دخولتسجيل الدخول

حديثان

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين، وذرياته وآل بيته، كما صليت على آل إبراهيم، إنك حميد مجيد.

أما بعد: ففي الحقيقة، كنا قد بدأنا دورة جديدة في شرح كتاب الحقيقية لابن أبي داوود. كنت أقرأ ترجمة ابن أبي داوود، وهو أبو داوود صاحب السنن، ولو حد بيسمع سنن أبي داوود؛ فابنه عامل متناً في العقيدة اسمه الحقيقية. كنت أقرأ في ترجمة أبي بكر عبد الله بن أبي داوود، وترجمة الولد جابت ترجمة الأب، فقرأت ترجمة أبي داوود صاحب السنن، وقرأت فيها أثراً عن أبي داوود وكأنني لأول مرة أقرؤه، وهو أثر كثير ما نقرؤه، أو من هو مهتم حتى بالأربعين النووية، حتى هذا الأثر ممكن يكون مر عليه.

قال رضي الله عنه: «كتبت عن رسول الله صلى الله عليه وسلم خمسمائة ألف حديث، انتخبت منها ما ضمنته هذا الكتاب»، يعني السنن، جمعت فيها 4800 حديث، ذكرت الصحيح وما يشبهه ويقاربه. ركزوا بقى في الحتة التي جاية دي، قال: «ويكفي الإنسان لدينه من ذلك أربعة أحاديث».

يبقى أبو داوود صاحب السنن يقول: أنا كتبت عن النبي صلى الله عليه وسلم خمسمائة ألف حديث، والأرقام دي عادي جداً في الزمن ده، وبعدين انتخبت من الخمسمائة ألف حديث ما في كتابي هذا في السنن، اللي هم كم؟ 4800 حديث. وبعدين أبو داوود ما كانش محدث بس، أبو داوود عالم وفقيه؛ لأن ده واحد من ناقل روايات الإمام أحمد، فهو فقيه أصلاً، يقول لك بقى يكفيك من كل اللي أنا حافظه ده وعارفه أربع أحاديث بس.

ده أولاً عجيب، يعني خمسمائة ألف حديث يقول لك لو خدت الأربعة دول كفاية عليك، ده لوحده عجيب، وده برضو معروف عن السلف؛ فالإمام أحمد بن حنبل روي عنه مثل ذلك، وعدد أقل، أحمد بن حنبل كان بيقول مدار الدين كله على ثلاث أحاديث، كل الدين مداره على ثلاث أحاديث بس: حديث عمر «إنما الأعمال بالنيات»، وحديث عائشة «من عمل عملاً ليس عليه أمرنا فهو رد»، وحديث النعمان بن بشير «إن الحلال بين، وإن الحرام بين، وبينهما مشبهات». فده معروف عند العلماء، معروف أن يقول لك ثلاث أحاديث، أربع أحاديث.

العجب مش هنا، أو الحاجة التي شدتني وكأنني أول مرة أقرؤها لسه جاية، بيقول: «ويكفي من ذلك أربعة أحاديث، أحدها قوله عليه السلام: إنما الأعمال بالنيات -حديث عمر-، والثاني قوله عليه السلام: من حسن إسلام المرء تركه ما لا يعنيه، والثالث قوله عليه السلام: لا يكون المؤمن مؤمناً حتى يرضى لأخيه ما يرضى لنفسه، والرابع قوله عليه السلام: الحلال بين والحرام بين».

تأملت هذا الأثر، ووقفت قدامه كده، فعلاً شدني وأنا بقرأ في ترجمة أبي داوود. طبعاً أول حديث عمر «إنما الأعمال بالنيات»، وآخر حديث النعمان بن بشير «إن الحلال بين والحرام بين»، نتفهم أن يكونوا أحاديث عليها مدار الدين، أو يكفيك الحديثين دول مع غيرهم، ليه؟ لأن حديث «إنما الأعمال بالنيات» ده بيدخل تقريباً في كل حاجة في الدين.

لما يجي يقول لك النية، تلاقي النية دي يتكلم عنها مين من علماء الدين؟ الفقهاء، أول حاجة مش كده؟ يقول لك أنا دخلت أستحمى، والله داخل عشان حران ولا ما ينفعش، ده ما يجزئكش، لا يجزئ عن غسل الجنابة، طب ليه؟ يقول لك عشان النية. فتلاقي النية دخلت تصلي ركعتين، الركعتين دول تحية مسجد، ولا سنة العشاء، ولا قيام ليل، ولا كل ده اللي يفرق بينهم، فتلاقي الفقهاء يتكلموا في النية.

ومين تاني؟ علماء السلوك يكلموك عن النية، مش كده؟ اللي هو من حيثية أخرى، وهي مسألة الإخلاص، فيقول لك أنت بتنوي بالعمل ده وجه الله، ولا بتنوي رياءً وسمعةً وأنك تبقى معروفاً عند الناس؟ فتلاقي حيثية أخرى يتكلم عنها طائفة أخرى من العلماء؛ تحس أنه حديث فعلاً داخل في الدين كله، ما فيش عبادة واحدة في دين الإسلام إلا وتلاقي النية مهمة فيها، بدون دخول في تفاصيل اسمها إيه النية دي ركن ولا شرط، ده مش وقته دلوقتي؛ فهو فعلاً حديث مهم.

وفعلاً حديث النعمان بن بشير «إن الحلال بين والحرام بين وبينهما المشتبهات»، هو لَمَّ الدين كله، بيقول لك الدين يا حلال، يا حرام، يا حاجات مشتبه فيها، وبيقول لك تعمل إيه لما يشتبه عليك حاجة؛ فبرضو المسألة تحس أنها حديث مهم، وآخره كمان مهم جداً لأنه بيتكلم عن القلب.

أما الحديثان بقى الثانيان اللذان اختارهما أبو داوود، هما دول الحقيقة اللذان وقفوني، حديثان في الأخلاق. يعني أبو داوود يا جماعة الآن أبو داوود بيديك نصيحة، رحمه الله، فهو مش مجاملة، ده بيقول لك لو عاوز نصيحتي اشتغل على الأربع أحاديث دول؛ فتتفاجأ أن فيهم حديثين في الأخلاق، ودي حاجة عجيبة جداً.

أحمد بن حنبل لما اختار الثلاث أحاديث اختار حديث «إنما الأعمال بالنيات»، وحديث النعمان بن بشير، يعني اتفق مع أبي داوود، وأبو داوود تلميذ أحمد، فهو اتفق مع أحمد في حديثين أهو «إنما الأعمال بالنيات» و«إن الحلال بين والحرام بين»، وأحمد زود لك حديث عائشة «من عمل عملاً ليس عليه أمرنا فهو رد». أبو داوود شال حديث عائشة وحط حديثين ثانيين.

إيه هما بقى الحديثين؟ قال: «والثاني قوله عليه السلام: من حسن إسلام المرء تركه ما لا يعنيه. والثالث قوله عليه السلام: لا يكون المؤمن مؤمناً حتى يرضى لأخيه ما يرضى لنفسه». احفظوا بقى الحديثين دول، عشان هو ده الدرس. الدرس مش هنشرح الحديثين، أنا مش جاي أشرح الأحاديث، أنا جاي أفهم ليه أبو داوود حط الحديثين دول، إشمعنى دول؟ «من حسن إسلام المرء تركه ما لا يعنيه»، يبقى ده أول حديث، الحديث الثاني أو الثالث في ترتيب أبي داوود: «لا يكون المؤمن مؤمناً حتى يرضى لأخيه ما يرضى لنفسه».

إشمعنى بقى الحديثين دول؟ أولاً يا جماعة قبل ما نبدأ: إشمعنى الحديثين دول؟ هو أنت ممكن يبقى مشروع حياتك تحسين أخلاقك؟ هعيد الجملة دي تاني: أنت كمسلم عاوز تنجو يوم القيامة وتدخل الجنة، ممكن يبقى مشروع حياتك اللي أنت عايش عليه أنك تبقى مسلم حسن الخلق بس؟ يعني لا طالب علم، ولا عالم، ولا عابد، ولا مجاهد، ولا ده خالص، يكفي أن يكون مشروع حياتك اللي أنت عايش عشانه أنك تخرج من هذه الدنيا يقال فلان كان مؤدباً.

ده كلام مين؟ ده مش كلامي، ده كلام سيدنا النبي عليه الصلاة والسلام: «إن المؤمن ليدرك بحسن خلقه درجة الصائم القائم». مش يا جماعة والشباب أسئلة كتير بتيجي تلاقي هو إيه أمنية حياته؟ أمنية حياته أنا عاوز أبقى بقيم الليل، أمنية حياته ودي اللي بيعافر عليها، وده شيء كويس، مش شيء جميل، بس هو يفضل طول حياته هي هو ده مشروعي أن أنا نفسي أبقى من قوام الليل. النبي عليه الصلاة والسلام بيقول لك إن المؤمن ليدرك بحسن خلقه درجة الصائم القائم، إيه رأيك؟

فبداية كده قبل ما ندخل في الحديثين دول، وإشمعنى دول بالذات من ضمن أحاديث كثيرة في حسن الخلق؟ ما هو الخلق ده يا جماعة حاجات كتير، يعني الكرم من حسن الخلق، مش كده؟ التغافل من حسن الخلق. نقدر لو قلنا لكم إيه حسن الخلق هتلاقوا بتطلعوا أخلاق كثيرة جداً كلها من حسن الخلق، فإشمعنى الحديثين دول؟ دي مسألة ثانية.

حديثان للنبي عليه الصلاة والسلام يؤكد على ذلك المعنى، معنى إيه؟ أن ممكن يبقى مشروع حياتنا. إحنا ما خرجناش من الدرس ده غير بالمعنى ده زي الفل، أن 10، 20 واحد يخرجوا من الدرس مشروعهم: أنا هبقى مسلم محترم، راجل محترم، راجل مؤدب، يعني ده يبقى وصفي، أي حد عاوز يصفني في كلمة فلان محترم، فلان مؤدب.

وطبعاً بقى لو تكلمنا عن الأدب وحسن الخلق، يعني حديث «ذو شجون»، إحنا دلوقتي خلاص ما فيش أخلاق، خلاص، يعني الأخلاق تكاد تكون انعدمت، اندثرت في هذه الآونة، فنريد أن نحيي ذلك مرة أخرى. قال صلى الله عليه وسلم: «إن أحبكم إليَّ وأقربكم مني منزلة في الآخرة أحاسنكم أخلاقاً». تأملوا ألفاظ النبي صلى الله عليه وسلم، «إن أحبكم إليَّ وأقربكم مني منزلة في الآخرة»، ما قالش الصوام ولا القوام، ولا «أحاسنكم أخلاقاً».

فيبقى بداية وضع أبي داوود لحديثين من أحاديث الأخلاق، كأنه أولاً أبو داوود يعي هذا المعنى بلا شك، يعي هذا المعنى ويريد أن ينبهك على هذا المعنى، معنى إيه؟ أن يكون تحسين أخلاقك مشروع حياتك. خلاص، يبقى الشباب اللي بتيجي تسأل أعمل إيه، وأتصرف إزاي، وأنا إيه هدفي في الدنيا؟ أهو عندك هدف أهو اشتغل عليه؛ يعني ده بس يا سيدي حط جنبه مائة هدف، بس ده هدف لو ما خرجتش من الدنيا غير بده، راجل بيؤدي الفروض اللي عليه، ويجتنب المحرمات، ويحسن أخلاقه، تكفيك.

لكن أبو داوود ما جابلكش ألف حديث في حسن الخلق ولا مائة حديث ولا 50 حديث، قال لك يكفي الإنسان من ذلك كله إيه؟ لذلك كله ده اللي هو إيه؟ خمسمائة ألف حديث! خمسمائة ألف حديث أبو داوود بيقول لك خد الأربعة دول واشتغل عليهم ويكفوك، واختار حديثين في حسن الخلق. الحديث الأول: «من حسن إسلام المرء تركه ما لا يعنيه»، الحديث الثاني: «لا يكون المؤمن مؤمناً حتى يرضى لأخيه ما يرضى لنفسه».

إشمعنى دول؟ تأملت الحديثين وجدت فيهم أموراً، أول أمر: أن الحديثين مشروع حياة برضو. يعني خليني كده أسألكم سؤال، لو جئت قلت لك إن الكرم من حسن الخلق، وأنت حتة الكرم دي ما أنتتاش قوي فيها، فهتخرج تخيلوا كده الدرس النهارده عن الكرم، وفضل الكرم، وفضل الإنفاق، وكذا وكذا وكذا، هتخرج تجاهد نفسك في الكرم ده يومين، أسبوع، أسبوعين، وتصير قد تخلقت بخلق الكرم، سهلة يعني، هي ميسورة أنك عن قريب تحصل هذا الخلق.

ماشي، التغافل، وأنت راجل بيحط مناخيرك في الصغيرة والكبيرة، فهتخرج من هنا بعد ما عرفت أن ده من حسن الخلق، أن تتغافل، مرة في مرة في مرة، هتتأدب وهتبتدي واحدة واحدة. ماشي، طبعاً التغافل ده في الأفعال؛ لأن ترك ما لا يعنيك ده موضوع أكبر بكثير، هنجي له دلوقتي؛ يعني ده قصة، إنما الحديثين دول مش كده. الحديثين دول عشان توصل للدرجة دي، ده هتعيش حياتك كلها تشتغل عليها.

يبقى «من حسن إسلام المرء تركه ما لا يعنيه»، عارف يعني إيه أن تترك ما لا يعنيك؟ أن تترك الحديث فيه، وأن تترك النظر إليه، وأن تترك، ودي درجة أعلى، أن يخطر على قلبك أصلاً ما لا يعنيك، ما تنشغلش به أصلاً، يعني حتى لو مش هتتكلم ولا هتنظر، ما يشغلكش. طيب إزاي أوصل لدي؟ ده حاجة كبيرة جداً. ليه حاجة كبيرة جداً؟ لأن عشان توصل لدي أنت محتاج أولاً تزهد في الدنيا، ما أنا هاجي أقول لك إيه اللي لا يعنيك، فتلاقي مثلاً في القرآن في ترك النظر إلى ما لا يعنيك، قال: ﴿وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ﴾ [طه: 131]. مين يعرف يعملها دي؟ ما هو ده من ترك ما لا يعنيك، أن ربنا أنعم على فلان بحاجة مش هبص له ومش هتشغلني، ﴿وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ﴾، ما تبصش. ده مين يعملها دي؟ طب عشان أعملها، عشان أوصل لدي لازم إيه؟ الدنيا ما تقعش في قلبي أصلاً، والدنيا بكل بقى تفاصيلها؛ ليه؟ لأن ممكن واحد لو واحد تاني أُعطي مالاً ما يبصلوش قوي، مش شغله المال مثلاً، إنما لو عنده منصب آه يتجنن، يا ريتنا بقى في المنصب الفلاني؛ لأن هو اللي شاغله المنصب مثلاً، أو أي بقى شهوة من شهوات الدنيا، يعني على خلاف شهوات الدنيا.

ففكرة أنك ما تبصش لغيرك في أي حاجة، يعني إيه؟ يعني كل حاجة ما بقتش تساوي عندك حاجة، صح ولا لا؟ وإلا هتبص، هتبص. ففكرة أن أجي أقول لك إيه اترك ما لا يعنيك، سهلة؟ لا مش سهلة خالص؛ عشان كده قلت لكم التغافل غير ترك ما لا يعنيك، التغافل ده اللي هو إيه؟ أنت في بيتك مثلاً، فالكرسي ده محطوط كده ليه؟ مش محطوط كده ليه؟ نقول لك يا عم تغافل، يا عم كبِّر دماغك، الأكل ملحه قليل، الأكل ملحه كتير، اللي مش عارف الرز، يا عم تغافل، كبِّر دماغك. إنما تركك ما لا يعنيك، لا، ده مشروع حياة، ومعنى أنك هتترك ما لا يعنيك أنك هتقعد فارغ يعني؟ تركت ما لا يعنيك وقعدت 24 ساعة ما بتعملش حاجة؟ ولا معنى أنك تركت ما لا يعنيك أنك انشغلت بما يعنيك؟

صح ولا لا؟ ما هو يا جماعة ما فيش الفراغ لازم يُملأ، الفراغ لازم يملأ. إحنا عشان حياتنا اتملت بما لا يعنينا، فمش عارفين ندخل شيئاً يعنينا، مش عارفين. المصيبة الأكبر، إحنا ده هنيجي في تفاصيله إن شاء الله، أننا لو حاولنا ندخل شيئاً يعنينا ما بنعرفش. جات لي رسالة من كام يوم، من يومين ثلاثة على صالحني.

بنت تقول: أنا من جيل الألفينات، وأنا مش متخيلة، أنا عادي سمعت درس أو حاجة ليا إن الموبايل لازم نحاول نترك ده شوية، فبتقول هعمل إيه؟ هي على فكرة مش هي بتقول أنا فعلاً مش عارفة الجيل اللي قبلينا كان بيعمل إيه. طب أنا هو مش أنا من الجيل اللي قبليكي؟ أنا بقولك دلوقتي الجيل اللي قبليكي في ناس منه مش عارفين هم كانوا بيعملوا إيه أصلاً؛ يعني لو قلت للجيل ده اللي هو الأربعين دلوقتي ولا الخمسين سيب الموبايل مش هيعرف يعمل حاجة.

مش هيعرف، طب هو أنت كنت بتعمل إيه؟ ما هو أنت قعدت 20 سنة أو 30 سنة من غير موبايل كنت بتعمل إيه؟ خلاص فقد تلك الملكة، ما عندوش ملكة إنه يعرف يعمل حاجة مفيدة في يومه؛ مع إنه كان بيعمل، مش بقى بتكلم على جيل فتح عينيه على الموبايل وفتح عينيه على السوشيال ميديا، لا، هو جيل عاش ممكن معظم عمره كمان في منا جيل عاش معظم عمره من غير موبايل.

النهارده لو قلت له سيب الموبايل هيلاقي مش عارف يعمل حاجة في يومه، مش عارف. فاحنا ليه خلاص إحنا اتملينا بما لا يعنينا؟ فخلينا بقى نرجع تاني، وإن شاء الله دي تفاصيل هنجيلها بعدين، يبقى من حسن إسلام المرء تركه ما لا يعنيه، ده مشروع حياة، وعشان تحقق دي لا أنت هتشتغل على نفسك كتير، ومن الشغل الكتير ده إنك هتترك بعض ما يعنيك عشان تدرب نفسك إنك تترك ما لا يعنيك.

إيه رأيك بقى؟ مشروع معاك يبقى هتزهد نفسك في الدنيا وهترغب نفسك في الآخرة. هتدور على ما يعنيك وتدرب نفسك إنك تنشغل بما يعنيك؛ لأنك لو ما عملتش ده قليلاً هتعود إلى ما لا يعنيك. يعني لو قلت خلاص أنا وعد من النهارده التليفون مش هستغنى عنه بس هقفله مثلاً لمدة خمس ساعات كل يوم، أنا بقولك أول يوم الخمس ساعات دول هتقعد منهم أربع ساعات «طرزان» مش عارف تعمل حاجة، يعني قفلت الفون وسايبه أهو يلا بقى أعمل، مش عارف أعمل حاجة، للاسف.

البنت بعد هي صادقة بتقول لي: قل لي أنتم اليوم بيتقضى إزاي؟ أنا معرفش، لو سبت التليفون ده أنا مش عارفة هعمل إيه، يعني ما أعرفش هعمل إيه في يومي. ما هو للاسف يا جماعة إحنا، وأنا دلوقتي حاجة بره الدرس بس، وأنا بقرأ في ترجمة ابن أبي داوود بقى، اللي هو أبو بكر بن أبي داوود، كان في ترجمته -وده برضه اللي أنا هحكيه ده حكاية ممكن الناس تقول: إيه ده؟ معقولة؟ وده كان عادي جداً في الجيل ده- إنه سافر مرة وبعدين قالوا له: حدثنا، هو راجل محدث، فقال: ليس معي كتاب، يعني معيش الكتاب اللي أحدثكم منه. طبعاً حدثنا دي يا جماعة يعني: حدثنا فلان، قال حدثنا فلان، قال حدثنا فلان أن النبي صلى الله عليه وسلم قال كذا كذا، ده هو ده الحديث، مش حديث اللي هو: عن عمر إنه قال كذا، وتغلط في نص الحديث؛ لا الحديث عندهم يعني سند ومتن، ما فيهاش هزار.

فقال لهم معيش والله الكتاب إني أحدث منه، فقالوا: ابن أبي داوود وكتاب! مستغربين، أنت محتاج كتاب؟ قال: فأثاروني، يعني استفزوني، فحدثتهم 3000 حديث من حفظي. إيه رأيكم؟ أنتم مستوعبين الرقم؟ حدثهم 3000 حديث، حدثنا فلان قال حدثنا فلان قال حدثنا فلان أن النبي صلى الله عليه وسلم قال كذا وكذا وكذا، 3000 حديث من حفظه. عرفتوا الموبايل ممكن يتساب ونعمل إيه؟ ما بقولكش احفظ 30000 حديث، بس في حاجات تتعمل في الدين، ما هم دول حملة هذا الدين اللي نقلوا لنا الدين، فإنت في حاجات تتعمل.

وبعدين راجع بغداد بلده يسيبوه بقى في حاله؟ هو كان مسافر، وانتشرت بقى الحكاية ورجع بغداد، البغداديين ما يسيبوهوش في حاله، يعملوا إيه؟ طبعاً ما فيش بقى زمان نت، طب ابعتوا لنا بقى من هناك واتساب بالـ 3000 حديث عشان نختبره، ما فيش كده؛ يقوموا يجيبوا شوية رجالة منهم لا روحوا سافروا، وما فيش طبعاً هناك مكتبة تصوير يعني ما فيش، فيسافروا ينسخوا الـ 30000 حديث ويرجعوا بغداد تاني عشان يشوفوا الـ 30000 حديث اللي حدثهم صح ولا غلط.

ما هو إحنا برضه مش هنسيبك في حالك، أنت حدثت 30000 حديث وجاي بقى، لا هنشوف الكلام ده، رجعوا من 30000 حديث لبغداد، خطأوه في كم حديث؟ ست أحاديث من 30000 حديث، ثلاثة منهم حدثها كما حدثها، يعني الغلط مش من عنده أصلاً، يعني ثلاث أحاديث مش ستة هو قالها زي ما حدثها، فما كانش الخطأ من عنده، وثلاثة كان غلطان فيها، من كام حديث؟ 30000 حديث من حفظه! و30000 حديث من حفظه يعني كان محضر بالليل عشان يصحى، لا ولا كان يعرف إنه هيتسأل إنه يحدثنا، ما كانش يعرف ده.

فالدين فيه كتير يتعمل. يعني اللي بيقول: أنا مش عارف النهارده لو سبت موبايل هعمل إيه؟ فانا أقدر أقول آخر مرة ختمت القرآن إمتى، ووردك من القرآن قد إيه، ومواظبتك عليه قد إيه؟ يقيناً هتلاقي فيه خلل يقيناً. ولو مواظب تقدر تزود، بس أنا بقولك لا، هتلاقي نفسك فيه خلل ومش مواظب وبتقرأ يوم وتوقع اثنين وثلاثة، وأذكارك شكلها إيه؟ قعدة الشروق في المسجد بتعملها ولا ما بتعملهاش؟

أنا نقدر بقى ليا وليكم، مش أنا، أنا أولكم، أنا أول المقصرين، نقدر نعد 100 خصلة في اليوم إحنا ما بنعملهاش، ولو بنعملها ففيها تقصير ويمكن تحسينها، فهو فيه حاجات تتعمل، فيه حاجات كتير تتعمل، ولما تخلص الخصال دي اللي هي خصال المسلم العادي -أنا على فكرة أنا بقولك ورد القرآن، أذكار صباح ومساء، جلسة شروق، ده اللي هو إحنا بنتكلم في مسلم عادي يعني ما بنتكلمش في حاجة خالص- ده مسلم عادي، يعني بادئ يومه، فبينزل يصلي الفجر في المسجد، بيقعد للشروق، لأن دي جلسة مباركة ما ينفعش تتفوت، بيخلص يبقى لازم عنده ورد قرآن، لازم عنده أذكار صباح ومساء، ده المسلم العادي.

أنا ما كلمتكش في واحد عنده مشروع علمي، مشروع دعوي، مشروع إنه يختم القرآن حفظاً، ما بكلمش حد عنده مشروع، أنا بتكلم في مسلم عادي خالص. فانا بقولكم لو مسلم عادي فإحنا، أنا ممكن أعد لنفسي 100 خصلة في اليوم أنا لا أفعلها، وإن فعلتها ففيها تقصير، بتكلم عن نفسي. فلا نقدر نعمل كتير لو سبنا التليفون، يبقى ترك ما لا يعنيك ده مشروع حياة، هتزهد نفسك في دنيا، هتراغب نفسك في آخرة، هتنشغل بما يعنيك، ودي لوحدها محتاجة قصة ومجاهدة، علشان مش هتفضل فارغ.

الحديث الثاني: قال صلى الله عليه وسلم: «لا يؤمن أحدكم حتى يحب لأخيه ما يحب لنفسه». لو سمحتوا يا جماعة كده لمدة 10 ثواني كل واحد يتأمل الحديث ده، يعني إنك علق النبي صلى الله عليه وسلم إيمانك على إنك تكون بترضى لأخيك ما ترضاه لنفسك، دي سهلة؟ تأملوها، أن تحب لأخيك ما تحب لنفسك، دي سهلة؟ يعني لو جيت قلت لك النهارده زي ما بقولك درس عن الكرم، لا، الدرس النهارده عن أن تحب لأخيك ما تحب لنفسك، أنت متخيل إنك تعرف تحصلها في أسبوع ولا أسبوعين؟ دي والله أبداً، أبداً.

يعني عارف يعني إيه تحب لأخيك ما تحب لنفسك؟ عشان بس نبقى فاهمين الكلام ده؛ يعني حضرتك في وظيفة، والسلم الوظيفي المفروض مثلاً أنت في الدرجة الفلانية، فالترقية اللي جاية الترقية الفلانية، طب فيه ثلاثة بيتنافسوا على هذه الترقية، أنا بديكم أمثلة عشان تفهموا يعني إيه تحب لأخيك ما تحب لنفسك، خلاص، فأنت تحب هذه الترقية، فبتحب للاثنين الثانيين هم ينالوا هذه الترقية، إيه رأيك؟ دي سهلة على نفسك؟

طب أنت في ثانوية عامة وتتمنى، تتمنى إنك يبقى ليك، لو حد ليه هدف يعني، فتتمنى يبقى لك ترتيب على الجمهورية ولا على مدرستك ولا على فصلك، تتمنى أكون الأول، طب إنك تحب لأخيك ما تحب لنفسك يعني إيه؟ يعني تحب لإخوانك في الفصل إن هم يبقوا أوائل برضه، طب دي سهلة؟ والله أبداً، وقل مثل ذلك بقى. خلاص دي، أنا عاوز أقول لك أنت ممكن تعيش وتموت عاوز تخلي ده مشروع حياتك وما تعرفش تحصلها أصلاً، ما تعرفش توصل لها.

يعني أنا هديكم مثال، مثال عجيب جداً وأنا بقرأ، أنا مش جاي النهارده أقرأ يعني، مش جاي أتكلم عن إنك تحب لأخيك ما تحب لنفسك، فيلا ناخد أمثلة بقى 100 مثال بس في مثال وقفني، من الأمثلة اللي جت في هذا الحديث: محمد بن واسع رحمه الله، أراد أن يبيع حماراً له، راح يبيع حمار، فقال الرجل له: أترضاه لي؟ فقال محمد: لو رضيته لم أبعْه. يعني إيه؟ طبعاً إحنا مفهوم طبعاً إن ممكن واحد يبقى مثلاً واحد بيبيع سيارة، فهي السيارة بالنسبة له خلاص هو عاوز يطلع منها لحاجة أكبر، بس السيارة دي ممكن تبقى مرضية لغيره، يعني طبيعي جداً هي دي الدنيا أصلاً، وإلا الدنيا مش هتمشي، فده طبيعي.

إنما فكرة إن ابن واسع بيقول له: أنت ترضى الحمار ده ليا؟ قال له: لو رضيته لم أبعْه، لو أنا راضيه كنت هخليه لنفسي، لا أنا لا أرضاه. فأنا أقصد أقولك إنك تحب لأخيك ما تحب لنفسك هتخش في تفاصيل كتير جداً في حياتك، وهتخليك مش هتخليك، فأصل الحب والبغض ده مش حاجة عملية، ده قلب، يعني أنت فعلاً من جواك صادق، أنا عاوز زميلي يترقى زي بالضبط ما أنا عاوز أترقى، ده مين يعرف يوصل لدي؟

طيب دي عشان توصل لها مشروع حياة، عارف إمتى توصل لها؟ هديكم مثال بسيط على الترقية دي، خلاص زميلك ده اللي أنت وهو بتتنافسوا على ترقية، فلو جيت سألتك بالله عليك يا شيخ تحب له إنه يترقى زي ما بتحب لنفسك؟ هتقول لو أنت صادق: مستحيل طبعاً، لا. طيب تعالوا وأنتم بتتنافسوا على الترقية دي، جالك عرض شغل في حتة تانية ضعف المرتب، مكان تاني وأعلى وحاجة كده يعني، وزميلك ده فعلاً أنت بتحبه، يعني أنت ما فيش بينك وبينه حاجة وحشة، ساعتها لو جيت قلت لك تحب إنه يترقى؟ تلاقي ممكن قلبك يميل، أه يترقى، عادي ما فيش مشكلة، هو يترقى ليه؟ لأن أنت مش شاغلك المنصب ده، خلاص.

أنت مشغول بحاجة تانية أكبر، صح ولا لا؟ أو قدام عينيك هدف أحسن، حد فاهم؟ حد لقط أنا عاوز أقول إيه؟ فأنا عشان أعمل دي لو الدنيا دي فعلاً ولا تشغلني، وأنا قدامي هدف تاني، ولده يا جماعة جاء حديث للنبي عليه الصلاة والسلام وتوجيه العلماء له توجيه آخر، لكن الحديث ده وقع في روعي معنى ويلا خذوا بقى واجب، حد يدور على المعنى اللي أنا هقوله ده ماشي. عن يزيد بن أسد القسري رضي الله عنه، قال لي رسول الله صلى الله عليه وسلم: «أتحب الجنة؟» قلت: نعم. قال: «فأحب لأخيك ما تحب لنفسك». طبعاً توجيه ما قرأته أنا من توجيه العلماء لهذا الحديث إنك يعني إن كنت بتحب الجنة عاوز تخش الجنة حب لأخيك ما تحب لنفسك، وقع في روعي معنى، فإن كان صواباً فمن الله وإن كان خطأ فمن الشيطان، فدوروا بقى على المعنى ده وإن شاء الله نلاقيه، يعني إن النبي صلى الله عليه وسلم كأنه يوجه ذلك الصحابي لمعنى لو تلبس به، أحب لأخيه ما يحب لنفسه: أتحب الجنة؟ قال: نعم، فلو بتحب الجنة والجنة قدامك وبتسعى للجنة، هتوصل لمرحلة إنك تحب لأخيك ما تحب لنفسك.

ليه؟ عشان المعنى اللي إحنا قلناه من شوية ده، أنت أصلاً مش مشغول بالدنيا، فالدنيا اللي جت لي هو جت له، أنا الاثنين، الاثنين بحبهم، مش فارقة معايا. هديكم مثال يا جماعة عشان برضه نفهم الحتة دي، أنا خرجت عن الموضوع شوية، هو إحنا عاوزين نفهم الحديثين، إشمعنى الحديثين دول؟ بس معاني مهمة إن إحنا نحصلها. لو جيت قلت لك الـ 100 ألف جنيه دول يا أنت هتاخدهم يا أنا هاخدهم، هتحب إن أنا آخدهم زي ما هتحب إن أنت تاخدهم؟ مستحيل، لا أنا آخدهم بقى وبعدين نبقى نشوفك أنت بعدين بأي حاجة، مش كده؟

طب لو جيت قلت لك الزلطة الصغيرة دي يا أنا آخدها يا أنت تاخدها، فميلك إن أنت تاخدها يزيد على ميلك إن أنا آخدها، آخدها أنا، تاخدها أنت، مش فارقة، مش شاغلني، يعني زلطة. طب لو قلت لها بقى جناح الناموسة ده، ناموسة وقع منها جناح كده ولقيناه في الأرض، ويا ناخده يا أنت تاخده، هتقول لي: يا عم إيه أنت واجع دماغنا بجناحها، ما تاخده. مش كده؟ أهي الدنيا دي كلها لا تزن عند الله جناح بعوضة أصلاً، لا تزن. فلو ده مقدار الدنيا عندك هتلاقي نفسك سهل جداً، مش بقى ترقية، مش بتكلم في ترقية ولا أول في المحاضرة ولا أول في ثانوية ولا خالص، أنا بكلمك في الدنيا كلها، يعني لو الدنيا.

ولا تزن جناح بعضها ولا فرق تأخذها ولا فرقة. هذه سهلة، لا ليست سهلة طبعًا، صعبة جدًا جدًا. تقول: أيوه يا شيخ، بس ده في الدنيا إنما في أمور الآخرة بقى، أقول لك ما هي الآخرة واسعة أصلًا، الآخرة لا تضيق لأحد. أنتم عارفين يا جماعة متى يظهر التنافس والحسد أو بلاش التنافس، الحسد يظهر متى؟ ويظهر في "يا أنا يا أنت" فيما يضيق، إنما الحاجة الواسعة لا يظهر فيها الحسد. لا تلاقي مثلًا واحدًا يحسد واحدًا إنه واقف ينظر في السماء ويتأمل في جمال السماء؛ ليه؟ ما تقف تنظر للسماء أنت الآخر، هل أحد سيشكل عليك؟ قف وانظر للسماء.

لذلك قالوا: إن الذي يحسد أو يضن بشيء هو مشاع، كل الناس ممكن تستفيد به؛ هذا نفسه خبيثة. من النوادر التي ذكروها أن كان في واحد وصل مرحلة من الشح وخبث النفس أنه كان يشعل النار ليلًا ليستضيء، زمان لم يكن هناك مصابيح، فيشعل نارًا ليجلس يقرأ أو يعمل، فإذا رأى غيره يستضيء بها أطفأها! طيب يا ابني هو مضايقك في إيه؟ قال: لا، ما يستضيء بناري. قالوا: هذا خبيث النفس الذي يعمل هكذا. أنتم عارفين الذي لا يشوف أمه؟ طب أنت استفدت إيه؟ ما استفدت شيئًا، بس هو "ما يشوف أمه" خلاص.

فالاثنان مشروع حياة، فأبو داود لما اختار الحديثين اختار لك حديثين لكي تصل إليهما، بل أنت ستعيش معهما، ولذلك يكفيك هذان الحديثان لأنهم مشروع حياة. المعنى الثاني الذي لو تأملتم الحديثين ستجدون أنهما مشتركان فيه، وهو أن الحديثين مظلة كبيرة لتفاصيل كثيرة تحتهما. يعني أنت لو وصلت أن تترك ما لا يعنيك، خلي بالك أنا لا أكلمك في الطريق الذي ستصل منه لأن تترك ما لا يعنيك؛ هذا خلاص خلصناه، هذا مشروع حياة. لا، أنت وصلت أنك تركت ما لا يعنيك، عارف هذا تحته كم حسن خلق أصلًا؟

ما أنت لو تركت ما لا يعنيك ستجد نفسك لا تتكلم كثيرًا، ومن حسن الخلق ترك فضول الكلام، وهذا خلق لوحده، أليس كذلك؟ وستجد نفسك معظم الوقت غاض البصر، وغض البصر يأتي في الأذان دائمًا، ليس غض البصر عن النساء فقط، هو غض البصر عن كل ما لا يعنيك. كانوا يكرهون فضول النظر كما يكرهون فضول الكلام. مما روي عن بعض السلف أن رجلًا دخل يومًا داره، ثم نظر في السقف، فكان السقف جريدًا وجذوع نخل، فوجد حتة على وشك أنها تنهار في السقف، فقال له: "يا ابن أخي، لي 20 سنة في هذا البيت ما نظرت إلى السقف". أنا بقالي 20 سنة في البيت هذا، عيناي لم ترتفع للسقف أصلًا.

الغزالي لما روى هذا الأثر، ومن بعده ابن الجوزي، علق تعليقًا عجيبًا جدًا، قال: "وكانوا يكرهون فضول النظر كما يكرهون فضول الكلام". يعني مجرد أنه ينظر في السقف، وعلى فكرة لا أقول حرام، عشان الناس أحيانًا هذا الكلام يكون غير مفهوم، أنا لا أقول إنه حرام أن تنظر لسقف البيت، لكن واحدًا شغله شيء كبير، فهو سيترك فضول النظر. سأعطيكم مثالًا بسيطًا عشان نفهم، نحن يا جماعة أمثلة السلف محتاجين نسقطها أو نحولها لأمثلة تستوعبها عقولنا فقط لا أكثر.

لو حضرتك مثلًا شاب في ثانوية عامة وعنده امتحان الساعة 9 صباحًا، راحت عليه نومة، ينظر في الساعة يجدها 8 ونصف، الامتحان الساعة 9، يا دوب سيلبس وينزل ويجري، وهو أصلًا بينه وبين اللجنة نصف ساعة، وهو ذاهب للجنة رأى افتتاحًا في الطريق، سينظر؟ رأى بنتًا جميلة، سينظر؟ والله ولا يشغله، لقى بعدها، اقعد عد كما تعد من ملهيات الدنيا، لن ينظر. ليه؟ هو لديه هدف، عارف أن الحاجات هذه وهو راجع سيرى بعد ثلاثة أيام، إنما لو هو ذاهب لن ينظر. ليه؟ أنا لست فاضيًا، اللجنة الساعة 9، عندي هدف، فهذا بالنسبة له فضول نظر، ليس وقته.

فبدأ المثال يوضح عندنا، فلما يأتي واحد من السلف يقول لك: أنا بقالي 20 سنة ما نظرت في السقف؛ ليه؟ هو عنده هدف أمام عينيه، فليس عندي وقت. أنتم عارفين يا جماعة ابن تيمية من الأشياء العجيبة جدًا، ابن تيمية وهو على فراش الموت، ابن تيمية لم يتزوج، وهو على فراش الموت قالوا له: هل تزوجت؟ قال: "لو ذكرتموني لفعلت". الشباب الذين الآن مش قادرين، ابن تيمية يقول: والله لو فكرتوني كنت تزوجت، يعني أنا لست معارضًا بس أنا لم أتذكر، لو ذكرتموني لفعلت. ليه؟ عنده هدف آخر خالص.

وعلى فكرة يا جماعة، الذي نضحك عليه الآن هذا نقابله في الدنيا، تجد واحدًا هدفه مثلًا أنه يريد أن يلحق يكون نفسه، أو هو حيا أمله في الدنيا أن يكون معه الدرجة الفلانية في العلم، دكتوراه أو كذا أو كذا، أو أمله في الحال أن يكون في المرتبة الفلانية في الشركة، وتسمع الكلمة هذه، يقول لك: "السكينة سارقاه"، لم يتزوج لغاية دلوقتي، وصل 40 سنة ولم يتزوج، السكينة سارقاه، وتيجي تبص لحياته هو مشغول فعلًا، ليس فاضيًا يفكر في الجواز، عنده هدف.

فكانوا يكرهون فضول النظر، كانوا يكرهون فضول الكلام، فالشاهد أن الحديثين هذين لو تأملتهما ستجد تحتهما أخلاقًا كثيرة، يعني لو وصلت للحتة هذه ونجحت أنك تصل للحتة هذه، فأنت ستكون حققت أصلًا أخلاقًا كثيرة جدًا حسنة. ففكرة أنك تترك ما لا يعنيك، فأنت أولًا أغلقت فمك معظم الوقت، أليس كذلك؟ ما هو أنت تارك ما لا يعنيك. طيب، قال صلى الله عليه وسلم: «من صمت نجا»، هذا خلق لوحده أن تعرف كيف تجلس ساكتًا، طيب ما أنت تارك ما لا يعنيك، فأنت ساكت معظم الوقت، أليس كذلك؟ «ثكلتك أمك يا معاذ، وهل يكب الناس في النار على وجوههم -أو قال على مناخرهم- إلا حصائد ألسنتهم». فلذلك كان من حسن الخلق كثرة الصمت، ويبقى كلامك قليلًا.

ما هو يا جماعة برضه الناس تقول لك هو أنا هسكت ليه؟ طيب ما تعالوا نحسبها حسبة رياضية، لأن الناس خلوا بالكم يا جماعة القلم أحد اللسانين. يعني ممكن واحد تلاقي يقول لك: أنا على طول ساكت الحمد لله، بس هو "بيشات"، هو ساكت صحيح، بس على طول صباعه شغال، يا شات، يا منشور على الفيسبوك، يا مش عارف إيه على الإنستغرام، ما هو القلم أحد اللسانين، يعني أنت فاكر أنك بتتحاسب على اللي بتقوله ولا بتتحاسب على اللي بتكتبه؟ القلم أحد اللسانين.

فالعلماء لكي يقولوا لك طب ليه "من صمت نجا" وليه اسكت كثيرًا وتكلم قليلًا، أنتم عارفين كلام النبي عليه الصلاة والسلام كانت كلماته كلمات معدودة، فقالوا بالحسبة العقلية، الكلام أربعة أقسام لا خامس لهما: كلام شر محض كله شر، كغيبة ونميمة وكذب؛ وكلام فيه خير وشر، يعني كلام أنت لو تكلمت به سيكون فيه جزء كويس وجزء وحش؛ وكلام لا خير فيه ولا شر، وهو الكلام المباح، قاعدين نتكلم ونتساير ونتسامر؛ وكلام خير محض، كلام كله خير زي الذكر والدعوة إلى الله وقراءة القرآن، هذه الأربعة أقسام، لا يوجد قسم خامس.

فالكلام الذي هو شر محض، ستتكلمه؟ ستسكت عنه. طيب الكلام الذي فيه خير وشر، ستتكلمه؟ ستجد نفسك، طب وليه؟ ما هو فيه خير محض، اتكلم في الذي فيه خير وشر؟ يعني إيه الذي زنقني في الذي فيه خير وشر؟ ستسيبه هو الآخر. طيب الكلام الذي لا خير فيه ولا شر؟ العلماء قالوا: من عرف شرف زمانه تنزه عن هذا القسم أيضًا، أنت ليس لديك رفاهية أنك تجلس تضيع وقتك في المباح في كلام كله مباح. يتبقى الجزء الذي هو الخير المحض، قال لك: وهذا تدخله الآفات أيضًا، ستجد فيه رياء وحب ظهور وحب سمعة، فتجد نفسك حتى هذا يحتاج مجاهدة، فتجد نفسك تفهم وقتها قول النبي صلى الله عليه وسلم: «من صمت نجا».

حديث النبي عليه الصلاة والسلام: «إن العبد ليتكلم بالكلمة من سخط الله لا يلقي لها بالًا تهوي به في النار سبعين خريفًا». أنتم عارفين أكثر كلمة تتعبني في الحديث هذا ليست "تهوي به النار"، هذه مرعبة، بس أكثر كلمة تتعبني في الحديث هي «لا يلقي لها بالًا». عارفين لا يلقي لها بالًا؟ يعني أصلًا ليست في دماغه الكلمة، قالها وليست في دماغه، لا يلقي لها بالًا، تهوي به في النار سبعين خريفًا عياذًا بالله. طب الواحد لما يسمع الحديث هذا يتكلم كثيرًا؟ لا، كلامه يبقى معدودًا. طيب، فهذا خلق حسن، متى ستحصله؟ لو تركت ما لا يعنيك، خلاص، مش محتاج أتكلم، لم أكن محتاجًا بقى كل الذي حكيته في الخمس دقائق أو السبع دقائق التي أتكلم فيها، لم أكن محتاجًا له، ليه؟ أنا أصلًا واصل أنني أترك ما لا يعنيك، فهذا جزء منه.

وكذلك فضول النظر، فضول النظر هذه مشكلة كبيرة، ومن الخلق الحسن أن تغض الطرف عما لا يعنيك، وقلنا لكم الآية: ﴿وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا﴾ [طه: 131]، لا تنظر للحاجات هذه، فلا تعمل "فولو" لصفحات البلوجرز بتوع السفريات ولا بتوع المطاعم ولا البنات بتوع الموضة وبتوع الإكسسوارات. لا تمدن عينيك، هل هذا حرام يا شيخ؟ ما قلتش حرام، أنا أكلم واحدًا عنده هدف في حياته، عنده مشروع سيخرج به اليوم، إيه المشروع؟ أنا عاوز أبقى رجلًا حسن الأخلاق، فأنا أقول لك خذ حديثين أهم اشتغل عليهما: «من حسن إسلام المرء تركه ما لا يعنيه»، طب أنا دخلت على الحاجات هذه، حرام؟ ما أقولكش حرام، طالما ما فيها شيء حرام ما أقولكش حرام، أنت حر، بس أنت كنت في مرتبة بتنزل عنها قليلًا، عاوز تعمل ده اعمله أنت حر، إنما لو عاوز تترك ما لا يعنيك، فهذا مما لا يعنيك.

إزاي يا شيخ؟ أنا لازم آكل، يا أخي ما أنت ستأكل، أنت أصلًا تفتح عينيك على أكل لو كنت ممكن تعيش وتموت ولا تعرف أنه موجود في الدنيا أصلًا، صح ولا لا يا جماعة؟ آه والله، تعيش وتموت ولا تعرف أن فيه أكلًا اسمه كذا، فتحت عينك عليها، طب ولما فتحت عينك اشتهى القلب، البداية فين؟ نظرة بس. كنت ممكن تعيش وتموت ولا تعرف أن فيه موضة نزلت شكلها كذا، البداية فين؟ نظرة بس. تعيش وتموت ولا تعرف أن فيه مكانًا في الدنيا اسمه كذا وفيه المواصفات الفلانية، لكن عشان أنت متابع فلان وفلان وفلان الذين يتنططون ليل نهار، ابتديت تنظر، ولما نظرت اشتهى القلب، وقفت هنا ما وقفتش هنا؟ حاجة من اثنين: يا ستفضل تسعى عشان تجيب الأكلة الفلانية واللبس الفلاني والإكسسوارات الفلانية وتسافر الحتة الفلانية، فيضيع عمرك يا مسكين يضيع عمرك، يا إما ستفضل مكتئبًا ومتحسرًا وشايف أن ناقصك كثيرًا، وكان الحل ببساطة أنك لا تعرف.

قلنا لكم القصة قبل كده، تلخص القصة هذه، القصة هي قصة رمزية وأنا قلتها قبل كده مش فاكر فين، قصة رمزية جميلة، أنا بحب القصة هذه الحقيقة يا جماعة، وتلخص الحياة. بيقولوا إن مرة سائحًا سافر بلدًا نائية من البلاد التي ممكن يروحوها عشان يستجموا، طبعًا السائح هذا جاي منين؟ من مدينة صخب المدينة بالمولات بالأبراج بناطحات السحاب بالعالم الرأسمالي المتوحش الذي نحن نعيش فيه هذا، راح المدينة هذه، ركب مركبًا مع صياد، فلقى الصياد هذا يعمل شيئًا عجيبًا جدًا، يصطاد بسنارة.

فالرجل مستغرب، السائح هذا مستغرب، قال له: تصطاد بالسنارة ليه؟ قال له: أنا أصطاد، أنا محتاج كل يوم ثلاث سمكات لي ولمراتي ولابني مثلًا وخلاص، هو ده احتياجي. فقال له: لا، أنت ممكن تصطاد بشبكة، قال له: إيه الشبكة هذه؟ قال له: الشبكة هذه، وقعد يوصف له الشبكة، قال له: تصطاد بشبكة ليه؟ قال له: عشان أجيب سمكًا كثيرًا، قال له: طب بعد ما أجيب سمكًا كثيرًا؟ قال له: تبيعه، قال له: طب بعد ما أبيعه؟ قال له: تكسب فلوسًا كثيرة، قال له: بعد ما أكسب فلوسًا كثيرة؟ قال له: تعمل كل ما نفسك فيه، قال له: وبعدين؟ قال له: ستصبح سعيدًا، قال له: طب ما أنا سعيد، هو ده ببساطة يا جماعة والله القصة هذه على رمزيتها وبساطتها هي ملخصة الحياة.

السائح يأتي بثقافة ونفسية مختلفة، فهو مشرب ومتشبع بمناظر الثاني لا يعرفها أصلاً، ولا رآها ولا يعرف عنها شيئاً. فغاية السعادة بالنسبة له هي أن أروح آكل اللقمة مع أم العيال ونقعد نتسامر قليلاً وأنام، واليوم خلص على كده وأنا مبسوط. أما السائح الآخر، فهو يرى أمامه مئات الآلاف من الصور المتشبعة والمتغلغلة في قلبه؛ فالسعادة بالنسبة له هي ألا يكتفي بذلك، فيسعى لامتلاك سيارة وشقة، ومن عنده شقة يطمح لفيلا، ومن عنده فيلا يطمح لقصر وسفريات، بدليل أن السائح موجود في هذه الحتة الآن.

الحياة أبسط من ذلك يا جماعة، والسعادة أبسط من ذلك. لماذا لا نشعر بالسعادة؟ بسبب النوافذ التي فتحناها على قلوبنا. فمهما تحصل أنت في ماراثون، ترى من سابقك. الحل أين؟ لا تشاهده يا سيدي. هل هو الذي جاء وظهر أمامك؟ والله أنت الذي تذهب إليه وتضغط على صفحته بيدك، قم بعمل إلغاء متابعة وريح دماغك. ستظل هذه الصور تتعبك قليلاً ثم ستنسى، خلاص ستمحى من ذاكرتك، وستنسى الأكل والشرب والفسح والسفر، وتعيش حياة بسيطة هادئة سعيدة.

من حسن إسلام المرء تركه ما لا يعنيه؛ أغلقت فمك وغضضت بصرك، هذا كله إذا وصلت لأن تترك ما لا يعنيك، أليس كذلك؟ وبعدها ستسلم الناس منك، بل ستكون خفيفاً في القعدة وخفيفاً على الناس. كونك لا تتكلم فيما لا يعنيك سيجعل الناس تحبك، ولن يكرهوك، رجل لست حشرياً، ما لا يعنيك خلاص سكتَّ عنه. المهم تفاصيل كثيرة وأخلاق حسنة تندرج تحت هذا الأصل لو حققته، لا نحتاج أن نكلمك فيها.

قل مثل ذلك في الحديث الآخر: «أن تحب لأخيك ما تحب لنفسك». نحن تكلمنا أنه مشروع حياة حتى تصل إليه، ستأخذ وقتاً طويلاً حتى تصل إليه وتصبح تحب لأخيك ما تحب لنفسك. كم خلقاً حسناً يندرج تحت هذه؟ إنك تحب لأخيك ما تحب لنفسك يعني سلامة الصدر، تندرج تحتها. ومساعدة الإخوان، أن تساعد أخاك وتمد يد العون له، تندرج تحتها؛ فلو أحببت لأخيك ما تحبه لنفسك، هل ستظل جالساً تقول أنا أحب أخي ثم لا تساعده؟ والله أنا أحب ولكن لا أساعدك، هذه قصة أخرى! لا، أنا أحب لك ما أحبه لنفسي، فسأقوم بمساعدتك لكي تحصل عليه. أنتم فاهمون يا جماعة إلى أين ممكن أن نصل؟ نصل إلى أن اثنين يتنافسان على شيء، فتجده يأتي ليساعدك في الشيء الذي ينافسك عليه، لماذا؟ لأني أحب لك ما أحبه لنفسي.

وكما قال النبي صلى الله عليه وسلم، إذ نفى الإيمان عن المؤمن حتى يكون على تلك الصفة، الحديث: «لا يؤمن أحدكم حتى يحب لأخيه ما يحب لنفسه». حديث عجيب. ستجد تحت هذا الأصل أصولاً كثيرة جداً من حسن الخلق. إذا كنت أحب لأخي ما أحبه لنفسي، هل سأغتابه؟ لا، فأنا لا أحب هذا لنفسي فلن أفعله. فتجد نفسك توقفت عن الغيبة، لماذا؟ لأن الذي تغتابه هو أخوك، وأنا لا أحب هذا لنفسي فلن أغتابه. ولو اغتابه أحد أمامي سأسكت؛ فأنا دائماً أفكر في نفسي: ماذا أحب في هذا الموقف؟ أحب أن يدافع عن عرضي، فإذن سأدافع عن عرضه، لماذا؟ لأني أحب له ما أحبه لنفسي. كل تفاصيل المعاملة مع الخلق تدخل هنا.

من المواقف التي أثرت في حياتي، موقف للشيخ محمد عمرو عبد اللطيف رحمه الله، وأنا أحب هذا الرجل، لا أحبه لعلمه، بل أحبه لزهده في هذه الدنيا وأخلاقه. بعدما مات الشيخ محمد عبد اللطيف، لا يعرفه أحد، ربما في المسجد لا تجد واحداً أو اثنين سمعوا هذا الاسم من قبل. لما مات كانت جنازته مهيبة، وهذا شيء عجيب لرجل غير معروف. ومن المواقف التي أضحكتنا عنه وعرفناها بعد ما مات، كان الشيخ محمد ينزل السوق ويروح للرجل الذي معه خضار أو الست التي معها فاكهة، ممن يبدو عليهم الغلبة، فيذهب آخر اليوم ويبدأ يقول لها: لا، أنا الذي سأنقي، فيُنقي الحاجه التي قربت أن تبوظ، ولا يفصل في السعر، بل يدفع بالسعر الذي تبيع به ويمشي.

موقف عجيب جداً، ليس لأنه ينقي ويضع في النص ويأخذ له اثنين ثلاثة وينوي بها الصدقة، لا، بل يقول هذه الست ستعود والحاجة ستبوظ وستفقد قيمتها، فآخذها أنا وأكلها، وهي قربت أن تبوظ، ولا يفصل في السعر. هذا الخلق، هل أنا محتاج أن أكلمك عنه لو وصلت لأن تحب لأخيك ما تحب لنفسك؟ أنت وأنت داخل السوق ستقول: البائع هذا يحب ماذا؟ أو لو أنا مكان البائع سأحب ماذا؟ وسأروح وأفعلها فوراً، لأني أحب له ما أحب لنفسي. فلو كنت مكانه سأحب أن الناس لا تنهكني كثيراً في الفصال، خصوصاً أنني في الآخر كسبان ماذا؟ فستجد نفسك فوراً، وأنت داخل، تقول: أنا لو مكان البائع سأحب ماذا؟ وتعامل البائع بمثل ما تحب.

الحديث جميل، كنا لسه نقرؤه في رياض الصالحين بالأمس أو قبله، قال صلى الله عليه وسلم: «من أحب أن يزحزح عن النار ويدخل الجنة، فلتدركه منيته وهو يؤمن بالله واليوم الآخر، وليأت إلى الناس الذي يحب أن يؤتى إليه». ما معنى ليأت إلى الناس الذي يحب أن يؤتى إليه؟ يعني يوصل للناس الذي يحب أن هو يوصل له من الناس، ويعمل مع الناس الذي يحب أن هو يتعامل معه. طيب، لو أنت وصلت لأنك تحب لأخيك ما تحب لنفسك، هل أحتاج أن أقول لك هذا الحديث؟ هو أصلاً مندرج تحت ذلك لوحده، لأنك لو أحببت لي ما تحبه لنفسك، ستعمل معي ما تحب أن يُعمل معك.

إذاً، الشيء المشترك بين الحديثين أنهما أصلان كبيران لفروع كثيرة تحتهما، وكل حديث منهما مشروع حياة. صعب أن تترك ما لا يعنيك، وصعب أن تحب لأخيك ما تحب لنفسك، لكن لو وصلت إليهما فقد حققت أصلين كبيرين لفروع كثيرة من الأخلاق الحسنة.

لا نريد أن نزهقكم فالكلام كثير، نقف هنا، وكما اتفقنا نريد أن نخرج من هذا المجلس بمشروع حياة يا جماعة، الحياه أسرع مما نتخيل والله العظيم، والوقت أغلى مما نتخيل. ترك ما لا يعنيك، والله لو عرفت قيمة الوقت فقط لما ضيعته فيما لا يعنيك. ولذلك قالوا: أطيل الكلام، طيب أين أنتم؟ تقفون لماذا؟ وأين ستذهبون؟ ستذهبون لتفعلوا ماذا الآن؟ ستقعدون على ما لا يعنيكم، خليكم فيما يعنيكم. لو عرفنا قيمة وقتنا لن نضيعه فيما لا يعنينا، ومن الأمور العلمية التي تعينك على ترك ما لا يعنيك أن تعرف قيمة الوقت.

أما الحاجات العملية، فقد قال العلماء: ضع حصاة في فمك، قالوا هذا في الكتب، ضع حصاة في فمك لكي لا تتكلم كثيراً. انظروا كيف يصل العلماء معك، حريصون عليك وشايفين أن هذه حاجة مهمة، أن تعرف كيف تمسك لسانك؛ فهل يكب الناس في النار إلا حصائد ألسنتهم؟ فلازم تعمل حاجة، لأنك لو عرفت الحديث وسبت نفسك تتكلم، فسيأتي يوم القيامة ونلاقي ﴿مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ﴾ [ق: 18].

ابن عباس قال في هذه الآية: يكتب كل شيء، حتى قولك أكلت وشربت ورحت وجئت، كل حاجة تكتب، ثم ينظر في كتابك، فما كان فيها من خير أو شر أُثبت، وطرح سائره، لكن في الأول كله يكتب. كل حاجة تقولها تكتب، وكل حاجة تكتبها على الفيسبوك تُكتب، كله أحصاه الله. هل لو قلت لك: ماذا كتبت على الفيسبوك من سنة؟ لن تتذكر، ولا ماذا قلت بلسانك في اليوم الفلاني في الساعة الفلانية؟ والله رعب، الكلام الذي أقوله رعب، ﴿أَحْصَاهُ اللَّهُ وَنَسُوهُ﴾ [المجادلة: 6]. ستفتح كتابك وتجد: أنا قلت كل هذا؟ أنا عملت هذه البلاوي كلها؟ فالحل أين؟ اسكت، اترك ما لا يعنيك، اتركه.

هذا مشروع نريد أن نشتغل عليه، المشروع باختصار نريد أن نصبح ناساً مؤدبة، نريد أن يقال الناس هذه ناس مؤدبة، ناس أخلاقها كويسة، ونشيع ذلك في الناس، فيكون معروفاً أن هذه ناس أخلاقها كويسة. أقول قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك.