تفسير سورة الأنعام (22) | الآيات (139-150) | د. أحمد عبد المنعم

السلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم.

بإذن الله عز وجل نستكمل ما بدأناه في تفسير سورة الأنعام. كنا توقفنا عند قول الله عز وجل آية مئة واحد وأربعين سورة الأنعام، قول الله عز وجل: ﴿وَهُوَ الَّذِي أَنشَأَ جَنَّاتٍ مَّعْرُوشَاتٍ وَغَيْرَ مَعْرُوشَاتٍ وَالنَّخْلَ وَالزَّرْعَ مُخْتَلِفًا أُكُلُهُ وَالزَّيْتُونَ وَالرُّمَّانَ مُتَشَابِهًا وَغَيْرَ مُتَشَابِهٍ كُلُوا مِن ثَمَرِهِ إِذَا أَثْمَرَ وَآتُوا حَقَّهُ يَوْمَ حَصَادِهِ وَلَا تُسْرِفُوا إِنَّهُ لَا يُحِبُّ الْمُسْرِفِينَ﴾ [الأنعام: 141].

ذكرنا في المرة الماضية إزاي أن ضغط المجتمعات أو تسلط السادة اللي عايزين يشرعوا شرع بعيداً عن دين الله عز وجل، وإزاي العقل البشري مهما بلغ من الذكاء والقوة والتفكير، مهما بلغ لما بيبتعد عن الوحي ويجي يحط شرع يشرع في المعاملات بين الناس وبعضها، بتجد يصل إلى مرحلة -مهما بلغ هذا العقل- يصل إلى مرحلة سماها الله عز وجل سفهاً. قال الله عز وجل: ﴿قَدْ خَسِرَ الَّذِينَ قَتَلُوا أَوْلَادَهُمْ سَفَهًا بِغَيْرِ عِلْمٍ﴾ [الأنعام: 140]. وقلنا إن أحياناً فعلاً ضغط المجتمع ممكن يوصل الناس أن هي تفعل الأفعال في قمة السفاهة، لكن هو بيمشي في المجتمع مش حاسس بالسفاهة دي لأن المجتمع راضي. هذه التقاليد بتتغير مع الأزمنة، وييجي الزمن الحاضر بينظر للزمن الماضي دائماً النظرة أنه كان على جزء من السفاهة.

فإذاً البعد عن الوحي هيؤدي إلى أفكار في غاية السفاهة. ﴿قَدْ خَسِرَ الَّذِينَ قَتَلُوا أَوْلَادَهُمْ سَفَهًا بِغَيْرِ عِلْمٍ وَحَرَّمُوا مَا رَزَقَهُمُ اللَّهُ افْتِرَاءً عَلَى اللَّهِ قَدْ ضَلُّوا وَمَا كَانُوا مُهْتَدِينَ﴾ [الأنعام: 140]. اتكلمنا في المرة اللي فاتت أيضاً أن السورة مرت مرحلتين في منازعة في تشريع ربنا سبحانه وتعالى. المرحلة الأولى: الناس اللي عايزة تحلل ما حرم الله عز وجل. عايزين يقولوا على الميتة اللي ربنا قال عليها حرام، عايزين يقولوا على الميتة حلال؛ فبيقولوا شبهات عشان تكون الميتة حلال. الجزء التاني: عايزين يخلوا الحلال حرام، عايزين حاجات هي حلال للناس لكن يقول لك: لا، دي خاصة للآلهة، ما حدش يركبها دي كذا، هذه اللحوم والألبان خاصة لبعض الناس لا يأكلها إلا من نشاء بزعمهم، اللي هم يقولوا عليه في الأطعمة هو اللي يمشي، مش اللي ربنا شرعه مش اللي ربنا أحله.

وقلنا إن تحريم الحلال فيه يعني أشد جرماً؛ لأن المنازعة أكثر. تحليل الحرام هو شيء ماشي مع هوى النفس، وإن كان أيضاً ده مش معذور أمام الله عز وجل، لكن هو بيجاري هواه بيجاري شهواته، لكن ده بينازع مجرد المنازعة في التشريع، مجرد أنه ينازع ما أراده الله عز وجل. طيب، يبقى هم قعدوا يقسموا الحرث والأنعام، قعدوا يقسموا الزروع والأنعام، قعدوا يقولوا: الزرع ده بتاع الأصنام، الزرع ده بتاع ربنا، الزرع ده كذا، الأنعام دي بتاعة الذكور عندنا، الأنعام دي بتاعة السادة، قعدوا يقسموا حاجتين؛ الأنعام والزرع. فالله عز وجل بيقول في الآيات: من الذي خلق هذه الأنعام؟ ومن الذي خلق هذا الزرع حتى توزعوه كيفما شئتم؟ الله عز وجل هو الذي خلق، إذاً الله عز وجل هو الذي خلق، الله عز وجل هو الذي يأمر كيف توزع هذه الأشياء. ﴿أَلَا لَهُ الْخَلْقُ وَالْأَمْرُ﴾ [الأعراف: 54].

ولله المثل الأعلى، لما تخش على واحد عمال يوزع حاجة من الفلوس، فبتقول له: هي الفلوس دي بتاعتك عشان تقعد توزع فيها كده؟ الفلوس دي بتاعة السيد الوالد مثلاً عشان تقعد توزع فيها براحتك؟ الفلوس دي مش بتاعتك عشان توزع فيها. فلله المثل الأعلى، ربنا بيقول لهم: أنتم عمالين تتكلموا في الزرع وفي الأنعام مين اللي ياخد؟ هو أنتم اللي خلقتوها؟ الله عز وجل هو الذي خلق، إذاً الله عز وجل هو الذي يأمر كيف توزع. لذلك الآيات اللي بعدها: وهو سبحانه وتعالى وحده سبحانه وتعالى، وهو الذي أنشأ جنات معروشات وغير معروشات والنخل والزرع مختلفاً أُكله، والنخل والزرع أي وأنشأ النخل والزرع. يعني أنتم لم تفعلوا أي شيء، أنشأ يعني عارف كلمة المنشأة الحاجة الكبيرة، بمعنى أن الزرع ده من أول لحظة لغاية لما كبر وبقى كبير الله عز وجل هو اللي عمله.

يعني أنتم لم تتدخلوا في أي مرحلة، أنت مجرد بس بتروح تسقي الزرعة، لا أنت اللي بتوجه النبتة تطلع إزاي، ولا أنت اللي بتقول للثمرة تمشي إزاي، ولا أنت اللي بتوزع الثمرات تقول: آه أنا هنخلي الثمرة دي حلوة والثمرة دي وحشة، أنت ما تتدخلش في حاجة. الله عز وجل هو الذي يوزع الثمرات ويقدر كل شيء. الله عز وجل يققدر ويدبر كل شيء سبحانه وتعالى، فهو الذي أنشأ جنات. ولما ربنا سبحانه وتعالى بينشأ ولما ربنا سبحانه وتعالى بيخلق، مش الإنسان ممكن يطلع عينه في الآخر عشان يستنسخ حاجة بسيطة ويقعد يجيب الدي إن إيه من حاجة ويقعد مش عارف يحطها في حاجة تانية ويطلع عشان حاجة بسيطة؟ الله عز وجل لما بينشئ ينشيء جنات سبحانه وتعالى، قدرة مطلقة من الله سبحانه وتعالى، زي ما ربنا قال في سورة عبس: ﴿فَلْيَنظُرِ الْإِنسَانُ إِلَى طَعَامِهِ * أَنَّا صَبَبْنَا الْمَاءَ صَبًّا * ثُمَّ شَقَقْنَا الْأَرْضَ شَقًّا * فَأَنبَتْنَا فِيهَا حَبًّا * وَعِنَبًا وَقَضْبًا﴾ [عبس: 24-28].

فهنا ربنا سبحانه وتعالى لما أنشأ أنشأ جنات منها معروشات -يعني الناس هي اللي بيحطوا له عروش ويطلع عليها- وغيرها معروشات ما بيصعدش لفوق، والنخل والزرع مختلفاً أُكله، يعني يسقى بماء واحد ونفضل بعضها على بعض في الأكل. قلنا المشهد العجيب لو أنت تتخيل أول مرة تشوف المشهد، لو جبنا واحد مثلاً -نفترض جدلاً- عمره ما عاش على كوكب الأرض قبل كده، واحد جاي من المريخ مثلاً -نفترض جدلاً يعني- وأنت جبت له شوية طين أسود وحطيت فيه بَزرة قد قد اللُّبّ كده وحطيتها، وبعدين سقيت مية، اكتشف أن اللي بتشق الطين نبتة تطلع خضراء، وبعدين بتطلع جزء نبات بيطلع فراولة ونبات بيطلع مانجة ونبات بيطلع رمان ونبات... فبينبهر! هو هيقعد ممكن يزنّ يقعد يحفر في الطين: أكيد في حاجة جوه بتعمل كده! الله عز وجل هو الذي يقدر ذلك، الله عز وجل هو الذي يدبر ذلك. أأنتم تخلقون؟ أأنتم تزرعونه؟ الله عز وجل هو الذي يفعل ذلك.

الإنسان مجرد بس أنه بيسقي الزرع، وفي الآخر تقول: أنا اللي عملت، أنا اللي... ده النبات بتاعي، ده ابني! الإنسان بمجرد بس خلاص هو كل اللي بيعمله المني، وبعد كده الله عز وجل يخلقكم في بطون أمهاتكم. مين اللي بيوصل لك إيه المكان ده؟ خلقاً من بعد خلق في ظلمات ثلاث سبحانه وتعالى. فربنا بيقول: مختلفاً أُكله والزيتون والرمان متشابهاً وغير متشابه. قال لك: متشابهاً يعني الثمر ممكن يبقى من بعيد شكله زي بعضه كله مدور مثلاً كده، لكن حقيقة لما بتتأمل هو غير متشابه بالمرة. كل نبتة ليها قصة ولها نوع من الأوراق -وبتوع علم النبات- ولها طريقة ولها ثمرة ولها بذرة ولها قُشرة ولها ساق، ولها كل نبات مختلف قصة عالم عن النبات الآخر: متشابهاً وغير متشابه.

فربنا بيقول: ﴿كُلُوا مِن ثَمَرِهِ إِذَا أَثْمَرَ وَآتُوا حَقَّهُ يَوْمَ حَصَادِهِ وَلَا تُسْرِفُوا إِنَّهُ لَا يُحِبُّ الْمُسْرِفِينَ﴾ [الأنعام: 141]. أربط الختام ده بالسياق: الله عز وجل بيقول: أنا الذي خلقت هذه الأشياء، وأنا أبدحت لكم هذه الأشياء، فلا تجعلوا أحداً يحرم عليكم ما أحللت لكم. لأن بيجي الكفار بيشيلوا جزء من الزرع بيقولوا: لا، الجزء اللي من الزرع ده بتاع الآلهة، الجزء اللي من الزرع ده... وقالوا: ﴿هَٰذِهِ أَنْعَامٌ وَحَرْثٌ حِجْرٌ لَّا يَطْعَمُهَا إِلَّا مَن نَّشَاءُ بِزَعْمِهِمْ﴾ [الأنعام: 138]، هم اللي كانوا بيقسموا الزرع، يقولوا: الزرع ده ممنوع حد ياكله غير الأسياد، ممنوع حد ياكله غير القائمين على خدمة الآلهة، عايز تاكل من الزرع ده لازم تترقى وتوصل لغاية ما... أن اللي بيقوموا بقى على خدمة الآلهة بيوزعوا زرع مع أن مش هم اللي خالقينه! الله عز وجل هو الذي أنشأه، والله عز وجل هو الذي خلقه.

فربنا بيقول: كلوا من ثمره، ده أمر إباحة، أبدحت لكم هذا، خلقته وأنا أبدحته لكم، كلوا من ثمره إذا أثمر. الحقوق اللي واجبة عليكم أنا اللي أحددها مش هم، في حقوق واجبة عليكم تجاه هذا الزرع؛ لأني أنا اللي أنبته لكم. والعجيب أن هذه الحقوق مش مثلاً بتشيل جزء من الزرع وبعدين بنجمعه في حتة زي مثلاً ما كان بيحصل مع الغنائم زمان فتنزل نار تحرقه، الحق اللي في الزرع ده بيعود مرة أخرى إلى الناس، بيعود إلى الضعفاء: ﴿وَآتُوا حَقَّهُ يَوْمَ حَصَادِهِ﴾. قيل: دا الزكاة، وقيل: دا أمر كان موجود قبل الزكاة، أن لحظة الحصاد الفقراء بيبقوا موجودين وبيبقى نفوسهم متشوقة، العنب بقى بدأ يطلع كده والتمر بادئ يطلع والرمان بادئ يطلع، فلو يقول لك: ساعة لما بتيجي تحصد الفقراء بيتجمعوا، وبعضهم أوجب أن في اللحظة دي وبعضهم قال: ده يستحب انك تدي ليه؛ ﴿وَإِذَا حَضَرَ الْقِسْمَةَ أُولُو الْقُرْبَى﴾ [النساء: 8] أن لما يحضر بقى الحصاد ادي له عشان بس نفسه ما تبقاش متشوفة.

فتجد الفرق أنهم خلوا الزرع ما حدش ياكله غير الأسياد، وربنا خلى الزرع فيه حق للفقراء. شوف لما هم بيسيطروا على الاقتصاد بتصرفوا فيه إزاي؟ وشوف لما ربنا سبحانه وتعالى هو سبحانه وتعالى بيقول فكيف يوزع المال؟ فجعل فيه حق للفقراء. وآتوا حقه، في حق للفقراء والمساكين في هذا الزرع، لأن مش أنت... مش أنت اللي خلقته، الله عز وجل هو الذي خلق، والله عز وجل هو الذي خلق ما قالش تطلع الزرعة أنا هنزل نار تحرقه مثلاً، قال: لا، يعود مرة أخرى إلى الضعفاء، يعود مرة أخرى إلى الفقراء. الفقير له حق، الزكاة هي حق الفقير، الفقير له حق في هذا الزرع لأن مش أنت اللي أنشأته، ربنا وهبك الأرض وربنا أعطاك القدرة المادية انك أنت تقوم على الزرع، فربنا أوجب عليك إما العشر أو نصف العشر على حسب إذا كان يسقى بماء السماء ولا أنت اللي تعبت في السقيا بتاعته، الله عز وجل أوجب عليك الزكاة تعود إلى الفقراء مرة أخرى.

﴿وَآتُوا حَقَّهُ يَوْمَ حَصَادِهِ وَلَا تُسْرِفُوا﴾، يبقى الأوامر والنواهي المطلوبة تجاه الزرع مش المشركين بيقولوها، اللي ربنا يقول عليها هو اللي ينفذه، الزكاة، ولا تسرفوا. قيل: ولا تسرفوا بتعود على الأكل، يعني كلوا من ثمره ولا تسرفوا، أنك لما تيجي تاكل ما تسرفش في الأكل. وقيل: ولا تسرفوا بتعود على قول الله عز وجل: وآتوا حقه يوم حصاده، يعني حتى الزكاة اللي هتطلعها أو الإنفاق على الفقراء ما تسرفش فيه، ما تطلعش للفقراء كل مالك وتظل فقيراً. وقيل ذكر الإمام الطبري عن ثابت بن قيس أن لما قرأ: وآتوا حقه يوم حصاده، وزع كل... كل ما يجي له فقير، كل ما يجي له فقير، فبات بدون ثمرة، فقال الله عز وجل: ولا تسرفوا.

يعني حتى الإسراف سواء في الإمساك أو في الإعطاء، وإن كان بعض المفسرين قال: لا ما فيش إسراف في الخير والشاهد أن هو بيختلف بحسب إيمان الشخص. لو إنسان عنده القدرة الإيمانية، لكن القاعدة العامة أن غالب الناس لا تصلح لهذا، غالب الناس لا تصلح أن هي تنفق كل أموالها في سبيل الله، غالب الناس لا يستطيع هذا، يبقى القاعدة العامة لا تناسب غالب الناس أنها أيضاً كما هي سهلة تسرف أن هي تمسك المال، أيضاً لا تسرف في أن هي تعطي، أما تيجي تصرف على الفقراء وتعطي المساكين ما تطلعش كل المال اللي عندها. ﴿وَلَا تُسْرِفُوا إِنَّهُ لَا يُحِبُّ الْمُسْرِفِينَ﴾.

يبقى برضو ربنا سبحانه وتعالى بيعلمنا التوازن في التعامل مع الرزق: ﴿وَالَّذِينَ إِذَا أَنفَقُوا﴾ دول من صفات عباد الرحمن: ﴿لَمْ يُسْرِفُوا وَلَمْ يَقْتُرُوا وَكَانَ بَيْنَ ذَلِكَ قَوَامًا﴾ [الفرقان: 67]. يبقى إذاً الإنسان لازم يبقى فيه توازن في التعامل مع المال، ما يخليش أن هو هيطلع كل فلوسه أو يمسك تماماً، لازم يبقى متوازن عشان ربنا سبحانه... عشان الإنسان ده يستطيع أنه يعيش. لذلك ربنا قال في صفات الرحمن دول اللي في آخر سورة الفرقان اللي بيعيشوا في وسط المجتمع دول نموذج عملي قابل للتطبيق؛ لأنهم عايشين وسط ناس: ﴿وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا﴾ [الفرقان: 63].

والعجيب أن في نفس السورة أيضاً في أول السورة لما كانوا بيستنكروا على النبي صلى الله عليه وسلم قالوا: ﴿مَالِ هَذَا الرَّسُولِ يَأْكُلُ الطَّعَامَ وَيَمْشِي فِي الْأَسْوَاقِ﴾ [الفرقان: 7]، في أشد الأماكن فتنة عند الناس أنت بتبقى متواجد عادي ومتماسك إيمانيا، مش أن أنت بتنعزل عن هذا المكان تماماً، في أماكن الاقتصاد وأاماكن البيع والشراء أنت متواجد، يعني الأماكن دي أنت متواجد، أنت بمارس حياتك الدنيوية دون أن تأثر، وأيضاً تصلح للناس دنياهم. أنت لازم تبقى متواجد في المكان ده تعلم الناس البيع والشراء إزاي، تذكر الناس بالله عز وجل، تعلمهم الأذكار، تعلمهم فقه البيع والشراء، وأيضاً أنت تمارس حياتك الدنيوية دون أن تأثر، ده النموذج اللي يبقى عملي قابل للتطبيق.

إنما نموذج تقديم نموذج واحد فقط عن الدين أن هو النموذج المنعزل عن الدنيا ده بيعطي الفرصة للعلمانية أن هي تتدخل، طالما أنتم بقى مش بتوع دنيا ولا أنتم هتعرفوا تتصرفوا في الدنيا ولا عندكم توجيهات للتعامل مع الدنيا، إحنا هنطرح الطرح بقى للتعامل مع الدنيا. إذاً لابد أن كما قال...

ادخلوا في السلم كافة، الدين يدخل فيه كافة. ومن الأنعام حمولة وفرشة. أي وأنشأ من الأنعام كما أنشأ من زرع جنات، أنشأ من الأنعام حمولة وفرشة. يبقى ومن الأنعام بتعود على قول الله عز وجل: وهو الذي أنشأ، وهو الذي أنشأ جنات والجنات كانت أنواع، كذلك أنشأ الأنعام والأنعام أنواع.

من الأنعام حمولة وفرشة، وده قدرة ربنا سبحانه وتعالى. والودود الله عز وجل، الودود أنه لما يخلق ينوع. يعني كان ممكن كفاية صنف واحد من الناس، كان كفاية بطاطس مثلا. الناس يكفيها من الغذاء شوية بطاطس مثلا وشوية حاجات رز مثلا. خلاص ياكلوا اللي هياكل رز وبطاطس ويشرب مياه عمره ما هيموت، كان كفاية كده. لكن رحمة ربنا سبحانه وتعالى أنواع من الحبوب والثمار والفاكهة.

كذلك الأنعام متنوعة، ومن الأنعام حمولة وفرشة. قالوا: يعني ايه حمولة وفرشة؟ الحمولة قال: اللي تستطيع أن هي تحمل الإنسان. فقالوا: الإبل الكبيرة أو الخيل والبغال والحمير، اللي تحمل وتحمل وأثقال ﴿وَلِتَبْلُغُوا عَلَيْهَا حَاجَةً فِي صُدُورِكُمْ وَعَلَيْهَا وَعَلَى الْفُلْكِ تُحْمَلُونَ﴾ [غافر: 80]، ﴿وَتَحْمِلُ أَثْقَالَكُمْ إِلَى بَلَدٍ لَّمْ تَكُونُوا بَالِغِيهِ إِلَّا بِشِقِّ الْأَنفُسِ﴾ [النحل: 7]. فالحمولة اللي بتحمل الأثقال بتاعة الإنسان.

طب يعني ايه فرشة؟ قالوا: فرشة الإبل أو البغال أو الخيل دي بتبقى كبيرة، بطنها بتبقى مش ملامسة للأرض. الحيوانات الصغيرة اللي الغنم الصغير اللي بتبقى مقارب الأرض، قالوا: دي اسمها فرش لأن دي أو صغار الإبل بطنها زي ما تكون مفروشة على الأرض. وقيل: فرشة اللي تذبح وتؤخذ الاصواف والأوبار يصنع منها. وقيل: وفرشة اللي أنت تفرشها على الأرض عشان تذبحها، أي ما يذبح للأكل.

فجعل لكم من الأنعام ما يركب زي الخيل والبغال والحمير، وأهل لكم من الأنعام ما يؤكل. فربنا خلى لك الأنعام نوعين، شف التنوع. نوع تركبه عشان تحمل عليه الأثقال، ونوع تذبحه عشان تاكله. بالخيل والبغال والحمير، وتذبح الإبل والبقر والغنم. يبقى الله عز وجل هو الذي أنشأ هذه الأشياء، فهو الذي يأمرنا سبحانه وتعالى ماذا نفعل فيه؟ هو ربنا اللي يقول لك تاكل ايه وما تاكلش ايه؟ الحمر الأهلية لا ما تاكلهاش. طب ناكل الإبل والبقر والغنم؟ أه تاكل ده.

طب الزكاة بتاعتها لما تبلغ عدد كذا في الغنم أو في البقرة، ربنا اللي يقول الحق بتاعها ايه؟ ويروح فين؟ والمصارف بتاعتها. الله عز وجل هو الذي يأمر سبحانه وتعالى، لذلك تفاصيل مقادير الزكاة والصورة مكية ما جتش في الصورة دي. لكن ده جه رد أن هم بدأوا يتدخلوا في توزيع الأطعمة، في توزيع الحرث والأنعام.

الله عز وجل هو الذي يفعل ذلك، الله عز وجل هو الذي يشرع. وقلنا دخل شوط كامل طويل في سورة الأنعام عشان محاولة المنازعة في تشريع في أمر واحد من الأطعمة؛ أن الميتة بدل ما تبقى حرام تبقى حلال، أو أن الحاجة الحلال تبقى حرام. تدخل يعني كتاب الفقه كبير جدا هنخد منه كتاب الأطعمة جزء باب حكم الميتة. تدخل في حكم واحد من الأحكام دي، ربنا قال: ﴿وَإِنِ اطَّعْتُمُوهُمْ إِنَّكُمْ لَمُشْرِكُونَ﴾ [الأنعام: 121]. الأمر تحول إلى الشرك، الأمر ليس بهين وتحسبونه هينًا وهو عند الله عظيم.

لذلك ربنا قال: ﴿كُلُوا مِمَّا رَزَقَكُمُ اللَّهُ﴾ [الأنعام: 142] أي أنه رزق من الله عز وجل، ولا تتبعوا خطوات الشيطان. لما تشوف كلمة خطوات الشيطان في القرآن تجد أن هي تقريبا ذكرت في خمس مواضع. مرتين في البقرة برضه: ﴿كُلُوا مِمَّا رَزَقَكُمُ اللَّهُ حَلَالًا طَيِّبًا وَلَا تَتَّبِعُوا خُطُوَاتِ الشَّيْطَانِ﴾ [البقرة: 168]، و﴿ادْخُلُوا فِي السِّلْمِ كَافَّةً وَلَا تَتَّبِعُوا خُطُوَاتِ الشَّيْطَانِ﴾ [البقرة: 208]. دول الاتنين بتوع البقرة.

ووحدة بتاعة الأنعام برضه جت مع الأكل: ﴿كُلُوا مِمَّا رَزَقَكُمُ اللَّهُ وَلَا تَتَّبِعُوا خُطُوَاتِ الشَّيْطَانِ﴾ [الأنعام: 142]. والاتنين جم في آية تقريبا في سورة النور: ﴿لَا تَتَّبِعُوا خُطُوَاتِ الشَّيْطَانِ﴾ [النور: 21] بعد ما حذرنا الله عز وجل من تلقي الإشاعات ونشرها. تجد أن الشيطان في الأربع مواضع أو الخمس مواضع أنها جت خمس مرات، أربع مواضع سورة النور والأنعام واتنين في البقرة، تجد أن هي بتدور حوالين جزئين.

جزء الأغلب عن الشهوات والشهوات جزئين، نقل الكلام الفاحشة للذين يحبون أن تشيع الفاحشة، نقل الفاحشة وأن نشر الفاحشة في المجتمع تبدأ بس بمجرد نقل الكلام وعن طريق الأطعمة. إذا شهوات البطن والفرج هنا الشيطان يتدخل عشان يمشي الناس في خطوات. لذلك النبي صلى الله عليه وسلم بيقول الحديث المشهور: «يا معشر المهاجرين خصلة وأعوذ بالله أن تدركوهن» وذكر فيها: «وما ظهرت الفاحشة في قوم قط حتى يعلنوا بها». خد بالك من كلمة حتى يعلنونها.

إذا الفاحشة بتمر في المجتمع بمراحل. العقوبة الكلية بتنزل على المجتمع في المرحلة الأخيرة وهي مرحلة الإعلام بالفاحشة. إنما الشيطان بيمشي مع المجتمع بمراحل في الفاحشة، يبدأ أن جزء يعملها ويحس باستنكار من المجتمع فيقول دي دي التقاليد ويدافعوا فاحشة قالوا وجدنا عليها آباءنا. وبعد ما يقول دي تقاليد يبدأ يقول لا ده شرع الله أمرنا بها، يبدأ يقول ده شرع، وبما أن شرع يبدأ ينشره، وبما أنه بدأ ينشره ما عدش يخاف منه فيعلنه. فيبدأ الفاحشة بتمر في المجتمع بمراحل، دي خطوات شيطان في الفاحشة.

كذلك في خطوات شيطان للتعامل مع الأكل تحليل الحرام وتحريم الحلال. المرة اللي جه فيها برضه خطوات الشيطان: ادخلوا في السلم كافة. يبقى الشيطان هدفه في حاجتين، في الشهوات في الفرج وفي البطن، وفي النقطة التانية: ادخلوا في السلم كافة، أنه عايز يجزأ الدين. يعني الشيطان بيدخل لخطوات في المجتمع، السلم كافة، يدخلوا في الإسلام كافة، عايز يقسم الدين والاسلام لأجزاء. يقول لك اعملوا العبادات، لأ وسيبكوا من بقية التشريعات، بلاش موضوع الولاء والبراء، بلاش موضوع الجهاد، بلاش موضوع أحكام معينة في الشريعة الحدود بلاش الأحكام دي.

الشيطان عشان يوصل للمرحلة دي في المجتمع زي ما احنا عايشينها الان ومطبقة في جل الدول الإسلامية، عشان يوصل المرحلة دي مر بخطوات. يعني نزع التشريع من المجتمع والوصول إلى الحالة الهشة اللي احنا شايفينها اللي هي تجزئة الدين. أن تجد دستور أو قانون في مادة شرعية ومادة مش شرعية، مادة مش شرعية ومادة شرعية، هذا ليسق اللي هو المتجمع ده اللي هو الفخفخينة ده اللي هو الكوكتيل ده اللي جايب كله على بعضه، ده ده وصل بخطوات.

يعني ما تفتكرش أن المجتمع المسلم انتقل من تشريع متكامل بيستمد من الوحي إلى تشريع مخلط جاي من حاجات كفرية على حاجات من الفلاسفة على حاجات من العقل على حاجات، ما جاش كده فجأة. كذلك الفاحشة لما تشوفها انتشرت في مجتمع ما بتنتشرش فجأة، ممكن حتى الإنسان لما يسقط في الفاحشة ما بيسقطش فجأة. لما ربنا قال على الزنا أنه كان فاحشة وساء سبيلا، قال له سبيلا يعني طريقا. عن الزنا ده طريق ممكن يبدأ بأن الإنسان بخلوة حرام، بنظرة حرام. فكذلك بما أن الفاحشة مع الفرج كذلك كذلك الفاحشة والمكتوبة.

شاهد ربنا قال هنا: ولا تتبعوا خطوات الشيطان. يبقى الشيطان لما يحب يدمر مجتمع يعمل حاجتين، من استخلاص كلمة خطوات الشيطان في القرآن في الخمس مواضع أو في الأربع مواضع يعمل حاجتين. إذا أراد الشيطان أنه يدمر مجتمع يعمل حاجتين؛ ينشر الشهوات سواء الفرج والبطن، وأنه يجزأ الدين عند الناس. بكده هو يحاول يدمر المجتمع ده، يحاول يفسد هذا المجتمع: ﴿وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُّبِينٌ﴾ [البقرة: 208].

وبعد كده بدأ الرد التفصيلي على مسألة تحريم الحلال. هم حرموا أشياء، قالوا: هذه الأشياء هذه أنعام وحرث حجر أي حرام، لا يطعمها إلا من نشاء بزعمها، حرموا الحلال. رد تفصيل منازرة تفصيلية لما يجي واحد يحرم حاجة. أول حاجة بدأ النقاش معه: أنت بتحرم ليه؟ هو أنت بتتدخل ليه؟ هو أنت اللي خلقتها؟ لا مش أنت اللي خلقتها. طب اللي بعد كده بتسأله: على أي أساس قمت بهذا التحريم؟

يعني لما تيجي تبص في حاجات مسلا في المعاملات المادية في القوانين الوضعية، أو المعاملات الاجتماعية في القوانين الوضعية. تجد مسلا هو عايز يحرك الزنا، فتجده يجرم الزنا في مواضع ولا يجرمه في مواضع. تجد المعاملات المادية تجد يحرم أشياء ويحلل أشياء. فبتسأله: ايه الأساس اللي أنت تحركت وحرمت ده وحللت ده؟ أنتم حرمتم جزء من الأنعام وأحللتم جزء من الأنعام.

فربنا بدأ معهم القصة والمناظرة من الأول، أولا مش أنتم اللي خلقتم ربنا اللي خلق. ثانيا ما خلقه الله ايه هو؟ ثمانية أزوج، الغالب في الأطعمة ثمانية أزواج؛ من الضأن اثنين ومن المعز اثنين ومن الإبل اثنين ومن البقر اثنين. الآية الأولانية والتانية، يبقى ربنا خلق ثمانية أزواج، آية مية تلاتة وأربعين: من الضأن اثنين ومن الماعز اثنين، وهي مية أربعة وأربعين: من الإبل اثنين ومن البقر اثنين.

طيب ربنا بيقول لهم شف التعامل التفصيلي لما تحب ترد على واحد. يعني زي ما في رد مجمل في القرآن، وفي رد تخويفي في القرآن، وفي إعراض عن الجواب في القرآن، في رد تفصيلي عشان تحاصره، عشان تحسسه أنه جاهل وزي ما ربنا قال سفها بغير علم، الكلام ده مش مبني على أي أساس. أنتم حرمتم حاجة وأحللتم حاجة، فاحنا فردنا اهو.

ده بيسموه في علم الأصول الصبر والتقسيم، أنا هقسمها لك اهو وقل لي أنت على أي أساس حرمت حاجات وحللت حاجات؟ عشان أصل معه لحاجة بيسموها في علم المناظرة، أقول له: أنت عندك حاجة اسمها التحكم، أنت بتتحكم في أنت ما عندكش أي أساس، أنت بمزاجك كده بهواك قلت ده حلال وده حرام. أنا بثبت له أنه جاهل في التحليل والتحريم، أنت لا عندك وحي، لا عندك مستند شرعي، ما فيش رسول، ما فيش كتاب، ما فيش أساس اتحركت عليه، لكن أنا عندي وحي.

لذلك بعدها ربنا قال له: قل لا اجد فيما أوحي إلي. أنا معي وحي بتحرك به، أنا قلت لك من الأول أن أنا معي وحي بتحداك به وبتحرك من خلالي، قلت لك هات كتاب قلت ما عييش كتاب، في رسول قلت ما فيش رسول. طب أنت على أي أساس بتحرك؟ بتثبت له وبتنسفه. لذلك في الآخر: قل فلله الحجة البالغة. فبنقول له: نبئني، اثنين من المعز اثنين، الذكرين؟ قل الذكرين حرم أم الأنثيين؟

أنتم مرة تحرموا الذكور، ومرة تحرموا الإناث، ومرة تقسموا على حسب الذكور منكم والإناث منكم، ومرة تقسموا على حسب الذكور والإناث من الأنعام. ولما لو استطردت معهم تجد أن هم مرة يحرموا ذكور ومرة يحرموا إناث ومرة يحرموا الاتنين ومرة يحللوا. فربنا يقول له: قل أن الذكرين حرم الأنثيين؟ يعني احنا عندنا من اثنين يعني ذكر وأنثى، ومن المعز اثنين ذكر وأنثى. ومن الإبل اسنين ذكر وأنثى، ومن البقر اسنين ذكر وأنثى.

أنتم بتحللوا على أساس التذكير والإناث؟ ولا على أساس ما في الأرحام؟ ولا على أي أساس؟ كانوا يحرموا على أساس الذكور والإناث. التقسيمة دي أثبتت لهم في آثار ذكرها الإمام البدوي وغيره، لما هما حتى بعتوا واحد يناظر النبي صلى الله عليه وسلم اسمه مالك بن عوف وأسلم بعد ذلك. مالك بن عوف راح يناظره للنبي صلى الله عليه وسلم، قرأ عليه الآيات وقال له: على أي أساس تحرمون؟ فتحير مالك، لأ اكتشف أنهم فعلا مرة يحرموا الذكور لما يحبوا عايزين ما يكلوش الذكور وياكلوا إناث، ومرة لو عايزين يبقوا الإناث عشان هي هتنجب وياكلوا الذكور. فتحير مالك ولم يجيب.

فهو بيقول لهم: أنتم عندكم من البقر اسنين معلش هي الآيات صعبة شوية. من الضأن اسنين ومن المعز اثنين ذكر وأنثى وذكر وأنثى، ومن الإبل السانية ذكر وأنثى ومن البقر الساني ذكر وأنثى. الذكرين، لو قالوا آه الذكور يكتشف أنه بيرجع يحرم الإناث. لو قال آه الإناث يكتشف أنه بيرجع يحرم الذكور. لو قال احنا بنحرم اللي في الأرحام أيا كانت ذكور إناث، طب ما هي مرة تبقى ذكور ومرة تبقى إناث. أما اشتملت عليها أرحام الأنثيين، أرحام الأنثيين، نبئوني بعلم معك علم تتكلم به. أنت بتحرم وتحلل على أساس.

لذلك تجد أن القوانين الوضعية لازم كل شوية يحصل لها لازم لأنه بيكتشف أن الأساس اللي كان قائم عليه اكتشفوا أنه اتغير، نظرية مرة تبقى اشتراكية أن الناس كلهم شركاء يقول لك لأ ده ما طلعوش شركاء لأ خليها رأسمالية، لأ بعد كده يكتشف لأ ما طلعتش كده لأ خليها مش عارف ايه لأ هنرجع نقسم، احنا اكتشفنا تقسيم جديد للصورة، ده احنا اكتشفنا أن الفوائد لما بتزيد عن نسبة معينة الاقتصاد بيتدمر، لا خلاص بلاش فوائد، لأ خلاص بلاش ربا، لأ خليه ربا صغير.

ويفضل يتخبط يتخبط، طب ما ربنا قال لك من الأول، هو أنت لازم تمشي لاخر الطريق عشان تصدق ربنا سبحانه وتعالى؟ ألا يعلم من خلق وهو اللطيف الخبير؟ وبعدين ومن الإبل اثنين ومن البقر اثنين. قل الذكرين حرم أم الأنثيين أما اشتملت عليها أرحام الأنثيين؟

شاهد من الآيات هذه طريقة لابد أن نستعملها؛ أنك أنت المناظرة التفصيلية لواحد يحرم شيء أحل الله، واحد أحل شيء حرمه الله. قد قد تكتفي انك أنت تخوفه لأنه ما بيتبع شهوته، احنا قلنا تحريم ما أحل الله أكثر جرما من تحليل ما حرم الله؛ لأن ده واحد بينازع في التشريع، غير أن واحد اجتهد على الأدلة الشرعية ووصل وأدى اجتهاده كده له أجر واحد. لكن واحد يتحكم في الناس ويفرض على الناس.

هو بعقله وصل اليه، ثم يحرم على الناس الرزق اللي أحله الله عز وجل لهم. ده أشد جرم، ده يحتاج إلى مناقشة تفصيلية تناظره وتقسم له الموضوع وتوضحه له وتظهر له في الآخر إنه مش على أي أساس. هذه التقسيمة مالهاش غير حل واحد، طالما ما طلعش عنده أساساً أن هي وحي. هو ممكن يرد يقول لا، أشممعنى أنتم بتحرموا كده؟ ممكن نقول أنت، أنت جاي تقول لي أنت حرمت؟ طب ما أنتم كمان بتحرموا حاجات وبتحللوا حاجات؟

فأنت ترد عليه: ﴿أَمْ كُنتُمْ شُهَدَاءَ إِذْ وَصَّاكُمُ اللَّهُ بِهَذَا﴾ [البقرة: 133]. معك وحي من ربنا؟ ﴿فَمَنْ أَظْلَمُ مِمَّنِ افْتَرَى عَلَى اللَّهِ كَذِبًا لِيُضِلَّ النَّاسَ بِغَيْرِ عِلْمٍ﴾ [الأنعام: 144]. أنت بتقول له أشد الناس ظلماً الذي يفتري على الله الكذب ليضل الناس بغير علم. لذلك يقول النبي صلى الله عليه وسلم: «رأيت عمرو بن لحي يجر قصبه في جهنم». عمرو بن لحي أول من سيب السوائب، أول من جاء بالأصنام من الشام، أول من جعل البحيرة.

عمرو بن لحي أول من أفسد وغير دين إسماعيل، لذلك عذاب شديد. ومسألة أنه يجر قصبه أي أمعاءه، لأنه كان يستفيد مادياً ويأكل من وراء هذا، فبيجر هذه الأمعاء التي طالما على هذا الدين الفاسد اللي غيره، على هذا الدين الفاسد اللي أحدثه الجديد وغير دين إسماعيل، يجر قصبه في جهنم يجر أمعاءه. إذاً أخطر حاجة اللي يبقى رقم واحد في تغيير دين ربنا سبحانه وتعالى، ده أشد الناس ظلماً. بعضهم قال وأشد الناس ظلماً أيضاً من تابعوه ويعلمون هنا أنه كاذب.

لذلك ألعن الناس أجرأ اللي ييجي الواقع فاسد ويغيّره. لذلك النبي صلى الله عليه وسلم لما جاله اليهود في قصة المحاكمة اللي بيتحاكموا النبي صلى الله عليه وسلم في قصة الزنا، والنبي صلى الله عليه وسلم حكم بالرجم وكانوا رافضين، فقال النبي صلى الله عليه وسلم في صحيح مسلم: «اللهم اجعلني أول من أحيا إذ أماتوه». كما أن أول من أفسد الدين وغير الدين عذابه شديد، كذلك أول من أحيا الدين ثوابه عظيم.

لذلك اللي عمله أتاتورك دوت في بعد سقوط الخلافة العثمانية والتغيير الشنيع اللي عمله في استجلاب قوانين وضعية أو أول من ساهم في ذلك عذاب شديد عند الله عز وجل، لأنه بيفسد ويغير ويدمر، واللي يساعد في إحياء الشريعة مرة أخرى ويبذل نفسه فماله ودمه، لذلك ثوابه عند الله عز وجل عظيم. «اللهم اجعلني أول من أحيا أمرك إذ أماتوا». فيقول الله عز وجل: ﴿فَمَنْ أَظْلَمُ مِمَّنِ افْتَرَى عَلَى اللَّهِ كَذِبًا لِيُضِلَّ النَّاسَ بِغَيْرِ عِلْمٍ إِنَّ اللَّهَ لَا يَهْدِي الْقَوْمَ الظَّالِمِينَ﴾ [الأنعام: 144].

وبعدين بتقول له أنتم بتحرموا من غير أساس؟ أنا مليش غير مصدر واحد فقط للتحريم والتحليل. أنتم قلتم على أشياء حرام؟ طيب أنا هبص في المصدر اللي معي، أشوف فيه إيه؟ بعد ما نظرت فيه: ﴿قُل لَّا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ يَطْعَمُهُ إِلَّا أَن يَكُونَ مَيْتَةً أَوْ دَمًا مَّسْفُوحًا أَوْ لَحْمَ خِنزِيرٍ فَإِنَّهُ رِجْسٌ أَوْ فِسْقًا أُهِلَّ لِغَيْرِ اللَّهِ بِهِ﴾ [الأنعام: 145]. وذكر المحرمات في الوحي. إذاً لما تسمع تحريم أو تحليل تقول له استنى أنظر ما أجد في ما أوحي إلي في الوحي.

أنظر في الوحي، يبقى المصدر الوحيد الثابت الذي لابد أن نتحاكم إليه عشان نشوف مين الصادق من الكاذب، عشان نشوف ده بيألف ولا بيقول الحقيقة، نعود إلى الوحي. فأنت بتقول له من الأول أنا عندي وحي أعود إليه، عندي مصدر لن أغيره ولن أبدله ولن تنازل عنه ولن أنصرف إلى غيري: ﴿قُل لَّا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ يَطْعَمُهُ إِلَّا أَن يَكُونَ مَيْتَةً أَوْ دَمًا مَّسْفُوحًا أَوْ لَحْمَ خِنزِيرٍ فَإِنَّهُ رِجْسٌ أَوْ فِسْقًا أُهِلَّ لِغَيْرِ اللَّهِ بِهِ﴾ [الأنعام: 145].

هنا في نقطة مهمة جداً: ليه كلمة فانه رجس فصلت بين المحرمات؟ بيقول يقول الله عز وجل: ﴿قُل لَّا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ يَطْعَمُهُ إِلَّا أَن يَكُونَ﴾ [الأنعام: 145]. ذكر تلاتة متصلات: ميتة، أو دم مسفوح، أو لحم خنزير. وبعدين قال: فانه رجس، فصل. وبعدين قال: أو فسق أهل لغير الله. كأن لما لما أنت أنكرت عليهم التحريم أو التحليل الأطعمة وتحريم الأطعمة بغير أساس، فانت قلت له أنا رقم واحد التحليل والتحريم عندي على أساس الوحي، أن أنا ما بتصرفش من دماغي. دماغي على أساس الآية؟ الوحي.

ثانياً، أن الوحي يحرم الأطعمة على جزئين، المحرمات عندنا لسبب من اتنين: إما سبب أن ده شيء مؤذي، حاجة تؤذي البدن، أو سبب عقدي، يبقى سبب بدني أو سبب عقدي. الجزء الأولاني شيء مؤذي بدنياً، على قول أن كلمة فانه رجس أنه شيء خبيث مؤذي. الجزء الأول اللي هو ميتة أو دما مسفوحا أو لحمة خنزير فانه رجس، في ناس قالت الهاء دي بتاعة فانه بتعود على الثلاثة، والمفسرين قالوا لا بتعود على الخنزير تحديدا. أياً كان، التلاتة دول لو قلنا أن كلمة رجس معناه نجس قذر، والنجاسة والقذارة مؤذية، فالجزء الأول من المحرمات أن شيء مؤذي النجس، فكذلك يقاس عليه أي طعام آخر، الطعام المؤذي أو الطعام النجس القاذورات كذلك لا تؤكل.

أو ده التقسيمة التانية من التحريم، يعني احنا نشوف حتى ربنا بيفهمهم وبيعلمنا أن حتى التحريم عندنا مبني على أن تحريم الأطعمة عندنا جزئين: أما أطعمة فيها إذاء أو نجسة أو قاذورات، أو أطعمة حتى لو هي ظاهرها أن هي مش مؤذية، لكن احنا مش بس التعامل بتاعنا مادي، احنا مش بنتعامل مع الأكل والشرب زي الأنعام. لأ، الذبيحة ﴿أَوْ فِسْقًا أُهِلَّ لِغَيْرِ اللَّهِ بِهِ﴾ [الأنعام: 145]. لو جبنا غنم وتدبح بالسكينة، الحاجات اللي هي اللي بتؤذي راحت خلاص أهي، ما كلناش خنزير، ومش مثلا موتنا غنم، الله ده احنا جبنا سكينة ودبحنا الشاة، خروف قد كدهو يا عم عمر، خروف يعني يعني ايه يأكل المسجد ده مثلاً أو جمل مثلاً، ورحنا مثلاً عند إيه صنم والعياذ بالله، أو هما راحوا عند صنم.

دائماً يستحب لما تتكلم على أفعال المشركين زي ما الراوي في البخاري كده قال إيه؟ بل هو على ملة عبد المطلب، مع أن أبو طالب قال أنا على ملة عبد المطلب، بس راوي ما رضاش يقول أنا، قال إيه؟ هو على ملة. فالمهم هما يروحوا عند الأصنام ويدبح بالسكينة الشاة بس هو بيدبحها قال بسم الله أو بسم هبل، ورفض أن هو يذكر اسم الله عز وجل، هذه لا تؤكل، أن عندنا برضو الأكل عقدي، كما أننا نسمي الله عز وجل على الطعام، الأكل عندنا مش مجرد ماديات. احنا بنترفع، احنا مش بس مجرد، ده اليهود هم اللي بيتعاملوا كده التعامل المادي فقط مع الأشياء. هتقول لك إيه الفرق؟ مش أنتم ما بتاكلوش الحاجات دي عشان بس أن هي مؤذية؟ لأ، أيضاً التعامل العقدي مع الطعام.

ها، أي طعام مهما كان يعني في قمة التغذية أو في قمة النظافة أو في قمة يعني الجمال، لكن لم يذكر وذبح على غير اسم الله، لا نأكله، لا نأكله لأن ﴿أَوْ فِسْقًا أُهِلَّ لِغَيْرِ اللَّهِ بِهِ﴾ [الأنعام: 145]. يبقى إذاً التعامل مع الطعام، تعامل المؤذي القاذورات النجسة هذه لا نأكلها ويقاس عليها غير ذلك، أو فسق أهل لغير الله به، وأيضاً يقاس عليها وغير ذلك، أو فسق أهل لغير الله به. ودائماً الشريعة متكاملة، يعني زي ما قال آتوا حقه، وبعدين قال لا تسرفوا، قال ما تاكلش الأشياء دي وبعدين رجع قال فمن اضطر غير باغي. وما كان ربك نسياً.

سبحان الله، أن التشريع متكامل، ودائماً العقل البشري ينسى. فلما ييجوا يحطوا تشريع أرضي بينسى حاجات، فناس تضر من التشريع الأرضي، فالناس اللي تضر تشتكي فيرجع يغير لأن في ناس أضرّت، لأن هو عقله قاصر ما كانش حاطط في ذهنه كذا. ومن أجمع السور لهذا العدل المتكامل الذي لم ينسى أحداً سورة النساء. فعلاً سورة لما تتأمل فيها سورة مبهرة، لم تنسى أحداً ولم تنسى شيئاً، وما كان ربك نسياً.

نرجع بعد ما قال لا تؤكل هذه الأشياء: ﴿فَمَنِ اضْطُرَّ غَيْرَ بَاغٍ وَلَا عَادٍ فَإِنَّ رَبَّكَ غَفُورٌ رَّحِيمٌ﴾ [الأنعام: 145]. هذه الأشياء تباح في وقت الاضطرار فقط. غير باغ ولا عاد، المفسرين يتكلموا فيها، قيل غير باغ يعني مش هو اللي بيدور عليها، عاد أن بعد ما أن الضرورة تقدر بقدرها، مش بقى هنقعد نجيب الميتة ونعملها ساندوتشات ونحط عليها كاتشب بقى ونفتح محلات للميتة ونقعد بقى إيه، لأ! الضرورة إيه؟ تقدر بقدرها. يبقى فمن اضطر غير باغ ولا عاد.

التوسع في الضرورات ده حرام، عندنا قاعدة الضرورة تقدر بقدرها. فمن اضطر غير باغ ولا عاد، بعضهم قال غير باغ ولا عاد أن لا يستفيد من هذه الرخصة أصحاب المعاصي، السفر لو واحد مسافر سفر معصية ما لوش الحق في الاستفادة من هذه الرخصة. وغير ذلك من الأقوال في تفسير الآية. الشاهد أن الله عز وجل بعد أن حرم هذه الأشياء، أحلها للمضطر وأنه يأكل بقدر الضرورة فقط. والله عز وجل مين اللي يحاسبه في الوقت ده؟ الله عز وجل يعلم ذلك، مين اللي يحاسبه؟ أنه كل بعد ما كل القوت وخلاص ممكن يكمل السفر كلمة الميتة اللي كم اللي يستطيع أنه يسافر به؟ كل تلات لقمات زيادة.

مين اللي؟ الله عز وجل، مين اللي مطلع عليه؟ الله عز وجل. لذلك ربط الناس دائماً أيضاً في التشريع بالدار الآخرة أمر مهم، ليس فقط على العقوبات الدنيوية، وإن كانت هي مهمة. ﴿فَمَنِ اضْطُرَّ غَيْرَ بَاغٍ وَلَا عَادٍ فَإِنَّ رَبَّكَ غَفُورٌ رَّحِيمٌ﴾ [الأنعام: 145]. طيب شف المحاصرة. أنت الأول قلت له ربنا اللي أنشأ دي، دي الأشياء، أنت أنا فصلت لك الموضوع. أنت بتحرم بدون أي أساس، ما عندك لا أساس علمي ولا أساس شرعي، أنا التحريم عندي مبني على الوحي. هذا الوحي له حكم وعلل.

تقول لي إيه؟ طب اليهود عندهم حاجات غريبة، طب أنتم بتقولوا إن ده كتاب ما هم أهل كتاب برضه. هم عندهم حاجات حرام مش متناسقة برضه زي اللي أنا بعمله، إيه يعني لما أبقى زيهم؟ أنا برضه عندي حاجات محرمة مش متناسقة. طب ما هم برضه عندهم حاجات في التحريم مش متناسقة. فربنا ذكرها قبل ما هو يقولها: ﴿وَعَلَى الَّذِينَ هَادُوا حَرَّمْنَا كُلَّ ذِي ظُفُرٍ﴾ [الأنعام: 146]. يختلف ضيوفه هل الحافر اللي مالوش ظفر؟ وأيه من الأنعام؟ بعضهم قال الإبل والأرنب وبعض الحيوانات كانت محرمة، بعضهم قال لازم تبقى مشقوق الظافر أو ما يبقاش غير مشقوق، أياً كان على خلاف.

يعني الشاهد وعلى الذين هادوا حرمنا كل، الإبل والأرانب، بعضهم قال والبط، بعضهم قال لأ، الإبل والأرانب فقط. وبعض المفسرين مثل القاسمي وابن عاشور بدأوا يجيبوا حاجات موجودة عندهم في التوراة ويجيبوا أياً كان. ومن البقر والغنم لحوم البقر والغنم حلال، ولحوم الإبل عليهم حرام. فممكن اللي يسمع المشركين يقول له طب ما هم فرقوا بين الإبل والبقرة والغنم أهو، وانت وربنا قال إن التلاتة دول لازم يبقوا متساويين لأن هم ثمانية أزواج. الضأن والماعز والبقر والإبل لازم تبقى أحكامهم متساوية، والذكر وأنثى لازم تبقى الأحكام متساوية، والأمر في الثمانية أزواج.

أشمعنى اليهود عندهم كده طب ما احنا زي اليهود؟ فربنا يقول لهم لأ، أنا اللي حرمت عليهم ده تحديدا بسبب ذنوبهم، وأن ده مش من عندهم. ولما ربنا قال في الآخر: ﴿ذَلِكَ جَزَيْنَاهُم بَبَغْيِهِمْ وَإِنَّا لَصَادِقُونَ﴾ [الأنعام: 146]. ده رد على اليهود، لأن اليهود قالوا الحاجات دي محرمة علينا أن بسبب إسماعيل هو اللي حرمه على نفسه وأن هذه لم تحرم علينا عقوبة، لأن لو اليهود اعترفوا أن التحريم ده كان بعقوبة ازاي يبقوا شعب الله المختار ويبقى عليهم حاجات عقوبات؟ فقالوا لا لا لا لا، ده إسماعيل لما حرم ده على نفسه فربنا قال لنا كملوا ما فعل إسماعيل، اللي هو يعقوب عليه السلام.

ربنا بيقول وعلى الذين هادوا، أنا عايزك بعيداً الآيات صعبة شوية، لكن المهم أن الرد المفصل لإفحام الخصم ده مهم. أحياناً احنا قلنا آيات في القرآن أحياناً تعرض عنهم، لما تعرف أن هو ما ضربوه لك إلا جدلاً، ده لهم قوم خصمون. وأحياناً رد تعزية، وأحياناً الرد التخويفي زي ما تيجي معنا الآيات دلوقتي لما ييجي يحتج بآخر حجة في الآخر، هي دي مناظرة، أكثر السور اللي جت فيها قل أكثر من أربعين مرة سورة الأنعام.

فانت الأول قلت له ربنا اللي خلق، أنت ما عندكش أي أساس علمي، ما عندكش أي أساس شرعي، أنا متبع للوحي، هذا الوحي له حكم وعلل مش كده وخلاص ومتقسم. اللي ادعوا أن عندهم وحي آخر وحيهم باطل، في تحريف حصل عندهم، وربنا قال الفروقات اللي حصلت: ﴿وَمِنَ الْبَقَرِ وَالْغَنَمِ حَرَّمْنَا عَلَيْهِمْ شُحُومَهُمَا إِلَّا ما حَمَلَتْ ظُهُورُهُمَا أَوْ الْحَوَايَا أَوْ مَا اخْتَلَطَ بِعَظْمٍ ذَلِكَ جَزَيْنَاهُم بَبَغْيِهِمْ﴾ [الأنعام: 146]. ربنا حرم الدهن والشحم اللي في البقر والغنم ما عدا تلات حاجات: ما عدا اللي في الظهور، أو الحوايا قالوا ده اللي في الأمعاء والمصارين، أو اللي لازق في العظم.

ليه؟ أشمعنى التلات حاجات دول ربنا ما حرمهمش؟ قال لك يصعب فصل هذه. سبحان الله! حتى والله عز وجل يعاقب يرحمهم، يعني دي عقوبة، ربنا عاقبهم حرم عليهم الإبل، لأن ربنا قال في الآخر بإيه؟ ببغيهم، دي عقوبة. لكن الله عز وجل وهو يعاقب يرحمه، لأن لو كان حرم عليهم كل الشحوم، إزاي كان اليهود أصلاً بيتلككوا، فيجي الشحم اللي جنب العظم والشحم اللي مش عارف اللي في الحوايا يقول لك أصل أنا ما عرفتش أفصله. فعشان

ربنا يرحمه عشان ما يبقاش له عذر. وبعدين قال له دول التلاتة حلال لك. إذا كان أصلاً ربنا حرم الشحوم دي، كانوا بيجمعوها ويجمدوها، وبعدين يرجعوا يسيحوها ويبيعوها. يقول لك احنا ما أكلناهاش.

حديث في البخاري أن هم كانوا والعياذ بالله بيلعبوا بالدين. إذا كان الحاجات الواضحة بيلعبوا فيها في الدين، فالله عز وجل وهو في العقوبة لكن يرحم سبحانه وتعالى؛ زي ما كتير من المفسرين قال إن المن والسلوى وتفجر الحجر اللي طلع لهم مية ده كان في التيه، هذا حدث في وقت العقوبة.

إذاً الله عز وجل ليس دوماً يبتلي ليعذب، ولكن قد يبتلي ليصطفي ويهذب. والله عز وجل حتى وهو يعاقب يرحم، حتى العقوبة فيها رحمة وفيها حفظ ورعاية ﴿إِلَّا مَا حَمَلَتْ ظُهُورُهُمَا أَوِ الْحَوَايَا أَوْ مَا اخْتَلَطَ بِعَظْمٍ ۚ ذَٰلِكَ جَزَيْنَاهُم بَبَغْيِهِمْ ۖ وَإِنَّا لَصَادِقُونَ﴾ [الأنعام: 146].

لما ربنا يستعمل أأسلوب التوكيد، إذاً في واحد هينكر، في ناس هتنكر الكلام ده، لليهود هيقولوا: لأ، الكلام ده كذب، احنا ربنا ما حرمش علينا الكلام ده عشان احنا بغاة أو عشان احنا ظلمة، لأ، ده احنا شعب الله المختار، وربنا حرم علينا الكلام ده اصطفاءً لأن نفعل ما فعل يعقوب عليه السلام. فالله عز وجل يكذبهم ويقول: ﴿ذَٰلِكَ جَزَيْنَاهُم بَبَغْيِهِمْ ۖ وَإِنَّا لَصَادِقُونَ﴾ [الأنعام: 146].

فإن كذبوك لو اليهود أصروا على التكذيب أو المشركين أصروا بعد كل الشرح التفصيلي ده، قل لهم إيه بقى؟ ﴿رَّبُّكُمْ ذُو رَحْمَةٍ وَاسِعَةٍ﴾ [الأنعام: 147]. إيه علاقة بأن أنتم عملتم كل ده وربنا لسه سايبكم؟ ده فعلاً ربنا يعني لو أنا عندي ﴿وَلَوْ يُؤَاخِذُ اللَّهُ النَّاسَ بِظُلْمِهِم مَّا تَرَكَ عَلَيْهَا مِن دَابَّةٍ﴾ [النحل: 61].

فعلاً إن ربنا يسيب الأشكال دي، فعلاً ربكم ذو يعني في ناس أنت تشوفها؛ إزاي ربنا سايبها ماشية على الأرض؟ في ناس بتقول كلام والعياذ بالله فعلاً كما قال الله عز وجل في الحديث القدسي: «ما أحد أصبر على أذى سمعه من الله، يدعون له الولد، ومع ذلك يرزقهم ويعافيهم»، ويقول الله عز وجل: «يشتمني ابن آدم ويؤذيني ابن آدم»، نتخيل فعلاً!

فلو بعد كل التفصيل اللي من أول السورة ده والعنت اللي عمالين يعملوه والنقاشات، كل التفصيل ده ولسه بيکذبوا، ده فعلاً فعلاً ربنا سايبكم لغاية دلوقت؟ ربكم ذو رحمة واسعة. ولكن مش معنى إنه سايبكم إن الموضوع متساب، ﴿وَلَا يُرَدُّ بَأْسُهُ عَنِ الْقَوْمِ الْمُجْرِمِينَ﴾ [الأنعام: 147].

وبعدين ربنا آخر حجة بقى خلاص معانا هنا في السورة، ويبدأ النقاش بقى في آخر ربع في سورة الأنعام، الختام بقى يجي معانا. آخر حجة بقى هنا يقولوا إيه؟ ربنا لو أنت عملت معه كده سيقول، مش قالوا سيقول؟ وبعض المفسرين قال سورة الأنعام نزلت قبل سورة النحل، وهذا القول قالوه في سورة النحل اللي هو ﴿لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِنْ شَيْءٍ﴾ [الأنعام: 148]، لو شاء الله ما أشركنا نحن ولا آباؤنا ولا ما عبدنا من دونهم شيء، الآاية بتاعة بتاعة سورة النحل، حد يذكرنا يا شباب اللي ﴿وَقَالَ الَّذِينَ أَشْرَكُوا لَوْ شَاءَ اللَّهُ مَا عَبَدْنَا مِنْ دُونِهِ مِنْ شَيْءٍ نَحْنُ وَلَا آبَاؤُنَا وَلَا حَرَّمْنَا مِنْ دُونِهِ مِنْ شَيْءٍ﴾ [النحل: 35].

اتقال إن سورة الأنعام نزلت قبل سورة النحل، قال وبالفعل قالوا هذا القول وأثبته الله عز وجل في سورة النحل. فسيقول ده عشان تبقى أنت مستعد، زي ما ربنا قال: ﴿سَيَقُولُ السُّفَهَاءُ مِنَ النَّاسِ مَا وَلَّاهُمْ عَنْ قِبْلَتِهِمُ الَّتِي كَانُوا عَلَيْهَا﴾ [البقرة: 142]، وبالفعل قالوا.

آخر حجة دايماً لما تزنق الخصم ساعة وتقفل عليك كل منافذ الاحتجاج بالقدر، دايماً زي ما تيجي تناقش مع واحد في مسألة إن أي دين عند ربنا مقبول؛ نصرانية، يهودية، حتى اللي هيعتقد بوذية ومات يخش الجنة، أهم حاجة بس يبقى عمل كمبيوتر قبل ما يموت أو صنع حاجة حلوة تنور، إنه يبقى عمل حاجة كويسة يعني قبل ما يموت، ده هيخش الجنة!

أما تيجي تناقش الناس دي آخر حاجة وتجيب له الأدلة وإزاي؟ طب معنى كده إن اللي عايز يبقى مسلم وعایز يبقى نصراني، طب أنت المسلم اللي بيقول الكلام ده، طب أنت لما تبقى نصراني طالما النصراني هيخش الجنة طب ما نصراني؟ طب والنصارى بيدعوا ليه؟ طب واليهود بيعملوا؟ طب إزاي النبي صلى الله عليه وسلم قال كذا؟

طب إزاي؟ آخر حاجة يقول لك إيه: ما هو ربنا اللي خلقهم كده، ولا ربنا كان يريدهم وإن الاختلاف ده أمر قدري، ولا يزالون مختلفين، ومهما عملت هيفضلوا كده. طب آه، ما انت مهما عملت هيفضلوا كده، أنت ليه تروح تعمل فيهم كده؟ الاحتجاج بالقدر!

آخر حاجة لما يتزنق في أي نقاش الاحتجاج بالقدر، حتى العاصي لما تيجي تنصح واحد توب ومش عارف إية أو صلي، يقول لك: والله أما ربنا يأذن بقى! آخر حاجة لما يحب يفض معك الحوار الاحتجاج به. فآخر حجة خالص في آخر سورة الأنعام قال لك إيه: ﴿لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِنْ شَيْءٍ﴾ [الأنعام: 148].

طيب هو ليه بيقول ولا آباؤنا؟ يعني هو بيتكلم ليه قال ولا آباؤنا؟ لأنه عايز يثبت معنى أن آباءنا الأقدمون عملوا كده وما تعذبوش وما نزلش عذاب، إذا الله يرضى بذلك. ودي أخطر مشكلة لقياس أن يقول لك طالما ما نزلش عذاب من السماء –ده بقى تفكير اليهود، ما نزلش عذاب من السماء يبقى ده ربنا يرضاه– لذلك في بعض الروايات في قصة أصحاب السبت، القرية التي كانت حاضرة البحر إذ يعدون في السبت إذ تأتيهم حيتانهم يوم سبتهم شرعاً ويوم لا يسبتون لا تأتيهم، هذه القرية قالوا إزاي بدأ الموضوع؟ إنهم اعتدوا في السبت، بعض الروايات ذكرها الإمام الطبري أن في واحد اثنين جيران كانوا ساكنين جنب الشط، فكان يوم السبت يشوفوا الحيتان شرعاً خلاص يعني تكاد أن هي تطلع على الشاطئ.

فواحد اشتاق وبقية الأسبوع ما فيش ولا حوت ولا سمك، فواحد اشتاق للأكل ده، فراح يوم السبت جهاراً عياناً كده قام اصطاد حوت وقام شواه، فجر وبدأ يشم إيه هو شرقان بقى له فترة، فأول لما شم ريحة الشوي عرف أن ده إيه؟ إيه ده، كفته مشوية، اصحى يا عم الحاج! عرف أن ده إيه؟ أن ده سمك، أن دي حيتان بتتشوى، خلاص!

أول لما شم الريحة عمل إيه؟ ساب البيت وطلع يجري، ليه؟ قال سينزل عذاب! اعتقد أن أول لما يشوي قعد أسبوع اتنين تلاتة ما نزلش العذاب، قام عامل إيه؟ قام راجع، قعد يشم ما استحمملش قام هو كمان إيه؟ اصطاد، القرية عرفت، بدأوا.. يبقى إذاً أكثر حاجة زي ما اليهود بيقولوا إيه: ﴿وَيَقُولُونَ فِي أَنْفُسِهِمْ لَوْلَا يُعَذِّبُنَا اللَّهُ بِمَا نَقُولُ﴾ [المجادلة: 8].

تفكير اليهود أن طالما ما نزلش عذاب مباشر أن إسرائيل هي الصح، ليه؟ عشان هي المتقدمة وما نزلش عليها عذاب، أن طالما ما نزلش عذاب يبقى هو اللي صح. فلما قالوا: ﴿لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِنْ شَيْءٍ﴾ [الأنعام: 148] ما نزلش عليهم عذاب، عشان كده الرد أن ربنا يقول: لأ، نزل عذاب، ﴿كَذَٰلِكَ كَذَّبَ الَّذِينَ مِن قَبْلِهِمْ حَتَّىٰ ذَاقُوا بَأْسَنَا﴾ [الأنعام: 148]. لأ، نزل عذاب، ولا حرمنا من شيء.

يبقى بيحتج، وده أخطر حاجة الاحتجاج بالقدر على المعصية أن يقول ربنا اللي أراد كده، دخلت عجيب! في حين إنه لو واحد راح شتمه وبعدين غضب يقول له: بتغضب ليه؟ ما هو لو ربنا لو أراد أن أنا أشتمك.. أمعنى لما واحد جه خد حقك خد فلوسك فزعلان تقول له: ما هو ربنا اللي أراد أن أنا أخد فلوسك، يعني أمعنى لما حقوقه بتعدى عليها يغضب؟ طب بتغضب ليه يعني؟ بتغضب ليه؟

لأن حاصل هذا الكلام أن الحق والباطل يتساويان، أن كل حاجة خلاص الاحتجاج بالقدر على الشرع ده طبعا وللاسف كتير من الفرق اللي ضلت في الإسلام بسبب الخلط ده؛ قادر يفهم يعني إيه الله عز وجل شاء ذلك وأراد ذلك؟ ما يفرقوش بين المشيئة الكونية بالإرادة الكونية والإرادة الشرعية. الله عز وجل خلق كل شيء وكل ما يحدث في الكون يحدث بإرادته سبحانه وتعالى، لا يخرج شيء عن طوعه سبحانه وتعالى.

كفر الكافر وفسق الفاسق وفجر الفاجر يحدث، لا يخرج شيء من هذا عن إرادته سبحانه وتعالى. المعتزلة ما قدروش يتخيلوا هذا الأمر، وبرضه ناس من بينفوا في الأشياء في القدر ما قدروش يتخيلوا ده، قال لك لا مش ممكن يكون ربنا أراد ده، وأن الإنسان هو اللي بيخلق هذه الأفعال. الله عز وجل أراد ذلك وأراد أمر شرعي، وربنا بيقول: ﴿وَلَوْ يَشَاءُ اللَّهُ لَانْتَصَرَ مِنْهُمْ وَلَكِنْ لِيَبْلُوَ بَعْضَكُمْ بِبَعْضٍ﴾ [محمد: 4].

الإنسان الله عز وجل أعطاه القدرة أنه يختار الطريق ده أو الطريق ده، عشان كده القدر لما كان ينزل عليه السلف يقولوا: القدر هو سر الله، القدر هو قدرة الله. اللي بيسأل إزاي ربنا قدر كل حاجة مكتوبة وإزاي في نفس الوقت أنا مخير؟ ده بالضبط زي اللي بيسأل إزاي ربنا بيسمع الناس كلها في وقت واحد؟ ما صفة السمع، هو ربنا اللي قدر ما هي دي من صفات الله سبحانه وتعالى من أفعال الله.

اللي بيسأل إزاي كل حاجة مكتوبة وإزاي أنا مقيد؟ بالضبط زي اللي بيسأل إزاي ربنا يرى كل شيء في وقت واحد؟ وإزاي ربنا يمسك السماوات والأرض أن تزولا؟ واحنا منهيين عن السؤال بكيف، نحن نؤمن بالصفة ونفوض الكيفية. فكذلك القدر، ده اللي ضل مش قادر يتخيل فقالوا: ﴿لَوْ شَاءَ اللَّهُ مَا أَشْرَكْنَا وَلَا آبَاؤُنَا وَلَا حَرَّمْنَا مِنْ شَيْءٍ﴾ [الأنعام: 148].

هنا رد عجيب بقى، ده الختام! عارف لما ييجي تروح تكلم واحد في مثلاً شباب فتقول لهم: تعالوا يا جماعة نصلي، فأجمل رد سمعته يعني كان مأخوذ من الآية، فقال له: طب اصبق بس وإحنا هنيجي وراك. فقال له: آه، اللي قبلكم قالوا كده برضه وماتوا! اللي قبلك قاعد يقول كده ومات وهو بيلعب، فربنا بيقول لهم: أنتم بتقولوا كده، ﴿كَذَٰلِكَ كَذَّبَ الَّذِينَ مِن قَبْلِهِمْ حَتَّىٰ ذَاقُوا بَأْسَنَا﴾ [الأنعام: 148]. قاعدين يقولوا كده برضه لغاية لما نزل العذاب.

هنا التخويف، إذاً فيه رد تفصيلي لأن هناك كانوا يضلون الناس بغير علم، وده رد تخويفي، ده الدخول من الضعف البشري اللي جوه. اللي قبلكم قالوا كده وفضلوا يقولوا كده لغاية لما نزل العذاب، خليكم قولوا كده، سيروا على طريقهم، ﴿وَكَمْ قَصَمْنَا مِنْ قَرْيَةٍ كَانَتْ ظَالِمَةً وَأَنْشَأْنَا بَعْدَهَا قَوْمًا آخَرِينَ * فَلَمَّا أَحَسُّوا بَأْسَنَا إِذَا هُمْ مِنْهَا يَرْكُضُونَ * لَا تَرْكُضُوا وَارْجِعُوا إِلَى مَا أُتْرِفْتُمْ فِيهِ وَمَسَاكِنِكُمْ لَعَلَّكُمْ تُسْأَلُونَ * قَالُوا يَا وَيْلَنَا إِنَّا كُنَّا ظَالِمِينَ * فَمَا زَالَتْ تِلْكَ دَعْوَاهُمْ حَتَّى جَعَلْنَاهُمْ حَصِيدًا خَامِدِينَ﴾ [الأنبياء: 11-15].

فاللي قبلكم ما زالوا يقولون هكذا حتى ذاقوا بأسنا. والآية اللي قبلها: ﴿وَلَا يُرَدُّ بَأْسُهُ عَنِ الْقَوْمِ الْمُجْرِمِينَ﴾ [الأنعام: 147]، هتفضلوا تقولوا كده لغاية لما ينزل عليكم العذاب، ﴿كَذَٰلِكَ كَذَّبَ الَّذِينَ مِن قَبْلِهِمْ حَتَّىٰ ذَاقُوا بَأْسَنَا﴾ [الأنعام: 148].

إذاً لو كان الله عز وجل يرضى ما فعل الكفار، لماذا أغرق قوم نوح؟ ولماذا أهلك عاد وثمود؟ ولماذا دمر قرية لوط؟ وهم يعلمون ذلك ويرون آثارها باقية ويمرون عليها بالليل وهم مصبحين. مصبحون! يمرون ويرون الآثار بأعينهم، طب ليه ربنا دمرهم؟ فكذلك كذب الذين من قبلهم حتى ذاقوا بأسنا.

ودي نفس أول إشارة في أول سورة، هنجد شيء عجيب دلوقتي أن سورة أول ما ذكر في السورة بيقرر ويعاد، أول حاجة أن هم يسيروا في الأرض فينظروا كيف كان عاقبة المكذبين، لما قالوا عايزين آية حسية فربنا قال لهم: انظروا إلى آثار السابقين. وتختم بنفس المشهد، ﴿قُلْ هَلْ عِنْدَكُمْ مِنْ عِلْمٍ فَتُخْرِجُوهُ لَنَا إِنْ تَتَّبِعُونَ إِلَّا الظَّنَّ وَإِنْ أَنْتُمْ إِلَّا تَخْرُصُونَ * قُلْ فَلِلَّهِ الْحُجَّةُ الْبَالِغَةُ﴾ [الأنعام: 148-149].

الله عز وجل بعد كل ده التفصيل ليس لأحد حجة على الله عز وجل، لله الحجة البالغة. إذاً اللي يعتقد أن القرآن مش كفاية مش حجة بالغة واضحة، ده عنده نقص، اللي بيعتقد كده نقصاً في القرآن ده كافر، واللي بيعتقد كده أن الدعاء عنده خلل في الفهم، لله الحجة البالغة.

اللي يريد إنه يقيم الحجة على العباد موجودة في كتاب الله عز وجل، واللي مش هيكتفي بالقرآن ومش هيقتنع بالقرآن فلن يؤمن بشيء بعده، ﴿وَنُقَلِّبُ أَفْئِدَتَهُمْ وَأَبْصَارَهُمْ كَمَا لَمْ يُؤْمِنُوا بِهِ أَوَّلَ مَرَّةٍ﴾ [الأنعام: 110]. اللي مش هيؤمن بالقرآن مش هيؤمن بحاجة تانية، ﴿قُلْ فَلِلَّهِ الْحُجَّةُ الْبَالِغَةُ﴾ [الأنعام: 149] التي تبلغ إلى الناس، ﴿فَلَوْ شَاءَ لَهَدَاكُمْ أَجْمَعِينَ﴾ [الأنعام: 149]. الله عز وجل وشاء كان هدى الناس هدى الناس كلهم، لكن الله عز وجل أعطى الإنسان المقدرة، ده رد على لو شاء الله ما شاء، لو شاء لهداكم أجمعين، ولكن الله عز وجل لم يشأ ذلك، الله عز وجل شاء أن الإنسان هو اللي يختار بنفسه.

كيف يعاقب الله عز وجل الرحيم الكريم الذي لا يظلم أحد؟ ﴿وَلَا يَظْلِمُ رَبُّكَ أَحَدًا﴾ [الكهف: 49]، لا يظلم الناس مثقال ذرة. كيف يعاقب على شيء.. لم يعاقب الإنسان على شيء لم يختاره؟ إزاي؟ ما هو اللي بيقول كده يتهم الله عز وجل؟ اللي بيقولوا أن الإنسان مسير في ده يتهم الله عز وجل سبحانه وتعالى، بيتهمه بالظلم وبيتهمه بالعبث، حاشاه الله عز وجل عما يشركون، تعالى الله عز وجل عما يصفون.

العجيب نختم بقى الدرس النهاردة، نفس البداية اللي كانت في أول السورة ولكن كانت عن العقيدة، أول سورة الأنعام خالص آية تسعتاشر: ﴿قُلْ أَيُّ شَيْءٍ أَكْبَرُ شَهَادَةً قُلِ اللَّهُ شَهِيدٌ بَيْنِي وَبَيْنَكُمْ وَأُوحِيَ إِلَيَّ هَذَا الْقُرْآنُ لِأُنْذِرَكُمْ بِهِ وَمَنْ بَلَغَ أَئِنَّكُمْ لَتَشْهَدُونَ أَنَّ مَعَ اللَّهِ﴾ [الأنعام: 19].

آلهة أخرى، قل لا أشهَد، جمع الشهادة على التوحيد، على العقيدة، وفي الآخر جمع الشهادة على تشريع واحد من التشريعات، قل هلم شهداءكم الذين يشهدون أن الله حرم هذا، فإن شهدوا نفس الكلمة اللي في أول السورة، فإن شهدوا فلا تشهد.

قل إنكم تسجنون مع الله، قل لا أشهَد، وفي الآخر فإن شهدوا فلا تشهد معهم، ولا تتبع أهواء الذين كذبوا بآياتنا، وكأن بدأت السورة بالعقيدة وختمت بالشريعة، وبتشريع واحد فقط، ده التدرج الطبيعي، البداية بالعقيدة وترسخ عند ناس ثم تطرح الشريعة، طرح الشريعة قبل العقيدة ده بيدي خلل عند الناس.

أيضاً من الفوائد أن الشريعة لها العظم عند ربنا زي العقيدة، وهنا لو شاهدوا على شيء في العقيدة لا تشهد، ولو شهدوا على حكم واحد لا يرضاه الله لا تشهد أيضاً، مجرد تحريم حاجة ربنا أحلها لا تشهد معهم، وأن زي ما الأولانية شرك، الآخرانية شرك، كل الطرح ده العميق ده بتاع سورة الأنعام، هذه العقيدة العظيمة اللي بتطرح من أول السورة وختمت بهذه الشريعة هو ده الدين المتكامل، هو ده المتكامل بتاع سورة الأنعام، لذلك نزلت جملة واحدة، قل هلم شهداءكم الذين يشهدون أن الله حرم هذا، فإن شهدوا فلا تشهد معهم ولا تتبع أهواء الذين كذبوا بآياتنا والذين لا يؤمنون بالآخرة.

ودي جت في المقطع التاني في السورة وهم بربهم يعدلون، دي أول آية السورة: ﴿الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ وَجَعَلَ الظُّلُمَاتِ وَالنُّورَ ۖ ثُمَّ الَّذِينَ كَفَرُوا بِرَبِّهِمْ يَعْدِلُونَ﴾ [الأنعام: 1]، أي يعدلون مع الله عز وجل غيره، يقولوا إن يعني يساوون بين الله عز وجل، سورة إبراهيم: ﴿تَاللَّهِ إِنْ كُنَّا لَفِي ضَلَالٍ مُبِينٍ إِذْ نُسَوِّيكُمْ﴾ مش نفضلكم، ﴿إِذْ نُسَوِّيكُمْ بِرَبِّ الْعَالَمِينَ﴾ [الشعراء: 97-98]، دول اللي بيعدلوا مع الله عز وجل الآلهة الأخرى.

هي مشكلة الآخرة مشكلة أن هو عايز حد ينازع في التشريع، بيدور على مخرج من التشريع أنه يجيب حد تاني يشرعه، فدول ولا نتابع أهواء الذين كذبوا بآياتنا والذين لا يؤمنون بالآخرة وهم بربهم يعدلون، كأن بقى الختام بقى هيبدأ الأمور التشريعية الأساسية اللي هتقوم عليها أي دولة، قل تعالوا أتل ما حرم ربكم عليكم، الوصايا العشر اللي ذكرت أيضاً في الإسراء، والإسراء أيضاً من أواخر قرآن العهد المكي، كأن ده تقدمة لبداية العهد المدني، وأن أي دولة لابد أن تقوم على هذه الأسس لا يتخلف منها شيء.

الشاهد أن ده كان الختام بتاع المناظرة بتاع سورة الأنعام، وبدأت بالعقيدة وختمت بالشريعة وعظمت ولو أمر واحد فقط ينازع في الله عز وجل، قالت اللي هيطيعهم: إنكم لمشركون، طب واللي بيعمله أصلاً ربنا قال لو أطعتموهم في هذا إنكم لمشركون، أمال اللي بيعمله؟ أمال اللي بيغير في دين الله عز وجل؟ وفي الآخر المؤمن لابد أن يبقى عنده عزة بدينه، عنده عزة بالوحي، يؤمن أن الوحي هو المصدر الوحيد للتلقي، ولو رورد عن دينه في شيء وطلب منه أن يشهد ويوافق على شيء يخالف العقيدة أو يخالف الشريعة يرفض ولا يشهد معهم.

أسأل الله عز وجل أن يثبتنا على الحق حتى نلقاه، أقول قولي هذا واستغفر الله لكم، سبحانك اللهم وبحمدك، أشهد أن لا إله إلا أنت أستغفرك وأتوب إليك، وجزاكم الله خيراً.