تفسير سورة سبأ (6) | الآيات (40-54) | د. أحمد عبد المنعم

السلام عليكم ورحمة الله وبركاته. الحمد لله وحده، والصلاة والسلام على من لا نبي بعده، محمد صلى الله عليه وسلم. نستكمل بإذن الله عز وجل تفسير سورة سبأ. كنا توقفنا عند قول الله عز وجل في الآية الأربعين: ﴿وَيَوْمَ يَحْشُرُهُمْ جَمِيعًا ثُمَّ يَقُولُ لِلْمَلَائِكَةِ أَهَؤُلَاءِ إِيَّاكُمْ كَانُوا يَعْبُدُونَ * قَالُوا سُبْحَانَكَ أَنْتَ وَلِيُّنَا مِنْ دُونِهِمْ بَلْ كَانُوا يَعْبُدُونَ الْجِنَّ أَكْثَرُهُمْ بِهِمْ مُؤْمِنُونَ * فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا وَنَقُولُ لِلَّذِينَ ظَلَمُوا ذُوقُوا عَذَابَ النَّارِ الَّتِي كُنْتُمْ بِهَا تُكَذِّبُونَ﴾ [سبأ: 40-42].

بعد شوط من فضائح الفكر المادي وطريقة التفكير المادية، وسقوط طريقة تفكير المشركين في التقييم أن من هو الأقرب عند الله ليس الذي معه مال، قال الله عز وجل: ﴿وَمَا أَمْوَالُكُمْ وَلَا أَوْلَادُكُمْ بِالَّتِي تُقَرِّبُكُمْ عِنْدَنَا زُلْفَى إِلَّا مَنْ آمَنَ وَعَمِلَ صَالِحًا﴾ [سبأ: 37]. قلنا يأتي في الغالب في السورة شوط من الدار الآخرة، وبعدين شوط من المحاجة والمجادلة، وبعدين شوط من الدار الآخرة، وبعدين شوط من المحاجة والمجادلة. وهذه نقطة مهمة جداً في النقاش مع أي أحد؛ فالمناظرات والنقاشات ما ينفعش تخلو من ذكر الدار الآخرة. لازم لما تيجي تناقش مع حد في أي قضية، حتى اللي هو بينكرها، وحتى لو هو ينكر الدار الآخرة، هو مركوز في فطرته ذلك؛ فأنت تضغط على النقطة دي. فلازم أثناء النقاشات، سواء في قضية الشريعة، أو توحيد الله سبحانه وتعالى، أو قضية دين الحق، لابد أن تتدخل فيها الدار الآخرة.

فبعد هذا الشوط جاء قول الله عز وجل: ﴿وَيَوْمَ يَحْشُرُهُمْ جَمِيعًا﴾، نقلة من الدنيا إلى الدار الآخرة. كما قلنا، من الأشياء التي تتكلم فيها السورة أن المشركين معهم عدة وعتاد وأموال، وينقسمون إلى أهل استكبار وأهل استضعاف، الذين استكبروا والذين استضعفوا. في رؤساء بيسيطروا على الأمور وبيضحكوا على الضعفاء، ودي أهم نقطتين معنا في السورة. يوم يحشرهم جميعاً، المستكبرين والمستضعفين، هيتجمعوا. المستضعفين حطوا المشكلة على المستكبرين، فربنا فضحهم، والمستكبرون تبرأوا منهم وقالوا: ﴿أَنَحْنُ صَدَدْنَاكُمْ عَنِ الْهُدَى بَعْدَ إِذْ جَاءَكُمْ بَلْ كُنْتُمْ مُجْرِمِينَ﴾ [سبأ: 32]. طيب حطوا المشكلة على الآلهة التي كانوا يعبدونها، فربنا سبحانه وتعالى بيجمعهم مع الملائكة. قالوا: إحنا كنا بنعبد الملائكة عشان تشفع لنا عندك يا رب. فربنا يسأل الملائكة أمامهم حتى تتبرأ الملائكة منهم.

ربنا بيسأل الملائكة هنا: ﴿أَهَؤُلَاءِ إِيَّاكُمْ كَانُوا يَعْبُدُونَ﴾ حتى يعلن الملائكة البراءة منهم. السؤال هنا مش أن ربنا يسأل لأنه مش عارف؛ فربنا أعلم سبحانه وتعالى، لكن حتى يتبرأ منهم أمام الله عز وجل وأمام الخلق. الملائكة قالت: ﴿سُبْحَانَكَ أَنْتَ وَلِيُّنَا مِنْ دُونِهِمْ﴾. يا رب إحنا بنعبدك وما لناش غيرك، أنت ولينا من دونهم. ﴿بَلْ كَانُوا يَعْبُدُونَ الْجِنَّ أَكْثَرُهُمْ بِهِمْ مُؤْمِنُونَ﴾.

بعضهم قال في معنى ﴿بَلْ كَانُوا يَعْبُدُونَ الْجِنَّ﴾ وجهين: إما أنهم كانوا يعبدون الجن مش الملائكة، وأنهم كانوا يكذبون لما قالوا يا رب إحنا كنا بنعبد الملائكة، ولما لقوا الجن دخلوا النار ولقوا الملائكة ربنا يكرمهم، فقالوا خلاص يا رب إحنا كنا بنعبد الملائكة، فكذبتهم الملائكة. وبعضهم قال: بل الجن ضحكت عليهم وصورت وزينت لهم عبادة الملائكة، فهم سمعوا كلام الجن؛ ففي حقيقة الأمر الجن ضحك عليهم وأقنعهم، ولذلك كانوا يسمون الأصنام تسمية أنثى، سموها اللات ومناة، وكانوا يعتقدون في بعض اعتقاداتهم أن الأصنام دي بتحل فيها الملائكة، وأن عبادتهم لهذه هي شفاعة يتقربون بها إلى الله؛ لأنه ما ينفعش يعبدوا ربنا مباشرة، فبيتقربوا حتى تشفع لهم الملائكة.

ليه اتخذوا الشفعاء دي؟ عشان مش عايز يلتزم بدين، عايز يعمل اللي هو عايزه، وبعدين ييجي يروح للصنم يقول له: خليه يشفع لي ويغفر لي ذنوبي، أو عشان يحقق أمانيه، عايز ولد، عايز ينتصر، فيعبد هذه الأصنام. فربنا سبحانه وتعالى بيفضحهم، والملائكة تفضحهم بتقول: ﴿بَلْ كَانُوا يَعْبُدُونَ الْجِنَّ أَكْثَرُهُمْ بِهِمْ مُؤْمِنُونَ﴾. دايما الإنسان، وده بيعرفك أن فيه نقطة مهمة معانا في السورة، أن من أخطر أسباب الشرك الإحساس بالضعف، ومن أخطر أسباب ترك الوحي الإحساس بالضعف. لذلك السورة بتبين أن المتصل بالله هو القوي؛ هتيجي معنا أن رب يقذف بالحق. الإحساس بالضعف بيخلي الإنسان عنده تبعية، بيخليه تابع، بيخليه مقلد، بيخليه يشوف عقائد أقوام المنتصرين ويقلدهم، غالب تقليد الشباب للغرب حتى لو في مضاد شكلها سيء هو نتيجة أنه عنده هزيمة نفسية وإحساس بالضعف.

فكان المستضعفين بيبحثوا عن أي قوة غيبية يعبدوها فكانوا يلجأوا إلى الجن. لما ييجي ينزل في وادي يقول: أعوذ بسيد هذا الوادي، خايف من الجن؛ بدل ما يلجأ إلى الله عز وجل يبحث عن أي قوة يلجأ إليها. المستضعف بيلجأ للمستكبر، والمستكبر بيلجأ إلى الجن، كلهم عمالين يبحثوا عن قوة، بيلجأوا إلى المال، بيلجأوا للعدة. وربنا سبحانه وتعالى بيقول القوة في السورة في اتصالك بالوحي، باتصال الوحي لربنا سبحانه وتعالى. فيقول الله عز وجل: ﴿فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا﴾. خلاص الأمور ظهرت على حقيقتها، لا أحد يملك لأحد نفعاً، ولا حتى لو حد عايز يضر حد ما يقدرش يضره.

﴿وَنَقُولُ لِلَّذِينَ ظَلَمُوا ذُوقُوا عَذَابَ النَّارِ الَّتِي كُنْتُمْ بِهَا تُكَذِّبُونَ﴾. الموضوع هنا أنهم كانوا بيعبدوا الجن ولا كانوا يكذبون بالنار؟ فكأن المشكلة الأساسية أنهم كانوا يكذبون بالنار، وأن موضوع الجن وعبادة الملائكة وعبادة الأصنام كل ده هروب من قضية النار، كل ده هروب من أنه يعترف أن فيه بعث وأن فيه حساب، وأن اللي مش هيؤمن بالكتاب واللي مش هيلتزم بالتعليمات هيدخل النار. نجد يا جماعة أن الشرك دايما هو حيلة نفسية للهروب من تبعات الحساب والجزاء؛ سواء اللي بيتخذ شفيع، نروح للقبر، اللي بيتخذ أصنام، اللي بيروح عند النصارى كرسي الاعتراف، أنه يتخذ ولي من دون الله عز وجل، كل ده حيل نفسية عشان ما يلجأش إلى الله مباشرة؛ لأنه عارف أنه عشان يلجأ إلى الله لازم يلتزم بأمر الله، وهو مش عايز يلتزم بأوامر الله، فهنا يدخل الشرك. فربنا بيقول لهم: ﴿ذُوقُوا عَذَابَ النَّارِ الَّتِي كُنْتُمْ بِهَا تُكَذِّبُونَ﴾.

ثم يقول الله عز وجل بعد شوط الدار الآخرة رجوع للدنيا، ويبدأ ختام السورة. المفروض أن طول السورة كلام عن قدرة الله المطلقة، كلام عن الملك والعلم المطلق لله سبحانه وتعالى، نماذج من التاريخ: سيدنا داود وسيدنا سليمان وقوم سبأ تدل أن الملك لله سبحانه وتعالى، وأن الله عز وجل قادر على أن يعطي الملك وقادر على أن يسلب الملك. شوط في الدار الآخرة من المستضعفين والمستكبرين حقائق علمية واضحة أن ليست الأموال والأولاد هي التي تقرب عند الله. بعد الشوط ده كله ما عادش فيه حاجة تستاهل الوضوح؛ بقى الموضوع واضح. فربنا بيقول: ﴿وَإِذَا تُتْلَى عَلَيْهِمْ آيَاتُنَا بَيِّنَاتٍ﴾، خلاص الدنيا بقت هنا واضحة، ما عادش خلاص بعد آخر السورة، شوط من الوضوح التام. يقولوا إيه بقى؟ ده كله قالوا الأولانية اللي قبلها: ﴿وَمَا أَرْسَلْنَا فِي قَرْيَةٍ مِنْ نَذِيرٍ إِلَّا قَالَ مُتْرَفُوهَا إِنَّا بِمَا أُرْسِلْتُمْ بِهِ كَافِرُونَ﴾ [سبأ: 34]. بدأوا يقولوا شبهات، فحصل رد على الشبهات.

هنا بقى ده الختام بتاع السورة، فقالوا تلات جمل. الآيات دي من اللي بتلخبط في الحفظ: ﴿وَقَالُوا مَا هَذَا إِلَّا رَجُلٌ يُرِيدُ أَنْ يَصُدَّكُمْ عَمَّا كَانَ يَعْبُدُ آبَاؤُكُمْ وَقَالُوا مَا هَذَا إِلَّا إِفْكٌ مُفْتَرًى وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُبِينٌ﴾ [سبأ: 43]. ليه اتقالت تلات جمل؟ ليه مع كل جملة جت كلمة قال؟ ليه ما جاش تلاتة معطوفين على بعض؟ ليه ربنا ما قالش وإذا تتلى عليهم آياتنا بينات قالوا كذا وكذا وكذا؟ ليه يتعطف مع كل مرة كلمة قالوا؟ وليه في التالتة تحديدا أظهر كلمة الذين كفروا؟

بصوا، نقطة مهمة في التفسير؛ التفسير بيقوم على مرحلتين: المرحلة الأولى التقاط أن الآية فيها حاجة، في تقديم في تأخير في لفظ غريب في اختصاص للصورة دي جه؛ ده الجزء الأول من التفسير. الجزء التاني ليه حصل كده؟ لازم يبقى عندك حس الالتقاط. فالآية دي مبنية على تلات جمل، الهجوم الإعلامي بتاعهم فصلوه عن بعضه، ولقى في التالتة تحديدا ربنا قال: ﴿وَقَالَ الَّذِينَ كَفَرُوا﴾، ما قالش وقالوا مع أن دي معطوفة، اللي قبلها كان متوقع وقالوا زيها. لأن هنجد هنا أن أهل الباطل بيقسموا الشبهات ويركزوا على كل شبهة لوحدها شوية فترة. فكأنهم اهتموا فترة بهدم الداعية، وفترة بهدم كلام الدعوة، وفترة هنقول التالتة بقى إيه.

التركيز الأول: ﴿وَإِذَا تُتْلَى عَلَيْهِمْ آيَاتُنَا بَيِّنَاتٍ قَالُوا مَا هَذَا إِلَّا رَجُلٌ﴾ بيتكلموا على مين كده؟ على النبي صلى الله عليه وسلم، بيتكلموا على الداعية. الجملة التانية: ﴿وَقَالُوا مَا هَذَا إِلَّا إِفْكٌ مُفْتَرًى﴾، ده اللي هو القرآن، يهدم المنهج. التالتة بقى: ﴿وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُبِينٌ﴾. الحاجة التالتة اللي قال عليها سحر هي إيه؟ التأثير؛ تلاوة النبي صلى الله عليه وسلم للقرآن أدت لتأثير على الناس. بدأوا مستغربين قالوا: ده أكيد التأثير ده سحر.

هم بيمسكوا الشبهات، يقولوا ده مثلاً مجنون، نقول له طب والكلام اللي بيقوله ده كلام حد يقوله مجنون؟ يقولوا الكلام ده كذب، تقول له طب مجنون بيقول كذب؟ بيعمل التأثير ده يقول لك التأثير ده سحر. طيب، بيمسكوا الأول يهدموا الداعية بإيه؟ وإذا تتلى عليهم آياتنا بينات، قالوا ما هذا إلا رجل يريد.. اتهموه بشبهتين: الشبهة الأولى أن له إرادة خفية من الكلام ده، له مطالب. دايماً أهل الباطل ما يتصوروش أن فيه حد بيعمل حاجة لله؛ يقول لك: "أكيد بتاخد كام يا عم الحاج؟"، ما عندوش تصور وبعاد. بيتهمك أنك أنت تريد حاجة من وراء ده؛ يبقى ﴿مَا هَذَا إِلَّا رَجُلٌ يُرِيدُ﴾ أن يبقى له زعامة، يريد أن يصدكم عما كان يعبد آباؤكم. عايز يشيل زعامة الآباء ويبقى هو زعيم، بيبحث عن الزعامة بيبحث عن السيطرة، بيبحث عن الرئاسة، بيتهمك بكده.

النقطة التانية أنه بيستثير قضية الآباء والأجداد، قال يعني هم متمسكين؟ هو أصلاً لما كان ما يعجبوش الصنم كان بيرميه ويجيب واحد تاني أو بياكله، ولو أبوه زعله ممكن يقتله ويتخانق معه عشان ناقة. لكن هو هنا بيستثير حمية الآباء، ودي أكثر حمية كانت موجودة عند العرب، حمية الآباء والفخر بالآباء، لدرجة لما ربنا سبحانه وتعالى أراد أنه يأمر العرب والمسلمين أنه يذكروا الله عز وجل قال: ﴿فَاذْكُرُوا اللَّهَ كَذِكْرِكُمْ آبَاءَكُمْ أَوْ أَشَدَّ ذِكْرًا﴾ [البقرة: 200]، كانوا أفخر بذكر الآباء. فيستثير الحمية، ودي نقطة مهمة جداً بيعملها أهل الباطل لما يحبوا يصدوا عن الدعوة وعن الدعاة، يتهموا الدعاة.

تهمة ضد الوطن وضد القومية وضد الوطنية؛ أي حاجة تعمل حمية عند الناس وخلاص. أي حاجة يتهمه: آه ده إنسان مش وطني، ده إنسان مش كذا، إنه يتهمه إنه عايز يبعدنا عن تقاليد الآباء. تخيلوا ده عايز يعمل كذا.

يصيروا عليه الشبهات، انتهزوا شبهة عايزين يستثيروا الحمية. طب ليه هم عايزين يستثيروا الحمية؟ الخطاب هنا ليه بالطريقة دي؟ هنا الخطاب يدل أن بدأ يحصل تأثير من دعوة النبي صلى الله عليه وسلم، وبدأ الناس تستجيب، وبدأ بعض الضعفاء -الآيات اللي فاتت أثرت فيهم بتاعت الحوار اللي بين المستضعفين والمستكبرين يوم القيامة- بدأوا يتأثروا، بدأ بعض الضعفاء يستجيبوا لهذه الدعوة. قالوا: إحنا لازم نلحق نفسنا، لازم نقوم بحملة إعلامية مضادة. فقالوا: هنعمل حملة ضد النبي صلى الله عليه وسلم إننا نقول إن ده فيه مشكلتين. المشكلة الأولى: إنه بيطلب الزعامة، مش عايز حق. النقطة الثانية: إنه عايز يبدل دين الآباء والأجداد، فيسألوهم لو في ناس بتفكر، طب إزاي؟ طب والكلام اللي معاه؟ ده الكلام اللي معاه مش أي حد ممكن يقوله. وقالوا: عملوا حملة تانية، تكرار كلمة وقالوا تدل أن في اهتمام بدي لوحدها واهتمام بدي لوحدها، إن دي اتعمل عليها حلقة كاملة أو مسلسل كامل أو برنامج كامل، دي شبهات كاملة.

يعني أعمل برنامج كامل مثلاً أو حلقة كاملة عن البخاري عشان يهدم حاجة في الدين عن السنة؛ ما يقولش الشبهات وراء بعضها، لا ده هو يفصل هنا في الشبهات. التفصيل في الشبهات لما يبدأ يحصل استجابة، بدأ يحصل في ناس تسير مع النبي صلى الله عليه وسلم. الشبهة الثانية ضد الوحي؛ يا يهدم في الداعية يا يهدم في المنهج اللي مع الداعية. ﴿وَقَالُوا مَا هَذَا إِلَّا إِفْكٌ مُّفْتَرًى﴾ [سبأ: 43]. والإفك هو نوع من الافتراء، لكن الزيادة في السب وزيادة في الطعن في الوحي لأن بيقولوا إن اللي معاه ده كذب، وكذب مش مثلاً جايبه من حد، ده كذب هو اللي اختلقه، لأن الشبهة بتاعة إنه اتعلم الكذب ده من حد تاني أثبتت فشلها.

ألاحظ أن المشركين بيعملوا حاجتين، دائماً بيعملوا للشبهات بتاعتهم، يعني دائماً يجيب شبهات جديدة، بس مشكلته أن الشبهات الجديدة بتتعارض مع الشبهات القديمة وده بيبقى أصلاً دلالة على أنه هو اللي كذاب. يعني أن يقول على واحد شاعر ونفس الشخص اللي يقول عليه شاعر يقول عليه مجنون! لا يمكن يبقى إنسان مجنون شاعر، أو يقول على واحد شاعر وبعدين يقول عليه ساحر؛ طب هو ساحر ولا شاعر؟ التهم تتعارض. فهنا قالوا: ﴿إِفْكٌ مُّفْتَرًى﴾، قالوا هنا هو اللي افتراه. وبعدين مرة تانية يقول: لأ، أعانه عليه قوم آخرون، نقول له: لأ، أصل ده في ناس ده بياخدوا من أهل الكتاب؛ فشبهتهم بتتعارض.

وخذ بالك الثلاث جمل جم بصيغة الحصر والقصر: ﴿مَا هَذَا إِلَّا﴾، ﴿مَا هَذَا إِلَّا﴾، ﴿إِنْ هَذَا إِلَّا﴾؛ يعني عايزين بيتكلموا قمة التوكيد. ﴿مَا هَذَا إِلَّا رَجُلٌ﴾، ﴿مَا هَذَا إِلَّا إِفْكٌ﴾، ﴿إِنْ هَذَا إِلَّا سِحْرٌ﴾. مش هذا رجل يريد أن يصدكم أو هذا إفك مفترى أو هذا سحر، لأ ده مش إلا كذا، ﴿إِنْ هَذَا إِلَّا﴾، بيتكلم بصورة الحصر والقصر زي ما قلنا. دي لغة شخص بدأ يتهز، بدأ أن في ناس تسيبه، فبدأ يشعر أنه لازم يقوم بحملة إعلامية يرد بها عن المستضعفين اللي بدأوا يسيبوه.

الثالثة بقى؛ إحنا قلنا الأولانية على النبي صلى الله عليه وسلم، الثانية على القرآن، الثالثة على إيه؟ على تأثير الوحي. كيف الناس؟ لأن لو أي عاقل بيسمع، هيسمع الأولانية أنه بيتهمه في نيته، يقول له: طيب إزاي؟ ده الكلام اللي معاه يدل أنه صادق. يقولوا: لا ما الكلام اللي معاه كذب. يقول له: إزاي ده كلامه، هذا الرجل وهو يتكلم بهذا الكلام يؤثر في الناس؟ ﴿وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُّبِينٌ﴾ [سبأ: 43]. قالوا للحق أي لتأثير الحق لما جاءهم، أي لما ظهر أمامهم.

يعني ما لهمش عذر، كان أشراف قريش يسمعوا سيدنا أبو بكر الصديق يصلي في فناء بيته، ما بيطلعش بره ولا حاجة، مساحة كده في بيته يصلي فيها، لكن بيعلي صوته، وكان رجلاً بكاءً. قراءته للقرآن فكان يتجمع عليه نساء وأطفال قريش منبهرين أن في شخص بيقرأ القرآن بهذه الطريقة، وكانوا مشركين، فكانوا يعجبوا بصلاة أبي بكر الصديق. فأفزع ذلك قريش، تخيل مجرد قراءة القرآن أفزعتهم، واتجمعوا وطلبوا من أبي بكر الصديق أنه ما عادش يصلي؛ حتى بس الصلاة، لأ ما عادش تصلي عشان ما تأثرش في الناس. فتأثير القرآن على الناس يخافون منه، يقول لك: لأ، أنا في مرة والله واحد بيحكي لي بيقول لي استدعوه، قالوا له: ما عادش تصلي بسورة مريم، ولو هتصلي ما عادش تصلي سورة مريم، صلي بأي سورة تانية. طب هو ده، هو مش هيشرح، ده هو هيصلي بسورة، قال: لا ما عادش تصلي ولا المائدة، ما تصليش بهم. فشيء عجيب جداً، هو يخاف حتى من قراءة القرآن.

﴿وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُّبِينٌ﴾ [سبأ: 43]؛ لأن هو مش قادر يدي تفسير، مش قادر، لازم يدي تفسير إيه اللي بيحصل ده؟ إزاي الناس بتستجيب؟ إزاي الرجل يترك أباه الغني وأمه الغنية ويصبر على التعذيب؟ إزاي؟ أكيد فيه حق، أكيد بيشعر بشيء في داخله يجعله يضحي. يقول: ده سحر، إيه اللي يخلي واحد يسيب أرضه وقومه وماله ويتبع هذا الدين ويتعرض للخطر، هو مستفيد إيه؟ فيقولوا: لأ ده ما لهاش حل غير السحر. طب ليه كلمة الذين كفروا؟ العلماء قالوا حاجة من اتنين: الذين كفروا قال من شدة اعتنائهم بالجزئية الثالثة كان أكتر كلامهم، وأن كلمة جاءهم بمعنى الظهور، وكلمة كفروا بمعنى كفروا بمعنى غطوا، الكافر أي الذي يغطي الشيء. فكلمة جاءهم يعني ظهر الحق، متضادة مع كلمة كفروا.

وبعض العلماء قال معنى ثاني: هل المقصود هنا بالذين كفروا هم المستكبرين؟ يبقى تفسير الآية: ﴿وَإِذَا تُتْلَى عَلَيْهِمْ آيَاتُنَا بَيِّنَاتٍ قَالُوا مَا هَذَا إِلَّا رَجُلٌ يُرِيدُ أَن يَصُدَّكُمْ عَمَّا كَانَ يَعْبُدُ آبَاؤُكُمْ وَقَالُوا مَا هَذَا إِلَّا إِفْكٌ مُّفْتَرًى وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُّبِينٌ﴾ [سبأ: 43]. المستكبرين لقوا اللي معهم بدأوا يروحوا منهم، فبدأوا يعملوا حملة لانتزاع المستضعفين مرة أخرى، يبقى قال الذين كفروا بحملة قام بها المستكبرون لاسترداد الضعفاء مرة أخرى بعد أن آمنوا عشان يرجعوهم تاني، يبقى كلمة ﴿وَقَالَ الَّذِينَ كَفَرُوا﴾ والمقصود بها مين؟ الذين استكبروا.

خذوا بالكم إحنا قلنا السورة مليئة بمسألة المستكبرين والمستضعفين، وأن في ناس هي بتملك القوة والعتاد وخايفة أن يسحب البساط من تحت، ﴿وَقَالَ الَّذِينَ كَفَرُوا لِلْحَقِّ لَمَّا جَاءَهُمْ إِنْ هَذَا إِلَّا سِحْرٌ مُّبِينٌ﴾ [سبأ: 43]. ومش أي سحر، بيقولوا سحر وإيه؟ مبين؛ يعني سحر واضح. فبيتكلموا يقول لك الموضوع واضح. يعني تخيل مشهد واحد من المستكبرين طالع، واحد من المستضعفين بدأ يسلم وبدأ يؤمن بالوحي، يقول له: أنا مش فاهم إيه اللي أنت بتعمله ده! ما هي واضحة قدامك أهو؛ واحد عايز زعامة، واللي معاه كذب، والتأثير سحر واضح، واضحة أهي، واضحة مش محتاج، فلازم يظهر أنه واثق فيما يقول، عشان كده بيستعمل أسلوب الحصر والقصر ويستعمل ألفاظ إفك مفترى، سحر مبين.

إن أهل الباطل في عصرنا بيسيروا على نفس نهجهم، بس هو إيه؟ المعاصرون بيدرسوا الكلام ده كويس ويفرعوا عليه، يعني ده كلام مقتضب، دي أصول، دي قواعد هم بيسيروا عليها زي ما قال ربنا سبحانه وتعالى: ﴿أَتَوَاصَوْا بِهِ﴾، زي ما كانوا بيوصوا بعض أن هم يعملوا كده.

فيقول الله عز وجل يعاتبهم، يعاتبهم والله عز وجل: أنتم إزاي بتنكروا الوحي؟ هو أنتم قارنتوه بوحي تاني؟ يعني أنت جاء لك وحي من عند ربنا، قارنت مثلاً بكلام أهل الكتاب عشان تقول أن هو كذب؟ قارنته مثلاً قلت ده ما بيدعوش إلى التوحيد؟ فربنا بيقول: ﴿وَمَا آتَيْنَاهُم مِّن كُتُبٍ يَدْرُسُونَهَا﴾ [سبأ: 44]؛ ده أنت ربنا ما جابلكش قبل كده وحي عشان تقارن به هذا الوحي، وتقول: آه إحنا قارنا واكتشفنا أن ده كذب، لأن الكتب كلها تدعو إلى التوحيد، الكتب كلها تدعو إلى رفع الظلم. لذلك المتواضعون الذين أرادوا الحق من أهل الكتاب، سواء اليهود والنصارى، لما سمعوا القرآن قالوا: ده نفس الكلام، أيوه ده خرج من مشكاة واحدة، هو نفس الوحي فعلاً، دعوة إلى التوحيد، ويسلموا على طول. أو حتى يعترف حتى لو ما أسلمش، زي هرقل، يسمع يقول: آه الكلام ده وحي، زي النجاشي يسمع يقول: آه الكلام ده وحي، زي عبد الله بن سلام يسمع يقول: الكلام ده وحي، لأنه من مشكاة واحدة، وهو بيقارن باللي عنده في الكتاب.

فربنا بيقول للمشركين هنا بتوع مكة: طب أنتم قارنتم ده بكتاب قبل كده فبتردوه؟ ﴿وَمَا آتَيْنَاهُم مِّن كُتُبٍ يَدْرُسُونَهَا﴾ [سبأ: 44]. أو معنى الآية: لقد ضيعتم أعظم شرف لكم وهو الكتاب، يعني بدل ما تدرسوه تردوه، ﴿وَمَا آتَيْنَاهُم مِّن كُتُبٍ يَدْرُسُونَهَا﴾، يعني أنتم لم تنالوا هذا الشرف من قبل. أفبعد أن جاء هذا الشرف إليكم تتركونه؟ ده أنتم المفروض تنكبوا عليه وتتدارسوه، تقوموا تتركوه! ﴿وَمَا أَرْسَلْنَا إِلَيْهِم قَبْلَكَ مِن نَّذِيرٍ﴾ [سبأ: 44].

بعض العلماء قال معناها إيه؟ كان دائماً العرب حاسين بالنقص، حتى بيتسموا الأميين، والتانيين كان اسمهم إيه؟ أهل كتاب. فالعرب حاسس دائماً أنه عنده نقص، وعلى فكرة النقص اللي كان عند العرب ده هو من أهم -زي ما ذكر بعض المؤرخين- من أهم أسباب انتشار الإسرائيليات؛ أنه دائماً عنده تطلع حاجات في الغيب عايز يعرفها، إيه الخلق والشيطان والجن والملائكة والسماوات والأرض وما بعد الموت وقبل الحياة، هو عايز، فيروح يسأل أهل الكتاب، كل ما يجي له حاجة يروح يسأل أهل الكتاب. فأهل الكتاب بيجاوبوا، حتى عندهم علم بيجاوبوا، وعندهم هم كمان قصص كتير فبيجاوب. فربنا بيقول لهم: جاءت لكم الفرصة، جاء لكم نذير وجاء لكم كتاب فتتركونه! ده أنتم المفروض تنالوا وتسارعوا لهذا الشرف! بقى بعد ما جاء لكم تسيبوه! هتبقوا أنتم كمان عندكم كتاب، وهيبقى الكتاب الأوحد الحق! تتركوه؟ ﴿وَمَا أَرْسَلْنَا إِلَيْهِم قَبْلَكَ مِن نَّذِيرٍ﴾ [سبأ: 44].

ربنا بيقول لهم كتهديد آخر تهديد قبل بقى الخمس آيات اللي وراء بعض اللي هيختم بها المناظرة في السورة. ربنا بيقول لهم: ﴿وَكَذَّبَ الَّذِينَ مِن قَبْلِهِمْ﴾ [سبأ: 45]، يعني يا كفار قريش اعلموا أن من قبلكم قد كذب أيضاً مثلكم، طب حصل لهم إيه؟ ﴿وَكَذَّبَ الَّذِينَ مِن قَبْلِهِمْ﴾ أي كذب الذين من قبل كفار قريش. خذوا بالكم من أهم الحاجات في التفسير أنك تعرف الضمائر بتعود على مين، ومن أهم أسباب الخلاف في تفسير الآية اختلاف عودة الضمائر، أن الضمير ده بيعود على إيه؟

أنتم فاهمين معي ولا نايمين؟ أيوه، ما هو بيعود بمعنى لما مثلاً سورة إبراهيم لما المشركين ربنا سبحانه وتعالى قال عنهم: ﴿فَرَدُّوا أَيْدِيَهُمْ فِي أَفْوَاهِهِمْ﴾ [إبراهيم: 9]، أيديهم الهاء دي بتعود على مين وأفواههم بتعود على مين؟ لو قلنا ردوا أيديهم، أيدي المشركين في أفواههم، أفواه الرسل، يبقى معناه أنه حط إيده على بوق الرسول وقال له: مش عايزك تتكلم. لو أيديهم أيدي المشركين في أفواههم، أفواه أنفسهم، معناه كأنه يا إما بيشاور له أنه يسكت أو كأنه بيضحك وبيمثل نفسه أنه بيكتب سخرية؛ فاختلاف الضمير بيؤدي لاختلاف في معنى الآية.

فهنا: ﴿وَكَذَّبَ الَّذِينَ مِن قَبْلِهِمْ وَمَا بَلَغُوا مِعْشَارَ مَا آتَيْنَاهُمْ﴾ [سبأ: 45]، الواو دي تعود على من؟ بلغوا معشار ما آتيناهم. الخلاف في الواو، فهم على أساسها اختلف العلماء تلات أقوال، إحنا ممكن نقول قولين نكتفي بهم. قيل: وما بلغ كفار قريش معشار القوة المادية التي آتاها الله للأمم السابقة، يبقى معنى الآية: وكذب الذين من قبل كفار قريش، كذب المشركون قبل كفار قريش، وما بلغ كفار قريش معشار ما بلغه هؤلاء اللي هم الكفار اللي قبلهم من القوة المادية من قوم عاد، وبالرغم أن دول كانوا أقوى منكم وربنا أهلكهم، فإذاً سوف يهلككم. وضح معنى الآية؟ يعني مثلاً يجي واحد يتكبر، فتقول له: أنت بتتكبر؟ ده ربنا أعطى لمن قبلك هو أعظم منك فكذب فأهلكه الله. يبقى معنى الآية إيه؟ من باب أولى، زي قوله عز وجل، يعني هو عليه هين سبحانه وتعالى، وهو أهون عليه أن اللي أهلك اللي أقوى منك قادر يهلكك. فمعنى الآية ربنا بيقول لهم: كذب الذين من قبلكم يا كفار قريش، ولقد آتيتوهم من القوة المادية وقوة الأجساد وينحتون في الجبال بيوتاً وأكثر منكم، فلما كذبوا أهلكتهم، فأنا قادر على إهلاككم.

يعني بيقول لهم تدبروا كده. معنى تاني: ﴿وَكَذَّبَ الَّذِينَ مِن قَبْلِهِمْ وَمَا بَلَغُوا مِعْشَارَ مَا آتَيْنَاهُمْ﴾ أي الذين من قبلهم معشار ما آتينا قريش من الوضوح في الوحي والآيات البينات؛ يعني ربنا بيقول لهم: أنا أعطيت لكم يا كفار قريش من الآيات المعجزات البينات أكتر من أي أمة سابقة، يعني القرآن أعظم.

فقال النبي صلى الله عليه وسلم: «ما من نبي من الأنبياء إلا أوتي من الآيات ما على مثله آمن البشر، وإنما كان الذي أوتيته وحيًا أوحاه الله إلي، فأرجو أن أكون أكثرهم تابعًا يوم القيامة». يبقى النبي صلى الله عليه وسلم في الحديث ده بيقول الوحي أعظم من كل الآيات، عشان كده هبقى أنا أكثر الناس اتباعًا لأنه أكثر تأثيرًا.

خلاص فكذبوا رسلي فكيف كان نكير؟ فمعنى الآية على المعنى التاني: إذا كان اللي كذب بعشر الآيات أهلكتهم، أومال اللي يكذب الآيات دي كلها هعمل فيه إيه؟ يعني اللي يكذب بعشر الآيات أنا أهلكته، أومال اللي يكذب بالقرآن هعمل فيه إيه؟ أنا أعذبه عذابًا شديدًا؛ لأن كل ما تزداد الآيات وضوحًا كل ما يزداد العذاب.

خد بالك ابن عمرو بن العاص زي ما روى الإمام الجليل بيقول: أشد الناس عذابًا ثلاثة: فرعون، وأصحاب المائدة، والمنافقون الذين صلوا خلف النبي صلى الله عليه وسلم. دول أشد الناس عذابًا، مين التلاتة؟ فرعون؛ ليه؟ لقد أريناه آياتنا كلها، شافها كلها فكذب وأبى. وأصحاب المائدة على قول إن هي نزلت؛ لأن ربنا قال لهم خدوا بالكم لو نزلتها وكفرتوا أعذبكم عذابًا لا أعذبه أحدًا من العالمين، قالوا ماشي وكلوا منها وبعدين كفروا. والتالت اللي صلى خلف النبي منافق، شاف من الآيات وصلى لكنه كان منافقًا، وضوح كثرة وضوح الآيات لو معها إعراض بيزداد معها العذاب، يبقى كل ما الآيات تبقى أكثر وضوحًا ويبقى فيه إعراض كل ما العذاب يزداد والعياذ بالله.

وكذب الذين من قبلهم وما بلغوا معشار ما آتيناهم فكذبوا رسلي فكيف كان نكير؟ خد بالك إن الراء مكسورة، فكيف كان نكيري حذفت. معنى الآية يقول الله عز وجل: انظروا كيف كان إنكاري عليهم. فكيف كان نكير، الياء دي فيه ياء محذوفة عشان كده الراء مكسورة تدل على الياء المحذوفة، معنى الآية انظروا كيف كان إنكاري عليهم. أنت لما تروح تنكر منكر آخرك ممكن تتكلم، تزعق، تعمل، لكن الله عز وجل لما ينكره يخسف بهم الأرض، فكيف كان إنكاري عليهم ذلك؟

ختام السورة، خلاص بقى المناظرة طول السورة، وبرضو من من الملامح اللي فيها مناظرة في السورة قمة الإنصاف. إحنا قلنا ده التنزل مع الخصم، يعني جت في السورة دي: ﴿وَإِنَّا أَوْ إِيَّاكُمْ لَعَلَىٰ هُدًى أَوْ فِي ضَلَالٍ مُّبِينٍ﴾ [سبأ: 24]. جه في السورة دي أنا بس هيطلب منك طلب واحد: ﴿قُلْ إِنَّمَا أَعِظُكُم بِوَاحِدَةٍ﴾ [سبأ: 46]. دي في السورة دي، إن اهتديت، قل إن ضللت وإن اهتديت، لو كده أو لو كده. التنزل مع الخصم؛ لأن في فترة البهرجة المادية هو محتاج يسمع خطاب ينتشله عشان يقبل ويسمع الوحي.

في الختام قل إنما أعظكم بواحدة. ختام بقى الآيات، النبي صلى الله عليه وسلم بيقول لهم بصوا بعد بقى الشوط من أول ﴿الْحَمْدُ لِلَّهِ الَّذِي لَهُ مَا فِي السَّمَاوَاتِ وَمَا فِي الْأَرْضِ وَلَهُ الْحَمْدُ فِي الْآخِرَةِ﴾ [سبأ: 1]، والكلام عن قدرة ربنا والملك والعلم وسيدنا داوود وسيدنا سليمان وقصة سبأ والدار الآخرة وحوار المستضعفين والمستكبرين، وبيان إن الأرزاق الأموال والأولاد دي رزق من عند ربنا ابتلاء مش علامة حب، بعد كل ده، هطلب منكم طلب واحد بس، ﴿قُلْ إِنَّمَا أَعِظُكُم بِوَاحِدَةٍ﴾. وما قلش أطلب منكم، قال إيه؟ أعظكم، بيمارس وظيفة النبي الداعية، إنه يعظهم. يقول له أنا برضو خوفي ليك هيخليني أعظك قبل ما أمشي، هو كان ممكن يقول خلاص السورة تخلص على كده ﴿وَكَذَّبَ الَّذِينَ مِن قَبْلِهِمْ وَمَا بَلَغُوا مِعْشَارَ مَا آتَيْنَاهُمْ فَكَذَّبُوا رُسُلِي فَكَيْفَ كَانَ نَكِيرِ﴾ [سبأ: 45]. خلصت السورة، هتموتوا يلا همشي وأسيبكم، لكن في الآخر أنا هوعظكم، حاجة هقول لك حاجة واحدة بس قبل ما أمشي ودي مهمة جدًا، لما تيجي الحوار يقفل مع اللي قدامك تسيب له حتة دائمًا تفضل ضاغطة عليه قبل ما تمشي، لما تيجي تتكلم مع واحد سيب له حاجة هتفضل مؤرقة نفسيًا كده عشان يفكر معي، يعني تيجي تتكلم واحد تقول له بص أنا قبل ما أقفل معاك الحوار أنا هقول لك كلمة واحدة بس كذا كذا، وتقول له وراء بعضه، وبعدين تمشي، دي تنهي به الحوار بحيث تسيبه يقعد يتفكر في الكلام اللي أنت بتقوله.

فالنبي صلى الله عليه وسلم بيقول لهم ﴿أَعِظُكُم بِوَاحِدَةٍ﴾، إيه هي الواحدة دي؟ إيه الطلب الواحد؟ النصيحة دي مكونة من كذا جزء، الجزء الأول: أن تقوموا، بمعنى إنك أنت تنهض للبحث. وهنا زي ما بنقول الجو في السورة فيه مستضعفين مضحوك عليهم، الجو ده مناسب أوي في الخطاب لما بيبقى فيه تشويه إعلامي كتير وناس كتير مضحوك عليها، فأنت بتقول للناس أنا هطلب منكم طلب واحد بس، رقم واحد: تقوموا، تقوم يعني إيه؟ يعني أنت تدور بنفسك ما عدتش تسمع، أنت تبحث بنفسك، هتتعب. يعني يجي واحد مثلًا يقول لك أنا ما عدتش مصدق أي حد، أنا باسمع فتاوى النقاب بدعة والنقاب واجب، الأغاني بدعة والأغاني حلال، الربا آه الفوائد المستحبة، واحد يقول أنا ما عدتش واثق في أي حاجة في الدنيا، أنا قلت له لأ طالما وصلت للمرحلة دي أنت لازم تتعب بقى لازم تدور، ده دار آخرة، ده جنة ونار، لازم تقوم، يبقى رقم واحد لازم تاخذ قرار إنك تقوم من الأغوشة اللي أنت عايش فيها دي.

ثانيًا: أن تكون هذه لله لا لإرضاء أحد، مش قايم تدور على مصلحتك، مش قايم تشوف إيه اللي بيجيب فلوس أكتر؟ مش رايح تسأل اللي يقول لك يبسطك هتمشي وراه، مش قايم ترضي المجتمع؟ مش قايم وأنت خايف إنك تعمل حاجة تخالف المجتمع؟ لأ، أن تقوموا إيه؟ لله، أي لأجل رضا الله، يبقى رقم واحد إنك تقوم تتحرك تبحث، رقم اتنين إن تكون هذه القومة إيه؟ لله.

رقم تلاتة في شرط في صحة القومة اللي هتوصلك للحق، إن أي إنسان هيعمل كده هيصل إلى الحق، أي إنسان هيقوم يرى الله عز وجل منه هذه القومة، يا رب أنا قمت أدور على دين الحق، زي سلمان الفارسي كده لما قام من بلده وسابها قال أنا وراء الحق، راح لنصارى واحد اتنين تلاتة أربعة، أربع قساوسة، وواحد يبعته للتاني للتالت راح أربع بلدان، راح العراق وفلسطين وتركيا والشام وبعدين نزل للمدينة لف عشان يوصل للحق، قوم هذه القومة كانت لله، رقم تلاتة: مثنى وفرادى، ما تقومش تفكروا مع بعض، لأ يا تقعدوا اتنين اتنين يا كل واحد لوحده.

ليه بقى؟ دائمًا في حملات التشويه إعلامي، زي مثلًا لما نشوف حملة تشويه إعلامي جامدة لما تيجي تتكلم قدام الناس ممكن واحد بس يبوظ الكلام يقول لك إيه يا عم إيه ومش عارف إيه وتلاقي أصوات وأنت اسكت وتلاقي هيصة وخلاص والموضوع إيه يتفشش، يعني ممكن يبقى درس واحد بس يبوظه واحد بس يزعق وما تسمعش هو بيقول إيه والتاني يرد عليه باز خلاص، فهو عايز جو إيه؟ جو هادئ للوصول للحق، إحنا دلوقتي عايزين نصل للحق مش عايزين نتخانق. النقطة التانية ليه برضو مثنى وفرادى؟ فيه حاجة اسمها الضغط المجتمعي، أنت خايف تفكر بره دائرة المجتمع.

يعني مثلًا هديكم مثال بعيد عن الموضوع خالص، قضية التعليم المنزلي، فيها أبحاث كتير وإن هي أنتجت علماء وأغنياء جدًا في العالم وشركات كتير عالمية أصحابها اتعلموا في التعليم المنزلي مش في التعليم الأكاديمي، فتخيل لو أنت جاي تطرح فكرة إيه رأيكم إن ممكن إن واحد يعلم أولاده في البيت ما يودهمش مدارس، أنت ممكن أول لما تيجي تطرح الفكرة أنت بتقول أنت مجنون، أنت خلاص يا عم خلاص، أو حتى اللي بيتلقى وهو قاعد وسط ناس ما لقاش حد تجاوب، يقول لك لا خلاص هبقى أنا اللي هعمل فيها لا لا مش هينفع، مش هبقى أنا اللي استجبت، فتخيل النبي صلى الله عليه وسلم يقوم يكلمهم وهم واقفين يبصوا لبعض، حد هيوافق؟ ما حدش وافق، خلاص لا خليني مع الناس وخلاص.

فيه ضغط مجتمعي، ده اللي سموه غصب عن الإنسان بعض بيسموه العقل الجمعي، إن أنت تربى جواك معلومات غصب عنك، مجموع الناس المعلومات دي ما يعرفش يخالفها غصب عنه ما يعرفش يخالفها، مخالفة العقل الجمعي ده مخالفته بتحتاج عزيمة وإرادة، لدرجة إن ممكن يكون واحد بيحب بنته في الجاهلية ويدفنها عشان يوافق المجتمع، اتكلمنا ده بالتفصيل في سورة الأنعام، إزاي السفاهة ممكن توصل بشخص إنه يدفن بنته حية عشان يرضي المجتمع، إزاي إنسان ممكن يدفن البنت بتاعته حية عشان إيه؟ عشان ما يبقاش شكله وحش قدام الناس.

طريقة التفكير دي عشان تتخلص منها لازم تقعد لوحدك، تبعد بره المؤثرات، حتى الأخ لما تيجي الشاب لما تيجي تكلم شاب في الالتزام تاخذ شاب مثلًا وسط الشلة خروجات واتكلموا، لما تكلمه لوحده تلاقيه بيستجيب، لما تكلمه وسط شلته تلاقيه عمال يهيص ويفلفص ومش عايز يسمع وبتاع، فهو هو، ما تقابله لوحده وتاخده وتصلوا واعتكاف لوحده يبقى شخص تاني مختلف تمامًا تغير، فالفصل للضغط المجتمعي ده إنك تفصله عنه مهم، المهم إنك أنت تقول له فكر لوحدك أو شوف واحد بيحبك صادق وأنت بتحبه، اتنين عقلاء مع بعض كده عقلاء يقعدوا مع بعض ويفكروا.

مش النبي صلى الله عليه وسلم طول عمرنا بنسميه الصادق الأمين؟ مش طول عمرنا بنخاف عليه؟ مش الوقتي وأحنا رايحين نموته عاينين الأمانات عنده! يا راجل يا عاقل! أنا أثق في في شوية أمانات ولا نثق في الوحي اللي بيجيبه بيقوله من السماء؟ يعني لما يقعد يفكر هو لو قعد يدي لنفسه فرصة يفكر، ذلك الوليد ابن المغيرة لما سمع القرآن لوحده وتأثر، لما راح وسمع القرآن لوحده تأثر، رجع لهم قالوا له إيه أنت اتجننت ولا إيه؟ قال لهم لا لا لا أنا عاقل خلاص، أنا ده أنا بس كانت إيه كان ملاك كده معدي وخلاص وأنا وتبت إلى الشيطان، يعني هو لما بيبعد عن الضغط بيفوق، كتير من الناس كده.

على فكرة الموضوع ده خطير، كتير مننا ييجي نسكت بقى على واقعنا إحنا كملتزمين، مثلًا هو عايش في وسط معين وسط سلفي مثلًا، الوسط ده بيفضل علم معين تلاقيه حريص قس على تلقي هذا العلم، طب ليه؟ عشان ما يحسش بنوع من الدونية وهو عايش في المجتمع ده، عشان ما يبقاش حاسس بنوع من الدونية بهذا المجتمع، الاهتمام بالنظرة العامة بتاعة الناس.

أنا قرأت قصة عجيبة أوي، أحد الخلفاء العثمانيين كان دائمًا من كتر اهتمامه بالجهاد كان رث الثياب، ما بيهتمش بهدومه أشعث أغبر ودائمًا الوزراء يحاولوا معاه ويتكلموا معاه إنه يهتم بملابسه ما فيش فايدة، وما بيهتمش بالظواهر، فجه واحد وزير دولة أوروبية أو سفير من دولة أوروبية جاي يزورهم، فالوزراء اتجمعوا الملك قالوا له معلش وعشان خاطرنا والراجل جاي من أوروبا وبتاع، وعايزين إيه تلبس بس حاجة نضيفة، قال لهم خلاص البسوا أنتم كلكم حاجات نضيفة وأنا كمان هنلبس حاجة كده من على الحبل كده، المهم جم كلهم يوم الزيارة كلهم لابسين حاجات بقى جديدة وحلل بقى وبدل نضيفة ما عدا هو زي ما هو اللي فاستغربوا جدا.

الراجل ده عمل إيه قبل ما يدخل الوزير الأوروبي؟ طلع سيف ضخم جدًا وحطه جنب الكرسي بتاعه، مع اللي قعد يتكلم معاه، فالناس جمع يعاتب الملك، قالوا مش أنت قلت لنا وكان شكلنا بايخ إن إحنا اللي لابسين جديد وأنت اللي مش لابس؟ قال لهم روحوا اسألوه الملك كان لابس إيه، فراحوا قالوا له الملك كان لابس إيه؟ قال والله ما أدري، ظلت عيني على هذا السيف طوال الجلسة، طول ما هو قاعد هو مركز على السيف، هو قاعد مش واخد باله من فاحيانًا في حاجات مؤثرة تأثير حقيقي في الإنسان مش المظاهر اللي بتأثر، فكذلك في الموضوع اللي أنا بتكلم فيه بقى إن أحيانًا الإنسان ما بيسمعكش.

أنت عمال تكلمه، تكلم شاب مثلًا وسط مجموعة من الشباب الصلاة والالتزام هو مش سامعك وعايش مع عالم اللي هو طب الخروجات طب وأصحابه طب مش عارف إيه، وتنتزع من ده مش كده، تقول له ﴿أَعِظُكُم بِوَاحِدَةٍ﴾ أن تقوموا، لازم تتغير تبحث عن التغيير، القومة دي لله، صفات هذه القومة مثنى وفرادى، اتخلص من ضغط المجتمع اللي عليك ده، زي ما بيقول كتير مننا بيطلب علم معين، مش ده المطلوب منه، لكن هو حتى لا يشعر بالدونية أمام الناس أمام المجتمع اللي هو فيه، حاجات مهمة بالنسبة له ما بيطلبهاش، بيفعل ما يمليه عليه المجتمع بتاعه.

طيب إحنا قلنا مثنى وفرادى، بعد التلاتة دول بعد ما ياخذ الخطوات التلاتة دول، يرجع يقعد مع نفسه تاني على قول بعض المفسرين، ﴿ثُمَّ تَتَفَكَّرُوا﴾، تقعد تفكر كده، فجأة واحد كان عايش وسطنا واسمه الصادق الأمين، وله مكانة وعايش تاجر ومبسوط ومن علية القوم ومع قوم قريش وشرف الناس ومبسوط، فجأة قال أنا بيجي لي وحي وقال أنذر لكم بين يدي عذاب شديد، تعرض للأذى وتعرض لمحاولات للقتل والتعذيب وما خدش فلوس وما طلبش فلوس، هو بيعمل كده ليه؟ يعني بيقول له ادي لنفسك فرصة، هو بيعمل كده ليه؟ ما هو حاجة من اتنين.

يا صاحب، فعلاً له غرض مادي من وراء الذي يعمله. يا مجنون! ما هو إن يعمل كل ده على الفاضي يبقى مجنون. فربنا نفى عن النبي التهمتين دول: تهمة الجنون وتهمة أن يكون له غرض مادي. عشان كده قال لهم إيه؟ ﴿ثُمَّ تَتَفَكَّرُونَ مَا بِصَاحِبِكُم مِّن جِنَّةٍ إِنْ هُوَ إِلَّا نَذِيرٌ لَّكُم بَيْنَ يَدَيْ عَذَابٍ شَدِيدٍ * قُلْ مَا سَأَلْتُكُم مِّنْ أَجْرٍ فَهُوَ لَكُمْ إِنْ أَجْرِيَ إِلَّا عَلَى اللَّهِ وَهُوَ عَلَىٰ كُلِّ شَيْءٍ شَهِيدٌ﴾ [سبأ: 46-47].

يعني واحد ترك كل ده لنصرة دين، ويقول أنا وحي ومعي وحي يثبت ذلك، ومعه كتاب ويتلو عليكم الكتاب، وتحداكم ولم تأتوا بسورة من مثله، ويتعرض للعذاب ويتعرض للأذى ويترك بلده، وأنتم عارفين إنه مش مجنون. عشان كده قال: ﴿مَا بِصَاحِبِكُم مِّن جِنَّةٍ﴾؛ لقد صاحبتموه كثيراً، طالما صاحبتموه أنتم تعلمون جيداً أنه ليس بمجنون، بل كنتم تحتكمون إليه عند الخلاف، زي ما حصل في حادثة الحجر الأسود، وتثقون في عقله وفي رأيه وفي أمانته. ﴿إِنْ هُوَ إِلَّا نَذِيرٌ لَّكُم بَيْنَ يَدَيْ عَذَابٍ شَدِيدٍ﴾. مهم أوي في كتاب المناظرات إنك تختمها بالتخويف، مهم قوي في ختام المناظرات بين المعرضين إنك تختم كلامك بالتخويف.

﴿قُلْ مَا سَأَلْتُكُم مِّنْ أَجْرٍ فَهُوَ لَكُمْ﴾. معنى الآية: أما أنا فلم أطلب منكم مالاً، وإن كنت طلبت مالاً فهي زكاة أو صدقة يعود نفعها عليكم، أو افترض أنني طلبت منك حاجة خذها ثاني مش عايزها، كنوع من التنزل في الخطاب. أو: ﴿مَا سَأَلْتُكُم مِّنْ أَجْرٍ فَهُوَ لَكُمْ﴾؛ فالقرآن يعود لكم ولا يعود نفعه عليّ، بل يعود نفع الدعوة دي لكم. طب وأنا نفعي؟ ﴿إِنْ أَجْرِيَ إِلَّا عَلَى اللَّهِ﴾؛ أنا أنتظر أجري من الله ولا أنتظر أجري منكم، ﴿وَهُوَ عَلَىٰ كُلِّ شَيْءٍ شَهِيدٌ﴾. يعني إيه ختام الآية ﴿وَهُوَ عَلَىٰ كُلِّ شَيْءٍ شَهِيدٌ﴾؟ أي أن الله عز وجل يعلم ما أقول ويشهد على ما أقول، وإذا أراد أن يفضحني فضحني. شهادة الله لرسوله بنصرته، شهادة الله لرسوله صلى الله عليه وسلم بنصرة دينه، شهادة الله عز وجل لرسوله صلى الله عليه وسلم برفعة ذكره، شهادة الله عز وجل لرسوله صلى الله عليه وسلم أن يحفظه إلى أن يتم الدعوة، فقالوا دي من معاني إن الله يشهد لرسوله ويشهد عليّ.

قل الآية الثالثة، ﴿قُلْ إِنَّ رَبِّي يَقْذِفُ بِالْحَقِّ عَلَّامُ الْغُيُوبِ﴾ [سبأ: 48]. هنا الحق قال كثير من العلماء، الإمام ابن جرير الطبري وغيره، قال: أي الوحي، أي أن الله عز وجل يهدم الباطل بالوحي. بمعنى إحنا دايما نقول في معركتين مع الباطل: المعركة الأولى هي معركة العقائد، المعركة الثانية هي معركة التطبيق. الإسلام لا يهزم أبداً في المعركة الأولى، أي مناظرة عقدية فكرية لابد أن ينتصر فيها الإسلام إلا إذا كان المناظر هو اللي ضعيف، إنما التطبيق فالحرب بيننا وبينهم سجال إلى يوم القيامة، فـ ﴿إِنَّ رَبِّي يَقْذِفُ بِالْحَقِّ﴾. الله عز وجل أوحى للنبي صلى الله عليه وسلم القرآن وأمرنا أن نتعلم القرآن، فنحن نجاهد بالقرآن.

قال كثير من أهل العلم إن الحق هنا الوحي، وأي أن الله عز وجل إن أول قذيفة للحق يهدم بها المسلمون الباطل أن يبقى معهم وحي، ومن غير وحي لن يستطيع المسلمون أن يهزموا أهل الباطل حتى لو معهم قوة مادية. يبقى إذاً الاهتمام بالقذيفة الأولى هي قذيفة الوحي، وإن الجهاد بالوحي هو الجهاد المثمر. بمعنى أي قذيفة من المسلمين على أهل الباطل، أي صراع عقدي بين المسلمين وبين أهل الباطل يغيب عنه الوحي، الصراع ده لن ينتصر فيه المسلمون، ولو انتصر فيه المسلمون لن ينتصروا انتصاراً حقيقياً، والله عز وجل يقول: ﴿بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ﴾ [الأنبياء: 18]. دماغ يجي في دماغه ويكسرها له، فالحاجة اللي تيجي في الدماغ تموته؛ لما كانت قذيفة الحق جت في الدماغ موتها. لما تبقى القذيفة مش بالوحي، لما يبقى الصراع العقدي اللي بين المسلمين وبين أهل الباطل ينزع منه عقائد ومبادئ الوحي، بيبقى تأثير المسلمين ضعيف، ما بيبقاش قوي. عشان كده تلاقي المناظرات أو النقاشات أو أطروحات من أهل دينه الله عز وجل لما بيغيب عنها القرآن بتبقى ضعيفة، تأثيرها ضعيف، ما بتبقاش قاصمة.

طريقة القرآن تخلي اللي أمامك إما أن يؤمن وإما أن يجحد. طريقة القرآن بتخلي اللي أمامك يوصل لحاجة من اتنين: إما أن يخضع ويستسلم ويؤمن، أو -مش يكفر بقى- يجحد، يعني يعلم أن ده الحق وبعدين يقول خلاص لا طاقة لي به أنا هكفر. زي الوليد بن المغيرة يسمع يقول: إن عليه لحلاوة، وإن أعلاه لمثمر، وأسفله لمغدق، ثم يكفر؛ فخلاص يهلك عن بينة كما قال الله عز وجل عن المشركين: ﴿أَجِرْهُ حَتَّىٰ يَسْمَعَ كَلَامَ اللَّهِ ثُمَّ أَبْلِغْهُ مَأْمَنَهُ﴾ [التوبة: 6]. بحيث خلاص لو هيموت بقى يموت عن بينة. فهنا ﴿إِنَّ رَبِّي يَقْذِفُ بِالْحَقِّ﴾، تسمية الوحي قذيفة، إن ما ينفعش ينزع من الوحي الصراع بين الحق والباطل، القذيفة دي تكون في الصراع، ما ينفعش يطرح القرآن على إنه مجرد لطائف، على إنه مجرد حاجات بلاغية، على إنه مجرد حاجات لطائف أخلاقية بسيطة، لأ، في قضية أساسية من أول لحظة خلق آدم: الصراع بين الحق والباطل. وإبليس لما جعل يطيف بآدم عليه السلام ويدرس هيعمل إيه، يبقى نزع قضية الصراع بين الحق والباطل وطرح الدين على إنه مجرد تراث شعبي أو تقاليد عامة، ده مصيبة. لأ، الدين هو صراع بين الحق والباطل.

﴿قُلْ إِنَّ رَبِّي يَقْذِفُ﴾ ولما أنت بتستعمل الوحي في الصراع أنت محفوظ من الله. ﴿إِنَّ رَبِّي﴾ هنا بقى الربوبية، قالوا هنا الربوبية، ربوبية خاصة مش ربوبية عامة، ربوبية العناية والاهتمام الخاصة؛ ليه؟ لأن أنت بتجاهد بالقرآن. ﴿قُلْ إِنَّ رَبِّي يَقْذِفُ بِالْحَقِّ﴾. طيب ربي اللي بيقذف بالحق له وصف هنا، ما جابش مثلاً العزيز الحكيم، القاهر الجبار، جاب وصف إيه؟ ﴿عَلَّامُ الْغُيُوبِ﴾. إشمعنى علام الغيوب هنا بقى؟ أولاً هنيجي قصادها في الآيات ﴿وَيَقْذِفُونَ بِالْغَيْبِ مِن مَّكَانٍ بَعِيدٍ﴾ [سبأ: 53] في ختام السورة عن الكفار. ده الفرق بين قذائف الحق الحقيقية وبين قذائف الباطل. قذائف الحق من الله مش من المسلمين أنفسهم، إنما أصلها من الله، ﴿إِنَّ رَبِّي يَقْذِفُ﴾. هم اللي بيقذفوا الباطل، ما عندهمش إله، لأن لا إله إلا الله. يبقى الفارق الأول: ﴿إِنَّ رَبِّي يَقْذِفُ﴾ هم اللي بيقذفوا، الفاعل هنا ربي، الفاعل هناك هم. هنا بالحق، هناك ما فيش بالحق. ﴿إِنَّ رَبِّي يَقْذِفُ بِالْحَقِّ﴾، عايزين نعمل مقارنة بين ﴿إِنَّ رَبِّي يَقْذِفُ بِالْحَقِّ عَلَّامُ الْغُيُوبِ﴾ وبين ﴿وَيَقْذِفُونَ بِالْغَيْبِ مِن مَّكَانٍ بَعِيدٍ﴾. هنا قلنا الفاعل ربي، هناك هم الفاعل. هنا بالحق، هناك ما فيش بالحق، ما فيش وحي عندهم أصلاً، عشان كده ربنا بيقول ﴿وَمَا آتَيْنَاهُم مِّن كُتُبٍ يَدْرُسُونَهَا﴾ [سبأ: 44]. معك واحد ما معهوش وحي، أنت معك وحي.

الفارق الثالث هنا بقى ما بين علام الغيوب وبين بالغيب من مكان بعيد. أهل الباطل لما بييجي يقذف قذيفته، يعني إيه الباطل يقذف قذيفته؟ يعني ييجي مثلاً أهل الباطل يقول: أنا عندي تفسير للحياة، أنا عندي رؤية اقتصادية عامة للحياة، أنا عندي تصور عن الدولة عام، التصورات العامة للحياة دي قذائف الباطل. إن يقول لك مثلاً إن يبقى فيه مثلاً مذهب الاشتراكية أو الرأسمالية أو الليبرالية أو العلمانية، دي تصورات من تصورات أهل الباطل، هي دي قذائف أهل الباطل اللي عايز يحط تصور كامل للحياة. الإسلام ينازع في التصورات الكلية، التفاصيل الجزئية ممكن يتفق معهم فيها في بعض الحاجات، التصورات الكلية يملكها الإسلام وينازع فيها، لأ لازم تكون لذلك. أما كان يجي واحد من الصحابة، ثلاثة من الصحابة قالوها أو بعض العلماء عد بعض من الصحابة، قال: نحن قوم -بيتكلم عن التصورات كلها- نحن قوم ابتعثنا الله لنخرج العباد من عبادة العباد إلى عبادة رب العباد، ومن ضيق الدنيا إلى سعة الآخرة. يبقى هو عنده تصور عام عن الحياة. قذائف أهل الباطل أشبه بواحد مغمض عينه بالغيب، مغمض عينه، ومكان بعيد وما بيشوفش وبيرمي، فده منظر بالضبط واحد واقف بعيد عايز ينشن على حاجة بعيدة عن الهدف بتاعه ومغمض عينه بالغيب وبيرمي، فطبعاً لا تصيب.

قذائف الحق الله عز وجل ﴿عَلَّامُ الْغُيُوبِ﴾. يعني إيه علام الغيوب؟ يعلم أين ستسقط هذه القذيفة؟ بمعنى أيضاً ربنا لما ينزل وحي يقول لك الوحي ده هيستمر وينفع إلى يوم القيامة، تقول له إزاي؟ تقول له لأن ربنا علام الغيوب. لما ربنا ينزل وحي ويقول الوحي ده المستضعفين اللي في مكة دول هينفوا به الدين في العالم، تقول له إزاي؟ تقول له لأن ربنا علام الغيوب. هو يعلم المستقبل بالنسبة لربنا كان ماضي ويعلم ذلك سبحانه وتعالى، ﴿سَوَاءٌ مِّنكُم مَّنْ أَسَرَّ الْقَوْلَ وَمَن جَهَرَ بِهِ وَمَنْ هُوَ مُسْتَخْفٍ بِاللَّيْلِ وَسَارِبٌ بِالنَّهَارِ﴾ [الرعد: 10]. الأمور عند ربنا مختلفة سبحانه وتعالى، ما تقيسش ربنا على البشر، ﴿لَيْسَ كَمِثْلِهِ شَيْءٌ﴾ سبحانه وتعالى. فكلمة يقذف بالحق إن أنت معك وحي الذي تكلم به يعلم الغيب، يعلم المستقبل. ما تخافش، ما تقولش طب وبعدين، وافرض طبقنا النظرية الاقتصادية بتاعة الإسلام، وافرض عملنا كذا في الشريعة، طب وبعدين إيه اللي هيحصل قدام؟ ما هو اللي نزله هو عارف إيه اللي هيحصل قدام، إنما أهل الباطل ما يعرفوش. عشان كده أهل الباطل كل شوية يجربوا، تظهر الاشتراكية والشيوعية والرأسمالية، يقول لك آه بعد مئة سنة تجربة، آه والله ده إحنا كنا غلطانين، الناس ماتت وغلطت وُفُلِسَت وحصل مشاكل يقول لك آه ده إحنا كنا غلطانين. وأنت لازم تقعد تجرب وراء أهل الباطل للنهاية. أنت قذائف الحق اللي معك الذي قذفها ﴿إِنَّ رَبِّي يَقْذِفُ بِالْحَقِّ﴾ ﴿عَلَّامُ الْغُيُوبِ﴾. يعني يعلم كل آية اللي هيطبقها مصيره إيه ونتائجها إيه في الواقع.

كل آية لو طبقناها ربنا يعلم إيه النتائج بتاعتها وإيه مستقبلها وهتصير بنا إلى إيه، ويعلم كل آية هنسيبها هنروح لغاية فين وهنضيع إزاي، يعلمه الله عز وجل. فنزل لك الوحي، فلو تعاملنا بالوحي على هذه الطريقة نحن نملك رؤية مستقبلية. يعني القذيفة اللي معك الذي قذفها ﴿إِنَّ رَبِّي يَقْذِفُ بِالْحَقِّ عَلَّامُ الْغُيُوبِ﴾. واضح المعنى ولا صعب ولا ثقيل؟ نحن إخوة يعني ما فيش مشكلة، واضح فعلاً؟

طيب ﴿قُلْ إِنَّ رَبِّي يَقْذِفُ بِالْحَقِّ عَلَّامُ الْغُيُوبِ * قُلْ جَاءَ الْحَقُّ وَمَا يُبْدِئُ الْبَاطِلُ وَمَا يُعِيدُ﴾ [سبأ: 48-49]. الباطل ما بيمشيش غير لما الحق ييجي، الباطل ما بيمشيش يقول الحق اتفضل، الباطل لن يذهب إلا كرهاً، الباطل ما بيمشيش إلا لما أهل الحق ييجوا، يعني طريقة تفكير بني إسرائيل أن يخرجوا منها، لا أنت هتدخل هو يمشي، ده أهل الباطل. إحنا عايزين أهل الباطل يقول لك إيه اتفضلوا حضرتك، لا، إحنا عايزينهم يمشوا عشان إحنا... ﴿قُلْ جَاءَ الْحَقُّ وَزَهَقَ الْبَاطِلُ﴾ [الإسراء: 81]. امتى زهق الباطل لما إيه؟ لما جاء الحق. ﴿إِنَّ الْبَاطِلَ كَانَ زَهُوقًا﴾ عند مجيء الحق مش لوحده، معي؟ فهنا ﴿قُلْ جَاءَ الْحَقُّ﴾ طب بعد ما جه الحق الباطل راح فين؟ ﴿وَمَا يُبْدِئُ الْبَاطِلُ وَمَا يُعِيدُ﴾، مش هيعمل أي حاجة. قيل وما يبدئ وما يعيد يعني إيه معناها؟ قالوا يعني معناها لا بيقدم ولا يأخر، إذا جه الحق الباطل مش هيعرف يتصرف قدامه في حاجة، مش هيعرف يتصرف؛ لأنه هيتصاب في دماغه الباطل، ﴿بَلْ نَقْذِفُ بِالْحَقِّ عَلَى الْبَاطِلِ فَيَدْمَغُهُ﴾ [الأنبياء: 18]. هيصاب في دماغه ما عدش يعرف يفكر يموت. ﴿وَمَا يُبْدِئُ وَمَا يُعِيدُ﴾. وقيل ﴿وَمَا يُبْدِئُ وَمَا يُعِيدُ﴾ يعني كيف لا تتبعون الله والله عز وجل هو الذي يخلق والباطل أهل الباطل لا يخلقون شيئاً، وإذا مات لا يعيدونه. فكلمة ﴿وَمَا يُبْدِئُ وَمَا يُعِيدُ﴾ أي لا يخلق خلقاً ابتداءً ولا يعيد الخلق. ده القول الثاني.

القول الثالث: إن الحق اللي هو الوحي يستطيع أن يقيم أمة، وإذا سقطت الأمة لو تمسك أهل الحق مرة ثانية بالحق، أقامهم الحق مرة أخرى. يعني أي أمة من الأمم عشان تنهض محتاجة وحي، ولن تكون هناك نهضة لأي أمة من الأمم إلا بالوحي، ولو سقطت أمة ابتعدت عن وحي وسقطت، الوحي قادر إنه يعيدها مرة ثانية. الأمة الإسلامية لما وقعت الحل عشان ترجع إيه؟ إيه؟ تتمسك بالوحي. فهنا إحنا نقول على الحق هنا إيه؟ الحق يبدئ ويعيد. معنى يبدئ: يبدئ إقامة دولة، وإذا سقطت... أما يعني إيه ﴿وَمَا يُبْدِئُ الْبَاطِلُ وَمَا يُعِيدُ﴾؟ أي أن الباطل ليس قادراً على إنشاء نهضة، أن ينهض بأمة كأمة، مش كدولة كأمة، إذا سقطت لو تمسكت بالباطل، أي مذهب باطل بيقع بيرموه، بيقعدوا يحاولوا مرة خلاص بيهلك الاشتراكية يقعدوا يجربوا فيها لغاية لما تثبت فشلها ويرموها خلاص. فيه واحد يقول لي: طب لو طب أنا الوقتي أنت بتقول الوحي لازم يقيم، طب إزاي فيه دول كافرة قائمة، إزاي فيه دول كافرة هي الوقت اللي مسيطرة وهي اللي قائمة؟ بنقول ده بسببين، السبب الأول ودايماً شيخ الإسلام يكثر منه في كتبه إن كل نهوض موجود وكل خير...

هو من بقايا وحي، هو من بقايا دين حتى لو لم ينسبوه إلى الدين. يعني الذي موجود في الحضارة الغربية الآن عندهم بقايا دين؛ رفع الظلم، وأنهم يقومون في وجه الظالم، وأنهم يتناصحون، وأنهم يحرصون، عندهم أشياء، هذا دائماً شيخ الإسلام يسميها بقايا النبوة.

أو بقايا الوحي حتى عند الشرق؛ عندهم بقايا الوحي وبقايا النبوة موجودة عندهم، ولكل خير في الأرض هو من الوحي أو من بقاياه، وهذا من أكثر المعاني التي يتكلمون فيها الشخصية. المعنى الثاني أنك أنت لما تخلّيت هو بقى شكله عالي، لكن هو الدرجة التي واقف عليها هي ليست عالية، أنت الذي نزلت تحته؛ بدليل عنده من الفساد الأخلاقي ما تضيق به صفحات الكتب، يبقى هو ما هو عالٍ أصلاً، أنت الذي نزلت؛ يعني هو واقف في الدركة رقم عشرة، ليس في الدرجة، أنت واقف في الدركة رقم عشرين، فتبدأ تقول هو سابقني، ما أنت لو رجعت تمسكت بالوحي ستقف وتقول: آه فعلاً، هذا هو ما تحتي. واضح الردان على هذه النقطة؟

﴿قُلْ جَاءَ الْحَقُّ وَمَا يُبْدِئُ الْبَاطِلُ وَمَا يُعِيدُ * قُلْ إِن ضَلَلْتُ فَإِنَّمَا أَضِلُّ عَلَىٰ نَفْسِي ۖ وَإِنِ اهْتَدَيْتُ فَبِمَا يُوحِي إِلَيَّ رَبِّي ۚ إِنَّهُ سَمِيعٌ قَرِيبٌ﴾ [سبأ: 49-50]. ففيها نوع من التنزل في الخطاب، لو أنا ضللت فإنما أضل على نفسي، أن يعود وبال الضلال على نفسه، وأيضاً بنفسي، وإن اهتديت فبما يوحي إلي ربي. الآية هذه جميلة جداً؛ يعني النبي صلى الله عليه وسلم يقول لهم ما فيش هداية من غير وحي، أي هداية في حياتي سببها الوحي، النبي صلى الله عليه وسلم الذي يقول هكذا، أي هداية في حياتي، ﴿وَإِنِ اهْتَدَيْتُ فَبِمَا يُوحِي إِلَيَّ رَبِّي﴾. ما فيش أي هداية في حياتي إلا سببها وحي من عند ربنا سبحانه وتعالى، إنه سميع قريب، قريب إلي، يعلم احتياجي، يعلم احتياج الناس، سميع بأقوالهم.

ولو ترى، نختم المشركين بقى الذين يحاربون الدين، آخر يختم المشهد زي ما قلنا دائماً في المناظرات، تعمل ختاماً تخويفياً وتنهي. فربنا يقول للنبي صلى الله عليه وسلم بعد ما قلت لهم خمس، قولوا وراء بعض: قل، قل، خمس آيات قل. في الآخر ربنا يقول للنبي صلى الله عليه وسلم: ﴿وَلَوْ تَرَىٰ إِذْ فَزِعُوا فَلَا فَوْتَ وَأُخِذُوا مِن مَّكَانٍ قَرِيبٍ﴾ [سبأ: 51]. فزع، متى الإنسان يفزع؟ عندما يشوف حاجة مرعبة. فقيل الفزع هذا له ثلاث مواطن: لما يشوف جنود المسلمين في بدر، وشاف الملائكة وهي تقاتل مع المسلمين في بدر، وساعة الموت لما يشوف ملائكة الموت وهي تضربه على وجهه وعلى دبره، ويوم القيامة لما يشوف ملائكة تجره للنار، لها سبعون ألف زمام مع كل زمام سبعون ألف ملك. في الثلاث مواطن هؤلاء يفزع المشرك، ﴿وَلَوْ تَرَىٰ إِذْ فَزِعُوا﴾. لما يجي يفزع الطبيعي أنه يجري، فيجي يجري، ولو ترى يفزع؛ ﴿فَلَا فَوْتَ﴾، رايح فين؟ ﴿وَأُخِذُوا مِن مَّكَانٍ قَرِيبٍ﴾، لأن كل مكان هو قريب إلى الله، يعني هو سيهرب من ربنا فين؟ فكلمة ﴿وَأُخِذُوا مِن مَّكَانٍ قَرِيبٍ﴾، أينما ذهب هو قريب، سواء ساعة الموت، سواء في الدنيا، سواء يوم القيامة على اختلاف الأقوال الثلاثة التي قلناها.

أول لما يجي يموت أو يوم القيامة أول ساعة يقول: ﴿وَقَالُوا آمَنَّا بِهِ﴾، طب ما أنا طول السورة عمال أقول لك، أنا طول السورة أقول لك قال الله، وعمال أوضح لك وهو الملك، وهو علمه الغيوب، وتتلى عليك الآيات، والآن قالوا آمنا به، ساعتها فربنا يقول لهم: ﴿وَأَنَّىٰ لَهُمُ التَّنَاوُشُ مِن مَّكَانٍ بَعِيدٍ﴾ [سبأ: 52]. يعني إيه التناوش؟ التناوش يعني التناول. أصل كلمة المناوشة النوش، أنك أنت تحاول تمسك حاجة وهي في مسافة صغيرة، يعني مثلاً عايز أمسك المصحف هذا، أنا كدة أحاول أن أتناوشه، التناول والمكان قريب. لما الناس تقرب من بعض، ما يتحاربوش مع بعض، ما يلتصقوش ويبقى قريبين من بعض، يقول لك حصل بينهم مناوشات، لأن كان فيه مسافة قريبة من بعض. فكلمة ﴿وَأَنَّىٰ لَهُمُ التَّنَاوُشُ﴾، كيف يتمنون؟ كأن ربنا شبّه الإيمان بحاجة قريبة، فكأنه عايز يمسك الإيمان وهو خلاص، ﴿وَأَنَّىٰ لَهُمُ التَّنَاوُشُ مِن مَّكَانٍ بَعِيدٍ﴾، في المكان البعيد، يعني تخيل معي المشهد، واحد مثلاً طلع فوق والإيمان كان تحت في الأرض وبيتحاسب، فجاي يقول آمنا، فربنا يقول له هو أنت جاي تتناول الإيمان دلوقتي، مكان بعيد، كان أمامك ولطالما عُرض عليك وأنت أعرضت عنه. ﴿وَأَنَّىٰ لَهُمُ التَّنَاوُشُ مِن مَّكَانٍ بَعِيدٍ﴾، أنت بَعدت خلاص عن التوبة، انسى، يا ليتني كنت، ويا ليتني تبت، الكلام هذا وقته خَلُص، هذا كان زمان. ﴿وَقَدْ كَفَرُوا بِهِ مِن قَبْلُ وَيَقْذِفُونَ بِالْغَيْبِ مِن مَّكَانٍ بَعِيدٍ﴾ [سبأ: 53]. كان قدامك وأنت الذي كفرت، ويقذفون بالغيب، هذا ما كانش بيكفر بس، هذا كان بيقذف أهل الحق بالباطل، وقارنا ما بين أن ربي يقذف بالحق، علام الغيوب، وبين أهل باطل، ﴿وَيَقْذِفُونَ بِالْغَيْبِ مِن مَّكَانٍ بَعِيدٍ﴾.

آخر حاجة في السورة تتناسب مع جو السورة، قلنا المشركين في السورة هؤلاء معهم أموال وأولاد وعدة، معهم كل الزينة، وفي السورة ﴿وَقَالُوا نَحْنُ أَكْثَرُ أَمْوَالًا وَأَوْلَادًا﴾، فربنا بيقول في الآخر: ﴿وَحِيلَ بَيْنَهُم وَبَيْنَ مَا يَشْتَهُونَ كَمَا فُعِلَ بِأَشْيَاعِهِم مِّن قَبْلُ ۚ إِنَّهُمْ كَانُوا فِي شَكٍّ مُّرِيبٍ﴾ [سبأ: 54]. يعني كل أمنياته لحظة الموت وهو بيموت وهو بيؤخذ من الدنيا، كأنه يمد يده وعايز يأخذ الفلوس معه فيُمنع، يقول له لأ، مش هتأخذ الفلوس معك، التي كنت فرحان بها لن تنفعك، ﴿وَحِيلَ بَيْنَهُم وَبَيْنَ مَا يَشْتَهُونَ﴾. يتمنى أنه يتنعم بالأولاد لأنه عارف أنه هينتقل من الدنيا للدار الآخرة، فسيترك الكفن ما فيه جيوب، عايز بقى يأخذ الأموال معه، فيُحال بينه وبين الأموال التي طالما افتخر بها على المسلمين، ﴿وَحِيلَ بَيْنَهُم وَبَيْنَ مَا يَشْتَهُونَ كَمَا فُعِلَ بِأَشْيَاعِهِم مِّن قَبْلُ﴾. وقيل حِيل بينهم وبين ما يشتهون أي بالتوبة، يقول يا ليتني أتوب، يا ليتني، يندم على كل لحظة طعن فيها في الدين، وعلى كل موقف وقف فيه ضد الدين يوم القيامة، فيقال له لن تنال التوبة، خلاص موضوع التوبة انتهى، بل حتى لن يؤذن له حتى في الاعتذار، بل تأتي عليه أوقات والعياذ بالله في النار يطلب أنه يعتذر، ربنا سبحانه وتعالى لا يأذن له حتى بمجرد أنه يأتي عليه لحظة حتى ممنوع أنه يتكلم في النار، ﴿قَالَ اخْسَئُوا فِيهَا وَلَا تُكَلِّمُونِ﴾، والعياذ بالله، ﴿وَحِيلَ بَيْنَهُم وَبَيْنَ مَا يَشْتَهُونَ كَمَا فُعِلَ بِأَشْيَاعِهِم مِّن قَبْلُ ۚ إِنَّهُمْ كَانُوا فِي شَكٍّ مُّرِيبٍ﴾. كان كلما يحاول، خلاص القرآن سيؤثر فيه يشك، فيبعد عن القرآن، كلما خلاص سيتأثر وخلاص سيلتزم بالقرآن يبدأ يشك ويبعد، ظل عايش في الشك هذا لغاية لما مات، ما سابش نفسه لو كان ساب نفسه ووقف ﴿أَن تَقُومُوا لِلَّهِ مَثْنَىٰ وَفُرَادَىٰ ثُمَّ تَتَفَكَّرُوا﴾، ابتعد عن ضغط المجتمع وفكّر وخذ القرار.

كثير من الناس ليس قادراً يأخذ القرار، أبو طالب عم النبي صلى الله عليه وسلم وهو بيموت مش قادر يأخذ القرار وهو يقول للنبي صلى الله عليه وسلم: ولقد علمت بأن دين محمد من خير أديان البرية دينا، لولا الملامة أو حذار مسبة، لكنت سمحاً بذاك مبينا. يقول للناس ستلومني أو ستشتمني، كان زماني الآن بقيت مسلماً، ولغاية آخر لحظة وهو بيموت والنبي صلى الله عليه وسلم يقول له: قل كلمة أشفع لك بها عند ربي، وأبو جهل يبص له ويقول له: أتترك دينك ودين آبائك؟ أبو طالب آخر كلمة قالها قال: بل هو على ملة عبد المطلب، ما قدرش يأخذ القرار، كثير من الناس مش قادر، مش قادر يأخذ القرار، لكن لابد أن الإنسان يقتحم العقبة، ربنا قال عن الوليد بن المغيرة لما بعد عن الضغط المجتمعي وسمع القرآن قال: إنه فكّر وقدّر، هذه مشكلته، قعد يقدر الأمور، طب وبعدين؟ طب وإزاي؟ لو كان أخذ القرار من غير ما يقعد يفكر ويقدر كثيراً كان زمانه أسلم، سبحان الله!

كل شيء بقدر. فإذاً الإنسان يُسرع في طاعة الله عز وجل ولا يتردد في طاعة الله عز وجل. يعني كدة بفضل الله عز وجل ربنا أتمّ علينا هذه النعمة العظيمة تفسير سورة سبأ. المرة القادمة بإذن الله عز وجل نستفتح سورة فاطر، وبإذن الله عز وجل ممكن المرة القادمة سنبدأ، السورة التي نخلصها سنعمل عليها امتحاناً إن شاء الله، على الدروس، سيصبح مثلاً السورة تخلص في خمس دروس، وممكن نعمل لكم مذكرة صغيرة كدة ربنا ييسر، ويبقى فيه جائزة كبيرة إن شاء الله مع كل سورة. يعني سورة فاطر آخر سورة فاطر إن شاء الله نعمل امتحاناً على سورة فاطر، على الدروس وعلى المذكرة التي سنوزعها، التي فيها شرح سريع لسورة فاطر، نعمل امتحاناً بعد كل سورة، والذي يجيء الأول إن شاء الله سيكون له جوائز قيمة. أسأل الله عز وجل أن يجعلنا من أهل القرآن. أقول قولي هذا وأستغفر الله لي ولكم، سبحانك اللهم وبحمدك، أشهد أن لا إله إلا أنت، أستغفرك وأتوب إليك، وأقم الصلاة.