دخولتسجيل الدخول

صوم عاشوراء فوائد و حِكَم

أمجد سميرالشيخ أمجد سمير
  • مدة الدرس:
  • قراءة

السلام عليكم. الصوت واضح يا جماعة؟ الصوت واضح على التليجرام وعلى اليوتيوب؟ لو واضح بس حد يكتب إنه واضح.

بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صل على سيدنا محمد النبي وأزواجه وأمهات المؤمنين وذريات آل بيته، كما صليت على آل إبراهيم إنك حميد مجيد. أما بعد:

النهارده هنتكلم فيه شوية عن صوم عاشوراء، ومش عاوزين نقول كلام مكروه بيتسمع كتير. عاشوراء يُصام، ده معروف والناس كلها عارفاه وعارفة الأدلة بتاعته، لكن إحنا النهاردة عاوزين نركز حول معنيين: أول معنى؛ لماذا الصوم؟ وثاني معنى؛ لماذا عاشوراء؟ يعني اشمعنى بنصوم؟ اشمعنى بنصوم ما بنعملش حاجة تانية غير الصوم؟ دي حاجة، والمعنى التاني، ليه بنحتفي بعاشوراء؟

خلينا نبتدي من الآخر كده؛ النبي ﷺ أخبر أن «من صام عاشوراء احتسب على الله أن يكفر السنة التي قبله». فهذا من المستحب أن يصام عاشوراء. والنبي ﷺ لما قدم المدينة وجد اليهود يصومون ذلك اليوم، فلما سأل عن ذلك قالوا: «ذلك يوم عظيم نجا الله فيه موسى وقومه وأهلك فرعون وقومه، فصامه موسى شكرًا لله، فنحن نصومه»، فقال ﷺ: «نحن أولى بموسى منكم»، فصامه وأمر الناس بصيامه.

الحديث ده مشهور وكل الناس عارفاه، فممكن حد يتخيل أن النبي ﷺ لم يكن يصوم عاشوراء في مكة، لا، هو النبي ﷺ كان بيصوم عاشوراء في مكة، لكن لم يأمر غيره بصوم عاشوراء في مكة، إنما ابتدأ يأمر الصحابة بصوم عاشوراء لما قدم المدينة، لكنه كان بيصومه وهو في مكة ﷺ.

ركزوا بقى في الحديثين دول وخلوهم معكم على جنب: ليه نصوم عاشوراء؟ ليه بنصوم؟ ده أول معنى؛ ليه اشمعنى الصوم؟ والمعنى التاني؛ ليه عاشوراء؟ ليه عاشوراء؟ علشان اللي النبي ﷺ قاله لما قدم المدينة وجد اليهود يفعلون كذا وكذا. طيب هو ليه كان بيصومه في مكة؟ كان بيصوم عاشوراء في مكة لأن عاشوراء أصلاً يوم عظيم يا جماعة، وعاشوراء مش بس نجا الله فيه موسى، وإنما عاشوراء كما ورد في بعض الآثار أن سفينة نوح رست على الجودي في عاشوراء أيضًا، وصام نوح أيضًا يوم عاشوراء شكرًا لله عز وجل، فيوم عاشوراء يوم عظيم جدًا.

عاشوراء واقع في شهر المحرم، اللي هو أصلاً مأمور بصيامه كله؛ «أفضل الصوم بعد رمضان شهر الله الذي تدعونه المحرم». فشهر المحرم يصام كله، والنبي ﷺ لما أمر بصوم محرم قال فيه: «يوم تاب الله فيه على أناس، ويتوب فيه على آخرين». خلاص، فيوم عاشوراء يوم عظيم، لابد أن إحنا نستغله.

عاشوراء اللي هو أنهي يوم؟ طبعًا الكل حافظ إن عاشوراء هو يوم العاشر من المحرم، وده قول الجمهور فعلاً. لكن يا جماعة نركز؛ ابن عباس رضي الله عنهما والضحاك ذهبوا إلى أن عاشوراء هو اليوم التاسع وليس اليوم العاشر، يوم تسعة محرم هو عاشوراء، ده في قول ابن عباس وقول الضحاك خلافا للجمهور. والجمهور يقول إن عاشوراء هو اليوم العاشر. وطبعًا ليه اسمه عاشوراء؟ له وجه في اللغة بس مش وقتها نحكيها، لكن لها وجه، يعني ينفع اليوم التاسع يتسمى عاشوراء؟ ممكن، ولها وجه في اللغة، لكن على كل حال فيها قولين.

هو عاشوراء يوم تسعة؟ قولين. طب إحنا نعمل إيه؟ نصوم اليومين. ولذلك الإمام أحمد في رواية الميموني قال: «لا ندري هو التاسع أو العاشر، ولكن نصومهما». يعني ده أحمد يبقى الفقيه؛ يقول لا ندري هو التاسع أو العاشر ولكن نصومهما. فأنت تصوم تسعة وعشرة، بس هات حداشر كمان، يبقى تصوم تسعة وعشرة وحداشر، هذا أكمل الصوم. التسعة ده اللي هو بكرة اللي هو يوم الحد، وعشرة الاثنين، وحداشر اللي هو الثلاثاء، هذا أكمل الصوم إن شاء الله.

ليه أكمل الصوم؟ لمعنيين: أول معنى؛ لأن ورد في أحاديث النبي ﷺ: «لئن بقيت إلى قابل لأصومن يوم قبله»، وفي بعض الروايات جاءت "أو"، فالعلماء قالوا إن أكمل المقامات وأعلى المقامات أنك تصوم يوم قبله ويوم بعده، اللي هو يوم تسعة ويوم حداشر.

ثاني معنى؛ أنك تأتي أو تصوم عاشوراء بيقين. ليه؟ لأن عاشوراء إحنا قلنا هو يوم عشرة يا يوم تسعة، قولين لأهل العلم. وبعدين لو حسبت كمان اختلاف المطالع، يعني ممكن أنت يُشاف الهلال في بلدك في وقت، وفي بلد تانية في وقت تاني، لو حسبت اختلاف المطالع فإنت ممكن يبقى يوم عاشوراء عندك غير يوم عاشوراء عند الناس التانية، طب هو فين أي واحد فيهم؟ إلا عاشوراء، فإنت تصوم يوم قبله ويوم بعده، يبقى إنت أتيت أو صمت عاشوراء بيقين.

طب ليه كل ده؟ مصلحة الثواب كبير؛ يعني الثواب يكفر الله عز وجل به السنة التي قبله، فثواب عظيم جدًا مثل هذا الثواب، نتحرى لمثله طبعًا بلا شك.

ليه بقى بنصوم؟ واشمعنى عاشوراء؟ عاشوراء الله عز وجل نجا فيه موسى وقومه من الغرق وأغرق فرعون وقومه، فصامه النبي ﷺ شكرًا لله عز وجل وأمر الصحابة بصيامه. هنا يا جماعة فيه فوايد كتير جدًا إحنا هنحاول بسرعة كده نمر عليها، أول فايدة: أن الحدود تراب، والحدود والقوميات لا أصل لها في ديني، يعني ما ده مصري وده جزائري وده مغربي، الحدود تراب. إحنا في اليوم ده يا جماعة بنصوم شكرًا لله أن نجا موسى وقومه وأغرق فرعون وقومه. تعالوا نعيد صياغة الجملة دي: في هذا اليوم نصوم شكرًا لله أن نجا الله موسى، الذي هو من نسل يعقوب، اللي هو مش مصري؛ يعقوب مش مصري صحيح موسى ولد في مصر، لكن هو أصله مش مصري، يعقوب ما هوش مصري.

وأغرق فرعون المصري، على برضه الآن الناس ابتدأت تنبش؛ تريد إخراج فرعون لا المصري. لكن على كل حال، فرعون كان لقباً لملك مصر أصلاً، وليس اسمه. فرعون لفظ مثل ملك أو رئيس، فمن كان يحكم مصر كان يتسمى فرعون، ولذلك يقولون فرعون موسى، أي حاكم مصر وقت موسى عليه السلام.

فنحن نصوم شكراً لله أن نجى الله موسى، الذي هو أصلاً ليس مصرياً، وأغرق فرعون وقومه الذين هم مصريون. الجملة هنا تحتاج إلى إعادة صياغة لكي تستقيم: نحن في هذا اليوم نصوم شكراً لله أن نجى الله موسى المسلم، وأغرق فرعون الكافر. فالحُدود تراب.

وأنت تصوم عاشوراء، يجب أن تستشعر هذا المعنى. «إنما المؤمنون إخوة»؛ المؤمن أخوك ولو كان جزائرياً، مغربياً، موريتانياً، سعودياً، أمريكياً، إنجليزياً، أو ألمانياً، هو أخوك. وتفرح لنصرته إذا انتصر على عدوه. وإذا كانت هذه الحرب حرباً دينية من أجل العقيدة، من أجل «لا إله إلا الله»، فانتصر فيها المسلم -ولو كان على غير جنسيتك- تفرح لنصرته ولو كان على كافر من جنسيتك.

وانظروا إلى هذه الآية: ﴿لَّا تَجِدُ قَوْمًا يُؤْمِنُونَ بِاللَّهِ وَالْيَوْمِ الْآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ﴾ [المجادلة: 22]. نحن دائماً عندما نقرأ هذه الآية، نركز على سياق الآباء والأبناء، لكن لفظ «أو عشيرتهم» الذي ختم الله عز وجل به الآية، يعني أن الحدود تراب.

زمان لم تكن لدينا الحدود بالمصطلح الحديث، وإنما هي أُحدثت باتفاقية سايكس بيكو. وقسموا العالم لأنها حيلة قديمة ذكرها الله عز وجل في القرآن. فلو كنا جميعاً تحت خلافة واحدة، وأمة واحدة كما أخبر النبي ﷺ: «مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى»، فمن سيقدر علينا؟ مليار مسلم!

لكنهم أرادوا أن يتركوا كل دولة في حالها؟ لا، بل دخلوا إلى كل دولة وقسموها سياسياً إلى أحزاب، ورياضياً إلى فرق، ودينياً إلى ملل ونحل. وربنا قال هذا في القرآن سبحانه وتعالى عن فرعون وكيف حكم قومه، قال: ﴿إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا يَسْتَضْعِفُ طَائِفَةً مِّنْهُمْ﴾ [القصص: 4].

انظروا إلى الآية: ﴿وَجَعَلَ أَهْلَهَا شِيَعًا يَسْتَضْعِفُ طَائِفَةً مِّنْهُمْ﴾. هذه وسيلة قديمة للحكم: أن تجعل الناس شيعاً، وعندما تتعرض لطائفة، تجد بقية الطوائف تسقف لك. الآن لو حصلت حرب في الجزائر، صحيح يربطنا بهم عروبة وغيرها، لكن في الآخر هي دولة لها رئيسها وجيشها، والمغرب له رئيسه، وليبيا لها رئيسها، والسودان له رئيسه، وكل واحد في حاله. ﴿وَجَعَلَ أَهْلَهَا شِيَعًا يَسْتَضْعِفُ طَائِفَةً مِّنْهُمْ﴾؛ فبمجرد أن تستضعف طائفة، بقية الطوائف حتى لو لم تبارك هذا الفعل، على الأقل ستسكت؛ لأنهم يقولون: هؤلاء ليسوا منا، هؤلاء طائفة غيرنا. لذا يجب أن ننتبه ونكون واعين جداً لهذا المخطط. الحدود تراب، والمؤمن أخوك أياً كانت جنسيته.

ولذلك عندنا مصطلح كبير وهو «الولاء والبراء»، ليس وقته الآن لنفتحه، لكنه مصطلح مهم جداً، ومن يسمعه لأول مرة يجب أن يبحث عن معناه؛ ما هو الولاء الواجب؟ وما هو البراء الواجب؟ لأن هناك مسائل في الولاء والبراء قد تخرج الإنسان من الملة أصلاً.

نحن أولى بموسى؛ لأن موسى لم يكن يهودياً، بل كان مسلماً، وكذلك عيسى عليه السلام، وكل الأنبياء دينهم الإسلام. قال النبي ﷺ: «نَحْنُ مَعَاشِرَ الْأَنْبِيَاءِ إِخْوَةٌ لِعُلَّاتٍ، دِينُنَا وَاحِدٌ، وَأُمَّهَاتُنَا شَتَّى». وإخوة العلات هم الإخوة من أب واحد ولكن من أمهات مختلفة. والأمهات هنا هي الشرائع، أما الدين فهو واحد وهو دين الإسلام، أي العقيدة.

عقلياً، لا يتصور أبداً أن يأتي نبي ويقول «عزير ابن الله»، ثم يأتي بعده نبي يقول «المسيح ابن الله»، ثم يأتي النبي في الآخر ويقول «قُلْ هُوَ اللَّهُ أَحَدٌ اللَّهُ الصَّمَدُ * لَمْ يَلِدْ وَلَمْ يُولَدْ * وَلَمْ يَكُن لَّهُ كُفُوًا أَحَدٌ». هذا عبث، بل عقيدة الأنبياء كلهم هي عقيدة الإسلام. فلماذا نحن أولى بموسى؟ لأننا المسلمون حقاً، وموسى كان مسلماً، وقد قال لقومه: ﴿اسْتَعِينُوا بِاللَّهِ وَاصْبِرُوا إِن كُنتُم مُّسْلِمِينَ﴾ [الجاثية: 11]. هذا قول موسى لبني إسرائيل، فنحن أولى بموسى وبكل مسلم في هذا العالم أياً كانت جنسيته.

المعنى الثاني الذي يجب أن نقف معه في عاشوراء، هو أننا عندما نصوم عاشوراء لا يجب أن يكون يوماً عادياً، صياماً ثم نأخذ الثواب ونمضي، بل يجب أن تخرج بمعانٍ تتربى في داخلك. وأول هذه المعاني هي عقيدة الولاء والبراء، والتي يجب أن تبحث عنها عند أهل العلم الموثوقين، لأن هذه المسألة قد يحدث فيها خلط، لكننا لن نستطيع التفصيل فيها هنا.

يبقى ده أول معنى تستحضره، معنى الولاء والبراء. وإن الحدود تراب إن احنا اتضحك علينا بده، خلاص واتضحك علينا يا جماعة أوي، مش ماشي، هنقولها في المسألة اللي جاية.

المسألة الثانية: إزاي النبي عليه الصلاة والسلام لما وجد اليهود يصومون صام عليه الصلاة والسلام وأمر الصحابة أن يصوموا؟ فقالوا: يا رسول الله، إن هذا يوم تعظمه اليهود. كأن هذا أشكل على الصحابة، وكأن هذا المعنى ترسخ عندهم؛ مشكلة على الصحابة يعني إحنا إزاي بنعظم اليوم ده إزاي بنصومه واليهود بيعملوا ده وإحنا المفروض ما نتشبه بهم؟ فأشكل عليهم، فقال: «لئن بقيت إلى قابل لأصومن التاسع». يعني مشترك الصوم؟ لا، قال: هصوم التاسع، هصوم التاسع إلى العاشر. ليه؟ علشان يخالف اليهود؟ ده أول معنى. والمعنى الثاني علشان عاشوراء يصام بيقين برضو.

لكن خايف المعنى الأول، وده اللي إحنا عاوزين نقف معه: فكرة أنه مخالفة أهل الكتاب، أن إحنا لا نتشبه بأهل الكتاب. والنبي صلى الله عليه وسلم أخبر عليه الصلاة والسلام: «لا تتبعن سنن من كان قبلكم، حتى لو دخلوا جحر ضب لدخلتموه»، قالوا اليهود والنصارى، فمن غيرهم؟ فالنبي صلى الله عليه وسلم أخبر بهذا، أخبر أن هذا سيكون واقعًا؛ أنه هنتبع سنن هؤلاء، وسننهم يا جماعة هنتبعها في كل شيء، بل واتبعناها حتى في اللي بيسموه نمط الحياة، اللي هو الـ "لايف ستايل".

إحنا متبعينهم لدرجة كبيرة جدًا، وأنا هسألكم سؤال دلوقتي هتفاجئوا بإجابته. معظم اللي بيسمعني طبعًا من مدن، يعني لو حد بيسمعني من قرى فهو خارج هذا السؤال، لكن اللي من المدن، اللي عايش في القاهرة مثلاً، لو جيت قلت لك: أيهما أشبه بنمط حياتك أنت؟ واحد عايش في الصعيد، ولا واحد عايش في باريس أو لندن؟ أنهي نمط حياة أقرب؟ أنا مش بتكلم حلال وحرام دلوقتي، إحنا بنتكلم في نمط حياة؛ خروجاتك، طريقة أكلك، طريقة شربك، طريقة لبسك.

أيهما أشبه بنمط حياتك أنت؟ راجل مسلم مصري معك من نفس دولتك في الصعيد، ولا واحد أجنبي عايش في لندن أو باريس؟ هتلاقي إن نمط حياتك أشبه بنمط حياة الفرنسي أو الإنجليزي، مش المصري اللي عايش في الصعيد. وخلي بالك لأن أنا مش بتكلم عن فقر وغنى، يعني لو أنت واحد صعيدي بس مليونير، أنا مش بتكلم في فقر، لكن هو نمط حياته يختلف تمامًا عن نمط حياتك أنت. فإحنا لدرجة كبيرة غزينا واتبعنا سنن من كان قبلنا فعلاً في كل شيء، تقريبًا خلاص حتى إن صرنا حياتنا أشبه بحياتهم.

النهاردة أنت لما بتسافر برة، اللي منكم سافر برة، أصبح الانبهار -زي زمان اللي بيسافر برة ما بقاش ينبهر قوي- ليه؟ هو تقريبًا الدنيا واحدة خلاص. سواء حتى الفسح والخروجات، تلاقي المولات والأماكن مش... خلاص نمط الحياة واحد، الأكل في المطاعم "التيك أواي". ونقطة الحقيقة دي يا جماعة ده برضو قصة كبيرة، أنا بس عاوز أشير إليها إشارة خاطفة مخلة؛ يعني أنا مش هينفع تكون غير مخلة، بس على الأقل نبقى سمعناه.

نمط الحياة دي يا جماعة هدم كثيرًا من الثوابت. يعني عشان ما يجيش واحد يقول لي: إيه يا عم أنت مكبر المواضيع ليه؟ إيه المشكلة في نمط الحياة مختلف ولا شبه دول ولا لا؟ هو ده فيه ثوابت كتير اتدمرت، أولها الترابط الأسري. يعني فكرة انتشار المطاعم، الأكلات السريعة، الوجبات السريعة دي جزء كبير جدًا ومساهم كبير جدًا في تدمير الترابط الأسري. زمان قلة وجود هذه الأماكن، سواء المطاعم أو غيرها، كان لازم قعدة الغدا دي تكون قعدة مقدسة في البيت، لازم كلنا نجتمع على الغدا.

النهاردة بتلاقي عادي جدًا الولد بياكل في المطعم الفلاني، والأم مع العيال في الحتة الفلانية، وجوزها مش عارف فين، وتفككت الأسرة. ولذلك أنا أتذكر أن كان -مش فاكر أفغانستان أو بلد تانية- لغاية عهد قريب كانوا رافضين تمامًا دخول "ماكدونالدز" للبلد، وشايفين أن ده غزو فكري. الغزو فكرة إيه؟ يعني أنت بتاكل البرجر مثلاً يحسبوا لك أفكار؟ لا، أنت بمجرد ما فتحت الباب لتغيير النمط الحياتي لك، خلاص بقى، حدث ولا حرج. وأنا قلت لك سألتك سؤال يمكن كانت إجابته صادمة للبعض لما ابتدى فعلاً يتأمل أن بقيت حياتك أشبه بحياة الأجانب عن المقارنة بحياة ولاد بلدك اللي هم من فلاحين أو من الصعيد.

إزاي النبي صلى الله عليه وسلم كان حريصًا جدًا على هذه المسألة؟ مسألة أن إحنا لا نتشبه باليهود حتى في أمر مثل هذا، حتى وإحنا أولى بموسى عليه السلام. لكن «لئن بقيت إلى قابل لأصومن التاسع»، هنا في مسألة الحقيقة أنا ما بحثت فيها، لكن لعلي أنصت لها أنا برضو هقولها، وهي مسألة النبي صلى الله عليه وسلم يا جماعة؛ إحنا قلنا كان بيصوم وهو في مكة وبعدين قدم المدينة فوجدهم يصومون، والنبي صلى الله عليه وسلم فضل على كده عشر سنين لغاية ما مات عليه الصلاة والسلام.

في التسع سنين دول، اللي معنا دلوقتي إنهم قالوا: يا رسول الله، هذا يوم تعظمه اليهود (والنصارى في رواية)، قال: «لئن بقيت إلى قابل لأصومن التاسع» ومات عليه الصلاة والسلام. معنى كده أن هذا الكلام قيل في السنة التاسعة. طب ما هم صاموا السنة الأولى والثانية والثالثة والرابعة والخامسة والسادسة والسابعة والثامنة، ليه في التاسعة؟ الحقيقة ده محل بحث، الله أعلم، محتاجة أبحث في الموضوع ده. لكن هل لما خلاص كان هذا من جملة ما استقر في نفوس الصحابة مسألة أن النبي صلى الله عليه وسلم كان يحب أن يوافق أهل الكتاب فيما لم يؤمر به؟

دي كانت بدايات النبي عليه الصلاة والسلام أنه كان يحب أن يوافق أهل الكتاب فيما لم يُؤمر به. فهل مثلاً بعد استقرار التشريع الهادي من المسائل التي جاءت تدريجياً مسألة البراءة أو عدم التشبه أو كذا؟ فلما استقرت عندهم سألوا الله أعلم، أنا مش بقول ده، لكن هي محتاجة تبحس.

يبقى ده معنى ثانٍ؛ وأنت بتصوموا يوم عاشوراء تستحضروا معنا أن الحدود تراب، وأن «إنما المؤمنون إخوة»، وتقروا في الولاء والبراء لحد موثوق في علمه وفي ديانته وفي عقيدته، مهم جداً لأن الحتت دي فيها شطط. وأنت بتصوم بكرة اللي هو يوم تسعة، تستحضر معنى أنك بتخالف اليهود في تعظيمه وفي إفرادهم ليوم عاشوراء، فأنت بتصوم يوم زيادة مخالفة لليهود، فده يأخذك على طول لمعنى: إذا كنت بتخالفهم في ده، فتخالفهم فيما هو أعظم من باب أولى.

فيبقى في دماغك فكرة أن المخالفة أو الموافقة الظاهرة بتجلب الموافقة الباطنة، ودي مسألة مهمة جداً؛ موافقة الظاهر تجلب موافقة الباطن. و لذلك هتلاقي اللي شبه شكلك، مش في ملامحك، بل اللي شبهك في طريقة لبسك وفي طريقة كلامك، في التفاصيل دي تلاقي نفسك لو دخلت على مجموعة فيهم واحد شبهك في الحاجات دي تمل له قبل ما تعرف خلفية كل واحد إيه، لكن نفسك تميل له. ويمكن ده حصل لكم أن الناس دخلت محاضرة مثلاً كبيرة شوية أو راحت تدريب معين، أول ما بتدخل بتلاقي نفسك لو في كذا مكان ممكن تقعد فيه غصب عنك كده، بتلاقي أنك بتروح للي شبهك؛ الموافقة في الظاهر بتجلب موافقة في الباطن، فتميل في الباطن.

يبقى وأنت بتصوم يوم تسعة، يعني بكرة، ما يعديش عليك كده برضو، لا، أنت تستحضر معنى مخالفة اليهود. ليه بقى بنصوم؟ ما إحنا كده عرفنا ليه عاشوراء؛ يبقى عاشوراء هو اليوم الذي نجى الله فيه موسى ونجى فيه نوح، ده اليوم الذي استقرت فيه السفينة على الجودي، كما جاء في بعض الأثر.

اشمعنى الصوم؟ قبل ما نقول اشمعنى الصوم هنا في عاشوراء، الصوم ده لو بصيت عليه ورجعت لورا شوية وبصيت من بعيد، هتلاقي أنك لو صمت الصيام المطلوب منك، سواء على سبيل الوجوب أو على سبيل الاستحباب في السنة كلها، هتعدي أو تقارب نصف العام صائماً. بسم الله الرحمن الرحيم، عندك شهر رمضان إدي شهر كامل، وشهر شعبان شهر كامل إلا يوم أو يومين، وشهر المحرم شهر كامل، دول يتصاموا زي ما هم كده، إدي كده تلات شهور. وعندك عشرة أيام بتوع ذي الحجة، اللي هو تسعة لأن اليوم العاشر حرام صوموا ليوم العيد، وعندك ستة أيام اللي هم بتوع شوال، إدي كمان ستة أيام، إدي كده تلات شهور ونص، يعني تقريباً تلت السنة أو أربع شهور. ولو ما صمتش كل شهر غير تلاتة أيام، فأنت كده عديت تلت السنة. طب لو صمت كمان اتنين وخميس في كل أسبوع، فانت هتلاقي نفسك مقرب من نص السنة صائماً.

ليه ده؟ علشان يا جماعة الصوم ده عبادة عجيبة جداً. وبرضه مش وقته أننا نشرك في الصوم، لكن هنقول معنيين مهمين جداً عاوزين نخرج بهم، عشان وأحنا بنصوم بكرة وبعده نكون مستحضرين المعاني دي. أول معنى أن الصوم -كما سماها أبو فهر رحمه الله محمود شاكر- قال: «عبادة الأحرار». الصوم عبادة الأحرار؛ أنت أسير شهوات نفسك، فلو ما جاهدتش نفسك عشان تخرج من هذا الأسر، هتظل عبداً للشهوات. وربنا سبحانه وتعالى ذكر لفظاً عجيباً قال: ﴿أَفَرَأَيْتَ مَنِ اتَّخَذَ إِلَٰهَهُ هَوَاهُ﴾ [الجاثية: 23]، ده ممكن واحد مننا يبقى إلهه هو كل ما أمره به هواه، وكل ما نهاه عنه هواه، ففي ناس عبيد للهوى، عبيد للشهوة.

إزاي نتخلص من هذا؟ أنك تجاهد نفسك، ولن تجاهد نفسك بمثل الصوم، عبادة الأحرار. ولذلك هتلاقي الصوم ربنا بيندبك أنك تصوم نصف العام تقريباً صائماً، ده إحنا ما زودناش ما قلناش تصوم يوم وتفطر يوم، ده إحنا كده جبنا الحاجات اللي هي على القد، فهتلاقي نفسك نص السنة صائماً لتتحرر من هذه العبودية. يبقى ده أول معنى، وأنت بتصوم تستشعر المعنى ده؛ معنى أنك تجاهد نفسك عشان تصير حراً، لا تصير عبداً لشهوتك.

شوفوا يا جماعة المعنى ده، معنى بليغ جداً وأنا اتكلمت عنه قبل كده في فيديو المقاطعة؛ معنى أنك ما ينفعش تكون عبد للحاجات دي. كيف؟ عمر رضي الله عنه لما رأى جابر رضي الله عنه ماشي كده وماسك حاجة، فقال له: «إيش ده؟»، فقال: «لحم اشتهيته فاشتريته»، عادي يعني على لحمة رحت اشتريت لحمة، مين فينا ما بيعملش كده؟ نفسي جابتني على حاجة سهلة. لكن انظر إلى عمر المربي، قال: «أوكلما اشتهيت اشتريت؟».

هتجاهد نفسك إمتى؟ هو حرامي يعني أكل لحمة؟ ما هو ممكن واحد ياكل لحمة، لكن رُدَّ لعمر رضي الله عنه؛ طبعاً لو كان واقف قدامه ما تقدرش تقول له كده، هيديك بالدرة على طول على دماغك، هو سيدنا عمر رضي الله عنه فقيه وملهم، ده راجل بيربي رجالاً، بيربي أمة؛ «أوكلما اشتهيت اشتريت»، خلاص هتصير عبداً لهواك، عبداً لشهوتك.

ويُروى في وقت حرب أكتوبر، وطبعاً الدول العربية -مش هنقول المسلمين، هو كان ساعتها إيش اللي بيجمعهم؟ نخوة العروبة- كانت بتساند مصر في الحرب، من الدول دي السعودية، فيُروى -الله أعلم بمدى صحته لكن المعنى جميل لو صح- أن أمريكا بعتت تهديداً مغلفاً للملك فيصل وقتها، أننا ممكن نقطع عنكم المعونات وممكن كذا وكذا، ففيصل رد؛ طبعاً السعودية ما كانتش وصلت للطرف اللي هم عايشين فيه دلوقتي، ففيصل الملك فيصل ساعتها فيما يُروى قال له: «إحنا بدنا نشرب مية ونأكل تمر».

هل يستطيع أن يقول هذه الكلمة الآن ملك ولا غيره؟ سيبك من أنا، أنا ما بتكلمش على مالك ورئيس، أنا بتكلم على فكرة أنك لما ما تكونش عبد للحاجات دي إزاي بتصير حراً؟ قرارك خارج من منك مش غيرك اللي بيمضيه عليك.

قال له: «إحنا بدو، هنشرب مية وناكل تمر»، يعني هتقطعوا لنا المعونات؟ يعني هتعملوا إيه؟ إحنا عايشين ناكل تمر ونشرب مية وشكراً. فبتحرر إزاي؟ أتحرر بالصوم، فافهم بقى فقه الصوم ده. فيكون عاشوراء ما هو إلا يوم من جملة أيام ندبت بصومها، فافهم الحكمة أنك تتحرر.

يبقى ده أول معنى. ثاني حاجة يا جماعة، سيبكم من ترك، دي هنجي لها في الخلية الثالثة. خلينا في معنى ثاني دلوقتي، أن الصوم صبر. الصوم صبر؛ بتصبر عن الطعام والشراب والشهوة من الفجر لغاية المغرب. الصوم صبر. وأنتم عارفين أن العبد يسير إلى الله عز وجل بين صبر وشكر؛ دائماً المقام الذي يذكر مع الصبر هو مقام الشكر، لأنك إما في نعمة فبتشكر، وإما في بلاء فبتصبر، فأنت إما تسير إلى الله صابراً وإما شاكراً.

فإذا صمت شكراً تكون قد جمعت بين المقامين؛ أنت في صومك لعاشوراء جمعت بين مقامي الصبر والشكر. صبر إزاي؟ لأنك صائم، والصوم صبر. وشكر إزاي؟ لأن الله نجى في هذا اليوم موسى وقومه وأغرق فرعون وقومه، فأنت تصومه شكراً لله سبحانه وتعالى، فتكون قد جمعت بين مقامي الصبر والشكر في عبادة واحدة.

ولذلك هتلاقوا المعنى ده متكرر في الشرع؛ معنى أنك بتصوم شكراً لله عز وجل. في عاشوراء بتصوم شكر. ويوم الاثنين ليه بتصوم؟ قال النبي ﷺ: «هذا يوم ولد فيه ويوم بعثت فيه»، فكان النبي ﷺ بيصومه شكراً. وكأن هذا المعنى مستقر كمان عند الأنبياء؛ موسى صامه شكراً، ونوح صامه شكراً لما استوت السفينة على الجودي، وده معناه ثاني هنيجي له كمان شوية، وهو فكرة ربط الشكر بالطاعة. خلاص ما هياش كلمة باللسان «الحمد لله واشكر فضلك يا رب»، جميل وكل حاجة، لكن فين العبادة؟

نرجع تاني لصيام يوم عرفة. إحنا ليه بنصوم يوم عرفة؟ من معاني صيام يوم عرفة يا جماعة أن هذا اليوم هو يوم إكمال الدين وإتمام النعمة؛ ﴿الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا﴾ [المائدة: 3]. فنصوم عرفة شكراً لله عز وجل أن أتم علينا النعمة وأكمل لنا الدين.

المعنى الثالث وهو معنى مهم جداً وركزوا فيه، أن الصوم ترك. الصوم ترك. وجميع العبادات يا جماعة هي عبادات فعل؛ أي عبادة هتيجي على دماغك هتلاقيك بتعمل حاجة، بتحدث شيئاً؛ الصلاة تقوم وتكبر وتركع وتسجد، الزكاة بتطلع فلوس، الحج بتطوف وتسعى وهكذا، العبادات كلها تلاقيها كده، إلا الصوم؛ الصوم أنت ما بتعملش، مش بتعمل، مفهومة دي؟ الصوم أن تمتعملش، يعني إيه ما بتعملش؟ أنت ما بتاكلش ولا بتشرب ولا بتجامع من الفجر للمغرب، فالصوم عبادة ترك.

طب وإيه يعني عبادة ترك؟ ركز بقى معي هنا، عبادة ترك دي بقى مهمة جداً؛ فكرة أنك تترك لله زي ما بتفعل لله. المعنى ده لازم نخرج به من صيام بكرة وبعده، يعني اللي هيقدر يصوم تلات أيام، صوم بكرة وبعده وبعده؛ تسعة وعشرة وإحدى عشر، لو ما قدرتش تصوم تسعة وعشرة ففي برضو ظروف، صوم عشرة ده أقل شيء. وأنت بتصوم انتبه لمعنى الترك.

يعني إيه معنى الترك يا جماعة؟ أنك مش هتعرف تربي نفسك ولا هتعرف تقرب لربنا سبحانه وتعالى إلا بأنك تترك أموراً له سبحانه وتعالى. وشوفوا كده في الحديث اللي كلنا حافظينه واللي ربنا سبحانه وتعالى بيمدح فيه أهل الصيام، يقول ﷺ: «كل عمل ابن آدم له، الحسنة بعشر أمثالها إلى سبعمائة ضعف، إلا الصوم فإنه لي وأنا أجزي به». إنه ترك طعامه وشرابه وشهوته لأجلي، ترك، شايفين ترك دي؟ ترك الطعام والشراب والشهوة لأجلي.

تجد لفظة الترك في حديث ثاني في معنى قيام الليل، هينبهك برضه لمعنى جميل جداً؛ الحديث أن ربنا سبحانه وتعالى يضحك لثلاثة نفر، أو يتعجب من سلاسة هذا، فكان الذي ترك فراشه وترك زوجته وقام لله عز وجل يصلي، قال ﷺ: «ولو شاء لرقد». فكرة الترك يا جماعة؛ هقول لكم يعني إيه دلوقتي عشان تفهموا اللي أنا عاوز أقوله.

دلوقتي يا جماعة خلونا في مسألة قيام الليل، كثير منا بيجي يدخل ينام يلاقي نفسه بيفرك مش عارف ينام، يقول لك طب أما أقوم أصلي لي ركعتين، جميل وخدت ثواب قيام الليل، لكن المعنى ده أو الحالة دي أنت لم تترك، خلاص أنت أصلاً مش جاي لك نوم، ولو كان جالك نوم كنت نمت. بخلاف الرجل اللي تعبان وداخل يدوبك لقى سريره عشان يرمي نفسه عليه، فترك النوم وقام لله، ده ترك.

يعني إيه هو ترك إيه يا جماعة؟ هتلاقي نفسك دائماً لما نيجي نقول تركك هتلاقي نفسك بتترك شهوة؛ النوم شهوة، الطعام شهوة، الشراب شهوة، المرأة شهوة، بتترك شهوة، يعني إيه بتترك شهوة؟ يعني بتهذب نفسك، يعني ما بقتش عبد هواك، ما بقتش عبد لنفسك. فصاحبنا ده اللي هو مش قادر فقام وصلى، ده ترك. طب صاحبنا اللي عمال يفرك ويتقلب ومش جاي له نوم، ده عبد لله عز وجل فعل، لكنه لم يترك، فاهمين دي؟ فالله عز وجل يريد منك كما يريد أن تفعل، يريد منك أن تترك.

ولذلك يا جماعة كان ممن يضحك الله لهم كما جاء في الحديث: «قوم ساروا ليلتهم حتى إذا كان النوم أحب إليهم مما يعدل به، قام أحدهم يتلو آياتي». فهذا الرجل يضحك الله إليه. خلي بالكم يا جماعة، الراجل ده ربنا ما خدش الثواب الكبير ده لدرجة ربنا سبحانه وتعالى يضحك إليه لمجرد أنه قام الليل، قيام الليل فعل، هو ما خدوش بالفعل، هو أخذ هذا الثواب بفعل وترك.

بفعل وترك، والترك أعظم من الفعل، وإلا فالفعل نفسه. يا جماعة، الرجل الذي وقف هذا في الحالة التي سنوصفها كمان شوية، خلونا نوصفها ونرجع.

﴿قَوْمٌ سَارُوا لَيْلَتَهُمْ﴾، حتى إذا كان النوم أحب إليهم مما يعدل به. عارفين إيه؟ إيه معنى أحب إليهم مما يعدل به؟ يعني لو جئت وقلت لك: ما تنمش وهديك مليون جنيه، تقول لي: يا باشا لا هنام، لو حطيت لي إيه أنا مش شايفك أصلاً هنام، هو ده أحب إليهم مما يعدل به، فدي الحالة بتاعتهم.

نرجع بقى لصاحبنا هذا، هو صاحبنا هذا وقف عمل إيه؟ صلى، صح ولا لا؟ أنا مش لأهون من الصلاة، لكنه في الآخر صلى، يعني عمل حاجة زيادة. كبر وقرأ الفاتحة وسورة وركع وسجد وقرأ وتشهد وسلم، عمل حاجة زيادة عن كده، الصلاة هي هي، الفعل واحد.

أمال إيه اللي عظم به الفعل؟ الترك. فهمتم ليه يا جماعة؟ الترك. ولذلك كانت صلاة الليل أعظم أجراً من صلاة النهار، ليه؟ ما هو الفعل واحد برضه، أنت صليت ركعتين بالنهار، ما هم الركعتين اللي هتصليهم بالليل كهيئة كأفعال. هو هنا في قصة، قصة إيه؟ الترك، فإحنا عاوزين ننتبه للمعنى، معنى الترك لله سبحانه وتعالى.

هذا الترك تجدوه طبعاً واضحاً جلياً ظاهراً فين؟ في الصلاة، إنك بتترك الطعام والشراب والشهوة. طب ليه؟ هل ربنا يريد عذابك؟ لا، يريد تهذيب نفسك، يريد تهذيب هذه النفس، والله سبحانه وتعالى هو خالق هذه النفس، هو أدرى بما يصلح هذه النفس.

فعشان كده ربنا لما شرع لك أنك تصوم تقريباً نص السنة كما شفنا، هو أدرى بما يصلح هذه النفس: ﴿أَلَا يَعْلَمُ مَنْ خَلَقَ﴾ [الملك: 14]. يبقى من فاعل أو من مفعول؟ يبقى ألا يعلم الله من خلق؟ فالله عز وجل يعلم سبحانه وتعالى ما يصلحك، فشرع لك الصوم نص السنة، ليه؟ عبادة الأحرار، ركزوا في المعاني تاني، هنعيدها، هي عبادة الأحرار، فأنت بتتحرر من شهواتك ومن تسلط نفسك عليك.

كذلك هي ترك، الصوم ترك، وإحنا مهم جداً ننتبه لمعنى الترك لله. معنى الترك لله: «فقمت عنها وهي أحب النساء إلي»، اللهم إن كنت فعلت ذلك ابتغاء وجهك ففرج عنه. هو عمل إيه؟ ترك، ترك شهوة، فالصوم عبادة ترك، فننتبه لمعنى الترك.

ثالث حاجة أنك بالصوم تكون قد جمعت بين مقامي الصبر والشكر، يبقى ده ليه بنصوم؟ طب ليه عاشوراء؟ يبقى وأنت بتصوم عاشوراء يا جماعة، أول حاجة نحن أولى بموسى منهم. الحدود تراب، المؤمنون إخوة، الولاء والبراء، كل دي معاني، أنا باقول لكم كلمات صغيرة حتى لو تكتبوها علشان تستحضروا هذه المعاني.

يبقى هذا أول معنى، ثاني معنى وأنت بتصوم بكرة يوم تسعة تستحضر معنى مخالفة اليهود وعدم التشبه بأهل الكتاب، وطالما لا نتشبه بهم في مثل هذه الأمور يبقى غيروها من باب أولى، حتى نمط الحياة اللي زي ما قلنا صرنا فيه كلنا شكل واحد وشبه بعض، وإن هذا التشابه في الظاهر يثمر تشابهاً في الباطن.

أقول قولي هذا وأستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.