دخولتسجيل الدخول

رمضان بلا أفيال

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه. أشهد أن لا إله إلا الله وحده لا شريك له، وأشهد أن محمدًا عبده ورسوله. اللهم صلِّ على سيدنا محمد النبي، وأزواجه أمهات المؤمنين، وذريته وآل بيته، كما صليت على آل إبراهيم إنك حميد مجيد. أما بعد.

درس النهاردة عن أفيال رمضان، في أفيال معانا هنا. طيب يعني إيه رمضان بلا أفيال؟ إيه اللي جه في دماغكم؟ يعني بلا مثقلات ذنوب؟ إيه تاني؟ بس ماحدش يكون معانا في القناة من السنة اللي فاتت يعني يعمل ناصح، عاوزين حد جديد. إيه يعني إيه؟ قول، قول ماشي، ما فيش حد خالص جه في دماغه الأكل؟ يعني فيل يعني ماشي.

طيب هو زي ما أخونا قال كده، أنت معانا في القناة من الأول ولا مش معانا؟ طيب في قصة عاوزين نحكيها عشان نفهم بقى يعني إيه رمضان بلا أفيال. الإمام مالك -رحمه الله- إمام دار الهجرة وصاحب الموطأ وصاحب المذهب المتبع مذهب المالكية، كان قاعد في مجلس تحديث في مسجد رسول الله صلى الله عليه وسلم، فنادى منادٍ أن قدم المدينة فيل. طبعًا زمان لا كان فيه جريدة حيوانات ولا نت تدخل تسرش وتشوف شكل الفيل، الفيل ده حيوان بنسمع عنه حاجة ضخمة وودان كبيرة وزلومة وكده يعني، بس عمرنا ما شفناه. فلما نادى منادٍ أن فيه فيل جاء المدينة في قافلة أو تجارة أو أي حاجة، فانفض مجلس مالك -رحمه الله- كله، طلع يشوف الفيل، إلا واحد فضل قاعد، وكان شابًا، كان من أحداث القوم سنًا، مش راجل بقى كبير عركته التجارب وعنده حكمة وكده.

فقال له مالك: لم لم تذهب لترى الفيل؟ فقال ذلك الشاب: جئت من الأندلس لأرى مالكًا وأسمع منه لا لأرى الفيل. فدعا له الإمام مالك. تدرون من هذا الرجل؟ يحيى بن يحيى الليثي. عارفين مين يحيى بن يحيى الليثي؟ الإمام مالك روى موطأه كتير، دوروا كده شوفوا كم واحد روى الموطأ؟ الرواية التي كتب الله لها القبول والانتشار وعليها أكثر الشروحات، رواية يحيى بن يحيى الليثي. يبقى بدأ يحضر درس مالك كثيرون، كم واحد روى الموطأ؟ لا، أقل القليل. مين أكثر واحد في دول كتب الله لروايته القبول والانتشار؟ هو ده الشاب اللي قعد وما راحش يشوف الفيل، قال: جئت لأرى مالكًا وأسمع منه، لا لأرى الفيل. فدعا له مالك، فلعل ذلك ببركة دعاء الإمام مالك، حتى إن يحيى بن يحيى الليثي في ترجمته قالوا إنه كان مجاب الدعوة، يحيى بن يحيى نفسه، يعني من بركة ما فعل هذا، وغيره بقى أكيد ليه مواقف ثانية، كان مجاب الدعوة -رحمه الله-.

فإحنا داخلين رمضان وفي أفيال، مش فيل واحد. الأول يا جماعة، قبل ما نخش بقى على قصة الأفيال والأثر ده لما قريته تعجبت منه جداً. الأول الجيل اللي فيه الإمام مالك ده جيل شكله إيه؟ الإمام مالك في المئة الثانية، فإحنا بنتكلم في جيل العظماء، مش بنتكلم الناس اللي دخلت المسجد ده، الناس اللي عايشين عادي بره المسجد، في الطرقات وفي الأسواق، دي ناس شكلها إيه؟ طيب تخيل بقى من الجيل ده مين اللي بيحضر لمالك مجلس التحديث؟ مين اللي بيحضر؟ يعني رعاع القوم وسفلتهم، على فكرة رعاع القوم وسفلتهم دول اللي هم أجدع من أجدع واحد فينا دلوقتي، يعني رعاع المئة الثانية دول ما فيهمش اللي إحنا فيه. مين بقى اللي بيدخل يحضر مجلس الحديث بتاع مالك ده؟ يعني الخلص من الخلص، مش كده؟ وبعدين أول ما ينادى على فيل، يحصل إيه؟ يتركوا مجلس التحديث ويجروا يشوفوا الفيل. يبقى إحنا دلوقتي مش بنتكلم مع الناس اللي مش متدينة ولا الناس اللي مالهاش قضية ولا هدف، قطعاً من غير ما نفكر كده ومغمضين، كل اللي في مجلس تحديث الإمام مالك دي ناس أصحاب أهداف، قطعاً فدي ناس عندها هدف.

لكن أول ما عرض الفيل تلاشى الهدف، تلاشى بقى الهدف بأي حجة، يعني ممكن يبقى بحجة إيه؟ ما هنشوف الفيل ونرجع هو مالك هيروح فين؟ مالك معانا في المدينة، الفيل اللي مش موجود، أي حجة، المهم هتطلع حجج يسيبوا الهدف اللي بيها هيسيبوا الهدف. وكم سيبقى واحد؟ واحد في الكام بقى؟ شوف أنت، كان حاضر مجلس مالك كم واحد؟ بقي واحد والباقي راح للفيل. هذا المعنى بعينه نص الله عليه في القرآن وعاتب عليه، مش جيل مالك، جيل الصحابة: ﴿وَإِذَا رَأَوْا تِجَارَةً أَوْ لَهْوًا انفَضُّوا إِلَيْهَا وَتَرَكُوكَ قَائِمًا﴾ [الجمعة: 11]، تركوا مين؟ تركوا سيدنا النبي عليه الصلاة والسلام، مش الإمام مالك، تركوه درس علم لا، وتركوك قائماً فين؟ في صلاة الجمعة. عجيب، النبي صلى الله عليه وسلم هو المتحدث، ومش في درس، خطبة جمعة، وحدث أمر، هو أن دحية الكلبي قدم من الشام بتجارة، وكان إذا قدم دحية بتجارة الشام دقوا الطبول وعملوا هيصة، وكان بيجي بكل ما تشتهي الأنفس وتلذ الأعين. فدقت طبول قدوم دحية الكلبي، إيه اللي حصل؟ خرج الصحابة وتركوا النبي قائماً يخطب الجمعة للتجارة، وقيل إن ده كان في زمان جوع وغلاء أسعار، فعاتبه الله عز وجل: ﴿وَإِذَا رَأَوْا تِجَارَةً أَوْ لَهْوًا انفَضُّوا إِلَيْهَا وَتَرَكُوكَ قَائِمًا قُلْ مَا عِندَ اللَّهِ خَيْرٌ مِّنَ اللَّهْوِ وَمِنَ التِّجَارَةِ وَاللَّهُ خَيْرُ الرَّازِقِينَ﴾.

هنا إحنا هنيجي كمان شوية لعلاج المشكلة دي، مشكلة الأفيال دي، فنعرف إن فيه علاج علمي وعلاج عملي. من العلاج العلمي اهو: ﴿قُلْ مَا عِندَ اللَّهِ خَيْرٌ﴾ من اللهو ومن التجارة والله خير الرازقين. خلي بالكم يا جماعة، الموقفين دول الناس ما راحتش الحرام، يعني إنك تروح للتجارة عشان تشتري حاجات بيتك، وخصوصاً لو كان في زمان جوع وغلاء سعر، الفعل نفسه مش حرام، إنك رايح تشتري ما يحتاجه البيت مش حرام. إنك عرفت إن فيه الفيل ذلك المخلوق الذي طالما سمعت عنه ولم ترَه، فيستفزك إنك تروح تشوف الفيل ده، خصوصاً إنك ما سمعتش عنه سماع عادي، يعني مش حيوان ليه أربع رجلين، لا ده أنت سمعت إن الفيل ده حيوان لا يشبهه حيوان. يا جماعة أنتم عيشوا النفسية دي، إحنا دلوقتي شفنا الفيل كتير، إنما فكرة إنك بتسمع عن حيوان ليه حاجة اسمها خرطوم كده زلومة ومناخيره قد إيه ونازلة حاجة مش موجودة في المخلوقات وودنه قد إيه وهو حجمه إزاي، هتبقى مستفز إن فيه إيه الفيل ده؟ عاوز أشوف الفيل.

فإنك تترك مجلس التحديث لترى الفيل، أو تسيبك من رؤيتك للفيل في ذاتها حرام، مش حرام، شيء مباح، التجارة تلعب في المباح، وأنت طالع يعني مباح ولا مستحب وقد تكون واجبة في بعض الأحوال، إنما في الآخر ما هياش حاجة حرام. أنا ليه بقول الكلام ده؟ لأني بكلم دلوقتي ناس لها أهداف، يعني رمضان داخل فإحنا لنا أهداف في رمضان، فممكن بعض الناس يبتدي يجيله الشيطان في الحتة دي، أو هوى نفسه بقى اللي هو إيه؟ اللي هو أنا ما بعملش حرام، أنا ما بعملش حرام.

طبعاً إحنا آسفين لو كان صوتنا مزعج للاستاذ اللي فوق، هو عمال يقول إيه الدوشة اللي أنتم جايبيني فيها دي، بيدعي علينا طبعاً، دلوقتي أظن فيه غرفة فوق للأطفال أو حاجة زي كده. كنا بنقول إيه بقى؟ آه، يعني الشيطان هيجيلك يا صاحب الهدف، يا صاحب الهدف الشيطان هيجيلك أو هوى نفسك، هيسوِّل لك إنك ما بتعملش حرام. فإحنا بقى النهارده بنتكلم على تلك الأفيال، إحنا مش جايين نكلمك على الحرام، إحنا جايين نكلمك على المباحات التي تشغلك، المباحات التي تشغلك عن هدفك، ذلك الفيل الذي شغل مجلس مالك فترك جميعهم الدرس، تلك التجارة التي استفزت جيل الصحابة فتركوا النبي صلى الله عليه وسلم قائماً يخطب الجمعة.

إحنا عاوزين نكون الثلة التي مكثت فلم تخرج للتجارة، نريد أن نكون ذلك الرجل الذي جلس ولم يخرج ليرى الفيل. كم واحد قعد مع النبي في المسجد عليه الصلاة والسلام؟ قالوا اثنا عشر رجلاً وامرأة، وشوف الرواية، منهم أبو بكر وعمر طبعاً، اثنا عشر رجلاً وامرأة والباقي خرجوا للتجارة. في رواية قال النبي صلى الله عليه وسلم: كم بقي هاه؟ فقالوا: اثنا عشر رجلاً وامرأة، قال: «لولا هؤلاء لسومتهم الحجارة عليهم من السماء»، يعني من خرج وترك الخطبة مستحق للعقاب، إن ينزل عليه عقاب من السماء، ولولا تلك الفئة التي مكثت لولا تلك الفئة التي صبرت، ماهي يا جماعة هذه الظروف أصابت الكل، يعني ظروف الحياة ظروف المعيشة في جوع وفي غلاء أسعار أصابت المدينة كلها، فقطعاً اللي قاعد ده هو قاعد وعنده نفس الظروف بتاعة اللي خرج، لكن عنده معاني أعلى وأسمى خلته يقعد.

خلي بالكم إحنا بنتكلم الكلام ده كعادتنا لا يقع في أنفسنا ولا في قلوبنا تنقص من قدر الصحابة رضوان الله عليهم، ولكنهم بشر والله عز وجل يربيهم بمرور الأيام، يربي الصحابة رضي الله عنهم، فهذا من تربية الله عز وجل لهم، يعني لا بأس. ماشي فقطعاً تلك الظروف أصابت هؤلاء، لكن فيه معاني منها معاني علمية ذكرها الله عز وجل، يعني زاد علمي ذكره الله عز وجل في الآية: ﴿قُلْ مَا عِندَ اللَّهِ خَيْرٌ مِّنَ اللَّهْوِ وَمِنَ التِّجَارَةِ﴾ ده أول معنى، ﴿وَاللَّهُ خَيْرُ الرَّازِقِينَ﴾ المعنى الثاني. معاني علمية تثمر معاني إيمانية في القلب، وتلك المعاني الإيمانية تثمر عملاً، فليخرج من يخرج، وتبقى ثلة، بتلك الثلة يحفظ الله عز وجل أهل المدينة، لولا هؤلاء لسومتهم حجارة من السماء. في رواية إن النبي صلى الله عليه وسلم قال: «والذي نفسي بيده، لو ذهبتم جميعاً فلم يبقَ منكم واحد، لسال عليكم الوادي ناراً»، أو كما قال صلى الله عليه وسلم، لَعُوقِبتم، لو كلكم كنتوا خرجتوا من المسجد وما فيش حد فضل في المسجد كان زمانكم هلكتم، فبمن دفع البلاء؟ بتلك الثلة التي مكثت في بيت الله عز وجل.

فإحنا عاوزين ننتبه لأفيال رمضان بقى، هل في الموجودين حد محتاج نقول أفيال رمضان، يعني المسلسلات والفواكه؟ أكيد في حد هنا بيتفرج على مسلسلات فيه ماشي، حتى لو فيه ما تقولش، ده كمين خلي بالكم. فانتبه لتلك الأفيال التي هي مباحات، مباحات ليه؟ هتضيع هدفك وهتاخد من هدفك. فكان يبقى أول سؤال دلوقتي إيه يتبادر للذهن؟ هو إيه مؤاخذة بس هو إيه الهدف أصلاً؟ يعني الكلام جميل والله شكله حلو وكده بس هو إيه هدفي في رمضان؟ يعني أنا داخل رمضان ليه؟ والله يا ابني أنت داخل رمضان عشان تتزحزح عن النار، ولا حد داخل لهدف تاني؟ أنت شايف نفسك فين؟ أصلي أنا داخل عشان تتزحزح عن النار، ليك هدف تاني في رمضان؟ ما هو أنت لو تعرف بلاويك وتعرف حال نفسك وتعرف قدر ربك سبحانه وتعالى، تعرف إن مجرد إنك تتزحزح عن النار ده أمل، ده هدف، هدف وذكره الله عز وجل بذلك اللفظ في القرآن، مش كده؟ ﴿فَمَن زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ﴾، طب ليه يا رب الناس ما بتتزحزحش وما بتدخلش الجنة على طول؟ بعدها إيه؟ الأفيال، ﴿وَمَا الْحَيَاةُ الدُّنْيَا إِلَّا مَتَاعُ الْغُرُورِ﴾، شوف الأفيال ظهرت إزاي، وما الحياة الدنيا إلا متاع الغرور، أهي الدنيا دي اللي بتخليك لا تتزحزح عن النار ولا تدخل الجنة عياذاً بالله. يعني الشقي الذي تكون تلك حاله يوم القيامة. فإحنا عاوزين نتزحزح عن النار ده هدفنا في رمضان، شوفوا الألفاظ بقى، زحزحة عن النار، عتق من النار، مغفرة ذنوب، هي دي الحاجات اللي إحنا عاوزينها، ده هدفنا.

إيه يعني الفردوس الأعلى ولا إمتى الكلام ده؟ والله إحنا بقراءتنا لنصوص الشرع نلاقي إن القضية دي من فضل ربنا سبحانه وتعالى علينا، ماشي، ما بقولش إن ما حدش هي، إنما مش ده كان الشغل الشاغل لا للصحابة ولا ده توجيه النبي عليه الصلاة والسلام، ولا ده توجيهه، عائشة رضي الله عنها هتجيله في آخر رمضان، الأول السيدة عائشة رضي الله عنها تتوقعوا كده بتعبد ربنا عبادة شكلها إيه؟ نص نص زينا كده ولا عبادة عائشة بقى؟ مش كده. فتيجي للنبي عليه الصلاة والسلام في آخر رمضان تقوله: أرأيت إن وافقت ليلة القدر أقول إيه بقى؟ فما أدعو؟ مستنيين بقى النبي عليه الصلاة والسلام يجاوب، ما تصلوا على النبي، إيه أنت يعني أول ما يجي فيل دلوقتي بتبطلوا تصلوا على النبي عليه الصلاة والسلام، فبما يجيبها صلى الله عليه وسلم؟ «اللهم إنك عفو تحب العفو فاعفُ عني». إيه ده؟ هو لو إحنا ما سألنا الفردوس الأعلى دلوقتي هنسأل إمتى؟ ولو ما سألنا مرافقة النبي في الجنة صلى الله عليه وسلم هنسأل إمتى؟ أرأيت إن وافقت ليلة القدر فما أدعو؟ قولي: اللهم إنك عفو تحب العفو فاعفُ عني. خلي بالكم يا جماعة آخر الحديث آخر الدعاء.

مرعب، أن يكون شغلك الشاغل في آخر رمضان وفي العشر الأواخر وفي ليلة القدر أن يُعفى عنك. بداية الدعاء مرعب أكثر، يعني ما قال: اللهم إني صمت لك وتصدقت لك واعتمرت لك وختمت القرآن لك فاعف عني. هل انتبه أحد لهذا المعنى من قبل؟ ما قالها. ماشي، سنسأل العفو وكل شيء حاضر، سنسأل العفو والمغفرة والعتق من النار، وسنأتي لهذه الألفاظ بعد ذلك، وسنرى أن هذا هو أصل هدف رمضان من النصوص الشرعية، لكن فكرة أن "اعف عني" ليست لأنني شيء أصلاً، ولا لأنني فعلت شيئاً، ولا لأنني أرى نفسي.

اللهم إنك عفو تحب العفو فاعف عني، عارفين العلماء يسمون هذا ماذا؟ يسمونه دخول المفلس. العلماء يسمون هذا دخول المفلس، ويقولون إن هذا أوسع الأبواب التي تدخل منها على الله سبحانه وتعالى؛ وهو أن يكون الواحد لا يجد لنفسه حالاً ولا عملاً ولا قولاً، ولا يرى نفسه أصلاً يستحق شيئاً، فلما يأتي ليدخل ويسأل، لا يجد أمامه غيره سبحانه وتعالى: "اللهم إنك عفو تحب العفو فاعف عني". هكذا فقط، أما أنا فلا أرى قراءتي ولا صيامي ولا صلاتي ولا ذكري ولا عمرتي، لا أرى شيئاً يا رب، ولا أرى شيئاً من هذا يصلح أن يُقدم لك، أو يصلح أن يُقبل عندك. هذا ليس شرطاً أن تقوله، لكن تستشعره، وهذا حقيقي يا جماعة؛ الكلام هذا ليس مبالغة، بل هو حقيقي.

المشكلة أننا لا نعرف قدر ربنا سبحانه وتعالى، فحن لا نفهم أن الصلاة التي لتوّنا صليناها، لولا عفو الله ورحمته ومغفرته وحلمه وصفحه، كان زماننا خُسف بنا الأرض؛ ليس بسبب معاصينا، بل بسبب الصلاة التي صليناها. عجيب! وعشان كدة أنت أول ما تُسلم، أول ذكر بعد الصلاة: السلام عليكم ورحمة الله، السلام عليكم ورحمة الله، اللهم أدخلني الفردوس الأعلى، كذا أول ذكر تنطقه؟ لا، استغفر الله، استغفر الله، استغفر الله. عجيب! أنت في الصلاة، وأول ذكر تنطقه هو: استغفر الله، استغفر الله، استغفر الله. أنت خائف، خائف؛ يا رب استغفرك من تقصيري في تلك الصلاة.

فانظر نصوص الشرع كيف هي. طيب، عائشة رضي الله عنها تسأل: أدعو بأي شيء؟ قال: «اللهم إنك عفو تحب العفو فاعف عني». طول ما يمكن، برضه السيدة عائشة رضي الله عنها، يعني امرأة وعبادتها، طيب روح لأبيها، أبو بكر رضي الله عنه. بعد أبي بكر يا جماعة، يأتي للنبي عليه الصلاة والسلام ويقول له: علمني دعاء أدعو به في صلاتي. انتبه، أولاً هذا أبو بكر، وثانياً الدعاء يُدعى به في صلاة. أبو بكر النبي عليه الصلاة والسلام يعلمه دعاء، يقول له: «اللهم إني ظلمت نفسي ظلماً كثيراً» وفي رواية «ظلمًا كبيرًا»، وبعدين هل قال: "أنا صليت يا رب وصمت وبتاع"؟ لا، خالص، دخول مفلس أيضاً. اللهم إني، خلوا بالكم يا جماعة هذا الدعاء النبي صلى الله عليه وسلم يعلمه لأبي بكر: «اللهم إني ظلمت نفسي ظلماً كثيراً كبيراً» -بعض العلماء قالوا يجمع بينهما- «ولا يغفر الذنوب إلا أنت فاغفر لي مغفرة من عندك». دخول مفلس؛ دخول واحد لا يرى شيئاً يدعو به، يعني يا رب ليس لأني صليت فاغفر لي، أو لأني صمت فاغفر لي، لا يوجد، «فاغفر لي مغفرة من عندك».

هذا دخول المفلس، فحن نريد أن ندخل رمضان بتلك النفسية، نفسية المفلس؛ التي هي أنه سيعمل وسيدوس بنزين على الآخر، وسيجيء في النهاية لا يرى لنفسه حالاً ولا مقالاً ولا عملاً يصلح أن يُقدم لله، فيدخل على الله دخول مفلس: «اللهم إنك عفو تحب العفو فاعف عني». طب أنا بعمل ماذا طول الشهر؟ أتعرض لنفحات الرحمة، بس، هذا الذي أعمله؛ "إن لربكم في أيام دهركم لنفحات ألا فتعرضوا لها". فإذا أصابتنا نفحات الرحمة، رُحمنا، أما أن تجد في آخر الشهر داخل نفسك أنك مستحق؟ "لا تدخل الجنة"! من سيدخل؟ لو أنا لست في الفردوس، فمن الذي سيكون في الفردوس؟ أعوذ بالله، أعوذ بالله. ﴿يَمُنُّونَ عَلَيْكَ أَنْ أَسْلَمُوا قُل لَّا تَمُنُّوا عَلَيَّ إِسْلَامَكُم بَلِ اللَّهُ يَمُنُّ عَلَيْكُمْ﴾ [الحجرات: 17]. المنة لله، لا لك. لو جاء في قلبك هذا المعنى، استعذ بالله من الشيطان الرجيم أن تمنَّ على ربك سبحانه وتعالى؛ يا مسكين أنت، لا تعرف قدر ربك.

سأقول لكم أثراً واحداً لتعرفوا -لن نعرف تماماً- لنفهم هذا المعنى: إن من الملائكة ملائكة خُلقت يوم خُلقت راكعة، فهي كذلك إلى يوم القيامة، ومنها ملائكة خُلقت يوم خُلقت ساجدة، فهي على ذلك إلى يوم القيامة. هي خُلقت هكذا، هي مخلوقة لتسجد سجدة لن ترفع منها إلا يوم القيامة. عارفين هذا الملك الذي خُلق يوم خُلق ساجداً، وشوفوا عمر الملك لما يرفع يوم القيامة ويرى الله عز وجل، سيقول ماذا؟ يقول: "سبحانك ما عبدناك حق عبادتك". ما رأيكم؟ هو هذا الرب سبحانه وتعالى الذي حضرتك تأتي في آخر الشهر وترى لنفسك حالاً، أني مستحق، أستحق كذا، لا، أنت لا تستحق شيئاً، نحن بالذي نفعله كله نتعرض لنفحات الرحمة، عساها أن تصيبنا تلك النفحات فنُرحم في الدنيا والآخرة، بس. أما أن تدخل على ربك مطأطئ الرأس، ذاكراً لعيب نفسك، هو هذا الدخول الذي سيفيدك مع ربنا. أما أن تدخل عليه دخول المستغني، دخول المستحق، فستبعد وتُطرد.

فما هدفنا في رمضان؟ الهدف الواضح يجب أن يبقى واضحاً أمام عينينا، ولما يبقى واضحاً، لا تظن بوضوح الهدف أنك ستحقق الهدف، أو لو جاءتك مشوشات أو أفلام لن أستفزك، لا، مجلسك مالك كله هدفهم واضح، الصحابة الذين في خطبة الجمعة هدفهم واضح، واضح أمام عينيهم، أما أول ما عُرض الفيل، جروا على الفيل، أول ما جاءت التجارة، جروا على التجارة. فحن أول خطوة بس يا شباب، يبقى الهدف واضح؛ نحن نريد ماذا من رمضان؟ فلما تأتي تستحضر نصوص الشرع حالين رمضان، تجدها تدور في فلك المغفره والعتق، هذا الذي نريده. تقول: بس، نقول لك: يا عم بس، خذ هذه، هو أنت لو غُفر لك ذنبك، سعدت، ولو أُعتقت من النار، فزت. فليس كذلك؟ فتجد: «من صام رمضان إيماناً واحتساباً غفر له ما تقدم من ذنبه». شايفين يا جماعة النصوص عاملة كيف؟ عجيبة؛ يعني أنت داخل رمضان بنفسية: "أنا سأصوم"، فعشان تعمل ماذا؟ عشان تنال ماذا؟ يا رب الذي أريده: "أخرج من رمضان مغفوراً لي، مغفوراً لي".

«من صام رمضان إيماناً واحتساباً غفر له ما تقدم من ذنبه»، «من قام رمضان إيماناً واحتساباً غفر له ما تقدم من ذنبه»، «من قام ليلة القدر إيماناً واحتساباً غفر له ما تقدم من ذنبه»، رمضان إلى رمضان، في حاجات كثيرة مكفرات لما بينهن إذا اجتنبت الكبائر. شايفين يا جماعة معنى المغفرة يلحُّ علينا؟ وبعدين العجيب لما تستقر نصوص الوحي ونصوص الشرع، تجد كان معنى المغفرة هذا هدف، خلينا يعني هدف المغفرة هو هذا هدف ليس للفاسق، مغفرة ذنوب، كان يجيء في دماغك على طول، يبقى نحن نتكلم عن الفئة الفاسقة، الفئة العاصية التي كثر عصيانها، لا لا لا، في مفاجأة! تقول: أكيد المؤمنين بقى، أقول لك: لا لا لا، هذا في مفاجأة أكبر، أكبر الأولياء مثلاً؟ أقول لك: لا، أكبر الأنبياء!

يعني لما تأتي تفتح المصحف وتقرأ، تجد أن المغفرة هذا هدف الأنبياء منذ أن رفع شعار ذلك الهدف: ﴿رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ﴾ [الأعراف: 23]. يبقى آدم يسأل المغفرة، وبعدين نوح: ﴿رَبِّ اغْفِرْ لِي وَلِوَالِدَيَّ وَلِمَن دَخَلَ بَيْتِيَ مُؤْمِنًا وَلِلْمُؤْمِنِينَ وَالْمُؤْمِنَاتِ﴾ [نوح: 28]، شوف اغفر، إبراهيم: ﴿وَالَّذِي أَطْمَعُ أَن يَغْفِرَ لِي خَطِيئَتِي يَوْمَ الدِّينِ﴾ [الشعراء: 82]، موسى: ﴿رَبِّ اغْفِرْ لِي وَلِأَخِي﴾ [الأعراف: 151]، سليمان قال: ﴿رَبِّ اغْفِرْ لِي وَهَبْ لِي مُلْكًا لَّا يَنبَغِي لِأَحَدٍ مِّن بَعْدِي﴾ [ص: 35]، النبي محمد صلى الله عليه وسلم: ﴿وَقُل رَّبِّ اغْفِرْ وَارْحَمْ﴾ [المؤمنون: 118]. شوفوا يا جماعة الأنبياء، قضية المغفرة هدف المغفرة كيف لائحة أمام أعينهم دائماً، تلوح ولا تغيب.

طب عارفين تلوح يعني ماذا؟ خاتمهم صلى الله عليه وسلم، وأفضلهم، وسيد ولد آدم، يُعد له في المجلس الواحد -ليس في اليوم الواحد- سبعون مرة: «رب اغفر لي وتب علي». طيب رب اغفر لي وتب علي، أنني أنا النبي، أنني أنا الرسول، أنني أنا، ها شوف دخول المفلس: «رب اغفر لي وتب علي إنك أنت التواب الرحيم»، دخول مفلس. يا جماعة، نحن لو لم نخرج من الدرس غير بفكرة أنك تدخل على الله دخول المفلس، هذه لوحدها كفاية؛ لأنك لما تقرأ نصوص الشرع، تجد أن فكرة دخول المفلس هذه فكرة متكررة، بل في حياة النبي كلها عليه الصلاة والسلام. يعني أول ما نعي له نفسه صلى الله عليه وسلم، سورة ماذا؟ أحد يعرف؟ النصر. يعني أول شيء ينزل على النبي عليه الصلاة والسلام وحياً، يعني فيها معنى أنك خلاص أجلك اقترب، سورة النصر: ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾، كذا عمر النبي خلاص قرب ينتهي عليه الصلاة والسلام.

فصار ربك بقى الفردوس، وخلاص، هو يا جماعة، هل عمر من عمر من الذي لو سينتهي، بسؤال الفردوس؟ يعني بنقول لا نسأل؟ لا اسأل الفردوس، ما أحد يأخذ الكلام هذا على أنني لا سأسأل، اسأل الله الفردوس، اسأل الله، والله عز وجل فضله عظيم وكبير، لكن أنت تسأل الفردوس، أنت تسأل الفردوس لأنك ترى أنك تستحق الفردوس؟ خالص. لكن شوف توجيه القرآن للنبي عليه الصلاة والسلام هنا: عمرك خلاص، أجلك قد دنا اقترب، ﴿إِذَا جَاءَ نَصْرُ اللَّهِ وَالْفَتْحُ * وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا﴾ فقد أديت ما عليك، أعمل ماذا يا رب؟ ﴿فَسَبِّحْ بِحَمْدِ رَبِّكَ وَاسْتَغْفِرْهُ﴾. طب استغفرك وأبقى واثقاً في المغفرة؛ لأننا النبي، ولأننا الرسول، ولأننا من جاهدت ودعوت وكذا وكذا؟ ﴿إِنَّهُ كَانَ تَوَّابًا﴾. استغفره إنه كان تواباً، ليس لأنك النبي ولا لأنك الرسول صلى الله عليه وسلم. هذا معنى دخول المفلس على الله عز وجل.

فحن داخلين رمضان بتلك النفسية، فإذا دخلت، لماذا؟ ادخل دخول... يعني ماذا يا جماعة؟ الحاجه التي لو استحضرتها أفهم معنى دخول المفلس؟ حاجتان لو استحضرناهما نفهم لماذا ندخل على ربنا دخول المفلس، احفظوا الكلمتين هاتين: مشاهدة المنة ومطالعة عيب النفس والعمل. احفظوا الكلمتين هاتين: مشاهدة المنة ومطالعة عيب النفس والعمل. لو استقام لك هذان المشهدان، تدخل عليه سبحانه إلا دخول مفلس. يعني ماذا مشاهدة المنة؟ أن ترى كل ما أنت فيه تراه منةً، منةً سبحانه وتعالى. طول ما أنا عارف، يا شيخ، والله عارف أنني الفلوس التي معي هذه منة، والعربيات والزوجة -كنت سأقول الزوجات، بس قلت عربيات، فلقيت ماذا؟ كانت ستخرج غلط، بس خرجت صح الحمد لله- والزوجة والبيت وكذا، هذه ليست النعم، النعم الأجل من تلك النعم، النعم الدينية. مشاهدة المنة أن ترى وجودك في هذا المسجد، في هذا الدرس، هو الذي حملك إليه سبحانه وتعالى، صلاة العصر جماعة هو الذي أتى بك إليها سبحانه وتعالى، ختمك للمصحف في رمضان هو الذي وفقك لذلك سبحانه وتعالى، صيامك به، صلاتك به، قرآنك به سبحانه وتعالى، عمرتك، حجك، أي حاجة تفعلها به سبحانه وتعالى.

ولذلك كان كنز من كنوز الجنة -عشان نفهم القضية هذه- ﴿لَا حَوْلَ وَلَا قُوَّةَ إِلَّا بِاللَّهِ﴾، سبحانه وتعالى. لا بحولك ولا بقوتك أبداً، وكم خُذل غيرك! لا بالجدعنة ولا بالقوة ولا بالعضلات ولا بالمجان ولا بأي حاجة، به سبحانه وتعالى. ﴿لَا حَوْلَ وَلَا قُوَّةَ إِلَّا بِاللَّهِ﴾، مشاهدة المنة. استقام لك هذا المشهد، خش على الذي بعده، مطالعة عيب النفس والعمل؛ يعني ماذا بقى؟ يعني أولاً رأيت منته عليك، يعني هو الذي أتى بك إلى صلاة العصر، فلما وقفت في صلاة العصر، وكبر الإمام، فكبرت خلفه، سرحت في الدنيا! يعني هو أتى بك سبحانه وتعالى إلى المسجد، فقابلت منته ونعمته بماذا؟ بذلك الجحود العملي، ليس جحود لفظي، جحود عملي، "آه يا رب، أنت جئت بي المسجد، وأوقفتني في الصلاة، وأنا سأسرح"، مطالعة عيب النفس والعمل. هو سبحانه وتعالى الذي جمل صوتك بالقرآن، ووفقك فختمت، فتدخل تصلي بالناس رياءً وسمعةً وحباً للشهرة وحباً للمدح والثناء، فهو الذي وفقك، شهدت منته عليك، طب بعد ما شهدت المنة، عملت ماذا؟ شوف بقى عيب النفس هنا. وقل مثل ذلك في كل عبادة بقى: مشاهدة المنة ومطالعة عيب النفس والعمل.

طب بالله عليكم لو صح لنا هذان المقامان، سنسأل ماذا؟ سنسأل ماذا؟ يعني بعد رمضان يا سيدي، بعد الصوم والصلاة والقرآن وكل حاجة، لكن أنت كل العبادات هذه رأيتها بالمنظور هذا، شهدت فيها المنة، ثم طلعت فيها عيب نفسك وعملك، خلصت العبادات، ستسأل ماذا؟ ستجد نفسك مش عارف، "يا رب اغفر لي، اغفر لي". أيوه، أغفر لك العصيان؟ لا، يا رب اغفر لي العبادة هذه، العبادة التي أنا لتوّي انتهيت منها هذه، اغفر لي الذي فيها! هو هذا يا جماعة، هذا المعنى الذي في القرآن أصلاً، هذا المعنى الذي في الشرع، في نصوص الشرع، عشان كدة العبادات العظيمة تُختم بالاستغفار. نحن.

الصلاة، أول ذكر بعد السلام: استغفر الله، استغفر الله، استغفر الله. قيام الليل، ثماني ركعات في نصف ساعة، لا، كانوا قليلًا من الليل ما يهجعون، معظم الليل سهرانين، بيصلوا قرب الليل يخلص وبالأسحار هم يستغفرون. معنى عجيب، برضه طول الليل بصلي، هقعد في الأسحار بقى أسأل الفردوس، أسأل الجنة، مرافقة النبي صلى الله عليه وسلم، هاجت نفسك للاستغفار بعد إيه؟ مش أي قيام، كانوا قليلًا من الليل ما يهجعون، فإذا جنهم السحر وبالأسحار هم يستغفرون. الحسن البصري انتبه لهذا المعنى، قال: سبحان الله، مدوا الصلاة إلى السحر، ثم جلسوا يستغفرون، أدي قيام الليل.

الحج خلصت في يوم الحج الأكبر معظم مناسك الحج، وبعدين رايح طواف الإفاضة، ثم أفيضوا من حيث أفاض الناس واستغفروا الله. عجيب، معظم مناسك الحج خلصت خلاص، وبعدين رايح تطوف الإفاضة، واستغفروا الله، شايفين الأعمال الشريفة إزاي بتختم بالاستغفار؟ الأعمال الشريفة إزاي بتختم بالاستغفار؟ أمر النبي عليه الصلاة والسلام: ﴿فَسَبِّحْ بِحَمْدِ رَبِّكَ وَاسْتَغْفِرْهُ ۚ إِنَّهُ كَانَ تَوَّابًا﴾ [النصر: 3]، ليه؟ علشان مشاهدة المنة ومطالعة عيب النفس والعمل. فإحنا داخلين رمضان ليه؟ هدفنا إيه؟ مغفرة الذنوب. أي حد يوقفك: أنت إيه هدفك في رمضان؟ يعفى عني، والله ده هدفي، والله ده هدفي يعفى عني، يغفر ذنبي، أعتق من النار. وده المعنى ده العتق من النار في رمضان مش كده؟ لله في كل ليلة عتقاء من النار. عتقاء المعنى ده يا جماعة، معنى خلي بالكم، هو اللي هيعتق من النار هيروح فين؟ هيروح الجنة مش كده؟ يعني كان ممكن يبقى اللفظ النبوي الشريف هنا: لله في كل ليلة أناس يدخلون الجنة، والمعنى واحد، وهو ده لازم، فانك تدل على المعنى بلازمه عادي، وده في لغة العرب موجود. لكن التنبيه على هذا المعنى، معنى إنك أنت هدفك إنك تعتق من النار، ليه؟ لأن أعمالك توجب لك النار من الآخر كده، من الآخر ماشي.

إحنا اتكلمنا قبل كده على الباء المنفية والباء المثبته، حد يعرف اللي أنا بقوله ده ولا لا؟ ولا واحد في المسجد، اتكلمنا قبل كده على مشكلة كده في باء منفية وفي باء مثبتة، طب أي حد يهبد أي حاجة، أي حاجة، أحسنت، النبي عليه الصلاة والسلام قال إيه؟ لن يدخل أحد الجنة بعمله، قال: ولا أنت؟ قال: ولا أنا، إلى آخر الحديث. فهنا النبي عليه الصلاة والسلام نفى أن يدخل الجنة أحد بعمله، يبقى في هنا باء منفية أهو، شايفين؟ طب في القرآن بقى: ﴿ادْخُلُوا الْجَنَّةَ بِمَا كُنتُمْ تَعْمَلُونَ﴾ [النحل: 32]، إيه ده بقى؟ تلخبطوا ليه؟ يبقى هنا في باء منفية أهو: لن يدخل الجنة أحد بعمله، وفي باء مثبتة: ادخلوا الجنة بما كنتم تعملون، بما أسلفتم. وأحل الإشكال ده، أنتم أصلًا ما كنتوش عارفين الإشكال فأكيد مش عارفين اللي قلناه قبل كده، أصل الإشكال هنا إيه؟ الحل بسيط، إن الباء المنفية غير الباء المثبتة، بس كده، دي باء ودي باء تانية، مشكلتنا إحنا فين بقى؟ إن إحنا بنثبت الباء المنفية.

الباء المنفية هي باء المعاوضة، والباء المثبتة هي باء السببية، يعني إيه؟ يعني دلوقتي لما أجي أقول: والله يا جماعة اللي هيرفع إيده دلوقتي مثلًا هديله 100 جنيه، هل فعلك ده ليك يعني تيجي تبجح كدة، أنا أستاهل الـ 100 جنيه لأن رفعت إيدي، ورفع الإيد ده حاجة صعبة؟ هو مش كده، هو أنا جعلت تفضلًا مني رفع الإيد سببًا لأنك تأخذ 100 جنيه، بس كده فاهمين دي؟ إنما لما أجي أقول، تقول لي الكتاب ده بكام؟ أقول لك الكتاب ده بـ 100 جنيه، فتقوم مديني الـ 100 جنيه، ساعتها تقدر تبجح وتقول: أنا أستحق الكتاب، ليه؟ لأن دفعت الـ 100 جنيه اللي هي المعاوضة، ده ثمن الكتاب وأنا دفعت ثمنه، فالكتاب ده من حقي، أه دي الباء المنفية، الكتاب ده بـ 10000 جنيه، شايفين الباء دي؟ بـ 10000 جنيه، أه الباء دي المنفية: لن يدخل الجنة أحد منكم بعمله، فأنت ما تجيش يوم تقول يا رب أنا أستحق دخول الجنة ليه أصل أنا عملت كذا وكذا وكذا.

طب المثال اللي أنا بقوله ده حصل وأخبر به النبي عليه الصلاة والسلام؟ أه، عابد بني إسرائيل، عبد كام سنة؟ 500 سنة زينا كده، ومنقطع في الصومعة، فربنا هيقول يوم القيامة: أدخلوه الجنة برحمتي، قال: بل بعملي، 500 سنة في الصومعة والناس عمالة، إحنا بنعتكف 10 أيام بنخرج حاسين إننا أولياء الله الصالحين، الناس في الخيم الرمضانية وفي مش عارف إيه وإحنا قاعدين في المسجد ده، أنا 500 سنة في الصومعة هيروحوا فين دول؟ قال: لا، رحمة إيه؟ عملي 500 سنة، فوزن عمله كله قدام نعمة واحدة، رجحت النعمة، أدخلوه النار بعدلي. خلاص، خلي بالك هو ميزان ربنا، الميزان العدل، عشان ما تجيش تقول أو يجي في دماغك كدة هو ربنا اللي رجح؟ لا هو ده الميزان العدل، خلي بالكم يعني اللي حصل ده هو العدل بقى، ولذلك أي حد يعامل بالعدل يهلك، يهلك، وبعدين وهو متأخذ على النار التفت وقال: بل رحمتك يا رب. فتلاقي بقى الأعمال الفاضلة كلها تختم بالاستغفار، الأعمال الفاضلة تختم بالاستغفار، ليه؟ مشاهدة المنة ومطالعة عيب النفس والعمل، فأنت هدفك هو هدف الأنبياء اللي هو إيه؟ مغفرة، أنا داخل رمضان ليغفر لي، ده هدفك، ده هدفك.

وأنت بقى داخل بالهدف ده، إياك والأفيال، إياك والأفيال، عشان هتيجي تدخل رمضان هتلاقي الأفيال، الأفيال بقى هتطلع، فيل الفيسبوك، وفيل الجروبات اللي أنت عليها، وفيل العزومات، وفيل قعدة شلة الأنس، وفيل أفيال، كل واحد بقى له الأفيال اللي يعرفها. فهذا رمضان نريده رمضان بلا أفيال، يعني إيه بلا أفيال يا جماعة؟ خلي بالكم بلا أفيال يعني بلا أفيال، مش الأفيال بتتنطط وأنت تقول أنا هعرف أمسك نفسي ومش هطلع أبص على الفيل، كان غيرك أشطر يا حبيبي من مجلس مالك، كله واحد اللي مخرجش، فكان غيرك أشطر.

طب إيه الحل؟ الحل إننا على قد ما نقدر من قبل رمضان، إحنا الدرس أهو قبل رمضان بأسبوع، عاوزين نرتب لرمضان بلا أفيال، يعني إيه بلا أفيال بقى؟ يعني أنت عرفت إن أعظم فيل وأكبر فيل بالنسبة لك هو التليفون اللي في إيديك ده، ده أكبر فيل من الأفيال التي تشغلك، أنا ما بتكلمش عن حد بيعمل حاجة حرام، أنا بتكلم عن اللي بيتشغل بالمباح، فهعمل إيه؟ هتخلص من الفيل ده، كان في دماغي فكرة كده بس عاوزين نرتبها، يعني إيه نعمل حاجة اسمها رمضان كت، ما هو أصل الموبايل ده بيتفك مثلًا، يعني أنت عشان نقول لك سيب الموبايل نقول لك يبقى معاك مصحف جيب، ويبقى معاك منبه، ما هو يقول لك بظبطه أصلي، ولازم أصحى، هات منبه، يعني ما تشتري منبه، إيه تاني عاوزين إيه تاني؟ حمام زاجل عشان الرسايل والحاجات دي، تليفون اللي هو مثلًا بزراير، تليفون نوكيا ده ابن الحلال ده مثلًا، أنا مش بهزر على فكرة، أه، انزل اشتري ده عادي جدا، اللي معاه الفلوس دي ينزل يعمل ده قبل رمضان، يقول أنا هجيب كدة حقيبة رمضانية، ماشي، أه، فينزل يشتري له حمامات، ينزل يشتري تليفون عادي خالص عشان هسيب، كدة يا جماعة هسيب السمارت فون في رمضان كبداية، هشتري تليفون عادي، هشتري مصحف جيب، هشتري منبه عشان يصحيني، شوف أنت التليفون تستخدمه في إيه، طيب وفي الآخر لو مش قادر أستغنى عنه فهو لي ساعة في اليوم مثلًا للحاجات المهمة، وشكرا على كده.

فيل لازم تستغنى عنه، ليه؟ لأن الفيل لو فضل يتنطط ده في إيدك في جيبك، فأنت ماشي بفيل في جيبك، مش بره المسجد لا أنت بتخش المسجد بالفيل بتاعك، أصلًا تروح للاعتكاف اللي هو أصلًا حقيقته كما قال ابن رجب: قطع العلائق عن الخلائق والاتصال بخدمات الخالق، ده دي حقيقة الاعتكاف، لب الاعتكاف، تدخل على المعتكفين ما شاء الله كل واحد في إيديه الموبايل وعمال يفر، زيه زي في بيته زي في الشارع زيه زي في أي حتة، فين بقى قطع العلائق عن الخلائق؟ فين ده؟ فإحنا عاوزين حقيبة رمضانية، خلاص، يعني لازم، لازم الجنة محتاجة شغل، وحفت النار بالشهوات وحفت الجنة بالمكاره. شوف إحنا دلوقتي بنوصل لإيه، إن إحنا عمالين نتحايل إنه نسيب اللي هو أصلًا منا ناس قاعدة قضت معظم عمرها من غير التليفونات دي أصلًا، شوفوا وصلنا لفين دلوقتي، يعني بقى من مكاره إن نقول لك سيب السمارت فون مدة شهر رمضان.

طب أنا الكلام ده بقوله لكل حد؟ لا بقوله للي شايف إن تليفونه فيل في المسجد ده، بقى كم واحد مش شايف إن التليفون ده فيل من الأفيال؟ أعتقد لو لقينا واحد غالبًا مش هيبقى معاه تليفون أصلًا، يعني هو مش فاهم، فهو أعظم شيء ما هو ده أعظم بلاء دلوقتي بنمر به، أنا بكلم الناس المتدينة، الناس اللي بتتقي الله عز وجل، الناس اللي مش بتعمل حرام، من أعظم البلاء اللي بنمر به هو ده الجهاز ده اللي دمر حياة البشر، وضيع أوقاتنا، في إيه؟ مش بقول في الحرام، بقول في ولا حاجة، ضيعنا خالص، فده فيل من الأفيال، وعلى هذا بقى فقس. يعني أدي فيل أهو أعمل إيه؟ هدخل رمضان بلا أفيال، لأني خلاص فهمت كويس جدا إن اختبار الأفيال ده اختبار بيسقط فيه أو بينجح فيه من كل ألف بني آدم، هو اللي بينجح والباقي بيسقط في اختبار الأفيال، كله بيجري على الفيل إلا واحد، يحيى بن يحيى الليثي هو اللي قعد، فلو حضرتك شايف نفسك يحيى بن يحيى الليثي اعمل ده، هات أفيال تتنطط في البيت وقول أنا جدع، أنا مش هبص للأفيال، مش هيحصل، بلاش يا جماعة، هو كل طب إحنا مستنيين إيه؟ أنتم عارفين المقولة اللي بنسبها لأينشتاين مش عارف إيه، اللي هو إيه؟ من الغباء إنك تكرر نفس التجربة كل مرة وتنتظر نتيجة مختلفة، يعني ليه؟

يعني ليه إيه اللي هيحصل إيه المختلف يعني؟ يعني فين العقل اللي هو كل رمضان أقول هعمل وما تعملش، يبقى لازم وقفة بقى، وقفة رجالة بقى، كل سنة هنقول هنعمل ونساوي وما بنعملش، طب إيه الجديد السنة دي؟ إن لازم يبقى في خطوات ما خدتهاش قبل كده، خطوات جريئة، خطوات قوية، صعبة أه صعبة، أنا عارف إنها صعبة، اللي أنا بقوله ده مش سهل، أنا عارف ده كويس، إنما الجنة تستاهل والله الجنة تستاهل. طب اللي إحنا بنعمله ده بيضيع الجنة، والله بيضيع الجنة، يعني أنا أديني بحلف أهو، بيضيع لأني أنا عمال أفترض افتراضات لو نزلنا أرض الواقع مش هنلاقيها يا شباب، أنا عمال كل شوية أفترض إيه وأحترز وأقول إيه إحنا ما بنعملش حرام، أنا عمال أقول كده، أنا بكلم اللي ما بيعملش حرام، هو ده بيحصل بنسبة قد إيه؟ إن شاء الله مصيبة، يعني زمان كنت عشان تعمل الحرام لازم عملية طويلة عشان توصل للحرام مش كده؟ لا النهارده لا، الحرام معاك في كل حتة، في كل حتة، فإنت لازم تدخل رمضان بلا أفيال، فالتليفون ده فيل، مش هدخل بيه أصلًا، مش هدخل بيه إزاي؟ أدي أديني قلت لك أهو الحقيبة الرمضانية اللطيفة الجميلة بتاعتك، قبل رمضان، مستعجل ليه يا جماعة؟ بيقول قبل رمضان ليه؟ بقول رمضان أنتم عارفين في معنى مهم هنا.

لعيبة الكورة، اللعيب علشان يكسب أو الفريق عشان يكسب لازم كل لعيب يكون عنده حاجتين: لياقة ومهارة، بغض النظر بقى فردية يا جماعة، المهم إيه في الآخر؟ لياقة ومهارة، لو واحدة من دول تخلفت اللعيب ده ما يسواش حاجة، يعني إيه مهارة؟ يعني واحد لما بتبصله الكورة بيعرف يوقفها يستلم، ولما يجي يشوط بيعرف يشوط إزاي، ولما بيجيب ص هو بيعرف يبص إزاي ويعرف إزاي يرقص، دي اسمها إيه؟ مهارات، تخيلوا لعيب كورة كدة تيجي تبصله الكورة تعدي من بين رجله ما يعرفش يوقف الكورة مثلًا، ده نازل يعمل إيه ده؟ ده نازل يهرج، فلازم يبقى عنده مهارة مش كده؟ طيب، تخيلوا بقى صاحب المهارة ده بس ما عندوش لياقة، هو عنده مهارة على فكرة وعالية ماشي، إنما تلات دقائق فين صاحبنا؟ مرمي متسطح فين جنب العارضة، ده هو عنده مهارة بيعرف يوقف ويبص ويشوط وحاجة فخامة، إنما آخره تلات دقايق، طب الماتش ساعة ونصف حضرتك، فلازم يبقى عنده إيه؟ لياقة، لازم يبقى عنده لياقة، أهو أنت محتاج الاتنين دول في رمضان برضه عشان كده بنقول لك ابتدي من بدري، يعني إيه؟ يعني ندي مثال عشان نفهم الفكرة دي، يعني مثلًا واحد هنقول لك في رمضان من وظائف رمضان قراءة القرآن، طب قراءة القرآن لها مهارة، فواحد فوجئ كدة إيه ده؟ ما أعرفش أقرأ القرآن، ما أعرفش أحكام تجويد، مش عارف ده، فاقد للمهارة، ده فاقد للمهارة، فنقول له تعلم أحكام التجويد عشان تقرأ القرآن، وطالما بتتعلم فأبشر، إذا قرأته وتعت فيه لك أجران، إنما واحد مقصر لا يأثم، ما هو تجويد القرآن إيه حكمه؟

من لم يجود القرآن إثمه مشكلة، فمن لم يجود القرآن، فالأخذ بالتجويد حتم لازم، فلازم نتعلم تجويد القرآن. فإذا اكتشفت أنك ليس عندك هذه المهارة، فهذا حال شخص واحد. وهناك شخص آخر معه القراءات العشر ومقفل هذه الجزئية من المهارات، لكنه هاجر القراءة لفترة، فهو عمال يقول لك إن شخصًا يدخل رمضان، ولكن ستشاهد ما يحدث فعليًا؛ يدخل رمضان فيدوس، ثم تجده في الثالث من رمضان، ثم في العاشر، ثم أين هو؟ لقد تعب، لأنه لا يملك اللياقة، ليس معتادًا على هذا العملي، فبمجرد أن بدأ واشتغل يومًا ثم يومًا، ضاعت لياقته.

فأنت لازم يكون عندك الاثنين: المهارة واللياقة. قل مثل ذلك في أي عبادة شئت، فلديك قوتان: قوة علمية وقوة عملية. وعندما تملك هاتين القوتين كما قال ابن القيم: «سعادة المرء قوة علمية وقوة عملية».

لذلك نحن نتحدث قبل رمضان بأسبوع، والمفروض أن نتحدث قبل رمضان بأكثر من ذلك؛ لأن رمضان كان يشغل السلف، وهو سنة كاملة وليس من ستة أشهر فقط. كانوا يدعون الله ستة أشهر أن يبلغهم رمضان، فإذا انقضى رمضان دعوا الله سائر العام أن يتقبل منهم رمضان. فكانت السنة كلها دائرة على هذا الموسم.

لكي نفهم السلف، تخيلوا تاجر ملابس؛ موسم تاجر الملابس يكون في العيد، وهو موسم رواج السلعة. التاجر المهتم بالموسم لا يبدأ العمل عند مجيئه، بل يحضر له من قبلها بمدة طويلة، فيتفق على القماش، والخيوط، والتصاميم، وتجار الجملة والتجزئة. فإذا وجدت نفسك تتحضر للموسم مع أتيانه، فاعلم أنك ستخرج خسرانًا.

نحن نريد أن نستعيد لياقتنا في هذا الأسبوع، ونرى أعمال رمضان. وهناك نقطة مهمة؛ قد تجد لاعب كرة لديه مهارة ولياقة عالية ويلعب في الدوري الأوروبي، وفجأة يُطلب منه اللعب في الخليج دون إعداد أو تدريب، فإنه لن يستطيع، ليس لنقص المهارة، بل لأن لياقته ليست في هذه الأجواء. كذلك من عنده مهارة قراءة القرآن ولكن ليس لديه اللياقة وهو صائم، أو لديه الاثنين ولكن ليس لديه القدرة على السهر بالليل للصلاة، فمطلوب منه أن يقلل نومه لكي يقرأ القرآن.

هذه هي الأشياء التي تضيع الناس في رمضان، فنحن نحتاج أن نتدرب ونعتاد؛ أن نكون صائمين بالنهار، قائمين بالليل، نقرأ في المصحف. الإمام الشافعي رحمه الله وغيره من السلف كانوا يختمون في رمضان، ومنهم من كان يختم في ركعة واحدة.

كان الشيخ عبد العظيم رحمه الله يقرأ عشرين جزءًا في الليلة في الصلاة، من مغرب وعشاء وتراويح وفجر. هؤلاء الناس حجة أمام الله؛ فأنت شاب صغير قد لا تستطيع صلاة ركعتين بالليل، والشيخ كان في أيامه العادية يختم كل أسبوع في صلوات المغرب والعشاء والفجر. هذه هي اللياقة التي أتحدث عنها.

الشيخ الدبيسي رحمه الله كان من آيات الله عز وجل؛ فقد كان مريضًا مرضًا شديدًا، وكنّا نحضر له، فكان يصلي الركعتين ثم يترمى في الأرض من التعب، والأطباء والأدوية تأتي لكي يقوم ليصلي الركعتين اللتين بعدهما. هذه أحوال رأيناها بعيوننا.

يا أيها الشاب، لا تكن من الذين ينتظرون الشيخ حتى يدخل الحمام ليتوضأ ثم يخرج، بل كن جادًا في عبادتك.

عارفين نبقى كده بايه؟ حد يقول كلمة واحدة بالله، بالله مش بحاجة تاني. وده كان رد الشيخ أحمد عبد العظيم رحمه الله على أي حد بيسأله، يعني أي حد يتعجب يقول له: لو كان بحولي وقوتي فلك أن تتعجب، فعلاً إنما هو مش بكده، هو بالله سبحانه وتعالى، أنت بتتعجب من إيه؟

فاحنا محتاجين بقى في الأسبوع ده نحاول إيه نجتهد علشان ربنا سبحانه وتعالى يعنا في رمضان على إيه أن احنا نحصل إيه مغفرة وعتق، ده هدفنا، ونعمل إيه؟ وده درس النهارده، هو درس النهارده يعني يعني احنا كل اللي فات ده استطراد، إنما درس النهارده: ندخل رمضان بلا أفيال.

احنا اتكلمنا عن اعظم فيل: التليفون اللي في جيوبنا، وكل واحد عارف أفيال إيه بقى؛ فمن قبل رمضان يقطع الأفيال دي، مثلاً الفيل بتاعك العزومات: أنا راجل اجتماعي وبحب اتعزم وأعزم، بس بصراحة يا شيخ لو كان فيل أنا ما أعرفش، أصل ممكن واحد يقول لك إية: أنا بعزم بس، لا احنا عارفين نظامنا، بناكل مع بعض، شكرا انتهى الموضوع، خدنا ثواب اطعام الصائم إفطار الصائم وخلاص، كل واحد في حاله بقى، اللي رايح مسجده، اللي قاعد بيتعب في البيت، وهكذا.

إنما لا، أنا عارف يا شيخ لا، ده فيل من أفياليس، خلاص فاتتني الليلة، أو نزلت صليت في مسجد ما بيصليش بنفس المقدار اللي متعود أصلّي بيه، أو هيتفتح التلفزيون فهستهبل وأقعد واتفرج، فيل آه من الأفيال، من قبل رمضان تخلص من هذا الفيل ازاي يا جماعة؟ رمضان لا بعزم ولا بتعزم، شكراً خلصت.

هتعمل مشكلة كبيرة مع أبوك مع أمك، خلاص يبقى دول هي عزومة الاب والام وانتهينا على كده، شطبنا مافيش تاني لو كان فيل من الأفيال. وهكذا شوف أنت إيه اللي بتضيع عليك رمضان، وادخل رمضان بلا أفيال.

الشغل يبقى من بدري، بخلص شغلي مرتب على إجازتي في رمضان شكلها إيه وهكذا، على قد ما نقدر، طبعا عارف إن في أشغال ما بتحتمش ده، اللي يعرف يعمل ده يعمل ده. فدخل رمضان بلا أفيال.

قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.