د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم. أهلاً بكم في الحلقة الثانية من وقفات مع سورة الفاتحة ضمن برنامج آيات تتلى. بنكرر أن الغرض الأساسي من هذا البرنامج إحياء معاني الإيمان تجاه السور التي نسمعها كثيراً وتمر علينا ونحن لا نشعر المعاني المبثوثة فيها. العجيب أن السورة اللي معنا سورة عظيمة، بل لا أقول عظيمة، هي أعظم سورة في كل الكتب كما تكلمنا في الحلقة الماضية. المرة دي عايزين نتكلم عن المعاني.
المرة اللي فاتت حاولنا نتكلم عن الفضائل ومقدمة بحيث إنك تبقى عارف خريطة السورة. ليه مهم أنك تعرف خريطة السورة؟ لأن احنا قلنا ده المجمل. فبالتالي القرآن كله أصلاً عبارة عن تفصيل لهذا الفهرس الذي ذكر في أول المصحف. هذا الإجمال الذي ذكر في أول القرآن، تفتح المصحف تلاقي أول حاجة سورة الفاتحة. طيب، قلنا تاني عشان تركز، الخريطة عبارة عن إيه؟ ثناء ودعاء وآية بتحدد وجهتك. ثلاث آيات: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾ [الفاتحة: 2-4]. والآية اللي بتحدد أو بتعيد تعريفك كإنسان أو بتعيد وجهتك وقبلتك: ﴿إِيَّاكَ نَعْبُدُ وَإِيَّاكَ نَسْتَعِينُ﴾ [الفاتحة: 5]. إيه الطلب؟
يعني دي مقدمة ثناء، وبعد كده تعريف، عارف لما أنت مثلاً تكتب طلب؛ الأول ثناء تثني على اللي هتبعت له الطلب، وبعد كده أنت عايز إيه؟ أنت مين أصلاً الأول؟ ﴿إِيَّاكَ نَعْبُدُ وَإِيَّاكَ نَسْتَعِينُ﴾. إيه هو طلبك والدعاء؟ ما قالش أسألك الهداية، لأ، الدعاء فيه تفصيل، وده هنتكلم عنه إن شاء الله. طيب، تعالوا بقى نقف بسرعة وقفات مع هذه المعاني. عندنا في الأول ثلاث معاني مهمة قبل ﴿إِيَّاكَ نَعْبُدُ﴾: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾. وكل كلمة بتقولها لو أنت عايش المعاني دي في الصلاة، يرد الله سبحانه وتعالى عليك؛ فإذا قال العبد: ﴿الْحَمْدُ لِلَّهِ رَبِّ الْعَالَمِينَ﴾، قال الله سبحانه وتعالى: حمدني عبدي.
أول كلمة بتستفتح بها علاقتك بالله هي الفاتحة اللي هتفتح لك الخيرات في الدنيا والآخرة، أول آية تستفتح بها الشفاء اللي يصرف عنك السموم، أول آية تستفتح لك الطريق أن تحمد الله سبحانه وتعالى. ﴿الْحَمْدُ لِلَّهِ رَبِّ الْعَالَمِينَ﴾. الحمد كلمة مليئة بالثناء، مليئة بالحب، مليئة بالخضوع؛ لأن الحمد غير المدح. أنت لما بتمدح حد أو بتشكر حد، بتمدحه على بعض الصفات الجميلة أو عمل خير قدمه للناس. لكن الحمد هو الذي يستحق الثناء لذاته. يعني إيه الكلام ده؟ يعني في واحد ما يحمدش ربنا غير لما توصل له النعمة، لكن لو حرم من بعض نعم ما يحمدش ربنا، ده اسمه الشكر، أنك أنت لما يجي لك نعمة تشكر الله سبحانه وتعالى مقابل نعمة، ده اسمه الشكر. لكن الحمد: أن تحمد الله سبحانه وتعالى على أسمائه وجماله وصفاته، أن تحمد الله سبحانه وتعالى على جمال خلقه وعلى سعة كونه، أن تنبهر بخلق ربنا سبحانه وتعالى. لذلك الحمد، وقدمت كلمة الحمد بالألف واللام، وأنك بتستغرق في كل ألوان الحمد، يعني أنا نفسي حياتي كلها أن أنا أشكر ربنا.
جه صحابي للنبي صلى الله عليه وسلم بيقول له: يا رسول الله أنا مجهز محامد ويعني ثناء على الله وعايز أقوله. شوفوا، يا صحابي جاي مبسوط عايز يثني على ربنا، فقال له النبي صلى الله عليه وسلم: إن ربك يحب الحمد. النبي صلى الله عليه وسلم بيقول له أنت إنسان موفق، أنت وفقت. النبي صلى الله عليه وسلم لواء الحمد يوم القيامة، النبي صلى الله عليه وسلم يفتح عليه يوم القيامة حتى يشفع أن يفتح عليه بمحامد لم تفتح. عايزك تتفنن في الثناء على الله، عايزك تقعد كده تفكر ازاي تثني على ربنا، ازاي تقعد تفكر ربنا بيحب إيه وأنا أعمله. ربنا بيحب سبحان الله وبحمده هاقولها، ربنا بيحب أن أنا أشكره على نعمه هاشكره، ربنا يحب أن أنا أتأمل في خلقه هتأمل في خلقه وأثني على الله سبحانه وتعالى. أنا هاتفنن في ده.
﴿الْحَمْدُ لِلَّهِ رَبِّ الْعَالَمِينَ﴾. يعني إيه يا رب؟ خلق الرب ومالك. طب ما هي، طب ما في في ﴿مَالِكِ يَوْمِ الدِّينِ﴾ وفي الملك. إيه الفرق بين رب ومالك؟ قالوا: الرب مش بس اللي بيملك الشيء، ربنا سبحانه وتعالى مش فقط بيملكنا، احنا بنقول أنا لله، فالله سبحانه وتعالى يملكنا، مش بس يملك الكون. لأ، الله سبحانه وتعالى يربي الكون، الرب جاي من التربية، يعني الشيء بيكون الأول صغير، وبعد كده يكون صغيراً ثم يكبر رويداً، في كل لحظة يحتاج إلى غذاء. ﴿يُخْلِقُكُمْ فِي بُطُونِ أُمَّهَاتِكُمْ خَلْقًا مِّن بَعْدِ خَلْقٍ﴾ [الزمر: 6]. بذرة في الطين ماء تكبر جذور ساق أوراق تخرج الثمرة. من الذي فعل ذلك؟ ﴿وَالسَّمَاءَ بَنَيْنَاهَا بِأَيْدٍ وَإِنَّا لَمُوسِعُونَ﴾ [الذاريات: 47]. والكون كان رتقاً ففتقناهما. إيه اللي عمل الكون ده؟ إيه الكون ده لما اكتشفوا صورة بس للثقب الأسود العالم انبهر، مين اللي خلق الكون ده؟
مين اللي رتب هذه السماوات وهذه الأفلاك وهذه الأجرام وهذه المجرات وهذه الكواكب وهذه الشموس وهذه الأقمار بهذا الترتيب؟ مين اللي عمل كده؟ ومين اللي جعل البذرة مع الطين أن هي محتاجة غذاءها والجذر ينزل في الأرض ويجي له الماية من باطن الأرض، وبعدين يطلع ثمرة تكون مناسبة للمعدة بتاعة الإنسان كلها؟ ويأتي الورق يأكله الحيوان تكون مناسبة لمعدة الحيوان، فيتغذى الحيوان فيكبر فيكون اللحم مناسباً للإنسان. إيه ده؟ إيه التنسيق المبهر ده؟ فاللحمة تنزل في باطن الإنسان فيخرج إنزيمات وهرمونات مناسبة أيضاً لهضم اللحم، ثم يتحول إلى غذاء يتوزع في جميع أنحاء الجسد، التحول إلى طاقة. إيه اللي رتب ده كله؟ والكون كله قاعد بيكبر وبيتحرك، الكون مش ثابت وبيدور، في كل لحظة يحتاج إلى الله، لو تركه الله لهلك. السماوات والأرض لو تركها الله لهلك الكون. ﴿لَا تَأْخُذُهُ سِنَةٌ وَلَا نَوْمٌ﴾ [البقرة: 255] سبحانه وتعالى.
يبق إذاً الإنسان لابد أن يستحضر الكون وهو في كل لحظة محتاج لربنا، فيقول: ﴿الْحَمْدُ لِلَّهِ رَبِّ الْعَالَمِينَ﴾. عوالم: عالم الإنس، وعالم الجن، وعالم الحيوان، وعالم الطيور، وداخل عالم الحيوان عالم النمل وعالم النحل وعوالم من الحشرات، وعوالم من النباتات وعوالم من الطحالب والبكتيريا والميكروبات عوالم. وكل شوية كان يقول لك ده ميكروبات، لأ ده بكتيريا وفطريات ومش عارف وعوالم مختلفة. إيه ده؟ رب العالمين! لدرجة أن بعض العلماء قال معنى جميل قوي. قال العالم ده اسم زي الخاتم، يعني ده الخاتم بيستعمل، فالعالم أشبه بالطابع دي علامة، فكل هذه العوالم آيات تدل على الله سبحانه وتعالى، المفروض أي حاجة تشوفها تقول: ﴿الْحَمْدُ لِلَّهِ رَبِّ الْعَالَمِينَ﴾.
هذا الإله العظيم أنت متخيل أن يعني هذا الإله العظيم رحمن رحيم سبحانه وتعالى؟ أنت متخيل أن كل صفاته هتكون صفات فيها تعذيب وفقط؟ لأنه سبحانه وتعالى الذي خلق، والخلق ده مش عبث. لكن بالرغم من ذلك، قبل ما تقول ﴿مَالِكِ يَوْمِ الدِّينِ﴾ حتى تصل إلى يوم الدين آمناً مطمئناً، بتقول: ﴿الرَّحْمَٰنِ الرَّحِيمِ﴾. الرحمن الرحمة الواسعة، الرحيم الرحمة الدقيقة. فبعض العلماء قال: الرحمن لما تكون محتاج حاجة ضخمة، حاجة مثلاً زي اسم الرحمن كده في سورة مريم كلها معجزات، فيجي اسمه الرحمن. الرحيم أنت محتاج دقائق وتفاصيل في حياتك. لذلك العلماء بيقولوا أنت محتاج رحمات ضخمة ومحتاج رحمات دقيقة. يعني أنت محتاج تفاصيل في البيت وتفاصيل مع عيالك وتفاصيل في الشغل، ده اسمه الرحيم، ومحتاج قفازات في حياتك، دي بتيجي من اسم الله الرحمن. فلذلك بعضهم قال: الرحيم جه بعد الرحمن حتى ما يظنش إنسان أنك تسأل الله سبحانه وتعالى في الأمور العظيمة فقط، لا، تسأل ربنا سبحانه وتعالى في الأمور العظيمة والأمور الدقيقة. حتى ملح طعامك وحتى الحذاء أعزك الله إذا انقطع، تطلب من الله سبحانه وتعالى، فتطلب من الله كل شيء. تفاصيل الحياة في الدنيا والآخرة تطلبها من الله سبحانه وتعالى. هي دي الرحمن الرحيم تفاصيل حياتك في الدنيا والآخرة تطلبها من الله سبحانه وتعالى، هو دعاء الرحمن الرحيم.
بعد كده ﴿مَالِكِ يَوْمِ الدِّينِ﴾. يبقى إذاً ده طلع أن الكلام عن الكون والعوالم ورحمة ربنا سبحانه وتعالى ورب العالمين، وبيدخل طبعا الملائكة والإنس والجن وكل العوالم رحمات ربنا سبحانه وتعالى المبثوثة في الكون. ده طلع أن فيه حاجة اسمها يوم الدين، ﴿مَالِكِ يَوْمِ الدِّينِ﴾. اختيار أن يوم القيامة اصطفاء من الله سبحانه وتعالى أن يتكلم بهذه الآية ﴿مَالِكِ يَوْمِ الدِّينِ﴾. كلمة الدين ديانة مبهرة، لذلك العلماء حاروا، طب ما أسماء يوم القيامة كتير في القرآن؟ يعني لما تيجي ده بالعكس فيه كتب أصلاً عن أسماء يوم القيامة في القرآن، وعن مشاهد يوم القيامة في القرآن. طب هنا الدين تحديدا قال له بتجمع معنيين، طبعا أنا بحاول يعني إيه أخلص اللي العلماء قالوا لأنهم اتكلموا في الدين دي كلام كتير. بل أهل اللغة لما تكلموا في الدين فصلوا فيها وجابوا الأبيات الشعر اللي بتدل لمعاني مختلفة.
لكن أحد المعاصرين قال معنى جميل قوي. قال الدين بيركز على معنيين مهمين جداً: الجزاء والحساب، والمنهج. بعض العلماء يركز على فكرة الجزاء والحساب ويجيبها من الدينونة وأنك أنت تدان وأن أنت ستحاسب، يوم الدين بمعنى يوم الحساب. لكن قال طب ما الدين عندنا بمعنى المنهج؟ طب ما أنزل الله سبحانه وتعالى لنا ديناً، فبالتالي أنت بتتبع منهج، بتتبع ديناً قيماً ملة إبراهيم حنيفاً. طب إيه الرابط بين الاتنين؟ كيف ستحاسب بدون منهج؟ ما هو معنى أن ربنا سبحانه وتعالى هيحاسبك وستخضع للحساب وللموازين والصحف ستقرأ يوم القيامة، معنى كده أن أنت أعمالك هتصحح على منهج. فجمعت بين الحساب والمنهج في كلمة واحدة.
يبقى الكلمة دي بترد على كل الشبهات الإلحادية. كلمة يوم الدين لو آمن بها إنسان تغيرت وجهته، وبالفعل كثير من الشبهات دين الإنسان بتقوم على أن هو للأسف يتجاهل الدار الآخرة. بل أصل من أصول الكفر هو تجاهل الدار الآخرة. واستقرار الإيمان بالدار الآخرة في قلب الإنسان يحول حياته تماماً. كتير عايزكم أنتم بتقرأوا كده وأنتم بتختموا في رمضان وأنت بتختم المصحف، بص على كلمة بل كذبوا أو أعرضوا عن الدار الآخرة، أو كفروا بالدار الآخرة. شوف المعاني دي هتجد أن تجد مثلاً شوط طويل من الكفر، وبعد كده ربنا يقول إنهم كذبوا بالساعة، وأن سبب الكفران والشبهات اللي قالوها والإعراض وحب الدنيا كان بسبب أنهم يحبون العاجلة، أو بسبب أنهم يذرون الآخرة، أو بسبب أنهم كذبوا بالساعة. يبقى عكس ده لو استقر الإيمان بالآخرة في قلب الإنسان، كثير من القرارات المصيرية في حياته سيتخطاها بسهولة. احنا طابور القرارات متأخر في حياتنا بسبب أننا مش عايشين مع معالم الدار الآخرة، احنا مش عايشينها أصلاً، احنا بالنسبة لنا الدار الآخرة سراب، عكس الصحابة. قال الله سبحانه وتعالى واصفاً أهل الإيمان: ﴿وَبِالْآخِرَةِ هُمْ يُوقِنُونَ﴾ [البقرة: 4]. هم عندهم الآخرة يقين، وعندهم الدنيا ها سراب. احنا عندنا العكس، الدنيا اللي أنا ماسكها بإيدي هي، والآخرة سراب.
﴿مَالِكِ يَوْمِ الدِّينِ﴾ أو ﴿مَالِكِ يَوْمِ الدِّينِ﴾ في قراءة متواترة أيضاً. أي أن هذا اليوم لا يتكلم فيه أحد إلا الله سبحانه، ولا يتكلم أحد إلا بإذنه سبحانه وتعالى. في الدنيا فلان يظلم، وفلان يعلو العرش، فلان يتصارع ويقتل، وفلان يعذب، وفلان يملك، وفلان يعطي الأوامر، هذا كله يزول، هذا ملك مجازي عابر ليس له حقيقة دائمة. كل هذه الملوك وكل هذه العروش ستسقط، ويأتي يوم هل تحس منه من أحد أو تسمع لهم ركزا؟ ﴿لِمَنِ الْمُلْكُ الْيَوْمَ ۖ لِلَّهِ الْوَاحِدِ الْقَهَّارِ﴾ [غافر: 16]. سوف يأتي اليوم كل هذه العروش سوف تسقط. ﴿مَالِكِ يَوْمِ الدِّينِ﴾.
يأتي يوم الشمس قريبة من الناس، الناس حفاة عراة لا يتكلم أحد. هذا المشهد الحقيقي الذي ينبغي أن يكون عليه الناس في الدنيا، لكن هذا يطغى إن رآه استغنى، هذا بمجرد أن ملك جزءاً من الدنيا يطغى ويقول يا ربي ويعترض على الله سبحانه وتعالى ولما ويقتل ويعذب، هذا سوف يحشرون يوم القيامة كأمثال الذر يطأهم الناس بأقدامهم. ﴿مَالِكِ يَوْمِ الدِّينِ﴾ بترد على كل الشبهات الإلحادية من الجانب النفسي. ليه فيه شر في الكون؟ ليه ربنا ما بينتقمش من الظالم؟ ليه ربنا سابنا نتعذب واحنا مسلمين؟ ليه ربنا ساب الأطفال تقطع؟ ليه ربنا ساب المسلمين يحرقوا؟ ﴿مَالِكِ يَوْمِ الدِّينِ﴾ ترد على كل هذه التساؤلات، أن العدل الكامل المطلق سوف يأتي يوم القيامة، أن هذه الدنيا دار ابتلاءات؛ لأن ممكن واحد يقول الرحمن الرحيم ازاي الحمد لله رب العالمين؟ طب أنا شفت المخلوقات فأثنيت على ربنا. طب الرحمن الرحيم ازاي والمسلمين في السجون؟ الرحمن الرحيم ازاي والأطفال بيعذبوا ويلقى عليهم في غزة؟ الرحمن الرحيم ازاي والمسلمين بيتقطعوا؟ الرحمن الرحيم ازاي؟
فيقَالَ لك: انتظر لا تتعجل، ﴿مَالِكِ يَوْمِ الدِّينِ﴾ هذه ليست النهاية، الدنيا ليست النهاية. ﴿وَلَوْ يَشَاءُ اللَّهُ لَانْتَصَرَ مِنْهُمْ﴾ [محمد: 4]، لكن الله سبحانه وتعالى يؤخرهم ليوم، يوم تشخص فيه الأبصار. الله سبحانه وتعالى يؤخرهم لذلك اليوم، يوم العدل المطلق، يوم الحكم الذي لا يتكلم فيه أحد، يوم يلقى الكفار في جهنم، المسلمون يجلسون على الأرايك متكئين في الجنة ينظرون إلى أهل الكفر، ينظرون إلى من كان يعذبه. ﴿مَالِكِ يَوْمِ الدِّينِ﴾ كلمة تسكب الطمأنينة. لذلك شوف الإعجاز حينما يقول الإنسان ﴿مَالِكِ يَوْمِ الدِّينِ﴾ يقول الله سبحانه وتعالى: فوض إلي عبدي، أه ما أنا فوضت برضه، ما أنا مش خايف مش زعلان من حاجة بتحصل في الدنيا ليه؟ لأن في يوم.
سآخذ فيه حقّي كاملًا ممن ظلمني. مالك يوم الدين. المقدمة حمد وثناء على الله سبحانه وتعالى؛ أهم اسمين والاسمان نفس المعنى سبحان الله؛ لأن سبقت رحمتي غضبي كما قال الله سبحانه وتعالى: الرحمن الرحيم. استحضار مالك يوم الدين، يوم القيامة.
دي معاني محورية في حياتك. يبقى لو احنا هنقول في سبع معاني لازم تكررهم في حياتك: لازم تكرر الثناء، الرحمة، وأنك تكتسب هذا الخلق بينك وبين الناس، الدار الآخرة. دي من المركزيات الوحيدة. بعد كده تقول: إياك نعبد وإياك نستعين.
يعني إيه إياك نعبد وإياك نستعين؟ كان المتوقع تقول: نعبدك. خلينا بس الأول نقول المتوقع إيه، وبعدين نقول القرآن جابها إزاي. كان المتوقع لو ده كلام برة القرآن مش نعبدك كمان، كان متوقع نقول: نعبده؛ لأني باتكلم عن ربنا مقام الغيب. أنا باتكلم عن ربنا من أول السورة، بقول: الحمد لله رب العالمين. بتكلم عن ربنا، ما قلتش: الحمد لك، مش بكيف الخطاب، أنا مش بخاطب ربنا، أنا باتكلم عن ربنا. ركزوا معي في الحتة دي.
أنا باتكلم عن ربنا من أول السورة، بقول: الحمد لله رب العالمين، الرحمن الرحيم. كأني بقول: هو مالك يوم الدين، خلاص. وبعد كده فجأة ما قلتش: نعبده؛ لأ. وما قلتش: نعبدك؛ ده أنا باقول: إياك نعبد. هنا حصل نقلة عجيبة في السورة، العلماء توقفوا هنا وقالوا: إيه ده؟ ده بيسموه في اللغة الالتفات؛ يعني أنا كنت بتكلم عن ربنا فجأة وصلت المقام وكأني أقف بين يدي الله وكأني أرى الله سبحانه وتعالى وأخاطبه وأقول: يا رب أنا بابعبدك يا رب. إيه ده! يعني أنا لما قعدت أكرر الثناء على الله، وأكرر معاني الرحمة، وأكرر استحضار الدار الآخرة، إيماني قعد يعلى يعلى يعلى لدرجة أن أنا وصلت لمرتبة الإحسان؛ فأعبد الله سبحانه وتعالى كأني أراه، فأخاطبه وأقول: يا رب أنا بابعبدك يا رب، ومش بقولها بس كده؛ يا رب أنا ما بابعبدش غيرك، أنا ما فيش في حياتي غيرك. فهي دي كلمة الكاف بتاعت معبود وكده، شلناها وحطيناها قدام وحطينا معها إياه، فبقت: إياك نعبد؛ يعني يا رب أنا ما أعرفش في حياتي غيرك، إني عبدك، ابني عبدك، ابن أمتك. أنا أصلاً يعني في سليل العبودية، أنا ما ليش حد، أنا عبد وأبويا عبد وجدي عبد وأمي أمة، جدتي أمة، عبدك ابن عبدك ابن أمتك، ما ليش غيرك أصلاً، هروح لمين؟
إياك نعبد، وبدخل نعبد؛ يعني جاي أدخل في عبادك الصالحين، جايز أنا مذنب، ما قلتش: إياك أعبد، بستحضر عبادات المسلمين: يا رب دخلني وسطهم يا رب، يا رب أنا نفسي أوصل، دخلني وسطهم. إياك نعبد، يا رب أنا وجهتي أن أنا عايز أعبدك يا رب، العبودية الخضوع، الذل، الانكسار، الحب؛ طريق معبد، طريق ما فيش فيه مطبات، طريق ربنا كده تمشي عليه بقمة السهولة واليسر. إياك نعبد، ده طلب عالي قوي ما أقدرش عليه يا رب، أنا بك وإليك، أنا ما ليش غيرك، فيا رب إياك نستعين، وأيضاً أطلب منك العون على عبادتك.
سبحان الله! يعني أنت متخيل أنك رايح -ولله المثل الأعلى- رايح لشركة تقدم مثلاً تقول لهم: أنا عايز أشتغل عندكم بس أنتم اللي هتساعدونا؟ يعني أنت هتشتغل عندنا ولا احنا اللي هنساعدك؟ ولله المثل الأعلى، هذا لا يكون إلا من الله سبحانه وتعالى. تطيعه وتطلب العون منه فيعينك، ثم يثيبك على ما أعانك عليه، ثم يدخلك الجنة بفضله وكرمه ورحمته سبحانه وتعالى. عايز إيه أكتر من كده؟
إياك نعبد وإياك نستعين. الألف والسين والتاء للطالب، تطلب العون؛ لن يعينك أحد إلا الله. إياك نستعين دي ديناً عايزك تعتبرها مثلاً قنبلة تفجر أي أسباب جواك، أي تعلقات جواك بشيخ، بعالم، بمربي، بحد هيفهمك، لما حد يوصلك إياك نستعين دي تدمرها: كلّكم ضالّ إلا من هديت، كما قال الله في الحديث القدسي. إياك نستعين دي تخليك أنت عايز توصل لربنا به وفقط، إياك أن تتعلق بغيري. أحياناً نحن نؤتى أن أنا متعلق بصوت فلان الحلو، وبدرس فلان الجميل، وبكتاب فلان؛ لا لا لا، دي كلها وسائل وأسباب قد تؤتي وقد لا تؤتي، قد تؤتي ثمارها وقد لا تؤتي ثمارها.
إياك نستعين. طيب، المقدمة: ثناء، الرحمن الرحيم، استحضار معنى الرحمة، استحضار الدار الآخرة، دي مركزيات لازم أكررها في حياتك. احنا قلنا إن ده الإسلام في سبع آيات، هو ده الإسلام. بعد كده: أنت مين؟ أنا عبد. هتعملها ازاي؟ بالاستعانة. طب عايز إيه بقى؟ خلاص، المقدمة وعرفت نفسك، يعني أنا الثناء وعرفتني، عايز إيه؟ هذا الطلب الذي اختاره الله لي أن أطلبه: اهدنا الصراط المستقيم. يا رب أنا نفسي أنك تهديني يا رب، الهدى الدلالة والإرشاد برفق، يا رب خد بايدي، أنا غلبان، أنا ما أعرفش أتحرك لوحدي يا رب، يا رب خد بايدي برفق، أنا ضعيف. الهداية مش اهدنا إلى الصراط المستقيم، لا، اهدنا الصراط؛ يا رب خليك معي طول الطريق. الصراط المستقيم ده الكلمة دي عجيبة قوي، كلمة كسرت الحواجز من الدنيا والآخرة، الصراط ده مكمل لغاية الجنة؛ يعني الصراط ده مكمل من أول لحظة الإسلام، أشهد أن لا إله إلا الله، وبالشرائع وبالعبادات، ومكمل في القبر، ومكمل لغاية الفردوس الأعلى لو أنت ماشي صح على الصراط المستقيم؛ يعني الفاتحة كسرت الحواجز بين الدنيا والآخرة.
استحضر معي كده مشهد الصراط المستقيم، ده طريق من أول لحظة الإسلام، ممتد لغاية الجنة، والطريق ده أنا مش ماشي عليه لوحدي، الطريق ده فيه ناس سبقتني عليه، الأنبياء وعلى رأسهم محمد صلى الله عليه وسلم، وبعد كده -لدرجة أن بعض العلماء قال:- وبعد كده المهاجرين والأنصار، بعد كده اتباع الأنبياء، وأنا بقى ماشي وراهم، ماشي على الصراط. اهدنا يا رب أنا عايز امشي على الطريق ده، الصراط ده صعب قوي، الطريق ده ممكن أقع من عليه، الطريق ده أحد من السيف وأدق من الشعرة، والطريق ده فيه ناس كتير قدروا يمشوا عليه، الطريق ده مش مستحيل، الناس اللي مشيت عليه مشيت ازاي؟ مشيت بفضل ربنا؛ فبيقول: يا رب اهدنا الصراط المستقيم، الاستفسارات دي صعب، هم مشيوا عليه ازاي؟ يا رب دول ما عرفوش يمشوا عليه غير لما أنت وفقتهم: صراط الذين أنعمت عليهم. أنت اللي أنعمت، مش هم اللي... لا لا لا، ده بأنعامك يا رب. صراط الذين أنعمت عليهم، لولا أنعامك ما كانوش مشيوا، وأنا يا رب لولا أنعامك مش هاعرف امشي، يا رب أنا عايز امشي وراهم، يا رب أنا عايز أحصلهم «وآخرين منهم لما يلحقوا بهم» زي في سورة الجمعة. يا رب أنا عايز ألحق بهم، في أمل؟ آه، في أمل بالدعاء والتضرع وتوحيد الوجهة وتجديد العزيمة: إياك نعبد وإياك نستعين، اهدنا الصراط المستقيم صراط الذين أنعمت عليهم. يا رب أنا عايز امشي وراهم، نفسي أوصل لهم، نفسي أوصل لغاية لما أشرب من إيد النبي صلى الله عليه وسلم في الحوض النبي صلى الله عليه وسلم، نفسي أوصل لغاية لما أعدي على الصراط كالبرق أو كالريح أو كأجاويد الخيل من غير ما أقع من على الصراط، نفسي يا رب أبابا ماشي كده في الدنيا بس أنا بابقع كتير قوي، أنا كل شوية أقع، فلذلك يا رب أنا بابطلب منك كل شوية: اهدنا الصراط المستقيم.
ما بين كل صلاة وصلاة وقعت كتير؟ قوم وقل: اهدنا الصراط المستقيم. ما بين كل صلاة وصلاة وقعت في ذنوب؟ قوم وقل: اهدنا الصراط المستقيم. طب الصلوات خلصت؟ قم في قيام: اهدنا الصراط المستقيم. قم بعد الفجر قل: اهدنا الصراط المستقيم. صلّ الضحى وقل: اهدنا الصراط المستقيم. هتقع كتير، قوم كتير؛ لأنك لو وقعت يا إما تقع كده مع المغضوب عليهم، أو تقع كده مع الضالين. غير المغضوب عليهم: اليهود اللي كانوا عارفين الصح وأصروا أن هم يعملوا الغلط، أو تقع مع الضالين: النصارى اللي ما رضوش يسمعوا أصلاً ومشيوا بدماغهم، مشيوا بهواهم فوقعوا في الضلال. ففي ناس عايزك تستحضر بقى الختام بقى، مشهد الفاتحة النهائي وانت قبل ما تقول آمين، مشهد طريق بادئ من الدنيا لغاية الآخرة مكمل معك، فيه ناس بتقع هنا وفيه ناس بتقع هنا وفيه ناس بتقع على الصراط. أنت شايف ناس عمالة تقع: اليهود والنصارى والمشركين والمنافقين، كل دول عمالين يقعوا، وأنت مرعوب تقع.
مش معنى أن أنا بقول إن غير المغضوب عليهم اليهود والضالين نصارى أن كده أن احنا مش هنقع، لا لا لا، ممكن يكون فيك أخلاق اللي بتجلب الغضب والعياذ بالله، أو أخلاق من اللي بتتسبب في الضلال، فلذلك وأنت بتختم خاتمة رمضان، بص كده إيه الآيات اللي قالت إن ربنا يغضب هؤلاء وأوعى تعملها، الآيات اللي ربنا قال عليها إن هؤلاء لا ينظر إليهم يوم القيامة ولا يزكيهم أحذر منها، الآيات اللي قالت إن اللي هيعمل كده هيضل ويشقى، مين اللي هيعمل كده؟ خد بالك. يا رب أنا نفسي امشي ورا النبي صلى الله عليه وسلم، أنا نفسي امشي ورا الصحابة. خايف أقع، معقول إنسان يدعي الدعاء ده ومستحضر معانيه ويكون بيحب واحد يهودي، أو يكون قدوته واحد نصراني، أو يكون قدوته واحد مشرك، أو يكون منبهر بواحد وثني، أو يكون بيقلد واحد ملحد؟ معقول واحد يقول يا رب بلا خايف مع المغضوب عليهم والضالين، ويكون قدوته في الحياة غير الصحابة؟ معقول! ده واحد مش فاهم هو بيقول إيه، ده واحد مش فاهم المعاني الرئيسية. فلذلك عجبني الشيخ إبراهيم السكران لما عمل مقالة اسمها كل المنهج في أم الكتاب، كان معنى جميل جداً، وركز في الآخر على خطورة الصراط المستقيم وأنك أنت ممكن تقع.
يبقى أنا داخل الصلاة نقول: الله أكبر، أنا خايف، خايف نفسي ربنا يهديني، خايف أقع. سبل الضلال كتير، كمية الشبهات اللي بنسمعها لا تحصى، كمية الشهوات اللي حوالينا كتير، بدخل الصلاة في كل مرة مستحضر كلمة اهدنا، عايز أوصل لها صح، وعايز مقدمة صح، وعايز تعريف صح: إياك نعبد، وعايز دعاء صح، ومستحضر: صراط الذين أنعمت عليهم صح، وخايف من المغضوب عليهم وخايف من الضالين، خايف أقع. مش معنى أن ربنا هداك أنك مش هتقع، ممكن تقع «عليه النبأ الذي آتيناه آياتنا فانسلخ منها»؛ لذلك العلماء بيقولوا: إزاي مسلم مؤمن عابد ولي من أولياء الله ويقول اهدنا الصراط المستقيم؟ طب ما ربنا هداك؟ لأ، مش معنى كده أن خلاص أنك أنت فزت حتى تصل إلى الفردوس، أنت ممكن تقع، أنت ممكن تكون من أولياء الله ثم تعجب بنفسك، ثم تظن في نفسك ويصيبك الكبرياء والعياذ بالله فتسقط، أو تتبع شهوة أو شبهة فتسقط، ولذلك بتكرر: اهدنا الصراط المستقيم صراط الذين ناس كتير مشيت في الطريق، الطريق ده قابل للتطبيق مش مستحيل، صراط الذين أنعمت أنت بفضل من الله عليهم غير المغضوب عليهم اللي ربنا غضب عليهم ولا الضالين.
في الآخر تقول إيه وليست من الفاتحة؟ آمين؛ اللهم استجب. نفسك أن ربنا يستجيب دعاءك، لذلك صلاة الجماعة تدعي مع الناس وتأمينك يوافق تأمين الملائكة فتهدى، وتكرر الدعاء في كل مرة. عايزين نخرج من الفاتحة بهذا المعنى: أنك أنت في معاني لازم تكررها في حياتك: الثناء على الله سبحانه وتعالى، الرحمات، الخوف من الدار الآخرة، تعريفك بنفسك، العبودية والاستعانة، طلب الهداية من الله سبحانه وتعالى، استحضار قدوتك صراط الذين أنعمت عليهم، الخوف من اللي ضلوا واللي غضب الله عليهم. دول سبع معاني لازم تكررهم في حياتك، كل معنى أنا من دول محاور أفردت بعد ذلك في القرآن، المغضوب عليهم قصص ذكرت في المصحف، الضالين قصص، الثناء قصص، للسبع آيات فصل تفصيلاً في المصحف بعد ذلك، وهذا من رحمة الله سبحانه وتعالى بنا أنه اختصر لنا معاني المصحف ومعاني الكتب السابقة في هذه السورة؛ فنشكر ربنا على هذه النعمة أن احنا نتعلم سورة الفاتحة، نقرأها من تفاسير، نستحضر المعاني ونكرر دائماً ونقول: اهدنا الصراط المستقيم صراط الذين أنعمت عليهم غير المغضوب عليهم ولا الضالين.
أسأل الله سبحانه وتعالى أن يوفقني وإياكم إلى الهداية، وأن يوفقنا سبحانه وتعالى إلى السير في هذا الصراط المستقيم، وأن يتقبل منا أعمالنا. أقول قولي هذا واستغفر الله لي ولكم. سبحانك اللهم وبحمدك، أشهَد أن لا إله إلا أنت، أستغفرك وأتوب إليك، والسلام عليكم ورحمة الله.