بسم الله، الحمد لله، والصلاة والسلام على رسول الله، وعلى آله وصحبه ومن والاه. أشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وأهل بيته، كما صليت على آل إبراهيم، إنك حميد مجيد.
أما بعد، فالنهارده إن شاء الله درس استثنائي هنتكلم فيه عن مسألتين. الموضوع الأول؛ طبعاً نحن لا ندري ما الله صانع بنا وبالإخوة في الأيام القليلة المقبلة، نسأل الله عز وجل أن يجعل لهم من كل هم فرجاً، ومن كل ضيق مخرجاً. فكان لابد أن نهرول إلى القرآن لنحاول أن نستخرج منه ما يكون لنا ضياءً في تلك الأيام المقبلة. والحقيقة يا جماعة إذا تدبرنا القرآن وجدنا القرآن تكلم عن مسألة الإخراج كثيراً.
أن يعمل أهل الباطل على إخراج أهل الحق من أرضهم، المعنى ده متكرر في القرآن؛ فنجد مثلاً قوم شعيب قالوا: ﴿قَالَ الْمَلَأُ الَّذِينَ اسْتَكْبَرُوا مِن قَوْمِهِ لَنُخْرِجَنَّكَ يَا شُعَيْبُ وَالَّذِينَ آمَنُوا مَعَكَ مِن قَرْيَتِنَا أَوْ لَتَعُودُنَّ فِي مِلَّتِنَا﴾. وقوم لوط: ﴿أَخْرِجُوا آلَ لُوطٍ مِّن قَرْيَتِكُمْ إِنَّهُمْ أُنَاسٌ يَتَطَهَّرُونَ﴾. وقوم موسى، فرعون أراد أن يستفزهم من الأرض فأغرقناه ومن معه جميعاً. ومحمد صلى الله عليه وسلم أخرجوا، وفي آيات كتير من القرآن ذكر الله عز وجل أن هذا الإخراج سنة متكررة. ماذا قال الله عز وجل؟ ﴿وَقَالَ الَّذِينَ كَفَرُوا لِرُسُلِهِمْ لَنُخْرِجَنَّكُم مِّنْ أَرْضِنَا أَوْ لَتَعُودُنَّ فِي مِلَّتِنَا فَأَوْحَىٰ إِلَيْهِمْ رَبُّهُمْ لَنُهْلِكَنَّ الظَّالِمِينَ * وَلَنُسْكِنَنَّكُمُ الْأَرْضَ مِن بَعْدِهِمْ ذَٰلِكَ لِمَنْ خَافَ مَقَامِي وَخَافَ وَعِيدِ﴾ [إبراهيم: 13-14]. فكل الذين كفروا إذا علا كعبهم وكانوا أكثر وأقوى من أهل الإيمان عملوا على إخراجهم. فمسألة التهجير القسري موجودة في القرآن، مبثوثة فيه، وأن ده سنة الله عز وجل في الكون.
ورقة بن نوفل علم تلك القضية لما جاء النبي صلى الله عليه وسلم وقال: زملوني زملوني، القصة معروفة، وخديجة أرسلت إلى ورقة وكان يقرأ كتاب يهود، لما جه قال للنبي عليه الصلاة والسلام: ليتني فيها جذعاً إذ يخرجك قومك. خلي بالكم ده أول يوم رسالة، أول ما جاء النبي صلى الله عليه وسلم ذلك الناموس الذي أتى موسى جبريل عليه السلام، قال له ورقة: ليتني فيها جذعاً إذ يخرجك قومك، قال: أو مخرجي هم؟ فدي قضية متكررة، مسألة التهجير قضية تتكرر مع أهل الإيمان؛ متى إذا قويت شوكة أهل الكفران وأهل الطغيان عملوا على إخراجهم من أرضهم.
العجيب يا جماعة، طبعاً إخراج سيدنا محمد صلى الله عليه وسلم والصحابة جاء في عدة سور، فذكر في سورة التوبة، وذكر في سورة الأنفال، وذكر في سورة الإسراء. وخلونا نقف شوية مع سورة الإسراء دي، لأن سورة الإسراء فيها معنى عجيب، سورة الإسراء سورة مكية، وبعدين ذكر الله عز وجل إرهاصات الإخراج في سورة مكية، وعشان كده بنقول موضوع الإخراج في الإسراء لازم نقف معاه شوية، لأن سورة الأنفال مدنية، يعني كان خلاص هو أخرج، وكذلك سورة التوبة، فكان أخرج خلاص، إحنا بنتكلم عن حاجة ماضية، إنما سورة الإسراء سورة مكية، وذكر الله عز وجل إخراج كفار قريش للنبي محمد صلى الله عليه وسلم فيها: ﴿وَإِن كَادُوا لَيَسْتَفِزُّونَكَ مِنَ الْأَرْضِ لِيُخْرِجُوكَ مِنْهَا وَإِذًا لَّا يَلْبَثُونَ خِلَافَكَ إِلَّا قَلِيلًا * سُنَّةَ مَن قَدْ أَرْسَلْنَا قَبْلَكَ مِن رُّسُلِنَا وَلَا تَجِدُ لِسُنَّتِنَا تَحْوِيلًا﴾ [الإسراء: 76-77]. فكون أن الإخراج يذكر في سورة مكية محتاجين نقف معاها شوية.
الموضوع الثاني، سورة الإسراء برضه إن لفظ الاستفزاز ده، الجذر اللغوي بتاعه إيه؟ فز. معنى فز إيه؟ فز فيه معنى الخفة والسرعة. يعني الإخراج ده مسألة، والاستفزاز فيها معنى أن ده يحصل بسرعة، حتى إحنا في اللغة العامية بنستخدم اللفظ ده في كده، لما أقولك إيه فز، فز دي تفهم منها أنك تقوم، ولا تقوم ببطء؟ لا، بسرعة، يعني اتحرك بسرعة. فالفز يحمل معنى الخفة والسرعة. الجذر اللغوي ده جه كام مرة في القرآن؟ مشتقاته ثلاث مرات بس في القرآن كله، الثلاثة في سورة الإسراء.
يبقى الجذر اللغوي بتاع فز مشتقاته جت في القرآن ثلاث مرات بس في القرآن كله، الثلاثة في سورة الإسراء: مرة عن الشيطان: ﴿وَاسْتَفْزِزْ مَنِ اسْتَطَعْتَ مِنْهُم بِصَوْتِكَ وَأَجْلِبْ عَلَيْهِم بِخَيْلِكَ وَرَجِلِكَ وَشَارِكْهُمْ﴾، ومرة عن فرعون: ﴿فَأَرَادَ أَن يَسْتَفِزَّهُم مِّنَ الْأَرْضِ فَأَغْرَقْنَاهُ وَمَن مَّعَهُ جَمِيعًا﴾، ومرة عن كفار قريش مع النبي عليه الصلاة والسلام: ﴿وَإِن كَادُوا لَيَسْتَفِزُّونَكَ مِنَ الْأَرْضِ لِيُخْرِجُوكَ مِنْهَا﴾. فالثلاثة جم في سورة الإسراء. طيب إيش معنى الثلاثة يجوا في سورة الإسراء؟ لعل والله أعلم، كان معنى الاستفزاز الأول يا جماعة -بس عشان نفهم يعني إشمعنى الجذر اللغوي ده ما يجيش غير في سورة الإسراء- كون أن حد يخرجك من أرضك، معنى كده أن وضع القوة شكله إيه؟ ميزان القوة معتدل ولا في غلبة؟ في غلبة، واحد جاي بيقولك اخرج دلوقتي من الأرض، هتتهجر، معنى كده أن هو له القوة وله الغلبة.
طيب ده كمان في استفزاز، استفزاز يعني لا ده أنت هتخرج وبسرعة، هنا مش مجرد غلبة، يعني ما هياش الغلبة اللي الميزان قريب من بعضه فهيبقى في مناوشات ومجادلات وبعدين حرب وبعدين أخرج، الموضوع مش كده، الموضوع استفزاز يعني ده أنت هتخرج وبسرعة، فهنا مفيش أصلاً معادلة عشان تقال مش إحنا عندنا قوة وهم عندهم قوة بس قوتهم أكبر شوية. ده معنى الاستفزاز، وعشان كده هتلاقوا المعنى ده موجود في فرعون مع قوم موسى، أيوه ما كانش فيه وجه للمقارنة، وكذلك كفار قريش مع النبي محمد صلى الله عليه وسلم وقت الهجرة، لدرجة هو هاجر إزاي النبي عليه الصلاة والسلام؟ متخفياً، يعني القصة اللي إحنا عارفينها، ليه؟ ما هو مفيش موازين خالص، فكان لابد نأخذ بكل الأسباب علشان نفر بالدين. فدول معنيين؛ المعنى الأول أن في قوة أكبر، والمعنى الثاني أن مش بس قوة أكبر، لا ده مفيش مقارنة بين قوى الكفر وقوى أهل الإيمان عشان يجي لفظ الاستفزاز ده، اللي هو بسرعة هتخرج، بسرعة طلب، ما هو الألف والسين والتاء في اللغة بتفيد الطلب، ففكرة أن هو يستفزك يعني يطلب منك الفز، تتحرك بسرعة.
هنا كأني مفيش رفاهية أني أقول لا أصلاً، وده معنى ثالث بقى، اللي هو إيه؛ عارفين يا جماعة أن ممكن الواحد لو الموضوع فيه رفاهية التفكير أو التدبير ممكن يعرف يدبر شيئاً من الأمر، إنما فكرة السرعة دي بتعمل إيه؟ بتشل تفكيرك، فكرة السرعة بتشل، أنتوا عارفين ده ولا مش عارفينه؟ طيب إحنا عندنا في دماغنا نوعين من التفكير، نمطين من التفكير، ربنا خلقنا باتنين سيستم كده في الدماغ، سيستم بتستخدمه علشان تحلل البيانات والمعلومات فتاخذ قرار وأنت هادي، والقرار ده غالباً قرار استراتيجي، يعني قرار كبير في حياتك بينبني عليه أمور، خلاص كده؟ في سيستم تاني في دماغك، ده مش بتاع تحليل بيانات ولا خالص، ده بياخد قرارات فورية. خطر كبير جداً أنك تستخدم السيستم الثاني ده في قرار المفروض تستخدم فيه السيستم الأول. ربنا خلق ليه السيستم الثاني ده فينا؟ علشان وقت الخطر، أنت وقت الخطر تبقى سايق العربية مثلاً في جزء من الثانية بتاخد القرار أنك تفرمل أو تحدي فيمين، مش بتحلل بيانات يعني، ساعتها مش هتقعد تقول إيه طيب ما هو بقى الأول نشوف، لا، خلاص، هو في جزء من ثانية بتاخد قرار، مش دايماً القرار يبقى صح، لكن ده ربنا خالق النظام ده، لو النظام ده مش عندنا في دماغنا ما كانش حد هيعرف ده، أنه ياخد قرار سريع فجائي.
فبتاع المبيعات يعمل إيه؟ هو بتاع المبيعات ده عارف أن السلعة اللي بيبيعها دي لو أنت قعدت وفكرت وحللت غالباً مش هتشتري، فيقوم يدخل عليك دخلة يخليك تفصل النظام الأول وتشتغل بالنظام الثاني، اللي هو يقولك هو عرض، وده في ناس بتعمل أكثر من كده، عرض في المكالمة دي، يعني لو قفلنا التليفون العرض انتهى، يقوم يخليك تعمل إيه؟ مفيش وقت للتفكير، لازم تاخد قرار. واضحة دي؟ ففكرة الاستفزاز اللي هو بسرعة اخرج، أنت هنا ما عندكش رفاهية أنك تقعد وتحلل بيانات وتاخد قرارات، مفيش. فالوضع في كلمة الاستفزاز دي وضع مش سهل، وضع مش بسيط. فلعل والله أعلم ذكر هذا الجذر اللغوي في سورة الإسراء فكأنك محتاج لمواجهة هذا الاستفزاز لأمرين، الأمران اللي هما إيه؟ إسراء ومعراج.
الإسراء يا جماعة فيه معنى الوحي، لأن الإسراء أسرى بالنبي صلى الله عليه وسلم إلى بيت المقدس، فيقابل الأنبياء كلهم، يجتمع الأنبياء اللي بيجمع بينهم الوحي، فما نقول إسراء وكل الأنبياء اجتمعوا، إيه العامل المشترك للأنبياء؟ الوحي. والمعراج -وإن لم يذكر في سورة الإسراء صراحة- إنما إحنا أول ما يتقال إسراء خلاص يجي على طول في دماغك المعراج، وهو الربط بالسماء، كأنك في مواجهة هذا أنت محتاج لوحي، أو إن شئت فقل لعلم، ومحتاج لربط بالسماء بالله عز وجل. ومن غير دول، من غير دول مش هتعرف تواجه هذا الاستفزاز، هذا الإخراج السريع الفوري، اللي معناه أن موازين القوى غير متكافئة وغير متعادلة، ومش بس كده، لا دي الفروق شاسعة، إحنا محتاجين إيه في ده؟ محتاجين إيه سواء استفزاز الشيطان استخفافه بنا، أو استفزاز أهل الكفر زي استفزاز فرعون لقوم موسى، واستفزاز قريش للنبي محمد وأصحابه صلى الله على النبي محمد ورضي الله عن أصحابه؟
محتاجين لإيه بقى؟ محتاجين للوحي ومحتاجين لربط بالسماء، إن شئت فقل تحتاج لعلم وحال، محتاج لعلم ومحتاج لحال، أو علم وعمل، علم، والعلم تعرف به مقادير الأمور وتعرف به سنن الله عز وجل في كونه وبأي شيء تواجه تلك السنن، وده اللي هنحاول نعرفه النهارده إن شاء الله، وحال مع ربنا سبحانه وتعالى حال، علشان إحنا هنعرف لما نيجي نتعلم العلم بقى اللي بقول هو الوحي، هنعرف أنك لن تواجه هذا الاستفزاز إلا بحال، لن تواجه الاستفزاز إلا بحال مع الله سبحانه وتعالى. الكلام ده ياما كررناه هنا، مش كده؟ أن الله عز وجل إذ وعد النصر والتمكين وكذا وكذا ما وعده لأي حد، وعده لمين؟ اللي ليهم حال مع ربنا سبحانه وتعالى: ﴿وَلَيَنصُرَنَّ اللَّهُ مَن يَنصُرُهُ﴾، اللي ليه حال مع ربنا هو ده اللي ربنا ينصره. وبشر الله عز وجل مع كل اللي إحنا عمالين نقوله ده والاستفزاز اللي هيحصل في الأرض وكذا وكذا، بشر الله عز وجل أن في نهاية الأمر الأرض بتاعة مين: ﴿وَلَقَدْ كَتَبْنَا فِي الزَّبُورِ مِن بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ﴾ [الأنبياء: 105]. عبادي اللي ليهم حال مع ربنا، عبادي اللي يربطهم بالسماء، سبب المعراج، يرثها عبادي الصالحون، والعاقبة للمتقين، ومن المتقون؟ اللي ليه حال مع ربنا سبحانه وتعالى.
طيب إزاي بقى لنا حال مع ربنا سبحانه وتعالى؟ بالعلم، بالوحي، نشوف إزاي نصل لهذا الحال مع الله عز وجل، فإحنا محتاجين لمواجهة هذا الاستفزاز، هذا الإخراج، هذا التهجير أن نجمع بين الأمرين، بين إسراء ومعراج، بين وحي وبين حال مع الله سبحانه وتعالى. هنا يا جماعة إحنا قلنا القرآن ذكر عدة إخراجات، يعني قوم شعيب وقوم لوط، وقلنا الآيات، لكن ذكر الله عز وجل إخراجين كبيرين، وإن شئت فقل تهجيرين كبيرين في كتابه وكرر ذكرهما، اللي هما مين ومين؟ اللي سائل لهم موسى عليه السلام وقوم موسى بنو إسرائيل، والنبي محمد صلى الله عليه وسلم وأصحابه، دول تهجيران كبار في التاريخ، فمهم أن إحنا نقف مع تهجيرين دول، خصوصاً أن هم دول التهجيران اللي اتذكروا في سورة الإسراء بلفظ الاستفزاز، هم دول التهجيران اللي اتذكروا، وبعض أهل العلم قال إن ذكر التهجير الإسرائيلي، تهجير فرعون لبني إسرائيل في سورة الإسراء، إنما هو ذكر تبعاً لا أصلاً، يعني هو ذكر بس علشان يتقال للنبي محمد عليه الصلاة والسلام أنك لما تهجر أبشر وادي مثال اهو، فذكر في سورة الإسراء عشان كده واضح. لكن يا جماعة لو تأملنا هذين الإخراجين أو هذين التهجيرين هنلاقي فيه فروق.
بينهم هنلاقي فروق بين التهجيرين، وده اللي عاوزين نستشف منه أمورًا تكون نبراسًا لنا في طريقنا إلى الله عز وجل، وفي مدافعة سنن الله القدرية بآياته الشرعية. وده اللي مطلوب مننا؛ لأن مش مطلوب مننا عشان الناس اللي بتفهم الكلام غلط إننا نقعد ونحط إيدينا على خدنا ونقول إحنا بقى نسلم لقدر الله، لا هو مش ده المطلوب، وده إحنا شرحناه كتير.
ندافع سنن الله عز وجل وأحكامه القدرية أو أوامره القدرية بأوامر الشرع، وهذا مراد الله منا أصلاً. ربنا سبحانه وتعالى لما يضيق على أهل الإيمان في فترة، ليه بيضيق عليهم؟ علشان يرجعوا للوحي، يشوفوا: يا رب إحنا نعمل إيه علشان الحال ده يتغير؟ فلما يرجعوا للوحي ويسألوا ربنا: يا رب نعمل إيه علشان الحال ده يتغير؟ يلاقي إن الحل فين؟ في المعراج. أن يكون بينكم وبين الله عز وجل حال، أحوالنا مع ربنا اللي بها تُرفع تلك البليات.
هنلاقي فروق بين التهجيرين؛ التهجير الأول تهجير بني إسرائيل. أول فرق واضح جداً يا جماعة، أن في تهجير بني إسرائيل ربنا سبحانه وتعالى لم يكلف بني إسرائيل أن هم اللي يحاربوا فرعون وموتوه ويسروا الجيش، ما عملش كده، بل تكفل بذلك سبحانه وتعالى، فأراد أن يستفزهم من الأرض: ﴿فَأَغْرَقْنَا أَحَدَهُمْ وَجَعَلْنَا بَنِي إِسْرَائِيلَ﴾ [الزخرف: 54]، وبعدين قلنا: ﴿وَمِن بَعْدِهِ أَوْرَثْنَا بَنِي إِسْرَائِيلَ الْأَرْضَ﴾ [يونس: 93]. يعني إيه اللي حصل؟ جاية لهم مباشرة كده هربوا، وربنا سبحانه وتعالى هو الذي تكفل أن يغرق فرعون وقومه، تكفل بذلك الله عز وجل.
التهجير الثاني ماذا قال الله عز وجل فيه؟ وخلونا ما نخرجش برا سورة الإسراء، ماذا قال: ﴿وَكَادُوا لَيَسْتَفِزُّونَكَ مِنَ الْأَرْضِ لِيُخْرِجُوكَ مِنْهَا إِذًا لَّا يَلْبَثُونَ خِلَافَكَ إِلَّا قَلِيلًا﴾ [الإسراء: 76]. إيه اللي حصل بعد سنة ونص من خروج النبي ﷺ؟ عاقبهم الله عز وجل بأيدي من أيدي أهل الإيمان في غزوة بدر، وبعد سنوات قليلة يحصل فتح مكة: ﴿إِذًا لَّا يَلْبَثُونَ خِلَافَكَ إِلَّا قَلِيلًا﴾.
يبقى ده اختيار الله عز وجل لهذه الأمة، اختيار الله عز وجل لأمتنا أن يكون عذاب القوم بأيدينا؛ «قاتلوهم يعذبهم الله بأيديكم». يبقى معنى كده إن ربنا سبحانه وتعالى ممكن يهلك، هو قد يهلك القوم الكافرين الطاغين من غير استعمال لأهل الإيمان، قد يفعل ذلك سبحانه وتعالى، وقد يستعمل أهل الإيمان ليفعل ذلك بأهل الكفران. طريقين، أنهي أحسن؟ إيه رأيكم؟ الأحسن هو اختيار الله عز وجل، هو الأفضل، إحنا مع أحب الأمرین إلينا.
لكن اللي عاوزين ناخد بالنا منه إن الطريقة الأولى ما تفتكروش سهلة؛ لأننا ممكن دلوقتي بنتكلم نلاقي حاجة جميلة كده تنزل صاعقة تدمر، وإحنا قاعدين، هو ده مش موضوع سهل. عارفين ليه يا جماعة مش موضوع سهل؟ لأن لو ده حصل فانتظروا ابتلاء؛ لأن الحياة دي ما فيهاش حاجة سهلة كده، لو ده حصل من ربنا سبحانه وتعالى هيجي بعده تكليف.
ما أخذتوا سورة التهجير للآخر، يعني ما تجيش تقف هنا إن هو «أغرقنا ومن معه جميعًا»، وبعدين حصل إيه لبني إسرائيل؟ جالهم ابتلاء: ﴿ادْخُلُوا الْأَرْضَ الْمُقَدَّسَةَ الَّتِي كَتَبَ اللَّهُ لَكُمْ﴾ [المائدة: 21]، يلا روحوا حاربوا بقى. عملوا إيه؟ سقطوا في الابتلاء، قالوا: «يا موسى إن فيها قومًا جبارين لا ندخلها». سقطوا في الاختبار، طب استعينوا بالله واصبروا، مفيش؛ «اذهب أنت وربك فقاتلا إنا هاهنا قاعدون».
روح روح حارب مع ربنا، خلي بالكم يا جماعة الكلمة دي قالوها ليه؟ ما شافوهاش أصلاً، هم شافوها فعودوا عليها: «اذهب أنت وربك فقاتلا إنا هاهنا قاعدون». هو كان حد يتخيل أن فرعون يموت؟ يا جماعة قيل إن جثة فرعون نبذها البحر عشان بنو إسرائيل يصدقوا، يعني لو ما كانتش حصل كده ما كانوش هيصدقوا، فرعون ده ما بيموتش. ﴿لِنُجِيَّكَ بِبَدَنِكَ لِتَكُونَ لِمَنْ خَلْفَكَ آيَةً﴾ [يونس: 92]. فتبقت جثة فرعون لغاية النهارده يروحوا يتفرجوا عليها، فيكون آية لمن خلف فرعون على نهجه وطريقته.
على كل حال، ما كانش حد يصدق أن فرعون بجيشه الجرار ده قوة غاشمة، طيب ادينا نجيناكم أهو، يلا بقى روحوا ادخلوا بيت المقدس، قالوا لا. طب هنعمل إيه؟ «اذهب أنت وربك فقاتلا إنا هاهنا قاعدون»، خلاص اتعودوا على كده. إيه اللي حصل؟ ضُرب عليهم التيه أربعين سنة؛ أربعين سنة يتيهون في الأرض، عارفين يعني يتيهون في الأرض يا جماعة؟ أربعين سنة في مكان مش عارفين يخرجوا منه، يفضلوا يلفوا طول النهار في الآخر يلاقوا نفسهم رجعوا لنفس النقطة اللي هم كانوا فيها.
ضرب عليهم التيه مكان مش عارفين يخرجوا منه، مش السور مثلاً حواليهم مش عارفين يخرجوا من السور، لا، تاهوا في الأرض مش عارفين يخرجوا من الأرض. ليه أربعين سنة؟ شمعنى الرقم ده؟ قالوا أربعين سنة عشان يبقى الجيل ده كله راح؛ لأن الجيل ده مش جيل نصر وتمكين، فربنا ضرب عليه التيه أربعين سنة عشان الجيل ده كله يكون مات، والله عز وجل يكتب النصر والتمكين لجيل آخر مش الجيل ده.
وفي هذا التيه مات هارون، وبعده بثلاث سنين مات موسى، وفتح الله بيت المقدس على يد يوشع بن نون بجيل تاني. طبعًا ما قصدش هارون وموسى من الجيل، لا، الجيل اللي هم بنو إسرائيل، أما المقصود الجيل ده اللي كانوا مع موسى، مش دول اللي ينفعوا، دول ضُرب عليهم التيه.
التيه ده بقى يا جماعة ممكن يبقى تيه حسي زي ما ضُرب عليهم، وقد يُضرب على أناس تيه معنوي؛ عارف اللفظ يقول لك أنا تايه، أنا مش عارف، أنا بلف في ساقية، تمر السنين وأنا في نفس حتتي، تيه معنوي عياذًا بالله ونسأل الله السلامة. فـضرب الله عز وجل عليهم التيه، فإحنا ما بقاش قاعدين كده عمالين نتمنى ربنا اللي ينزل صاعقة، وربنا اللي يرسل مش عارف إيه، ربنا اللي يجيب حرايق في كاليفورنيا.
وربنا هو ده ببلاش، مافيش حاجة في الدنيا ببلاش؛ فربنا سبحانه وتعالى لو عمل ده في وقت من الأوقات، اعرفوا أن في بعديها اختبارًا. أهو عمل، والقوة التي كانت تظن نفسها لا تقهر قهرتها، لكم ها أنتم بقى هتعملوا إيه؟
لا، في واجبات عليكم، الله عز وجل لم يختر ذلك الاختيار مع أمة محمد ﷺ. ده أنتم هتهجروا، وبعدين وأنتم بتهجروا، ما هوش تهجير، أنتم عارفين يا جماعة الخروج من الدار ده مش حاجة سهلة، جعله الله عز وجل قسيم الموت؛ شوف أنت إزاي بتكره الموت، ماذا قال الله عز وجل: ﴿وَلَوْ أَنَّا كَتَبْنَا عَلَيْهِمْ أَنِ اقْتُلُوا أَنفُسَكُمْ أَوِ اخْرُجُوا مِن دِيَارِكُم مَّا فَعَلُوهُ إِلَّا قَلِيلٌ مِّنْهُمْ﴾ [البقرة: 95].
فالخروج من الدار، الخروج من موطنك الأصلي، مش حاجة سهلة. إحنا هنا يا جماعة مش بنقول واحد رايح الخليج عشان يحسن مستواه الاجتماعي، ولا واحد مسافر أوروبا علشان يشتغل، إحنا مش بنقول كده؛ ده واحد سايب، متهجر قسرًا، ورايح لحتة مش عارف هو رايح فين ولا هيعمل إيه، ما يعرفش حاجة.
وطريق الهجرة من الطرق التي قعد فيها الشيطان لابن آدم، كما ذكر ذلك النبي محمد ﷺ وشبه تشبيهًا عجيبًا؛ جلس له بأطرقه كلها، فقعد له في طريق الهجرة، قال: «تدع أرضك وسماءك، وإنما مثل المهاجر كمثل الفرس في الطول». عارفين إيه الفرس في الطول؟ الفرس زمان كانوا يربطوه بحبل، وبعدين يربط الحبل ده في أي حاجة، في عمود في أي حاجة، الحبل ده كانوا يسموه الطول.
الفرس في الطول، أنتم عارفين طبيعة الفرس الجموح يحب يجري، مش كده؟ أول ما تحطه في الطول تلاقي الفرس حركته مقيدة، بيتحرك بس حركة مقيدة، آخره طول الحبل؛ فمثل المهاجر كمثل الفرس في الطول، مهما كانت حركته فهو مقيد. ولذلك المهاجر أول ما يرتفع عنه سلطان القسر، تجدون أول حركته هي في الرجوع إلى وطنه. وإحنا بنتكلم عن المهاجر اللي هو مهاجر هجرة قسرية، يعني مش رايح مكان هو متدلع فيه خالص.
ليه هو بيحن لده؟ واضح جدًا من اجتماع الكفار في دار الندوة، يعني شغالين بأريحية؛ هنعمل في إيه في الراجل ده؟ طب ما نخرجه؟ لا، هو طبعًا قالوا نخرجه فرجعوا عن الكلام ده. طب إزاي إحنا بعد كده القرآن أثبت لهم الإخراج لأن هم اللي جاؤوا لده وإلا كانوا قتلوه؟ أنتم عارفين دار الندوة، عارفين القصة، القصة مشهورة مش محتاجين نعيدها.
طيب نخرجه؟ لا ما نخرجش. طب نسجنه؟ لا ما نسجنش، نخرجه؟ قالوا طبعا الشيطان كان معاهم في صورة شيخ جدي فقال: يعني هتخرجوا؟ هينتشر القول بتاعه ويرجع يحاربك. طب نسجن؟ راح داخل الشيطان في الخط وقال: هتسجن؟ هيخرج أمره من بين الجدران وكذا. طب نقتله؟ وأجمعوا أمرهم أن هم يقتلوه، وواضح جدًا الأريحية في اتخاذ القرار، وهنجيب من كل قبيلة رجل، يعني القبائل كلها معاهم.
فهاجر النبي ﷺ في تلك الأجواء، استفز بسرعة، هاجر ﷺ. طيب لما هاجر بقى وطلعوا وراه، كان ممكن يحصل إيه؟ على الأقل اللي طلعوا وراه دول كان ممكن يحصل زي ما حصل مع فرعون، تنزل عليهم صعقة مثلاً تموتهم، يطلع عليهم مش أي حاجة، ما حصلش كده، ما حصلش. ويوصل للغار، ويوصلوا هم كمان للغار وما يحصلش حاجة.
وييبقى الفرق بينهم وبين أن هم يقتلوا النبي ﷺ أنه واحد يطقطق رأسه بس، لو طقطق أحدهم رأسه لرانا، واحد يطاطي لتحت هيشوفنا وهينتهي الأمر، ويأبى الله عز وجل أن يفعل ما فعله مع فرعون. ليه؟ لأن إحنا هنربي جيل، الجيل ده هو اللي هيعذب الكفار بأيديهم. فالله عز وجل يربي ذلك الجيل على يد النبي محمد ﷺ، وإن شئت فقل الجيل أصلاً يتربى من الأول مش من بعد الهجرة، الجيل ده بيتربى من أول يوم وحي.
والجيل ده بيتربى ويقع منهم هفوات، يقع ويتربى ولسه هيقع منهم هفوات تاني، وإحنا أخدنا هنا غزوة أحد، مش كده؟ هيقع، هتفضل الهفوات بتقع، وهتقع منهم هفوات حتى قرب نهاية الرسالة، قبل ما النبي ﷺ يموت بحاجة بسيطة ويقولوا: «لنهزم اليوم من قلة». وعملية التربية مستمرة، ما فيش حد يا جماعة وصل لآخر السقف في التربية.
أوعوا تفتكروا كده بقيت شيخ، بقيت طالب علم، بقيت داعية، بيجيلك ناس بيسمعوك ناس، أوعى تفتكر نفسك إنك خلاص. الصحابة رضوان الله عليهم بيتربوا لآخر نفس، ويدخلهم آفات القلوب لآخر نفس، ما هو «لنهزم اليوم من قلة» دي آفة قلبية، صح ولا لا؟ وقيلت آفة قلبية دخلت قلوب بعض الصحابة في الآخر نفس.
إحنا بنتربى، أوعى أنت عارف لما تقول أنا خلاص أنا أعرف، إن أنت دي نفسها آفة قلبية، أنت معجب بنفسك. يعني لو قلت لا خلاص أنا كده أنا اتربيت، نقول لك أولًا: ده دليل إنك ما اتربتش، يعني ما تربيتش تربية إيمانية كاملة؛ ليه؟ لأن لو متربي تربية إيمانية مش هتقول الكلمة دي، هتبقى خايف. ودليل تاني على إنك جاهل بنفسك التي بين جنبيك، ما أنت مش عارف نفسك، وخوفك من أمر الله عز وجل مخالفة صريحة: ﴿فَلَا تُزَكُّوا أَنْفُسَكُمْ هُوَ أَعْلَمُ بِمَنِ اتَّقَى﴾ [النجم: 32].
فأبى الله عز وجل أن يعامل كفار قريش معاملته سبحانه وتعالى لفرعون، لحكم منها أن إحنا بنربي جيل هو اللي هيعذب، ﴿قَاتِلُوهُمْ يُعَذِّبْهُمُ اللَّهُ بِأَيْدِيكُمْ وَيُخْزِهِمْ وَيَنْصُرْكُمْ عَلَيْهِمْ وَيَشْفِ صُدُورَ قَوْمٍ مُؤْمِنِينَ * وَيُذْهِبْ غَيْظَ قُلُوبِهِمْ﴾ [التوبة: 14-15]. كل ده هيحصل بإيه؟ قاتلهم، ويبشر الله عز وجل النبي ﷺ بذلك في سورة مكية: ﴿وَإِن كَادُوا لَيَسْتَفِزُّونَكَ مِنَ الْأَرْضِ لِيُخْرِجُوكَ مِنْهَا وَإِذًا لَّا يَلْبَثُونَ خِلَافَكَ إِلَّا قَلِيلًا﴾ [الإسراء: 75].
وقد حدث وأخرجهم الله عز وجل في بدر، وحدث ما حدث، ثم كان بعدها بسنوات فتح مكة. طيب يعني ما حدث للنبي ﷺ هل كان ببدع؟ يعني ملوش مثال سابق؟ لا، الدليل اللي بعده على طول قال الله عز وجل: ﴿سُنَّةَ مَن قَدْ أَرْسَلْنَا قَبْلَكَ مِن رُّسُلِنَا وَلَا تَجِدُ لِسُنَّتِنَا تَحْوِيلًا﴾ [الإسراء: 71]. فهذه سنة الله عز وجل، اللي هي أبشروا، سنة الله عز وجل إهلاك الظالمين، سنة الله عز وجل إن الأرض يرثها عباده الصالحون، سنة الله، وهذا نقسم بالله عليه أنه سيحدث.
مش بتاعتنا، جيل يباد بالكامل عشان يجي جيل يرى ذلك؟ مش بتاعتنا. إيه اللي بتاعنا؟ بتاعنا أن نكون على الطريق، أن تأتينا ميتنا ونحن على الطريق. يا رب، ما مرادك منا؟ يا رب، هذه المقادير التي قدرتها علينا، سواء كانت هذه المقادير أن أهلنا في غزة يفضلوا في غزة، أو أن أهلنا في غزة يهجروا؛ نحن لا ندري ما الله عز وجل صانع. وأنا أكرر، الله هو الذي يصنع، الله هو الذي يفعل. يا جماعة، كبروا دماغكم من أي قوى أرضية، دي مش دروشة، مش "كبروا دماغكم" يعني لا، يعني الله عز وجل هو الذي يفعل: ﴿إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ﴾ [يس: 82]. كن فيكون دي بقى؛ كن بلا تدخل وبلا أسباب، أو كن بأسباب، اللي من جملتها الكفار وأمريكا وغيرهم، لكن في الآخر من الذي يدبر أمر الكون؟ مش أمريكا، مش أمريكا، بل الله عز وجل يدبر أمر الكون وأمر أمريكا.
فنحن لا ندري ما الله صانع في الأيام المقبلة، وربما في الساعات المقبلة، لكن الذي علينا أننا إذا نظر الله عز وجل إلينا، وجدنا نتلمس مواقع الوحي: يا رب نعمل إيه؟ يا رب هذا الإخراج الذي أخرجته للنبي صلى الله عليه وسلم كان إيه المراد منه؟ وإزاي تعالج الموضوع؟ تعالج الموضوع بجيل تربى فجاهد فانتصر ففتح، ده المطلوب. هذا الجيل، مش أي جيل، يعني مش جيل، احنا مش بنتكلم على إيه إزاي تنشل وإزاي، لا مش كده، هو فيه معاني إيمانية عالية بها ينصر الله عز وجل عباده سبحانه وتعالى، والله عز وجل لم يعد نصره في القرآن ولا تمكينه أبدًا غير للمؤمنين؛ فلازم تحقيق الإيمان، لازم تحقيق الإيمان.
﴿وَلَنُسْكِنَنَّكُمُ الْأَرْضَ مِن بَعْدِهِمْ﴾ [إبراهيم: 14]. شوفوا الآية اللي إحنا قلناها، اللي هي بتاعة إخراج الرسل: ﴿وَقَالَ الَّذِينَ كَفَرُوا لِرُسُلِهِمْ لَنُخْرِجَنَّكُم مِّنْ أَرْضِنَا أَوْ لَتَعُودُنَّ فِي مِلَّتِنَا﴾ [إبراهيم: 13]. واضح جدًا السيطرة الكفرية عندكم اختيار من اثنين: يا تدخلوا في ملتنا يا بره مع السلامة. "ادخلوا في ملتنا" دي بقى مش لازم الملة الدينية، يدخلوا في سياستنا، يدخلوا في هيمنتنا، اختيار من اثنين مالهمش تالت: تبقوا تحتينا أو بره، هو ده الاختيارين اللي بيقولهم الكفار لأقوامهم، نفس الاختيارات: ﴿وَقَالَ الَّذِينَ كَفَرُوا لِرُسُلِهِمْ لَنُخْرِجَنَّكُم مِّنْ أَرْضِنَا أَوْ لَتَعُودُنَّ فِي مِلَّتِنَا فَأَوْحَىٰ إِلَيْهِمْ رَبُّهُمْ لَنُهْلِكَنَّ الظَّالِمِينَ﴾ [إبراهيم: 13]. كيف يهلك الله الظالمين؟ عرفنا طريق من اثنين، إما بيده أو بأيد المؤمنين، عرفنا لنهلكن الظالمين. بس يا رب؟ لا مش بس: ﴿وَلَنُسْكِنَنَّكُمُ الْأَرْضَ مِن بَعْدِهِمْ ۗ ذَٰلِكَ لِمَنْ خَافَ مَقَامِي وَخَافَ وَعِيدِ﴾ [إبراهيم: 14]. من منا يخاف مقام الله عز وجل ويخاف وعيد الله؟ أحوالنا تنبئ عن هذا، ده اللي إحنا بقى، دي بقى رسالة الله لنا، هذا أمر الله لنا وأمر الله لإخواننا في غزة لمن يصل هذا الكلام منهم: ﴿ذَٰلِكَ لِمَنْ خَافَ مَقَامِي وَخَافَ وَعِيدِ﴾ [إبراهيم: 14].
فأنت خاف مقام الله عز وجل، أن تعلم أن كل شيء بأمره وقدره، لا إحنا بنخاف من أمريكا ولا بنخاف من غير أمريكا؛ ليه؟ لأن كل هؤلاء نواصيهم بيد الله عز وجل، فنحن مع الله سبحانه وتعالى. طب قدر الله عز وجل أن تسلطت أمريكا؟ فهو بقدر الله عز وجل: ﴿ذَٰلِكَ لِمَنْ خَافَ مَقَامِي فَلَا تَخْشَوْهُمْ وَاخْشَوْنِ﴾ [النحل: 127]. واضح يا جماعة آيات القرآن واضحة: ﴿فَلَا تَخْشَوْهُمْ﴾، دي كانوا شوية عيال صغيرة ولا كان برضه كفار لهم شوكة ومنعة؟ ﴿فَلَا تَخْشَوْهُمْ وَاخْشَوْنِ﴾، ﴿ذَٰلِكَ لِمَنْ خَافَ مَقَامِي﴾. فالقلوب الآن تخاف مقام الله عز وجل، ربنا هو المقدم عندنا في قلوبنا، ولا كيد الشرق ولا كيد الغرب.
طب قلوب على هذه الصفة تنتصر؛ فين المعراج؟ أين الربط بالسماء؟ فين الأحوال؟ محتاجين بقى تلك الأحوال. ما الأحوال هتيجي إزاي يا جماعة؟ ما هي دي، إن يتقال لك ﴿قَدْ جَمَعُوا لَكُمْ فَاخْشَوْهُمْ﴾ [آل عمران: 173]، فتلاقي جواك إيه؟ زادهم إيماناً، وقالوا: ﴿حَسْبُنَا اللَّهُ وَنِعْمَ الْوَكِيلُ﴾ [آل عمران: 173]. عارفين يعني إيه حسبنا؟ كافينا، حسبنا الله ونعم الوكيل، أول ما هنقول كده: ﴿فَانقَلَبُوا بِنِعْمَةٍ مِّنَ اللَّهِ وَفَضْلٍ لَّمْ يَمْسَسْهُمْ سُوءٌ﴾ [آل عمران: 174]. إمتى انقلبوا لم يمسسهم سوء؟ لما زادهم إيماناً وقالوا: ﴿حَسْبُنَا اللَّهُ وَنِعْمَ الْوَكِيلُ﴾، ﴿ذَٰلِكَ لِمَنْ خَافَ مَقَامِي وَخَافَ وَعِيدِ﴾. هل نحن نخاف وعيد الله عز وجل؟ أحوالنا تنبئ أنهما كون في المعاصي والشهوات والغفلة وترك الطاعات، هل دي أحوال ناس تخاف وعيد؟ لا، دي أحوال ناس معمرة في الدنيا أبد الآبدين، لا تخاف ناراً ولا ترجو جنة. طب أحوالنا دي أحوال الناس تنتصر ويمكن لها؟ أهو القرآن معانا أهو، إخراج، تهديد بإخراج: ﴿وَقَالَ الَّذِينَ كَفَرُوا لِرُسُلِهِمْ لَنُخْرِجَنَّكُم مِّنْ أَرْضِنَا أَوْ لَتَعُودُنَّ فِي مِلَّتِنَا﴾، تهديد بالإخراج، يا تدخلوا تحت الهيمنة العالمية تحت ماما أمريكا واللي يتقال لكم تعملوه، يا بره الأرض، نفس التهديد: ﴿فَأَوْحَىٰ إِلَيْهِمْ رَبُّهُمْ لَنُهْلِكَنَّ الظَّالِمِينَ * وَلَنُسْكِنَنَّكُمُ الْأَرْضَ مِن بَعْدِهِمْ ۗ ذَٰلِكَ لِمَنْ خَافَ مَقَامِي وَخَافَ وَعِيدِ﴾ [إبراهيم: 13-14]. فهذه رسالة القرآن لنا مع هذا التهديد بالإخراج، هذا التهديد بالتهجير القسري سواء لينا إحنا في مصر أو في أي حتة، أو إخواننا في غزة سلمهم الله من كل سوء.
الموضوع التاني عاوزين نتكلم عنه: عيد الحب، وعملتوا إيه النهاردة؟ خلص بدري عشان تلحقوا ولا إيه؟ عيب. والله، غزة وإخراج وتهجير، وبعدين فجأة عيد حب، والله حاجة تحزن. والله عاوزين نقوم تلاتة أربعة يفتشوا في جيوب الناس كلها، أي حد شايل حاجة حمراء في جيبه... طبعاً عيد الحب حرام، عارفين كده ولا الدرس خلص خلاص؟
دلوقتي، الأعياد يا جماعة من شرع الله عز وجل، والله عز وجل هو الذي يشرع العيد، أي عيد ربنا سبحانه وتعالى هو اللي بيشرع، وعشان كده النبي عليه الصلاة والسلام لما قدم المدينة ووجد اليهود يحتفلون، قال إيه للمؤمنين؟ «قد أبدلكم الله بهما خيراً منهما: يوم الأضحى ويوم الفطر». مين اللي أبدل؟ ربنا سبحانه وتعالى، فالعيد ده شرع، دي أول حاجة، وما أعتقدش أن حد بيروح يحتفل بعيد الحب تديناً، يعني عيد بقى بيعود الأيام وكل سنة، لا مش كده، لكن يا جماعة هي المشكلة الكبيرة فين بقى هنا؟ بغض النظر عن المسائل الحرام اللي بتحصل في العيد نفسه، يعني في هذا اليوم، من التواصل المحرم، وأظن نحسب ذلك أن معظم الناس ده آخرهم في هذا اليوم، تواصل محرم لأن في بعض الأماكن بيصل للفجور والعياذ بالله لما هو أبعد من ذلك، يقع في الكبائر. لكن فكرة أصلاً أنك بتحتفل بعيد هو أصلاً عيد وثني يا جماعة.
في خمس دقايق كده بس عشان نفهم عيد الحب ده جه منين أصلاً؟ فلنتاين ده إيه؟ ده قسيس. فلنتاين ده اسمه واحد قسيس، طب أنت بتقول وثني ليه؟ ده يبقى عيد نصراني، لا، هو عيد وثني أصلاً، هتعرفوا دلوقتي. هو كوكتيل كده، فلنتاين ده قسيس، وكان في ملك عنده جيش، وكان هو بيحب الفتوحات والحرب ومش عارف، فاكتشف حاجة الملك ده؛ لقى أن الناس العزاب بيحاربوا بقوة أكتر من الناس اللي متجوزة، ليه؟ اللي متجوز ده دماغه بقى فيها إيه؟ عندي عيال وعندي زوجة وعندي، فيجب وقت الحرب؛ فطلع كده فكرة أنه منع الزواج في الجنود، هذا الملك منع الزواج في الجنود، وطبعاً دي فطرة، فكان في قس اسمه فالنتاين، فكان بيزوج الجنود سراً، فالملك ده عرف، فقتل فالنتاين، فصار رمزاً للحب، قتله يوم 14 فبراير، فصار رمزاً في المملكة كلها للحب، وابتدوا يحتفلوا بعيد وفاة فالنتاين، وتسمى الفالنتاين داي أو عيد فالنتاين.
طيب إشمعنى بقى اللون الأحمر؟ إيه رأيكم؟ إشمعنى اللون الأحمر؟ يعني الدبدوب أحمر والقلب أحمر كل حاجة، إشمعنى اللون الأحمر؟ ما هو اللون الأحمر آه لون بس، لون الدم برضه، يعني إيه فلسفة اللون الأحمر؟ هنا بقى يظهر المعنى الوثني في هذا العيد، أنت لو عملت سيرش كده على فالنتاين هلاقي من بعض الرسومات اللي هتطلع رسمة لذئب بيرضع طفلين صغيرين، أي حد يعمل سيرش بس يكتب "فالنتاين داي" أو عيد فالنتاين أو حاجة، هيلاقي دي من ضمن الرسومات اللي هتطلع لكم على جوجل، رسمة لذئب أنثى يعني بترضع طفلين صغيرين. إيه قصة بقى الذئب اللي بيرضع طفلين دول؟ ده بقى يرجع لقبل عيسى عليه السلام بمئات السنين، يعني تقريباً ب 300 سنة قبل الميلاد، أنه كان في إمبراطور روماني، وقيل إن هو مارس، مارس ده كان إله من آلهتهم أصلاً، وفجر بامرأة فحملت في ولدين توأم، فطبعاً هيرثوا الملك لكنهم ولاد زنا، فراح جايب واحد من جنوده قال له: خد الولدين دول وغرقهم، ما ينفعش يكبروا، العيلين بيصعبوا عليه، وهو ماشي بيهم صعبوا عليه راح راميهم في ثبت كده ورماهم في البحر، فالطفلين بلاد تشيلهم وبلاد تحطهم لغاية ما راحوا الناحية التانية، عيلين صغيرين محتاجين يرضعوا، ذئب معدي، أنثى وكانت عندها أطفال لقيتهم راحت مرضعاهم، وراحت سحباهم لغاية الكهف بتاعها اللي فيه وابتدت ترضعهم، راعي معدي لقى الطفلين خدهم ورباهم، ويقال إن الطفلين دول بعد كده لما كبروا هم اللي عملوا الإمبراطورية الرومانية كلها.
فكان الطفلين دول لما كبروا عرفوا قصتهم من الراعي، قالوا طيب إحنا الذئب ده عاوزين نقدره، هو اللي رضعنا، فبقوا يروحوا من يوم 13 ليوم 15 فبراير كل سنة لهذا الذئب، قالوا له طب نقدره إزاي؟ قالوا الديب بيحب الخرفان، خلاص نذبح خروفين، فكل مرة يروحوا يذبحوا خروفين ويلطخ الرجال أنفسهم بالدماء، ومن هنا يظهر فكرة اللون الأحمر، يلطخ أنفسهم بدماء الخروفين، وبعدين تطور العيد بقى خروفين وكلب، وبعدين يقوموا يجيبوا الخروفين دول يعملوا من الجلد سوط -أو كرباج- ويجيبوا جرة كده يحطوا فيها أسماء النساء كلها اللي في القرية ويختاروا عشوائي، والست دي يجيبوها يقعدوا يجلدوا فيها، فتجيب حاجات طقوس كلها وثنية مالهاش دعوة خالص.
وبعدين جه سيدنا عيسى عليه السلام وانتشر الدين المسيحي، وتملك الدين المسيحي الإمبراطورية الرومانية، خلاص دخلت تحت الحكم النصراني، وكان عندنا دلوقتي عيدين، ظهر بعد كده عيد فالنتاين ده والعيد التاني ده اللي النصارى مش قادرين يوقفوه، لأن خلاص دي حاجات فولكلور متأصل، فدمج بين العيدين، قالوا طب زدنا في دقيقنا، وبقى عيد واحد نسميه عيد فالنتاين ونحتفل كل سنة بعيد الفالنتاين ده. والناحية التانية طبعاً نحت، قال لك اللون الأحمر بقى معاكم، اللون الأحمر، عيشوا في اللون الأحمر ده رمز للدم والحاجات دي، فانتشر اللون الأحمر.
اللي عاوز أقوله يا جماعة أن الاحتفال بهذه الطقوس خطير جداً، ده يا جماعة إحنا وصلنا لأبعد من كده، أنتوا عارفين تلاقوا إيه؟ بيبعتوا لبعض رسائل وأشكال الطفل الصغير اللي هو ماسك القوس اللي بيرمي السهم، عارفين ده مين؟ ده كيوبيد، ده كيوبيد ده إله الحب، ده إله كان بيعبد، الصورة اللي بتبعتها دي للطفل الصغير ده اللي بجناحات وماسك قوس وسهم في إيديه، ده كيوبيد ده كان إله يعبد، كان ابن فينوس الإلهة اللي هي إلهة الجمال عندهم، وده إله الحب، وبيقولوا إن السهم ده هو اللي بيضرب بيه فلما يصيب قلباً يحب، وكان عندهم في اعتقاداتهم أن كيوبيد ده كنعمة، عشان كده إحنا نقول الحب إيه؟ الحب أعمى، فشوف أنت بتعمل إيه، وصلت لفين، أن حتى الكروت اللي أنت بتجيبها ولا بتكتب -ما أظنش يعني حد بيعمل هنا كده- بتعمله، شوف ضحك بره يعني واحد ما يعرفناش، الملائكة سبحان الله في بعض الصور اللي بتداول للأسف الشديد أن يصور الملك حد بجناحين على أنه ملك وله أعضاء أنثوية، تصوير الملك أصلاً دي فيها مشكلة، وكمان على أنه أنثى، الأمر الذي كذبه القرآن: ﴿وَجَعَلُوا الْمَلَائِكَةَ الَّذِينَ هُمْ عِبَادُ الرَّحْمَٰنِ إِنَاثًا ۚ أَشَهِدُوا خَلْقَهُمْ ۚ سَتُكْتَبُ شَهَادَتُهُمْ وَيُسْأَلُونَ﴾ [الزخرف: 19]. فتلاقي نفسك عادي جداً، الصور دي عادي بتداول على كروت على رسائل، وهذا كله مخالف للشرع، أنت فاهم أنت بتبعت صورة إله؟ إله كان بيعبد من دون الله عز وجل، صورة للملك مصور، ومش بس مصور، مصور على أنثى هيئة أنثى.
فضلاً بقى عن الحرام اللي بيحصل في هذا اليوم، تواصل الحرام ولد مع بنت، الأمور، هذا المال الذي ذهبت واشتريت به ستسأل عنه، وعن ماله من أين اكتسبه، بس لا من أين اكتسبه، والله لا تسأل يوم القيامة، هتتسأل، ده أنت عشان تعرفوا يا جماعة قيمة الموضوع ما تفكرش في نفسك يعني في هديتك يا أبو 10 جنيه أنت ولا 100 جنيه ولا 1000 جنيه، 10 جنيه تجيب إيه دلوقتي؟ الكارت اللي عليه كيوبيد بقى اللي هو يمكن أغلى كمان ما أعرفش دلوقتي الكارت بكام، قول بكام الكارت؟ هو ما حدش هيتكلم خالص. دلوقتي لا، شوفوا مدى الإنفاق اللي بيحصل، يعني 2020 في أمريكا أنفق، هو طبعاً ده تاني مناسبة في أمريكا بينفق فيها بعد كريسمس، أنفق في 2020 ما زاد عن 27 مليار دولار في أمريكا بس، حجم الرواج التجاري في الفالنتاين داي في أمريكا. الإحصائية اللي وقفت عليها في مصر 2006، أنفق على الورد في اليوم ده 6 مليون جنيه على الورد في 2006.
6 مليون ده رقم كبير، وما جبناش سيرة كروت والورد، الحاجات دي بس 6 مليون جنيه. هذا المال إحنا عمالين نتكلم عن غزة وأحوال غزة، والحمد لله اتفتحت المعابر لإدخال المساعدات، ما أعرفش في طرق قانونية إن إحنا نوصل الحاجات دي ولا لا.
المهم، كل واحد كان ناوي يعمل البلوة دي النهارده، ينوي صدقاً من قلبه لله عز وجل أن هذا المال سيخرج لله عز وجل، سيخرج لله. وبعدين تقطع علاقتك بالبنت خالص، والبنت تقطع علاقتها بالولد خالص. يا جماعة حافظوا على قلوبكم، والله القلوب أضعف من مش مستحملة، ماشي؟ حافظوا على قلوبكم، ونقعد نحب في دي وهي تحب في ده، وبعدين الزمن يجور عليهم، يفضل هو بيفكر وهي تفكر، طب ليه يا ابني من الأول كل ده ليه؟ حافظ على قلبك وأنتِ حافظي على قلبك، ونتقي الله عز وجل.
وربنا سبحانه وتعالى لما ينظر إلينا ويرانا على تلك الحال، تفتح علينا فتوح العارفين، ويبقى في بينا الأحوال، ما هو أنت إحنا بأحوالنا دي هيبقى بينا وبين ربنا حال إزاي؟ إزاي ما أنت قلبك قلبك فين؟ ما فيش مكان فيه لا الشرع ولا حب ربنا ولا الخوف من ربنا، ماليه بالحاجات دي.
فالنهارده أي واحد فيكم أو أي واحدة، كان هو البنات بتجيب ولا بس بيتجاب لها؟ أنا مش عارف، يعني لو كان البنات بتجيب ما أعرفش بقى سلو بلدكم إيه هنا في التجمع، أي حد كان ناوي يجيب حاجة يطلع الفلوس دي النهارده لله سبحانه وتعالى. النهارده سواء بقى فقراء في مصر، في طريق قانوني ما فيش منه قلق ولا حاجة، ومتأكدين مش نصابين، هيوصل إخواننا في غزة يعمل ده، وينوي بذلك أن يتقرب إلى الله عز وجل، وأن ربنا سبحانه وتعالى يصرف عنه هذا الأمر لأنه بلاء، بلاء شديد جداً.
أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله وبركاته.
الشيخ أمجد سمير