دخولتسجيل الدخول

إني أحبها | تأملات في سورة الإخلاص

أمجد سميرالشيخ أمجد سمير
  • مدة الدرس:
  • قراءة

الحمد لله وحده لا شريك له، وأشهد أن محمداً عبده ورسوله. اللهم صل على سيدنا محمد النبي وأزواجه أمهات المؤمنين وذرياته وآل بيته، كما صليت على آل إبراهيم إنك حميد مجيد، أما بعد.

سورة الإخلاص سورة عظيمة ولها شأن عظيم في دين الله عز وجل، وهي صفة الرحمن سبحانه وتعالى. النبي قال كده ولا مين عليه الصلاة والسلام؟ فسورة الإخلاص صفة الرحمن سبحانه وتعالى وجاء ذلك في حديث أقره النبي صلى الله عليه وسلم، صحابي قال هذا وأقره النبي عليه الصلاة والسلام.

احنا عندنا حديثين يا جماعة في الحتة دي؛ صحابي لما أرسل النبي صلى الله عليه وسلم سرية وأمر عليهم أحدهم، فكان يصلي بهم فكان يختم الصلاة بقل هو الله أحد. عندنا موقف ثاني يرويه أنس أن رجلاً من الأنصار كان يؤمهم في مسجد قباء، فكان يفتتح الصلاة بقل هو الله أحد. يعني الأول كان يختم كل صلاة بقل هو الله أحد، الثاني كان يفتتح كل صلاة بقل هو الله أحد، خلاص.

فلما سئل عن سبب ذلك -سأله النبي صلى الله عليه وسلم عن سبب ذلك- قال: صفة الرحمن وأنا أححبها، أو: وإني أحبها. وفي رواية قال صلى الله عليه وسلم: «أخبروه أن الله يحبه بحبه إياها». وفي رواية: «حبك إياها أدخلك الجنة». فالحقيقة سورة الإخلاص سورة عجيبة، ليه عجيبة بقا؟ هتلاقوها أولاً متكررة.

يعني ايه متكررة؟ تكرارها في اليوم والليلة مرارا، مش كده؟ يعني تفتتحك بها وتفتتح ليلتك بها. فتلاقي أول ما هتقوم تصلي الفجر فهتصلي سنة الفجر، هتقرا بايه؟ سورة الكافرون والإخلاص، بيسموهم سورتي الايه؟ الإخلاص. يعني سورة الكافرون وسورة الإخلاص اسمهم سورة الإخلاص. خلاص، فتبدا يومك بقل يا أيها الكافرون وقل هو الله أحد.

طيب انتهى اليوم وبعدين هتبدا الليلة، فهتصلي المغرب، وبعد ما تصلي المغرب تصلي ركعتين المغرب ركعتين السنة، فتقرا بايه؟ والمغرب هي أول صلاته أول الليل، فتقرا برضه قل يا أيها الكافرون وقل هو الله أحد، مش كده؟ وتختتم بها الليلة، فهتيجي في الآخر هتوتر، فتوتر بايه؟ قل هو الله أحد، وقبل ما تنام هتقرا ايه؟ قل هو الله أحد. ومش مرة، هتقراها ثلاثا، فتلاقوها متكررة على مدار اليوم والليلة.

وبعدين فضلها عظيم، يعني هي متكررة في... الصوت بقا... متكررة في أحاديث بخصوصها وفضلها عظيم. يعني الواحد عاوز يقراها لمطلق الفضل الذي جاء فيها، فضلها عظيم جدا تعدل إيه؟ تعدل ثلث القرآن. يعني إيه تعدل ثلث القرآن يا جماعة؟ يعني إيه تعدل؟ يعني إيه سورة الإخلاص تعدل ثلث القرآن؟

مما قيل في ذلك: أن ثوابها؛ ثواب قراءة سورة الإخلاص يعدل ثواب قراءتك ثلث القرآن ليس فيه سورة الإخلاص. هذا مما قيل، طبعا القول اللي الناس دايما يعني كأنهم بعض الناس يتعاظم هذا الفضل فيكسف، لا، هذا قول موجود عند أهل العلم أن ثواب قراءتها هو ده الثواب بتاعها.

والقول الثاني اللي هو بقا مشهور والناس كلها عارفاه، أن القرآن فيه أحكام ووعد ووعيد وعقائد، ثلاث حاجات؛ لو جبت القرآن من أوله لآخره أحكام ووعد ووعيد، أو بعضهم يقول أحكام وأخبار وعقائد. فإذا كان هو القرآن مقسوم ثلاث أقسام، وقل هو الله أحد بتتكلم عن إيه؟ عن أصل العقيدة، مش كده؟ فلذلك تعدل ثلث القرآن.

لكن احنا عاوزين بقا نمسك في القول الأول، عاوزين نمسك في القول الأول أن قراءة قل هو الله أحد، وفي حديث عن النبي عليه الصلاه والسلام يعني يقوي هذا ولذلك ذهب إلى ذلك بعض أهل العلم: «أيعجز أحدكم أن يقرأ كل يوم ثلث القرآن» أو كما قال صلى الله عليه وسلم. يعني تستشعر كده المعنى ده، معنى أن في الثواب ده فثوابها عظيم وتعدل ثلث القرآن.

سورة الإخلاص ليه بقا؟ ليه كل ده؟ الحقيقة يا جماعة لو تاملنا سورة الإخلاص هنلاقي حاجه عجيبة جداً، أن سورة الإخلاص طبعا سورة الإخلاص من قصار السور هي كلها أربع آيات، هتجد أن اسم الله الأحد لم يأت في القرآن كله إلا في سورة الإخلاص، وأن اسم الله الصمد لم يأت في القرآن كله إلا في سورة الإخلاص، وده شيء عجيب جداً.

ولما دعا رجل يوما بهذه السورة، ماذا قال النبي عليه الصلاة والسلام؟ قال: «لقد سأل الله باسمه الأعظم الذي إذا سئل به أعطى، وإذا دعي به أجاب». قال رجل يوماً: اللهم إني أسألك بأنك أنت الله الأحد الصمد، الذي لم يلد ولم يولد ولم يكن له كفواً أحد. قال: «لقد سأل الله باسمه الأعظم». فالصورة عجيبة.

وبعدين سورة الإخلاص زي ما قلنا هي وسورة الكافرون اسمهم سورتي الإخلاص، ليه بقا؟ علشان سورة الإخلاص سورة قل هو الله أحد بتتكلم عن التوحيد الذي يليق بالله عز وجل، عن صفة الله عز وجل في التوحيد. سورة الكافرون بتتكلم عن إيه؟ عن فعل العبد بقا، عن توحيد العبد: ﴿قُلْ يَا أَيُّهَا الْكَافِرُونَ * لَا أَعْبُدُ مَا تَعْبُدُونَ * وَلَا أَنتُمْ عَابِدُونَ مَا أَعْبُدُ * وَلَا أَنَا عَابِدٌ مَّا عَبَدتُّمْ * وَلَا أَنتُمْ عَابِدُونَ مَا أَعْبُدُ * لَكُمْ دِينُكُمْ وَلِيَ دِينِ﴾ [الكافرون: 1-6]. فعل العبد وسورة الإخلاص صفة الرب سبحانه وتعالى، ولذلك كانتا سورتي الإخلاص.

طيب عاوزين نتدبر شوية في سورة الإخلاص، لأن التدبر عاوزين نعمل مشروع كده إن شاء الله قريبا يمكن أو حاجه أن احنا نمر على السور التي حض الشرع على تكريرها أما يوميا أو أسبوعيا. يعني اشمعنى الصور دي بالذات تقرا كل يوم ليه؟ أو الآيات دي بالذات اشمعنى السور دي تقرا كل أسبوع ليه؟ أكيد في معاني ملحة في تلك السور أو في تلك الآيات بخصوصها، فعاوزين نتدبر من هذا الوجه ليه هذا التكرار؟ ليه دي مش غيرها؟

فمن أعظمها، من أعظمها سورة الإخلاص، لأن تكرار سورة الإخلاص لا يكاد يوجد في غيرها أصلاً. فهل هو بس مجرد أن احنا بنثبت لله الوحدانية؟ ما هو يا جماعة الوحدانية موجود في القرآن كله، صح ولا لا؟ يعني هي الوحدانية في سورة الإخلاص ولا القرآن كله توحيد؟ القرآن كله توحيد، فكأن لا، في معنى أو في معاني أخرة عاوزين نقف قدامها، عاوزين نتدبرها، عاوزين نستشعرها، عاوزين ننطلق بها ولذلك نكررها في اليوم والليلة.

فنهاردة مش جايين نفسر ولا جايين نقف على السورة حرف حرف وكلمة كلمة، وإنما جايين نقف على مواطن في السورة، وأول هذه المواطن: قل هو الله أحد. قل هو الله أحد. فالأحد قلنا ما جاش في القرآن خالص ولا مرة كصفة لله عز وجل إلا في هذه السورة. نعم، كلمة أحد جت في القرآن كتير، يعني كلمة أحد جت كتير في القرآن، إنما في هذه السورة جاءت صفة لله عز وجل: ﴿قُلْ هُوَ اللَّهُ أَحَدٌ﴾ [الإخلاص: 1].

طيب إيه الأحد؟ في عندنا الواحد وفي الأحد، هما الاتنين بمعنى؟ ولا كل واحدة تختص بمعني؟ بعض العلماء ذهب أن الواحد والأحد بمعنى، أن هما الاتنين معنى واحد، أن الواحد والأحد معناهما واحد. وبعض العلماء قال لك لا، الواحد ليها معنى والأحد ليها معنى تاني خالص، ودول بقا اختلفوا إيه الفرق بين الواحد والأحد؟ مش هنقف على كل الاقوال، لكن مما قيل في الأقوال أن الله عز وجل واحد في ذاته، أحد في صفاته.

يعني لما نقول الله واحد، يعني واحد في الذات، مفهومة دي. واحد في صفاته يعني إيه أحد في صفاته بقا؟ يعني ما فيش حد يشارك ولا ينازعه في صفة من صفاته. هو ممكن يبقوا واحد في ذاته وصفات، صفاته تنازع؟ واضح؟ لا، هو مش كده سبحانه وتعالى، هو واحد في ذاته، أحد في صفاته. ولما نقول أحد في صفاته، أن ممكن بعض المخلوقين يشتركوا مع الله عز وجل في قدر مشترك من الصفة، لكن لله عز وجل كمال تلك الصفة.

حد فاهم حاجه؟ يعني الرحمه مش ممكن نقول إيه: فلان ده رحيم بالناس، مش كده؟ والله رحيم، فنقول كده يبقى بينازع ربنا صفه الرحمة؟ لا أبدا، رحمة الله عز وجل رحمة كاملة تامة لا نقص فيها بوجه من الوجوه، بخلاف رحمة المخلوقين. وهكذا بقا قل مثل ذلك في كل الصفات اللي فيها قدر مشترك من أو فيها قدر من الاشتراك بين المخلوق والخالق سبحانه وتعالى.

خلاص، يبقى هو أحد في صفاته سبحانه وتعالى. طيب هذا يقتضي إيه منا؟ أن احنا بنقول قل هو الله أحد، أن هيمر قدام عينيك صفات ربنا سبحانه وتعالى كلها، فتستشعر بقلبك أحديته في كل صفة. اتكلمنا المره اللي فاتت مثلا عن صفة الحكمة، وصفة هو طبعا كل اسم يشمل إيه؟ صفة، فالحكيم يعني له الحكمة، مش كده؟ وقل مثل ذلك بقا في كله، فتكلمنا عن صفة الحكمة، كلمنا عن صفة إيه تاني؟ العظمة، مش كده؟ وغيرها من الصفات، فهو أحد في حكمته، أحد في عذته، أحد في حياته سبحانه وتعالى، أحد في سمعه، أحد في بصره.

فكانك وانت بتقول قل هو الله أحد وتكررها في كل يوم وليلة، بلاش تغفل عن هذه المعاني. ده من جملة التكرار أنك بتقراها بعد إيه كمان؟ بعد الصلوات. يا جماعة سورة الإخلاص بتكرر كتير قوي في اليوم والليلة، أكيد مش عشان في كل مرة أنت غافل عن تلك المعاني، لا، هي فيها معاني كبيرة وعظيمة وخطيرة، وليه بنكررها؟ عشان لو غفلنا مرة ننتبه مرة ثانية، ولو انتبهنا المره دي، المعنى يفتح علينا في المرات القادمة بمعنى آخر.

الصحابي يا جماعة لما أحب صفة الرحمن، أحبه الله ودخل الجنة بحبه لها. طب هو واحد بيحب حاجه وهو مش فاهمها وهو غافل عن معناها؟ مستحيل. هذا رجل، وبعدين خلي بالكم، مثلا في رواية أنس الرجل الأنصاري الذي كان يؤمهم في قباء، راحوا واشتكوا له، قبل ما يروحوا للنبي عليه الصلاة والسلام اشتكوا للراجل نفسه، قالوا له يعني يا إما تقرا بغيرها لو أنت شايفها مش مكفياك، يا إما تقرا بيها وخلاص، إنما ما تقراش بيها وتفتتح سورة ثانية.

قال لهم: هو ده اللي عندي، عاوزين حد تاني يامكم، شوفوا حد غيري. وكانوا هم يعني أهل قباء يرونه أفضلهم، يعني هو أفضل واحد يئمهم، فقالوا: خلاص، سيبوه براحته لغاية ما نبقى نروح للنبي عليه الصلاة والسلام ونسأل بقا إيه الموضوع ده؟ يعني حصل خلاف بينه وبين الصحابة وأصر على اللي بيعمله، ليه؟ لأنه يحبها: وني أحبها. فقال النبي له صلى الله عليه وسلم: «حبك إياها أدخلك الجنة».

طب احنا إزاي هنحب حاجة مش فاهمينها؟ يعني إيه مش فاهمين؟ يعني مش فاهمين يعني إيه أحد. ممكن يبقى واحد فاهم يعني إيه أحد بس مش فاهم مقتضى معنى الأحدية. ما هو مقتضى معنى الأحدية يعني إيه يا جماعة؟ يعني يحب سبحانه وتعالى. انتوا فاهمين يا جماعة لما أجي أقول لك إيه، مثلا مخلوق واحد من المخلوقين، واحد من قرايبك كريم وشهم ورحيم باهله وبار، واقعد عد من هنا لبكره وعيلتك كلها ما جابتش غيره، يعني إيه؟ يعني هو الوحيد اللي في عيلتك فيه الصفات دي، تلاقي الشخص ده من كل العيلة إيه؟ محبوب، مش كده؟ عشان هذه الصفات اللي لو دخلنا في تفاصيلها نلاقي فيها نوع نقص بلا شك.

يعني ما فيش حد بيبلغ في الرحمة غاية الرحمة، ولا حد بيبلغ في الشجاعة غاية الشجاعة، ولا حد بيبلغ، ما فيش كده، خلاص. لكن هو متصف بتلك الصفات الجميلة الحسنة، فتلاقيه محبوب من كل العيلة، بالذات لو ما فيش غيره. عارف لو واحد واثنين وثلاثة وأربعة وخمسه وسته تلاقي الحب إيه؟ متوزع على دول، ممكن واحد يحب واحد منهم ما يحبش التاني. إنما لو واحد يجمع الصفات دي كلها وما فيش غيره، فتجده محبوباً من كل اللي حواليه، هو ما فيش غيره، ما فيش غيره اللي كده.

ولله المثل الأعلى، قل هو الله أحد. فأنت بتقول كلمة أحد، تستشعر هذا: هو أحد سبحانه وتعالى في رحمته. أحد في رحمته يا جماعة، رحمة الله مثلاً، يعني رحمة الله عز وجل منها أن إبليس يوم القيامة هيعمل إيه؟ هيشب كده، صح؟ يتطاول كده، يظن أن الرحمة تدركه، من عظم الرحمة اللي شايفها إبليس يوم القيامة يقوم يشب براسه كده إيه يظن أن الرحمة تدركه. رحمة عظيمة سبحانه وتعالى.

هو أحد في رحمته، أحد في لطفه، أحد في مغفرته. هو يا جماعة في مخلوق في الدنيا يستحمل أنك تخالفه؟ مخالفتك لربنا ما تلاقيش، مستحيل. في مخلوق في الدنيا يستحمل مخالفتك لربنا، أن يعني شوف أنت بتخالف ربنا في كم أمر في اليوم والليلة في الأربع وعشرين ساعة؟ مصحى لغاية ما تنام، شوف بتخالف ربنا في كم أمر سبحانه وتعالى؟ عدد هذه المخالفات لو خالفتها لمخلوق مين يستحملك؟ ما تلاقيش.

طب خد الزيادة بقا عن كده، مع كم المخالفات دي، هو سبحانه وتعالى يحب منك أن تستغفر، وإذا استغفرت غفر لك. طب وقعت تاني؟ يمهلك. طب استغفرت؟ يغفر لك. طب وقعت ثالث؟ عاشر؟ يمهلك، وإن استغفرت غفر لك وأحب ذلك منك سبحانه وتعالى. أحد في مغفرته، أحد في كرمه سبحانه وتعالى.

هو في مخلوق في الدنيا يستحمل كم الطلبات اللي بتطلبها من ربنا سبحانه وتعالى، حتى لو أبوك أو أمك؟ ما تلاقيش. طيب في مخلوق في الدنيا يستحمل ذنبك إلحاحك في السؤال؟ يعني تسأله مرة وبعدين شوية وتروح ساله تاني، وشويه تروح تسأله ثالث و...

حتى لو هو مين، هيحصل إيه؟ هيزهق، مش كده؟ الله يغضب إن تركت سؤاله، وبني آدم حين يسأل يغضب. ليه؟ أصل أحد في كرمه، فما فيش حد في كرمه سبحانه وتعالى؛ فيحب أن يعطي، ويحب إلحاحك.

طب خد المفاجأة دي، جاء في بعض الآثار أنه ربما أخر سؤالك، أخر إجابة سؤالك ليه؟ لأنه يحب أن يسمع صوتك، يحب أن يُسأل ويحب أن يلح عليه سبحانه وتعالى. طب خد اللي أكبر من دي، لو ما سألناهوش يهلكنا كلنا ويجيب ناس تسأله، تسأله المغفرة، هو بيحب ده ليه؟ أصله أحد في كرمه.

أنتم عارفين اللي كريم وعنده بقى يعني تلاقيه لو عدى يوم ما أنفقش يتعب ما يعرفش يعمل ده في المخلوقين يعني، فأقصد فهو أحد في كرمه. وقل مثل ذلك في كل الصفات، احنا الدرس النهارده مش درس الصفات كلها، في أحد دي، فأنت بتقول أحد، أكيد أكيد النهارده الموضوع ملمس معاك في صفة معينة مع ربنا سبحانه وتعالى، يعني إيه مثلا؟

كان الفرق بينك وبين أن تتفضح لحظة؛ فاتح مقطع إباحي، وفجأة أبوك دخل عليك، كنت أنت لسه يا دوبك إيه قافل المقطع، لحظة وكنت تتفضح، فأنت عايش معانا الستر، النهارده أنت عايش معنى الستر. فجيت بعد الصلاة بتقراها ولا قبل ما تنام ولا في أذكار الصباح، في أي وقت بقى بتقرا قل هو الله أحد، فتقول أحد في ستره سبحانه وتعالى، ستير، أحد في ستره، فتلك الأحدية في الستر.

لأن ما فيش مخلوق تعصيه كم العصيان ده وتخالفه كم المخالفة، ويفضل سترك على طول الخط كده، ما تلاقيهاش دي. ربنا بقى أحد في ستره سبحانه وتعالى. طيب النهارده اتجرأت على ربنا أنت ومثلا حد وحدة بتقول لك الحجاب ولا مش عارف الصحبية ولا بتاع، رحت إيه غلطت غلط كبير، غلط تؤخذي به الآن، يعني يخسف بك الآن الأرض، في ناس كده تتجرأ على ربنا، وبعدين أمهلت!

ما هو يا جماعة لو قلوبنا صاحية هنحس المعاني دي في كلمات احنا يعني في كلمات لما تتقال المفروض ننتظر العقوبة فوراً، فوراً، فوراً، حتى لو أنت راجل مؤمن وتقي. طب يعني أقول لك حاجة زيادة؟ ده أنت لو مؤمن وتقي وولي لله، عقوبتك تبقى أشد، وعلى كلمات ربما يتجاوز عن مثلها في حق غيرك، إيه رأيك بقى؟ مش هتتعامل زي غيرك، إمتى؟

يعني هديكم مثال: النبي الذي قال النبي عليه الصلاة والسلام كان لما يخلص صلاة يتمتم بكلمات كده مش مفهومة مش سامعينها يعني الصحابة، فصحابي راح سأله عن الكلمات، فحكى له نبياً من الأنبياء نظر يوماً في قومه في الجيش بتاعه قال: من يقوم لهؤلاء؟ يعني إيه اللي حصل؟ أعجب إيه بكثره الجيش، قال: من يقوم لهؤلاء؟ ما حدش يعرف يقف قدام الجيش بتاعي. فأوحى الله له أن اختر لقومك إحدى ثلاثة، اختارهم بقى واحدة من الثلاثة دول، ثلاث عقوبات، ماشي؟

المهم اختار، اختار لهم الموت يعني مش عايزين الحديث طويل بقى، فمات منهم في يوم كام؟ سبعون ألفاً! أنتم فاهمين الرقم ده يا جماعة؟ الرقم ده يعني ممكن إيه في في حروب كبيرة ممكن ما يموتش الرقم ده، أنت فاهم يعني إيه في ساعة زمن هذا النبي ينظر في جيشه مات سبعون ألفاً؟ الرقم سبعة آلاف ده رقم كبير جداً خلي بالكم يعني يعني أنا أظن اللي في المسجد دول مثلا ما نجيبش الألف، ما نجيبش الرقم ده، ممكن يبقى خمسمائة، فاضربوا الرقم اللي أنتم شايفينه دلوقتي في مائة وأربعين لو إحنا فعلاً خمسمائة!

فأنتم فاهمين الرقم عامل إزاي؟ مائة وأربعين ولا إيه؟ مائة وأربعين صح؟ مائة وأربعين، يعني الرقم ده كده حطه مائة وأربعين مرة جنب بعضه، فرقم مرعب. فإحنا بنعمل كده، إحنا إحنا لينا كلمات، لينا أفعال قلبية عقابها كان يبقى فوري وأمهلنا، وجيت في سنة المغرب وأنت عارف الكلمه اللي قلتها، ما هو إن الرجل ليتكلم بالكلمة من سخط الله لا يلقي لها بالاً يهوي بها في النار سبعين خريفا.

حد تدبر المعاني دي؟ فالمهم جيت أنت بقى بتقرا قل هو الله أحد فتعيش معنى إيه؟ تعيش معنى أحاديته في إيه بقى؟ في إمهاله، في إمهاله سبحانه وتعالى. أمهلك، أحد في إمهاله سبحانه وتعالى.

لقيت درس المره اللي فاتت حاجات تجنن، المؤمنون مستضعفون وتنتهك الأعراض ويقتلوا وما فيش حد معبرهم ومش عارف إيه، ودخلت في سنة الفجر القبلية قل هو الله أحد في حكمته، وتعيش مع أحادية الله عز وجل في الحكمة، أحد في حكمته. ولو كان الأمر لأحدنا لعجل، عجلة، أكيد هتفضي إلى إلى شر، ليه؟ لأن طالما ربنا لم يعجل تلك العجلة فهو ده الخير، مفهومة دي؟

يبقى إيه قل هو الله أحد في حكمته سبحانه وتعالى، فتطمن تخرج كده من سنة الفجر وأنت وأنت مطمئن القلب، ليه؟ أصله أحد في حكمته، أحد في حكمته سبحانه وتعالى. قس على ذلك كل صفة بقى، كل صفة؛ شايف نفسك متجرأ على معصية ربنا سبحانه وتعالى ومقضيها بالطول والعرض ويمين وشمال ولا فارقة معاك، تقوم تدخل الصلاة قل هو الله أحد في جبروته، في قوته، في سمعه وبصره سبحانه وتعالى.

على فكره كل واحد من دول ليها تفاصيل جوه، يعني مثلا لو قلنا قل الله أحد في سمعه، فإزاي سبحانه وتعالى لا تختلط عليه الأصوات؟ وبعدين سواء منكم، أنتم عارفين دلوقتي لو أنا اهو بتكلم في المايك اهو كلنا كل اللي قاعدين سامعيني صح كده؟ اثنين بيوشوا بعض في آخر المسجد ولا واحد في المسجد سامعهم، ربنا يقول لي بقى في القرآن: ﴿سَوَاءٌ مِّنكُم مَّن أسَرَّ الْقَوْلَ وَمَنْ جَهَرَ بِهِ﴾ [الرعد: 10]، في سمع الله سيان، الإثنين واحد، سواء منكم من أسر القول ومن جهر به، اللي بتكلم في ميكروفون زي اللي قاعد بيسر القول بيوش واحد.

طب اللي أكتر من هذا؟ لا، ده ما أسرش حتى، أنتم عارفين السر يكون بين اثنين، ما أسرش، ما فتحش بقه، يعلم السر وأخفى، هو إيه اللي أخفى من السر؟ ما لم تحدث به غيرك، الحاجه اللي في ضميرك اللي لم تطلق عليها أحداً أصلاً. طب يعني يعلمها بس طشاش كده يعني؟ سواء منكم من أسر القول ومن جهر به.

قد سمع الله قول التي، عائشة تقول إيه؟ أنا في ناحية بيت أسمع كلمة ويخفى علي كلمات، وأنزل الله من فوق سبع سماوات: ﴿قَدْ سَمِعَ اللَّهُ قَوْلَ الَّتِي تُجَادِلُكَ فِي زَوْجِهَا﴾ [المجادلة: 1]. فتقوم أحد في سمعه، أحد في بصره. فأنا وسط الناس شايفني زي ما أنا لوحدي، إحنا بنكلم مين؟ المتجرئ على معصية ربنا سبحانه وتعالى.

سواء منكم من أسر القول ومن جهر به ومن هو مستخف بالليل وسارب بالنهار، سواء، يبقى سواء منكم من أسر القول ومن جهر به، سواء في سمع الله وسواء في بصره من هو مستخف بالليل وسارب بالنهار، الإثنين واحد، رؤيته لهذا كرؤيته لذاك. فانت راجل متجرأ على معصية ربنا وما بتصدق تبقى لوحدك في خلوة علشان تنتهك الحرمات، قل هو الله أحد في سمعه، أحد في بصره، أحد في قوته، في قدرته، أحد في أخذه، في بطشه، لسه واخدينها الدرس اللي فات: ﴿إِنَّ بَطْشَ رَبِّكَ لَشَدِيدٌ﴾ [البروج: 12].

فاهمين أنتم فاهمين يا جماعة الكلام ده؟ أحد يعني إيه؟ ما فيش حاجه، ما فيش حد زيه، ما فيش حد يشبهه في هذا. وكذلك أخذ ربك إذا أخذ القرى وهي ظالمة، إن أخذه أليم شديد. أحد في لطفه، فاكرين صاحبنا أحد في ستره اللي هو قبل ما أبوه يخش بلحظه كان قفل المقطع الإباحي؟ طب أبوه فتح عليه وطب عليه وشافه وهو بيتفرج على المقطع الإباحي؟ قل هو الله أحد في لطفه سبحانه وتعالى، لطيف.

ليه لطيف؟ كان ممكن يأخذك وتلك الهيئة، ومن لطفه بك أن أنذرك عشان تفوق وتبطل وترجع، أحد في لطفه. ولو أخذك على تلك الهيئة ومت على ذلك الشيء لبعشت عليه، فإن حدث ذلك في فضيحتك يا مسكين، أنت النهارده متضايق أن أبوك شافك، أن أمك شافتك، أن مش عارف صاحبك، أن أخوك، أن، تخيل بقى فضيحتك هذه على رؤوس الأشهاد! والادهى من ذلك والأمر أن تقف على تلك الهيئة بين يديه وهو يحاسبك سبحانه وتعالى.

لطيف، أحد في لطفه، ومن لطفه أنه فضحني الفضيحة الصغيرة دي عشان أفوق وأرجع، وإلا كنت أتمادى لغاية ما أؤخذ على تلك الصفة تلك الهيئة ذلك الفعل، وتبقى الفضيحة الكبرى، أحد في لطفه. فإحنا عاوزين نعيش يا جماعة في كل موقف نقرا فيه سوره سورة الإخلاص مع صفة من صفات الله عز وجل، وتستشعر معنى الأحدية في هذه الصفة. أنهي صفة؟ معرفش، يعني مش هقول لكم واجب النهارده صفة، لا، كل واحد حصل معاه موقف واستشعر معنى من من تلك الصفات، يوم الموقف اللي بعديها على طول من المواقف اللي بتقرا فيها قل هو الله أحد سورة الإخلاص، يقف يهدى شوية، بلاش تخلصها في ثلاثين ثانية، خلصها في دقيقتين في ثلاث دقائق، طأطئ رأسك وأغمض عينك وتدبر قوله تعالى قل هو الله أحد.

في إيه بقى؟ كل واحد وما يفتح الله عليه. ولذلك يا جماعة قل هو الله أحد كنز، كنز تعدل ثلث القرآن، ما هو ما فيش أحد تاني في القرآن، ما فيش أحد تاني في القرآن، فمش هتعرف تعملها دي، هتعملها فين تاني؟

لو قلنا لو ذهبنا إلى هذا الفرق أنه واحد في ذاته، أحد في صفاته، فهتعملها فين في القرآن تاني دي؟ أنك تقعد تتدبر هذا اللفظ وتقدر تتدبر فيه أي صفة. أنتم فاهمين الكلام ده يا جماعة؟ أن أحد دي تقدر تتدبر فيها أي صفة من صفات الله عز وجل. أنا على فكرة أنا مش محضر الكلام، يعني أنا كل اللي أنا قلته الربع ساعة اللي فاتت ولا أنا مش محضره، أنا عمال أجيب في صفات ومواقف، أنا ما يعني أنا ليه بقول الكلام ده؟ عشان أقول لكم إن ده يقدر يعمله أي حد، يعني هو أنت موقف بيحصل لك فتققدر تعيش بقى معاه.

ومش لازم من قبل الله عز وجل، مثلاً النهارده ضدك مات واحد ليك، أبوك، أخوك، أي حد مات، فتقوم قل هو الله أحد في حياته، ما هي حياة كاملة لم تسبق بعدم ولا يلحقها زوال، الحياة لن تزول، حياة ربنا لن تزول ولم تسبق بعدم (يعني ما كانش موجود وبقى موجود، ما كانش حي وبقى حي لا حياة كاملة)، فقل هو الله أحد في حياته. عشان كده شوفوا الآية: ﴿وَتَوَكَّلْ عَلَى الْحَيِّ الَّذِي﴾، ليه هنا الذي لا يموت؟ ليه جت وتوكل على الحي؟ علشان ينفي من قلبك الأغيار.

حد فاهم حاجه؟ أنت رايح دلوقتي مصلحة حكومية، ورايح محضر واسطة فلان الفلاني المدير في مش عارف إيه، عضو في مجلس الشعب، واسطتك أياً كانت واسطتك، رايح بقى وبطنك بطيخة صيفي وقلبك مطمئن ومش عارف إيه، صح كده؟ وصلت على باب المصلحة، بتصل يرد عليك، والله فلان مات. وارد ولا مش وارد؟ وارد.

طب كان الحل إيه من الأول؟ توكل على الحي الذي لا يموت، آه صحيح عضو مجلس الشعب ده حي بس بيموت، والله بيموت، وتلحقه الآفات (مش لازم يموت، أنت ممكن توصل لباب المصلحة تتصل أصله بس جاله جلسة طارئة في مجلس فراح فساب التليفون)، اشرب بقى أنت وأنت على باب المصلحة بقى، شوف هتعمل إيه. بعض الناس يا جماعة لو بس وصل لباب المصلحة واتصل بالرقم اللي هو المفروض هيشفعه ولا كذا ولا كذا، ولقى بس ادله غير متاح، يضطرب قلبه ويعرق مش عارف هيتصرف إزاي.

لا إله إلا الله، لا إله إلا الله، فين ربنا؟ إيه اللي قلبك يضطرب ليه؟ ولا ليه يعني؟ أين الله؟ أين الأحد؟ يبقى تشهد هذا بقى، ماشي. موقف اللي هو غير متاح ده، تليفون غير رحت فتحت اتصلت لقيته غير متاح، تستشهد، وبعدين قل هو الله أحد ها، أحد في إيه بقى؟ معيته، مش كده؟ فلان ده اللي أنت فاكره معاك جيت في اللحظة اللي محتاجه فيها ما بقاش معاك. صح يا جماعة اللي أنا بقوله ده بيحصل ولا أنا ما بيحصل؟

تليفون غير متاح، تليفونه نسي في البيت، حد رد عليك بس هو نسيه في البيت، طب يعني أعرف أوصل له والله ما حوش تليفون، طب راجع إمتى؟ لا ده بالليل، وأنت على باب المصلحة قل هو الله أحد في معيته سبحانه وتعالى، على طول معاك، أربعة وعشرين ساعة معاك سبحانه وتعالى، في أي لحظة ترفع إيديك وتسأل في أي لحظة، وأنت على يقين أن سؤالك مسموع، على يقين.

يجيب ولا لا يجيب؟ دي مسألة تانية ترجع إلى أحاديته في حكمته، وأحاديته في رحمته بك، لأن ممكن المصلحة اللي أنت رايح تخلصها مش مصلحة ليك، إنما أنت تستشعر إيه بقى؟ تليفون غير متاح، تليفون في البيت، أحد في معيته سبحانه وتعالى. عش مع أحيته، قل هو الله أحد. الله الصمد، والصمد أيضاً لم تأتِ في القرآن إلا في سوره الإخلاص.

عجيب والله يا جماعة، إنا لو يعني حاجه عجيبة فعلاً يعني، يعني القرآن كله صورة من أربع آيات، اسم الصمد مش موجود في القرآن، إزاي ما نقفش مع حاجه زي كده يعني إزاي؟ إيه هو الصمد؟ الصمد اتُّقِل فيه أقوال كتير جداً ممكن تكون وصلت لعشرين قول. خلونا ناخد ثلاث أقوال وهي أشهر الاقوال، ثلاث أقوال ونتدبر الاقوال، قل هو الله أحد الله الصمد، مما قيل في الاقوال أن الصمد الذي لا جوف له.

الصمد الذي لا جوف له فهو مصمد، وقيل إن الدال مبدلة من التاء، والأصل مصمت. حد فاهم حاجة؟

فالصمد الذي لا جوف له، فلا يأكل ولا يشرب، هكذا قالوه في التفسير. حد تدبر المعنى ده قبل كده؟

طيب، علشان نتدبر المعنى ده، أولاً أول ما نقول إنه لا جوف له، نقوم نتأمل كده في المخلوقات، بالذات المخلوقات التي لها نوع إدراك. هنكتشف أن المخلوقات دي كلها لها إيه؟ لها جوف. وكان وجود الجوف نوع نقص. طب شوفوا المعنى الأعجب من ده: أن إبليس، إبليس عارف الموضوع ده، إيه رأيكم بقى؟ إبليس لما خلق الله آدم قبل أن ينفخ فيه الروح وهو ليس بقا على هيئته من الصلصال أو كذا، فإبليس كان يطوف بأيه؟ بآدم ويدخل ويخرج، ما هو آدم مجوف عليه السلام، فيدخل فيه ويخرج، وبعدين قال كلمة عجيبة جداً إبليس في روايتين.

الرواية الأولى يقول: فلما رآه أجوف، علم أنه خلق خلقاً لا يتمالك. هنيجي لكلمة لا يتمالك دي. الرواية الثانية بقى: أن إبليس قال لما لقاه أجوف، لما وجد آدم أجوف، قال: نلت منه، خلق لا يتمالك، أو ظفرت به، هكذا الرواية: ظفرت به، خلق لا يتمالك.

هنا بقى عاوزين نقف شوية أول حاجة مع إبليس، لقى آدم أجوف، فريح قوي وقال: ظفرت به خلق لا يتمالك. فعاوزين نفهم إبليس فهم إيه، دي أول حاجة. تاني حاجة: اللي إبليس فهمه ده هو فهمه بناء على إيه؟ يعني في تجربة سابقة، حد فاهم أنا بقول إيه؟ ما هو إبليس يعني.

طيب، إبليس كأنه فهم أولاً في تجربة سابقة. آه، في تجربة سابقة لإبليس، إيه هي التجربة السابقة؟ الملائكة، جاء في بعض الآثار: الملائكة صمد، خلق الله الملائكة صمداً لا جوف لها، ولذلك الملائكة لا تأكل ولا تشرب ولا تتناسل. مش كده؟ لما جاء لهم بالعجل الحنيذ وبعدين رأى أيديهم لا تصل إليه، نكرهم وأوجس منهم خيفة، ليه ما بياكلوش؟ ما الملائكة ما بتاكلش، ليه ما بتاكلش؟ مالهاش جوف. حد فاهم دي؟ وطالما مالهاش جوف، فإحنا في جوف كده هنسميه بعد كده الرحم، والجوف ده هو المسؤول إنه إيه؟ يشيل الجنين، فهي مالهاش جوف، ما فيش تناسل.

فدي خلق اهو، خلق صمداً. وفي خلق تاني جاءت النصوص بما يوحي أنه خلق مجوفاً، اللي هو مين؟ إبليس نفسه. ما هو إبليس نفسه الجن والشياطين بتأكل ولا ما بتأكلش؟ ماذا قال النبي صلى الله عليه وسلم: «هذا زاد إخوانكم من الجن». فالجن بيأكل، طب بيتناسل؟ ﴿أَفَتَتَّخِذُونَهُ وَذُرِّيَّتَهُ﴾ [الكهف: 50]، مش كده؟ فبيتناسل. فعندنا خلقين أهم، خلق خلق صمداً، وخلق خلق أجوف.

فلما خلق هذا على تلك الصفة من الصمدية، تمالك؛ ليه تمالك؟ لأن الجوف من قوانين الله عز وجل في الكون يجري عليها الكون، أن أي شيء مجوف لابد أنه يمتلئ. دي قوانين الطبيعة، الطبيعة يعني التي خلق الله عز وجل عليها، الطبيعة تسير على هذه القوانين، مستحيل تلاقي حاجة جوفاء مش مليانة حاجة إلا بتدخل خارجي.

يعني دلوقتي مثلاً الإزازة اهو، الإزازة اهي جوفاء اهي، نصها مية ونصها فاضي، مش كده؟ لا، نصها مية ونصها هواء، لأن دي قوانين ربنا في الكون، أي حاجة مجوفة لابد أنها يمتلئ، لابد! يبقى دي نصها مية ونصها هواء. طيب، عشان إحنا نخلي حاجة ما فيهاش حاجة، ما فيهاش حاجة دي اللي بنسميها إيه؟ مفرغة، مش كده؟ بنعمل لها عملية إيه؟ تفريغ، بنعمل لها إيه؟ ڤاكيوم، بنسحب منها الهواء، ده كده دي قوانين الطبيعة ولا إحنا بنمشي عكس بقى الطبيعة؟ بنبذل جهداً عشان نعمل ده، حد فاهم ده؟

طيب، فدي القوانين: أن أي شيء خلق مجوفاً هيتملي. طيب، لما يكون شيء بقى خلق مجوفاً وله نوع إدراك، شيء خلق مجوف وله نوع إدراك، فكان هذا الجوف الذي خلق فيه سيكون لإدراكه تدخل في ملء هذا الجوف، يعني إيه؟ وده اللي هنسميه بعد شويه شهوة بقى.

يعني لما لقى آدم مخلوق مجوف، فعرف أن هيبقى في شهوة عنده اسمها شهوة الأكل والشرب، وفي، أو يعني بالقياس، ما هو مجوف فبيأكل ويشرب، بيحتاج لأكل وشرب، فدي شهوة. وبعدين هيبقى بعد كده عند المرأة اللي قلناه من شويه تجويف آخر هيسمى الرحم، فطالما خلق التجويف ده يبقى لازم هي ده خلق ليملا. طب هيملى بأيه؟ ما هو ده هنسميه بعد كده بقى في حاجة اسمها جنين وبتاع ومش عارف إيه، طب عشان ده يحصل هيبقى في عملية اسمها عملية الجماع، طب عشان دي تحصل فيبقى في شهوة اسمها شهوة الوقاع تخلق في هذا الجنس البشري. ليه؟ عشان نملى التجويف. طب ليه نملى أصلاً التجويف؟ عشان في حكمة بقى كده، اللي هو بقاء النسل، يعني مش دي قضيتنا دلوقتي. حد فاهم اللي أنا بقوله يا جماعة؟

فلما إبليس لقى آدم أجوف، قال: ظفرت به خلق لا يتمالك. عرف لوحده، عرف أن الخلق ده هيبقى فيه شهوات، الشهوات دي ليه؟ الشهوات دي وضعت في هذا الجنس، ما هو يا جماعة الشهوة وضعت فينا لحكمة. واحد يقول لك: هو إيه؟ طب ربنا خلق لنا الشهوة ما هي سبب المصائب كلها؟ نقول لك: لا، هي الشهوة وضعت فيك لحكمة، وإلا لو مثلاً نزعت منك شهوات الطعام والشراب، هتموت، مش هتاكل ولا تشرب وهتموت، مش كده؟ طب نزعت منك شهوة الوقاع، هينقطع النسل وينقرض الجنس البشري. وقل مثل ذلك في كل شهوة، حتى الغضب.

حتى الغضب خلق لحكمة. إيه الحكمة؟ أنك تغضب لمحارمك، ما هو لو الغضب ده واحد ما عندوش، ما تخلقش الغضب، عادي جداً يلاقي أبوه بيضرب وهو بيظلم وهو واقف وعرضه بينتهك وهو واقف، ما هو لا، ما عندوش حاجة اسمها غضب، مش موجودة. ولما قام سوق الجهاد، ما هو سوق الجهاد، الجهاد ده كله قائم على إيه أصلاً؟ أنك تغضب لحرمات الله عز وجل، تغضب أن يكفر بالله عز وجل في الأرض، مش كده؟ فقل مثل ذلك في كل شهوة خلقت لحكمة. المشكلة فين في الشهوة؟ أننا نعرف نسيطر على تلك الشهوة، أننا نعرف نحجم تلك الشهوة، أننا نعرف نتحكم في تلك الشهوة، بس دي مشكلتنا مع الشهوة.

طيب، طالما في جوف يبقى أنت محتاج تملى الجوف. وطالما محتاج تملى الجوف يبقى هتخلق فيك شهوات عشان بها تتحرك بإرادتك، عشان كده قلنا إيه؟ لو خلق أجوف له نوع إرادة، تسلط تلك الارادة على ملء ذلك التجويف، فهتخلق فيك شهوة عشان تتحرك بإرادتك لملء هذا الجوف. فهمتوا دي؟ فالأكل والشرب، أو الجوف البعيدة هقوم أنت متحرك بإرادتك لكذا، والرحم هتحرك بإرادتك لملئه. في بقى تجاويف أنت خلاص خلقت فيك مثلاً عملية الشهيق والزفير، أنت بتتنفس، لو تكتب نفسك ما تعرفش، ما تعرفش تعمل ده، طب ده ليه؟ عشان يتخلق لك جوف اسمه الرئة.

فطالما في تجويف هو اتخلق عشان يملى حاجة، إيه الحاجة بقى؟ تعالوا نشوف بعد كده. فهنلاقي تجويف اتخلق عشان يملى هواء، وتجويف اتخلق علشان يملى أكل وشرب، وتجويف اتخلق عشان هيتحط فيه حاجة اسمها جنين، وهكذا. فهمنا دي يا جماعة؟

طيب، وخلقت الملائكة صمداً مالهاش بقى الجوف ده، فلا بتأكل ولا تشرب ولا تواقع، ولذلك تجدها متفرغة بقى للعبادة، إلى آخر صفة الملائكة اللي أنتم عارفينها خلاص. يبقى ده أول معنى: الله الصمد.

طيب، اركنوا على جنب بقى المعنى ده، هنقول معنى تاني وبعدين نشوف المعنى الثالث. العجيب بقى هو إيه؟ هيجمع المعنيين، ويه هنشوف كده بالتدرج. فهمنا المعنى ده؟ الله الصمد، الله الصمد من معاني الصمدية: يعني السيد الذي بلغ النهاية في السؤدد. وقالوا أن الصمد بقى -ركزوا بقى يا جماعة- إنه الصمد الذي بلغ النهاية في كل صفة، ده ده معنى الصمد. يبقى هو نرجع تاني لأحد بقى، أحد في كل صفة، بلغ النهاية في كل صفة. فاهمين دي؟ لا مش فاهمين؟ طيب تعال أقول لك حاجة.

دلوقتي أنت عايش في قرية صغيرة، خلاص، وبينك وبين المركز مسافة ساعتين مثلاً عشان توصل للمركز اللي هو إيه تبع المحافظة دي، ففي القرية دي فيها مثلاً واحد ترزي خياط، بنطلونك اتقطع، هتروح لمين؟ للخياط اللي في القرية، ليه؟ مش لازم يكون هو شاطر خالص، ده مش شاطر وممكن يبوظ الحاجة بس ليه بتروح له؟ هو إيه؟ واحد، فمش شرط إنه يكون واحد أن يكون حاجته يعني مئة في المئة، مش شرط. إنما ممكن يكون واحد وهو البريمو في مصر كلها بقى، يعني هو قدرا كده أن الخياط اللي في قريتك ده هو أحسن خياط في مصر، فهو أحد، أو واحد يعني عفواً، واحد في قريتك ومع ذلك بلغ في مهنته الغاية، خلاص هو ما فيش حد، هو مقفل المهنة. حد فاهم الفرق بين ده وده؟

طيب، فالله عز وجل أحد صمد بلغ في كل صفة الغاية. طيب، أو سيد بلغ الغاية في السؤدد. تعالوا نجمع المعنيين دول يا جماعة. أولاً: صمد يعني لا جوف له، معنى أنه لا جوف له أنه لا يحتاج لغيره. ما هو أنت أصلاً محتاج، أنت ليه بتحتاج أي حاجة أو أي حد عشان تملى جوف، أياً كان بقى هذا الجوف؟ أنا عاوز أقول لكم سعادة العمل كله قائمة على أنك بتملا أجواف، صح ولا لا يا جماعة؟ سواء طعام وشراب، سواء عشان أتتجوز، فكله قائم على ملء أننا بنملا أجوافاً.

الله عز وجل صمد، فهو أولاً لا يحتاج لأحد، لأنه لا يحتاج لشيء صمد سبحانه وتعالى، فهو غير محتاج لغيره. وبعدين مع ذلك بلغ في السؤدد الغاية، سيد، فبلغ في السؤدود الغاية.

يجي بقى المعنى الثالث للصمد، وهو الذي تصمد إليه الخلائق. يعني إيه تصمد إليه؟ يعني تلجأ إليه في حوائجها، فهي تصمد إليه وهو لا يصمد إلى أحد، بل هو المصمود إليه سبحانه وتعالى. يبقى هو مصمود إليه وهو لا يصمد لأحد. ليه لا يصمد لأحد؟ ما هو صمد لا جوف له، وهو سيد بلغ الغاية في السؤدد، فيصمد لمن وليه؟ فهمتوا؟

طب ليه تصمد إليه الخلائق؟ ما هو صمد، أه يعني إيه صمد؟ يعني بلغ في كل صفة الغاية. فأنت شوف أنت كده بتروح تلجا لحد ليه في الدنيا؟ محتاج فلوس، فبتروح لواحد كريم، ما هو صمد بلغ في الكرم الغاية. بتروح لواحد عشان ذو سلطان، أنت مش محتاج فلوس دلوقتي بس محتاج سلطة في أي حاجة بقى، طب ما هو صمد بلغ في السؤدود الغاية. طب بتروح لحد بس عشان محتاج حد يسمعك، فأنت بترتاح لما بتفضفض، ما هو صمد بلغ في سمعه الغاية.

اقعد بقى فكر من هنا لبكرة، أنت ليه بتروح لحد في الدنيا؟ بتحتاج ليه حد في الدنيا؟ وأول ما تلاقيك، ما تلاقي صفة بتحتاجها في المخلوق فبتخليك تروح له، هتلاقيها في الله عز وجل، لكن هتجدها في الله على معنى الصمدية، على معنى الصمدية أنه بلغ فيها الغاية، فلذلك هو صمد تصمد إليه الخلائق في حوائجها. شفتوا الترتيب ده؟

ولذلك يا جماعة في أول واحدة، ماذا قال الله عز وجل: وهو يطعم ولا يطعم، كده. في قراءة: يطعم. حد هنا معاه قراءات؟ ما فيش ولا واحد معاه قراءات ولا مخلصين؟ ما بترفعوش أيديكم. قراءة شاذة، قراءة عكرمة: وهو يطعم ولا يطعم. طبعا القراءة المعروفة: وهو يطعم ولا يطعم، لكن يطعم فيها معنى زائد. أصل هو وهو يطعم ولا يطعم، يعني مش محتاج حد يأكله، ممكن يبقى حاشاه، بتكلم في المعنى اللغوي، ممكن يبقى واحد لا يطعم ليه؟ لأنه هو بياكل نفسه فمش محتاج إيه؟ مش محتاج حد يأكله. القراءة الشاذة: وهو يطعم ولا يطعم، ما يأكلش، أه، ما هو ليه؟ ما هو صمد.

واستدل سبحانه وتعالى بعدم ألوهية عيسى بأنه إيه؟ بياكل. ﴿مَّا الْمَسِيحُ ابْنُ مَرْيَمَ إِلَّا رَسُولٌ قَدْ خَلَتْ مِن قَبْلِهِ الرُّسُلُ وَأُمُّهُ صِدِّيقَةٌ كَانَا يَأْكُلَانِ الطَّعَامَ انظُرْ كَيْفَ نُبَيِّنُ لَهُمُ الْآيَاتِ ثُمَّ انظُرْ أَنَّىٰ يُؤْفَكُونَ﴾ [المائدة: 75]. إيه ده؟ يعني في آية أكبر من كده؟ كانا يأكلان الطعام وأنا صمد، إزاي إله يأكل؟

طب إيه اللي فيها إله يأكل؟ لا ما هو إله يأكل ده يعني يحتاج. وبعض العلماء بقى نظر في أذ الأكل والشرب، كانا يأكلان الطعام، بعض العلماء نظر آخر: أن من لوازم الأكل والشرب إيه؟ الإخراج. فكأن الله عز وجل عن عملية الإخراج بعملية الأكل والشرب، أو أشار إليها بعملية الأكل والشرب، لأن أنتم عارفين الألفاظ التي تدل على عملية الإخراج يعني تستقبح، فقال إيه: كانا يأكلان الطعام، ومن لوازم الإخراج أفذه صفة إله؟ فنفى الله الألوهية عن عيسى بده بأنه يأكل، بأنه أجوف، والله صمد.

والله صمد سبحانه وتعالى، فعش مع اسم الصمد وترى ضعفك وعوزك واحتياجك. وأنت تقرأ: قل هو الله أحد، الله الصمد، في كونك أجوف تتذكر كده أنك أجوف، ومعنى أنك أجوف أنك في غاية العوز وفي غاية الاحتياج، ليه؟ عشان تملى الجوف. ما هو لو الجوف ده لا يملى يبقى خلقه عبث. ليه اتخلق أجوف؟ اتخلق أجوف عشان هتملى الجوف. وترى الله عز وجل في كمال الاستغناء ليه؟ لأنه صمد سبحانه وتعالى. ده المعنى الأول.

المعنى الثاني: تراه في كمال السيادة وغاية السؤدد سبحانه وتعالى. فلما تشوفه كده تروح لغيره ليه؟ ليه هتلاقي إيه عند غيره مش عنده؟ الأثر إراهيم عليه السلام وهو في في المنجنيق كلام لما نسمعه تقول: آه، ما أنا ممكن أقول زيه.

أما اليك فلا، لو مني شكرا مش محتاج، إيه رايكم؟ وبعد جبريل يا جماعه، يعني هو أنا هسألكم سؤال بس هو جبريل يا جماعه -وحاشاه- قاعد في السماء، وبعدين عرف إن إبراهيم في منزل في قلب منزل، ولا جبريل لا يتحرك إلا بأمره سبحانه وتعالى؟ أنتوا فاهمين عاوز أقول إيه؟ يعني كون جبريل نزل من السماء وقال لإبراهيم هذا عليه السلام هو رسول من الله، يعني هو مش أنا قاعد فاضي -حاشاه- وبعدين إيه هروح بقى وأسلم على، مش كده لا، هو لا يفعل شيئاً إلا بإذن.

لكن إيه اليقين اللي عند سيدنا إبراهيم ده عليه السلام، وإيه التوكل اللي عند سيدنا إبراهيم عليه السلام ده؟ إيه ده، أما إليك فلا، مش عاوز منك حاجة أنت، فين ده يا جماعه، فين ده؟

وهذا لم المشرك، النبي عليه الصلاة والسلام نايم ويفتح عينه يلاقي واحد مشرك واقف على راسه بالسيف، من يمنعك مني؟ قال الله. واحد بقى من كان زمان يطرحك في الأرض بسرعة وجري ويلحقوني، مش كده؟ قال الله، فسقط السيف من يده، فأخذ النبي السيف صلى الله عليه وسلم قال: «وأنت من يمنعك مني الآن؟» قال: كن خير آخذ.

الشاهد يا جماعه أين هذا التوكل كله؟ طيب، ليه هؤلاء الأنبياء ومن دونهم من الأولياء والصالحين كان عندهم التوكل ده؟ هم عايشين باسم الصمد. ما هو احنا مش هنقرا قل هو الله أحد في اليوم عشر مرات ولا زيادة ولا أقل، ومش عايشين بالصمد. وكل شوية يا شيخ عاوزين عقيدة، عقيدة إيه يا أبني هو في أكتر من كده، أنت كل يوم بتقرا الصمد دي كام مرة؟ كم مرة نحسبها دلوقتي ولا إيه رايكم؟ شوفوا كام مرة، يعني كتير جداً. العقيدة اللي محتاجة أكتر من كده الله الصمد، بلغ في السؤدد الغاية، سايبه ليه، رايح تسأل غيره ليه؟

فلما كان صمداً لا جوف، ولما كان صمداً بلغ في كل صفة الغاية، كان صمداً سبحانه وتعالى، يصمد إليه، تتوجه إليه بالسؤال دون غيره سبحانه وتعالى.

يعني يا شيخ أنت بتقول إيه دلوقتي يعني ما ناخدش بالأسباب؟ أنا ما قلتش كده، أنت فهمت كده موضوعك. أنا بقول لك خد بالأسباب وقلبك لا يعتمد على الأسباب. هو في بعد إن سيدنا النبي عليه الصلاة والسلام ينزل من على البراق يقوم يعمل إيه؟ يربطه. طب البراق هيجري، بس ده هو جايلك دابة مخصوصة جاية لك من السماء، البراق هيجري، يعني مش هيجري، لكن إمعاناً في الأخذ بالأسباب.

بلاش الموقف ده عشان موقف تاني أوضح بقى، موضوع الأسباب والتوكل دي عشان نفهمها. النبي عليه الصلاة والسلام -صلوا على النبي- عاوز يهاجر، يقوم يعمل إيه بقى؟ كل سبب بيقدر ياخد بيه ياخد بيه، مش كده؟ يخرج بالليل ومتخفي، وبعدين يخرج من الباب اللي ورا، وبعدين يجيب إيه الخريت الماهر اللي هو مش عارف إيه، مش كده؟ وبينام سيدنا علي مكانه، قصص بقى كثيرة كده أنتوا عارفينها.

معنى كده إنه مش متوكل؟ سيد المتوكلين أول ما يوصلوا عند فم الغار، لو طأطأ أحدهم رأسه لرآنا يا أبا بكر، ما ظنك باثنين الله ثالثهما؟ اسكت يا أبا بكر، وفي رواية: اثنان الله ثالثهما. فقضية الأخذ بالأسباب مع كمال التوكل على الله عز وجل ما فيش معارضة. طب احنا ليه بناخد بالأسباب؟ عشان ربنا أمرنا ناخد بالأسباب بس، ولو نزل علينا من السماء ألا نأخذها بالأسباب لما أخذنا بالأسباب عادي جداً وتبقى الأسباب مخلوقة قدام عينينا أهي وشايفينها ومش هناخد بيها ليه، أصل احنا مأمورين ما ناخدش بالأسباب؟ صح يا جماعه ولا لا؟

بل في نوع من ده بتعمله، إن لما يكون السبب محرم هتلاقي نفسك ما بتاخدش بيه، طب ليه؟ ما أصل السبب ده أنا منه فمش، أنت بقى روح خد قرض ربوي أنت حر، روح أنت براحتك، أنا مش هاخد بالسبب ده. كل الناس كده؟ ما هو أنا مش كل الناس، أنا مسلم، وهذا السبب بعينه منهي عنه فأنا مش هاخد بيه، عادي جداً. طب يا أبني هتفتقر؟ ما هو لو كان السبب اللي بيغني كان يبقى القضية زي ما أنت بتقول، بس هو ربنا سبحانه وتعالى، طب افتقرت فعلاً الأصلح لك، عادي جداً يا جماعه بسيطة.

صمد سبحانه وتعالى الله الصمد، ولانه صمد لم يلد. مش احنا عرفنا من شوية إن الأجوف هيبقى فيه تجويف كده، هيبقى فيه الجنين ومش التفاصيل اللي قلناها دي، ما هو الجنين دي هيجي منين؟ ما أي مخلوق زي ما من المخلوقات اللي بنشوفها بتولد ما هو في جوف بيحمل الجنين، سواء بقى جنين بيضة أو مولود أو أياً كان، هو صمد سبحانه وتعالى، فالصمدية دليل على أنه سبحانه وتعالى لم يلد، ودليل على أنه لم يولد.

طب لا، واحدة واحدة يا شيخي، طب الصمدية دليل على أنه لم يولد لأنه صمد فلا جوف لها، طب فين إنه دليل بقى إنه لم يولد؟ هو يا جماعه الإنسان هيخلف إيه؟ أنتوا ساكتين ليه؟ في إنسان، مش كده، أي دابة خروف هيخلف خروف، والبقرة هتجيب بقرة، ويشتركوا كلهم في الصفات الأساسية في المخلوق ده، مش كده؟ طيب، لما الإله يكون صمداً سبحانه وتعالى، إزاي يولد؟ ما هو لو في إله صمد، يعني هو صمد سبحانه وتعالى، والصمد لا جوف له فلا يلد. طب لو كان في إله آخر ما هو هيبقى صمد، حد فاهم دي؟ فيبقى الصمد لا يلد ولا يولد، ما هو يولد إزاي؟ ما هو عشان يولد يبقى يولد من صمد، ما هو التاني صمد لا جوف له، فهمتوا دي؟ ولذلك كان صمداً لم يلد ولم يولد.

لم يلد ولم يولد، هنا لماذا قدم لم يلد؟ العلماء اتكلموا فيها وقالوا عشان هذا، يعني لماذا لم يقل لم يولد ولم يلد مع أن الترتيب الطبيعي كده، مفهومة دي؟ قالوا إنه نسب إليه الولد لكن لم ينسب إليه الأب، يعني ما فيش حد قال إن الله ولد، ولكن في حد قال إن الله اتخذ الولد أو ولد، وفرق بين اتخذ الولد وبين ولد، في فرق بينهم، فلذلك قدم هذا.

خلاص، وقالوا إن ما فيش حد خالص قال إن الله عز وجل إيه ولد، وأنا دورت فما لقيتش اللي أنا هقوله ده، فاللي جاي ده مني، فإن كان صواباً فمن الله وإن كان خطأً فمني، ما لقيتش حد قاله يعني، إن قول الله عز وجل لم يلد ولم يولد فيه تعريض بقول النصارى في المسيح، لأن برده النصارى قالت إن المسيح إله، فالله عز وجل رد عليهم بأن الإله لا يلد ولا يولد، والله أعلم، وإلا يكون القول ولم يقل به أحد ولن يقول به أحد. يبقى لماذا وضع هنا؟ لماذا جاء؟ حد فاهم حاجة؟ فيظهر والله أعلم أنه تعريض بقول النصارى أن المسيح لا يصلح أن يكون إلهاً من الوجهين جميعاً.

فالمسيح عليه السلام لا يصلح أن يكون إلهاً لأنه ولد، والإله لا يولد. لم يلد ولم يولد، طيب لم يلد، يبقى نفي لإيه؟ للمرتبة الأدنى ولا المرتبة الأعلى؟ يعني الولد أقل من الوالد ولا لا، أقل. لم يلد فيبقى هو مالوش شبيه ولا مثيل حتى لو كان أدنى في المنزلة. ولم يولد فيبقى هو مالوش لا شبيه ولا مثيل حتى لو كان أعلى. ويتبقى اللي مثله: ﴿وَلَمْ يَكُن لَّهُ كُفُوًا أَحَدٌ﴾ [الإخلاص: 4] يبقى كده نفي للثلاثة جميعاً: الأدنى والاعلى والمماثل. عشان كده هتلاقوا الثلاثة دول هم اللي في آخر سورة الإسراء: وقل الحمد لله الذي لم يتخذ ولداً -فده الأدنى- ولم يكن له شريك في الملك -ده المساوي- ولم يكن له ولي من الذل -ده الأعلى- ولي من الذل يعني إيه؟ لم يذل فيحتاج إلى من يواليه ويدافع عنه، فده نفي للأعلى للمرتبة الأعلى، فنفى المراتب الثلاثة.

كذلك هنا في سورة الإخلاص: صمد، لم يلد ولم يولد ولم يكن له كفواً أحد. طب يا جماعه هو الخلفْة، الخلفْة علامة كمال ولا نقص؟ يعني دلوقتي راجل بيخلف وراجل ما بيخلفش، من أكمل الاثنين؟ أنا دلوقتي بقول من أكمل، يعني اللي بيخلف ولا ما بيخلفش؟ اللي بيخلف أكمل، مش الاتنين ناقص ولا حاجة، لا هو أكمل. يعني دي يعني ها، حد فاهم؟ مش عارف فيها مشكلة دي اه.

بقى من غير فلسفة بقى، واحد بيخلف وواحد ما بيخلفش، على حسب بقى ما بيخلفش ليه، ما يمكن مش متجوز. في دنيا الناس اللي بيخلف أكمل، مش كده؟ أنتم مبلمين صح ولا لا، ولا أنتم مش يعني التريكة، أنتم عايزين الزيتونة بقى، فين التريكة هنا صح؟ هو أكمل لضعفك أنت. تاني هو ليه أكمل؟ أكمل لضعفك أنت لأنك محتاج للولد، وأنت ده مش، يعني أنت كشخص أنت كجنس بشري فلاحتياجنا وضعفنا الضعف ده ذكره مين؟ إبراهيم، فلما بلغ، ذكره الله عن إبراهيم: ﴿فَلَمَّا بَلَغَ مَعَهُ السَّعْيَ﴾ [الصاَّفات: 102] هنا إشارة إلى إيه؟ أن ده السن اللي الوالد بيرجو فيه إيه بقى؟ نفع الولد. وعشان كده إبراهيم قال له، راح بنى الكعبة لوحده ولا قال له إيه تعال نبني تعال معايا ساعدني نبني الكعبة؟

طب الله عز وجل لو أراد أن يبنيها الكعبة كن فيكون، فهو مش محتاج الولد، ما هيحتاج الولد ليه؟ أي شيء، إنما أمره كعبة إيه بقى ده الكون كله، مش كده؟ ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82] هيحتاج ولد ليه، فهمتوا دي؟ إنما احنا بنحتاج الأولاد ليه؟ أصل بعد شوية هكبر وهضعف وأولادي هيشيلوني. طب اللي أنا بقوله ده ينطبق على الله؟ حاشاه، يبقى هيحتاج الولد ليه؟ يبقى احنا اللي بيولد أو الرجل الذي ينجب أكمل صحيح من الذي لا ينجب ليه؟ لأن ده المناسب لضعف بشريتنا، فصار أكمل في حقنا. أما في حق الله عز وجل لا، هو غير محتاج للولد، فكان الأكمل في حقه أنه لم يلد ولم يولد ولم يكن له كفواً أحد.

الرسالة اللي هنمشي بيها النهارده من الدرس أن احنا نعيش مع اسم الله الأحد واسم الله الصمد على الصفة التي ذكرنا. أقول قولي هذا واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.