إن شاء الله هنحاول كده في جلسات الفجر ناخد قصة آية. يعني المرة اللي فاتت اتكلمنا عن قول الله سبحانه وتعالى: ﴿وَلَا تَكُونُوا كَالَّذِينَ آذَوْا مُوسَىٰ فَبَرَّأَهُ اللَّهُ مِمَّا قَالُوا وَكَانَ عِندَ اللَّهِ﴾ [الأحزاب: 69]. فهنحاول ناخد قصة آية النهاردة؛ قول الله سبحانه وتعالى: ﴿يَا أَيُّهَا الرَّسُولُ لَا يَحْزُنكَ الَّذِينَ يُسَارِعُونَ فِي الْكُفْرِ مِنَ الَّذِينَ قَالُوا آمَنَّا بِأَفْوَاهِهِمْ وَلَمْ تُؤْمِن قلوبهم وَمِنَ الَّذِينَ هَادُوا سَمَّاعُونَ لِلْكَذِبِ سَمَّاعُونَ لِقَوْمٍ آخَرِينَ لَمْ يَأْتُوكَ يُحَرِّفُونَ الْكَلِمَ مِن بَعْدِ مَوَاضِعِهِ يَقُولُونَ إِن أُوتِيتُمْ هَٰذَا فَخُذُوهُ وَإِن لَّتْؤْتَوْهُ فَاحْذَرُوا وَمَن يُرِدِ اللَّهُ فِتْنَتَهُ فَلَن تَمْلِكَ لَهُ مِنَ اللَّهِ شَيْئًا أُولَٰئِكَ الَّذِينَ لَم يُرِدِ اللَّهُ أَن يُطَهِّرَ قُلُوبَهُمْ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ﴾ [المائدة: 41]. سورة إيه؟ سورة المائدة.

بدأت الآية بقول الله سبحانه وتعالى: ﴿يا أيها الرسول﴾، الله سبحانه وتعالى حينما ينادي النبي صلى الله عليه وسلم في القرآن؛ يعني أي نداء لأي نبي في القرآن: يا موسى، يا إراهيم، يا إبراهيم أعرض عن هذا؛ إن ده بيكون بالاسم المباشر للنبي. لكن لما بيكون النداء للنبي محمد صلى الله عليه وسلم - صلوا عليه - إما بالوصف الذي كان على الحال التي كان عليها في أول البعثة: ﴿يا أيها المدثر﴾، ﴿يا أيها المزمل﴾، أو بوصف النبوة: ﴿يا أيها النبي﴾، أو بوصف الرسالة: ﴿يا أيها الرسول﴾، ما فيش في القرآن يا محمد. إنما كلمة محمد بس صلى الله عليه وسلم جت أربع مرات في القرآن بدون النداء: ﴿وَمَا مُحَمَّدٌ إِلَّا رَسُولٌ﴾ [آل عمران: 144]، ﴿مَا كَانَ مُحَمَّدٌ أَبَا أَحَدٍ مِّن رِّجَالِكُمْ﴾ [الأحزاب: 40]، ﴿مُحَمَّدٌ رَّسُولُ اللَّهِ﴾ [الفتح: 29]، ﴿وَآمَنُوا بِمَا نُزِّلَ عَلَى مُحَمَّدٍ﴾ [محمد: 2].

كلمة ﴿يا أيها الرسول﴾ جت مرتين، والمرتين في نفس السورة، في سورة المائدة: ﴿يَا أَيُّهَا الرَّسُولُ لَا يَحْزُنكَ الَّذِينَ يُسَارِعُونَ فِي الْكُفْرِ﴾، والتانية: ﴿يَا أَيُّهَا الرَّسُولُ بَلِّغْ مَا أُنزِلَ إِلَيْكَ مِن رَّبِّكَ﴾ [المائدة: 67]. فالعلماء لما اتكلموا قالوا إن ده بوصف النبوة يختلف عن بوصف الرسالة. فالنبوة والرسالة فيها تكليف وفيها تشريف، وأي تشريف في القرآن يعني أي رفعة مقام لازم يتبعها تكليف؛ ﴿يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاءِ الْعَالَمِينَ﴾ [آل عمران: 42] ده تشريف، ﴿يَا مَرْيَمُ اقْنُتِي لِرَبِّكِ﴾ [آل عمران: 43] ده تكليف. ربنا سبحانه وتعالى قال لسيدنا موسى: ﴿إِنِّي اصْطَفَيْتُكَ عَلَى النَّاسِ بِرِسَالَاتِي وَبِكَلَامِي﴾ [الأعراف: 144] ده تشريف، وبعدها على طول: ﴿فَخُذْ مَا آتَيْتُكَ وَكُن مِّنَ الشَّاكِرِينَ﴾ [الأعراف: 144] ده تكليف. التشريف للدين مش معناه أن واحد بقى له مقام عالي في الدين معناه إنه ما يشتغلش؛ يشتغل أكتر ويكلف أكتر. فبعضهم قال إن مقام الرسالة بيغلب عليه طابع التكليف أكتر، يعني المهام عليه أكتر. لذلك لما تشوف الآيتين دول تحديدا اللي في سورة المائدة: ﴿يا أيها الرسول لا يحزنك﴾، و﴿يا أيها الرسول بلغ﴾، الاتنين فيهم أن ممكن اتباع النبي صلى الله عليه وسلم يحصل منه إحجام عن التبليغ في المقام ده؛ يخاف يبلغ دين ربنا في الآيات دي تحديدا زي ما نشوف ربنا قال له في التانية: ﴿يَا أَيُّهَا الرَّسُولُ بَلِّغْ مَا أُنزِلَ إِلَيْكَ مِن رَّبِّكَ وَإِن لَّمْ تَفْعَلْ فَمَا بَلَّغْتَ رِسَالَتَهُ﴾ [المائدة: 67]، يعني لو ما بلغتش كل آيات القرآن فما بلغْتَ الرسالة، يعني لو بلغت جزء من القرآن والباقي ما بلغتهوش فكأنك لم تبلغ شيئاً. وإن لم تفعل - قال ابن عباس: أي وإن لم تبلغه كاملا، لازم تقول له القرآن كاملا - ﴿وَإِن لَّمْ تَفْعَلْ فَمَا بَلَّغْتَ رِسَالَتَهُ وَاللَّهُ يَعْصِمُكَ مِنَ النَّاسِ﴾ [المائدة: 67]، دايما العصمة والحفظ تأتي مع تبليغ الدين.

المهم: ﴿يَا أَيُّهَا الرَّسُولُ لَا يَحْزُنكَ الَّذِينَ يُسَارِعُونَ فِي الْكُفْرِ مِنَ الَّذِينَ قَالُوا آمَنَّا بِأَفْوَاهِهِمْ وَلَمْ تُؤْمِن قُلُوبُهُمْ﴾. إيه قصة الآية دي؟ ترجع لأقوال المفسرين تجد أقوال كتير حقيقة، هنحاول نختار بعض الأقوال ولنجملها بحيث نفهم سياق الآية على بعض: ﴿مِنَ الَّذِينَ يُسَارِعُونَ فِي الْكُفْرِ﴾. في ناس في القرآن بتسارع في الطاعات: ﴿أُولَئِكَ يُسَارِعُونَ فِي الْخَيْرَاتِ وَهُمْ لَهَا سَابِقُونَ﴾ [المؤمنون: 61]، وفي ناس بتسارع في الكفر والعياذ بالله. خد بالك: يسارع في الخيرات ويسارع في الكفر، مش يسارع إلى الخيرات، لا، يسارع في الكفر؛ لأن هو أصلا والعياذ بالله مغموس في الكفر، ثم ينتقل إلى دركات الكفر، زي التاني يسارعون في الخيرات مش إلى الخيرات، وهو أصلا في خير، لكن ينتقل من خير إلى خير؛ يعني هو يكون مثلا في التراويح، فيسمع عن فقير محتاج، فيخلص تراويح ويرروح يزور يعطي الفقير، فيسمع عن مريض فيروح يزوره، فينتقل بين أعمال الخير، حياته هو أصلا داخل دائرة الخير، عشان كده جه حرف الانغماس (في الخيرات). هنا: ﴿يُسَارِعُونَ فِي الْكُفْرِ مِنْ الَّذِينَ قَالُوا آمَنَّا بِأَفْوَاهِهِمْ وَلَمْ تُؤْمِن قُلُوبُهُمْ وَمِنَ الَّذِينَ هَادُوا سَمَّاعُونَ لِلْكَذِبِ سَمَّاعُونَ لِقَوْمٍ آخَرِينَ لَمْ يَأْتُوكَ﴾.

إ ايه القصة دي بقى؟ مجلس النبي صلى الله عليه وسلم مجلس تعليم الصحابة، كانوا بيحضروا بعض المنافقين من الذين قالوا آمنا بأفواههم ولم تؤمن قلوبهم، فالنبي صلى الله عليه وسلم كان بيحكي اللي موجودين في المجلس وما بيتأثروش بالكلام، وبيستمروا على نفاقهم وعلى كفرهم، وكان صلى الله عليه وسلم يعرفهم بلحن القوم، عارفهم بفلتات اللسان اللي بتخرج منهم، فكان النبي صلى الله عليه وسلم حزين خايف عليهم، فربنا قال له إن دول لم يرد الله أن يطهر، دول أصروا على الفتنة زي ما نذكر في آخر الآية. يبقى في صنف منافق كل همه مصلحته وخلاص، قاعد مجلس النبي صلى الله عليه وسلم كل همه أن هو يحافظ على دمه وماله ودنيته، فبيجي يحضر والمجلس كده رياء وخلاص، ده الصنف الأولاني اللي النبي صلى الله عليه وسلم كان حزين عليه جدا.

الصنف التاني: ﴿وَمِنَ الَّذِينَ هَادُوا سَمَّاعُونَ لِلْكَذِبِ سَمَّاعُونَ لِقَوْمٍ آخَرِينَ لَمْ يَأْتُوكَ﴾. قال لك كان في بعض اليهود بيجوا يحضروا مجلس النبي صلى الله عليه وسلم متنكرين، إن هم عاملين نفسهم مسلمين، بيجي برضه ويحضر بس مش بيجوا لمجرد الرياء وخلاص واللي هو النفاق يعني، في واحد بينافق لأجل النفاق إن هو مصلحته فعايز يمشي مصلحته، لا، كان في بعض اليهود، اليهود دايما خبثاء، دايما يخططون لهدم الدين: ﴿كُلَّمَا أَوْقَدُوا نَارًا لِّلْحَرْبِ أَطْفَأَهَا اللَّهُ وَيَسْعَوْنَ فِي الْأَرْضِ فَسَادًا﴾ [المائدة: 64]، دايما ده اللي اليهود عايزين يعملوه، فربنا يقول لك إن كان بعض اليهود بيحضروا مجلس النبي صلى الله عليه وسلم، ومن الذين هادوا سماعون للكذب. يعني إيه سماعون للكذب؟ هم هنا بيسمعوا للنبي صلى الله عليه وسلم مش هم بيسمعوا للنبي؛ يبقى دلوقتي النبي صلى الله عليه وسلم بيجي المجلس في جزء من قاعد في المجلس منافقين قاعدين همهم مصلحتهم وخلاص، عامل نفسه مؤمن وخلاص، في صنف تاني من اللي قاعدين في المجلس يهود عاملين نفسهم مسلمين بس جايين لأغراض. سماعون للكذب قيل: أي سماعون لأجل أن يكذبوا عليه؛ يعني يحضروا المجلس النبي صلى الله عليه وسلم وبعدين يطلعوا من المجلس، فيسألوا: ماذا كان يقول محمد صلى الله عليه وسلم في المجلس؟ فيطلعوا يكذبوا على نفسه عشان ينفروا الناس من الدين، بيمثلوا إن هو مسلم جاء يحضر الإسلام، فيقول لك: إيه ده، أنا كنت دخلت في الإسلام بس لما حضرت المجلس اكتشفت أنه مجالس النبي صلى الله عليه وسلم دي اكتشفت أن هو ده دين صعب جدا ولا يمكن، ويكذب على النبي صلى الله عليه وسلم. يبقى بيسمع لا لأجل الاستفادة، لا لأجل الهدى، سماعون للكذب، هنا (بمعنى لأجل): سماعون لأجل أو يحضرون مجلس النبي صلى الله عليه وسلم ويسمعون الكذب اللي بيتقال على النبي صلى الله عليه وسلم ويصدقوه.

يعني في كلام بيلقى على النبي صلى الله عليه وسلم بدل ما يبرئ النبي صلى الله عليه وسلم من التهم اللي بتلقى عليه، لا، يسمعوا الكلام اللي بيلقى في تهمة النبي صلى الله عليه وسلم ويصدقوه، ويجوا يحضروا المجلس عشان ينشروا الإشاعات دي بالحاضرين المجلس عشان يفتنوا الصحابة.

وبعد ما بيحضر عايزك بقى تتخيل معايا السيناريو اللي بيحصل: النبي صلى الله عليه وسلم بيجي المجلس في مؤمنين صادقين قاعدين في المجلس، في منافقين قاعدين رياء وسمعة، في يهود قاعدين يمثلوا أنهم مسلمين لأغراض؛ الغرض الأول أن هو يحضر عشان ياخد الكلام ويضيف عليه إشاعات ويكذب على النبي صلى الله عليه وسلم، يبقى ده الوظيفة الأولانية اللي جاي عشان يحضر عشانها المجلس، مش كل اللي بيحضر مجلس بيحضر عشان يستجيب، فده واحد قاعد عشان يكذب على النبي صلى الله عليه وسلم. في صنف ده أو هو نفس الصنف قاعد له وظيفة تانية: سماعون لقوم آخرين لم يأتوك.

قالوا إيه ده بقى؟ في أقوال كتيرة، أختار لهم قوم ذكرهم الطبري وغيرهم أن اليهود السادة ما بيحضروش مجلس النبي صلى الله عليه وسلم، طبعا يعني استنكفوا، فيبعتوا بعض - بتعبير البغوي وابن عطية وغيره من المفسرين - يبعتوا جواسيس من اليهود يحضروا مجلس النبي صلى الله عليه وسلم، وظيفة الجواسيس دول حاجتين: يكذبوا على النبي ويطلعوا ينشروا إشاعات، الحاجة التانية: ينقلوا الكلام بتاع النبي صلى الله عليه وسلم لليهود الكبار. يبقى اليهود الصغيرين المنافقين اللي حضروا المجلس ياخدوا كلام النبي صلى الله عليه وسلم يروحوا ينقلوه لمين؟ لليهود الكبار: ﴿سَمَّاعُونَ لِقَوْمٍ آخَرِينَ لَمْ يَأْتُوكَ﴾. طيب والقوم الآخرون الذين لم يأتوا دول؟ اليهود الكبار بيعملوا إيه بقى بالكلام ده؟ يعني بعد ما بيقولوا لهم كلام النبي صلى الله عليه وسلم يعملوا فيه إيه؟ طب هم عايزين كلام النبي ليه؟ عشان قلنا عشان حاجة؛ الحاجة الأولانية: الكذب يكذبوا عليه، الحاجة التانية: يحرفون الكلمة من بعد مواضعه.

من بعد يعني إيه يحرفون الكلمة؟ يحرفون الكلمة جت تقريبا تلات مرات في القرآن، في مرة عن مواضيعه، في من بعد، أظن اتنين في نساء، واحدة في المائدة، فيما أذكر، أو اتنين في المائدة واحدة في النساء. مسألة تحريف الكلمة عن مواضيعها، يعني إيه يحرفون الكلمة؟ الله سبحانه وتعالى تكلم بهذا الكلام حقيقة، ولما الله تكلم بهذا الكلام، هذا الكلام له مواضع، يعني إيه له مواضع على الأرض؟ يعني الله سبحانه وتعالى عايزك تتخيل معايا كده مثلا لو أنت بتبص على الكرة الأرضية من فوق؛ الكرة الأرضية متقسمة قارات، والقارات متقسمة دول، وفي محيطات وفي أنهار، دي التقسيمة الجغرافية للكرة الأرضية، ماشي؟ اللي عايز يلعب في جغرافيا الأرض؛ يشيل المحيط ده من هنا ويحطه هنا، ويشيل النهر ده يحطه هنا، ويخلي القارة دي يفتح القارة دي على القارة دي، هو كده بيلعب في معالم الأرض اللي ربنا وضعها في الأرض، وده مستحيل.

طيب، لما تيجي تبص بقى على الكرة الأرضية بالطريقة الشرعية، يعني إيه الطريقة الشرعية؟ يعني ربنا أراد أن في علاقات تترسم على الأرض؛ أن المسلمين لهم علاقات مع بعض غير علاقة المسلمين بالكفار، غير علاقة الأب بابنه، غير علاقة الزوجة بزوجها، الزوج مع زوجته والصديق مع صديقه، الروابط والعلاقات دي ربنا وضعها، وامتى نقدم رابطة إيه على إيه؟ وامتى نقدم رابطة الإسلام على رابطة التراب؟ وامتى تقدم رابطة الإسلام على رابطة النسب؟ وأمتى تقدم رابطة النسب؟ كل دي ربنا وضع تشريعات: حد للسرقة وحد للزنا وحدود، كل ده ربنا وضعه. فكلام ربنا المفروض إحنا دورنا ناخد كلام ربنا وننزله على مواضعه، لما ناخد كلام ربنا ونحرفه وما ننزلوش على مواضعه؛ إحنا كده بنحرف الكلمة عن مواضعه.

عامل بالزبط زي اللي عايز يغير خريطة؛ يعني ربنا أراد أن في شكل للمسلمين، شكل للأمة الإسلامية اللي اتطَبقت في مدينة النبي صلى الله عليه وسلم، ده الشكل اللي ربنا، لذلك لما حصل الخلافات ما بين المهاجرين والانصار، وهذا قال: يا لالمهاجرين، وهذا قال: يا للانصار، هم هنا بدأوا يتخانقوا صورة غير شرعية، فغضب النبي، قال: أبدعوى الجاهلية وأنا بين أظهركم؟! هو كده بيغيروا المواضع اللي ربنا أرادها. فالله تكلم بكلام عظيم له مواضع على الأرض، كلام مش كده خلاص، الكلام ده عشان يطبق: ﴿إِنَّا أَنزَلْنَا إِلَيْكَ الْكِتَابَ بِالْحَقِّ لِتَحْكُمَ بَيْنَ النَّاسِ﴾ [النساء: 105]، الكلام اللي ربنا نزله ده جاء ليطبق على الأرض، لما إحنا ما ننزلوش على مواضعه يبقى إحنا كده بنحرف الكلام عن مواضعه. فكانوا ياخدوا كلام النبي صلى الله عليه وسلم يقول لك: لا، دي مش هنطبقها، دي مش أهي، دي هنضحك على المسلمين ونقول لهم إن دي مش نافعة، ويقعدوا يحرفوا في كلام النبي صلى الله عليه وسلم، مش بس يكذبوا، لا، يحرفوا.

من بعد ما ربنا أراد إنه يستقر. طب عايزين نموذج للي أنت بتقوله ده؟ ده بقى السبب القيمي، وده سبب نزول الآية، أو حديث صحيح مسلم وفي مسند أحمد: «يحرصون الكلمة من بعد مواضعه، يقولون: إن أوتيتم هذا فخذوه، وإن لم تؤتوه فاحذروه».

النبي صلى الله عليه وسلم بيجي المجلس فيه، جينا قاعدين أهم، مصلحته في يهود صغيرين جواسيس جايين يحضروا مجلس النبي صلى الله عليه وسلم، يسمعوا الكلام وياخدوه، يعملوا بالكلام حاجتين: يضيفوا عليه حاجات كذب، ويحرفوه ويغيروه عن الموضوع. يقوم اليهود الكبار يبعت اليهودي الصغير تاني، يقول له: أنا أبعتك تاني في المجلس. ليه؟ ما أنا لسه جاي وجايب لك. المرة دي أنا عايز منك مهمة تانية، أنا هبعتك لسؤال تسأل به النبي في المجلس، تعمل إن أنت بتسأله سؤال في المجلس، يشوف إجابته، وعلى حسب إجابته هنعرف هو صادق ولا لا.

فاليهودي الكبير يبعت اليهودي الصغير، يقوم واحد ويقول له: بص روح أسأله، قل له: احنا عندنا لو في حادثة في اليهود حصل حالة زنا، أنت تحكم بإيه؟ هل تحكم بالرجم أم والزاني محصن؟ فبعده يسأله النبي صلى الله عليه وسلم. وفي رواية إن مش اللي سأله المنافقين الصغيرين، في رواية إن اللي سألوا، وفي اليهود، والتاني جم قالوا: احنا دلوقتي عايزين نسألك، وجم بقى في صورتهم اليهودية مش أنهم منافقين، هم اليهود واحنا بنسألك سؤال، بس احنا عايزينك تجاوب لنا إجابة كده إيه؟ يعني تاخد بالك مننا كده يعني، بلاش بلاش الإجابة إيه الصادمة، قل لنا إجابة كده تراضينا.

واتفقوا مع بعض قبل ما يروحوا، قالوا: لو احنا رحنا سألناه وكانت الإجابة الرشد فانما هو نبي، ولو كانت الإجابة الجلد أو التحرير -وهقول يعني إيه- إنما هو ملك. يعني إيه الكلام؟ يعني أسئلة اليهود للنبي صلى الله عليه وسلم كانوا حالاً بيضربوا أسئلة عشان يعرفوا هو طالب ملك ولا طالب نبوة؟ يعني أحياناً يا جماعة أهل الباطل بيختبروا العالم، يشوفوه هو بتاع دين بجد، فهيقول الدين أياً كان، ولا هيحور وهيغير؟ يبقى هو طالب دنيا.

زي ما شرحنا السنة اللي فاتت في قصة بلقيس من رؤية سبأ لما بعتت لسيدنا سليمان قالت: ﴿وَإِنِّي مُرْسِلَةٌ إِلَيْهِمْ بِهَدِيَّةٍ فَنَاظِرَةٌ بِمَ يَرْجِعُ الْمُرْسَلُونَ﴾ [النمل: 35]، أنا هبعت له هدية. لذلك الحكماء قالوا: فإن قبلها فهو ملك، واحد عايز فلوس عايز ملك، وإن لم يقبلها وأصر فانما هو نبي، ده واحد فعلا عايز إيه؟ يبقى كان أحياناً اليهود يسألوا النبي صلى الله عليه وسلم أسئلة يختبروا بها شوفوا ده نبي ولا ملك؟ فالنبي صلى الله عليه وسلم أجاب بأن الحكم الرشد، فانكروا، يقولون: إن أوتيتم هذا فخذوه، لو قال لكم اللي أنتم عايزينه قولوا له: خلاص هناخد بحكمك، لو قال لكم حكم أنتم مش عايزينه مش هناخد الحكم.

دي مشكلة إن واحد يتحاكم للشرع بس عايز الشرع يجي على الهوى. يعني أحياناً مثلاً يحصل خلاف بين رجل وزوجته فيقولوا: خلاص نحتكم إلى عالم فيقعدوا، فالزوج يحكي المشكلة والزوجة تحكي المشكلة، فالعالم يسمع مثلاً للزوجة، الزوج يقول: لا أنا مش موافق أنا رجعت في كلامي، أنا كنت بحسب إن أنت إيه تحكم لي، أو العكس، الزوجة تقول: لا لا لا أنا مش مكملة، أنت مش كنت بتقولي؟ لا ما أنا كنت بحسب إن أنت هتتحكم.

فأحياناً بنتعامل مع شريعة بسياسة: إن أوتيتم هذا فخذوه، لو هتحكم لي آه ده الدين ده جميل، إنما هتحكم علي؟ لا أنا مش عايزه، مش عايز الحكم ده. فبدايةً كان الإنسان لازم يكون عنده استسلام للشرع، الإنسان يكون عنده استسلام للشريعة مش عشان تيجي على هواي آخد بها، ولما تيجي علي أو إن أنا هخسر، أو مثلاً حصل أنا كسرت حاجة حد وتحاكمنا إلى حد من الدين وعنده علم، وقال: لا أنت يجب عليك إصلاح... إيه يا عم ده لا أنا مش موافق، لا خليه بقى يروح ويبقى يشوف هيجيب حقك! أيوه ما هيجيب حقه يوم القيامة، لو معلش يجيب حقه دلوقتي أنت الأولى إنك ترد المظالم إلى أهلها.

فالشاهد إن آه لما راحوا سألوا النبي صلى الله عليه وسلم قالوا إيه؟ إن أوتيتم هذا فخذوه وإن لم... ففي رواية تانية زي ما في صحيح مسلم: جم للنبي صلى الله عليه وسلم وقالوا: لا احنا الحكم عندنا مش الرجم، فنفسه قال: «أنشدكم بالله الذي أنجى موسى ومعه من فرعون، وأشهدكم بالذي أنزل كذا وكذا على بني إسرائيل» يذكرهم بنعم ربنا عليهم، «وأنشدكم بكذا، وأنشدكم بالذي فعل...» هل تجدون عندكم الرجم في التوراة؟ قالوا: طالما أنشدتنا بالله، آه هي بصراحة موجودة عندنا الرجم، أمال إيه إليه اللي حصل؟ غيرتوها ليه؟

وده في صحيح مسلم أيضاً وفي روايات كتير، قصة تغيير قالوا: زنا أحد الأشراف في قومه فقالوا: مش هينفع نقيم عليه الحد، وعدوه ما أقاموش عليه الحد، ثم زنا أحد الضعفاء في القوم فقالوا: لابد من إقامة الآية الرجم، دين ربنا! فالضعفاء: طب ما هو الراجل التاني زنا، يعني جت عشان احنا غلابة؟ وعملوا مشكلة ضعفاء وبدأ يحصل فتنة، لا ينطبق على الاتنين الغني والفقير زي ما النبي صلى الله عليه وسلم يقول: «إنما أهلك من كان قبلكم إذا سرق فيهم الشريف تركوه، وإذا سرق فيهم الضعيف أقاموا عليه الحد». دي من الأخلاق اللي تهلك، يعني القانون يطبق على كله ده ده يخلي أمة تنجح، إنما الانتقائية في التطبيق دي تخلي أمتك تبقى متأخرة.

فلما الضعفاء عملوا مشكلة قالوا: لا يا الحد يطبق على الغني والفقير، خلاص تعالوا بقى نقعد مع بعض قعدة ونشيل حكم الرجم ونوصل لحل وسط نطبقه على أي حد طالما أنتم عايزين نطبق الحد على كله، تعالوا نشيل إيه؟ عارف تحسوا العبوا بالبازل، يعني إيه نطبقه على الضعيف والشريف لا، طب ما ضبطتشي، طب نشوف حد تاني ونطبقه على الاتنين؟ قالوا: آه فيك حلوة الفكرة دي، فقالوا: خلاص نشيل الرجم، واخترعوا حاجة اسمها الأسود بالزفت الأسود، ويوضع عكس، يركب زي عجز الحمار، ويشهر به، خلاص ما يعرفش يعمل كده تاني.

فاتفقوا على الحد بحيث إن لو حد من الشرفاء زنى ما يترددش، ولو كان محصناً! فالنبي صلى الله عليه وسلم لما سمع ذلك قال: «اللهم إني أول من أحيا أمرك إذ ماتوا ورجمهما»، اللهم إني أول من أحيا أمرك إذ ماتوا. فأحياناً ترك الدين لفترة طويلة بيحصل حاجة نوع من الإماتة، ييجي انسان ربنا يستعمله في إحياء هذا الدين، إحياء فريضة أو إحياء سنة ماتت. لذلك النبي صلى الله عليه وسلم قال: «من سن في الإسلام سنة حسنة»، مش معناه إنه ابتدعها واخترعها؛ لأن حصل تقصير قارب الاندثار، فيجي واحد يطبق السنة دي فتحيا كأنها كانت ميتة، زي ما النبي صلى الله عليه وسلم قال: «اللهم إني أول من أحيا أمرك إذ أماتوه».

فأنزل الله سبحانه وتعالى قوله: ﴿يَا أَيُّهَا الرَّسُولُ لَا يَحْزُنْكَ الَّذِينَ يُسَارِعُونَ فِي الْكُفْرِ مِنَ الَّذِينَ قَالُوا آمَنَّا بِأَفْوَاهِهِمْ وَلَمْ تُؤْمِنْ قُلُوبُهُمْ﴾ [المائدة: 41]، ده الصنف الأول لم تؤمن قلوبهم، الصنف التاني: ﴿وَمِنَ الَّذِينَ هَادُوا﴾ [المائدة: 41]، أجزاء اليهود اللي بييجوا يقعدوا، سماعون للكذب، قاعدين بيسمعوا عشان يكذبوا عليك، سماعون لقوم آخرين لم يأتوك، بيسمعوا مجلس النبي صلى الله عليه وسلم عشان يروحوا يبلغوه للكبار. يقوم الكبار لما يسمعوا يقولوا: طب احنا هنبعتك بسؤال، بعد ما يحرفوا الكلمة من بعد مواضعه، يقولون: إن أوتيتم هذا... وقيل إن السؤال ما كانش في حد الزنا، كان السؤال في القصاص، حد من الأشراف اليهود قتل حد من الضعفاء في اليهود، وكان الحكم القصاص، فقالوا: روحوا أسألوا النبي صلى الله عليه وسلم، فإن حكم بالدية فخذوه، وإن حكم بالقصاص فردوه، يقول فاحذروا.

لكن ربنا قال في آخر الآية اللي هيتعامل مع الدين بالطريقة دي: ﴿وَمَنْ يُرِدِ اللَّهُ فِتْنَتَهُ فَلَنْ تَمْلِكَ لَهُ مِنَ اللَّهِ شَيْئًا﴾ [المائدة: 41]. يا جماعة، القلوب بين أصبعين من أصابع الرحمن، الإنسان يستسلم لدين الله سبحانه وتعالى، لو مش قادر يطبق جزء الدين يقول: يا رب أنا مقصر، لكن ما يغيرش في الدين، لو مش قادر يطبق حاجة في الدين يعتذر ويطأطئ الرأس ويندم ويقول: يا ربنا أنا مقصر، الكلمة أفعال ما ينساهاش في الدين، ده الإنسان والعياذ بالله قد يخذل في آخر عمره ونسأل الله السلامة والعافية، قد يصاب بالفتنة. والقلوب بين أصبعين مليون... لله من الآيات المرعبة في القرآن: ومن يرد الله فتنته ما حدش هيعرف يهديه أبداً، لو الأمة كلها، لو كل الأمة اجتمعت عشان تهدينا لا يحصل أبداً.

ومن يرد الله فتنته فلن تملك له من الله شيئاً، في ناس والعياذ بالله اختارت الرجس: ﴿أُولَئِكَ الَّذِينَ لَمْ يُرِدِ اللَّهُ أَنْ يُطَهِّرَ قُلُوبَهُمْ﴾ [المائدة: 41]، في واحد قلبه يختار الشهوة، واختار إنه يخلو إلى الأصل والعياذ بالله، أولئك الذين لم يرد الله أن يطهر قلوبهم، لهم في الدنيا خزي ولهم في الآخرة عذاب عظيم.

يبقى إذاً اللي نطلع به: أن الإنسان يبلغ دين الله سبحانه وتعالى، يا أيها الرسول، أن الإنسان يتمنى أن ربنا يستعمله في إحياء من الدين، من فرائض ومن السنن. ويعني كلمة جميلة قوي اللي قالها النبي صلى الله عليه وسلم في صحيح مسلم: «اللهم إني أول من أحيى أمرك إذ ماتوه». الإنسان يدعو ربنا إن هو يستعمله، والإنسان يخاف على قلبه ويدعي ربنا كتير: اللهم يا مقلب القلوب ثبت قلبي على دينك.

وده كان أكثر أدعية النبي صلى الله عليه وسلم، وهو من هو صلى الله عليه وسلم؟ شف النبي صلى الله عليه وسلم يقول: اللهم يا مقلب القلوب! أمال احنا بنعمل إيه؟ فلابد دائماً أن يكون الإنسان بين الخوف والرجاء، مش معنى إنسان وفق إلى صلاة قيام ليل أو إلى قراءة القرآن يصيب العجب أو يعتاد لا بالعكس، القلوب ولا أحد يدري بالخاتمة أبداً. الإنسان لابد أن يكون على وجل، وأن يكون على حذر، ويكثر من التضرع أن ربنا يكتب له حسن الخاتمة، وأنه يكتب له لذة النظر إلى وجهه سبحانه وتعالى.

لازم الإنسان يكثر من الدعاء: اللهم يا مقلب القلوب. وتذكر دائماً هذه الآية: ﴿وَمَنْ يُرِدِ اللَّهُ فِتْنَتَهُ فَلَنْ تَمْلِكَ لَهُ مِنَ اللَّهِ شَيْئًا﴾ [المائدة: 41]. والله سبحانه وتعالى عدل لا يظلم أحداً سبحانه وتعالى، أما أولئك الذين لم يرد الله أن يطهر قلوبهم بسبب خزي فيهم وبسبب مرض فيهم وبسبب نفاق في قلوبهم أصروا عليه، فعاقبهم الله سبحانه وتعالى، فالله لا يظلم أحداً أبداً. فمن أراد الهداية أخذ بأسبابها وسعى لها هداه الله سبحانه وتعالى، ومن أعرض عنها وأصر وأخرجه الله... نسأل الله السلامة والعافية، ونسأل الله عز وجل أن يستعملنا جميعاً ولا يستبدلنا، خلق ولهذا، واستغفر الله لكم. سبحانك اللهم وبحمدك كما أنطقتني، أستغفرك وأتوب إليك، جزاكم الله خيراً.