بسم الله، الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي وأزواجه أمهات المؤمنين وذريته وآل بيته، كما صليت على آل إبراهيم إنك حميد مجيد.
أما بعد، الصحابي الجليل أبو ذر الغفاري رضي الله عنه قصته ملهمة ومهمة جدا في هذه الآونة التي نحياها. خلونا نبتدي قبل ما نخش في قصة إسلام أبي ذر رضي الله عنه، نفهم مين هو أبو ذر، وإيه هي غفار. أبو ذر رضي الله عنه طبعا كان اسمه جندب بن جنادة، رضي الله عنه، كان من قبيلة اسمها غفار. قبيلة غفار دي كانت إيه المهنة الرسمية ليه؟ قطاع طرق. يبق قبيلة غفار كانوا يقطعون الطريق. بس كده لا، كانوا بيقطعوا الطريق على مين؟ على الحجاج.
طيب، الحجاج دول، أنتم عارفين احنا اتكلمنا قبل كده في درس الأشهر الحرم، فلسفة الأشهر الحرم، وأن الله عز وجل حرم الأشهر التي تحيط بالحج ليه؟ علشان العرب كانت تعظم الأشهر الحرم، فالحجاج يروحوا في أمان ويرجعوا في أمان. صح كده؟ طيب، هم كانوا يتحركوا في الأشهر الحرم ذهابا وإيابا، وغفار كانت تقطع الطريق على الحجاج، يبقى كانوا بيقطعوها فين؟ في الأشهر الحرم، يبقى غفار كانت لا تعظم الأشهر الحرم. افهموا نفسية أبي ذر رضي الله عنه، وبعدين هنطلع بدرس كبير من اللي احنا بنقوله ده.
يبقى هو من قبيلة قطاعين طرق، قطاعين طرق ولا يحترمون الأشهر الحرم. دي غفار. أبو ذر بقى كان إيه؟ كان شيخ منصر، كان زعيم عصابة، يعني مش كان واحد عادي قبل الإسلام. أبو ذر رضي الله عنه جاء في ترجمته أنه كان يطرق الحي وحده. يعني إيه؟ مش قطع طرق، أنت عارف قطع الطرق دي بتطلع على قافلة في الآخر يعني فيها كم نفر معاهم سلاح شكله إيه؟ لا، أبو ذر كان يدخل على حي، ياخد اللي هو عاوزه ويمشي لوحده، يعني مش طالع بشوية من غفار، لوحده، وكان قوي البنية، كان آدم ضخما، يعني كان لونه يميل إلى السواد وكان ضخم الجثة، كان قويا.
فده أبو ذر، وأبو ذر رضي الله عنه احنا هو خلاص من غفار، فلا في حرمة الحجيج ولا في حرمة الأشهر الحرم، وأكلهم من قطع الطريق. لكن في رواية جاءت في سيرته تدل على أن أبو ذر حتى ما كانش بيحترم الكعبة، يعني ما كانش عنده مهابه للكعبة، ده كله طبعا قبل الإسلام. ها؟ إنه لما جاء إلى النبي عليه الصلاة والسلام وكان لسه ما أسلمش ولا قابل النبي عليه الصلاة والسلام، قصة طويلة هنحكيها، بس هنقول دي هنا عشان نفهم مين أبو ذر. وبعدين دخل بين الكعبة وستارها في قصة طويلة هنعرفها إن شاء الله، وبعدين اثنين ستات بيطوفوا وعمالين يدعوا صنمين من الأصنام، ماشي؟ اللي هما إساف ونائلة، ودول كان لهم قصة كده أن هما كانوا اثنين بيحبوا بعض وفجروا في الكعبة، قصتهم كده، وبعدين إيه مسخوا صنمين أو يعني حجرين فعبدوه.
حاجة غريبه جدا، المهم هما عمالين يلفوا حوالين الكعبة الست الاتنين الستات دول وهو بين الستارة الكعبة والكعبة وبيدعوا هذين الصنمين. فراحوا وهما بيطوفوا بيتريقوا على الصنمين، الأول قال إيه؟ فلتجعلا أحدهما ينكح الآخر. وبعدين بيطوفوا راح قايل بقى كلام أفظع من كده، قال: ولم أكن يعني إيه؟ يعني قال الألفاظ صريحة كده، ألفاظ وحشة صراحة. فالاتنين الستات دول إيه؟ ولولتا وجريوا. هنجيلها بقى القصة دي، أقصى أو أقول هو بيقول الألفاظ دي فين؟ ده بين أستار الكعبة والكعبة، فده أبو ذر رضي الله عن أبي ذر ودي غفار.
ثم أسلم أبو ذر، وده أول درس يا شباب؛ درس للدعاة، ودرس للناس المتدينة، ودرس للناس البعيدة. الإنسان مهما كان، مهما كان الله عز وجل يفتح قلبه لهذا الدين في لحظة. فانت مهما كنت بعيد، مهما كنت بعيد عملت إيه يعني في حياتك؟ مهما كنت عملت، يعني ما أظنش أن في حد هنا بعيد لدرجه أنه كفر بالله. أصل يا شيخ ده أنا ما تعرفش ده أنا مخدرات وزنا وقول زي ما تقول، كل اللي هتقوله ده أعظم أم الكفر بالله تعالى؟ الكفر بالله اعظم، مش كده؟ مين صحابي ما كانش كافرا بالله؟ الصحابه كانوا إيه؟ كانوا كفارا وأسلموا وصاروا سادات هذه الأمة، وصاروا سادات الأولياء.
فمهما كان ذنبك، لا تستعظم ذنبك على ربك سبحانه وتعالى. وكذلك الدعاة والناس المتدينة، ما تستكثروش رحمة ربنا على حد، يعني فلان ولا فلana؟ لا، ده مستحيل كان بيتقال الكلام ده على مين؟ على سيدنا عمر، مش كده؟ ده حمار عمر يسلم وعمر ما يسلمش! سيدنا عمر بن الخطاب كان بيتقال عنه كده، بيقولوا: لو أسلم حمار الخطاب عمر، ده سيدنا عمر ده هم طبعا كانوا كانوا بيقولوا: عمر ما يسلمش. أسلم، بس لا، ده صار ثالث ثلاثة، يعني إيه؟ سيدنا النبي يذكر بعديه على طول سيدنا أبو بكر، بعديه على طول سيدنا عمر.
فأنتم ما تستعظموش رحمة ربنا ومغفرته على حد من البشر مهما كان ذنبه، والمأساة مش مسألة نفسيات. طيب، فأبو ذر رضي الله عنه كان على تلك الصفة، وكانت دي حياته ودي قبيلته. وبعدين يا شباب، لا قال: أنا مش نافع، ولا صده قومه عن ذلك؛ عشان ما تجيش الحجج اللي بتطلع: ما أصل أنت الجامعة كلها كده، أصل المنطقة بتاعتي هي كده، أصل أصحابي من زمان كده، أصل ما هو قبيلة غفار كلها مقطعين طرق. ولم يمنعه ذلك أن يسلم وأن يحسن إسلامه، وهنعرف ليه دلوقتي، وهناخد منها دروس برده. فهي دي غفار.
وغفار ليها خصيصة ثانية، أن كانت زي ما قلنا بيقطعوا الطرق، وكانت تقع في طريق قوافل قريش، قريش كانت مهنتهم الأساسية التجارة، مهنة قريش الأساسية التجارة، وكان ليه رحلتين؛ رحلة الشتاء والصيف. فكانت غفار تقع في طريق قريش، يعني أي نواش هيحصل مع واحد من غفار، إيه؟ الطرق هتتقفل خلاص، ودي حاجة مهمة عشان هنعرف ليها مناسبة. فهو ده أبو ذر وهي دي غفار.
وبعدين أبو ذر ما كانش عاجبه الأصنام ولا عبادة الأصنام، ولذلك هو لسه ما أسلمش وعمال يشتم في إيه؟ في الصنمين، هو ما كانش عاجبه كده. وكان يصلي لله قبل ما يسلم ثلاث سنين، لا يسجد لصنم، ومش مقتنع أنه يسجد لصنم ويصلي لله، وهو اللي كان بيحكي بقى عن نفسه. فلما سئل: طب إزاي بتصلي لله يعني ببتوجه لإيه؟ قال: حيث وجهني ربي. أطلع كده العشاء بالليل يعني، أقف أحمل أي حاجة، يعني إيه؟ الصلاة طبعا مش برده قيام وركوع وسجود، لا، الصلاة يعني ممكن يكون قاعد بيدعي، ممكن يكون قاعد بيعمل طقوس ما نعرفهاش، لكن هو في الآخر متوجه بقلبه لرب لاله، اللي هو مين؟ اللي هو مش الأصنام دي. طب صفته إيه؟ ما ما أعرفش، لكنه ما كان يسجد لصنم لمدة ثلاث سنين.
وبعدين أنيس أخوه كان في رحلة لمكة وتأخر، رجع فبيسأله: أنت تأخرت ليه؟ قال له: في راجل في مكة دينه زي دينك، أنت بتقول إن ما فيش أصنام وفي إله للكون واحنا بنعبد الإله ده، وهو بيقول نفس الكلام بتاعك، يزعم أنه مبعوث من الله. طيب، فأبو ذر قال له: طب القوم قومه بيقولوا عليه إيه؟ قال: بيقولوا كاهن، وبيقولوا ساحر، وبيقولوا مجنون. وكان أنيس شاعرا أصلا، فقال: لكن كلامه ما هواش كلام الكهان. وبعدين أنا أضرب الشعر، أنيس بقى أضرب الشعر، قال: برده ما هواش الشعراء، وإنه لصادق وهم كاذبون. حينها أبو ذر عزم أن يذهب إلى مكة ليرى النبي صلى الله عليه وسلم.
وده الدرس الثاني يا شباب؛ دينك لن يستقيم إلا ببذل وبتضحية. يعني سبحان الله، احنا جايين النهارده وإيه ممكن نتجوز ونقول يبق إيه قافل شوية ولا حر شوية، وممكن بعض الناس تراودها إيه أنفسها يعني خلاص يعني نمشي، أو أصلا واحد من قبل ما ييجي هو يعني إيه جاي غصب عنه. طب يعني أنت لو ما جيتش هتروح تعمل إيه؟ لو هتروح تعمل خير تاني وتكون في طاعة الله وفي القرب منه ماشي سبحانه وتعالى، إنما لو ما كانش كده، ما تيجي، ابذل لله عز وجل، فإنك إن صدقت الله صدقك الله سبحانه وتعالى.
ما تقعدش تشتكي؛ لأن بعض الشباب هو لا يحسن إلا الشكوى، والنساء كذلك لا تحسن إلا الشكوى. يعني إيه لا يحسن إلا الشكوى؟ أنا ما فيش حته، ما فيش درس هروح. طب أهو الدرس أهو ما يروحش. طب ليه؟ ما أصل بعد العشاء وأنا كنت عاوزه بعد، ما أصل المسجد، أصل المش عارف إيه. طب أنت فاكر لما تعمل كده ربنا هيعاملك إزاي؟ يعني أنت فاكر إيه؟ ﴿وَإِن تَتَوَلَّوْاْ﴾ [محمد: 38] مش هنجري وراكم، ﴿يَسْتَبْدِلْ قَوْماً غَيْرَكُمْ ثُمَّ لاَ يَكُونُوۡاْ أَمْثَالَكُم﴾ [محمد: 38].
طيب، والآية الثانية: ﴿وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ﴾ [العنكبوت: 69] مش المعرضين، مش الكسلانين، وإن الله لمع المحسنين. فشخصيته على فكرة يا جماعة، مفتاح شخصية أبي ذر رضي الله عنه عشان نبقى فاهمين الشخصية اللي هنتكلم عليها دي، لو عاوزين نلخصها في كلمة واحدة، لنوجد كلمة أفضل من كلمة قالها عنه النبي عليه الصلاة والسلام: الصدق. أبو ذر رجل صادق.
وهنا لما نقول الصدق ما هواش صدق الحديث، يعني مش بيكذب؛ هذا في أبي ذر قطعا، لكن مش ده الصدق اللي في أبي ذر. وأحنا ماشيين في قصة أبي ذر هتلاقوا أن أبو ذر صادق العزم، يوافق فعله قوله، صادق. واحد يخرج من قبيلته ويمشي في الصحراء يروح لمكة علشان يشوف النبي عليه الصلاة والسلام؛ راجل صادق. فده مفتاح شخصية أبي ذر رضي الله عنه. والكلمة التانية، وهي يعني ممكن نقول مفتاح ثانوي، يعني إيه ده المفتاح الرئيسي وهي منبثقة من الصدق أيضا، أنه كان زاهدا، وهذا لفظ نبوي أنه كان في زهد عيسى عليه السلام. فهو كان رجلا صادقا زاهدا، والزهد فرع عن الصدق، هتشوف ده كمان شوية إن شاء الله.
فأبو ذر يعمل إيه؟ لا، ما شافتش غليلي لأنيس أخيه، ويروح طالع من غفار ويرروح لمكة، ويمشي في الصحراء ويتعب، وزي ما أنتم بقى فاهمين السفر في الصحراء في هذه الأزمان، فمحتاجين هذا الصدق مع الله عز وجل، وبهذا ننال ولاية الله عز وجل ورحمة الله عز وجل، إن رحمة الله قريب من المحسنين اللي هم مين بقى؟ ﴿إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ﴾ [الأعراف: 56]. فأنت جاهد في الله تصير من المحسنين فتشمك الرحمة.
يرروح مكة، طبعا أنيس يقول له: خلي بالك علشانه يعني الناس مستضعفة هناك المؤمنين. أبو ذر يا جماعة من السابقين، ها! أبو ذر رابع أربعة أو خامس خمسة، يعني إيه؟ يعني هو رابع واحد يسلم أو خامس واحد، فهو في الأوائل أبو ذر، مش مثلا رقم 10 ولا 20، رابع أربعة أو خامس خمسة؛ يعني عندنا خديجة رضي الله عن خديجة، وأبو بكر رضي الله عن أبي بكر، وعلي رضي الله عن علي، وأبو ذر. فاحنا لسه في بدايات الدعوة.
فأبو ذر يروح مكة، طب وبعدين؟ عاوز يعرف، هو لا يعرف شكل النبي عليه الصلاة والسلام ولا يعرف حاجة عنه، ولا أنيس حتى شاف النبي، هو سمع أن في حد كذا كذا. فقاعد محتار، فراح عامل إيه؟ قال: خلاص استضعف واحد كده، يعني واحد ضعيف بحيث أنه حتى لو ما الكلام مش على هواه ما يعرفش يعمل حاجة، وأبو ذر قلنا كان يعني قوي. استضعف رجلا، وبعدين قال له: أين هذا الذي يدعونه الصابئ؟ ما قالش فين رسول الله عشان برضه. قال له: هو فين ده اللي بيقولوا عليه صابئ؟ فأشار الرجل إلى أبي ذر وصاح: الصابئ الصابئ! يعني ده تبع النبي عليه الصلاة والسلام.
فالناس اتجمعت على أبي ذر وقعدوا يضربوا فيه، كما يقول هو، بكل حجر ومدر، أي حد في إيده حاجة نازل يضرب في أبي ذر حتى أُغشي عليه، أغمى عليه، وما رفع إلا كالنسل الأحمر، جسمه كله جايب دم. فراح أبو ذر رضي الله عنه على ماء زمزم واستخبى هناك وغسل نفسه، وبعدين هو كان خارج بأكل بسيط، يعني ما كانش في دماغه أنه هيقعد مدة، ففني طعامه، فابتدا يشرب من مياه زمزم، فضل على كده 30 يوم وليلة ما بيعملش، ما فيش أكل، بيشرب زمزم بس، ماشي؟ وزمزم قال النبي صلى الله عليه وسلم: «هي طعام طعم».
أبو ذر لما بقى يشرب زمزم سمن، تخن، وتكسرت عكن بطنه، عارفين البطن من هنا كده ابتدا يطلع له إيه؟ تتكسر عكن بطنه وما شعر قط من زمزم فقط. فأبو ذر رضي الله عنه مكث على تلك الصفة وهو خايف اللي حصل فيه، أو أنا عفوا يعني لأننا هنعرف كمان شوية أن هو ما بيخافش، يعني هنشوف ده وهي دي شخصيته شخصية أبي ذر، لكنه عاوز يتصرف بحكمة عشان يوصل لمراده. وفضل كده وداخل بين أستار الكعبة والكعبة، والذي يظهر والله أعلم، والله أعلم أنه ما عملش كده يعني أنه بيستخفي منهم، والله أعلم. وده في قصة المرتين أن هم كانوا عارفين أن هو الصادق، هم قالوا كده. هي المشكلة أن ما كانش في رجالة وقتها.
كانت الدنيا ليل والرجالة كلها نايمة، وقالوا له داحنا بس لو في نفر من يعني من أهلنا كنا وريناك. لكن يظهر لحرمة الكعبة هو عارف أن هم بيعظموا الكعبة.
فإيه؟ فداخل في الحتة دي عشان ما حدش إيه؟ يجيبه ويعمل فيه إلّا ماشياً. وكان فعلاً العرب كده، بالذات قريش، يعظمون الكعبة جداً لدرجة أن لو واحد منهم رأى قاتل أبيه في الكعبة ما يتعرضلوش.
ويستنى يخرج من الكعبة. وسيدنا النبي عليه الصلاة والسلام في حديث لما قال لهم إيه: «اقتلوه ولو رأيتموه متعلقاً بأستار الكعبة». فده دليل على أن العرب تعظم ذلك المكان جداً.
فأبو ذر ظل على تلك الحال. وبعدين في قصتين في أول لقي النبي عليه الصلاة والسلام؛ القصة الأولى اللي أشرنا إليها، أنه قاعد في مكانه.
وبعدين ستات دول بيطوفوا في ليلة قمراء، القمر فيها بس، قريش كلها نايمة وهما اتنين ستات بس بيطوفوا. فزاولهم بقا بالكلمة اللي إيه: عمالين يدعوا للأصنام وهو عمال يشتم في الأصنام، لغاية ما قال كلمة صعبة جداً ولم يكن يعني كلام ألفاظ، فمشوا.
وقعدوا يولولوا وهما ماشيين وقالوا لو كان بس في حد صاحي كنا هنفرجك. ماشيين لقوا مين؟ أبو بكر، سيدنا أبو بكر مع سيدنا النبي عليه الصلاة والسلام.
فبيسالوهم: مالكم؟ قالوا: الصابئ. وحكوا له، وقال كلمة، قال لهم إيه الكلمة؟ قالوا: قال كلمة تملأ الفم، يعني مكسوفين يتكلموا بها النساء، ومشوا. سيدنا النبي جه عليه الصلاة والسلام واستلم الحجر وطاف.
وبعدين سلم عليه أبو ذر، وأبو ذر أول من شرع ذلك السلام في الدين؛ يعني أول واحد يسلم على النبي بسلامنا: السلام عليك، كان أبو ذر رضي الله عنه. فرد عليه النبي صلى الله عليه وسلم السلام.
وتبتدئ القصة الرواية الثانية، أن علي رضي الله عنه راح الكعبة لقى أبا ذر، وده راجل غريب. قال له: أنت مين؟ قال له: أنا غريب. قال له: طب تعالى، وداه البيت أكله ومشاه وبيت ومشاه، طبعا ده قلقان يتكلم وده قلقان يتكلم.
تاني يوم سيدنا علي راح الحرم الكعبة لقاه قاعد نفس القصة، وبعدين تالت يوم قال له: أما آن للغريب أن يرجع؟ فترجع. قال: لا. قال له: ما شأنك؟ فقال له: لو أمنتني هقول لك. فآمنه.
فقال: جئت لذلك. لذلك الرسول عليه الصلاة والسلام ما كان لسه قابله، فهش له وبش سيدنا علي طبعا، وبعدين قال له: اتبعني، وانا لو حسيت بأي قلق هاجي على حائط وهعمل إكني بصلح نعلي؛ يعني نعلي اتفك ولا ما كانش بيتفك، يعني اتقطع ولا حاجة، فأنت امشي بقى ما كده يبقى في قلق.
ماشي، يبقى الدين يا جماعة مش لازم يبقى باللي يعني لا، ممكن يبقى في حرص، ممكن يبقى في عقل، ممكن يبقى في حكمة في التعامل، وهذا الأولى، والاندفاع مش شرط يبقى هو الصح ولا الشرط يبقى هو ده الجريء في دين ربنا سبحانه، ولا شرط أن هو ده الأفضل، مش شرط خالص.
احنا هيجي معانا أن سيدنا أبو ذر رضي الله عنه النبي عليه الصلاة والسلام نهاه أن يتأمر، قال له: «إني أراك ضعيفاً». سيدنا أبو بكر ضعيف؟ سيدنا أبو ذر ضعيف؟ ضعيف إيه بقى؟ لا هو ضعيف الديانة، مثلاً قوى الديانة جداً؟ ولا هو ضعيف البنية؟ قال له: «إني أراك ضعيفاً، فلا تأمرن على رجلين، ولا تليَن مال يتيم». لا تبقى أمير ولا تلي ما لا يتيم. طب هو ضعيف إيه؟
الإامام الذهبي في السير قال إنه كان ضعيف الرأي وفيه حدة، والإمارة تحتاج إلى نوع مداراة وحكمة. خلاص، وهنيجي للتفاصيل دي إن شاء الله كمان شوية.
فأبو ذر رضي الله عنه وصل مع سيدنا علي لبيت للنبي عليه الصلاة والسلام، فسيدنا النبي سأله على حاله وسأله: أنت قاعد إزاي الفترة دي كلها من غير أكل وشرب؟ قال له: إن أنا كنت بشرب زمزم والحكاية اللي حكيناها دي.
فقال: اعرض علي الإسلام. فعرض عليه الإسلام، قال: فاسلمت في مكاني. فقال: إني أريد النبي عليه الصلاة والسلام مدينة ذات نخل وما أراها إلا يثرب؛ يعني أنا هنتقل لحتة فيها نخل وغالباً هتبقى يثرب، فاذهب إلى قومك، فإذا سمعت بنا، يعني هاجرنا وانتقلنا إلى تلك المدينة، فأتنا.
فقال أبو ذر رضي الله عنه: لا والله حتى أصدع بها بين أظهرهم. هو بيقول له إيه؟ احنا دلوقتي في حالة استضعاف، وأنت شايف أحوالنا عاملة إزاي، وروح لغفار، ولما ننتقل للمدينة فتعالى. قال له: لا، أقف في وسط الكعبة وأنطق الشهادتين قدام الناس كلها.
الغريب يا جماعة أن النبي لم ينهَ، عليه الصلاة والسلام. وهنا في فائدة عظيمة جداً لازم نفهمها كدعاة أولاً، وبعدين احنا كأشخاص في أنفسنا: الناس أنماط، الناس أنماط، ولو أنت أردت أن تحمل نمطاً من الناس على عكس ما هو عليه، بالذات في البدايات، ينفر، ينفر منك.
فأنت بتحاول، المفروض ده بقا من حكمة الداعية ومن ذكائه، أنه يحاول أولاً يعرف ده. احنا مش عايزين نطلع استنباط، يعني كل الناس علماء، أو كل الناس مجاهدون، أو كل الناس طلاب علم، أو كل الناس يمسكوا ملفات الأرامل والمساكين والفقراء والمعوزين، أو كل الناس صوام قوام، أو كل الناس، مش عايزين كده، والدين أوسع من ذلك وأشمل من ذلك. ولذلك الصحابة رضوان الله عليهم كان فيهم اللي كده واللي كده؛ كان فيهم المجاهد زي خالد رضي الله عنه، وكان فيهم المنقطع للعلم عشان ياخد حديث النبي عليه الصلاة والسلام زي أبي هريرة رضي الله عنه، وهكذا أنماط.
بل الحديث في الصحيحين لما سيدنا النبي عليه الصلاة والسلام صلى وبعدين سلم من ركعتين، يعني سها في صلاته، حديث ذي اليدين معروف في حديث في الصحيحين، في الحديث خرج السرعان، الناس يقولون: قصرت الصلاة، قصرت الصلاة. يبقى الصحابة كان فيهم اللي بيقعد يطول بعد الصلاة، وفيهم اللي بيخلص صلاته ويَمشي. خرج السرعان من الناس، يبقى كان في في الصحابة كده، ماشي؟ فهو ده جيل الصحابة، فده أول حاجة نفهم ده.
عندنا سيدنا علي رضي الله عنه اللي هو أصلاً قرشي، يعني له عزوة في المكان ده، يقول له إيه: امشي ورايا ولو حسيت بحاجة هعمل إني بصلح النعل. شوفوا الحرص بتاع سيدنا علي وهو قرشي. أبو ذر بيدخل على حي أنا يعني إهانة.
أبو ذر لو لو جه في دماغه أن هو ده شكل الدين، ده نمط الدين، ممكن يرتد أصلاً. أنا مش ده وما أعرفش أكون ده. فسيدنا النبي عليه الصلاة والسلام وهو معاهوش غير تلاتة رابعهم أبو ذر، قال له: لا، ارجع فين؟ هقف في الكعبة وأقولها. النبي سكت عليه الصلاة والسلام، سكت. فين بقى هذا الوعي؟
لكن هنا في مسألة أن هنا أبو ذر رضي الله عنه لو وقف وعمل كده الأذى يصيبه وحده، الأذى يصيبه وحده، مش هينتقل لغيره، إنما ما فيش واحد يروح يتسرع عشان يعمل حاجة وبعدين يقوم يؤذي الناس التانية، لا. ولذلك حتى في باب الأمر بالمعروف والنهي عن المنكر، ودي مسائل مبثوثة ومعروفة يعني موجودة في الكتب يعني كتب الأداب وكتب الفقه، أنه إذا كان الأذى يتعداه إلى غيره سقط وجوب الأمر والنهي، سقط وجوب الأمر والنهي.
طيب، إذا كان الأذى في نفسه؟ فيها أقوال بقا وإيه نوع الأذى وكده، إنما إذا كان الأذى يتعداه إلى غيره، يعني لو أمر بالمعروف أو نهى عن المنكر غيره هيتأذي، يسقط الوجوب، خلاص، لا يجب الأمر ولا النهي في الحالة دي، خلاص. فسابه النبي عليه الصلاة والسلام أنه يروح يعمل كده في الكعبة ويقول للناس الكلام ده. وكذلك فيها مصلحة، يعني ممكن الناس بعض الناس لما يشوفوا أنه بيتضرب وبتاع، أنتم عارفين الناس دائماً تميل للضعيف، فممكن ناس ترق لحاله، وبعدين من الرقة دي إيه؟ يسلموا هم كمان، يعني ممكن يبقى فيها مصالح.
راح الكعبة، أبو ذر وقف وقال: أشهد أن لا إله إلا الله وأن محمداً رسول الله. اتجمعوا عليه وضربوه، برضه لغاية ما وقعوه وبتاع. لغاية مين اللي لحقه؟ العباس وكان كافراً. راح نايم عليه قال لهم: ويحكم، إنه من غفار! إن الراجل اللي أنتم ضربتوه ده من غفار، وإن تجارتكم تمر عليها.
ماشي، سيدنا أبو ذر نسيت أقول لكم حاجة لما راح للنبي عليه الصلاة والسلام، فالنبي قال له: من أين؟ قال: من غفار. فالنبي راح عامل كده، هوى بيده إلى جبهته، عمل كده النبي عليه الصلاة والسلام. قال: وكره أن.. وكره أني من غفار، ما هو غفار سمعتها سابقةاها. فالنبي عليه الصلاة والسلام يعني، لكن سبحان الله، يعني سبحان الله! ده رابع أربعة، راجل قاطع طرق، ده رابع واحد يسلم.
فالانسان لا يزهد في أي الداعية أو حتى اللي متدين عادي يدعو في شركته في مدرسته في جامعتك، ما تايه؟ مش أنت اهو: ﴿نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا﴾ [الزخرف: 32]. مش أنت. واحد جاي لك، ما تزهدش فيهم، ما الخير في مين؟
سيدنا النبي عليه الصلاة والسلام عاتبه ربه: ﴿عَبَسَ وَتَوَلَّىٰ * أَن جَاءَهُ الْأَعْمَىٰ * وَمَا يُدْرِيكَ لَعَلَّهُ يَزَّكَّىٰ * أَوْ يَذَّكَّرُ فَتَنفَعَهُ الذِّكْرَىٰ * أَمَّا مَنِ اسْتَغْنَىٰ * فَأَنتَ لَهُ تَصَدَّىٰ * وَمَا عَلَيْكَ أَلَّا يَزَّكَّىٰ﴾ [عبس: 1-7]. اللي هما زعماء الكفار، زعماء قريش. أما من استغنى فأنت له تصدى، رايح تقف له في وشه عشان تكلمه، وما عليك ألا يزكى. واما من جاءك يسعى وهو يخشى فانت عنه تلهى. كلا، ما تعملش كده.
فأنت ما تعرفش الخير في مين. أبو ذر ده اللي كان قاطع طريق هتشوفوا حياته إزاي بتحول 180 درجة، 180 درجة.
فالمهم العباس لحقه وقال لهم: غفار! والقصة دي. يسكت، يروح يرتاح الليلة دي، ويجي تاني يوم الصبح يروح الكعبة ويقول: أشهد أن لا إله إلا الله وأشهد أن محمداً رسول الله. احنا بنتعامل مع واحد مش عادي، يعني واحد ذاق الموت مرتين؛ مرة أول ما جه لما قيل: الصابئ الصابئ، ومرة امبارح والنهارده صاحي يروح يذوق الموت تاني. عادي، هي دي حياته أصلاً، يعني هو قاطع الطريق ده اللي بيدخل على حي لوحده، هو مستني طعنة في أي وقت وخلاص حياته انتهت.
فدي شخصية أبي ذر رضي الله عنه، إزاي النبي عليه الصلاة والسلام سمح بقدر من ذلك؟ سمح بقدر من ذلك. لذلك يا جماعة القيادة نوع، يعني أو معنى مهم في القيادة أنك تبقى عارف أنماط الناس اللي تحتك وطبائع وتعرف طبائعهم، وتعرف كل واحد يتسكن فين، تعرف كل واحد يتسكن فين.
أنتوا عارفين يقول: وظائف المدير أربعة، أربع وظائف كبيرة، ماشي؟ منها واحدة من أربع وظائف كبيرة للمدير وبعدين بقا إيه يعني في زي بيسموها يعني حاجات تحتيها، بس الأربعة الكبار منهم واحدة: أن الموارد بتاعتك تحطها فين، ماشي؟
طيب، ففلان الأصل للحته الفلانية وعلان الأصل للحته العلانية. والقائد اللي ما يعرفش ده ما ينفعش يبقى قائد، ما ينفعش. فابو ذر وقف تاني يوم وقال نفس القصة دي، عملوا القصة دي فيه، راح واخد بعضه بقا وطالع على غفار.
فقابل أخوه أنيس، قال له: إيه اللي حصل؟ قال له: أسلمت، فأسلم أنيس. قابلتهم أمهم: إيه اللي حصل؟ أسلمنا، أسلمت أمهم. دخل على غفار: إيه اللي حصل؟ أسلمنا، نص غفار أسلمت. احنا لسه إيه؟ احنا لسه في أول يوم نوصل غفار، نص غفار أسلمت. طب النص الثاني؟ قالوا: لما يبقى يهاجر النبي عليه الصلاة والسلام هنسلم. وفعلوا ذلك، قبيلة غفار كلها أسلمت! مقطعين الطرق؟ آه، مقطعين الطرق كلها أسلمت.
بس يا ريت، ده كله ببركة أبي ذر. لما أسلمت غفار، كان في قبيلة تانية جنبهم اسمها أسلم، هي اسمها كده، فقالوا: إخواننا، يعني احنا جت علينا، أسلموا! فأبو ذر كان سبباً في إسلام قبيلتين: غفار وأسلم. وقال صلى الله عليه وسلم لما جت بقا غفار وأسلم يسلموا: «غفار غفر الله لها، وأسلم سالمها الله».
طيب، سيدنا أبو ذر النبي قال له: روح لقومك. قال له: لا، أنا عاوز أبقى جنبك وأقع. وطب مين هيتابعني؟ طب مين هي؟ أنا كده هضيع أنا. لا، اشتغل.
يا شباب، احنا محتاجين ده، محتاجين ده، محتاجين نصدقاً مع الله. هتقول لي: أصل الحال كان غير الحال؟ ولا هو صدقه اللي كان غير؟ صدقه ذلل له المصاعب. هو إيه اللي أدخل على القبيلة نصها يسلم؟ منين دي؟
قال صلى الله عليه وسلم في أبي ذر: «ما أقلت الغبراء، الأرض، وما أظلت الخضراء، السماء، ذي لا من ذي لهجة أصدق من أبي ذر». كان عنده صدق. وقلنا لكم قبل كده، مصعب بن عمير أول سفير في الإسلام، وبعدين لما جه بقا واحد من سادات القوم، وهو في المدينة، هو ده رايح يدعو الناس في المدينة، جاي مشهر سيفه هيقتله، جاي يقلب عليه الناس، ما هو أنا أنا سيد القوم، جاي تخلي الناس تسلم وتطلع عن طوعي؟ فجay يقتله. فالراجل اللي كان مستضيف مصعب قال له: هذا سيد قومه، إن أسلم أسلم بإسلامه خلق كثير، فأصدق الله فيه. ما قالش بقا حضر له الأدلة أو إيه، حضر كم بيت كده من الإيه بيدغدغ العواطف عشان يبكي وقلبه يرق خالص، قال له: فأصدق الله فيه.
الراجل جاي يقتله، مصعب ابتدى يقول له إيه: اقعد اسمع، إن رضيت
ما نقول وإلا كفيناك عنك ما تكره. اقعد اسمع، رضيت، رضيت، ما رضيتش هنقوم ونمشي ونسيب لك حيك.
قال: أنصفت.
جلس مصعب، ابتدى يتكلم، ما اتكلمش، ابتدى. قال الرجل: ماذا يصنع من أراد أن يدخل في هذا الدين؟ اعمل إيه دلوقتي؟ أنا عاوز أخل في الدين ده.
أصدق الله فيه.
أبو ذر صادق. فبلاش دايماً يا جماعة في شماعات عندنا دايماً، وده للأسف، للأسف، حتى في الفئة المتدينة: أنا بقع، أنا عاوز حد يتابعني، أنا مش لاقي حد يتابعني، فأنا خلاص أنا ضعت! ليه ضعت يعني؟ ليه ضعت؟
عندك المصحف، وعندك الدروس، وعندك -قبل بقا كل ما نقعد نعد ده- عندك ربنا سبحانه وتعالى، عندك ربنا. هو الشيخ ولا الأخ اللي سابقك في التدين شوية ولا الحد اللي فاهم شوية في الدين هيعمل لك إيه أكتر من اللي ربنا عمله لك؟!
لكنها شماعات. طبعا هو مالوش لازمة؟ لا، ليه لازمة، أنا عارف إن ليه لازمة، لكن عند الفقد، آه، هنعمل إيه؟ نروح النار؟ طب هو كده؟ لا، مش كده، يا ريت يبقى كده. هنرجع بقا لورا شوية، ده هو ممكن يبقى في حد، وعندك شيخ ممكن تحفظ عليه قرآن أو عندك دار بتاعت نساء، ولكن والله بعيدة!
إيه اللي، ما تنزل يا أخويا! روح! إيه يعني بعيدة؟ ما أنت، أنت اللي في نفس اليوم اللي المفروض كنت هتسمع فيه لو هتروح، هتنزل تظبط في حته، وممكن تطلع قرب الصحراء عشان تظبط، عادي جداً. إنما مجلس العلم بعيد! المقرأة بعيدة! أبو ذر طلع من غفار راح مكة. أصدق الله.
أنتم فاكرين يا شباب إن يوم القيامة هتخيل؟ حججنا دي، السامع والمتكلم، على ربنا سبحانه وتعالى؟ قلت لكم قبل كده: أخطر ما في الأمر أن اللي هيحاسبك يوم القيامة هو اللي كان شايفك في الدنيا هتعمل فيها إيه دي؟ ومش شايفك يعني يرى ظاهرك، يرى ظاهرك وباطنك. هتعمل فيها إيه؟
قلت لكم قبل كده المثال، قلت لكم: تخيل اتنين في الشركة اتخانقوا مسكوا طحنوا بعض، فالمدير جابك، دخلت عليه اتمسكنت، والله هو وأنا كنت قاعد في حالي وأنا راجل مسكين وغلبان و... فهو بكل هدوء راح قالب لك شاشة الكمبيوتر كده، طلع إن في كاميرا في المكتب، والخناقة باينة من أولها، وأن أنت اللي قمت طحنت الراجل. هتعمل إيه وقتها؟ هتحط راسك في الأرض، وانتهى خلاص.
حجتك إيه؟ حجتك إيه؟ شايفك! في أي حجة أنت بتقولها وأنت عارف من جواك أنها مش حجة، وأنت عارف من جواك إن ده مش صدق، عشان كده بنقول مفتاح شخصية أبي ذر: الصدق. ما فيش حجج. مكة؟ هروح مكة، ما عنديش مشكلة، ما فيش حجة. فبلاش تطلعوا حجج، ليه؟ لأنها لن تخيل على الله، لن تخيل!
دي أول حاجة. تاني حاجة: كونوا صادقين. يعني إيه؟ الجو حر؟ وإيه يعني؟ انزل، ﴿قُلْ نَارُ جَهَنَّمَ أَشَدُّ حَرًّا﴾ [التوبة: 81] لو كانوا، لو عندك عقل، نار جهنم أحر، إيه يعني الجو حر؟ يعني إيه يعني؟ ولو كان سعياً لدنيا لا يهمك حر ولا برد. بتنزل في عز الحر عشان تروح شغلك، وبتنزل في عز المطر عشان تروح شغلك، إيه يعني حر؟!
كن صادقاً مع الله سبحانه وتعالى. إحنا يا جماعة من كثر الحياة المرفهة، كلنا أقل واحد فينا، أقل واحد في المجلس ده، عايش حياة ما كانش حد من الصحابة يتوقع إن في حياة زي دي أصلاً هتكون في يوم من الأيام، أنا بكرر: أقل واحد فيهم.
لما نسمع حياة الصحابة كانت عاملة إزاي، وأما أقول الصحابة يعني الموسر منهم كمان، مش بس الفقراء، حتى الموسر، حتى أبو بكر، حتى عثمان، حتى... كانوا حياتهم، في فرق بين واحد معاه فلوس واللايف ستايل عاملة إزاي للي معاه فلوس، في فرق. يعني اللي معاه فلوس زمان مش زي دلوقتي، مش هو معاه مثلاً سين من الفلوس فهو هيعيش على قد سين، بقت صاد هيعيش على قد صاد، بقت عين، بيكبر. حياة الصحابة ما كوش كده، يعني مش واحد مليونير فهو عايش حياة المليونير، الصحابة ما كوش كده، اقرأوا تراجم المليونيرات في الصحابة، فهم ما كوش كده.
طيب، ده أنا عايز أقول لكم السيدة عائشة أُثر عنها أن أول بدعة أحدثت في هذا الدين الشبع. يعني إيه؟ يعني الصحابة ما كوش يعرفوا الشبع ده على الدوام، يعني لا، الصحابة ما كوش ياكلوا لغاية ما يشبعوا. مرة الحسن البصري قاعد، وبعدين واحد دخل عليه قال له: هلم، تعال كل معايا. الحسن البصري من سادات التابعين، فقال: أكلت حتى لا أستطيع، خلاص، شبعان يعني، اللي هي كلمة بسيطة إحنا بنقولها عادي جداً، لا، شبعان اللي هو عادي يعني. فقال الحسن: سبحان الله! أوأكل المسلم حتى لا يستطيع أن يأكل؟! هو، هو قال له إيه؟ أكلت حتى لا أستطيع، مش قادر آكل تاني، فتعجب الحسن قال له: إيه، هو في حد بيعمل كده؟ أوأكل المسلم حتى لا يستطيع أن يأكل؟! عملتوها أمتى دي؟
آه، كانوا يشبعوا إيه مرة كل فين، يعني مش، عمرهم ما شبعوا، ممكن حد يشبع مرة أو مرتين، يعني مش لازم مرة في العمر، أنا أقصى، بس مش على الدوام، مش اللي هو إيه: النهارده شبعان وبكره شبعان وبعده شبعان وبعده شبعان، ما كوش كده الصحابة، اللي هما مين بقا؟ اللي هما الأغنياء برضه. أنتم عارفين قصة أبو بكر خرج جائع مش لاقي أكل في بيته، وأبو بكر واحد من الموسرين في الصحابة! خرج من بيته ما فيش أكل، جائع مش لاقي حاجة ياكلها. ولما أبو بكر يقول ما فيش أكل، هو كان بالنسبة لهم التمر ده أكل، يعني اللي في بيته تمر، هو عنده أكل.
طيب، نرجع تاني لأبي ذر، لأن إحنا إيه، هو الزهد كله جاي، فإحنا يعني خلينا إيه، مش عايزين نخرج عن أبي ذر. فأبو ذر، آه، يبقى إحنا كده يا جماعة، استغل المكان اللي أنت فيه وما تشتكيش، واستغل الإمكانيات اللي معاك وما تشتكيش. تليفونك اللي في إيديك اللي بتسِكرول عليه بالساعات هو هو التليفون اللي غيرك هيدخل بيه الجنة! ليه؟ دروس، المصحف، البرامج اللي بيستفيد منها في دينه، هو ده تليفونه. تدخل على الهستوري بتاعتها هنا ولا هنا أو على أي أب، كلها حاجات تدخله جنة، هو هو نفس الجهاز، فأنت بتشتكي ليه؟ بتشتكي ليه؟ أبو ذر سيدنا النبي قال له: روح، راح.
قولوا لي كده: أبو ذر رضي الله عنه، أنا بأسأل بجد، هل فينا واحد دلوقتي قاعد معلوماته الشرعية أقل من معلومات أبي ذر حين ترك النبي وذهب إلى قومه عليه الصلاة والسلام؟ مستحيل! هو أبو ذر قاعد قد إيه مع النبي عليه الصلاة والسلام؟ أيام، يعني آخرها كام يوم يعني؟ عرف إيه في الدين؟ والدين أصلاً كان نزل منه إيه؟ ده رابع أربعة. انطلق بما معه، انطلق بما معه! ما قعدش بقا يشتكي: أنا معايا إيه من الدين؟ طب أنا مش عارف إيه؟ خلاص، أمر جاله من النبي عليه الصلاة والسلام، أمر جاله، راح.
طيب أنت بقا كنت في هذا الموقف في أي، في أي، مش لاقي الشيخ، مش لاقي مش عارف إيه، فتروح النار يعني؟ تشتغل، ما تخش دورة علمية، ما تنزل سلسلة دروس واسمعها كل يوم درس، ما تروح اشتري لك كتاب خلصه وخش في غيره، ما ترمي التليفون اللي في إيديك اللي مضيعك! كن صادقاً، هو ده درس النهارده يا جماعة: كن صادقاً! ليه؟ لأن اللف والدوران مش هينفعك يوم القيامة، هيخيل على مين؟
طيب، أبو ذر فضل بعيد عن النبي قد إيه عليه الصلاة والسلام؟ ممكن فوق الـ 15 سنة، لأنه ما حضرش حتى غزوة الخندق مع النبي عليه الصلاة والسلام. طب هل معقولة المدة دي كلها يعني ما كان يعرف حاجة؟ لعل والله أعلم، يعني كتب السير والتراجم ما بتقولناش إن هو، إنما لعل كان هو، وبعدين ما تنسوش إن نص غفار أسلمت، فمرة هو يجي ويتعلم، مرة غيره يروح ويتعلم، يعني بيتعلموا أكيد. لكن كم المعلومات قد إيه؟ والرحلة اللي بتاخد قد إيه رايح وجاي وإيه...
وبعدين جه المدينة. أبو ذر، ذلك القاطع للطريق اللي كان يدخل يغير عشان ياخد فلوس، يعني همه دنيا، ودنيا من أسوأ أبوابها، يعتدون على الحجيج في الأشهر الحرم. فجأة يكونوا أزهد الناس رضي الله عنه! جه المدينة، إيه شغلته؟ بيخدم النبي عليه الصلاة والسلام، وبعد ما يخلص يروح ينام في الجامع، في المسجد النبوي. ده أبو ذر!
وبعدين يجي النبي عليه الصلاة والسلام يخش عليه مرة كدة، فيلاقيه نايم، فيضربه برجله يقول له: إيه، يعني أنت نايم هنا؟ قال له: أنا لي غيره؟! مالوش غيره، مالوش غير المسجد. فهذا أبو ذر رضي الله عنه.
وبعدين، أبو ذر كان له مذهب يحكونه، وأنا عندي نظر في في حكي هذا المذهب على هذا الوجه، فمهم جداً ركزوا في الكلمتين اللي جايين دول. أبو ذر كان ينهى الناس عن كنز الذهب والفضة على الوجوب يعني. وطبعا زمان كان الدينار من الذهب والدرهم من إيه؟ من الفضة. فكان أبو ذر ينهى الناس عن كنز الذهب والفضة، متأولاً قول الله عز وجل: ﴿وَالَّذِينَ يَكْنِزُونَ الذَّهَبَ وَالْفِضَّةَ وَلَا يُنفِقُونَهَا فِي سَبِيلِ اللَّهِ فَبَشِّرْهُم بِعَذَابٍ أَلِيمٍ * يَوْمَ يُحْمَى عَلَيْهَا فِي نَارِ جَهَنَّمَ فَتُكْوَى بِهَا جِبَاهُهُمْ وَجُنُوبُهُمْ وَظُهُورُهُمْ هَذَا مَا كَنَزْتُمْ لِأَنفُسِكُمْ فَذُوقُوا مَا كُنتُمْ تَكْنِزُونَ﴾ [التوبَة: 34-35]. فكان يقول: ما حدش يحوش لا درهم ولا دينار، اللي إحنا بنسميها دلوقتي الفلوس، وده لفظ غلط، اللفظ الأحسن نقول إيه؟ دول النقدين. المهم، دي العملة اللي كانوا بيتعاملوا بيها.
فكان يقول لهم: ما حدش يكنز ده. وده عمل له مشاكل، لأن الصحابة طبعا رضوان الله عليهم ما كوش يروا ذلك المذهب. وما أدى زكاته فليس بكنز، خلاص، وده مذهب خلاص جمهور الصحابة، وهذا قول النبي عليه الصلاة والسلام: ما أدى زكاته خلاص ليس بكنز، اللي عليك أنك تؤدي الزكاة وانتهينا. أبو ذر كان يقول: لا، الذهب والفضة لا يكنزان.
طب يسكت؟ يعني بيعمل ده في نفسه ويسكت؟ أنتم عارفين أبو ذر مين اللي يسكت؟ ما هو مستحيل يسكت! فكان يدخل يفتي الناس بذلك، وأبو ذر كان عالماً، سيدنا علي اللي هو يعني باب العلم، كان يقول -أما تيجي سيرت أبو ذر عشان بس الناس برده في آثار كده ما بتقفش معاها- كان يقول: أبو ذر حوى العلم ثم أوكى عليه، يعني حوى العلم وربط العلم فلم يخرجه. لكن أبو ذر عالم، وكان يفتي في عهد أبي بكر وعمر وعثمان، يفتي الناس، عالم، عنده علم، ما كانش يسكت! كان يدخل يقول للناس وينهى الناس ويبكت فيهم وكذا وكذا، وحتى الصحابة يعمل معاهم كده، هو ده مذهبه، فأيه، ما يسكتش بقا، ماشي؟
طيب، لكنه كان صادقاً رضي الله عنه، يعني إيه؟ ما يقولش حاجة، يعني ما يجيش إيه زينا كده، يا ابن الزهد ويا ابن حبيبي، وبعدين يخرج بقا يدبها أكل وشرب ولبس ومش عارف إيه، لا خالص. شوف بقا صدق أبي ذر رضي الله عنه، اختبره سيدنا معاوية.
أبو ذر راح الشام في عهد عثمان رضي الله عن الجميع، وبعدين نفس القصة، يقول للناس: ما حدش يكنز الذهب والفضة وما حدش...
قبل ما ندخل بس في قصة صدقه، ده المذهب اللي دايماً بيقولوه على أبي ذر رضي الله عنه. هل معنى كده الناس لما بتسمع ده بقا تظن أن أبا ذر مذهبه أنك النهارده أهو تبقى مفلس وبكرة يجي برزقه، وهو حديث النبي عليه الصلاة والسلام: اللهم اجعل رزق آل محمد قوتاً، إيه القوت؟ اللي هو أكل يوم بيومه. لكن الظاهر لما نجمع الروايات أن أبو ذر ده مش مذهبه، يعني مش اللي هو اللي الناس بتفهمه.
في رواية الذهبي ذكرها في السير وهي في المسند، مسند أحمد، وفي الطبقات عند ابن سعد، أن أبا ذر كان عطاؤه من بيت المال 4000، فكان لما يجي له العطاء -طبعا العطاء ده سنوي، يعني بيجي له عطاء سنة- فكان لما يجي له عطاء من بيت المال يجيب الغلام بتاعه ويأمره إنه يشتري طعام سنة، يقول له: خد الفلوس دي روح اشتري لنا أكل يكفينا السنة. وما فضل، اشتري بيه فلوس.
فاكرين لما قلت لكم ما ينفعش نقول على الدرهم والدينار فلوس؟ دي تسمية غلط. إيه بقا الفلوس دي؟ الفلوس دي اللي هي جمع فلس. زمان كان في الدرهم من فضة والدينار من ذهب، ودول كانوا بيشتروا بيهم الحاجات، الدينار طبعا بيشتروا بيه الحاجات الغالية أوي، والدينار بيشتروا بيه الحاجات اللي إيه، الأرخص شوية، بس برده حاجات يعني ليها قيمة يعني.
الفلوس دي كانت من معادن تانية، يعني عملة تُسك من معدن آخر غير الذهب قيمته في نفسه والفضة قيمتها في نفسها، المعدن الآخر اللي بيسك ده قيمته فين؟ حد يعرف الفلوس بتاعت النهارده دي يا جماعة، الورقة اللي بـ 100 جنيه والورقة اللي بجنيه، هل دي قيمتها 100 جنيه يعني يعني الورقة دي؟ أمال اكتسبت قيمتها منين؟ الثقة اللي هي اللي الدولة أو الكيان اللي أنت عايش فيه بتديها لها. بدليل، لو بكره الصبح طلعت الدولة وقالت: لاغيين الـ 200 جنيه، تصير الورقة أم 10 جنيه أغلى من الورقة اللي بـ 200 جنيه في يوم! صح؟ فيبقى دي قيمتها مش في نفسها.
إنما الذهب؛ ما فيش دولة تقدر تطلع وتقول إيه؟ لاغيين الذهب! ما فيش حاجة اسمها كده، الذهب قيمته في نفسه، هو نفسه فيه قيمة. فكانوا زمان يسكو فلوس عشان اللي عاوز يشتري حاجات أحقر، أو إيه؟ أحقر دي مش يعني حاجات أرخص بكتير، يبقى فيه حاجة نعرف نتداولها بينا، نشتري بقى الحاجات دي.
فكان سيدنا أبو ذر يقول للخادم كده: «روح اشتري لنا أكل سنة، والباقي اشتري به فلوس، ما تسيبليش ذهب وفضة». اشتري بالباقي فلوس، ليه بقى يشتري فلوس؟ الله أعلم، يعني هل كان يدخر منها شيئاً؟ لكن هو يرى حرمة ادخار الذهب والفضة لأن الآية في الذهب والفضة، ولا هينفق كل الفلوس؟ الله أعلم.
لكن في رواية أخرى ذكرها ابن الجوزي في صفة الصفوة: أن مرة بنته دخلت عليه، وطبعاً كانت هيئتها رثة وكذا، وبعدين بتقول له بقى أن الزراع والتجار بيقولوا إن تلك الأفلس اللي عندنا يعني من البهرج -هي بتقول إيه: أنت عمال تنهانا عن الذهب وال... يعني يظهر كده ده معنى الأثر-: طب ما الفلوس اللي عندنا دي ما هي برضه من البهرج؟ فقال لها: «يا بني ابقي عليها، فليس عندي غيرها». هو شوية ال... أنت عارفين يا جماعة، بس عشان نفهم القصة دي، يعني الناس كلها بتتدوال الـ 200 جنيه عادي، وهو أبو ذر عايش بالإيه؟ بالجنيه الفضة؛ عشان عشان نفهم بس إيه معنى فلوس قدام الدرهم والدينار.
هو فلوسه كلها عبارة عن إيه؟ كوينز جنيهات فضة، والناس عادي بتنزل بالـ... فده حياته عاملة إزاي؟ لكن مش المعنى اللي لأسف يعني ممكن يتبادر لذهنه، والله أعلم، لكن من مجموع الروايات يظهر هذا، واللي بعض الخطاب الديني برضه بيصدره يعني لما يجيوا يتكلموا عن أبي ذر بيقولوا كده، خلاص؟
وطبعا ادخار طعام سنة ده مأذون فيه لمدة سنة، يعني هذا مما رخص فيه وفيه آثار. فابو ذر راح الشام، عاوزين بقى نشوف صدق أبي ذر رضي الله عنه، يبقى هو ما كان بينهى، لا لا، ده كان بيلبس... ده كان بينام في المسجد في المدينة، ويموت النبي عليه الصلاة والسلام، ويظل في عصر أبي بكر على تلك الصفة، وفي عصر عمر على تلك الصفة، وهنجيب آثار. وبيجي في عصر عثمان يذهب إلى الشام عند معاوية، ليه؟ عشان الناس بتشتكيه، ما هو كل ما بيسيبش، كل ما بيخش مجلس يقعد يذكرهم بالـ... وهنشوف الآثار دي وهنقراها مع بعض إن شاء الله.
فذهب إلى معاوية رضي الله عنه، معاوية احنا بقى بنقول إيه؟ القائد ما ينفعش يكون عنده حدة. أبو ذر كان عنده تلك الإيه؟ حدة وتلك الشدة وتلك القوة، فده ما ينفعش في القيادة، وسيدنا النبي قال له كده: «أنت ضعيف»، ضعيف الرأي، ضعيف أنك مش هقدر تيه؟ تبقى مرن مع الناس، والقيادة مش كده. سيدنا معاوية العكس تماماً، سيدنا معاوية قمة الحلم، وقمة الذكاء، وقمة المداراة. يعني سيدنا معاوية حد في الحتة دي مميز جداً.
فيععمل إيه سيدنا معاوية؟ جه أبو ذر -طبعاً مش سايب الناس في حالهم- فهيقلب الناس على الوالي، فكان ممكن على طول ياخد قرار، لا ما يعملش كده، يختبر بقى مين؟ أبا ذر. عمل إيه؟ جاب الغلام بتاعه، قال له: «روح بالـ 1000 دينار دول بعد العشا، اديهم لأبي ذر وقول له: ده من بيت المال ليك». خلاص.
وبعدين بعد الفجر -الكلام ده حصل بعد العشا- بعد الفجر جاب الغلام سيدنا معاوية، قال له: «روح لأبي ذر، قل له: أنقذ ظهري من ضرب معاوية، أخطأت، الفلوس ما كانتش ليك». قال له إيه؟ الحقني أنا هطحن، الفلوس اللي جت لك بيها أنا غلطت ما كانتش ليك، ادها لي. فقال أبو ذر: «والله ما بقي منها دينار»، الفلوس ما باتتش في البيت. ما هو سيدنا معاوية عاوز إيه؟ يعني يضيق على أبو ذر، ما سابلوش يومين تلاتة من العشا للفجر، وأبو ذر الفلوس ما باتتش في بيته. ولكن: «أنظرنا ثلاثة أيام، هنلم لك بقى فلوس واديها لك، بس أنا ما... الفلوس كلها اتصرفت خلاص، بس تعال لي ثلاثة أيام أكون جمعت لك الفلوس».
فسيدنا معاوية لما رأى ذلك خلاص عرف أن ما فيش حيلة بقى يعني، راح باعت لسيدنا عثمان قال له: لا مش هينفع، سيدنا أبو ذر مش هينفع يكون هنا، ليه؟ لأنه ينصر ذلك المذهب على ما ذكرناه، وده مش كل الناس تستحمله يا جماعة. وده برضه من فقه الدعوة؛ من فقه الدعوة، وطبعاً أبو ذر لما كان بيعمل ده هو يرى ذلك على الوجوب، وده مذهبه الخاص به، والذي خالفه فيه الصحابة، يعني وكان صادقاً مع نفسه، يعني هو بيقول ده وبيعمل ده رضي الله عنه، ماشي.
إنما من فقه الدعوة: أنك تبقى عارف ده، تبقى عارف أن الدين لو أراد الله يا جماعة إنه يجعل الدين كله حرام وحلال، يعني ما فيش مستحبات ولا مكروهات، كان قادر يعمل كده ولا لا سبحانه وتعالى؟ ﴿لَا يُسْأَلُ عَمَّا يَفْعَلُ وَهُمْ يُسْأَلُونَ﴾ [الأنبياء: 23]. يعني كان ممكن يبقى الدين إيه؟ هو حرام وحلال. يعني إيه حرام وحلال؟ يعني في صلاة عشاء دي حكمها إيه في الدين، فرض ولا سنة؟ فرض. وفي ركعتين بعد العشاء فرض. وبعدين هتصلي ثمان ركعات بالليل وتوتر فرض. وهتصوم اثنين وخميس كل أسبوع فرض. مش كان ممكن الدين يبقى كده؟ إيه ممكن ولا مش ممكن؟ كان ممكن يبقى كده. لو ربنا سبحانه وتعالى شرع الدين على هذا النحو، كان هيبقى الدين كده، خلاص.
طيب وزي الزنا والكذب والربا والـ... ده حكمه إيه في الدين؟ حرام. فكان ممكن برضه يبقى أكل الثوم والبصل حرام، مش مكروه، وهكذا عد بقى المكروهات. لكن برضه ربنا ما عملش كده، هو الأول عشان الناس اللي ممكن ما تبقاش فاهمة: الحرام اللي هو لو عملته تأثم، المكروه لو عملته ما تأثمش، إنما لو تركته لله تثاب، ده المكروه. والمستحب -أظن كلنا عارفين السنة- لو تركتها ما تأثمش، إنما لو عملتها تثاب، زي ركعتين السنة بتوع العشا.
لكن ربنا ما عملش كده، خلى الدين في فرض ده كله لازم يعمله، وفي سنة يتنافس فيها المتنافسون، فواحد هيصلي ركعتين بالليل، والثاني هيصلي أربعة، والثالث هيصلي ستة، والرابع يصلي ثمانية، وده هيصلي بربعين، وده هيصلي بجزئين، وده هيختم في ركعة، كل دول بيعملوا إيه دلوقتي؟ سنة.
فممكن يبقى يجي... ده احنا لابد يبقى أولاً الداعية فهمه، ولابد لما يجي ينقل الدين ينقله على هذه الصفة، ما يشددش على الناس التشديد اللي ما يصلحش لكل الناس، فيبقى لبعضهم فتنة، خلاص.
طيب، سيدنا النبي عليه الصلاة والسلام -أنتم عارفين الحديث اللي هو إيه؟- منا الصائم ومنا المفطر، عادي جداً، خارجين في سفر، ناس صايمة وناس مفطرة، لا ده بينكر على ده، ولا ده بينكر على ده. بس كده؟ لا مش بس كده، ينزلون منزلاً، فيقوم الصايمين -طبعاً ما فيش طاقة خالص- يعملوا إيه؟ يناموا مش قادرين. طيب المفطرون؟ يقوموا هم اللي ينزلوا الرحل، وهم اللي يدقوا الخيام، وهم الـ... فيقولوا إيه: ذهب المفطرون اليوم بالأجر. فسعة فهم الشريعة مهم، يبقى فاهمين فين نشدد، وفين ده مش محل تشديد. ولذلك قالوا: إن العلم رخصة من عالم، أو الفقه رخصة من عالم، أما التشديد فيحسنه كل أحد، أسهل حاجة في الدنيا: يا شيخ، ينفع؟ حرام! أسهل حاجة، إنما الفقه رخصة من عالم.
طيب، أبو ذر رضي الله عنه أنفق كل المال، ادي تعاطي أبي ذر مع ملف الفلوس.
طيب الثياب؟ أبو ذر في أيامه راح الربذة، وهنحكي ده، مكان في الصحراء قاعد لوحده ما فيهوش حد، هنحكي ده إن شاء الله. وبعدين يعدي عليه ناس في الربذة فيلاقوه لابس بُرد، والغلام بتاعه والخادم بتاعه... بالمناسبه يا جماعة كلمة غلام أو جارية، خادم أو خادمة، ده احنا دلوقتي بنعتبره إيه؟ ده للناس اللي هما يعني زمان ما كانش كده؛ عشان بس نفهم برضه سياق الزمان، يعني ممكن يبقى عنده غلام وهو من أفقر الناس؛ لأن الغلام ده ما كانش بياخد أجرة، طب بتدفع له أجرته منين؟ لا هو الغلام ده ده كان ملك، ما بياخدش أجرة.
فراحوا عدوا عليه في الربذة، فلاوه لابس بُرد، والغلام بتاعه لابس بُرد نفس القماشة، وعشان نفهم فقالوا له: يعني كنت خد ده اعمل حلة لنفسك وهات له هو أي حاجة تانية. وعشان نفهم الكلمة دي، عاوزين نفهم: جات لك حتة قماشة فروحت أنت عامل منها بنطلون ليك، وعملت من الباقي بنطلون للغلام بتاعك الخادم بتاعك، فالناس لما شافت كده قالوا له: طب كنت خد أنت القماشه كلها اعمل بدلة -هو ده بالضبط يعني إسقاط عصر- اعمل بدلة لنفسك كاملة وهات له هو أي حاجة أقل في المنزلة يعني.
فقال لهم: «لا، اصل أنا سمعت حديث للنبي عليه الصلاة والسلام أن على الغلمان على الخدم يعني: أطعموهم مما تطعمون، وألبسوهم مما تلبسون». فكان سيدنا أبو ذر يعمل إيه؟ تجيء له حتة القماش يقسمها بينه وبين الغلام. عارفين يعني دلوقتي -إسقاط عصري- اللي هو إيه؟ عندك خادم ولا عندك خادمة، فانت نازلة تشتري لبس العيد للولاد، فرایحة البراند الفلاني فهتجيب لها من البراند الفلاني، ألبسوهم مما تلبسون، مش أنا لبست عيالي من هنا؟ هلبس الخادمة اللي عندي من هنا. طبعاً الخادمة دلوقتي هي دي أجيرة يعني ما هياش بنفس سمات الخادم زمان اللي هو كان عبد، لو حد عمل كده إحساناً ويرجو بذلك أنه يمتثل كلام النبي عليه الصلاة والسلام، جميل جداً يعمل كده. فادي تعاطي أبي ذر مع ملف الثياب، شايفين يا جماعة الصدق في حياة أبي ذر رضي الله عنه.
طيب الأثاث؟ أثاث البيت يعني، السرير بقى والكومودينو والدولاب والانتريه ومش عارف إيه. مرة واحد دخل عليه منزله فلم يجد شيئاً، البيت فاضي. قال له: يا أبا ذر، أين متاعكم؟ فين؟ أنت عايش إزاي؟ فين الحاجات؟ قال له: «لنا دار أخرى نرسل إليها متاعنا»، لا أصل في بيت تاني بنجهزه فاحنا بس قاعدين هنا شوية لغايه ما نروح البيت الثاني يعني فبنفرش البيت الثاني يعني. وده ممكن يحصل، تبقى أنت قاعد في شقة وبتوضب شقة ثانية، توضبت بس بتفرشها فبتنقل عفشك واحدة واحدة ولغاية ما... قال له: «لنا دار أخرى نرسل إليها متاعنا». قال له: لابد لك من متاع ما دمت هاهنا يعني طالما أنت في البيت ده لازم ما كان فيه حاجة. قال صاحب الدار: «لا يدعون فيها»، سيدنا أبو ذر بيتكلم عن إيه؟ عن الآخرة، هو بيقول له أنت فين متاعك؟ قال له: لا، احنا في دار ثانية بنرسل المتاع ليها. قال له: بس طول ما أنت عايش هنا يعني يبقى لك حتى فرشة تنام عليها، يبقى لك...
خلي بالكم هو برضه يا جماعة، هو الصحابي اللي بينكر على أبي ذر ده -هو عشان تفهموا يعني يا جماعة- الصحابة نمط حياة لا شفناه ولا هم شافوا، ولا كانوا يتوقعوا أن هيجي جيل شبهنا، يعني اللي بينكر على أبي ذر ده ما تفتكروهوش... يعني خالص، ده ممكن واحد كان عنده إيه؟ بس الشوال فيه تمر، فدخل على أبي ذر ما لقاش الشوال اللي فيه التمر، يعني عشان نبقى فاهمين بس القصة يعني. فابو ذر قال له إيه: لا ما اصل صاحب الدار مش هيسيبنا فيها، يقصد الرب سبحانه وتعالى، أنا كل لحظة والثانية ممكن أموت. فهذه تعاطي أبي ذر مع ملف الأثاث.
الأكل: أبو ذر كان له قرين من الصحابة رضوان الله عليهم، وبعدين تولى صار والياً، وأبو ذر بقى اللي كان يبقى والي، يا وييله لو أبو ذر شافه، ما بيتفهمش بقى في الحتة دي يا أبو ذر، احنا بنتكلم على صحابة ها، هو مذهبه كده، هو شايف الدنيا دي ما حدش يجي ناحيتها خالص، يجي الثاني يقول له: مرحبا بأخي، يقول له: لست أخا لك، أنت أخويا؟ أنت بتهزر! ده أنا مش راضي اقول الأسماء طبعاً؛ لأن أسماء كبيرة، أسماء صحابة، لكن ده مذهب أبو ذر، ودي شخصية أبو ذر، هو كده يعني، هو كده اللي جواها بيقوله، ما بيخافش.
ففي واحد أحد الولاة وكان قريناً له، وبعدين جه واحد معدي عليه قال له: أنت منين؟ قال له: من العراق. قال له: تعرف فلان ده الوالي؟ قال له: الوالي؟ قال له: لو رحت رجعت العراق، تعرض لها، يعني إيه؟ وهو ماشي كده إيه تعال قدامه، امشي قدامه، فهيناديك هيقول لك: ألك حاجة؟ فقل: أجل، صاحبك أبو ذر يقرئك السلام، ويقول لك: أنا ناكل التمر ونشرب الماء، ونعيش كما تعيش. يعني احنا الاثنين عايشين، أنا باكل تمر وبشرب مياه واديني عايش. فده كان طعام أبو ذر، ياكل شوية تمر وخلاص.
طبعاً الراجل رجع العراق، تعرض لهذا الوالي فقال له: أنت ليك حاجة؟ قال: نعم، جئتك من عند صاحبك أبي ذر. فخشع لها، أول ما سمع ده -يعني إيه؟ حن لأيام أبي ذر رضي الله عنه- فخشع لها، وراح قايل له الكلمتين دول، قال له بيقول...
لك، إحنا بناكل تمر وبنشرب مايه وعايشين. قال: فحلا إزاره، فحلا رداءه، وأدخل وجهه في جيبه وجعل يبكي. تاني يا جماعة، الوالي ده من الصحابة، لو يعني شفته حياته، ده اللي هو فقير يستحق الزكاة دلوقتي.
يعني سيدنا أبو هريرة كان والي، تولى في بعض، كان يعمل إيه؟ ينزل يروح السوق، ويشتري وبتاع، ويشتري دقيق، يشيله على كتفه فالديق يغرقه، ده الوالي. ما يسيبش ما حدش يشيل له حاجة، يشيل الدقيق على كتفه ويغرقه. قصة معروفة يعني، كان بيهزر مع الناس، وبعدين يمشي يقول إيه: افسحوا للوالي. فيبصوا يلاقوا إيه؟ واحد شايل الدقيق والدقيق مغرقه ومتبهدل. فهما دول الصحابة رضوان الله عليهم.
فطبعا أنا برضه قبل ما أكمل، إحنا إحنا بنقول إيه؟ إن أبو ذر مفتاحه أنه صادق مع الله، هل إحنا لازم كل اللي إحنا لسه بنقول إيه؟ من فقه الدعوة أن بنقول للناس ده درجات يعني، يعني دي درجات. الزهد ده من أعلى درجات الدين. وأعقل الناس هم الزهاد، أعقل الناس. ليه؟ عرفوا أنها مش باقية لحد.
فقال لك إيه؟ يعني نستستمر، ما إانت دلوقتي واحد معاه مليون جنيه، فراح استثمرها في استثمار جابت له زيهم، يعني مكسب مية لمية. واحد تاني خد المليون، راح استثمرها في استثمار جابت له مئتين لمية، مين أعقل؟ المئتين لمية بلغة الدنيا يعني. يقولوا ده أذكى من ده، ده جاب مئتين لمية، اشتغل في المخدرات ذكي، والتاني ما جابش غير مية في المية. فده بلغة الدنيا.
فواحد تالت جاتله المليون فقال: هو أنا دي لو انفقتها في سبيل الله كلها كده على بعض كده، إيه اللي هيحصل؟ هبقى تاجرت مع ربنا. راح واحد صرفها كلها في سبيل الله، فمن أعقل الثلاثة؟ التالت، مش كدة؟ ولذلك الإام الشافعي رفعت إليه مسألة أن واحد مات وأوصى بجزء من ماله لأعقل الناس. ما نحل المشكلة دي إزاي؟ وصية لازم ننفذها، يعني ما التاني برضه اللي مات ده ما يقول هو عاوزه مين؟ هو كتب في الوصية الجزء ده من المال ينفق في أعقل الناس، ومات على كده ف فزورة. فسئل الشافعي فقال: تنفق في الزهاد. تنفق في الزهاد، هم دول أعقل الناس.
طيب، هل كل الناس لازم تبقى على حياة أبي ذر؟ لا، مش لازم. طب واحد تحمس وقال: أنا هبتدي أقلل من حياتي، خير وبركة يعني، ما يعني. طب واحد قال: أنا عايش بزي زكاة مالي والباقي أنا بستمّتع به، طالما ما فيش إسراف وده شرط مهم، ما حدش يقدر يحرم عليك حاجة، لكن في الآخر ما هياش فتوى يعني، ما هياش فتوى يعني ما تجيش تبقى أنت عايش حياتك في المباحات -ما بقولش أنك تعمل حرام- والتاني آثر الدار الآخرة، وجاي يوم القيامة، فتوى أنا عاوز أبقى زيه بقى في الفردوس الأعلى، ليه يعني؟ منين؟ إلا أن يشاء الله، طبعا لا نتأل على الله سبحانه وتعالى، إلا أن يشاء الله سبحانه وتعالى.
هي مش فتوى، مش بالدراع، هي الآخرة لها قوانين ماشية عليها، فانت إيه الملف يعني في حياتك اللي اللي هتدخل بيه الفردوس؟ طب ده خد ملف الزهد وطبقه على نفسه، أنت إيه الملف اللي أنت عايش ليه؟ اللي هتيجي يوم القيامة كده ستف ورقك فيه، هو ده الملف اللي أرجوه. إيه؟ ما هو أنت لو ما لكش الملف ده إيه هتعمل إيه يوم القيامة إلا أن يشاء الله وكلنا أصلا داخلينها بالرحمة، أو نرجو ذلك يعني.
فلا، خليك بقى الملف اللي أنت عاوزه، طب واحد انبعثت نفسه وهمته أن لا أنا هتقلل من الدنيا واحدة واحدة، جميل. هو مش لازم يبقى خطابنا إيه؟ إحنا عاوزين المسلم اللي بيلبس مش عارف إيه وبياكل إيه وبركب إيه، إيه يعني وعاوزين المسلم اللي زي أبي ذر يعني، وما له أبو ذر يعني؟ سيدنا أبو ذر لو كان بيننا دلوقتي كان شفشنا كلنا، مش كدة؟ كان زماننا قاعدين في الجامع، والله كان طوح الضرب فينا، يجي يبتدي بيا يموتني، أرفع كان كان نصب الأحمر، وبعدين مش هيلحقكم بقى تكونوا أنتم جريتوا، هو يجي يبتدي بيا، كله هيجري، رضي الله عنه.
فادي أبو ذر الصادق، ماشي؟ قال عن عبد الله بن، هو كده فات قد ايه؟ يا لأن أنا قلت الدرس هيخد نص ساعة، خلاص بقى مش هنقرا حاجة. أبو ذر رضي الله عنه بعد كده معاوية رضي الله عنه أرسل إلى عثمان رضي الله عنه: لا مش هتنفع القصة دي، خذوا المدينة تاني. فرجعوا المدينة، فأبو ذر يعني مش قادر بقى يعيش وسط الناس خلاص، فاستأذن عثمان رضي الله عنه أن هو يخرج إلى الربذة. إيه الربذة دي؟ صحراء، يعيش لوحده مش عاوز حد، واعتزل الناس.
أبو ذر رضي الله عنه حصل قصة كده في غزوة تبوك، أنظروا يا جماعة إلى الصدق، ودي مهمة جدا في موضوع الربذة ده. في غزوة تبوك سيدنا، طبعا غزوة تبوك كانت بعيدة عن المدينة، أنتم عارفين القصة مش كدة؟ والنبي عليه الصلاة والسلام كان أما يجي يخرج يوري ولا في الغزوة دي ما ورش لأن المسافة بعيدة، وكان الجو حر صعبة جدا، خلاص.
ففي ناس تخلفت عن غزوة تبوك، فكان كل ما يذكره حد يقول له: فلان مش لاقيينه، فيقول: إن يريد الله به خيرا يلحقه بنا، وإن نكن غير ذلك فقد كفيتموه، يعني لو في خير هيجي، ما فيهوش خير أحسن. فذكر أبو ذر، فين أبو ذر؟ مش لاقيينه. فقال النبي نفس الكلام عليه الصلاة والسلام: لو في خير هيجي، ما فيش خير خلاص، قد كفيتموه.
أبو ذر بقى كان فين؟ أبو ذر كان راكب على بغلة. راكب بغلة، فهو طبعا بغلة هتعمل إيه؟ وبعدين البغلة عطبت يعني تعبت، ما بغلة هيقطع بيها الصحراء دي كلها؟ ما فيش الكلام ده، فتعبت. فطبعا دي كانت حجة جميلة جدا، أبو ذر يرجع. لا، أبو ذر عمل حاجة عجيبة جدا، نزل وشال الحمل بتاع ومشي في الصحراء، وراح تبوك. تبوك يا جماعة للنبي عليه الصلاة والسلام لم يوري بها عشان بعيدة وفي جو حر. شال حمله وراح.
صدق، صدق يا جماعة! إحنا إحنا بندور -أنا أولكم- لأي حجة نتخلف بها عن الركب، ركب مين بقى؟ ركب المصلين في الجامع، ركب اللي اللي اللي اللي القرآن، ركب اللي بيحضروا الدرس، ركب اللي بيطلبوا علم، ركب اللي بينفقوا في سبيل الله، أي حجة. أبو ذر رجل صادق، مش هفوت الغزوة، شال الحاجات على كتفه وراح ورا الجيش.
قاعدين كدة ده واحد جاي من بعيد، هم مستغربين: إيه اللي جاي في الصحراء ماشي؟ ده مين ده؟ فقالوا للنبي عليه الصلاة والسلام: في واحد جاي من بعيد. قال: كن أبا ذر، وكان أفطن الناس صلى الله عليه وسلم. قال: كن أبا ذر. قالوا: هو أبو ذر. لما قرب شوية لقوه أبو ذر، فقال صلى الله عليه وسلم: «يرحم الله أبا ذر؛ يمشي وحده، ويموت وحده، وبعث يوم القيامة وحده».
رجل بأمة، يبعث يوم القيامة وحده. الناس ما بتقفش على اللفظة دي، بيذكرون ذلك الحديث عشان يقولوا دي علامة من علامات النبوة وأنه مات وحده، لكنه رضي الله عنه يبعث يوم القيامة وحده.
راح الربذة وحضرته الوفاة، ومراته مش لاقية حاجة تكفنه فيها، ما معاهاش غير ثوبها اللي عليها بس. فبشرها أنه كان في جماعة وقاعد مع النبي عليه الصلاة والسلام هنا في روايتين في الحتة دي، والنبي قال لهم أن فيكم واحد عليه الصلاة والسلام هيموت لوحده ويحضره نفر من المسلمين، وقال: كل اللي كانوا قاعدين معايا في المجلس ده كلهم ماتوا في القرى عادي والمدن يعني، فانا اللي هموت لوحدي وما تقلقيش، في نفر من المسلمين هيجوا، ما تقلقيش.
طب يجوا منين؟ وموسم الحج خلص فما فيش حد بيعدي على الربذة خلاص. قال لها: هيجوا. تطلع شوية من المسلمين معهم عبد الله بن مسعود جايين من الكوفة. والمرأة كل يوم، وقال لها: إذا أنا مت ضعي سريري على الطريق، خدي كده الآية الجنازة بتاعتي السرير وحطيه بس على الطريق.
عملت كدة، لقيت الناس معدية، قالوا: من هذا؟ قالت: أبو ذر. فبكى ابن مسعود بكاء شديداً، وتذكر قول النبي صلى الله عليه وسلم: «يرحم الله أبا ذر؛ يمشي وحده، ويموت وحده، ويبعث يوم القيامة وحده». وواراه التراب، وانصرف رضي الله عنه.
أقول قولي هذا، أستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.
الشيخ أمجد سمير