من الحوادث المهمة في السيرة حادثة الإفك، واحنا سمعنا الآيات في الصلاة التي تتحدث عن تلك الحادثة باختصار. طبعا احنا النهارده إن شاء الله هنتكلم عن حادثة الإفك من القرآن، وفي درس قادم هنتكلم -ونتمنى يكون درس واحد يعني- هنتكلم عن حديث الإفك من السنة، فالنهارده إن شاء الله هنتكلم عن حديث الإفك من القرآن.
بس خلونا قبل ما نبدأ يعني نشرع في تدبر آيات حديث الإفك، عاوزين باختصار عشان الشباب اللي مش عارفة إيه حديث الإفك ده أصلا، نفهم إيه حديث الإفك؟ النبي عليه الصلاة والسلام كان إذا خرج في أي غزوة من الغزوات يعمل قرعة بين نسائه، علشان يشوف مين اللي هتخرج معاه في الغزوة دي. ففي غزوة من غزوات خرج سهم السيدة عائشة رضي الله عنها، طبعا القصة بالتفصيل مش في الدرس ده هنذكر بقى الحديث بطوله وناخد فوائد الحديث، لكن بنختصر القصة عشان لما نخش على الآيات نبقى فاهمين احنا بنتكلم عن إيه أصلا.
فخرج سهم السيدة عائشة رضي الله عنها في في تلك الغزوة، خلصوا الغزوة وهما راجعين حصل قصة كده هنعرفها بقى بعدين يعني إن شاء الله. المهم سابوا السيدة عائشة ومشوا، فالسيدة عائشة نامت قالت شوية هيرجعوا ياخدوني. فجاء صحابي اسمه صفوان بن المعطل رضي الله عنه شافها، فأخدها ووصلها لغاية المدينة.
فلما دخلوا المدينة كان هو ماشي وشد الناقَة بتاعتْه وسيدنا عائشة راكبة على الناقة، دخلوا المدينة، فرآهم رأس النفاق في المدينة عبد الله بن أبي بن سلول، فاستغل الموقف ده ورمى السيدة عائشة رضي الله عنها وصفوان بالزنا عياذا بالله، وقد براها الله عز وجل من ذلك.
فلما عبد الله بن أبي بن سلول عمل كده، ففي بعض المؤمنين ابتدوا يتداولوا تلك الأخبار زي سيدنا حسان رضي الله عنه، زي سيدنا مسطح رضي الله عنه، زي ستنا حمنة رضي الله عنها، طبعا بنسودهم ونترضي عليهم علشان ما يقعش في أنفسنا تنقص لهؤلاء الكبار، وده كله هيجي إن شاء الله، ابتدوا يتداولوا تلك الإشاعات وتلك الأخبار.
فأنزل الله عز وجل -في فائدة مهمة نذكرها علشان أو يعني معلومة مهمة أنه- فضل الحال على كده شهر كامل، وفي بعض الروايات أنه أكثر من شهر وصلت لخمسين يوم، سيدنا النبي عليه الصلاة والسلام لا يوحى إليه شيء في أمر عائشة. ماشي والرواية ما قالتش إن الوحي انقطع، بس قالت إن ما فيش حاجة بتوحى في شاني في شان السيدة عائشة رضي الله عنها وهنجي له يعني إن شاء الله.
ففضلنا المده دي كلها ما بيجيش له وحي يعني، طب هي بريئه؟ هي عياذا بالله وقع منها شيء ما في؟ ما يعرفش سيدنا النبي عليه الصلاة والسلام، وما فيش وحي بيتكلم في الموضوع ده خالص المدة دي كلها. وبعدين نزل الوحي ببراءة السيدة عائشة في تلك الآيات عشر آيات هنقراها بقى ونتدبرها وسمعتوها في الصلاة.
فلما نزل الوحي بتلك الآيات لسيدة عائشة قيل لها يعني قومي إلى رسول الله صلى الله عليه وسلم تشكري يعني، فقالت: بل لا أقوم إلا لله. وفي رواية قالت: لا بحمدك ولا بحمد أحد، إنما بحمد الله. سيدة عائشة -أنا ذكرت المواطن اللي هنحتاجها النهارده بس- إنما إن شاء الله الحديث بطوله إن شاء الله نتدبره بقى ونقف على معانيه في درس ثاني. اظن كده القصة مفهومه إجمالا.
طيب، أول سؤال عاوزين نسأله أو سؤالين مع بعض: اشمعنا السيدة عائشة يحصل معاها ده؟ واشمعنا نفضل شهر وفي رواية لغاية خمسين يوم ما فيش حاجة تنزل؟ ودي بداية مفتاح فهم الآيات. احنا النهارده الآيات دي في سورة إيه يا شباب؟ في سورة النور. سورة النور كلها بتدور في فلك أو معظم الصورة بيدور في فلك الكلام حوالين العفة وغض البصر، وانتو سمعتوا آيات غض البصر أو إيه، والايه التانية بقى ممكن نكملها الدرس الجاي.
المهم الصورة بتدور في الفلك ده. اشمعنا السيدة عائشة رضي الله عنها يحصل يحصل معاها ده؟ يعني إيه اشمعنا؟ اشمعنا ده لأن يا جماعة لازم نتلمح فعل الله عز وجل في كل ما جرى. يعني إيه؟ من أول ما سيدنا النبي عليه الصلاة والسلام بيقرع بين زوجاته أو بين أزواجه فيخرج سهم السيدة عائشة، كان ممكن يخرج سهم حد تاني مش كده؟ لكن الله عز وجل بقدره أخرج سهم السيدة عائشة رضي الله عنها.
وبعدين تمر القصة وتخلص الغزوة وهما راجعين، فالسيدة عائشة تروح في حاجتها يتقطع لها عقد، فترجع تطلبه، كان ممكن العقد ما يتقطعش، لكن الله بقدره أراد أن أن هذا العقد ينقطع وتروح تدور عليه. وبعدين يجوا عشان يمشوا يظنوا أن السيدة عائشة في الهودج لأنها كانت صغيرة وكانت خفيفة فما عرفوش أنها مش جوه، فيقوموا ماشي ماشيين بالهودج وكان السيدة عائشة جوه، كان ممكن ينتبهوا أنها مش جوه لكن ما ينتبهوش بقدر الله عز وجل.
وبعدين ترجع السيدة عائشة فتنام، فيجي سيدنا صفوان فيشوفها، وكان ممكن ما يشوفهاش ويحتملها ويخش بها المدينة، ففي اللحظة اللي يخش بها المدينة يبقى رأس النفاق واقف ويشوفهم، كان ممكن ما يشوفهمش فيقول اللي يقوله. كل ده وقع بقدر الله عز وجل اشمعنا السيدة عائشة؟ اشمعنا؟
السؤال الثاني: كان ممكن بعد ما ده حصل أول ما رأس النفاق يقول ما قاله ينزل الوحي مباشرة بتبرئة السيدة عائشة، مش كده؟ ما نزلش. طب ينزل بعدها بيوم، بيومين، إنما نقعد شهر كامل ما فيش حاجة بتتقال عن الموضوع، والموضوع ده كان قضية رأي عام بالمصطلح الحديث، ده مش كلامي، قالوا إن هذه الفتنة لم تذر بيتا في المدينه إلا دخلته، وده متوقع من غير ما يتقال في رواية متوقع خبر زي ده، دي قضية رأي عام.
فيتاخر الوحي شهر أو خمسين يوم ما فيش كلمة في الخبر ده، ويقع من يقع، ويسكت من يسكت، ويدافع من يدافع، وسيدنا النبي عليه الصلاة والسلام أهمهما أهمه وكان في حالة صعبة جدا سيدنا النبي عليه الصلاة والسلام مما يقال عن السيدة عائشة. ليه؟ ليه الوحي ما ينزلش على طول؟
فتعالوا نجاوب على السؤالين دول ودول مفتاح فهم الآيات. أولا اشمعنا السيدة عائشة؟ السيدة عائشة لها خصيصة عند النبي عليه الصلاة والسلام، اللي هي إيه؟ مش أحب النساء، ده أحب الناس عموما، مش كده؟ أحب حد إلى قلب النبي عليه الصلاة والسلام في هذا الوقت يعني هي سيدة عائشة، لأنه كان بيحب حد اكتر مين؟ سيدة خديجة، بس سيدة خديجة كانت ماتت خلاص. فاحب حد لقلب سيدنا النبي عليه الصلاة والسلام هي السيدة عائشة. وكذلك سيدنا النبي عليه الصلاة والسلام للسيدة عائشة كانت تحبه حبا شديدا.
فهذه عادة الله عز وجل مع أوليائه، إذا ساكن الولي الولي، فربما يحدث الله عز وجل منه بينهم شيئا، ليه؟ عشان يرد كلا منهما إليه سبحانه وتعالى. وهذه الفائدة تكلم فيها بعض العلماء، أنه ربنا سبحانه وتعالى دلوقتي سيدنا النبي عليه الصلاة والسلام يححب عائشة فيها مشكلة يعني فيها حاجة حرام؟ ما فيش حاجة حرام ولا حاجة، سيدة عائشة تحب سيدنا النبي عليه الصلاة والسلام حبا شديدا، ما فيش حاجة حرام.
لكن ربنا سبحانه وتعالى يربي أوليائه تربية ويحملهم على أشياء ما يحملش عوام الناس عليها، لا أنت أنت في منزلة أخرى. لو تفتكروا اللي بيحضر الدروس معانا كنا اتكلمنا على نفس المسألة دي في قصة ذبح سيدنا إسماعيل، أنه لما تعلقت شعبة من شعب قلب إراهيم سيدنا إبراهيم عليه السلام بسيدنا إسماعيل عليه السلام، جاء الأمر بذبح ذلك المزاحم كما سماه ابن القيم، ليه؟ لأنه إبراهيم خليل الرحمن، فحب الله عز وجل قد تخلل شغاف قلب سيدنا إبراهيم، لما ولد له إسماعيل وزاحم حبه تلك المرتبة العلية، كان الأمر بذبح ذلك المزاحم.
فلما امتثل الخليل أمر خليله سبحانه وتعالى لم يبق في الذبح فائدة فكان الفداء: احنا مش عاوزين مش عاوزينك تذبحه، احنا عاوزين أن هذا الحب الذي دخل فزاحم حبنا في قلبك أنه لا يعتدل وما يزاحمش حبنا، فلما حصل ده ما بقاش في الذبح فائدة. فده معنى عالي، فلذلك كانت السيدة عائشة رضي الله عنها.
طيب ليه نقعد شهر أو خمسين يوم؟ أول حاجة للمعنى الأول اللي احنا قلناه، أنه يعني ايه يشتد البلاء على سيدنا النبي عليه الصلاة والسلام ويشتد البلاء على على سيدة عائشة رضي الله عنها علشان يرد كلا منهما إليه سبحانه وتعالى وقد كان. علشان كده في الآخر بعد الشهر لما سيدة عائشة قالوا لها قومي للنبي عليه الصلاة والسلام قالت إيه: والله لا أقوم إلا لله. ما أقومش للنبي عليه الصلاة والسلام والله لا أقوم إلا لله. وفي رواية: لا بحمدك ولا بحمد أحد من أصحابك ولكن بحمد الله. فكانها رضي الله عنها فهمت ذلك الدرس.
ثم وده بقى اللي يعنينا ودي بداية الدرس بتاعنا: ليه نقعد شهر كامل الوحي ما ينزلش؟ سورة النور مدنية ولا مكية؟ مدنية. ماشي سورة النور مدنية، لا يعني عشان دي هتتدلق أنا معايا مياه خلاص جزاكم الله خير وجزاك خير.
سورة النور مدنية، واحنا يا جماعة القرآن لما نقول قرآن مدني، فاحنا بنخاطب دولة، بنخاطب مجتمع، مش أفراد. القرآن المكي هو قرآن يخاطب أفرادا، واحد اثنين ثلاثة اثنا عشر أسلموا، خايفين ما بيعلنوش إسلامهم، بيتقابلوا خلسة علشان ما حدش يعرف، دي طبيعة النفسية الصحابة في الحقبة المكية. الحقبة المدنية مش كده، الحقبة المدنية احنا عندنا دولة قائمة ولها رأس، وفي مجتمع ودولة، فالقرآن المدني يخاطب دولة.
طيب، الدولة لا يستقيم حالها أن مع كل نازلة ينزل الوحي مباشرة يحكم في النازلة. ليه لا يستقيم؟ لأن قليلا وينقطع الوحي، هينقطع بإيه؟ بموت النبي عليه الصلاة والسلام. شوية والوحي هينقطع، فلو ما اتدربناش من دلوقتي ازاي نقيم دولة؟ ازاي نتعامل في دولة؟ ازاي لما لما يقابلنا موقف نستخدم الأدوات اللي تحت إيدينا عشان نحل الموقف ده، اللي من أعظمها والمهيمن عليها الشرع النصوص اللي في إيدينا، الدولة دي هتنهار بمجرد ما ينقطع الوحي، الدولة هتنهار.
فكان من حكمة الله عز وجل أنه يؤخر نزول الوحي، وتأخير نزول الوحي أحدث ذلك. يعني إيه أحدث ذلك؟ في آخر الشهر وده هنجي له بالتفصيل لما نتكلم عن الحديث، السيدة عائشة بتحكي أن سيدنا النبي عليه الصلاة والسلام جاب سيدنا علي وجاب سيدنا زيد، وكان الاتنين دول هما اللي بيستشيرهم دايما في أي حاجة تخص أهل بيته. سيدنا علي كان ربي في حجره وله قرابة معه، وسيدنا زيد معروف طبعا يعني هو يحبه، فكان ما يستشرش حاجة تخص أهل بيته غير الاتنين دول فجابهم استشارهم: إيه رايكم؟
فربنا سبحانه وتعالى بحكمته الاتنين يختلفوا على الرايين اللي أي حد ممكن يقولهم، واحد يقوله دي مراتك وما عرفناش عليها غير خير، واحد تاني يقوله طلقها والنساء غيرها كتير، اللي يحوجك لده، ودول الرايين يعني يعني لو جبنا مليون واحد مش رايهم مش هيطلع بره الرايين دول.
بس ابتدى المجتمع يرتب أوراقه دلوقتي، هو كان سيدنا النبي عليه الصلاة والسلام مستني وحي ينزل ما فيش وحي بينزل يوم واثنين وثلاثة وتسعة وعشرين وثلاثة أيام ما فيش حاجة، فابتدى المجتمع يرتب أوراقه هعمل إيه؟ طب تعالوا استشيركم، فيطلع الرايين.
فسيدنا النبي عليه الصلاة والسلام يميل لرأي فيهم ويطلع على المنبر ويقول: من يعذرني في رجل قد بلغ أذاه أهل بيتي؟ يقصد عبد الله بن أبي بن سلول. فيحصل حاجة عجيبة، عبد الله بن أبي بن سلول يا جماعة كان رأسا في الخزرج، كان رأس كان حاجة كبيرة يعني مش واصلا هو كان متغاظ ليه من سيدنا النبي عليه الصلاة والسلام أنه جاء إلى المدينة فأخذ منه ذلك السؤدد، فكان متغاظ فكان رأسا في الخزرج.
فيقوم سيدنا سعد بن معاذ في المجلس لما النبي يقول: من يعذرني في رجل كذا وكذا. قبل ما نقول القصة، هل يا جماعة بعد شهر ولا أكثر كل اللي قاعدين في الجامع مش عارفين مين الراجل اللي النبي بيتكلم عنه؟ عارفين، صح؟ فهم عارفين مين بيتكلم عن مين النبي عليه الصلاة والسلام، لكن النبي ما قالش اسمه عليه الصلاة والسلام: من يعذرني في رجل قد بلغ أذاه أهل بيتي.
فيقوم قايم سعد بن معاذ وهو سيد الأوس، وطبعا أما نقول الأوس والخزرج على طول جه في دماغكم الحروب اللي كاتبينهم في في الجاهلية، قال: أنا أعذرك منه، إن كان منا من الأوس قطعنا عنقه، وإن كان من إخواننا من الخزرج أمرتنا فيه بأمرك. دبلومآسية شديدة، هو سيدنا سعد عارف هو بيتكلم عن مين وكل اللي قاعدين عارفين، فيقول: لو كان من عندنا حالا هنقطع راسه، لو من إخواننا من الخزرج -وهو كلهم عارفين أن هو من الخزرج- أمرنا.
فيقوم مين؟ سعد بن عبادة وهو منين؟ من الخزرج، يقول له: كذبت والله لا تقطع عنقه ولا تقدر عليه، أو كما قال. وابتدا فتنة بين الأوس والخزرج، الناس قامت على بعض في الجامع والنبي صلى الله عليه وسلم يخفضهم. يا جماعة مش دي الحاجات اللي هنشوفها في الدولة بعد كده؟ هي هي، هو ده اللي هنشوفه، مسألة عاوزين ناخد فيها رأي. طب الرأس
هياخد رأي بأيه؟ بالادوات اللي تحت ايده. وبعد ما ياخد رأي الناس هتختلف والناس هتبتدي تتق, طيب هيتعامل ازاي مع الموقف ده؟ فهنا ابتدى المجتمع يرتب اوراقه وهنشوف ترتيب اوراق اكتر ان شاء الله لما نتكلم عن الحديث بعد كده.
فلذلك اخر الله عز وجل نزول الوحي تلك المدة عشان المجتمع يرتب اوراقه. ثم نزلت تلك الايات العشر لتبرئة السيدة عائشة. العجيب ان الايات العشر اللي نزلت يا جماعة لم تذكر تبرئة السيدة عائشة رضي الله عنها الا في كلمة من ثلاث حروف تبعا لا اصلا. احنا معانا عشر ايات اهم. فين تبرئة السيدة عائشة في الايات؟ يعني فين في الايات ان السيدة عائشة بريئة؟ ما فيش. في كلمة من ثلاث حروف كلمة إفك. وكلمة إفك جاءت تبعا لا اصلا, يعني ايه تبعا لا اصلا؟ يعني ما جاتش آية نزلت آية, إن ما يقال إفك, ما اتقالش كده, لا دي جت تبعا كده في نص الكلام.
يعني قال الله عز وجل: ﴿إِنَّ الَّذِينَ جَاؤُوا بِالْإِفْكِ عُصْبَةٌ مِّنكُمْ﴾ [النور: 11] فعرفنا ان اللي حصل ده إفك. فاهمين؟ وكأن الايات, كأن الايات التي نزلت لتبرئة السيدة لها مهمة اخرى اخطر من تبرئة السيدة عائشة. خلاص براناكي بتلات حروف, والكلمه جاءت تبعا لا اصلا. امال ايه مهمة الايات العشرة؟ ليه عشر ايات ليه؟ يعني لو تصورنا ان الايات نزلت لتبرئة السيدة عائشة كان يكفي آية واحدة. مش كده؟ إن هذا إفك مبين وخلاص خلصنا. او ان زوجك مثلا آية طاهرة عفيفة, وخلصنا. أي آية يعني أي نص في آية أو في نص آية أو جزء من آية ونزلت براءة السيدة عائشة وخلاص تمام على كده.
لا ربنا ما عملش كده. السيدة عائشة قالت نزلت العشر ايات, عشر ايات نزلوا في الموطن ده. ليه؟ ليه؟ علشان اللي احنا بنقوله. علشان ربنا سبحانه وتعالى بيعلمنا ازاي نتعامل في المواقف اللي شبه دي. الله عز وجل يعطينا أنواراً في سورة النور. هنتكلم عن أنوار سورة النور وفي أنوار اخرى هنجيبها بقى من الحديث ان شاء الله, بس خلونا في تلك الأنوار الكاشفة في مثل هذه الحوادث. يلا نبدأ الايات وفي اثناء الايات هنشوف الأنوار اللي هتبتدي توضح لنا الصورة.
قال الله عز وجل: ﴿إِنَّ الَّذِينَ جَاؤُوا بِالْإِفْكِ عُصْبَةٌ مِّنكُمْ لَا تَحْسَبُوهُ شَرًّا لَّكُمْ بَلْ هُوَ خَيْرٌ لَّكُمْ﴾ [النور: 11]. وأول درس وأكبر درس وأعمق درس والذي ندندن حوله كثيراً في الدروس: لا تحسبوه شرا لكم بل هو خير لكم. ليه مش شر وليه خير؟ لأنه تقدير ربنا سبحانه وتعالى. فطالما ربنا قدره خلاص ده الخير. عرفنا ليه عرفنا, ما عرفناش هنسلم انه الخير من غير ما نعرف. لا تحسبوه شرا لكم بل هو خير لكم.
شوفوا يا جماعة, من الخيرية, يعني هاقول لكم حاجة واحدة بس من الخيرية: إنه بعد نزول تلك الايات من اتهم السيدة عائشة رضي الله عنها بما برأها الله منه يكفر ويقتل. طيب لو واحد جاء الان عياذا بالله واتهم سيدنا ابا بكر رضي الله عنه بالفاحشة, هو مين أعظم؟ سيدنا ابو بكر ولا السيدة عائشة؟ سيدنا ابو بكر بلا شك أعظم تلك الامة. طب واحد جاء اتهم سيدنا ابو بكر دلوقتي بالفاحشة, يقتل؟ لا ما يقتل, يؤدب ويعزر. طب واحد اتهم السيدة عائشة رضي الله عنها بالزنا؟ يقتل. ليه؟ لأنه مكذب للقرآن. يقتل لأنه مكذب للقرآن. فكان خيراً.
وخير آخر للمجتمع المدني وللأمة بعد ذلك أن نزلت تلك الأنوار اللي بيها هنعرف نتعامل مع الشائعات، واللي بيها هنعرف نتعامل مع القذف، واللي بيها هنعرف نتعامل مع اربع فئات هيظهروا لنا في المجتمع مع كل حالة شبه دي. ربنا ذكر الاربع فئات دول. انتم عارفين يا جماعة، أي شائعة تحصل وأي حد من اهل الديانة ولا اهل الصلاح يرمى بما يرمى به ولا يطعن في شرفه ولا في عرضه ولا يتفبرك له فيديو ولا صورة ولا غيره ولا غيره، تلاقي الناس تتقسم اربع فئات.
فئة تحب ذلك، تحب ان تشيع الفاحشة في الذين امنوا. والحب ده عمل ايه؟ قلب ولا جوارح؟ قلب, يعني هي من جواها حابة اللي بيحصل، حابة الدوشة اللي حاصلة في الحتة دي حوالين اهل الديانة واهل الصلاح. ومع ذلك هي تتكلم وتساعد في نشر تلك الفاحشة. دي فئة. فئة ثانية تحب ذلك، تحب أن تشيع في الذين امنوا -ده لفظ القرآن- ومع ذلك هي ما بتتكلمش لكن حب الموضوع ده, يعني ايه فرحانة باللي بيحصل لكن لا تشارك.
وفي فئة ثالثة هي لا تحب ذلك، هي لا تحب ذلك، لكن تشارك. عجيبة دي مش كده؟ هو ده اللي حصل من الصحابة الاسماء الكبار اللي احنا قلناها دي، هو سيدنا حسان يحب ذلك؟ وشارك. سيدتنا حمنة تحب ذلك؟ وشاركت. سيدنا مسطح يحب ذلك؟ ابدا وشارك. يبقى فئة لا تحب ذلك بقلبها لكنها شاركت. وفئة لا تحب ذلك ولم تشارك. ولم تشارك دي بقى ممكن نقسمها اتنين أو تقولوا بقى ان هم خمس انواع براحتكم: أما لم تشارك يعني سكتت، واما انها لم تشارك يعني ابتدت كمان تدافع، مش بس ما شاركتش لا، دي لما حصلت دوشة طلعت دافعت.
فدي الفئات اللي ممكن تظهر في اي مجتمع مع نشر مثل تلك الاخبار. هذه الفئات ذكرها الله عز وجل في القرآن وتعامل معها. أنوار هتجيلنا دلوقتي فهذا من خير تلك الحادثة: ﴿لَا تَحْسَبُوهُ شَرًّا لَّكُمْ بَلْ هُوَ خَيْرٌ لَّكُمْ﴾ [النور: 11]. طيب واللي عمله ده ما تشغلوش نفسكم بيهم: ﴿لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ وَالَّذِي تَوَلى كِبْرَهُ مِنْهُمْ لَهُ عَذَابٌ عَظِيمٌ﴾ [النور: 11].
فاول فائدة: لا تحسبوه شرا لكم بل هو خير لكم. والذي تولى كبره منهم على القول الراجح من اقوال اهل العلم ان هو عبد الله بن ابي بن سلول. قيل غير ذلك؟ اه قيل غير ذلك، لكن خلينا على القول اللي احنا مش جايين نفسر القرآن، جايين نتدبر بس بعض المواطن.
أي لولا بقى في الايات دي اعرفوا انه نور من انوار تلك السورة المباركة. لولا, يعني هلا. دلوقتي يا جماعة احنا قلنا شهر كامل القرآن ما بينزلش, وبعدين نزل, فنزل ربنا أول لولا: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12]. يا جماعة، ربنا الان القرآن بيرتب دماغنا وبيرتب افكارنا وازاي نتعامل في المواقف، فتعالوا كده نفهم أنوار تلك الصورة من هذا بقى المنطلق اللي احنا شرحناه.
اول لولا: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12]. أنفسهم دي اللي هما مين انفسهم؟ اما انفسهم يعني هما نفسهم، يعني انا لما اسمع الكلام ده على غيري من اهل الصلاح والديانة اما اظن بنفسي الخير، او اظن بانفسهم يعني باخوانهم اللي هو الشخص اللي اترمي ده ولا الست اللي اترمت دي، اظن بها الخير طالما هي ظاهرها الصلاح.
تعالوا نمسك المعنى الاولاني، انفسهم دي ممكن تيجي ويقصد بها غيرنا، ممكن جت في القرآن ربنا قال ايه: ﴿فَسَلِّمُوا عَلَىٰ أَنفُسِكُمْ﴾ [النور: 61] يعني هتمسك اليمين كده ولا انفسكم هنا اللي هو سلموا على مين؟ على إخوانكم. مش كده؟ فممكن كلمة انفس تيجي في القرآن والمعنى غيركم يعني إخوانكم. تعالوا نمسك اول معنى: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12]. هنا فيها قصة سيدنا ابو ايوب الانصاري لما ابتدى الناس تتكلم، دخل على أم ايوب مراته فقالت له: سمعت اللي حصل؟ قال لها: اه سمعت. أكنت فاعلة ذلك؟ قال لها: انا سمعت، اه انت تعملي كده، انت تزني؟ قالت: لا والله. قال: أكنت فاعلة؟ تصدقي علي أن اعمل كده؟ قالت: لا والله. قال سيدنا ابو ايوب: فعائشة خير منك، وصفوان خير مني.
هنا يا جماعة القرآن بيعمل ايه؟ بيقول: آدي نور من الأنوار، يعني لما يحصل حاجة كده, ما هو دلوقتي ما فيش وحي اهو، فسمعت عن فلان الفلاني اللي هو ظاهره الصلاح أو فلانة الفلانية اللي هي ظاهرة الصلاح والديانة وما عندناش اي حاجة تقول غير كده انه حصل كذا وكذا وكذا، اول حاجة تعملها ايه؟ تقول: انا زوجي تعمل ده؟ انا اعمل ده؟ لو انا ما اعملوش وزوجتي ما تعملوش، فلان ده اصلح مني فيما يبدو, فيما يبدو (يعني في الظاهر) وكذا، وفلانة اصلح من زوجي. وخلصنا، الصفحة واتقفلت. يبقى ده نور من الأنوار، اللي هو ايه؟ القياس.
القياس, انا ما اعملش ده ومراتي ما تعملش ده، وده قياس, ده بيسموه قياس الأولى, يبقى دول أولى بانهم ما يعملوش ده. وده حدث، آدي فئة اهي قلنا ايه القرآن هيذكر الفئات معانا، اللي هي لم تحب الفاحشة بقلبها ودافعت. اهو.
او يكون المعنى: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12] يعني باخوانهم خيرا. هنيجي لإفك مبين لأن ده نور ثاني هنجي له، كلمة إفك مبين دي لوحدها ده نور لوحده هنجي لها دلوقتي. لكن خلونا: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12] يعني باخوانهم، اللي هو معناه ايه بقى يا جماعة؟ اللي هو إحسان الظن بالمسلمين. وأن الإنسان طالما ظاهره الصلاح والديانة والعدالة خلاص، خلاص يعني ايه؟ يعني هيتقال عليه شيء بلا بينة, نصدق؟ لا ما نصدقش. طب نروح نفتش؟ لا ما نروحش نفتش، وده نور تاني هيجيلنا: تفتش ليه؟ انت مالك؟ ما تفتش. وما تصدقش وما تنشرش، دي كلها أنوار هتجيلنا ان شاء الله.
طيب, أنا شفته بعينيا، شفته يفجر، يزني بعيني، اروح اتكلم؟ ما تتكلمش. طب عارف لو كلمت هيحصل فيك ايه؟ تحد قذفاً. أنت اللي تحد قذفاً. ليه؟ لأن النصاب كم واحد؟ اربعة يشهدوا. فلو شهدت لوحدك تحد قذفاً فما تروحش تتكلم. طب انتو اتنين تروحوا تتكلموا؟ لا. طب ثلاثة؟ طب اربعة؟ لا برضه. حتى لو اربعة ما نتكلمش؟ اه ما تتكلموش. ليه؟ لأن هذا من إظهار الفاحشة، يحبون أن تشيع الفاحشة، من إشاعة الفاحشة. طب رحتوا اتكلمتوا؟ الشرع أذى لكم في ذلك، الأولى انكم ما تتكلموش. دي كلها مسائل شرعية ومذكورة في كتب الفقه معروفة يعني. خلاص.
فهذا الأولى انك ما تتكلمش حتى لو اربعة، حتى لو اربعة، تستره عليها؟ اه تستره عليه. طيب ده الأصل ماشي، خلينا بقى نرجع للمسألة بتاعتنا. فبقى نور من الأنوار أن اليقين لا يزول بالشك, ده نور من الأنوار. طيب اليقين اللي هو ايه؟ الأصل في المسلم اللي قدامي ده العدالة، الأصل في المسلم اللي قدامي ده إنه صالح، إن ده الأصل فيه، بالذات بقى لو ظاهر عليه علامات الصلاح وعلامات الديانة وعلامات كذا وعلامات كذا، ده الأصل فيه.
طب هو احنا بنقول ده الأصل يا جماعة, يعني اللي بالصفة دي لا يقع في الفاحشة؟ يعني اللي بالصفة دي لا يقع؟ ما هو ممكن يقع في الفاحشة عادي، هو مش معصوم، ممكن يقع في الفاحشة، لكن هو الأصل فيه كده. فواحد جى قال كلمة كده، ولا شير فيديو ولا نزل صورة ولا عمل مش عارف ايه، ها انت هتعمل ايه؟ اول حاجة، احنا ده كله يا جماعة احنا بنتكلم في القلب دلوقتي: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا﴾ [النور: 12], تظن بأخيك الخير وأنت تظن بأختك الخير، أو تظن بنفسك وتظن بزوجك الخير وبنتك وبأمك، تقول أمي ما تعملش ده وزوجتي ما تعملش ده، يبقى زيها دي برضه دي ست صالحة وست تقية وست معروف عنها الصلاح وكذا فما تعملش ده، وقل مثل ذلك في الرجل. يبقى دول نورين مش نور واحد.
خلاص، أي نور يا جماعة من الأنوار دي لو بس هو كنا اتبعناه في حديث الإفك كانت الفتنة دي ماتت في يومها. ما هو يا جماعة انتم تخيلوا الفتنة دي ازاي, هو سيدنا صفوان داخل بستنا عائشة رضي الله عنهما، عبد الله بن ابي بن سلول واقف قال كلمة هي, هو قال كلمة قال ايه؟ زوجة نبيكم وصفوان! والله ما سلم اثنين ولا سلم منها. كلمة! لو اتبعنا احنا احنا هنقعد نقول أنوار كتير في الصورة، أنوار كتير تفيدنا في التعامل مع المشاكل اللي شبه كده. لو اتبعنا نور واحد كان كفاية. يعني ايه نور واحد؟ يعني عبد الله بن ابي بن سلول لما وقف قال الكلية دي, فمثلا لما سمع سيدنا حسان، فسيدنا حسان وقف كده شوية وراح قال ايه؟ والله كذا وكذا، اللي هو انا اظن بنفسي الخير وصفوان افضل مني فما يعملش، او انا اظن بصفوان الخير واظن بسيدنا عائشة الخير فسكت وما اتكلمش، انتهت، خلصت الفتنة، ماتت.
اللي بعده, النور الثالث: ﴿لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَذَا إِفْكٌ مُّبِينٌ﴾ [النور: 12]. كلمة مبين دي عجيبة جداً، يعني إفك واضح. ده نور يا جماعة ما كانش يحصل غير لما المجتمع يهدى وابتدي يفكر تفكير منطقي، تفكير عقلاني.
تعالوا نتأمل كلمة إفك مبين دي، الإفك ده ازاي واضح؟ تعالوا كده نشوف، طبعا أولا أنها السيدة عائشة رضي الله عنها فده يخليه إفك مبين أصلاً، يعني بداية كده بس ده مش هنتكلم عن دي. واعذروني الكلام هيبقى ثقيل شوية فهحاول يعني ايه أوري بالكلام وكده, الكلام ثقيل على القلب يعني إنه يتكلم في مثل هذا في مثل سيدنا عائشة, سيدنا صفوان رضي الله عنهم. دلوقتي لو حصل شيء مما رمي به وبرأهم الله عز وجل منه، هيقوم داخل سيدنا صفوان بسيدنا عائشة على الجمل قدام الناس كلها الظهر؟ يعني لو حصل حاجة زي كده يعني أبسط حاجة.
ايه؟ هنوصل لقرب المدينة وبعدين هنزلك ولا شفتك ولا شوفتيني ونخلص. طب نستنى الليل الناس كلها تنام ونبقى نخش وخلاص وتخلص. مش ندخل احنا الاتنين مع بعض الظهر قدام الناس. صح يا جماعة؟
وهذا مما قيل يعني قاله العلماء أصلاً، العلماء تكلموا في هذه المسألة يعني. فده يخليه إفك مبين، إفك واضح. طيب، في مسألة ثانية، كلمة في الحديث، وهذه الكلمة لم أجد من تعرض لها لكن تأملتها وجدت الكلمة دي عجيبة جداً. إن سيدنا النبي عليه الصلاة والسلام لما طلع على المنبر في آخر الشهر وقال: «من يعذرني في رجل قد بلغ أذاه أهل بيته؟ ولقد ذكر رجلا ما علمت عليه إلا خيرا وما دخل على أهلي إلا معي».
يقصد مين؟ سيدنا صفوان. الأول يا جماعة سيدنا صفوان في خصيصة مهمة جداً قبل ما نتكلم على الحته دي، في خصيصة مهمة جداً سيدنا صفوان الناس ممكن ما تبقاش عارفاها. هو ليه السيدة عائشة لما نامت في الموقف ده اللي شافها سيدنا صفوان؟ ليه؟ سيدنا صفوان كان له دور مهم جداً في الجيش، وده كان وظيفته الرسمية في الجيش، بيسموه الساقة.
مين الساقة ده؟ الجيش يا جماعة لما كان بيمشي في الصحراء بيمشي بقى شهور. فبايه؟ بيخيموا في مكان، وبعدين شوية يناموا بالليل، وبعدين يروحوا إيه؟ واخدين حاجتهم وماشيين لغايه ما يجي عليهم الليل يخيموا في مكان تاني. سيدنا صفوان كانت وظيفته إنه يبقى متأخر عن الجيش، بيسموها الساقة. وبعد ما الجيش يمشي من المكان ده يروح جاي سيدنا صفوان يقعد يبص في المكان ليه؟ عشان اللي وقع منه حاجه، اللي نسي حاجة ياخدها معه ويلحقهم في المنزل اللي بعده. دي وظيفة سيدنا صفوان رضي الله عنه.
لو أنت قائد في دولة أو قائد جيش أو رئيس جمهورية وهتختار واحد للمهمة دي، أهم صفة فيه إنه يكون إيه؟ أمين. أمين مش كده، لأن ده واحد هتأتمنه على ما هو ممكن يدب حاجة في جيبه ولا شفت ولا خلصت. فمن أهم الصفات اللي، طب سيدنا صفوان بقى كان هو الساقة بتاع النبي عليه الصلاة والسلام. فده يجعل الأمر برده إفك مبين، لا تعالوا بقى للكلمة اللي قالها سيدنا النبي عليه الصلاة والسلام لما وقف على المنبرشوفوا يا جماعة بعد شهر.
الكلام ده ابتدى يترتب، بعد شهر ابتدى يظهر، بعد شهر وقف على المنبر قال كلمة عجيبة جداً قال: «وما دخل على أهلي إلا معي». إيه معنى الكلمة دي؟ شوف بقى الإفك المبين ده معنى الإفك المبين. دلوقتي يا جماعة عياذاً بالله عياذاً بالله الفاحشة رجل وامرأة ورجل زي صفوان وامرأة زي السيدة زي سيدنا صفوان وامرأة زي السيدة عائشة رضوان الله عليهما. والسيدة عائشة اللي هي إيه؟
فسيدنا صفوان رضي الله عنه قال عنه النبي عليه الصلاة والسلام وما دخل على أهلي إلا معي. الزنا ده عشان يحصل بين رجل وامرأة والمرأة دي هي يعني امرأة الراس الكبير، هل يحصل فجأة كده؟ يعني هيحصل يعني إنه مثلاً أصل خليه لو لو رجل راود امرأة عن نفسها فامتنعت، ده معناه ايه؟ فِضيحة بجلاجل. هو الموضوع مش إيه؟ أراود امرأة عن نفسها فتمتنع وخلص الموقف في الصحراء، الموضوع مش هيبقى كده. الموضوع إن هترجع المدينة وتقول حدث كذا وكذا.
طب عشان ده يحصل لازم يبقى إيه الأول؟ حصل رسالة على الواتساب فلقينا إيه؟ إيموجي ضحك حصل. فابتدينا نفهم إن في سكة. وبعدين بقت بعثنا فويس فلقينا اترد بفويس فالسكة، وبعدين واحدة واحدة لغايه ما يجي الإيه؟ ده كله هيحصل إمتى؟ ما هو لازم يبقى في خلوة معينة حصلت. سيدنا النبي قال عمره ما دخل على أهلي غير معي، فازاي فجأة كده يحصل ده؟ هذا إفك واضح، كذب واضح.
آخر حاجه في أنه إفك مبين إنه عبد الله بن أبي بن سلول كان معاهم في الصحراء قاعد زيه زي الناس، دخل عليه قال إيه؟ والله ما سلمت منه ولا سلمت منه. طب يا ابني أنت شفت إيه ولا شفت إمتى؟ أنت معانا. وبعدين اللي بيتكلم راس النفاق اللي كلنا عارفين إنه منافق أصلاً، وبيتكلم عن مين؟ عن السيدة عائشة وسيدنا صفوان. إفك مبين، إفك واضح. عشان كده الآية اللي بعديها على طول: ﴿لَوْلَا جَاءُوا عَلَيْهِ بِأَرْبَعَةِ شُهَدَاءِ﴾ [النور: 13].
الحقيقة أنت القعدة معكم حلوة، بس أنا مرهق شوية، فيعني لو تسمحوا لي أمشي يبقى كُتّر خيركم. تعبان يعني بس نوعدكم إن شاء الله نكمل. وكنا وقفنا عند قول الله عز وجل: ﴿لَوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنْفُسِهِمْ خَيْراً وَقَالُوا هَذَا إِفْكٌ مُبِينٌ﴾ [النور: 12]. وكنا بنتكلم عن أنوار سورة النور في التعامل مع الشائعات. قال سبحانه وتعالى: ﴿لَوْلَا جَاءُوا عَلَيْهِ بِأَرْبَعَةِ شُهَدَاءِ فَإِذْ لَمْ يَأْتُوا بِالشُّهَدَاءِ فَأُولَئِكَ عِنْدَ اللَّهِ هُمُ الْكَاذِبُونَ﴾ [النور: 13].
هنا يا جماعة الكلام قد يكون موصولاً ويكون الكلام من قول أهل الإيمان. يعني إيه؟ يعني يكون الكلام: لولا إذ سمعتموه ظن المؤمنون والمؤمنات بأنفسهم خيراً وقالوا هذا إفك مبين لولا جاءوا عليه بأربعة شهداء. يعني أهل الإيمان هم اللي قالوا هذا إفك مبين، لولا جاءوا عليه من رمى السيدة عائشة رضوان الله عليها وسيدنا صفوان رضي الله عنه. لولا جاءوا عليه بأربعة شهداء، وهذا نور آخر من أنوار سورة النور.
احنا بنتكلم عن تلك الأنوار التي من أجلها أخر الله عز وجل نزول الوحي شهراً، وفي بعض الروايات خمسين يوم أو يزيد. ليه؟ عشان المجتمع يرتب أوراقه ويعرفوا أن مش في كل نازلة هينزل وحي. يعني إيه يا جماعة مش في كل نازلة هينزل وحي؟ يعني الآن اتهمت السيدة عائشة رضي الله عنها طب في وحي بينزل فهينزل أن السيدة عائشة بريئة. طب مات النبي عليه الصلاة والسلام واتهمت امرأة عفيفة أخرى مستنيين احنا بقى، ما فيش وحي ما فيش وحي هينزل يقول تلك المرأة لا ينبغي أن تتهم أو لا ينبغي أن ترمى أو لا ينبغي أن تسمعوا لتلك الشائعات، أو ما فيش كده، أو رجل اتهم بأي شيء هنتعامل إزاي؟
ولذلك أخر الله عز وجل الوحي عشان المجتمع يرتب أوراقه بما فيهم النبي صلى الله عليه وسلم، وهذا حدث في آخر الشهر هيجي لنا بقى في السنة إن شاء الله. إزاي ابتدت بعد ما الصدمة خدت وقتها سيدنا النبي عليه الصلاة والسلام يبتدي يشاور ويسمع الآراء ويطلع يتكلم على المنبر بحجج عقلية أشرنا إليها إمبارح وهتجينا تاني إن شاء الله في السنة إن شاء الله. فده مطلوب من أنوار سورة النور أن احنا عندنا قاعدة في الرمي بالزنا، عندنا حكم في ده مش كده؟ أن علشان نقبل عشان نقبل ذلك لابد أن يكون أربعة بيشهدوا، ولما يشهدوا يشهدوا أن هم رأوا رأي العين، يشهدوا أن هم رأوا ذلك رأي العين من غير بقى دخول في تفاصيل.
ماشي؟ طيب هل ده حصل؟ ما حصلش، فكان من تلك الأنوار الملكات المفروض تضيء الطريق أو تضيء في تلك الظلمة الحالكة أن هو فين الأربعة شهود؟ ما فيش أربعة شهود، إذاً خلاص الملف ده اتعفل من بابه. وإمبارح قلت لكم طيب واحد رأى رأي العين يتكلم؟ ما يتكلمش. طب لو اتكلم يحد، يحد حد القذف. ده شب عينه. الشرع بيقول كده: ما تتكلمش، لو اتكلمت هتحد حد القذف.
طب اتنين شافوا؟ لو اتكلموا يحدوا حد القذف فما يتكلموش. طب تلاتة شافوا يتكلموا؟ برده ما يتكلموش. طب أربعة شافوا يتكلموا؟ برده ما يتكلموش، ما يتكلموش هنا استحباباً، هذا نص عليه الفقهاء، ليه؟ ستراً للمسلم. طب اتكلموا؟ جائز لهم، وساعتها يبقى خلاص شهدوا على ذلك الرجل، يؤتى هذا الرجل ويقام عليه الحد. إنما الشرع يندبهم إلى الكتمان برده حتى لو أربعة شافوا؟ حتى لو أربعة شافوا.
خلاص؟ طب اتكلموا؟ لهم ذلك، وخصوصاً بقى احنا نستخدم ده فين؟ على حسب حال الرجل وحال المرأة، يعني هو رجل أصل احنا قلنا الكلام ده إمبارح قلنا رجل ظاهره الصلاح امرأة ظاهره الصلاح هل اعتقادنا فيهم أن هم معصومين لا يعني لا يقعون في الفاحشة؟ لا طبعاً، بعيد عن السيدة عائشة أنا بتكلم دلوقتي. مهما بلغ الرجل في الصلاح ومهما بلغت المرأة في الصلاح يعني اعتقادنا فيهم إيه؟ أن هم مستحيل يقعوا في مثل هذا؟ لا، ما فيش حد نعتقد فيه كده، ما فيش حد نعتقد فيه كده.
لكن نحن نعامل الناس على ظاهرهم، فهو رجل ظاهره الصلاح، خلاص ظاهره الصلاح. طب وقع؟ ممكن ممكن، وسيدنا ماعز وقع في مثل ذلك رضي الله عنه، إلى الآن نترضى عن سيدنا ماعز رضي الله عنه. خلاص؟ المسألة دي مهمة عشان نفسياتنا يا شباب، بعض الناس نفسيتها بته ما بتستحملش. واحد ظاهره الصلاح ولا واحد من الدعاة ولا واحد من طلاب العلم ولا مقرئي القرآن ولا كذا وكذا وعُرِف عنه شيء، فطبعا أسوأ شيء أن الشاب ولا البنت ولا بتاع يعمل إيه؟ يفقد الثقة في الدين. طب الدين ماله؟ يعني واحد وقع في حاجة غلط الدين ماله؟ يقول لك مش هم دول بقى بتوع الدين؟ هو الدين ماله يعني أنت تفقد الثقة في دينك ليه؟
واحد تاني لا أخف شوية يفقد الثقة في كل الرموز، طب بقية الرموز مالهم؟ عملوا إيه بقية الرموز؟ بقية الدعاة ولا بقية طلاب العلم ولا بقية المقرئين ولا عملوا إيه عشان تفقد الثقة في كل حد؟ طيب، يفقد الثقة في الشخص هذا برضه نقول لا، لأنك لما أتبعتَه لم تتبعه على أنه إنسان معصوم، لا في الصغيرة ولا لا يقع في الكبيرة ولا كذا ولا لا خالص. والولي الولي من أولياء الله عز وجل قد يقع في مثل ذلك.
ومن رحمة الله عز وجل بنا أن أجرى ذلك في جيل الصحابة، فمنهم من حُدّ في الزنا ومنهم من حُدّ في الخمر، بل منهم من كان ما من كان كثيراً ما يؤتى به يُحدّ في الخمر، شهوته تغلبه ويشرب خمر فيُحدّ ويرجع يتوب، وأصلاً الحد كفارة له. ولذلك يا شباب احفظوا دي: بعد إقامة الحد يحرم التعيير. حد انتهت، مش راحة وجاية بقى شفت اللي مش عارف شفت اللي عمله شفت حرام عليك تعمل ده.
طيب هذا الرجل الذي كان كثيراً ما يؤتى به ليُحدّ، لما لعنه أحدهم يوماً ماذا قال النبي عليه الصلاة والسلام؟ قال: «لا تلعنه، فوالله ما علمتُ أنه يحب الله ورسوله». يا جماعة مش مش جيت حد في الخمر مرة واتنين كثيراً ما يؤتى به يحد في الخمر؟ طب أنا دلوقتي بجريكم على المعصية؟ لا مش بجريكم على المعصية، لكن بقول لكم قواعد في التعامل مع البشر عشان نفسياتكم تبقى هادئة في مثل هذا. يعني بنميع قضية الكبائر في نفوس الناس؟ لا مش ده المقصود برضه، الكبيرة كبيرة يعني. لكن تصور أن الكبيرة لا تقع من الصالحين ده تصور خاطئ، أو لا تقع من الأولياء ده تصور خاطئ، فلازم تعدله جواك عشان لما تقع ما تتهزش أنت. مفهومة دي؟
فمن أنوار سورة النور في مع هذه القضية الكبيرة أن احنا عندنا شرع في الحتة دي: ﴿لَوْلَا جَاءُوا عَلَيْهِ بِأَرْبَعَةِ شُهَدَاءِ﴾. طب ليه أربعة؟ ما في واحد قال يبقى عاوزين تلاتة، إيه رأيكم؟ إمبارح قلنا إنه هذا إفك مبين، إفك واضح ظاهر من ظهوره أن اللي اتكلم عليه لعنة الله عبد الله بن أبي بن سلول هو كان موجود معاهم، ولا هم جم فراح قال الكلمتين اللي قالهم: زوجة نبيكم وصفوان والله ما سلمت منه ولا سلم منها. طب أنت كنت فين؟ البعيد كنت فين؟ ما انت كنت معانا، أنت شفت إيه أنت عشان تتكلم؟
فأصلاً احنا محتاجين أربعة من بابها كده، يعني مش معانا واحد ويتبقى ثلاثة، هو ما فيش حد كان موجود عشان يشوف، فييبقى أنت دي من الأنوار، من الأنوار يبقى واحد كتب على الفيسبوك، واحد كتب على تويتر على إنستجرام وشفت مش عارف إيه، أنت جواك إيه؟ ﴿لَوْلَا جَاءُوا عَلَيْهِ بِأَرْبَعَةِ شُهَدَاءِ﴾. طيب، فاذا لم يأتوا بالشهدء، خلصانة، فأولئك عند الله أي في حكم الله هم الكاذبون.
طب افرضوا تعالوا نرجع للمثال اللي قلته لكم، واحد شاف بعينه رأى بعينه فجاء وقال، أول حاجة يحد ولا لا يحد؟ يحد حد القذف. هل يقال عنه كاذب؟ آه، فأولئك عند الله قالوا أي في حكم الله، في حكم الدنيا ده كاذب. طب في حقيقة الأمر هو كاذب؟ هو مش كاذب، في حقيقة الأمر مش كاذب، لكنه في حكم الله كاذب، فأولئك عند الله هم الكاذبون في حكمه سبحانه وتعالى، ليه؟ أن النص لم يكمل ما فيش أربعة. فأولئك عند الله هم الكاذبون.
﴿وَلَوْلَا فَضْلُ اللَّهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِيما أَفَضْتُمْ فِيهِ عَذَابٌ عَظِيمٌ * إِذْ تَلَقَّوْنَهُ بِأَلْسِنَتِكُمْ﴾ [النور: 14-15]. هنا على الوصل، أولاً تعالوا نشوف يعني إيه إذ تلقونه بألسنتكم لأن هنا في فائدة. إذ تلقونه بألسنتكم يعني إيه تلقونه؟ تلقونه يعني تتلقونه. طيب أنت بتتلقى الكلام بإيه؟ بلسانك. بتتلقى الكلام، واحد بيقول كلام فانت بتتلّقاه. بتتلّقاه بإيه؟ بإذنك مش كده؟
في حاجة عجيبة هنا ربنا قال: ﴿إِذْ تَلَقَّوْنَهُ بِأَلْسِنَتِكُمْ﴾. يعني إيه؟ الكلام يا جماعة لما بنسمعه بنسمعه بالأذن، وبعدين بيحصل كده عملية في المخ يسموها المنطقة تصور وتصديق. باختصار عشان بس ما ندخلش في الـ دلوقتي لما أقول لك البرتقالة مدورة، فلازم تبقى الأول عندك تصور عن البرتقالة وتصور عن الدائرة، عندك تصور في ذهنك عن البرتقالة وعن الدائرة.
أو أقول لك: أحمد قائم، يبقى عندك تصور عن أحمد، مين أحمد ده؟ وتصور عن كلمة قائم، يعني إيه؟ والا لو كلمة قائم أنت مش فاهم يعني إيه، كلمة قائم مش هتعرف تعمل التصديق، مش هتعرف تربط الكلمتين ببعض. يبقى أنا الأول فاهم إن أحمد ده الشخص الفلاني اللي في ذهني ده اللي اسمه أحمد، وكلمة قائم دي يعني واقف. فلما حد يقول لي: أحمد قائم، أو ما أربط الكلمتين ببعض، ده بيسموه التصديق، أربط الكلمتين ببعض فأفهم إن أحمد واقف. مفهومة دي؟ مفهومة ولا إيه؟
يعني عشان نفهمها، لو قلت لك إيه الحبشتكن في البلكونة، تفهم إيه؟ فلازم تفهم يعني إيه حبشتكن، مش كده؟ أنت تفهم حاجة في إن فيه حاجة في البلكونة بس إيه هي؟ ما أنتش فاهم إيه الحبشتكا دي. طب جبت لك بقى الكلمتين الاتنين مش فاهمهم، مش هتعرف، يعني لا فيه تصور ولا فيه تصديق، ما أنت أصلاً ما فيش أنت مش فاهم، أنا مش فاهم جملتك.
خلاص، يبقى إحنا الأول بنسمع بودنا، نتلقى الكلام بودنا، وبعدين يحصل في الذهن في المخ في العقل مسألة التصور والتصديق دي، فينطبع علم في القلب، وبعدين إذا أردت بقى أن تتحدث بما عندك من علم تتكلم بإيه؟ بلسانك، هي دي العملية ببساطة.
يبقى تقول لي: أحمد قائم، فأنا فاهم أحمد وفاهم قائم، حصل التصديق بين الكلمتين ففهمت إن أحمد واقف، وبعدين انطبعت هذه الصورة في قلبي إن أحمد واقف، بقى فيه علم عندي في قلبي إن أحمد واقف، فممكن أخد الكلمتين دول وأروح أقولهم لواحد تاني: خلي بالك أحمد واقف. صح كده؟ فهمنا دي، يبقى التلقي بالأذن، وبعدين عقل، وبعدين قلب، وبعدين لسان.
هؤلاء من سرعة ما يتحدثون بما يسمعون كأنهم تلقوا الكلام بالألسنة، ولو كانوا هديوا شوية ووقفوا وتصوروا المسألة دي كانت مجتها قلوبهم، ستنا عائشة مستحيل. لكن هو إيه اللي حصل؟ الكلمة جت اتعمل لها شير، خلي بالكم يا جماعة. حادثة الإفك المتكلم واحد والباقي بيشير، يعني هو واحد كتب بوست، واحد دخل قال: ما سلمت منه ولا سلم منها، الباقي عمل إيه؟ شير بس، لاكتها الألسنة.
شير من غير ما نفكر، من غير ما نعمل بقى مسألة التصور والتصديق وينطبع علم في القلب. قاله الله عز وجل في كلمة: ﴿إِذْ تَتَلَقَّوْنَهُ بِأَلْسِنَتِكُمْ﴾ [النور: 15]. ودي طبيعة دي طبيعة الشائعات، خصوصاً يا شباب في العصر السريع اللي هو الإنسان ما عندهوش رفاهية إنه يقعد يفكر، وخصوصاً بقى إنه عاوز إيه؟ يبقى أول واحد، عشان اللي سبق أكل النبأ، يبقى أنت أكثر شير بيتعمل لك وأكثر لايكات بتتعمل لك وفي الآخر تبقى من الذين تولوا كبره.
يا ابني اهدى! أيوه يعني اهدى لغاية أمتا؟ اهدى على طول، مش لغاية أمتا. أنت أنت أنت ليه عاوز الفاحشة تشيع في الذين آمنوا؟ يعني ما تهدا، ما تتكلمش. شريح كان في الفتنة لا يستخبر ولا يخبر، يعني لا يستخبر، ما يسالش في حاجة، جرت إيه اللي حصل؟ ما يسالش. لا يستخبر ولا يخبر، ليه؟ كأنه يرى من نفسه أنه إيه؟ أضعف، ممكن يستخبر فيبتدي يخبر، لا يا عم مش عاوز أعرف. وكان غيره يستخبر ولا يخبر. فعندك أهو مذهبين من إيه؟ من مذاهب السلف في الفتن؛ شريح لا يستخبر ولا يخبر، وغيره أه، ممكن يسمع بس عمره ما يفتح بقه ما يتكلمش.
فكن كذلك، بالذات يا جماعة هذا الكلام خطير، انك ترمي إنسان بزنا أو تلمح لكده. طيب خد دي، حتى لو كانت واحدة يا سيدي ظاهرها الفسق لكن ما نعرفش عنها زنا، تلاقي عادي جداً الشاب ممكن بسهولة جداً الممثلة يقول لك: دي كذا، ويتهمها بزنا. أنت يا ابني، طب أنت لو إحنا بقى الناس عاوزة تقول لك تطبيق الشريعة، لو بنطبق الشريعة حضرتك هتحد كل يوم مرتين ثلاثة! وأنت فاكر إن ده على دين الله عز وجل؟ إيه رأيك؟
طب أنك بتحد دي، يعني أنت أوحش من... أنا ماليش دعوة أوحش وأحسن ممن حد. في حادثة الإفك ناس نعالهم فوق دماغنا؛ سيدنا حسان، سيدنا مسطح. مسطح بدري، حسان بن ثابت طبعا اسمه يعني نار على علم. مسطح يمكن ناس ما تعرفش قوي سيدنا مسطح، مسطح بدري. البدريون قال فيهم النبي صلى الله عليه وسلم: «اطلع الله على أهل بدر فقال: اعملوا ما شئتم فقد غفرت لكم». فالبدري يقع ذنبه مغفوراً في قول بعض أهل العلم، وبعض أهل العلم قال: إنه يوفق لتوبة ولا بد. سيدنا مسطح وستنا حمنة، كل دول أسماء يعني تقيلة في وقعوا في ذلك وحدوا. فانستكت!
الشير دي أنت مسؤول عنها. قال، آه، يبقى ماشي، طبعا في قراءة: تلقونه بألسنتكم، ودي كانت قراءة السيدة عائشة؛ تلقونه، من يا أما يكون من الكذب أو يكون من السرعة، فلو كان من السرعة يبقى نفس المعنى خلاص.
نرجع بقى تاني، قال سبحانه وتعالى: ﴿وَلَوْلَا فَضْلُ اللَّهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِيما أَفْضْتُمْ فِيهِ عَذَابٌ عَظِيمٌ * إِذْ تَتَلَقَّوْنَهُ بِأَلْسِنَتِكُمْ﴾ [النور: 14-15]. يعني لولا رحمة ربنا كان زمان نزل عليكم العذاب وأنت بتقول، وأنت بتعمل، وأنت بتضغط الشير. ليه؟ قالوا: لأن هذا محل تنزل العذاب، هو إمتى استحققت العذاب؟ لما تكلمت. فده وقت استحقاق العذاب، فيبقى العذاب المفروض لو هينزل هينزل إمتى؟ هينزل في الوقت ده، أو أنت تستحق العذاب في هذا الوقت.
قد يؤخره الله، قد لا ينزله بالكلية، لكن من يؤمنك؟ فضيحة رحت بتدوس شير، ساعتها ينزل العذاب، والعذاب ده مش لازم تتسخط قرد مثلاً، ممكن العذاب عارف يبقى إيه؟ يطبع على قلبك وما تبقاش حاسس، فلا توفقوا لتوبة أبداً بضغطة زرار!
الناس بتستمرئ حاجات والله عجيبة، لعيب كورة أسمر في الفريق اللي ضدك، ابنه يجي أبيض، تلاقي الكوميكس نازلة، كان في وقت حصل كده، يتهموا مراته! إيه اللي بتعملوه ده؟ طب الكلمة دي بسيطة؟ الكلمة دي كبيرة، الكبيرة دي مش أنا يعني مش أنا هي كبيرة من الكبائر أنا اللي بقول لا مش أنا اللي بقول، ده ربنا اللي قال. ربنا في الآيات دي قال إيه؟ ﴿وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ﴾ [النور: 15]. ما هو حضرتك في الآخرة مش هتتحاسب بقواعد مارك، أنت هتتحاسب بشرع ربنا! أه، فمارك قواعده إنك إيه؟ هتفيرل وهتجيب لايكات وشيرات ومش عارف إه وصفحتك هتكبر، دي قواعد مارك في الدنيا، الآخرة في قواعد تانية خالص.
وتحسبون، وأنت بالنسبة لك إيه؟ يا عم، كلمة بوست من كلمتين إيه يعني اللي حصل؟ ولما يجي حد يقول لك اتق الله وده لا يجوز وبتاع، يصعب عليك عدد اللايكات والشيرات ومش عارف إه، فتقيه؟ تسيب الكبيرة! كبيرة من كبائر الذنوب. فانت في الآخرة هتتحاسب بشرع ربنا سبحانه وتعالى. فالبوست اللي انت شايفه دي كلمتين يعني ما بنفك بيكم عن نفسنا وبنهزر وبنضحك وعلي امرأة ظاهرها العفاف، كل ذنبها أنها متجوزة لاعب كورة يعني، فتتعرض للرَّمي بالزنا، وحاجة تقرف. طب أنت يوم القيامة هتعدي؟ والله ما هتعدي! وقلت لكم الكلام ده 100 مرة، والله ما هتعدي، ديوان لا يترك الله منه شيئاً. مش هتعدي، تيجي تلك المرأة وتقتص منك.
قال: ﴿إِذْ تَتَلَقَّوْنَهُ بِأَلْسِنَتِكُمْ وَتَقُولُونَ بِأَلْسِنَتِكُمْ﴾ [النور: 15]. هو أنا دلوقتي لو قلت لك: فلان بيقول كذا، هيكون بيقولها بإيه يعني؟ ببنخرة بشعره؟ هو ما أكيد ببوخه، مش كدة؟ فتلاقي ربنا هنا حاجة عجيبة جداً يقول: ﴿وَتَقُولُونَ بِأَفْوَاهِكُم﴾ [النور: 15]. طب ما هو لو قال الله عز وجل: وتقولون ما ليس لكم به علم، هيبقى أكيد بالأفواه، فليه هنا بأفواهكم؟ نفس الكلام، اللي هو الكلام لا عد على عقل ولا على قلب، هو الكلام في بقك كدة. ﴿وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ﴾ [النور: 15]. يلا، أنتوا شطار بقى، العلم بيكون فين؟ في القلب، فأنتم بتتكلموا بحاجات أنتم ما تعرفوش عنها حاجة، ما ليس لكم به علم. ﴿وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ﴾ [النور: 15].
وإما أقعد اتصور يا جماعة ما حدث في حادثة الإفك، يعني إحنا طبعا هيجي بعديها: ﴿وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَٰذَا﴾ [النور: 16]، بعد دي على طول: ﴿وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ﴾. وقلنا لكم كل لولا هنا في الآيات معناها هلا، ودي نور من أنوار سورة النور في التعامل مع هذه المواقف. فهو بيقول، يقول الله عز وجل: ﴿وَتَحْسَبُونَهُ هَيِّنًا وَهُوَ عِندَ اللَّهِ عَظِيمٌ * وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَٰذَا سُبْحَانَكَ هَٰذَا بُهْتَانٌ عَظِيمٌ﴾ [النور: 15-16]. يعني الله عز وجل بيقول: هلا إذ سمعتموه قلتم ما يكون لنا أن نتكلم بهذا، يبقى ده نور تاني من أنوار سورة النور. وقلنا لكم، قلنا ده إمبارح، قلنا يا جماعة تلك الأنوار في التعامل مع الشائعات، في التعامل مع قذف المحصنات، في التعامل مع مثل هذه المسائل اللي بقت سهلة جداً دلوقتي.
وخلي بالكم يا جماعة أنا عاوز عاوز برضه تنتبهوا لحاجة. دلوقتي في مجتمع الصحابة في المدينة، خطر الكلمة بيوصل فين يعني؟ يعني صحابي قال كلمة، فردد أو يعني ذلك المنافق قال كلمة، فرددها شوية صحابة. فالكلمة دي هتبلغ فين يعني؟ كم واحد هيسمعها؟ مئات، كم ألف؟ ثلاثة، أربعة آلاف واحد، اللي هو سكان المدينة يعني. أنت بكلمة واحدة دلوقتي تكتبها على موقع من المواقع، ممكن يشوفها ملايين الناس! يعني الله عز وجل لما يصف تلك الكلمة بأنها شيء عظيم وانتشارها كده انتشارها كده، أمال الكلمة منا دلوقتي بما توصف؟
﴿وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَٰذَا﴾ [النور: 16]، ما ينفعش نتكلم في الحاجات دي. ليه؟ أولاً، وده اللي كنت عاوز أقوله بقى، يعني أما أقعد أتأمل حديث الإفك وسيدنا حسان وسيدنا مسطح وستنا حمنة رضوان الله عليهم، تكلموا. فانتشر الأمر، وجه في السنة أنه لم، تلك الفتنة لم تدع بيتاً أو لم تذر بيتاً في المدينة إلا دخلته. دخلته بقى مش لازم تلوك يعني تلوك الفتنة أو الكلام الألسنة، لا، ممكن تكون دخلته إنكاراً.
زي مين؟ سيدنا مين إمبارح قلناه؟ ولا واحد كان حاضر؟ أبو أيوب، مش كده؟ دخل، مراته قالت له: شفت اللي بيتقال؟ الله، أه شفت اللي بيتقال. أكنت فاعلة ذلك؟ أنت تعملي كده؟ قالت: لا، أكنت فاعلة طب أنا؟ قالت لها. قال: فوالله عائشة خير منك، وصفوان خير مني. وده ساعتها قلنا: ده نور من الأنوار، ظن المؤمنون والمؤمنات بأنفسهم خيراً. في الظاهر، ما هو لا معانا دليل، ولا معانا شهود، ولا معانا اعتراف، ما معناش أي حاجة. خلاص، نجري الأمر على ظاهره وانتهينا، وملف أتقفل، صفحة واتقلبت. والشرع لا يندبنا إلى التنقير أصلاً، اللي يروح يقعد يفتش، الشرع لا يندبك إلى هذا أصلاً، بل ينهاك عن ذلك، وخلى فيه وعيد على من يفعل ذلك؛ يا معشر من آمن بلسانه ولم يدخل الإيمان قلبه، لا تغتابوا المسلمين ولا تتبعوا عوراتهم، فانه من تتبع عورة أخيه تتبع الله عورته، ومن تتبع الله عورته يفضحه ولو في جوف بيته. فأنت غير غير مطالب أصلاً بأن أنك تروح تبحث.
طيب، فتأملوا بقى كدة يا جماعة لما الناس دي تكلمت ووقع ما وقع، حال سيدنا النبي إيه عليه الصلاة والسلام؟ طب حال سيدنا أبو بكر إيه؟ وزوجه أم رومان؟ وأنتم فاهمين إحنا بنتكلم في إيه دلوقتي؟ إحنا أذينا مين بالكلام؟ النبي أوذي صلى الله عليه وسلم، وأبو بكر أوذي، وزوجه أوذيت، وطبعا السيدة عائشة رضي الله عنها ما كانتش عارفة.
السيدة عائشة عرفت في الآخر خالص، في الآخر خالص. ويوم ما عرفت، يعني هي في نفس اليوم يا بعديها بيوم ولا حاجة، الوحي نزل. السيدة عائشة ما كانتش تعرف حاجة أصلاً، فالله عز وجل يعني إيه؟ رفع عنها ذلك البلاء، لأنها لما عرفت طبعا اشتد مرضها، في رواية خارج الصحيح أنها أغمى عليها. قالت: هو النبي عارف زوجها؟ قالوا: أه عليه الصلاة والسلام. طب وأبي يعرف؟ قالوا: أه. أغمى عليها. فالله عز وجل برحمته حجب عنها ذلك طول المدة دي ما تعرفش حاجة لأنها كانت رجعت عيانه أصلاً، فكانت في البيت. وهيجي معانا بقى يعني الحديث بطوله إن شاء الله.
فإحنا بنؤذي مين؟ وهذا يحدث كثيراً، والله والله أنا أنا كثيراً ما أقعد أشوف الناس وهي بتقعد تتناحر كدة للأسف حتى المتدينين. وأنت كان يعني يكفيك في بعض المسائل، يا سيدي شايف إن ده دين، أعرض ما تراه ديناً. أنت لازم تجيب البني آدم اللي أنت شايفه غلطان مثلاً في شيء، أنت شايف كدة ما هو أنت برضه أنت مانتاش المعصوم يعني، يعني واحد تاني بيقول: الدين كدة، فانت مانتاش المعصوم يعني ولا ولا دماغك هي أحسن دماغ في الدنيا. لكن ماشي يا سيدي أنت خلاص ترى أن ده ما هواش من الدين وأنا هقول لكم الدين، ما تقول الدين اللي عندك، لازم تجيب الإنسان ده بقى وتقعد تتريق عليه وتقعد تعملوا حاجات بالـ AI وتقعد... سيبك من البني آدم، له زوجة وله ابن وله بنت وله أب وله أم، ولو شافوا الحاجات دي أنت بتؤذيهم، وفي الآخر أنت كدة عملت إيه؟ كده أنت عملت إيه يعني؟ أنت لو أتباعك بيفهموا هينفضوا هينفضوا من حولك.
قال الله عز وجل: ﴿إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ﴾ [النور: 19].
أمبارح كنا قلنا إن في كل نازلة أو في كل حادثة مثل هذه الحوادث المجتمع بينقسم لأربع فئات، وساعتها قلنا في فئة يعني بيتشجر منها اثنين فخلوها خمسة بقى دلوقتي، خمس فئات. فئة أحبت ذلك بالقلب، احنا قلنا إن ﴿إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا﴾، يعني إيه يحبون أن تشيع الفاحشة؟ أما يحبون أن تشيع الفاحشة يعني الفاحشة فعلا تشيع، يعني يبقى أهل الديانة زناة، أو أكثر المفسرين على المعنى الثاني؛ أن الذين يحبون أن تشيع الفاحشة أن يشيع ذكر الفاحشة في الذين آمنوا وإن لم يكونوا كذلك، كما حدث هنا. هو سيدنا عائشة كانت كده؟ حاشاها. سيدنا صفوان كان كده؟ حاشاه. وإنما أحب عبد الله بن أبي بن سلول أن تشيع الفاحشة في الذين آمنوا يعني أن يشيع ذكر الفاحشة، يتقال الناس المتدينة دول حرامية، شيوخ منصر، الناس السنية دول ما تعرفش بيعملوا ايه لما مش عارف ايه، هو يحب يبقى فيه دوشة في الحتة دي. ﴿إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا﴾.
وهنا يا جماعة عاوزين ننتبه لحاجة مهمة جدا؛ عبد الله بن أبي بن سلول لما لقى الموقف كده راح قال الكلمتين اللي قالهم اللي احنا قلناهم دول، هو في الأصل السيدة عائشة ما تشغلوش قوي، هو مين اللي شاغله؟ النبي عليه الصلاة والسلام. وهو عارف انه لما يقول كده ذلك يعكر صفو النبي عليه الصلاة والسلام. ولذلك قالوا ما زنت امرأة نبي قط. طب امرأة النبي ممكن تكون كافرة؟ إيه رأيكم؟ ممكن، مش كده؟ ضرب الله مثلا للذين كفروا امرأة نوح وامرأة لوط، فامرأة النبي ممكن تكون كافرة؟ آه. هل تزني امرأة نبي؟ قالوا ما زنت امرأة نبي قط. أيهما أعظم الكفر أم الزنا عند الله؟ الكفر بلا شك الكفر أعظم.
طب ليه يتصور من امرأة النبي الكفر ولا يتصور منها الزنا؟ لسببين؛ السبب الأول أن الكفر لا يصد الكفار، هو النبي ده بعث ليه؟ عشان يدعو الكفار إلى دينه. طب مراته كافرة ما هم كفار، يعني الكفر في ذاته لا يصد الكفار يعني مش هيقرف ويقول له إيه بص اللي مراته كافرة، ما هم كفار، مفهوم؟ ثاني حاجة أن الزنا يطعن في النبي كما يطعن في امرأته، الزنا يطعن في النبي كما يطعن في المرأة ويعكر صفو النبي الزوج، مفهوم؟ فلذلك ما زنت امرأة نبي قط.
فقلنا إن المجتمع في أي حادثة شبه دي بيبقوا خمس فئات؛ أول فئة يحبون أن تشيع الفاحشة وما يتكلموش ما بيعملوش حاجة لكن هم من جواهم مبسوطين باللي بيحصل ده. فئة ثانية يحبون أن تشيع الفاحشة وبيساعدوا أن الفاحشة تنتشر ذكرها ينتشر يبقى في دوشة في الحتة دي. الفئة الثالثة لا يحبون أن تشيع الفاحشة في الذين آمنوا وما بيتكلموش. الفئة الرابعة يحبون ألا تشيع الفاحشة في الذين آمنوا وبيكلموا بذكر الفاحشة، وده حدث زي سيدنا حسان والسيدة حمنة وسيدنا مسطح، هم لا يحبون قطعا لكن تكلموا. والفئة الخامسة لا يحبون أن تشيع الفاحشة ويدافعون. دول الخمس فئات، وقلنا لكم الخَمْسَة مذكورين في الآيات دي، خلاص.
وقلنا لكم إن عبد الله بن أبي بن سلول لما رمى السيدة عائشة بما رماها به، السيدة عائشة مش شاغلاه قوي هو اللي شاغله النبي عليه الصلاة والسلام. وده مهم يا شباب ما نبقاش ساذجين ما نبقاش سطحيين، ونبقى فاهمين أن ممكن واحد من أهل الكفر ولا واحد من أهل الفسق ولا واحد من أهل الظلم يعمل حاجة وغرضه حاجة تانية خالص، فنبقى واعيين لده. سيدنا عمر كان يقول: لست بالخب ولا الخب يخدعني، ما بيتضحكش مش درويش، مانيش درويش فايه أي حد عاوز يضحك عليا بكلمتين يتضحك عليا؟ ممكن يتضحك عليا بمزاجي آه، أعديها وأنا واخد بالي منها.
زي مين؟ عبد الله بن عمر رضي الله عنه عن أبيه، كان عنده خُدَّام وبعدين كان اللي يشوفه بيصلي منهم إيه يعتقه، فمين قزل القصة دي الخدام فبقوا إيه يلاقوه داخل يروح إيه واقف مصلي بقى متوضي اتجاه القبلة عادي بقى إيه يصلي وخلاص. فكان يعمل إيه سيدنا عبد الله بن عمر؟ يعتقه. فجم قالوا له ده هم بيلعبوا معاك دول عارفين كذا كذا كذا، فقال لهم: من خدعنا في الله انخدعنا له. بصوا يا جماعة النفوس عاملة إزاي، ما أنا عارف إن بيخدعوني في الله ماشي بنخدع له، وأنا يعني عملت ايه أعتقته، ده من أعظم الثواب أن أعتق عبد أعتق رقبة يعني فخلاص إيه المشكلة.
طيب ﴿إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ﴾، هنا أنا عاوز أنبه تنبيه؛ الذين آمنوا دول يا جماعة ما هياش طائفتك ولا جماعتك ولا حزبك، الذين آمنوا بإطلاقها حتى لو من طائفة غير طائفَتِك ولا من جماعة غير جماعتك ولا من حزب غير حزبك. ليه بقول الكلام ده؟ لأن للأسف هذه الآية تنطبق على فئة للأسف من الناس المتدينة، فاكرين قلنا لكم خمسة، أسوأهم اللي بيحب أن تشيع الفاحشة وبيعمل إيه؟ وبينشر. في ناس بتعمل ده لمجرد أن الفاحشة ريحتها فاحت من طائفة مش طائفتي، أو من حزب مش حزبي، أو من جماعة مش جماعتي، فابقى فرحان أن الفاحشة ظهرت وأن ريحتهم فاحت، بس لا! وأنشر. هو هنا ربنا ما قالش ﴿إِنَّ الَّذِينَ يُحِبُّونَ أَن تَشِيعَ الْفَاحِشَةُ﴾ في الحزب الفلاني ولا في الجماعة الفلانية ولا في الفئة الفلانية، في الذين آمنوا، إلا لو انت مخرجهم بقى من دائرة الإيمان بقى مكفرهم ده موضوع تاني.
فليكن تعاملك مع الجميع في الحتة دي تعاملاً واحداً؛ ده راجل مسلم، آه بس ده من حزب تاني فبقى إيه؟ بقى كافر يعني؟ مسلم. ده من جماعة تانية فبقى إيه يعني؟ بقى كافر ولا مسلم؟ مسلم، فله حق الإسلام. فقلبك لو فئ بس فرح، هنا يا جماعة الآية ما بتتكلمش على اللي نشر، أن الذين يحبون الحب ده عمل ايه؟ قلب ولا جوارح؟ الآية بتتكلم عن اللي بيحب ده ﴿يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ﴾. فلو لمجرد أن ده حصل في حتة في ناس تانية فلقيت قلبك فرحان، راجع إيمانك وراجع مواقفك وراجع ولاءك وبراءك. انت ولاءك وبراءك على إيه؟ على دين الله عز وجل، دين الله أوسع بكثير من انك تحصره في جماعتك ولا حزبك ولا فئتك ولا كيانك، دين الله أوسع من ذلك.
هل ده معناه أن احنا بنقول التانيين ما عندهمش بدع؟ ولا ما قولناش كده، بس نضع كل شيء في نصابه، ويعكر صفونا أن تنتشر الفاحشة في أي مؤمن وأي فئة من الذين آمنوا وفي أي طائفة وفي أي جماعة، هذا يعكر صفونا ونحزن له ﴿لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنتُمْ لَا تَعْلَمُونَ﴾.
بعديها بإيه؟ ﴿يَا أَيُّهَا الَّذِينَ آمَنُوا لَا تَتَّبِعُوا خُطُوَاتِ الشَّيْطَانِ﴾، نور آخر من أنوار سورة النور في مثل هذه المواقف؛ لا تتبع خطوات الشيطان. الشيطان مش هيدجي يقول لك اقذف من الأول كده، يقول لك بس اسمع الناس دي بتقول ايه، وتسمع فشوية أول مرة تستهجن ازاي بيقولوا كده على المسلمين وازاي بيقذفوا، المرة التانية خلاص انت اشتركت في الصفحة بقى، فالپوست اللي بعده يبتدي الإنكار اللي بالقلب ده يقل لغايه ما إيه تألف ده وبعدين تستمرئ ده وبعدين تبتدي تعمل لايك لسه ما بداتش الشير وبدات تضحك على الكوميك ولسه ما بداتش الشير وبعدين تشير وشوية تلاقيك انت اللي بتكتب. ﴿لَا تَتَّبِعُوا خُطُوَاتِ الشَّيْطَانِ وَمَن يَتَّبِعْ خُطُوَاتِ الشَّيْطَانِ﴾ هيروح فين يعني؟ هيروح في داهية ﴿فَإِنَّهُ يَأْمُرُ بِالْفَحْشَاءِ وَالْمُنكَرِ وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَىٰ مِنكُم مِّنْ أَحَدٍ أَبَدًا﴾، الله أكبر! هو انت المعصوم؟ ده لولا فضل ربنا ورحمته ما زكى منكم من أحد أبدا.
يعني يا جماعة ده أيضا نور آخر، قبل ما قبل ما تنطق بلسانك وترمي فلان وفلانة، قول: هو انا ضامن نفسي لنص ساعة قدام؟ انت ضامن نفسك اللي انت هتبتدي ترمي بيه فلان وفلانة ده انت نفسك ما توقعش فيه؟ طب خد المفاجأة الأكبر؛ أن واحدة من شؤم هذا الفعل انك تبتدي تلقح بالكلام وانك تقع فيه. إيه رأيكم؟ وهذا قاله بعض السلف أنك إذا عيرت أخاك بشيء قليلا وتقع فيه، وبعضهم ينسبه للنبي عليه الصلاة والسلام اللي هو إيه؟ لا تعير أخاك بما فيه فيعافيه الله ويبتليك، أو يعني كما قال. فهذا نور آخر، قال الله عز وجل: ﴿وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَىٰ مِنكُم مِّنْ أَحَدٍ أَبَدًا وَلَٰكِنَّ اللَّهَ يُزَكِّى مَن يَشَاءُ وَاللَّهُ سَمِيعٌ عَلِيمٌ﴾.
ويَبقى حق القاذف؛ سبحان الله شوفوا يا جماعة ورحمة ربنا، الآية اللي بعد كده بتكلم عن حق مين بقى؟ القاذف، من اللي قذفه؟ سيدنا مسطح. وسيدنا مسطح بن أثاثة كان قريب سيدنا أبو بكر، يعني دلوقتي بيقذف قريبته السيدة عائشة، ومش بس كده سيدنا مسطح كان فقيراً وكان أبو بكر سيدنا أبو بكر ينفق عليه. فطبعا لما ده سيدنا أبو بكر قال: هذا أمر ما رمينا به في الجاهلية أفنرمى به بعد أن أعزنا الله بالإسلام؟ وأقسم ألا ينفق على مسطح، مش هصرف عليه تاني خلاص وده أبسط شيء يتعمل يعني واحد رماك في بنتك، الواحد ده قريبك يعني جاي من اللي منك وفقير وانت اللي بتصرف عليه، أبسط شيء تقول خلاص من النهارده انت في مسك وانا في مسك.
ده اللي عمله سيدنا أبو بكر، فالله عز وجل لا يغفل حق مسطح القاذف. احنا محتاجين يا جماعة هذا التوازن في التعامل مع المسلمين، تبقى بتنكر عليه أمر لكن له حق لا تغفله. فماذا يقول الله عز وجل؟ ﴿وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَىٰ وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ﴾ [النور: 22]. ما أن تليت على أبي بكر إلا قال: بلى والله يا ربنا أنا لنحب أن تغفر لنا. وأعاد على مسطح بالنفقة.
أقول قولي هذا واستغفر الله العظيم لي ولكم. ناخد كم سؤال وبعدين نصلي وبعدين نبدأ الدرس بقى، ماشي. دلوقت في ورقة جاية ظاهرة من عند النساء؛ هناك اعتراض على ميعاد الدرس في العشاء. اقتراح: يرجى تقصير الإمام للصلاة في المغرب وكذلك العشاء، ومن يقومون بالتصوير يجوا بدري شوية ويحترموا نفسهم ويبطلوا قلة ده مننا الكلام ده، قلت فرصة بقى أقول اللي في قلبي ليهُم. ومن يقومون بالتصوير يبدأون في ضبط أجهزتهم قبل المغرب، دي واحدة مراقباكو، يعني بص فيكون هناك وقت كاف للدرس. تحياتي لشخصكم الكريم، الحمد لله ما غلطتش فيا، أنا باجي في ميعادي.
هو كدة كدة المفروض أمتى الوقت هيتقدم؟ خلاص يعني صح. فاحنا بعد كده إن شاء الله الوقت هيبدر كدة كدة، إن شاء الله، وممكن إن شاء الله حتى بعد ما الوقت يبدر نخلي المغرب برضه يعني خلينا نشوف هنعمل ايه عشان برضه البنات ما تمشيش بالليل وكده الصلاة يأثر في الصلاة. أنا ضد هذا تماماً وأرى أن لو أنفقنا كل الوقت في الصلاة هذا أولى من الدرس أصلا، ولو طهرت قلوبنا ما شبعنا من كلام ربنا، يعني يعني كلامي أنا مش مش قادر أقولها أصلا والله ما قادر أقولها، كلام ربنا يتلى فاحنا نقف نستمع لكلام الله عز وجل، وليس بعد كلام الله كلام.
فلو الصلاة خدت الوقت كله نبقى مبسوطين وفرحانين وماشيين مبسوطين أكتر من لو خدنا درس. الأشكال في قلوبنا ما هي يعني. عيب عيب عيب.
صاحبي ضرب أبوه ضرب شديد جدا ومش حاسس بأي ذنب، والحجة إن أبوه سيء العشرة وبخيل جدا، النصيحة ليه إيه؟ هيخش النار لو ما صالحش أبوه وأبوه سامحه هيخش النار، طب أبوه سيء العشرة، أبو سيدنا إبراهيم كان إيه؟ مش كافر؟ ده كان صانع الأصنام. أبو سيدنا إبراهيم كان صانع الأصنام، سيدنا إبراهيم يقول له إيه؟ يا أبتي أربع مرات في سورة مريم. أربع مرات يا أبتي، ويا أبتي فيها تودد مش يا أبي. وبعدين بعد ما يخلص يا أبتي أربع مرات يقول له إيه؟ لئن لم تنته لأرجمنك واهجرني مليا، قال سلام عليك سأستغفر لك ربي. طبعا بعد كده نهي عن عن أن يستغفر له لأنه كافر، والكافر لا يستغفر له، فأنت أبوك مسلم سيء الخلق بس مسلم.
طيب وربنا قال إيه على الأبوين المشركين؟ مش بس المشركين، اللي بي بيعفروا عشان ابنهم يبقى مشرك، يعني مش بس مشركين، ده بيجاهدوا يخلوا الواد مشرك، ربنا يقول عنهم في القران: ﴿وَإِن جَاهَدَاكَ عَلَى أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا وَصَاحِبْهُمَا فِي الدُّنْيَا مَعْرُوفًا﴾ [لقمان: 15].
فأنت أبوك بيعمل إيه؟ دي أول حاجة، المعنى الثاني: أبوك سيء معاك وأنت تستاهل معاملة أحسن من دي، يعني أنت بأفعالِك مع ربنا في خلواتك، ما هو أبوك ده مين اللي مسلطه عليك؟ ربنا، ولو شاء الله لسلطهم عليكم، مش كده؟ ربنا اللي بيسلط وهو الذي كف أيديكم عنكم، فربنا اللي يكف إيد أبوك ولسانه عنك.
أقول قولي هذا وأستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير