تفسير سورة الأنعام (23) | الآيات (150-153) | د. أحمد عبد المنعم

قل تعالوا أتلُ ما حرم ربكم عليكم ألا تشركوا به شيئا وبالوالدين إحسانا ولا تقتلوا أولادكم من إملاق نحن نرزقكم وإياهم ولا تقربوا الفواحش ما ظهر منها وما بطن ولا تقتلوا النفس التي حرم الله إلا بالحق ذلكم وصاكم به لعلكم تعقلون.

بعد شوط مناقشة أهل الباطل في مسألة التحريم والختام اللي احنا قلناه، اللي رد آخر السورة على أول السورة: الإشهاد على العقيدة. ألا تشهد الأمر اللي جه للنبي صلى الله عليه وسلم: «فإن شهدوا فلا تشهد معهم». لو شهدوا أن مع الله آلهة أخرى. التحذير من الوجود في مكان إنك تشهد، سواء إنك تبقى موجود، أو إنك تشهد شهادة رضا، أو إنك تقبل وجود آلهة مع الله عز وجل أخرى. ده في أول السورة، وختمت أنك ترفض ولو حكم واحد إذ يحرف من أحكام الله عز وجل. زي ما قلنا بدأت السورة بالعقيدة، وختمت بحكم واحد من أحكام الشريعة، عشان تدي صورة متكاملة عن الدين. اللي هيجي لنا بعد كده، ده ختام السورة في الآخر: ﴿إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ﴾ [الأنعام: 162]. التصور الكامل عن الدين اللي بيتكون من عقيدة ومن شريعة، والفصل ده أن ده فصل من أهل الباطل بين العقيدة والشريعة. الاندماج العجيب اللي جه في سورة الأنعام زي ما قلنا بدأت بالعقيدة وختمت بالشريعة.

والأمر في الشريعة في سورة الأنعام دي في حكم واحد بس؛ أنهم أرادوا أن يحلوا ما حرم الله عز وجل من الميتة، وأرادوا أن ما أحل الله عز وجل وقالوا على بعض الأنعام والزروع هذه إيه؟ حجر لا يطعمها إلا من نشاء بزعمهم. اعتقدوا أنهم اللي يوزعوا الأرزاق ويوزعوا الحرث والأنعام كيفما يشاؤون. بعد ما رد عليهم القرآن في سياق مبهر ومعجز، وصلوا في الآخر للحجة الواهية اللي بيصل عندها أي انسان يغلب أنه يحتج بالقدر: قالوا لو شاء الله ما أشركنا ولا آباؤنا. ورد عليهم القرآن. في الآخر القرآن بيقول لهم: تعالوا بقى أقول لكم إيه وإيه هو الحرام وإيه هو الحلال. سيبك من اللي معاك ده واللي معاك ده كلام فارغ، ولن ينفعك لا في دنيا ولا في آخرة، ومش لازم تجرب المناهج الباطلة عشان تتأكد أنهم على باطل. تعالوا قل تعالوا أتلُ مش من عندي، قل تعال واتلُ إيه؟ ما حرم ربكم عليكم.

تعالوا قيل في معنى تعالى في اللغة أي فاضلة أعلى. قالوا ده أصل معناه في اللغة تعالى يعني إلى أعلى. أنك أنت بتتكلم من علو وبتكلمهم إيه اللي يرضي الله عز وجل، فبتقول لهم تعالوا أتلُ. أنا وظيفتي أن أنا أتلو عليكم ما حرم الله عز وجل. رسولاً من وظائف الرسول جت في أكثر من موضع من القرآن أن الرسول من وظائفه إيه؟ يتلو عليهم آياته ويزكيهم ويعلمهم الكتاب والحكمة. يبقى من أهم وظائف الدعوة إلى الله عز وجل تلاوة القرآن على الناس، مع توضيح هذه المعاني، زكى الناس فيعلمونهم الشرائع. يبقى الترتيب كده: يتلو عليهم آياته ويزكيهم ويعلمهم الكتاب والحكمة. يتلو عليهم آيات القرآن، ولو في فجوة بين ناس وبين آيات القرآن نزيل هذه الفجوة أن احنا نشرح للناس آيات القرآن، فبالتالي الناس تتزكى ونفوسها تطهر بمعاني القرآن، ثم بعد ذلك نعلمهم الشرائع المطلوبة منهم الكتاب ويعلمهم الكتاب والحكمة. فهنا قل تعالوا أتلُ ما حرم ربكم عليكم. ده مش من عندي، ده من عند الرب سبحانه وتعالى، وده من ربوبيته أنه يحرم عليكم أشياء ده في مصلحتكم. هذه الأشياء لاقت اعتناء كبير من المفسرين وخاصة من السلف، هذه الوصايا اللي جت متتالية ورا بعضها في الثلاث آيات وكل آية ختمت بقول الله عز وجل: ذلكم وصاكم به لعلكم، الأولانية تعقلون، الثاني تتذكرون، الثالثة تتقون. ذلكم وصاكم به عشان كده سموها الوصايا العشر. خمسة وأربعة وواحدة في الترتيب كده الآيات بيسموها الوصايا العشر.

هذه الوصايا لاقت اهتمام كبير جدا من المفسرين، وخاصة اللي عايز يتكلم في العلوم الاجتماعية اللي بتربط الإنسان بعضها ببعض أو سنن قيام الدول وانهيارها، ركز على الوصايا دي وتكررت قريبا منها في سورة الإسراء. وكثير من السلف اتكلم على الآيات دي وقال سماها الآيات المحكمات. ويعني إيه المحكمات؟ يعني إيه قبل ما ندخل في تفاصيل هذه الأشياء؛ تحريم الشرك، بر الوالدين، عدم قتل النفس سواء الولد أو النفس التي حرم الله، تحريم الفواحش، الوفاء بالكيل والميزان، العدل في القول: إذا قلتم فاعدلوا. هذه الوصايا، عدم اتباع البدع والشهوات والأهواء، وأن هذا صراطي مستقيماً فاتبعوه ولا تتبعوا السبل فتفرق بكم عن سبيله. وبعد كل واحدة: ذلكم وصاكم به.

هذه الوصايا قبل أن نتناولها بالتفصيل لها أهمية هامة زي ما قلنا. ابن عباس وغيره من السلف قال هذه المحكمات. وكان بعض الصحابة بعض التابعين زي الإمام علقمة تلميذ ابن مسعود، كان تلامذة ابن مسعود دائما يتحرجوا من القول في التفسير. فلما كان حد يطلب منهم أنه يشرح له القرآن يقول له: بص أنا هشرح لك الحاجات اللي ما فيش فيها أي خلاف، أشرح لك المحكمات. ويشرح له الآيات دي، يقول له: قل تعالوا أتلُ ما حرم ربكم عليكم. لما كان علقمة يطلب منه أنه يفسر القرآن كان يشرح الآيات دي لأن هي محكمات لا تتغير. إيه الأهمية بتاعت دي؟ أهمية دي من معاني المحكمات أي أنها لا تتغير في أي دين ولا في أي وضع ولا في أي زمان ولا في أي مكان. في أحكام قد تتغير بحسب الأحوال، لكن هذه الأحكام هي المحكمات التي لا يصح أن يسمى أي دين ديناً إلا بهذه الأشياء. فهذه الأشياء قطعا في التوراة، وقطعا أمر بها من قبلنا. لذلك كثير من اللي أسلم من مسلمة أهل الكتاب قالوا هذه الآيات كانت إما بنصها أو بمعناها كانت في التوراة، وبعضهم قال هذه أصلاً من دين إبراهيم. بدليل قول الله عز وجل زي ما هيجيلنا في الخلاف ما بين المفسرين: قول الله عز وجل: ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ وَتَفْصِيلًا لِّكُلِّ شَيْءٍ﴾ [الأنعام: 154]. قالوا ثم آتينا موسى الكتاب يعني هذه الآيات كانت مع دين إبراهيم وبعد كده تنقلها ووصلت إلى سيدنا موسى وبعد كده أيضاً بلغت النبي صلى الله عليه وسلم.

إذا من أهمية هذه الأشياء أنها محكمات لا تتغير في أي دين. أي دين يخلو من هذه القواعد وعلاقته بالله سبحانه وتعالى يفقد عمود من أعمدة قيام الدولة وقيام الحضارة. لذلك نجد العجيب أن الوصايا العشر اللي جت سبب هذا الترتيب في الأنعام أو جت مفرقة بعد التفريق في سورة الإسراء، هاتان السورتان مكية ولا مدنية؟ مكيتان ولا مدنيتان؟ مكية يعني الاستضعاف ولا في التمكين؟ في الاستضعاف. فهذه الأشياء تطبق في أي وقت، حتى لو في زمن الاستضعاف، وأن الحرص والاتقان في تطبيق هذه الأشياء هو الذي يؤدي إلى بداية تكوين المجتمع، ده اللي يؤدي إلى بداية التمكين. فالتمكين الحقيقي أنك تطبق هذه الأوامر تطبيقاً محسناً فيه، عشان ربنا يمن عليك ويجهز لك المجتمع أنه يتلقى الشريعة. هو إيه التمكين يا جماعة غير مجتمع أنت بتطبق فيه الشريعة؟ هو ده التمكين. هو التمكين ببساطة أنك أنت عندك القدرة أن المجتمع عنده القدرة أنه يتلقى تطبيق الأحكام الشرعية، وأنت ممكن في تطبيق الشريعة، مش متمكن من رؤوس الناس، أن تمكن من قلوب الناس. يبقى التمكين حقيقة وجود مجتمع أنت قادر فيه أنك تطبق أحكام الشريعة، وأن لو فيه نفاق أنت قادر أنك تمنع هذا النفاق، وتمنع الكفر وتنشر الدين، وده هو ده التمكين في الأرض.

إذا هذه الأشياء، هذه الأوامر والعجيب والمهم اللي بيخفى على كثير من الناس أن هي بدأت بالتوحيد. بدأت بمنع الإشراك قبل ما نتكلم في معاني العدل وعن الإحسان ومعاني بر الوالدين، بالرغم أن هي أعمدة مهمة من قيام أي مجتمع، لكن لازم نقول أن كل ده لا يفيد أي شيء بدون إيه؟ بدون التوحيد. لازم الأول يقوم المجتمع على توحيد الله عز وجل. لذلك النبي صلى الله عليه وسلم لو كان دعا إلى هذه الأشياء فقط بدون التوحيد كان ممكن يقبل وما كانش يعارض، يعني كان ممكن يشيل أول واحدة بس قال: لا تشركوا شيئا، ويقول: وبالوالدين إحساناً ولا تقتلوا أولادكم من إملاق نحن نرزقكم وإياهم ولا تقربوا الفواحش ما ظهر منها وما بطن ولا تقتلوا النفس التي حرم الله وأوفوا الكيل والميزان وإذا قلتم فاعدلوا. ويقول الآتي، كان ممكن يقبل منه هذا الكلام. لكن لما قال لهم: لأ، كل ده في إطار التوحيد، وأن دي طاعة تحاسبون عليها ثم تبعثون لتحاسبوا عليها؟ رفضوا، قالوا: لأ، لأن عندنا آلهة أخرى وعندنا مصالح تانية. رفضوا، فما بدأش بالبداية كمصلح اجتماعي فقط، بدأ الأول أن هو جاء بدين من عند الله عز وجل. الأوامر دي ما قال لهمش، وده واقع، واقع الكلام اللي أنا هقوله ده أن أي مجتمع هيطبق الحاجات دي هينهض، أي مجتمع كان منهار حضارياً يحافظ على الحاجات دي قطعا هينهض. كان ممكن تقول لهم كده: أنا جيت لكم بخير عظيم، المجتمع المتهلهل العربي اللي احنا فيه، فيه حضارات فارس والروم، دعونا نلحق بالركب ونسبق فارس والروم. كان ممكن يبدأ كده، لكن قال لهم الأول: لا إله إلا الله، مش هتنازل عن البداية دي، مش هتنازل عن بداية التوحيد: لا إله إلا الله. فقال لهم هذه الأشياء ليست من عندي، تعالوا وأتلُ ما حرم ربكم عليه.

طيب، يبقى قلنا دي من المحكمات. النقطة الثانية، ودي فرع على كلمة من المحكمات، أن ما ينفعش العاملين لدين الله عز وجل يساوم أو يساوم على هذه الأشياء. بمعنى الإحسان والعدل والوقوف بجانب المظلوم، وعدم الاقتراب من مال اليتيم والورع في التعامل والأموال، والدقة في التعامل في الأموال، هذه الأشياء أخلاق ثابتة، مش أخلاق نسبية متغيرة. بمعنى لو العاملين لدين الله عز وجل حصل نظام سياسي بيضطرهم أنهم يتخلوا عن بعض هذه الأشياء، أو حصل نظام اجتماعي أو نظام اقتصادي وطالب العامل لدين الله أنه يلتحق بهذا النظام عشان يغير ويأتي بالتمكين، ولكن بشرط أنه يتخلي إما عن التوحيد أو عن أن الموضع عادي، مش مشكلة أننا ناكل مال اليتيم، أو مش لازم كل الكلام نقوله يبقى عدل وإذا قلتم فاعدلوا ممكن تكذب مفيش مشكلة، أي نظام هينخرط فيه العاملين دي ويتخلوا عن أصل من هذه الأصول لن يحدث تمكين. هذه الأصول أصول ثابتة، المساومة عليها تؤدي إلى الرجوع عليك بالانهيار، هتعود عليك بالبطلان. دي أصول ثابتة، اللي هيطبقها كويس وهو في الاستضعاف هو اللي هيمكن. وده أحد معاني قول الله عز وجل: ﴿ثُمَّ آتَيْنَا مُوسَى الْكِتَابَ تَمَامًا عَلَى الَّذِي أَحْسَنَ﴾. أي أحسن في تطبيق هذه الأشياء، لما كان محسن في تطبيق هذه الأشياء منّ الله عز وجل عليه بالتمكين. وهنقول إحدى معاني الكتاب في تفسير الآية اللي جاية.

إذا في معاني ما ينفعش تساوم عليها ولا تساوم عليه، ولا تتخلى عنها، دي معاني ثابتة. معاني في الفطرة، الفطرة الإنسانية تعظم وتقدس اللي بيطبق هذه الأشياء، حتى لو عارضته حتى لو خالفته. والفطرة الإنسانية تحقر كل من يخالف هذه الأشياء، هي بداخلها أن اللي ظالم اللي ما بيعدلش في القول، اللي ما بيقفش جنب المظلوم، وأن اللي بياكل مال اليتيم، بداخله إنسان احتقار من يتخلى عن هذه الأشياء. فأي منظومة هتدخل فيها تتخلى عن هذه الأشياء أنت تخسر الناس قطعا، وأولاً تخسر معية الله سبحانه وتعالى. يبقى إذا أي نظام سياسي عالمي يوضع في تخلي عن هذه الأصول لابد أن يرفض، ولو كيف دخلت فيه من باب على نزول على قول البعض، والعلماء رأوا من باب المصالح والمفاسد أنهم يخشوا في هذا النظام، لابد أن تظل طائفة لا تتلبس بهذا النظام تبين عوار هذا النظام، وتقول زي الديمقراطية يعني. إذا تلبس ببعض الناس لأن الديمقراطية ما بتراعيش كل هذه الأشياء، ما بترعيش العدل الكامل؛ لأن العدل غير المساواة، العدل في توزيع الميراث غير المساواة في توزيع الميراث. العدل هو ما أمر الله عز وجل به أن يعطى، ده العدل. فالمساواة التامة في كل شيء ليست عدلا؛ لأنك بتساوي بين المختلفين أصلاً، هي ليست عدل. المساواة في توزيع الحقوق، أنت أن كل حد ياخد أي حاجة في المجتمع ده ده سفه. ربنا قال له: ﴿وَلَا تُؤْتُوا السُّفَهَاءَ أَمْوَالَكُمُ﴾ [النساء: 5] إزاي أن في ممكن ثلة من الناس لا تفقه شيء، هي ممكن تتحكم في مصيري؟ وده وده معاني الديمقراطية أن هي بأصواتها تتحكم في مصير دولة، ولا شيء في أي شيء. طب إزاي ده سفه؟ إزاي كان ربنا قال: ﴿وَلَا تُؤْتُوا السُّفَهَاءَ أَمْوَالَكُمُ﴾؟ يبقى بالتالي ولا تؤتوا السفهاء أصواتكم، يعني ما هي هي! يبقى إذا من السفاهة.

إعطاء الحق لمن لا يستحقه دي سفاهة. ربنا قال: ﴿وَلَا تُؤْتُوا السُّفَهَاءَ أَمْوَالَكُم﴾ [النساء: 5]. ده معنى الآية أصلاً، وَلَا تُؤْتُوا السُّفَهَاءَ أَمْوَالَهُمْ. في أحد الأقوال التي جعل الله لكم قياماً أن ممكن ده يبقى ماله بس هو سفيه ما ياخدوش، ولكن سماه الله أموالكم لأن المال المفروض كلنا نحافظ عليه. ده أحد معاني هذه الآية في سورة النساء. الشاهد هذه الأعمدة اللي بتقوم عليها إيه؟ مجتمع.

لذلك سورة الأنعام وسورة الإسراء من البشريات أنت جاي تمكين بدايات هذه التشريعات أن هي تنزل، وأن إحنا نحافظ عليها. إذا ربنا هيمكن لنا في مجتمع يطبق فيه الشريعة كاملة، يبقى دي الأصول اللي تهيأ لتطبيق الشريعة التفصيلية. يا جماعة المشكلة أن أحياناً المجتمع بيحتاج تمهيد نفسي وتمهيد عقلي عشان يبقى الأول مجتمع سوي وبعدين يتلقى الشريعة، إنما مجتمع متربي على عقلية الكيد أن هما يكيدوا في بعض، مجتمع متربي على عقلية أهلاوي وزملكاوي، ما ينفعش أن أنا يبقى أهلاوي على طول الخط خسر كسب يا يبقى زملكاوي، اتربي على هذه النفسية، هو محتاج الأول تمهيد لأخلاق معينة تتربى فيه، وطول مكث تأصيل هذه الأخلاق، ثم تطرح عليه الشريعة فيتقبلها، وده من الشريعة أيضاً.

لكن أنا قصدي اللي تطرح عليه أصول؛ قل الإحسان، العدل، بر الوالدين. لذلك أيضاً من أهمية هذه الأوامر دي من الأوامر اللي نتحرك بها في المجتمع المكي المستضعف، لذلك لو هنقيس أي مجتمع طمع أن هو شبيه بالمجتمع المكي في المستضعف، إيه الأوامر اللي اتكلم فيها الناس؟ مش بس الوعظ، لا نكلم الناس في بر الوالدين، نكلم الناس في الإحسان، نكلم الناس في العدل، في الميزان، الوفاء بالكيل والميزان. لازم هذه المعاني دي المعاني اللي تنشر في الواقع المكي اللي ربنا دايماً أصر القرآن، أصر عليها الحض على طعام المسكين، العدل، دي أوامر، يبقى لما نيجي نشوف واقع ما فيش فيه شريعة، واقع مصلي عايزين نستفيد من الآيات دي، يبقى نتكلم مع ناس في هذه الأشياء.

كثير منهم يمكن الناس ما ياخدش باله موضوع بر الوالدين ممكن يتكلم عنه يقول لك إحنا في واقع مستضعف وعايزين تمكين خلينا نتكلم في هم الدين والوعظ فقط، لا أنت لازم تأصل هذه الأخلاق. ركل من الأسئلة اللي سألها عشان يعرف؛ سأل لأبي سفيان عشان يعرف المبعوث ده نبي ولا لأ صلى الله عليه وسلم، سأله عن أخلاق، سأله عن أشياء أتى بها، سأله عن الجهاد، سأله عن الحرب، سأله عن أشياء منها الأخلاق، قال هل يغدر؟ لما قال له لأ، قال له ده نبي.

إذاً من الأشياء اللي تمكن لك في قلوب الناس تطبيق هذه الأخلاق، أن يبقى إنسان عامل لدين الله أو عايز ينصر دين الله عز وجل، ولا يتعامل بهذه الأخلاق من بر والدين وإحسان في المعاملة والعدل وأنه يقول بالحق حتى لو على قريب، لو ما قامش بهذه الأشياء لن يحدث له تمكين، هيبقى تمكين وهمي. إذاً الشاهد القضايا ديت الوصايا العشر استحوذت زي ما يقول، كما أقول، على كثير من عقول المفسرين، بل اللي كتبه في مقاصد الشريعة توقفوا كثيراً، زي الإمام ابن عاشور، توقف في كثير عن المقاصد اللي حصلتها هذه الآيات.

نقول دي بتتكلم عن أصول الدين اللي بتتفرع منه كل الأحكام بعد كده، قال لك جاءت لحفظ الدين، ولحفظ النفس، ولحفظ النسل، ولحفظ العقل، ولحفظ المال، هذه الأوامر. وأزاي التوزيعه ديت؟ وأزاي أن الآيات الخمس الوصايا الخمس الأول أصلاً شيء معين في المجتمع والوصايا الأربع الأخر تنظم شيء في المجتمع، والوصايا الأخيرة الخاتمة بتعمل سياج للمجتمع يحفظه. يبقى إذاً هذه الآيات عايزة دروس، يعني بقول كتبت فيها كتب تفصل وتؤصل في هذه الوصايا العشر التي لن يقوم ولن تكون أي يقاوم المجتمع بدون تطبيق هذه الوصايا، فجاء الختام بها في سورة الأنعام بعد البداية بالعقيدة والختم بالشريعة أصول الشريعة أهي اللي عايزين تطبقوها، عشان لما تيجي في الاخر تقول: ﴿إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ﴾ [الأنعام: 162] الجزء التعبدي ومحياي ومماتي الجزء الحياتي، كل ده لله رب العالمين.

فكذلك هذه الوصايا كما أنها اشتملت على التوحيد وعلى العقيدة، اشتملت على التشريع والمعاملات، ما فصلتش بين الاتنين، حطت العقيدة جنب الشريعة، حطت الاعتقادك في دين الله عز وجل جنب معاملاتك للناس. طيب نبدأ مع التفصيل هذه الأشياء: ﴿قُلْ تَعَالَوْا أَتْلُ مَا حَرَّمَ رَبُّكُمْ عَلَيْكُمْ﴾ [الأنعام: 151]. رقم واحد وبدأ به: ﴿أَلَّا تُشْرِكُوا بِهِ شَيْئًا﴾ [الأنعام: 151] هنجد أن الوصايا الخمس الأول كلها جت بالنهي: ألا تشركوا، لا تقتلوا، لا تقربوا، لا تقتلوا النفس، ما عدا واحدة اللي هي إيه؟ ﴿وَبِالْوَالِدَيْنِ إِحْسَانًا﴾ [الأنعام: 151].

هنقول هنا ليه ما جاتش بصيغة ليه ما قالش ولا تعقوا الوالدين؟ عشان تبقى ماشية كلها بنفس السياق كلها نواهي، الاول ألا تشركوا به شيئاً. زي ما قلنا اللي يبدأ برقم اتنين على طول قبل الدعوة إلى التوحيد هو بيخسر، اللي بيبدأ يكلم الناس عن إصلاح الدنيا قبل إصلاح الدين مش ده اللي ربنا يرتضيه، مش ده الخطاب القرآني السليم، ده بيبتعد عن الوجهة الأساسية، اللي بيعتقد أنه هيقفز عن كلام عن التوحيد عشان يقرب للناس لغاية بس لما يكسب الناس وبعد كده يرجع يكلمه عن التوحيد هو واهم، وتكلمنا عن الموضوع ده في خلال سورة الأنعام.

﴿قُلْ تَعَالَوْا أَتْلُ مَا حَرَّمَ رَبُّكُمْ عَلَيْكُمْ أَلَّا تُشْرِكُوا بِهِ شَيْئًا﴾ [الأنعام: 151] بمعنى أن التشريعات اللي أنتم شرعتوها اللي فاتت دي خلاص دي ترموها في الزبالة ما لهاش أي قيمة، إنما اللي أنت تتلقاه وتعظمه كلام ربنا سبحانه وتعالى، فلا تشرك به شيئاً في التشريع وخاصة في الأطعمة زي السياق اللي فات.

﴿وَبِالْوَالِدَيْنِ إِحْسَانًا﴾ [الأنعام: 151] قالوا إن كان متوقع السياق أن يجي زي زي بقية الأوامر ولا تعق الوالدين، ولا تقربوا ولا تقتلوا أولادكم من إملاق ولا تقربوا الفواحش ولا تقتلوا النفس. ليه هنا ربنا ما قالش ولا تعقوا الوالدين؟ لأن الأمر في الوالدين أكبر من أنه بس مجرد النهي عن العقوق، فالوالدين لهم معاملة خاصة، يعني لو كان ربنا قال ولا تعقوا الوالدين يبقى أنت كان كل المطلوب منك أنك تعمل إيه؟ أنك ما تضايقهمش، فانت لو ما ضايقتهمش وما أحسنتش إليهم أنت كده طبقت الأمر، لأ مش ده المطلوب.

المطلوب أنك تححسن إليهم وبالوالدين إحساناً. قالوا معنى الآية وأحسنوا بالوالدين إحساناً، أي أتقن في الإحسان، إحسان هنا يبقى مفعول مطلق لفعل محذوف، أي إحساناً مطلقاً إلى ما لا نهاية، إحسان مطلق خالي من أي العوارض إلا العوارض اللي جت في القرآن: ﴿وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا﴾ [لقمان: 15] يبقى إحسان مطلق.

لذلك هنا من دقة السياق القرآني أن ربنا ما قالش ولا تعقوا الوالدين، قال إيه؟ وبالوالدين إحساناً، عشان لو كان بس جه النهي عن العقوق أنت ممكن تقول إيه؟ طب أنا ما أذيتهمش، مش ده المطلوب، أنت لو ما أذيتهمش وما أحسنتش لهم أنت أيضاً مقصر. دايماً ربط بالوالدين إحساناً مع التوحيد الفطرة الإنسانية ثابتة، الفطرة اللي تقدر النعمة للأشخاص هي تقدرها لله، والفطرة اللي تقدر نعمة الله تقدر الفطرة دي النعمة للناس، اللي فطرته انتكست مع أبوه وأمه أكيد هتنتكس مع ربنا، من لم يشكر الناس لا يشكر الله، اللي ما بيشكرش الناس كأنه ما بيشكرش ربنا، لأن ربنا اللي ببعت له النعمة وبرده مش هيشكر ربنا لأنه هو في فطرته خلاص أصبح جاحد للنعم.

فمنكر الفضل بتاع الوالدين عليه، هذا الشخص فطرته منتكسة ما يصلحش يقوم عليه مجتمع أبداً، ولا تطمن له، مهما كان ذكي ومهما كان عبقري، ولا تطمن له، ده ممكن يخرب أي مجتمع، العنصر ده عنصر جاحد النعم ده ده ما تطمنوش أبداً، اللي ينكر نعم الله عز وجل عليه في الأول في الإشراك ثم ينكر نعم الوالدين عليه، هذا لا يطمئن إليه أبداً. وبالوالدين إحساناً.

بعدين السياق بقى مع الوالدين ومع الابناء، مع الوالدين تحسن إليهم ومع الأبناء: ﴿وَلَا تَقْتُلُوا أَوْلَادَكُمْ مَنْ إِمْلَاقٍ﴾ [الأنعام: 151]. نجد هنا تركيز على الأسرة، وأن ده الدول المسلمة فقط هي الآن الدول الوحيدة اللي بتحافظ على الأسرة، دول الغرب والشرق الآن الأسرة عندها مهلهلة، وتجد فيه حملات لأهمية الأسرة ما فيش أسرة أصلاً، أنت ممكن تشوف واحد بيتجوز واحدة وعندهم طفلين وهما لسة يوم الجواز هما خلاص الزنا قبل ذلك معهم عيلين فقالوا آه خلاص إحنا ممكن نتجوز كده، إحنا اكتشفنا أن إحنا كده ممكن نتزوج، ده وارد ده هناك طبيعي، فأصبحت الأسرة مهلهلة، الابن له سن معين وبيبصيب البيت، ما فيش علاقة يعني علاقة مهلهلة تماماً.

أحد الإخوة كان في سفر في دولة أوروبية، بيحكي لي كان في مطعم فهو وأخوه والده وقاعدين مع مجموعة من الأوروبيين الأجانب قاعدين معهم في نقاشات كده في إيه عمل عمل دنيوي، فبعد ما الاجتماع خلص، قام أحد أخو صديقي اللي بيحكي لي قام يحاسب لأخوه ولوالده، فقام واحد معه من بيقول له إيه ده أنت بتعمل إيه، بتحاسب لوالدك ليه، أنت ازاي مش كل واحد عندكم المفروض يحاسب لنفسه؟ قال له ده والدي، قال له إيه يعني؟ يعني هو مستغرب يعني ازاي هو المفروض أن في فصل عن خلاص هو بعد أنت أنت عدّيت سن معين خلاص هو ما لوش سلطة عليك، هو ممنوع أنك يقول لك كذا، الأسرة مهلهلة تماماً.

وده عمود أي مجتمع، ومن المعاني اللي قيلت في سورة الطلاق أن هي بدأت جزء الأول في الطلاق والجزء التاني: ﴿وَكَأَيِّن مِّن قَرْيَةٍ عَتَتْ عَنْ أَمْرِ رَبِّهَا وَرُسُلِهِ فَحَاسَبْنَاهَا حِسَابًا شَدِيدًا وَعَذَبْنَاهَا عَذَابًا نُكْرًا﴾ [الطلاق: 8]. قالوا النصف الأول من السورة وقوع وهلاك الأسر، النصف التاني من السورة وقوع وهلاك الأمم. والأسرة لما تسقط وتتهلهل لازم الأمة دي مش هتستمر، حتى لو استمرت فترة طويلة نتيجة عوامل أخرى لازم المجتمع ده ينهار، فبداية المجتمع المسلم بيتبدأ من الحفاظ على الأسرة، أن يبقى فيه تداخل وترابط أُسري قوي جداً.

فبالنسبة للوالدين: وبالوالدين إحساناً، وبالنسبة للأبناء: ﴿وَلَا تَقْتُلُوا أَوْلَادَكُمْ مِنْ إِمْلَاقٍ نَحْنُ نَرْزُقُكُمْ وَإِيَّاهُمْ﴾ [الأنعام: 151]. تقتلوا أولادكم من إملاق، قالوا الملاق الحجارة الملساء، فكلمة من إملاق بتعبيرنا كده على البلاطة، بتعبير العرب على ما عدش عنده قاعد على الحصير، لا قاعد ما عدش فيه حصير، قاعد على الحجارة الملساء، يعني بقى ما عدش حاجة يفرشها عشان يقعد، قعد على الحجارة، فكلمة الإملاق يعني أنت حتى لو وصلت إلى هذه الحالة من الفقر لا تقتلوا أولادكم، قالوا لم يبقَ له إلا الملاقات، زي ما الإمام الشوكاني بيقول، يعني الملاقات اللي هي الحجارة الملساء، اللي هو بتاع بنها زي ما دكتور حسن جبل كان بيتكلم في كتابه اللي بيشرح فيه ألفاظ القرآن، الحتة بتعبيرنا المعاصر كده دي بتساوي بتساوي عند العرب على البلاطة.

ولا تقتلوا أولادكم من إملاق، من إملاق يعني أنت في اللحظة دي فقير وربنا رزقك ولد، خلاص الأمر بقى رزقت الولد، لا تقتله، ما تروحش تؤد البنت، لا تقتله، ليه؟ اللي رزقك هيرزقه، بدأت هنا: ﴿نَحْنُ نَرْزُقُكُمْ وَإِيَّاهُمْ﴾ غير بتاعة الإسراء: ﴿نَحْنُ نَرْزُقُهُمْ وَإِيَّاكُمْ﴾ [الإسراء: 31]، لأن هناك هو لسة مش فقير، في سورة الإسراء ولا تقتلوا أولادكم خايف لسة يبقى فقير، فربنا قال له أنت خايف أن هو يبقى سبب الفقر؟ طب أنا هرزقه وإياك، نحن نرزقهم وإياكم. هنا هو بيقتله لأن هو أصلاً فقير، مش خايف من هو أصلاً فقير، فالآية دي أشد وأصلاً فقير، ربنا بيقول: ونحن نَرْزُقكم زي ما رزقتك من قبل أنا أرزقك، نحن نرزقكم وإياهم.

﴿وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ﴾ [الأنعام: 151]. نجد أن دي الأصول العامة للمجتمع، لسة ما اتكلمتش على المعاملات التفصيلية، اتكلمت عن حاجتين: عن الأصول العامة التوحيد واتكلمت على الأسرة، كلمة في الأصول العامة واتكلمت على الأمر تحدداً على الأسرة. تيجي الآية اللي بعدها تتكلم على نظام المعاملات وتحدداً المعاملات المالية، المعاملات الاجتماعية، جابت معظم المعاملات الاجتماعية وتحدداً ركزت على المعاملات المادية والمالية بين الناس وبعضها.

فشوف ازاي المجتمع بيتبنى؟ يبقى الأول التوحيد الأمور العامة، نتكلم أن إيه نكلم الناس التوحيد، أنك أنت تحسن إلى من أحسن إليك الوالدين، الرزاق هو الله، لا تقتلوا أولادكم من إملاق، البعد عن الفواحش تماماً، النفس البشرية تتبّرا من الفواحش، حتى لو واحد اتهم بفاحشة حتى لو هو والعياذ بالله بيسقط فيها يقول لك لأ مش أنا، يعني زي يقول لك كفى بالعلم فخراً أن يدعيه كل أحد، كل واحد يقول لك ده أنا عندي علم فده يبقى إكيد حاجة كويسة، وكيف عكسها بقى بالفحش ذماً أن الناس كلها تتبرأ منه.

لما ربنا اتكلم على الفواحش قال إيه؟ قال: ﴿وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ﴾ [الأنعام: 151] وما قالش ولا تقتلوا القتل، قال بعدها ولا إيه ولا تقتلوا النفس، في أوامر ربنا قالها ولا تقربوا وفينا نواهي، يعني قال ولا تقربوا ونواهي جت مباشرة النواهي اللي جت بكلمة ولا تقربوا جه الفواحش وجه مال اليتيم، يبقى شهوة الفرج وشهوة البطن، شهوة المال، دول دايماً لازم يبقى بينك وبينهم حاجز ولا تقربوا الفواحش سواء الزنا أو مقدمات الزنا أو حتى الكلام البذيء، كل ذلك لا تقترب منه، مش بس ما تعملوش، لا تقترب منه.

حين يأتي الإنسان ويحضع شيئاً مثل حاجات عسكرية أو مفاعل نووي أو ما شابه، يكون ممنوع الاقتراب. وممنوع الاقتراب هذه ليست مجرد يافطة، بل تجدها محطوطة على بعد الشيء الذي لا يريدك أن تقرب له، فتجدها على بعد عشرة كيلو متر مثلاً، أو في الحاجات البسيطة تجدها على بعد مئة متر أو عشرة متر على حسب ضخامة الشيء وعلى حسب ما تبتعد عنه. وهنا ربنا يقول لك: خن في مساحة، حتى لو من المباحات، بعيدة بينك وبين هذه الفواحش، ما ظهر منها وما بطن. في أشياء لا يعلمها إلا الله عز وجل، نعوذ بالله من ذلك، نسأل الله عز وجل أن يطهر قلوبنا. فيه حاجات مستخبية في القلب فما تقرب لهاش، ﴿وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ﴾ [الأنعام: 151]. ابن عباس قال في تفسير الآية دي: ما ظهر إن كان الزنا موجوداً في جزيرة العرب على نوعين، زنا علانية الرايات التي ترفع للبيوت ومعروفة دي والعياذ بالله بيوت للزنا، وكان فيه الزنا السر. فكانت العرب تأنف، أصحاب المكانة يأنفوا أن هم يروحوا للزنا العلنية، لكن يقول لك ما فيش مشكلة لو الزنا سره. واتكلمنا في مسألة جات قبل كده: أن عقول البشر زي القوانين الوضعية ممكن تحل الزنا سرا بشروط معينة؛ أنه ما يكونش في بيت الزوجية، وأنه يكون بتراضي الطرفين، وما تقومش دعوة من إحدى الزوجين على أيا كان يعني. فده العقول البشرية لما توصل إن هي تحط قانون تجده قمة في الضلال.

﴿وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ﴾ [الأنعام: 151]. الآية واضحة، وهنا برضو العجيب في سياق الآيات الاستثناءات والدقائق؛ يعني لما ربنا قال ﴿وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ﴾، عشان الواحد ما يعتقدش أن الفاحشة هي بس الزنا، لا، حتى الحاجات الخفية ما تقربلهاش. لما قال ﴿وَلَا تَقْتُلُوا النَّفْسَ﴾ قال لا، ممكن تقتل بعض لكن بالحق. لما قال ﴿وَلَا تَقْرَبُوا مَالَ الْيَتِيمِ﴾ جاب ﴿إِلَّا بِالَّتِي هِيَ أَحْسَنُ﴾ [الأنعام: 152]. لما قال ﴿وَأَوْفُوا الْكَيْلَ وَالْمِيزَانَ بِالْقِسْطِ لَا نُكَلِّفُ نَفْسًا إِلَّا وُسْعَهَا﴾ [الأنعام: 152]. لما قال: ﴿وَإِذَا قُلْتُمْ فَاعْدِلُوا وَلَوْ كَانَ ذَا قُرْبَى﴾ [الأنعام: 152]. كل أمر من الأوامر له حاجة تفصله وتوضحه وتدققه. لذلك دائماً الأوامر لما يتقال أنت لازم تحط لها الضوابط بتاعتها والمعايير، وازاي تتطبق والآليات بتاعتها والاستثناءات اللي ممكن تقولها. فلما ربنا قال ﴿وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ﴾ قال: في بعض الأنفس قد تقتل، وذكروا منها المرتد إجماعاً يقتل، والزاني المحصن يقتل، ده من الحاجات إجماعاً اللي هي ما فيش فيها خلاف وغيرها. وذكر المفسرين هنا إيه الحق الذي يوجب ذلك؟ لكن في المجتمع المكي، في المجتمع المستضعف، تركت هكذا يعني لسه أغلب الحاجات دي لم تشرع، فكأن ده استثناء عشان ما يجيش لما نجيء في المدينة، ويجي بقى التشريع، نقول فلان يقتل عشان مرتد أو عشان زاني محصن! طول ما أنتم قلتم في مكة ما تقتلوش النفس فاحنا نقول: احنا قلنا في مكة إيه؟ ﴿وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ﴾، لا، أنا في مكة قلت إلا بالحق، وهو ده الحق الذي أتى به الله عز وجل. ﴿ذَلِكُمْ وَصَّاكُم بِهِ لَعَلَّكُمْ تَعْقِلُونَ﴾ [الأنعام: 152].

تكرار الأوامر بأسلوب الوصية، إذا هي جاءت لمن قبلنا ومستمرة إلى يوم القيامة، يعني ده يؤكد قول الذي روي عن ابن عباس أنها من المحكمات التي لم تبدل في أي من دين إبراهيم لم تبدل. يعني فيه حاجات نسخت، فيه أحكام كانت موجودة في اليهودية ونسخها الإسلام، غيرها حاجات في الأطعمة، لكن هذه من الأشياء المحكمات التي لم تتغير في أي دين، هي موافقة للفطرة الإنسانية في كل زمان وفي كل مكان. لذلك جاءت بأسلوب الوصية أن دي وصية الله عز وجل من أول نوح إلى يوم القيامة لا بد أن احنا نتوصى بها ونذكر أنفسنا بها. جه في الأولانية: ﴿لَعَلَّكُمْ تَعْقِلُونَ﴾، والتانية: ﴿لَعَلَّكُمْ تَذَكَّرُونَ﴾، والتالتة: ﴿لَعَلَّكُمْ تَتَّقُونَ﴾. في الأولانية ليه تعقلون؟ هذه الأشياء، اللي عايز يعملها، المنهيات دي اللي عايز يعملها لا يقره عاقل عليه، وأن العقل أصلاً بطبيعته يرفض هذه الأشياء؛ يعني العاقل يرفض الفواحش، العاقل يرفض أنه يقتل ابنه، العاقل يرفض أنه يقتل النفس التي حرم الله، العاقل يرفض أنه يعق أباب وأمه، العاقل يرفض الشرك. فكأن ربنا بيقول لك أن قضية التوحيد هي قضية أصلاً، معنى أن الإنسان يرفضه أن في عقله شيء، معنى الإنسان يرفض التوحيد ويرفض دلائل خلق السماوات والأرض إنسان في عقله شيء، في عقله شيء. ﴿ذَلِكُمْ وَصَّاكُم بِهِ لَعَلَّكُمْ تَعْقِلُونَ﴾ [الأنعام: 152].

نيجي للأوامر أو النواهي الأربعة دول أو الخسة بينظموا المجتمع العام، نظام عام. طيب، العلاقات بقى بين الناس وبعضها، بنقول بنأكد هذه الأوامر لو حصل فيها خلل في أي مجتمع لن تقوم له قائمة، وتجد حتى المجتمعات الغربية وأي حضارة بتقوم بتحرص على هذه الأشياء حتى لو كفرت بمسألة التوحيد، عارفة مسألة الشرك في السنن، قيام حضارات، ده عايز برضه جلسات هل هو مؤثر في انهيار الحضارة ولا غير مؤثر؟ اللي تكلموا في قيام الحضارات والدول اختلفوا، في ناس قالت لأ، حتى لو غاب التوحيد لكن الدولة أو الأمة أو صاحبة الحضارة حافظت على القواعد العامة الباقية دي؛ العدل والاحسان وشكر النعمة وعدم القتل ومنع الظلم، لو حافظت على دي الدولة دي مستمرة. فيه ناس قالت لا، مجرد وجود الشرك حتى بالحفاظ على هذه الأشياء هيؤدي إلى انهيار، وطبعا كلام القرآن يتجه إلى أن الشرك وجود الشرك سبب لانهيار أي دولة، لأن الشرك هيخليك تكفر بهذه الأشياء، وهيخليك تضبط هذه الأشياء بعقلك فهتحط حاجات غلط فتقع. ولكن الشرك فقط يؤخر سقوط الدولة، في اشياء تسرع من سقوط الدولة زي الظلم، يقول النبي صلى الله عليه وسلم: «لا قدست أمة لا يأخذ فيها الضعيف حقه من القوي غير متعتع». «لا قدست أمة»، أي أن الله عز وجل لن يحفظها ولن يقدسها ولن يرفعها وستكون أمم مهانة، أمة ذليلة. إيه المواصفات اللي بالأمة دي؟ لو الضعيف لا يأخذ حقه من القوي غير متعتع؛ يعني لازم ياخد حقه وهو مش خايف. يعني كمان لو الضعيف خد حقه وهو خايف مش هي دي الأمة اللي يرضاها الله عز وجل. لا قدست أمة لا يأخذ فيها الضعيف حقه من القوي غير متعتع.

يبقى إذا الحفاظ على بقية الأشياء يطول عمر الأمة، زي الدول الغربية دلوقتي هي دول كافرة، طب ازاي الحضارة بتاعتها قائمة؟ لأن هي بتحافظ على بقية الأشياء، كل عمود من الأعمدة دي بيختل بيقصر عمر هذه الدولة وهذه الحضارة؛ يعني دلوقتي هم أخلوا بالتوحيد وأخلوا بالأسرة والفواحش، لكن محافظين على منع الظلم ومنع القتل على الأقل ظاهرياً، ومنع وإعطاء اليتيم حقه ويهتموا بدقائق إعطاء الحقوق وأخذ الحقوق، وحتى لو كان الشريف يحاكم فيهم، حفاظهم على ده يؤخر سقوط الدولة لكن لها أجل، لكل أمة أجل، لها أجل سيأتي، طالما في شرك لازم هتسقط، لكن وجود ده يؤخر، وجود العدل واعطاء الحق للضعيف يؤخر سقوط هذه الدولة. يبقى احنا لو عايزين نقوم بدولة إسلامية لابد نشر هذه المعاني أولاً في المجتمع، أما تبقى تنشر المعاني دي في المجتمع الأول يبقى بعد كده نتكلم في تفاصيل الشريعة، ونتكلم في أبواب كتير من الشريعة لابد أن توضع فيها هذه الأشياء أولاً.

طيب، بعد كده: ﴿وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ﴾ [الأنعام: 152]. اختيار اليتيم ده الشخص الضعيف اللي مالوش حد، مالوش حد يحافظ عليه، وما فيش رقابة؛ يعني واحد يتيم الطفل، عمه هو اللي مسئول عنه، صعب أن فيه رقابة وأنك توجد قوانين مهما كانت في قمة الدقة وتراقب عمه، ازاي في الأكل ما ياخدش أكل زيادة من اليتيم؟ في الأوامر الأولى لما نزلت المنع التام من القرب من اليتيم كان من شدة تحرج الصحابة كان يفصل أكل اليتيم عن أكله فكان يفسد أكل اليتيم. ويسألونك عن اليتامى، لما فراحوا يسألوني مثلاً طيب نعمل إيه الأكل بتاعه يفسد؟ فربنا قال: ﴿قُلْ إِصْلَاحٌ لَّهُمْ خَيْرٌ ۖ وَإِن تُخَالِطُوهُمْ فَإِخْوَانُكُمْ﴾ [البقرة: 220]. يعني مش مشكلة حطوا أكلكم مع بعض وكلوا مع بعض بس أنت ممكن غصب عنك وأنت بتاكل تاكل لقمة من بتاعة اليتيم مش من بتاعتك، ربنا بيقول إيه: ﴿وَاللَّهُ يَعْلَمُ الْمُفْسِدَ مِنَ الْمُصْلِحِ﴾ [البقرة: 220]. مين اللي قاصده من خلطة المال أنه يصلح مال اليتيم؟ ومين اللي قاصده من الخلطة أنه ياكل مال اليتيم؟ يبقى إذا في حاجات عندنا في الشريعة مهما اتحطت أنظمة إدارية الرقابة عليها لن تستطيع، دي في النفوس بين العبد وبين الله، لذلك الرقابات الإدارية ووضع القوانين لضبط الأشياء دي مهم جداً في أي مجتمع، لكن الأهم منه نشر روح الوعظ والخوف من الله.

زي مثلاً مسألة اللي بيلعب بالطلاق، أنه يطلق زوجته ويعلق الزوجة، يسيبها لغاية لما تقارب على انتهاء العدة وبعدين يرجعها وبعدين يطلقها وبعدين يتركها لغاية، هو قاعد بيأثر على المرأة نفسياً وبيضغط عليها عشان تفتدي نفسها منه، هو قدام الناس: أنا بمارس حق شرعي، أنا من حقي أن أنا أطلقها. اللي بيعمل كده بالرغم أن هو ظاهرياً ما عملش حاجة حرام ظاهرياً، ربنا قال اللي بيعمل كده قال: ﴿وَلَا تَتَّخِذُوا آيَاتِ اللَّهِ هُزُوًا﴾ [البقرة: 231]. ده بيستهزأ بدين الله عز وجل، ده عقابه أشد من اللي كان يعمل الحرام ظاهرياً. يبقى إذا في حاجات في الشرع هنا ربنا قال ﴿وَلَا تَقْرَبُوا مَالَ الْيَتِيمِ﴾ قال إيه: ﴿إِلَّا بِالَّتِي هِيَ أَحْسَنُ﴾ [الأنعام: 152]. أنت ممكن تضحك على الناس وتعمل مشروع تقول ده أحسن لليتيم، لكن أنت أحسن لك مش لليتيم، ده هيضر اليتيم، الذي يعلم ذلك هو الله، لكن ربنا قال: ﴿وَاللَّهُ يَعْلَمُ الْمُفْسِدَ مِنَ الْمُصْلِحِ﴾ [البقرة: 220]. يبقى في منع تام من الاقتراب من أموال الضعفاء إلا أنك تصلحها له، وإذا أحد قوي العقل ﴿وَارْزُقُوهُمْ فِيهَا﴾ [النساء: 5] ما قالش ارزقوهُم إيه؟ منها. من بعض العلماء اللي تكلموا في الإعجاز الاقتصادي في سورة النساء قالوا: ارزقوهم فيها مش منها، منها يعني تسيب مال اليتيم زي ما هو وتدي له منه فيخلص، ارزقوهم فيها أي استثمروا لهم فيها ثم أعطوهم من الربح، معايا تاني؟ ﴿وَارْزُقُوهُمْ فِيهَا﴾ يعني استثمروا لهم في المال ثم أعطوهم من الربح مش من أصل المال عشان ما يفناش مال اليتيم.

الشاهد: ﴿وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ﴾ [الأنعام: 152]. العلماء اختلفوا: يبلغ أشده ده يعني كم سنة؟ بعضهم قال عشرين وبعضهم قال ثمانتاشر وبعضهم قال خمسة وعشرين وبعضهم قال تلاتين، وأغرب وأبعد من قال أربعين وستين قياساً على لما بلغ أشده هو بلغ أربعين سنة. القرآن جاب وصفين: قال ﴿فَإِن آنَسْتُم مِّنْهُمْ رُشْدًا فَادْفَعُوا إِلَيْهِمْ أَمْوَالَهُمْ﴾ [النساء: 6]، وقال: ﴿حَتَّىٰ يَبْلُغَ أَشُدَّهُ﴾ [الأنعام: 152]. فجاب وصف الرشد والشدة، الوصف ده وصف ممكن بيختلف من شخص لشخص، ممكن واحد يصل إلى الرشد والشدة عنده رشد عقلي وشدة بدنية يعرف يحمل فيه المال، تدي له مثلاً ميت ألف جنيه بتوعه أو خمسين ألف جنيه بتوعه، لو اديتهم له مثلاً ممكن شاب عنده ثمانتاشر سنة لكن سفيه، تدي له المية ألف يضيعها، فده ما ياخدش الفلوس، ممكن واحد عنده ستاشر سنة، ده مش سفيه، عنده رشد عقلي وعنده شدة يتحمل انك تدي له المال ده وتصرف فيه، إذاً والله أعلى وأعلم.

الراجح أن الموضوع مش مضبوط بسن، الموضوع مضبوط بالاختبار، وده يعلمك أن ممكن بعد كده يتعمل لجان اختبار تدريب: اليمتيم إمتى ياخد الفلوس بتاعته؟ مش يتحط قانون وضعي عند سن ثمانتاشر سنة ياخد فلوسه، طب ما أغلب اللي بيبقوا في الملاجئ بياخدوا فلوسهم يبعتروها، وبعدين يرجع بقى يشتغل بلطجي ولا يشتغل أي حاجة تاني، لأنه خد الفلوس اللي موجودة ضيعها. لكن شف تعبير القرآن: ﴿فَإِن آنَسْتُم مِّنْهُمْ رُشْدًا﴾، وحتى يبلغ أشده. حتى بعض العلماء يقترح أن فعلاً يتعمل مراكز تدريب واختبارات: إمتى ياخد الفلوس بتاعته؟ والرشد جمهور أهل العلم أن الرشد هنا مش المقصود به الرشد الديني، المقصود به الرشد العقلي، بنكال الإام الشافعي وبعض العلماء قال لأ، حتى لو واحد ذكي وتاجر كويس لكن عاصي ومسرف في المعاصي برضو ده مش رشد. لكن يعني الراجح والله أعلى وأعلم رأي الجمهور والعلماء أن الرشد يكفيه من الرشد العقلي، لأن المسألة هنا مسألة مال، والله عز وجل يحاسبه على معصيته بينه وبين الله عز وجل.

يبقى هنا قال ﴿إِلَّا بِالَّتِي هِيَ أَحْسَنُ﴾ لغاية إمتى؟ ﴿حَتَّىٰ يَبْلُغَ أَشُدَّهُ﴾ [الأنعام: 152]. وهنا بناخد قاعدة مهمة جداً جداً جداً في الفقه: التصرف في مال الغير يكون بالحظ له. التصرف في مال الغير دايماً لما وخاصة إن لم يأذن ولكن أذن لك الشرع، مش هو اللي أذن لك، أو هو أذن لك زي أنت مثلاً وكيل، أنت وكيل لشخص، شخص أداك فلوسه وخلاك الوكيل بتاعه تشتري له حاجة، لا يجوز لك أنك أنت تتصرف له بالاقل، لازم تتصرف له بيسموها الفقهاء بالاحظ، أي بالافضل له. يعني أنا واحد أداني فلوس وقال لي روح اشتري عربية. ليه بتكلم في الحاجات دي؟ لان احنا عايزين نتعود أن مش لازم الدرس يبقى كله وعظي، بقينا عايزين نشيل الفكرة اللي أصبحت فيها نوع من العلمنة عند بعض الناس، أنه أي أحكام شرعية أو أي معاملات اجتماعية من الشريعة مش عايز يسمعها، طب أنت هتعرفها منين؟

وده جه متداخل في القرآن، يعني جه بالتوحيد يجيب في الأول زي ما قلنا العقيدة ويجيب الأطعمة تيجي في صورة مكية. طب ليه؟ عشان هذا الدين متداخل، لن يستطيع مهما حاولوا علمنة هذا الدين، هذا الدين عصي على العلمنة.

بقية الأديان اللي حرفت أصبحت سهلة أن هي تتعلمن، عملوا لهم كنيسة وعملوا لهم معابد وخشوا عيطوا وأطلعوا مارسوا حياتكم، فأصبحت سهل أن هي تتعلمن. الدين الوحيد الآن اللي رافض العلمنة هو الدين الإسلامي. لذلك أصلا أنا عايز أقول لكم إن إحدى التعريفات اللي أطلقتها مراكز البحوث الأمريكية على كلمة إسلامي اللي احنا بنسمعها اليومين دول في السياسة، لكن الإسلاميين فقالوا يعني مين إسلامي؟ أي الإسلام هو رافض تنحية الشريعة من المجتمع، ده يبقى أي حد عنده الفكرة دي، حتى لو متساهل، حتى لو متسيب، حتى لو بيغير، ده إسلامي ولازم يحارب، ده لازم يحارب. مجرد بس رفض داخلي لتنحية الشريعة عن المجتمع، اللي رافض الفكر ده، ده يبقى اسمه إسلامي ولازم يحارب.

نقوم نرجع تاني أن بنقول قاعدة مهمة جدا في التعامل بنغلط فيها: واحد يديك فلوس عشان تشتري له حاجة، أنت هنا وكيله من غير ما تعرفه، وتقوم تعمل سمسرة وتشتري الحاجة مثلا هي الحاجة عند راجل بمية ألف، قعدت فصلت لغاية لما بقت تسعين ألف، وتقوم أنت واخد العشر آلاف وتقول له أنا جبتها لك، أو تقوم أنت واخد خمس آلاف وتقول له أنا جبتها لك بخمسة وتسعين ألف. لو هو أداك المال بصفتك أنك وكيل عنه، المفروض يديك أجرة الوكالة، ما تعملش أنت كدة تاني يا عفود، تقول له بصراحة أنا فصلت وجبتها بتسعين ألف أنا عايز حقي كوكيل، أو تتفق معه قبل ما تشتغل، قلت له أنا عايز حقي أن أنا هاشتغل لك هابقى وكيل عنك، إنما ما تشتغلش من وراه إلا إذا كان هو عارف. هتقول لي خلاص، فالمعروف عرفا كالمشروط شرطا، معروف أن هو جاي لك على أساس أن أنت سمسار وشغال في الموضوع دوت وبتشتري وبتاخد نسبة وبتكون برضى الطرفين اللي بتشتري منه والباقي. الشاهد أن لا تتصرف في مال الآخرين إلا بالأفضل لهم، لو هي مسألة متداخلة اه، لو مش معروف عن الشخص ده أنه بيجيب حاجات للناس واداها لك بصفتك أنك وكيل؟ اه حرام.

لذلك الخطورة دائما في العقود المالية أن هي ما بتتوصفش الأول، اللي بيعمل مشاكل وبيعمل مشاكل عند المفتين برضه، أنك بتحط المفتي في حرج، ما هوش عارف أن أنتم ما وصفتوش العقد اللي بينا ده إيه؟ لازم نقعد ونقول أنت هتاخد الفلوس مني، العقد ده في الشريعة اسمه إيه؟ اسمه وكالة ولا اسمه سمسرة؟ لازم نوصف، غياب التوصيفات العقود بيؤدي لتداخل، فالفلوس تروح، ييجي المفتي يقول له لأ أنت وكيله، لأ ده أنا واخدها على أنه سمسار، راجل والله أنا مديهم فلوس على أنه وكيل، ما أنتم ما اتفقتوش ليه؟

من الحديث المروي اللي حسنه بعض أهل العلم: «ثلاثة لا يستجاب دعاؤهم ولا يستجيب الله دعاؤهم منها رجل أعطى مالا ولم يشهد»، اديت فلوس لواحد يشغلها لك وما أشهدتش عليه، سرق الفلوس، تدعي عليه دعائك عليه مش مستجاب ليه؟ حتى لو واحد استلف؟ حتى لو واحد استلف ليه؟ لأن الشرع قال لك لازم تشهد، أنت اللي فرطت في حقك، أنت بقى ارتضيت المعاملة دي خلاص ترضاها لغيرك، يعني أنت ارتضيت المعاملة دي أنت ترضاه لغيرك. يعني ربنا قال إن في تجارة ممكن تبقى عن تراض بينا، أنت ارتضيت عن تراض خلاص كمل فيها، ما تجيش بقى بعد تقول أصل هو ضحك علي، طب ما أنت غلطان، طب ما لو فيه احتمال يضحك عليك أنت المفروض أصلا الأصل أنك تشهد، أي نعم الأمر في الآية زي ما قال جمهور العلماء أن هو على الاستحباب، لكن أنت غلطان أنك فرطت.

الشاهد من الحديث بعض أهل العلم ضعفه، الشيخ مصطفى أولاده مضاعفة والشيخ اليماني محسنه، أيا كان يعني أنا عايز أقول إن اللي بيفرط في حقه، ضبط العقود المالية قبل الدخول فيها مهم جدا جدا جدا. اللي بيعمل خلل عند الناس في شراء العربيات وشراء الأدوات المنزلية ويقول لك لأ ده خد فلوس من ورايا وأنه يشغل فلوس واحنا ما اتفقناش، ضبط كل ده لازم مهم جدا قبل ما نشتغل في أي معاملة مالية لازم يضبط والنسبة والمرابحة ولا مضاربة ولا إيه؟ العقد ده اسمه إيه؟ وهياخد قد ايه؟ لازم كل شيء يبقى مضبوط، لأن كتير من الناس دلوقتي شكوى المال اللي إيه اللي بيسرق.

بعدها ما الأولانية: ﴿وَلَا تَقْرَبُوا مَالَ الْيَتِيمِ﴾. طب التانية: أنت مضطر تتعامل مع أموال الناس؟ بيع وشراء، الأولانية طب يتيم طيب ماشي، طب أنا بقى عايز أيش حياتي مع وسط ناس، هشتري منه عربية، هشتري منه شوال رز هنبيع، فربنا يقول لك: ﴿وَأَوْفُوا الْكَيْلَ وَالْمِيزَانَ بِالْقِسْطِ﴾. ما قالش تعاملوا بالقسط، قال إيه؟ أوفوا، دي زي بالوالدين إحسانا كدة، ما جتش هنا بالنهي، يعني هنا قبلها ولا تقربوا مال اليتيم إلا بالتي هي أحسن، وبعدين قال إيه: ﴿وَأَوْفُوا الْكَيْلَ وَالْمِيزَانَ﴾، ما قالش ولا تبخسوا الكيل والميزان، قال وأوفوا، يبقى لازم تتعامل بالوفاء التام، ظاهر الآية ده يقول لك أنك لازم تتعامل بالحباية، لأن الوفاء التام يعني بحباية الرز، بورقة الجرجير الزيادة في الميزان تتحط.

فده ممكن يؤدي إلى إيه إلى الحرج في المعاملات المالية بالبعض، فربنا قال بعدها إيه على طول؟ ﴿لَا نُكَلِّفُ نَفْسًا إِلَّا وُسْعَهَا﴾. أنت أهم حاجة تبلغ وسعك في أنك ما يضحكش عليك، في حاجة راحت غصب عنك أنت الاتنين مش مشكلة، الله عز وجل يعفو عنك واليسير معفو عنه، ودي إيه رفع الحرج في الشريعة الإسلامية: ﴿فَلَا نُكَلِّفُ نَفْسًا إِلَّا وُسْعَهَا﴾.

قالوا هنا جتي ليه؟ دي جتي عاملة زي بالضبط آية بر الوالدين في سورة الإسراء: ﴿فَلَا تَقُل لَّهُمَا أُفٍّ وَلَا تَنْهَرْهُمَا﴾، في آية صعبة أنك مجرد القول حتى لو ما سمعوهمش أنت محاسب عليه، فممكن غصب عنك يحصل موقف غصب عنك، فربنا بيقول إيه بعدها: ﴿إِن تَكُونُوا صَالِحِينَ﴾، لو أنت أصلا صالح طول عمرك بس غلطت غلطة، فإنه كان ﴿لِلْأَوَّابِينَ غَفُورًا﴾. لأن دي حاجة صعبة، المعاملات الاجتماعية أنك تحافظ عليها صعبة، فدائما ربنا بيقول لك أنت مطالب بالوسع، ﴿اتَّقُوا اللَّهَ مَا اسْتَطَعْتُمْ﴾ جتي في سورة التغابن في المعاملات المالية بعد إن من أزواجكم وأولادكم عدوا لكم فاحذروا.

طيب وأوفوا الكيل والميزان بالقسط، فأن أنا بقول ظاهر الآية أنك أنت مسؤول أن الطبقة بتاعة الميزان الزيادة وأنك أنت لازم تتعامل معه وتبين كل حاجة، فده ممكن يبقى صعب جدا في البيع والشرا أنه أنه يصل لمرحلة الوفاء، هو ممكن يصل إلى مرحلة أن الاتنين راضيين، يعني أنا شاري وأنا عارف أن في سوق العربيات عرفا في حاجات ما بتتقالش، لكن في عيوب بتتقال. غالب المعاملات الاجتماعية يا جماعة عايز أخوف من ربنا، ومهما وضع لها من قوانين إدارية برضه ممكن يحصل فيها لعب، لذلك غالب المعاملات تطفيف الميزان حاجات سهلة جدا أن هو يحط حاجة بس تتعمل في الميزان كدة، أنه يجيب كفة شكلها قد بعض لكن الكفة اللي بيحط فيها أتقل من اللي بيحط فيها، الوزن أتقل من الكفة التانية، طبعا أنا بقول لكم على أفكار ممكن إيه تطبقوها مثلا في غالب المعاملات الاجتماعية زي زي معاملات الراجل مع زوجته، مين المطلع عليهم؟ ممكن هي تضر الزوج وممكن هو يضرها، ممكن في الخلع هي مظلومة أو ممكن هي ظالمة، ده وارد، لذلك لابد من بث روح الوعظ وأن هذه الأشياء طاعة وأن الحياة كلها طاعة، وأن البيع والشرا ده طاعة، لذلك بييجي لحزة وأنا لسه هبيع وأظهروا البيع أسيبه عشان الصلاة لأن دي إذا كانت دي طاعة فأنا بسيبها لطاعة أولى، لازم بث هذه الروح في المجتمع.

لذلك جتي البداية بالتوحيد: ﴿وَلَا تُشْرِكُوا بِهِ شَيْئًا﴾ مهم جدا أن المعاملات الاجتماعية سهل جدا أنك تلعب فيها وتهرب من فمهما وضع لها إداريات وضبط ممكن الإنسان يلعب فيها، فلازم بث روح الخوف من الدار الآخرة.

﴿وَأَوْفُوا الْكَيْلَ وَالْمِيزَانَ بِالْقِسْطِ﴾، جيب صيغة الوفاء: ﴿لَا نُكَلِّفُ نَفْسًا إِلَّا وُسْعَهَا﴾. وبعضهم هنا قال المهندسين قال المعنى اللي أنا قلته، وهو أن المقصد هنا أن أنت ممكن غصب عنك يقع منك الشيء، البائع يقع منه حتة فاكهة المشتري الفلوس ما تبقاش كاملة قوي بنفس الحق، الحاجات البينية الصغيرة دي دي معفو عنها، ده إحدى المعاني قالوا كتير مفسرين.

معنى تاني قالوا أن الله عز وجل في المال لم يكلفك بما فوق طاقتك، لا نكلف نفسا إلا وسعها يعني ربنا بيقول أنا أعلم ما يصلح الإنسان لم أكلفه فوق طاقته، فلا تقول لأ ده صعب لأ تنفذه، وده رأي الإمام الطبري أن الوفاء بالكيل والميزان أنت مطالب به، الله عز وجل لم يطلب من البائع أن هو بيدي المشتري يدي له فوق حاجته ولم يطلب من المشتري أنه يدفع فوق الثمن، طلب من الاتنين الإتمام العادل وأوفوا الكيل والميزان بالقسط مش بالحب مش بالود ومش بالعرف، بالقسط، فالله عز وجل يعلم النفوس البشرية ويعلم إيه الثقيل اللي عليها، فجه عند دي لأن دي ثقيلة على النفس أنك دائما أنك تدي الناس حقها ثقيل عليك أوي، ﴿وَيْلٌ لِّلْمُطَفِّفِينَ * الَّذِينَ إِذَا اكْتَالُوا عَلَى النَّاسِ يَسْتَوْفُونَ * وَإِذَا كَالوهُم أو وَزَنُوهُم يُخْسِرُونَ﴾، دائما كدة، يرى أحدكم القذاة في عين أخيه ولا يرى الجسد أو الجزل في عين نفسه، صعبة جدا، فدائما المعاملات مع الناس ثقيلة أنك تدي للناس حقه، وأنت بتستلف بيبقى أسعد أيام حياتك، وأنت بترد بيبقى أتعب أيام حياتك، طب ما هو مستني الفلوس زي ما أنت كنت مستنيها، دائما التعامل مع ناس ثقيل، فربنا بيقول لك هنا بعد الآية دي تحديدا: ﴿لَا نُكَلِّفُ نَفْسًا إِلَّا وُسْعَهَا﴾ أنت تستطيع أنت اللي بتروغ.

﴿وَإِذَا قُلتُمْ فَاعْدِلُوا﴾، دي أوامر زي ما بنقول أصول، لما يبقى الواقع الملتزم ما فيش فيه الأصول دي ما تقعدش بقى تقول متى نصر الله والتمكين فين؟ انسى بقى الحاجات دلوقتي خالص، انسى بقى الكلام ده خالص دلوقتي، ظبط دول أنا مش بناقش هنا فكرة التزكية ثم التمكين والمراحل، ده أنا بقول لك على أصول مهما حاولت تنشر شريعة في مجتمع ما فيش فيه الحاجات دي مش هتتنشر الشريعة، هتنتشر وسط مين؟ بهذه العقليات ازاي؟ تلاتاشر سنة تمهيد للعقول والنفوس عشان يتلقوا الدين، لازم يبقى فيه مجتمع يمهد الأول، يبقى فيه نفوس سوية مش نفوس مريضة، هتكلم مين؟ ده المجتمع لما يبقى المجتمع كل غرضه أنه يكيد في الآخرين فقط، ده عايز يكيد في ده وده عايز يكيد في ده فقط، مجتمع قائم على السخرية فقط، فين الشريعة اللي هتنتشر أساسا؟

فلازم هذه الأصول تضبط أولا، وأنك تحافظ عليها حتى لو أنت مستضعف، والحفاظ على هذه الأشياء في وقت الاستضعاف هو الذي يورث التمكين: ﴿وَإِذَا قُلتُمْ فَاعْدِلُوا وَلَوْ كَانَ ذَا قُرْبَى﴾. هنا كان ممكن ربنا يقول الآية اعدلوا في القول، خد بالك دائما سياق القرآن معجز، قال إيه: وإذا قلتم فاعدلوا، كأن الأصل هو عدم القول، دائما طول ما الكلمة لسه ما طلعتش خليها ما تطلعش أحسن، لأن لو طلعت ما هيش راجعة، إذا اضطريت أنك تتكلم قل العدل بقى، قد يعفى عن سكوتك، لكن الكلام ما لوش عذر، فربنا قال ما قالش واعدلوا في القول، وإذا قلتم فالأصل السكوت، وده اللي رجعه الإمام قول الله عز وجل: «من كان يؤمن بالله واليوم الآخر فليقل خيرا أو ليصمت»، فقال خيرا تحمل معنى اسم أففضل تفضيل، يعني لو تساوى الكلام مع السكوت الأولى السكوت، يعني لو الكلام بتاعك هيعمل فايدة وسكوتك هيؤدي نفس الفايدة أنت المفروض الأولى أنك تختار السكوت، الأولى هناك أنك تختار السكوت، طبعا يعني الحسابات في إيه؟ عايز آلة حاسبة الواد مش موجودة، ربنا يعلمنا ويفقهنا ويستعملنا.

وإذا قلتم فاعدلوا، الأخطر أن كلامك ولو كان ذا قربى، هنا بقى الله عز وجل يعلم الضعف اللي في النفس البشرية وللنفس البشرية اللي هتتكلم، لو أنا أتكلمت عن قومي قلت الحق في قومي أو في والدي أو في أخويا أو في جماعتي أو في حزبي أو في دعوتي، لو أنا قلت الحق فيهم أنا أصلا باستمد قوتي منهم، خد بالك اللفة النفسية بتيجي ازاي؟ أنا باستمد قوتي منهم فأن لما أطعن فيهم أنا كدة إيه بطلع أن أنا ضعيف فبخاف، مش بس حرصا عليهم ده أنا بعمل كده إيه حرصا على نفسي لأن أنا لو أتكلمت عن قبيلتي قلت أه بصراحة قبيلتي أخطأت في كذا أو دعوتي أخطأت في كذا، أه يا عم أنت منتمي لدعوة أصلا فيها أخطاء؟ أه أصل أنت قبيلتك فيها كذا، وصل بقى أن اللي يخاف من الموضوع ده وصل بقى لمرحلة في الجاهلية أنه يقول إيه: وهل أنا إلا من غزيّة إن غوت غويت وإن ترشد غزيّة أشد، يعني وهل أنا إلا من قبيلة غزيّة، وبعضهم قال غزيّة هنا قرأتها بضبط غزيّة، وهل أنا إلا من غزيّة إن غوت غويت لو هي ضاعت أنا ضايع وإن ترشدت أرشد؟ هو قال بص لا هقعد بقى أنقضهم ولا هقعد أشوف قبيلتي صح ولا غلط، اللي بتعمله قبيلتي صح على طول حتى لو الغواية أنا ماشي.

مش هفكر خلاص هو عمل بلوك وقفل العقل وما عادش ماشي وخلاص يساق، ما بيفكرش. فهنا ربنا بيقول: ﴿وَإِذَا قُلْتُمْ فَاعْدِلُواْ وَلَوْ كَانَ ذَا قُرْبَىٰ﴾ [الأنعام: 152]. ولو عشان نفسك البشرية، ما تقولش إيه؟ لأ أصل على القريب لازم أراعيه برضو، وربنا أمر بالإحسان لذي القربى، فمش من الإحسان أنت ممكن بقى نفسك تجيب لك تأويلات ومصالح ومفاسد والكلام ده وتقول لك إيه، أصل من المصالح إن احنا نحافظ على الكيان ونحافظ على الدعوة ونحافظ على القبيلة، فنقول العدل لأ مش مشكلة إن احنا نقول الظلم هنا. فربنا بيقول لك ولو كان ذا قربى.

يقول الله عز وجل في سورة النساء: ﴿يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ وَلَوْ عَلَىٰ أَنفُسِكُمْ﴾ [النساء: 135]. من المعاني الجميلة اللي قيلت، قالوا: ولو على أنفسكم؛ بعضهم قال متعلقة بكلمة شهداء لله، أي تشهد لله ولو على نفسك. وبعضهم قال متعلقة بكلمة قوامين بالقسط، أي قوام بالقسط على نفسك. يعني إيه قوام بالقسط على نفسك؟ يعني نفسك لن تستطيع أن تقول الحق إلا لو كنت واقف عليها بتحاسبها، قوام مش بس واقف، ده أنت كل يوم بتحاسب نفسك، أنت الكلمة دي قلتيها ليه؟ عشان ترضي فلان ولا عشان الحق؟ أنت لما اتحطيت في موقف إن أنت هتشهد على أقربائك، هو ده الحق، لازم دايماً تقوم نفسك إن تتهم نفسك، أنت قلت الكلمة دي ليه؟ وتحاسب نفسك، تكون قواماً بالقسط، أي تقوم نفسك دائماً. أنت قلت الكلمة دي ليه، وقصدك إيه، هو ده الحق؟ تعال نراجع الأدلة تاني.

في واحد ما بيفكرش وما بيسمحش لنفسه أصلاً بهذا التفكير. ﴿وَإِذَا قُلْتُمْ فَاعْدِلُواْ وَلَوْ كَانَ ذَا قُرْبَىٰ﴾ [الأنعام: 152]. الختام وبعاء الختام الأربعة دول، وعهد الله أوفوا، دي الوفاء مع الكيل والميزان وعهد ربنا، معاملة مع ربنا بالوفاء، ومعاملة مع الناس بالوفاء. في عندنا حقوق الله وحقوق العبيد، دايمًا كده لذلك في بعض الحدود الشرعية زي مثلاً السارق خلاص إتمسك ووصل، قالوا في حق لله وفي حق للعبد، حتى لو تنازل العبد عنه في حق لسه قائم لله، زي الزاني برضو، وبيختلفوا في بعض الأحكام الشرعية. إذاً في حقوق لله وفي حقوق للعبيد، في حق إنك تتعامل معه وفي حق الله عز وجل. ﴿وَبِعَهْدِ اللَّهِ أَوْفُواْ﴾ [الأنعام: 152]، قال بعهد الله، أي كل عهد أعطيته للناس، بسم الله يعني أي كلمة أديتها للناس.

وإذا قلتم بعدين ممكن تحمل على الشهادة، وممكن تحمل أنك تقول رأيك، إنما واحد قال لك أنا عايز منك كلمة فأعطني عهد الله، قلت له عهد الله عز وجل أفعل لك كذا، ده أشد الأشياء إنك أنت لازم توفي بها، ومن أشد المعاصي أنك أنت بعد ما تعطي هذا العهد تنقضه، لأنك استغليت اسم الله لأغراضك الشخصية والعياذ بالله. زي اللي بيستغل اسم الله وتعظيم الناس لله عشان يبيع السلعة، ده مش بيستغل مثلاً شطارته ولا ده بيستغل اسم الله فبيحلف بالله. لذلك المنفق سلعته بالحلف الكاذب، ده من الكبائر. ليه مش مجرد بس إنه عشان باع وكسب أو خد فلوس حد؟ لأ، لأنه استغل اسم الله العظيم عشان يبيع سلعته، عشان دنيا حقيرة. فكذلك وبعهد الله أوفوا.

وقيل: كل عهد عاهدنا الله عز وجل عليه، أن العهود اللي ربنا خدها علينا، أو أخذ الله عز وجل علينا عهود ومواثيق لازم نؤديها. ﴿ذَلِكُمْ وَصَّاكُم بِهِ لَعَلَّكُمْ تَذَكَّرُونَ﴾ [الأنعام: 152]. الأولانية قلنا لعلكم تعقلون، لأن هي أصلاً مناسبة للعقل البشري. تذكرون ليه هنا جت تذكرون؟ لأن الأوامر دي تحديداً الأربعة الإنسان بينساها، لأن نفسه مايلة عكسها؛ نفسه مايلة إن فلوس اليتيم قدامه ما حدش هيسأله طب ما يأخد كده يختصر كده ما حدش واخد باله، وإن الكيل والميزان ما حدش واخد باله وهو بيشيل حاجة من الميزان، وإن مش لازم يتكلم على قرايبه يعني مش لازم يقول الحق، ما جتش على قرايبه يعني ممكن أقول الحق على أي حد تاني، وإن ممكن بعد ما يحلف بالله عايز ينقض العهد، النفس ممكن تميل عكس ذلك. فلازم تذكرة، لازم ده أمر يبقى منتشر مذكر به أنفسنا يعني، ﴿لَعَلَّكُمْ تَذَكَّرُونَ﴾ [الأنعام: 152]. وأن هذه السنة اللي قبل كده خلاص.

طيب، نختم الآية دي: ﴿وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [الأنعام: 153]. ختام بقى الوصايا العامة للمجتمع والوصايا المعاملات المادية والاجتماعية، في بقى السياج العام اللي لازم يحفز المجتمع، إن لازم دايماً أصدر المجتمع، أيها الناس أحذروا من الضلال فيه مناهج ضالة. لما تيجي تكلم الناس عن المناهج ضالة يحسسوك إنك جاي من المريخ، فين المناهج الضالة دي؟ أمال أنت ليه يومياً في الفاتحة بتقول: ﴿اهْدِنَا الصِّرَاطَ الْمُسْتَقِيمَ * صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ﴾ [الفاتحة: 6-7]؟ أنت يومياً خايف تكون من المغضوب عليهم ولا الضالين، أنت يومياً خايف تضل، فلازم المجتمع يحذر إن في حاجة اسمها أهل السنة في سياج يقام منع البدع والخرافات والضلالات، لازم ده يعلم للمجتمع وينشر من البداية، إن في طريق واحد هو الحق، والطرق التانية كلها ضلال.

قال: ﴿وَأَنَّ هَذَا﴾ وكلمة هذا اسم إشارة للواضح القريب، الدنيا واضحة وقريبة، ﴿وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلَا تَتَّبِعُوا السُّبُلَ﴾ [الأنعام: 153]، مش السبيل الضال، السُّبُل، جت جمع ليه؟ زي أول الصورة: ﴿الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ وَجَعَلَ الظُّلُمَاتِ وَالنُّورَ﴾ [الأنعام: 1]. طرق الضلال كتيرة. أيضاً من غواية الشيطان للناس، أن لو كان عامل لهم سبيل واحد للضلال، إفرض ما عجبكش؟ فاحتمالية أنك تسقط في سبيل واحد ضلالي احتمالية قليلة جداً، لكن لما خمسميت سبيل ضلال احتلتها الناس أكتر، زي رمضان لو هو مسلسل واحد إفرض ما عجبكش خلاص ما هو هتسيبه ما وراكش حاجة، إنما لما يبقوا تلتمايت مسلسل في خمسمية قناة ومتداخلين والمناسبة لكل الأعمار من أول اللي عنده تمنميت سنة لغاية اللي عنده شهر، عاملين لهم كل حاجة بحيث إن كل الناس تفضل قاعدّة، خلاص يبقى نسبة الضلال هنا بتزيد. ﴿وَلَا تَتَّبِعُوا السُّبُلَ﴾ [الأنعام: 153]. ومن معنى في اللغة عن الطريق يقول لك: السبيل الذي سبلته السابلة، يعني في ناس ماشيّة فانت ممكن تلاقي ناس كتير ماشيّة، وده يبقى طريق ضلال، ولا تتبعوا السبل.

طيب، خد بالك بقى من الانحراف بيحصل ازاي؟ أولاً الانحراف ممكن يحصل أنك تجد مناهج تدعي إن هي تملك هذه الأشياء، إن احنا عندنا عدل وعندنا حرية وعندنا مساواة اجتماعية، لكن من غير التوحيد، يعني ممكن المناهج تظهر تستغل هذه الأوامر التسعة اللي قبلها، فانت لازم بعد ما تقول الأوامر التسعة اللي بتقيم أي مجتمع تقول: وهذا لا يكون إلا بدين الله، بالتوحيد الخالص، باتباع سنة النبي صلى الله عليه وسلم، لازم ترجع تأصل تاني على الأصول. ختامي الأخير ده، ده ضابط عشان مش الحاجات دي تيجي إن أي منهج يستغلها ويضحك على الناس ويدخلهم فيه، مع معي؟ طيب، ﴿وَلَا تَتَّبِعُوا السُّبُلَ﴾ [الأنعام: 153]. ازاي الانحراف بيحصل؟ شف التعبير القرآني المعجز، وأختم بها: ﴿وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [الأنعام: 153].

ولا إيه؟ فتفرق بكم. إيه الفرق بين فتفرقكم وبين فتفرق بكم؟ تفرقكم يعني لو احنا مشينا لو كل ناس مشيوا في سبيل السبل دي هتفرقنا، وده معنى مهم في الآية وذكره قتادة وغيره. أمال يعني إيه؟ فتفرق بكم باقي المصاحبة دي، تفرق بكم يعني السبيل هياخدك وأنت مش واخد بالك، تفرق بكم يعني هيصحبك دي بيسموها باقي المصاحبة، يعني هياخدك مجرد بس أنك أنت تقف، زي ما النبي صلى الله عليه وسلم قال: «ضرب الله مثلاً صراطاً مستقيماً، وعلى جنبتي الصراط سوران، وفيهما السور ده مش سور صب، ده فيه أماكن مفتوحة، فيهما أبواب مفتحة، والأبواب دي مش مقفولة بمفاتيح، أيها الستور مرخاة»، النبي صلى الله عليه وسلم بيقول في منادي على كل واحد.

وفي حديث تاني مروي عن ابن مسعود عن النبي صلى الله عليه وسلم: خط النبي صلى الله عليه وسلم خطاً، وخط خطوطاً عن يمينه وعن يساره، وقال: «هذا سبيل الله، وهذه السبل، فلا تتبعوا السبل فتفرق بكم عن سبيله». على كل سبيل شيطان يدعو، شف التخصص يعني مش على كل خمسة شيطان أو شيطان هو مسئول عن السبل والضلالة، لأ، على كل سبيل منها شيطان يدعو إليه، التخصص في الإطلاق.

طيب، النبي صلى الله عليه وسلم قال في الحديث: «إنك إن تفتحه»، يعني مجرد أنك تفتح لو أنت فكرت تمشي في الطريق هتلاقي الطريق خدك، عارف أنت لما تبقى ماشي في الطريق مسافر الطريق عمال ياخدك ويحود يميناً، أنت ما أنتاش واخد بالك، أنت يقول لك ده أنا ماشي في الطريق المستقيم من ساعتها، يقول لك أنت حتى اللي بيوصف لك يقول لك إيه: هتاخد الطريق ده طوالي، لا هتحود لا يمين ولا شمال. لغاية حقيقة الطريق اللي أنت ماشي وعمال بيعمل ازاي عملية حود يمين وشمال هي دي فتفرق بكم، أنك ممكن الطريق ياخدك ويحود وأنت مش حاسس وأنت لا تشعر. لو لابد من وضع السياج اللي لما جيت تيجي تحود تقول أي ده! هي دي بقى كتب العقيدة، المجهود اللي بذله أهل العلم عشان يحطوا السياج يحطوا موانع، إن خد بالك أوعى الطريق يحود بك، كل حوداية زي ما كل سبيل عليه شيطان، كل حوداية بيقيد الله عز وجل إمام يقف.

خد بالك هنا حوداية، دي هتدخلك على النصارى، دي هتدخلك على اليهود، ودي هتدخلك على الإلحاد، دي هتدخلك على الشيعة، دي هتدخلك واقفين. ابن عمر كان يلقط كده يسمع حد يقول له آه أنت بتنكر القدر، ده أنت من الخوارج، كان إيه من سؤاله يفهم هو إيه الفكرة الضالة اللي عنده. فيقال الله علماء يبقوا سياج عشان الطريق، لأن لو سبنا نفسنا الطريق يحود وأنت مش واخد بالي، ﴿فَتَفَرَّقَ بِكُمْ عَن سَبِيلِهِ ذَلِكُمْ وَصَّاكُم بِهِ لَعَلَّكُمْ تَتَّقُونَ﴾ [الأنعام: 153]. لازم يبقى في حذر، تقوى هي الحذر، لازم في الختام الأخير، الأولانية العقل، التانية التذكرة المستمرة، التالتة الحذر أن الطريق يحود بنا واحنا مش واخدين بالنا.

نكتفي بهذا القدر، سبحانك اللهم وبحمدك، أشهد أن لا إله إلا أنت، أستغفرك وأتوب إليك. جزاكم الله خيراً.