دخولتسجيل الدخول

وتحسبونه هينا | حادثة الإفك | الدرس الثاني

أمجد سميرالشيخ أمجد سمير
  • مدة الدرس:
  • قراءة

إن شاء الله نتكلم عن حادثة الإفك من السنة، وطبعا حديث الإفك موجود في البخاري تعليقا وموجود في مسلم. لمدة سبع ثمان دقائق هقرا الحديث رواية البخاري قراءة سردية، ركزوا معايا مش عاوزين صوت خالص. بعد ما نقرا الحديث قراءة سردية هنرجع نشوف بعض فوائد الحديث ان شاء الله، عشان نلم بحادثة الإفك إلماما سريعا.

عن عائشة رضي الله عنها قالت: كان رسول الله صلى الله عليه وسلم إذا أراد أن يخرج أقرع بين أزواجه، فأيهن خرج سهمها خرج بها رسول الله صلى الله عليه وسلم معه. قالت عائشة: فأقرع بيننا في غزوة غزاها فخرج سهمي، فخرجت مع رسول الله صلى الله عليه وسلم بعدما نزل الحجاب، فأنا أحمل في هودجي وأنزل فيه. فسرنا حتى إذا فرغ رسول الله صلى الله عليه وسلم من غزوته تلك وقفل ودنونا من المدينة قافلين أذن ليلة بالرحيل، فقمت حين أذنوا بالرحيل فمشيت حتى جاوزت الجيش، فلما قضيت شأني أقبلت إلى رحلي، فإذا عقد لي من جزع ظفار قد انقطع، فالتمست عقدي وحبسني ابتلاؤه، وأقبل الرهط الذين كانوا يرحلون لي فاحتملوا هودجي فرحلوه على بعيري الذي كنت ركبته وهم يحسبون أني فيه، وكان النساء إذ ذاك خفافا لم يثقلهن اللحم إنما يأكلن العلقة من الطعام، فلم يستنكر القوم خفة الهودج حين رفعوه وكنت جارية حديثة السن، فبعثوا الجمل وساروا.

فوجدت عقدي بعدما استمر الجيش، فجئت منازلهم وليس بها داع ولا مجيب، فأممت منزلي الذي كنت به وظننت أنهم سيفقدوني فيرجعون إلي. فبينا أنا جالس في منزلي غلبتني عيني فنمت، وكان صفوان بن المعطل السلمي ثم الذكواني من وراء الجيش فأدلج فأصبح عند منزلي فرأى سواد انسان نائم، فأتاني فعرفني حين راني وكان يراني قبل الحجاب، فاستيقظت باسترجاعه حين عرفني، فخمرت وجهي بجلبابي، والله ما كلمني كلمة ولا سمعت منه كلمة غير استرجاعه، حتى أناخ راحلته فوطئ على يدها فركبتها، فانطلق يقود بالراححة حتى أتينا الجيش بعدما نزلوا موغرين في نحر الظهيرة، فهلك من هلك، وكان الذي تولى الإفك عبد الله بن أبي بن سلول.

فقدمنا المدينة فاستكشفت حين قدمت شهرا والناس يفيضون في قول أصحاب الإفك ولا أشعر بشيء، وهو يريبني في وجعي أني لا أعرف من رسول الله صلى الله عليه وسلم اللطف الذي كنت أرى منه حين أشتكي، إنما يدخل علي رسول الله صلى الله عليه وسلم فيسلم ثم يقول: كيف تيكم؟ ثم ينصرف، فذاك الذي يريبني ولا أشعر بالشر، حتى خرجت بعدما نقهت فخرجت معي أم مسطح قبل المناصع وهو متبرزنا، وكنا لا نخرج إلا ليلا وذلك قبل أن نتخذ الكنف قريبا من بيوتنا، وأمرنا أمر العرب الأول في التبرز قبل الغائط، فكنا نتاذى بالكنف أن نتخذها عند بيوتنا.

فانطلقت أنا وأم مسطح وهي بنت أبي رهم بن عبد مناف وأمها بنت صخر بن عامر خالة أبي بكر الصديق، وابنها مسطح بن أثاثة، فأقبلت أنا وأم مسطح قبل بيتي وقد فرغنا من شأننا، فعثرت أم مسطح في مرطها فقالت: تعس مسطح، فقلت لها: بئسما قلت، أتسبين رجلا شهد بدرا؟ قالت: أيهنتاه، أولم تسمعي ما قال؟ قالت: قلت: وما قال؟ فأخبرتني بقول أهل الإفك، فازددت مرضا على مرضي. فلما رجعت إلى بيتي ودخل علي رسول الله صلى الله عليه وسلم تعني سلم ثم قال: كيف تيكم؟ فقلت: أتاذن لي أن آتي أبوي؟ قالت: وانا حينئذ أريد أن أستيقن الخبر من قبلهما، قالت: فأذن لي رسول الله صلى الله عليه وسلم فجئت أبوي فقلت لامي: يا أمتاه ما يتحدث الناس؟ قالت: يا بني هون عليك، فوالله لقلما كانت امرأة قط وضيئة عند رجل يحبها ولها ضرائر إلا أكثرن عليها.

قالت: فقلت: سبحان الله، أولقد تحدث الناس بهذا؟ قالت: فبكيت تلك الليلة حتى أصبحت لا يرقى لي دمع ولا أكتحل بنوم حتى أصبحت أبكي. فدعا رسول الله صلى الله عليه وسلم علي بن أبي طالب وأسامة بن زيد رضي الله عنهما حين استلبس الوحي يستأمرهما في فراق أهله. قالت: فأما أسامة بن زيد فأشار على رسول الله صلى الله عليه وسلم بالذي يعلم من براءة أهله وبالذي يعلم لهم في نفسه من الود، فقال: يا رسول الله، أهلك وما نعلم إلا خيرا. وأما علي بن أبي طالب فقال: يا رسول الله، لم يضيق الله عليك والنساء سواها كثير، وإن تسأل الجارية تصدق. قالت: فدعا رسول الله صلى الله عليه وسلم بريرة فقال: أي بريرة، هل رأيت من شيء يريبك؟ قالت بريرة: لا والذي بعثك بالحق، إن رأيت عليها أمرا أغمصه عليها أكثر من أنها جارية حديثة السن تنام عن عجين أهلها فتأتي الداجن فتأكله.

فققام رسول الله صلى الله عليه وسلم فاستعذر يومئذ من عبد الله بن أبي بن سلول، فقال صلى الله عليه وسلم وهو على المنبر: يا معشر المسلمين، من يعذرني من رجل قد بلغني أذاه في أهلي؟ فوالله ما علمت على أهلي إلا خيرا، ولقد ذكروا رجلا ما علمت عليه خيرا وما كان يدخل على أهلي إلا معي. فقام سعد بن معاذ الأنصاري فقال: يا رسول الله، أنا أعذرك منه، إن كان من الأوس ضربت عنقه، وإن كان من إخواننا من الخزرج أمرتنا ففعلنا أمرك. قالت: فقام سعد بن عبادة وهو سيد الخزرج، وكان قبل ذلك رجلا صالحا ولكن احتملته الحمية، فقال لسعد: كذبت لعمرو الله لا تقتله ولا تقدر على قتله. فقام أسيد بن حضير وهو ابن عم سعد بن معاذ فقال لسعد بن عبادة: كذبت لعمرو الله لنقتلنك، فإنك منافق تجادل عن المنافقين. فتساور الحييان الأوس والخزرج حتى هموا أن يقتتلوا ورسول الله صلى الله عليه وسلم قائم على المنبر، فلم يزل رسول الله صلى الله عليه وسلم يخفضهم حتى سكتوا وسكت.

قالت: فبكيت يومي ذلك لا يرقى لي دمع ولا أكتحل بنوم. قالت: فأصبح أبواي عندي وقد بكيت ليلتين ويوما لا أكتحل بنوم ولا يرقى لي دمع يظنان أن البكاء فالق كبدي. قالت: فبينا هم جالسون عندي وأنا أبكي، واستأذنت علي امرأة من الأنصار فأذنت لها فجلست تبكي معي. قالت: فبينا نحن على ذلك دخل علينا رسول الله صلى الله عليه وسلم فسلم ثم جلس، قالت: ولم يجلس عندي منذ قيل ما قيل قبلها، ولقد لبث شهرا لا يوحى إليه في شاني. قالت: فتشهد رسول الله صلى الله عليه وسلم حين جلس ثم قال: أما بعد يا عائشة، فانه قد بلغني عنك كذا وكذا، فإن كنت بريئة فسيبراك الله، وإن كنت ألممت بذنب فاستغفري الله وتوبي إليه، فإن العبد إذا اعترف بذنبه ثم تاب إلى الله تاب الله عليه.

قالت: فلما قضى رسول الله مقالته قلص دمعي حتى ما أحس منه قطرة، فقلت لأبي: أجيب رسول الله صلى الله عليه وسلم في مقاله. قال: والله ما أدري ما أقول لرسول الله صلى الله عليه وسلم. فقلت لامي: أجيبي رسول الله صلى الله عليه وسلم. قالت: ما أدري ما أقول لرسول الله صلى الله عليه وسلم. قالت: فقلت وأنا جارية حديثة السن لا أقرأ كثيرا من القرآن: إني والله لقد علمت لقد سمعتم هذا الحديث حتى استقر في أنفسكم وصدقتم به، فلئن قلت لكم إني بريئة والله يعلم أني بريئة لا تصدقونني بذلك، ولئن اعترفت لكم بأمر والله يعلم أني منه بريئة لا تصدقونني، والله ما أجد لكم مثلا إلا قول أبي يوسف، قال: ﴿فَصَبْرٌ جَمِيلٌ وَاللَّهُ الْمُسْتَعَانُ عَلَىٰ مَا تَصِفُونَ﴾ [يوسف: 18].

قالت: ثم تحولت فاضطجعت على فراشي، قالت: وأنا حينئذ أعلم أني بريئة وأن الله مبرئي ببراءتي، ولكن والله ما كنت أظن أن الله منزل في شاني وحيا يتلى، ولا شاني في نفسي كان أحقر من أن يتكلم الله في بأمر يتلى، ولكن كنت أرجو أن يرى رسول الله صلى الله عليه وسلم في النوم رؤيا يبرئني الله بها. قالت: فوالله ما رام رسول الله صلى الله عليه وسلم ولا خرج أحد من أهل بيتي حتى أنزل عليه، فأخذه ما كان يأخذه من البرحاء حتى إنه ليتحدر منه مثل الجمان من العرق وهو في يوم شات من ثقل القول الذي ينزل عليه. قالت: فلما سري عن رسول الله صلى الله عليه وسلم سري عنه وهو يضحك، فكانت أول كلمة يتكلم بها: يا عائشة، أما الله عز وجل، فإن الذين جاؤوا بالإفك عصبة منكم لا تحسبوه العشرين الآيات كلها.

فلما أنزل الله في براءتي قال أبو بكر الصديق رضي الله عنه وكان ينفق على مسطح بن أثاثة لقرابته منه وفقره: والله لا أنفق على مسطح شيئا أبدا بعد الذي قال لعائشة ما قال. فانزل الله: ﴿وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَىٰ وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحوا ۗ أَلَا تُحِبُّونَ أَن يَغْفِرَ اللَّهُ لَكُمْ ۗ وَاللَّهُ غَفُورٌ رَّحِيمٌ﴾ [النور: 22]. قال أبو بكر: بلى والله إني أحب أن يغفر الله لي، فرجع إلى النفقة التي كان ينفق عليه، وقال: والله لا أنزعها منه أبدا.

قالت عائشة: وكان رسول الله صلى الله عليه وسلم يسأل زينب ابنة جحش عن أمري، فقال: يا زينب، ماذا علمت أو رأيت؟ فقالت: يا رسول الله، أحمي سمعي وبصري، ما علمت إلا خيرا، قالت: وهي التي كانت تساميني من أزواج رسول الله صلى الله عليه وسلم فعصمها الله بالورع، وطفقت أختها حمنة تحارب لها فهلكت فيمن هلك من أصحاب الإفك.

هذا الحديث بطوله من صحيح البخاري، وقبل ما نبدأ الحديث من أوله -ما تخافوش الحديث كله- هنقف على بعض فوائد يعني القليلة منه. لكن قبل ما نبدأ عاوزين نكمل تلك الأنوار التي كنا قد ابتداناها. احنا قلنا يا جماعة من حكم ألا ينزل في عائشة رضي الله عنها وفي شأنها وحي لمدة شهر أو أكثر -في بعض روايات عدت الخمسين يوم- أن المجتمع المدني دولة، وأن الدولة ترتب أوراقها؛ لأن الوحي هينقطع بعد شوية بموت النبي عليه الصلاة والسلام، ولا يستقيم في دولة أن كل حاجة عاوزين لها وحي. وكان عمر رضي الله عنه فهم ذلك، فمر قال للناس: أيها الناس، إن الوحي قد انقطع، خلاص ما بقاش في وحي، وإن لناخذكم بما يظهر لنا منكم، ما هو احنا مش هينزل لي سيدنا جبريل يقول: لا، فلان بريء وفلان مجرم، فكان لازم الدولة ترتب أوراقها. وسورة النور أصلا فيها خطابات عدة، يعني في خطاب للحاكم، للدوله، للبرلمان، لمجلس الشعب، خطاب في الأول خالص في أول الصورة خالص ماشي، وبعدين -وده كان له درس لوحده يعني- وبعدين خطاب للمجتمع بقى بفئات المجتمع كلها، اهو معنا اهو، فكان لازم المجتمع يرتب أوراقه. وقلنا لكم وخلاص خدنا الانوار اللي في سورة النور.

لكن من الانوار التي جاءت في السنة بقى، ولو تلاحظوا أن تلك الأنوار لم -يعني لم تتأتى للنبي عليه الصلاة والسلام- إلا في آخر المدة، يعني النبي عليه الصلاة والسلام مهموم بالامر، وكاني به صلى الله عليه وسلم كل يوم وكل ليلة مستني إيه؟ الوحي، والله عز وجل حجب الوحي. أمتى ابتدت الاوراق تترتب ولازم أخذ- لازم يبقى في قرار دلوقتي؟ ما هو الوحي ما فيش وحي بينزل، طب ما هو ممكن يفضل كده، وكان ممكن ما تنزلش براءة السيدة عائشة أصلا، هنعمل إيه؟ ابتدى بقى النبي عليه الصلاة والسلام يتعامل بما لديه من أدوات، يتعامل بما لديه من أدوات.

فمن تلك الأنوار المشورة، ومن سياق حديث السيدة أن تلك المشورة لم تكن إلا في آخر المدة. راح جايب سيدنا علي وسيدنا أسامة بن زيد، والاثنين دول في رواية خارج خارج الصحيح أنه ما كان يستشير حد غيرهم في أمر أهل بيته، وطبعا ده مفهوم لسيدنا علي أصلا متربي في بيت النبي عليه الصلاة والسلام وهو قريب له، وسيدنا أسامة بن زيد هو حب النبي عليه الصلاة والسلام، ما كانش يشاور حد في أهل بيته غير دول، فجاب الاثنين. فدي من الأنوار أن دلوقتي وقعت في مشكلة، اعمل إيه؟ أستشير، أستشير العقلاء اللي تثق في رأيهم، ولما تجي تستشير لو حاجة تخص أهل بيتك ما تبقاش على الملا كده، لا، يبقى تستشير القريبين منك حتى لو غيرهم أعقل؛ لأن دي حاجة تخص أهل بيتك. فده اللي عمله النبي عليه الصلاة والسلام وأسامة بن زيد وعلي الاثنين كانوا شباب. النبي عليه الصلاة والسلام ما راحش لا لأبي بكر ولا لعمر ولا للناس ولا ولا عثمان ولا الناس الكبيرة في السن اللي هي أعقل وأحكم. يبقى استشار، ولما كان الأمر يخص أهل بيته استشار الأقربين، وسيدنا عائشة تقول في الروايات خارج زي ما قلت لكم إنه أي حاجة كانت تخص أهل بيته ما كانش يستشير غير سيدنا علي وسيدنا أسامة.

رضي الله عنها. فدي من الأنوار، ولعل من حكم الله عز وجل أنه لما استشار الاثنين، أشاروا عليه بالرأيَيْن اللي لو جبنا مليون واحد مش هيخرج رأيهم عن رأي واحد من الاثنين، يا إما دول أهلك وانت عارفهم كويس وناس زي الفل وبتاع، يا إما أنت إيه اللي جابرك طلقها وتجوز غيرها. في رأي ثالث ممكن يتقال؟ مافيش حاجة، يعني هو الرأي ده يا الرأي ده.

فقدر الله عز وجل أن الاثنين يختلفوا، كان ممكن الاثنين يتفقوا على حاجة، وكان يا جماعة ده اللي هتشوفوه أيها المؤمنون، ده اللي هيحصل، مافيش وحي خلاص. فده اللي هتشوفوه لما تيجي تشاور أسوأ حاجة إيه؟ الأريح أن الاثنين اتفقوا على حاجة فتعمل الحاجة اللي اتفقوا عليها، اللي أتعب على قلبك أن يختلفوا، فتبقى أنت برده لسه في حيرتك، أعمل إيه؟

هنا يا جماعة سيدنا علي اعتذروا له لما قال إيه؟ يعني إيه اللي جابرك طلقها وتجوز غيرها؟ كأن الموضوع إيه شوية فيه قسوة، قالوا لا سيدنا علي غلب عليه حزنه على حال النبي عليه الصلاة والسلام فده اللي كان همه، ففي خضم هذا ذهِل عن ستنا عائشة، يعني من كثر حبه للنبي عليه الصلاة والسلام فده اللي شاغله، يعني أنا عاوز أرفع عنك حالتك تلك، فأنت إيه اللي جابرك طلقها؟ المهم اختلفوا.

وسيدنا علي رضي الله عنه لما قال هذا ما سكتش، قال لك وإن تسأل الجارية تصدق، يعني بريرة دي الخادمة اللي بتخدم مين؟ ستنا عائشة، فهي لصيقة بها، فيا جماعة عياذا بالله عياذا بالله اللي هتقع في الفاحشة دي أكيد في مقدمات وأكيد ما تجراتش مرة واحدة أنها تقع في، ودي الملاصقة لينا، اسالها. فراح رايح سأل بريرة، فقالت: لا والله ما علمت عليها إلا خيرا، مافيش حاجة خالص، مافيش حاجة من دي خالص.

يبقَى دي واحدة من الأنوار التي جاءت في السنة، واتكلمنا عنها في الدرس اللي قبل كده بس امبارح، أن النبي عليه الصلاة والسلام لما طلع على المنبر قال كلمة عجيبة جدا ولم أجد من تعرض لها من الشراح، لما وقف على المنبر وقال: من يعذرني في رجل قد بلغ أذاه أهل بيتي؟ ولقد ذكروا رجلا -يعني صفوان- ما علمت عليه إلا خيرا، وما دخل على أهلي إلا معي.

فدي من الأنوار يا جماعة اللي ما جاتش، يعني سيدنا النبي عليه الصلاة والسلام طول الفترة مستني الوحي، مستني الوحي، تأخر الوحي، ابتدى لا لازم يبقى في قرار، لازم أعمل حاجة، طب إيه القرار؟ يلا نستشير، يلا أحكم العقل، يلا أفكر بالمنطق. فقال كلمة عجيبة جداً قال: والله ما دخل على أهلي إلا معي. إيه معناها الكلمة دي؟

دلوقتي يا جماعة معلش أنا عشان الكلام ثقيل عليا جداً، فاحنا هنخرج عن السيدة عائشة وسيدنا صفوان، احنا بنتكلم عموماً، بنتكلم في المسألة عموماً، فأنا لا أتكلم عن السيدة عائشة ولا عن سيدنا صفوان. دلوقتي يا جماعة رجل فجر بامرأة، زنى بامرأة عياذا بالله، هل ممكن تيجي فجأة كده يروح يقول لها يلا نفجر يلا بينا؟ ولا خصوصاً خصوصاً احنا بنتكلم في مجتمع صغير، والمرأة دي امرأة الراس بتاع المجتمع؟

معناها إيه الكلام ده؟ أنه لو راودها فرفضت، دي قرصة، هترجع تقول فلان عمل كذا وكذا، صح ولا لا؟ فهو مستحيل يراهن على الحتة دي، مستحيل أنه يراود المرأة عن نفسها وفي احتمال ولو ضعيف أنها ترفض. طب عشان ده يحصل، يحصل إزاي؟ يحصل زي ما قلنا بقى امبارح أنه إيه الأول؟ هيبعت لها رسالة على الواتساب، فيلاقيها عملت رياكت إيه بتضحك، آه ده كده السكة بتفتح أهي، فيبعت الرسالة اللي بعديها فيلاقيها بترد الرسالة بطريقة فيها مرقعة شوية، فيروح باعت لها فويس فترد بفويس وتتمييع في صوتها فيبتدي خطوة بخطوة بخطوة لغاية ما إيه يراودها فتقبل، أو يبعت فتقفل السكة في وشه فخلاص عرف أن دي ما لهاش إيه ما ينفعش.

سيدنا النبي عليه الصلاة والسلام قال كلمة في غاية الخطورة، قال: ولقد ذكروا رجلا ما علمنا عليه إلا خيرا، دي أول واحدة. التانية بقى: والله ما دخل على أهلي إلا معي. فمتى اتفتحت السكة اللي اتجرأ أنه يراود؟ فهمتوا دي؟ أمتا ده حصل؟ في آخر المدة، في آخر المدة، لما خلاص يعني كأنّه إيه خلاص مافيش وحي هينزل، اتصرفوا، ما احنا المجتمع مش هيفضل عطلان، اتصرفوا، فاتصرفوا.

وبعدين يشاء الله عز وجل شيئاً عجيباً، أن النبي عليه الصلاة والسلام -عشان كده يا جماعة احنا بنقول القرآن المدني قرآن يخاطب دولة- والله عز وجل لما حبس الوحي، حصلت أمور هتحصل في الدولة، ولازم الكبير الدولة يعرف يتصرف. حصل حاجة عجيبة جداً، دلوقتي من الذي تولى كبر هذه المسألة؟ عبد الله بن أبي بن سلول، عبد الله بن أبي بن سلول من الخزرج، ومش بس من الخزرج، ده راس كان كبير في الخزرج، ولذلك هو أصلاً متضايق من النبي عليه الصلاة والسلام أنه لما جه المدينة أخذ منه السيادة، فهو كان سيداً في الخزرج، خلاص أركنوا دي على جنب بقَى.

دلوقتي النبي عليه الصلاة والسلام لما هيقف على المنبر في المسجد وبقالهم شهر أو أكثر في القصة دي، هل في واحد من اللي قاعدين مش عارف مين اللي ابتدى القصة؟ نتصور ده عقلاً يعني؟ ولا كل اللي قاعدين فاهمين كويس أن عبد الله بن أبي بن سلول هو اللي بادئ القصة؟ كله عارف كده. فالنبي وقف على المنبر عليه الصلاة والسلام، وأنا كذا مرة في كذا درس أقول: احنا محتاجين بحث لحد أكاديمي، لعل هذه الكلمة تصادف أذنا تقبل ذلك، بحث في تعامل النبي عليه الصلاة والسلام مع المنافقين في المدينة، والبحث ده مهم جداً.

وهنشوف دلوقتي أهو موقف من تعامل النبي مع المنافقين في المدينة، البحث ده مهم جدا جدا، النبي عمل إيه عليه الصلاة والسلام؟ خلاص هو عارف أن عبد الله بن أبي بن سلول رأس المنافقين، لكنه سيد في الخزرج، وحتة أن حمية العرب دي لسه موجودة، وهنشوف دلوقتي. وقف على المنبر أول حاجة ما قالش اسمه، ما قالش من يعذرني في عبد الله بن أبي بن سلول، ما قالش كده، قال: من يعذرني في رجل قد بلغ أذاه اهل بيتي، فنكر اسمه، ليه؟ سيدنا النبي فاهم كويس عليه الصلاة والسلام الفتنة اللي ممكن تحصل، وحصلت مع أنه نكر اسمه ما قالش.

يقوم قايم مين؟ سعد بن معاذ رضي الله عنه، سعد بن معاذ منين؟ من الأوس. طبعا أول ما تسمع كلمة أوس وخزرج على طول يجي في دماغنا الحروب اللي كانت فين؟ في الجاهلية. الأوس والخزرج سيدنا النبي نفسه عليه الصلاة والسلام ما كانش يعرف يؤلف بينهم، مش أنا اللي بقول كده، ده ربنا اللي قال كده في سورة الأنفال: ﴿لَوْ أَنفَقْتَ مَا فِي الْأَرْضِ جَمِيعًا﴾ [الأنفال: 63] ده في الأوس والخزرج، ولكن الله ألف بينهم، ربنا اللي ألف بينهم كده. إنما أنت يا محمد صلى الله عليه وسلم لو عملت إيه مستحيل تؤلف بين الأوس والخزرج على كمية الدماء، ما هو حروب يعني دماء، فبينهم دماء، بينهم أحن.

فالمهم سعد بن معاذ وقف وهو سيد من الأوس، قال: أنا أعذرك يا رسول الله، إن كان منا قطعت عنقه، وإن كان من إخواننا من الخزرج أمرتنا فامتثلنا أمرك. راجل دبلوماسي، سعد بن معاذ هو عارف كويس أن الراجل ده من الخزرج، لكنه دبلوماسي، قام بكلمتين بسط قال: لو طلع من الأوس فوراً هنذبحه، لو طلع -شوفوا اللفظ- من إخواننا من الخزرج أمرتنا فامتثلنا أمرك. مع الدبلوماسية الشديدة دي تعدي؟ ما تعديش، الشيطان يدخل.

يقوم قايم مين؟ سعد بن عبادة، وهو رأس من الخزرج وهو مؤمن صحيح الإيمان، سيدنا سعد رضي الله عنه قام قال: كذبت والله لا تقتله ولا تستطيع أن تقتله، تقتل مين؟ هو من الخزرج. يقوم يقف مين؟ أسيد بن حضير وهو من الأوس، يقول له: والله لنقتلنك وما أنت إلا منافق تجادل عن المنافقين. فثار الناس، والنبي يخفضهم.

يا جماعة يعني معلش استحضرو المشهد ده، سيدنا النبي واقف على المنبر عليه الصلاة والسلام، والصحابة ابتدوا بوادر قتال تحصل فين؟ في المسجد النبوي، احنا مش بنتكلم احنا في شارع، احنا جوه المسجد والنبي على المنبر عليه الصلاة والسلام، وابتدت بوادر حرب هتقوم جوه المسجد بين الأوس والخزرج، والنبي عليه الصلاة والسلام عمال يقول: اسكتوا اسكتوا، ويخفضهم. هي دي الدولة، هي دي الدولة، النبي إزاي يتعامل في الموقف ده عليه الصلاة والسلام.

دلوقتي احنا قلنا يا جماعة أن في هذه الحادثة، حد ناس في الحادثة دي صح، في أول واحد تحدى مين؟ بالمنطق كده مين؟ عبد الله بن أبي صح؟ لا، النبي ما حدش عبد الله بن أبي على أرجح أقوال أهل العلم، طبعا المسائل فيها أقوال كثيرة كثيرة، أنه لم يحد أحداً أصلاً وأنه حد كله بعبد الله بن أبي، وأرجح الأقوال وأصح الأقوال أنه حد حسان ومسطح وحمنة، ولم يحد عبد الله بن أبي بن سلول. ليه؟ اختلفوا على أقوال كثيرة، منها درءاً للفتنة، لو حد عبد الله بن أبي بن سلول كانت هتولع، فلم يحد عبد الله بن أبي بن سلول درءاً للفتنة، عشان كده بقول تعامل النبي عليه الصلاة والسلام مع المنافقين في المدينة محتاج بحث، مش عاطفة هي، احنا في دولة، دولة إسلام يعني في عهد النبي عليه الصلاة والسلام احنا في دولة وعندنا مصالح ومفاسد وموازنات، فمحتاجة بحث قوي، بحث مالوش دعوة بالعاطفة، بحث نصوص شرعية تعاملات النبي عليه الصلاة والسلام إزاي.

يعني منها مثلاً مثلاً لما سيدنا عمر قال: دعني أضرب عنق هذا المنافق وقع في النبي عليه الصلاة والسلام، قال له سيبني هقتله وهو يستحق القتل. فالنبي قال إيه عليه الصلاة والسلام: يتحدث الناس أن محمداً يقتل أصحابه، وما قتلوس، يعني إيه؟ يعني بكره برامج التوك شو والصفحات بتاعة الفيسبوك مش هتقول ده منافق وقع في النبي فقتلها، مش هتيطلعوا يقولوا كده، هيقولوا إيه؟ شفتوا اللي بيروح يسلم بيتقتل، يتحدث الناس أن محمداً يقتل أصحابه.

المهم نرجع تاني لقصتنا، فالنبي عليه الصلاة والسلام لم يحد عبد الله بن أبي بن سلول ليه؟ من الأقوال التي قيلت فيه أنه عشان يدرأ الفتنة، ومن الأقوال التي قيلت أن الحد كفارة، فلم يرد النبي عليه الصلاة والسلام أنه يحد عبد الله بن أبي فيصير الحد له إيه؟ كفارة، لا عشان يشدد عليه في عذاب الآخرة، ومنها ودي مهمة جدا جدا جدا، أنه قالوا إن عبد الله بن أبي لم يقذف بلفظ صريح، شوفوا يا جماعة المنافقين، يعني إيه؟ يرمي الحبل كده وأنت تتزحلق، هو عبد الله بن أبي قال إيه؟ لم يقذف بلفظ صريح، وإنما قال إيه؟ زوجتكم نبيكم وصفوان، والله ما سلمت منه ولا سلم منها، وده كناية مش لفظ صريح يحد به. وكان طالما على هذا القول يبقَى بقية الصحابة رضوان الله عليهم واللي نعالهم فوق دماغنا، كأنهم طالما حدوا استخدموا الألفاظ الإيه؟ هو رمى الخيط وهم راحوا.

شوفوا يا جماعة خطر النفاق، وخطر الكلمة، وخطر الشائعة. فهذه أيضاً من الأنوار، يبقى شوفوا يا جماعة كل اللي بنحكيه ده الأوراق إمتى ترتبت؟ والعقل إمتى اشتغل؟ لما النفس هديت، أو بلاش هديت، لما كأنّه خلاص النبي عليه الصلاة والسلام علم أنه مافيش وحي، اتصرف، كل يوم مستني الوحي، مافيش وحي، اتفضل اتصرف. فابتدت فابتدت تلك الأنوار، شاور سيدنا علي وسيدنا أسامة، ابتدى يعمل بقى العقل والمنطق في المسألة، وبعدين راح سأل بريرة، وكان ده برده من بركة المشاوره وكان أمر بديهي يعني من الأول ما تروح تسأل بريرة من الأول، فسأل بريرة.

وبعدين ابتدى خلاص الموضوع ظهر له، مش تيقن منه، ظهر له الحكم في الدنيا إيه؟ وقف على المنبر: من يعذرني في رجل بلغ أذاه أهل بيتي؟ خلي بالكم يا جماعة لغاية اللحظة دي سيدنا النبي عليه الصلاة والسلام لا يعلم براءة عائشة، ولذلك بعديها هيجي يقول لها إيه؟ يتشهد ويقول: إن كنت قد ألممت بشيء فاستغفري الله، فإنهما مهما يفعل العبد ويتوب الله، يتوب الله عليه. فهو لسه ما يعرفش حاجة، لكنه خلاص أعمل القواعد وأعمل النصوص الشرعية، وخلي بالكم يا شباب، معظم أحكام الدنيا تبنى على غلبة الظن مش على اليقين، خلاص، فده طبيعة الأحكام الشرعية أصلاً.

فوهذا الذي فعله النبي عليه الصلاة والسلام. طيب، فدي من الأنوار التي جاءت في السنة. الحديث بقى فيه طبعا فوائد لو يعني ممكن نقعد إيه؟ 20 مرة 20 درس كده، بس احنا ناخذ بعض فوائد، من تلك الفوائد في أول الحديث خالص أن عائشة رضي الله عنها قالت: كان صلى الله عليه وسلم إذا أراد أن يخرج أقرع بين أزواجه، فأيتهن خرج سهمها خرج بها رسول الله صلى الله عليه وسلم. ومن الفوائد مشروعية القرعة، والقرعة دي خليها في جيبك كده، سواء أنت راجل مسئول في بيت يعني معاك زوجتك ومعاك ولادك حتى لو زوجة واحدة -هو هنا طبعا كان يقرع بين زوجاته هو متجوز أكتر من واحدة، لكن أنت متجوز واحدة وعندك عيال- أو مدير في عمل، القرعة بتحل الدنيا. قبل ما ندخل في مسألة القرعة، طبعا القرعة

ذكرها الله في القرآن أصلاً، فَسَاهَمَ، فَكَانَ مِنَ الْمُدْحَضِينَ. وَمَا كُنتَ لَدَيْهِمْ إِذْ يُلْقُونَ أَقْلَامَهُمْ أَيْ كُلُّ دي قُرْعَة. ذكرها الله عز وجل وكلها في المشكلات.

كانوا يقولون فقه البخاري في. حد يعرف؟ حد يكمل الجملة، فقه البخاري في تراجمه. الإمام البخاري في صحيح البخاري، الجامع الصحيح له، ما تكلمش في أحكام، ما كانش بيتكلم في أحكام، لكن كان فقهه في التراجم؛ يعني في أنه هيحط عنوان للباب إيه؟ وتراجم البخاري حيرت العلماء، حيرت العلماء؛ يعني يقعدوا يقولوا هو ليه العنوان ده هنا، يعني مش فاهمين، يقعدوا يفكروا لغاية ما يفهموا المناسبة بتاعت العنوان، فقالوا فقه البخاري في تراجمه.

فمن الأبواب التي بوبها البخاري في صحيحه: باب القرعة في المشكلات. العجيب مش في ترجمة الباب، العجيب في أنه تلك الترجمة هذا الباب جعله في كتاب الشهادات. في كتاب الشهادات تجدون باباً بوبه البخاري: القرعة في المشكلات. إيه اللي دخل القرعة في كتاب الشهادات؟

فابن حجر قعد يتأمل كده، قال: آه، أصل هو الشهادات تقطع النزاع، وكذلك القرعة. دلوقتي اتنين جايين بيقولوا إيه؟ أنا اديته الفلوس، يقول لك: والله ما خدت منه حاجة، وعمالين يتخانقوا، يقوم يجي اتنين رجالة قاعدين يقولوا لك، دخلوا، اتنين عدول دخلوا قالوا: احنا شفناه وهو بيديه، تلاقي بيقول: والله ما خدت حاجة، دي يعمل إيه؟ يحط لسانه في بقه وخلاص. الشهادة قطعت النزاع.

فالبخاري راح حاطط باب القرعة في المشكلات في كتاب الشهادات، عشان يقول لك كذلك القرعة تقطع النزاع. فانا بقول لك خلي معاك الوسيلة دي، دلوقتي كثير من الأبناء يتعقدوا من الآباء، ليه؟ تلاقي الأب كل على طول يجي على الابن الكبير، يقول لك ليه؟ ما أصل ده، ما أصل ده الكبير. انتو عارفين الآباء مذهبين؛ أب يجي على الكبير يقول لك عشان الكبير، وأب يجي على الصغير يقول لك عشان الصغير، وكل واحد مقتنع بدماغه.

طب أنت ليه حاطط نفسك في الخانة دي؟ العيلين جم بيتخانقوا على المش عارف إيه، وما فيش حد ليه، يعني مش حاجة واحدة فتديها له، لا يعني، مسافرين: أنا اللي هقعد جنب الشباك، الخناقة المشهورة بين العيال الصغيرة. كل واحد عاوز يقعد جنب الشباك. ماشي لو هم تلاتة، ما هو لو اتنين خلاص، واحد يقعد هنا وواحد هنا، فتفعل إيه؟ هتحلها ازاي دي؟ من الأدوات اللي معاك القرعة.

وأقول لك بقى نصيحة تانية: مش أنت اللي تعمل القرعة. ليه؟ عشان تحيد نفسك تماماً، تفضل في نظر جميع الأبناء أنت الأب اللي على مسافة واحدة من الأبناء، وده مهم جداً جداً في التربية. لأنك لو كَسَرْتَ الحتة دي، الولد هيبقى شايفك متحيز، وده سيؤثر على نفسيته. وكثير من الأبناء يكبرون بالعقدة دي، يقول لك: أصل أبويا كان بيفضل أخويا الكبير، أو العكس: أبويا كان مدلع أخويا الصغير. وتفضل العقدة دي عند الولد أو عند البنت لغايت ما يكبر، وتؤثر على نفسيته، وممكن الولد يكرهوا بعض. الكلام ده كنا اتكلمنا عنه باستفاضة واحنا بنشرح سورة يوسف، وخلاص.

فأنت تعمل إيه؟ حَيّد نفسك: أنا على مسافة واحدة، يعني هتعمل قرعة مثلاً بالجنيه ولا بالبتاع، تقوم تعمل إيه؟ تديها لزوجتك؟ يكرهوا مراتك، لا يعني، ادي الجنيه لواحد منهم، أو لو عندك ابن تالت تديه للابن التالت، أو هات مراتك التانية؟ يكرهوا مراتك، هم كده كارهينها، ويروح هو اللي عامل إيه؟ القرعة طلعت القرعة له، خلاص هو اللي عامل القرعة طلعت لأخوه، هو اللي عاملها بإيديه. فأنَا على مسافة واحدة منكم، لا أنا حتى القرعة مش أنا اللي عملتها.

خلاص، كذلك في الشغل بتاعك، القرعة دي بتنشل مشاكل كتير: اتنين بيتخانقوا: أنا هطلع الإجازة بكره، لا أنا اللي هطلع الإجازة بكره. وهو الموضوع لازم واحد بس اللي يطلع، أنا عندي ظرف، وأنا كمان عندي ظرف، ويا سلام لو الاتنين بقى ناير ونير أصلاً في الشغل، طب أنت هتبدي مين؟ مشكلة، دي مشكلة فعلاً، هتبدي مين؟ الحل قرعة. خلاص يا جماعة، أنا عندي فكرة: احنا هنعمل قرعة، وهنحترم القرار بتاع القرعة، كلنا هنحترم القرار.

وكذلك زي ما بقول لك مش أنت اللي تعملها، تعالى يا فلان، واحد تالت من الشغل، اعمل قرعة يلا، أنت ملك وأنت كتاب، هات وقعت ملك أنت كتاب أنت، وخلصنا. القرعة في المشكلات فكان النبي عليه الصلاة والسلام دي واحدة من الأدوات اللي بيستخدمها أنه عشان النساء، طبعا الضرائر عارفين ما يكون بينهم، عشان لو ما لحقناش نجي لآخر الحديث يا جماعة، في فائدة مهمة جداً لما اتكلمت عن مسألة الضرائر دي.

فائدة مهمة ومتكررة في هذا الحديث من عائشة، السيدة عائشة رضي الله عنها منصفة وتلتمس العذر للمؤمنين. والحقيقة نفسيتها -مع أنها كانت السيدة عائشة كانت صغيرة، طبعا امرأة، امرأة، المرأة حاضت تبقى امرأة خلاص، يعني محاسبة ومكلفة- في الموقف ده السيدة عائشة كانت على أقصى تقدير، على أقصى تقدير عندها خمس سنة، على أقصى تقدير، أو تلاتة عشر سنة، يا تلاتة يا أربعة يا خمسة، على اختلاف العلماء. غزوة بني المصطلق كانت سنة تلاتة ولا أربعة ولا خمسة، عفواً أربعة ولا خمسة ولا ستة؟ فهي على أقصى تقدير عندها خمسة عشر سنة، فهي لسه صغيرة، وهي قالت كده في الحديث أنها كانت جارية صغيرة يعني.

فلما جم احتملوا الهودج فاكرينه جوه، ومع ذلك شوفوا يا جماعة، السيدة عائشة طبعا السيدة عائشة بتحكي الحديث ده، هي بتحكيه وهي بعد ما كبرت بقى. عملت إيه؟ أول موقف مع سيدنا سعد بن عبادة، سيدنا سعد بن عبادة وقف ودافع عن مين؟ عن عبد الله بن أبي بن سلول. تقوم ستنا عائشة تقطع القصة وتقول إيه؟ وكان رجلاً صالحاً غير أنه احتملته الحمية. تعتذر عنه، مع أنه يدافع عن رأس النفاق اللي اتهمها. شوفوا الإنصاف يا شباب، تعتذر عنه.

وبعدين يتكرر الموقف مع مين بقى؟ زينب بنت جحش. زينب دي رضي الله عن زينب، بالنسبة لسيدنا عائشة مشكلة كبيرة، عارفين إيه المشكلة؟ السيدة عائشة بتقول عنها: هي من كانت تساميني في زوجات النبي عليه الصلاة والسلام. يعني هي طبعا السيدة عائشة في حتة وبقية الزوجات في حتة، اللي بتنافسها السيدة زينب. ولذلك لما كانوا يحتاجوا حاجة من النبي عليه الصلاة والسلام، يبعثوا له السيدة زينب.

يعني في مرة من المرات، لما الصحابة طبعا رضوان الله عليهم كانوا عارفين حب النبي عليه الصلاة والسلام لسيدنا عائشة، فكانوا يعملوا إيه؟ كانوا يستنوا ليلة السيدة عائشة ويجوا له في بيت السيدة عائشة بالهدايا، فالهدايا كلها تروح لمين؟ السيدة عائشة. فطبعا ده مضايق مين؟ بقية النساء، طب عاوزين نشتكي، مين مين يجرؤ يتكلم؟ بعثوا له الأول السيدة فاطمة، أول حاجة ده طبعا يعني السيدة فاطمة، فدخلت عليه وهو مع السيدة عائشة في حجرتها، وقالت له إيه؟ إن أزواجك يسألنك العدل في ابنة أبي قحافة. فقال: يا بني، أتحبينني؟ قالت: نعم. قال: فأحبي هذه. فخرجت، راحت لهم: إيه اللي حصل سبع ولا ضبع؟ قالت لهم: قال كذا كذا كذا. طب روحي له تاني. قالت لهم: والله لا أراجعه فيها أبدا، خلاص انتهيت.

مين تاني بقى يجرؤ يدخل؟ ما فيش غيرها، السيدة زينب، دخلت. تقول عائشة: ففضجعت في الكلام، قالت كلام ثقيل، فنظرت إلى النبي صلى الله عليه وسلم هل يكره أن أجيبها؟ فعلمت أنه لا يكره، فقمت لها فأحمتها. خناق بقى ستات مع بعض. الشاهد يعني، مش عاوزين ندخل في القصة دي، المهم أن السيدة زينب كانت من تسامي السيدة عائشة رضي الله عنها.

شوفوا بقى يا جماعة، أول حاجة السيدة زينب، السيدة زينب طبعا صفاتها جميلة، والسيدة عائشة هي اللي تذكر ده عن السيدة زينب في حديث آخر، ماشي، وأنها كانت تهضم حق نفسها، وتبذل نفسها لله، وورِعَة. السيدة عائشة، الكلام ده يا جماعة خارج على لسان امرأة عن ضرتها، الكلام ده صعب جداً، ده أنت كراجل، راجل وما تعرفش تعمله مع واحد زميلك في الشغل بينافسك على وظيفة! فتخيل امرأة والتنافس على النبي عليه الصلاة والسلام، فالكلام ده ثقيل جداً على النفس.

أول حاجة السيدة زينب رضي الله عنها، السيدة عائشة تقول إيه؟ راح النبي سألها، سأل السيدة زينب عن السيدة عائشة، فقالت: أحمي سمعي وبصري، ولا أعلم إلا خيراً. الله أكبر، شوفوا شوفوا الجمال! فالسيدة عائشة ترد تقول إيه عن السيدة زينب؟ فصانها أو حماها الورع.

مين بقى اللي تقع في السيدة عائشة؟ حَمْنَة، عارفين حَمْنَة دي مين؟ أخت السيدة زينب، حَمْنَة بنت جحش وقعت في السيدة عائشة ليه؟ انتصاراً لمن؟ لأختها. أختها اللي سكتت وقالت: لا أعلم إلا خيراً، أحمي سمعي وبصري، فحماها الورع. فالسيدة رضي الله عنها كانت منصفة.

قالت، وبعدين السيدة عائشة هنا بقى بتعتذر عن نفسها في موقف أنا يعني، قالت: فخرجت مع رسول الله صلى الله عليه وسلم بعدما نزل الحجاب، فأنَا أحمل في هودجي وأنزل فيه يعني بعد الحجاب، فما كنتش أركب كده، كانت تتحط في الهودج، اللي هي زي حاجة كده شبه القبة وعليها الثياب، تدخل فيها المرأة ويحط فوق الجمل فيسير بها الجمل لأن الحجاب قد نزل إيه الحجاب يعني.

قال: وقَفَلْنا ودنونا من المدينة قافلين، أذن ليلة بالرحيل يعني قعدوا في مكانه، وبعدين قال: يلا نمشي من هنا. فقمت حين أذنوا بالرحيل، راحت تقضي حاجتها السيدة عائشة رضي الله عنها، وبعدين رجعت، الأول لما راحت ما كانتش قالت لحد، وبعدين انقطع لها عقد فرجعت تلتمسه تاني ومش قايلة لحد، فجم حملوا الهودج ومشوا فاكرينها جوه.

تتعلم بقى السيدة عائشة ولا ما تتعلمش؟ تتعلم. وهذه من الفوائد التي ذكرها ابن حجر في هذا الحديث، أنه بعد كده إيه التيمم يا جماعة لما نزلت لينا قصة طويلة، لكن فيها موقف شبه ده بالضبط، أن السيدة عائشة برده راحت لحاجتها، ولكن في الموقف ده في الرواية أنها قالت للنبي عليه الصلاة والسلام. فسيدنا فابن حجر رضي الله عنه قال إيه بقى؟ قال أنها اتعلمت. والكلمة دي الصراحة يعني مع أنها كلمة بسيطة جداً يقولها ابن حجر، لكن ده درس كبير للنساء وللرجال: بلاش نقع في أخطائنا، تفضل هي هي أخطائنا بالسنين نتعلم! يعني لما عملتي كذا حصل كذا، وجوزك تنرفز ووصلت كان هيطلقك أو ضغطه عالي وراح المستشفى أو جابته جلطة، تقومي عايداها؟ اللي عاوزه تموتيه بقى ده موضوع تاني.

طب ليه؟ ما خلاص، يبقى تركيز دي حاجة بتضايق الزوج، ما أعاملهاش تاني. فالسيدة عائشة تعلمت من هذا الموقف. برده من الفوائد هنا: أن ما كانوش بياكلوا كتير، كانوا بياكلوا تقول العُلْقَة، اللي هي البلغة، اللي هو الأكل البسيط. فكان النساء ما ما كانش عندهم، ما كانوش مليانين يعني، وكذلك الرجال، فما كانوا ياكلوا كتير، ولذلك قالوا إن أول بدعة أحدثت في هذه الأمة الشبع. وقلت لكم الكلام ده قبل كده، يعني شبع يعني على الدوام، آه ممكن نسمع أن أبو هريرة شبع مرة ولا حاجة، فيقول: والذي بعثك بالحق، لا أجد له مسلماً، إنما كل يوم بنشبع! دي الصحابة ما كانوا يعرفوها أن كل يوم بنشبع دي، ماشي.

قالت عائشة رضي الله عنها: وكنت جارية حديثة السن، فبعثوا الجمل وساروا، فوجدت عقدي بعدما بعثوه، ماشي. أنا عاوزة أوقف على مواطن فبعدي يعني، آه، من المواطن المهمة والدروس المهمة جداً ما فعله صفوان رضي الله عنه. دلوقتي يا جماعة صفوان بن المُعَطَّل قلنا لكم أن صفوان كان له وظيفة في الجيش، كان إيه؟ السَّاقَة. السَّاقَة دي وظيفة، إيه السَّاقَة دي؟ أن الجيش عاوزين نفهم بس طبيعة زمان، زمان يا جماعة السفر كان بالجمال، فالجيش ماشي رايح غزوة بني المصطلق ولا غيرها من الغزوات، فبيمشي مش يوم ولا اتنين، ده بيمشي أسابيع أو شهور، بيعملوا إيه؟ الجيش بيعمل إيه؟ والله لو الليل مُقْمِرة بيمشوا بالليل في الطراوة كده، لو الليل حالكة ما فيش قمر يعني في أول الشهر، يعملوا إيه؟ يناموا، يُعَرِّسُوا يعني ينزلوا في حتة كده يناموا فيها لغايه ما النهار يبتدي يشقشق، يبتدوا يمشوا لغاية ما يجي وقت الظهيرة، اللي هو وقت شدة الحرارة، يقوموا ينزلوا ينصبوا الخيام لأن مش عارفين يمشوا في شدة الحر، لغاية ما الشمس تكسر وبعدين يكملوا المسير. خلاص كده؟

طيب، ففي واحد وظيفته إيه بقى؟ طبعا الجيش ده بالمئات أو الألوفات. فالجيش بعد ما بيمشي، واحد بقى نسي الأداة، واحد نسي الدرع، واحد نسي السيف، وارد ده يحصل، فالجيش يمشي. في واحد اسمه السَّاقَة، السَّاقَة ده بعد ما الجيش يمشي، يكون هو أصلاً قبليهم برده في المنزلة اللي قبليهم، يعني يكون جاي وراهم. ليه جاي وراهم؟ اللي نسي حاجة يروح لاممها وماشي يلحقهم في المنزل اللي بعديه، ده بيسموه السَّاقَة. كان صفوان رضي الله عنه وظيفته دي، يعني مش مرة، كان هو السَّاقَة بتاع النبي عليه الصلاة والسلام. لو دي وظيفة السَّاقَة، يبقى من أهم صفات الرجل ده أنه يكون إيه؟ أمين. ودي مهمة جداً، أن أنا أعين واحد يبقى السَّاقَة ده واحد أنا أئتمنه. فدي مهمة جداً في قصتنا دي، ولذلك قال: ما علمت عليه إلا خيراً سيدنا صفوان.

دي أول حاجة، تاني حاجة سيدنا صفوان أما جه فلقى السيدة عائشة، فيعمل إيه بقى سيدنا صفوان؟ يقول: لا لا لا.

لا، ما الكلام مع النساء لا يجوز، ويمشي ويسيب سيدة عائشة يجيلها محرم ياخدها؟ عمل كده سيدنا صفوان؟ ما عملش كده. طيب عمل ايه؟ الله انت هنا؟ ازيك، اخبارك ايه؟ طب ايه اللي حصل؟ طب برضه ما عملش كده.

يبقى سيدنا صفوان، وده يا جماعة هو ده بقى إيه؟ التعامل، يعني امرأة واقعة في مشكلة كبيرة وضخمة، نسيبها بقى تولع؟ شوف سيدنا موسى عمل إيه؟ ﴿فَسَقَى لَهُمَا ثُمَّ تَوَلَّى إِلَى الظِّلِّ﴾ [القصص: 24]. ما بقى إيه طب واتساب بقى عشان لو احتجتوا بس تسقوا تاني بس رسالة تجي لكم على طول. ما فيش كده، سقى لهما ها ثم تولى إلى الظل خلصت، لا هو اللي ما سقاش ويدخلوا هم وسط الرجالة ويتبهدلوا، ولا هو اللي سقى وخدها فرصة نتعرف. سقى لهما ثم تولى إلى الظل، خلصت المهمة.

فسيدنا صفوان في الصحيح، لأن في روايات خارج الصحيح، لكن في رواية الصحيح إنه عمل إيه؟ ألا حول ولا قوة إلا بالله، أو استرجع: إنا لله وإنا إليه راجعون، تقول عائشة في رواية الصحيح: والله ما كلمني كلمة ولا سمعت منه كلمة إلا استرجاعه. هي كلمة وخلصت. هو عرفها إزاي؟ لأنه كان يراها قبل الحجاب، فهي كانت نايمة هو جه وهي نايمة، فشافها عرفها فاسترجع. قال بعض، ابن حجر في الفوائد قال إيه؟ قال: استرجع ليه؟ قال: عشان يصحيها من غير ما يوجه خطاب لها. شفتوا الجمال؟

يعني كان ممكن يعمل إيه؟ اصحي. كان ممكن يعمل كده وما فيهاش حاجة، لكنه بلغ في الأدب الغاية؛ استرجع، يعني ما كأنه ما بيكلمهاش هو بيتكلم بصوت عالي، تقوم هي على استرجاعه وبعدين ما تسمعش كلمة تاني خلاص، أناخ الناقة ركبته مشي. يبقى لا هو اللي سابها في الصحراء وقال أنا ماليش دعوة ودي امرأة يجيء لها محرم يأخدها، تجيء لها امرأة تانية يا ابن الست هتموت يا ابني، ولا هو اللي خدها حلوة في سيلوانة ويلا بقى نفتح كلام وحوار، خلاص.

تقول: والله ما كلمني كلمة ولا سمعت منه كلمة غير استرجاعه، حتى أناخ راحلته إلى آخر الكلام. طبعا الشباب عشان بس الكلام، احنا هم كانوا في صحرا، فأنت هنا يا حبيبي يا حنين البنت في بنات تانية يساعدوها، احنا مش في صحرا، ماشي فما تقولش الشيخ قال نساعد البنات، لا يا حبيبي البنت هتلاقي اللي يساعدها بدل الواحدة ألف، ماشي.

طبعا السيدة عائشة في هذا الحديث، أنا يعني بعدي بسرعة عشان نخلص، قالت إن الحاجة الوحيدة اللي كانت بتهربني إني لا أجد اللطف الذي أجده من رسول الله صلى الله عليه وسلم حين أشتكي. يبقى النبي عليه الصلاة والسلام كان لما المرأة بتشتكي ما فيش بقى حاجة اسمها إيه ده أنا أمي كانت تولد وتروح تعمل لأبويا الغدا، يا عم روح عند أمك دي مش أمك، فالمراة لما تشتكي تجد لطفاً من زوجها، يقدر ذلك ويحمل عنها العبء، ويتودد، أو يعني يودها ويقول لها كلام لطيف، يرفع من معنوياتها، هذا محتاجينه برضه يا جماعة في بيوتنا خلاص.

طيب نختم بآخر فايدة كنا قلناها في الدرس اللي فات، بس هو المفروض كانت تتقال هنا عشان يعني في الحديث، إنه لما قلنا ابتدينا الدرس اللي فات أصلاً بلماذا عائشة رضي الله عنها، وقلنا إن الله عز وجل إذا ساكن ولي من أوليائه ولياً آخر ربما يحدث بينهما شيئاً ليرد كلا منهما إليه سبحانه وتعالى، اللي حضر معانا إمبارح يعني يفتكر الكلام ده.

خلاص، ليه؟ علشان قلب الولي، الولي ده مش حد عادي، فقلب الولي ده ربنا سبحانه وتعالى يصون قلب ذلك الولي إنه إيه؟ يتعلق تعلقاً زائداً بأحد من البشر، مع إن ده في الأصل مش حرام، فلذلك كانت عائشة يعني كان ممكن يحصل الحادثة دي مع حد غير السيدة عائشة، لكن قدر الله أنها تكون مع عائشة. طيب ده حصل، قلنا لكم ده حصل، الشاهد بقى فين في الحديث هنا؟ إنه السيدة عائشة لما كانت تحب النبي عليه الصلاة والسلام حباً شديداً جداً، سيدنا النبي عليه الصلاة والسلام لما كان بيحب عائشة حباً شديداً جداً، فربنا سبحانه وتعالى أحدث بينهما شيئاً ليرد كلا منهما إليه سبحانه وتعالى.

ولذلك السيدة عائشة في آخر الحديث لما أمها تقول لها قومي إلى رسول الله، فتقول: والله لا أقوم إلا لله. في روايات بقى خارج الصحيح، خارج الصحيح جميلة قوي، أنها قالت: بحمد الله لا بحمدك ولا بحمد أحد من أصحابك. وفي رواية تانية قالت: بحمد الله، وكلمة زيادة مش مهم. وفي رواية إنه جه يمسك إيديها راحت شادة إيديها، والحافظ ابن حجر يعني اعتذر، قال إنه إيه؟ هذا يعني ما يكون بين المحب وحبيبه، يعني جه يمسك إيديها يعني بيلاطفها راحت شادة إيديها: لا مش عاوز، فهذا حدث أن ربنا سبحانه وتعالى ردها إليه سبحانه وتعالى، فهذا يكون في حق الأولياء.

أقول قولي هذا، واستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.