تفسير سورة الأنعام (1) | الآيات (1-7) | د. أحمد عبد المنعم

الحمد لله وحده والصلاة والسلام على من لا نبي بعده، محمد صلى الله عليه وسلم. إن شاء الله النهاردة هنستفتح سورة الأنعام، والإنسان فعلاً حقيقة بيتهيأ. يعني بيتهيأ إنه يستفتح هذه السورة العظيمة. السورة، سورة الأنعام هي تعتبر سورة طويلة من السبع الطوال، وأول سورة مكية بتقابلنا في المصحف. يعني بعد البقرة وآل عمران والنساء والمائدة، أول سورة مكية بتقابلنا في المصحف سورة الأنعام.

في آثار كتير رويت، بعضها مرفوع للنبي صلى الله عليه وسلم وبعضها موقوف، أنها نزلت سورة الأنعام صفحة 128 في المصحف السعودي، وأنها نزلت جملة واحدة معها 70 ألف ملك يشيعونها. وبعض الآثار قالت إن هي نزلت ليلاً، ودي من المباحث اللي بتبقى موجودة في علوم القرآن؛ السور اللي نزلت في مكة واللي نزلت في المدينة، واللي نزلت نهاراً واللي نزلت ليلاً، الآيات اللي نزلت نهاراً أو ليلاً، ونزلت متفرقة ولا نزلت جملة واحدة. حقيقة يعني يعتبر ما فيش سند صحيح قطعا يعني متصل بموضوع نزلت جملة واحدة، لكن مجموع الآثار قابل، بعض العلماء حسنه يعني بمجموع الطرق. يعني المعلومة دي بعض العلماء أجاز إنك تقولها، يعني إن سورة الأنعام نزلت جملة واحدة؛ لكثرة الآثار الواردة طرقاً، وإن كان أغلبها ضعيف، وبعض العلماء قال كلها كمان ضعيف، لكن مجموع الطرق قابل إنه يتصل، إنه إيه؟ يحسن الأثر يعني. الشاهد، يبقى إذن هذه السورة سورة عظيمة؛ يبقى أول حاجة أول سورة مكية بتقابلنا في المصحف، نزلت جملة واحدة، نزلت ليلاً.

ثانياً، من اختصاص سورة الأنعام إن هي من السور اللي افتتحت بالإيه؟ بالحمد لله. من السور اللي افتتحت بالحمد لله؛ إيه السور اللي افتتحت بالحمد لله؟ الفاتحة، الأنعام، الكهف، سبأ، فاطر. خلاص؟ الحمد لله رب العالمين، الحمد لله الذي خلق السماوات والأرض وجعل الظلمات والنور، الحمد لله الذي أنزل على عبده الكتاب ولم يجعل له عوجاً، الحمد لله الذي له ما في السماوات وما في الأرض، وله الحمد في الآخرة، الحمد لله فاطر السماوات والأرض، دي فاطر. خلاص؟ لما تيجي تشوف صفات الحمد الموجودة؛ كلمة الحمد لله الألف واللام ديت بيقولوا الألف واللام للاستغراق، يعني إيه الاستغراق؟ يعني كل الثناء وكل الحب وكل المشاعر معينة كده جواك لا تكون إلا لله، خاصة لله. يعني يا جماعة الحمد غير الشكر. الحمد كلمة قعدوا يطوفوا حواليها اللغويين عشان يفسروها، قالوا فيها معنى الشكر، وقالوا فيها معنى الثناء، وقالوا فيها معنى الحب، وقالوا فيها معنى التعظيم.

ثاني، قالوا فيها إيه؟ معنى الشكر، ومعنى الثناء، ومعنى الحب، ومعنى التعظيم. حب وثناء وتعظيم وشكر، ده منظومة على بعضها اسمها الحمد. غير لما تيجي الحروف، ودي حاجة موجودة في اللغة إن الكلمة الواحدة حروفها لما تتلخبط ممكن توصلنا لأصل متقارب، غير المدح، يعني المدح إن الميم دال حاء، هنا دي حاء ميم دال، المدح هو مجرد الثناء، ممكن تمدح أي حد. لكن إن هذا المدح يخالطه مشاعر تعظيم، ويخالطه مشاعر حب، وتبقى حاسس بامتنان وعايز تشكر اللي قدامك من أعماق قلبك، المعنى ده اسمه الإيه؟ الحمد. طب المشاعر اللي جوانا دي، اللي إحنا بنقول هذه المشاعر استغراقاً وكليةً لا تكون إلا لله، يعني أنت حاسس كده؛ أما تيجي مثلاً إيه نعمة الكلية؟ إن كليتك شغالة، وإنك ما بتروحش تعمل غسيل كلية، وإنك أنت سليم أو إنك أنت مبصر. أما تيجي تستحضر نعمة وتحس بانكسار وشكر لله عز وجل على هذه النعمة، ساعتها تقول إيه؟ الحمد لله. التنهيدة دي خرجت مشاعر، هي دي معاني الحمد؛ إنك أنت عاجز عن الشكر، مش عارف تشكر هتشكر إيه ولا إيه؟ ﴿وَإِن تَعُدُّوا نِعْمَتَ اللَّهِ لَا تُحْصُوهَا﴾، وجواك مشاعر ثناء، عايز تقعد تثني على الله، ده ربنا ده كريم قوي، ده ربنا ده رحيم قوي، تلاقيك عايز تثني على الله وبتثني.

في واحد بيثني على حد عشان خايف منه يديله فلوس، أو عشان منصب، أو رياءً أو نفاقاً. لكن لا، ده أنت بتثني على الله عز وجل إجلالاً له، ورهبةً منه، وطمعاً في ثوابه، وحباً له؛ يعني أنت هي منظومة يعني معينة من المشاعر مرتبطة ببعضها، لا تكون إلا لله سبحانه وتعالى. طيب، المشاعر دي جوانا لربنا، ربنا سبحانه وتعالى بقى افتتح خمس سور ليه؟ عمل إيه ربنا سبحانه وتعالى فجاب لنا خمس معاني في القرآن بيقول لنا إن المعاني ديت لما بتفتكرها بتبقى عايز تقول: الحمد لله. إيه أول حاجة؟ الحمد لله إيه؟ رب العالمين. إيه اللي في رب العالمين ككلمة تحسسك إن أنت هذه الكلمة تستوجب الحمد لله سبحانه وتعالى؟ رب العالمين الله عز وجل خلق العالم، لكن من رحمته أنه خلقه ولم يتركه بل خلقه وكان رباً له. يعني إيه كان رباً له؟ كلمة إن الشيء بيربو يعني إيه؟ بيزيد. من سنة ربنا في الكون إن ربنا خلق الكون كله بينمو؛ السماوات بتتسع، النبتة بتنمو، الإنسان بينمو، الذرة بتتحرك، كل حاجة، ما فيش حاجة ثابتة، كله إيه؟ بينمو، كله بيمر بمراحل عمرية معينة.

حتى السماوات والأرض كانت في أول الأنبياء كانت رتقاً ففتقناهما، وبعدين بقول له وبيقول: ﴿وَالسَّمَاءَ بَنَيْنَاهَا بِأَيْدٍ وَإِنَّا لَمُوسِعُونَ﴾ [الذاريات: 47]. دي في الذاريات. نرجع، دي أول الأنبياء. آخر الأنبياء: ﴿يَوْمَ نَطْوِي السَّمَاءَ كَطَيِّ السِّجِلِّ لِلْكُتُبِ كَمَا بَدَأْنَا أَوَّلَ خَلْقٍ نُّعِيدُهُ﴾ [الأنبياء: 104]. يبقى الكون كله في ظاهرة النمو والتمدد؛ كل الكون حتى النملة والميكروب والذبابة والإنساْن والقلب بتاع الإنسان ويد الإنسان والحشرات والسماء والأرض كله بينمو، وله مراحل عمرية بتمر مع الزمان، كل مخلوقات الكون تحتاج إلى الله في كل لحظة من لحظات النمو، ولو تركها الله لن تنمو ولن تربو. لذلك رب العالمين، العالم كله يحتاج إلى الله أثناء حياته وأثناء نموه، فإحنا بنحمد ربنا إن العالمين لهم إيه؟ لهم رب. صفة الرب هنا، يبقى أول وصف تحمد به الله عز وجل صفة الإيه؟ الربوبية، وده أول وصف ذكر في نزول القرآن: ﴿اقْرَأْ بِاسْمِ رَبِّكَ﴾ [العلق: 1].

ثاني صفة من صفات الله ذكرت: ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]. ثاني حمد عندنا في القرآن: الحمد لله الذي خلق. يبقى أول حاجة الربوبية بعدين الإيه؟ الخلق. اقرأ باسم ربك الذي خلق. الحمد لله رب العالمين، الحمد لله الذي خلق السماوات والأرض. الربوبية والخلق متلازمان، فالذي خلق هو الرب، والرب لابد أن يخلق؛ يعني لما واحد يقولك أنا ربك، قوله الدليل إيه؟ عايز تبقى ربي ما فيش مشكلة، بس إعمل إيه؟ إخلق، إخلق ذباب، إخلق من عدم. مش أنت عايز تبقى رب؟ الرب بيخلق، والذي يخلق قطعاً هو الرب، هو اللي قال له الخلق والأمر، الخالق ما ينفعش حد. يعني عارف لما تيجي مثلاً واحد يصنع حاجة وتبوظ، فتروح للي صانعها تقوله ده باظت، يقولك معرفش فيها، تقوله متعرفش فيها إزاي؟ ده أنت اللي إيه؟ ده أنت اللي عاملها. فالذي خلق يرب خلقه وهو اللي بيراعيهم، الذي خلق هو الرب، معايا؟ فاهمين التلازم بين الإثنين؟

طيب، تالت حاجة في الحمد، الحمد لله الذي إيه؟ يبقى الله عز وجل رب العالمين، بما إنه رب العالمين هو الذي خلقهم، لكن من رحمة الله أنه خلقهم ولم يترتركهم سدى، فأنزل لهم الكتاب. تالتة عندنا: الحمد لله الذي أنزل على عبده الكتاب. ﴿اقْرَأْ بِاسْمِ رَبِّكَ الَّذِي خَلَقَ * خَلَقَ الإِنسَانَ مِنْ عَلَقٍ * اقْرَأْ وَرَبُّكَ الأَكْرَمُ * الَّذِي عَلَّمَ﴾ [العلق: 1-4]. علم، نزل لك وحي. الحمد لله الذي أنزل على عبده الكتاب. يبقى الله عز وجل رب العالمين، الله عز وجل خلق السماوات والأرض، الله عز وجل هو الذي أنزل على عبده الكتاب. معايا؟ الله عز وجل هو الذي أنزل على عبده الكتاب. يبقى ربنا سبحانه وتعالى لما خلق الخلق ما سابناش، الله عز وجل لما خلق الخلق ما سابناش من غير نور. لذلك هنا ربنا بيقول إيه في معنى في أول الأنعام: الحمد لله الذي خلق السماوات والأرض وجعل الظلمات والنور. في ظلمة وفي نور، وهنتكلم في الآية دي إن شاء الله.

رابع آية من آيات الحمد إيه؟ بتاعة سبأ، الحمد لله الذي له، له دي إيه؟ تفيد الإيه؟ ملكية. يبقى الله عز وجل الرب، الرب هو الذي خلق، من صفات الربوبية أن هو ما سابناش فنزل لنا وحي، كل دي مستلزمات تحمد ربنا عليها. لما تفتكرها كده تقعد تقول: الحمد لله إن ربنا مش سايبنا رب العالمين، الحمد لله إن ربنا خلق (لا يعني صفة لا تكون إلا لله)، الحمد لله إن ربنا نزل لنا وحي، الحمد لله إن ربنا هو المالك الوحيد للكون. أصبحنا وأصبح الملك لله، أول لما تقول أصبحنا وأصبح الملك لله تقول إيه ده؟ والحمد لله، ده فعلاً ده نعمة. الحمد لله الذي لم يتخذ ولداً لآخر الحمد لله الذي لم يتخذ ولداً ولم يكن له شريك في الملك ولم يكن له ولي من الذل. الحمد لله إن ما فيش حد بيتدخل في تدبير الكون. الحمد لله؛ لإن لو في حد بيتدخل في تدبير الكون إن إحنا هنضيع، هنبقوا عاملين زي اللي فيه شركاء متشاكسون، عايز ترضي ده وعايز ترضي ده وعايز ترضي ده. ﴿لَوْ كَانَ فِيهِمَا آلِهَةٌ إِلاَّ اللَّهُ لَفَسَدَتَا﴾ [الأنبياء: 22]. الدنيا كلها تبوظ وأنت تفسد، هتضيع ما بين الـ هتعيش تعيس زي ما النبي صلى الله عليه وسلم قال: «تعس عبد الدينار، تعس عبد الدرهم». هتعيش تعيس ليه تعيس؟ لإن بقى فيه أكثر من إله في حياته.

خامس حاجة بنحمد عليها ربنا، نعمة الفطرة؛ الحمد لله فاطر السماوات والأرض، ودي بقى عايزة قصة، بس نرجع لقضية الفطرة، إن مهما عمل أعداء الله عز وجل، فطرتك ثابتة ما بتتغيرش. يبقى إحنا عندنا اتنين حمد فيهم الفطرة والكتاب، بتاعة فاطر والكهف، واتنين حمد فيها الخلق والملك، بتاعة الأنعام وسبأ، وحمد واحد بتاع الربوبية. يبقى إذن من مستلزمات الربوبية الخلق والأمر. تاني معايا، مستلزمات الربوبية خلق ويملك وفطر ويعلم ونزل الكتاب. وضحت كده؟ اللي عايز يسأل يسأل يا جماعة، استغلوا إن العدد قليل النهاردة فيبقى براحتنا يعني. الملك، صفة الملكية: الحمد لله الذي له ما في السماوات وما في الأرض وله الحمد في الآخرة.

طيب، نيجي بقى للأنعام؛ سورة الأنعام أول سورة مكية بتقابلنا في القرآن، وهي سورة عظيمة، وفعلًا وفعلًا نزلت (يعني لو قلنا بتحقيق الأثر اللي بالحس إنه حسن يعني) نزلت جملة واحدة. سورة الأنعام عايزة تتأخد جملة واحدة. توراكو حاجة؟ عاشوراء الجاي. آه، سورة الأنعام عايزاك في يوم كده، عاشوراء الجاي كده تقوم جاي واخدها على بعضها، قايم تصلي قيام واخد السورة على بعضها في ركعة. خلاص تمام، آه عمر شوال بييجي يعني، الأنعام تاخدها على بعضها جملة واحدة. فعلاً يعني إيه؟ درس عقيدة مركز بيعالج كل مشاكل النفوس في النفع والضر، في البأساء، في النعمة، في الملك، في الإحياء والإماتة، في الشبهات، في الضلال، في الاحتجاج بالقدر، مش ممكن. يعني كل تفاصيل العقيدة معالجة ليها بطريقة، ولكن بطريقة قرآنية مش بطريقة كلامية.

ودي نقطة قبل ما ندخل في سورة الأنعام مهمة جداً؛ قضية علاج القرآن أو توصيل القرآن للعقيدة غير طرق كلام البشر. وللأسف اللي دايماً الدائرة المتكررة إن تنشأ فرقة ضالة، يقوم علماء المسلمين يكتبوا كتب للرد عليها ويحطوا ضوابط ما كانوش محتاجين يحطوها إلا لما نشأت الإيه؟ الفرقة الضالة. يبقى الدائرة بتبدأ إزاي؟ إن تنشأ فرقة ضالة، علماء المسلمين يهبوا للرد على هذه الفرقة الضالة فيكتبوا ويستخلصوا آيات من القرآن وأحاديث، ويجيبوا الشبهات ويردوا عليها، ويردوا عليها بصورة تناسب فهم الفرقة الضالة؛ لو الفرقة الضالة فلسفية كلامية فبيرد عليه عشان يفهم. معايا؟ يعني زي مثلاً عالم مثلاً في الطب فممكن تجيبله آية من الإعجاز الطبي في القرآن مثلاً. فنشأت المذاهب المختلفة في العقيدة الضالة فيردوا عليهم، يقوم الكتب اللي اتكتبت للرد على هؤلاء تبقى كتب عقيدة وتدرس لعموم المسلمين. طب عموم المسلمين أصلًا ما كانش عندهم المشكلة دي، عموم المسلمين محتاجين العقيدة الصافية الفطرية البسيطة اللي جت في كتاب ربنا.

يعني ممكن كتب ضخمة في قضية الرد على النصارى وشبهات النصارى، وثلاثة في واحد واثنين في واحد وثلاثة لا، واحد بس هو اثنين... والقرآن بيقول إيه؟ القرآن بيقول إيه؟ ﴿كَانَا يَأْكُلَانِ الطَّعَامَ﴾ [المائدة: 75]. بس خلاص، وأمه صديقة، كان إيه؟ بس، كان يأكلان، أنت تفهم بقى. الله عز وجل يطعم ولا يطعم، الله عز وجل صمد. بس، فكلمة ﴿كَانَا يَأْكُلَانِ الطَّعَامَ﴾ بتعرفك إزاي القرآن بيطرح العقيدة بطريقة سهلة بسيطة تناسب؛ هو ربنا بيحتاج إلى طعام؟ في رب يحتاج إلى طعام؟ إيه اللي أنتم بتقولوه ده؟ ويجوع ويقضي حاجاته ويخش الخلاء؟ إيه اللي ده؟ فطرح القرآن للعقيدة بطريقة بسيطة. أنت بتقول ما فيش ربنا؟ طب لما بتبقى في نص البحر والموج بيلعب بك بتقول إيه؟ ده دي طريقة القرآن البسيطة. مش بس بسيطة، ﴿أَلَا يَعْلَمُ مَنْ خَلَقَ﴾ [الملك: 14]؟ نفسك محتاجة كده، مهما تفرعن الفرعون، ومهما تكبر المتكبر، ومهما طغى الطاغية، هو جواه مشاعر.

خوف من المجهول، ومن المستقبل، ومش هو جواه مشاعر خوف. هو هيظل بشر، لن يعلو فوق طبقة البشرية. هيظل بشر، القرآن بيخاطب مشاعر البشرية اللي جواه. أنت مشكلتك في كتاب العقيدة إنك بتحلله المشكلة العقلية فقط.

يعني عجيب قوي إن سورة فيها شبهات للمشركين زي سورة الأنعام، وبتكرر عقائد، وبتدحض مشاكل، وبتربي، وكتاب هدى، أول حاجة بتبدأ بإقرار ما تريد أن تقرره. يعني هي إحنا نفسنا إنك تقول الحمد لله، هي بدأت بتقول الحمد لله، الموضوع منتهي أصلاً. يعني تخيل سورة يعني إيه حاطة النتيجة في الأول، دي متوقعة النتيجة في، فبما أنه فعل كذا فهو الذي يستحق الحمد.

لأ، بدأت من الأول تخاطبك، عارفة ضعفك البشري، الضغط النفسي اللي عليك، هي عارفة. مش الآيات: ألا يعلم من خلق؟ الله عز وجل هو الذي خلق، ويععلم حاجة الإنسان، وده كلام ربنا سبحانه وتعالى. خلاص؟ فللأسف إيه انشغالنا بالجدل الكلامي وتعليمه للناس إجبارًا على إن ده اللي يعلم به عموم المسلمين، لأ. ده طائفة معينة هي اللي بتنتصر للرد على الفرق الضالة، فهي التي تحتاج إن تتعلم مثل هذا الكلام، وتتلقى هذا الكلام، وتدرسه، وترد على الفرق الضالة، ده مطلوب، فلولا نفر من كل إيه فرقة منهم طائفة ليتفقهوا في الدين؟ ده مطلوب، إن تنفر فرقة لهذا.

لكن عموم الناس، عموم الناس ده اللي هو إحنا يعني، مش قصدي عموم الناس اللي هم الـ، لأ، الأصل في الإنسان إنه يتلقى القرآن بطريقة فطرية بسيطة. تلقى، زي آيات سورة الأنعام كده، هي دي العقيدة الحقيقية، هي العقيدة اللي هي بـ اللي هي قيل يعني إنها عقيدة بوزن فعيلة ديت بمعنى مفعول، أي عقدت، مربوطة، عقيدة يعني مربوطة.

أي معقودة. معقودة فين؟ في قلبك. يبقى العقيدة ما ربط في قلبك من معاني لا تتزحزح. يعني أنا أعتقد إن اللي بيزعلني ويهزأني ده أبويا، مثلاً، مهما يحاولوا يقنعوني إنه مش، لأ، هو إيه؟ هو والدي، أنا عارف أبويا، أنا عارف كويس، خلاص؟ فدي أصبحت عندك إيه؟ عقيدة.

أنا مثلاً عارف إن أنا لما بجوع، لما باكل ده هبقى كويس. أنا متنفز دلوقتي عشان مثلاً أنا إيه؟ جوعان. أنا عارف، دي عندي إيه؟ عقيدة. الغيبيات بقى إنها تتحول إلى عقيدة مش هتيجي غير بالقرآن. لو العقيدة في القرآن التعامل معاها كان زي كتب العقيدة اللي بيوضعها البشر، كان القرآن يخلص في ثلاث صفحات: واحد، إن الله واحد لا إله إلا هو؛ اثنين، لازم تعرفوا إن في ما جنة؛ وثلاثة، ما ينفعش كده عشان ما تخشوش النار؛ أربعة، خلاص، وخلص الموضوع، هي دي الحاجات دي المعاني يعني اللي محتاجينها توصل.

لكن لا، القرآن بيضرب ويطرق على كل مداخل النفوس، بيعملك حصار نفسي. يعني ده أنا عايز أقولك بص كده أول ثلاث آيات في الأنعام: الحمد لله. عمل إيه الله؟ خلق السماوات والأرض، وجعل الظلمات والنور، وبعد كده الكفار رايحين يبحثوا عن إله تاني، وده هو اللي خلقك من طين أنت، خطاب بقى مباشر، وهتموت ثم قضى أجلاً، وبعدين هتبعث وأجل مسمى عنده، وبعد كل ده لسه شاكك؟ ده هو الله في السماوات، هو المعبود في السماوات وفي الأرض. ويعلم اللي جواك، أثر الكلام اللي أنا قلته ده جواك ربنا يعلمه الآن، وعارف أنت هتقول إيه، ويعلم ما تكسبون.

ثلاث آيات إحاطة زمنية، من أول ما اتولد، أو إحاطة مكانية الأول من أول السماوات والأرض والظلمات والنور، إحاطة مكانية وإحاطة زمنية، اتخلق وهيموت وهيبعث، إحاطة نفسية جواك ربنا يعلمه. شوف ثلاث آيات حصار.

إحنا دورنا بقى، وأنا قلت الكلام ده قبل كده وبكرره في الدرس اللي فات واللي قبله، دورنا توصيل معاني القرآن للناس؛ لأن حصلت عجمة بينا وبين آيات القرآن. فأما تيجي تقرأ الآيات دي على حد دلوقتي يقولك إيه؟ مش فاهم، مش عارف أنت عايز إيه، إيه المشكلة يعني؟ أو ما يجي مثلاً واحد بيسمع الآيات دي ويعيِّط، واحد يقوله: خير في يعني في إيه في إيه في إيه؟ في حاجة مضايقاك؟ أو إيه اللي حصل؟ إيه اللي مزعلني؟ من إيه اللي حصل؟ إيه اللي في الكلام يزعل؟ تمام، هو مش عارف.

لذلك لازم نبقى بلسان قومه، أنت بقى تاخد المعاني دي، ما تاخدش معاني ثانية وتروح توصلها، لا، معاني القرآن دي هي اكسر له الحواجز اللي بينه وبين النصوص دي؛ عشان نوصل للمرحلة إن احنا نقرأ على ناس القرآن فيتأثروا.

طيب، دي كانت مقدمة لكيفية طرح القرآن للعقيدة، وليه تناول العقيدة من خلال القرآن أمر مهم، وإعطاء عقيدتنا للناس من خلال كتاب ربنا مهم، خلاص؟

طيب، نبدأ بقى، بسم الله الرحمن الرحيم. الحمد لله، تكلمنا عن معاني الحمد، وتكلمنا ليه جاء في الخمس سور اللي موجودين في القرآن. ﴿فَأْتُوا بِسُورَةٍ مِّن مِّثْلِهِ﴾ [البقرة: 23]، دول نوعين التحدي اللي بتتحدى بهم أي أحد إن هذا الدين حق، الأول لخلق السماوات والأرض، الرب والخالق: ﴿اقْرَأْ بِاسْمِ رَبِّكَ الَّذِي خَلَقَ﴾ [العلق: 1]، وهنا الحمد لله الذي خلق، اسم موصول اللي هو الذي ده بيزيد تعريف. لما تحب تعرف مثلاً أقول لك: عارف فلان؟ تقول لي: فلان مين؟ أقول لك: فلان اللي بيزعق. طب ما هو بيعمل حاجات كتير في حياته، إنما لما بأقول لك: اللي بيزعق، أنت عارف إن دي صفة مخصوصة فيه.

فيقول لك: ﴿الْحَمْدُ لِلَّهِ الَّذِي خَلَقَ السَّمَاوَاتِ وَالْأَرْضَ﴾ [الأنعام: 1]، لا يفعل الخلق إلا هو سبحانه وتعالى. خلق السماوات والأرض وجعل الظلمات والنور ثم الذين كفروا بربهم يعدلون. أنتم صاحيين؟ العلماء وقفوا عند كلمة، تكلموا فيها كثير بصراحة بس احنا مش هنحاول نطول فيها.

إيه الفرق بين خلق وبين جعل؟ الحمد لله الذي خلق السماوات والأرض وجعل الظلمات، قالوا ليه ما قالش خلق الظلمات والنور؟ قعدوا بقى يتكلموا إن جعل بتفيد معنى الصيرورة، شيء بيتحول إلى شيء، وإن دي أشياء بتتحول وبتتغير مع دوران الأرض، لو قلنا الظلمات والنور المقصود بها الليل والنهار أو أي ظلمة ونور الحسيين، مش المعنويين، مش المقصود به المعنويين، لا، الحسيين، ودي حاجات بتتغير وبتمر بتغيير فبتتحتاج إلى سيرورة.

وفي ناس قالت: جعل دائماً جعل بيجي إن الحاجة تبقى مهيأة لحاجة، يعني يقولك: أنا جعلتها قابلة لكذا، سواء عمل فيها التغيير ده حقيقي أو عمل التغيير فيها معنوي. يعني لما يقول إيه: ﴿وَجَعَلُوا الْمَلَائِكَةَ الَّذِينَ هُمْ عِبَادُ الرَّحْمَٰنِ﴾ [الزخرف: 19]، ناس هم عايزين يحولوا الملائكة الذين هم عباد الرحمن إلى إناث، هو ما استطاعش، لكن هنا يبقى جعل مش لازم تبقى حصلت.

فكلمة جعل الظلمات والنور، الله عز وجل هيأ الأسباب في الأرض إلى وجود الظلمات ووجود النور، زي ما هيأ الإنسان إنه قابل إنه يسير في طريق الشر أو طريق الخير، كذلك هيأ الأسباب لوجود الظلمات ووجود النور. هيأ، خد بالك من الكلمة دي، هيأ الأسباب لوجود الظلمات والنور الحسية إزاي؟ خلق شمس، وخلق أرض بتلف، فبالتالي يبقى خلق أشياء متحركة، هذه الحركة بتنتج في الآخر نور وبتنتج ظلمة.

كذلك هيأ الأسباب لوجود النور والظلام المعنويان، اللي هو الهدى والضلال. هيأ الأسباب لكده، يعني إيه هيأ الأسباب لكده؟ يعني خلق رسل، وجعل الرسل قابلين لتلقي الوحي، وأنزل وحي، وخلق إبليس، وجعل نفوس ضالة، ربنا سبحانه وتعالى عمل كده، فهيا الأسباب لوجود الظلمات ووجود النور. يبقى الله عز وجل بيعرفك إنه في ظلمات وفي نور.

خد بالك من كلمة جعل الظلمات، الظلمات جمع والنور مفرد؛ دائماً في القرآن لأن الظلمات شعب متعددة، زي ما في آخر السورة هيجيلنا بقى بعد الشوط الطويل: ﴿وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ﴾ [الأنعام: 153]. ولا تتبعوا السبل، اللي هي الظلمات اللي في أول السورة اللي هي معانا دلوقتي، ولا تتبعوا السبل فتفرق بكم، والنور واحد، السبيل واحد، طريق واحد.

الله ولي الذين آمنوا يخرجهم. يبقى الأول الإنسان بيبقى في ضلمة، وبعدين بيروح للنور، وهنا بدأ بالظلمات: ﴿اللَّهُ وَلِيُّ الَّذِينَ آمَنُوا يُخْرِجُهُم﴾ [البقرة: 257] من الظلمات إلى النور. كل معنى من معاني الإيمان قبل ما بتعرفه أنت كنت في ضلام منه.

عشان كده أنت يومياً أكثر من مرة بتطلب معنى الهداية: اهدنا. طب ما أنت دلوقتي مهدي؟ لا، أنت عايز هداية في كل خطوة في حياتك. أنت عايز هداية في القيام، وهداية في الصيام، وهداية في الفروض في المسجد، وهداية في الأخلاق الطيبة، وهداية في الأمر بالمعروف والنهي عن المنكر، وهداية في فهم القرآن، وهداية في فهم السنة، وهداية في نشر الدين. أنت عايز هداية في كل حاجة، وكل معنى من اللي أنا قلته ده طريق، عايز جوه الطريق ده هداية، يبقى أنت عايز تصل سالماً.

كل خطوة بتاخدها في طريق الدين قبلها كانت بالنسبة لك دي ضلمة، مين اللي نقلك النقلة دي؟ الله. أعلى صور الولاية تتجلية في إنقاذ الناس من الظلمات والنور: ﴿اللَّهُ وَلِيُّ الَّذِينَ آمَنُوا﴾ [البقرة: 257] بيعمل إيه؟ يعني ما قالش الله ولي الذين آمنوا يطعمهم. خد بالك لأن هنا هيجيلنا: ﴿قُلْ أَغَيْرَ اللَّهِ أَتَّخِذُ وَلِيًّا﴾ [الأنعام: 14].

أعلى صور الولاية: إخراج الناس من الظلمات إلى النور. يبقى الله عز وجل يتولى الناس إنه هو يبين لهم النور: ﴿إِنَّ عَلَيْنَا لَلْهُدَىٰ * وَإِنَّ لَنَا لَلْآخِرَةَ وَالْأُولَىٰ﴾ [اللَّيل: 12-13]. وبما إن ربنا أوجب على نفسه إنه يبين للناس: ﴿وَمَا كُنَّا مُعَذِّبِينَ حَتَّىٰ نَبْعَثَ رَسُولًا﴾ [الإسراء: 15]، أعلى صور الولاية إن ربنا يتولاك في الدين. لذلك الله عز وجل لن يترك الناس بدون نور، هيبين لهم، وأما ثمود ربنا قال إيه؟ فهدينهم، الأول فعملوا إيه؟ فاستحبوا العمى على الهدى.

ربنا وضح لهم ونزل لهم رسول، يعني الله عز وجل يصبر الدعاة على أذى العصاة عشان النور يوصل لهم. ربنا يمد الدعاة بصبر، أحياناً الدعاة يشوفوا حاجات يبقوا عايزين يعني إيه يولعوا في اللي قدامهم، لكن بينزل عليهم صبر ومدد عشان إيه؟ عشان النور؛ لأن الله عز وجل أوجب على نفسه ذلك، هيوصلك الهدى هيوصلك، بعد كده أنت بقى تعرض ما تعرضش ده ده حسابك على الله. معايا؟

الحمد لله الذي خلق السماوات والأرض وجعل الظلمات والنور ثم، ثم دي بقى بيسموه حرف استبعاد، وبعد كل ده الذين كفروا بربهم يعدلون. يعني إيه يعدلون؟ يعني إيه؟ أحد عارف يعني إيه يعدلون؟ ثم الذين كفروا بربهم يعدلون. يعني إيه يعدلون؟ يساوون.

ده المعنى التاني. يبقى فيه معنيين في يعدلون: عدل عن الطريق يعني أعرض عنه، شاف طريق غيره؛ أو عدل به كذا ساوى به كذا. فالمعنى الأول: ثم الذين كفروا بربهم يعدلون، أي يعدلون معه غيره، إنهم عايزين يحطوا آلهة كلها واحدة، يعني فيه كذا إله، مش ما تقولش يعني أكثر كلمة إله أجعل الآلهة إلهاً واحداً؟ لا لا يمكن، أوعى تقول واحدة.

آه، يعني هم ما عندهمش مشكلة، يعني يقولك: يا سيدي، أنت ليه منشف دماغك؟ أنت ليه متعصب ومتشدد كده؟ آه، هو فيه إله، بس مش لازم يبقى إله واحد، ما تبقاش متشدد. هو هيفولك فيه آلهة كتير، هو دائماً بيبحث، تكلمنا في المعنى ده كتير قبل كده، بيبحث عن مخرج نفسي إنه ما يبقاش فيه إلزام.

أنت عارف لما تروح شغل مثلاً، وفيه قانون محطوط، فبصيت على قانون الشغل كده لقيته صعب عليك أوي، فقلت: مين اللي بيحاسب على القانون ده؟ هيقولك: المدير. فبتسأل: طب ما لوش معارف؟ طب ما فيش حد؟ ما أنت عايز تعرف: لو أنا دلوقتي ما أنا مش هعرف أطبق قانون، مين اللي لما أجي متأخر هـ إيه أظبط مع حد؟ مش هينفع، ما هو لو واحد بس، تخيل لو رحت للمدير عشان تظبط معاه لقيته ما فيش رشاوى، ولا فيه واسطة، ولا فيه أي حاجة، تخيل فيه شغل بالمنظر ده؟

ما فيش طبعاً، أنا عشان كده بقولك تخيل. عشان كده أنا بقولك تخيل: تخيل فيه مصلحة حكومية في الدنيا، مثلًا المرور مثلاً، عايز تطلع رخصة مثلاً، وطبعاً ده إيه تخيل يعني. مثلاً آه، وامتحانات وقصة وبتاع، عايز تطلع رخصة. فقالك: بص، فيه قواعد واختبارات صارمة، ولازم لا يمكن أن تحصل على رخصة قيادة إلا لما تعمل اللي مطلوب في الورق ده كله.

بصيت في الورق ده، أول ما تبص في الورق بتقول إيه؟ هو مين اللي مسؤول عن الموضوع ده؟ فبيقولولك: فلان. حد معاه رقم تليفونه؟ اتصلت بفلان لقيته يقولك: مستحيل، وما فيش، وما فيش. السؤال اللي بعده: مين يعرف فلان؟ ما عشان أنا خلاص قررت من الأول إن الورقة دي إيه؟ ما ليش دعوة بيها، الموضوع ده أدي الورقة أهو، أدي الورقة، هم بقى قرروا كده، أدي المصحف ده ما لناش دعوة بيه.

طيب، مين اللي هيحاسبنا؟ ربنا. طب فيه آلهة أخرى؟ لا. خلاص، هنعمل إيه؟ نعمل إحنا آلهة أخرى ونقول إنهم شفعاء، بس، نعمل اللي إحنا عايزينه، نروح نقعد على كرسي الاعتراف وخلاص، ما هو عشان كده طب خلاص ما عدتش تعمل كده تاني، يلا توكل على الله.

فهو بيفلفص، زي ما أنا بقولك كلنا بنعمل كده. أنت بتروح المرور بتسأل: هو مين؟ مفيش حد مخلصاتي؟ مفيش حد ياخد حاجة ويخلص الـ الـ الـ هو عايز عايز مثلاً أعمل كذا، ما ينفعش. طبعاً الـ كلمة ما ينفعش دي مفيش حاجة في مصر ما بتنفعش، الواسطة والفلوس مفيش حاجة، كل حاجة بتنفع وكل حاجة ما بتنفعش على حسب، يعني في حاجة بتبقى ما بتنفعش، في خطوات معينة كده بتعملها بتتحول من ما ينفعش إلى ينفع، وفي دلوقتي لحيتك دي ممكن تخلي كل حاجة.

تنفع ما تنفعش، يعني عادي كل حاجة ممكن قابلة إنها تتحول من كده. فالفلسفة ديت للبحث عن الآلهة الأخرى. وما ثم الذين كفروا بربهم يعدلون؟ مش مثلاً انبهروا بإله تاني بيخلق. قالك إيه ده؟ ده الإله بوذا ده بيخلق، ده إحنا لما السماء بتبقى مجدبة وهو بينزلنا المطر، ده هو بيخلق لنا الأنعام من العدم، ده هو بيوجد لنا الفاكهة من غير ماء ولا أرض. ده إحنا لما بنطلب، هما ده حصل؟ أمال بيعدلوا معاه غيره ليه؟ هي حيلة نفسية لتحقيق أغراض شهوانية. يبقى ثم الذين كفروا بربهم يعدلون؛ أي يبحثون عن حد يبقى معاه.

مش كده القرآن المكي استفاض في التوحيد، مش في إثباته. عشان كده بعض الناس يقولك القرآن ما خاطبش الملحدين أوي، وإن كان في بعض الآيات تصلح لخطابهم: ﴿وَمَا فَرَّطْنَا فِي الْكِتَابِ مِن شَيْءٍ﴾ [الأنعام: 38]. وأصلاً الملحدين دول مخالفين للفطرة، ده فطرته منتكسة، فهو ما اهتمش بيه إنه ما اهتمش معاه، إنسان مستهزئ، لكن جاءت ﴿وَمَا خَلَقْنَا السَّمَاوَاتِ وَالْأَرْضَ وَمَا بَيْنَهُمَا لَاعِبِينَ﴾ [الأنبياء: 16]، جاءت في أكثر من حاجة، ﴿وَقَالُوا مَا هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا يُهْلِكُنَا إِلَّا الدَّهْرُ﴾ [الجاثية: 24]، دول اللي قالوا عليهم الدهريين في سورة الجاثية، اللي حتى بيقولوا ما فيش ربنا، ده الزمن هو اللي متحكم، أيًا كان اللي هي الطبيعة فكرتهم يعني. أيًا كان، القرآن ركز قوي القرآن المكي على إيه؟ مش بس على وجود الله، على إيه؟ على توحيد الله؛ إنه إله واحد، مش على إن ربنا إن في إله، لأ، القرآن تجاوز النقطة ديت إلى إنه واحد. معايا؟

وخد بالك من الكلمة اللي تحس فيها بخسية الكفار: ﴿ثُمَّ الَّذِينَ كَفَرُوا بِرَبِّهِمْ يَعْدِلُونَ﴾ [الأنعام: 1]. بربهم، باللي رباكم بالنعم، باللي خلقكم من عدم، باللي بيطعمك ويسقيك، تعمل كده مع ربك؟ طب إزاي؟ ثم الذين كفروا بربهم، طب عيش في أرض غير أرضه، وكل من طعام غير طعامه، ومن رزق غير رزقه، وتحت سماء غير سمائه، وبعدين يبقى اكفر. ﴿ثُمَّ الَّذِينَ كَفَرُوا بِرَبِّهِمْ يَعْدِلُونَ﴾، ده وهو كافر لما بيقع في مشكلة بيقول يا رب، إيه الجرم والقبح ده والإجرام ده؟ ﴿ثُمَّ الَّذِينَ كَفَرُوا بِرَبِّهِمْ يَعْدِلُونَ﴾، هو الذي خلق السماوات والأرض، والذي يستحق الحمد سبحانه وتعالى، هو الذي خلقكم، ثاني صفة الإيه؟ بس الانتقال بقى من خلق السماوات والأرض لخلقك أنت.

﴿هُوَ الَّذِي خَلَقَكُم مِّن طِينٍ﴾ [الأنعام: 2]. يا لبعد الفجوة بين الطين، أنا عايزك تمسك كده طين، حط شوية طين في إيدك كده، فين القلب في الطين ده؟ وفين الكلية؟ وفين المعدة؟ بل فين المشاعر؟ فين الخوف؟ فين البكاء؟ فين الضحك؟ فين الفرح؟ فين الطموح؟ فين العقل؟ فين التخطيط؟ فين الآمال؟ فين ده في الطين؟ إزاي طين؟ يعني لو عملت من طين تمثال ماشي، إنما تصنع من طين كائن حي ينمو ويشعر ويفكر ويتمنى، إزاي؟ إزاي دي؟ يعني البشر عرفوا يعملوا من الحديد اللي ما جابوهوش من العدم، جابوه من خلق ربنا، عرفوا يعملوا منه إنسان آلي، لكن لا يفك، ولا يشعر بفاقة بداخله، ولا يتعبد، ولا يأمل، ولا يتمنى، ولا يخطط ولا يدبر، ما عندوش مشاعر، ولا ينمو، ده مش خلق، واللي بيضحك على الناس ده خلق؟ ده هو بيشتغل نفسه وبيشتغل الناس. واللي يجيب الدي إن إيه ويعمل له الاستنساخ ويقولك أنا كده خلقت، ده وهم، اخلق من العدم.

﴿ثُمَّ قَضَىٰ أَجَلًا﴾ [الأنعام: 2]. يعني الله عز وجل قضى أجل هتموت فيه قطعاً، والموت برضه من الحاجات اللي تضغط بيها على نفسية اللي قدامك، حاجة ما بيقدرش ينكرها وحاجة مهما بلغ من العلم لن يفر منها، مش ممكن، أنا مش متخيل. يعني أمال المشرك بيرد يقول إيه؟ لما بتقول الله خلق السماوات والأرض وأنت مثلاً إلهك ما يخلقش السماوات والأرض، وتقوله أنت هتموت والله العظيم هتموت، والله مهما بلغت من العلم لن تكتشفوا سر الحياة، والله، وهتفضلوا تموتوا، وإن الموت الذي تفرون منه بأبحاثكم وبعلمكم والله لن تفروا منه فإنه ملاقيكم، هو بيحس بإيه؟ يعني بيرد يقول إيه؟ المفروض الواحد يحس، هو هيموت هيموت، وشايف الموت قدام عينيه ومش قادر يتصرف، فالمشركين هربوا من القصة دي قالك بص بقى ﴿إِنْ هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا يُهْلِكُنَا إِلَّا الدَّهْرُ﴾ [الجاثية: 24]، خلاص ماشي هنموت أو كل حاجة بس ما فيش بعث، فقالوا لأ، ﴿وَأَجَلٌ مُّسَمًّى عِندَهُ﴾ [الأنعام: 2]، لأ ده في بعث، في بعث جاي وأجل مسمى عنده ده البعث اللي هييجي.

نرجع تاني لإيه؟ ثم ﴿وَأَجَلٌ مُّسَمًّى عِندَهُ﴾، هتموت غصباً عنك وهتبعث غصباً، والله لتبعثن، والله. إنت إيه؟ يعني مش ممكن يا جماعة فعلاً بحس القرآن قوة في الطرح حصار نفسي للي قدامك. بتقولها له هو بقى حر، زي مثلاً واحد بيقولك ما فيش امتحان، والله في امتحان، والله لو فضلت كده هتسقط، والله لو سقطت هتتبهدل، إنت بتعامله على إن الأمر منطقي موضوع خلاص قطعي. طب ليه بس ما فيش امتحان؟ طب اسمع طب لأ، مبتعملش معاك كده، طب تتجاوز هذه الخلافات، ﴿ثُمَّ أَنتُمْ تَمْتَرُونَ﴾ [الأنعام: 2]. ثم دي برضه استبعاد، يعني إنت هتموت وتبعث، شوف لما جه البعث جه تمترون، أخطر نقطة بيهرب منها الناس كلها قضية البعث دي، أصل بعث يعني إيه؟ يعني حساب، حساب يعني إيه؟ يعني جنة ونار، جنة ونار يعني إيه؟ يعني قوانين أنا هلتزم بيها، قوانين هلتزم بيها يعني مش هعيش زي ما أنا عايز، يعني شهوات هسيبها؟ لأ، الدايرة دي بدأت من كلمة بعث، ألغي البعث.

مشركين دايماً بنقول المشركين غير اليهود والنصارى، المشركين ما بيعرفوش يلفوا ويدوروا، يعني هو العرب بيدخل وش في وشه، النبي صلى الله عليه وسلم لهم وحي، أنتم هتتحاسبوا على الوحي ده، ﴿كُلُّ أُمَّتِي تُدْعَىٰ إِلَىٰ كِتَابِهَا﴾، هتتحاسبوا إمتى؟ لما هتموتوا، لما نموت وبعدين إيه اللي هيحصل؟ هتبعثوا في بعث، قالوا مافيش بعث، جابوا الموضوع من مافيش بعث. اليهود والنصارى هم بتوع دين، اسمهم أهل كتاب، ما ينفعش يقول الكلمة دي، في بعث؟ أه في بعث، في جنة ونار؟ في جنة ونار، في كتاب هتتحاسبوا عليه؟ طبعاً، أمال إيه اللي بتعملوه دوت؟ لأ ما أصل أنت ما أنتش فاهم، يعمل إيه بقى؟ يحرف النصوص، يؤول في النصوص، يقول لك أصل مقاصد الشريعة ويقعد يلعب بالبتاع، أصل الحاجات دي كانت أيام النبي صلى الله عليه وسلم مش أيامنا، يقعد دول بقى اللي بيسيروا، في ناس ماشية ورا المشركين ملحدين ومافيش بعث وداخل وش في وش، وفي ناس ماشية ورا أهل الكتاب، هتلاقيهم من جلدتنا يعني، يقول لك لأ مقاصد الشريعة، وآيات الشريعة كلها في القرآن كام آية يعني؟ 200 آية، وال200 آية دول كانت مناسبة، وربنا قال مش مهم تنفيذ الشريعة دي بذاتها، المهم تحقيق مقاصد، والمقاصد دي شوفوا اللي أنتم عايزينه واعملوه. ولما هو الدين شوفوا اللي أنتم عايزينه، أمال الجنة والنار لازمتهم إيه يعني؟ لما هو الموضوع كده؟ ﴿وَأَنتُمُ الْأَعْلَوْنَ﴾، مش فاهم، أمال مين اللي هيخش النار؟ يعني هو دايماً يخش النار الوحش، مين الوحش؟ ما تقولش على حد كافر، أومال مين النار معمولة لمين؟ يعني إبليس هيخش النار لوحده؟ ده ناقص كمان يقولك إبليس مش هيخش النار.

المهم ﴿ثُمَّ أَنتُمْ تَمْتَرُونَ﴾، أول ما تيجي البعث يقعد يلف ويدور، ﴿وَهُوَ اللَّهُ فِي السَّمَاوَاتِ وَفِي الْأَرْضِ﴾ [الأنعام: 3]، قيل هنا الله بمعنى المعبود، الإله يعني له الألوهية. يبقى الربوبية دائمًا يا جماعة تستلزم الألوهية، يعني إيه الربوبية تستلزم الألوهية؟ عشان برضه الكلام ما يبقاش مصطلحات مش مفهومة، يعني زي ما ربنا قال، له الخلق يبقى لازم يأمر، ﴿أَلَا لَهُ الْخَلْقُ وَالْأَمْرُ﴾ [الأعراف: 54]. يبقى هو الذي خلق يبقى هو الذي يضع الأوامر والنواهي سبحانه وتعالى، يفعل ما يشاء في ملكه، ويحاسبك على ده، ويحاسبك حساب تفصيلي. ﴿يَعْلَمُ سِرَّكُمْ وَجَهْرَكُمْ وَيَعْلَمُ مَا تَكْسِبُونَ﴾ [الأنعام: 3]، هيحاسبك حساب تفصيلي على كل أعمالك، إنه يعلم السر ويعلم الجهر، ويعلم مدى تأثير الآيات دي عليك، ويعلم ما تكسبون بصيغة المضارع، كل خطوة في حياتك الله عز وجل يعلمها.

يبقى تاني يا جماعة، ثلاث آيات بدأت بيهم السورة قبل ما ربنا يبدأ يكلمنا عن المشركين، الله عز وجل الخالق، خالق السماوات والأرض، الله عز وجل اللي خلق السماوات والأرض جعل الظلمات والنور، دي الآية الأولانية. الآية الثانية الله عز وجل خلقكم أنتم وستموتون حتمًا في ميعاد لا يعلمه إلا الله، ثم تبعثون في ميعاد لا يعلمه إلا الله. بما إنه خلق السماوات والأرض، وبما إنه خلقكم وهتموتوا يبقى هتتحاسبوا، طب هيحاسبك على إيه؟ على ما يعلمه منك، سرك وجهرك، هتحاسب على كل شيء، على النقير والقطمير، ويعلم ما تكسبون، خلاص؟ آيات واضحة تأصيل واضح لبداية سورة الأنعام.

مقدمة، ماذا فعل المشركون تجاه هذه الآيات؟ عملوا إيه؟ ربنا بيقول لك ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ﴾ [الأنعام: 4]. هتجد طول ما إحنا ماشيين مع بعض في سورة الأنعام كمية طلب للمشركين، عايزين آية، ورينا آية. يعني دلوقتي النبي صلى الله عليه وسلم، أنا عايزك تتخيل إن الهادي دائمًا سياق واحد، نقطة مهمة يا جماعة، فهم الآية لوحده ممكن يبقى فهم ناقص أو تأخذه وسط السياق بيكتسب معانيه، دائمًا حط الآية في سياقها. تخيل كده النبي صلى الله عليه وسلم قرأ عليهم الثلاث آيات الأولانيين، في إله واحد له الحمد سبحانه وتعالى، هذا الإله خلق وهذا الإله جعل الظلمات والنور، هذا الإله خلقكم من طين، هذا الإله قضى أجل وأجل تبعثوا فيه، ويعلم، قالوا له إيه؟ إحنا مش مصدقينك، هات لنا آية. مش أنت بتقول جعل الظلمات والنور؟ هات لنا آية. نزلت عليهم الآيات، الآيات القرآن مرارًا وتكرارًا، سواء آية القرآن أو الآيات اللي في القرآن اللي بتشير للكون، أو بتشير لأحداث زي ما عندنا في الأنعام، فربنا بيقول أثناء تلاوة هذه الآيات: ﴿وَمَا تَأْتِيهِم مِّنْ آيَةٍ مِّنْ آيَاتِ رَبِّهِمْ إِلَّا كَانُوا عَنْهَا مُعْرِضِينَ﴾، ربهم ثاني هنا اللي أعلم بمصالحهم، وأعلم بهم لأنه هو الذي خلقهم ويربيهم. وما تأتيهم من خد بالك من كلمة وما إيه؟ بتجيلهم لغاية عندهم ﴿وَلَقَدْ وَصَّلْنَا لَهُمُ الْقَوْلَ﴾ [القصص: 51]. وما تأتيهم من آية من آيات ربهم إلا أعرضوا عنها، صح؟ إلا كانوا عنها معرضين، يعني إيه كانوا عنها معرضين؟ مش كانوا عنها يعرضون، كانوا عنها معرضين، قمة الثبات في الإعراض، كانوا دي بتفيد إن أصبح من كينونته من تركيبته إنه بقى إنسان معرض.

طيب شوف بقى معايا، ركزوا معايا، هم عملوا الآيات جت ثلاث آيات، هم عملوا ثلاث حاجات: رقم واحد الإعراض التام، يعني كل ما تيجي تكلمه ما بيسمعكش، له طب اسمع، أقرأ عليك آيات، طب اسمع، ادي لنفسك فرصة تسمع، رقم واحد الإعراض، رقم اثنين فقد كذبوا بالحق لما جاءهم، رقم اثنين التكذيب، رقم ثلاثة فسوف يأتيهم أنباء ما كانوا به يستهزئون، يبقى رقم ثلاثة الاستهزاء، يبقى دي المراحل الثلاثة اللي بيمر بها المشركون: إعراض، ثم تكذيب، ثم استهزاء.

تيجي تكلم حد في الشريعة كإسقاط في واقع، لو مش ما عندوش استعداد يسمع، لو ما آمنش بالثلاث آيات الأولانيين، لو ما آمنش إن فيه إله وهذا الإله هو الذي خلق وفيه ظلمات ونور يعني فيه كفريات وفيه طريق منقذ واحد، هو إيه اللي يخلي إنسان يحس بالقلق؟ إنه يعرف إن فيه ضلال. هو فيه مشكلة فيا ولا فيكم؟ أصل أنا حاسس إن أنتم مركزين جدًا، إيه اللي يخلي إنسان قاعد قلقان؟ يعني أنت تبقى قاعد قلقان ليه يعني؟ ده أنت ماشي زي الفل أهوت، قلقان وليه ما أنت ماشي كويس والحمد ما بتعملش حاجة وحشة، لا بتأذي حد ولا بتزعل حد ولا بتعمل فاحشة ولا بتصلي ولا بتصوم ما إيه يعني ما بتعملش حاجة، ما بتأذيش حد أنت إنسان كويس يعني، إيه اللي يخليك حاسس بقلق؟ ربنا قال لك في أول سورة الفاتحة وأنت بتقرأها ربنا عرفك أنت ليه تبقى قلقان في الهداية؟ قلقان ليه وأنت بتطلب الهداية؟ ﴿اهْدِنَا الصِّرَاطَ الْمُسْتَقِيمَ * صِرَاطَ الَّذِينَ أَنْعَمْتَ عَلَيْهِمْ﴾ [الفاتحة: 6-7]، في ناس غضب عليهم وفي ناس ضلت، ما أنت احتمال تبقى في دول. أنت وأنت.

بتطلب الهداية بتقول يا رب أنا مرعوب، الهداية طريق محفوف بالمخاطر، زي الصراط كده اللي بتعدي على جهنم. ما تعتقدش إن الهداية اختار بس أي حاجة وشوف اللي أنتم عايزينه واعملوه، لا، زي ما بيصوروا لنا الدين إن الدين مقاصد والدين أهم حاجة تبقوا كويسين مع بعض، لا، الدين طريق وسط محفوف بالمخاطر، أنت بتقول اهدنا الصراط المستقيم. في ناس وصلت والموضوع مش مستحيل بفضل ربنا، صراط الذين أنعمت عليهم، مش صراط الذين سلكوا، يا رب أنا مرعوب أبقى معدول غير المغضوب عليهم ولا الضالين.

المعرض هو مش مؤمن بالثلاث آيات الأوليين دول، مش مؤمن إن في ظلمات وإن في نور وإن في موت بعده حساب وإن في أجل مسمى وإن في خفايا الصدور مكتوبة ومعلومة. فلذلك دائماً بنكرر المعنى ده في القرآن، الدخول في إلزام الناس بالتشريعات قبل إيمانهم بهذه الآيات بيبقى ضرب من الجدال والمراء اللي مالوش أي قيمة، زي ما كنا بنشوف كده البرامج اللي بتناقش أمور في الشريعة بنقاش بارد، خطر.

يبقى رقم واحد الإعراض التام، ويزع الله بالسلطان ما لا يزع بالقرآن، يزع يعني يحصل تغيير، يعني ممكن أحياناً نضع قوانين طالما الناس لازم يبقى لك سلطان وقوة، لما يبقى لك سلطان تطبق، مش لازم الناس تقتنع بالزكاة لو أنت مكنت، أنت ممكن تعمل اللي بيروح يجبى الزكاة ويعاقب، في ضوابط في الشريعة لمعاقبة مانع الزكاة، إنه يؤخذ منه مالاً أكثر، في طرق معينة على خلاف في تفسير بعض الحديث. طبعاً أمال الحدود؟ ما هي الحدود دي ضوابط وعقاب للي مش هيسمع الكلام، يبقى رقم واحد الإعراض.

خذ بالك من كلمة ﴿إِلَّا كَانُوا عَنْهَا مُعْرِضِينَ﴾ فإيه؟ فقد كذبوا بالحق، لما جاؤوا، أجمل مقولات في الفاء ديت رشيد رضا بيقول الفاء دي فاء سببية، أي فتسبب عن إعراضهم أنهم كذبوا، فبيقول لك أكبر سبب للتكذيب بالحق هو الإعراض، يعني إن أنت ما تسمعش، قالوا ﴿لَوْ كُنَّا نَسْمَعُ أَوْ نَعْقِلُ﴾، هو عمره ما يعقل إلا ما يسمع الأول، مشكلة فعلاً.

لذلك ربنا بيقول ﴿وَمَنْ أَظْلَمُ مِمَّن ذُكِّرَ بِآيَاتِ رَبِّهِ فَأَعْرَضَ عَنْهَا﴾، الفاء دي بتاعة سورة الكهف، بتاعة سورة الفتن اللي فيها الدجال وفيها المغريات ﴿إِنَّا جَعَلْنَا مَا عَلَى الْأَرْضِ زِينَةً لَّهَا﴾، جت معاها الفاء، إنه مش هيسمعك أصلاً، ﴿وَمَنْ أَظْلَمُ مِمَّن ذُكِّرَ بِآيَاتِ رَبِّهِ فَأَعْرَضَ عَنْهَا﴾، ثم أعرض عنها في السجدة، أي بعد ما عقل ورأى الآيات أصر على الإعراض، فهنا الفاء دي فاء سببية، يعني تسبب عن الإعراض قطعاً هيتسبب أي حاجة.

أنا في مرة بتكلم مع أحد الإخوة في مسألة خصوصاً في الوسط السلفي، هي مستقرة إن ده الحق الأوحد عنده، فبيناقشني في المسألة وبيتكلم إن هي قول واحد، قلت له على فكرة الأئمة فيها ثلاثة من الأئمة يعني، الجمهور عكس القول اللي أنت بتقوله، قال لي أنت أدب، شاور لي، أنا اتخضيت، شاور لي فين، يعني أنا ولا أنا عشان نقلت ولا اللي كتب الكتاب ولا الـ.. هو مش عايز يسمع، ماشي ممكن يكون الراجح الدليل، حقك إنك تعتقد هذا القول، عايز تنكر كمان بأسلوبك وعايز توصل أيًا كان مش عايز، إنما اسمع، اسمع. فهو هنا مش عايز يسمع، إحنا مش عايز يسمع ليه؟ الدنيا متقفلة مترتبة متستفة عنده، في آلهة مظبطينها في حاجات معينة بتجيب لهم فلوس بيعملوا الشهوات وبعدين يروحوا للآلهة وشفعاء عند ربنا، أنت جاي لي المنظومة دي كلها؟ لا مش هيهدها.

عشان كده تقول له مثلاً تخيل تروح لواحد نصراني، خلاص هي حياته كلها منظومة معينة، فتقول له طيب أنا هكلمك عن الإسلام، لا، أو شيعي مثلاً يكلمك عن الإسلام، أي حد بتقول له هكلمك عشان ممكن هو فاهم، فاهم إن الكلام ده لو سمح له وطلع صح احتمالية إنه يطلع صح معناه إنه هيحصل تغيير في حياته وهيحصل تغيير، فهو لو مش عايز يغير لا مش عايز أسمع. ما هو طبعاً فيه حق، ما هو ما إحنا بنقول بقى طب ما هو الحق ده أنت جبته منين؟ من القرآن والسنة، طيب ما أنت بتقول له وريني الحق بتاعك، أنا ما قلتلكش حاجة، أنا الحق معايا أهو. يعني لو جه قال لي إشمعنى أنت؟ أقول له لا تعال أعرفك، لازم، أمال إيه يعني؟ أنا هقول له تعال أعرفك، ربنا سبحانه وتعالى قال ﴿وَمِنْهُمْ أُمِّيُّونَ لَا يَعْلَمُونَ الْكِتَابَ إِلَّا أَمَانِيَّ﴾، قبل ما الكتاب تحول عندهم لأماني، قال إنهم الأول أميون، أميون يعني إيه؟ مش معناها بس ما بيعرفش يقرأ ويكتب، أميون يعني ما بيعرفش حاجة في الدين، مش كده؟ دلوقتي اللي ممكن يبقى مسلم ويتنصر، هو أصلاً ما كانش يعرف حاجة في الدين، هو أمي في الدين.

أغلب اللي بيستخف به، هو بيستخف به إنه هو جاهل، لذلك عندنا على مدار التاريخ لا تجد في الأغلب يعني، أغلب اللي بينتقل من النصرانية واليهودية والبوذية إلى الإسلام علماء مفكرون وعلماء في دينهم، على العكس أغلب اللي بينتقل من الإسلام لغير ذلك تجد من الرعاع، تجد الأميين في الدين، تجد إن ده درس وقرأ، ولما بينقل بيجيب بيروح لهم يقولهم أناظركم، المسلم لما بينقل ما بيقولهمش كده، ما بيقولهمش أناظركم، أه سيبني وما لكش دعوة أو يرمي شوية شبهات من بعيد عن النت وخلاص، التاني يقولهم لا ده أنا أروح للقساوسة أناظرهم، أنا عارف الـ... أو تلاقي الشيعة مثلاً يكتب يوم كاتب لهم ويوم قاتلينه.

فأنت لازم تسمع، يبقى رقم واحد الإعراض، الإعراض يؤدي طب ما أنا كده ما سمعتش طب ما أنا شكلي وحش، يبقى رقم اثنين هكذبك، رقم ثلاثة هعمل فيك إيه بقى؟ هستهزئ، خد بالك من ترتيب الآيات، ربنا بيقول إيه؟ ﴿فَقَدْ كَذَّبُوا بِالْحَقِّ لَمَّا جَاءَهُمْ﴾ كان متوقع الآية تقول فسوف يأتيهم أنباء ما كانوا به يكذبون، قال ﴿يَسْتَهْزِئُونَ﴾ لأن دي الخطوة الحتمية الثالثة اللي بتحصل، إيه الخطوة الحتمية الثالثة اللي بتحصل؟ إن أنا مش قادر أناظرك، أنا أصلاً معرض ومكذب بدون ما أفهم التفاصيل، فأنا بلجأ لأسلوب الاستهزاء.

إعرف دائماً إن اللي بيلجأ لأسلوب الاستهزاء في الغالب ده فيه كذا مشكلة، المشكلة الأولانية إنه وصل للمرحلة الأخيرة في البعد، إنه بعد قوي، إنه أعرض وبعدين كذب وبعدين استهزأ، قلما بل يستحيل يجتمع في إنسان جاد باحث عن الحق وإنسان مستهزئ، ما يجتمعوش مع بعض. يعني لو إحنا بنتعامل واحد حاسس الموضوع خطر جنة ونار هداية وضلال نور وظلمات، بيتعامل بالعقلية دي وبالنفسية دي، لا يمكن يبقى مستهزئ، أصل مش ممكن إحنا قاعدين مثلاً بنقوله إيه إحنا هنكتشف تعال نكشف سر قنبلة نووية أو عملية جراحية خطيرة، وتلاقيه عمال يتعامل مع الموضوع باستهزاء، لا، يبقى أنت مش مقدر قيمة الموضوع، اللي وصل للاستهزاء خرج من الجدية اللي بتؤدي إلى اليقين. معايا؟ الوصول لليقين عايز جد مش استهزاء، عايز خوف من ربنا سبحانه وتعالى، أهم حاجة المتقي، وأنذر به في السورة هنا لأنهم عمالين يجادلوا، عمالين يجادلوا، عمالين يجادلوا، فربنا قال له سيبهم وأنذر به الذين يخافون أن يحشروا إلى ربهم.

اللي خايف إنه يحشر، هو ده اللي هيوصل للحق، إنما اللي بيتعامل قول لي كده عندكوا إيه؟ وريني كده الإسلام عندكوا إيه؟ لا، قول لي كده أنت عندكوا إيه في الدين؟ فتلاقيه طالما بيتعامل هذا التعامل عمره ما هيوصل، الكل اللي بحث بجد ولف تلاقي قصص كتير وصل للإسلام، الخايف المرعوب، يعني الحريص، يوفق، من زمان زي سيدنا سلمان الفارسي، يلف الأرض عشان يوصل، وربنا يوصله.

فسوف يأتيهم أنباء ما كانوا به يستهزئون، قالوا حاجتين، سوف يتم هم كانوا بيستهزئوا بالبعث وبالحساب هيشوفوه حتمًا، ودي أحد معاني قول الله عز وجل هذا في سورة ياسين هذا ما وعد الرحمن، لو قالوا إن كلمة وصدق المرسلون دي بعض المفسرين قالوا دي من قول المبعوثين مش من قول الملائكة، فمعناها إيه وصدق المرسلون؟ قال آه صدق المرسلون، ده الكلام اللي بيقولوه لنا طلع بجد، طلع الكلام اللي بيتقال لنا في المساجد ده مش كلام تخويف، لما طلعش تشدد ولا اشتغالات والكلام ده طلع بجد، عشان كده أنت بيتقال لهم يوم القيامة كده، هل وجدتم ما وعد ربكم حقًا؟ الكلام طلع بجد ولا هزار؟ إحنا وجدنا ما وعدنا ربنا حقًا، إحنا من الأول متأكدين ولقيناه، لقينا الجنة ولقينا اللي ربنا قاله، طب أنتم لقيتوا اللي قالوا نعم، فأذن مؤذن بينهم أن لعنة الله على الظالمين.

يبقى هنا نقطة مهمة لأ تاني قبل ما نرجع للاستهزاء، قلنا أنباء حاجة من الاثنين البعث أو عقاب ذلك في الدنيا، أنباء ما كانوا به يستهزئون أي عاقبة استهزائهم ستحدث في الدنيا، زي بقى يوم بدر البطشة الكبرى أو سنين كسنين يوسف أو أو أي عذاب دنيوي. فقد كذبوا بالحق لما جاءهم فسوف يتم ما كانوا يزدرون، النقطة يا جماعة اللي عايزين نتكلم فيها فعلاً أما تجد اللي قدامك بيوصل إلى مرحلة الاستهزاء، اسكت، اعرض عنه، فبما كانوا به يستهزئون فعلاً الاستهزاء زي ما نقول لا تستقيم نفسية إنسان مستهزئ وفي نفس الوقت يكون جاد وباحث عن الحقيقة مش هينفع، ده مش إنسان جاد، أنت بتكلم في أمر جاد، ﴿وَمَا خَلَقْنَا السَّمَاوَاتِ وَالْأَرْضَ وَمَا بَيْنَهُمَا لَاعِبِينَ﴾، الأمر مش لعب.

طيب فربنا بعد كده بيقول إيه؟ ﴿أَلَمْ يَرَوْا﴾ وأنتم دلوقتي معرضين عن كل الآيات، طيب أنا أقولكم على حاجة، ألم يروا، وهنا ربنا لهم آية بصرية يشوفها، وكذب بآيات القرآن وما تأتيهم من آية من آيات ربهم قيل آيات القرآن إلا كانوا عنها معرضين فقد كذبوا بالحق أي فتسبب عن إعراضهم عن القرآن تكذيبهم بالحق، تاني أنا برضه يهمني فهم مش بس المعاني الإيمانية والتربوية، فهم ألفاظ الآيات زي ما قلنا نمشي مع ألفاظ الآيات، وما تأتيهم من آية من آيات القرآن إلا أعرضوا عنها فتسبب عن إعراضهم للقرآن تكذيبهم بدين الله عز وجل وهو الحق، خلاص، ثم ازدادوا كفراً واستهزأوا بدين الله عز وجل فسوف يأتيهم عاقبة هذا الاستهزاء أو فسوف يروا هذه الحقائق في الآخرة، أقول اثنين تمشي كده.

اتنقل بقى هنا النقلة إن أنا بكلمه عن آية بصرية قدامه لا ينكرها، ألم يروا كم أهلكنا قبلهم من قرن مكناهم في الأرض ما لم نمكن لكم؟ وأرسلنا السماء عليهم مدراراً، وجعلنا الأنهار تجري من تحتهم، هم عارفين زي ما كان بيقرأ في آية العشاء وتمرون عليها، وإنكم لتمرون عليهم مصبحين وبالليل أفلا تعقلون؟ أنت بتعدي عليهم رايح جاي، بتعدي على مواطن الإهلاك للظالمين، أنت لما بتيجي تسأل قريش يعني.

مثلًا لما أجي أقول لك إيه؟ يا أخي ده أنت بتروح تزور الهرم والفراعنة، ده أنت بتشوف آثار المجرمين. أنت المفروض تتعظ؛ دول لطالما مكن لهم في الأرض ثم أهلكهم الله. لما تشوف جثة فرعون التي ربنا أنقذها وتشوفها، ده أنت المفروض تتعظ. ممكن واحد يقول لك: لا، لا، لا، ده مات في حادثة مثلًا، أو كان نازل يجيب سحور بسرعة فخبط في أي حاجة مثلًا.

إنما دول عارفين إن ربنا أهلكهم، قوم لوط كانوا معترفين بده، وقوم ثمود كانوا معترفين، وبعدوا عليهم وعارفين إن في ناس كان في قوم هنا عارفين هذه الأنباء، لدرجة لما النبي صلى الله عليه وسلم كان بيقول القصص دي في القرآن، يقولون: آه، ده القصص دي أنت واخدها أساطير، ده أنت جايبها من ناس، ما إحنا عارفين القصص دي. يعني هم عارفينها، طب أنت عارف وبتعدي عليه؟

زي ما النبي صلى الله عليه وسلم بيقول: «إذا مررتم بديار المعذبين، فمروا بـ لا تمروا إلا باكين أن يصيبكم ما أصابهم» من حديث البخاري. لكن النبي صلى الله عليه وسلم كان يعدي على منازل قوم صالح في غزوة أظن تبوك، فقنع رأسه ثم أسرع. ولما بعض الصحابة سقى بالماء الذي هناك، قال لهم: «ارموا الأكل أو أطعموه الدواب، ما تأكلوش منه». فالتعامل لازم يبقى حذر مع الآيات، هما بيبقوا عارفين، لأن هي جنبهم هما عارفين ده. فربنا جاب لهم آية بصرية شايفينها، وربنا بيورينا الآيات، لكن المشكلة الآيات للأسف ﴿وَمَا نُرِيهِم مِّنْ آيَةٍ إِلَّا هِيَ أَكْبَرُ مِنْ أُخْتِهَا﴾ [الزخرف: 48].

الآيات بتبقى واضحة؛ الكسوف ما هو لسه موجود أهو، المفروض دي حاجة تخوف الإنسان، الإعصار المفروض هذه الآيات تخوف الإنسان، لكن ﴿وَمَا تَزِيدُهُمْ إِلَّا نُفُورًا﴾ [الإسراء: 41].

أيوه، ما هو النبي صلى الله عليه وسلم لما كان يحصل الكسوف أو الخسوف، ويدخل ويخرج ويدخل ويخرج ويخاف، وتأتي السيدة عائشة تقول له: أعرف الخوف في وجهك، ويقوم يصلي أطول صلاة. مش كان ممكن ربنا يقول له: ما تخافش، ده أصل الأرض بتيجي ما بين الشمس والقمر، وأنت خايف ليه؟ ده دي ظاهرة فلكية بتحصل وممكن تحصل، ده حاجة جميلة اطلعوا اتفرجوا عليها؟ هو مش ربنا كان ممكن يقول له؟ مش ده رسول الله؟ يا إما أنت مكذب بقضية الرسالة والوحي، يعني دي قصة تانية نبدأ لها من نقطة قبل كده شوية، لكن أنا أنت بتقول أنا موافق على ده، فالموضوع أيوه تخاف، تخاف أن تأتي بالعذاب.

المشكلة يا جماعة في إيه؟ هو ربنا بيقول لهم ﴿أَلَمْ يَرَوْا كَمْ أَهْلَكْنَا مِن قَبْلِهِم مِّن قَرْنٍ﴾ [الأنعام: 6]. هنا ربنا جاب لهم المثال اللي بيتكرر دائماً كثير في القرآن، أن التمكين اللي كان عندكم ده، اللي كان قبلكم كانوا ممكنين أكثر منكم. المشكلة إن كل قرن بييجي، كل زمان بييجي هو معتقد إن أنا أكثر تمكيناً، فأنا شايف، عارفين إزاي بالظبط فكرة اللي كنت قلتها لكم ﴿وَتَنْحِتُونَ مِنَ الْجِبَالِ بُيُوتًا﴾ في سورة الحجر على قوم ثمود، قوم ثمود اللي جم بعد قوم عاد، فقال ﴿وَتَنْحِتُونَ مِنَ الْجِبَالِ بُيُوتًا آمِنِينَ﴾. هما بينحتوا من الجبال بيوتاً آمنين من إيه؟ فقالوا في التفسير قيل: آمنين من نوائب الدهر. إيه نوائب الدهر اللي خايفين منها؟ عاد أهلكوا بريح، فقال لك: إحنا هنبني البيوت جوه الجبال، فالريح تيجي ما تعملش حاجة، فتنحتون من الجبال بيوتاً آمنة من نوائب الدهر.

قال لك: آه، القذافي باللي ضربوه بالاتحاد الأوروبي، أنا بشار بقى أنا بقى أرتب أنا مع الاتحاد الأوروبي عشان.. هو معتقد إن هي لازم تيجي هي، معتقد إن البلاء ييجي فأنا أحترز من.. لما تمطر أعمل سقف مثلاً. فربنا بيقول: ﴿فَأَتَاهُمُ اللَّهُ مِنْ حَيْثُ لَمْ يَحْتَسِبُوا﴾ [الحشر: 2]. هي دائماً بتيجي لك، ممكن تيجي لك ببعوضة. يأجوج ومأجوج اللي بيبقوا في آخر الزمان، سيدنا عيسى ربنا هيمكن له إنه يقتل الدجال، أكبر فتنة في الأرض فتنة الدجال. ربنا هيمكن لعيسى إنه يقتل الدجال، فالدجال أول لما يرى عيسى يذوب كما يذوب الملح في الماء، ويطلع يجري، فعيسى يقول له: إن لي فيك ضربة لن تخطئك، هجيبك هجيبك، أمر قدري محتوم، فيدركه عند باب اللد الشرقي فيموته.

المهم، يوم ربنا يقول لسيدنا عيسى: إن لي عباداً لا يدان لأحد بقتالهم، فحرز عبادي إلى الطور، حديث صحيح مسلم. يعني في بقى عباد، مش الحل إنك أنت تواجههم، مش هتعرف، مش هتعرف، خذهم وروح الطور في سيناء، فيحرز عبادي إلى الطور، فيلجأون إلى الله، فيرسل الله عليهم النغف. يعني قصة يأجوج ومأجوج خلصت بالنغف؟ وفرعون بضربة عصا؟ يعني كل سنة وأنتم طيبين، إحنا في عاشوراء بقى، هلاك الظالمين قد يأتي بضربة عصا.

يعني أحياناً إحنا نقعد معتقدين، زي بالضبط كده، هو ربنا دائمًا قال لنا المعنى اللي بيحسوه، زي ما هم مكنهم قال إيه ﴿وَظَنُّوا مَا هُم بِمُعْجِزِينَ﴾، إحنا كمان بنقول مستحيل يقع. يقع إزاي؟ ده مظبط مع روسيا، وأمريكا مظبطة مع روسيا، وإيران مظبطة مع أمريكا، وهم شوية مستضعفين في سوريا، أنت تقول مستحيل. ﴿وَظَنُّوا أَنَّهُم مَّانِعَتُهُمْ حُصُونُهُم مِّنَ اللَّهِ﴾، مش من المؤمنين، وظنوا أنهم مانعتهم حصونهم من الله، فآتاهم الله من حيث لم يحتسبوا، وقذف في قلوبهم الرعب، وأنت هتعمل إيه في الرعب بقى؟ هتعمل فيه إيه بقى؟ هتتحصن بيه إزاي؟ أنت بشر، قلبك بيد الله سبحانه.

فهي هنا مشكلة إن دائمًا اللي بيمكن في حاجة، أول كلمة بيقولها ﴿مَا أَظُنُّ أَن تَبِيدَ هَذِهِ أَبَدًا﴾. يعني تقول له طب ما اللي فات باد، يقول لك آه ما أنا عارف، أصل اللي فات ما كانش مظبط. ﴿مَا أَظُنُّ أَن تَبِيدَ هَذِهِ أَبَدًا﴾، لا، ده دي بقى أنا خدت كل الاحتياطات الأمنية، وظبطت كل حاجة، وظبطت مع إسرائيل، وظبطت مع أمريكا، وبعت، يا عم هتجيلك من، لا ما هبعتلهم. هو معتقد إن، لكن دائمًا ربنا بيقول إيه ﴿فَأَتَاهُمُ اللَّهُ مِنْ حَيْثُ لَمْ يَحْتَسِبُوا﴾.

هنا ربنا بيقول لهم: لو أنتم فرحانين بالتمكين، اللي قبلكم كان ممكن أكثر منكم ﴿وَأَثَارُوا الْأَرْضَ وَعَمَرُوهَا أَكْثَرَ مِمَّا عَمَرُوهَا﴾ [الروم: 9]. كلمة أثاروا حتى الأرض في الروم يقولك يعني بانوا في الأرض بناءات ضخمة جداً. ﴿أَلَمْ يَرَوْا كَمْ أَهْلَكْنَا مِن قَبْلِهِم مِّن قَرْنٍ مَّكَّنَّاهُمْ فِي الْأَرْضِ مَا لَمْ نُمَكِّن لَّكُمْ وَأَرْسَلْنَا السَّمَاءَ عَلَيْهِم مِّدْرَارًا وَجَعَلْنَا الْأَنْهَارَ تَجْرِي مِن تَحْتِهِمْ فَأَهْلَكْنَاهُم بِذُنُوبِهِمْ﴾ [الأنعام: 6].

الكلمة دي بتصادم أغلب المفكرين في التفسير المادي للتاريخ. يعني إيه التفسير المادي للتاريخ؟ الناس بتقعد تقولك إيه؟ الدورات الحضارية وأسباب تدهور الحضارة، كل ده كلام مهم، لكن ينقصه كلام أهم، إن الهلاك قد يأتي بسبب الذنوب. حتى بعض الإسلاميين المفكرين المسلمين قالوا: الذنوب مش هي اللي مهلكة، الذنوب تؤدي لانتشار فاحشة وظلم، والظلم يؤدي للكسل والترف، والترف يؤدي لعدم الاهتمام بالحاجات الحضارية فتدور الدورة، وتشيخ الدولة دي فتسقط. ده أمر موجود، لكن مش ده الطريقة الوحيدة للإهلاك بالذنوب، بأن في ذنب فربنا ينزل العقاب يرفع البركة، يعني التدرج اللي قاله ده مهم وموجود في القرآن ﴿وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُوا فِيهَا فَحَقَّ عَلَيْهَا الْقَوْلُ﴾ [الإسراء: 16].

يبقى ده موجود اللي قاله ده عشان برضه ما نبقاش ننكر، ده موجود الدورة الحضارية، ودي سبب أحيانا تأخر سقوط الدول الفاسدة، إن الدورة لسه ما كملتش بتاعتهم، لسه نصاب الفساد ما اكتملش، إنما قد يأتي زي سبأ المترفين، ﴿فَأَرْسَلْنَا عَلَيْهِمْ سَيْلَ الْعَرِمِ﴾ ما حصلش بسبب الـ، لأ ده عقاب من ربنا سبحانه وتعالى. يعني أحياناً تحصل النغف اللي جه على يأجوج ومأجوج، يعني مش لازم يمروا بدورة حضارية متكاملة.

فكلمة ﴿فَأَهْلَكْنَاهُم بِذُنُوبِهِمْ وَأَنشَأْنَا مِن بَعْدِهِمْ قَرْنًا آخَرِينَ﴾ [الأنعام: 6] جزء مهم من التفسير للتاريخ، إن إحنا بننسى إن الذنوب سبب للانهيار. يعني مش لازم دولة كذا وقعت بسبب إن الرئيس فلان ما كانش بيفهم، ودولة كذا حصل فيها كذا بسبب كذا، لأ، بسبب الذنوب.

كفاية كده؟ طولنا إحنا عليكم النهارده صح؟ طب آخر حاجة ونبقى آخذ بس الآية الأخيرة دي تبقى مفتاح نكمل بها المرة الجاية. ربنا بيقول لهم: إنتوا الثلاث آيات اللي في أول السورة مش عايزين تصدقوهم، طب تصدقوا إزاي إن في إله؟ وتصدقوا إزاي إن في بعث أجل مسمى عنده؟ وتصدقوا إزاي إنه يعلم سركم وجهركم وإن هتتحاسبوا على الكلام ده؟ أنا نزلت لكم القرآن، تفاجأ إن ما فيش آية من آيات القرآن بتيجي إلا وكانوا عنها معرضين، مكذبين، مستهزئين.

طب أنا هقول لكم حل ثاني: امشوا في الأرض وشوفوا الأمم السابقة أهلكت إزاي، ما فيش فايدة، لأ، عايزين آية حسية. القرآن سرد سياق الآيات بيفهمك إن في أشياء وطلبات محذوفة ترد عليها، بيقولوا ده من إعجاز القرآن، وده دور المفسر اللي متدبر استنباط المحذوف اللي الآية ردت عليه. فكأن بعد الكلام ده طلبوا آية مادية محسوسة يمسكوها، فربنا قال لهم: ﴿وَلَوْ نَزَّلْنَا عَلَيْكَ كِتَابًا فِي قِرْطَاسٍ فَلَمَسُوهُ بِأَيْدِيهِمْ لَقَالَ الَّذِينَ كَفَرُوا إِنْ هَذَا إِلَّا سِحْرٌ مُّبِينٌ﴾ [الأنعام: 7].

يعني لو نزلت لهم الآية المادية الحسية اللي عايزينها ووصلوا معها إلى أعلى درجات اليقين، اللي هي درجة ﴿فَلَمَسُوهُ بِأَيْدِيهِمْ﴾. حتى بيقولوا الآية ديه كان في إعراض في سورة الحجر شديد جداً، ﴿وَلَوْ فَتَحْنَا عَلَيْهِم بَابًا مِّنَ السَّمَاءِ فَظَلُّوا فِيهِ يَعْرُجُونَ * لَقَالُوا إِنَّمَا سُكِّرَتْ أَبْصَارُنَا﴾ [الحجر: 14-15]. يقولك آية الحجر استعملوا حاسة البصر بس، إن ربنا فتح لهم السماء وطلعوا فشافوا، فيقولوا إحنا سكرت أبصارنا. إنما هنا بيقول كتاباً في قرطاس، فلمسوه بأيديهم، طب ده هيقول إيده بقى حصلها إيه؟ يعني طب هناك قال لا أنا اتضحك علي سكرت أبصارنا، طب هنا هتقول إيه؟ فقال الذين كفروا إن هذا إلا سحر مبين.

عارف يعني إيه سحر مبين؟ واضح بمعنى عايز يقول إيه، يعني اللي مش عارف إن ده سحر يبقى ما بيفهمش، يعني ناصح قوي، يعني بيعمل ضغط نفسي على الناس، يعني اللي ده سحر ده واضحة جداً إنها سحر، مش شايفين؟ يا عمي اتأخر، يعني هو بيوصل لمرحلة اللي عايز يوصل إنه موقن في الباطن لدرجة إن هذا إلا سحر مبين.

ولو نزلنا عليك كتاب، يبقى ربنا بيقول للنبي صلى الله عليه وسلم مش الحل إنك تنزل لهم، الناس ديه أو بتعبيري ليكم بقى الأشكال ديه مش الحل إن ينزل لهم آية مادية. ده لو ربنا بيقول ولو نزلنا، والله عز وجل يعلم ما لم يكن لو كان، كيف يكون؟ سبحانه وتعالى يعلم ذلك. فربنا بيقول: ﴿وَلَوْ نَزَّلْنَا عَلَيْكَ كِتَابًا فِي قِرْطَاسٍ فَلَمَسُوهُ بِأَيْدِيهِمْ لَقَالَ الَّذِينَ كَفَرُوا إِنْ هَذَا إِلَّا سِحْرٌ مُّبِينٌ﴾، وقالوا لا مش عايزين الآية دي خلاص، عايزين واحدة ثانية. شوف الطالب الحق ما بيعملش كده، يعني زي ما نسوا مع البقرة، زي قوم فرعون مع الآيات سيدنا موسى، هي نفسية واحدة معارضة مكذبة مستهزئة.

أنا المفروض أول لما ألاقيه بيعرض أعرف إن الاثنين جايين وراه، يعني أول ما تيجي واحد ما بيسمعش آيات القرآن وما بيتدبرش، يعني إزاي واحد يكذب بالقرآن وما عرفش القرآن ده على الأقل 100 مرة، إزاي هيكذب بإيه؟ طب أنت عارف أنت بتكذب بإيه؟ يعني مثلًا: خد يا عمي الموبايل ده هدية، ألف شكر جزاك الله خير، لا ده موبايل معفن، طب ليه؟ في موبايل أبيض؟ حد يشيل موبايل أبيض؟ الزملكاوي؟ هو عارف.. طب أنت بتقيمه على أساس إيه؟ هو معرض لا لا لا لا أنت هتجيب لنا كلام وقرآن ونعم، لا لا أنت مش رسول، طب أنا مش رسول ليه؟ أنا بقول لكم أنا معي آية، لا لا لا لا أنت مش رسول، في ناس أغنى منك.

أنا بقول لك إقرأ.. طب إقرأوا القرآن، لا لا لا لا، ليه؟ مش أغنى، طب إقرأوا القرآن يا جماعة، لا أصل أنت فقير، بقول لكم إقرأوا القرآن تقول لي أنت فقير، أقول لك إقرأ القرآن تقول لي في ناس أغنى منك، أغنى منك، أقول لك إقرأ القرآن تقول لي لا أنا عايز ملك، أقول لك إقرأ القرآن تقول لي اعمل لي باب في السماء، أقول لك إقرأ القرآن تقول لي اعمل لي كنز في الأرض، بقول لك إقرأ القرآن يقول لك اسمع القرآن، يعني أنا بكلمه في حاجة وهو مصمم، هو معرض.

فأول لما تلاقي إنسان معرض اعرف إنه هيروح للتكذيب، واعرف إنه هيروح فين، ده أمر قطعي عندنا معروف، أعرض سيكذب، سيستهزئ، لازم هيمشي في السكة دي. ولو جبتله بعد كده آية حسية، هيقعد يستهزئ بيها، زي سحر مبين، خلاص هو وصل، قلتلك طالما وصل لمرحلة الاستهزاء ما عادش هتنفع معاه آية، الحل إنه يرجع تاني لأول السورة بقى، يرجع يؤمن بقى إنه في إله خلق الكون، الحل ده.

وقالوا لولا أنزل عليه ملك، ولو أنزلنا ملكاً لقضي الأمر ثم لا ينظرون. أكتفي بهذا القدر؛ لأن الآية دي مرتبطة باللي بعدها وعايزة شرح أطول شوية.

أكتفي بهذا القدر، سبحانك اللهم وبحمدك، أشهد أن لا إله إلا أنت، أستغفرك وأتوب إليك.