دخولتسجيل الدخول

أويس القرني

أمجد سميرالشيخ أمجد سمير
  • مدة الدرس:
  • قراءة

بسم الله، الحمد لله، والصلاة والسلام على رسول الله، وعلى آله وصحبه ومن والاه، وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على محمد النبي وأزواجه أمهات المؤمنين وذرياته وأل بيته، كما صليت على آل إبراهيم إنك حميد مجيد.

أما بعد: النهارده أنا كنت ناوي (مجلتش) النهارده، قلت يبقى درس مختلف، نقعد نقرا كده مع بعض حاجة ترقق القلوب وبتاع، بس أنتم عارفين بقى اللي فيه طابع ما بيعرفش، فطلع الكرباج خمس دقايق وندخله تاني إن شاء الله. دلوقتي أنا دخلت قبل على الأذان، وبعدين الصراحة أحوال الشباب ما تزعل، يعني أفعال كثيرة، يعني هي أفعال الوقت يعني وما الناس قاعدة مش منتبهه، يعني لا في صلاة ولا في دعاء ولا في ذكر ولا في أي حاجة، معظم الناس قاعدين كده يضيعون ذلك الوقت الثمين.

بقى ولا وقتكم ثمين؟ ولا سمين؟ ذلك الوقت الثمين وقت عجيب جدا بين الأذان والإقامة، من اوقات الإجابة، ورحم الله امرا صلى قبل العصر أربعا. أنت أصلا لو صليت الأربع ركعات بس هتاخد عشر دقائق مثلا، فما فيش ناس كتير ما صلتش الأربع ركعات، واللي صلى ركعتين؟ طب صليت ركعتين عشان مشغول بأعمال أخرى تزحمت عليك أعمال الآخرة، فقدمت عملا على آخر؟ ولا إلا إيه؟ لا، ده اللي صلى ركعتين صلاهم عشان يقعد ساكت كأنه ما بيعملش حاجة.

الإشكال هنا فين؟ الإشكال أن عندنا إشكالين؛ الإشكال الأول أن المفروض أن إحنا الفئة المتدينة، ودي مصيبة كبيرة، يعني لما يكون أهل التدين هي اللي ظهر فيهم تلك الآفات وهذا التفريط، فدي مشكلة. يعني مشكلة أولا فينا نفسنا، إحنا اللي مفرطين، إحنا أنا وأنتم يعني، مشكلة كبيرة فينا أن إحنا ما نجيش بقى نناقش بعد كده أن همنا الآخرة، همك الآخرة ما هو ده وقت اهو من اوقات الآخرة.

ويظهر أن برضه عندنا مشكلة شوية في الخطاب، مثلا يعني عاوزين نشد عليكم زيادة ولا في زيادة نشد عن كده كمان ولا الناس بتطفش؟ فدي أول مشكلة؛ يبقى أول مشكلة أن الفئة المتدينة هي دي اللي ظاهر فيها تلك الآفات، خلاص، الكسل عن الطاعات، وحتى مع الاجتماع، الواحد لو هيكسل في بيته، طب أنت دلوقتي قاعد في وسط الناس، المفروض نشد بعضنا، فنلاقي لا ده كله مكسل، دي مشكلة يا جماعه لو أنتم مش شايفين اللي احنا نقوله ده مشكلة فهي مشكلة كبيرة أن ده يكون في صفوف أهل الدين.

طيب، مستنيين من مين أنه يتمسك بتلك السنن وتلك الآداب وتلك الأوقات الشريفه يعمرها بطاعة الله عز وجل؟ مستنيين مين بقى؟ فدي أول مشكلة. المشكلة الثانية: أنه بعد تلك الأخلاق وتلك الأفعال الرديئة التي يكرهها الله عز وجل منا، نتبجح بقى ونقول هي غزة ليه ما انتصرتش؟ وغزة ليه ما اتعملتش؟ بمين بقى تنتصر؟ بمن؟

هذا وقت شريف وهو من أوقات الإجابة، فلما نبص يمين وشمال ورا وقدام، نلاقي معظم الناس لم ترفع أيديها إلى الله عز وجل في هذا الوقت، فضلا عن اللي رفع دعا بقى لإخوانه ولا لم يدع, دي قضية ثانية، ومقدار الدعاء ومقدار الإقبال على الله في ذلك الدعاء، وأنه يرى فعلا أنهم إخوانه أصابهم ما أصابهم، يعني كأنه لو نزل بزوجك أو بولدك أو بأخيك أو بأختك أو بأبيك أو بأمك شيء، هيبقى دعائك ليه زي دعائك لإخوانك هناك؟ ولا ستكون أكثر إقبالا وأكثر خضوعا وأكثر شعورا بما وقع فيه أخوك أو أبوك أو أمك أو كذا؟

إنما المؤمنون يا إخوة، دول اللي رفعوا أيديهم، طب اللي ما رفعوش هم الأكثر، ما نجيش بعد كده نقول أين النصر ولماذا تخلف النصر ولماذا تاخر النصر، وعلى من ينزل النصر ولمن ينزل النصر؟ فالحقيقة أحوال عجيبة مني ومنكم، أنا قبلكم يعني، فهذه الأحوال تحتاج مراجعات، يعني إيه مراجعات؟ هتقعد مع كل واحد فينا يقعد مع نفسه، وهذه صفحه من صفحات عمرك أهي أنا أجليها لك الآن، يعني هتيجي في يوم القيامة هتلاقي ما هو ما فيش لحظة هتعدي غير وهي موجودة.

مش كده؟ ﴿لَا يُغَادِرُ صَغِيرَةً وَلَا كَبِيرَةً إِلَّا أَحْصَاهَا﴾ [الكهف: 49]. فهتيجي هتلاقي في صفحه من صفحات كتابك أنه كان في وقت بين أذان وإقامة وكان ممكن يعمر ذلك الوقت بكذا وكذا وكذا، وأنت تركت تركت كل ذلك، هي دي معصية؟ أنا ما بقولش معصية.

وأصلا اللي انا بقوله سبحان الله له تعلق للدرس، أنا مش محضر الكلمتين اللي أنا بقولهم دلوقتي دول، بس لهم تعلق للدرس بتاع النهارده، لكن إحنا بنتكلم لما نلاقي أهل الدين، أهل التدين يعني، أو من يظن فيهم ذلك تركوا السنن وتركوا المستحبات وتركوا التنافس على المراتب العاليات، سايبينها لمين بقى؟ عجب والله عجب، أحوالنا عجيبة.

ويظهر أن ذلك كاشف لما هو أبعد، يعني لما تكون في وسط الناس في المسجد، الناس المتدينة، الناس اللي المفروض أنها حريصه، فتكون على تلك الحال، قال: طيب ما هي حالك إن خلوت بربك؟ لما قدام الناس حالنا حال البطالين، أمَال لما بنخلو بالله عز وجل بتبقى حالنا شكلها ايه؟ ما هو المفروض لما بنجتمع بننشط للعبادة، يعني ده واحد من العوامل اللي بتنشط الناس للعبادة أنهم يجتمعون على خير مش كده؟ فتلاقي العبادة تبقى أسهل وينشطون، ينشط بعضهم بعضا. فإذا اجتمعنا وكانت تلك هي حالنا، كانت تلك هي حالنا، يبقى لو كل واحد فينا لوحده بقى في بيته حاله عاملة إزاي؟ خربانة خالص.

فلازم كل واحد يقعد فينا بقى مع الرسالة، الرسالة كل واحد لازم يقعد فينا مع نفسه ويفتش في نفسه هو أنا ليه كسلان كده؟ هو أنا الوقت اهو فاضي، يعني أنا مش مثلا مشغول بحاجة، طبعا فضلا عن اللي طلع الموبايل وقاعد عمال يفر في هذا الوقت الشريف وفي هذا المكان الشريف، وأنا أتحدى اللي عمال يفر فيسبوك ولا انستغرام ولا كذا، أتحدى أنه عدت عليه دقيقة أو دقيقتين من غير ما يتعرض لحرام، ده تحدي، من غير ما يتعرض لحرام! لصورة بقى مؤذية، موسيقى تشتغل، أي حاجة، فين؟ في بيت من بيوت الله عز وجل في وقت شريف تستجاب فيه الدعوات.

طيب الله عز وجل إذا نظر إلينا فرأى تلك الحال، يعمل إسبحانه وتعالى؟ يعني تلك الحال حال رحمة؟ حال تنزل رحمات مثلا؟ ولا هي حال الوقفة والبعد؟ فسأل نفسك لماذا هذا الكسل عن العبادة؟ وعلى في الدنيا حريصين جدا على أننا نحصل كل شيء ولو فاتنا شيء نزعل، وفي الآخرة إدي أحوالنا أهي! إدي أحوالنا!

الحقيقة الدرس اللي فات -كده بديت الدرس بقى- أجر الله عز وجل على لساني كلمة وبرده ما كنتش محضرها، يعني هي قدرا، قلت إنه كثير من الشباب لما يقرا عن بعض الكرامات التي ظهرت على بعض الأولياء يتمنى لو حصلت تلك الكرامه، اللي يدعي ربنا فيستجاب له ودعاء على طول مستجاب، اللي مش عارف شرب السم وماماتش، الكرامات ثبت الأولياء، ونقرا عنها ونسمعها فربما البعض يعني تشوق لمثل تلك الكرامات وتظهر عليه هذه الكرامات.

وساعتها قلت إيه؟ قلت يعني أن هؤلاء لم ينالوا ما نالوه إلا بأمم، هو مش نام فاسق وأصبح وليا له كرامات، وإنما قدموا أشياء. وبرده مما جرى على اللسان وبرده ما كانش أن جبت سيرة كده من حد فاكر؟ أُويس القرني، وقلت لكم مثال كده صغير عنه، وأشمعنى ده اللي جه على ذهني وقتها؟ علشان أُوَيْس القرني في خصيصة عجيبة جدا، أن النبي عليه الصلاة والسلام يقول للصحابه -وأُوَيْس القرني تابعي-: أن في واحد اسمه أُوَيْس القرني، ويصفه للصحابة، وبعدين يأمر الصحابة: من لقيه منكم فليأمره أن يستغفر له.

ولذلك أُوَيْس القرني سيد التابعين وإمام الزاهدين رحمه الله، عجيب، دعاؤه مستجاب، والنهارده إحنا جايين نعمل إيه؟ هنقرا شوية في ترجمة أُوَيْس، دعاؤه مستجاب، يدعي بأي حاجة، وهنعرف بعد شوية إن شاء الله في تفاصيل قصتي أُوَيْس أنه ممكن يدعي في شيء بالتفاصيل، يعني مش يدعو دعاء مجملا، لا، ده ممكن يدعو بالتفاصيل فتقع كما دعا، عجيب.

وحتى أن بعض الصوفية يعدونه من جملة الأبدال، ومن جملة مقاتيف الأبدال، لفظ نبوي، أحاديث الأبدال بعض العلماء يضاعفها وبعضهم يصححها، ودي مسألة حديثية، إنما ورد في لفظ في لفظ نبوي، ومما قيل في تسميتهم، في سبب تسميتهم أنه يبدل الله عز وجل بدعائهم الأحوال، ليه؟ لأن دعاؤه مستجاب، تدخل له فقير تطلع غني، تدخل له قلبك قاسي تطلع قلبك رقيق، ليه؟ ادعي لي، يدعي لك، فتبدل الأحوال، هذا مما قيل في تسميته، وهو قيل أنه لأن كلما ذهب منهم رجل أبدل الله عز وجل به آخر فسموا بالابدال لذلك.

المهم فهو له شأن شان عجيب جدا أُوَيْس، وذكرت قول الله عز وجل في هذا، حد فاكر قلنا إيه؟ نالوا ما نالوه بأمرين ذكره الله في كتابه، إيه هم؟ ﴿وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا وَكَانُوا بِآيَاتِنَا يُوقِنُونَ﴾ [السجدة: 24]. فهم نالوا الإمامة في الدين بهذين الأمرين: بالصبر واليقين، وإن شئت فقل: اليقين حملهم على الصبر.

ولذلك بعضهم يقف: يهدون بأمرنا لما صبروا، وبعدين وكان حالهم أنهم كانوا باياتنا يوقنون، فمحتاجين صبر، يعني إحنا المثال اللي ضربناه في الأول اهو، هو ممكن واحد ينشط للي قلناه ده؟ يعني ممكن واحد يقول: والله دي أول مره في حياتي ما اصليش بين أول مره مادعيش، نقول له ما هو القضية فين؟ القضية في الاستقامة الاستمرار، هي دي القضية.

ولذلك إحنا بنتكلم على الكرامات بقى والشباب اللي عاوزين كرامات، اعظم الكرامة إيه؟ الاستقامة الاستقامة! أعظم كرامة أنك تستقيم، أنك من يوم ما تدينت ليوم وفاتك أنت ليك حد أدنى، طبعا الاستقامة هنا مش معناها أن أنت ما فيش فترة في ال يعني ما فيش فترة، يعني ما فيش نزول، يعني كيرف لا بينزل، لكن في حد أدنى أنت ما تنزلش عنه خالص، والحد الأدنى ده هو حد بالنسبة للناس لا حد مرتفع، مش بنيجي على الحاجات الـ... يا جماعه يا جماعه، وانا الكلام ده قبل كده كتبته في منشور.

تدخل كده الصلاة، صلاة العشاء، ما أعرفش تلاقي إيه بمنتهى الاريحية كده، الناس الكبيرة اللي هي 50 سنة و60 سنة، ماشي، الناس اللي هو يعني طبعا هذا التقسيم أنا لا أرضاه لكن ده في أذهان بعض الشباب، ومش عارف ليه برضه يقول لك إحنا الناس العادية والإخوة ما أعرفش عشان أنا التقسيم ده أنا ما أعرفوش في الدين بصراحة، إنما المؤمنون إخوة، فكل إنسان مسلم هو أخ لك وكل إنسانية مسلمة هي أخت لك.

ماشي، طيب، ظاهره بقى إيه وظاهرها إيه؟ خلاص، يعني هو ممكن يبقى ظاهره في تقصير في جانب معين وباطنك أنت خرب، وظاهرها فيه تقصير من جانب معين -يعني مش بنجامل- وباطنك أنت خرب، خلاص؟ الرجل اللي بيحلق لحيته يحلق يعني بالموس، يعني مش منبته خالص، هذا حرام؟ اه حرام، يأثم؟ اه يأثم على فعلته تلك، خلاص، طب والكبر اللي في قلبك؟ والعجب اللي في قلبك؟ وسوء الظن اللي في قلبك؟ اللي في الحاجات دي فين طيب؟ لو رتبناها في دين ربنا سبحانه وتعالى، إيه ييجي قبل إيه؟ إيه أعظم؟ حلق هذا لحيته ولا كبرك وعجبك بنفسك وسوء ظنك بأختك؟

مش لو ما بتحلقش لحيتها لو مثلا متبرجه مثلا عشان يعني واحده لابسه حجاب شرعي وواحده ثانيه ماهيش لابسه حجاب خالص، طب وقع في ذنب؟ اه وقع في ذنب طبعا، لكن ممكن يبقى الذنب اللي هي واقعه فيه هو أصغر عند الله عز وجل من ذنوب كثيرة في قلبك أنت يا منتقبة ولا يا مختمرة ولا كذا، طب أنت كده بتهون؟ أنا ما بوهنش حاجة، أنا بقول لكم هو ده الترتيب عند ربنا سبحانه وتعالى.

ممكن يبقى اللي حالق لحيته ده ولا المتبرجة دي ما بيفتهمش فجر، يعني هو على طول في الفجر في المسجد وهي على طول صاحية تصلي الفجر، وتكون أنت بتصهين عن الفجر ولا أنت بتنامي عن الفجر، ممكن ما حدش يعرف، ممكن يكون هو أبر بأمه -أُوَيْس القرني أو القرني هيجي معانا أنه كان بارا بأمه برا شديدا- فممكن يبقى هو أبر بأمه وأبِيَك وأبيك منك، وتكون أنت مش بس مش بار، تكون عاق، فنحتاج نطاطئ رؤوسنا وتخشع قلوبنا ونفكر في أحوالنا، نحن أحوالنا تكفي أننا نفكر فيها، ما عندناش رفاهية ولا وقت أننا نفكر في غيرنا، غيرنا فين وداخل فين ورايح فين وجاي منين وعمل إيه وحلق ولا ما حلقش ولبست ولا ما لبستش.

اه اللي يعنينا ممكن إيه واجبنا تجاه ذلك؟ ممكن برضه نرجع في الآخر بنفكر في إيه؟ في نفسنا، إنما كل نفس بما كسبت رهينة، فإيه اللي جده بقى؟ وجعلنا منهم أئمة يهدون بأمرنا لما صبروا، تصبر بقى على إيه؟ اه تصبر على أنك الوقت اللي بين الأذان والإقامة ده ما تضيعوش، تصبر.

تصبر، إن المؤذن يؤذن وأنت في المسجد، هذا يحتاج صبراً؛ أن تبقى حياتك كلها تصبر على تكبيرة الإحرام، وتصبر على الصف الأول. أنا حكيت لكم حكاية الشيخ أسامة المرة اللي فاتت في موضوع تكبيرة الإحرام. الشيخ أسامة عبد العظيم -رحمه الله-، طبعاً أنا حينما أجلس أتكلم، الكلام يأتي تلقائياً؛ فأنا لست محضراً شيئاً في موضوع تكبيرة الإحرام، حتى لا يقول أحد: لماذا السلف في كل شيء؟ ولكن الشيء يأتي في دماغي فنقوله، فهو رزق. كان عندهم جنازة في بلد فسافروا إليها، والشيخ لا تفوته تكبيرة الإحرام ولا الركعة الأولى.

فوصل البلد، وكان بلد زوجته، وهي الفرق بينها وبين القاهرة ساعة مثلاً، فوصل ووجدهم -وهم عارفين أن الشيخ إذا جاء لا يقيمون الصلاة إلا إذا جاء الشيخ ليلحق بها-، ففي هذه المرة حصلت لخبطة. هو في تفصيلة لازم نعرفها، مسجد الشيخ هنا في القاهرة لا يقيمون الصلاة غير لما الشيخ يقول لهم أقيموا؛ فالشيخ يتأخر عادي جداً، الظهر في الطبيعي ممكن يقيمه بعد ساعة ونصف، عادي ما فيش مشكلة. فالشيخ وصل ووجدهم في الركعة الأولى أو يصلون، فنزل أولاده وقال لهم: أنا سأرجع أصلي في مسجدي. لم تفته الجماعة، تكبيرة الإحرام لم تفُت الشيخ، نزلهم ورجع القاهرة ثاني ليصلي في مسجده.

وأنا حدث معي موقف مع أحد الدعاة الذين هم أكبر منا قليلاً -المشكورين-، لا أحب أن أقول اسمه، كان عنده درس في مسجد يحضره الآلاف، وهو درس أسبوعي، أو بالأصح كانت ندوة أو محاضرة في سلسلة محاضرات أسبوعية. ذهبت لأجلب الشيخ، فركب معي، وبرضه الشيخ هذا مسجده لا يقيم الصلاة غير لما يذهب هو، بالذات صلاة العشاء؛ نصف ساعة أو ساعة إلا ربع لازم الشيخ يجيء عشان يقيموا الصلاة. فهو لم يصلِّ في مسجده ساعتها عشان نلحق الدرس. ونحن ماشيون أذن أذان العشاء، فقال لي: اركن يلا عشان ندخل المسجد. قلت له: نحن إن شاء الله سنلحق الصلاة هناك. قال: لا، أنا لا تفوتني تكبيرة الإحرام.

فخلوا بالكم يا جماعة، المسألة هنا أن هناك آلافاً ينتظرون عشان يسمعوا كلمة، وممكن واحد يقول: الدعوة الناس ستمشي! فدخل. ولحد هنا عادي، ممكن أي أحد يفعله، ألا تفوته تكبيرة الإحرام عادي؛ المفروض في وقت معين تقول: أنا سأقعد هذه الأربعين يوماً أو هذين الشهرين لا تفوتني تكبيرة إحرام. دخل الشيخ، وطبعاً الشيخ معروف، فلما وجدوا الشيخ قدموه ليصلي، فظننت أن الشيخ سيتجاوز في الصلاة، لأنه عنده درس والناس جالسة، فالشيخ استرسل في الصلاة وطول فيها ولا كأني في درس ولا كأني في ناس مستنية. وكان ذلك درساً لي: أن الصلاة أهم، الصلاة خير موضوع، ليس من أجل الدرس نخل بالصلاة أو نتجاوز فيها، لا خالص، الصلاة خير موضوع، فنتم الصلاة على قدر استطاعتنا، وبعدين نشوف موضوع الدرس هذا يجيء بعدين. فاطمأن في صلاته وأطال فيها واسترسل.

فمحتاجين ترتيب الأولويات. نحن محتاجين صبراً يا جماعة؛ صبراً على الطاعة، وصبراً عن المعصية، وصبراً على أقدار الله المؤلمة. محتاجين ذلك الصبر، وبذلك الصبر تنال الإمامة: ﴿وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا﴾ [السجدة: 24]، تنال الولاية، وتظهر الكرامات. بهذا الصبر، هل نصبر بنية أن تظهر الكرامات؟ لا، هو الولي لا يريد أن تظهر الكرامات أصلاً، الولي ليس حاباً أن تظهر الكرامات ويبقى مشهوراً؛ عفواً، لا يريد أن يعرف أنه يستجاب له الدعاء. ولذلك لما يتعرف عنهم ذلك يعملون إيه؟ يهربون، أليس كذلك؟ وذو القرنين سيأتي معنا، يروح حتة ويتعرف عنه أي شيء يهرب، لدرجة أن أويس القرني مات فين وامتى؟ ما فيش معلومة يقينية، بعضهم يقول في أذربيجان، وبعضهم يقول حضر صفين مع علي، وهذا أويس القرني سيد التابعين! أنتم فاهمين يا جماعة سيد التابعين؟ وفيات أمثال هؤلاء تؤخذ بالدقيقة والثانية! وهو أويس القرني مختلفون في موته، ليه؟ لأنه كان هربان؛ اتعرف في اليمن هرب للكوفة، اتعرف في الكوفة هرب في الصحراء.

نحن طبعاً أول ما يستجاب لك دعاء، ثاني يوم على الفيسبوك "حظ"، وممكن تعملها بصياعة: والله أنا كنت قاعد إمبارح فدعيت وبعدين حصل، تقولها في النص، كأن الموضوع ليس موضوعنا، فموضوعنا شيء ثانٍ، بس سأرميها لكم في النص؛ هم ما كانوا هكذا يا جماعة. ففي هذا الدرس بدا لي أن نقرأ شيئاً من سيرة أويس -رحمه الله-، فلنقرأ من صفة الصفوة، كتاب من؟ ابن الجوزي.

يقول ابن الجوزي -رحمه الله- عن أسير بن جابر قال: كان عمر بن الخطاب إذا أتت عليه أمداد أهل اليمن سألهم: هل فيكم أويس بن عامر؟ حتى أتى على أويس فقال: أنت أويس بن عامر؟ قال: نعم. طبعاً هذه رواية وفي روايات كثيرة في هذه الحتة؛ كان عمر -رضي الله عنه- كلما يجيء أمداد اليمن يسألهم: حد فيكم من مراد ثم من قرن؟ أويس بن عامر القرني من مراد ثم من قرن؛ قبيلة مراد، وبعدين فخذ منهم اسمهم قرن، فهو من هؤلاء. فكان يسأل كل سنة في الحج عن أويس بن عامر، لغاية ما في سنة من السنين حج أويس بن عامر، فقال له: أنت أويس بن عامر؟ قال: نعم. قال: من مراد ثم من قرن؟ قال: نعم. قال: كان بك برص فبرئت منه، أو برأت فبرأت منه، إلا موضع درهم؟

أويس بن عامر -ودي ليها قصة- كان عنده برص، شيء مثل البهاق، فدعا الله فبرئ من هذا المرض، طب ليه إلا موضع درهم؟ وكان هذا الموضع في سرته. الحقيقة يا جماعة، أنا قلت لكم في البداية أويس بن عامر كان لما يدعو الله يدعو بتفاصيل فتقع التفاصيل؛ ليس دعاءً إجمالياً. أويس بن عامر هو الذي دعا هكذا، دعا ربه أن يبرأ من هذا المرض إلا موضعاً ليذكر به نعمة الله عليه، فكلما يرى هذا الموضع يفتكر أني كان عندي برص مالي وجهي وجسمي وشفاني الله عز وجل؛ فده دعاء أويس.

قال: فبرئت أو برأت منه إلا موضع درهم؟ قال: نعم. قال: لك والدة؟ قال: نعم. قال: سمعت رسول الله -عمر يقول-: «يأتي عليكم أويس بن عامر مع أمداد أهل اليمن، من مراد ثم من قرن، كان به برص فبرئ منه إلا موضع درهم، وله والدة هو بها بار». اسمعوا يا جماعة، نحن اليوم نقرأ سيرة أويس لنقف على تلك الحيثيات التي نال بها أويس تلك المرتبة، مرتبة الولاية؛ فحيثية من الحيثيات أنه كان باراً بأمه، حتى في بعض الروايات أن أويس بن عامر كان يريد لقاء النبي -صلى الله عليه وسلم- يعني كان سيشرف بالصحبة، ما منعه إلا بره بأمه؛ أمه كانت مريضة وقيل إنها كانت مشلولة ولا تتحرك، ولا بد من أحد يخدمها.

فأويس، خلوا بالكم يا جماعة، لو ترك أمه لنال شرف الصحبة، فأويس آثر أن يبر أمه وألا يذهب إلى النبي -صلى الله عليه وسلم- لينال بذلك رتبة الصحبة؛ فالنبي -صلى الله عليه وسلم- يثبت له البر بأمه، فبر الأم! أنتم فين من هذا؟ نحن كلنا من بر الأب والأم، وأين البر من الدين؟ بعيداً عنا الآن، ويا جماعة نحن في ناس منا للأسف مشكلتها في القوة العلمية، وعندنا ناس مشكلتها في القوة العملية. يعني إيه الكلام هذا؟ يعني في ناس لا تفعل كذا لأنها لا تعرف فضل كذا؛ كنت دائماً أقول للشباب: في واحد من السلف يقول: أعرف 70 خصلة من خصال الخير لا أجد في نفسي واحدة منها. وكنت ساعتها أسأل الشباب: لو قلت لكم اكتبوا لي، كل واحد يطلع قلماً ويكتب لي 70 خصلة من خصال الخير، لا يوجد فينا أحد سيعرف يكتب.

فأنا أقول معظمنا لن يعرف يكتب؛ هل هذا لأن فينا خصال الخير؟ لا، هو لأننا لا نعرف خصال الخير، فالمشكلة عندنا الآن في القوة العلمية؛ نحن جاهلون. أقرب مثال لهذا في السنة، حديث ابن عمر أنه كان يصلي على الجنازة وينصرف، لا يتبع الجنازة لغاية ما تدفن، حتى سمع أن النبي -صلى الله عليه وسلم- قال حديثاً: «من صلى على جنازة فله قيراط، ومن تبعها حتى يفرغ منها فله قيراطان»، وكل قيراط مثل جبل أحد. فقال: لا إله إلا الله، كم فرطنا من قراريط! فهنا كانت المشكلة أين؟ لم أكن أعرف الحديث. فبعض الشباب ممكن لا يكون عارفاً أين البر من الدين، فتلاقيه على طول "لاطش" مع الأب والأم، وأنا هنا أتكلم على الناس المتدينة، وهذه أسئلة تأتي: "متخانق مع أبوي يومياً"، هذا عادي سواء ولد أو بنت، هؤلاء من؟ المتدينون.

لا، أنت أبوك وأمك اجعل خدك مداساً لهما، اتصرف، إنما فكرة أنه عادي جداً أنا الآن في الدرس والعشاء في درس وقاعد في الدروس وأمك في البيت غضبانه، هذا شيء عجيب الحقيقة. لا، بر الوالدين مقدم في دين الله عز وجل، خلاص، طب هذا بإطلاق؟ أكيد ليس بإطلاق، ما في شيء بإطلاق يا جماعة، عشان لا نقعد نقول هكذا، لا يوجد شيء بإطلاق، وفي حدود، آه أكيد في حدود، لكن نتعلمه؛ لازم عندنا العلم الكافي أن الحدود تقف فين، وكيف أتعامل؛ يعني ما دام الحدود وقفت هنا، هل في هذا الحد سأغضب وأزعله مني؟ لا، برضو.

ومن من السلف قلنا لكم عليه قبل ذلك الذي كان يغمز قدم أمه وبات أخوه يصلي؟ مين؟ ثابت ولا المنكدر؟ هذا على مسؤوليتك أنت، أنا لا أتذكر من الصراحة؛ كان يقول: كانت أمه تعبانة رجليها توجعها، وهو يحكي يقول: "أغمز قدم أمي" -يعني أفركها- وأنا طول الليل أدلك رجل أمي وبات أخي يصلي؛ أخوه طول الليل قائم الليل، قال: وما أحب أن تكون ليلتي بليلته. يعني لو عادت الليلة وقال لي: طب سيبني أنا أدلك رجليها وقم أنت صلي؛ لا لا، روح أنت صلي وأنا سأدلك رجليها. فهم يا جماعة فهم عميق لمسألة البر؛ فكان أويس باراً بأمه.

قال -والكلام للنبي عليه الصلاة والسلام-: يقول عمر مكلماً أويساً وذاكراً حديث النبي عليه الصلاة والسلام عشان نحن قطعنا، فممكن لا نعرف أين نحن: «وله والدة هو بها بار، لو أقسم على الله عز وجل لأبره، فإن استطعت أن يستغفر لك فافعل». النبي -صلى الله عليه وسلم- يقول لعمر -رضي الله عنه-: إن استطعت أن يستغفر لك أويس فافعل. عجيب! قال: فاستغفر لي، فاستغفر له، فقال عمر -رضي الله عنه-: أين تريد؟ أنت ذاهب فين بعد ما تخلص؟ قال: الكوفة. فقال: ألا أكتب لك إلى عاملها فيستوصي بك؟ أمير المؤمنين بقى كاتب توصية لفلان، هذا سيعيش كيف في الكوفة؟ "باشا" مش كذا؟ آه، شوفوا بقى أنتم الذين تتحركون عاوزين الكرامات عاوزين تلاقوا أنفسكم، يعني نفسنا نصبح مش عارف إيه، ما هم هؤلاء ليسوا نحن!

أهم قال له: سأكتب للعامل، أنت طبعاً أول ما تسمع كلمة مثل هذه، آه طبعاً، وبقى على طول وهذا ظهور للدين، وكأن البعيد هو الدين، أنت خلعت الدين، شيء غريب جداً. قال: أنا أحبكم، فلا تزعلوا، ماشي؟ ضرب الحبيب زي أكل الزبيب. فقال: ألا أكتب لك إلى عاملها فيستوصي بك؟ قال: لأن أكون في غبراء الناس أحب إلي.

ما هو الذي قال عنه النبي عليه الصلاة والسلام: «رب أشعث أغبر ذي طمرين، مدفوع بالأبواب، لو أقسم على الله لأبره». يبدل الله عز وجل الحال فوراً، لو أقسمت عليك يا رب أن يحدث كذا وكذا، ربنا يبر قسمه. فكان منهم أويس، فقال: لأن أكون في غبراء الناس أحب إلي.

فلما كان من العام المقبل حج رجل من أشرافهم؛ الناس اللي ليها مكانة في الكوفة، فوافق عمر، فسأله عن أويس: كيف تركته؟ قال: تركته رث الهيئة، قليل المتاع. شكله منعكش ومضطرب وهدومه مقطعة، وقليل المتاع ما عندوش حاجة. وفي رواية يا جماعة أن النبي صلى الله عليه وسلم قال لعمر: «لم يترك خلفه إلا أما له»، يعني ما عندوش حاجة؛ هو هيجيلكم في إمداد اليمن واحد اسمه أويس القرني مش سايب حاجة في اليمن غير أم.

فلما كان من العام المقبل حج رجل من أشرافهم فوافق عمر فسأله عن أويس: كيف تركته؟ في رواية أن هذا الرجل كان ابن عم أويس، وكان كثير الإيذاء لأويس، بيتريق عليه وبيتنمر عليه بلغة العصر، وفي رواية أنه ما فاطنش إلا أن أويس مين، مع أنه ابن عمه فهو مش متخيل أن عمر بيسأل عن ده، فما زال به حتى عرف أنه يسأل عن أويس، فقال له: أنت بتسأل عن ده؟ فعمر قال له: أيوه. قال: تركته رث الهيئة، قليل المتاع. فقال عمر: سمعت رسول الله صلى الله عليه وسلم يقول: «يأتي عليكم أويس بن عامر مع إمداد أهل اليمن من مراد، ثم من قرن، كان به برص فبرئ إلا موضع درهم، له والدة هو بها بر، لو أقسم على الله عز وجل لأبره، فإن استطعت أن يستغفر لك فافعل».

فلما قدم الكوفة أتى أويساً، هذا الرجل أول ما رجع من الكوفة في رواية أنه ما راحش بيته، نزل على أويس على طول، فقال: استغفر لي. فأويس قال: أنت أحدث عهداً بسفر صالح، أنت اللي تستغفر لي! فعاد عليه قال: استغفر لي. فعاد عليه أويس وقال له: أنت أحدث عهداً بسفر صالح، استغفر أنت لي! فعاد عليه، قال: لقيت عمراً؟ أويس فهم قال: أنت شفت عمر بن الخطاب؟ قال: لقيت عمراً. قال: نعم. قال: فاستغفر له. في رواية أن أويساً قال: لن أستغفر لك حتى تعاهدني على أمرين. قال له: إيه؟ قال له: أول حاجة تبطل تتريق عليا ولا تؤذيني، والأمر الثاني: لا تفشي سري، ما تطلعش تقول إيه ده عمر قال وقال. فأعطاه العهد وقال له: ماشي خلاص، لا أؤذيك ولا أفشي سرك. لكن ما لبث أن فشى السر، ففطن له الناس، فانطلق على وجهه، ساب الكوفة.

قال أسير وكسوته برداً، راوي الحديث أصلاً من الأول أسير بن جابر، فكان إذا رآه إنسان قال: من أين لأويس هذا البرد؟ طبعاً هنا برضو البرد ده ليه قصة، أن أسير افتقد أويس في الكوفة، وقال حاجة كده عن أويس بن عامر قال: كانوا بيقعدوا يحدثونا في المسجد. خلي بالكم إحنا في زمان فيه خليط بين صحابة وتابعين، فكانوا يقعدوا يحدثوا في المسجد، فأول ما أقول يحدث في المسجد ده فإما صحابي أو تابعي، إحنا فوق قوي. وكان يجي واحد كده إذا حدث أثر في القلوب ما لم يؤثر غيره، أول ما يبتدي يتكلم يحصل حاجة فينا كده، ثم افتقدته شوية اختفى هذا الرجل، فقعدت أسألهم عنه، واحد صفته كذا وبيقعد ويؤثر فينا، قالوا: ده أويس بن عامر.

قال: فذهبت إلى بيته وسأله أسير: هو أنت ما تجيش للمسجد؟ ما منعك وما حبسك عنا؟ قال: العري. ما عندوش حاجة يلبسها، يعني ما عندوش حاجة مش يعني الجلابية مكرمشة، لا هو ما عندوش حاجة تتلبس، لأن أويس بن عامر كان ثيابه الرقاع، يروح ياخذها من المزابل يغسلها في النهر ويخيطها، وده لبسه شكراً على كده. ففي هذه الفترة ما كانش عنده حاجة يلبسها، قاعد عريان. وعارفين مين اللي برضو أثر عنه أنه امتنع عن مجلس الطلب عشان العري؟ الإمام البخاري، كان طالباً وامتنع عن مجلس الحديث لأنه ما كانش ليه حاجة يلبسها، فشايفين يا جماعة الناس دي كانت عايشة إزاي.

فقال العري، قال: فكسوته برداً، أسير قال: خلاص اديته البرد بتاعي وراء الباب، فقال: يستهزئون بي، يعني أول ما أطلع عليهم في برد، أصل هو مش بيعود يلبس الملابس دي، وأويس متأذي من الناس، يقعدوا يتريقوا عليه، ودي فائدة هنجيلها كمان شوية. قال: يستهزئون بي، أول ما هيشوفوني هيتريقوا عليا، فأقسمت عليه حتى أخذ البرد. ففعلاً أول ما خرج الناس شافته في البرد، قالوا: ترى من خدع عن هذا البرد؟ يعني احتال على من عشان يلبس البرد ده؟ فرجع إلى بيته تضايق من سوء صنيع الناس معه. فلما لقى أسير هذا الفعل قال له أويس بن عامر: أرأيت؟ هم اتريقوا علي واتهموني وكذا وكذا. فجاء أسير إلى مجلسهم وعنفهم تعنيفاً شديداً وقال: دعوا الرجل.

الحقيقة وأنا بقرأ هذه الرواية وقفت أمامها كثيراً، وهي فكرة أن قلوبنا محشوة بتصنيف الناس، وأننا نصنفهم على الدنيا، طب هو ده في إشكال؟ فيه إشكال كبير. إحنا ممكن نبقى إحنا كده وحشين، وهذا قد يقع في قلوب الأولياء، بل هذا وقع في قلوب الصحابة، والحديث معروف: كيف تعدون هذا فيكم؟ الراجل معدي، إيه رأيكم في ده؟ هذا حري إن نكح أن ينكح، وإن تكلم أن يسمع له، وإن شفع أن يشفع. راجل كباره. سكت النبي عليه الصلاة والسلام شوية، عدى واحد تاني، ها إيه رأيكم في ده؟ حري إن نكح ألا ينكح، وإن شفع ألا يشفع، وإن تكلم ألا يسمع له. قال: هذا خير من ملء الأرض من مثل هذا.

فهنا النبي عليه الصلاة والسلام بيعاير الميزان، لما نيجي نوزن الناس ما نوزنهمش لابس إيه وراكب إيه ومعاه كام في البنك وبيتكلم إزاي، مش ده خالص. فأويس ده، إحنا بنستفيد يا جماعة أول ما تحتقرش مسلماً، لا تحتقري مسلمة، ظاهره بقى عامل إيه، ما تحتقرش بني آدم. الاحتقار ده مش باللسان يا جماعة، يعني أنت قاعد دلوقتي فدخل شخص حالق لحيته، فدي أول نظرة ليك ليه أنه يسقط على طول، سقط في الاختبار بتاع سعادتك، وده ممكن يبقى خير من ملء الأرض من مثلك ومثلي.

يا شيخ، هو مين فينا ملاك؟ مين فينا ما بيعصي ربنا سبحانه وتعالى؟ هو إحنا فينا حد ما بيعصيش ربنا؟ ما فيناش حد يا جماعة ما بيعصيش ربنا. فأيه الكبر ده وأيه رؤية النفس دي؟ وأنت كأن الله عز وجل وضعك في الأرض خليفة عنه حاشاه، بل هو الخليفة، فما فيش كده. طب لقيت واحدة حجابها مش مظبوط أو مش لابسة حجاب خالص، هي على معصية طبعاً، ومعصية مش سهلة لأنها مستمرة، يعني عمالة تفتن الناس، لكن أنت أحسن منها؟ مين قال ده إن شاء الله؟ لعلها هي أفضل من ملء الأرض من مثلك، ما نعرفش. ويمكن ليها بر عالي بأبيها بأمها، يمكن ليها صدقات، يمكن في شدة احتياجها وتخرج ما في جيبها، يمكن حاجات كتير قوي ترفعها درجات.

طب يعني إحنا نعمل إيه؟ انشغل بنفسك، الكلمة اللي هيجت الدنيا علينا مرة: مالكش دعوة بغيرك، إلا فيما يتوجه لك فيه خطاب شرعي، يعني لو في خطاب شرعي دلوقتي أن المفروض أنكر المنكر، أنكر المنكر ما فيش مشكلة، لأن ده الخطاب الشرعي لك أنت، فإنت كده برضو مشغول بنفسك، يعني أنت تفعل ذلك لأنه أمر لي أنا، مفهوم، إنما ما تمشيش تصنف في مخاليق ربنا. طب لقيت واحد مقطع ونايم في الشارع وهدومه ما فيش، فتقوم تحتقر بقلبك؟ لعله من الأولياء، لعله من أولياء الله عز وجل الصالحين الذين لا يؤبه لهم، ما هو ده الوصف اللي قاله النبي عليه الصلاة والسلام: لا يؤبه له. ما هو يا جماعة أنا هسألكم سؤال، الوصف النبوي «مدفوع بالأبواب»، اللفظ ده لو تأملناه، أنتم عارفين أن حد يصل لمرحلة أنه يدفعه بالأبواب دي؟ يعني أنا عاوز أقول لك أنت لو فتحت الباب، مين اللي لو فتحت الباب ولقيته تقفل في وشه؟ ده مش واحد مثلاً لابس ثياباً متواضعة ولا خالص، ده واحد وصل لمرحلة بعيدة قوي، هو ده اللي مدفوع بالأبواب. طب ده عند ربنا إيه؟ لو أقسم على الله لأبره.

طب يعني نستفيد من الموضوع اللي أنا بقوله ده وأنت بتتعامل مع أي مسلم؟ خليك خايف، أنت ما تعرفش ده إيه، وما تعرفش ده عند ربنا إيه، فخليك خايف، يعني إيه خايف؟ ما تظلمش حد، ما تجيش على حد، ما تحكمش على حد، خاف من الحتة دي قوي، وعندنا الحتت اللي أنا عمال أقولها دي عندنا فيها نصوص خاصة، خلي بالكم يا جماعة أنا بقول مع أي مسلم، آه مع أي مسلم.

يا شيخ اللي هو احنا مش عارفين لا عارفه وفاسق، إيه رأيك؟ في بعد كده؟ عشان بس نجيب من الآخر، طب ده فين؟ ده حديث النبي عليه الصلاة والسلام. ذكر أن كان في نبي من الأنبياء وفي اثنين، وكل واحد طائع لربنا وبيعمل كل حاجة، والتاني شوف اللفظ النبوي: لم يترك شيئاً من محارم الله إلا ركبها، واسرح بخيالك بقى في اللفظ ده، لم يترك شيئاً من محارم الله إلا ارتكبها وركبها. وكان أخوه كثيراً ما يعظه: يا عم اتق الله تعالى، انزل صلي معايا، تعالى نروح المقرأة، تعال. والتاني ما فيش، فمرة بينصحه فقال له إيه؟ قال له: خليني وربي، أبعثت علي رقيباً؟ أنت مالك؟ مالكش دعوة، خليني وربي أبعثت علي رقيباً؟ فقال: والله لا يغفر الله لك.

الكلمة دي بتتقال ولا ما بتتقالش دلوقتي؟ ده أنت روح، أنت ربنا عمره ما يهديك، والأم تلاقيها تقول لابنها كده، مش كده؟ ده أنت ربنا عمره ما يهديك، أهو هنا نفس الكلمة أهي: والله لا يغفر الله لك. أوحى الله إلى نبي هذا الزمان: من ذا الذي يتألى علي؟ مين اللي دخل في اختصاصي؟ أخبره أني قد غفرت لأخيه وأحبطت عمله. طب والله لا يغفر الله لك دي، أنت مش تقولها بلسانك، أنت مجرد أنك ماشي كده ويقع في قلبك أن ده ربنا مش هيديه، ما قلتهاش، ما يؤمنك ألا يرد عليك بمثل هذا الرد: من ذا الذي يتألى علي؟ أنت بتدخل هنا ليه؟ هي دي بتاعتك أغفر لمين وما أغفرش لمين؟

طب أنا إيه الواجب عليا؟ يعني لقيت واحد عاص لله عز وجل، تكره تلك المعصية منه، تكره تلك المعصية وتشفق عليه وتخاف عليه الآخرة، ونرجو له عفو الله، كل ده تتزاحم في قلبك، وتخشى على نفسك أن تقع في مثل ما وقع فيه، ما أنتش المعصوم، فتهجم على نفسك كل تلك المعاني. نحن نرجو للمحسن ونخاف عليه، ونخاف على المسيء ونرجو له، حد فاهم حاجة؟ نرجو للمحسن أن الله هو ظاهر الإحسان أن الله عز وجل يدخله الجنة، ونخاف عليه سوء الخاتمة، ونخاف عليه محبطات أعمال لا نراها، ونخاف على المسيء لأنه لو مات كده يروح في داهية، ونرجو له أن ربنا يختم له بتوبة، وأنه حتى لو مات كده ربنا يعفو عنه في الآخرة.

احنا هيضرنا حاجة إن المسيئين يدخلوا الجنة؟ ما يدخلوا الجنة! وفي نفس الوقت أخاف بقى على نفسي هو أنا يعني هو أنا اللي بعيد عن الفسق يعني أنا اللي بعيد عن المعصية الفلانية مش بعيد ولا حاجة خالص.

وفي حديث مرعب في الحّتة دي يا جماعة وكثيرا ما أكرره؛ أخبر صلى الله عليه وسلم أن من صلى الفجر في جماعة فهو في إيه؟ حد فاهم يعني إيه في ذمة الله؟ فانظروا لا يطالبنكم الله من ذمته بشيء، هذا ختام الحديث، حد فاهم الجملة دي؟ من صلى الفجر في جماعة فهو في ذمة الله، فانظروا لا يطالبنكم الله من ذمته بشيء. يعني إيه دلوقتي لما أجي أقول فلان ده في حمايتي؟ فلان ده في حمايتي فيوم يجي واحد يعتدي على فلان كده مين اللي هيطالب بحق فلان؟ أنا ليه؟ لأنه في حمايتي، حد فاهم القصة دي؟ فلما تعرف أن فلان ده في حماية الملك في حماية الرئيس في حماية اللواء فلان حد هيتعرض له؟ ليه؟ لأنه عارفين مع أن هو ما يساويش يعني هو في نفسه ما يساويش حاجة بس لا ده في حماية فلان، ما حدش تعرض له.

عشان كده تلاقي إيه فراش مثلا، فراش فراش ده أنا لا أحتقر (يعني هذه بس يعني أستاذ أقول إيه) من الناس اللي ممكن مستضعفة اللي أي حد بيزعق لها، أما تعرف أن هو فراش مثلا إيه مدير المصلحة تلاقيه واخد حقوق أکتر من الموظفين يمكن مش كده؟ ليه مش عشان هو؟ عشان علاقته المباشرة بفلان، ده مفهومه، ده معنى الحديث بقى بقى: فانظروا لا يطالبنكم الله من ذمته بشيء. يعني إيه؟ أوِعى تروح تظلم حد صلى الفجر في جماعة.

من صلى الفجر في جماعة فهو في ذمة الله، فخلي بالكم وأنتم بتتعاملوا مع المسلمين اللي هم مين بقى؟ مش لازم حد تعرفه خالص، ده أنت طالع الأتوبيس، الأتوبيس زحمة فخبطت في واحد مثلا عشان تلحق تدخل وما قلتلوش عشان أنا آسف وسامحني، فكان الواحد ده مصلي الفجر في جماعة، إيه رأيك؟ وأقس على ذلك بقى وأنت ماشي في الشارع كده خاف: عامل النظافة، البياع في السوبر ماركت، الكمسري في الأتوبيس، سواق الميكروباص، أي حد.

تقف كده اللحظة وتقول: لعله صلى الفجر في جماعة، أنا دلوقتي بتعدي على جانب مين اللي هيطالبني؟ مش هو، فانظروا لا يطالبنكم الله من ذمته بشيء، أوِعى تقعوا في الحتة دي. طب أنت عارف بقى مين صلى ومين ما تعرفش؟ فخاف وأنت بتعامل مع مسلم خاف.

يعني كأنه يا جماعة أويس هذا بين أظهرنا، وقطعا قطعا في أولياء بين أظهرنا قطعا، ما هو يا جماعة يعني هذه الأمة لا تعدم الخير، ففي أولياء بينا، أولياء لله عز وجل، وفي بينا اللي هم دول، اللي هو من إذا أقسم على الله أبره، ودول وصفوا من النبي عليه الصلاة والسلام: «أشعث أغبر ذي طمرين مدفوع بالأبواب»، اللي هو لو كل أهل المسجد شفناه ما فيش واحد هياخد باله منه أصلا ولا شافه، فلو كان بقى أويس بقى بين أظهرنا كنا هنعامله إزاي؟ ما حدش يقول لا ده إاحنا كنا ما كناش هنعمل، إاحنا بنتكلم في التابعين وكانوا كان يناله الأذى، ليه؟ علشان الحتة دي مش متعايرة.

قال وعن أبي هريرة قال رسول الله صلى الله عليه وسلم: «إن الله عز وجل يحب من خلقه الأصفياء الأخفياء الأبرياء، الشعثة رؤوسهم منعكشين، المغبرة وجوههم مطربين، الخمصصة بطونهم» على طول جعانين بطنهم ما بتتمليش، «الذين إذا استأذنوا على الأمراء لم يؤذن لهم» أنت مين يا ابني؟ «وإذا خطبوا المتنعمات لم ينكحوا» البنت الشريفة النسيبة، «وإن غابوا لم يفتقدوا» حضر زي ما حضرش ما حدش ما حدش جعان أصلا أنه جه ولا أنه ما حدش ما حدش يعرفه، «وإن طلعوا لم يفرح بطلعتهم» لو لقيناه داخل علينا ما حدش يفرح أنه دخل يعني، «وإن مرضوا لم يعادوا، وإن ماتوا لم يشهدوا». دول مين؟ إن الله يحب من خلقه هؤلاء.

أنا مضطر أقول كنت إيه؟ مش هقوله (يعني قوله بقى) يعني الع... في خطاب وأنا لا أحبه الحقيقة، وهو خطاب شوّه نفسية كثير من ال... من يستمعون لهذا الخطاب، فكرة لما نجي نتكلم عن الدنيا (يعني لعلي قريبا يعني أنا دي في نيتي في درسين كده في نيتي بس أنا يعني بقدم رجل وأخر عشرين رجل منهم الدرس ده) أنه حقيقة الدنيا وإزاي ينظر إلى الدنيا وتعاملنا مع الدنيا ومع... فخلونا ناخد حتة صغيرة كده ونرجع تاني.

الخطاب الذي لما يجي يخاطب الناس عن الدنيا وعن مش عارف إيه وبتاع يقول لك إيه: الإسلام هي الجملة دي بس اللي هقولها وهطير أنا ما كنتش عاوز أقولها أصلا يا جماعة: الإسلام مش انك تمشي مقطع و... ويقعد إيه يحكي شوية حاجات كده إيه من العينة دي بقى ماشي؟ لا مش كده خالص، أنت تلبس أفخم اللي مش عارف إيه وتأكل أحسن اللي مش عارف إيه وبتاع بس الدنيا تبقى في إيدك مش في قلبك.

أنا الخطاب الحقيقة أول ما بسمعه بتنرفز، هو مين قال إن ده مش... يعني الصورة الأولى دي مين قال لك أنها مش من الإسلام؟ أنا مش فاهم، مين قال؟ المتلقي لهذا الكلام يتلقاه خلاص: الإسلام مش انك تعمل وما... وبعدين نرجع للأولياء، هم كده أصلا، هو هي... هو هم كانوا كده؟

الحديث إيه المشهورة في التاريخ بإيه؟ خروج خروج الثلاثة العظماء، اللي هم مين؟ النبي وأبو بكر وعمر، الثلاثة خارجين ليه؟ مش لاقيين حاجة ياكلوها، الثلاثة خارجين من بيوتهم مش لاقيين حاجة ياكلوها. طب النبي عليه الصلاة والسلام كان أحيانا يلبس إزار ولا رداء؟ زمان عارفين إزار ورداء اللي هم بتوع الإحرام دول زمان كانوا عادي ممكن ده لبسهم، ممكن واحد يطلع بكده بإزار ورداء مش محرم ولا حاجة يعني، فكان أحيانا النبي عليه الصلاة والسلام عنده إزار وما عندهوش رداء يلبسه ويربط على بطنه الحجر الحجرين، والصحابة رابطين الحجر... وهذه الأمثلة كلها وغيرها من الصحابة اللي لبس المرقع، وعمر إزاي كانت صفة إيه وهو داخل يستلم المفاتيح بتاعة بيت المقدس؟ الروايات دي كلها عشان يجي واحد في 2024 ولا 2025 ولا 2020 ولا يقول لك: الإسلام مش انك تلبس مققطع، أنت مين؟ يعني إيه ده؟ إيه الخطاب ده؟ إيه الخطاب ده؟ خطاب مشوه.

نرجع بقى تاني، وإن شاء الله ممكن إيه نبقى نعمل درس عن الموضوع ده بس ما يتسجلش بقى، يعني اللي يحضر يحضر والما يحضر... آه فكان اهو أويس القرني بيلبس مقطع إيه رأيهم؟ وما بياكلش، وحتى أكله والله يا جماعة والله يا جماعة إاحنا في نعمة، عارفين أويس كان بياكل إيه؟ كان برده يروح المزابل ويلم كسر الخبز ويروح يغسلها وبعدين ياكلها، لا يتصدق ببعضها وياكل بعضها، ده كان أكل أويس.

وكان أحيانا يلم النوى النوى من الأرض كده ويروح يبيعه، هو النوى ده هيجيب له إيه يعني؟ ويروح يبيعه ويروح شاري حاجة يفطر بيها المغرب أحيانا، ولو لقي حاجة واقعة تأكل ياخدها يأكلها. قالوا: يا رسول الله، كيف لنا برجل منهم؟ قال: «ذاك أويس القرني». قال: وما أويس القرني؟ ثم ذكر (يعني حديثا فيه بعض صفته، وهذا الحديث يعني ضعفه أهل العلم).

في بعض الروايات جاءت بقى فمكثا فمكثا (يعني عمر وعلي، مش مهم الرواية من أولها) يطلبانه (يعني يطلبان أويسا) عشر سنين لا يقدران عليه ما بيجيش، فلما كان في آخر السنة التي هلك فيها عمر رضي الله عنه (هلك دي مش كلمة وحشة، هلك يعني مات، جت في القرآن هلك لحد من الصالحين سيدنا يوسف): ﴿حَتَّىٰ إِذَا هَلَكَ قُلْتُمْ لَن يَبْعَثَ اللَّهُ مِن بَعْدِهِ رَسُولًا﴾ [غافر: 34] فهلك يعني مات. قال هلك فيها عمر قام على أبي قبيس فنادى بأعلى صوته: عمر (يعني يا أهل الحجيج من اليمن أفيكم أويس؟).

فقام شيخ كبير طويل اللحية فقال: أنا لا ندري ما أويس، ولكن ابن أخ لي يقال له أويس، وهو أخمل ذكرا وأقل مالا وأهون أمرا من أن نرفعه إليك، إاحنا (يعني ما نعرفش مين أويس) عندنا واحد اسمه أويس ده ابن أخويا ومش هو أكيد يعني مش ده اللي أنت عاوزه، وإنه ليرعى إبلنا حقير بين أظهرنا (يعني حتى إاحنا ده مش جاي معانا يحج، لا، ده هو جاي عند من كان قاعد عند من يرى الإبل).

قال: فعمى عليه عمر كأنه لا يريده، عمر أول ما سمع أن أويس موجود قال له أكيد مش هو، عمى أمره (يعني عشان إيه عارف أن أويس لو وصله الخبر ههرب، عمر جايلك مش إاحنا بقى لا إله إلا الله). فعمى عليه الأمر كأنه لا يريده، وقال: ابن أخيك هذا أبيع حرمنا؟ قال: نعم. قال: أين يصاب؟ قال: في أراك عرفات، يرعى الإبل في ناحية عرفات كدة.

فركب عمر وعلي سراعا إلى عرفات، فاذا هو قائم يصلي إلى شجرة والإبل حوله ترعى، فشد خماريهما (حطوا إيه توشح يعني لبسوا حاجة على وشهم كده يعني عشان ما يتعرفوش)، ثم أقبل إليه فقال: السلام عليك ورحمة الله، فخفف أويس الصلاة ثم قال: السلام عليكم ورحمة الله. قال: من الرجل؟ قال: راعي إبل وأجير قوم، أجير وبرعى الإبل. قال: لسنا نسالك عن الرعاية ولا عن الإجارة، ما اسمك؟ فقال: عبد الله. قال: قد علمنا أن أهل السماوات والأرض كلهم عبيد لله، ما اسمك الذي سمتك أمك؟ قال: يا هذان، ما تريدان إلي؟

فققال: وصف لنا محمد صلى الله عليه وسلم أويسا القرني، فقد عرفنا الصهوبة والشهولة (يعني وصفين فيه بينين) وأخبرنا أن تحت منكبك الأيسر لمحة بيضاء، فأوضحها لنا، فإن كانت بك فانت... فأوضح منكبه فإذا اللمحة، فابتدره يقبلانه وقال: نشهد أنك أويس القرني، فاستغفر لنا يغفر الله لك. قال: ما أخص باستغفار نفسي ولا أحدا من ولد آدم، ولكنه في البر والبحر من المؤمنين والمؤمنات والمسلمين والمسلمات، ما بستغفرش لحد، بستغفر استغفار عام. يا هذان، قد شهر الله لكما حالي وعرفكما أمري، فمن أنتما؟ (هو ده كله ما يعرفش مين اللي بيكلم).

قال علي: أما هذا فعمر أمير المؤمنين، وأما أنا فعلي. فاستستوى أويس قائما وقال: السلام عليك يا أمير المؤمنين ورحمة الله، وأنت يا علي... وأنت يا علي السلام عليك، فجزاكما الله عن هذه الأمة خيرا. قال: وأنت فجزاك الله عن نفسك خيرا. فقال له عمر: مكانك يرحمك الله حتى أدخل مكة فأتيك بنفقة من عطائي وفضل كسوة من ثيابي، هذا المكان ميعاد بيني وبينك (يعني أثبت مكانك رايح وراجع لك). فقال أويس: ميعاد بيني وبينك، لا أراك بعد اليوم، اللي بيني وبينك أن ما أشوفكش ولا تشوفني خلاص، لا أراك بعد اليوم.

فعرفني ما أصنع بالنفقة؟ أنت رايح تجيب لي نفقة أعمل إيه بالنفقة دي؟ وما أصنع بالكسوة واللبس؟ هعمل بيه اللبس؟ أما ترى علي إازارا من صوف ورداء من صوف، متى تراني أخرقهما وأنا ألحق... أبوش الثوب اللي عليا ده مش ألحق، ليه مش ألحق؟ لأنه هو يعد نفسه في الموتى أصلا، يعني هو ماشي بين الناس وكل لحظة أنا هموت. قال له: ما أنت شايف علي إازار صوف ورداء صوف فمش ألحق أقطعهم، فمش محتاج يعني مش محتاج ثياب يعني. أما ترى أن نعلي مخصوفتان متى تراني أبليهما؟ يعني حق الشبشب بتاعي أهو ماشي معايا أهو مش ألحق أقطعه يعني، إني قد أخذت من رعايتي أربعة دراهم، رعايتي للإبل دي ادوني أربعة دراهم متى تراني أكلها؟ الأربعة دراهم دول كتير قوي هاكلهم امتى دول ولا هجيب بيهم أكل امتى؟ مش محتاج فلوس يا أمير المؤمنين، إن بين يدي ويديك عقبة كؤودا لا يجاوزها إلا ضامر (بطنه قليلة مخف...) طبعا هذا كناية عن أنه إيه مقل من الدنيا يعني، مخف مهزول، فاخفف رحمك الله.

طبعا سيدنا عمر اللي بيكلمه ده أصلا حالته عاملة إز, برده هو أمير المؤمنين ولا حاجة خالص مش كده؟ جه مرة عليه مين من الصحابه؟ وبعدين بيقول له يعني سمعت عن حاجة زعلتك، يعني قال له: أه. قال له: إيه؟ قال له: عندك ثوبين ثوب في الشتاء وأ... أو ثوب بالليل وثوب حاجة زي كده يعني ليل والنهار أو شتاء وصيف يعني، يعني عندك جلابيتين جلابية جلابية صيفي وجلابية شتوي، ده كلام ده كتير، هو يعني بيقول له إيه: عندك ثوبين وأنك جمعت بين إيدامين على مائدة؟ الإدام اللي هو الإيه؟ الغموس، يعني أنت مثلا لو قاعد بتاكل فقدامك مثلا جبنة ومربى، دول إيدامين، كده دول كده إيدامين خلاص، لأن العيش إاحنا بنقتات بيه، بنأكل بيه أي حاجة، أي حاجة تأكلها بالعيش اسمها إدام، فهو بيقول له: أنك إيه جمعت بين مائدة... فقال عمر: أما... أما هذان فقد كفيتيهما، لا كذب المنطق هو بيقول له إاحنا أنا سمعت عنك أنك بت... عندك ثوبين وجمعت مرة على المائدة كده بين إيدامين، قال له: لا لو هم... لو ده اللي وصلك فده ما بيحصلش، فده سيدنا عمر والحديث ما إيه: قرقري أو لا تقرقري ليس عندنا غيره حتى يحيى الناس عارفين في عام الرمادة كان يأكل زيت فبطنه تعمل أصوات فيقول لها: قرقي أو لا تقرقري براحتك، اعملي اللي تعمليه ليس...

عندنا غيره حتى يحيى الناس، هو ده اللي هيتاكل؟ فيا جماعة هي دي كانت حياتهم، يعني ليه بقول كده؟ برضه هنرجع تاني للحته اللي أنا يعني من الطرح اللي بيطرح الحقيقة، وبرضه ده محتاج وقفة ومحتاج تاني ومحتاج بحث.

يقول لك إيه أصل العشرة المبشرين بالجنة، ستة منهم كانوا إيه؟ حافظين أنتم مش كدة؟ مليونيرات مش كدة؟ طبعا خلي بالكم أنا كل اللي بقوله ده مش بقول إنه إيه، أنا مش بتكلم في حرام وحلال، أنا بنقل التاريخ كما كان التاريخ بس يعني قول اللي أنت عاوزه بعد كده ونشوف بقى الدين بيقول إيه في دي وبيقول إيه في دي، إنما ما تجيش تزور التاريخ، دي مسألة كبيرة جدا وحرام.

خلاص طيب، هو هنا لما بيقول الكلام ده هو عاوز يقول لك إيه؟ إن نمط الحياة اللي احنا عايشينه‌ ده هو ده إيه كان في ستة من مش كدة؟ يعني ده اللي بيجي في دماغنا، بس هو الحقيقة ما كانش كدة، يعني في فرق بين إنك معاك قد إيه ونمط حياتك شكله إيه، واحد من الستة اللي بيعدوهم، أول واحد مين؟ أبو بكر نفسه، يقول لك ده كان تاجر وكان معاه أموال، مش ده؟ طب ما هو أبو بكر نفسه ده هو اللي كان خارج ما عندوش إيه أكل في بيته؟ يعني هو كونه بيدخل له مال كتير، تعاطيه مع المال شكله إيه عشان يبقى من العشرة المبشرين بالجنة؟ حد فهم اللي بيقوله؟ ما هو يعني هو بقى من العشرة وهو مليونير عشان إيه؟ يعني بيعمل إيه بالفلوس؟

بلاش، وأنا أنا النهارده كنت استخرت يعني هدي أويس ولا هدي أبو ذر الغفاري؟ والاثنين فيهم نفس المعاني اللي احنا عاوزين نوصلها، واستقرت على أويس، اللي هو أجر الله يعني اسمه على لساني في الدرس اللي فات في قصة أبو ذر الغفاري لما قدم المدينة، هو طبعا أسلم النبي في مكة عليه الصلاة والسلام وبعدين جالو في المدينة، المهم أبو بكر قال له إيه؟ أنا النهارده عازمه، أنا النهارده عازمه خلاص، غداة عندي خلاص، فالكلمة دي لو احنا كده ماشي، وبقى مجلس فيه النبي، يعني مش مش شيخ كبير ويقوم أحد الإخوة يقول إيه فلان عندي أنا بقى النهارده عزمه، أول ما يقول كده أنت دماغك هتروح فين؟ يعني مش كدة؟

أبو بكر خد أبو ذر الغفاري أكله إيه؟ أعطاه زبيبا من زبيب الطائف. أبو بكر دخل بيته، أنا بقول لكم يا جماعة اهو، يعني أنا وأنا مغمض، هذا أفضل ما يملكه أبو بكر في هذا الوقت من غير ما أعرف، يعني أنا ده يعني إيه مش رجماً بالغيب، لكن معرفة بأبي بكر رضي الله عنه. أبو بكر لما يكون واحد جاي وهيضيفه، مش هيسيب لعياله اللحمة والفراخ ومش عارف ويروح يدي له زبيب، أبو بكر مش هيعمل كده، هو ده اللي في بيت أبو بكر، دخل لقى زبيب من زبيب الطائف، راح مدي له زبيب، هو ده غداه. أبو ذر بيقول: دي كانت أول حاجة تنزل، هو طبعا أبو ذر كان ليه قصة كده يعني عفوا، قصة أبو بكر كانت في مكة ما كانش في المدينة عفوا؛ لأنه بعد ما إيه أُضرب وبعدين إيه فضل هربان أيام ما بيشربش غير زمزم، قصة كبيرة كده لأبي ذر يعني لو عارفينها، فقال: ده أول طعام يدخل جوفي من بعد مدة كبيرة بقى، قعد حوالي 30 يوم ما بيشربش غير زمزم، فدي كانت حياتهم.

خلاص، طب يا شيخ بس عشان احنا تلخبطنا إحنا نعمل إيه؟ ما تعملش أي حاجة لغاية ما ربنا يفتح ونعمل درس طويل في الحته دي، بس ما تسمعش للخطاب ده برضه، هذا الخطاب خطاب مضر لقلبك، ده خطاب مضر، ماشي اه، وليس من الإسلام إيه؟ إحنا إيه؟ ليس من الإسلام إنك تلبس مش عارف إيه؟ لا من الإسلام، ما يجيش النبي عليه الصلاه والسلام يقول: أشعث أغبر ذي طمرين، إن أنت تيجي تقول لي مش من، ليه مش من الإسلام؟ ليه يعني إن شاء الله؟ ماشي.

طيب، أول أو الثاني من العشرة المبشرين بالجنة مليونيرات، موهماً المستمعين أو اتباعك أو من يعني وثق في دينك إن إيه، إن اللي احنا شايفينه دي حالة مرضية لله، مرضية مش مرضية، مرضية لله، وأن دي الحالة الجميلة، لا مين قال كده؟ ما تروح تشوف الستة بقى، كل واحد وده إن شاء الله هيكون في البحث لو عملنا درس، إن أننا نجيب الستة دول اللي بيقولوا عليهم، ونجيب سيرتهم ونشوف كانوا عايشين إزاي.

ما هو ده اللي يعنينا دلوقتي، يعني كانوا عايشين إزاي؟ نتفرج، نقعد نتفرج، كانوا عايشين إزاي؟ كان بيوتهم عاملة إزاي؟ كان أكلهم عامل إزاي؟ كان شربهم عامل إزاي؟ كان لبسهم عامل إزاي؟ ونتفرج. أصله يعني كأنه يوهمهم إنه إيه؟ يعني هو يعني بهذا صاروا من العشرة؟ لا، هو مش بهذا صاروا من العشرة، هو بحاجات تانية صاروا من العشرة.

خلاص، قال، كانوا واقفين بقا مع أويس فقالوا: نشهد أنك أويس القرني. آه، قال: ميعاد بيني وبينك لا أراك بعد اليوم. وبعدين خلاص وصلناها، قال: يا أمير المؤمنين إن بين يدي ويديك عقبة كؤوداً لا يجاوزها إلا ضامر مخف مهزول، فأخفف رحمك الله. فلما سمع عمر ذلك ضرب بدرته الأرض، ثم نادى بأعلى صوته: ألا ليت عمر لم تلده أمه، يا ليتها كانت عاقراً لم تعالج حملها، ألا من يأخذها بما فيها ولها؟ يأخذ إيه؟ الخلافة. ألا من يأخذها بما فيها ولها؟ حد يجي يشيل عني حمل الخلافة؟ مش عاوزها.

هنا يا جماعة هو قوي أويس القرني أو القرني الكلمتين اللي قالهم دول عمر ما يعرفهمش، شوفوا ما يفعل الصدق. إحنا في دعوتنا نفتقر إلى الصدق، مش إلى الكاميرات والمعدات وإلى إننا نبقى منمقين للكلام، خالص خالص، آه، ده كله نأخذ بالأسباب نأخذ بالأسباب، إنما لا الدعوة تنتشر بده، ولا حتى لو انتشرت مش هيكون لها الصدى ولا التأثير بكل الحاجات دي خالص، بصدقك مع الله، بصدقك في كلامك، هو قال كلمتين أي واحد فينا يعرف يقولهم لك، لكن تأثيرهم في عمر، يعني احنا لو أي واحد فينا وقف لعمر وقال له الكلمتين دول، عمر هيضرب الأرض بدرّته ويقول، هيضربك أنت، يقول لك مش هنا أبدا. إنما أويس لصدقه مع الله -نحسبه كذلك- أثر كلامه.

من المواقف الجميلة جداً؛ أول سفير في الإسلام مين؟ مصعب رضي الله عنه. ولما راح المدينه وبعدين نزل على يعني أحدهم وبعدين كان بيعرق، هو مش عارف بقى المدينة، فالناس وهي جاية كده من بعيد يبتدي يقول له: ده فلان، ده فلان كده يعني بيعرفه، فجاى عليه واحد من سادات القوم فقال له: هذا فلان سيد قومه، إن أسلم أسلم باسلامه خلق كثير. فحضر بقا الأدلة وأفحمه والأشعار الزهدية وقال له إيه: فأصدق الله فيه. الراجل ده لو أسلم، قبيلته كلها هتسلم، فأصدق الله فيه.

في بعض الروايات أن مصعب متكلمش، الراجل جه بقا رافع سيف وجاي يقتل، قال له: أجلس فاسمع، فإن رضيت وإلا كففنا عنك ما تكره. اقعد اسمع بس الكلام، رضيت الكلام زي الفل، ما رضيتش هقوم وأسيب لك الحي بتاعك، وما يا دار ما دخلك شر. فقال: أنصفت، آه والله ما أقعد أسمع. قال: فجلس. الرواية بتقول: ما إن بدأ مصعب بالحديث إلا علت وجهه ابتسامة، هو مصعب ابتدى يتكلم ده جاي واحد جاي يقتل! وقال: كيف يصنع من أراد أن يدخل في هذا الدين؟

فإحنا محتاجين في دعوتنا إلى الله وأحنا سائرين إلى الله في الدعوة نبقى المعاني دي قدام عينينا، بكلمات بسيطة ربنا عز وجل يغير الكون، لكن تفتقر إلى صدقنا في الدعوة إليه سبحانه وتعالى.

قال، أنا بَدِّي حاجات بقى عشان ما نقراش الكلام كتير أنتم تزهقوا مني، أنا عارف، عن أسير بن جابر قال المفروض لما أقول كده تقولوا لا يعني، ما فيش خالص برضه ما قالوش، مش عاوزين يكذبوا، ماشي قال: كان محدث بالكوفة يحدثنا، قلت لكم القصة دي خلاص ماشي، القصة اللي هي كان بيأثر فيهم وبعدين لقى عريان في بيته وجاب له، قلناها لكم خلاص.

وعن أصبغ بن زيد قال: إنما منع أويساً أن يقدم على النبي صلى الله عليه وسلم برّه بأمه، دي قلناها لكم برضه.

طيب يبقى ده يا جماعة احنا بنتكلم عن ولي اهو وبماذا نال الولي ولاية؟ فعرفنا لبسه، وعرفنا برّه بأمه، وعرفنا أكله وطريقة أكله وإيه بياكل إيه وقد إيه وكده، وعرفنا هروبه من الشهرة وإيثاره لخمول الذكر، وكلما عُرف هرب. وصلاته وعبادته بقى شكلها إيه؟ عن أصبغ بن زيد قال: كان أويس القرني إذا أمسى يقول: هذه ليلة السجود، فيسجد حتى يصبح. يقول: النهارده ليلة السجود، فيسجد أول سجدة يفضل في سجدة لغاية ما يصبح. قال: وكان إذا أمسى -طبعا هو في رواية إنه إيه وفي ليلة تانية يقول: هذه ليلة الركوع- وهكذا حتى إن في بعض الروايات واحد بيقول له: يعني أنت إزاي بتطيق أنك تسجد سجدة واحدة الليلة كلها؟

طبعا يا جماعة هذا فعل الملائكة؛ يعني في من الملائكة ملائكة ربنا خلقهم سجداً، هم هم هيفضلوا ساجدين ليوم القيامة، مش هو مش هيرفعوا رؤوسهم، وملائكة خلقت راكعة فهي كذلك إلى يوم القيامة. فواحد سأله قال له: يعني أنت إزاي بتعرف تعمل ده؟ قال: أقول سبحان ربي الأعلى مرة، فإذا الصبح قد طلع. حد فاهم؟ يعني هو ما بيخرجش في السجدة دي كلها، هو يقول التسبيحة مرة واحدة، لكن عشان ينطقها شوفوا بقا المعاني القلبية اللي جت في قلبه عاملة إزاي واستحضرها في قد إيه؟

الشيخ أسامة عبد العظيم رحمه الله كان ليه حالة عجيبة كده مع زيارة النبي عليه الصلاه والسلام، أنا بقول لكم على حته أنك تستحضر أموراً قلبية قبل الفعل؛ يعني كان الشيخ أسامة يؤخر الزيارة، يعني لما يوصل المسجد النبوي ما يبتديش بالزيارة، كان يؤخر الزيارة، يروح المسجد وكان ليه أحوال أصلا في المسجد النبوي برضه عجيبة، يعني منها إنه ما كانش يسند ضهره في المسجد النبوي أبدا، كان يقعد ما يسندش ضهره طول ما هو طول ما هو في المسجد النبوي، خلاص يعني في جلسة الأدب في حضرة النبي صلى الله عليه وسلم، طبعا احنا حرمة النبي ميتاً كحرمته حياً ولذلك العلماء قالوا إنه لا يرفع الصوت عنده صلى الله عليه وسلم وهو ميت، لا يرفع الصوت، واستدلوا بقوله تعالى: ﴿لَا تَرْفَعُوا أَصْوَاتَكُمْ﴾ [الحجرات: 2]. طب ده وهو حي؟ قالوا: لا، ما هو حرمته ميتاً كحرمته حياً صلى الله عليه وسلم.

فوبعدين يروح يجيب في اليوم ختمة؛ هو قاعد مثلا خمس أيام، فهو يجيب خمس ختمات في اليوم ختمة، وهو بيزور ما يروحش كده زينا إيه، أنت نازل مثلا بالجلابيه مش عارف شكلها عامل إزاي ولا مش، لا لا لا، داخل بقا الزيارة يلبس أحسن الثياب ويتعمم أحسن حاجة، هو رايح يزور النبي عليه الصلاه والسلام.

فكان ده يشكل يعني يعني أشكل على بعضهم وبعدين سأله يعني قال له: لا، أصل الدخول هنا الزيارة دي في معاني لازم تستحضرها، تستحضرها أنك أولاً بتقعد، ده ده الظاهر إحنا شفناه بيعمل كده، بس هو أتاريه كمان في الباطن هو يحضر قلبه بأمور تانية، قال لك: ده أنت الأول تقعد تستحضر جواك مواقع أو مواطن سنن فاتت، يعني تقعد كده يومين ثلاثة عمال تفتكر: أنا اليوم الفلاني ما صليتش السنة القبلية للعصر، إحنا سبحان الله الكلام جاب بعضه، ما دعوتش بين الأذان والإقامة سنة فاتت، تقعد تستحضر كده سنن فاتت، وبعدين أنت داخل بقا على النبي عليه الصلاه والسلام بتلك السنن الفائتة، أنت فوتت السنة الفلانية وفوتت السنة، فطب أنت حالك معه إيه دلوقتي؟ يعني هو يحب ذلك منك صلى الله عليه وسلم أنك تفوت سنته عادي كده؟ ماشي، وبعدين تجدد العهد، آه، ثم تنظر بقى إيه: طب هاعتذر له بإيه؟ لو هعتذر بإيه بين يديه عليه صلى الله عليه وسلم؟ ما فيش اعتذار غير أنك تعاهد، ما هو ما فيش حاجة، أنت ما لكش حجة في اللي فات، ما لكش حجة، فهو الاعتذار إيه؟ أنك تعاهد أنك مش هتكون كدة بعد كده، يعني مش هفوت السنن بعد كده، وتفهم أن العهد اللي أنت بتعهده ده عهد مش زي أي عهد.

فالمهم، هو احنا هنا عمالين نعمل إيه؟ أنا إيه اللي فكرني بالحكاية دي دلوقتي؟ أنه فكرة تسبيحة واحدة في السجده ليه؟ فممكن واحد يقول لك إيه: إيه يا عم، مأخر زيارة ليه؟ ما إحنا بندخل نزور ونطلع وزي الفل، وأنا زرت 20 مرة في الخمس أيام، هو مش كدة. حتى الشيخ أسامة -بس يعني ما كان معاه شخصية كبيرة- معرفش ينفع أقولها ولا لا، بس يعني شخصية كبيرة شرعية يعني، والشيخ أنكر عليه، يعني قال له، راح للنبي عليه الصلاه والسلام وكان حاسر الرأس، قال له: أنت بتعمل إيه؟ تعال، وعممه بيده وألبسه عمامة، وبّخ الشيخ وقال له: أنت داخل على يعني الزيارة دي مش كدة، يعني مش زي ما بس.

فده يخلينا بقا إيه، فكرة أن إيه اللي صلي الليل كله باآية واحدة؟ ماشي، هو يكررها بس هو إزاي أحواله القلبية شكلها إيه؟

طيب، خلاص نقف.

ما أطول عليكم، قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك. والسلام عليكم ورحمة الله وبركاته.