د. أحمد عبد المنعمالسلام عليكم ورحمة الله وبركاته. بسم الله والصلاة والسلام على رسول الله صلى الله عليه وسلم، أهلاً بكم أحبائي في هذا البرنامج برنامج آيات تتلى الموسم الثاني. هذا البرنامج بفضل الله سبحانه وتعالى فكرته الرئيسية ببساطة أننا بنتعرض لآيات بصورة متكررة. في بعض آيات القرآن بتتكرر على مسامعنا، الإشكال أن التكرار ده زي ما هو ميزة بيثير معاني داخل القلب وداخل النفس والعقل. أحياناً الإنسان بيحصل له نوع من الألفة.
فبقى مثلاً بفضل الله إحنا في رمضان في صلاة التراويح بنقول الله أكبر وبنستنى السورة اللي هيقرأها الإمام وبنتجاوز سورة الفاتحة. أو مثلاً اللي يصلي الفجر في مسجد، فجر الجمعة في مسجد بكرر سورة السجدة وسورة الإنسان أو سورة الأعلى وسورة الغاشية، سورة الكهف، سورة الجمعة. السور اللي بتتكرر على مسامعنا كثيراً بفضل الله مع موقع الطريق إلى الله فكروا إزاي أن إحنا نعيد هذه المعاني مرة أخرى؟ إزاي المعاني الإيمانية المبتورة في هذه السور اللي أصلاً التكرار فيها سر؟ يعني معنى أن الشارع يسن لنا أن إحنا نكررها كتير أكيد فيها معنى، مش معقول ربنا سبحانه وتعالى جعل لنا أن إحنا نقرأ سورة الفاتحة أو سورة السجدة أو سورة الأعلى كده عبثاً، أكيد فيها معاني مهم أن الإنسان يكررها.
زي بالظبط التكرار في الأذكار؛ زي سبحان الله وبحمده مائة مرة، لا إله إلا الله وحده لا شريك له مائة مرة. أكيد فيه معاني مهمة الإنسان لابد أنه يراجع وبدون هذه المعاني الإنسان قد يضيع، قد ينسى معاني محورية في الشريعة. معنا إن شاء الله باذن الله سبحانه وتعالى هذا الموسم إن شاء الله هكون معكم وهنشرح سورة الفاتحة. سورة الفاتحة طبعا الواحد أصلاً متهيب أنه يتكلم في هذه السورة العظيمة، لذلك إحنا هنكون سورة الفاتحة، يعني هنقول كده إيه مقتطفات سريعة حول السورة في حلقتين، إن شاء الله الحلقة من ربع لتلت ساعة هنتكلم عن سورة الفاتحة.
طبعاً سورة الفاتحة كتبت فيها كتب، بل بعض العلماء قال إن أكتر سورة كتب فيها كتب ومؤلفات وشروحات وأطول ما كتب قيل في سورة الفاتحة، وبعضهم قال سورة يوسف، وبعضهم قال كمان سورة الكهف؛ لأن السور دي بتتكرر والعلماء كتبوا فيها كثيراً. لكن عند العد وخاصة الرسائل اللي اتعملت بقى سواء ماجستير أو دكتوراه أو اللي كتبت في الهدايات ومعاني الإيمان، سورة الفاتحة فيها كتب كثيرة جداً، الواحد وهو قاعد حتى يحاول يحضر كم الكتب اللي موجود في سورة الفاتحة كثير جداً، وإن شاء الله هحاول في آخر الحلقة أو الحلقة التانية أقول لكم على بعض المراجع نرجع إليها إن شاء الله.
لذلك حتى كان العلماء لما يبدأوا التفسير بيستفتحوا بسورة الفاتحة، وبيكون دايماً المفسر في الأول كده لسة ما تعبش من طول التفسير ونفسه كده الخير وفي الأول فبيكتب يستفيض في سورة الفاتحة؛ لأن الرازي مثلاً كان بيقول أن عنده ألف مسألة في سورة الفاتحة، يعني عنده تساؤلات وتدبرات أو إشكاليات تدور لها على حل أو هدايات في السورة ممكن تصل إلى ألف فائدة من سورة الفاتحة، أنت متخيل؟ فسورة الفاتحة سورة عظيمة.
طيب التخصيص اللي ورد في سورة الفاتحة هل ده اجتهاد من العلماء؟ يعني هل هم العلماء قعدوا يفكروا كده يقولوا إحنا عايزين سورة نركز فيها ونكتب فيها تفاسير كتير؟ ده اجتهدوا ولا أصلاً الشارع هو اللي وضع لنا هذه الخصوصية؟ عندنا حاجة في القرآن في كتاب حتى بالاسم اللي أنا هقوله ده اسمها خواص القرآن الكريم، وفيه كتاب بالاسم ده كتاب جيد أرجو أن أنتم ترجعوا له. أول كتب اللي بعنوان الأحاديث وآثار الواردة في فضائل السور، فيه برضو أكثر من كتاب بهذا العنوان.
بمعنى إيه؟ بمعنى أن إحنا مش بنجتهد، إحنا مش بنقول والله إحنا شايفين سورة السجدة ينفع نقراها فجر الجمعة وشايفين والله أن سورة الكهف نقراها كل أسبوع ده مش بمزاجنا، هذا بأمر من النبي صلى الله عليه وسلم، فسورة الفاتحة النبي صلى الله عليه وسلم هو اللي قال لنا إن دي أعظم سورة في القرآن. والعجيب العلماء اللي تتبعوا الأحاديث اللي وردت في كلمة أعظم سورة في القرآن وجدوا أن النبي صلى الله عليه وسلم قال المعنى ده لأكثر من صحابي، بعضهم قال إن ده لأبي سعيد بن المعلى، وبعضهم قال لأبي بن كعب، ورواية عن أنس، ورواية عن جابر، وبعضهم عن بعض الصحابة، لدرجة أن ابن حجر قال الأمر ده تكرر مع أكثر من صحابي بل تقريبا نفس الموقف حصل مع صحابيين اتنين.
وابن حجر قال عشان نجمع الموقف ده تكرر أن النبي صلى الله عليه وسلم يكون قاعد في المسجد وينادي على صحابي، وبعدين عايز يدي للصحابي هدية، فيقول للصحابي: «لأخبرنك قبل أن تخرج من المسجد بأعظم سورة في كتاب الله»، تخيل الصحابي كده وهيعرف أعظم سورة في القرآن، تخيل لو أنت مكان الصحابي تقعد تفكر أعظم سورة البقرة ميتين ستة وثمانين آية ولا السورة اللي فيها سجدتين زي الحج ولا السورة مثلاً اللي بادئة بالحمد لله زي الأنعام وطويلة؟ أنت قاعد تفكر إيه أعظم سورة؟ فالصحابي قعد يفكر وبعدين النبي صلى الله عليه وسلم ظل يحدثه.
الموقف هذا حصل مع أبي سعيد وحصل مع أبي بن كعب، النبي صلى الله عليه وسلم ظل يحدثه وضع كفه في كفه، تخيل الموقف ده للنبي صلى الله عليه وسلم يحط إيده في إيدك وماشيين مع بعض وخارجين من المسجد، والصحابي مستني لسه النبي ما قالوش، والنبي صلى الله عليه وسلم قال له هقول لك قبل ما نخرج من المسجد، هو قاعد يقرب من هيخرج من المسجد قال له يا رسول الله إحنا هنخرج! أنت ما قلتليش أعظم سورة. فقال لأبي سعيد في رواية: «أعظم سورة في كتاب الله سورة الفاتحة أم الكتاب السبع المثاني». وفي رواية أبي بن كعب قال له: «والذي نفسي بيده ما أنزل في التوراة ولا الإنجيل ولا الزبور ولا الفرقان مثلها»، أنت متخيل؟ يعني بيقول له أنا هقول لك سورة مش موجودة في أي كتاب سماوي سبق ولا حتى في القرآن، دي أعظم سورة مطلقاً.
التهيئة دي أنك تهيأ نفسك أنك تسمع أعظم سورة، طب ما أنا أركز معها، طب ما أكيد أعظم سورة في القرآن اللي هي الفاتحة، واتسمت السبع المثاني وهونقول إيه دلوقت، واتسمت أم الكتاب. بعض العلماء جمع الأسماء التي قيلت في سورة الفاتحة وصلهم لحاجة وعشرين، زي الإمام السيوطي في الإتقان، وبعضهم وصلها لتلاتين أو حاجة وتلاتين زي البصائر ذوي التمييز، يعني بعض العلماء قعد يجمع أسماء سورة الفاتحة بس، تخيل لو إحنا اخترنا مثلاً حاجة وعشرين اسم لسورة الفاتحة، أنت متخيل!
وكان العرب دايماً يقولوا أن الشيء لما ياخد أسماء كتير يبقى ده شيء مهم، فتخيل كلام الله سبحانه وتعالى حينما يخص الله سبحانه وتعالى هذه السورة بأسماء كثيرة، سواء وردت عن النبي صلى الله عليه وسلم أو ذكرها الله في القرآن أو ورد عن بعض الصحابة أو حتى اجتهاد، فلما تسمى أم الكتاب والرقية وأنها شفاء، والنبي صلى الله عليه وسلم قال كما قال الله سبحانه وتعالى في الحديث القدسي في صحيح مسلم: «قسمت الصلاة بيني وبين عبدي»، والعلماء قالوا هنا زي الإمام النووي قال: الصلاة هنا المقصود بها سورة الفاتحة، أنت متخيل؟
طيب إحنا أصلاً عشان نعرف إحنا هنتكلم ازاي؛ إحنا لما نجي نتكلم عن سورة الفاتحة هنقسم الكلام نصين، نص عن الفضائل، وده جزء كبير ده عايز حلقات بس إحنا نحاول نختصره، وجزء عن المعاني. يبقى إحنا الكلام عن سورة الفاتحة؛ جزء عن الفضائل وجزء عن المعاني، طبعاً عشان هما حلقتين بس اللي هنتكلم عن سورة الفاتحة والوقت قصير فأن أحيل إلى كتب ترجعون لها. اللي بيبني كثير أما تجي تقرأ كده في تفسير ابن كثير عايز تقرأ المختصر ما فيش مشكلة، أورد الأول مجموعة أحاديث قبل أن يدخل في تفسير سورة الفاتحة مجموعة أحاديث كتير جداً في فضائل سورة الفاتحة، أو لو عايز ترجع لكتاب خواص سور القرآن الكريم أو خواص القرآن الكريم عمل فصل طويل جاب ما يقرب من تلاتاشر حديث صحيح عن سورة الفاتحة، وبعض الآثار الصحيحة أيضاً ثم شرحها شرح مبسط، طبعاً أنا مستحيل أعمل كل ده معكم، لكن لما جاب كل حديث وقعد يفصل فيه، الكتب اللي اتكتبت في فضائل سورة الفاتحة كتير جداً؛ لأن النبي صلى الله عليه وسلم قال أنها أم الكتاب.
أم الكتاب يعني إيه؟ الأم بمعنى الأصل، يعني أنت قبل ما تدخل المصحف عايز مراجعة سريعة، عايز فهرس، عايز مجمل المعاني، عايز تعرف الكتاب ده بيتكلم عن إه؟ أن أنا داخل القرآن، افرض واحد لا يبحث عن الهدى، واحد داخل كل طموحه طموح دنيوي فقط، واحد يبحث عن الشهوات، فقبل ما تقرأ الكتاب إحنا بنقول لك فيقول الله سبحانه وتعالى هذا اللي هي الملخص السبع آيات اللي في سورة الفاتحة ده ملخص مجمل ما في القرآن، لو المعاني اللي في سورة الفاتحة دي أنت مش مهتم بها خلاص يبقى أنت ما تهتمش بالقرآن، المعاني التي ذكرت مجملة في سورة الفاتحة ذكرت مفصلة في القرآن، لذلك عجبني جداً اسم كتاب من الكتب اللي اتكلمت عن الفاتحة وكتاب جيد حقيقة اسمه الإسلام في سبع آيات، اسمه الإسلام في سبع آيات، وبالفعل أن إحنا عملنا محاضرة برضه مع موقع طريق الإسلام كان اسمها مركزيات الوحي حاولنا نشرح الوحي بيتكلم مجملا عن إه؟
أيضاً من سورة الفاتحة يبقى أول معنى مهم نخرج به أن سورة الفاتحة فيها مجمل ما ذكر في القرآن، بل قال بعضهم: مجمل وكل الكتب السماوية من قبل، لو أنت عايز الملخص، ماذا يريد الله سبحانه وتعالى من عباده؟ الملخص قبل التفاصيل المجمل قبل التفصيل موجود في سورة الفاتحة. إه ده! ده الموضوع مهم للدرجة دي؟ آه الموضوع مهم، هي أم الكتاب، هي السبع المثاني، سبع آيات. طب ليه؟ يعني إيه مثاني؟ بعض العلماء قال مثاني لأن فيها الثناء على الله سبحانه وتعالى، والله سبحانه وتعالى يحب الحمد سبحانه وتعالى ويحب المدح زي ما نجي في الحمد لله رب العالمين. بعضهم قال سبع المثاني من التثنية أي أنها تكرر.
أنت مش واخد بالك أن السورة اللي لازم إجباري تقرأها في كل ركعة وبدونها تبطل الركعة وتبطل الصلاة، لذلك قال النبي صلى الله عليه وسلم بدونها بدون سورة الفاتحة فالصلاة خداج، خداج يعني إيه؟ يعني ناقصة، يعني أنت حياتك من غير الفاتحة ناقصة، وصلاتك من غير الفاتحة ناقصة، وطريق الوصول لربنا من غير الفاتحة ناقص، فيه معاني مهمة لو أنت ما أخدتهاش من سورة الفاتحة لن تصل إلى الله سبحانه وتعالى، الطريق ناقص، عارف لما تجي طريق متسفلت وبعد كده فجأة الطريق اتقطع، الطريق يقول لك فين بقية الطريق؟
بدون سورة الفاتحة وبدون معاني سورة الفاتحة الطريق مقطوع، لذلك الحديث وإن كان في سند ضعف لكن مشهور بين أهل العلم وبيبدأوا به كثير من كتبهم: «أن كل أمر ذي بال لا يبدأ فيه ببسم الله الرحمن الرحيم فهو أبتَر»، أنك تبدأ أي حاجة من غير ما تقول بسم الله في الأول أبتَر، فحياتك بدون الفاتحة حياة مبتورة، حياة مقطوعة، حياة خداج، حياة ناقصة. طبعاً كل اسم من أسماء سورة الفاتحة له معانٍ، لكن إحنا أنا اخترت بس أم الكتاب لأن الأم بمعنى الأصل والمرجع، وأنها السبع المثاني لأنها تكرر.
قسمت الصلاة بيني وبين عبدي ده هنتكلم فيه وإحنا بنشرح مع بعض آيات سورة الفاتحة، بقية الأسماء وأنها رقية، وأن الرقية واحد معتقد أن الرقية مثلاً لما تسخن أو بطنك توجعك، لما تجي تشوف الحديثين أيضاً مذكورين في الكتب أسلوب الفضائل حديثين ورد فيها أن الفاتحة رقية، واحد الصحابي قيل إنه أبو سعيد الخدري كان يرقي الأولاني من إه؟ من لديغ، يعني اتلدغ عقرب لدغه والسم صار في جسده، والتاني في بعض روايات أنه كان معتوهاً قيل كان مجنوناً وقيل مسه الجن، وقيل في رواية حسنها الشيخ الألباني كان موثوقاً في الحديث.
أنت متخيل يعني رابطين واحد لأنه مجنون رابطينه في الحديد، واحد معتوه وواحد لديغ، ده أنا عايز أقول لك إن ممكن حتى الآن الطب لا يجد حل لهؤلاء، الأولاني راح الصحابي وقرأ عليه الفاتحة فقام، والثاني قرأ عليه الفاتحة وكرر عليه فقام وكأنما نشط من عقال، الفاتحة تزيل أثر السم من البدن، الفاتحة تعيد العقل لإنسان، إذا كان هذا أثر الفاتحة الحسي فما بالك أثر الفاتحة المعنوي؟ تخيل، أنت متخيل لذلك ابن القيم في زاد المعاد كتب أربع خمس صفحات في أثر الفاتحة مبهر، كلام مبهر، فعلاً يا ريت ترجعوا له كلام في قمة الروعة، أن أثر الفاتحة الذي أزال السموم من الجسد فكيف بأثر الفاتحة أن يزيل الشهوات والشبهات؟ وقال لا يقبل على الفاتحة أحد إلا صرفت عنه كل بدعة وصرف عنه كل شهوة.
لكن الإشكال فينا إحنا، الفاتحة هي شفاء هذه الفاتحة، لكن الإشكال في من يقرأ الفاتحة، الفاتحة كما هي لم تتغير ﴿إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ﴾ [الحجر: 9]، الإشكال في تعاملنا إحنا مع سورة الفاتحة. يبقى إذن دي نظرة سريعة عن الفضائل التي ذكرت في سورة الفاتحة، كيف يكفي فقط أنها أعظم سورة في كتاب الله وليس في
القرآن ولا التوراة ولا الإنجيل ولا الزبور مثلها، وأنها أم الكتاب، وأنها السبع المثاني، وأنها رقية. وسميت بالصلاة. قسمت الصلاة بيني وبين عبدي. وفي أسماء كثيرة وردت في كتاب الله سبحانه وتعالى أو عن النبي صلى الله عليه وسلم، وآثار عن الصحابة في أسماء سورة الفاتحة.
طيب، تعالوا بقى... الله سبحانه وتعالى بسم الله الرحمن الرحيم. الخلاف مذكور في كتب التفسير: هل هي آية ولا ليست آية من الفاتحة؟ بسم الله الرحمن الرحيم. الحمد لله رب العالمين، الرحمن الرحيم.
سورة الفاتحة أنت بتستفتح المصحف. سورة الفاتحة هي النجاة. سورة الفاتحة بدونها ليس لك صلاة. فسورة الفاتحة بدونها ليس لك وصول إلى الله سبحانه وتعالى. هي أم الكتاب. ركز، سورة الفاتحة عايزة تركيز. ليه عايزة تركيز؟ لأنها سورة مجملة. كل القرآن التفصيلي اللي ذكر في القرآن أجمل ومركز في سبع آيات معنا في سورة الفاتحة. المركزيات الأساسيات، المعاني الأساسية المبثوثة في القرآن موجودة في سورة الفاتحة.
أنت في كل ركعة قبل أن تقرأ أي آيات أو أي سورة، تقرأ الأول سورة الفاتحة. بتراجع الأول المجمل، وبعدين تختار معنى تفصيلي من المعاني التي وردت في القرآن تقرأها بعد سورة الفاتحة. طيب، أنا دلوقتي عايز أعيش مع سورة الفاتحة؛ يعني دي سورة أنا هاكررها، بل أنا بالعكس، قصدي في الحقيقة أنا بكررها كتير جداً في كل ركعة، لكن للاسف مع كتر التكرار أنا ما بفوقش غير مع كلمة آمين، وأدخل بعد كده بقى على الآية على السورة. أنا بانسى أصلاً؛ يعني واقف تعودت حتى لما أجي أصلّي، أنا أحياناً أقول: إيه ده؟ هو أنا قريت الفاتحة ولا لأ؟ وأكون قريتها. أمال الوسوسة دي بتجي لي ليه؟ لأن أنا لساني متعود خلاص: والحمد لله رب العالمين، آمين.
أنا مش حاسس بالمعاني. أنا لا أشعر بقيمة كلمة: ﴿اهدِنَا الصِّرَاطَ الْمُسْتَقِيمَ﴾ [الفاتحة: 6]، أشعر بهذا المعنى. احنا عايزين النهارده بس نفتح كده بعض الآفاق مع هذه المعاني عشان لما نجي نكرر السورة نعيش مع هذه المعاني. قال الله سبحانه وتعالى: ﴿بِسْمِ اللَّهِ الرَّحْمَٰنِ الرَّحِيمِ﴾ [الفاتحة: 1]. هذه الباء باء مصاحبة أو باء استعانة؛ يعني أنا من أول لحظة بقول له: يا رب ما تسيبنيش، أريد أن أصحى باسمك طوال القرآن، ومن أول لحظة بقول: يا رب أنا بستعين بك يا رب. بسم الله وأستفتح بسم الله سبحانه وتعالى، وأخص اسمين من الأسماء ولست أنا من فعلت ذلك بل ربي سبحانه وتعالى هو الذي علمني: الرحمن الرحيم.
دي البسملة، ودي مش يعني طبعاً قول معتبر جداً أن هي من الفاتحة، ويفضل أنك أنت تقرأها حتى تخرج من الخلاف. بسم الله الرحمن الرحيم. ثم قال الله سبحانه وتعالى في الحديث القدسي: «قسمت الصلاة بيني وبين عبدي».
أنت مستحضر أن دي السورة الوحيدة اللي لما بتقرا آية يرد الله عليك؟ يعني ده مش موجود سورة الكهف، مش موجود في سورة يوسف، مش موجود في سورة البقرة. سورة الفاتحة فقط. حينما تقول: ﴿الْحَمْدُ لِلَّهِ رَبِّ الْعَالَمِينَ﴾ [الفاتحة: 2]، يقول الله سبحانه وتعالى: حمدني عبدي. ﴿الرَّحْمَٰنِ الرَّحِيمِ﴾ [الفاتحة: 3]، يقول الله سبحانه وتعالى: أثنى علي عبدي. ﴿مَالِكِ يَوْمِ الدِّينِ﴾ [الفاتحة: 4]، يقول الله سبحانه وتعالى: فوض إلي عبدي. وفي رواية: مجدني عبدي. ﴿إِيَّاكَ نَعْبُدُ وَإِيَّاكَ نَسْتَعِينُ﴾ [الفاتحة: 5]، يقول الله سبحانه وتعالى: هذا بيني وبين عبدي. هنا في سر: ﴿إِيَّاكَ نَعْبُدُ وَإِيَّاكَ نَسْتَعِينُ﴾، هنا في سر. هذا بيني وبين عبدي ولعبدي ما سأل. اللي هيطلبه بعد المقدمة دي: لعبدي ما سأل. فيطلب، خلاص، ووصل: ﴿اهدِنَا الصِّرَاطَ الْمُسْتَقِيمَ﴾.
طيب، احنا اتكلمنا عن الفضائل، تعالوا بقى نقول كده سورة الفاتحة: أنا عايزك تتخيلها كده، افردها قدامك كده، سبع آيات، هي عبارة عن إيه سورة الفاتحة؟ عبارة عن مقدمة من الثناء، ثم بعد ذلك نهاية بالدعاء. لذلك الإمام النووي قال: يعني إيه قسمت الصلاة بيني وبين عبدي؟ قال: قسمت الفاتحة إلى نصفين، نصف ثناء ونصف دعاء. يبقى تاني الحلقة: احنا هنتكلم أو الحلقتين فضائل ومعاني. كلمنا عن الفضائل سريعا.
المعاني في نصف ثناء ونصف دعاء. الفاتحة: ﴿الْحَمْدُ لِلَّهِ رَبِّ الْعَالَمِينَ * الرَّحْمَٰنِ الرَّحِيمِ * مَالِكِ يَوْمِ الدِّينِ﴾ [الفاتحة: 2-4] ده ثناء. بعد كده في جملة في المنتصف بتحدد الوجهة، بتحدد القبلة، وبتراجع التعريف بتاعك: ﴿إِيَّاكَ نَعْبُدُ وَإِيَّاكَ نَسْتَعِينُ﴾ [الفاتحة: 5]. دي الفاصل ما بين الثناء وبين الدعاء: ﴿اهدِنَا الصِّرَاطَ الْمُسْتَقِيمَ﴾ [الفاتحة: 6]. يعني كل الفاتحة دي، اللي هي أعظم سورة وأم الكتاب والسبع المثاني والرقية والشفاء والكافية والأسماء الكتيرة اللي اتقالت والصلاة، كل الأسماء اللي اتقالت دي كل ده عبارة عن الملخص.
أصل أنا عايز أطلب من ربنا الهدية؛ يعني كل العظمة دي وكل أعظم سورة في التوراة والإنجيل والزبور والفرقان عشان كلمة: اهدنا. وأن اللي قبلها الإهداء. أنا عايزك تتخيل لو أنا قلت لك: أنت لك دعاء واحد لازم تطلبه في كل صلاة، تطلبه في كل ركعة، ولازم تكرره، هو طلب واحد. لو احنا اللي كنا اخترنا، كان ممكن اخترنا غلط. ربنا هو اللي اخترنا؛ لأن ربنا سبحانه وتعالى يعلم الخير لنا، ربنا يعلم مدى حاجتنا للهداية، ربنا يعلم قد إيه احنا ضعفاء، وقد إيه الشياطين تحيط بنا شياطين الانس والجن، وقد إيه ان احنا ممكن نسقط في سبل الضلال، وقد إيه أن الإنسان ممكن تغلبه شهوته أو يقع في شهوة أو يقع في شبهة.
فالإنسان محتاج للهداية لدرجة أن لازم يطلب الهداية في كل ركعة، ولازم يطلب الهداية في كل صلاة، محتاج لده. حبب الله إلينا سورة الفاتحة بهذه الفضائل عشان احنا محتاجين للهداية. لكن ليس هناك طلب بدون مقدمات، هذا هو الأدب مع الله سبحانه وتعالى. كيف ستدخل إلى باب الملك وتطلب هذا الطلب العظيم؛ طلب الهداية الذي يحقق لك الخلود في الفردوس الأعلى، الذي يحقق لك الخلود مع الذين أنعم الله عليهم؟ ده طلب عظيم، فلازم مقدمات، وعلى قدر الطلب وعظم الطلب تكون المقدمات عظيمة وتكون المقدمات مركزة. إيه هي المقدمة اللي أنا بدأ بها الدعاء؟ وإيه تفاصيل الدعاء ده بإذن الله سبحانه وتعالى اللي هنشرحه في الحلقة القادمة؟
أسأل الله سبحانه وتعالى أن يفتح علينا في فهم كتابه والعمل به. أقول قولي هذا وأستغفر الله لي ولكم، والسلام عليكم ورحمة الله وبركاته.