أيام تفصيلنا عن شهر ربيع الأول، وفي هذا الشهر اعتاد الناس أن يحتفلوا بمولد النبي صلى الله عليه وسلم. صلوا على النبي. طيب، وإيه؟ واعتاد الناس مع الاحتفال بمولده صلى الله عليه وسلم أن هم يتخانقوا ويقلوا أدبهم على بعض، وده يبدع ده، وده يفسق ده، مش كده؟ وده يفرح النبي، صح عليه الصلاة والسلام، أن احنا نقعد نعمل كده في بعض، مش كده؟
يعني هذا مما اعتاده الناس، وللاسف هذا مما اعتاده حتى الفئة المتدينة. فكان درس اليوم بعنوان: المولد بين مفتون ومحجوب. وعاوزين نبدأ الدرس الأول بطبعاً احنا عندنا فريقين، فريق بيجوز الاحتفال بمولد النبي صلى الله عليه وسلم، وفريق آخر يمنع من ذلك ويراه بدعة. فخلونا قبل طبعاً الدرس زي ما قلنا: المولد بين مفتون ومحجوب، والدرس مش هيبتدي غير يمكن بعد نص ساعة من دلوقتي، فكل اللي هنقوله من دلوقتي لنص ساعة قدام دي مقدمة للدرس خلاص. وهذا الدرس على غير العادة ممكن نفتح فيه باب للنقاش في الآخر.
فعندنا فريقين، فريق بيقول بمشروعية الاحتفال بمولده صلى الله عليه وسلم، وفريق آخر يمنع من ذلك ويراه بدعة. خلونا ننطلق من الاتفاقات بين الفريقين جميعاً. أول حاجة يا جماعة، الفريقان جميعاً اتفقوا في الجملة -في الجملة يعني لن تعدم من خالف هنا أو هناك، لكن في الجملة الفريقان متفقان- على أن الاحتفال بمولد النبي صلى الله عليه وسلم بدعة. الفريقين متفقين على ده، يعني ما فيش حد بينكر إنه بدعة خلاص.
طيب، الفريق الذي يقول بعدم المشروعية واضح إنه بيقول إنه بدعة، لكن يمكن الغريب شوية علينا أن الفريق الآخر الذي يقول بمشروعية الاحتفال بالمولد أن يقول إن الاحتفال بالمولد بدعة، ده غريب شوية. خلونا الأول نذكر بعض النقولات عن هذا الفريق. أول حاجة، الحافظ العراقي -طبعاً برض يعني قبل ما نبتدي- كل قول من القولين دول قال به نبذ من العلماء، عشان بس يعني يبقى كلام واضح، يعني القول بالبدعية قال به علماء كبار، والقول بالمشروعية أيضاً قال به علماء كبار.
فأنا لما أجي أقول لكم، أنتو ممكن الناس تتخض دلوقتي من الأسماء اللي هقولها، ويكتشفوا إيه ده، هم دول بيقولوا بمشروعية الاحتفال بالمولد؟ فممكن الناس تتخض من ده، فأصبروا معي للآخر بقى ماشي عشان نحل الإشكالات. الحافظ العراقي رحمه الله، وهو ممن يرى مشروعية الاحتفال بمولد النبي صلى الله عليه وسلم، يقول: إن اتخاذ الوليمة وإطعام الطعام مستحب في كل وقت، فكيف إذا انضم إلى ذلك الفرح والسرور بظهور نور النبي صلى الله عليه وسلم والصحب في هذا الشهر الشريف يعني شهر ربيع الأول؟ قال: ولا يلزم من كونه بدعة كونه مكروهاً إلى آخر كلامه. هنيجي بقى للكلام بالتفصيل بعد كده، لكن هنا قال، هنا اللي نلاحظه، الحافظ العراقي بيقول على أن الاحتفال بمولد النبي صلى الله عليه وسلم إيه؟ بدعة، وهو ممن يرى مشروعية ذلك.
أبو شامة، أبو شامة يبقى شيخ الإمام النووي، يقول: ومن احسن ما ابتدع في زماننا من هذا القبيل ما كان يفعل بمدينة إربل -جبرها الله تعالى- كل عام في اليوم الموافق ليوم مولد النبي صلى الله عليه وسلم من الصدقات والمعروف وإظهار الزينة والسرور. والامام أبو شامة ممن يرى مشروعية الاحتفال، ومع ذلك قال: ومن احسن ما ابتدع في زماننا، فهو يراه بدعة.
الإمام السيوطي، والسيوطي يرى مشروعية ذلك بل له كتاب في ذلك، يقول: عندي أن اصل عمل المولد الذي هو اجتماع الناس إلى آخر كلامه هو من البدع. إلى آخر كلام، هنيجي برض يعني أنا بقطع على موطن ما ينفعش أقطع عليه على فكرة بس عشان هنجي له بعد شويه، فهو بيقول: وعندي أن اصل عمل المولد الذي هو اجتماع الناس إلى آخر كلامه هو من البدع. والسيوطي يرى المشروعية كذلك. الإمام السخاوي قال: لم يفعله أحد من السلف. السخاوي يرى المشروعية، ومع ذلك يقول: لم يفعله أحد من السلف في القرون الثلاثة، يعني لا الصحابة ولا التابعيون ولا تابعوا التابعين فعلوا ذلك. اهو اعتراف صريح من الطائفة التي ترى المشروعية مشروعية الاحتفال بالمولد: لم يفعله أحد من السلف في القرون الثلاثة، وإنما حدث بعد يعني بعد القرون الثلاثة حدث ذلك.
الإمام ابن عبد الحنفي قال: اعلم أن من البدع المحمودة عمل المولد الشريف من الشهر الذي ولد فيه صلى الله عليه وسلم، إذاً يراه بدعة، وهو ممن يرى المشروعية. ابن حجر، الإمام الحافظ ابن حجر صاحب الفتح، فتح الباري، أيضاً ممن يرى المشروعية. طبعاً أنا هنا مش بقول القول بالمشروعية، خلوا بالكم، أنا ما فيش معنى معناه أن لما أقول اتفق الفريقان على أن المولد بدعة أن أجيب لكم كلام من يرى عدم المشروعية، هم خلاص هم كده بيقولوا إيه، ما هو غير مشروع أصلاً، لكن المفاجأة أن من يقول بالمشروعية يراه بدعة! ده اللي احنا عاوزين نقف عليه شوية ونفهمه. ابن حجر رحمه الله، وهو ممن يرى مشروعية الاحتفال، يقول: اصل عمل المولد بدعة لم تنقل عن أحد من السلف الصالح من القرون الثلاثة.
طيب، يبقى ده أول موطن اتفقوا عليه في الجملة. فده يخلينا نعمل إيه بقى؟ يخلينا ما نردش، أو يعني ما أول ما يدخل بقى ربيع الأول ويبتدي يعني إيه مثل هذه الأمور تظهر، بلاقي الحقيقة شوية يعني كلام منشورات ساذجة الحقيقة، فتلاقي من يرى عدم المشروعية يقوم يجي يقول لك إيه: هل فعله النبي صلى الله عليه وسلم؟ هل فعله الصحابة؟ هل فعله التابعون؟ ويعملوا بقى دلوقتي إيه حاجات صح وغلط. فعله النبي: غلط. فعله الصحابة: غلط. فعله إذاً مش عارف إيه. وكان الناس التانية بتنكر ده! حد فاهم بيقول إيه؟ يعني يا جماعة، من يقول بالمشروعية ما جوش قالوا إيه: لا عملوا النبي عليه الصلاة والسلام، لا عملوا الصحابة. لا، هم ما بيقولوش كده أصلاً، هم ما بيقولوش كده عشان تيجي تحاججهم بهذا، مفهومة دي؟ هم أصلاً هم نفسهم بيقولوا هو بدعة ولم يكن في القرون الفاضلة، لا عملوا الصحابة ولا التابعون ولا تابعوا التابعين.
يبقى ده مش أصل مسالتنا أصلاً، يعني ما هوش أصل مسالة عشان تيجي تثير الدنيا وبجهل وبسذاجه، لأن ما هو المخالف ما هو أنت بتلزم المخالف بإيه؟ ما هو أصلاً بيقول بقولك، فانت بتعمل إيه؟ المشكلة فين هنا يا جماعة؟ المشكلة مش في المسالة، مش في كونها بدعة، لأن هم موافقينك على ده. المسالة في حته تانية خالص، وهو هل نثبت في الشرع بدعة حسنة أو لا نثبت؟ دي المسألة. وهذه بدورها مبنية على أصل تاني بيُدرس في اصول الفقه وهو دلالة الترك. مش وقت أن احنا بقى نفصل في المسائل دي، لكن أنت في الحته الغلط، بس ده اللي أنا عاوز أفهمه لك، أنت في الحته الغلط لما تيجي تقول: هل فعله؟ هل فعله؟ هل فعله؟ وغلط، غلط، غلط.
هي أنا طلعت بنتيجة أن الناس دي ما بتفهمش، وتفاجأت مين بقى اللي ما يفهمش؟ اللي حضرتك مطلعه ما يفهمش، ابن حجر والعراقي والسخاوي والسيوطي! كأن العالم دي، أنت جبت لهم حاجة هم مش عارفينها؟ يعني لو كان ابن حجر عايش يقول لك: جزاك الله خيراً والله، أنت يعني نبهتني أن النبي ما عملهاش ولا! دي مسخرة، دي مسخرة، يعني ده لو وزناه بميزان العلم ما تتققالش غير كده، ده اللفظ المؤدب خلاص.
طيب هل هذا من جمله ما يستدل به القائلون بالمنع؟ نعم، من جملة ذلك، لكن مش بيبيقولوها يعني ما هياش إيه، مش بيطلعوا يقولوها في بوست على الفيسبوك: أنا بقى جايب لكم التايهة! ما بيقولوش كده، ولا لما بيقولوا كده فاكرين أن الخصم حد جاهل ساذج لا علم عنده وأنت اللي جاي تعلمه أن النبي عليه الصلاة والسلام ما عملهاش ولا الصحابة ولا التابعين ولا مش كده، مش كده خلاص.
يبقى دي المسألة الثانية، الطرف التاني بقى اللي هو من يرى المشروعية -يعني احنا قلنا الطرف اللي لا يرى المشروعية: عيب تعمل كده. عيب في حق مين؟ في حق نفسك، لأن اللي فاهم هيشوفك، اللي فاهم طبعاً، اللي مش فاهم هيلايك ويشير، إنما اللي فاهم ويلاقيك كاتب كده يعني هيشوفك صغير جداً، ويعرف أن أنت لا وزن لك في العلم، فانت بهذا أولاً بتعمل إيه؟ بتحترم، قبل ما تكون بتحترم أهل العلم، فانت بتحترم إيه؟ قدرك الذي أنت فيه. فبلاش الإيه البوستات الظريفة دي، واللي هو: هل فعله؟ هل فعله؟ غلط، غلط، غلط. بلاش الكلام إيه.
الفئة الثانية بقى، من يرى المشروعية، مشروعية الاحتفال، ما فيش معنى برده أنك تاتي لتنافح وكأنها السنة، لأن الأئمة الذين قالوا بالمشروعية قالوا: هو بدعة بكل بساطة، قالوا: هو بدعة، لكن نحن نثبت في الشرع بدعة حسنة. وده مش احنا هنا مش جايين نناقش مسألة: هل تثبت البدعة الحسنة ولا لا تثبت في الشرع؟ والأصل الذي بني عليها هو دلالة الترك، وكيف تكلم فيه الأصوليون. اللي عاوز يراجع المسائل دي دي مسائل كبيرة. برده يا جماعة بالمناسبة، المسائل دي ما هياش بجرة قلم ولا أنك تقرا كتاب ولا كتابين، فانت خلاص وقفت على مسألة البدعة الحسنة أو البدعة الإضافية، وقفت على دلالة الترك. مش كده، ده فضلاً بقى عن اللي بيحصل اليومين دول وهذا جناية على العلم، أن احنا يا ريت نلاقي اللي قرأ كتاب وكتابين، يا ريت، احنا دلوقتي خلاص دنا بقى إيه البدعة الحسنة؟ عرفت إيه في؟ يقول لك: أنا قريت بوست أو بوستين، أنا شفت ريل كده واحد بيتكلم على البدعة الحسنة، وخلاص أنا اقتنعت أن ما فيش حاجة اسمها بدعة حسنة في الدين، أو اقتنعت أن في بدعة حسنة في يعني أياً كان يعني.
يا حلاوة! يعني يعني مسألة العلماء بقى إيه حصل بينهم مشاكل وناس بتبدع بعض، وأنت في إيه؟ في ريل خلصت القصة! يعني حرام يعني حرام عليكموا نفسكم، مش كده؟ ده مش علم ولا ده دين خلاص. طب احنا يعني لازم كلنا نبقى علماء؟ لا، مش لازم، بس خلاص أنت عارف أنك مش عالم أقعد بقى على جنب واهدى، وبلاش تدخل في الإيه في العِركة الدائرة أنت ما يعني ما لكش دعوة، اهدى بقى على جنب. وده اللي احنا جايين نقوله أصلاً، يعني احنا قلنا الدرس مش أول نص ساعة أصلاً، يعني احنا بس بنقصُّ الأصول وبعدين نشوف بقى درسنا إيه.
فييبقى الفريق الثاني من يرى المشروعية، بلاش ينافح منافحة أنه بينافح عن السنة، هو مش كده برده، هو مش كده خلاص. هو لا هي مسألة لم يفعلها خير القرون ثم كانت بعدهم -وهنتكلم على كانت بعدهم دي ومين أول من أنشاها وكذا- المهم كانت بعدهم، واستحسنها طائفة من أهل العلم، وقالوا بمشروعيتها، وطائفة أخرى لم تستحسنها، وظل الخلاف قائم بين العلماء، مش عشان أنت تيجي بعد ١٤٠٠ سنة تنافح عنها منافحتك عن السنة! غلط برده خلاص.
فدي أول مسألة اتفقوا عليها. المسألة الثانية التي اتفق عليها الفريقان في الجملة برده، ليه بنقول دايماً في الجملة؟ عشان قلنا لن تعدم مخالفا من هنا، بس في الجملة اتفقوا عليها، اللي هي إيه؟ المسألة الثانية التي اتفقوا عليها أنهم اتفقوا على المنع من المحرمات في هذا الاحتفال.
يعني الطائفة طبعا المانعة من الاحتفال رأساً بتقول لا إيه، لا تحتفل بحاجه محرمة ولا بحاجه أصلها مشروع، خلصنا بر도 من الطائفة دي. الطائفة الأخرى بقى الذين يرون مشروعية الاحتفال، فالقالوا: نحتفل بمولد النبي عليه الصلاة والسلام بأي حاجة، يلا بقى روحوا اعملوا الخيم وهاتوا رقصات ترقص، واضربوا بودرة وحشيش والبلطجية تيجي تنام في الميم عارف إيه، واعملوا سرادقات وأسبوع هنا وأسبوع هنا، يعني نعمل ال... العلماء نصوا على عدم جواز ذلك. تعالوا نشوف ابن حجر وهذا ممن قال بالمشروعية، مشروعية الاحتفال، قال: اصل عمل المولد بدعة لم تنقل عن أحد من السلف الصالح من القرون الثلاثة، ولكنه مع ذلك قد اشتمل على محاسن وضدها، فمن تحرى في عمله المحاسن وتجنب ضدها كان بدعة حسنة وإلا فلا.
أنا بس بنبه على حاجة يا جماعة، احنا هنا مضطرين في الحتة دي أن احنا بننقل كلام من يرى المشروعية، ده مش تقوية لمذهبهم، لا، ما فيش معنى أن احنا نجيب كلام من يرى عدم المشروعية، عدم المشروعية في أن هو بيقول لك ما تعملش الحرام، هو أصلاً بيقول لك ما تعملش المشروع باصل الشرع، اللي هو قراءة شيء من السيرة ولا شيء من القصائد الزهدية ولا شيء، هو بيقول لك ما تعملش حتى ده، احنا حرام عندنا، فما فيش معنى نجيب كلام ليه يعني.
فابن حجر بيقول: ولكنه مع ذلك قد اشتمل يعني الاحتفال بالمولد على محاسن وضدها، فمن تحرى في عمله المحاسن وتجنب ضدها كان بدعة حسنة وإلا فلا. ابن الحاج المالكي و...
ومن جملة ما أحدثوه من البدع مع اعتقادهم أن ذلك من أكبر العبادات وإظهار الشعائر؛ ما يفعلونه في شهر ربيع الأول من المولد، وقد احتوى ذلك على بدع ومحرمات جمة. اهو ده ابن الحاج المالكي الذي يرى المشروعية يقول: احتوى ذلك على بدع ومحرمات جمة؛ فمن ذلك استعمالهم المغاني ومعهم آلات الطرب وغير ذلك مما جعلوه آلة للسماع، ومضوا في ذلك على العوائد الذميمة في كونهم يشتغلون أكثر الأزمنة التي فضلها الله تعالى وعظمها ببدع ومحرمات. ولا شك أن السماع في غير هذه الليلة فيه ما فيه، فكيف به إذا انضم إلى فضيلة هذا الشهر العظيم الذي فضله الله تعالى وفضلنا فيه بهذا النبي الكريم صلى الله عليه وسلم، فآلة الطرب والسماع أي نسبة بينها وبين هذا الشهر الكريم الذي من الله علينا فيه بسيد الأولين والآخرين صلى الله عليه وسلم، وكان يجب أن يزاد فيه من العبادة والخير شكراً للمولى.
هنا واضح أن الحاج المالكي يقول: اللي بيحصل ده كله ما لا يجيزه. ابن الحاج المالكي في موطن آخر يقول: بل ضَمَّ بعضهم إلى ذلك الأمر الخطر -أو ضم بعضهم إلى ذلك الأمر الخطر كده أو كده ماشي- وهو أن يكون المغني شاباً لطيف الصورة، حسن الصوت والكسوة والهيئة، فينشُد التغزل ويتكسر في صوته وحركاته، فيفتن بعض من معه من الرجال والنساء، فتقع الفتنة في الفريقين، ويثور من المفاسد ما لا يحصى، وقد يؤول ذلك في الغالب إلى فساد حال الزوج وحال الزوجة ويحصل الفراق والنكد العاجل وتشتت أمرهم بعد جمعهم، وهذه المفاسد مركبة على فعل المولد. وهذا كلام من يرى جواز أصل الاحتفال بالمولد، واضح الكلام، واضح أن بيحصل في زماننا ما هو أشد من ذلك.
من الأمور برضه اللي عاوزين ننبه عليها هنا، طبعا الإمام الفاكهاني، وهو إمام صوفي أشعري مالكي، والحقيقة هذا مهم جداً معانا، وهنجي له كمان شوية وهنعرف ليه مهم معانا، لكن خلونا نقرا كلامه كده، أو يعني خلاص يعني أظن الأصل الثاني ثبت وواضح الكلام فيه. من الأمور بقى اللي برضه لازم ننتبه لها أنه بعض الناس بيبقى عاوز يعني يسيس تلك القضية أو يحذبها، يعني يجعل إيه أن مثلاً من يقول بالمشروعية هم الفئة الفلانية، فأي حد هيقول بالمشروعية يبقى هو من الفئة الفلانية، وأي حد يقول بعدم المشروعية يبقى هو ضد الفئة الفلانية، وبرضه الأمر مش كده، يعني برضه لو هدينا وشوفنا كلام أهل العلم هنلاقي مثلاً من الصوفية من يرى عدم المشروعية، وهذا برضه كلام قد يكون غريباً على البعض، ماشي، الإمام الفاكهاني -وقلنا ده صوفي أشعري مالكي خلاص- هو طبعا كان ليه كلام في حته أن هو إيه بينكر البدع الحديثة في المولد، لكن هو بقى فتواه أصلاً حرمة الاحتفال بالمولد بأي صورة، حتى لو كانت صورة مشروعة في الأصل، وهو صوفي، ولذلك فتوى هذا الإمام مهمة في هذا الموطن؛ بيقول: لا أعلم لهذا المولد أصلاً في كتاب ولا سنة، ولا ينقل عمله عن أحد من علماء الأمة الذين هم القدوة في الدين، المتمسكون بآثار المتقدمين، بل هو بدعة أحدثها البطالون وشهوة نفس اعتنى بها الأكالون -أو اغتنى بها في نسخ، وفي نسخ اعتنى- بدليل أن إذا أدرنا عليه الأحكام الخسة، إيه الأحكام الخسة؟ أحكام تكليفية، يعني لو قدرنا على الاحتفال بالمولد الأحكام الخسة تلك البدعة، الأحكام الخسة يعني هو واجب ولا هو لازم ياخد حكم من الخسة بلا شك، أما أن يكون واجباً أو مندوباً أو مباحاً أو مكروهاً أو محرماً.
وبعدين قال كلام كتير، ثم تابع بقى قال: وحينئذ يكون الكلام فيه في فصلين والتفرقه بين حالين؛ أحدهما: الحالة الأولى أن يعمله رجل من عين ماله لأهله وأصحابه وعياله، لا يجاوزون في ذلك الاجتماع على أكل الطعام ولا يقترفون شيئاً من الآثام، متوقعين هيقول إيه بقى؟ ده إيه؟ حلو يعني. قال: فهذا الذي وصفناه بأنه بدعة مكروهة وشناعة. وهو صوفي ومع ذلك لا يرى الاحتفال بالمولد حتى بهذه الأمور، وعلى فكرة هذه الأمور بعينها التي ذكرها هي التي يجوزها من يجوز الاحتفال. حد فاهم حاجة؟ يعني من جوز الاحتفال بالمولد بمولود النبي صلى الله عليه وسلم، ابن حجر وغيره بقى والسيوطي وزي ما قلنا والحافظ العراقي والحافظ السخاوي وغيرهم، يقولوا: طب نعمل ايه؟ قال لك: لو هنجتمع على طعام أو توزع طعام، أو تقرأ شيئاً من سيرة النبي صلى الله عليه وسلم، أو شيئاً من الانشاد الذي يحركه القلوب، هذه الأمور التي أجازوها في مثل هذا هنا الفكهاني يرى ذلك بدعة مكروهة وشنيعة أو وشنعاء كما قال.
خلاص يقول: فهذا الذي وصفناه بأنه بدعة مكروهة وشناعة، إذ لم يفعله أحد من متقدمي أهل الطاعة الذين هم فقهاء الإسلام وعلماء الأنام سرج الأزمنة وزين الأمكنة. وبعدين ذكر الصورة الثانية التي هي بقى بيحصل فيها إيه المخالفات، كلام كتير، ورا قائل: لا سيما أن انضاف إلى ذلك شيء من الغناء مع البطون الملا ملآنة بآلات الباطل من الدفوف -خلي بالكم من الدفوف ها، ذكر الدفوف- والشبابات واجتماع الرجال مع الشباب المرد والنساء الفاتنات؛ إما مختلطات بهم أو مشرفات -يعني من الشرف- والرقص بالتثني والإنعطاف والاستغراق في اللهو ونسيان يوم المخاف، وكذا النساء إذا اجتمعن على انفرادهن رافعات أصواتهن بالتهنيك والتطريب في الإنشاد والخروج في التلاوة والذكر عن المشروع والامر المعتاد، غافلات عن قول الله تعالى: ﴿إِنَّ رَبَّكَ لَبِالْمِرْصَادِ﴾ [الفجر: 14]. وهذا الذي لا يختلف في تحريمه اثنان ولا يستحسنه ذو المروءة الفتيان، هذا كل كلام رجل صوفي.
خلاص، يبقى مش كل الصوفية على القول بالمشروعية، خلاص. كذلك من الصوفية المحدثين، ومنهم شيوخ من شيوخ الأزهر، منهم شيوخ ممن ولي مشيخة الأزهر، من رأى المنع من ذلك على الصفة التي تجري عليها الاحتفالات اليوم، خلاص، كشيخ محمود شلتوت وغيره يرى المنع من ذلك على ليه؟ لأنه خلاص احنا بقى واضح أنه مع الاحتفال بيحصل كذا وكذا وكذا وكذا. طبعا وهنا الجهة منفكة نعم، لكن ده من باب سد الذرائع ومن باب النظر إلى المآلات، يعني خلاص إذا أبحينا ذلك حدث كذا وكذا وكذا وكذا، خلاص.
طيب ده برضه لا يعنينا، احنا مش جايين نقوي مذهب على مذهب دلوقتي ولا خالص، ولا ده درسنا أصلاً، احنا ده كله بنحاول نفك شوية حاجات جوه الناس علشان يبقى الموضوع متشاف زي ما أهل العلم بيشوفوه بس. فالمسألة حصل فيها الخلاف بين العلماء القدامى؟ اه حصل فيها الخلاف، أسماء كبيرة هنا وأسماء كبيرة هنا؟ اه أسماء كبيرة هنا وأسماء كبيرة هنا. أنا بلم الشواهد اللي فاتوا، كل الأسماء دي عارفين إنه بدعة، مش مستنيين حضرتك تيجي تكتب على الفيسبوك بعد 1400 سنة إنه بدعة، مش مستنينها منك يعني، وكل الأسماء الكبيرة دي أتقى لله مني ومنك، فما حدش بيجوز الصورة الحادثة دلوقتي.
خلاص، وكل العلماء دول ودي برضه حاجة كويس احرص مني ومنك على السنة، سواء دول ولا دول، تاني، احرص مني ومنك على السنة، ولكن اختلفت الأنظار، وهذا قدر الله عز وجل أن يكون هذا الخلاف واقعاً، ده قدر ربنا سبحانه وتعالى اختلفت أنظارهم في مسألة إثبات البدعة، في البدعة الإضافية بدعة حسنة أو لا، وبعدين بناءً على اختلافهم في مسألة إيه دلالة الترك. هنا في مسألة مهمة جداً أنا مش هدخل في البدعة الحسنة لأن هي مسألة كبيرة وما ينفعش نذكرها الآن، يعني محتاجة مجلس لوحده ومش مجلس زي ده بقى، لكن اللي ينشط لده سواء بقى من اللي قاعدين أو اللي هيسمع الدرس بعد كده عاوز أقول لكم مسألة كده صغيرة وهي مهمة ومحتاجة يبقى فيها بحث، وأنا لم أقف على بحث في هذه المسألة بعينها، فالله أعلم يكون حد بحثها، مسألة البدعة الحسنة بين التنظير والتطبيق.
وليه بقول الكلام ده؟ عشان ده بيحدث إشكالاً. الأول إيه الكلام ده؟ يعني هتلاقوا يا جماعة من الأئمة من ينسف فكرة وجود البدعة الحسنة في الدين، خلاص، وما فيش حاجة اسمها كده، منهم شيخ الإسلام ابن تيمية وفي تطبيقاته يقع في هذا النوع. والعكس، منهم من يثبت البدعة الحسنة زي الفاكهاني، وفي تطبيقاته يحضر شيئا من هذا النوع. حد فاهم أنا بقول إيه؟ مفهومة دي ها، يعني البدع في بدعة حسنة وما فيش بدعة حسنة، يجي واحد يقول لك ما فيش بدعة حسنة، وبعدين ناخد مثال واحد هنا ومثال واحد هنا عشان نبقى خلصنا الحته دي محتاجة بحث، يعني لو حد بقى ينشط لبحث فكرة البدعة الحسنة بين التنظير والتطبيق؛ نجيب أمثلة لمن يقول بالبدعة الحسنة وبعدين في بعض التطبيقات يحظر أشياء، أو من يقول بما إن ما فيش بدعة حسنة وفي بعض التطبيقات نلاقيه راح للنوع ده عمله أو يجوزه. وكان المسألة محتاجة شوية بحث، وكان العلماء برضه عندهم الحته دي إما يكون فيها نوع من السعة في بعض المسائل أو فيها نظر آخر ينضاف إليها، يعني فيها بحث الحته دي الحقيقة.
فابن تيمية مثلاً لا يرى البدعة الحسنة أو لا يقول بها، ومع ذلك عادي جداً بين سنة الفجر وصلاة الفجر يقول: يا حي يا قيوم لا إله إلا أنت برحمتك أستغيث أربعين مرة، يواظب عليها ويدعو الناس إليها، ويقول: من واظب على هذا الذكر أحيا الله قلبه ولم يمت قلبه. طب دي منين دي؟ جابها منين؟ يلا بقى ندخل نكتب على الفيسبوك هل فعلها النبي؟
هنا يبقى التنظير في باب التنظير واضح جداً؛ تيمية ممن لا يقول بالبدعة الحسنة، وفي باب التطبيق ممكن تلاقي بعض التطبيقات عند ابن تيمية تدخل في هذا النوع. الناحية الثانية الفاكهاني؛ هو صوفي ويقول بذلك، يقول بوجود البدعة الحسنة في الجمله يعني، ومع ذلك في التطبيقات يجي على المولد يقول لك لا، ولا حتى بالصورة اللي فيها الحاجات المشروعة، ولا بالصورة اللي فيها الحاجات المشروعة. خلاص، فالمسألة دي محتاجة برضه لمن يبحثها، هيبحثها بهدوء وبإنصاف، احنا للأسف خلق الإنصاف كاد أن يندثر للأسف، احنا دلوقتي عاوزين إيه؟ كل واحد عاوز ياخد بونت على الثاني وخلاص، واللي صوته أعلى، واللي بيعرف يقل أدبه أكثر، واللي عنده فالورز أكثر، ده لا هو دين دين ولا هو علم يعني. لا في ميزان العلم الصوت العالي بيزن شيء، ولا في ميزان الدين، ولا في ميزان العلم اللي عنده فالورز أكثر يبقى هو الأعلم ولا في ميزان الدين، ما ولا حاجة اللي بيحصل ده ولا حاجة.
محتاجين الطرفين نكون أهدى من ذلك ونريد وجه الله عز وجل، ولو فعلاً صدقنا في هذه الإرادة الموضوع ده هيخف ده وغيره ده وغيره. ده احنا دلوقتي الخلاف الفقهي بقى مش هقول يعني احنا دلوقتي يعني الناس العلماء يرون ذلك يا اما يعني شيء مشروع واما شيء بدعة منكر حرام، ده في المسائل الفقهية الناس تتقاطع وتقل الأدب ومسائل فقهية وده دين! ولو بعث النبي صلى الله عليه وسلم الآن يحب أن يرى ذلك في أمته إيه؟ يا عم ما أنت ترى مشروعيات الاحتفال وراجل دين وعندك دين وفاهم أنك مش تعمل الحاجات اللي تغضب النبي عليه الصلاه والسلام في هذا اليوم، مقلداً غيرك من العلماء، اعمل ده وخلاص اقعد. والتاني يرى ذلك بدعة، ما تعملوش واقعد وانتهينا، والموضوع يعدي وخلصت؟ لا، إزاي، إزاي؟ لازم دول يبدعوا دول، ودول يقولوا على دول أجلاف ما بيحبوش النبي عليه الصلاه والسلام. ما احنا ما صليناش على النبي ليه حق، ونطلع من الموسم ككل موسم محملين بالأوزار، ككل موسم. هاتوا لي كده موسم ما بنطلعش مقطعين بعض، سواء على حسب بقى مين اللي هيعمل الحفلة، يعني على حسب الموسم بقى، ونطلع مقطعين بعض ومغتابين بعض ومحتقرين بعض، وحاجة في منتهى يعني، طب هذا يرضي النبي عليه الصلاه والسلام؟ قطعا لا، لا يرضي النبي صلى الله عليه وسلم.
طيب مسألة ثانية، لسه الدرس ما ابتدش، أول من أحدث هذا المولد، وليه بذكر المسألة دي؟ لأني من جملة ما يذكر في هذا الموسم أن تلاقي الفئة التي تمنع من الاحتفال فالك إيه، أصل ده أول من أنشاه أو من ابتدعه الفاطميون العبيليون ومش عارف إيه، ودول يسيسوا المسألة ويقول لك: آه، شفت بقى عشان أنتم أصل أنتم ما تفهموش يا صوفية، ده الشيعة هم اللي عملوا كده عشان يعملوا فينا ويسووا، وأنتم ناس طيبة ساذجة فصدقتوهم ومش عارف إيه. بيحصل ولا ما بيحصلش الكلام ده؟ وكأن هذه الأسماء التي ذكرتها ناس دراويش؛ يعني ابن حجر والعراقي والسيوطي والسخاوي والناس دي إيه ناس ساذجة دراويش، الشيعة يحدثوا ودول إيه ورا الشيعة؟ وهذا عجيب أن تظن ذلك في علماء يا جماعة. احنا اتعلمنا السنة من مين؟ مش من ابن حجر؟ أنت لما بتيجي تفهم سنة بتروح تقرا لمين؟ لابن حجر، تقوم فاتح فتح الباري عشان تفهم سنة، عشان تفهم سنة. فتيجي النهارده تقول كلاماً لازمه أنت ما تقولش ده طبعا، أنت ما حدش بيقول ابن حجر ده، لكن لازم كلامك هذا.
هل فعلا أول من أحدث هذا هم الفاطميون؟ الظاهر أنه لا. هو مين أصلاً قال ده؟ أنا ما أعرفش حد قال ده من الآخر كده يعني، هذا القول انتشر في المحدثين.
بَنَوْا على إيه؟ على قول للمقريزي، وده مؤرخ في المائة الثامنة. المقريزي لفظه.. تعالوا نقرأ كده لفظ المقريزي عشان ده مهم جداً، قال إيه؟ وكان للخلفاء الفاطميين في طول السنة أعياد ومواسم؛ موسم رأس السنة، وموست أول العام، ويوم عاشوراء، ومولد النبي صلى الله عليه وسلم. ركزتوا في ده؟ هل المقريزي قال إن الفاطميين أول من أحدث كذا؟ المقريزي يحكي ما رآه في المائة الكام؟ الثامنة.
طيب، تعالوا بقى نرجع كده للسيوطي، قال كلام السيوطي، والسيوطي خاتمة الحفاظ كما يقولون: أول من أحدث فعل المولد بالمواظبة عليه صاحب إربل الملك المظفر أبو سعيد كوكبوري، أحد الملوك الأمجاد، الكبراء الأجواد، وكان يعمل المولد الشريف في ربيع الأول ويحتفل به احتفالاً هائلاً، وكان شهماً شجاعاً بطلاً عاقلاً عالماً عادلاً رحمه الله وأجزل مثوبته.
ده نص من الإام السيوطي في أن أول من أحدث هذا العمل مش الفاطميون. طب الراجل ده بقى ما يمكن يطلع في الآخر شيعي؟ طب تعالوا كده الإمام الذهبي بيقول عنه -طبعا هو طبعا يكفي يعني السيوطي كلام السيوطي عنه- الإمام الذهبي ماذا يقول عنه في السير؟ قال: وكان ملكاً عظيماً شجاعاً بطلاً عاقلاً عالماً عادلاً رحمه الله أجزل مثوبته، وكان متواضعاً خيراً سنياً. هذا كلام الذهبي عن هذا الملك المظفر ومن هزم في حرب إلى آخره خلاص، وكان طبعا له صدقات ذكرها الذهبي اللي عاوز يراجع عن إيه سيرة الملك.
فده نص للإمام السيوطي في من في أول من أحدث هذا العمل. أبو شامة شيخ الإمام النووي قال: وكان أول من فعل ذلك بالموصل الشيخ عمر بن محمد الملا أو الملاء، أحد الصالحين المشهورين، وبه اقتدى في ذلك صاحب إربل. يعني كان المسألة هنا على درجتين؛ درجة شيخ زاهد وكان يلزم زاويته، هذا شيخ ما يخرجش وربما زاره الأمراء، فهو أول من أحدث ذلك في زاويته، وعنه أخذ ذلك ملك إربل. دي يا جميل يا جماعة نصوص واضحة للعلماء في أول من أحدث اهو.
فأنا برضه فكرة إحنا نغفل هذه النصوص الظاهرة في أن أول من أحدث ذلك هم هؤلاء، ونروح لنص يحتمل أمرين، بل هو أظهر في أنه ما هواش أول من أحدث الفاطميون! عجيب الحقيقة. وانا من عجيب ما رأيت والله يا جماعة وأنا يعني بإحسان الظن في إخواني أقول إنه إيه يعني من باب عدم الاطلاع وقلة العلم، أن بعض إخواننا لما جه يؤصل لمسألة البدعية.. خلوا بالكم أنا أنا شخصياً يعني أرى عدم الجواز -عشان بس إيه أنا عمال أجيب ال..- أنا أرى عدم الجواز خصوصاً في هذه الآونة بما يظهر وقلة الديانة وقلة العلم وقلة ال.. خلاص، إنما لا أنكر يعني واحد عنده علم وعنده تقوى وعنده صلاح وجا في اليوم ده عمل أي صورة من الصور تلك التي وقال: أنا مقلد! ما هو يا جماعة يعني ما احتربناش الجميع يعني، لكن واحد يجي يقول لك إق: اصل ده بدعة ليه؟ اصل الشيخ فلان بقى من الأسماء المحدثة اللي الناس بيه شيوخ أفاضل، أنا شيخ فلان قال البدعة، فراح يقول لك: طب خلاص جزاك الله خيراً أنت مقلد فلان وأنا مقلد ابن حجر والسخاوي والعراقي والسيوطي وأبي شامة وغيرهم. ابن كثير له كلام بس اختلفوا في كلام ابن كثير يعني يحتمل إنه موافق أو مش موافق، فيعني فقال لك: أنا مقلد دول. هتقول له إيه يعني؟ هترد عليه تقول له إيه؟ خلاص هو مقلد دول ونوقف المسألة على كده وحبايب؟ الراجل راح عمل إيه ولا حاجة، راح جاب ناس عذبهم على أكل احتفالاً بمولده صلى الله عليه وسلم، قعد قرأ شيئاً من السيرة، قعد مش عارف إيه خلاص. طب تيجي تقول لي انت: أنا اعمل كده؟ أقول لك: لا، ما تعملش كده اهو، لكن أقول لك: لا تنكر على من يفعل ذلك، ده مش موطن إنكار.
طيب، بي- إحنا كنا فين بقى؟ آه، يبقى دي نصوص واضحة، آه، كنت بقول لكم إن بعض إخواننا لما جه يوصل لتلك المسألة وأن هي بدعة راح عامل إيه بقى؟ قال لك: اهو الإمام السخاوي، وراح كلام السخاوي في كونها بدعة ووقف على إنه قال بدعة. السخاوي نفسه يرى الإيه؟ يرى جواز الفعل! قطع كلام السخاوي هذا رأيته بعيني. طب ليه ب.. يعني ليه بن.. إحنا بنبحث عن الدين ولا بنبحث عن نصر الفئة بتاعتنا ولا حزبنا ولا جماعتنا ولا إحنا بنبحث عن إيه بالظبط؟ ما إحنا لو بنشوف دين ربنا فإحنا هنجيب اللي لينا واللي علينا، إنما نجي نقطع كلام في نصّه؟ وبقول لكم بإحسان الظن بإحسان الظن أن هو مثلاً سيرش على النت وجاب الكلمتين حطهم يعني، إنما لو وقف على كلام السخاوي فاقتطع منه ما يوافق مذهبه وأغفل الباقي.
أنا إيه اللي فكرني بيه بقى؟ أن نفس المقال هذا المقال، أو يعني هذا الشخص وهو بيستدل، فكان بيتكلم على مسألة أول من أحدث، فلقيته ذكر مسألة إربل الملك المظفر وقائد إربل، فقلت كويس هو عارف الموضوع، قال لك: أول واحد الفاطميون، والمقريزي قال كذا كذا وراح جايب كلام أنا اغفلته هنا -لانه ما هواش ظاهر قوي في مسألة إربل- أظن لابن الحاج المالكي أظن والله أعلم إنه برضه ما ذكرش إن هو أول من أحدث هو ملك إربل، يعني ذكر كلام شبه كلام المقريزي بالضبط، إنه كان بيفعله وكذا وكذا، وراح يقول لك إيه: وغاية هذا أنه كان بيعمله بس ما حدش قال إنه أول من فعل. مع أن نفس كلامه ده موجود في كلام مين؟ المقريزي برضه، هو ما قالش إنه أول! ومع أن السيوطي نص على إنه الأول، وأبو شامة نص على إنه الأول، ما جابش لا نص السيوطي ولا نص أبي شامة. طب ليه بتعمل كده؟ ليه بنعمل كده؟ وده دين؟
نبتدي الدرس بقى. كل اللي فات ده بقى هو فرشة للدرس. الدرس: المولد بين مفتون ومحجوب. اللي بيحصل إيه بقى؟ أن بيجي يدخل الموسم؛ شهر ربيع الأول ويبتدي من يرى الجواز يبتدئ ينشر، بالذات بقى إيه بعد المنصات اللي موجودة، الفيسبوك وغيره، ينشر إيه؟ حاجات تخص النبي صلى الله عليه وسلم، يعني شيئاً من شمائله، شيئاً من سيرته، شيئاً يبتدي يكثر ذكر النبي صلى الله عليه وسلم في هذه ال.. ده كده الوقت خلاص، ام.. يكثر ذكر النبي صلى الله عليه وسلم في في هذا الوقت. وبعدين ينقسم الناس إلى فئات، إحنا عاوزين نوجه خطبنا إلى فئتين: فئة المفتونين، وفئة المحرومين أو المحجوبين.
من هو المفتون؟ المفتون الذي مع دخول ذلك الموسم يقع في تلك المحرمات التي ذكرنا اتفاق العلماء في الجمله على أنها محرمة، أو يهون من منها، أو يغض الطرف عنها نصْرَةً لطائفته. والثلاثة دول واقعين في الفتنه. فهمتوا أنا بقول إيه؟ يعني واحد أنا عندي لازمه معلش يا جماعة عشان في ناس بتزعل لما أقول فهمتوا، أنا ما بقصدش إن يعني إيه إن أنا ببقى هي لازمة عندي ما أقصدهاش فما حدش يزعل يعني. فهمتوا؟ ما حدش.. إنا كنا بقول إيه بقى؟ المفتون، من هو المفتون في هذا الموسم؟ من يقع في تلك المحرمات؛ يروح يرقص مع اللي بيرقص، ويشرب مع اللي بيشرب، ويذكر مع اللي بيسكر، ويزني مع اللي بيزني.. الحاجات دي بتحصل ها؟ عشان بس الحاجات دي بتحصل، فمقل ومستكثر. وبعدين إخواننا الصوفية ده ما هواش مجال الكلام عن الجذب وانه وقعوا في ذلك وهم مش عارف إيه، أنتم عارفين كويس جداً أن دي عيال نصابة، ما كان يقبل في الأئمة القدامى، وده تكلم عنه شيخ الإسلام وغيره، أن آه ممكن يصل لمرحلة إنه يبقى مش عارف بيعمل إيه -يعني من كتر السماع أو من كتر كذا- يفقد السيطرة على نفسه فيتمايل أو يعني حاجات ذكروها، أو يوصل لمرحلة الجذب أو كدة، أنتم عارفين كويس أن دول مش كدة، فما تجيش تكلمني عن إيه بقى عن الجذب والفناء والمقامات الإيه التي ذكرها العلماء ووقع فيها بعض العلماء فعلاً، إحنا ما بننكرهاش، بس بننكر أن يكون حال هؤلاء هو ذلك، لا، فمش وقته يعني ولا إيه؟ يعني زي ما إحنا بنقول دول ما هو يا جماعة دول ما هماش ناس ساذجة وعيب، فإحنا برضه مش إيه مش ساذجين عشان تقول لي ده الجذب والمش عارف إيه.
فمفتون، اللي بيقع في مثل ذلك مفتون ليه؟ لأنه لو بعث النبي صلى الله عليه وسلم قطعا يكره ذلك منك، يعني النبي عليه الصلاة والسلام يدخل بترقص وبتبغني وستات على رجالة وخيم فيها حشيش وبودره وتقول لي المولد؟ النبي عليه الصلاة والسلام صلى الله عليه وسلم يرضيه ذلك؟ فده أول حاجة. في واحد تاني ما بيعملوش لكن بيهون من أمره. أنا نطيت شوية اللي هو إيه بقى؟ زي ما بقول لك كده يقول لك إق: الجذب ومش عارف السماع فيه خلاف، خلوا بالكم بقى، هيجيب لك كل حاجة لوحدها فيها خلاف ويلفق، يعني إيه يلفق؟ يعني يقول لك: السماع فيه خلاف، والاختلاط مش عارف إيه، ويجيب لك قول صورة تلفيقية لم يقل بها أحد من أهل العلم! يعني لو بُعِث من قال بجواز السماع ورأى ذلك السماع مع ذلك الاختلاط مع ذلك المش عارف القرف، كل ده يقول لك: أنا لا أجوز تلك الصورة! خلاص، مسألة معروفة يعني مسألة تلفيق في الشرع. فيهون من هذا الأمر، خلوا بالكم يعني اللي بيهون ده بيطلع يتكلم يهون من هذا الأمر، يعني بيطلع يتكلم.
وفئة ثالثة هي أيضاً مفتونة، وهو من يغض الطرف، لا هو بيعمل، هو عارف إن ده غلط، فلا بيعمل ولا بيهون، لكن يعمل إيه؟ ساكت. طب يا فلان قل كلمة حق، مع أن في أقل من كدة بكثير لو من غير طائفتك هتقوم الدنيا مش هتقعدها، لكن هنا يغض الطرف وما يفتحش بقه ليه؟ عشان طائفته! فما يتكلمش. فكل تلك الفئات فئات وقعت في الفتنة المولد بين مفتون ومحجوب. لا، في كلمة هنا تقولاها لله، زي ما أسلافك قالوه، يعني زي ما ابن حجر قال: أما ما نراه من كذا وكذا وكذا فحرام. فين دي عندك؟ فين؟ ولو أنت في مكان مسؤول في الدولة، يعني في وزارة الأوقاف ولا في مشيخة الأزهر ولا كذا، فين منعك لذلك؟ فين؟ دول أسلافك منعوا ذلك.
فدي الفئة المفتونة، وفئة محجوبة، مين بقى الفئة المحجوبة؟ اللي في هذا الموسم زي ما قلنا بيذكر النبي صلى الله عليه وسلم بشيء من شمائله، بشيء من سيرته، بشيء من القصائد الزهدية التي إيعني تتكلم عنه عن أحواله المشرفة صلى الله عليه وسلم، فتلاقي كل همك إيه؟ إنكار البدع! قلبك حجر، لا لان لكلمة، ولا لان لبيت شعر أتقال، ولا تأثر بشيء من شمائله ولا شيء من سيرته صلى الله عليه وسلم! وهذا حجب بلا شك، بلا شك أن تطلع من الموسم ده كله لم تحب النبي صلى الله عليه وسلم حُبّاً زائداً لكثرة سماع اسمه حتى يا أخي صلى الله عليه وسلم! هذا نوع حجب بلا شك.
الأول يا جماعة، تعالوا قبل.. إحنا طبعا الطائفة دي هنقف مع شوية عشان إيه يعني هي الطائفة اللي موجودة أظن يعني، هي ما أقصدش المحجوبة يعني أقصد يعني غالب اللي موجود اللي هو بيقول بعدم المشروعية. أحوال السلف إيه مع ذكر النبي عليه الصلاة والسلام؟ كان مالك إذا ذكر النبي صلى الله عليه وسلم يتغير لونه، وينحني حتى يصعب ذلك على جلسائه، فقيل له يوماً في ذلك، فقال: لو رايتم ما رأيت لما أنكرتم علي ما ترون. لقد كنت أرى محمد بن المنكدر، وكان سيد القراء لا نكاد نسأله عن حديث أبداً إلا يبكي حتى نرحمه. ولقد كنت أرى جعفر بن محمد، وكان كثير الدعابة والتبسم، فإذا ذكر عنده النبي صلى الله عليه وسلم اصفر لونه، وما رايته يحدث عن رسول الله صلى الله عليه وسلم إلا على طهاره. ولقد كان عبد الرحمن بن القاسم يذكر النبي صلى الله عليه وسلم فينظر إلى لونه كأنه نزف منه الدم وقد جف لسانه في فمه هيبة لرسول الله صلى الله عليه وسلم. ولقد كنت آتي عامر بن عبد الله بن الزبير، فإذا ذكر عنده النبي صلى الله عليه وسلم بكى حتى لا يبقى في عينيه دموع. ولقد رايت الزهري، وكان من أهنأ الناس وأقربهم، فإذا ذكر عنده النبي صلى الله عليه وسلم فكانه ما عرفك ولا عرفته. ولقد كنت آتي صفوان بن سليم، وكان من المتعبدين المجتهدين، فإذا ذكر النبي صلى الله عليه وسلم بكى، فلا يزال يبكي حتى يقوم الناس عنه ويترُكوه. وقال: رأيت أيوب السختياني بمكة حجتين فما كتبت عنه، ورأيته في الثالثة قاعداً في فناء زمزم، فكان إذا ذكر النبي صلى الله عليه وسلم عنده يبكي حتى أرحمه.
الإمام مالك أيضاً لما أهدي إليه خيل وبغال وكانت جيدة حسنة، فالإمام الشافعي راها فقال: ما أحسن هيئتها، جميلة نفيسة خيل أصيلة وبغال جميلة ما أحسنها! فقال: هي هبة مني لك خذها من أولها لآخرها. الإمام مالك أهدى الإمام الشافعي كل ما أهدي إليه، فقال: اترك بغلة منها لتركبها، أسيب لك بغلة.. بص بقى الإمام مالك قال إيه؟ قال: إني أستحي أن أطأ تربة النبي صلى الله عليه وسلم بحافر دابة! الإمام مالك كان يسكن إيه؟ دار..
إمام دار الهجرة كان يسكن المدينة، فيقول: إني لأستحي أن أطأ تربة النبي صلى الله عليه وسلم بحافر دابة. انظروا، خذوا هذا المثال لمن سيعمل بحثاً ممن سيسمعنا بعد ذلك؛ هذه أيضاً ممكن أن تأتي في مسألة البدعة الحسنة، بين التنظير والتطبيق؛ ها هو أمر لم يفعله الصحابة مع وجود المقتضي وانتفاء المانع، فهم دائماً يقولون: "لم يفعله الصحابة"، إذن لم يفعله الصحابة ولا التابعون، ألا يتركوا ركوب الدواب في المدينة؟ وتركها مالك، أليس كذلك؟ هذه أيضاً ممكن أن تكون شيئاً يُؤخذ على جنب.
تقول: أيها الشيخ، ما هو المفروض لما نسمع اسم النبي عليه الصلاة والسلام فعلاً نتأثر وكذا، بس هو الذي يمنعنا من التأثر البدعة. أقول لك بذمتك، أنت لما بتسمع ذكر النبي صلى الله عليه وسلم هل تتأثر بذلك التأثر؟ لكن في ذلك الموسم الذي يمنعك من التأثر هو البدعة، كن صادقاً مع نفسك، هذه واحدة. كن صادقاً مع نفسك، والأمر الثاني: تعالوا نشوف حال السلف مع الذي تقوله، وهو أن يكون فيه بدع، لكن يسمعون شيئاً فيه ذكر للنبي عليه الصلاة والسلام أو ذكر للآخرة أو كذا، فيتأثرون مع وجود البدعة؛ برضه عادي جداً، ما يمنعهم هذا عن هذا. يعني هناخد مثالين، مثال لإمام أهل السنة أحمد بن حنبل، هل أحد يشك فيه؟ ومثال ثانٍ لشيخ الإسلام ابن تيمية. أحمد بن حنبل مما روي عنه أنه كان ينهى نهياً شديداً عن مجالسة الحارث المحاسبي رحمه الله، وكان له كلام شديد جداً في الحارث، وكان مما يقول: الحارث أصل البلية، انظروا، هل في أكثر من كذا؟ هذا رأي أحمد في الحارث المحاسبي.
وبعدين يقول إسماعيل بن إسحاق السراج: قال لي أحمد بن حنبل: هل تستطيع أن تريني الحارث المحاسبي إذا جاء منزلك؟ يعني إسماعيل بن إسحاق السراج من جلساء الحارث، قال له: أنا عاوز أشوفه لما يجيء لمنزلك، قلت: نعم، وفرحت بذلك فرحاً شديداً. ثم ذهبت إلى الحارث فقلت له: إني أحب أن تحضر الليلة عندي أنت وأصحابك، ما قال له إن أحمد بن حنبل عاوز يشوفك ولا حاجة، فقال: إنهم كثير، فأحضر لهم التمر والكسب. فلما كان بين العشائين جاؤوا، وكان الإمام أحمد قد سبقهم، فجلس في غرفة بحيث يراهم ويسمع كلامهم ولا يرونه. فلما صلوا العشاء الآخرة لم يصلوا بعدها شيئاً، بل جاؤوا بين يدي الحارث سكوتاً مطرقي الرؤوس، كأنما على رؤوسهم الطير، حتى إذا كان قريباً من نصف الليل سأله رجل مسألة، فشرع الحارث يتكلم عليها وعلى ما يتعلق بها من الزهد والورع والوعظ، فجعل هذا يبكي وهذا يئن وهذا يزعق. قال: فصعدت إلى الإمام أحمد إلى الغرفة فإذا هو يبكي حتى كاد يُغشى عليه وهو بيسمع لمين؟ للحارث أصل البلية عنده، حتى كاد يُغشى عليه، ثم لم يزالوا كذلك حتى الصباح، فلما أراد الانصراف قلت: كيف رأيت هؤلاء يا أبا عبد الله؟ فرح طبعاً بالذي سيقوله عليه، قال: ما رأيت أحداً يتكلم في الزهد مثل هذا الرجل، وما رأيت مثل هؤلاء، ومع هذا فلا أرى لك أن تجتمع بهم. شوفوا إنصاف أحمد، وشوفوا كيف ترك نفسه، يعني ترك نفسه مع أنه يرى وقوع الحارث في البدعة، هو طبعاً اجتهاد أحمد على الحارث في تأويلات، يعني ابن تيمية يؤوله بشكل وغير ابن تيمية يؤوله بشكل ثانٍ، المهم في الآخر أحمد بن حنبل يقول الحارث أصل البلية، خلصنا من دي، ومع ذلك لما حضر مجلس الحارث ساب الراجل، بيقول كلام كويس، أتأثر.
ابن تيمية رحمه الله، بيحكي عنه تلميذه ابن القيم. الأول ابن تيمية يا جماعة، يحيى الصرصري حنبلي ومكثر من مدح النبي عليه الصلاة والسلام، وكان ابن القيم يصفه بحسان السنة في عصره، له 20 مجلداً في مدائح النبي صلى الله عليه وسلم، يحيى الصرصري، ابن تيمية كان ينكر على يحيى الصرصري أبيات الاستغاثة التي عنده، يحيى الصرصري عنده أبيات استغاثة يرى ابن تيمية أنها غير جائزة، خلاص ده رأي ابن تيمية إمام مجتهد يرى ذلك، وكان ينكرها على يحيى الصرصري. ضعوا هذه على جنب، خلاص فهمتم من يحيى الصرصري وابن تيمية شايف يحيى الصرصري كيف؟ اسمعوا بقى ابن القيم يقول: سمع مرة شيخ الإسلام ابن تيمية قدس الله روحه منشداً ينشد أبيات يحيى الصرصري التي أولها: ذكر العقيق فهاجه تذكاره، فلما وصل إلى قوله: يا من ثوى بين الجوانح والحشى مني وإن بعدت علي دياره، عطفا على قلب يحبك هائم إن لم تصله تصدعت أعشاره، وارحم كئيباً فيك يقضي نحبه أسفاً عليك ومن قضت أوطاره، لا يستفيق من الغرام وكلما حجبوك عنه تهتكت أستاره. يقول ابن القيم: فاشتد بكاؤه ونحيبه وتغير حاله. قال: وسمع يوماً في نيته روح المجالس ذكره وحديثه، وهدى لكل ملدد حيران، وإذا أخل بذكره في مجلس فأولئك الأموات في الجبان، والمستهام على المحبة لم يزل حاشى لذكراكم من النسيان، لو قيل ما تهوى لقال مبادراً أهوى زيارتكم على الأجفان، تالله إن سمح الزمان بقربكم وحللت منكم بالمحل الداني لأعفرن الخد شكراً في الثرى، ولأكحلن بتربكم أجفاني. قال ابن القيم: فغلبه البكاء والنحيب.
ابن القيم طبعاً له كتاب اسمه الكلام في مسألة السماع، عقد باباً في هذا الكتاب في من وقع له السماع اتفاقاً فتأثر، الذي هو مثل ابن تيمية كذا، هو ما يعني واحد قال أبيات الصرصري قدام تيمية، ما قالش بقى ابن تيمية: يحيى الصرصري المبتدع الذي يستغيث بالمش عارف إيه، ده ما عملش كذا، تأثر بالكلام وبكى وعيط عادي جداً. فلما سمع هذا الكلام، يقول ابن القيم: فغلبه البكاء والنحيب. ثم يقول ابن القيم معلقاً: ولو تتبعنا ما في هذا الباب من كلام السلف والخلف لبلغ عدة أسفار، يعني لو جبت لكم كل الكلام الذي ورد عن السلف في أنهم وقع لهم السماع اتفاقاً فتأثروا مش هخلص لبلغ عدة أسفار. فهذا مما ينتفع به السامع ولا يتضرر به إذا صادفه مصادفة فاستراح به، فليس في هذا أدنى مفسدة على الدين، ما تخفش أيها السني بقى الذي خايف على السنة، سيب نفسك ما فيها مشكلة خالص، سمعت شيئاً في مدائح النبي عليه الصلاة والسلام فتأثرت، سيب نفسك وتأثر وابكِ وعط، بلاش هذا الجفاء هذا الجمود.
ابن القيم يقول: فهذا مما ينتفع به السامع ولا يتضرر به إذا صادفه مصادفة فاستراح به، فليس في هذا أدنى مفسدة على الدين، بل فيه ما فيه من تليين القلب وتحريكه وحثه على الطاعة والنشاط. ثم قال ابن القيم: هذا التوسط في أمر السماع هو بين مرتبة المائعين المنحلين، وبين مرتبة القاسين اليابسين، الذين هم درسنا اليوم مفتون ومحجوب، هم دول مرتبة ميوعة الدين، وتروح بقى ترقص وتغني وتشغل المعازف وآلات الطرب وتجيب ستات ترقص، وناحية ثانية ناس يابسة جامدة، لا تتحرك قلوبها لذكر النبي عليه الصلاة والسلام ولا لذكر شيء من شمائله ولا سيرته صلى الله عليه وسلم. هذا التوسط في أمر السماع هو بين مرتبة المائعين المنحلين وبين مرتبة القاسين اليابسين، يقول ابن القيم: وهم مع قسوتهم ويبسهم خير وأحب إلى الله وأقرب إلى رضاه من أولئك، يعني المنحلين، وأحفظ لحدوده وأقوم بأمره ودينه، وإن فاتتهم مراتب أهل المحبة الذائقين لحالها الذين رفع لهم علمها فشمروا إليه، وهم درجات عند الله وقد جعل الله لكل شيء قدراً.
أريد أن أختم بكلام ابن تيمية الحقيقة، وهو كلام مهم جداً جداً، ونختم، يعني سأؤجله للآخر عشان يبقى يعني خلاص ناخده كذا، هي دي رسالة اليوم، يقول ابن تيمية رحمه الله، طبعاً ابن تيمية ممن لا يرى جواز الاحتفال بالمولد، يقول: فتعظيم المولد واتخاذه موسماً قد يفعله بعض الناس ويكون له فيه أجر عظيم لحسن قصده وتعظيمه لرسول الله صلى الله عليه وسلم، كما قدمته لك أنه يثاب على محبة النبي صلى الله عليه وسلم. يبقى أول حاجة نستفيدها من كلام ابن تيمية إيه؟ اهدأ مع المخالف، هذا رجل قد يكون أحب لرسول الله منك صلى الله عليه وسلم، يعني ما هو أنت برضه، أنت مش الذي جاء لك صك من السماء أنك حامل لواء السنة في القرن العشرين، فاهدأ كده على نفسك واعرف قدر نفسك، وكل واحد فينا عارف بلاويه، فبدل ما تروح تشغل نفسك بغيرك، انشغل بنفسك.
قال: وكثير من المنكرين لبدع العبادات والعادات تجدهم مقصرين في فعل السنن من ذلك. يعني يلا يا سني يا الذي جئت ورأيت الثاني هذا مبتدع وضل ويضيع الدين، فعملت عليه الحملة الشعواء بتاع كل سنة، وطلعت البوستات القديمة ومجهزها من قبلها بشهر عشان تنزل سلخ، بتصلي على النبي كام مرة في اليوم عليه الصلاة والسلام؟ وردك إيه الصلاة على النبي في يوم الجمعة؟ يا سني هي دي سنة بقى ولا هذه كمان بدعة؟ أكثر من الصلاة علي صلى الله عليه وسلم، قل لي بقى وردك كام كذا يومياً ولما يجي الجمعة بتصلي عليه قد إيه؟ قال: هذا غير بقى فينك من سننه، يعني تعال ادخل بقى في تفاصيل سنن اليوم والليلة، أنت فين منها؟ قال: كثير من المنكرين لبدع العبادات والعادات تجدهم مقصرين في فعل السنن من ذلك أو الأمر به، ولعل حال كثير منهم يكون أسوأ من حال من يأتي بتلك العبادات المشتملة على نوع من الكراهة. واضح الكلام صح كذا، يعني يقول الناس الذين تنكر هذه، ممكن فيهم ناس أسوأ حالاً ممن يفعلوا البدعة.
ثم يقول: فمن تعبد ببعض هذه العبادات المشتملة على نوع من الكراهة كالوصال في الصيام وترك جنس الشهوات ونحو ذلك، أو قصد إحياء ليالٍ لا خصوص لها كأول ليلة من رجب ونحو ذلك، قد يكون حاله خيراً من حال البطال الذي ليس فيه حرص على عبادة الله وطاعته. تلاقيه هو بطال، قيام الليل ما فيش خالص، وبعدين يجي في ليلة النصف من شعبان أو في ليلة العيد مجهز البوستات بتاعته الجميلة اللطيفة: بدعة المش عارف إيه، طب امبارح كنت بتعمل إيه؟ ما بيعملش حاجة، طب أول امبارح؟ ما بيعملش حاجة، هو ما يعرفش حاجة اسمها قيام ليل أصلاً، ما يعرفش، فالح بس مستني الموسم الذي هينزل فيه بالبوست الذي يكسر الدنيا. قال: قد يكون حاله -يعني من يأتي بهذه العبادات التي فيها نوع من المكروهات أو البدع- قد يكون حاله خيراً من حال البطال الذي ليس فيه حرص على عبادة الله وطاعته. بل كثير من هؤلاء الذين ينكرون هذه الأشياء زاهدون في جنس عبادة الله، سلم يا رب، يعني ما بيعبدش أصلاً، يعني في جنس العبادة. زاهدون في جنس عبادة الله يا جماعة، نحن نشوف ناس كذا، يعني بالكاد ممكن يكون بيصلي الخمس فروض، هذا لو ما بيجمعش صلوات، وعلى الفيسبوك حامل لواء السنة، يا ابني سيب الفيسبوك وروح اقعد صلي على النبي عليه الصلاة والسلام 10000 مرة، هي دي سنة، اقعد تصلي عليها 10000 مرة وسيبك من البدعة يا عم، سيبك من البدعة خالص.
قال: زاهدون في جنس عبادة الله من العلم النافع والعمل الصالح أو في أحدهما، لا يحبونها ولا يرغبون فيها، لكن لا يمكنهم ذلك في المشروع، ما يقدرش يجي يقول لك سيب الصلاة، سيب الصوم، يقدر يقول لك سيب البدعة، وكأنه محروق على الدين، قال: لا يمكنهم ذلك في المشروع فيصرفون قوتهم إلى هذه الأشياء. والله ابن تيمية هذا جميل، أنا دائماً أحب ابن تيمية في قوته النفسية كذا وجميل الحقيقة، عنده إنصاف عجيب. بيقول: فهم بأحوالهم منكرون للمشروع وغير المشروع، ده بأحوالهم، لأنه لا هو بيعمل المشروع ولا غير المشروع، فهم بأحوالهم منكرون للمشروع وغير المشروع، وبأقوالهم لا يمكنهم إلا إنكار غير المشروع. يقول: قولي هذا، أستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير