بسم الله، الحمد لله، والصلاة والسلام على رسول الله وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صل على سيدنا محمد النبي وأزواجه أمهات المؤمنين وذريته وآله بيته، كما صليت على آل إبراهيم إنك حميد مجيد.
أما بعد؛ هذا الدرس هو خارج السياق، هو الدرس الثاني من الدروس المستثناة من سلسلة «قبسات نور»، وهو إكمال للدرس السابق. درس الجمعة اللي فاتت، لو تفتكروا، ختمنا بأن لازم كل واحد فينا يبقى له هدف، وهدف كبير، ويسعى خلف ذلك الهدف. وجاءت لي رسائل كثيرة، سواء على القناة أو رسائل شخصية، أن في ناس تائهة، مش عارفين نعمل إيه؟ يعني إيه اللي المفروض نعمله؟
أنا تصوري أن الموضوع كان واضحًا للناس، واتكلمنا فيه أكثر من مرة في المسجد هنا. وأحيل لكم على شيء علشان مش هقدر أقول كل حاجة في الدرس ده؛ نحن في ملف كامل مسمينه «ملف غزة»، في أكثر من 100 مقطع صوتي، ما بين خطب ودروس وشرح كتب، حاجات كتير ممكن نسمعها، وممكن نعمل برضه تحديث للملف ده لأن في حاجات اتكلمنا عنها بعد كده وما انضفتش، فمهم بقى فلان وفلان يعملوا لنا الـ update للملف عشان نبعته للناس تاني يسمعوا كل حاجة.
فأنا كنت متصور أن الموضوع ده قتل بحث هنا في المسجد، أو في الخطب، أو في الدروس الأونلاين، فما فيش مشكلة أننا نذكر مرة أخرى ونتناول الأمر من كذا وجه يمكن ما اتكلمناش عنه قبل كده. أولًا يا جماعة، زي ما قلنا المرة اللي فاتت، فاكرين إحنا ابتدينا الدرس المرة اللي فاتت وقلنا إن الناس حيال ما يحدث كانوا ثلاثة أصناف؟ إنما النهارده كمان عاوزين نقول لما بنيجي نتكلم عن إيه اللي المفروض نعمله، الناس لما تيجي تفكر في الحتة دي هي برضه أنواع، وأنواع ده بناء على طباع الشخص نفسه؛ يعني في طباع في الناس بتخلي كل واحد ليه طريقة تفكير مختلفة عن الثاني.
أول طريقة تفكير، أن في ناس وهي بتفكر دائمًا في دماغها النتيجة؛ يعني هو عاوز يعرف إحنا نعمل إيه عشان بكره الصبح يحصل نصر؟ هو دائمًا في دماغه أنه عاوز يشوف النتيجة، عاوز يشوف النصر، عاوز يشوف اليهود أولئك اللئام دول بكره السنة الجاية أو كمان شهرين يتبددوا من المنطقة؛ طريقة تفكيره كده.
في واحد ثاني بيفكر دائمًا: ما أصل فين العلماء؟ هو فين الدعاء؟ أصل الحدود؟ أصل الحكومة؟ دائمًا طريقة تفكيره دائمًا هو كده بيفكر في غيره، عمل إيه؟ دي طريقة تفكير موجودة، أنماط شخصيات، إحنا اتكلمنا عن النمط ده قبل كده، فاكرينه؟ اسمه «شخصية لوم»، ده بيتدرس يا جماعة في علم النفس، تكلمنا عليه قاش خالص، حد فاكر؟ الشخصية التي دائمًا تلقي باللوم على غيرها.
هذه أنماط من التفكير، والحقيقة إحنا عاوزين نتخلص منهم قبل الدرس. أول فكرة أن إحنا دائمًا عينينا على النتيجة، والشرع نفسه هتلاقوا في نصوص كثيرة بتبعدني عن الحتة دي: أنت اللي عليك كذا وكذا وكذا اعمله، مالكش دعوة بالنتيجة، النتيجة مش بتاعتك. الحديث اللي اتكرر كثير الفترة اللي فاتت دي، اللي كان له مناسبة، هو حديث الفسيلة؛ حديث الفسيلة ده نفسه أقوى حديث يدلك على أن النتيجة مش بتاعتك.
«إذا قامت الساعة وفي يد أحدكم فسيلة، فإن استطاع أن لا تقوم حتى يغرسها فليغرسها». غرسك للفسيلة في قانون النتائج يعني إيه؟ حد يرد ولا حاجة؟ في قانون النتائج غرسك للفسيلة لا يعني شيئًا؛ القيامة بتقوم يعني الفسيلة دي لا هتكبر ولا هتبقى شجرة، ولا هيحد ياكل منها ولا يستظل بها ولا أي حاجة. حديث الفسيلة يضرب هذه الطريقة في التفكير التي هي: أنا عشان أعمل حاجة لازم أشوف النتيجة بتاعتها، أو لازم النتيجة تكون بسرعة.
أنا أصلاً بعمل الحاجة بفكر في النتيجة؟ الله عز وجل أرسل نبيه ﷺ داعيًا إلى الله ومبشرًا ونذيرًا، ومع كل هذا نزع عن النتائج فقال: ﴿لَيْسَ عَلَيْكَ هُدَاهُمْ﴾ [البقرة: 272]. النتيجة مش بتاعتك، طب يا رب أنا عليَّ إيه؟ تدعو إلى الله، النبي ﷺ ومن تبعه، وتأمر وتنهى، والنتيجة مش بتاعتك.
خلونا علشان ما نسهب في الحتة دي، تعالوا نخش في آيات في حتة أن إحنا يا جماعة نخرج النتائج من أذهاننا تمامًا. النتيجة تحصل النهارده، بكره، السنة الجاية، الجيل ده كله يموت وما يشوفش؛ النتيجة مش بتاعتنا. قال الله عز وجل في آيات كثيرة في القرآن في المعنى ده، خلينا ناخد آيتين منهم علشان ختام الآية مش عشان نفس المعنى، وإلا فالمعنى موجود كثير في القرآن.
قال الله عز وجل: ﴿وَإِن نَّرِيَنَّكَ بِبَعْضِ الَّذِي نَعِدُهُمْ أَوْ نَتَوَفَّيَنَّكَ فَإِنَّمَا عَلَيْكَ الْبَلَاغُ وَعَلَيْنَا الْحِسَابُ﴾ [يس: 32]. يعني يا رسول الله؟ الخطاب للنبي ﷺ، فقال سبحانه وتعالى له: ﴿وَإِن نَّرِيَنَّكَ بِبَعْضِ الَّذِي نَعِدُهُمْ﴾ يعني من العذاب، الكلام هنا على المدافعة بين أهل الإيمان وأهل الكفران؛ يعني يا رسول الله يا محمد ﷺ هم حال من اثنين: يا إما وأنت عايش يقدر الله عز وجل عليهم شيئًا مما وعدنا به، ده احتمال موجود، الاحتمال الثاني أنك تموت وما تشوفش الحاجة دي.
فماذا قال الله للنبي محمد ﷺ؟ ﴿أَوْ نَتَوَفَّيَنَّكَ﴾، طب يا رب أنا أعمل إيه؟ شوف بقى ختام الآية يا جماعة؛ يعني تعيش لغاية ما تشوف أو تموت قبل ما تشوف، مش دي القضية؟ طب إيه القضية؟ قال الله عز وجل خاتم الآية: ﴿فَإِنَّمَا عَلَيْكَ الْبَلَاغُ﴾. اللي عليك إيه؟ هو السؤال بتاع الدرس النهارده؛ إحنا علينا إيه؟ انشغل بما عليك، ودع النتائج لله عز وجل. ما تقعدش حاصر نفسك في التفكير في النتيجة، لأن التفكير ده أول شيء ما فيش منه عمل ينبني عليه.
متى النصر؟ متى؟ قعدت من هنا للسنة الجاية بتفكر: متى النصر؟ عملت إيه أنت؟ ولا حاجة. طيب التفكير ده عمل إيه برضه؟ ولا حاجة. طيب هي متى النصر دي بتاعتك؟ بتاعت الأمم المتحدة؟ بتاعة أمريكا؟ بتاعة اللوبي الصهيوني؟ بتاعة مين؟
متى النصر؟ دي ربنا، مش بتاعة أي حد. مش بتاعة أي حد، فقال سبحانه وتعالى: ﴿إِنَّمَا عَلَيْكَ الْبَلَاغُ﴾. الآية الثانية قال الله عز وجل: ﴿فَانْذَهْبْ بِكَ فَإِنَّا مِنْهُمْ مُنْتَقِمُونَ﴾ [الدخان: 8]؛ يعني لو مت قبل ما ترى ذلك، هننتقم منهم برضه، يعني الانتقام موجود، هيحصل هيحصل، والخطاب للنبي محمد ﷺ: ﴿فَانْذَهْبْ بِكَ فَإِنَّا مِنْهُمْ مُنْتَقِمُونَ﴾. يعني اطمئن، يعني قاعد دلوقتي وقلبه حرقة، نقول له اطمن، لو مت فوعد الله عز وجل سيكون، والله منجز وعده، هيحصل هيحصل فاطمن.
﴿فَانْذَهْبْ بِكَ فَإِنَّا مِنْهُمْ مُنْتَقِمُونَ * أَوْ نُرِيَنَّكَ الَّذِي وَعَدْنَاهُمْ فَإِنَّا عَلَيْهِمْ مُقْتَدِرُونَ﴾ [الدخان: 8-9]. الحالة الثانية أنك تفضل عايش لغاية ما تشوف ده بعينيك: ﴿أَوْ نُرِيَنَّكَ الَّذِي وَعَدْنَاهُمْ فَإِنَّا عَلَيْهِمْ مُقْتَدِرُونَ﴾. الآية اللي بعديها: ﴿فَاسْتَمْسِكْ بِالَّذِي أُوحِيَ إِلَيْكَ﴾؛ ده اللي عليك، تعيش بقى لغاية ما تشوف، تموت وما تشوفش، ﴿فَاسْتَمْسِكْ بِالَّذِي أُوحِيَ إِلَيْكَ﴾.
واضح يا جماعة؟ يبقى طريقة التفكير بتاعة النتائج دي بـ... إحنا كنا واحنا بنقرأ في دروس التفسير في الفجر، تفسير العصر كان ساعتها في الفجر، يعني الآية دي إحنا أظن قرأناها في الفجر ولا مش فاكر، المهم جه معانا قول الله عز وجل: ﴿وَأُخْرَىٰ تُحِبُّونَهَا ۖ نَصْرٌ مِّنَ اللَّهِ وَفَتْحٌ قَرِيبٌ﴾ [الصف: 13]. وساعتها اللي بيحضر معانا دروس تفسير قلت لكم إيه؟ دوروا على معنى كده كان في قلبي لكن ما كنتش لسه قريته في حتة، والشباب قرأوا وجابوا لي بقى إن المعنى ده موجود.
أنا لما كنت بقرأ دي، باستشعار معنى إن ده فيه عتاب من الله عز وجل لمن يفكر في النصر، يعني اللي شغله كل تفكيره: متى النصر؟ متى النصر؟ فقال الله عز وجل: ﴿وَأُخْرَىٰ تُحِبُّونَهَا﴾؛ أنتم بتحبوها، ﴿نَصْرٌ مِّنَ اللَّهِ وَفَتْحٌ قَرِيبٌ﴾. وجابوا كلام الرازي في هذه الآية: "وفي تحبونها شيء من التوبيخ على محبة العاجل".
هذا كلام الفخر الرازي، أنا ساعتها قلت لكم اللي كان بيحضر دروس التفسير: "تحبونها" دي يعني نسبة الحب إليهم، يعني تحس كده إيه؟ هي ليست محبوبة إلى الله بالإطلاق، ده أنتم بتحبوها، عاوزين نصر عاجل، ربنا سبحانه وتعالى حساباته مختلفة وترتيبه مختلف سبحانه وتعالى. يا جماعة بنو إسرائيل مش هقول لكم قتلوا قد إيه من المؤمنين ولا من الأولياء، قتلوا قد إيه من الأنبياء؟ أنبياء! حسابات ربنا غير.
﴿وَأُخْرَىٰ تُحِبُّونَهَا﴾، قال أبو السعود: "وفي تحبونها شيء من التوبيخ على محبة العاجل"، وقال: "تحبونها فيه تعريض بأنهم يؤثرون العاجل على الآجل". يبقى فكرة إن وإحنا بنفكر اللي علينا شغلنا قوي بالنتيجة، ده مش تفكير صائب حتى بالشرع. ما تفكرش في النصر، ماشي، ما تفكرش في النصر، لكن مش ده اللي شاغل تفكيرك، أمال إيه اللي شاغل تفكيري؟ أنا عليا إيه؟
الحقيقة دي سؤالين عشان بقى نخلص من الفئة الثانية لأنها منتشرة جداً برضه، اللي هو هو إيه اللي المفروض يحصل؟ ده سؤال كبير جوابه: اللي المفروض يحصل ده بقى في أشخاص يعني المفروض يحصل من الفئة الفلانية والفئة العلانية، وتلاقي واحد شاغل نفسه دايماً كده بكل الناس دي ومش شايف نفسه، يعني العلماء فين؟ عملوا إيه؟ العلماء الدعاء عملوا إيه؟ الحكومة عملت إيه؟ أصل ده أمريكا، أصل ده اللوبي الصهيوني، أصل ده... طب وأنت؟
طريقة التفكير دي يا جماعة، لو أنت فضلت تفكر كده، على فكرة إحنا طبعاً بنيجي يتكلموا في أنماط الشخصيات والحاجات دي، بيقولوا إن طريقة التفكير دي لازم تتخلى عنها أصلاً، لأن دي مش هتقدم لا في دنيا ولا في دين، ولا أي حاجة في الدنيا. إحنا ممكن نقعد من هنا لبكرة نحكي: تعالى يا فلان يلا روح اتعلم، أصل التعليم بايظ، أصل أديك شايف المدارس، أصل الحاجات الأونلاين مش قد كده، ويقعد يرص لك... طب غيرك اللي تعلم؟ هو أنت عايش في الكوكب لوحدك؟ ولا نفس ظروفك دي في زيك الآلاف، ولو قلة اتعلمت في الظروف اللي أنت عمال تحكي عليها دي، يبقى أنت في إيديك حاجة تعملها بس أنت مش عاوز توجع دماغك، مش عاوز توجع دماغك فخلاص.
يبقى التعليم والمدارس والأونلاين وعد من هنا لبكرة هجيلك بعد سنة واثنين وثلاثة وأربعة هلاقيك محلك سر في نفس الحتة اللي أنت فيها، وغيرك اتعلم. ده حصل قبل كده، حصل لابن عباس رضي الله عنه، لما مات النبي ﷺ انكب ابن عباس على العلم وأقبل على العلماء، وكان واحد من أقران ابن عباس، والناس هتسيب كبار الصحابة دول وهيقعدوا لك؟ أنت واحد قرين لابن عباس، فلم يبه به، ابن عباس أقبل على شأنه واتعلم وتمر، مش هقول بقى الأيام والسنين، ويقعد لابن عباس الناس يسمعوا لابن عباس ويجي صاحبه ده ويقول: «هذا الغلام كان أعقل مني». بس خلاص مرت السنين.
شو هنا يا جماعة طريقة التفكير؟ ابن عباس كأنه فكر: "أنا أقدر أعمل إيه؟" ما يشغلنيش بقى الناس هتقعد ولا لأ، مش أنا أقدر أعمل إيه؟ أتعلم، هتعلم. التاني طريقة تفكيره كانت إزاي؟ فكر في حاجات خارجية، بنسميها حاجات خارجية، ماشي، إن في غيرك الصحابة الكبار والناس مش هتقعد لك، أنا أعمل إيه دلوقتي؟ أنا مش في صحابة وفي غيري، وأنا أعمل إيه؟
يبقى يا جماعة خلاصة الموضوع: ما يشغلكش النتيجة، وما يشغلكش غيرك يعمل إيه وإيه اللي المفروض كان يعمله وما عملوش ليه، لأن شرف لك أن تموت على الطريق، شرف لك. خلاص، النتيجة اللي أنت حبيبها دي حصلت وأنت عايش خير وبركة، ما حصلتش، ﴿لَا يُكَلِّفُ اللَّهُ نَفْسًا إِلَّا وُسْعَهَا﴾؛ يا رب أنا عملت اللي عليا. طيب وغيرك؟ غيرك يسأله عما خوطب به، يعني أنت هتيجي يوم القيامة مش هتتسأل الصهيوني ولا هتتسأل عن نفسه، وكل واحد والعلماء كل عالم يتسأل عن نفسه، والدعاء كل داعية هيسأل عن نفسه، وأنت هتتسأل.
فاكرين الجملة اللي قلتها لكم قبل كده؟ قلت لكم يوم القيامة أصغر ذنب فعلته هو أكبر من أكبر ذنب فعله غيرك، ساعتها أنتوا تخضوا. قلت لكم أيوه، أصغر ذنب أنت عملته يوم...
القيامة أعظم وأجل من أكبر ذنب عمله حد غيرك، لكن أعظمه وأجل على مين؟ عليك، لأن أعظم ذنب عمله غيرك مين اللي هيتحاسب عليه؟ غيرك، وأحقر ذنب انت عملته مين هيتحاسب عليه؟ انت، فيبقى يوم القيامة أيهما أعظم عليك؟ عليك أنت؛ أصغر ذنب أنت عملته، ولا كفر كل الكفار اللي في الدنيا؟ أصغر ذنب أنت عملته كفر الكفار، الكفار هيتحاسب عليه، ما هو مش شغلك يوم القيامة، إلا لو كان في واجب تجاه هؤلاء الكفار أنت قصرت فيه، فبرضه هيبقى ذنبك أنت بقى مش ذنب الكفار، يعني كفرهم هم يتحاسبوا عليه، إنما أنا أنا أعمل إيه؟ هو ده السؤال.
يبقى شيل من دماغك النتيجة إيه اللي هتحصل، زائد يا جماعة كمان إشكال النتيجة ده برضه ده إشكال تاني، هو أصل النتيجة دي اللي هي نتيجة بتاع مين؟ يعني اقتراح العقول ده هو مين اللي قال لحضرتك إن اقتراح عقلك هو ده الاقتراح اللي يعني ما فيش بعد كده؟ يعني يا جماعة الناس اللي قاعدة لو أنا شايف ناس برה فمعلش الناس برضه تضم، هو في مكان جوه بقى يمين وشمال يعني لو الناس عاوزه تخش في أماكن، احنا بنركب سماعة صغيرة برضه برה علشان السماعات الكبيرة دي ما نشغلهاش.
كنا بنقول إيه؟ كنا بنقول إيه؟ آه يعني اقتراح العقل ده ما برضه يعني إيه؟ يعني عقلك هو المعصوم يعني؟ يعني يا جماعة دلوقتي واحدة واحدة كده أنت عمال تقول إيه؟ احنا عاوزين النصر، طب هو مين الذي لم يأذن في النصر؟ مين يا جماعة؟ ربنا ولا أمريكا؟ يعني هي أمريكا اللي مأخرة النصر؟ مساندة أمريكا لإسرائيل هو ده اللي مأخر النصر يعني؟ ولا ربنا سبحانه وتعالى هو الذي لم يأذن إلى الآن في النصر؟ فانت بتقول لا بقى لازم لازم نصر دلوقتي، أنت بتعدل على مين دلوقتي؟ هو ربنا سبحانه وتعالى بيقول لا النصر مش دلوقتي، لأن ربنا سبحانه وتعالى لو قال الآن يبقى الآن خلصت، خلصت ولا حد شاكك؟ خلصت.
فالله عز وجل لم يأذن، طب احنا نعمل إيه بقى؟ الله عز وجل لم يأذن، نرجع بقى نفسنا اللي هو سؤال الدرس: أنا أعمل إيه بقى في هذا الواقع؟ قلنا لكم قبل كده السؤال بصيغة بقى شرعية: اسأل نفسك دائماً ما هو الأمر الشرعي حيال الأمر القدري؟ فاكرين الجملة دي؟ يعني الله عز وجل يقدر أموراً في الدنيا، يقدر أموراً، ده اسمه أمر قدري، قال الله له: كن فكان، أي حاجة في الدنيا ده اسمه أمر قدري، الأمر القدري ده في أمر شرعي، يعني إيه أمر شرعي؟ يعني افعل ولا تفعل، مش كن بقى، فهمتوا الفرق بين الأمر القدري والأمر الشرعي؟ تاني، ما هو الأمر الشرعي حيال الأمر القدري؟ الأمر القدري: كن، الأمر الشرعي: افعل ولا تفعل.
طب يا رب قدرت ذلك قدراً أن يحصل واحد اتنين تلاتة، وأن اليهود تدخل، وأن اليهود تضرب، وأن مش عارف إيه، كل اللي احنا شايفينه مش وقت أن احنا نحكي عليه، هذا أمر قدري، ما الأمر الشرعي حيال هذا الأمر القدري لي أنا ما فيش حد تاني؟ أعمل إيه يا رب؟ واضح السؤال كده يا جماعة؟ طيب السؤال ده تتفرع منه حتتين: أوامر شرعية أنت مامور بها صحيح، لكن في قانون الدنيا دلوقتي ما تعرفش تحصلها، يعني ما تعرفش تعملها، ماشي، يعني أمر شرعي آه، ممكن تلاقي أمر شرعي بكذا وكذا وكذا، لكن تيجي تطبق ده تلاقي في عوائق في الدنيا أنك تعمل ده.
وحاجات تانية أنت مامور بها وما فيش تلك العوائق، خلاص يبقى احنا ننشغل باللي هو ما فيهوش عوائق ده، ونسأل الله عز وجل أن ييسر لنا الأمور التي فيها هذه العوائق، وهنتكلم بنوع من التفصيل شوية في المسائل دي.
طيب اتكلمنا هنا قبل كده في دروس، اتكلمنا في درس اسمه نصر هنا ونصر هناك، واتكلمنا في غزوة أحد وعوائق النصر، دروس كتير، الحل كلها في ملف غزة ماشي موجود، الدروس دي اسمعوها، لكن النهارده عاوز أبتدي بآية تانية عمرنا ما اتكلمنا عليها بقى ماشي، ومنها ننطلق، آية في سورة البقرة: ﴿أَلَمْ تَرَ إِلَى الْمَلَإِ مِنْ بَنِي إِسْرَائِيلَ مِنْ بَعْدِ مُوسَى إِذْ قَالُوا لِنَبِيٍّ لَهُمُ ابْعَثْ لَنَا مَلِكًا نُقَاتِلْ فِي سَبِيلِ اللَّهِ قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلَّا تُقَاتِلُوا قَالُوا وَمَا لَنَا أَلَّا نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا فَلَمَّا كُتِبَ عَلَيْهِمُ الْقِتَالُ تَوَلَّوْا﴾ [البقرة: 246].
يا جماعة الآية اللي شبه دي اللي اتكلمنا عنها كتير هنا اللي هي إيه: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ قُلْ مَتَاعُ الدُّنْيَا قَلِيلٌ وَالْآخِرَةُ خَيْرٌ لِمَنِ اتَّقَى وَلَا تُظْلَمُونَ فَتِيلًا﴾ [النساء: 77]، الآية دي اتكلمنا عنها هنا قبل كده نفس الكلام، طبعا الآية الأولى دي أو اللي احنا اتكلمنا عنها هنا قبل كده، قلنا لكم المرعب الموضوع أن الآية دي على أحد أقوال ثلاثة نزلت في صحابة، في مؤمنين، مش بس صحابة، دول صحابة مهاجرين، يعني الخلص من الخلص، كانوا في مكة مستضعفين ومقهورين وكذا، وعمالين يستعجلون القتال: احنا احنا احنا بنطلب أهوه، بننطق ليه؟
علشان اللي حضرتك قاعد عمال تقوله غيرك قاله، يعني إيه بقى؟ أنت جاي تخاذلنا النهارده ما نحلمش مش عارف إيه، لا مش جاي أخذلك، لكن جاي أقول لك المنع القدري قد يكون مصلحة لك وأنت يا مسكين ما انتش فاهم أي حاجة، المنع القدري من أمر أنت نفسك تتوق إليه ممكن يبقى مصلحة ليك، يا جماعة قلنا لكم الكلام ده هنا قبل كده، قلنا لكم الجهاد ذروة سنام هذا الدين، مش كده؟ حاجة ما فيش بعد كده، والمذهب عندنا أنه أفضل ما يتطوع به الجهاد، ثم النفقة فيه، ثم العلم، ثم الصلاة، كده الترتيب: جهاد، نفقة في الجهاد، علم شرعي، صلاة، ده أفضل ما يتطوع به.
خلاص فالجهاد خلاص ده حديث النبي عليه الصلاة والسلام، لكن في إشكال تاني هنا أن من أكبر الكبائر التولي يوم الزحف، مش كده؟ فهنا زي ما في حاجة عظيمة الناحية دي ففي حاجة عظيمة الناحية دي برضه، قد يكون المنع القدري خيراً لك وأنت ماشي مش فاهم حكمة ربنا سبحانه وتعالى في هذا المنع، فالله عز وجل ضرب لنا مثلين: مثلاً في صحابه رسول الله صلى الله عليه وسلم، وممثلاً في الأمم السابقة لناس استعجلت، لناس استعجلت، فلما أجاب الله اقتراحات العقول، كما يسميها بعض أهل التفسير، لما أجاب الله اقتراحات العقول ظهر ما ظهر.
يعني الآية الأولى اللي احنا ضربناها هنا قبل كده وقلناها كتير، يعني ضربناها مثلاً في قول في بعض، يعني في بعض أقوال أهل العلم في سبب النزول أن عبد الرحمن بن عوف رضي الله عنه في ثلة من أصحابه هم اللي كانوا بيستعجلون: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾، هنبجي لها كمان شوية لأن هو ده اللي احنا نعمل إيه بقى؟ ﴿فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ﴾ [النساء: 77].
لدرجة أن هنا عمل إشكال عند بعض المفسرين، قالوا يعني الوصف ده يوصَف به مؤمن؟ بعض المفسرين استبعدوا يكون ده في أهل الإيمان، وقالوا ده للمنافقين، لأن يقال للمؤمن: ﴿إِذَا فَرِيقٌ مِنْهُمْ يَخْشَوْنَ النَّاسَ كَخَشْيَةِ اللَّهِ﴾؟ بعض أهل العلم قالوا لا هو فريق من المؤمنين، وفعلا ده حدث في وقت من الأوقات عند اشتداد القتال وكذا وكذا وكذا.
على كل حال أن يصل الأمر بالمؤمنين أنهم يوصلوا للحالة دي: ﴿يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ﴾، عارفين يعني إيه قولين لأهل العلم؟ القول عايزين نقف عليه دلوقتي: ما كنت يعني إيه كنت سبنا لغايه ما نموت ميتة طبيعية؟ الأجل القريب هنا هو الموت، لولا أخرتنا إلى أجل قريب يعني إيه؟ نعيش ونموت زي الناس.
وختام الآية فاضح، قلنا لكم في الآية دي قبل كده: ﴿وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ﴾، الجواب إيه؟ لا مش جواب الآية السؤال دلوقتي: ربنا لم كتبت علينا القتال؟ الجواب: كتبت عليكم القتال للأسباب التالية واحد اتنين تلاتة أربعة؟ هو ده جاوب السؤال يا جماعة؟ وهم سالوا كده: ربنا لم كتبت علينا القتال؟ فالجواب حاجة عجيبة جداً، قل ليه بقى؟ الجواب جاي أهو: ﴿قُلْ مَتَاعُ الدُّنْيَا قَلِيلٌ وَالْآخِرَةُ خَيْرٌ لِمَنِ اتَّقَى﴾ [النساء: 77].
قلنا ربنا عمل إيه في الآية دي؟ فضح القلوب، كأن الله عز وجل هو ما جاوبش ليه ما كتبت علينا القتال؟ ما فيش أنا كتبت عليكم القتال عشان كذا، ما فيش، جواب: ﴿قُلْ مَتَاعُ الدُّنْيَا قَلِيلٌ﴾، هو انتوا ليه أكلتوا؟ وليه جابوا؟ وانتم ليه؟ عشان الدنيا في قلوبكم، ولو لم تكن الدنيا في القلوب لما سالتم أصلاً هذا السؤال، شوف يا جماعة هنا جوابات القرآن الحقيقة يعني عجيبة، لازم نقف معاها، لازم نتدبر، الله عز وجل أعرض عن السؤال ليه ما كتبت علينا القتال؟ ما فيش لما كتبت علينا القتال، روحوا صلِحوا قلوبكم ولو صلحت تلك القلوب لما سالتم ذلك السؤال أصلاً.
فدي مثال أهو شرحناه هنا كتير لصحابة رضوان الله عليهم في يعني أو هم ثلاثة أقوال، يعني بعضهم قال دي في المنافقين، بعضهم قال في المؤمنين وظلوا مؤمنين لكن وقعوا في ما وقعوا فيه، وبعضهم قال ده كان في طائفة من المؤمنين نافقوا، ثلاثة أقوال، طيب الآية بقى اللي معانا، الآية اللي معانا نفس اللي حصل عشان يا جماعة لما ربنا سبحانه وتعالى يرفع عنك هذا الأمر شرعاً أو قدراً، ما هو خلي بالكم يا جماعة احنا قلنا إيه؟ ممكن المنع يكون شرعي، يعني إيه المنع شرعي؟ يعني دلوقتي ما فيش حاجة اسمها كذا وكذا.
ممكن المنع يبقى قدري، يعني إيه المنع قدري؟ يعني آه في أمر اسمه كذا، لكن تيجي تعمله تلاقي ما فيش، على الأرض ما فيش المساحة دي، فيبقى هنا المنع إيه؟ منع قدري، منع قدري، خلاص هنشوف احنا واجبنا إيه نحو هذا المنع القدري بقى، ماشي؟ نوع من المنع القدري ما حدث في بني إسرائيل بقى، ده كان منع قدري، اللي هو إيه؟ قال الله عز وجل: ﴿أَلَمْ تَرَ إِلَى الْمَلَإِ مِنْ بَنِي إِسْرَائِيلَ مِنْ بَعْدِ مُوسَى إِذْ قَالُوا لِنَبِيٍّ لَهُمُ ابْعَثْ لَنَا مَلِكًا نُقَاتِلْ فِي سَبِيلِ اللَّهِ﴾ [البقرة: 246].
خلي بالكم يا جماعة هنا هم كانوا يعني شراذم متفرقين ودخل عليهم واتخذت ذراريهم وبيوتهم، هم قالوا كده في الآية دي، طب كان ناقصهم إيه؟ ما قالوا: ناقصنا ملك يجمعنا بس، نبقى تحت أمره ملك ويقودنا للقاتل في سبيل الله، فقالوا كده: ﴿ابْعَثْ لَنَا مَلِكًا نُقَاتِلْ فِي سَبِيلِ اللَّهِ قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلَّا تُقَاتِلُوا﴾، حذرهم نبيهم، يبقى خلي بالكم يبقى كده القتال مشروع عندهم ولا مش مشروع؟ ناقص بس ملك يجمعنا عشان نروح نقاتل، يبقى المنع هنا كان منع إيه؟ قدري مش كده، المنع كان قدري من الله مش منع شرعي، لكن في منع قدري هنا، فنبيّهم حذرهم ماذا قال؟ ﴿قَالَ هَلْ عَسَيْتُمْ إِنْ كُتِبَ عَلَيْكُمُ الْقِتَالُ أَلَّا تُقَاتِلُوا قَالُوا وَمَا لَنَا أَلَّا نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا﴾.
ليه يعني ما نقاتلش ليه الدنيا خربانة؟ شوف يا جماعة كل التفكير فين؟ ربطوها الآية التانية: ﴿قُلْ مَتَاعُ الدُّنْيَا قَلِيلٌ﴾، هم هنا شوف في: ﴿وَمَا لَنَا أَلَّا نُقَاتِلَ فِي سَبِيلِ اللَّهِ وَقَدْ أُخْرِجْنَا مِنْ دِيَارِنَا وَأَبْنَائِنَا﴾، طب إيه اللي حصل؟ ﴿فَلَمَّا كُتِبَ عَلَيْهِمُ الْقِتَالُ تَوَلَّوْا﴾ برضه، ماشي.
قال الله عز وجل: ﴿فَلَمَّا كُتِبَ عَلَيْهِمُ الْقِتَالُ تَوَلَّوْا إِلَّا قَلِيلًا مِنْهُمْ وَاللَّهُ عَلِيمٌ بِالظَّالِمِينَ﴾ [البقرة: 246]، طيب تولوا دي الله عز وجل فصلها بعد ذلك، شوف يا جماعة أن طريقك طريقك لهذه الفريضة العظيمة مش كده، مش مش النهارده نمت بكره، لا ده في ابتلاءات تانية هجيلك، شوف بقى الامتحانات بقى: أول امتحان الملك، طيب مش انتوا قلتوا عاوزين ملك؟ وكمان انتوا بتكلموا نبي يوحى إليه من الرب سبحانه وتعالى.
خلاص الآية اللي بعديها على طول، قال الله عز وجل: ﴿وَقَالَ لَهُمْ نَبِيُّهُمْ إِنَّ اللَّهَ قَدْ بَعَثَ لَكُمْ﴾، أول صدمة أن جاب لهم ملك مش من كبرات، خلي بالكم ده أمر مين يا جماعة؟ ده أمر ربنا، فده أول ابتلاء، أول ابتلاء أن يجيلك واحد مش على هواك، عملوا إيه؟ سلموا لأمر الله عز وجل؟ ما سلموش: ﴿أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِنَ الْمَالِ﴾، أول ابتلاء، وتمر، شوف يا جماعة احنا عندنا في سورة البقرة أكتر من نص صفحة بشوية، لو كانوا سلموا ما كانش النص صفحة دي، يعني النص صفحة بتتكلم بس علشان يسلموا للملك لطالوت، وأن إيه ملكه كذا وكذا، نص صفحة عشان يسلموا أن ده الملك بتاعهم.
طب سلموا له بالملك؟ آه، يجي امتحان تاني، وهو امتحان إيه بقى؟ امتحان إيه؟ انتصارك على شهوة نفسك، أنت رايح عاوز تنتصر على العدو مش كده؟ لا في ابتلاء تانية قبليها بس، ابتلاء وأنت قاعد هنا في المسجد والديب نسر موجود على الجنب والكوبايات ومياه معدنية ما شاء الله والبتاع تخلص تلاقي واحدة اتحطت، قد يظهر لك أنه ابتلاء.
سهل أن هو في واقعي ابتلاء مش سهل، ابتلاء الاستعلاء على الشهوة، ده كله إحنا لسه ما قبلناش جيش، ما قبلناش كفار. وشوف يا جماعة أنتم خلي بالكم ساعات ابتلاءات الدنيا ما تبقاش عارف إنه ابتلاء يعني ما بيتقال لكش إيه خد تعال يلا ده ابتلاء اهو خش يلا، يعني لا ده دول اتقال لهم اتقال لهم أن الله إيه: ﴿مُبْتَلِيكُم بِنَهَرٍ﴾ [البقرة: 249]، خلي بالكم في ابتلاء، فمن شرب منه فليس مني ومن لم يطعمه فإنه مني إلا من اغترف غرفة بيدي، يعني اللي ياخد غرفة واحدة معايا، يعني المسموح به غرفة واحدة ده المسموح، أكتر من كده مش معايا.
الابتلاءات دي إحنا بنسميها إيه في الشرع؟ حد يعرف؟ تمحيص. ليه تمحيص؟ أصل الفئة اللي هتنتصر دي فئة ليها مواصفات، وده اللي عاوزين ندخل فيه النهارده، فعلشان تنتصر لابد أن يحصل ابتلاءات قبل المواجهة بها يُمحَص أو تُمحَص الفئة، علشان يروح يواجه على نظافة، يروح يواجه على نظافة. الكلام ده قُلناه لكم فين قبل كده؟ فاكرين النبي عليه الصلاة والسلام لما خرج ليقاتل اليهود وقال إيه؟ ما يجيش معايا غير اللي كان معايا، قلنا لكم ساعتها إيه؟ قلنا لكم هو إيه الأحسن لما تخرج بـ 2000، 5000، 7000 واحد ولا تخرج بمئات؟ في قوانين الدنيا اخرج يا عم هات ناس. لا، هو أنا عاوز دول بس، ليه؟ أصل التانيين دول التانيين دول فيهم مشاكل.
إيه المشاكل؟ أول مشكلة هيمنعوا تنزل النصر، هيمنعوا تنزل النصر، يبقى أنت بعد ما كنت خالف بفئة مؤمنة ثُلة مؤمنة ومعاها ملائكة ومعاها تأييد الرب سبحانه وتعالى ومعاها النصر، قعدت تزود اركب، اركب، اركب، اركب وفرحان بالعدد، لكن تخلف عنك كل ما ذكرت بقى ملائكة ونصر الله، أصل هو نصر ربنا مش لأي حد، مش لأي حد. فجه ابتلاء يُمحِّص الصف: ﴿إِنَّ اللَّهَ مُبْتَلِيكُم بِنَهَرٍ فَمَنْ شَرِبَ مِنْهُ فَلَيْسَ مِنِّي وَمَنْ لَمْ يَطْعَمْهُ فَإِنَّهُ مِنِّي إِلَّا مَنِ اغْتَرَفَ غُرْفَةً بِيَدِهِ﴾ [البقرة: 249]. إلا حصل، شربوا إلا قليلاً، كله شرب إلا قليل. في بعض الروايات القليل دول كانوا كام؟ 313، اللي هو تقريبا عدد مين؟ عدد المسلمين في غزوة بدر.
هنا مُحِّص الصف بقى خلاص عدوا، والناس الأولانية دي اللي شربت ابتدوا يرجفوا، لا طاقة لنا اليوم بجالوت وجنوده، قيل إن اللي قال ده اللي شربه، ودي حاجة تانية أنا نسيت أقولها لكم، قلت لكم إيه؟ هيمنعوا النصر الناس الكتير دي، بيعملوا حاجة تانية بقى خطيرة جداً وهي الإرجاف، الإرجاف، يقعدوا يثبتوا الناس: ﴿لَوْ خَرَجُوا فِيكُم مَّا زَادُوكُمْ إِلَّا خَبَالًا وَلَأَوْضَعُوا خِلَالَكُمْ يَبْغُونَكُمُ الْفِتْنَةَ﴾ [التوبة: 47]، المشكلة أن فيكم إيه؟ سماعون لهم. وده حصل في فئتين كاد أن أن يفشل يَجبُن في غزوة أحد، مش كدة؟ لما عبد الله بن أبي بن سلول انشق بتلت الجيش وابتدا يقول إيه: لو نعلم قتالاً لاتبعناكم، في فرقتين من المؤمنين من المؤمنين كانوا هيُنشقوا، أنت فاهمين يعني يعني إيه يا جماعة فئة تنشق من من الصف وفيكم سماعون لهم؟!
يبقى في طريقك، يبقى في طريقنا، في طريقنا عشان بس نفهم يا جماعة سنن الله عز وجل، في طريقنا في هذا الأمر العظيم، الموضوع الطريق مش مفروش بالورود، لا، في ابتلاءات بتحصل لك. خلي بالك بقى ده اللي أنا عاوز أرجع أقوله بقى، أول حاجة تبقى واعي ليها وده أول حاجة عليك أنك تبقى عارفها، دور ليك في هذه المعركة أنك تبقى واعي للابتلاءات اللي بتحصلك أنت كل يوم، وتعرف أن الابتلاءات دي إما أنها بتقربك لأنك تكون من هذه الثُلة التي تستحق تنزل الرحمات وتنزل النصر من الله عز وجل، أو بتبعدك حتى إذا نودي يا خيل الله اركبي كنت من المتخلفين، أنت أوعى تزكي نفسك، أوعى يا جماعة مين منا يقدر يزكي نفسه بعد عبد الرحمن بن عوف في ثُلة من أصحابه: ﴿إِذْ فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ لَوْلَا أَخَّرْتَنَا إِلَى أَجَلٍ قَرِيبٍ﴾ [النساء: 77]؟ مين هنا يزكي نفسه بعد دول؟!
فأول واجب عليك أنك تكون واعي للابتلاءات اللي بتحصلك، والابتلاءات اللي بتحصلك ماشي الابتلاءات بكل مستوياتها بقى؛ فلوس حرام، يعني شغلانة تانية الدخل فيها مش عارف عامل ازاي بس فلوسها حرام فلوسها فيها شبهة، ابتلاء، هتعدي على طول افتكر النهر على طول، خلي بالك يا جماعة ده الشرب من النهر الأصلي فيه أنه إيه؟ حلال مباح، لكنه بلاء، هنا ابتلاء ماشي على طول افتكر النهر. زميلتك اللي كان في بينكم مش عارف إيه لقيتها باعتة لك إضافة على الفيسبوك، ابتلاء، هتتعامل ازاي مع الابتلاء؟ خطيبك اللي مش عارف إيه وحبيته ومش عارف إيه والموضوع ماميش بعد ما اتجوزتي لقيتيه، ابتلاء، هتتعامل ازاي مع الابتلاء؟ أبوك عصبي ومش هتعامل معاه ازاي، ابتلاء، نهر.
كل أمر قَدَر هيصيبك بقى في نفسك، شوفه من من هذه الآية من العدسة دي، عدسة أنه ابتلاء في طريق أن أكون من الفئة المؤمنة التي يتنزل عليها النصر. تقول لي بس أنت يعني يا شيخ يعني إيه بصراحة إيه مكبر المواضيع، يعني يعني إيه ذنب يعني؟ طب خد المفاجأة دي اللي قلناها لكم هنا بردو كذا مرة، قال الله عز وجل: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّى هَٰذَا ۖ قُلْ هُوَ من عِندِ أَنْفُسِكُمْ﴾ [آل عمران: 165]، غير بقى قلتم أن هذا قل من عند أنفسكم دي إحنا قلناها لكم قبل كده، بس اللي أنا عاوزها أن الذين تولوا منكم يوم التقى الجمعان، أيوه، لفظ التولي بقى: ﴿إِنَّ الَّذِينَ تَوَلَّوْا مِنْكُمْ يَوْمَ الْتَقَى الْجَمْعَانِ إِنَّمَا اسْتَزَلَّهُمُ الشَّيْطَانُ بِبَعْضِ مَا كَسَبُوا﴾ [آل عمران: 155]، ببعض ما كسبوا.
امتى؟ قبل اللقاء، أنت عمال تعمل في ذنوب، ما يؤمنك أن الذنوب دي تكون سبب وقت اللقاء أنك تتولى يوم الزحف؟ إيه اللي يا جماعة حد يعني اللي عمال ده قلبه محروق على فكرة هذا علامة صحة إيمان، حرقة القلب، من لم يغزو ولم يُحدث نفسه بالغزو مات على شعبة من النفاق، عشان بس بردو يعني إيه نأزن المواضيع، لكن بلاش تزكية النفس دي قوي، بلاش قوي تبقى واثق في نفسك كده.
ده الموضوع اللي أنا بنتكلم فيه بخصوصه بقى؛ في حديث أصلاً مش كدة؟ قال صلى الله عليه وسلم: «لا تتمنوا لقاء العدو وإذا لقيتموه فاصبروا». طب ليه يا رسول الله؟ ليه ما نتمنمش لقاء العدو؟ لأنها فتنة، وزي ما قلنا لكم الجهاد ذروة سنام هذا الدين، لكن التولي يوم الزحف من أكبر الكبائر، من أكبر الكبائر. أنت بتخوفنا، أنت بترجف؟ لا بخوف ولا بجف، بس هو ده الشرع كاملاً، أن أجي أكلمك في حتة وأسيب حتة، أنا كدة هذا ليس من الأمانة في الخطاب.
طيب، يبقى: ﴿إِنَّ الَّذِينَ تَوَلَّوْا مِنْكُمْ يَوْمَ الْتَقَى الْجَمْعَانِ إِنَّمَا اسْتَزَلَّهُمُ الشَّيْطَانُ بِبَعْضِ مَا كَسَبُوا﴾ [آل عمران: 155]. الآية التانية بقى اللي هي إيه؟ ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّى هَٰذَا ۖ قُلْ هُوَ مِنْ عِندِ أَنْفُسِكُمْ﴾ [آل عمران: 165] ده على الهزيمة اللي حصلت في غزوة أحد لما اتقتل 70 صحابي: ﴿قُلْ هُوَ مِنْ عِندِ أَنْفُسِكُمْ﴾. وقلنا من عند أنفسكم دي بقى اللي هو يا دوبك كم واحد خالفه؟ كام؟ 50، دول الرماة كلهم، الرماة كلهم 50، كم واحد من الـ 50 خالف؟ 40 واللي ثبت 10، ولا العكس؟ أنا مش فاكر يعني 40 خالف وثبت 10 أو 10 خالف، الأقرب لذهني 40 خالف، لو حد يبحث ويقول لنا.
المهم عدد قليل جداً من أفراد الجيش يعني مش خلفوا كم أمر؟ 10، 20، 30 أمر ولا أمر واحد؟ أمر واحد! إيه نتيجة مخالفة عشرات على أقصى تقدير يعني لأمر واحد من أوامر النبي عليه الصلاة والسلام أن جيش قائده النبي محمد صلى الله عليه وسلم ومعاه أبو بكر وعمر وعثمان وعلي وطلحة والزبير وعد بقى الأسماء الفخمة دي، يُهزَم؟!
هنا يبقى أول مسألة أنا أعمل إيه؟ أول مسألة أنت تتوب لربنا سبحانه وتعالى وترى أن كل ذنب تفعله يُبعد الأمة في مجموعها عن النصر، ويُبعدك أنت في خاصة نفسك أن تكون من تلك الثُلة، من تلك الفئة التي وعدها الله النصر. يبقى دي أول حاجة عليك، أول حاجة تعملها؛ يبقى التوبة متجددة ومستمره وكل يوم وكل لحظة وكل ساعة. الذنب اللي أنت واقع فيه، الذنب اللي أنت واقعة فيه النهاردة هتبطله النهاردة دلوقتي وأنت قاعد، خلاص نويت أنا هطلع الذنب ده خلاص اختفى من حياتي، وقعت تاني هتقوم تاني وتوب تاني أياً كان الذنب بقى، خلاص عقوق والدين من أكبر الكبائر وأنا بقول لكم اهو، أنا بقول اهو الشباب حتى للاسف اللي ابتدى يتدين وكده حدث ولا حرج، عقوق الوالدين ده ده بقى الأصل بقى الأصل!
ويجي لنا مشاكل، وساعات يجي لنا مشاكل من الشباب وأقرأ في يعني أنا أنا يعني أنا عارف أقرأ ما بين السطور وإزاي الولد ده بيتعامل مع أبيه وأمه، ولما نخش في التفاصيل ونصلح الحتة دي تلاقي الدنيا كلها اتظبطت والمشكله فيه هو، مش عارف يتعامل، نصر إيه اللي بتتكلم عليه يا ابني؟ روح شوف أبوك وأمك، أنت مضيع يعني أمر من اعظم أوامر دينك أصلاً، وخلل في ترتيب الأولويات؛ يعني أبوه بيقول له تعال عاوزين نعمل كذا، لا أصل أنا عندي قاعد بقرا الورد بتاعي! أنت يا ابني لا فاهم دين ولا ورد بتاعك إيه لما تسيب الورد بتاعك وتقوم لأبوك؟ ورد إيه اللي بتقراه؟ مش استهانة، لكن ده في ترتيب الاولويات يأتي قبل أبِيك، أنت مش فاهم حاجة، مش فاهم دين، مش فاهم! سيب اللي في إيدك وقوم لأبوك، سيب اللي في إيدك وقوم لأمك.
هذا فضلاً بقى عن إيه؟ دنيا بقى مذاكرة، اصلي أنا بذاكر، بتذاكر؟ اقفل الكتاب ده وقوم لأبوك، واقفي الكتاب اللي في إيدك وقومي لأمك، ما فيش، ما فيش، ما فيش بربع جنيه لا علم ولا ولا أي حاجه. وبعدين ينزل بقى الأخ فلان وداخل بقى يأذن ويقيم ويصلي بالناس وهو عامل كبيرة في البيت قبل ما ينزل، ويا ريته بيتوب، لا، ده شايف أن هم اللي غلطانين كمان! إحنا إيه اللي جابنا هنا؟ أصل مبقوق، الحتة دي يعني كل ما تيجي يعني مشاكل كبيرة جداً حادثة في البيوت الحقيقة.
قلنا لكم مين من السلف؟ حد يجيب كده ويقول لنا مين هو ناسي اللي هو بات إيه؟ بيقول: بات أخي يصلي وباتت أغْمِز قدم أمي أم رجليها وجعاها، فقعد يدلك رجل أمه طول الليل، ما صلاش ولا ركعة، وما أحب أن تكون ليلتي بليلته، يعني لو أعادت الليلة دي 10 مرات 20 مرة، واتقال أخويا، أخويا يقول لي طب ريح أنت أنا أغْمِز قدم أمي وقوم صلي، أقوله لا روح صلي، أنا هنا أنا بأغمز قدم أمي روح أنت صلي، ما أحب أن تكون مين؟ حد حد بحث مين؟
تقريبا بصيت ولا أنت حافظ؟ ماشي، أصل الشيخ معاذ بردو حافظ من حفاظ الأمة محمد بن المنكدر ماشي على رواية أنا مش فاكر، معاذ اللي بيقول بقى اضربوه بعد الدرس لو طلع حد تاني ماشي أغمز له رجله بقى بعد الدرس.
كنا بنقول إيه بقى؟ آه، روح شوف بقى الذنوب اللي بتعمل البلاوي، اللي بتعمل. أنا ليه بس نبهت على دي؟ يمكن سبت فيها عشان أنبه على جنس من الذنوب مش شايفينها. أنتم فاهمين عاوز أقول إيه يا جماعة؟ يعني أنت ممكن تكون حضرتك عمال تعمل في ذنوب وفي كبائر وأنت مش دريان أنك بتعمل كبائر، يعني التشويحة اللي شوتها لأبوك قبل ما تنزل وتيجي المسجد عشان تحضر درس العصر ده، أنت مش شايفها، أنت مش شايف أنك عملت حاجة، أو الحزن اللي أَدخلتيه على قلب والدتك قبل ما تجيبي المسجد عشان تصلي وتحضري الدرس، أنت مش شايفاه، وعلى هذا فقس بقى شوف كم الذنوب اللي بنعملها في يومنا ومش شايفينها أصلاً!
وبس نجي بالليل إيه؟ هو فين النصر؟ هو النصر ما جاش ليه؟ هو يجي لمين النصر؟ يجي لمين لينا يعني؟ إحنا إحنا كدة نستحق نصر؟ يجي لمين؟ ما أصل يا جماعة بردو هنا بردو عندنا القاعدة بقى الشرعية قالها النبي محمد صلى الله عليه وسلم ماشي قال: «نعم إذا كثر الخبث»، قاعدة، ده مش كلام أمجد بقا، أنهلك وفينا الصالحون؟ الصالحين دول مش إحنا ها، عشان الحمد لله إحنا الصالحون بقا، بس الخبث كتير، لا يا حبيبي أوعى ما أنت بتفكر كدة أنت ضايع، الصالحين دول ناس غيرنا دول الأولياء بقا والناس اللي قاعدين كده في حالهم، مش إحنا خالص.
أنهلك وفينا الصالحون؟ قال: «نعم إذا كثر الخبث». أي إنسان ينظر للعالم الإسلامي الآن بإنصاف لا يملك إلا أنه يقول كثر الخبث، مش كدة ولا إيه؟ كثر الخبث ماشي، وأنا لما أقول ده يا جماعة تاني أوعى يجي في دماغك حفلة أنطونيادس اللي كانت وماتش إمبارح والمج... لا لا لا بص لنفسك تاني، ما تنشغل غير بنفسك، الدرس ده ليك، أول ما تسمع كلمة خبث فيجي في دماغك ال... لا، هو أنت وأنا أمجد إحنا الخبث ده اللي هيخلينا نصلاح. طول بقا ما أنت عمال تقول آه الحفلات وأه الماتشات وقال مغنيات وقال ممثلات وقال أنت مش هتتعدل أو أنت المعصوم يعني خلاص، لو أنت بقا مُغسَّل وضامن جنة أنت حر: «نعم إذا كثر الخبث».
يبقى العلاج أننا نُقلِّص ذلك الخبث، صح ولا إلا؟ ما هو أنهلك وفينا الصالحون؟ نعم إذا كثر الخبث، يبقى العلاج أننا نُقلِّص ذلك الخبث. نُقلِّص بايه؟ بحاجتين، أول حاجة.
أن نكون غير جزء من هذا الخبث، وأن نعمل على القضاء على الخبث الخارج؛ يعني القضاء على الخبث ليس القضاء على الخبيثين، بل القضاء على الخبث يعني أن ندعو إلى الله، فالذي كان يفعل المعاصي، والذي كان يجهل المعاصي، والذي كان يرى هذه الأمور عادية، ليعرف أنها ليست عادية فيتوب إلى الله، فتدريجيًا يقل هذا الخبث.
قد يسأل سائل: كم سيستغرق هذا؟ أو قائل: ما علاقتي أنا؟ هو هذا الطريق، تعالوا نتخيل هذا الطريق. هل جاء هذا الطريق في القرآن؟ نعم، قال الله عز وجل: ﴿وَلَيَنصُرَنَّ اللَّهُ مَن يَنصُرُهُ ۗ إِنَّ اللَّهَ لَقَوِيٌّ عَزِيزٌ﴾ [الحج: 40].
إذا ركزنا في وصفهم يا جماعة، سنجد حاجتين؛ الخروج من دائرة الخبث، والعمل على تقليل الخبث الخارجي، وهذه هي المواصفات. لنقرأ الآيات بهذه النظرة: ﴿وَلَيَنصُرَنَّ اللَّهُ مَن يَنصُرُهُ ۗ إِنَّ اللَّهَ لَقَوِيٌّ عَزِيزٌ * الَّذِينَ إِن مَّكَّنَّاهُمْ فِي الْأَرْضِ أَقَامُوا الصَّلَاةَ وَآتَوُا الزَّكَاةَ﴾ [الحج: 40-41]. هم أنفسهم أصبحوا ليسوا من أهل الخبث، ثم لم يجلسوا جانبًا ويتركوا أهل الخبث، بل أمروا بالمعروف ونهوا عن المنكر.
عندما تفعل ذلك، ماذا سيحدث بعد ذلك؟ عاقبة الأمور ليست لك، بل هي لله. إذا كثر الخبث، فماذا نفعل؟ أول حاجة ألا تكون جزءًا من الخبث. ليس بمجرد أن يُغلق عليك الباب تذهب لتفتح موقعًا إباحيًا ثم تقول لي "النصر تأخر"، وليس بمجرد أن تدخلي غرفتك تفتحين "تشات" مع صاحبك ثم تقولي لي "النصر تأخر"، وليس بمجرد أن تقدر أن تدوس على خلق الله وتأتي لتقول لي "النصر تأخر".
المشكلة أنك قد تكون جزءًا من المشكلة، ترتدي النقاب الذي لا يبين عينيك ولكنك جزء من المشكلة. أنت في هذا تُحمد وفي هذا تُذم، وخلاصة الأمر أنه ليس هناك سمت معين يعطي صاحبه صكًا بأنه قد أدى ما عليه؛ هذا لا يوجد في ديننا، بل هذا يزيد من مسؤولياتك.
﴿وَلَيَنصُرَنَّ اللَّهُ مَن يَنصُرُهُ ۗ إِنَّ اللَّهَ لَقَوِيٌّ عَزِيزٌ * الَّذِينَ إِن مَّكَّنَّاهُمْ فِي الْأَرْضِ أَقَامُوا الصَّلَاةَ﴾. أول شيء، الصلاة حاضرة بقوة في مواطن النزاع، لتعرفوا ما الذي ينقصنا؛ أول شيء هو إقامة الصلاة. وإقامة الصلاة ليست مجرد أداء الصلاة أو المفروضة فقط، فما هو وضعك من الصلاة؟ وما هي تفاصيل صلاتك؟
كان بعض السلف يقول: "أعلم سبعين خصلة من خصال الخير لا أجد في نفسي واحدة منها"، فكنا نتحدى الشباب ونقول لهم: "عدّ لي سبعين خصلة من خصال الخير"، فلا يستطيع؛ لأنه جاهل بخصال الخير.
عندما أقول لك "إقامة الصلاة"، فمن منكم حين يقول "قامت الصلاة" يتبادر إلى ذهنه التبكير، والذهاب للصف الأول، وتكبيرة الإحرام، والخشوع، والتدبر؟ كل هذا داخل في مسمى إقامة الصلاة، وكذلك الأذكار بعد الصلاة وأنت في مصلاك؛ فكل هذه الأمور فيها ثواب خاص ونصوص.
إقامة الصلاة ليست مجرد أنك صليت العصر اليوم، نحن نتحايل على الشباب ونقول: "قم صلِّ العصر فقط"، لكن هذا ليس إقامة الصلاة، لا يزال هناك الكثير لنقيم الصلاة. من السلف من ظل خمسين سنة لم يُرَ قائمًا في الصف الأول، ولم يُرَ مصلّيًا في المسجد.
يُحكى أن أحد المقربين للشيخ أسام عبد العظيم رحمه الله قال إن الشيخ ظل أربعين سنة لم تفته تكبيرة الإحرام. أنا لا أتكلم عن السلف، بل أتكلم عن رجل كان يعيش بيننا ومات قريبًا، وكان دكتورًا في الجامعة، ولم يفتْه تكبيرة الإحرام طوال أربعين سنة.
﴿الَّذِينَ إِن مَّكَّنَّاهُمْ فِي الْأَرْضِ أَقَامُوا الصَّلَاةَ﴾، تقول: يا شيخ، نحن لم نُمكَّن بعد! أقول لك: أنت لا تفهم معنى التمكين. أنت مُمكَّن؛ لو قررت اليوم أن تصلي كل صلواتك في المسجد، فمن سيمنعك؟ لو قلت سأبكر للمسجد ولن يؤذن الأذان إلا وأنا في بيت الله، فمن سيمنعك؟ لو قلت سأقسم ليلي لكي لا تفوتني ليلة دون قيام ليل، فمن سيمنعك؟ بلاش "شماعات" ونرجع للعقل الذي نحذر منه وهو أن كل شيء خارج عن إرادتنا، لا، أنت تستطيع فعل ذلك.
إقامة الصلاة، فما هو وضعك منها؟ قلنا إن إقامة الصلاة حاضرة بقوة في مواطن النزاع. انظروا هنا: ﴿الَّذِينَ إِن مَّكَّنَّاهُمْ﴾، نحن نتحدث عن نصر وتمكين، ﴿أَقَامُوا الصَّلَاةَ﴾. انظر مع موسى.
نرجع لبني. بص، احنا أخذنا مثال في الأول للصحابة ومثال لبني إسرائيل. طب ارجع بقى لموسى عليه السلام: ﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءَا لِقَوْمِكُمَا بِمِصْرَ بُيُوتًا﴾ [يونس: 87].
طيب، ده إمتى؟ في عز الصراع مع رأس الكفر في هذا الزمان، فرعون. طب يا رب نعمل إيه بقى لما نتبوأ البيوت؟ ﴿وَاجْعَلُوا بُيُوتَكُمْ قِبْلَةً﴾ [يونس: 87] قيل مساجد، يعني اجعلوا بيوتكم قبلة، يعني مساجد ﴿وَأَقِيمُوا الصَّلَاةَ﴾ [يونس: 87]. إيه ده؟ يعني ما نروحش مثلا نشترك في جيم ونعمل ونعمل بالسيوف؟ ده كله مطلوب على فكرة، ومطلوب للجهاد ومطلوب للنصر. لكن هنا إلحاح القرآن على إقامة الصلاة قبل اللقاء. ﴿وَأَوْحَيْنَا إِلَى مُوسَى وَأَخِيهِ أَنْ تَبَوَّءَا لِقَوْمِكُمَا بِمِصْرَ بُيُوتًا وَاجْعَلُوا بُيُوتَكُمْ قِبْلَةً وَأَقِيمُوا الصَّلَاةَ﴾ [يونس: 87]. ختام الآية إيه؟ ﴿وَبَشِّرِ الْمُؤْمِنِينَ﴾ [يونس: 87]. لما تعملوا ده، لما تجعلوا بيوتكم قبلة وتقيموا الصلاة، يا بشراكم بقى، هيأتي النصر، اه هيأتي النصر لمين؟ لدول.
أقيموا تاني، هعيد الجمله: إقامة الصلاة حاضرة بقوة في مواطن الصراع. الآية اللي ابتدينا بيها: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ﴾ [النساء: 77] وسكرول على الفيسبوك، واكتب لك الله يا غزة، ونزل الصور وأناشيد مش عارف إيه. اتقال كده: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ﴾ [النساء: 77]. طب ما هو ده إحنا اللي بنعمله دلوقت، مش كده؟ إحنا إيه؟ كافّين إيدينا وببنعمل إيه؟ بنعمل إيه؟ الله عز وجل ما قالش قيل لهم كفوا أيديكم وسكت سبحانه وتعالى. لا، ما هو يا جماعة الفارغ ده لو سيبته هيفضل فارغ. فانت عمال تقول له ما تعملش، ما تعملش، طب أعمل إيه؟ النص القراني فيه تعمل إيه: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ﴾ يبقى هنا في مواطن نزاع وصراع، ونعمل إيه يا رب؟ ﴿وَأَقِيمُوا الصَّلَاةَ﴾ [النساء: 77]. ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77].
اهو، طيب هو أتا، إحنا قلنا يا جماعة الآية دي نزلت بتكلم الناس في الحقبة المكية، مش كده؟ لكن هنا في إشكال: أقيموا الصلاة وآتوا الزكاة. الزكاة متى فرضت؟ في السنة الثانية من الهجرة، بعد الهجرة. فلذلك نحى بعض أهل العلم هنا منحى آخر، اتقال إن الزكاة هنا المعنى أن ابذلوا، ابذلوا في سبيل الله عز وجل، لأن هو ده معنى الاستعلاء على الشهوة. ما هو الشهوة مش لازم شهوة امرأة أو شهوة نساء، الشهوة ممكن حرصك الشديد على المال، طهر نفسك من هذه الشهوات. الصلاة يا جماعة، الصلاة مش بس إن إنت يعني مش بس بتأدي الفرض، الصلاة فيها معاني كتير.
قلنا لكم قبل كده في درس من المقالات المنسوبة لعز الدين القسام رحمه الله وبرده هي مناسبة الآن لأنه الصراع كله في الحته دي ومعاصر، أن من المقالات المنسوبة ليه إنه كان بيقول والله أعلم بصحة النسبة، لكن المعنى صحيح اللي هنقوله يعني، بيقول إن أنا فضلت عشرين سنة بدرس عقيدة، فضلت عشرين سنة بدرس للناس عقيدة، وأول ما كتب علينا الجهاد لقيت نفسي خايف، فاعتزلت الناس وأقمت الليل، قلت بس بقى إيه؟ لا، اعتزل الناس، اقف كده بين إيد ربنا وخد لك بقى شوية قيام ليل، قال: فزال الخوف من قلبي. إحنا هنا إحنا قدام معاني قلبية بتُحصل بالصلاة، ولذلك كان صلى الله عليه وسلم إذا حزبه أمر فزع إلى الصلاة.
في يا جماعة هو هي مش بس يعني مش مجرد عبادة، يعني زي زي الصوم، زي، لا، هو في حاجات بتُحصل، لأن الصلاة صلة بينك وبين الله، تخيل إنت عمال تقوي تلك الصلة.
فمهم، يبقى أول، تاني حاجة نعملها إيه؟ إقامة الصلاة. وقلنا إقامة الصلاة مش أداء صلاة، وقلنا إقامة صلاة مش صلاة فرض. يبقى تاني حاجة هنخرج بيها من المسجد النهارْده: أحوالك مع الصلاة إيه؟ إذا قلنا صلاة الفرض، فإنت بتيجي المسجد كام مرة في اليوم؟ وبيلحق الصف الأول كام مرة في اليوم؟ وأحوالك إيه جوه الصلاة؟ جوه الصلاة. وكنا دايما نعمل تحدي للشباب نقول له إيه: قولي كده النهاردة مثلا، اللي صَلّى الفجر في المسجد بس النهاردة سهلة، عشان إيه؟ أقول لك السجدة، والإنسان ده لو بيصلي، إنما أي حاجة يعني، تعال كده بعد المغرب مثلا، مش هقول الإام صَلّى بكم في المغرب بأيه، ما يفتكرش، دي مصيبة! بعد المغرب بربع ساعة لتلت ساعة، إنت مش فاكر الإمام صَلَّى بأيه؟ ما يفتكرش، وجاي تقول هو فين النصر؟ طب هو مين يستحق النصر؟
يبقى تضبط صلاه الفرض بسوابق ولواحقها، ووضوءك شكله إيه؟ يا جماعة يا جماعة، ينفع أجي أقول لك أركان الصلاة إيه، ما تعرفش تجاوب؟ تقول لي أنا لازم أعرف؟ أجاوب أقول لك آه لازم تعرف، لأن السؤال ده ينبني عليه عمل، إن في حاجات معينة في الصلاة لو سبتها ما يجبرهاش سجود سهو، يعني لو حاجة سبتها وما عملتهاش وسجدت سهو، نقول لك صلاتك باطلة، لأن ده ركن لا يُجبر بسجود سهو أصلاً، تقول لي إيه ده؟ هو في حاجة اسمها أركان؟ أقول لك تخيل! فإنت مش عارف الأركان، طب الوضوء؟ أركان الوضوء إيه؟ ما إنت لو فوتَّ ركن، الوضوء باطل، فالصلاة باطلة، أنتوا شايفين يا جماعة إحنا في ناس منا فين؟ أنتوا شايفين ليه النصر بيتخل? إنا بكلم إيه، أنا بكلم اللي في المسجد، ما بكلمش حد، ما بكلمش اللي ما بيصليش، وطبعا دول جزء كبير من المشكلة، عشان برض يعني أنت يا شيخ، إحنا بس، لا، بس هو الخطاب لك، ما هو من السَفَه إني أكلم غائب، أقعد أكلم الناس اللي بره، يبقى أنا بعمل اللي أنا بقول لكم ما تعملوش.
إحنا نعمل إيه؟ أقم الصلاة، واديكم شفتوا إقامة الصلاة ازاي حاضرة في مواطن النزاع والصراع. ﴿الَّذِينَ إِنْ مَكَّنَّاهُمْ فِي الْأَرْضِ أَقَامُوا الصَّلَاةَ﴾ [الحج: 41]. ﴿كُفُّوا أَيْدِيَكُمْ وَأَقِيمُوا الصَّلَاةَ﴾ [النساء: 77]. ﴿وَاجْعَلُوا بُيُوتَكُمْ قِبْلَةً وَأَقِيمُوا الصَّلَاةَ﴾ [يونس: 87].
إنت فين من الصلاة؟ السنن الرواتب قبلية وبعدية فين منها؟ أذكار الصلاة فين منها؟ خلصت، خش بقى على النوافل، فينك من الضحى؟ فينك من قيام الليل والاستمرارية على ذلك؟ مش بس قيام، الاستمرارية عليه، علشان يعني تؤتي ثمار هذا الأمر. قلنا لكم الدرس اللي فات، صلاح الدين الأيوبي اللي بيحصل في فلسطين يذكرنا على طول بصلاح الدين رحمه الله، قلت لكم الدرس اللي فات إن مما أُثر عنه إنه كان يمر على الخيام بالليل بتاعت الجنود، فيلاقي جندي قام بيقيم الليل. بكرة الصبح عندنا جهاد وقتال وبتاع، ممكن القائد يقول لك إيه: يا عم نام، إحنا ورانا بكره، إحنا محتاجينك صاحي بكره وفوق، كده. فكان يمر بالليل على الخيام فيلاقي جندي بيقيم الليل، يقول: من هنا يأتي النصر. وبعدين خيمة تانية الجندي نايم، يقول: أخشى أن نؤتى من قبلك، اهو، أنا خايف الجيش كل ده ينسحق بكرة عشانك إنت يا اللي نايم. لو صلاح الدين بقى معانا دلوقتي ووصلنا إحنا كده، هيقول إيه؟ هيقول إيه؟ أخشى أن نؤتى من قبلك.
قامت الصلاة. إيه؟ فات نص ساعة ولا لسه؟ لسه؟ زهقت؟ طب الكاميرا برضه باظت، دول بقى ربنا، يعني إيه، ربنا يهديكم، حد مسلطه عليا، يجوا يبوظوا الدرس ويمشوا، مشكلة، بحبهم، مش عارف أغضب وأتنرفز.
طيب، يبقى: ﴿وَلَيَنْصُرَنَّ اللَّهُ مَنْ يَنْصُرُهُ إِنَّ اللَّهَ لَقَوِيٌّ عَزِيزٌ * الَّذِينَ إِنْ مَكَّنَّاهُمْ فِي الْأَرْضِ أَقَامُوا الصَّلَاةَ وَآتُوا الزَّكَاةَ﴾ [الحج: 40-41]. يبقى استعلوا على شهوتي: حب المال، حب المال. يبقى عرفت إن في سبيل للانفاق في سبيل الله، سواء تقدر توصل لإخوانك اللي هناك، ما أعرفش بقى حد بيوصل الحاجات دي مثلاً، بس يبقى حاجة مضمونة، لأن النصابين برضه كتير، مش كده؟ الجمعية الشرعية باين بتلم ولا ما بتلمش؟ مش عارف، كانوا بيلموا جمعية شرعية، أظن جمعية مقننة وما فيهاش إشكالات، أظن يعني، ما أعرفش، أو حتى في داخل، يعني المهم يا جماعة إن إحنا نستعلي على حب المال.
﴿الَّذِينَ إِنْ مَكَّنَّاهُمْ فِي الْأَرْضِ أَقَامُوا الصَّلَاةَ وَآتُوا الزَّكَاةَ﴾ [الحج: 41]. وبس؟ لا، حضرتك عليك دور تجاه الناس اللي حواليك: أبوك وأمك، أخوك وأختك، جيرانك، عشيرتك الأقربين، ﴿وَأَمَرُوا بِالْمَعْرُوفِ وَنَهَوْا عَنِ الْمُنْكَرِ﴾ [الحج: 41].
إحنا ده بنعمل إيه؟ بنقلل الخَبَث. يبقى حضرتك النهاردة كنت في شلّة أُنس، جيت المسجد سمعت الكلمتين دول أثروا فيك، قلت أنا حياتي هتتغير خلاص، يبقى من النهارده خلاص ما فيش شلة أُنس، وبعدين اللي عاوز ييجي معايا أهلاً وسهلاً، إنما أنا خلاص أنا توبت لربنا، خرجت من المستنقع اللي كنا فيه، مش راجع تاني، اللي عاوز ييجي معايا أهلاً وسهلاً. ﴿وَأَمَرُوا بِالْمَعْرُوفِ وَنَهَوْا عَنِ الْمُنْكَرِ﴾ [الحج: 41]. فبعد الشلة ما كانت عشرة بقت تسعة، ثمانية، سبعة. نعم، إذا كثر الخَبَث. الخَبَث عمال يقل اهو.
مفهوم يا شباب؟ فدي حاجات نص القرآن عليها، عليك هتعملها: توبة إلى الله، رجوع إلى الله، إنك تهجر السيئات والذنوب التي أنت عليها، إقامة الصلاة بالمفهوم اللي قلناه، الاستعلاء على شهوة حب المال، أمر بمعروف ونهي عن منكر.
أقول قولي هذا، وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك. والسلام عليكم ورحمة الله وبركاته.
الشيخ أمجد سمير