تفسير سورة الرعد (1) | الآيات (1-2) | د. أحمد عبدالمنعم

بسم الله والصلاة والسلام على رسول الله صلى الله عليه وسلم.

بإذن الله سبحانه وتعالى نستكمل مجالس القرآن. أسأل الله سبحانه وتعالى أن يجعلني وإياكم من أهل القرآن، وأن يفتح لنا فتحا مبينا في فهم كتابه والعمل به والجهاد بكتاب الله سبحانه وتعالى، وأن يشرفنا بخدمة كتاب الله سبحانه وتعالى.

قبل أن نبدأ في مجلس اليوم أو في السورة التي سنتناولها اليوم بإذن الله سبحانه وتعالى، بعض الناس يتساءل: لمَ مجالس القرآن؟ الدروس الأخرى التي تكون سواء مواضيع عابرة أو مشكلة نحاول حلها تكون أكثر سهولة، أو تكون قصيرة فنستفيد، لكن مجالس القرآن تطول ولا سيما لو السورة كانت سورة طويلة، والمجالس التي تكون متعددة زي سورة الأنعام والأعراف، فبيكون متابعتها فيها نوع من الصعوبة فلماذا الإصرار على مجالس القرآن؟

طبعا الإجابة كفاية بس أحاديث فضائل القرآن وغير ذلك، قصدي أنا مش هجيب إجابة عامة على السؤال ده لأن أنت عايز محاضرة. هو ده إجابة سؤال ما أهمية كتاب الله سبحانه وتعالى؟ وحقيقة مع زحمة القراءات الكثيرة الإنسان قد ينسى أهمية القرآن، لكن كما قلت قبل ذلك كثيرا، نحن نعيش حالة للتجريف في الأصول؛ أصبح المسلم لا يعرف أصوله، لا يعرف تاريخه، لا يعرف سلفه، لا يعرف لغته، لا يعرف هويته، أصبح منزوع الأصل.

الإنسان لما بيفقد الماضي، لو انسان انقطعت علاقته بالماضي، بيعيش حالة من العبث، إن هو المفروض لما يحب يقيم نفسه ويقيم عاداته ويقيم تقاليده ويعرف إيه الصح من الغلط، إما أن فيه وحي أو فيه تقاليد. فتخيل انسان نزع فجأة من الماضي! فلما الإنسان بيفقد الماضي بيفقد المستقبل تماما، بيعيش حالة من العبثية والعدمية، بيعيش حالة ما لوش معايير أصلا.

عشان أوضح لكم بمثال أبسط: لو واحد سافر برة وانقطعت صلته بأهله تماما، ما عادش له أي حد بيسأل عليه، وأصبح غريب وأصبح زي ما بيقولوا كده مقطوع من شجرة، عايش لوحده تماما. هنا لو ما لوش دين يحكمه هو فاقد لأي معايير للحكم عليه الصح والغلط، فممكن يعمل اللي هو عايزه، ما حدش بيسأل عليه، خلاص هو غريب.

لذلك كان من دين يوسف عليه السلام أنه ثبت في زمن الفتنة في قصر العزيز بالرغم أنه غريب. يعني العلماء بيقولوا إن هو شاب، وأن تعرضت له المرأة وهي التي أقبلت عليه، وغير ذلك من العوامل التي يتعجب منها: كيف ثبت يوسف أنه كان غريبا؟ ودايما الإنسان الغريب، حتى الواحد لما بيسافر أي بلد، حتى في مسألة تروح تعمل عمرة، بتتعامل بنوع من التخفف في الالتزام بالتقاليد، يعني عادي ممكن تمشي حافي، ممكن ما تشغلش بالك بشكل هدومك، ليه؟ لأن أنت في بلد غريبة.

فكذلك الإنسان يتخفف من القوانين والتقاليد والعادات لما بيكون غريب. فتخيل لما هو بيعيش حالة من الانقطاع عن الماضي والانقطاع عن السلف، فبيكون الثابت الوحيد في زمن المتغيرات هو القرآن بالنسبة للمسلم.

فيعود القرآن، وهنا كانت فكرة درس إعادة ضبط؛ أن القرآن يعيد مرة أخرى تشكيل العقل، وتشكيل القلب، وتشكيل النفس، وتشكيل الهوية، وتشكيل المبادئ والعقائد، يعني المسلم يعاد خلقه مرة أخرى، يعني كأنك بيعاد تشكيلك مرة أخرى.

للأسف قبل قليل شاهدت فيلما مؤلما جدا، تقرير عملته البي بي سي الإخبارية عن مسلمي الصين، وكيف أنهم الأول تعرضوا لحالة من السجون والتعذيب وغير ذلك، ثم بعد ذلك آلاف مؤلفة من مسلمي الصين تم التعامل معهم بصورة غريبة جدا، لما بدأت هيئات الحقوق والناس تسأل عليهم، قالوا: لا ده إحنا مش حاطينهم في سجون، ده إحنا حاطينهم في مدارس. وبدأوا يسمحوا لقنوات إخبارية أن هي تنزل تعمل استكشاف هم بيعملوا معهم إيه في الأماكن دي، اللي بعضهم بيسميها سجون والصينيين بيسموها مدارس.

فبدأوا يفاجئوا أنهم بيعيدوا تشكيل هويتهم مرة تانية؛ بيعلموهم بالقصر بالقوة قصرا، بيعلموهم الرقص وفنا صينيا، فنا شعبيا يبتعد تماما عن الإسلام، ويعاد تشكيل أفكار وتلقى عليه الأفكار وتكرر مرارا وتكرارا، ويجبر، يجبر على الغناء وعلى الرقص وعلى الاختلاط، يجبر إجبارا على ذلك مش بمزاجه، ويهدد، ثم يترك فترة يعيش سنتين تلاتة في المجتمع ده اللي هو مجبر فيه، اللي هو في الأول بيبقى رافضه، وبعد كده يطلق سراحه.

بعد فترة بقى تلات اربع سنين يتساب، ما يعرفش يرجع مسلم تاني! بيعاد تشكيل هوية. أنت لما بتسلم نفسك للقرآن، بيحدث معك أنك تعود إلى الإسلام مرة أخرى.

فده الغرض الأساسي من التعامل مع مجالس القرآن؛ أن كثرة التعرض لآيات القرآن مع نوع من المدارسة وأن احنا دورنا أن احنا نفتح الآيات مع بعض، أن أنت تفكيرك ومبادئك تعاد مرة أخرى إلى فهم الإسلام.

هذا القرآن الذي أنزله الله سبحانه وتعالى على النبي صلى الله عليه وسلم لم يحرف ولم يبدل ولم تغير فيه كلمة، هذا القرآن هو الذي صنع جيل الصحابة، فبالتالي القرآن قادر على أن يصنع أجيالا متتالية. لذلك قال ربنا سبحانه وتعالى في ختام سورة البروج بعد تقتيل المشركين للمؤمنين، أن حتى لو قتل كثير من المؤمنين فإن الله سبحانه وتعالى حفظ لنا القرآن، فقال ربنا سبحانه وتعالى في ختام السورة: ﴿بَلْ هُوَ قُرْآنٌ مَّجِيدٌ * فِي لَوْحٍ مَّحْفُوظٍ﴾ [البروج: 21-22]. هذا القرآن حفظه الله سبحانه وتعالى من التبديل.

طيب، النقطة التانية في اختيار السورة: الواحد كان متردد كثيرا في اختيار السورة، ولأن ضعف الإنسان في التعامل مع التفسير وقلة الارتباط بالقرآن فهو بيختار من صور محدودة، يعني مش بمزاجه، يعني مش مثلا يقول إيه أنا هشرح سورة البقرة، لأ، خليه المائدة، لأ، خليه النساء، أنا مش ابن كثير، أنت على قدك، على قد فهمك، وعلى قد اللي أنت بتستطيع أنك تقرأ فيه في التفاسير، أو يكون الإنسان مرتبط ببعض سور يحب هذه السور أو فتح له في هذه السور فيريد أن يشرح هذه السور.

حقيقة من السور التي أحبها كثيرا، لكن في نفس الوقت أنا كنت متهيب أن أرح هذه السورة، هي سورة الرعد. وفعلا كنت عازم أن أنا أشرح سورة الرعد بعد سورة يوسف، احنا خدنا سورة يوسف وبعد كده انتقلنا إلى سورة العنكبوت. كنت ناوي أشرح سورة الرعد ولا سيما في التسلسل بعد ما اتكلمنا عن سورة هود، في إعادة ضبط اتنين في سلسلة الإشكالية، مجمل سورة هود والخواتيم، واتكلمنا بالتفصيل عن سورة يوسف، كنت أتمنى أن أنا أدخل سورة الرعد، لكن من السور اللي الواحد بيتهيبها.

يعني في سور الواحد بيخاف يتكلم فيها، هو يشعر بمهابة تجاه هذه الصورة، هو يشعر أن فيه سر في هذه السورة، أو في أسرار في هذه السورة، أو نتيجة اللسان والعجمة لا يستطيع الإنسان أن يعبر عما في صدره تجاه هذه الآيات، فكأن الواحد يفضل أن تبقى هذه الآيات كما هي، أن هو يقرأها على الناس، بلاش أن نتدخل.

وسبحان الله، والواحد كان متردد في اختيار سورة الرعد، وأنا بدور في التفاسير قلت أقرأ الأول كده في تفاسير واحد قبل ما ياخد القرار، ففوجئت بمقدمة الظلال لهذه السورة أن سبحان الله وكأنه يحكي تماما ما أجده في صدري تماما! فانا فوجئت فقلت خلاص الواحد يتوكل على الله. قال:

بسم الله الرحمن الرحيم، مقدمة سورة الرعد: قال: كثيرا ما أقف أمام النصوص القرآنية وقفة المتهيب أن أمسها بأسلوب البشر القاصر. طبعا هتجدوا فجوة رهيبة من طريقة كلامه وطريقة كلامي -عشانكم طبعا، أنا بس مش راضي أعمل زيه عشان أنا مش عارف- بأسلوبي البشري القاصر المتحرج أن أشوبها بتعبير البشر الفاني.

وهذه السورة -هو بيتكلم عن سورة الرعد وهو كان متهيب أنه يشرحها- شأنها بالنسبة له برضه، ودا سبحان الله كان نفس الإحساس، شأنها شأن سورة الأنعام من قبلها من بين هذه النصوص التي لا أكاد أجرؤ على مسها بتفسير أو إيضاح. الصور اللي فيها كلام عن معرفة الله الإنسان بيتهيب أنه يتكلم فيها، زي سورة الرعد وسورة لقمان وسورة فاطر وسورة الأنعام، بل حتى هذه السور الثلاث تحديدا الرعد وفاطر ولقمان هي التي خصها محمد قطب في كتاب «دراسات قرآنية» بأنها تكثر الكلام عن الله سبحانه وتعالى.

قال: ولكن ماذا أصنع ونحن في جيل لابد أن يقدم له القرآن مع الكثير من الإيضاح لطبيعته ولمنهجو لموضوعه كذلك، بعدما ابتعد الناس مش عن بس اللغة أو عن القرآن، بعدما ابتعد الناس عن الجو الذي نزل فيه القرآن وعن الاهتمامات والأهداف التي تنزل لها، وبعدما ماعت وذوبت في حسهم وتصورهم مدلولاتها وابعادها الحقيقية، وبعدما انحرفت في حسهم مصطلحاته عن معانيها.

هو بيتكلم أن المسلمين مش بس بقوا مش فاهمين الكلمة دي معناها إيه، أو مش عارف السلف قالوا إيه في الكلمة دي أو في المعنى ده، لأ، ده فيه جو عام نزل فيه القرآن، هو فقد هذا الجو، وأصبح غريبا عن هذا الجو، ليس هذا الجو من أهدافه ولا طموحاته ولا اهتماماته.

ودايما بضرب لكم المثال ده عشان أبسط الفكرة: لو قلت لك لو أنت لقيت كتاب «كيف تصبح مليونيرا؟» وأنت مش مهتم أنك تكون غني أو أنت لست في حاجة أو لا تصدق، هتقرأه قراءة متصفح، قراءة المستغني، قراءة غير المبالي، قراءة اللامصدق غير المكترث، يعني أيا كان، مش هتتعامل معه إلا لو كان نفسك تبقى مليونير، ورأيت فعلا من قرأ هذا الكتاب وطبقه وأصبح مليونيرا بالفعل فستتعامل معه بيقين، لأ، أنتم بتقرأوا كلمة كلمة وتخطط وتعلّم وترجع وتطبق وتعيد وتتهم نفسك لو أنت حاولت تطبق وما عرفتش، تتعامل تعاملا مختلفا.

فلو أنت أصبحت أهدافك، أهداف من نزل عليهم القرآن، أن تريد أن تحقق العبودية، أنت نفسك تكون عبد. عارف من الآيات الجميلة: ﴿قُلْ إِن كُنتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ﴾ [آل عمران: 31]، اللي بيحب ربنا أول ما يسمع الآية دي يقول: أيوه، أعمل إيه بقى؟ هو واحد بيحب ربنا بس مش عارف يعمل إيه، فاتبعوني، تحمد ربنا أن فيه سبيل رسم لك.

فهنا بيقول إن حاسس أن الجيل أصبح غريبا عن معاني القرآن. وبعدين أطال، خدت نفس الكلام، لكن هو دايما بختلف مع الشيخ سيد قطب في مسألة استعمال مصطلح الجاهلية، لأنه كان مصطلح موهن، وعُتب فيه: تعني إيه بكلمة الجاهلية؟ فتجد أن الصفحة الأولانية المقدمة جت فيها الجاهلية مثلا ست سبع مرات، من كتر ما كان شايف المشاكل حواليه والبعد عن الدين حواليه.

دايما بيقول: بينما هم لا يتحركون بهذا القرآن في مواجهة الجاهلية كما كان الذين تنزل عليهم القرآن أول مرة يتحركون. هو هنا عايز يوضح فكرة جميلة؛ أن القرآن لم ينزل ليقرأ فقط، ولكن نزل ليعاش به ويتحرك به.

مش فاكر كان فيه مقالة اسمها «ديناميكية القرآن الكريم»، مش فاكر مين المؤلف، كانت على مركز موقع مركز تفسير، كانت المقالة جميلة جدا تشرح قول الله سبحانه وتعالى: ﴿أَوَمَن كَانَ مَيْتًا فَأَحْيَيْنَاهُ وَجَعَلْنَا لَهُ نُورًا يَمْشِي بِهِ فِي النَّاسِ﴾ [الأنعام: 122]. كان بيركز على كلمة يمشي، أن النور مش مستقر، أن النور بيمشي بين الناس، القرآن لازم تتحرك به في الناس. لن يظهر أثر القرآن ولا معاني القرآن ولا كثير من القضايا التي يحلها القرآن إلا لما تتحرك فيواجهك مشاكل فتفهم.

يعني كتير من الناس ما يبقاش فاهم الآية دي هستفيد منها ازاي، ييجي ينزل يشتغل في الدعوة، يطلب العلم، ينشر الدين، يقابله مشاكل، يرجع يقرأ قرآن فيفاجأ أن القرآن يحل المشاكل دي، ما هو نفس الطريق، هو نفس الطريق الذي صار فيه الأنبياء، صار فيه الصالحون، صار فيه الصحابة، صار فيه التابعون، وكانوا يجدون حل هذه المشاكل في القرآن، فكذلك أنت لو سَرتَ على طريقهم ستقابل نفس المشاكل وتجد نفس الحلول.

لكن القرآن لا يخلق على كثرة ردّه، لذلك مهم جدا أن كل فترة زمنية -لو قلنا مثلا تلاتين أو خمسين أو ستين سنة- يطلع حد يتكلم في القرآن بما يناسب لغة هذا الجيل أو مشاكل هذا الجيل. يعني دلوقتي مثلا قضية الإلحاد تبرز، ممكن من عشرين سنة ما كانتش بارزة، فمهم في تناول القرآن أن نركز على قضية الإلحاد، فترة من الفترات كانت الاشتراكية أو الشيوعية فكان مهم تناول القرآن، القرآن ضرب وهدم هذه الفكرة، دلوقتي لا، الرأسمالية أو غير ذلك من مصطلحات زي الحداثة أو العلمانية، فمهم تناول القرآن بما يناسب المشاكل التي يعيشها هذا الجيل.

هي مجالس القرآن هي صعبة كده، فمن الأول عشان إيه نتفق مع بعضنا هي كده، صلوا على النبي. يقول بعد ما بتكلم على أنك أنت لم تدرك أسرار القرآن إلا لما تتحرك في الواقع: ومع هذا كله يصيبني رهبة ورعشة كلما تصديت للترجمة -يعني التفسير- عن هذا القرآن، أن إيقاع هذا القرآن المباشر في حسي، وعلاقته المباشرة بالقرآن محال أن أترجمه في ألفاظي وتعبيراتي.

يعني هو لما بيجي يعيش مع السورة يحس بمعايير مش طبيعية في صدري، ييجي ينقلها مش عارف.

والمعنى ده انت لسه ماشي في بوست قريب عنه في كلام الرافعي، أن فيه فجوة دايماً بين المعاني اللي انت عايشها تيجي تنقلها مش عارف. بتحتاج تؤتى فصاحة وبيان وغير ذلك من امتلاك أدوات كثيرة عشان تعرف تقارب بس أنك تعبر عن المعنى الذي تجده بداخلك. فبيقول: ومن ثم أحس دائماً بالفجوة الهائلة بين ما استشعره من نوع من القرآن وما أترجمه للناس في هذه الظلال. يعني وده ديماً فعلاً الواحد بيحسه بعد كل درس قرآن. تحس أنك انت ما وصلتش ربع اللي انت عايزه. مش عارف تقوم. والحل الأوحد الذي يراه أن دور أي حد بيشرح هو مجرد أن ترتبط أنت بالنص لا بالشخص. سبحان الله، ثم عبر عن هذه الكلمة التي أقولها تعبير جيد قال: وأنني لأهيب بقراء هذه الظلال بيقول اللي هيقرا الكتاب بتاعي ألا يكون هدفهم، ألا تكون هي هدفه من الجدال، مش عايز يبقى هدفك أنك تقرا الكتاب بس، ده غلط، أنت كده ما فهمتش أنا كاتب الظلال ليه؟ بيقول: وإنما يقرءونها أي الظلال ليدنوا من القرآن ذاته. ثم ليتناولوه عند ذلك في حقيقته ويطرح عنهم هذه الظلال.

دور زي ما حاولنا نعمل في موقع كذا أن القرآن، وقلنا الرسالة كسر الحواجز بين الناس وبين القرآن. أنت اللي تدوق. لابد أن -زي التعبير اه فريد الأنصاري- أن تكابد، لازم أنت اللي تتعب. يعني لازم أنت اللي تعاني عشان توصل لعلاقة مباشرة مع القرآن، لازم. مالهاش حل تاني. أنت اللي تجاهد وتقرأ وتكرر الآيات وتدندن وتصلي وتقرأ وتسمع وتصلي ثم تخرج تسمع الآيات في مكان بعيداً عن الناس. محتاج تتعب. يعني زي ما فريد الأنصاري بيقول: يكابد حتى يشتعل الفتيل. ساعتها الجمرة دي لما بتنير لن تتركها أبداً.

طيب، بعد كده نبدأ بقى إيه دي كانت المقدمة، نبدأ سورة الرعد. هذه السورة العظيمة اللي اسمها مخيف، اسمها يقذف في قلبك الخوف والطمع. لذلك بعض اللي كتبوا في تفسيري الموضوعي أو موضوع السورة كان بيلتقط المعنى ده، إن صح التعبير على يعني بتعبير فاضل السامرائي وغيره، متناقضات اللي موجودة في السورة واللي أعلى تحقق فيها كان الرعد، أن هو بيعطي الخوف والطمع في نفس الوقت. وأن الرعد بيكون آية يستضيء أو يعني آية يعرف بها المؤمنون ربهم، وآية يكفر بها الناس زي ما النبي صلى الله عليه وسلم قال، أصبحوا -كما قال النبي صلى الله عليه وسلم عن الله سبحانه وتعالى في الحديث القدسي- أصبح من عبادي مؤمن بي وكافر بي، نزول المطر أن الآية تجعل الإنسان يؤمن وإنسان يكفر.

لذلك الإمام البقاعي لما كان بيتكلم عن موضوع سورة الرعد قال أن اسم سورة الرعد ده إشارة إلى القرآن، كما أن القرآن يهتدي به أناس ويضل به أناس فكذلك الرعد يقذف الخوف في قلوب ناس ويقذف الطمع في قلوب ناس. فالآية الواحدة لها أكثر من دلالة، فالاسم أصلاً يعني يحدِث مشاعر متنوعة في قلبك. طيب، ده الاسم. هنيجي نتكلم عن إحنا بنتكلم عن دايماً عن في المقدمة عنه، موضعها في القرآن وبنتكلم عن نزولها، زمن نزولها. زمن نزولها فيه خلاف كبير بين أهل العلم، وده شيء عجيب حقيقة، لولا الآثار الواردة عن بعض السلف لجذمت بأنها مكية. وبعض أسباب النزول التي قيلت في بعض الآيات زي ما هيقابلنا إن شاء الله، ألزمت بأنها مكية، لكن العجيب أن فيه قول قوي جداً أنها مدنية.

وده اللي بيأخذ بترتيب جابر بن زيد زي مثلاً اللي بيكتبه في التفسير واعتمدوا ده، زي مثلاً حبنكة الميداني، الشيخ حبنكة الميداني عمل تفسير للقرآن بترتيب النزول، وإن كان ده فيه خلاف بل أظن الأزهر كان طلع بيان أن ده غلط، من الأولى بقى أن هو يفسر بترتيب المصحف أو يعني وخصوصاً لو عايز يعمل مصحف بترتيب النزول وقال بتحريم ذلك. الشاهد يعني أن هو أكتر من حد عمل فكرة القرآن بتفسير القرآن على حسب النزول لأن هو مش قطعي، الشاهد يعني أن اعتمد أظن يعني ترتيب جابر بن زيد. لذلك الشيخ حبنكة بدأ المكي ثم أول لما جه يبدأ في المدني بدأ في سورة البقرة توفي، توفاه الله سبحانه وتعالى.

فهو فسر القرآن المكي كاملاً وبدايات القرآن المدني البقرة بدايات بس البقرة كان في خمستاشر مجلد. حتى أنا بقول لواحد من أصدقائي يعني أن احنا عايزين أول ما نزل التفسير ده لازم نقتنيه، كان قبل التعويم بقى الكلام ده، كان أظن كان بتسعمائة جنيه، دلوقتي تلاقوه خمس آلاف ست آلاف جنيه ولا حاجة. فبقول له الكلام ده كان من سنوات يعني، تسع عشر سنوات. فبقول له: احنا لازم نقتنيه. قال لي: إيه التفسير ده؟ قلت له: ده الشيخ حبنكة فسر القرآن المكي في خمستاشر مجلد وتوفي قبل ما يكملوا. يا خسارة، إي الحمد لله أنه مات، تخيلوا كان هيبقى كم مجلد! هنجيبه ازاي ده؟ الحمد لله أنه مات بحيث إيه نلحق نشتري الخمستاشر مجلد. كل واحد بيبص على المنطقة التي تؤلمه أو تؤثر فيه.

فالشاهد الشيخ حبنكة ما حطش سورة الرعد في قراءة مكة، ما فسرهاش ضمن التفسير، ده هو قدراً كان بيختار صورة يشرحها أظن في جامعة من الجامعات السعودية لما ابتدأ يعني أن هو شامخ فاختار منهج مرة سورة الفرقان ومرة كانت سورة الرعد، فطُبعت بمفردها، اللي هو كان بيميل يعني سورة الرعد المطبوعة دي مش ضمن تفسير، لكن هو يرى أن هي مدنية. وكتير يرى أن هي مدنية، وكتير أيضاً يرون أن هي مكية.

اللي بيلاحظ يعني بيراقب أكتر عرض العقيدة وأن في في ملامح في السورة ممكن تقول أن هي مكية، مثلاً أولاً وضعها ضمن الشوط المكي الطويل اللي هو ألف لام راء، يعني شوط ألف لام راء من أول يونس للحجر، وكمان بعدها النحل ونكمل شوط مكي طويل، وضعها ضمن ده وممكن يفهم لها دلالة ضمن سياق ألف لام راء ممكن يخلينا نقول أن هي مكية، ده في ترتيب المصحف.

داخل السورة فيه دلالات كثيرة، أن دايماً اللي كان بياطلب آية حسية كان المشركين من قريش ما كانش أهل الكتاب. يعني أهل الكتاب نزل عليهم كتب من السماء، فكانوا بيتهموا الكتاب، كانوا بيتهموا تحريف الكتاب أنه ليس من عند الله، فكانت شبهاتهم غير شبهات المشركين. تكرار كلمة ويقول الذين كفروا أظن ابن عاشور قال عدها اللي بقى له خمس شبهات أو خمس مرات في السورة، ده الأقرب لدلالة أن هو مكي، أن الكلمات والشبهات التي قيلت في السورة هي شبهات المشركين.

وبعضهم قال: لا مانع أن تأتي سورة مدنية تعيد طرح العقيدة التي ذكرت في مكة عشان يحدث أن الإنسان يتذكر، زي ما حصل بالضبط في الخلاف في سورة التغابن؛ سورة التغابن طرحها في وسط الشوط المدني جزء ثمانية وعشرين، يشك من سياقها أن هي مكية، ويقول لها ده هي مدنية، حتى لا ينسى المجتمع المدني طريقة طرح العقيدة في مكة. نوع من الخلاف كبير وأنا مش بصدد الترجيح لست لذلك يعني، أن احنا نقطع، لكن أنا أميل يعني مع اللي اختاره أن هي مكية، لا أقطع من ذلك يعني، اللي يرى أن هي مدنية ده مش يعني الأمر فيه سعة، الخلاف سائغ يعني إن شاء الله.

ده زمن، الزمن اللي قال أن هي مكية بعضهم من خلال سياقها كان يرى أنها نزلت في أواخر العهد المكي، يعني يعني أشبه بسياق سورة يونس وهود ويوسف، لما حصل فيه ضغط جامد على المسلمين، وكل ما كان بيزيد الضغط على المسلمين وكان بيزيد التعذيب على المسلمين كانت الشبهات بتكثر، لأن الشبهات وقعها مش بس بقوة الشبهة، لا بالواقع الذي يُلقى فيه الشبهة، يعني لما بيكون واقع فيه استضعاف وهزيمة نفسية وتقليد، الطائفة المهزومة تقلد الطائفة المنتصرة، هنا الشبهة سهل أن هي تنتشر لأن الواقع أصلاً ما فيش مناعة.

فههم بيتعمدوا زيادة الشبهات في واقع، فزيادة مطالبة الكفار بآية وتكرارها في السورة هنا مرتين وإنكار الرسالة وإنكار الوحي في السورة أكثر من مرة، وهنشوف ازاي السورة عالجت ده، بيدل أن هي ممكن تكون أقرب للواقع المكي، بل الواقع المكي المتأخر.

طيب، تعالوا نشوف وضع سورة الرعد في المصحف. وضع سورة الرعد في المصحف هي بعد السور التي بأسباب الأنبياء الثلاثة: يونس، هود، يوسف. وبعد كده جت سورة إبراهيم والحجر، وانتصفت هنا سورة الرعد. أنا هقول ملاحظات ما عنديش عليها معاني يعني، لعل الله سبحانه وتعالى يفتح يعني لمن يتدبر في الأمر ده، ولا سيما أن بداية السور التي بالحروف المقطعة دايماً فيها أسرار وخاصة لو حروف مقطعة مختلفة شوية، يعني في ألف لام ميم في المدينة مدني بقرة وآل عمران، وفي ألف لام ميم مكي اتكلمنا عليه العنكبوت والروم لقمان والسجدة، لكن في ألف لام ميم صاد دي غريبة، يعني في ص بس، وفيه ألف لام ميم بس.

هنا في ألف لام ميم صاد فكانت غريبة بنعرفها، هنا بقى جت أن الميم هي اللي زادت على ألف لام راء، يعني مش الصاد هي اللي زادت على ألف لام ميم في الأعراف، لأ، هنا الميم لأن هو السياق كله شوط كله كله إيه، صلوا على النبي. أنا قلت لكم الأول هي مجالس القرآن كده مع جو التكييف ده تؤدي إلى حالة من الإيه؟ صلوا على النبي. واحد هيقول لي: ما على هذا تبعتك؟ أنا جاي كلمتين سخنين على شوية... صلوا على النبي.

هنا في ألف لام ميم راء سورة الرعد هي جت ضمن سياق ألف لام إيه؟ راء، اللي بدأ بسورة ابدأ بسورة... لأ مش هود، سورة يونس وانتهى بسورة الحجر، وتوسطت هنا ألف لام ميم راء. زيادة الحروف دي وخاصة لما بيبقى وسط السياق بنفس حكم الخطاب يبقى لها دلالة، زي سورة الشورى كده، يعني عين سين قاف بعد حم، اللي في وسط حم، وتيجي في المنتصف، يعني تيجي سورة الشورى في المنتصف بعد ما تيجي غافر وفصلت وبعد كده الزخرف والدخان والجاثية والأحقاف، وتيجي سورة الشورى، أن لها دلالة، أكيد لها دلالة.

ده اللي يرى أن الحروف المقطعة -طبعا احنا لسه هنقول دلوقتي الألف المقطعة مش هشرح يعني هحكي لكم عن أول درس سورة الأعراف أنا فصلت فيه تفصيل كامل عن نص ساعة عشان الحروف المقطعة- فأنا هقول بس التقسيمة السريعة، تمام. طيب، أكيد هنا هذه السورة لها معنى زائد على المعاني اللي في الرعد.

طيب، تعالوا سريعا كده وده كنت قلته في سورة يوسف، لما نجي نبص على سورة يونس وهود ويوسف؛ سورة يونس إحنا في الاستضعاف، ما فيش مكان حتى تقيم فيه الصلاة، اجعلوا بيوتكم قبلة، فما آمن لموسى إلا ذرية من قومه على خوف من فرعون وملئهم أن يفتنهم، ده برضو في يونس، اللي آمن شوية صغيرين وفتية شباب ذرية فتية شباب وخايفين: ﴿إِلَّا ذُرِّيَّةٌ مِّن قَوْمِهِ عَلَى خَوْفٍ مِّن فِرْعَوْنَ وَمَلَئِهِمْ﴾ [يونس: 83].

الهاء حتى الهوم دي بعضهم قال: ده كانوا خايفين من أبائهم اللي من بني إسرائيل، يعني مش كانوا خايفين بس من فرعون، ده كانوا مؤمنين وخايفين من أبهاتهم، لأن أبهاتهم كانوا بيمنعوهم من الإيمان. فشوية شباب فتية بيؤمنوا في خوف، طب يعملوا إيه؟ اجعلوا بيوتكم قبلة وأقيموا الصلاة واستبشروا وبشروا المؤمنين. في واقع الاستضعاف الرهيب ده في يونس ربنا يقول: واصبر حتى يحكم الله. طب إيه اللي هيحصل؟ مش عارفين.

تيجي سورة هود شرحت لنا بالتفصيل بس أعيده بسرعة، تيجي سورة هود برضه واصبر برضه واقع استضعاف حتى يحكم هود هنا، انتظر الأمر. وقلنا تكرار كلمة الأمر جت في هود كتير: حتى إذا جاء أمرنا، حتى إذا جاء أمرنا، خلاص، وفي آخر السورة: ﴿وَلِلَّهِ غَيْبُ السَّمَاوَاتِ وَالْأَرْضِ وَإِلَيْهِ يُرْجَعُ الْأَمْرُ كُلُّهُ﴾ [هود: 123]. وأنت قاعد في سورة هود تبذل ومنتظر مش عارف إيه اللي هيحصل، يعني أنت قاعد سورة هود مستضعف، تعذب، تضرب، تحاول أن تجد مكانا أن تذهب إليه لا تجد، تحاول أن تبحث عن من ينصرك لا تجد، تحاول أن تنشر الإسلام لا تجد من يقبل، الدنيا مقفلة. طب إيه اللي هيحصل؟ هتفضل مقفلة كده على طول؟ مش عارف، هتعمل إيه؟ اصبر.

خواتيم سورة هود أن اللي بيصبر في هذا الوضع هم أولو... أولو إيه؟ اللي بيصبر في آخر هود اسمهم بيقولوا إيه؟ أولو بقية. شرحنا الكلمة دي بالتفصيل يعني أولو بقية، ودول اللي بيبقوا بعد ما كتير من الناس بيسقط هم القلة القليلة اللي بيبقوا. فقلة قليلة متبقية خالص في سورة هود، أنت ممكن عقلك يطيش، احنا هنفضل كده؟ ما فيش حل؟ عايزك تجري جو السيرة، مش محتاج تعيش جو كتير قوي، أنت ممكن لو عشت الواقع فأنتم هتفضل كده! طب وبعدين؟ طب وايه الحل؟ طب والمسلمين والاستضعاف في العالم؟ طب هتتحل ازاي؟ ماشي، أنا هصبر وأنتظر: ﴿وَانْتَظِرُوا إِنَّا مُنْتَظِرُونَ﴾ [هود: 122]. أنا هانتظر وهصبر وهأكون إن شاء الله من أولي بقية، أو حافظ ولن أترك شيئاً، فلعلك تارك بعض ما يوحى إليك، ولن أترك بعضاً. يعني هم في يونس قالوا له: غير كل حاجة، ائت بقرآن غير هذا أو بدله، هود تبسيط بعض: ﴿فَلَعَلَّكَ تَارِكٌ بَعْضَ مَا يُوحَى إِلَيْكَ﴾ [هود: 12]. لا هسيبه كله ولا هسيب بعضه.

طب وهتعمل إيه؟ هتتحل ازاي؟ تيجي سورة يوسف تضرب لك نموذج كيف تحل المشاكل المعقدة، بسيطة برؤية تبين لك لطف الله سبحانه وتعالى حتى لا تفقد الأمل. يعني سورة يوسف دي ترطيب كده لقلب المؤمن.

كيف تتحل؟ سأريك. إن كلمات الله لا تنفد، ومن الممكن لمشاكل معقدة جداً أن تتحل برؤية يراها ملك ظالم أيضاً.

كل حاجة، ليس واضحاً حضرتك بالتفصيل سورة يوسف. أنت خارج من سورة يوسف أصبح عندك أمل، خارج من سورة يوسف بعد الضغط الذي في سورة يونس وسورة هود، عندك أمل أن ممكن الأوضاع تتغير. هذا الإله الذي هو لطيف لمن يشاء، أنت لا تعلم جنوده، ومن جنوده الرعد. هذا الإله بصفاته وبقدرته وبعهده أنزل وحياً لابد أن تتمسك به.

هذا الإله الذي أمرك أن تصبر في سورة يونس وهود وبين لك مدى لطفه في سورة يوسف، وبين لك مدى قدرته وعلمه في سورة الرعد. هذا الإله قرر لك ووضح لك أن هذا الصراع الذي أنت تذوق ألمه، هذا من سنة الله في خلقه، وهذا يجيء لنا في المثل بتاعه. هذا الإله يبين لك في وحيه أن الباطل مهما علا فهو زبد يذهب جفاء، وأما ما ينفع الناس فيمكث في الأرض.

كل هذه المعاني، فتطلع من سورة الرعد بقوة سورة الرعد، فعلا تخليك وكأنك أنت الرعد، تديك قوة وهنشوف إزاي بدايتها فيها قوة. الطرح القرآني فعلا مختلف، وإن شاء الله ربنا ييسر قريبا يعني إن شاء الله ممكن الأسبوع اللي جاي يعني بالكتير إن شاء الله أو اللي بعده، محاضرة، أسجل محاضرة بعنوان، أو يعني فكرتها، مفارقة، أو إزاي الخطاب القرآني في تقرير العقائد بيختلف عن أي خطاب بشري آخر، منفرد تماماً في تقرير العقائد في القلب. فهتشوف إزاي إن سورة الرعد بدأت بداية قوية، ولذلك لما العلماء يهتمون به، التفسير الموضوعي، وأنا دايماً عندي إشكال، بالعكس أنا مؤمن بالتفسير الموضوعي جداً يعني، لكن ما بحبش التعجل فيه.

يعني بحب أن الإنسان يعيش سورة آية، وشرحت ده بالتفصيل قبل كده، إذن في بداية سورة الرعد عيش السورة آية آية وصل بها، وبعد ما تبقى في المستوى الرابع مع السورة بعد ما عشتها وصليت بها وقريت تفسيرها وسمعتها تاني كتير وتدبرت بها، ممكن تبدأ تشوف إيه بقى موضوع السورة. بلاش تبدأ، اللي عايز يشوف جهود العلماء والعلم ده اهتم به المتأخرون كثيراً عن المتقدمين، آه في موقع اسمه حصاد التدبر، جزاه الله خيراً الإخوة القائمين عليه، أي حد بيقابلهم، كتاب معاصر أو متقدم اتكلم في موضوع السورة بيجيبوه، يعني حتى تابع لكم هنا، هنا، اللي اتطرح لي اللي كتبوه عن سورة الرعد، فيه ناس بتهتم بالمجال ده، هو حتى لو واحد ما كتبش في كل القرآن وكتب في سورة حتى، أنت ممكن تراسلهم، يعني مثلاً لو أنت وقعت على كتاب لسه، حديث لسه مؤلف جديد في سورة واحدة مثلاً سورة الأحقاف، وفلان بيرى أن موضوع، ابعت لهم قل لهم فلان طبع كذا، هم بيضيفوه على طول.

فهم جابوا يعني، آه، الموقع نفسه له اختيار، آه، مؤلف يعني معاصر توفي يعني، اسمه تحماز له رأي، هم يرون أن موضوع سورة الرعد الاستجابة لله مصدراً للأسباب والمسببات. المختصر في التفسير بيان حقيقة القوة والقدرة الإلهية. التفسير المباشر يرى أنها سورة عقدية. أخت تهتم بباب تفسير موضوعي اسمها جميلة خليفة، ترى أنها التطمين الأول لقوة الله. عدنان عبد القادر، عدنان عبد القادر ده له كتاب اسمه جني القلب الهائل في معرفة مواضيع السور، هو بيرى، ريم أخت جميلة بيرى أن موضوع سورة الرعد كيف إن أهل المحبة يطمئنون من سورة الرعد، يعني وقعد يشرح بقى أن بس هو الإشكال عندي أن هو تمحور حولين الفكرة دي، ففسر السورة كلها حولين الفكرة دي بس، فبقى أي حاجة آيات مثلاً في الخلق آيات كذا يقول إن دي آية جاية عشان تطمئن وأن الطمأنينة درجات وأن اليقين درجات.

مين تاني جابوه؟ نظم الدرة طبعا الإمام البقاعي، أنا قلت لكم إن هو ربط ما بين الرعد نقل طويل هنا ما بين الرعد والقرآن. الدكتور هاني دوغان وده له حساب على الفيسبوك ومهتم جداً، حسابه جيد تتابعوه، كل فترة لازم بينزل كتاب جديد سواء في تفسير موضوعي أو في الهدايات، وهو له كتاب في هدايات جزء عم. أنا لم أطلع عليه، لكن من متابعتي للحساب، أرى أن كتاباته جيدة، هو بيرى أنها دعوة الحق بمثابة الرعد الشديد الذي يهز عقول وقلوب المعاندين، أيضاً وكما أنها كالرعد تحمل الخير الكثير ويستجاب. الشيخ محمد عبد الهادي المصري يرى أن الحق قوي وراسخ وإن لم يظهر أمام الأعين. الدكتور عبد الله شحاتة من علماء الأزهر وتوفي وكان له كتيب صغير في مواضيع السور، يرى أنها العقيدة وقضاياها التوحيد والبعث.

الكتيب المشهور أول مرة أتدبر يرى أنها تتكلم عن قوة الحق. الدكتور فاضل السامرائي، هم مش جايبينه لكن أنا وجدت أن واضح أن صاحب كتاب أول مرة أتدبر واخدها منه؛ لأن فاضل السامرائي أسبق، فاضل السامرائي كان قايل في لمسات بيانية أنها تتكلم عن قوة الحق وربط ما بين الرعد وقوته وبين القرآن. في كتاب اسمه، بس هم مش ضايفينه برضو، هي معجزة أسماء السور القرآنية، شايف أن التركيز على المعنى اللغوي لاسم السورة؛ لأن هو كتاب اسمه معجزة اسم السورة القرآنية، ويرى أن الرعد ده هنشرحه إن شاء الله لما نيجي أن الرعد فيه معنى الاضطراب، وكيف أن الرعد يأتي للتثبيت في أوقات الاضطراب.

دي كل ما قيل في أو ما وجدته قيل في موضوع سورة الرعد، واحنا لما نمشي مع بعض ممكن في آخر مجلس نحاول نراجع بقى إيه نطلع بإيه، حتى لو مش موضوع واحد، نطلع به من سورة الرعد إن شاء الله.

الميم والراء، تلك آيات الكتاب والذي أنزل إليك من ربك الحق ولكن أكثر الناس لا يؤمنون، عايزك تقرأ القرآن على مكث. الف لام ميم راء، تلك آيات الكتاب والذي أنزل إليك من ربك الحق. في البداية ما تشغلش بالك بقى ولكن أكثر الناس لا يؤمنون. وبعدين فجأة، الله، عارف كأن في سمعت مقطع الشيخ عبد الرشيد صوفي إذن في سورة غافر، برضو فجأة آية بدأت الله قعد يكررها كثيراً، يعني وقع بداية الآية وقع لفظ الجلالة على أذنك، أنت متوقع بقى إيه؟ هنرد على أكثر الذين لا يؤمنون وهنقول لهم إيمانكم ليه، ما بتؤمنوش بس الصح كذا. فجأة انتقال مفاجئ، الله، الله الذي رفع السماوات، اعتقاد يعني احنا كنا إقبال تلك آيات الكتاب واللي معاك الوحي ده الحق وكثير من الناس رافضة الحق. وبعدين فجأة انتقال للسموات والارض، شؤوط تطوير في السماوات والأرض، وبعدين حكم على اللي رفض الإيمان آخر الصفحة: أولئك الذين كفروا بربهم. طب ما كان والذي أنزل إليك من ربك الحق ولكن أكثر الناس لا يؤمنون، أولئك هؤلاء الذين رفضوا الإيمان هم الذين كفروا بربهم أولئك الأغلال في أعناقهم.

لا، القرآن ما بيعملش كده، القرآن مش بيدي معلومات وخلاص، القرآن مش بيخاطب العقل فقط وده إن شاء الله هنقولها في طريقة القرآن في تقرير العقائد. واللي أبدع هنا في الشرح ده كان كتاب دراسات قرآنية، شرح الفكرة دي، سواء في المقدمة أو في سورة، في المقدمة اللي عملها للكتاب في معرفة الله أو في سورة الرعد، كيفية أن يخاطب القرآن الإنسان كإنسان متكامل له عقل وله مشاعر.

الالف لام ميم راء هنا حروف مقطعة فيها الخلاف المشهور من أهل العلم، منهم من قال هي للتحدي، ومنهم من قال هي للتنبيه، ومنهم من قال هي هذه هي الحروف التي منها القرآن فأتوا أنفسكم، يعني ولله المثل الأعلى لما واحد يصنع شيء مبهر مثلاً، عربية مثلاً أو شيء خشب مبهر مثلاً، وبعدين يقول للناس تحتهم هذه الأدوات المسامير والخشب الذي صنعت منها، أروني أنفسكم. فهذه هي الحروف، لكن ده معنى جيد ممكن يكون معنى عام، لكن هذا لا يفسر لماذا هنا فيه اختلافات، يعني هنا ليه فيه ميم راء، هنا ليه فيه ميم صاد، هنا ليه فيه كاف هاء ياء عين صاد، يعني أطول سورة في الحروف المقطعة كبداية، يعني إذا كان حم عسق خمس حروف بس مفصولة، لأ، في آية واحدة سورة مريم، فقد يكون لها دلالات وأسرار. ومنهم من اختار ذلك، ومنهم أيضاً من السلف من فسر ذلك بأنها من اسماء الله أو أنها قسم أو أسماء سور، كل ده بالتفصيل في مقدمة سورة الأعراف، اللي اختار هنا من السلف أنها لها معنى أو دلالة قال أنا الله أعلم الميم بتيجي الألف لام ميم أنا الله أعلم، والراء بمعنى أرى، فتثبت علم الله ومراقبة الله سبحانه وتعالى، ده اللي اختار من السلف هذا المعنى.

تلك آيات، يبقى هنا من الأول احنا طالعين من سورة يونس وهود، حالة استضعاف، أنت ممكن تبدأ تشك أنا تجاوزت يوسف؛ لأن أنا قلت يوسف هي أصلاً تسلية، الضغط ممكن يخليك تشك في عقيدتك ومبادئك فبتحتاج تثبيت، زي بالظبط لما شرحنا في مقدمة سورة ياسين، وقلنا أحياناً الداعية يحتاج تثبيت، فيقول الله للنبي صلى الله عليه وسلم في أول السورة بالتأكيد إنك لمن المرسلين. طب ما هو عارف لكن يحتاج أن يسمعها، عارف لما أنت تقدم تضحيات كبيرة وتمر بابتلاءات كبيرة وتفقد وعتبات ولومة لائم تكثر عليك، وتفقد أعز الناس وتفقد أعز ما تملك، أنت في النفس تحتاج من يقول لها هي ليست نادمة، تحتاج من يقول لها أنت على الحق استمري، عايزة بس تسمع الكلمة دي ليه؟ ما تعيدش حساباتك أنت ماشي صح كمل، بيحتاج بس يسمع الكلام ده. مع الضغط المستمر على المؤمنين نبرة المشركين كانت بتعلو، انتم أصلاً مش على الحق، ما عندكوش آية، طب ورونا آية كده، طب هاتوا لنا آية واحدة، يقول الذين كفروا زي ما يجي لنا لولا أنزل عليه آية، بص تجيب لنا آية ياَّه لو يجيب لنا آية ده احنا هنقطع سكين الصلاة، نهار أبيض لو جاب لنا آية، أنت مش متخيل، بقى نتكلم لما نشرح طلبات الكفار للآية والفارق من الآية الحسية والمعنوية.

كثر الطلبات والمعنى ده اتكرر كتير جداً في القرآن المكي، معنى محوري، طلب المشركين لآية حسية معنى ما احنا هنشرح ده إن شاء الله. ده ممكن تكون من الواجبات، يعني أنت وأنت بتقرأ القرآن المكي شوف المواطن اللي طلب فيها المشركون آية من المسلمين، أو رد القرآن على الفكرة دي أصلاً. مع الضغط ده فتيجي السورة تقول ده أنت مش معاك آية، ده السورة ده هي على على معنى اللي اختار أن تلك بتعود على سورة الرعد، التركة دي فيها أقوال كتير قوي، هل الكتب المتقدمين ولا ما تقدم من نزول القرآن ولا الزمخشري اختار أن هي سورة رعد وتبعه كثير من المتأخرين، تلك بتعود على اللي هي سورة الرعد دي تحدداً، ده السورة دي آيات، ومش بس السورة دي وكل ما أنزل إليك من ربك هو الحق، والذي أنزل إليك من ربك من قبل، يعني قرآن مش بس الآيات دي هي آيات، مش بس سورة الرعد.

أنا هنا مش مش لازم في كل موطن أذكر الخلاف، أنا في موطن بذكر فيه خلاف وهنا أحياناً بختار من أقوال المفسرين، فاللي أنا قلته ده هو اختيار. تلك آيات الكتاب هذه السورة مليئة بالآيات، جاءتكم ليست آية، جاءتكم آيات، وكل القرآن آيات، والذي أنزل إليك من ربك من كمال ربوبيته ألا يترك الناس بدون وحي سبحانه وتعالى.

الذي أنزل إليك من ربك الحق مش حق، إيه الفرق بين، هو الأصل عندنا في اللغة العربية الحق هنا يعربها خبر، الحق هنا يعرب إيه؟ خبر. معلش، مستحيل يعني أنت بتطول وبتقول كلام مش مفهوم وكمان هتقول لغة عربية، لأ، ده أنت جاي تتخانق بقى، صلوا على النبي، الحق يعرب هنا إيه؟ يا خبر! الأصل في الخبر إنه ييجي معرفة ولا نكرة؟ نكرة، الله أكبر. لأ، أنا كمل بقى براحتك، الأصل في الخبر، ماشي، اللي هو بيسموه المسند، مش معنى احنا سكتنا لك أنك أنت بهت، لأ، مش للدرجة دي. الأصل في الخبر إنه بيجي إيه؟ نكرة. الأصل في المبتدأ إنه ييجي معرفة، يعني أنا أقول مثلاً محمد جميل، أخبر عن محمد أنه جميل، فهو عبر عنه بلفظ نكرة. لو أضفت الألف واللام يبقى أنا لي غرض آخر غير مجرد الإخبار، الإخبار خبر أخبرك خبراً، لو لعبت في الخبر بأي شكل من الأشكال، حطيت في الأول على المبتدأ إن، حطيت لام بعد كده تأكيد، حطيت قسم، حطيت قصر، أسلوب قصر ما وإلا، حطيت ألف ولام، أنت غرضك إضافي، لأ، أنت مش بس عايز تخبرني أن هو حق وبس، لأ، لأ، ده أنت عايز تقول لي ده مش مجرد هو حق، هو والحق.

طب تفرق إيه بقى، الألف واللام دي إيه؟ إما الانفراد أو الكمال، الحق الأوحد الكامل. بعض المفسرين اختار كده وبعضهم اختار كده. الحق إيه؟ احنا بقى نختار الاتنين أجمع، وهذا من فرائد المعاني القرآنية، الأوحد الكامل لا تدور على الحق في حتة تانية، ولو لقيت بعض الحق في أماكن أخرى فهو ناقص.

فمن الأول بتطمئن، ولذلك أنا يعني عجبني التقاط معنى الاطمئنان في السورة فعلاً: ﴿الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ﴾ [الرعد: 28] إن شاء الله ربنا يدينا ويديكم طول العمر لما نوصل لها يعني، هنقول جت في سياق إيه؟

بعضهم يتعامل معها على أنها مجرد أنك لما تقول الأذكار تطمئن، لا، هي لها معنى أعلى من ذلك أو إضافي إلى هذا المعنى.

تلك آيات الكتاب والذي في الاطمئنان الذي معك، الذي معك إيه؟ الذي معك إيه؟ مش حق، الذي معك إيه؟ الحق. زي الفارق ما بين الله إله وبين لا إله إلا الله، تفرق. هنا برضه تفرد الألف واللام دي، قلنا بتفيد إيه؟ لا، حصل القصر قبل كده، بتألفه بقى ماشي. اللي أنا قلته ده إيه؟ الانفراد والكمال والحق الأوحد. تعريف الخبر يفيد دائماً كده إما أنه أصبح كاملاً في شيء أو هو انفرد بالشيء، هو بنقصد الشيء عليه يعني.

ولكن أنت ممكن تستغرب، يعني اللي معنا ده هو الحق ووقوف البشر بعيد عنه، طب ما ده ممكن يخليني أششك، لأ ما تشكش، فعلا ولكن أكثر الناس لا يؤمنون. أيوه كتير من الناس مش هتقول.

أنا أذكر في مرة حكيت لكم أنا القصة دي لما كنت قابلني أحد الشباب وكان عنده شبهات إلحادية كبيرة، جلسة طويلة من جلسات النقاش استمرت من الظهر للعصر، كان جاي لي بورقة وش ظهر شبهات إلحادية. سيب الورقة دي على جنب تعال اتكلم، ومن حظي أن هو كان حافظاً للقرآن، سهل. سم والعياذ بالله، يعني مش عايز أقولها لحد، كان على شفا يعني أو شبه إلحاد يعني. قعدنا نتناقش نتناقش، وحتى اتكلموا عن القرآن وإعجاز القرآن، آه وفي الآخر ما اقتنعش.

وبعدين قصة طويلة يعني أياً كان، فقلت له إيه، طب اقرأ أنت بس اقرأ، فأشرت قلت له إيه، قال لي اقرأ إيه، قلت له اقرأ القرآن، اقرأ سورة الرعد. قال لي ما أنا مش بفهم قوي مش عارف، قلت له خلاص أحيلته على كتاب دراسات قرآنية. اتصلت بعدها بفترة، إيه الأخبار الليلة ما قرأتش حاجة، طب رجعت تصلي؟ لأ. الإسلام بقى وأنا قلت لأ لازم برضه ما بلاش أتَنرفز عليه وإزاي طب بعدها بكلمه، آه ها عملت إليه، لا ما ليـش، طب بتصلي، اللهم صلي اتنرفزت بصراحة فقدت أعصابي عليه وأيه قفلت.

بعد فترة لقيته وهو باعت لي بيقول لي أنا جيت فترة من حالة من الضيق الشديد، وقعدت أقول يا رب لو أنت موجود وريني آية، أنا عايز آية أريد آية، وبعدين هو سكن طلبه فلقى المصحف، هو ده الآية في إيه يعني؟ بيفتح لقى سورة الرعد فبيقرأ لقى ربنا بيقول له، هو كان دايما شاغله إيه، مش هينفع غير إيه حساسيتها، الغرب متقدم مادياً جداً، كان بالمعنى ده مسيطر عليه، المسلمين متأخرين والغرب معقول اللي بيفهموا في كل حاجة واكتشفوا معهم، فلازم عشان نكسبوا يبقى فيه إيه حساسيتها لو إحنا صح. ففوجئ أن ربنا بيقول لي، بيقول لي أنا طلعت بمعنى أن الله سبحانه وتعالى يقول لي إن الآية التي معكم أيها المسلمون ليست من جنس الآيات الحسية، ودي وجدتها في قول الله في السورة: ﴿وَلَوْ أَنَّ قُرْآنًا سُيِّرَتْ بِهِ الْجِبَالُ﴾، بيقول لي الآية بقى اللي ردت على أن ناس كتير بعيدة أول آية. ما تنشغلش بين صلاة في الناس ولكن إيه؟ أكثر الناس لي.

البداية فيها قوة، وهذا من أسلوب وهذا هنقوله إن شاء الله في الدرس بتاع الخطاب القرآني. القرآن بيتعامل مع قضايا أحياناً أنت متوقع أن القرآن لسه هيثبتها، لأ، القرآن بيتعامل معها على أنها قضايا يقينية، بيتجاوز مرحلة إثبات القضية إلى إقرارها. أنت عارف لما دي إيه، حد مثلا إيه مثلا الله موجود، فانت بتقول له لا إله إلا الله ده مش بس ده هو إله واحد، تتجاوزت القضية وبعدين بدأت تتكلم عن مصير من سيكفر بهذا الإله. يا أحمد أنا جاي أقول لك إيه الأدلة على وجود الله، أنت بتقول يعني بتتعامل معها كأنها قضية بديهية أصلاً، ممكن تشير له بس بعض الإشارات وبعض الأدلة، ثم تتجاوز ما بتقفش كتير، والقرآن بيعمل كده، يشيل إشارات وأدلة سريعة ثم لا يقف كثيراً عند هذه القضية.

وبعدين الكلام في أول آية عن إيه، تلك آيات الكتاب والذي أنزل إليك من ربك الحق، الكلام عن إيه هنا، عن القرآن، أتكلم عن الوحي، أن ما معكم من القرآن فيه آيات وكل القرآن آيات، لكن كتير من الناس فجأة السياق انتقل الكلام عن إيه؟ عن الله. يعني الآية أول ما هي بتتكلم عن الوحي، لذلك حتى بعض الناس يقول إيه، سورة الرعد تتكلم عن إنكار الوحي، وبعدين يقول لك لأ ده عن إنكار البعث، لأ ده عن إنكار وجود الله، هنشوف دلوقتي، فجأة السياق انتقل الله!

انتقل الحديث ليس عن الوحي، عن منزل الوحي، والخطاب هنا إحنا ممكن نستفيد منه كمؤمنين جداً، أن إحنا نرجع نكتسب الثقة في القرآن لما تعرف صفات من أنزل القرآن. طب ليه المثل الأعلى أنت لما بتلاقي كتاب وتكسل تقراه، فأحياناً أنت باصص في ظهر الكتاب فتفاجئ أن إيه، كاتب هذا الكتاب حصل على كذا واكتشف كذا واخترع كذا وعمل كذا، تقول يا نهار أبيض! لا لا لا ده أنا ما كنتش أعرف، لأ هات الكتاب وخلاص ها رجع. يعني معقول عمل كل ده واكتشف كل الاكتشافات دي وخد كل الجوائز دي، مش معقول! هيعمل لنا إيه، أي كلام، مش معقول! لأ أكيد الكلام اللي موجود في الكتاب ده مهم.

فلله المثل الأعلى، الله الذي رفع السماوات بغير عمد ترونها، ثم استوى على العرش، سخر الشمس والقمر كل يجري لأجل مسمى، يدبر الأمر يفصل الآيات لعلكم بلقاء ربكم توقنون. وهو الذي مد الأرض وجعل فيها رواسي وأنهاراً، ومن كل الثمرات جعل فيها زوجين اثنين يغشي الليل النهار، إن في ذلك لآيات لقوم يتفكرون، وفي الأرض قطع متجاورات.

نجد أن الثلاث آيات ورا بعض تحس أن الآية دي بتتنزل عليك أنت. الآية الأولى كلمتك بتقول لك خد بالك، هذه السورة مليئة بالآيات، وكل القرآن آيات وحق، لكن أكثر الناس لا يؤمنون، وفجأة الله، فانت بدأت تنصت. وبعدين بتفاجئ أن الصورة اللي بتترسم الوقتي عمالة تقرب منك، يعني الصورة اللي أُخذت عن السماوات والشمس والقمر دي الآية الأولانية، اللي هي كانت يعني في الترتيب هنا رقم اتنين. كده اللي بعدها من وسط المجرات الأرض وهو الذي مد الأرض، فبعد ما كان الخطاب لك أنت الصورة بتترسم حواليك سماوات وشمس وقمر فانت عمال تبص في الاتساع، وبعدين فجأة الصورة قربت منك وجابت لك الأرض بقى باتساعها والجبال والرواسي والأنهار وكل الثمرات، وبعدين فجأة الصورة قربت منك قوي وحطتك في مزرعة بعد الأرض الواسعة، مزرعة مليئة بالأصناف المختلفة الطعوم، وخدت بايدك وخلتك تذوق دي وتذوق دي والفرق بين المانجة والخوخ والفراولة والبطاطس، وتفاجئ أن هي أرض واحدة وماء واحد وفيها تفضيل، اقتربت إلى حاسة الذوق اللي بيلازمها، الآيات عمالة تخترقك تقرب معك، لذلك في الأول لعلكم بلقاء وبعد كده توقنون، وبعد كده آيات لقوم يتفكرون، وبعد كده أنت ما عندكش عقل بقى لو ما حسستش بالأداء، الآية قريبة منك جداً، تعقلون، لقوم يعقلون.

فالصورة عمالة تقرب منك لأن هي بتخاطبك أنت، السماوات باتساعها وبعدين الأرض وبعدين المكان اللي أنت فيه وبعدين لسانك. يعني ما قالش ونفضل بعضها على بعض حتى في اللون حاجة تشوفها من بعيد، لا في الأكل أنت اللي بتذوقها بنفسك، يعني اختلاف الألوان جه في سورة فاطر، هنا اختلاف الذوق حاسة التذوق. الصورة اللي بدأت بأشياء كبيرة ثم يعني نوع من الوسط وبعد كده الدقة، ده من إعجاز الرسم في السورة القرآنية، وده كنا شرحناه في مساق تدبر القرآن وإحنا بنتكلم على كتاب التصوير الفني.

الله الذي رفع السماوات بغير عمد ترونها. الله إعرابها إيه؟ معلش أنتم هتتعبوا معنا إيه؟ والله يا إخواننا إيه، مبتدأ. الذي رفع إعرابها إيه؟ طيب بعض المفسرين قال الذي فعلاً هنا إعرابها خبر، الذي يخبر الله سبحانه وتعالى يخبرنا عن نفسه أنه هو الذي رفع السماوات بغير عمد ترونها، ثم استوى على العرش وسخر الشمس والقمر كل يجري. وبعد ما أخبرنا عن نفسه سبحانه وتعالى أنه رفع السماوات بغير عمود، أخبرنا أيضاً بجملة مستأنفة جديدة، قال: يدبر الأمر يفصل الآيات، دي جملة جديدة خالص، الخبر الله يدبر الأمر، ركز معي، الله مبتدأ، الخبر إيه؟ يخبر عن لفظ الجلالة أنه إيه يدبر الأمر، أمال الذي رفع السماء ده إيه، ده نعت وصف.

طب بتفرق إيه، تفرق زي ما كنت بقول لك من شوية، ولله المثل الأعلى لما أقول لك كاتب هذا الكتاب هو الذي عمل وعمل وعمل وعمل وعمل كذا كتب الكتاب، يقول لك فلان، أنا عايز أقول لك فلان كتب الكتاب. عندنا في الآية الله يدبر الأمر، بس بدل ما يتقal كده بس الله يدبر الأمر، لأ تذكير، يقول لك فلان، المثل الأعلى فلان الذي فعل كذا وأخذ كذا وعمل كذا وعمل كذا وعمل كذا، كل ده أوصاف له، أيوه تخبرنا عنه إيه، ما له فلان، مات، ما له فلان، كتب هذا الكلام.

فلما يقال لك الله، ده سر اللي يختار أن إعرابي يدبر هنا خبر، له هنا معنى جديد، أن منزل هذا الكتاب الذي دبر الأمر وفصل الآيات عشان تعرفوا بس الآيات اللي أنتم هتقرؤوها دي من الذي أنزلها؟ الذي أنزلها بقدرته رفع السماوات بغير عمد ثم استوى على العرش وسخر الشمس والقمر كل يجري لأجل مسمى، فإذا كان الكون في هذا الاتقان فما بالكم بكتابه؟ فإذا كان الكون بهذه الدقة والإعجاز فما بالكم بالكتاب! يدبر الأمر يفصل الآيات، معي؟

ده سر اللي اختار هنا، وأكثر حد فصل بقى في المنطقة دي اللي عايز يرجع لها بالتفصيل، الإمام الطيبي في الحاشية على الكشاف وحاشيته عز وجل، أنا بقول المرة دي بحيث أن اللي عايز يرجع التفصيل بتاع الكلام ده، لأنه قال لو قلنا خبر هيبقى هتفيد هتدينا فايدة كذا ولو قلنا أن الذي نعت هتدينا فائدة كذا، بس أنا ها حاول إيه اختصر وأحيلكم على المراجع، وده اللي هنمشي به إن شاء الله بعد كده.

الله الذي رفع السماوات بغيرها، هنا المفسرين قالوا بغير عمد ترونها، الهاء دي بتعود على السماوات ولا اللي بتعود على العمد، هي تفرق؟ لو قلنا رفع السماوات بغير عمل ترونها، بغير عمل ترون الأعمدة، يعني فيه أعمدة غير مرئية، فهنا ترونها يبقى إعرابها وصف للعمد، فهنا بعض العلماء قال: أي نعم هناك أعمدة رفعت علي السماء ولكننا لا نراها. وبعض بقى المعاصرين اللي بيحاول يعني يأخذ العلوم الحديثة ويسقطها على الآيات قال: ومن هذه الأعمدة الجاذبية الأرضية، رشيد لما أوصيك أولى ما قيل وغيره إن كنت أنا مختلف معه في النقطة دي، أكثر من حد سمعته قال كلمة الجاذبية هي الأعمدة.

بعضهم قال لأ فيه أعمدة قد تظهر للعلم وقد لا تظهر للمؤمن، أنا لن أراها. بعضهم قال لا هي أصلاً مين اللي قال أن ترونها وصف للأعمدة؟ ترونها حال من السماوات أو جملة مستأنفة، أيها إنتم ترون السماوات هل تروا من عمل؟ يعني رفع السماوات بغير عمد تقف ترونها، أديكم شايفين، شعرت. فالله قادر على غير عادة الناس إذا أرادوا، إذا أراد الناس أن يرفعوا شيئاً رفعوه بأعمدة لكن الله لا يحتاج إلى أعمدة.

دائماً فيه فارق بين طريقة البشر في عمل شيء وبين فعل الله، والمعنى ده برضه فصلته تفصيلا أو أكثر حد أبدع فيه حملناك في مقدمة سورة فاطر، قال: يعني إيه الفطر، أن طريقة بناء الإنسان لمبنى غير طريقة خلق الله، مختلفة تماماً، دي طريقة ودي طريقة، طريق فعل الله لا يستطيعه بشر. فإن رفع السماوات بغير عمل ترونها إما السماء أو ترون العمل.

ثم استوى على العرش سبحانه وتعالى، استواء حقيقياً علا وارتفع سبحانه وتعالى، زي تعبير كتير من السلف: استواء حقيقياً بجلال وجهه وعظيم سلطانه، لا نعرف كيفيته، لا هنقعد نؤول ولا هنقعد نفوض الصفر نفسه، فوض الكيفية ونقول كما قال ربنا سبحانه وتعالى استوى على العرش، ثم نقول كما قال ربنا سبحانه وتعالى: ﴿لَيْسَ كَمِثْلِهِ شَيْءٌ ۖ وَهُوَ السَّمِيعُ الْبَصِيرُ﴾ [الشورى: 11]، وخلصت عشان ما نقعدش ندخل في حوارات وخناقات وقضايا، نثبتها ونقول ليس كمثله شيئاً وهو السميع البصير.

ثم استوى على العرش وسخر الشمس والقمر، الموضوع مش وشوية معدلات فيزيائية هي اللي ظبطت الشمس، طب وجات مين المعدلات الفيزيائية؟ مش شوية قوانين هي اللي خلت الشمس تمشي بالمنظر ده والقمر يمشي بالمنظر ده، مين اللي أجبرهم يمشوا في المسار ده وبالطريقة دي وبوقيت محدد لأجل مسمى، إما في منازل محددة تتغير كل يوم أو لأجل مسمى لوقت يوم القيامة، وبناء عليه أغلب المفسرين ثم يتوقف جري الشمس والقمر، الأمر ما مشيش كده، يتوقف وتكور الشمس والقمر لأجل المسمى. يبقى إذاً يا جماعة كل حاجة أنت شايفها بضبط بحسبان بتقدير من العزيز الحكيم العليم سبحانه وتعالى وبأجل ولها نهاية. يبقى الموضوع مش صدفة زي ما الدحيح كان بيقول في محاسن الصدف، الموضوع مش إيه بشوية أكون كتير اتعملت باظة ودي قامت ظابتة كده بالصدفة، تقديري العزيز العليم.

ربنا قال بعدها إيه: يدبر الأمر. اللي اختار أن الآية دي بتتكلم عن قدرة ربنا في الأحكام والإتقان قال أن الذي هنا خبر، يخبر الله عن نفسه أنه هو الذي رفع السموات فقال بعدها فعل ذلك ليريكم كيف أنه يدبر الأمر سبحانه وتعالى، وفعل ذلك حتى ترى تفصيل الآيات أمامك، كل حاجة مفصلة موضحة.

يعني مش ربنا بيكلمك على حاجة انت مش شايفها. لأ، انت شايف الشمس ونمط ومتابع إزاي إن لها تقدير وعارف إزاي إن ممكن دي لو اتحركت كل حاجة تبوظ، أو لو قربت أو لو بعدت. يعني مش بيكلمك عن مجرات أو كواكب أنت مش شايف الأدب، بيكلمك عن حاجات أنت بتحسها.

حتى هم قالوا من إعجاز الآية دي غير الآية اللي بعدها، إن ربنا خلى الليل والنهار مع آيات الأرض، وخلى الشمس والقمر مع آيات السماء؛ لأن الآية الأولانية بتتكلم عن السماء، التانية عن الأرض. الليل والنهار دي عوارض تحدث للأرض، لكن الشمس مش بتطفي بالليل وتيجي الصبح تنور. يعني اللي بيخلينا إحنا نحس إن هي بالليل مش إن الكبس بيفصل بالليل فالدنيا تضلم، وبعدين الساعة ستة الصبح أو الساعة خمسة بتفتح فتنور، لأ. هي الشمس على طول كده.

أمال عوارض الليل والنهارده بسبب حركة الأرض، فده أمر عارض بالنسبة للأرض. الليل والنهار فاتحط مع إيه؟ يغشي الليل النهار اتحطت مع آيات الأرض، لكن الشمس والقمر وجريهما اتحط مع آيات السماوات: ﴿وَسَخَّرَ الشَّمْسَ وَالْقَمَرَ كُلٌّ يَجْرِي لِأَجَلٍ مُّسَمًّى يُدَبِّرُ الْأَمْرَ﴾ [الرعد: 2] بصيغة المضارع. يعني إيه بصيغة المضارع؟

خلاص، ونختم دي، يعني الكون محتاج لربنا في كل لحظة، عكس ما كان بعض الفلاسفة بيقول: إن الكون ده عامل زي الساعة اللي اتْرَكَّبَتْ واتْعَمِلْت وبتلف لوحدها. بعضهم قام قايل كمان إيه؟ لأ، ده كمان الساعة دي اتعملت عشوائية وبالصدفة ظبطت الساعة فلفت لوحدها، كتاب الأحمق دوكينز لما بيتكلم عن صانع الساعات الأعمى. عشان كده كتير من الملاحدة دي يقول لك إيه: إحنا عندنا مشكلة في لحظة البداية، هاتوا لنا بس معجزة نعمل بها الـ (ستارت) بتاع الكون، وبعد كده الكون هو بيمشي نفسه مش محتاج ربنا.

لأ، هو الكون كُلَّ يَوْمٍ هُوَ فِي شَأْنٍ سبحانه وتعالى، رب العالمين يحتاج يمسك السماوات والأرض أن تزولا ولئن زالتا إن أمسكهما من أحد من بعده، كن في كل لحظة يحتاج إلى الله، وأنت في كل لحظة: لا تكلني إلى نفسي طرفة عين. فجت بصيغة المضارع: يُدَبِّرُ الْأَمْرَ يُفَصِّلُ الْآيَاتِ لَعَلَّكُمْ بِلِقَاءِ رَبِّكُمْ تُوقِنُونَ.

أنت متوقع لعلكم بوجوده؟ لأ، ده الآية تعدت إثبات وجود الله، وأن في منهج هينزل وهتتحاسبوا عليه، واللي إحنا بنكلمك عشان توقن بالبعث. إيه علاقة إحكام السماوات بهذه الطريقة باثبات البعث؟ مش دي مقدمة الآية؟ ﴿اللَّهُ الَّذِي رَفَعَ السَّمَاوَاتِ بِغَيْرِ عَمَدٍ تَرَوْنَهَا ثُمَّ اسْتَوَىٰ عَلَى الْعَرْشِ وَسَخَّرَ الشَّمْسَ﴾ [الرعد: 2] كل يجد بعد كده لعلكم بلقاء ربكم إيه؟ توقنون. بتتكلم على اليقين بلقاء الله اللي هو البعث. إيه علاقة مقدمة الآية دي بختام الآية؟ هذا ما سنعرفه في الحلقة القادمة.

هنكتفي بهذا القدر، سبحانك اللهم وبحمدك، أشهد أن لا إله إلا أنت، أستغفرك وأتوب إليك، وجزاكم الله خيراً.