دخولتسجيل الدخول

سوريا فرحٌ و قلق

أمجد سميرالشيخ أمجد سمير
  • مدة الدرس:
  • قراءة

الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صل على سيدنا محمد النبي، وأزواجه أمهات المؤمنين، وذرياته وأهل بيته، كما صليت على آل إبراهيم، إنك حميد مجيد. أما بعد؛ النهار ده درس استثنائي؛ علشان بس يعني نحاول نتكلم شوية عن ما يحدث في سوريا. الحقيقة أول معنى عاوزين نتكلم عنه هو ما يصيب المسلمين من مشاعر في مثل هذه المواقف، وليه عاوز أتكلم عن الموضوع ده؟ لأنه كالعاده -ما نتعلمش- حدث شقاق ونزاع على صفحات التواصل بخصوص هذه المسألة؛ مسألة المشاعر. فخلونا نحرر المسألة دي لأنها مسألة مهمة جداً.

بعض الناس فرحت وأظهرت الفرح، وبعض الناس خافت وقلقت من اللي جاي وأظهرت الخوف والقلق، وابتدى دول يشتموا في دول، ودول يشتموا في دول؛ صح ولا لا؟ حاجة عجيبة جداً الحقيقة يعني. فتعالوا كده واحدة واحدة يعني إيه نفكك المسائل دي علشان نفهم الوضع؛ يعني هل نفرح ولا نخاف ونقلق ولا نشتم؟ نعمل إيه في قدر لا شك أنه يفرح به؟ يعني لابد أن كل المسلمين يفرحوا به، اللي هو القدر الحاصل من سقوط رجل من الظلمة الفجرة، وكمان اعتقاده اعتقاد يخرج من دين الإسلام. أنتوا عارفين بشار نصيري كده، النصيرية دول مين؟ عارفين اعتقاد النصيرية دول إيه؟

الأول عاوزين نتكلم شوية عن الديموغرافيا سوريا؛ علشان مهم. سوريا تقريبا 93% منهم عرب، وأقلية كده جنسيات أخرى، وقرب 80% سنة في سوريا، قرب 80% سنة، ماشي؟ والـ20% متقسمة برضه على شويه حاجات تانية، منهم نصارى؛ يعني حوالي قرب الـ5% من الـ20% نصارى، فعندك حوالي 15% بقى متقسمة على طوائف تانية، منها النصيرية. خلاص، النصيرية دي نسبة إلى محمد بن النصير أبي شعيب. النصيرية من الباطنية، هم في الظاهر من غلاة الرافضة، مش بس رافضة، من غلاة الرافضة الشيعة، لكن باطنهم الكفر، كما قال شيخ الإسلام ابن تيمية، وذكر أن كفرهم أشد من كفر اليهود والنصارى، ده كلام شيخ الإسلام ابن تيمية.

حتى لو أنتوا دخلتوا يا جماعة في الأركان الخسة هتلاقوا الأركان الخمسة عندهم فيها مشاكل؛ يعني أول ركن ركن التوحيد، هم يقولون بالإلهية علي رضي الله عنه، يقولون بأن علي فيه إلهية وحتة بقى اللاهوت والناسوت نفس كلام النصارى شوية. فده ركن التوحيد. الصلاة؛ صلاتهم تغير صلاة المسلمين، ما عندهمش سجود في الصلاة النصيرية، لا سجود عندهم في الصلاة، يصلون خمس مرات في اليوم والليلة زينا في العدد، لكن على هيئة تخالف صلاتنا أصلاً، وما عندهمش صلاة في مسجد صلاة جماعة، يصلون في بيوتهم ولا يصلون الجمعة. الزكاة؛ ما عندهمش زكاة. الصوم؛ صومهم في رمضان الامتناع عن النساء فقط. الحج؛ ما عندهمش حج، ويرون أن مناسك الحج وثنية، روح ماشي يحجوا في مكة، فولذلك نقل بعض اهل العلم اتفاق العلماء أنهم لا يناكون ولا يدفنون في مقابر المسلمين. فالمعلومات دي ممكن يبقى الناس مش عارفاهَا ماشي؟

وهُم ما كانوا اسمه علوية، يعني أنت لو جيت دلوقتي تسأل معظم الناس تقول له هُم دول اعتقادهم إيه ولا مذهبهم؟ يقول لك دول علويين، ما كان اسمه علوية أصلاً النصيرية، ما كانش اسمها علوية، عارفين مين اللي سماها العلوية؟ الاحتلال الفرنسي هم اللي سماهم علويين، علشان يروج على الناس هذا الأمر. وفضائع دي يعني خلوها بقى على جنب هنجي لها بعد شويه يعني، فأول مساله القدر الذي يفرح به؛ يعني اللي هو ما ينفعش تنام المسلمين يعني إيه يبقوا مش فرحانين به؟ أن أول حاجه سقوط مثل هذا الرجل، هذا النظام على ما ارتكبه من فضائع، مش بس عشان هو كده، وده الأمر الثاني الذي يفرح به لما ظهر ما كان يحدث في السجون هناك، حتى أن الآن بيقولوا أن سجن صيدنايا هو السجن الأخطر على ظهر هذه الأرض، وطبعا هذا فيما بدلنا يعني، ممكن يبقى في حته تانية أخطر بس ما حدش يعرف عننا حاجة، لكن فيما بدلنا، يعني الفظائع التي تمت فيه والتي سرب بعضها، قالوا لا ما سمعناش يعني على الحاجات دي في حته في هذه الحقبة التي نحياها يعني.

على كل حال يبقى ده مسألة تانية يفرح بها؛ أن إخوانك من المسلمين رفع عنهم هذا الظلم وهذا القهر، فهذا يفرح به يعني، مين ما يفرحش بحاجة زي كده؟ طيب اللي ما يفرحش بده يبقى عنده مشاكل كبيرة جداً؛ مثل المسلمين في توادهم وتراهم وتعاطفهم كمثل الجسد الواحد، إذا اشتكى منه عضو هينام باقي الجسد ويقول للعضو خليك أنت بقى سهران؟ ده بيحصل؟ أنت ضرسك قد كده في جسمك يعني، ضرسك ده كام في المية؟ ولا يساوي حاجة، لو ضرسك نقح عليك جسمك كله بيام، وضرسك بيفضل صاحي ولا بيصحي الجسم كله؟ بيصحي الجسم كله، ما تعرفش تنام، فهمتوا حديث النبي عليه الصلاة والسلام: «مثل المسلمين في توادهم وتراحمهم وتعاطفهم كمثل الجسد الواحد إذا اشتكى منه عضو تداعى له سائر الجسد بالسهر والحمى»، مش بقيت الجسد بيهزر ويضحك وفي دنيته عادي، ويقول للدرس إيه: خليك أنت على جنب بقى انقح لوحدك، ما بتحصلش!

يبقى دي أول مسألة، يبقى هذا القدر المفروض يكون متفق عليه بين عموم المسلمين، أنه قدر يفرح به بلا شك؛ رفع الظلم عن إخواننا، سقوط هذا الظالم، خصوصاً زي ما قلت لكم بقى ديانته شكلها إيه.

وفي قدر لابد أن يكون أيضاً متفق عليه بين الأمة من الخوف والقلق، مش كده؟ يعني أول مسألة، إحنا هنا مش جايين، إحنا لا بنحلل سياسة ولا بتاعتنا، ولا نعرف عنها حاجة أصلاً، يعني إيه السياسة لاهلها؟ لازم بقى يجمعوا الخيوط ويعملوا الحركات بتاع، إنما إحنا جايين نتكلم دين. القدر المشترك لابد الأمة كلها تبقى قلقانة منه وخايفة منه، اللي هو ما بعد هذا؛ سواء تسلط دول كفيرة على بلاد المسلمين قد يحدث متوقع، سواء الانقسام الداخلي بين رفقاء الأمس؛ أنتوا عارفين طول ما في عدو واحد ظاهر تلاقي قلوبها واحدة على هدف واحد، أول ما العدو ده يختفي تلاقي الناس كل واحد يرجع لمصلحته الشخصية يعني، يدور على مصلحته الشخصية.

طيب هو ده طبيعي؟ اه طبيعي، دي طباع البشر، هذه حدث للصصحابة! فين؟ أدينا هنا الدرس ده؛ غزوة بدر مش كده؟ طول ما في عدو واحد كلنا بنحارب العدو، هرب؟ اختلفوا على كام فرقة؟ يلا يا جماعة صحصحوا إحنا أدينا الدرس ده. لثلاث فرق؛ فرقة أحاطت بالنبي عليه الصلاة والسلام عشان لا يصيب العدو منه غرة، وفرقة طلعت ورا العدو بتجري وراه علشان تلحقه، وفرقة راحت جمعة الغنائم. رجعت الفرقة اللي جمعت الغنائم قالت: إحنا الغنائم دي بتاعتِنا، ليه؟ إحنا اللي جمعناها. فجت الفرقة التانية قالت: والله أنتم باحقية منا؟ نحن أحطنا برسول الله صلى الله عليه وسلم لا يصيب العدو منه غرة. الفرقة الثالثة: والله ما أنتم باحقية منا، نحن خرجنا في أثر العدو!

فنزعها الله عز وجل من أيديهم، ﴿يَسْأَلُونَكَ عَنِ الْأَنْفَالِ قُلِ الْأَنْفَالُ لِلَّهِ وَالرَّسُولِ﴾ [الأنفال: 1]. طب أنتم تعملوا إيه بقى؟ فاتقوا الله وأصلحوا ذات بينكم وأطيعوا الله ورسوله إن كنتم مؤمنين. فنزعت من أيديهم، وكانت في أول الأمر إليهم، بيسموها زي ما هم عاوزين، فلما اختلفوا وساءت فيها أخلاقهم، ده لفظ الراوي مش لفظ لفظي، فينا معشر البدريين: نزلت حين اختلفنا في النفل وساءت فيه أخلاقنا، فنزعها الله من أيدينا وجعلها إلى رسوله صلى الله عليه وسلم.

فده برضه قدر يقلق، أنه خلاص إحنا عارفين طبائع البشر، بل وعايشنا ذلك السنوات اللي فاتت؛ أنه لما بيحصل نوع استقرار ونوع دعة ونوع راحة، يبتدي رفقاء الأمس أعداء اليوم، مش كده بيحصل؟ فده برضه يقلق، وساعتها هتلقى مشكلة كبيرة؛ لأن فساد ذات بين هي الحالقة، وهنجي لها إن شاء الله بعد شوية.

طيب يبقى ده شيء يخوف وشيء يقلق، وده زي ما بقول لكم المفروض يبقى قدر مشترك بين كل المسلمين، يكونوا شايفين ده وقلقين منه. المشكلة بقى فين هنا يا شباب؟ المشكلة كالعادة كالعادة أن الناس، حتى الناس المتدينة وصفحات الناس المتدينة، تلاقي مع كل حدث كل واحد يتبنى رأي، ولو لقينا هنا الأمر سهل لكن يسفه آراء الآخرين ويرميهم بالجهل، ويرميهم بأنهم مش فاهمين حاجة، ويرميهم أنهم مش، وتلاقي كلام لا يرضي الله عز وجل، وتلاقي الشباب اللي بيأخدوه بقى عن الناس، الشباب بقى اللي هو يعني بيستقل الصفحات، يقوم كل واحد يتبنى قول من هذه الاقوال وينافح عنه ويدافع، فتلاقي الناس نفسهم انقسموا.

حصل ده ولا ما حصلش؟ تلاقي حد مثلا يطلع يقول لك إيه: ده وقت فرح واللي يزعل ده يبقى ما بيفهمش حاجة، ومش عارف مثلا، فالتاني يسكت؟ لا ما يسكتش طبعا، ده اللي فرحان ده مش فاهم حاجة، ومش عارف إيه اللي هيحصل، فكله مش فاهم يعني، خلاص ما هو ده ده بيقول ده مش فاهم، وده بيقول ده مش فاهم، وكل واحد هيروح ياخد، يعني أنا بثق في فلان خلاص هو قال إن الفئة الاخرى مش فاهمة يبقى مش فاهمة، طب والتاني بيثق في علان قال الفئة الأولى مش فاهمة تبقى مش فاهمة، ده هيعمل إيه بالناس؟

هذا الشقاق وهذا التنازع الذي يرفع البركات؛ فساد ذات البين، قال النبي صلى الله عليه وسلم: «هي الحالقة»، صلوا على النبي: «لا أقول تحلق الراس، أو تحليق الشعر، ولكن تحلق الدين». عاوزين نشوف تحلق الدين إزاي؟ شوفوا -مش بقول لك صفحات الفساق والفجار والدول- شوفوا صفحات المتدينين إزاي؟ الواحد يستحل عرض أخيه لأنه بس مخالف له في في إيه بقى؟ في مشاعر. هنيجي بقى مسألة المشاعر دي دلوقتي، أن ده طاغى عليه مشاعر الفرح، وهذا طاغى عليه مشاعر القلق، فيحصل إيه؟ ده يشتم في ده، وده يشتم في ده.

فإحنا مستنيين إيه بقى؟ مستنيين ينزل علينا بركات وينزل علينا رحمات؟ أبداً! النبي عليه الصلاة والسلام -عشان تعرفوا شؤم اللي بيحصل دلوقتي- النبي عليه الصلاة والسلام أعلم بليلة القدر، خارج يقولها للصصحابه، يعني ما فيش فرق بين أنه يقولها للصصحابه أن هم يعلموا ليلة القدر وأن أو ما يعلموها، غير فتح الباب؛ هيفتح الباب ويقول لهم ليله القدر يوم كذا أو ليله كذا. فاتنين اتنين فردين، مش جماعتين على الفيسبوك، فردين تلاحى فلان وفلان -يعني شدوا مع بعض كده- فرفع علمها عن النبي صلى الله عليه وسلم! أنتو متخيلين يا جماعة؟

النبي خارج عليه الصلاة والسلام من الباب بس، يعني مسافة السكة، علشان يقول لهم ليلة القدر الليله الفلانية، قال: «فتلاحى فلان وفلان، فرفعت» رفع علمها عن النبي عليه الصلاة والسلام بشؤم إيه؟ فردين! شوفوا إزاي يا جماعة فساد ذات البين، الشقاق، النزاع، الخصومات تضيع الأمة وترفع البركات وترفع الرحمات.

طيب واحد غلب عليه مشاعر الفرح، فكتب مشاعر الفرح على الفيسبوك، ماشي جميل، راح واحد داخل قال له: يا أخي ده أنت بتفرح على إيه؟ ده هيحصل كذا وكذا وكذا، خلاص الموضوع انتهى يعني مش لازم بقى أنت ما تعرفش حاجة في الدين، ده إحنا دلوقتي ده يوم من أيام الله، واللي ما يفرحش يبقى منافق! أنا بقول كلام بيحصل ها، يعني أنا مش مش جاي مش بفبركه، أنا جاي أعمل درس على الواقع اللي عشناه، وللاسف للاسف اللي بنعيشه مع كل موقف.

أو العكس؛ اللي كاتب أنه قلقان من اللي جاي، في واحد يدخل يقول له: أنا فرحان والظلم والطغيان، يقوم داخل: أنت ما بتفهمش، وأنت ما بتقرا في التاريخ، وأنت مالكش في الجغرافيا! يا عم خلاص. الإشكال فين هنا يا جماعة؟ تعالوا كده أسألكم سؤال: لو مسكت أي واحد من كل دول قلت له: تعالى، أنت جرد بقى نفسك خالص دلوقتي، وأسألك أسئلة وتقول آه أو لا؛ أنت فرحان بخروج إخواننا من السجون ورفع الظلم عنهم؟ في مسلم هيقول: لا مش فرحان؟ ما فيش، دول ولا كله هيقول: آه طبعا فرحان؟ صح ولا لا؟

طيب أنت بعد بقى ما عرفنا يعني حتى اللي ما كانش عارف وعرف بقى دلوقتي شكل هذا الطاغية والظالم، وال أنت فرحان بسقوط ده ولا ما أنْتَش فرحان بسقوطده؟ قول له: جرد يعني أنا بكلمك في دي، نرجع في باللي جاي دلوقتي، يقول لك: آه طبعا، واحد ظالم وطاغيه وجبار وكان بيقتل وكان بيسج وكان بيفجر بالنساء، أو يعني يأمر جنوده أن يفعلوا ذلك؛ آه طبعا فرحان، ما فيش مسلم هيقول: لا مش فرحان.

وامسك أي واحد منهم وقول له: تعالى هو أنت مش قلقان من اللي جاي أن ممكن يحصل كذا، بغض النظر عن مش مشاعر الفرح؟ يقول لك: آه طبعا، يعني ربنا يستر في اللي جاي، خرجوا بس بره حتة الشحناء وأن إحنا، هتلاقي يعني هتلاقي كل الناس متفقه على المشاعر. المشكلة فين بقى؟ أن في واحد طغى عليه مشعر الفرح، واحد طغى عليه مشاعر القلق، فده بس فرحه وده بس قلقه، دخلوا يتخنقوا الاتنين! وده يا جماعة دائماً في دروسنا بنحاول نركز على ما يعنينا، أنا مش هاجي هنا أكلم السوريين، أنا مالي.

ما فيش حد سوري بيحضر ولا حد سوري بيسمع، ولا ماليش دعوة احنا فينا احنا نعمل ايه؟ احنا نحافظ على تلك اللحمة التي بيننا يا جماعة، مش مع كل موقف ننقسم فرق ونقسم جماعات ونقسم أحزاب، ودول بيشتموا دول ودول بيصفوا دول. وللاسف هذا في صفوف المتدينين! مابنا بقى بغير الناس؟ أقصد المتدينين، الناس اللي الدين في دماغهم بزيادة شوية، عاوزين المفروض الناس المتدينة تبقى قدوة للناس لغيرهم.

هل فكرة المشاعر دي واختلاف المشاعر مقبولة؟ أه مقبولة جداً، وحدثت يا جماعة يعني احنا بنتكلم دلوقتي إنه إيه ده يوم من أيام المسلمين ما ينفع، مش ده اللي بيتقال دلوقتي؟ طيب تعالوا أنا أقول لكم حاجة، لما فتحت قبرص إيه رايكم؟ واللي فتحها صحابة وتابعي عشان بس افضل جيلين أهو، فتحت قبرص، الناس فرحانة كلها ومزقططة وراحوا بقى للسبي والغنائم وبتاع، فواحد يضرب بعينه كده لاقى مين قاعد على جنب بيعيط؟ أبو الدرداء قاعد بيعيط.

فقالوا يا أبا الدرداء تبكي في يوم أعز الله فيه الإسلام وأهله؟ مش ده هو اللي حاصل دلوقتي؟ أهو اللي سأله هو جبير بن نفير، فقال: ويحك يا جبير، ما أهون الناس على الله إن هم عصوه! بينما هي أمة ظاهرة قاهرة لها الملك، إذ عصت الله فصارت إلى ما ترى. أبو الدرداء في حته تانية خالص، يعني إيه في حته تانية؟ يعني في مشاعر معينة غلبَت على أبي الدرداء، غلبت على مشاعر الفرح.

لو جيبت أبو الدرداء وقلت له: يا أبا الدرداء هو انت مش فرحان إن المسلمين كسبوا؟ هيقول لك: لا مش فرحان؟ ردوا يا شباب، فرحان؟ فرحان، مش كده؟ لو جيبت أي واحد من اللي فرحانين من الجيش كله، قلت له: تعالى هو انت مش خايف من الذنوب والمعاصي؟ هيقول لك: لا ما بخافش من ذنوب والمعاصي؟ ولا هيقول لك: لا أنا بخاف من ذنوب والمعاصي؟ يعني المشاعر عند الاتنين، سواء اللي فرح فهو فاهم شؤم الذنوب والمعاصي فاهمها كويس جداً، واللي قعد بيبكي ده فاهم كويس جداً فكرة إن المسلمين انتصروا على الكفار وفتحوا دولة.

لكن المشكلة فين هنا؟ إن في كل فرقة من الفرقتين غلب عليها مشاعر معينة، بس أبو الدرداء غلب عليه مشاعر الخوف، فتأمل هذه الصورة. طب الأثر اللي أنا حكيته ده أظن كلنا سمعناه قبل كده، أو معظمنا سمع قبل كده أو عد على أُذنه وهو بيحكي. عمرك سمعت واحد بيحكي إنكاراً على أبي الدرداء ويقولوا إيه: ما أفقه هذا الرجل! انظروا إلى فقه الصحابي الجليل! الله! طب ما اشمعنى دي "ما أفقه الرجل وفقه الصحابي الجليل" واللي يجي دلوقتي يغلب عليه مشاعر القلق والخوف تقول له: انت ما بتفهمش، وده مش الدين ولا تعكر علينا؟

ليه يا جماعة ما بنشوفش الاختلاف إنه اختلاف تنوع؟ مش لازم اختلافنا يبقى اختلاف تضاد، مش لازم في كل مسألة اللي بيخالفني يبقى ضدي. ممكن يخالفني علشان في مجموعنا ننهض بهذه الأمة، قادرين تفهموا دي؟ في مجموعنا ننهض بالأمة، فاللي غلب عليه مشاعر الخوف مقبول، واللي غلب عليه مشاعر الفرح مقبول. أهو أبو الدرداء أهو، بلاش أبو الدرداء، لما فتحت التُّسْتُر وكلنا عارفين القصة، أنس بن مالك رضي الله عنه كان في الجيش الذي فتح التستر ومات أخوه، وكلما ذكر أنس بن مالك فتح التستر بكى.

بيعيط عشان إيه؟ مش عشان اخوه مات، لا، عارفين ليه؟ ببكي لأنهم في وسط الفتح، في وسط الحرب، حان وقت الفجر، والحرب ما انتهشت غير بعد الشروق، ففاتتهم صلاة الفجر، فكان كلما ذكر أنس فتح التستر بكى لصلاة الفجر، وفي بعض الروايات يقول: وما التستر؟ فاتتنا صلاة الفجر! إيه رايكم؟ طب لو جيبت أنس رضي الله عنه قلت له: بغض النظر عن صلاة الفجر، انت فرحان بفتح التستر ولا مش فرحان؟ هيقول لك: طبعا فرحان، يعني ما هو اللي ما يفرحش بفتح المسلمين لبلاد الكفار يبقى فيه نفاق! مش كده؟

طب لو جيبت أي واحد من جيش المسلمين اللي قعدوا فرحوا وصلا، قلت له: تعالى انت هو انت مش زعلان إن فاتك صلاة الفجر؟ هيقول لك: طبعا زعلان، صح ولا لا يا جماعة؟ لكن هؤلاء غلب عليهم مشاعر الفرح، وأنس غلب عليه مشاعر إن إزاي تفوتني صلاة فجر! أسالكم نفس السؤال تاني، الأثر ده معظمنا سمعه، هل عمرك سمعته على وجه الإنكار على أنس؟ إزاي أنس يبقى زعلان في فتح المسلمين للتستر؟

وخلي بالكم أنا بكلمكم في إيه بقا؟ فتح صريح، يعني ما فيهوش إشكال، يعني ممكن دلوقتي الناس تقعد تحللك بقا سياسيين يقول لك: لا ده يعني جيش ما فيش كلام عليه، صحابه وتابعين ورايحين يفتحوا بلاد كفر، وعمرنا ما سمعنا إن حد بيقول: أنس غلطان! أصلي ده ده يوم من أيام الله، إزاي يقعد زعلان، وإزاي يبكي، وإزاي؟ ما حدش يقدر يقول الكلام ده عن أنس، بل يذكره من يذكره مثنيا على أنس رضي الله عنه، مش كده؟ وإن إزاي عنده نظرة في أهمية الصلاة.

طب اشمعنى؟ بل حدث مثل ذلك للنبي عليه الصلاه والسلام، مش في غزو صحيح، لكن فكرة إن مشاعر معينة مسيطرة على الناس، مشاعر أخرى تسيطر عليك، النبي عليه الصلاه والسلام كان إذا رأى الغيم عُرِفَتِ الكراهة في وجهه ودخل وخرج اضطرب. الآن عارفين اللي يتحرك حركة غير منضبطة كده أو يعني بلا مش رايح لوجهة، لا يدخل وبعدين يخرج وبعدين يرجع وبعدين يجي عمال يتحرك حركة مضطربة، وعُرفت الكراهة في وجهه!

مع أن العرب عندهم الغيم ده مصدر الخير؛ لأنهم بيئة صحراوية، فلما يجي غيم يعني في مطر، يعني هنشرب وهنشرب المواشي والزروع، زي ما أنتم عارفين عائشة أشكل عليها الأمر رضي الله عنها، فتسأل النبي عليه الصلاه والسلام إن الناس إذا رأت الغيم استبشرت، وانت تعرف الكراهة في وجهه؟ قال: «وما يؤمنني أن يكون عذَابًا بعَثَهُ اللهُ عزَّ وجلَّ» أو كما قال صلى الله عليه وسلم، وذكر قول الله عز وجل: ﴿فَلَمَّا رَأَوْهُ عَارِضًا مُّسْتَقْبِلَ أَوْدِيَتِهِمْ قَالُوا هَٰذَا عَارِضٌ مُّمْطِرُنَا ۚ بَل هو مَا اسْتَعْجَلْتُم بِهِ ۖ رِيحٌ فِيهَا عَذَابٌ أَلِيمٌ * تُدَمِّرُ كُلَّ شَيْءٍ بِأَمْرِ رَبِّهَا﴾ [الأحقاف: 24-25].

هنا بقا ننكر؟ ننكر على مين هنا؟ أنا مش قادر أقولها حتى، يعني هي مشاعر. طيب لو جيبت أي حد من الصحابة -طبعا ما اقدرش أقول التانية برضه بس- لو جيبت أي حد من الصحابة رضوان الله عليهم وقلت له: هو انت لما الغيم ده مش ممكن يكون في عذاب وكذا وكذا؟ وممكن يقول لك: أه والله، وفعلا يعني هذا شيء يخوف، هو المعنى عندهم مش كده، لكن الذي يغلب عليهم إذا رأوا الغيم الاستبشار والفرح.

فين الاشكال؟ إحنا بنتكلم على مشاعر، مشاعر واحد غلب عليه مشاعر الفرح فبث فرحه وأبدى فرحه، فرحه بسقوط هذا الظالم الطاغية الجبار الذي قتل من أهل السنة من قتل، وعذب من عذب، وسجن من سجن -مش عايز أدخل في تفاصيل وحواديت الناس اللي في السجون دي عملت إيه أو الذي وصل إلينا من هذه الأخبار، وأظن كل الناس عارفين أكتر مني- غلب عليه هذا الشعور ففرح وأظهر فرحه وخروج إخواننا من السجون وكذا وكذا.

الثاني مع فرحه ما هواش منافق، ده مش واحد منافق يا جماعة، بتتكلم عن حد منافق؟ مع فرحه لكن غلب عليه الخوف والقلق، ليه؟ بيكره المسلمين؟ ولا خايف على المسلمين والان على المسلمين وعلى بلاد المسلمين مزيداً من التقسيم وتشرذم وكذا؟ والا فالشام، الشام دي كلها كانت حتة واحدة، كان الشام لبنان وسوريا والأردن جزء من مصر وجزء في العراق، دي دي كلها كانت منطقة اسمها الشام بلاد الشام فقسمت.

فواحد خايف من كده، قلقان من كده يحصل مزيد من التقسيم، مزيد من التشرذم، مزيد من الضعف كذا كذا، وغلب عليه خوفه فدخل بث خوفه. خلاص خلاص، ما انتش المعصوم، يعني ما هواش كلامك كلام صادر عن معصوم وهو يا جماعة برضه احنا عندنا اشكالات، احنا جايين نحل اشكالات عندنا احنا اللي موجودين في الدرس، ما هو فكرة إن انت تبتدي تنكر على كل من خالف، دي تظهر آفات.

الآفة الأولى: الاعتداد بالراي، أنا رايي هو اللي صح وغيري ما بيفهمش، وده إشكال كبير جداً، عارفين ليه إشكال كبير؟ لانه ربما ينم عن كبر دفين. طب إيه المشكله برضه؟ المشكلة بقا الخطيرة إنه: «لا يدخل الجنة من كان في قلبه مثقال جبل أحد من كبر» كده؟ أمال مثقال إيه؟ انتو فاهمين الرعب اللي احنا بنتكلم فيه؟ لا يدخل الجنة من كان في قلبه مثقال حبة خردل أو مثقال ذرة من كبر! انتو فاهمين إحنا المفروض نجاهد نفسنا لفين في الآفة دي؟ آفة الكبر خطيرة جداً.

طيب انت تضمن إن ما فيش جواك كبر؟ في بعض، الحمد لله ما بتكبرش أهي! مواقف زي دي تبين بقا، أول ما واحد خلفك اتعصبت وتنططت وما ينفعش تتخالف، وأنا اللي بفهم، وأن ده، وهو مش شايف على صفحته كم واحد وأنا عندي كم واحد مثلاً بقسها كده بالكيلو دلوقتي، مش كده؟ بالكيلو! مشكلة كبيرة جداً كبر، وايه تاني؟ تزكية للنفس، والله عز وجل نهى عن ذلك: ﴿فَلَا تُزَكُّوا أَنْفُسَكُمْ﴾ [النجم: 32]. تزكيته للنفس وللرأي وللعقل، مين قال إن انت اللي صح؟ يعني مين قال لك؟ مين قال ده؟

وبعدين إزاي يعني تحصر الاسلام في رايك؟ ما دي يا جماعة كلها مشاكل في صفوفنا، يعني ليتك لما فرحت، أو ليتك لما خفت وقلقت، قلت والله انا فرحان، ويعني أقدر قلق؟ لا، ليس من الاسلام بث الخوف في هذا، يا سلام! منين ده بقا؟ إن شاء جبته منين إنه ليس من الإسلام؟ ده منين؟ منين ده؟ عجيب! جرأة عجيبة، جرأة على دين الله عز وجل عجيبة.

فالناس أه تفرح وتقلق وتخاف، والله اتزن هذا الأمر خير وبركة، ما اتزن وغلب عليك الفرح خير وبركة، ما اتزن وخلف غلب عليك الخوف والقلق خير وبركة، كل دول مسلمون محبون للدين عاملون له، خائفون على مستقبل أهله، مش كده يا جماعة؟ كل دول، يعني اللي فرح كده واللي زعل كده أو يعني خايف أو قلقان برضه كده.

إنما يا جماعة ما ينفعش نبقى كده فريسة للشيطان سهلة في كل في كل موقف، ما نتعلمش بقى، لا نختلف يحصل بيننا التحريش، اللفظ النبوي: «إن الشيطان قد أيس أن يُعبد في جزيرة العرب ولكن في التحريش بينهم». دي وظيفة الشيطان، وظيفة الشيطان وأداة من أدوات الشيطان دلوقتي الفيسبوك وسائل التواصل وسيلة من وسائله في التحريش بيننا.

يعني حاجة عجيبة جداً، واحد دخل يبث، يعني أنا برضه يبث القلق مثلاً وأنا خايف من اللي، واحد يدخل يكتب له مثلاً: إيه يا أخي ما تخافش ومش هيحصل وإيه المشكلة؟ يخلّي له إيه: يا رب هو انت عاوز يحصل؟ يعني انت خايف إنه يحصل؟ اتفق انت انت وأخوك اتفق في هذه، يعني يقول لك: ما تخافش ومش هيحصل وده بعيد. يا رب، يا رب ما يحصلش! خلصت المسالة وعدت، مش كده يا جماعة؟ ولا انت ده اصل تبقى مشكلة بقى، يعني كمان وصلنا من الاعتداد بالراي إني أتمنى لإخواني الشر لمجرد أن أطلع أنا صح؟ أعوذ بالله!

حد حد كده هنا ولا إية؟ ما اعتقدش إنك يعني قاعد دلوقتي متمني إن اللي انت كتبته يحصل عشان إيه تطلع؟ شفت بقى قلت لكم، مش عارف إنت عاوز بقى إيه؟ البلاد تقسم وإخوانك يقتلوا وكده عشان بس تطلع إنت صح؟ يعني ما اعتقدش، يعني ما اعتقدش إن في حد كده، دي علامة نفاق! يعني ده في إيه بعد كده يعني؟

فأخوك دخل كتب لك: لا انت ده مش هيحصل وبتاع وما تقلقش وأبشر يا أخي، أقبل البشرى يا أخي، إيه هتحصل إيه؟ على قول له: قبلت البشرى وخلاص وخلصت الموضوع، خلص الموضوع وانتهى. واحد فرحان وأبدى فرحه ودخل واحد قال له: إنت مش خايف من كذا وكذا؟ قول له: والله عندك حق، يعني لعل إيه يعني ربنا يكرمه، وخلصت.

ليه هذا التحريش؟ وليه هذا الشقاق والتنازع؟ ليه يا جماعة؟ الذي يحدث هذا عقاب من الله عز وجل، أول ما تلاقوا في تشرذم وفي شقاق وفي تنازع، اعرفوا إن احنا في عقوبة على طول ماشي؟ ودي في آيات كتير وفي أحاديث كتير أن الشقاق ده ماهوش علامه رحمة أبدا، ولا علامة توفيق ولا علامة سداد أبدا أبدا.

فدي أول مسألة، مسألة المشاعر، ما تحركناش، ما تحركنا احنا عندنا دين بيحرك، ما حدش يقدر أبدا أبدا يعني يسيطر على مشاعر نفسه، لكن نقدر نسيطر على أفعالنا، مش هي اللي تحركنا، مش مشاعرنا اللي تحركنا، لا، في كل كلمة بتكتبها على الفيسبوك أو غيره أو بتقولها قف واسال نفسك: هو ما حكم الله عز وجل في هذه الكلمة؟ هو أنا دلوقتي هعمل إيه؟ سواء بقى في في المنشور الأصلي أو بترد على تعليق أو بتنشر كلام حد، اقف واسأل.

حكم ربنا في اللي أنت بتنشره أو في اللي أنت بترد عليه إيه؟ هل أنت بتنتصر لنفسك؟ الأمر ممكن يتقلب كدة، فممكن يكون المنشور الأساسي صادق فيه، وحرقة قلبك هي اللي محركاك، أو فرحك الشديد، وأول ما ترد عليك يتقلب بانتصار للنفس، ودي خطيرة جداً. ده يا جماعة في الدين الظاهر، مش في أمر معروف ونهي عن منكر، يعني هو دين، ما فيش حد يختلف عليه.

أحمد بن حنبل رأيه إيه في المسألة دي؟ واحد جاله قال له: بآمر بالمعروف والراجل يقعد يناقشني ويجادلني، أو بنهى عن المنكر وأقعد أناقش وأجادل، قال له: لا ما تعملش كده. قال: إن فعلت ذهبت تنتصر لنفسك، أنت بين الحق وخلاص وانتهى. قال: إن فعلت ذهبت تنتصر لنفسك. شوف يا جماعة الفقيه لما يكون عالم بهذه النفوس، ما هي دي فتوى فقيه مربي، قال له: أوعى، امشي بقى خلاص، إن فعلت ذهبت تنتصر لنفسك. يبقى دي أول مسألة، مسألة المشاعر.

المسألة الثانية وهي مسألة مهمة وحقها التقديم الحقيقة، لكن علشان مسألة المشاعر دي خدت حيز كبير جداً في صفحات الناس المتدينة وفي أتباعهم، وحصل ما حصل منها. وزي ما أقول لكم دي كالعادة، إحنا بيبقى بيحصل عارفين اللي هيحصل، يعني خلاص إحنا معانا أسبوع أسبوعين الناس المتدينة بتشتم في بعض، للأسف الشديد. المسألة الثانية وحقها التقديم، أن ترى في كل ما يحدث فعل الله سبحانه وتعالى، وهذا كثير ما ندندن حوله في الدروس، أن ترى كل ما يحدث فعل الله عز وجل. والأعلى من ذلك مقاماً أن تتلاشى في عينك تلك الأشباح، وأقصد بالأشباح كل ما دون الله سبحانه وتعالى.

فاهمين حاجة؟ يعني فلان سلط على فلان، لا أنت شايف فلان ولا فلان، أنت ترى فعل الله سبحانه وتعالى. الفئة الفلانية هي أمدت الفئة العلانية بالسلاح عشان كدة راحت، لا أنت شايف الفئة الفلانية ولا الفئة العلانية، أنت ترى الله سبحانه وتعالى؛ لأن الله عز وجل هو مدبر هذا الكون، ومن تدبيره سبحانه وتعالى أن تسير الأمور على وفق ما سارت عليه. لما غاب من غاب في هذه السجون، غابوا عن علمك أنت وعلمي أنا، لكنهم في علم الله سيان نحن وهم، أنت اللي واقف في الساحة كده وزيك زي اللي في غياهب السجون تحت الأرض، الاثنين عند ربنا سواء، ﴿سَوَاءٌ مِّنكُم مَّنْ أَسَرَّ الْقَوْلَ وَمَن جَهَرَ بِهِ وَمَنْ هُوَ مُسْتَخْفٍ بِاللَّيْلِ وَسَارِبٌ بِالنَّهَارِ﴾ [الرعد: 10].

طيب لما أخّر سبحانه وتعالى خروجهم، أخّره بحكمة ولا عبثاً؟ حاشاه لحكمة، عرفتها ما عرفتهاش ده موضوعك أنت، يا جماعة ﴿إِنَّا كُلَّ شَيْءٍ خَلَقْنَاهُ بِقَدَرٍ﴾ [القمر: 49]. إمتى يفرج عن هؤلاء وليه أصلاً؟ وكل ده بقدر. أنا فكرة برضه يا جماعة اللي مع كل موقف تضطرب القلوب، ويبتدي ناس تشك عياذاً بالله في الله. إحنا لو كنا عايشين أيام الأنبياء، أنبياء بني إسرائيل مثلاً، كان ممكن بنو إسرائيل يصبحوا على الصبح يقتلوا لهم نبيين ثلاثة، مش يقتلوا داعية ولا عالماً، نبياً! بني إسرائيل كان فيهم عدة أنبياء في الوقت الواحد، سيدنا يحيى قُتل قتلة بشعة، فُصلت رأسه. طب أنت لو عايش في المواقف دي هتعمل إيه؟ بلاش غزوة أحد وشايف بعينيك النبي عليه الصلاة والسلام فُشل له وكاد أن يُقتل وأصيب، يا جماعة إن ﴿كُلَّ شَيْءٍ خَلَقْنَاهُ بِقَدَرٍ﴾، ذلك قدر الله، قدر الله الحكيم سبحانه وتعالى. أنت مطمئن لاسم الله الحكيم ولا ما أنت مطمئن لهذا الاسم؟ ما فعله فعله بحكمة، وما أخّره أخّره لحكمة. دور حضرتك أن تعمل عقلك في الوصول للحكمة، مش في الاعتراض على قدره سبحانه وتعالى.

يبقى أول مسألة هنا دول مسألتين مش مسألة واحدة، المسألة الأولى أن ترى كل ما في الكون فعله سبحانه وتعالى، فترضى به من هذه الحيثية، يعني ترضى به من حيث أنه فعل الله عز وجل. فاهمين دي؟ مش ترضى بيه يعني ما أنت راضي بكفر الكافر مثلاً، لا أنت تبغض كفر الكافر إذا بنسبته إلى الكافر، لكن ترضى بوجود الكفر بنسبته إلى الرب سبحانه وتعالى. يعني الله عز وجل لو شاء لاختفى الكفر، ولا بلاش الكفر، ارجعوا هو أصلاً أصل الكفر إيه؟ إبليس، من الذي أمهله؟ الله سبحانه وتعالى. ينفع واحد دلوقتي يقول: أنا لا أرضى عن وجود إبليس في الكون؟ من أنت لترضى أو لا ترضى؟ هذا فعل الله عز وجل، رضينا به وسلمنا له، وعلمنا يقيناً أنه إذ فعله سبحانه وتعالى فلحكمة، هذه الحكمة قد تجل عن عقولنا، ما نبقاش عارفينها، ما نبقاش فاهمينها، لكن متأكدين من جوانا أنه ليس في الإمكان أجمل ولا أحكم مما كان. تسلط الظالم في وقت تسلطه هو أحكم شيء، طيب في وقت انخلاعه أحكم شيء، ليه؟ مش لازم ليه، هو لأن ده فعل ربنا. هو مين اللي عيَّن الظالم؟ هتقول القوة، مش يا حبيبي في الآخر ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]، خلصت، ما تشغلش دماغك بيهم بقى، ﴿فَذَرْهُمْ﴾ ما تشغلش دماغك بيهم؛ لأن ﴿وَلَوْ شَاءَ رَبُّكَ مَا فَعَلُوهُ﴾.

بل ما نتكلم عنه الآن، الله عز وجل تكلم فيه بلسان عربي مبين، قال الله عز وجل: ﴿قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ بِيَدِكَ الْخَيْرُ﴾ [آل عمران: 26]. يبقى من الذي يؤتي الملك؟ الله، من الذي ينزع الملك؟ الله، أجرى ذلك على أيدي بعض عباده، لم يخرج كون إتيان الملك أو نزع الملك من فعله سبحانه وتعالى. فاهمين يا جماعة؟ أجرى ذلك على أيدي بعض عباده خير، أجرى ذلك بغير سبب ظاهر خير. دورنا إحنا بقى عشان يبقى الكلام، أول حاجة خلاص تيقنا أنه فعل ربنا سبحانه وتعالى، فراضين به من حيث هو فعله سبحانه وتعالى، ورأينا أن ذلك أحكم شيء وأوفق شيء وأجمل شيء في هذه الظروف.

دورنا، الكلام ده تكلمنا عنه كتير بس إحنا كل موقف لازم نرجع نذكر؛ لأن دي المسألة الأم أصلاً، هذا هو ديننا. دورنا بقى أننا ندور على حكمة ربنا سبحانه وتعالى وندور على دورنا المطلوب منا إيه، ليه بقى يا جماعة؟ لأن للأسف برضه من الإشكالات الحاصلة في صفوف الناس المتدينة الآن، هو في كل موقف مشغول بكل حاجة إلا نفسه. يعني شفت دول عملوا إيه وشفت دول سووا إيه، ودول راحوا فين ودول جم منين، ودول أمدوا مين ومش عارف بمين، ودول منعوا مش عارف مين. هو حضرتك قرأت سورة الكهف النهاردة؟ وحضرتك صليت على النبي 1000 مرة النهاردة عليه الصلاة والسلام؟ صليت سنة الجمعة البعدية؟ لحقت التكبيرة الأولى تكبيرة الإحرام؟ لحقت الصف الأول؟ لا، هو قاعد يحلل في مخاليق ربنا كلهم، وهذا من الخذلان. إن وجدت نفسك في هذه المنطقة، منطقة أنك مشغول بكل حد إلا نفسك، اعرف ده نذير خذلان؛ لأنك في الآخر هتتسور يوم القيامة، هتتسال: هو ليه فلان أمد فلان بالمش عارف إيه؟ ليه الدولة الفلانية منعت الدولة الفلانية؟ يلا دخلوه النار! أصل الدولة الفلانية منعت الدولة الفلانية، ودوا ده النار بقى. أنت مالك أنت؟ أنت مالكش دعوة بالدولة الفلانية والدولة العلانية، أنت مالك، لكن هتتسال؛ هتلاقي ورقة في صحيفتك كده بتمثل يوم الجمعة اللي هو النهاردة موجودة دي، وأنت عملت إيه في يوم الجمعة ده؟ فما تشغلش بغيرك، ﴿يَرَى أَحَدُكُمْ الْقَذَاةَ فِي عَيْنِ أَخِيهِ وَيَنْسَى الْجِذْعَ فِي عَيْنِهِ﴾.

هذا من الخذلان؛ لأن طريقة التفكير دي قلنا لكم كذا مرة، لو فضلت تفكر بيها 100 سنة لن تتقدم، واحد 100 سنة بيفكر في المؤامرة الكونية على مش عارف مين، في مش عارف الصهاينة والأمريكان والروس، طريقة التفكير دي هتعمل إيه في الآخر؟ ولا حاجة، لا نفسك قاعد محلك سر، وأنت شايف أنك دايماً مفعول بك، أنت مالكش يد في أي حاجة بتحصل، لا أنت عليك واجبات، انطلق في واجباتك، انطلق في واجباتك.

يبقى دي المسألة الثانية الكبيرة، أن ربنا سبحانه وتعالى أن نرى ذلك كله فعل الله عز وجل، إتيان الملك فعله، نزع الملك فعله سبحانه وتعالى، الأعزاز فعله، الإذلال فعله سبحانه وتعالى، وإن أجرى ذلك على أيدي بعض البشر. أنتم عارفين يا جماعة، أديكم مثال عشان تفهموا ولنا في درس الشكر، تخيلوا كده ملك من الملوك، رحت له أنت علشان يأمر لك بعطاء من بيت المال، ماشي؟ فراح ملك الدولة ده وافق إنه يديك عطاء من بيت المال، فراح قال لوزيره: يا وزير، روح ادِ لفلان عطاء من بيت المال. راح الوزير واخدك ورايح للكاتب أو الخازن على بيت المال، قال له: اديله، الملك بيقولك اديله كذا وكذا. فراح جاي الخازن ده مسك القلم والورقة، الجدول اللي هو بيسجل فيه الحاجات اللي هتخرج، وابتدى يكتب بالقلم والحبر على الورقة أنه هيطلع لك الفلوس دي. فإنشغل قلبك وتعلق بالقلم والورقة أن جريان القلم بهذا الحبر على الورقة هو السبب في أني آخذ الفلوس اللي هتطلع لي دلوقتي. فاهمين المثال ده؟ أهو ده اللي إحنا فيه، هو في ملك الملوك سبحانه وتعالى، أمر فكان ما أمر به، ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. فلان هيمسك فلان، يجي بقى بمؤامرة مش عارف إيه، ولو شاء ربك ما فعلوه، ﴿فَذَرْهُمْ وَمَا يَفْتَرُونَ﴾، ما تشغلش دماغك بيهم.

فلان الذي تسلط، أمر الله أن ينخلع، هينخلع خلاص. طب خد بقى زيادة، ولو وقفت معاه كل قوى الأرض، كل قوى الأرض! هذا قاله النبي محمد صلى الله عليه وسلم: «يا غلام، إني أعلمك كلمات... واعلم أن الأمة» -الأمة هنا قالوا دي أمة الدعوة مش أمة الإجابة- «لو اجتمعت على أن ينفعوك بشيء لن ينفعوك إلا بشيء قد كتبه الله لك، ولو اجتمعت على أن يضروك لن يضروك إلا بشيء قد كتبه الله عليك». انتهى الموضوع، وخدنا قصة أصحاب الأخدود، مملكة بحالها بتحارب غلام ما قدرتش، وبعدين جنود، تعالوا خدوه في قارب صغير إذا توصلتم به البحر فإن رجع عندين وإلا فالقوه، يروحوا، القصة معروفة، علقوا قلوبكم بالله سبحانه وتعالى، لا بشرق ولا بغرب، وده معنى التوكل، ده معنى لا إله إلا الله أصلاً.

ما هو التوكل عبادة، لما قلبك يعتمد على غير الله، لا إله إلا الله، لا معبود بحق إلا الله سبحانه وتعالى، يبقى قلبك قاعد مضطرب من الشرق والغرب. خلي بالك في فرق بين أنك تعد لهم العدة، وده كله من الدين برضه، لكن في الآخر تعمل إيه؟ تتخفى وتخرج في وقت ما حدش شايفك، وتجيب خريت ماهر علشان يهديك الطريق، وتسر معاد خروجك، وبعدين تقعد في الغار فيقال لك لو تقطع أحدهم، يقول له: اسكت يا أبا بكر، اثنان الله ثالثهما. آه، هناخد بكل الأسباب، لكن قلوبنا متعلقة بالله عز وجل، اسكت يا أبا بكر، اثنان الله ثالثهما. انتهت.

ليه؛ لأنك أول ما تلاقي قلبك راح ناحية الاسباب وابتدى يعتمد عليها، اعرف على طول على طول على طول ده دي بقى سنن الله في كونه على طول كده، أول ما تلاقي الحتة دي اعرف إن في مصيبة جاية. هذه سنن الله لا تحابي أحداً، وأمثلة بقى كتير، ويوم حنين ﴿إِذْ أَعْجَبَتْكُمْ كَثْرَتُكُمْ﴾ [التوبة: 25]، اتناشر ألف ما أجتمع في غزوة قبلها الرقم ده.

وقال قائلهم من مسلمة الفتح أبو سفيان: لن نهزم اليوم من قلة، وأكيد المعنى ده كان جوه قطاع عريض من مين؟ من الجيش، يفر الجيش كله وتبقى ثلة صغيرة حوالين النبي عليه الصلاة والسلام. سنن الله لا تحابي أحداً، أهو جيش قائده النبي عليه الصلاة والسلام، أول ما تلاقي إيه؟ قلبك كده راح ناحية الإيه؟ العدد والكثرة والاتباع وكذا، اعرف إن دي بداية النهاية، بداية الخذلان. لا، ناخد بكل الأسباب وفي الآخر: «اسكت يا أبا بكر، اثنان الله ثالثهما». فهذه أيضاً مسألة كبيرة.

المسألة الثالثة اللي عاوزين ننوه عليها أشرنا إليها في أول الدرس وده وقتها بقى: الانخداع في الروافض. ولعل ما حدث وظهور ما كان يحدث من فضائع في سجون بشار لأهل السنة على يد الروافض والنصيرية يرجع تاني أو يعدل الإيه الميزان عند أهل السنة، لأن الفترة اللي فاتت ودي برض متعودين عليها مع كل مشكلة تحصل يظهر فيها حزب الله -مش قادر أقولها يعني حزب اللات- تلاقي دايما في قلوب الإيه خصوصا مع إيه نوع تخاذل من أهل السنة، تلاقي إيه الناس تستعظم هؤلاء.

لا يا جماعة، دول وبال على المسلمين من أول يوم، مش في العصر الحديث، من أول ظهورهم وهم وبال على المسلمين، حتى ابن تيمية يقول: إنه ما ظهرت فتنة إلا من الشيعة، يعني الشيعة دول أساس كل بلاء، وأساس خيانات كتييرة جداً. من أول صلاح الدين، أنتوا عارفين الشيعة أرسلت لما صلاح الدين تملك في مصر، أصلاً صلاح الدين عين وزيراً، أصلاً بداية قصة صلاح الدين تعيين وزيراً، كان إيه؟ كان شاب صغير كده، فراح جاي الوالي الفاطمي وقتها تعيينه علشان إيه استصغره، يعني قال لك إيه أو نحطه كده إيه ما هيعمل حاجة.

ماشي، فطبعا صلاح الدين انتشر نفوذه، المهم عملوا إيه الشيعة الفاطمية في مصر؟ راحوا أرسلوا إلى النصارى: تعالوا واحنا في ضهركم، عشان يتخلصوا من صلاح الدين ومصر فصلا وما عرفوش طبعا يعملوا ده. من أول ده لغاية بقى ما عشناه نحن في سقوط العراق، احنا ده عشناه وشوفنا بعينينا مش كده آه إن العراق سلمت، فلكن الناس بتنسى ده سواء أو ما تعرفش التاريخ أو بتنسى الواقع، خصوصاً مع المشاعر بقى اللي عندنا إن هو اليهود وفتلاقي إيه المشاعر برضك بردك بتحرك.

فتيجي بقى أحداث مثل هذه علشان ترجع الأمور تتزن في نفوس أهل السنة مرة أخرى. الناس دي صعبة جداً، ولا أبدا لن يتمنوا لأهل السنة خيراً أبداً يا جماعة، عقيدة غير العقيدة، ودين غير الدين، وناس بتلعن أبا بكر وعمر وعثمان، ناس منهم من يتهم عائشة في عرضها، ومن يفعل ذلك فهو كافر لأنه مكذب للقرآن. من يفعل ذلك منهم، مش بقول كلهم كفر، لكن من يفعل ذلك منهم فهو كافر لأنه مكذب للقرآن.

ولذلك فضائع الشيعة في حق أهل السنة على مدار التاريخ، يعني من النابلسي، الشيعة قتلوا إزاي عالم من علماء السنة؟ أنا يعني احنا ده سمعنا عنه، احنا شفنا بقى في سجون بشار وسمعنا عن فضائع حصلت: سلخوا حي ابن النابلسي عالم من علماء السنة، سلخ حياً ممعنا في تعذيبه نفسياً. أدو لواحد يهودي هو اللي يقتله، هو اللي يسلخه! أنتوا عارفين يا جماعة احنا بنقول إيه؟ واحد يتسلخ يتشال جلده من على لحمه وهو حي! المسألة هنا مش مسألة قتل، مش مسألة إعدام، وابن النابلسي كان يردد قول الله عز وجل: ﴿كُلُّ ذَلِكَ كَانَ فِي الْكِتَابِ مَسْطُوراً﴾ [الكهف: 52]. مين بقى اللي رَقَّ لحاله؟ اليهودي راح طعنه في قلبه عشان يموت، اليهودي رق لحاله راح مموته.

وفضائع شيعة كتييرة يعني انتوا يعني دوروا عنها واقروا عنها وكده، فما عاوزين نغفل عن ده أن الفئة اللي كانت مسؤولة عن ده هم دول، ماشي؟ عن الفضائح هذه الفضائح التي سمعنا عنها، كسر النفسيات غير بقى التعذيب البدني، كسر النفسيات والحاجات يعني مش عاوزين نقولها.

وهذه مسألة رابعة بقى عاوزين خامسة يعني زي ما تكون عاوزين نتكلم عنها: فكرة يا جماعة ليس كل ما يعرف أو يسمع يقال. يا جماعة في هذه الأمور وهذه العظائم احنا مطالب عندنا أحكام شرعية هنا، يعني في الحتة دي عندنا أحكام شرعية. أول حاجة أن هذه الأمور التي تصل مش لازم أنت، لا أنت مطالب ولا تنشر ولا مطالب مش لازم، يعني مش لازم خلاص. ليه بقى؟ أول حاجة: في ممكن يكون في مبالغات في هذه الأمور، قد أنا ما بقولش أي أمر بيجيلك أو كذب في بعض الأمور، أنا برضه مش بتكلم على هذه المسألة بعينها ها، أنا بتكلم عموماً يعني يعني ابنوا هذه المسالة فكرياً عندكم ماشي.

ممكن يبقى الأمر برُمَّتِهِ أصلاً كذب، تاني مش بتكلم في هذه المسالة بعينها أو في مبالغات أو في كذا أو في كذا. الواجب إيه وقتها؟ السكوت، أنا ما اعرفْش حاجة، لا شفت حاجة ولا اعرف حاجة ولا خلاص، ويوم القيامة إن مش هيتقال لك: أنت سكت ليه في الموقف ده؟ بس ممكن يتقال لك: أنت ليه نشرت حاجة أنت مش متاكد منها؟ حاجة أنا ما اعرفْهاش ولا شفتها ولا اعرف عنها حاجة، مش لازم أنشرها، يعني مش لازم، ماشي.

﴿وَإِذَا جَاءَهُمْ أَمْرٌ مِّنَ الْأَمْنِ أَوِ الْخَوْفِ أَذَاعُوا بِهِ ۖ وَلَوْ رَدُّوهُ إِلَى الرَّسُولِ وَإِلَى أُولِي الْأَمْرِ مِنْهُمْ لَعَلِمَهُ الَّذِينَ يَسْتَنبِطُونَهُ مِنْهُمْ﴾ [النساء: 83]. يعني إيه يستنبطونه؟ يستخرجونه من معدنه. عمر يقول: كنت أنا ممن يستنبطه من إيه، أو يستخرجه من معدنه، أو كنت أنا ممن يستنبطون. ليه؟ لما سمع حاجة حصلت للنبي عليه الصلاة والسلام مع زوجته ما عادش يتكلم، كده راح للنبي على طول عليه الصلاة والسلام هو انت عملت كده على طول؟ طب احنا ما نعرفْش نعمل ده دلوقتي، خلاص اسكت! أذاعوا به، ليه تذيع؟ ليه تذيع بيه؟ دي أول حاجة.

تاني حاجة يا جماعة: من عقل الرجل إنه ينظر في مآل ما يفعل. يعني هَبَكْ خلاص عرفت إن ده حصل ومتاكد وشفت بعينيك عموماً أنا بكلم عموماً، هل معنى كده أنك لازم تقول؟ لا، برضه لا. برضه ليه؟ مآل هذا القول لازم نفكر في ده، يعني لو أنا قلت ده هيحصل إيه؟ لا، ممكن يحصل مشكلة أكبر، لا، ممكن المسلمون يصيبهم إيه؟ وَهَن وضعف وكده.

عارفين النبي عليه الصلاة والسلام، وقلنا احنا المثال ده هنا قبل كده في المسجد أظن يعني، لما فأرسل إثنين من الصحابه وهو في غزوة، وبعدين سمع أن اليهود نقضوا العهد في المدينة وهم على الجبهة. خلاص أنتوا متخيلين بقى النفسية اللي في الجيش دلوقتي؟ اليهود في المدينة نقضوا العهد، مين اللي في المدينة؟ نسائنا وأطفالنا، واحنا على الجبهة فأنْتُوا فاهمين الجيش شكله إيه؟ فراح أرسل إثنين من الصحابة علشان يعرفوا ده حصل ولا ما حصلش، فقال لهم إيه بقى؟ قال لهم: لو لقيتوه ما حصلش تعالوا قولوا بصوت عالي: لا، ما فيش نقض عهد ولا حاجة، ولو لقيتوا ده حصل فحَنُّوا لي لحناً، قولوا لي شفْرة أفهم منها.

ليس كل ما يعرف يقال. اللي بيعمل ده ده واحد عقله خفيف، كل ما يعرف حاجة يروح منزلها على الفيسبوك! غلط! غلط. في مآل؟ إيه؟ الإمام الشاطبي ماذا قال؟ قال: ومن خاصة العالم أنه ناظر في المآلات قبل أن يجيب على السؤالات. فهمتوا دي؟ يعني أنا لو عالم وسئل، طب أنا لو أجبت ممكن يحصل إيه؟ مش بقى هو المسألة مش حلال وحرام وخلاص، لا، ممكن فتوى تضم أمة، تدمر أمة! فتوى واحدة تدمر أمة!

الإمام أحمد مسجون وبيُعَذَّبْ، أو من أكثر الناس اللي امتحنت في فتنة إيه؟ خلق القرآن. وكان يرى أن من يقول بخلق القرآن فهو كافر، وبعدين يجي له الفقهاء بيشاوروه في إيه؟ الخروج على الإيه؟ على الحاكم، يقول: لا، لا أرى ذلك ولا آمر به، الدماء الدماء ماهياش أهواء! ده رجل ينظر في المآلات، مش أهواء، مش ابن الذين بقى اللي سجني وعذبني وقتل العلماء وبقول بخلق القرآن، يلا أخرجوا! ما فيش كده، ما فيش كده!

حد بقى دلوقتي يقول لك: الإمام أحمد بقى ده كان متخاذل وكان موالي للنظام وما، يا جماعة لا! من خاصة العالم أنه ناظر في المآلات قبل أن يجيب على السؤالات. فأنت كذلك، احنا لا علماء بقى ولا أي حاجة، احنا ناس على باب الله، ماشي؟ قدرنا أن إن إيه؟ واحد اختراع علينا حاجة اسمها فيسبوك، فبقى كل واحد شايف نفسه حاجة. ما هو هي دي القضية باختصار يعني.

قبل الفيسبوك ده أنت كنت راجل ماشي في الشارع لا حد يعرفك ولا تعرف حد، كل واحد كافي خيره شره. بقى في حاجة اسمها فيسبوك، فكل واحد خلاص شايف نفسه، خلاص ياما هنا ياما هناك، هو عنده الحتة اللي يكتب فيها كل حاجة عاوز يكتبها، ده يديك الحق لإيه بقى؟ إن شاء الله ولا حاجة! أنت أنت نفس الشخص اللي كان من عشر سنين وخمستاشر سنة بتمشي في الشارع ما حدش يعرف عنك حاجة. طب عرفت حاجة؟ اكتبها، مش لازم تتكتب! مش لازم! ليه؟ ممكن تعمل مصيبة أنت ما تعرفْش!

يبقى تفكر في مآلات الأمور، ماشي يا جماعة؟ الكعبة ماهياش على قواعد إبراهيم، طب النبي يعرف ده ولا ما يعرفوش عليه الصلاة والسلام؟ يعرف ده. فأول ما يفتح مكة يروح جاي على الكعبة هدمها ويقيمها على قواعد إبراهيم. صح عمل كده النبي عليه الصلاة والسلام؟ ليه؟ هو في حاجة أهم من الكعبة؟ يلا بقى وعلّاق على الفيسبوك تاني يوم: هو في إيه أهم من الكعبة؟! ما هو عمله كده، مش كده؟

أول ما أقول لك: طب الضريح بقى اللي في مسجد بني أمية اللي في، يا عم اهدأ، اهدأ يا حبيبي! طب النبي ليه ما عملش كده عليه الصلاة والسلام؟ وفي حاجة أهم من الكعبة عندنا في ديننا؟ آه، في أهم من الكعبة، أنت خايف ولا، آه، في في أن الناس تخش في الدين، مش كده؟ الكعبة اللي كل الناس بتعظمها ليك في الفتح تيجي تهدها لنا؟ ده مش بعيد يكذب هذا الفعل بعض مين بقى؟ مش الكفار، بعض المسلمين أصلاً! يبقى في نظر للمقالات.

قلت لكم مثال تاني هنا في المسجد برضه: النبي عليه الصلاة والسلام يجي رأس النفاق عبد الله بن أبي بن سلول ويقول اللي يقوله على النبي عليه الصلاة والسلام، يوم سيدنا عمر يقول له ايه: دعني أضرب عنق هذا المنافق. أهو حاجة جميلة جداً، واحد بيقول بيغلط في النبي عليه الصلاة والسلام وكلنا كده في بعضينا عارفين إنه منافق، ما فيش حد مش عارف. النبي عليه الصلاة والسلام ينظر إلى المآلات، يقول: «يتحدث الناس أن محمداً يقتل المنافقين». هيقولوا كده، هيطلع بكره الناس في التيك توك وعلى الفيسبوك وفي التوك شو، هيقولوا محمد صلى الله عليه وسلم بيقتل المنافقين؟ مش هيقولوا كده: «يتحدث الناس أن محمداً يقتل أصحابه».

احنا عارفين إنه منافق، ومش بعيد إن التانيين عارفين إنه منافق برضه خلي بالك، مش بعيد، لكن مش هيقولوا كده، هيطلعوا يقولوا: أهو شفتوا بقى اللي يروح لمحمد ليس آمناً على نفسه، ده بيقتل بمزاجه، يعني أنت رايح له النهارده صاحبه، بكره هيقتلك! أهو قتل واحد من أصحابه! ويمنع هذا في سورة النور. احنا كله في درس إيه؟ اهدوا، اهدوا، فكروا في المآلات! مش عارف تفكر، ما أنتاش ما أنتاش يعني لو ما كتبتش النهارده، احنا الأمة مش واقفة على كلام حضرتك ولا حضرتي، الأمة مش واقفة على كده. مش عارف مآل ما تكتب؟ اسكت!

في سورة النور قلنا لكم الذي تولى كبره مين ها؟ عبد الله بن أبي بن سلول برضه، مش كده؟ اتجلد كام جُلْدَة ولا جُلْدَة؟ مين اللي اتجلد؟ ممن اتجلد؟ حسان وغيره في صحابة. رأس الأمر الذي تولى كبره ما اتجلدش! إيه رايكم؟ مين اللي خد الأمر ده؟ النبي عشان بس عليه الصلاة والسلام، ما جلدهوش يا جماعة! في نظر للمقالات، عاوزين نهدى شوية في أفعالنا وفي أقوالنا، نتقي الله عز وجل. الكلمه اللي هتخرج منك أنت مسؤول عنها ومسؤول عن مغبتها، مسؤول عن مغبتها، ما تقولْش: أنا ما ماسكتْش بايدي سيف، ما ماسكتْش بايدي سلاح، أنا ما قلتْش. الكلمة تقتل!

ولذلك مش عارف مين من الصحابة لما يعني جم عشان إيه يخرج في أحد الصفين في فتنة حصلت يعني وأبى. وطبي ليه ما تمسكْش سلاح؟ بس تعال شوف يا جماعة كان برضه الناس عندهم عقل يعني فاهمين. قال إيه؟ يقول الناس: فلان في الصف. يعني هم جايين يقولوا إيه: طب تعال بس معانا نستبرك بيك كده يعني. فقال لهم لا، الناس هتشوفني تقول إيه؟ فلان في الصف، فيقعوا على حسني. فاهمين؟ فالنظر إلى المآلات مهم جداً.

طيب، إيه تاني؟ آخر حاجة ونختم بيها بقى: أن زي ما قلت لك تنشغل، دي قلناها بس يعني ما خدتش وقتها، أن تنشغل بنفسك بما أنت مأمور به، بما يصلح حالك، باللي ينفع إخوانك هناك، وده اتكلمنا فيه كتير ودروس كتير بقى.

احنا عاملين ملف عندنا على القناة، ملف غزة، اسمعوا الدروس دي. يعني اتكلمنا في الموضوع ده كتير، ماشي؟ حاجات أنت مطالب بيها هنا تنفعهم هناك. في درس سميناه إيه؟ نصر هنا ونصر هناك. ممكن تسمعوا ده، فبإذن الله يغنيكم عن غيره في النقطة دي. نصر هنا ونصر هناك؛ أنت لازم هنا تنتصر على حاجات عشان هما هناك ينتصروا. ونصرك هنا على الحاجات دي يصلهم هناك إن شاء الله، سواء في غزة، فلسطين، السودان، سوريا، لبنان، أي مكان.

فابقى انشغل بنفسك ودعك من غيرك. يوم القيامة تسأل عن نفسك، مش هتسأل فلان عمل إيه ولا علان عمل إيه. قل قولي هذا واستغفر الله العظيم لي ولكم. سبحانك اللهم وبحمدك، نشهد أن لا إله إلا أنت، نستغفرك ونتوب إليك. والسلام عليكم ورحمة الله وبركاته. جزاك الله خيراً.