنا في شرح كانت آية سورة الفرقان في درس مرحلة الفرقان- عن معنى البركة بالتفصيل والمعنى اللغوي، وأن الخلاصة ده الخير الدائم الثابت المستمر المتزايد، فكذلك القرآن هو خير ثابت مستمر دائم متزايد إلى يوم القيامة. ﴿وَهَٰذَا كِتَابٌ أَنزَلْنَاهُ مُبَارَهٌ فَاتَّبِعُوهُ﴾؛ بما أن الكتاب من عند الله وبما أنه مبارك، إذا فاتبعوه. فالذي يعرض عن القرآن انسان غير عاقل. ﴿اتبعوه﴾ يعني ايه اتبعوه؟ الإمام الطبري بيقول معنى رائع: تابعوه، أي اجعلوه إمامًا لكم، هتبقى أنت دايمًا وراء، لا تقدمه بين يدي الله ورسوله، مش انت تتحرك قبل القرآن؟ لا، ما تاخدش فعل ولا قرار إلا لما تدور في القرآن الأول، لا تتقدم القرآن. ﴿فاتبعوه﴾؛ أي اجعلوه إمامًا لكم.

﴿وَهَٰذَا كِتَابٌ أَنزَلْنَاهُ مُبَارَكٌ فَاتَّبِعُوهُ وَاتَّقُوا لَعَلَّكُمْ تُرْحَمُونَ﴾. الله عز وجل انزل الكتاب لحكم كثيرة، منها كان العرب، العرب كان عندهم فخر، كان عندهم ثقة في النفس عالية جدا، بس كان عندهم حتة ناقصة كده حاسين فيها دايما بالنقص: أنهم ما عندهمش كتاب، فكانوا يشعروا أنهم أفضل من اليهود والنصارى في الأخلاق وفي اللغة، وكان العرب بيسموا غير العربي بيسموه الأعاجم وكانوا يسموا الدواب عجموات، فكان اللي ما بيعرفش يتكلم عربي كأنه لا يتكلم أصلا من شدة فخر العرب بلغتهم وبشعرهم وبانسابهم وبأخلاقهم وبأفعالهم.

وهذا الفخر جه القرآن صلحه وخلاهم أمة تصلح لتلقي الرسالة؛ لأن كان عندهم أخلاق فعلا زي ما كان عندهم أخلاق سيئة، لكن كان عندهم أخلاق تصلح لتلقي الرسالة، لكن كانت الإشكالية عندهم أن هذه الأخلاق لابد أن تنضبط بالوحي. النقص اللي كان عندهم أن دايما حاسين أن أهل الكتاب عندهم كتاب وما عندهمش كتاب، فيقولوا ايه؟ احنا مش هنتبع الكتاب بتاعهم، كانوا دايما بيعتبروهم أمة ناقصة. وبعضهم قال: لأ، مش هم اللي كانوا رافضين، ده اليهود والنصارى اللي كانوا مزمزمين، ما كانوا سايبين الدعوة تنتشر!

يعني ليه العرب ما انتشرش عندهم الكتاب؟ اليهود وأهل الكتاب، اليهود والنصارى. بعضهم قال: ده أنفة من العرب. البعض اللي حاول يحلل الموضوع ده بعضهم قال: لا، ده اليهود هم اللي كانوا مزمزمين لدرجة في المدينة واليهود ما تنشروش دينهم، يعني يبقى في عرب مشركين في المدينة وفي يهود واليهود ما ينشروش! طب اليهود في مكة كانوا قليلين، أو كانت زيارات من اليهود والنصارى فقط، طب في المدينة، طب في غيرها ما كانوا بينشروا الكلام. فكانت حجة العرب دايما: احنا بس مشكلتنا أن احنا ما عندناش كتاب، لو معنا كتاب وينزل لنا كتاب من السماء وربنا يبعت لنا رسول ﴿أَن تَقُولُوا إِنَّمَا أُنزِلَ الْكِتَابُ عَلَىٰ طَائِفَتَيْنِ مِن قَبْلِنَا وَإِن كُنَّا عَن دِرَاسَتِهِمْ لَغَافِلِينَ﴾ [الأنعام: 156].

دايما كتير من الناس بيتحجج، ما تحفزش القرآن ليه؟ لكن المشكلة بس أن ما فيش تحفز في المسجد، المشكلة بس ما فيش كذا، طبعا دي حجج فارغة! والله عز وجل يبطل لهم هذه الحجة، وتحصل الحاجة اللي هو مستنيها وبرضه ما يحفزش، وبرضو ما يلتزمش، وبرضو ما يمشيش، وبرضو ما يقومش ليل! دايمًا يعلق تأخره في أشياء، يعلق تأخره في أشياء على بعض الحاجات، لأن مثلا ما فيش شيخ، أن ما فيش حاجة على النت، أصل ما فيش عندي جهاز، أصل ما عنديش عربية! ويرزق الشيء ثم ماذا؟ ثم لا يسير في هذا الطريق! تبقى حجة فرض.

فهما دايمًا يقولوا: احنا مشكلتنا بس ما عندناش رسول ولا كتاب، وهم عندهم كتاب ﴿وَإِن كُنَّا عَن دِرَاسَتِهِمْ لَغَافِلِينَ﴾. كلمة الدراسة فيها معنى: بيقللوا من نفسهم، يقول لك: احنا كنا غافلين عن هذه الدراسة، احنا كنا جهلة، احنا لو كان عندنا كتاب، والاية اللي بعدها ﴿أَوْ تَقُولُوا لَوْ أَنَّا أُنزِلَ عَلَيْنَا الْكِتَابُ لَكُنَّا أَهْدَىٰ مِنهُمْ﴾ [الأنعام: 157]. ليه ما قالوش هنبقى زيهم؟ لأن هو يرى نفسه أنه أفضل فعلا، العرب فيهم صفات كانت أفضل، فبيقول: احنا لو يجي لنا كتاب احنا هنبقى أكثر هداية منهم، فكان الفريقين مستنيين الكتاب، اه، مستنيين الرسول الخاتم، اليهود منتظرينه والعرب منتظرون.

فلما جه ﴿فَقَدْ جَاءَكُم بَيِّنَةٌ مِّن رَّبِّكُمْ وَهُدًى وَرَحْمَةً﴾ نفس التفصيل والهدى والرحمة هنا البينة الزيادة كمان عن التفصيل، يعني مش بس تفصيل، لأ ده تفصيل مبين، يعني ربنا قال على كتاب موسى: ﴿تَفْصِيلًا لِّكُلِّ شَيْءٍ وَهُدًى وَرَحْمَةً﴾، هنا قال: ﴿بَيِّنَةٌ وَهُدًى وَرَحْمَةً﴾، ده الموضوع واضح تمامًا. ايه اللي حصل؟ كذبوا! ﴿فَمَنْ أَظْلَمُ مِمَّن كَذَّبَ بِآيَاتِ اللَّهِ وَصَدَفَ عَنْهَا﴾.

يعني دايمًا الإنسان اللي بيقعد يقول لك: أنا بس لو يحصل كذا هتلاقيني بقيت لازم على طول، أنا بس لو يبقى فيه تحفيز، أنا بس لو ألاقي شيخ، أنا بس لو ألاقي فرصة لطلب العلم، أنا بس لو ألاقي فرصة للجهاد، أنا بس لو ألاقي فرصة للانفاق، أنا بس وربنا يرزقني بس أنا بقبض مش عارف الفين لو يبقوا الف ونص، أنا بقبض... دايمًا دايمًا اللي بيقعد يلولو الكتير ده ما بيشتغلش في الفترة اللي موجود فيها، ده مش هيعمل حاجة.

اشتغل وأنت في الوقت ده، اللي كل وقت له عبودية؛ احنا قلنا: ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾. خليك انسان محسن في كل وقت حتى يتم الله عز وجل عليك النعمة، أحسن في الفترة اللي أنت فيها، لابد أن تحسن: قم الليل، اشتغل في الأبواب المفتوحة، ما تشترطش على الله عز وجل، ما تشترطش أن في أبواب معينة هي اللي تتفتح، وغير كده احنا اتكلمنا على خطورة أن في من الناس من يعبد الله على حرف، لكن قلنا في من الناس من يعبد الله على ايه؟ على شرط، أنه بيشترط على ربنا عشان يعبده، وده خطر جدا.

﴿أَوْ تَقُولُوا لَوْ أَنَّا أُنزِلَ عَلَيْنَا الْكِتَابُ لَكُنَّا أَهْدَىٰ مِنهُمْ﴾ آية بتفهمه وبتخلي ما عنده أي حجة، هو بيقول: أنا ما كنتش باعبد عشان ما عنديش كتاب، واليهود كان عندهم كتاب وكانوا حارمينا من الدراسة بتاعتهم، عندهم دراسة عظيمة ﴿وَإِن كُنَّا عَن دِرَاسَتِهِمْ لَغَافِلِينَ﴾. ﴿أَوْ تَقُولُوا لَوْ أَنَّا أُنزِلَ عَلَيْنَا الْكِتَابُ﴾ كأنه برضو دي إشارة أن أنا مش هروح أتبع هذا الكتاب، أنا عايز كتاب يجي لي أنا! ﴿لَوْ أَنَّا أُنزِلَ عَلَيْنَا الْكِتَابُ لَكُنَّا أَهْدَىٰ مِنهُمْ فَقَدْ جَاءَكُم بَيِّنَةٌ مِّن رَّبِّكُمْ وَهُدًى وَرَحْمَةً﴾. عملوا ايه؟ كذبوا بايات الله وصدف عنها.

كلمنا عن الصدف، وأن اللي صدف في القرآن ما جاش غير سورة الأنعام، فعل صدفة ده أشد الإعراض، وقالوا الصدف دي جاية من الحاجة الملساء، يعني اللي يقول لك: اللي بيعرض بيسمع وبعدين يعرض. الصدف ده يعني هي أصل كلمة الإعراض: أعطاه عارضه، يعني بعد ما قرب منه فأدا له جنب ومشي. الصدف ده من غير ما يقرب منه ابتعد عنه زي ما يكون اتزحلق قبل ما يروح له أصلا.

وأصل الصدف في اللغة أن ده مرض بيصيب بعض الدواب بيخلي رجلها تحود، تيجي تمشي على طول تلاقيها بتحود، الدابة ما تعرفش تمشي أصلا على طول تبقى ده مرض! وده من عجيب تعبيرات القرآن أنه يجيب بالأمراض النفسية في صورة أمراض مادية موجودة، يعني ولا تصعر خدك للناس، قالوا ده مرض كان بيصيب الإبل، يخلي الناقة تبقى راسها مرفوعة لفوق ورقبتها محدودة كده، ما تعرفش تعدلها -يعني هي ما تقدرش تعدلها- شبه مشية المتكبر ماشي عامل كده، كأن المتكبر هو مش عارف يعدل نفسه أصلا، ده مريض! اللي عنده ده مرض زي ما الإبل ده مريضة.

كذلك اللي هم فيه ده مرض، الصدف ده مرض، يعني أحيانًا التعبير القرآني بيجيب نوع من المرض زي حبوط الأعمال ده مرض؛ أن الدابة تفضل تاكل لغاية لما بطنها تتملى وتموت. فاستعمال الأمراض، استعمال التعبير اللي كان موجود عند العرب في الأمراض المادية اللي موجودة في الدواب واسقاطها على أمراض معنوية موجودة عند الناس، ده من عجيب استعمال القرآن.

فالصدف ده شدة الإعراض: ﴿فَمَنْ أَظْلَمُ مِمَّن كَذَّبَ بِآيَاتِ اللَّهِ وَصَدَفَ عَنْهَا﴾. وهم عملوا هنا حاجزين: كذب بآيات الله، وصدف عنها. بعض العلماء هنا قال: صدف عنها، مش بس هو اللي أعرض، ده كان بيخلي الناس تبتعد عن القرآن! صدف عنها؛ أي جعل الناس يعرضون عن القرآن. يعني صدف هي نهى عنها، قالوا: تلاقي بعض العلماء يفسرها أي صد عنها. لكن حقيقة غالب المفسرين قال: صدف، أي هو بنفسه.

لكن الإمام الزمخشري وتابعوا بعض الناس -زي الإمام البيضاوي وغيره والقاسمي- قال لأ: صدف عنها، أي صد الناس عنها. طب ليه هم قالوا كده؟ قالوا عشان كلمة كذب بآيات الله في نفسه ثم صدف عنها أي صد الناس عنها. فكده عمل أعلى جريمة، عشان كده هنا ربنا قال ايه: ﴿سَنَجْزِي الَّذِينَ يَصْدِفُونَ عَنْ آيَاتِنَا سُوءَ الْعَذَابِ﴾ [الأنعام: 157]، ﴿الَّذِينَ كَفَرُوا وَصَدُّوا عَن سَبِيلِ اللَّهِ﴾ [النحل: 88]، ﴿زِدْنَاهُمْ عَذَابًا فَوْقَ الْعَذَابِ﴾ [النحل: 88]. دايمًا اللي بيخلي الناس تعرض عن القرآن عذابه أشد من اللي يكذب بالقرآن! اللي بيخلي الناس تعرض عن القرآن عذابه أشد من المكذب في نفسه بالقرآن والعياذ بالله: ﴿سَنَجْزِي الَّذِينَ يَصْدِفُونَ عَنْ آيَاتِنَا سُوءَ الْعَذَابِ بِمَا كَانُوا يَصْدِفُونَ﴾.

يبقى هو أصبح وصلنا احنا لآخر السورة خلاص، وهنبدا بالختام. ايه اللي حصل في سورة الأنعام من أول لحظة؟ من أول لحظة في سورة الأنعام ربنا بيقول: الله عز وجل خلق السماوات والأرض وجعل الظلمات والنور. جعل النور واضح وبين للناس أن دي طرق، الظلام ما حدش يمشي فيها.

ومن أول لحظة ربنا قال: إن النور واحد والظلمات شتى، زي ما قلنا في الختام هنا: ﴿وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ﴾ [الأنعام: 153]. وهييجي الختام دلوقتي اللي هقوله النبي صلى الله عليه وسلم في آخر تلات آيات: قل... قل... قل... الختام البياني بتاع سورة الأنعام في الآخر.

البيان الختامي لسورة الأنعام، فمن الأول ربنا قال إن الدنيا واضحة، ومن أول لحظة في السورة هم بيعرضوا، جه لفظ الإعراض الآيات في أول الوقتي هنا وصل بقى صد عنها مش أعرض عنها. وما تأتيهم من آية من آيات ربهم في أول سورة إلا كانوا عنها معرضين، كان لسه معرض في أول.

الآيات بقى سورة الأنعام كلمته وهو في نص البحر، استجارت فيه مشاعر واستثارت فيه مشاعر الرجاء وناقشته بالعقل، قال عايز آية حسية؟ قالت له سير في الأرض وشف مصارع المكذبين بنفسك. جابت له نموذج سيدنا إراهيم سواء كان نذر أو مناظر، جابت له اللي أنت بتفخر به ملة أبيك إراهيم. استعرضت الأقوام السابقين، جابت حسرته من كل الاتجاهات، اتعرض عليك كل الآيات، كلمته بكل الوسائل، كلمته بفالق الحب والنوى، كلمته فالق الإصباح، كلمته في الثمر والزرع، مين اللي أخرجها؟ مين اللي طلع الحب متراكم مشتبهاً وغير متشابه؟ طوفت به طوال السورة، هو عايز آية؟ وكل مرة عايز آية عايز آية عايز آية مش مكتفي، كل هذه الآيات والإعراض مستمر.

خلاص ده بقى ده بيسمى انتقل من الإعراض إلى صد عنها. صادف عنها دي المرأة اللي ممكن زوجها بيحبها وبيتقرب إليها وهي تعرض فخلاص دي ما فيش منها أمل دي بتطلق، ده بيستعمل العرب بيستعمل أيضاً هذه اللفظة، لأنها أشبه بالدابة المريضة اللي ما تعرفش تتعدل، الدابة اللي ما تعرفش تمشي الدابة رجليه معوجة كل ما تضبط لها الطريق وتقول لها تمشي كده تحوت كده لأن هي مريضة. فأصبح أن اللي عندهم ده مرض خلاص.

فجه بقى البيان الختامي في الآخر احنا وصلنا للمرحلة دي قمة الإعراض وقمة الصدوف عشان كده جت هنا ثلاث مرات، ﴿فَمَنْ أَظْلَمُ مِمَّن كَذَّبَ بِآيَاتِ اللَّهِ وَصَدَفَ عَنْهَا سَنَجْزِي الَّذِينَ يَصْدِفُونَ عَنْ آيَاتِنَا سُوءَ الْعَذَابِ بِمَا كَانُوا يَصْدِفُونَ﴾ [الأنعام: 157].

في الآخر بقى أنتم مش عاجبكم كل الآيات دي، ولا عاجبكم آيات القرآن، ولا آيات الخلق ولا آيات الثمار، ولا المناقشة ولا المناظرة وراء المجادلة ولا قصة سيدنا إراهيم ولا الأنبياء الثمان عشر اللي جم في السورة ولا أي حاجة! أومال أنتم مستنيين إيه! قلتم مستنيين كتاب، مستنيين إيه؟ ﴿هَلْ يَنظُرُونَ إِلَّا أَن تأتِيهُمُ الْمَلَائِكَةُ أَوْ يَأْتِيَ رَبُّكَ أَوْ يَأْتِيَ بَعْضُ آيَاتِ رَبِّكَ﴾ [الأنعام: 158]. أنتم أنتم مش نافع معكم غير أن القيامة تقوم، ما هو أنت وبالفعل لما يلاقيها ما تقوم هيقول إيه؟ آمنا لكن خلاص بعد إيه؟ ﴿يَوْمَ يَأْتِي بَعْضُ آيَاتِ رَبِّكَ﴾ ما قالش يوم، ما قالش يوم آيات ربك. يعني ربنا هنا جاب قال هل ينظرون إلا أن تأتيهم الملائكة أو يأتي ربك أو يأتي بعض آيات ربك؟ إتيان الله عز وجل ده أعظم آية سبحانه وتعالى الثاني يليق سلطانه، وإتيان الملائكة شيء عظيم، وبعد كده ده الترتيب بعض آيات ربي. مجرد بس إتيان بعض الآيات والنبي صلى الله عليه وسلم فسر ده بطلوع الشمس من مغربها. بعض الآيات لسه ما قالش ائتي لنا الملائكة ولا ائتينا ربك، أول لما ييجي بعض آياته يقول.

فنان طب ما أنا طول السورة بقول لك آمن، طول السورة باعرض عليك وباناقش وباطول بك وباخوفك وباستثير الضعف اللي جواك كأنك بشر وباقول لك تضرع ﴿فَلَوْلَا إِذْ جَاءَهُم بَأْسُنَا تَضَرَّعُوا وَلَكِن قَسَت قلوبهم﴾ [الأنعام: 43]، طول السورة بطوف بك عشان تؤمن، باعرض عليك الآيات ليه قمة الإعراب ده؟ فسورة الأنعام بتصور قمة الوضوء مع قمة الإعراض، سورة الأنعام بتوضح قمة الآيات في الكون مع قمة الإعراض. لذلك فيها أشواط تدبرية عالية جداً في سورة الأنعام.

لكن بالرغم من ذلك جابت أعلى لفظ في الإعراض، زي ما سورة الأنعام من أكثر السور اللي جابت ألفاظ جابت كلمة بصائر وبينة وهدى ورحمة وتفصيل الألفاظ دي كلها جت جمعت في سورة الأنعام وممكن تفرقت في سور أخرى، جمعت في سورة الأنعام كذلك أعلى لفظ عن الإعراض خصصت به سورة الأنعام، عجيب شيء عجيب، قمة الوضوح مع قمة الإعراب.

فأنتم مستنيين إيه بقى؟ إذا لم ينفعكم القرآن ﴿هَلْ يَنظُرُونَ إِلَّا أَن تَأْتِيَهُمُ الْمَلَائِكَةُ أَوْ يَأْتِيَ رَبُّكَ أَوْ يَأْتِيَ بَعْضُ آيَاتِ رَبِّكَ يَوْمَ يَأْتِي بَعْضُ آيَاتِ رَبِّكَ لَا يَنفَعُ نَفْسًا إِيمَانُهَا لَمْ تَكُنْ آمَنَتْ مِنْ قَبْلُ﴾ [الأنعام: 158]. لأنه أول ما يشوف الآاية هيقول إيه؟ يعني معنى كلمة هنا يوم يأتي بعض إن أول لما يشوف بعض الآيات يقول آمنت. طب ليه؟ لذلك برضه في سورة الدخان: ﴿يَغْشَى النَّاسَ هَذَا عَذَابٌ أَلِيمٌ * رَبَّنَا اكْشِفْ عَنَّا الْعَذَابَ إِنَّا مُؤْمِنُونَ﴾ [الدخان: 11-12]، فارتقب يوم تأتي السماء بدخان مبين يغشى الناس هذا عذاب أليم. أول لما بيشوف الدخان يقول ربنا اكشف عنا العذاب إنا مؤمنون. طب ما أنا عمال أكلمك من أول حم في سورة الدخان، من أول حم في سورة غافر باعرض عليك الآيات وأنت عمال تجادل ﴿مَا يُجَادِلُ فِي آيَاتِ اللَّهِ إِلَّا الَّذِينَ كَفَرُوا﴾ [غافر: 4]. من أول حم أنا عمال أعرض عليك الآيات، مجرد بس شاف الدخان قال آمنت.

طب ليه؟ ليه الناس؟ قوم فرعون شاف العصا واليد والطوفان والجراد والقمل والضفادع والدم آيات مفصلات، شاف كل ده شاف البحر بيشق وفي الآخر هو بيغرق يقول ﴿آمَنتُ أَنَّهُ لَا إِلَهَ إِلَّا الَّذِي آمَنَتْ بِهِ بَنُو إِسْرَائِيلَ وَأَنَا مِنَ الْمُسْلِمِينَ * آلْآنَ﴾ [يونس: 90-91]. فهنا ﴿يَوْمَ يَأْتِي بَعْضُ آيَاتِ رَبِّكَ لَا يَنفَعُ نَفْسًا إِيمَانُهَا لَمْ تَكُنْ آمَنَتْ مِنْ قَبْلُ﴾.

ده بالنسبة للمشركين، وبالنسبة للعصاة المؤمنين المعرضين عن الأعمال أو كسبت في إيمانها خيراً، الناس اللي هي يعني الجزء الأول ده شوف برضه إيه أاسلوب القرآن بيجمع، الكافر لما يشوف الشمس تطلع من المغرب هيقول آمنت، والعاصي شوف الشمس طالعة بقى الله أكبر دلوقتي الله أكبر دلوقتي هتصلي، يشوف أنا نويت أصوم، فدلوقتي يعني هيبدأ بقى إيه؟ يكسب في إيمانها خيراً، يعني في ناس مؤمنة بس ما كانتش بتكسب الخير في الإيمان، يعني ما كانتش بتزيد هذا الإيمان بالأعمال كأن مكبر دماغه، فأول لما يشوف بعض آيات ربك يبدأ يجتهد في الطاعات، هنا ما ينفعش خلاص. وبعض العلماء هنا قال أو كسبت قال ده التوبة، خص المعنى ده بالتوبة، قال أول لما يشوف آيات يوم القيامة يقول تبت الآن، بعد إيه؟ ما عدش خلاص.

قل انتظروا طالما أنتم بقى مش نافع معكم حاجة وقاعدين مش أنتم قاعدين مستنيين؟ انتظروا، مش أنتم عايزين آية؟ خليكم مستنيين الآاية، مش أنتم طول السورة عايزين آية؟ خليكم خلاص لأن ده الختام. هنا تجد أن الخطاب شديد ومفاصلة ومش مشغول بهم خلاص، هنا النبي صلى الله عليه وسلم في الختام اللي بيتكلم عن نفسه خلاص أنا خدت طريق بيتكلم عنه هو، خلاص ﴿قُلْ إِنَّنِي هَدَانِي رَبِّي﴾ [الأنعام: 161]، ﴿قُلْ إِنَّ صَلَاتِي وَنُسُكِي﴾ [الأنعام: 162]، ﴿قُلْ أَغَيْرَ اللَّهِ أَبْغِي رَبًّا﴾ [الأنعام: 164]. ثلاث آيات ورا بعض قل. خلاص ما أنت مش هتلتفت لهم خلاص، ده الختام، أنت طول السورة أتكلمت معهم.

فهنا انتظروا، طب وأنت هتعمل إيه لأن الآية دي فيها تهديد، فيها عذاب إن منتظرون، أمر عجيب جداً، مش مثلاً انتظروا أنا هخلي ربنا ينزل عليكم العذاب انتظروا خمسة وثلاثين ألف يوم والساعة هتقوم، انتظروا أنا ما أعرفش أنا برضه عبد وهاحسن في الطاعة حتى يتم الله عز وجل على النعمة ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾ [الأنعام: 154]. انتظروا أنا منتظرون لأن أنا عبد انتظروا وأنتم منتظرون.

﴿إِنَّ الَّذِينَ فَرَّقُوا دِينَهُمْ وَكَانُوا شِيَعًا لَّسْتَ مِنْهُمْ فِي شَيْءٍ إِنَّمَا أَمْرُهُمْ إِلَى اللَّهِ ثُمَّ يُنَبِّئُهُم بِمَا كَانُوا يَفْعَاعَلُونَ﴾ [الأنعام: 159]. الختام أن كأن من أهم الأسباب، شوف تخيل عندنا كده في سورة الأنعام كم إشارة كده لأهل الكتاب؟ بعض العلماء هنا قال إن المقصود بآية دي أهل الكتاب، طب إيه علاقة الآية دي أن هم بيصدفوا عن الآيات وأن هم مش نافع معهم لغاية لما تيجوا يوم القيامة؟

كأن من أهم أسباب إعراضهم وإن كان ده مش عذر لهم تأتي اللي شافوه ما بين اليهود والنصارى، إن الذين فرقوا دينهم وكانوا شيعاً، أن كان الدين واحد، ما قالش فرقوا لأنهم قال فرقوا إيه؟ دينهم. هو أصلاً واحد، ﴿الْحَمْدُ لِلَّهِ الَّذِي خَلَقَ السَّمَاوَاتِ وَالأَرْضَ وَجَعَلَ الظُّلُمَاتِ وَالنُّورَ﴾ [الأنعام: 1]، ﴿وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [الأنعام: 153]، ﴿قُلْ إِنَّنِي هَدَانِي رَبِّي إِلَى صِرَاطٍ مُّسْتَقِيمٍ﴾ [الأنعام: 161]. هو دين واحد صراط واحد سبيل واحد نور واحد، تفريق اليهود والنصارى واختلافهم وتنازعهم مع بعض أبعدهم عن ملة إراهيم خلى الناس تكفر وتشك بالدين، بل كان اليهود يجرؤوا المشركين ويقولون شريكين هؤلاء أهدى من الذين آمنوا سبيلاً، يقولون عن المشركين إنهم أهدى من المؤمنين، وكان المشركين لما يحبوا يتحججوا ضد دين يقولوا للمسلمين لأ، يقولوا للمسلمين عن النصارى اللي هي ما وجدنا في الملة الآخرة أن هذا إلا اختلاق في سورة ص، بعضهم قال إن ما وجدناش ده في الملة الآخرة النصارى، إن النصارى عندهم التثليث واحنا عندنا آلهة زي ما النصارى ثلاثة احنا عندنا عشرة إيه المشكلة يعني؟ إيه موضوع التوحيد اللي أنت جاي به ده؟

فأحياناً اللي أوتوا الكتاب هم السبب لصد الناس عن الدين، وده خطورة أن اللي يبقى عامل عن الدين العاملين للدين يتنازعوا ويفرقوا الدين شيعاً ويقطعوا الدين شيعاً، فيصرفوا الناس عن الدين، ده عقوبة شديدة جداً، عقوبة شديدة أن هم ممكن هنا يذوقوا العذاب الشديد بسبب صد الناس عن الدين، كما قال الله عز وجل سورة النحل: ﴿وَتَذُوقُوا السُّوءَ بِمَا صَدَدتُّمْ عَن سَبِيلِ اللَّهِ﴾ [النحل: 94]، بسبب صد الناس عن دين بسبب التفرقة، فيقول الله عز وجل: ﴿إِنَّ الَّذِينَ فَرَّقُوا دِينَهُمْ﴾.

عملوا إيه؟ جم على الدين وخدوا منه وبعدين قالوا الحتة اللي احنا خدناها دي هي الدين كله، وبعدين أقنعوا الأتباع أن ده الدين كله، الأتباع عشان جهلة تعصبوا فتشيعوا، فجه واحد تاني بص قال إيه ده؟ ده دين ده ناقص، قام واخد حتة من الدين اللي هي كانت ناقصة عند الأولاني وقال له اللي مش معك ده الدين اللي معي ده هو الدين، وجاب أتباع وأقنعهم أن اللي ما عدا الدين فبقوا شيعاً.

أنتم فاكرين كلمة شيعة زي ما أخدناه في سورة الأنعام برضه: ﴿أَوْ يَلْبِسَكُمْ شِيَعًا وَيُذِيقَ بَعْضَكُم بَأْسَ بَعْضٍ﴾ [الأنعام: 65]، وقلنا أن مرحلة البأس أن يبقى بأسنا بيننا شديد إزاي؟ يبدأ الأول اللبس يحصل أن اللبس في الدين أو يلبسكم شيعاً ويذيق بعضكم بأس بعض، ثلاث مراحل كنا قلناهم، المرحلة الأولى اللبس أن الدين ما يبقاش واضح عند الناس فنبقى شيع فيبقى في بأس بيننا.

فربنا بيقول هنا دول عقوبتهم أن النبي صلى الله عليه وسلم يتبرأ منهم، كثير من العلماء حمل الآية دي مش بس على اليهود والنصارى، قالوا إن كانت ممكن تبقى السياق يقول النبي في اليهود والنصارى، لكن هي في كل فرقة ضالة فرقت الدين، وكل ناس ساهموا في تفريق المسلمين لهم نصيب من هذه الآية، وكانت أم سلمة تقول فليتق امرئ أن يتبرأ منه النبي صلى الله عليه وسلم وتذكر هذه الآية، وكانت تذكر هذه الآية وغيرها من الصحابة يذكرون هذه الآية في اللي خرجوا على سيدنا عثمان وفي الفرقة اللي حصلت مع سيدنا عثمان كان خوفوا الناس منها بهذه الآية.

﴿إِنَّ الَّذِينَ فَرَّقُوا دِينَهُمْ وَكَانُوا شِيَعًا لَّسْتَ مِنْهُمْ فِي شَيْءٍ﴾ النبي صلى الله عليه وسلم يتبرأ منهم، وقيل منهم في شيء أي لست في هدايتهم من شيء لن تستطيع أن تهديه، المتعصب ده المتشيع ده مستحيل مستحيل تهديه، ده إنما أمرهم إلى الله، دي من عند ربنا، أنت مهما حاولت معه بالحجج في الغالب ما بيفوقش على حسب ما شيخه يحود، على حسب ما المتشيع له يحود وهو يحود معه.

﴿إِنَّ الَّذِينَ فَرَّقُوا دِينَهُمْ وَكَانُوا شِيَعًا لَّسْتَ مِنْهُمْ فِي شَيْءٍ إِنَّمَا أَمْرُهُمْ إِلَى اللَّهِ ثُمَّ يُنَبِّئُهُم بِمَا كَانُوا يَفْعَلُونَ﴾ يبقى تفريق وتقطيع الدين خطر جداً، ﴿كُلُّ حِزْبٍ بِمَا لَدَيْهِمْ فَرِحُونَ﴾ [الروم: 32].

يقول الله عز وجل وتقطعوا أمرهم بينهم زبراً سورة المؤمنون، كان فيه معنى جميل قوي ذكره الشيخ سلمان العودة في كتابه كيف نختلف؟ بيقول وتقطعوا أمرهم بينهم زبراً، الزبور ده الصحيفة من الدين، فبيقول كل واحد لما جه يقطع قطع حتة من هو الكتاب المفروض يفضل مجموع فكأنهم قطعوا بعض الأوراق من الدين وقال هو ده الدين، ثم فرح به كل حزب بما لديهم فرحون، دي المصيبة.

وده نفس المعنى اللي ربنا قاله في سورة الأنعام أيضاً أن دي جريمة، تجعلونه قراطيس، أن القرآن يتقسم حتت قراطيس زي ما قلنا أن يبقى الكتاب اهو يتقسم دفاتر ملفات وكل ملف يتفصل، فكل الطائفة تيجي تعجب بحتة من الدين، ده يعجب بالدعوة، وده يعجب بالجهاد، وده يعجب بالعلم، وده يعجب بالسياسة الشرعية، وكل واحد ده عن بقية الدين، ده يقطع ده وياخد القطعة دي، وبعد ما ياخد القطعة دي فاللي حواليه يقولوا إيه ده! الدين اللي معك ناقص، يقوم واخد قطعة ويقول إيه؟ أنا معي الدين الكامل، فده يبص على ده وهو صادق ويقول له أنت الدين اللي معك ناقص، وده يبص على ده ويقول له أنت الدين اللي معك ناقص، والأتباع مين يسقفوا؟ أيوه فعلا ناقص وعمالين يسقفوا، وتقوم الشيعة وتحدث الفرقة ويحدث.

إن الذين فرقوا لازم يبقى متكامل، لازم النظرة تبقى متكاملة، إن الذين فرقوا دينهم وكانوا شيعاً لست منهم في شيء إنما أمرهم إلى الله. هذه الآية أيضاً في أهل القبلة.

زي ما الآية اللي قبلها قالوا إن لا ينفع نفسا إيمانها لم تكن آمنت في المشركين، أو كسبت في، قالوا في أهل القبلة أيضاً، كما إن الآية اللي بعدها كما أنها تصلح لليهود، أيضاً في اللي فرقوا دين الإسلام من المسلمين: ﴿مَن جَاءَ بِالْحَسَنَةِ فَلَهُ عَشْرُ أَمْثَالِهَا﴾ [الانعام: 160].

الإمام الطبري بيقول: أنا غريب جداً ورائع جداً في الآية دي. بيقول: الحسنة هنا التوبة من التفرقة، وأن هذه حسنة عظيمة، إن اللي يقدر يرجع تاني بعد ما فرق ويجمع، هذه حسنة عظيمة. ويرجع يجمع الناس على التوحيد، لذلك كتير من السلف، أي: الحسنة هنا هي لا إله إلا الله، وأنه يرجع يجمع الناس على التوحيد تاني بعد ما تفرقوا، هذه حسنة عظيمة. ﴿وَمَن جَاءَ بِالسَّيِّئَةِ فَلَا يُجْزَىٰ إِلَّا مِثْلَهَا وَهُمْ لَا يُظْلَمُونَ﴾ [الأنعام: 160].

هنا نبدأ بقا إيه؟ خلاص، البيان الختامي لسورة الأنعام. هنا النبي صلى الله عليه وسلم يقف بعد كل النقاش ده والجدال والتوضيح، وزي ما قلنا إنت لما ترجع بقا تقرا تاني كمية النقاش والوضوح، وتجد إن السورة اتكلمت عن العقيدة في الله لكن باسلوب عجيب غير أي كتاب تاني، استثارت لحظات الضعف عند الإنسان مهما بقا معاه أسباب هيضل لسه إنسان، هيضل لسه ضعيف. الضعف محيط به من كل جهة. قطرة الدم لو وقفت في مخه تخليه مشلول. إن البعوضة ممكن تضايقه وتموته، إن أبسط شيء إنه ينام غصب عنه وهو القاهر فوق عباده. قالوا من معاني القهر النوم. فالسورة طوفت بكل الحاجات اللي في الإنسان دي بتقهره، تعرفه إن له رب.

عشان كده هنا يقول: ﴿قُلْ أَغَيْرَ اللَّهِ أَبْغِي رَبًّا﴾ [الأنعام: 164]. أي: أغير الله الذي أخبرتكم بصفاته في هذه السورة أبغي ربا؟ فتجد هذه السورة المتكاملة. وهنيجي في الآخر دلوقتي نقول: طب ليه بقى الأنعام السورة؟ ليه الأنعام؟ قل: إنني الختام بقا خلاص، أنا أنا ربنا وصلني للنور: ﴿الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ وَجَعَلَ الظُّلُمَاتِ وَالنُّورَ﴾ [الأنعام: 1]. زي سيدنا إبراهيم بعد ما ربنا سبحانه وتعالى اجتباه وهداه فبيقول: ﴿إِنِّي وَجَّهْتُ وَجْهِيَ﴾ [الأنعام: 79]. هنا برضو الختام زي ما سيدنا إبراهيم قالها، إن النبي صلى الله عليه وسلم بيقولها وهو بيتبع ملة إبراهيم: بيقول إنني هداني ربي إلى صراط مستقيم ديناً.

اللي أنا فيه ده دين، ده مش فكر، ده مش رأيي، ده مش استنتاج، ده مش تذوق، دي مش معاني، اللي أنا فيه ده دين، مش فكرة هتنضف مع الزمان ونلاقي فكرة غيرها. لأ: ﴿إِنَّنِي هَدَانِي رَبِّي إِلَىٰ صِرَاطٍ مُّسْتَقِيمٍ دِينًا﴾ [الأنعام: 161] إيه؟ قيمًا، وفي قراءة قيماً، أي: هو يقيم غير معوج، ويقوم أي إعوجاج في الأرض: ﴿إِنَّ هَذَا الْقُرْآنَ يَهْدِي لِلَّتي هِيَ أَقْوَمُ﴾ [الإسراء: 9]. أي إعوجاج في الأرض يقومه القرآن. ﴿قُلْ إِنَّنِي هَدَانِي رَبِّي إِلَىٰ صِرَاطٍ مُّسْتَقِيمٍ دِينًا قِيَمًا مِّلَّةَ إِبْرَاهِيمَ حَنِيفًا﴾ [الأنعام: 161].

وهنا يذكر إبراهيم مرة أخرى بعد الموقع الجهادي اللي قام به الدعوي والتوضيح اللي قام به في سورة الأنعام، يذكر هنا أنا أسير على ملة إبراهيم. ولكن أنتم من بدلتم، أنتم من حرفتم، أنتم بتدعو أن أنتم بتسيروا على ملة إبراهيم؟ لأ. هنا لازم دايما أهل الباطل خد بالك لازم أهل الباطل هيسرقوا مصطلحات أهل الحق. يعني تجد حاجة عجيبة اوي لما تيجي تبص في القوانين الوضعية حتى اللي جاية من فرنسا وغيرها تجد إن هم بيستعملوا مصطلحات شرعية.

يقول لك المشرع الفرد، تلاقيهم بيستعملوا وأشار لذلك الشيخ أحمد شاكر في حاشيته في عمدة تفسير ابن كثير إن هم فين المصطلحات بتاعة الشرع؟ في القانون الوضعي بيستعملوا مصطلحات بيضفوا على كلامهم المصطلحات الشرعية. فهم بيدعوا هنا أن هم اتباع سيدنا إبراهيم. لأ، إنت تسحب المصطلح ده منهم. ﴿قُلْ إِنَّنِي هَدَانِي رَبِّي إِلَىٰ صِرَاطٍ مُّسْتَقِيمٍ دِينًا قِيَمًا مِّلَّةَ إِبْرَاهِيمَ حَنِيفًا وَمَا كَانَ مِنَ الْمُشْرِكِينَ﴾ [الأنعام: 161].

إيه ملة إبراهيم حنيفا؟ هو إيه دين إبراهيم كامل؟ ﴿قُلْ إِنَّ صَلَاتِي وَنُسُكِي وَمَحْيَاي وَمَمَاتِي لِلَّهِ رَبِّ الْعَالَمِينَ﴾ [الأنعام: 162]. احنا استنى قد ايه كده؟ عشر دقايق. طب هنزود شوية عشان الختام بقا النهارده.

إيه دين سيدنا إبراهيم؟ الدين الشامل، هنا بنذكر أربع حاجات، إنت مأمور أنك تقولهم. ولما تعرف دينك والدين لما يعرف بغير كده يبقى دين ناقص، مش هو ده الدين. يعني اللي يقول إن صلاتي ونسكي لله رب العالمين، بس كده؟ فيه نقص. يبقى الدين لو وصل للناس إنه صلاة ونسك بس يبقى ده الناقص، مش ده دين ربنا، مش دين ملة إبراهيم. لأ، ده النقص، دي العلمانية. الحتة العلمانية بتسيب الجزء من النسك كمان، هي صلاتي بس، ما بتصليهاش صح كمان. فلأ، هو لازم الدين شامل على بعضه، الحياة كلها لله. ﴿إِنَّ صَلَاتِي وَنُسُكِي وَمَحْيَاي وَمَمَاتِي لِلَّهِ رَبِّ الْعَالَمِينَ﴾ [الأنعام: 162].

ليه الأربعة دول؟ الصلاة أعظم العبادات، وده عبادة في كل عبادة بين العبد وبين ربه، زي الذكر، زي الصيام، دي عبادة الإنسان ممكن في مكان لوحده ما يعملش أي علاقة باللي حواليه ولا ولا يبقى فيه حاجة حتى ممكن ظاهرة للمجتمع، إن دي حاجة بينه وبين الله. ادي الصلاة، وبدأ بها لأنها الأهم، وبيقوم عليها كل شيء، عمود الإسلام. ونسكي.

يعني إيه نسكي؟ العلماء اختلفوا في كلمة نسكي، بعضهم قال: أي قربان أقدمه، أي بذل أبذل قربان الذبائح. وقالوا: دي لها علاقة باسم سورة الأنعام، وبالميتة اللي ذكرت، وبتحريم بعض الأنعام، فرد على المشركين عملوه إن النسك الذبائح القربان الأطعمة لا تكون إلا لله. يبقى دي لو ليها علاقة بالسياق وبالصورة، إن النسك هنا المقصود به القربان، كل ما يقدم لله من مال، من ذبائح، بيقدم فوق خالص لله، لو هيقدم بنية التعبد والتقرب لا يكون إلا. يعني ما ينفعش تتقرب للقبر أنك تذبح عند القبر، عشان هو يحل لك مشكلتك، ما ينفعش، ده لا يكون إلا الله.

بعضهم قال: النسك المقصود به الشعائر. يعني إيه الشعائر؟ لكل أمة جعلنا منسكاً، سورة الحج، وقالوا إن المناسك اللي هي الحج، وده أعم من ذلك. بعضهم دخل في النسك العيد، صلاة العيد، كل أمة لها شعائر، لها سمت، لها عيد، لها قواعد، لها زي، ممنوع بالنسبة مثلاً للنساء ممنوع تتخطاه، لها شكل، كل أمة مميزة، فكذلك الإسلام جاء بشعائر عامة، بأماكن عبادة لها شكل معين زي عرفة، أماكن معينة، والذبائح بطريقة معينة مش أي حاجة تذبح، والفرحة بتاعة المسلمين لها طريقة معينة، والأيام بتاعة العيد لها ده كله يكون خالص لله.

ما ينفعش نتلقاه من عند الغرب أو الشرق. يعني تلقي أيام العيد من عند الغرب ده مخالفة في النسك؛ لأن كده النسك مش لله. تلقي طريقة الهيئة، شكل الشعر واللبس، ولبس المرأة، وبالنسبة للرجل الشكل بتاع اللحية إن هو يبقى معمول بشكل معين تلقيه الغرب، ده خارج النسك الإسلامي، لأ، ده لازم يكون لله، لا تتلقاه من غير الدين بتاعك.

تخيل إن الدين بيشمل عبادتك، حياة مشاعرك الأول، وشعائرك، وشكلك، وذبائحك، والقربان، ومالك، وبعد كده كل حياتك، فهي خصصت الاتنين دول، النسك عشان الذبيحة، عشان الآيات بتاعة الميتة، وقيل: نسك أعم من ذلك هي كل الشعائر الإسلام، كل زي الأذان، الأذان من شعائر الإسلام، رفض النبي صلى الله عليه وسلم الناقوس، رفض الوسيلة مجرد وسيلة لجمع الصلاة، كان ممكن تبقى زي اليهود أو زي النصارى، لأ، ليه شعيرة خاصة جمع الناس للصلاة، مش وسيلة جمع جمعهم هما للصلاة. واللي يقرأ كتاب زي مثلاً: اقتضاء الصراط المستقيم زي شيخ الإسلام ابن تيمية يفهم إزاي اقتضاء الصراط المستقيم، إن من مقتضيات أنك تسير على الصراط المستقيم أنك تخالف أصحاب الجحيم، مخالفة أصحاب الجحيم.

أن فيه مخالفة بل المخالفة حتى للشيطان، إنت ما بتاكلش بالشمال عشان الشيطان، ما بتمشيش بالحذاء برجل واحدة عشان الشيطان، ما بتشربش من الحتة المكسورة في الإناء عشان الشيطان. يعني إنت ما بتصليش أوقات معينة عشان الشيطان، ده كل دي حاجات، ده غير الكفار بقا، ما أنا بكلمك حتى عن الشيطان اللي مش متشاف، فلازم فيه صفة خاصة. ده النبي صلى الله عليه وسلم يقول: «لا تغلبنكم الأعراب على اسم صلاتكم العشاء»، يسمونها العتمة وهي العشاء. يعني اسم الصلاة ما ينفعش يتغير، طب يا عم احنا صلينا أربع ركعات بالليل اسمها العتمة إحنا نازلين، لأ اسمها العشاء، الأعراب بيسموها العتمة، النبي صلى الله عليه وسلم يحذر أن هم لبسوقم؛ لأن في منازعة حتى في المسميات، فلازم يبقى فيه نسك خاص بأهل الإسلام.

ثم الحياة بقا، ودي اللي الغرب مش قادر يفهمها، ودي اللي حاول يألف علشانها علي عزت بيجوفيتش: الإسلام بين الشرق والغرب، أن الطغيان المادي عندهم ومش قادرين يفهموا يعني إيه أنك تعيش بالدين، هو يفهم أنك تقفل على نفسك معبد وتتعبد، إنما هو مش فاهم يعني إيه تتعبد، تخرج بره ده أن حياتك تبقى بالدين. لذلك ديني الوحيد اللي تجد أن في كل أماكن الشغل فيه مسجد أو فيه مصلى أو فيه حتى إن شاء الله قياس يتفرج يصلوا، تجد حتى يعني كتير من الإخوة اللي بيسافر يحكي لي يقول لي ممكن أن المطارات العالمية اللي بيجتمع فيها أغلب دول العالم وتبقى ترانزيت لكل دول العالم تجد فيه مسجد ومعرفش إيه وكنيسة، الوحيد اللي بيتفتح والوف مؤلفة داخلة خاجة وهو في مسجد المسلمين، التانيين هو مش قادر يجمع، هو يوم في ساعة بيروحوا شوية طقوس ويمشي، هو مش عارف يعيش، ما عندهمش.

إحنا عندنا آية مبهرة: ﴿فَإِذَا قُضِيَتِ الصَّلَاةُ فَانتَشِرُوا فِي الْأَرْضِ﴾ [الجعة: 10]. إيه ده؟ يعني نصلي ونشتغل؟ يعني نحج: ﴿لَيْسَ عَلَيْكُمْ جُنَاحٌ أَن تَبْتَغُوا فَضْلًا مِّن رَّبِّكُمْ﴾ [البقرة: 198]. يعني ممكن نحج ونتاجر؟ يعني ممكن بعد ما نصلي نشتغل؟ يعني ممكن أبقى في السوق وبعدين أصلي وأرجع للسوق تاني؟ ﴿رِجَالٌ لَّا تُلْهِيهِم تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ﴾ [النور: 37]. يعني بتاجر وبابيع وبأذكر وبأصلي وبأزكي مع بعض؟ أه مع بعض. هما عندهم، إحنا عندنا عادي، لكن إحنا عندنا عادي ده موجود عندنا، هو ده اللي مش قادرين يتخيلوه، مش هي دي مشكلتهم التداخل، ولذلك قلنا إن في آيات سورة البقرة التداخل ده مقصود، من آيات الوصية والمال والتجارة والصيام وبعدين تيجي آيات الصلاة، لأ تيجي القتال مع الحج، والطلاق مع الصلاة والزكاة، والربا مع المعاملات المالية ومعرفة الله وآية الكرسي.

إزاي التداخل ده؟ إزاي التداخل ده؟ ليه التداخل بين العبادات والمعاملات؟ هذا التدخل الذي لن ينزع إلى يوم القيامة، هذا الدين عصي على العلمنة، لن ينزع إلى يوم القيامة. ﴿إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ﴾ [الأنعام: 162]. دي حياتي. نيجي بقا ومماتي.

معلش النهارده الدرس هيبقى كومبو شوية عشان الآية الختام هنطول شوية، معلش نستنى قد ايه كده؟ هزود أنا بقا معلش. ومماتي، العلماء استغربوا، يعني إيه ومماتي لله؟ يعني العلماء هنا قعدوا استغربوا، بعضهم قال: أنك بعد ما تموت أعمالك لله. طب إزاي بقا أن ما تموت أعمالك لله؟ أنك تنوي بأعمال تعمل أعمال، تنوي أنك بعد ما تموت تستمر، زي الصدقة الجارية، زي الوصية، زي الوقف. قالوا: دي أعمال تستمر بعد شوف المؤمن بيفكر بأعمال ما بعد الموت.

بعضهم قال: دي الأعمال التي تستمر بعد موتك: ﴿وَنَكْتُبُ مَا قَدَّمُوا وَآثَارَهُمْ﴾ [يس: 12]. وبعضهم قال: أنك موتك تختار هتبقى في سبيل الله زي القتال والشهادة، وأن هنا بيطلب الشهادة. وبعضهم قال: وابن عاشور ذكر المعنى ده، ما شفتش حد ذكره غيره بس معنى غريب شوية، قال: ده خاص بالنبي صلى الله عليه وسلم، أن حتى النبي صلى الله عليه وسلم وهو ميت له أعمال لله، أن يرد السلام على من سلم عليه، أن يوم القيامة يشفع لنقف عند الصراط، أن يقف عند الحوض، أن حتى في ممات النبي صلى الله عليه وسلم أن الأحكام بتاعتك مستمرة، ثابتة، أنك ما ترفعش صوتك عند قبر النبي، ما ترفعش صوتك عند قبر النبي صلى الله عليه وسلم في المسجد النبوي، أن أياً كان أن هم قعدوا تخيل أنك إنت تقعد تفكر زي الموتة بتاعتي.

عجيب قوي أنك يعني جميل قوي أنك تشوفني في الصينيين وعمالين يفكروا أنا عايز أخلي الموتة بتاعتي زي ما ربنا قال، أعمل إيه؟ واحد يقول: أه أوصي، واحد يقول: أعمل وقف، واحد يقول: أعمل صدقة جارية، واحد يقول: طب أنشر علم، واحد يقول: طب ولد صالح يدعو. تخيل هو عمال يفكر، ده حاجة مبهرة عندنا في الدين، أن إنت بتفكر أعمال فيما بعد الموت كيف تكون لله؟ مش تبقى للذكر وخلاص، يعني إنت عايز أعمال مش بس عشان الناس تقول فلان ده فلان ده ده باشا، ده فلان ده ده كان، لأ، إنت مشغول أن إزاي عملك يكون لله حتى بعد الموت؟

﴿وَمَحْيَايَ وَمَمَاتِي لِلَّهِ رَبِّ الْعَالَمِينَ * لَا شَرِيكَ لَهُ وَبِذَٰلِكَ أُمِرْتُ وَأَنَا أَوَّلُ الْمُسْلِمِينَ﴾ [الأنعام: 162-163]. أي أول من يطبق هذا في هذه الأمة. ﴿قُلْ أَغَيْرَ اللَّهِ أَبْغِي رَبًّا﴾ [الأنعام: 164]. إنتم بتطالبوني أغير فالق الإصباح، والجعل الليل سكناً، واللي أخرج الثمرات المتشابهة وغير المتشابهة، واللي بينجيكم من ظلمات البر والبحر، واللي خلق السماوات والأرض، واللي جعل الظلمات والنور، واللي فعل كل هذه الأفعال العجيبة طوال سورة طوال السورة أفعال عجيبة منسوبة إلى الله عز وجل، أغير الله الذي ذكر بكل هذه الصفات في هذه السورة أبغي ربا؟ وجه في سورة فغير الله أبغي حكماً، دي الربوبية والحكم الألوهية، ﴿أَغَيْرَ اللَّهِ أَبْغِي رَبًّا﴾.

وهو رب كل شيء، ثم إلى ربكم. عجيبة أوي دي! مش ثم إلى ربي، ثم إلى إيه؟ ربكم. أي أنكم لم ترضوا به ربا في الدنيا، فهو ربكم غصب عنكم في الدنيا وفي الآخرة.

بيقول: أغير الله أبغي إيه؟ رب أنا ارتضيت أن هو ربي. طب أنتم مش راضيين؟ طب أنتم هترجعوا له. ثم إلى ربكم مرجعكم فينبئكم بما كنتم فيه تختلفون. الختام زي ما جابكم ممكن يستبدلكم، وأنتم جيتوا بعد أقوام آخرين، ومكة ياما فيها أقوام وعذبوا بسبب المعصية في الحرام. واللي يقرأ كتب في التاريخ مكة يعني من بعد سيدنا إسماعيل لغاية ما جه قريش واستقرارهم، تجد كمية أقوام تم استبدالهم بسبب المعصية. وهو الذي جعلكم خلائف الأرض. قيل خلائف الأرض أن بيجي قوم يخلفوا قوم، بقوم يخلفوا قوم. وأن دي بترد إلى أصل السورة: سيروا في الأرض فانظروا كيف كان عاقبة المكذبين. خلائف الأرض يعني قوم يخلفوا بعضهم، وقيل خلائف الأرض لا، الله عز وجل جعلكم، دي كلمة: إني جاعل في الأرض خليفة.

كلمة خليفة الله في الأرض، الكلمة دي بعض العلماء انتقدها، منهم شيخ الإسلام ابن تيمية، حتى الشيخ عامل كتاب كده كتيب اسمه لا يصح أن يقال خليفة الله في الأرض. لكن حقيقة في أيضا كثير من العلماء أجازت الكلمة، زي الإمام الطبري وأظن الإمام القرطبي وغيرهم. كتير برضه من المفسرين وقال: أيا كان هو الخلاف لفظي، أن المعنى خلائف الأرض أو خليفة الله وأن جاء في الأرض خليفة؟ أي يقيموا حكم الأرض. الملائكة تطبق أمر الله في السماء، وأنتم البشر جاء الله بكم إلى الأرض. لذلك هو ربنا بيقول للملائكة: إني جاعل إيه في الأرض، أنتم في السماء، إني جاعل في الأرض خليفة. فلابد أن يخلق من الأرض، لن تكونوا أنتم. إني جاعل في الأرض خليفة. فربنا في ختام سورة الأنعام بيقول لهم الحكمة الأساسية من وجودكم أنكم تطبقوا الشرع.

يبقى الآية لها معنيين: وهو الذي جعلكم خلائف الأرض، معنيين. المعنى الأول: كما أنه جاء بكم بعد قوم آخرين هو قادر على استبدالكم. المعنى الثاني: أن الحكمة الأساسية من وجودكم هو تطبيق شرع الله. المعنيين وصلوا؟ أنا هصحيكوا لما أخلص، بس معايا؟ وهو الذي جعلكم خلائف الأرض، إحنا عايزين نقفل التكييف ده بس، خلاص بقا. وهو الذي جعلكم خلائف الأرض. لو قلنا معنى، اللي ناخد المعنى الأول: كما أنه جاء بكم بعد قوم آخرين قادر على أنه يخسف بكم الأرض ويأتي بقوم آخرين. طب والنعمة اللي إحنا فيها دلوقتي ورفع بعضكم فوق بعض درجات؟ ده بلاء، ده بلاء. على القول الثاني أن الحكمة الأساسية من وجودكم في الأرض أن أنت اللي هو خليفة الله في الأرض: يا داوود إنا جعلناك في الأرض خليفة فاحكم بين الناس بالحق ولا تتبع الهوى. أن الغرض هنا من كلمة خليفة وخلائف الأرض أنك تطبقوا شرع الله في الأرض، وأن فروقاتي المادية ليست علامة على رضا أو بغض، وأن التفرقة المادية اللي بينكم ديت هذه ليست علامة على قرب من الله أو بعد من الله عز وجل. ده بلاء ورفع بعضكم، لازم تفرق ما بين تطبيق شرع الله في الأرض وبين تقسيم الأرزاق اللي موجود.

لذلك في تفرقة هامة جدا بين قام بها أحد العلماء في رسالة ماجستير. قال: فيه فارق ما بين بخلاف والاستعمار. عمارة الأرض غير الخلافة في الأرض، ودايما الناس بتركز على عمارة الأرض وتسيب الخلافة في الأرض. العمارة: البناء الدنيوي للأرض. الخلافة: إقامة شرع الله في الأرض. الخلافة أعم من العمارة. الخلافة تشمل عمارة الأرض دنيويا واقامة شرع الله عز وجل دينيا. لذلك يقول لك إيه الغرض الأساسي من وجود الإنسان عمارة الأرض؟ لأ، الكلام نقص. لأ، خلافة بمعنى تطبيق، لو قلنا خليفة الله، تطبيق مراد الله عز وجل في الأرض. فرفع بعضكم فوق بعض، ده الرزق. إنما الخلائف دي إقامة الشرع: ليبلوكم فيما آتاكم. الختام: إن ربك سريع العقاب وإنه لغفور رحيم. أككد العقوبة بمؤكد واحد وهو إن، وأكد المغفرة بثلاث مؤكدات، وهي: إن واللام وتكرار الصفتين: غفور رحيم.

كده سورة الأنعام، كلمة الأنعام هي دي اللي المشركين حاولوا يغيروا فيها في التشريع، ده المدخل بتاع الأطعمة الأنعام، النموذج اللي ربنا جابه في السورة اللي حاولوا يدخلوا فيه شركة تشريع. وكأن ده أخطر حاجة لازم المسلمين يحاربوها. إذا هذه السورة العظيمة اللي ابتدأت بالعقيدة وتوضيحها، وختمت بالشريعة، ثم جه الختام الكلي الجمع الاثنين على بعض: صلاتي ونسكي ومحياي ومماتي. هذه السورة المجملة لازم تكون وسيلة للانسان في حياته، وسيلة في نقاشه مع الناس. كيف يصل بالإنسان أنه يقول له: إن صلاتي ونسكي ومحياي ومماتي، ده في الآخر. انك عشان توصل واحد للمرحلة دي، إحنا دايما بنبدأ مع الناس من الآخر، لا، لازم تبدأ من الأول: الحمد لله الذي خلق السماوات والأرض. اتكلم بقا عن مصارع المكذبين وعن إنقاذ الله لك وأنت في زنقتك، وأنك أنت بتمر بمراحل ضعف، وأن في خبراء مش عايزين يلينوا لدين الله، أنت ما تبقاش تسمع كلامهم. وأن في زخرف للقول وفيه جن وفيه شياطين الإنس والجن بيتعاونوا. طوال هذه السورة عشان توصل باللي قدامك لهذه النتيجة، أنت محتاج دي طريقة القرآن، أنه مش بيخاطب عقل فقط، بيخاطب النفس، بيخاطب القلب، بيخاطب الصدر، بيخاطب مشاعر الرجاء، بيخاطب مشاعر الخوف، بيخاطبك كبني آدم كلك على بعضها، بيخاطب عقلك، بيخاطبك مرة بالحجة، مرة يضغط عليك، مرة يحاصرك، هذا هو خطاب القرآن.

يبقا لازم لما تخاطب نفسك أو تخاطب الناس تسير على هذا القرآن. نحمد الله عز وجل أن أتم علينا هذه النعمة، وبفضل الله عز وجل يعني ختمنا هذه السورة، وفعلا انك تفهم آية من كتاب الله عز وجل، والله خير من الدنيا وما فيها. انك يعني بتستحضر نعمة انك تفهم بس آية من كتاب الله، ويا سلام لو سورة من كتاب الله، ولكننا نحقر الشيء العظيم. لذلك يروى أن كان فيه ضعف يروى أن من آتاه الله عز وجل القرآن ثم حقر هذه النعمة فقد حقر عظيم نعمة الله عز وجل عليه. أن كما قال الله عز وجل لقد، ولقد آتيناك سبعا من المثاني والقرآن العظيم، اللي معه القرآن ما ينفعش يبص لحاجة تانية: لا تمدن عينيك إلى ما متعنا به أزواجاً منه. الإنسان يحرص أنه يفهم ولو آية من كتاب الله عز وجل. أسأل الله عز وجل أن يجعلنا من أهل القرآن الذين هم أهله وخاصته.

إحنا فان شاء الله كده هنتوقف بإذن الله عز وجل، وبإذن الله عز وجل نكمل بعد شهر رمضان. أسأل الله عز وجل أن يبلغنا رمضان وأن يعيننا فيه على ذكره وشكره وحسن عبادته، وأن يبلغنا ليلة القدر وأن يجعلنا من الفائزين فيها، والقائمين في شهر رمضان على الوجه الذي يرضاه الله عز وجل علينا. أقول قولي هذا واستغفر الله لي ولكم. سبحانك اللهم وبحمدك، أشهد أن لا إله إلا أنت، أستغفرك وأتوب إليك، وجزاكم الله خيراً.