السلام عليكم ورحمة الله وبركاته. هذا الفيديو الثاني من الفيديوهات الخاصة بيوم عرفة وعيد الأضحى. الحقيقة كنت مقرر أتكلم في الفيديو ده عن أعمال عرفة، خصوصًا إن النهارده يوم التروية؛ لكن لقيت إن ده بيتقال كتير وناس كتير عارفاه، فقررت إني في الفيديو أتكلم عن بعض المعاني الخاصة بأعمال عرفة. زي إيه؟ تعالوا نخش في الموضوع على طول.
أول عمل من أعمال عرفة، وتقريبًا كل المسلمين عارفينه ومعظم المسلمين بيعملوه، هو الصيام. وده لأن فيه فضل كبير في صيام يوم عرفة، وفي الحديث أن النبي صلى الله عليه وسلم قال: «أحتسب أن يكفر السنة التي قبله والسنة التي بعده». مش عاوز أتكلم عن فضل الصيام وكده، عاوز أتكلم عن معنى الصيام في عرفة.
الأول عاوزين نقول معنى عام عن الصيام في الإسلام، إن الصوم يرتبط بالشكر، إنتوا عارفين الصوم صبر، والدين صبر وشكر. لكن العجيب إن هتلاقوا إن فيه معنى إنك ممكن تصوم شكرًا لله عز وجل، هتلاقوا المعنى ده موجود في صيام عاشوراء. ده نص كده إن موسى لما النبي صلى الله عليه وسلم قدم المدينة وجد اليهود يصومون ذلك اليوم، بتصوموا ليه؟ قالوا: ذلك يوم نجى الله فيه موسى وأغرق فرعون، فصامه موسى شكرًا لله، فنحن نصومه. فقال النبي صلى الله عليه وسلم: «نحن أولى بموسى منكم» وصامه وأمر بصيامه. يبقى هنا صيام عاشوراء شكرًا لله.
صيام يوم الاثنين: النبي صلى الله عليه وسلم لما سئل عن صيام يوم الاثنين قال: «ذاك يوم ولدت فيه، ويوم بعثت فيه». فكان النبي صلى الله عليه وسلم يصوم يوم الاثنين شكرًا لله. كذلك يوم عرفة، هذا اليوم نصومه، ومن معاني الصوم في عرفة شكر الله عز وجل. والعجيب يا جماعة هتلاقوا النبي صلى الله عليه وسلم جمع بين صيام عاشوراء وصيام عرفة في حديث واحد؛ قال إن صوم عاشوراء يكفر السنة التي قبله، وصوم عرفة يكفر السنة التي قبله والسنة التي بعده. فجمع بينهما في حديث واحد، وكأن هنا فيه معنى مشترك بين صيام عاشوراء وصيام عرفة، وده اللي إحنا عاوزين نتكلم عنه دلوقتي.
صيام عاشوراء يا جماعة، النبي صلى الله عليه وسلم كان ليه بيصوم عاشوراء؟ وليه اليهود صاموا من قبل النبي صلى الله عليه وسلم؟ وليه موسى صام من قبل اليهود ومن قبل النبي عليه الصلاة والسلام؟ لمعنى المفاصلة، ولمعنى علو الدين ودحض الكفر وأهله. المعنى ده معنى كبير جدًا وخافت في نفوس معظم المسلمين اليوم. معنى إن ظهور الدين وعلو الدين، وكذلك دحض وهزيمة أهل الكفر، ده معنى عظيم جدًا يشكر الله عز وجل له، ويصام له شكرًا لهذا المعنى. وهتلاقوا المعنى ده موجود في صيام عاشوراء وموجود في صيام عرفة.
صيام عاشوراء: ذلك يوم نجى الله فيه موسى وقومه وأغرق فرعون، فصامه موسى شكرًا لله فنحن نصومه. فصامه النبي صلى الله عليه وسلم وأمر الناس بصيامه وقال: «نحن أولى بموسى منكم». يبقى هنا علو الدين وأهله وسفول الشرك وأهله، كذلك معنى المفاصلة أن الله عز وجل فصل بين أهل الإيمان وأهل الكفران.
طيب، تعالوا في يوم عرفة. الفيديو اللي فات لو ما سمعتوهوش اتفرجوا عليه، تكلمنا عن قول الله عز وجل: ﴿الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا﴾ [المائدة: 3]. وقلنا إن معنى أكملت لكم دينكم فيها معاني، من المعاني إن في السنة دي منع المشركون من دخول بيت الله الحرام، وخلص البيت الحرام لأهل الإيمان، ما كانش فيه غير مسلمين في بيت الله الحرام، ونودي ألا يطوف بالبيت اليوم عريان، خلاص انتهى.
هنا حصلت المفاصلة بين أهل الإيمان وأهل الكفران، وثانيًا حصل علو الدين وظهور الدين خلاص، كان الأول البيت الحرام تحت سلطان الكفر وتحت سلطان المشركين، فأزيح ذلك السلطان وهيمن عليه سلطان الإيمان. فده يوم يا جماعة وإحنا بنصوم عرفة كده نستشعر المعنى ده، أول حاجة نستشعر معنى إن ده يوم أعلى الله عز وجل فيه كلمة الإيمان، ودحض وهزم كلمة الشرك والكفران. وثاني حاجة إن دي حاجة يتفرح بيها، ودي حاجة يحمد الله عز وجل ويشكر عليها، فنصوم شكرًا لله عز وجل على هذا.
معنى كبير قوي يا جماعة إن أهل الإيمان وأهل الكفران مش زي بعض، وإن المفاصلة دي لابد أن تحدث حتى ولو في داخل أنفسنا. شوفوا معنى جميل جدًا هنا عشان تفهموا اللي أنا عاوز أقوله، لما صام النبي عليه الصلاة والسلام عاشوراء أشكل ذلك على الصحابة، قالوا: يا رسول الله ذاك يوم تعظمه اليهود والنصارى، إحنا إزاي نعظمه؟ شوفوا يا جماعة معنى المفاصلة إزاي موجود في الأذهان، يعني أشكل عليهم، إحنا إزاي نعظم يوم هما بيعظموه؟ فقال صلى الله عليه وسلم: «لئن بقيت إلى قابل لأصومن التاسع». ليه؟ عشان ما يبقاش بيخص ذلك اليوم بشيء.
لأن اليوم ده فيه معنى المفاصلة واضح جدًا، المفاصلة بين موسى وبين فرعون، ومعنى ظهور موسى على فرعون، فلا، هذا يوم يصام شكرًا لله عز وجل، ومع ذلك ننتبه لمعنى إني ما نبقاش زيهم، فلئن بقيت إلى قابل لأصومن التاسع عشان ما أبقاش شبههم. فيبقى يا جماعة وإحنا بنصوم عرفة نستشعر المعنى ده، معنى إنه لازم يكون فيه فرق، وهذا الفرق موجود في القرآن: ﴿أَفَنَجْعَلُ الْمُسْلِمِينَ كَالْمُجْرِمِينَ * مَا لَكُمْ كَيْفَ تَحْكُمُونَ﴾ [القلم: 35-36].
دعكم بقى من قوانين الدنيا ودعكم من التشريعات التي تساوي بين أهل الإيمان وغيرهم. على الأقل يا جماعة في نفسك تبقى فاهم إن أهل الإيمان غير أهل الكفران، وتبقى فاهم إن ظهور الدين شيء يطلب، وهزيمة الكفار والمشركين شيء يفرح له. واضح يا جماعة؟ يبقى ده أول معنى في الصوم اللي لازم تستشعره.
المعنى الثاني اللي لازم تستشعره في صوم عرفة، في قول الله عز وجل: ﴿الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا﴾ [المائدة: 3]. إحنا قلنا من معاني كمال الدين إنه بنزول هذه الآية قد نزلت جميع الشرائع أو جميع التشريعات، فلم ينزل بعدها حلال وحرام. على طبعًا خلاف بين أهل العلم في هذه النقطة، لكن خلونا عشان ما نطولش، يبقى انتهينا من التشريع الحلال والحرام. وده معنى مهم، اللي هو إيه؟ إن ده معنى يشكر ومعنى يفرح به: ﴿وَقِيلَ لِلَّذِينَ اتَّقَوْا مَاذَا أَنْزَلَ رَبُّكُمْ قَالُوا خَيْرًا﴾ [النحل: 30].
فكل ما أنزل الله خير، سواء أمر قدري أو أمر شرعي، وده اللي يعنينا دلوقتي. أمر قدري يعني أصابك بشيء أو جابلك نعمة أو أي حاجة في ده كله خير، وكذلك الأمر الشرعي الحلال والحرام كله خير. ويا جماعة اتفق العقلاء في جميع الأزمان في جميع الأماكن أنه لا قيام للجنس البشري إلا بقانون، ولذلك لا تقوم دولة إلا بقانون، بل لا يقوم أي اجتماع بشري إلا بقانون يحرس ويحميه. وأفضل القوانين وأحكم القوانين القوانين التي شرعها رب العالمين؛ ليه؟ لأنه أعلم بنا وأعلم بما يصلحنا سبحانه وتعالى، ﴿أَلَا يَعْلَمُ مَنْ خَلَقَ وَهُوَ اللَّطِيفُ الْخَبِيرُ﴾ [الملك: 14].
بلى، هو أعلم بنا وأعلم بما يصلحنا، فكون إن اليوم ده اكتملت فيه التشريعات فالحمد لله، والشكر لله سبحانه وتعالى إنه نزل لنا القانون ده اللي لو مشينا عليه صلحت دنيانا وفزنا في أخرانا. فيصام يوم عرفة، فما تعدوش صيام عرفة كده، فكروا في المعاني دي.
ولذلك، وده عمل ثاني من أعمال يوم عرفة، انتبهوا يا جماعة، ولذلك كان أفضل الذكر في يوم عرفة وأفضل ما قال النبي والنبيون من قبله: «لا إله إلا الله وحده لا شريك له، له الملك وله الحمد وهو على كل شيء قدير». ما تأملتش كده إشمعنى الذكر ده في عرفة؟ ما هو إنت اربط بقى الأحداث، عرفة يا جماعة إحنا ليه بنصومه شكرًا لله عز وجل على إيه؟ على إكمال الدين، اللي هو إيه إكمال الدين؟ اللي هو التشريع، كمال التشريع، اللي هو الألوهية. الحلال والحرام دي أخص خصائص الألوهية إن الله عز وجل يأمر بما يأمر وينهى عما ينهى، ولا يسأل عما يفعل سبحانه وتعالى، ولا يسأل عما يأمر به ولا عما ينهى عنه، ده من أخص خصائص الألوهية لله عز وجل.
فناسب أن يكون دعاء يوم عرفة لا إله إلا الله، ده اليوم اللي اكتمل فيه التشريع يا جماعة، فلا إله إلا الله وحده لا شريك له، له الملك وله الحمد وهو على كل شيء قدير. يوم عرفة يوم تكفير الذنوب وغفران تلك الذنوب، فكأني برضه له الملك فيغفر لمن يشاء سبحانه وتعالى، فإذا غفر فله الحمد سبحانه وتعالى، وهو على كل شيء قدير، ولو أن يغفر لجميع خلقه، فأنت استحضر ده وأنت بتقول الذكر ده، خلي بالك بكرة الذكر ده تكثر منه مش مرة ولا اثنين ولا ألف، تكثر من هذا الذكر لكن تستحضر المعاني دي. لا إله إلا الله تستحضر الألوهية وكمال التشريع، وأن اليوم ده هو يوم كمال التشريع، وأنا أصلا صايم شكرًا لله على كمال التشريع، فلا إله إلا الله وحده لا شريك له.
معنى تاني في لا إله إلا الله إن هذه الكلمة التي فرقت بين الحق والباطل، فرقت بين الإيمان والكفر أصلا، وده المعنى التاني في إكمال الدين اللي هو علو الدين وهزيمة الكفار والمشركين. طيب هو أصلا أهل الإيمان وأهل الكفران، إيه الفيصل بينهم؟ لا إله إلا الله، هو ده الفيصل، فهذه الكلمة التي عليها ومن أجلها قامت الحروب أصلا بين أهل الإيمان وأهل الكفر، هذه الكلمة التي من أجلها نجى الله موسى وأغرق فرعون، هذه الكلمة التي من أجلها طرد الله عز وجل مشركي قريش عن البيت الحرام وجعل الهيمنة للنبي صلى الله عليه وسلم وحزبه، كلمة لا إله إلا الله، فناسب أن تكثر منها في هذا اليوم.
لا إله إلا الله وحده لا شريك له، له الملك، فأنا من ملكه من جملة ملكه، فله الملك وأنا له سبحانه وتعالى، فيرجو قلبك أن يعتقك من النار وأن يغفر ذلتك فأنت من جملة الملك، من جملة ملكه سبحانه وتعالى، فإذا فعل فله الحمد سبحانه وتعالى، له الملك وله الحمد، وهو على كل شيء قدير فلا يعجزه شيء، لا يعجزه ذنوبك أن يغفرها سبحانه وتعالى، ولا يعجزه أن يأمر بك فتكون من أهل الجنة من أول وهلة، ولا يعجزه أن يأمر بك فتكون من أهل الفردوس الأعلى أعلى مراتب الجنة، فهو على كل شيء قدير سبحانه وتعالى، فناسب أن تكثر من هذا الذكر.
كذلك المعنى اللي عاوزين نقف عليه المعنى الثالث، وهو من أعمال كذلك يوم عرفة أن تصون سمعك وبصرك ولسانك، وجاء في ذلك حديث أن ذلك يوم من صان فيه أو من حفظ فيه سمعه وبصره ولسانه غفر له أو كما قال صلى الله عليه وسلم. فده يوم لابد أن تحفظ فيه جوارحك، إزاي؟ خد بقى نصايح: أول حاجة تليفونك مش معاك، ما تقوليش هو معايا بس مش عارف هعمل سايلنت ولا هقفل النت، ولا ابعد عن تليفونك في اليوم ده، من فجر عرفة لمغرب عرفة، لو تقدر أنت في حتة وتليفونك في حتة اعمل ده، اعمل ده عشان تحفظ سمعك وبصرك، لا تسمع حرام ولا تنظر إلى حرام، وأن تحفظ لسانك، والقلم أحد اللسانين، والكيبورد والحاجات دي من جملة الألسن بلا شك، فلا تكتب حاجة غلط، ولا تبص لحاجة غلط، ولا تسمع حاجة غلط، ابعد عن التليفون، ابعد عن التليفزيون، ابعد عن اللابتوب، ابعد عن التابلت، ابعد عن كل الحاجات دي.
تاني حاجة، اقعد في بيتك، وقد ورد عن إبراهيم أنه قال إنه أولى ما يجلس الرجال في بيوتهم يوم عرفة، اقعد في بيتك. تقدر تروح تعتكف في المسجد روح اعتكف، والاعتكاف أولا من جملة الأعمال الصالحة، والأعمال الصالحة مندوب إليها في جميع العشر، فأنت كده مش بدعة ولا حاجة إنك تعتكف في المسجد، هي من جملة الأعمال الصالحة. تاني حاجة مما يعينك على حفظ السمع والبصر واللسان، وهذا مأمور به شرعًا في هذا اليوم، فدي تاني حاجة.
تالت حاجة أنه التعريف في الأمصار مختلف فيه أصلا، والتعريف مش هو الاعتكاف، إيه تعريف الأمصار ده يا جماعة؟ تعريف الأمصار إنك عشية عرفة يعني من العصر كده لغاية المغرب الناس تقصد المساجد لتأتي بعبادات تتشبه بأهل الموقف، تجلس في المسجد من العصر للمغرب تذكر وتدعو وتقرأ القرآن وتبتهل لتتشبه بأهل الموقف. هذا التعريف مختلف فيه بين أهل العلم، المذهب عندنا أنه لا بأس بالتعريف في الأمصار، قد فعله الإمام أحمد ورخص فيه، لأن ابن عباس فعله وغير ابن عباس. ابن عباس يا جماعة كان يروح المسجد يوقف يقرأ سورة البقرة وآل عمران يفسرها آية آية، يجمع الناس عليه في المسجد ويوقف يقرأ في يوم عرفة، يقرأ البقرة وآل عمران يفسرها آية آية. فأنت في الحتة دي الحتة واسعة.
بدعة ولا حاجة، الحتة دي واسعة. اللي عنده مسجد يعتكف فيه أنا أرشح لك ذلك؛ أنك تروح تعتكف في المسجد على قد ما تقدر.
مش قادر اليوم كله؟ على الأقل من الفجر للشروق أنت قاعد في المسجد تصلي وتصلي الضحى. وبعدين عاوز تروح تنام شوية، تقعد في بيتك شوية، ترجع تاني من العصر للمغرب قاعد في المسجد، اعمل ده. تقدر تقعد من الفجر للمغرب، اعمل ده. المهم تحفظ سمعك وبصرك ولسانك، وهذا من جملة الأعمال في يوم عرفة.
آخر حاجة نختم بيها الذكر اللي قلناه في الأول، وإن ده هنكثر منه، وقد يستشكله البعض، اللي هو إيه؟ هو فين الدعاء هنا؟ «لا إله إلا الله وحده لا شريك له، له الملك وله الحمد وهو على كل شيء قدير»، فين الدعاء هنا؟
الدعاء يا جماعة نوعين: دعاء ثناء ودعاء مسألة. دعاء ثناء إنك تقعد تثني على الرب سبحانه وتعالى من غير أن تسأل شيئاً. ودعاء مسألة تقول يا رب اديني كذا، يا رب اعمل لي كذا، يا رب، ده اسمه دعاء مسألة. ادعُ بالاثنين ما فيش مشكلة، لكن المعنى اللي عاوزك تنتبه ليه وأنت بتكثر من الدعاء ده إنك بتسأل. إيه ده إزاي؟ هو فين المسألة؟
يا جماعة، دعاء الثناء يتضمن المسألة من غير ما تسأل. يعني أنت بتقعد، ولله المثل الأعلى يا جماعة، في الدنيا لما تروح لملك من الملوك وهو عارف حالك، وعارف إنك فقير، وعارف إنك محتاج، وعارف إنك مذلول ليه، وتقعد تقول له أنت الملك وأنت الكريم وأنت الجواد، يبقى متخلف لو ما فهمش إن أنت عاوز منه حاجة، إنك جاي تشحت. ده ملوك الدنيا، هو بيفهم إن دي رسالة منك إنك اديني، صح؟ ولله المثل الأعلى سبحانه وتعالى.
فدعاء الثناء يتضمن المسألة من غير أن تسأل. وأمية بن أبي الصلت كان يقول: أأذكر حاجاتي؟ أم قد كفاني حياؤك؟ فإن شيمتك الحياء. إذا ما أثنى عليك المرء يوما كفاه من تعرضه الثناء. يعني مجرد إني أثني، هو كان بيمجد ملكاً من الملوك، لكن الله عز وجل كذلك، مجرد ما تثني على الله عز وجل يكفي أن تثني عليه سبحانه وتعالى فيعطيك سؤلك من غير أن تسأل.
السلام عليكم ورحمة الله وبركاته.
الشيخ أمجد سمير