بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وأهل بيته، كما صليت على آل إبراهيم إنك حميد مجيد. أما بعد.
الحقيقة سورة البروج تناولت قصة مهمة جداً ومهم إن إحنا نتعرض ليها في هذه الآونة، وهي قصة أصحاب الأخدود. الحقيقة إن النهارده مش جايين نتكلم في السورة ولا جايين نتكلم في القصة، إحنا جايين نتكلم في حاجة يعني لها تعلق بهذه السورة. السورة دي يا جماعة على قصرها وقلة عدد آياتها فيها حاجة عجيبة جداً، السورة دي فيها أكثر -مش نفس الرقم اللي هقوله- أكثر من 13 اسم وصفة وفعل لله عز وجل، يعني هذا الرقم إحنا أغفلنا اسم الله واسم الرب. هنلاقي 13 اسم وصفة وفعل لله سبحانه وتعالى، وهي السورة كلها 22 آية تقريباً.
فده شيء عجيب ويستحق التوقف، خصوصاً إن بعض هذه الأسماء له خصيصة مع هذه السورة، خلاص يعني مثلاً اقتران العزيز بالحميد ما جاش في القرآن كله غير ثلاث مرات، منهم في السورة دي. اسم الحميد نفسه هو اسم عجيب، لأنه اسم الحميد جه في القرآن 17 مرة. العزيز طبعاً من يعني في القرآن كتير، 92 مرة تقريباً. اسم الحميد جاء في القرآن 17 مرة، منهم 13 مرة في سور مكية، وده إن شاء الله يعني نتناوله إن شاء الله بشيء من التفصيل. 13 مرة من 17 في سور مدنية، أربع مرات بس اللي في سور مدنية.
فمحتاجين النهارده إن شاء الله نتدبر شيئاً -مش هنلحق نقف عليها كلها- من هذه الأسماء والصفات والأفعال التي هي لله عز وجل ومذكورة في هذه السورة المباركة. قبل بقى ما ما نتدبر هذه الأسماء والأفعال والصفات، هي موضوع السورة أصلًا موضوع قصة أصحاب الأخدود. وهي باختصار، كلنا طبعًا عارفين قصة أصحاب الأخدود. قصة طويلة، لكن باختصار: فئة من المؤمنين وفئة من الكافرين، فئة الكفار هي الفئة المستعلية المتمكنة في الأرض، وراودوا المؤمنين عن دينهم، أبوا، فراحوا حافرين الأخدود ورموهم في الـ في تلك الأخدود. أخدود فيها نار، حفروا أخدود وولعوها نار، ورموا الفئة المؤمنة في تلك الأخدود فأحرقوا المؤمنين.
فواضح جدًا استعلاء الكفار، وواضح جدًا استضعاف المؤمنين، وفي رأي العين في رأي العين واضح جدًا انتصار مين على مين في رأي العين؟ لما نحكي القصة كده لأي حد ما فيش واحد هيقول إن المؤمنين كذبوا حاجة، صح كده؟ لو حكيتها لـ 1000 واحد مش عارف ومش عارف قوي تفاصيل القصة، ومش عارف دين، ومش عارف عقيدة، ما حدش هيقول إن المؤمنين انتصروا في حاجة. إنما مع الدخول في تفاصيل القصة نكتشف إن لأ، ده في انتصارات، ويعني إيه؟ بس يعني خلينا من القصة دلوقتي، فدي القصة باختصار.
وذکر الله عز وجل طرفاً من هذه القصة في سورة البروج، وذكر أمراً آخر، إنه ذكر سبحانه وتعالى من باب الإشارة، إشارة سريعة، ذكر فرعون وثمود في في نفس السورة. خلاص، يبقى احنا عندنا دلوقتي السورة دي فيها قصة أصحاب الأخدود، مش بالتفصيل برضه، يعني إشارة إلى جزء كده من القصة، وذكر الفرعون وذكر الثمود. وبعدين 13 اسم وفعل وصفة لله عز وجل، وده بقى موضوع درس النهاردة إن شاء الله. قصة أصحاب الأخدود إحنا كنا تدبرناها قبل كده، مش فاكر في كام مجلس، ولعلنا نستخير إن شاء الله ونعيد تدبر هذه الـ القصة مرة أخرى بإذن الله، لكن يعني هذه الوقت لم نقفها في التدبر الأول.
وأول الأسماء التي ذكرها الله عز وجل في هذه السورة المباركة هي قول الله عز وجل: ﴿وَمَا نَقَمُوا مِنْهُمْ إِلَّا أَنْ يُؤْمِنُوا بِاللَّهِ الْعَزِيزِ الْحَمِيدِ * الَّذِي لَهُ مُلْكُ السَّمَاوَاتِ وَالْأَرْضِ ۚ وَاللَّهُ عَلَى كُلِّ شَيْءٍ شَهِيدٌ﴾ [البروج: 8-9]. أربع حاجات جم ورا بعضهم: العزيز، الحميد، الذي له ملك السماوات والأرض، والله على كل شيء شهيد. يبقى دول أول أربعة من 13.
مهم جدا يا جماعة إن احنا نحيا بكل اسم من هذه الأسماء وكل صفة من هذه الصفات، لابد أن نحيا بها في هذه العصور. الأول: سورة البروج مكية ولا مدنية؟ سورة البروج مكية، ومن أوائل السور، يعني سورة حاجة و20 نزولاً. فاحنا بنتكلم في نفسية الاستضعاف، يعني احنا هنا مش مش ناس لها دولة ولها شوكة ومنعة، خالص. احنا بنتكلم هذه السورة نزلت على النبي صلى الله عليه وسلم وعلى قلوب الصحابة وهم في نفسية الاستضعاف، بل في أشد نفسية الاستضعاف في البداية خالص.
فعيشوا النفسية دي، وهذه السورة نازلة في الوقت ده على تلك النفسيات المستضعفة، تحكي لهم قصة أصحاب الأخدود. والظاهر من سياق السورة إن كفار مكة كانوا عندهم خبر بالقصة دي، وعندهم خبر بفرعون، وعندهم خبر بثمود، ولذلك الـ السورة لم تسهب في ذكر القصص القصص، ووجهت السورة خطاباً للكفار لكفار مكة إيه؟ فين؟ ها؟ في آخر السورة بل ها؟ في تكذيب الذين كفروا في تكذيب والله من ورائهم محيط. وده من الـ من الـ 13 والله من ورائهم محيط، من 13 اسم وفعل وصفة اللي المفروض نقف معاها إن شاء الله.
فـ في خطاب وجه لكفار مكة ليه؟ كأنهم عارفين شيئاً ما من تلك القصص. فأول اسم لله عز وجل يذكر في هذه السورة المباركة يقرع آذان الصحابة في فترة الاستضعاف بعد التنويه على قصة أصحاب الأخدود هو اسم العزيز. فكيف نحيا باسم العزيز؟ يعني إيه العزيز؟ ولما نفهم لما نفهم إن ربنا سبحانه وتعالى عزيز سبحانه وتعالى، ده كيف يؤثر في نفسيتنا؟ خصوصاً في فترات الاستضعاف، خصوصاً في فترات علو الكافرين وسفول أهل الدين. ازاي نحيا باسم العزيز؟ ولماذا تبدأ السورة -أو يعني أول الأسماء التي تذكر في السورة- هو اسم العزيز؟ العزيز يا جماعة هو الذي لا يقهر ولا يغالب، ده معنى العزيز، لا يقهر ولا يغالب سبحانه وتعالى، وكذلك يعز من لجأ إليه سبحانه وتعالى. فيعني هو عزيز الجانب سبحانه وتعالى ومن تولاه كان عزيزاً بعزته سبحانه وتعالى له، فده معنى اسم العزيز.
طيب، ليه محتاجين نعيش بهذا الاسم في فترة الاستضعاف؟ لإن يا جماعة في فترات الاستضعاف، خصوصاً مع ضعف الإيمان، ممكن يصيب المسلمين نوع شك، نوع يأس. فاكرين إحنا الدرس اللي فات لما اتكلمنا قلنا إن فتنة الضراء لها آفات، وفتنة السراء لها آفات تانية خالص، فاكرين الكلام ده؟ فقلنا كنا ساعتها بنتكلم على فتنة السراء ما كناش عارفين فتنة الضراء، قلنا فتنة السراء ييجي بقى الزهو والعجب ورؤية النفس آفات لفتنة السراء، فتنة الضراء ليها آفات برضه وعشان كده فتنة.
فمن هذه الفتن التي ذكرها الله عز وجل في القرآن: ﴿حَتَّىٰ إِذَا اسْتَيْأَسَ الرُّسُلُ وَظَنُّوا أَنَّهُمْ قَدْ كُذِبُوا جَاءَهُمْ نَصْرُنَا﴾ [يوسف: 110]. والآية التانية إيه؟ حتى يقول الرسول -أنا عاوز اللي قبل-ها؟ ها؟ ﴿أَمْ حَسِبْتُمْ أَنْ تَدْخُلُوا الْجَنَّةَ وَلَمَّا يَأْتِكُمْ مَثَلُ الَّذِينَ خَلَوْا مِنْ قَبْلِكُمْ ۖ مَسَّتْهُمُ الْبَاسَاءُ وَالضَّرَّاءُ وَزُلْزِلُوا حَتَّىٰ يَقُولَ الرَّسُولُ وَالَّذِينَ آمَنُوا مَعَهُ مَتَى نَصْرُ اللَّهِ ۗ أَلَا إِنَّ نَصْرَ اللَّهِ قريب﴾ [البقرة: 214]. يعني هتضيق جداً، والضيق ده فتنة الضراء دي علشان تستخرج حاجتين: أنواع من العبادات، وتستخرج أنواع من الآفات فتعالج تلك الآفات.
تظهر ما يا جماعة إحنا إحنا في ستر وعافية -خلي بالكم، نحن في ستر وعافية- فلما تنزل الفتنة نصير إلى حقائقنا بقى، كل واحد يظهر خلاص. يعني ممكن واحد دلوقتي -وده قلناه لكم قلناه لكم وكررناه لكم كذا مرة- بلاش حتى لو بينك وبين نفسك خطاب تزكية النفس، اللي هو ايه: باب الجهاد بقى امتى يتفتح عشان مش عارف؟ ساعتها قلنا لكم ايه: الجهاد زي ما هو ذروة سنام هذا الدين في خطورة، مش كده؟ من أكبر الكبائر الفرار يوم الزحف. طب أنت هتكون ده ولا ده؟ طب معنى كده يعني معنى كده أنت بتخزل؟ لا مش بخزل. طيب يعني ما نتمنى؟ لا أتمنى، لكن بلا تزكية نفس، يعني ما يبقاش جواك ايه: أنا بقى هبقى اللي مش عارف مين. مين قال لك إنك هبقى اللي مش عارف إيه؟ مين قال يعني؟ مين قال إنك هتكون كده؟ فبلاش خطاب تزكية النفس ده، لا طأطئ رأسك.
والنبي عليه الصلاة والسلام نفسه من وصاياه: لا تتمنوا إيه؟ لأنها فتنة عظيمة جداً، لا تتمنوا لقاء العدو وإذا لقيتموهم لا خلاص بقى، فاصبروا. ففي فتنة الضراء ممكن يصيب بعض الأنفس فكرة بل بعض الناس بتقول الكلام ده: هو فين ربنا؟ هو فين ربنا؟ هو ربنا يعني مش شايف الـ اا اا يعني حاشاه وعياذ بالله، لكن هذا يقال ويتسمع وبنشوف ناس بتعمل كده. ولو واحد إيمانه زايد شوية عن كده ما يقدرش يقولها بلسانه، لكن ممكن جوه قلبه يبقى إيه؟ يعني مستوحش من اللي بيحصل. كتبنا للقصة بتاعة إيه اللي ذكرها ابن كثير في البداية والنهاية؟ ذلك الرجل الصالح لما لقى التتار دخلوا بغداد وقتلوا في الأطفال وانتهكوا الحرمات -وعلى فكرة اقرأوا يا جماعة فتنة التتار دي كانت عاملة إزاي، فتنة التتار دي مش فتنة سهلة، يعني كل اللي إحنا شايفينه وعايشينه ده ولا حاجة جنب فتنة التتار-.
فكأن هذا الرجل استوحش قلبه، وسأل: ليه ليه يا رب؟ اللي هو بيـ ليه يا رب؟ وبعدين أطفال طب إيه ذنبهم يا رب؟ فرؤي فرأى في المنام أنه أتي أتاه ملك أو رجل ودفع إليه ورقة، فإذا مكتوب فيها: دع الاعتراض، فما الأمر لك ولا الحكم في سير الفلك. الموضوع مش بتاعك أنت مالك؟ دع الاعتراض فما الأمر لك ولا الحكم في سير الفلك. لا تسأل الله عن فعله، من خاض لجة البحر هلك. إليه يصيـ أو إليه تصير أمور العباد، دع الاعتراض ما أجهلك. أنت بتعترض على مين؟ تعترض على على ربنا سبحانه وتعالى؟ الله عز وجل يدبر الكون كيف أراد سبحانه وتعالى، أنت اللي عليك تعمل إيه؟ تذعن لأمره القدري وتبحث أمره الشرعي وتسكت.
يعني إيه تذعن لأمره القدري؟ يعني يكون جواك كده مطمئن إنه ما كان هو أحكم شيء. ولا كان في حاجة أحكم من اللي ربنا قدرها؟ حد يرد، حد حد عاوز يكفر؟ يعني ما كان كان خلاص، من الذي قدره؟ ما هو أنت بين حاجة من اثنين، يا تقول لأ هو ربنا ما قدرهوش فإيه؟ تكفر برضه. أو تقول ربنا قدره لكن ده مش أحكم حاجة، سلموني أنتم بس مفاتيح الكون ساعتين زمن هأضبط لكم الدنيا. ما هو ده المعنى يا جماعة. بتعترض على مين؟ ما كان هو أحكم شيء وأجمل شيء، وليس في الإمكان لا أحكم ولا أجمل ولا ألطف مما كان، ليه؟ لأنه تقديره سبحانه وتعالى مهما استبشع قلبك شيئاً، مهما استبشع.
تطمئن لقدره سبحانه وتعالى ولقضائه، ليه؟ أصله سبحانه وتعالى وحاشاه ما هوش ضعيف، ده عزيز. يعني إيه عزيز؟ يعني لا يغالب. فلما يبقى عزيز ولا يغالب وبعدين فئة من المسلمين ولا حتى كل المسلمين يحصل فيهم اللي بيحصل وكذا وكذا، يبقى اللي بيحصل ده الحكمة ولا ما هو لا يغالب، ما هو يا إما ضعيف ما إش- وحاشاه سبحانه وتعالى، إله يعني إله بهذه الصفة مستحيل، عزيز.
فكلمة عزيز يا جماعة واسم اسم الله العزيز يطمئنك إنك في جوار العزيز. طب هو ليه بيسلمني؟ عشان بيربيك. خلي بالكم قبل ما نتجاوز الحتة دي. طب ده معناه إيه؟ إن إحنا يعني نقعد ما نعملش حاجة؟ لأ، ده المفروض بقى احنا كلنا متدربين واللي معاه فروة مش كده؟ نعمل ايه؟ نبحث عن الحكم الشرعي في أو الأمر الشرعي في الأمر القدري، يعني ده الأمر القدري، ايه بقى أمرك الشرعي يا رب؟ ما هو ربنا سبحانه وتعالى يا جماعة له آيات متلوة في المصحف وفيها رسائل لنا، وله آيات مشاهدة مرئية في الكون وفيها رسائل لنا. حد فاهم حاجة؟
طيب الآيات المتلوة دي بتتجدد ولا ما بتتجددش؟ خلاص انتهى الوحي، مش كده؟ ممكن يتجدد فهم شيء فيها ماشي، إنما الآية كآية خلاص انقطع الوحي من السماء، إيه اللي بيتجدد بقى؟ الآيات المشاهدة المرئية اللي هو القدر. فإذا أراد الله عز وجل من المسلمين شيئاً أرسل إليهم رسالة قدرية يفهمها اللي يفهمها وما يفهمهاش اللي ما يفهمهاش، فينجح اللي ينجح ويسقط اللي يسقط. مفهومة دي؟ ايه النجاح؟ إنك تفهم إنها رسالة من ربنا سبحانه وتعالى وإنه لو شاء ربك ببساطة ما فعلوه. ولو شاء ربك ما فعلوه، اطمئنوا يا جماعة لقدر الله.
أصله عزيز سبحانه وتعالى، لا يغالب. وبعدين لا يغالب ده يعني بقى محتاج وحاشاه إنه ينزل جنداً من السماء وتجوب حرب بين الملائكة واللوبي الصهيوني، محتاج ده؟ إنما أمره إذا أراد شيئاً أن يقول له تخلص، خلصت خلاص، كن فيكون. طيب ليه ما عملش؟ لو لو تقول ليه ما عملش اعتراضاً: دع الاعتراض ما أجهلك. ليه ما عملش؟ روح فتش في نفسك وحالك وأنت تعرف ليه ما عملش. ما عملش عشان أنا موجود، وما عملش عشان أنت موجود، فلو أنا وأنت مش موجودين كان عمل. حد فاهم حاجة؟ ما عملش عشان إحنا موجودين وإحنا لا نستحق إنه يعمل شيئاً من أجلنا. ما عملش عشان نفهم رسالته سبحانه وتعالى، عشان نرجع إليه سبحانه وتعالى. قال الناس الفسقة الفجرة؟ لا لا، الناس اللي في المسجد هنا، كله. مش بقول إن أنتم فسقة وفجرة، يعني بقول.
بلاش دائمًا تفكيرك في غيرك، وتفكيرك في اللي أنا الحلو الجميل، لا خالص، خالص. مين من السلف؟ إيه، جزاكم الله خير، اللي كان في عرفة، وكان يعيط ويقول إيه؟ مين إيه، طب هيقول إيه لولا أنك ترفعني؟ هيقول إيه؟ إيه يعني. لا ها؟ بيقول إيه طيب؟ لو لأن فيه آه، إيه بقى؟ إيه الجملة؟ ما أجمل كده؟ أجمل؟ آه، ما أجمل هذا الجمع لولا أني فيهم، أو حاجة زي كده. مش عارف بقى الفضيل ولا مين، حد من الأولياء يعني.
طب هو ده يعني بيقول كلمتين دي بقى عشان يتحفظوا وبعدين هو عارف إن في كتب هتتألف بقى إيه كلام الأولياء؟ ولا هو مستشعر ده فعلًا؟ هو مستشعر ده يعني يعني هو يرى أن هذا الجمع في عرفة هو جمع يستحق تنزل إيه أو إيه يعني مش يستحق يعني قريب لأنه تتنزل إليه الرحمات لولا أني فيهم، لولا إني أنا هنا. يعني هو يرى إنه هو سبب الإيه؟ يعني لو ما نزلتش الرحمة فعشاني، فالله عزيز.
وهذا دين الله سبحانه وتعالى، طيب عزيز وده دينه، ويخلي بين الكفار وبين أهل الدين وكذا وكذا، ويعملوا فيهم كده، آه يخلي. ليه؟ لأنه زي ما هو عزيز، أكثر اسم بيقترن بالعزيز في القرآن إيه؟ الحكيم. هو صحيح عزيز، لكنه حكيم سبحانه وتعالى. طب اسم الحكيم ده ما جاش في السورة هنا؟ ما هو كأني الإشكال اللي هيحل أو اللي هيحل الإشكال ده، هو ليه ربنا سبحانه وتعالى ما ينتصرش لأهل الدين؟ هو إنه إيه؟ إن يظهر بقى اسم الحكيم هنا. ما هو خلاص عرفنا إنه عزيز، يلا بقى انتقم، نقول لك لا هو حكيم. طب ما هو ما جاش هنا حكيم، صح؟ هو ما جاش اسم الحكيم، لكن السورة فيها إشارات إلى حكمته سبحانه وتعالى من أول آية.
والسماء ذات البروج. بعض أهل التأويل قال: طبعًا السماء ذات البروج فيها أقاويل كتير، من أشهرها السماء ذات البروج منازل القمر، أو السماء ذات البروج اللي هي الأبراج الاثنا عشر برج. طيب، أول ما نقول لك منازل القمر أو الاثنا عشر برج أو هذه الأمور، على طول ذهنك يذهب لإيه؟ حكمة ربنا سبحانه وتعالى في خلق الكون. يعني السورة ابتدت والسماء ذات البروج، يعني هذا الكون سائر وفق الحكمة، فأنت من أول آية في السورة مستحضر حكمة الله عز وجل. إحنا لسه ما دخلناش في السورة، ولا نعرف يعني إيش هو نفسية، إحنا ما نعرفش السورة بتتكلم عن إيه دلوقتي.
والسماء ذات البروج. ربنا سبحانه وتعالى لما أقسم بالسماء ذات البروج، ليه؟ وليه ذات البروج؟ ليه يعني؟ إيه المعنى اللي لما تنزل هذه الآية على الصحابة، اللي بيفهموا عربي لغة عربية، وأقرب لفهم الوحي من حيث اللغة ومن حيث الإيه كمان؟ الديانة والفتوحات. هيفهموا إيه من الآية دي؟ إن فيه حكمة في الكون. طب طالما فيه حكمة في الكون، يبقى إله الكون إيه؟ حكيم، مش كده؟
وبعدين: ﴿وَمَا نَقَمُوا مِنْهُمْ إِلَّا أَن يُؤْمِنُوا بِاللَّهِ الْعَزِيزِ الْحَمِيدِ * الَّذِي لَهُ مُلْكُ السَّمَاوَاتِ وَالْأَرْضِ ۚ وَاللَّهُ عَلَىٰ كُلِّ شَيْءٍ شَهِيدٌ * إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا﴾ [البروج: 8-10]. تظهر الحكمة تاني أهو. إن الذين فتنوا المؤمنين والمؤمنات فلهم عذاب جهنم كده؟ يبقى ثم لم يتوبوا. يبقى الإمهال لحكمة تانية أهي تظهر، حكمة إيه؟ لعل يفتح لهم باب التوبة. وإلا لو كان كل ما حد عمل حاجة في المسلمين يؤخذ في حينه، يبقى ما كانش زماننا بنترحم على خالد، كان زماننا بنلعنه، كان زمانه مات كافر. ولا كان زماننا بنترحم على أبي سفيان، كان زماننا بنلعنه لأنه كان زمانه مات كافر. ما هي الناس دي كلها حاربت المسلمين، بل الله عز وجل لام على نبيه: ﴿لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذَّبَهُمْ فَإِنَّهُمْ ظَالِمُونَ﴾ [آل عمران: 128]. لما سأل النبي أهلكت لهم، قال الله عز وجل له ليس لك من الأمر شيء. ما تقترحش على ربنا سبحانه وتعالى يهلك مين ويهلكش مين ويهلك إمتى وما يهلكش إمتى.
دع الاعتراض ما أجهلك. دع الاعتراض ما أجهلك. أنت مالك يهلك إمتى اليهود ولا إيه؟ أنت مالك؟ الذي عليك أن تبحث عن أمره الشرعي فيك أنت، وتذعن لقدره سبحانه وتعالى، وتطمئن لقضائه، وتطمئن لكونه عزيزًا سبحانه وتعالى. يعني إيه تطمئن لكونه عزيزًا؟ يعني كل اللي انت شايفهم دول لا يعجزونه شيئًا، لا يعجزونه شيئًا. ولكونه عزيزًا سبحانه وتعالى، طالما أنه عزيز سبحانه وتعالى، يبقى يجي في دماغك معنى إيه تاني ده كله جوه العزيز ها، إحنا كله جوه العزيز، إنه طالما خلي بين هؤلاء وبين فئة من المؤمنين، يبقى هو الذي قدر ده ولا ده بعيد عن إن احنا بقى ما كلامنا ما نعرفش قدر دلوقتي؟
بنقول لك راجل له سلطان وقوة ومحدش يقدر عليه، وبعدين فيه غلام ده بتاعه اللي هو إيه غلامه، راح جاي واحد مسك الغلام ده ضربه، وعلى مرأى ومسمع، سيبكم من على مرأى ومسمع دي دلوقتي هنتكلم عليه بعدين إن شاء الله. غلام العزيز ده، الملك اللي مش عارف إيه بتاع، ماشي؟ فأنت تقول إيه؟ ممكن بذهنك تتصور حاجات، بس عشان ما نحرقش بقية الصفات والأسماء اللي هنتكلم عنها إن شاء الله، لكن بفرض أن خلاص العزيز ده يعرف ولا الملك ده يعرف، يبقى ليه عمل كده؟ أكيد في حكمة، مش كده؟
انت عارف لما ولله المثل الأعلى، ابنك الصغير، وبعدين أمه اللي مربياه فطالع إيه عيل طري كده، فأنت راجل بقى يعني ما يعجبكش المايلة، فلقيته متخانق مع ابن عمه مثلاً، فابن عمه مسكه إيه؟ تقوم انت قاعد وسايبه. أنت هنا بتعمل ايه؟ أنت عاوزه، آه أنت عاوزه يتشرشح شوية، سيبه بقى يتضرب علشان لما يتضرب يعرف إن الله حق، ويعرف يدافع عن، مش ده بيحصل يا جماعة؟ مش ده ممكن يحصل؟ وانت قادر انك تعمل ايه؟ تقوم شايل ابن عمه ده كده وترميه بعيد عنه، ما بتعملش ده، بتسيبه، صح ولا لا؟ ولله المثل الأعلى.
فده كله في اسم العزيز إنه لا يغالب. شوفوا يا جماعة، اسم العزيز ده يظهر جدًّا في قول النبي عليه الصلاة والسلام لابن عباس: «واعلم أن الأمة لو اجتمعت على أن ينفعوك بشيء، لن ينفعوك إلا بشيء قد كتبه الله لك، ولو اجتمعوا على أن يضروك بشيء، لن يضروك إلا بشيء قد كتبه الله عليك». ليه؟ عزيز، عزيز. فمفيش حاجة بتحصل غير وهو يريدها سبحانه وتعالى. محتاجين نحيا باسم الله العزيز سبحانه وتعالى.
العزيز الحميد. يعني إيه الحميد؟ الحميد فعيل، فعيل طبعًا فعيل ممكن تجي بصيغة مبالغة دي معروفة دي، لكن فعيل ممكن تجي بمعنى اسم فاعل أو اسم مفعول، يعني تبقى الكلمة نفسها تجي بصيغة فعيل والمقصود منها يا اسم فاعل يا اسم مفعول. حد فاهم أنا بقول إيه دلوقتي؟ يعني حميد مثلاً، فعيل ممكن تبقى معناها حامد أو محمود، كده أو كده، تمشي كده وكده، خلاص؟ فصيغة فعيل دي شوية مربكة كده عشان نفهمها فشوية مربكة، وحتى قالوا إن في اللغة عشان يفرق بين اسم يعني لو جت فعيل بمعنى اسم فاعل أو بمعنى اسم مفعول، قالوا إن لو جت باسم مفعول بمعنى اسم مفعول تلزمه التذكير لا تؤنث، حتى لو جت مع شيء مؤنث لا تؤنث، ليه؟ علشان نفرق بين فعيل اللي بمعنى اسم ففاعل وفعيل بمعنى اسم إيه؟ مفعول. ﴿وَإِنَّ رَحْمَتَ اللَّهِ قَرِيبٌ مِّنَ الْمُحْسِنِينَ﴾ [الأعراف: 56] كده؟ قريب من المحسنين. الله! دي الرحمة مؤنث. إن رحمة الله قريب، ما قالش قريبة، طبعًا ده على أحد أوجه التفسير يعني، خلاص؟ يعني مقربة، مفعول هنا بمعنى مفعول، قريب فعيل بمعنى مفعول، فتلزم التذكير لا تؤنث. ﴿إِذْ أَقْسَمُوا لَيَصْرِمُنَّهَا مُصْبِحِينَ * وَلَا يَسْتَثْنُونَ * فَطَافَ عَلَيْهَا طَائِفٌ مِّن رَّبِّكَ وَهُمْ نَائِمُونَ * فَأَصْبَحَتْ كَالصَّرِيمِ﴾ [القلم: 17-20]. فأصبحت الجنة الصريمة؟ لا، كالصريم. ليه؟ لأن هنا فعيل بمعنى مفعول، حد فاهم حاجة؟
طيب، ولذلك شاهد في أشعار العرب، مش فاكر بقى مين اللي قاله، هصرت بفود رأسه فتتمايلت علي هضيم الكشح ري المخلى. الخليع، مش هنشرحه عشان قلة الأدب اللي فيه، المهم فهنا هضيم الكشح برده عشان إيه؟ فعيل بمعنى مفعول، امرؤ القيس أظن، أي هو كان قليل الأدب.
الله عز وجل: ﴿وَمَا نَقَمُوا مِنْهُمْ إِلَّا أَن يُؤْمِنُوا بِاللَّهِ الْعَزِيزِ الْحَمِيدِ﴾ [البروج: 8]. طبعًا إحنا أغفلنا الله والرب، لأن الله ده ناخد فيه محاضرات، والرب ناخد فيه محاضرات. فقلنا 13 باستثناء الله والرب، لأن الله والرب جم في السورة برده. العزيز الحميد. الحميد يعني إيه؟ يعني المحمود على كل أفعاله سبحانه وتعالى. الله عز وجل محمود على كل شيء، سواء بقى على أفعاله، وحتى على صفاته الذاتية، هو محمود سبحانه وتعالى. لكن مش عايزين ندخل قوي إحنا من هنا مش جايين نشرح أسماء وصفات ونتكلم عقيدة، إحنا جايين إزاي نعيش بهذه الأسماء التي نزلت في تلك السورة المباركة، سورة مكية أولاً، فنزلت في فترة استضعاف وبتتحكي لنا عن قصة كلها قهر. مفيش قهر أكثر من كده يعني، يتجاب الراجل ويتجاب الست، ترجع عن دينك لا يترمي في النار، مفيش قهر أكثر من كده، وتيجي بقى الأسماء دي في السورة: عزيز، حميد.
حميد. الله عز وجل محمود. محمود على كل حاجة. محمود على كل يعني على اللي بيحصل ده؟ آه، على اللي بيحصل ده. له الحمد سبحانه وتعالى. وعشان كده قلنا لكم بقى اسم الحميد ده ليه خصيصة كده، جه كم مرة في القرآن؟ هو أنا ده كان كمين أنتم فاكرين بقولها عشان 17؟ كم مرة في سورة مكية؟ 13 من 17 سورة مكية. يعني اسم الحميد 13 مرة في القرآن يلح الله عز وجل على هذا المعنى: الله محمود وأنتم في فترات الاستضعاف، احمدوه على هذا القدر.
وهذا فرع عن كلامنا الأول إن أنت مطمئن لقدر الله عز وجل وعارف إن ده أحكم شيء، أحكم شيء، هو ما كان وما يكون وما سيكون هو أحكم شيء، فتحمده سبحانه وتعالى وترضى قدره وقضاءه سبحانه وتعالى. هنا يا جماعة الرضا، رضا القدر والقضاء مش معناها إنك تتخلى عن واجبك الشرعي تجاه ذلك القدر أو ذلك القضاء، ده مش معنى كده. لازم يا جماعة قلوبنا تستوي بالمعنيين عشان الناس دائمًا بيبقى عندها لبس، إحنا شايفين إن أي حاجة في الكون بتحصل هي أحكم شيء، وأجمل شيء، وألطف شيء؛ لأنها قضاء ربنا سبحانه وتعالى وقدره، وإلا لو قلنا لا في دي، يبقى معنى كده إن نقول لحضرتك إيه: خد مفاتيح الكون دبره أنت بقى! ما هو ده تدبير ربنا، فوالله لو أنت شايف بقى تدبير تاني هو الأحسن، وأن يبقى المسلمين هم اللي مستعلين وهم المتمكنين وأحلام اليقظة بتاعة الناس دي، خد دبره أنت بقى، خد مفتاح الكون روح دبر الكون. أمال يا جماعة يعني كنا هنقول إيه بقى لو كنا عايشين أيام الأنبياء اللي بيموتوا بيتقتلوا؟ يعني إحنا لغاية دلوقتي ما عشناش زمان في نبي بيتقتل، ده حصل، كان زماننا بقى بنقول إيه إن شاء الله، عجيب والله!
فإحنا راضيين يا رب بقضائك وراضيين بقدرك يا رب، ولا نغفل الأمر الشرعي، يبقى كده ده الواجب تجاه الأمر القدري، وفي واجب تاني علينا هو البحث عن الأمر الشرعي تجاه ذلك الأمر القدري. فممكن يبقى في وقت الأمر الشرعي والله تجاه الأمر القدري الجهاد، أو مش في وقت، ممكن في نفس الوقت في واحد مطالب منه الجهاد وحمل السلاح، واحد مطالب منه إنه يتعلم العلم الشرعي، وده ربنا ذكره في القرآن: ﴿فَلَوْلَا نَفَرَ مِن كُلِّ فِرْقَةٍ مِّنْهُمْ طَائِفَةٌ لِّيتَفَقَّهُوا فِي الدِّينِ وَلِيُنذِرُوا قَوْمَهُمْ إِذَا رَجَعُوا إِلَيْهِمْ﴾ [التوبة: 122]. مش كل الناس هتمسك السلاح وتروح تحارب، وواحد تاني هيبقى الواجب بتاعه إنه يفضل في العبادة والتوبة ليه؟ لأنه مقفول عليه تلك الأبواب، واحد را وهكذا. ففي أوامر شرعية إحنا مطالبين بها، مش عاوزين نسف في دي ودي، إحنا اتكلمنا فيها في أكثر من درس.
خلاص. حميد، محمود سبحانه وتعالى. إزاي يا جماعة محتاجين نفهم ده في فترات الاستضعاف؟ فلما نشوف القدر كده، نقول الحمد لله. الحمد لله يعني فرحانين في إخواننا؟ لأ، مش فرحانين في إخواننا. الحمد لله لأن ده قدر ربنا، فالحمد لله. أيوة، الحمد لله ليه؟ لأن ده أحكم شيء، ومش بس أعدل شيء، أنتم عارفين أصله لو كانت ماشية بالعدل كان زمان حصل أكثر من كده. إيه رأيكم؟ لو ماشية بالعدل، كان حصل فينا أكثر من كده، ده هي ماشية بالفضل والله. ﴿وَلَوْ يُؤَاخِذُ اللَّهُ النَّاسَ بِمَا كَسَبُوا مَا تَرَكَ عَلَىٰ ظَهْرِهَا مِن دَابَّةٍ وَلَٰكِن يُؤُخِّرُهُمْ إِلَىٰ أَجَلٍ مَّسَمًّى﴾ [فاطر: 45]. ليه؟ أصله حكيم سبحانه وتعالى.
فالحمد لله يا رب إن أنت قدرت ده، الحمد لله إنك قدرته، والالحمد لله إن هو قدر على هذه الهيئة وهذه الصفة وهذا المقدار. الحمد لله يا رب. طب ليه يا ابني؟ ما هو أنا مش عارف، أنا ما أعرفش؛ ما أصل أنا ما أملش مفاتيح الغيب، فأنا ما أعرفش الغيب، وما أعرفش لو ما كانش كده كان هيحصل إيه. واضح يا جماعة؟ يا جماعة إحنا الكلام ده
تكلمنا فيه كثيرًا، لكن حسبوا لنا مثلًا موقفًا واحدًا في القرآن، الناس الذين خـ يعني هنعدي عليه سريعًا، الناس الذين أخذوا الخضر وموسى في السفينة. مش عارفين مين موسى؛ موسى كان جاي من حتة بعيدة عليه السلام، والخضر معروف في الحتة دي، موسى مش معروف أصلًا. سيدنا موسى ركبوا السفينة عرفوا الخضر وما عرفوا موسى، قالوا له العبد الصالح وبتاع. ركبوا العبد الصالح يلا نركبه، طيب بكم؟ ركبوه بلا نوال، لا لا ما نأخذ منك فلوس، اركب يا عم الشيخ. وركب السفينة.
راح عامل إيه الخضر؟ نزل خرم السفينة. أنا بقى بأقول لكم دلوقت إحنا بقى اللي هو إيه الواحد اللي يا رب، وإحنا اللي مش عارف واقف بقى في السفينة وشايف المشهد ده. رجل ركب الناس احتفت به ولم تأخذ منه أجرة واحترموه، راح هو مزوغ وفي حين غرة من أهل السفينة راح نازل شايل، اقتلع لوحًا في رواية، شال لوح من السفينة من تحت. هتعمل إيه؟ هتعمل اللي موسى عمله. ما هو هنا يا جماعة موسى هو الخضر هو موسى هنا رمز للأحكام الظاهرة اللي إحنا حلال وحرام ومش كده؟ والخضر القدر.
ما هو القدر ده بقى بإيد واحد من عند ربنا، ما هو ممكن المساكين دول وهم ماشيين فجأة السفينة تتخرم، يقولوا يا رب ده إحنا مساكين وناس بتاع ربنا ليه تخرم لنا سفينة؟ ما هم مش عارفين إنه قدام شوية ملك ظالم ويأخذ كل سفينة صالحة غصبًا. وكان وراءهم ملك يأخذ كل سفينة صالحة غصبًا، فخرق السفينة أو اقتلاع لوح من السفينة يعني نجاة السفينة للمساكين. إمتى نفهم ده بقى إن شاء الله؟ إحنا مش فاهمين حاجة. اللي بيحصل في غزة، نسأل الله عز وجل أن يفرج عن أهل غزة، وأن يتقبلهم في الشهداء، وأن يطعم جوعاهم وأن يداوي مرضاهم، اللي بيحصل ده إيه الحكمة منه؟ والله وقفنا على حكم خير وبركة ما وقفناش، الحمد لله حميد سبحانه وتعالى. ﴿وَمَا نَقَمُوا مِنْهُمْ إِلَّا أَن يُؤْمِنُوا بِاللَّهِ الْعَزِيزِ الْحَمِيدِ﴾ [البروج: 8].
طيب، يحمد على إيه؟ قلنا لكم الحمد غير الشكر يا جماعة، الحمد غير الشكر. يكون دائمًا على النعمة؛ يعني أنا أشكر فلان إنه أسدى إليّ معروفًا، أشكر الله عز وجل إنه اداني النعمة الفلانية، إنه عمل كذا، ده شكر. الحمد مش لازم في مقابلة المعروف؛ يعني الله عز وجل يحمد مثلًا لكونه حيًا، فاهمين دي؟ لكونه سميعًا، لكونه بصيرًا. فالحمد لله على إيه؟ على كل حاجة، فالله عز وجل يحمد على كل حال. فعاوزين نعيش بنفسية العزيز وبنفسية الحميد. العزيز ده بقى ممكن يبقى عزيز لكن في منطقته، في دولته، يعني هو مثلًا ملك دولة أو ملك مملكة، فهو في مملكته عزيز لا يغالب ولا يمانع، بره حدود مملكته لا، في زيه كثير. مش كده؟ فيبقى ممكن العزيز ما يقدرش، فاكرين الغلام اللي قلت لكم إيه؟ بعد شوية هيجي معانا شوية حاجات كده، اللي بتاع الملك. ده لما اتضرب أصل المشكلة إنه ما اتضربش في المملكة، ده كان بره المملكة واللي ضربه حد من مملكة تانية. فممكن العزيز ساعتها يعمل إيه؟ يصاهين عشان ما نخش حرب، حد فاهم دي؟ لو كان في مملكتي وغلامي اتضرب في مملكتي ده أنا أجيب اللي ضربه وأعمل فيه اللي ما اتعملش، لكن اتضرب في مملكة تانية، فلو رحت عملت ناوش هناك هتقوم حرب، فممكن أصاهين بقى، ده صحيح عزيز في مملكتي لكن أصاهين، ما أعمل نفسي مش واخد بالي أو أطبطب على غلامي ده ولا أقوله كلمتين يرضوه وخلاص، ليه؟ لأن أنا عزتي مش عزة مطلقة.
فتيجي الكلمة اللي بعد كده إيه؟ ﴿الَّذِي لَهُ مُلْكُ السَّمَاوَاتِ وَالْأَرْضِ﴾ [البروج: 9]. لا، هو عزته سبحانه وتعالى، أوعى تفتكروا إنه لما خلى بين الكفار وبين فئة من المؤمنين، لإن هو عزته مش طايلة الحتة دي، يعني هو عزته في مصر ومثلًا والأردن وسوريا، بس غزة بره العزة، ما فيش كده. عزة الله عز وجل مطلقة، له كمال العزة سبحانه وتعالى، ليه؟ أصل له ملك السماوات والأرض. فعاوزين نعيش هذه النفسية، عزيز حميد له ملك السماوات والأرض، ففي أي حتة هتروحها بر، بحر، جو، عزته سبحانه وتعالى في هذا المكان، وطالما عزته في هذا المكان يبقى أي شيء بيجري في هذا المكان بقدره سبحانه وتعالى، مش غصب عنه بقى، ليه؟ ما أصله في الحتة دي هو عزيز، طب أروح حتة تانية هتلاقيه عزيز برضه، طب هطلع فوق عزيز في أي حتة، أصل له ملك السماوات والأرض. قلنا لكم من شوية اللي خلى الراجل ده ما يتـ إنه إيه؟ ملكه، شايفين اللفظ؟ ملكه على قد مملكته، إنما الله ملك السماوات والأرض.
الغلام ده لما اتضرب، الملك ده ما عملوش حاجة ليه؟ أصله ما عرفش، هو صحيح اتضرب جوه مملكته لكن ممكن ما يعرفش إنه اتضرب، لما يبقى يعرف بقى يبقى ياخد له حقه، متصورة دي ولا لأ؟ متصورة، ﴿وَاللَّهُ عَلَىٰ كُلِّ شَيْءٍ شَهِيدٌ﴾ [البروج: 9]. شهيد، يبقى هو عزيز وله ملك السماوات والأرض ولا يخفى عليه شيء في ملك السماوات والأرض، ما هو ممكن يبقى زي ما بقول لكم واحد ملك، يعني ملك السعودية، رئيس مصر، ملك مش عارف، عارف بقى كل تفصيلة بتحصل في كل حارة في الـ ما فيش كده، ما فيش حد كده في الدنيا، مش موجودة، يخفى يعلم شيئًا ويخفى عليه أشياء. الحمد لله، فربنا بقى سبحانه وتعالى مش كده لأ، له ملك، وعيب وبعدين؟ له ملك السماوات والأرض. ﴿وَاللَّهُ عَلَىٰ كُلِّ شَيْءٍ شَهِيدٌ﴾، يعني له الملك وله كمال الاطلاع والعلم سبحانه وتعالى، فده برضه ينفي الاحتمال إنه لأ، الفئة اللي بتتضرب في صحيح هم تبع ملك ربنا، لكنه حـ وحاشاه لا علم له بأنه بس في فئة كده مضطهدة في الحتة دي، وأول ما يعلم بقى هيـ لأ، مين قال كده؟ والله على كل شيء شهيد.
إيه اللي ثاني ممكن الغلام ده يخليه ما يتـ ما يتخذلوش حقه؟ إنه آه هو انضرب في مملكتي وأنا عرفت إنه انضرب، لكن جيت أروح للي ضربه لقيته هرب واختفى ومش عارف أجيبه، فنعالج دي فين بقى؟ علاج دي فين؟ في آخر السورة: ﴿وَاللَّهُ مِن وَرَائِهِم مُّحِيطٌ﴾ [البروج: 20]، يعني ما فيش حد بيفوته. يبقى هو عزيز لا يغالب، لا يغالب. فلما تلاقوا الفئة المؤمنة أو اللي إحنا بنبقى فاكرين ما أنا دلوقتي ما بتكلمش عن أهل غزة، أنا بتكلم على أصل هو يا جماعة اللي بيحصل إيه؟ إنه بيبقى فيه فئة وبيحصل فيها حاجة وبنبقى فاكرين بس هي بيبقى فيها إشكالات ومحتاجة تتحل، هل معنى كده إنهم وحشين؟ لأ، مش معنى كده إنهم وحشين ولا معنى كده إن اللي نزل بهم البلاء هم اللي وحشين والباقيين حلوين، ده مش كده خالص. الكلام ده إحنا حللناه كثير قبل كده يعني مش عارف عاوزينه ثاني؟ حد عاوزه؟ طيب، دلوقتي يا جماعة عشان برضه ده إشكال عامل كلاكيع عند الناس، هو في غزوة أحد لما اتغلب الصحابة والجيش قائده رسول الله صلى الله عليه وسلم، مش بس كده، كاد أن يخلص له وأن يقتل وشج وجهه الشريف وكسرت رباعيته صلى الله عليه وسلم، وأشيع في الجيش أنه قتل، مات. هو ده ينفع إحنا نقول بقى دلوقتي أصل الفئة دي ما كانتش مؤمنة؟ ولا دي تربية من ربنا سبحانه وتعالى؟ تربية، وربنا لا يحابي أحدًا. خلوا بالكم، يبقى دي أول مسألة أهو.
تعالوا نحل الإشكال الثاني، اللي هو لما ييجي ينزل البلاء بفئة معينة أو مجموعة معينة من الناس، يبقى هم اللي وحشين ولا الثانيين اللي وحشين ولا إيه بالضبط؟ إحنا كل وحش، بس خلونا نفهم دي برضه. في غزوة أحد لما أمر النبي الرماة صلى الله على نبينا محمد ما تسيبوش المكان ده، ومعروف القصة، لو لقيتونا بنتقتل ما تنزلوش من على الجبل، لقيتونا بنغنم ما تشاركوناش في الغنيمة، أنتم هنا. كانوا كام واحد؟ 50 واحد، صح كده؟ شؤم إن تنقلب القضية وإن المسلمين هم اللي يهزموا بعد ما كانوا منتصرين، شؤم ده كله بإيه؟ بمخالفة بعض الرماة، مش كده؟ هنا بقى تعالوا نركز في دي، هم 50 شوية خالفوا الأمر كام واحد؟ 40، وتبقى كام؟ 10. مين اللي اتقتل؟ الـ 10، اللي ما خلفوش هم اللي اتقتلوا. إيه رأيكم؟ ليه؟ اسكت، دع الاعتراض، ما أجهلك، أنت مش فاهم حاجة، هم اتقتلوا وصاروا إلى الجنة، قتلوا شهداء، ومن أصيب بهم؟ مين اللي عاشوا عمومًا يعني، يا جماعة لما واحد بيموت في معركة شهيد مقبل غير مدبر بأيدي الكفار، خلاص ده مين بقى اللي بيؤمن به؟
مين اللي بيصاب به؟ مين اللي بيزعل عليه؟ بيزعل إيه؟ مش على يعني بيزعل على فقدانه، على اللي عايش، ده ربنا قاله في القرآن. قال: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا ۖ قُلْ هُوَ مِنْ عِندِ أَنفُسِكُمْ﴾ [آل عمران: 165]، أولما أصابتكم مصيبة اللي هي إيه؟ قتل 70 في غزوة أحد، قد أصبتم مثليها، لأن كانوا في بدر المسلمين قتلوا 70 كافر وأسروا 70، فربنا يقولهم: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا ۖ قُلْ هُوَ مِنْ عِندِ أَنفُسِكُمْ﴾، هذا الخطاب للي ماتوا ولا للي عايشين؟ اللي ماتوا ماتوا خلاص، من الذي أصيب؟ اللي عايش. قلتم أنى هذا، يا اللي عايشين، قل هو من عند أنفسكم بذنوبكم، بمعاصيكم، يعني لو خدناها بقى على حجم أصغر، بذنبكم أيها الأربعون قتل هؤلاء العشرة، فهمتوا دي؟ طب ليه يا رب؟ بذنبنا إحنا دول يتقتلوا ليه؟ تقول له إيه على طول؟ دع الاعتراض، ما أجهلك، 10 شهداء في الجنة، إيه ما أنت زعلان ليه؟ إلا لو من نفس بقى عليهم، يعني ليه يبقوا شهداء؟
فيبقى ربنا سبحانه وتعالى عزيز حميد، له ملك السماوات والأرض، وهو على كل شيء شهيد والله على كل شيء شهيد ومن وراء الجميع محيط سبحانه وتعالى. طيب إيه ثاني يخلي الغلام ده ما يتخذ له تعايق تعب معانا الغلام ده عمال يتضرب، عزيز لا يغالب، والعزة دي يا جماعة حد له عزة كده يفضل عزته السنة دي زي عزته السنة الجاية زي عزته وهو على فراش الموت زي ولا بتحصل إيه؟ بتختل مش كده؟ يكبر في الملك فتلاقي سلطان وزهو وقوته وجبروته يقل مع الوقت، مش كده؟ صحيح لسه له عزة يعني ما هوش ما بقاش يعني زيرو عزة يعني ما فيش عزة خالص، لكن ما هوش بعزته وقت شباب ولا وقت قوة سلطانه، مش كده؟ كانوا ذكروا، هو من الأوائل عاوز إيه؟ لا ما ينفعش أقعد بقى في أي حتة، حد مسلطك علينا من الجامع الثاني؟ مين كان واحد من فترات الضعف، يعني في ضعف الدولة الإسلامية وبعدين قال لي قائد الجيش بتاعه أو قائد الشرطة إنه هأعمل فيك وأسوي وبتاع، قال له إيه؟ يعني أتمنى أنك كنت تقدر تعمل ده، وحرك فرسه وانصرف، يعني كان نفسي تكون كده، ضعيف جدًا وما خلاص كان سلطانه بيزول أو بيتلاشى، فممكن إنه مع الوقت قوته بتضعف، فتجي ﴿إِنَّ بَطْشَ رَبِّكَ لَشَدِيدٌ﴾ [البروج: 12].
وهنا في مؤكدين، إن بطش ربك لشديد، فاطمئن لدي كمان، يبقى عزيز عزة تامة مطلقة، وعزته إيه حدودها؟ ملك السماوات والأرض. طيب، حد هيهرب؟ ﴿مِن وَرَائِهِم مُّحِيطٌ﴾ [البروج: 20]. طيب، على مر الزمان عزته بتضعف ولا، ﴿إِنَّ بَطْشَ رَبِّكَ لَشَدِيدٌ﴾. ﴿إِنَّهُ هُوَ يُبْدِئُ وَيُعِيدُ﴾ [البروج: 13]. هنا في بعض التفاسير يبدئ يعني يبدأ الخلق ويعيده، خلاص؟ ومما قيل بقى يبدئ ويعيد يعني في النار، يعني إن ﴿كُلَّمَا نَضِجَتْ جُلُودُهُم بَدَّلْنَاهُمْ جُلُودًا غَيْرَهَا لِيَذُوقُوا الْعَذَابَ﴾ [النساء: 56]، إحنا بنتكلم عن أخدود اتحفر ونار ولعت وناس اترمت في النار، فربنا لما أراد سبحانه وتعالى إنه يبين مآل الكفار في الآيات دي، الآية جت عجيبة شوية، ماذا قال الله عز وجل؟ اسمعوا كده معايا، إيه المآل بتاع الكفار؟ ﴿فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ﴾ [البروج: 13]. طب هي جهنم إيه؟ مش الحريق؟ ربنا سبحانه وتعالى هنا في الآية دي قال فلهم عذاب جهنم ولهم عذاب الحريق، والعلماء اختلفوا بقى يعني ليه الجمع بينهم، لكن المهم فكرة إن إحنا إن ربنا سبحانه وتعالى ينص في هذه الآية على عذاب الحريق.
العذاب الذي عذب به الكفار المؤمنين في هذه الواقعة هو عذاب الحريق، لكن حريق ربنا سبحانه وتعالى غير. حريق الدنيا آخره إيه؟ يحرق شوية وهذه الأشياء تقل وتزيد وفي الآخر خلاص. أزيدكم، الحريق بتاع الأخدود عمل إيه؟ ولا حاجة، الأجساد اتشوت لكن كانت الأرواح تقبض والمؤمنون في الهواء، يعني هم لم يشعروا أصلاً بحريق.
لكن دعكم من هذا، حريق الآخرة إيه بقى؟ ربنا قال: ﴿إِنَّهُ هُوَ يُبْدِئُ وَيُعِيدُ﴾ [البروج: 13]. يبقى حريق ربنا في الآخرة غير حريق الدنيا، ما لهوش نهاية. طب والجلود هتتشوي وخلاص بعد كده مراكز الإحساس مش هتحس؟ لأ، ﴿كُلَّمَا نَضِجَتْ جُلُودُهُم﴾ [النساء: 56]. هل ربنا سبحانه وتعالى يحتاج إلى ذلك؟ ما هو ممكن تنضج الجلود ويفضل يحس برضه، قوانين الآخرة غير قوانين الدنيا. لكن هذا من باب أنكم مشغلين عقولكم، طب أنا هحاكمكم إلى عقولكم وهتشوفوا اللي هيحصل فيكم في الآخر: ﴿إِنَّهُ هُوَ يُبْدِئُ وَيُعِيدُ﴾ [البروج: 13].
طب وأهل الإيمان؟ ﴿وَهُوَ الْغَفُورُ الْوَدُودُ﴾ [البروج: 14]. وأهل الإيمان ﴿إِنَّ الَّذِينَ آمَنُوا وَعَمِلُوا الصَّالِحَاتِ لَهُمْ جَنَّاتٌ تَجْرِي مِن تَحْتِهَا الْأَنْهَارُ ذَٰلِكَ الْفَوْزُ الْكَبِيرُ﴾ [البروج: 11]. شوفوا التباين بين حال هؤلاء وحال أولئك. ﴿وَهُوَ الْغَفُورُ الْوَدُودُ﴾ سبحانه وتعالى. يبقى هو الغفور، أول حاجة ده خطاب للمؤمنين، كأنه فيه إشارة إلى أنكم عاوزين تتغير الأحوال يا أهل الإيمان؟ ربنا غفور، يعني توبوا لربنا فالأحوال تتغير، لأنه غفور سبحانه وتعالى. والودود هو المحب لكم. يا الله، يعني ملك الملوك العزيز الذي له ملك السماوات والأرض، الذي من وراء الكفار محيط، الذي بطشه شديد، يحبك؟ نعم يحبك ويسلمك، لأنه يريد منك شيئًا.
طيب ما طالما هو الغفور يبقى اعملوا الذي به يغفر لكم، توبوا لربنا وسيبوا البلاوي اللي بتعملوها. يبقى اللي ييجي يبجح ويقول ليه يا رب؟ وأول ما يطلع يفتح التيك توك على باب المسجد، وفي البيت الإباحية تشتغل وهو على باب المسجد التيك توك يتفتح والريلز والشورتس وشات مع صاحبته، وفي الآخر ليه يا رب؟ ليه يا رب إيه يا ابني؟ ما هو عشان حضرتك معانا في الأمة. عرفت ليه يا رب؟ عشان إحنا في الأمة، فإيه كنت مستني إيه حضرتك؟ هو الغفور، توب لربنا. عاوز البلاء يرتفع عن أهل غزة؟ توب. وأنت بقى أصل هو ما فيش جهاد روح جاهد، في ناس دماغها مريحاها، هو عاوز يخاطب نفسه بالخطاب اللي يخليه ما يعملش حاجة.
في الآخر هو بيعمل إيه؟ ولا حاجة، هو النهارده زي هو إمبارح زي هو من سنة. طب غزة دلوقتي أحوالهم بقالهم قد إيه؟ داخلين في السنة الكام؟ مين فينا ما كانش خاتم القرآن وختم بالنية دي؟ يعني لما حصل ده في غزة قال أنا هكون واحد من حملة القرآن، مش ختم قراءة، ختم حفظ، فأخذ النية دي. مين فينا أقلع عن الكبائر اللي بيعملها بتلك النية؟ أهو سنتين ولا داخلين في سنتين وشوية. طب وده نسبته قد إيه في الأمة؟ ما هو لما في غزوة أحد النبي عليه الصلاة والسلام كاد أن يقتل وجيش المسلمين يهزم، جيش فيه أبو بكر وعمر وعثمان وعلي إلى غيرهم من الصحابة الكرام يهزم ذلك الجيش، وليه؟ لمخالفة واحدة من الجيش كله؟ لا من ٤٠ منهم. فربنا لا يحابي أحداً، ربنا يربي أولياءه. طب إحنا النهارده كم من المخالفات التي منك أنت بس؟ وتيجي تقول إحنا ليه بنهزم؟ ما هو أنت وأنا.
طيب الحل؟ ﴿وَهُوَ الْغَفُورُ الْوَدُودُ﴾، الباب مفتوح. باب إيه؟ باب تغير الأحوال. اللي قلبه محترق على ما يحدث لإخوانه يغير من حال نفسه هنا. عملنا درس اسمه نصر هنا ونصر هناك، اسمعوا الدرس ده. عاوز يحصل نصر هناك لازم يحصل نصر هنا الأول، لازم. ﴿وَهُوَ الْغَفُورُ الْوَدُودُ﴾، الودود المحب لكم يا أهل الإيمان، أو قيل من معاني الودود أنه يود أن يغفر لكم، يعني هو غفور ويحب أن يغفر لكم. في أكثر من كده؟ طب لما يبقى غفور ويود أن يغفر لكم وما يغفرش؟ يبقى التقصير فين؟ فينا، مش كده؟
وحاجة تانية عجيبة والله، ﴿وَهُوَ الْغَفُورُ﴾ خطاب برضه للكفار، ممكن تبقى صعبة على نفسنا شوية صحيح. ويا بعد ده كله ييجي مش عارف مين يسلم، تبقى صعبة. على فكرة صعبة على مين؟ على جبريل عليه السلام، يقول للنبي محمد: لو رأيتني وأنا آخذ من حال البحر فأضعه في فيه، في فم فرعون. ما هو وهو بيغرق قال: ﴿آمَنتُ أَنَّهُ لَا إِلَٰهَ إِلَّا الَّذِي آمَنَتْ بِهِ بَنُو إِسْرَائِيلَ﴾ [يونس: 90]. فجبريل خشي أن تدركه الرحمة.
طب أنا هسألكم سؤال: لولا أن علم جبريل بربه سبحانه وتعالى أنه قد يغفر ويرحم ما كانش خاف. مش كده؟ يعني كون إن جبريل قال: لو رأيتني وأنا آخذ من حال البحر فأضعه في فيه خشية أن تدركه الرحمة، ده معناه إن جبريل عليه السلام يعرف من رحمة الله عز وجل إنها ممكن تدرك فرعون. هو المشكلة فين دلوقتي؟ إن فرعون قالها عند نزول البلاء العام، وده حينها لا تنفع التوبة. إحنا التوبة تنفع لغاية أوقات معينة، فمن الأوقات اللي حينها ما تنفعش التوبة خلاص إذا نزل الهلاك العام، ومن الأوقات الغرغرة مثلاً، فهنا كان نازل هلاك عام فلذلك ربنا سبحانه وتعالى لم يرحم فرعون. لكن معنى كده إن جبريل عليه السلام يعلم من حال الله عز وجل ومن سعة رحمته إنه ممكن يحصل.
طب تبقى سهلة ولا ثقيلة؟ ثقيلة، هي ثقيلة على النبي عليه الصلاة والسلام إنه يشوف وحشي مع إنه أسلم، وبعدين يطلب منه إنه مش عاوز يشوفه، هي ممكن تبقى ثقيلة آه، بس الحمد لله إن مش إحنا اللي بندبر الكون. رحمة ربنا أوسع من كده بكتير. فيبقى الغفور ده خطاب لأهل الإيمان توبوا فتتغير الأحوال، وهو برضه خطاب للكفار. جه في الآية وفي آية تانية في نفس السورة ربنا قال: ﴿إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا﴾ [البروج: 10]. بعضهم تلمح هذا المعنى، قال: سبحان الله، فتنوا المؤمنين والمؤمنات وهو يدعوهم إلى التوبة، هم مالهمش توبة صحيح، لكن قال: ﴿ثُمَّ لَمْ يَتُوبُوا﴾، يدعوهم إلى التوبة. يبقى ﴿وَهُوَ الْغَفُورُ الْوَدُودُ﴾، عش بهذه النفسية في فترات الاستضعاف، يبقى ده الأمر الشرعي المطلوب منا كلنا، إن إحنا نتوب لربنا سبحانه وتعالى.
﴿ذُو الْعَرْشِ الْمَجِيدُ﴾، والعرش هنا لما يكون الملك له عرش، كلما عظم العرش يبقى ده دلالة على عظم الملك، فيبقى العرش مجيد عظيم، فده دلالة على عظم الملك. طيب عرش ربنا عامل إزاي؟ والله تطيش فيه العقول، إحنا مشكلتنا ما عندناش رفاهية إن إحنا نقعد نتأمل، بس لما نيجي نقول السماء الدنيا، السماء الدنيا دي للسماء الثانية كحلقة في فلاة، ركزوا في اللفظ يا جماعة، عارفين يعني إيه؟ هات حلقة حديد وطلع منها حلقة وارميها في صحراء. معلش سامحوني، أنا عارف إني سوء أدب مني بس حاولوا تشغلوا دماغكم، أصل إحنا في عصر ما فيش حد بيتأمل، ما حدش عنده الهدوء إنه يقعد يتأمل. لا معلش، تأملوا وتخيلوا المشهد ده.
السماء الأولى في الثانية كحلقة في فلاة، أنتم فاهمين السماء الثانية دي عاملة إزاي؟ أنتم الأول متخيلين إن أنا لما أقول لكم عرش ربنا هو السماء الدنيا، ده عرش عامل إزاي؟ فأقول لك بقى السماء الدنيا دي في السماء الثانية كحلقة في فلاة، ولما أجي أقول لك بقى الثانية في الثالثة كحلقة في فلاة، وأرجع أقول لك تبقى الأولى في الثالثة عاملة إزاي؟ يعني الفلاة اللي هي الثانية التي السماء الأولى فيها حلقة، الفلاة دي في الثالثة كحلقة في فلاة. إحنا فاهمين إحنا بنتكلم في إيه؟ والثالثة في الرابعة كده، والرابعة في الخامسة كده، والخامسة في السادسة كده، والسادسة في السابعة كده، والسابعة في العرش كحلقة في فلاة. والله مرعب، مرعب، حاجة كده وبعدين في بقى صرصار هنا في الأرض اسمه نتنياهو، فاكر يا جماعة ده العرش ده مش الرب، ده مخلوق من مخلوقاته سبحانه وتعالى. ارجعوا بقى كده استشعروا العزيز تاني، ده العرش ها يعني مش ربنا. قدرنا نفهم دلوقتي يعني إيه عزيز؟ قدرنا نطمئن له سبحانه وتعالى ونطمئن أننا في كنفه وحمايته ورعايته وكلاءه سبحانه وتعالى.
نعيش بقى بالنفسية دي في فترة الاستضعاف: ﴿عَزِيزٌ حَمِيدٌ * لَّهُ مُلْكُ السَّمَاوَاتِ وَالْأَرْضِ وَاللَّهُ عَلَىٰ كُلِّ شَيْءٍ شَهِيدٌ﴾ [البروج: 8-9]. ﴿إِنَّ بَطْشَ رَبِّكَ لَشَدِيدٌ * إِنَّهُ هُوَ يُبْدِئُ وَيُعِيدُ * وَهُوَ الْغَفُورُ الْوَدُودُ * ذُو الْعَرْشِ الْمَجِيدُ * فَعَّالٌ لِّمَا يُرِيدُ﴾ [البروج: 12-16]. ودي آخر حاجة نختم بيها، ﴿فَعَّالٌ لِّمَا يُرِيدُ﴾، ربنا سبحانه وتعالى لما تكلم عن الملائكة، ملائكة النار، قال حاجة عجيبة جداً: ﴿لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ﴾ [التحريم: 6]. إيه الفرق بين دي ودي؟ يعني ده من باب التوكيد ولا في فرق؟
خليني أديكوا مثال، لو جيت قلت لعمار: شايف الساعة اللي متعلقة على العمود دي؟ قال لي اه، قلت له روح شيل الساعة دي لو سمحت هاتها هنا على المنبر، فقام عمار شايل الساعة وحاططها على المنبر، كده عمار عصى أمري؟ فعل ما أريد؟ طيب، قلت له جزاك الله خير يا عمار بس هو ده ما كانش هدفي صراحة، هو العمود ده مضايقني أصلاً مكانه فبما أنك خلاص شلت الساعة زق لي العمود مترين كده، راح عمار رايح على العمود وقعد يزق في العمود بعزم قوته وينزل على الأرض وبضهره، كده عمار عصى أمري؟ فعل ما أريد؟ فهمتوا حاجة؟
يبقى ﴿لَا يَعْصُونَ اللَّهَ مَا أَمَرَهُمْ﴾ مهما أمروا به فعلوا، ما فيش حاجة بتوقف قدامهم، فهمتوا دي؟ لأن زي ما قلت لكم عمار لما راح زق العمود واجتهد وعمل كل اللي يقدر عليه عشان يحرك العمود المتر فعلاً مش قادر خلاص، لم يعصِ الأمر لكنه لم يفعل الأمر. فهمتوا بقى ﴿فَعَّالٌ لِّمَا يُرِيدُ﴾؟ يعني لا يعجزه شيء سبحانه وتعالى، يعني مش عزة مطلقة وفي الآخر ممكن حاجة تستعصي، أي شيء يريده هيحصل، ليه؟ ما أصل ما فيش حاجة بتوقف قدامه سبحانه وتعالى. عاوزين الدليل؟ ﴿هَلْ أَتَاكَ حَدِيثُ الْجُنُودِ * فِرْعَوْنَ وَثَمُودَ﴾ [البروج: 17-18]. أصل فرعون ده ما كانش واحد عادي، ده فرعون البحر لفظه. عارفين ليه؟
لأن بني إسرائيل ما كانتش هتصدق إنه مات. اليوم ننجيك ببدنك لتكون لمن خلفك آية. كده؟
في خلفك قراءة شاذة، لكن بحبها، أنا بحبها الصراحة أنا. لتكون لمن خلفك؛ اللي اتبع منهجك في الظلم والتجبر. المهم القراءة بقى المشهورة لتكون لمن خلفك آية. ليه؟ أصلي لو كان غرق وجثته اختفت، كان زمان بني إسرائيل لسه خايفين. ويقولوا لا، فرعون يغرق؟ مستحيل. ما تحصلش. فرعون اللي قال أنا ربكم الأعلى.
فلو ما اطمأنتش لكل ده، وعاوز بقى لازم لك -يعني وده مقام أدنى على فكرة- لازم بقى عاوز أدلة عشان تصدق يعني وتطمئن؟ هل هل أتاك حديث الجنود فرعون وثمود؟ افتكر بقى اللي حصل في فرعون وافتكر اللي حصل في ثمود. ثمود أهلكوا برضه بحاجة غريبة جداً، بثلاث حاجات.
ثمود في القرآن أخذتهم رجفة، وإيه، وإيه؟ وصيحة، وإيه؟ وصاعقة. ثلاث حاجات. فهلاكهم كان عجيب برضه. لدرجة إن الواحد منهم أول ما جت الصيحة من الـ رجله مش شايلاه مش عارف يقوم.
فما استطاعوا من إيه؟ من قـ مش عارف يقوم على رجله. عارف يقول لك رجلي مش شاياني، باجي أقوم أقع من الخوف. صيحة ورجفة وصاعقة.
فلو أنتم بقى مش مصدقين كل اللي قلناه: ﴿هَلْ أَتَاكَ حَدِيثُ الْجُنُودِ * فِرْعَوْنَ وَثَمُودَ﴾ [البروج: 17-18]. بل الذين كفروا في تكذيب، والله من ورائهم محيط. تكلمنا عليها، بل هو قرآن مجيد في لوح محفوظ. أقول قولي هذا، وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير