قصة يونس الله عز وجل ذكرها في كتابه في أربعة مواطن. طبعا يونس عليه السلام ذكر باسمه في سورة النساء وسورة الأنعام باسمه فقط يعني في جملة أنبياء. لكن لم يتعرض هذا الموطن أو ذاك إلى شيء من قصته، لكن قصته ذكرت في أربعة مواطن في القرآن.
عايزين نتأمل شوية المواطن دي، لأن فيها شوية حاجات غريبة كده. أول حاجة؛ إيه هي المواطن؟ أبسط تلك المواطن؛ أبسطها يعني أكثرها بسطاً، يعني أكثر موطن تكلم عن قصة يونس في سورة الصافات. قال الله عز وجل: ﴿وَإِنَّ يُونُسَ لَمِنَ الْمُرْسَلِينَ * إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنَ الْمُدْحَضِينَ * فَالْتَقَمَهُ الْحُوتُ وَهُوَ مُلِيمٌ * فَلَوْلَا أَنَّهُ كَانَ مِنَ الْمُسَبِّحِينَ * لَلَبِثَ فِي بَطْنِهِ إِلَى يَوْمِ يُبْعَثُونَ * فَنَبَذْنَاهُ بِالْعَرَاءِ وَهُوَ سَقِيمٌ * وَأَنبَتْنَا عَلَيْهِ شَجَرَةً مِّن يَقْطِينٍ * وَأَرْسَلْنَاهُ إِلَى مِئَةِ أَلْفٍ أَوْ يَزِيدُونَ * فَآمَنُوا فَمَتَّعْنَاهُمْ إِلَى حِينٍ﴾ [الصافات: 139-148]. ده أكثر المواطن بسطاً.
الموطن الثاني هو موطن سورة الأنبياء، وده اللي يليه ليه على طول في إنه يعني من حيث البسط في القصة. قال الله عز وجل: ﴿وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ * فَاسْتَجَبْنَا لَهُ وَنَجَيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ﴾ [الأنبياء: 87-88]. الموطن الثالث؛ موطن سورة القلم: ﴿فَاصْبِرْ لِحُكْمِ رَبِّكَ وَلَا تَكُن كَصَاحِبِ الْحُوتِ إِذْ نَادَى وَهُوَ مَكْظُومٌ * لَّوْلَا أَن تَدَارَكَهُ نِعْمَةٌ مِّن رَّبِّهِ لَنُبِذَ بِالْعَرَاءِ وَهُوَ مَذْمُومٌ * فَاجْتَبَاهُ رَبُّهُ فَجَعَلَهُ مِنَ الصَّالِحِينَ﴾ [القلم: 48-50].
الموطن الرابع وهو أخسرها، يعني أكثر موطن مختصر. ودي أول حاجة غريبة هنفاجأ بيها، أن هو موطن سورة إيه؟ يونس. السورة التي سميت باسمه هو أخصر تلك المواطن. قال الله عز وجل: ﴿فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْنَاهُمْ إِلَى حِينٍ﴾ [يونس: 98]. بس كده.
وتاني حاجة عجيبة هنلاحظها؛ أن يونس في هذا الموطن ذكر تبعاً لا أصلاً. يعني يونس في هذه الآية في سورة يونس التي سميت باسمه، ذكره فيها جاء تبعاً، هو الكلام عن مين؟ عن قوم يونس. فقال الله عز وجل: ﴿فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ﴾ يبقى احنا هنا مش بنتكلم عن يونس عليه السلام، احنا بنتكلم عن قوم يونس، فذكر يونس للدلالة على قومه اللي احنا الكلام عنهم أصلاً، ومع ذلك هي السورة التي باسمه عليه السلام. فدي أول حاجة عجيبة.
تاني ملاحظة؛ أن الأربع سور دول كلهم سور مكية. يبقى احنا كعادتنا بقى هنعيش نفسية النبي عليه الصلاة والسلام والصحابه في الحقبة المكية؛ حقبة الاستضعاف، حقبة التكذيب، هذه الحقبة بكل ما فيها من نفسيات، وده احنا عملناه كتير، فآظن الناس متدربه عليه يعني من قبل كده. فالأربع سور اللي ذكر فيها قصة يونس هي سور مكية.
الملاحظة الثالثة؛ أن يونس عليه السلام لم تذكر كل قصته في القرآن، وإنما الأربع مواطن بيحكوا مشهداً واحداً. طبعا مشهد واحد في تفاصيل يعني، إنما هو في الآخر مشهد واحد؛ أن يونس راح دعا قوم، وبعدين القوم كذبوا، فخرج والسفينة والحوت، وهو ده المشهد. إنما فين بقيت حياة يونس؟ مالهاش ذكر في القرآن. يعني بخلاف مثلاً لو جينا نتكلم عن نبي الله موسى عليه السلام، لا، هنلاقي كذا مشهد وكذا حقبة في حياته من وهو طفل رضيع حتى؛ فاحنا عندنا تفاصيل كتير في قصة موسى في القرآن. وقل مثل ذلك على مثلاً نبي الله إبراهيم، وقل مثل ذلك على نبي الله نوح؛ هنلاقي تفاصيل ومشاهد كثيرة بيحكيها القرآن في قصص الأنبياء. يونس عليه السلام القرآن معه مختلف؛ هنلاقي الأربع مواطن بتحكي مشهداً واحداً؛ موطن يسُهب في ذكر المشهد، موطن يختصر في ذكر المشهد، لكن في الآخر هو مشهد واحد اللي بيحكيه القرآن عن يونس عليه السلام. فدي برضه ملاحظة عاوزين ناخد بالنا منها.
طيب، قبل ما ندخل في تفاصيل قصة يونس؛ ليه سورة يونس هي أخصر المواطن؟ ولماذا سميت بسورة يونس بقا؟ ما هو يا جماعة، سورة يونس دي لو احنا تأملنا السورة هنلاقي سورة يونس متكلمة عن موسى عليه السلام، وأسهبت في ذكر موسى مع قومه، وبعدين ننتهي من قصة موسى مع قومه هتتكلم عن نوح مع قومه، وأسهبت في ذكر نوح مع قومه، ولم تسمى بسورة نوح، ولا سميت بسورة موسى، وإنما سميت بسورة يونس.
طيب، ليه؟ ليه اتسميت سورة يونس؟ هنقول معنيين: المعنى الأول ذكره بعض أهل العلم وهو أن ما حدث ليونس أصلاً شيء عجيب أصلاً وخلاف العادة وخلاف السنن الإلهية. اللي هو إيه بقا؟ العادة والسنن الإلهية تسير على النحو التالي: أن نبي يخرج فيروح يدعو قومه، فالقوم دول يكذبون، يعني منهم من يؤمن طبعا بالنبي ومنهم من يكذب، وتشتد العداوة، فهذا النبي إما يدعو على قومه، وإما أن يخرج من بين ظهرانيهم، وبعدين الله عز وجل يعذب هؤلاء القوم الكافرين. المشهد ده متكرر في القرآن مع معظم الأنبياء تقريباً. صح يا جماعة؟
يونس عليه السلام قصته عجيبة، قصته العكس؛ الذي عوقب في هذا المشهد هو يونس عليه السلام. فدي أول حاجة غريبة، أن الذي عوقب هو النبي مش القوم. ﴿فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87-88]. فظن أن لن نقدر عليه، يعني إيه؟ أو فظن أن لن نقدر عليه، أن نقدر عليه ذلك الذي فعلناه اللي هو أن الحوت يلتقمه؛ أو فظن أن لن نقدر عليه يعني لن نضيق عليه. ماشي، مش لن نقدر عليه من القدرة لأن يعني أن الإنسان يظن أن ربنا لن يقدر عليه ده ظن إيه؟ كفري مش كده؟ آه. فهو ظن، قال: لن نقدر، يعني لن نضيق؛ الله يبسط الرزق لمن يشاء ويقدر، ويقدر يعني إيه؟ يضيق، ﴿وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ﴾ [الطلاق: 7]؛ من قدر عليه رزقه يعني إيه؟ يعني من ضيق عليه رزقه. فهنا فظن أن لن نقدر عليه؛ لن نضيق عليه في فعلته تلك.
إيه القصة باختصار علشان، وهنرجع بقا نتدبر الآيات ونستخرج منها الفوائد؟ من العجيب برضه قبل ما نحكي القصة، أن هذا المشهد قصة يونس الذي ذكره الله عز وجل في كتابه لم يترك لنا نحن أن نستنبط الفوائد؛ يعني بخلاف باقي القصص بنقعد نقرا القصة ونحاول نتأمل ونخرج الفوائد من القصة ونستفيد إيه، هنكتشف أن ربنا سبحانه وتعالى في قصة يونس لم يترك ذلك لنا، وإنما نص هو سبحانه وتعالى في كتابه على الفوائد التي يريد منا أن نستنبطها وأن نتحقق بها من هذه القصة المباركة. وده برضه شيء عجيب تاني في قصة يونس.
طيب، يبقى أول حاجة؛ ليه سورة يونس سميت سورة يونس؟ علشان قصة يونس عجيبة غريبة مخالفة للسنن الإلهية، فناسب أن سورة يونس تسمى بسورة يونس. ده أول معنى. المعنى الثاني، ونرجع نشوف بقا القصة إن شاء الله؛ إنه واحنا بنحكي كده -طبعاً قصة يونس كأن كلنا عارفينها ولو طشاش يعني- فيعني أنا هبني المسألة الجاية عليها، واحنا بنحكي قصة يونس كان ممكن البعض يقع في قلبه أنه إيه؟ يتنقص من يونس عليه السلام. يعني واحنا بنحكي قصة نبي راح وبعدين خرج من بين أظهر قومه من غير أن يأذن له الله عز وجل في ذلك فعاقبه الله عز وجل بما عاقبه به سبحانه وتعالى، وأنت عمال تسمع هذه التفاصيل وهذه المشاهد، ربما ربما وقع في قلبك تنقص سيدنا يونس عليه السلام، فليعظم الله عز وجل يونس في قلوبنا سمى السورة باسمه. فسميت سورة يونس عشان لا تتنقص يونس عليه السلام وأنت تقرا هذه، وأنا كثير نقول لكم إيه؟ العبرة بتمام النهايات لا بنقص البدايات، والأنبياء الله عز وجل يربيهم، وذكر ذلك عن موسى عليه السلام: ﴿وَلِتُصْنَعَ عَلَى عَيْنِي﴾ [طه: 39]، ﴿وَاصْطَنَعْتُكَ لِنَفْسِي﴾ [طه: 41]؛ فالله عز وجل يربي يربي الأنبياء شيئاً فشيئاً ويربي أولياءه شيئاً فشيئاً. فما فيش مشكلة أن ولي من أولياء الله عز وجل أو حتى نبي من أنبياء الله عز وجل يقع في محظور والله عز وجل يربيه، ما فيش أي مشكلة. وهذا وقع، حتى وقع لموسى عليه السلام مش كده؟ قصة موسى مع الخضر، كل ده حصل ليه؟ عشان كلمة قالها موسى عليه السلام، مش كده؟ واقف في قومه بيخطب فواحد قال له: تعرف حد أعلم منك؟ قال: لا. فعاتبه الله إذ لم يرجع الأمر إليه، فكانت قصة موسى مع الخضر. واضح؟ ده متكرر.
ولذلك النبي عليه الصلاة والسلام عشان يونس بالذات، ما هو ما فيش غير مشهد واحد في قصة يونس، وهو مشهد ربما زي ما بنقول كده هجم على القلوب، هاجم التنقص من يونس؛ فيقوم النبي عليه الصلاة والسلام -صلوا على النبي- يقول إيه النبي عليه الصلاة والسلام؟ «لا ينبغي لاحد أن يقول انا خير من يونس ابن متى». لا ينبغي لأحد أن يقول أنا أنا دي اللي هو مين؟ اللي هو أنا، مش كده؟ ما حدش ينفع يقول أنا خير من يونس بن متى، ده قول بعض أهل العلم؛ أو لا ينبغي لأحد أن يقول أنا، يعني النبي عليه الصلاة والسلام لا ينبغي لأحد أن يقول أنا خير من يونس بن متى من يونس بن متى. طيب ليه؟ ما هو النبي عليه الصلاة والسلام خير من يونس؛ هو خير ولد آدم صلى الله عليه وسلم.
طيب، في إشكال دلوقتي، ليه ما نقولش كده؟ هو النبي عليه الصلاة والسلام في هذا الحديث لا ينفي الخيرية، ركزوا! مش بيقول إيه؟ أنا مش خير من، ما بيقولش كده؛ النبي عليه الصلاة والسلام بيقول: «لا ينبغي لأحد أن يقول أنا خير من يونس بن متى». فالعلماء قالوا: أن نهي النبي صلى الله عليه وسلم في هذا الموطن؛ إذا فاضل الإنسان بين النبي صلى الله عليه وسلم ويونس على وجه التنقص من يونس. مفهومة دي؟ ولذلك في حديث آخر: «لا تفاضل بين الانبياء على وجه التنقص من احدهم». ما تجيش تقول إيه؟ النبي عليه الصلاة والسلام خير من يونس بن متى، وأنت جواك كده بتنتقص يونس عليه السلام. لا، لا ينبغي لأحد أن يقول أنا خير من يونس متى. فلذلك سميت السورة بسورة يونس. وبعدين الفوائد المستنبطة من سورة يونس؛ هتلاقيها صحيح السورة ما جابتش اسم يونس غير مرة واحدة وذكر تبعاً لا أصلاً، إنما فوائد قصة يونس مبثوثة في هذه السورة. وهنشوف كمان شوية؛ احنا قلنا إن ربنا سبحانه وتعالى لم يترك لنا أن احنا نستنبط الفوائد لوحدنا في قصة يونس، بل نص عليها سبحانه وتعالى. وهنشوف إزاي سورة يونس منصوص على فوائد قصة يونس فيها.
قصة يونس باختصار إيه؟ يونس كان نبياً من أنبياء بني إسرائيل. وكان العادة الجارية أن بني إسرائيل يسوسهم ملك؛ ملك مؤمن صالح، هذا الملك معاه كذا نبي، يبقى في وقت واحد كان الله عز وجل يرسل لبني إسرائيل كذا نبي. فإذا أراد الله عز وجل شيئاً أن تساس به الرعية، أوحى إلى نبي من الأنبياء الأمر، يؤمن النبي ده، يرفع الأمر إلى الملك، فالملك يحكم بما أنزل الله عز وجل فيسوس بني إسرائيل، وفي جملتهم الأنبياء. مفهوم القصة بالشكل ده.
فأوحى الله عز وجل إلى نبي من أنبياء الزمان أن الملك يرسل نبياً من هؤلاء الأنبياء إلى قرية كذا يدعوهم إلى الله عز وجل. فالنبي بلغ الملك، فالملك اختار يونس عليه السلام. ويونس عليه السلام كان فيه نوع ضيق صدر؛ يونس عليه السلام كان صدره فيه نوع ضيق، يعني ما يستحملش الآية كتير الأخذ والرد. فقال له يونس عليه السلام: أو سماني لك ربي؟ يعني أنا مقصود بعيني، أنا اللي أعمل ده؟ فقال، ففي رواية- طبعا احنا مما نذكره هنا الإسرائيليات. حد ما بيحبش الإسرائيليات؟ بنحب الإسرائيليات، ما نحبش إسرائيل. بنذكر الإسرائيليات، طبعاً الإسرائيليات لا تصدق ولا تكذب، وقال صلى الله عليه وسلم: «حدثوا عن بني اسرائيل ولا حرج»؛ فهذا من جملة ما يروى عادي جداً في هذه في هذه القصص.
الإسرائيليات على ثلاث أنواع (فائدة كده كده جانبية عشان نبقى عارفينها): إما شيء يروى عن بني إسرائيل أو ياتي في كتبهم ويصدقه القرآن، وإما شيء ياتي عنهم أو يروى في كتبهم ويكذبه القرآن، وإما شيء يروى عنهم أو ياتي في كتبهم ويسكت عنه القرآن. فالقسم الأول يصدق، لأن القرآن مهيمن؛ يعني إيه مهيمن؟ يعني هو الحاكم على هذه الكتب. لأن كتب يا جماعة التوراه ولا الإنجيل هل كلها محرفة؟ لا، في أجزاء منها ممكن ما يكونش وقع فيها التحريف، عادي جداً.
طيب، ففي رواية أن يونس عليه السلام لما الملك ده قال له: لا، أنت يعني ما تقلقش اسمك، أنا بس المفروض اختار أي نبي؛ فلما قال له ذلك الملك، خرج فاراً ليه؟ علشان مسألة ضيق الصدر دي، مش عاوز يروح يدعو هذه القرية. فعوقب بما عوقب به. وعلى هذه الرواية يبقى قصة السفينة والحوت وقعت له قبل أن يذهب إلى القرية، وده على خلاف المشهور عند الناس، يعني ماشي كده؟ طيب، ركزوا عشان.
دي أول فائدة، أنا مفاجأة هتلاقونا بنقول خلاص الفائدة خلصت. فاحنا واحنا بنحكي كده ركزوا في كل تفصيلة بقولها.
أن يونس امتثل أمر الملك الذي هو أصلاً أمر من أمر الله، فامتثل أمر الملك وذهب إلى القرية ودعاهم، فلم يؤمن واحد ولا واحد أمن، فضاق بهم ذرعاً وضاق صدره. فخرج من بين أظهرهم ولم يأذن الله عز وجل له في ذلك الخروج. فخرج من بين أظهرهم وذهب إلى السفينة وحدثت الواقعة وقصة الحوت اللي كلنا عارفينها. طيب، على الأمر الأول، على الرواية الأولى يا شباب، أن يونس عليه السلام لم يمتثل أمر الملك ولم يذهب، يبقى هنا يونس عليه السلام. يبقى هنا، بعد كده اللي جه يقعد قدام يبقى عامل حسابه مش هيقوم خالص طول الدرس عشان ما ما تتشتتش.
يبقى هنا يونس عليه السلام، هنا فين بقى؟ أنا عندي مشكلة في يعني بتشتت على طول. أمم. يبقى هنا يونس عليه السلام في الرواية الأولى لم يصبر على الحكم الشرعي ولا الحكم القدري. ركزوا قبل ما تجاوبوا: الملك جه قال له: اذهب إلى قرية كذا، فلم يمتثل وخرج. هنا لم يصبر على حكم شرعي ولا حكم قدري. على الحكم الشرعي هو جايله أمر من ربنا والملك بيسوس بأمر الله عز وجل فقال له أنت روح، فقال لا مش رايح، فهنا لم يصبر على الحكم الشرعي. مش كده؟
على الرواية الثانية أنه لا امتثل الحكم وراح لقومه ودعاهم فلم يؤمن واحد فضاق بهم ذرعاً وخرج. لم يصبر على الحكم الشرعي ولا حكم قدري. على الحكم القدري، ومن أهم الدروس التي ينبغي أن نخرج بها بالذات الداعية إلى، أن الداعية لابد أن يصبر على الحكم الشرعي والحكم القدري جميعاً. ولذلك لما دي كانت أعظم فائدة في قصة يونس ذكرها الله عز وجل في أكثر من موطن. ففي سورة القلم بدايه كده ماذا يقول الله عز وجل لنبيه؟ ها: ﴿فَاصْبِرْ لِحُكْمِ رَبِّكَ وَلَا تَكُن كَصَاحِبِ الْحُوتِ﴾ [القلم: 48]. دي أعظم فائدة، ولذلك ربنا ينص على الفائدة: يا محمد صلى الله عليه وسلم، فاصبر لحكم ربك ولا تكن كصاحب الحوت إذ لم يصبر لحكم ربه سبحانه وتعالى.
يا جماعة احنا طبعا مستحضرين على طول احنا إيه، لا نتنقص من يونس عليه السلام خالص. فاصبر لحكم ربك الشرعي واصبر لحكم ربك القدري. ولذلك لما ده كان أعظم فائدة زي ما قلنا لكم، هنلاقي آخر آية شوفوا بقى سورة يونس ليه اتسمت سورة يونس، أهو شوفوا فوائد قصة يونس. آخر آية تختتم بها السورة، ماذا قال الله عز وجل في آخر آية في سورة يونس؟ ﴿وَاتَّبِعْ مَا يُوحَى إِلَيْكَ وَاصْبِرْ حَتَّى يَحْكُمَ اللَّهُ﴾ [يونس: 109]. واتبع ما يوحى إليك، أهو واتبع ده حكم إيه؟ شرعي. فاصبر على الحكم الشرعي واصبر على هذا الحكم الشرعي واصبر على الحكم القدري. لغايه إمتى يا رب؟ حتى يحكم الله. حتى يحكم الله.
طيب، ربنا حكم بأن ما فيش ولا واحد يؤمن وهو خير الحاكمين. أصل يؤمن ما يؤمنش دي مش بتاعتنا. طيب لو ربنا حكم ما فيش ولا واحد هيؤمن هو خير الحاكمين ولا ما بقاش خير؟ سبحانه وتعالى هو خير الحاكمين. أمنت القرية كلها، آمنها آمن ثلثها، آمن ربعها، ما آمنش ولا واحد، هو خير الحاكمين. حكمه القدري خير الأحكام وحكمه الشرعي خير الأحكام، لأنه سبحانه وتعالى خير الحاكمين.
فأول درس أن يصبر، أي مسلم، أي مسلم أن يصبر لحكم الله الشرعي وأن يصبر لحكم الله القدري بالذات الداعية إلى الله عز وجل. الداعية إلى الله لابد أن نصبر على الأحكام الشرعية اللي هي بتتمثل في حلال وحرام، في أن احنا نمتثل أوامر الله عز وجل ونجتنب نواهيه. الدعاء إلى الله عز وجل وبعد كده مهما أصابنا، صبرنا على الحكم القدري. أصابنا ده ممكن يبقى شيء حسي، وممكن يبقى شيء معنوي؛ إذاء معنوي زي التكذيب مثلاً، ده إذاء معنوي مش حاجة ماضربتش مثلاً ولا حاجة، زي أن ما حدش يؤمن ما هي ممكن تؤذي، مش كده؟ وبعدين تؤذي من ناحيتين، أول حاجة تؤذيك في نفسك أنت، يعني أن أنا ما حدش آمن بيا، يعني، وتؤذيك في إيه بقى؟ في قومك، مش ده حصل للنبي يا جماعة عليه الصلاة والسلام والله عز وجل عاتبه على ذلك؟ ﴿فَلَعَلَّكَ بَاخِعٌ نَّفْسَكَ عَلَى آثَارِهِمْ إِن لَّمْ يُؤْمِنُوا بِهَذَا الْحَدِيثِ أَسَفًا﴾ [الكهف: 6]. فلعلك باخع نفسك أسفاً، يعني فلعلك قاتل نفسك أسفاً. لعلك قاتل نفسك من التأسف عليهم إذ لم يؤمنوا بهذا الحديث، لا ما تعملش كده، ما تعملش كده.
يبقى احنا يا جماعه عاوزين يبقى في اتزان نفسي في الحته دي. الداعية إلى الله يدعو، يعني المفروض يعني يبقى أصلاً عندنا حرقة على الناس، المفروض شايفين الناس بتعصي الله عز وجل، بالذات لو ناس نعرفهم وناس قريبين مننا، يبقى عندنا جوانا هذه النفسية اللي كانت عند النبي عليه الصلاة والسلام، لكن ما تاخدناش للحته دي، حته إن إيه؟ تاخدنا لأن نقتل أنفسنا من التأسف عليهم، لا، ماشي.
يبقى ده أول درس، أن نصبر للحكم الشرعي فنمتثل الأوامر ونجتنب النواهي، ثم أن نصبر للحكم القدري ونعرف أن الإيمان والكفر، الكفر دي مش بتاعة حد، لا بتاعتنا ولا بتاعة الصحابة ولا بتاعة النبي عليه الصلاة والسلام ولا بتاعة جبريل ولا بتاعة أي حد غير ربنا سبحانه وتعالى، مش بتاعة حد خالص. ماشي، وده فائدة، لأن فائدة تانية من السورة يعني أو من قصة يونس عليه السلام.
الفائدة الثانية، عشان بقى يعني نربطها دي على طول، أنه إذا صبرنا لحكم الله عز وجل الشرعي وصبرنا على حكم الله عز وجل القدري، كنا من أوليائه سبحانه وتعالى. طب وإيه يعني كنا من أوليائه؟ إذا فعلنا ذلك نجانا الله عز وجل بما كان منا من ذلك الصبر. ولذلك يا جماعة الفائدة الثانية من فوائد قصة يونس وهي فائدة عظيمة جداً ومحتاجينها في الأوقات دي؛ أوقات الضيق، أوقات الشدة، أوقات الكرب اللي ينزل على الأمة. الفائدة الثانية هي أن بمثل هذه الأفعال يفرج الله عز وجل الكربات. يبقى نستغل وقت الراحة وقت الدعاء وقت الرخاء في أن احنا نفعلاً أفعالاً بمثلها ينجي الله عز وجل أولياءه إذا نزل البلاء، مفهومة دي؟
وكذلك الله عز وجل لم يترك لنا أن احنا اللي نستنبط الفائدة دي من قصة يونس، بل نص عليها سبحانه وتعالى. فهتلاقي في سورة الأنبياء: ﴿وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ * فَاسْتَجَبْنَا لَهُ وَنَجَيْنَاهُ مِنَ الْغَمِّ﴾ [الأنبياء: 87-88]، وتخلص الآية، ﴿وَكَذَلِكَ نُنجِي الْمُؤْمِنِينَ﴾ [الأنبياء: 88]. سورة يونس، قلنا لكم كل فوائد قصة يونس في سورة يونس بس مش متصلة بالآية، فآلتنا، فلولا كانت قرية، بعديها أربع آيات كده أو خمس آيات، ماذا قال الله عز وجل؟ ﴿ثُمَّ نُنَجِّي رُسُلَنَا وَالَّذِينَ آمَنُوا كَذَلِكَ حَقًّا عَلَيْنَا نُنجِ الْمُؤْمِنِينَ﴾ [يونس: 103]. نفس المعنى، اللي هو إيه المعنى الذي قاله النبي صلى الله عليه وسلم في حديث ابن عباس: «تعرف إلى الله في الرخاء يعرفك في الشدة».
طيب، هو بأي شيء فرج الله عز وجل عن نبيه يونس لما نزل به البلاء؟ بأي شيء برضه ربنا ما سبناش نقعد نتخيل بأي شيء، لا، لا، ربنا نص، يا جماعة فوائد سورة يونس أو قصة يونس منصوص عليها، مش محتاجين أكثر من أن احنا نقرا القرآن بس. قال الله عز وجل: ﴿فَلَوْلَا أَنَّهُ كَانَ مِنَ الْمُسَبِّحِينَ * لَلَبِثَ فِي بَطْنِهِ إِلَى يَوْمِ يُبْعَثُونَ﴾ [الصافات: 143-144]. يبقى بأي شيء نجى الله عز وجل نبيه يونس؟ أنه كان من المسبحين. يعني إيه كان من المسبحين؟ على قولين للعلماء.
القول الأول: فلولا أنه كان من المسبحين في بطن الحوت، يعني لما نزل به البلاء لجأ إلى الله سبحانه وتعالى، ما لجأش لغيره، لجأ إليه سبحانه وتعالى، يبقى دي احنا محتاجينها، ما نروحش يمين وشمال، قلوبنا ما تتعلقش لا بدولة عظمى ولا بحلف مش عارف إيه ولا ب خالص، ولا بمجلس أمن ولا غيره، أمال تتعلق بمن؟ بالله عز وجل. طب إذا أجرى الله عز وجل بعض الأسباب على هذا، خلاص، نأخذ بالأسباب، لكن قلوبنا فين؟ لا، مش شايفة حد غيره سبحانه وتعالى، مش شايفه. فلولا أنه كان من المسبحين للبس في بطنه إلى يوم يبعثون. أو وهو المعنى الذي أو الفائدة التي أصلًا بدأنا بها (يعني الفائدة الثانية): فلولا أنه كان من المسبحين في زمن الرخاء، فلولا أنه كان من المسبحين للبس في بطنه إلى يوم يبعثون، يعني بأي شيء نجاه الله عز وجل من هذا الكرب؟ أنه كان في زمان الرخاء من المسبحين، فلما نزلت به الشدة ودعا الله عز وجل استجاب الله دعاءه لأنه كان من المسبحين.
يعني إيه كان من المسبحين بقى؟ أما يكون التسبيح يعني كان من الذاكرين لله عز وجل ذكراً كثيراً اللي مش هيسمى مسبح وهو بيسبح يعني عدد قليل، ده كده كأنه متلبس بهذا اللون أو النوع من العبادة معظم الوقت عشان يسمى مسبح، ماشي؟ ما هو أنتم عارفين يعني الاسم أو الصيغة الاسمية يعني بتدل على اللزوم. مسألة في اللغة كده يعني، حصل خير. فهو فمسبح ده اسم مش فعل، يعني مش يسبح أو سبح، يسبح فعل مضارع إيه؟ سهلة دي ولا إيه؟ سبح فعل ماضي، مسبح اسم، بغض النظر بقى اشتقاقه إيه، بس هو اسم، يعني إيه؟ اسم يدل على معنى غير مقترن بزمن، مسبح.
فالصيغة بقى الاسمية بتدل، العلماء، علماء اللغة يقولون: بتدل على اللزوم، يعني ده شيء لازم له ثابت له، فلولا أنه كان من المسبحين فكان دي كانت صفة يونس عليه السلام. أو فلولا أنه كان من المسبحين، يعني من المصلين. الصلاة يا جماعة، صلاة. وكان صلى الله عليه وسلم إذا حذبه أمر فزع إلى، مش الفيسبوك ولا ال، احنا أول ما يحصل حاجة يحصل الزلزال تقوم رايح على الفيسبوك، مش كده؟ تبص بقى والناس قالت إيه وعملت إيه؟ فزع إلى الصلاة. ويل للعرب من شر قد اقترب، ها، طب نعمل إيه؟ من يوقظ ها صياح حباية الحجرات أو صواحب الحجرات كي يصلين؟ رب كاسية في الدنيا عارية يوم القيامة، إيه، نعمل إيه؟ البلاء قرب، البلاء نازل، من يوقظ الناس كي يصلون؟
فلولا أنه كان من المسبحين يعني من المصلين. هي صلاة تسمى سبحى في القرآن وفي السنة. في القرآن في سورة الإنسان ماذا قال الله عز وجل؟ ﴿وَسَبِّحْهُ لَيْلاً طَوِيلاً﴾ [الإنسان: 26]، يعني إيه وسبحه؟ يعني صلي له. وسبحه يعني صلي له ليلاً طويلاً. وجاء في القرآن: لو كنت مسبحاً لاتممت، ها؟ أه، لو كنت مسبح النبي عليه الصلاة والسلام قال كده لما جمع بين الصلوات. خلاص فقال: لو كنت مسبحاً لاتممت. طبعا الفقهاء بتوعنا ما شاء الله يوم واخدين الحديث يقول لك إيه؟ مش مش هنسبح، نخلص الظهر وندخل في العصر، ليه؟ أصل النبي عليه الصلاة والسلام وبقي، خلاص صح، يعني إيه؟ قال لو كنت مسبحاً لاتممت، يعني لو كنت هسبح كنت أتم بقى من باب أولى كده صح؟ فاهمين صح احنا كده؟ لا، لو كنت مسبحاً يعني لو كنت مصلياً للسنة لاتممت.
وهي يمكن أنتم سمعتم يقال إيه؟ سبح الضحى، يعني سنة الضحى. المهم قوي يا جماعة أن احنا يعني إيه ما ناخدش كده يعني بالمرة، دي فائدة برده على جنب للشباب لأن برده ده متكرر الحقيقه وبشوف منه بلاوي على الفيسبوك وغيره. خلاص، ندخل حد من إخواننا ولا أنا ولا أي حد يدخل يكتب يقول لك إيه مثلاً: أن العلماء مثلاً قول الجمهور المذاهب الأربعة، أي حاجة كذا، فيقوم إيه جاي يقول لك: النبي بيقول عليه الصلاة والسلام، وكأني يعني إيه جمهور العلماء مش عارفين الحديث بتاع، بس مش دي اللي احنا عاوزينها، خلينا في اللي احنا هو بقى يروح ماسك لك الحديث. طب يا ابني رحت بصيت العلماء قالوا إيه؟ ما بيبصش، هو أنا فاهم الحديث؟ هو إيه بالدراع؟ هو بالدراع؟ مع أن يا جماعة احنا لا نقبل بأقل من ده بكثير في أي حاجة تانية غير الدين، حد يستجري يعمل ده في الطب؟ يقول لك: أنا قريت النشرة وبقول لك خود الدواء ده واكتب لك روشتة، ما حدش يستجري يعمل ده في الطب. فيقول لك: أنا إيه؟ فاهم الحديث ويعك بقى، واللي أنا بقوله ده في ناس فهمته كده، يقول لك إيه: لو كنت مسبحاً لاتممت فمش مش هنسبح بعد الصلاة.
واحد من الدعاة يحكي عن واحد يعرفه يعني دخل عليه مش عارف ياخد نفسه هيموت، الراجل هيموت خلاص! إيه يا ابني في إيه؟ طب اقعد، ديك قال له في إيه بس يعني هنعترض على السنة خلاص بقى؟ قال له: يا عم سنة! طب فهمني، قال له رحت لناس عازمني على أكل فلقى في الاكل لحمة ضاني فكل شوية يحط له حته دهنة، دهنة مش لحمة. فهو يقول لهم يعني ما لا يعني ما باكلش، ده يقول له لا، كان النبي صلى الله عليه وسلم لا يرد الدهن، وهو فعلاً في حديث كده أن النبي عليه الصلاة والسلام كان لا يرد الدهن. إنما الدهن اللي هو إيه؟ العطر، الطيب، الطيب كان يصنع من الزيوت، يعني دهني، فهو كان لا يرد الدهن. فطبعا هو يسمع الحديث، هو معظم للسنة، يقول لك خلاص.
السنة، كان يرد الدهن، يقوم واكل، يا عيني! الدهنة بتاعة الضاني اللي أصلاً إحنا بنشم ريحتها بتموع، يسكتوا لا، يخلصوا يروحوا حاطين له إيه؟ حتة تانية، حتة دهنة تانية، وكان لا يرد الدهن، الراجل طلع هيموت. فأنتم اعلموا عشان إيه لما تقابلكم المواقف دي تبقوا فاهمين.
بقى كان واحد صاحبي، وبعدين برضه هو شعره بقى ناعم كده وطويل وبتاع وتدين، وبعدين بقى كل كان هو الأول عادي يعني شعره حلو أصلاً لوحده يعني مش محتاج حاجة، كل ما حاطط كريم في عز التراب في الخريف شعره يطين، وأقول له يا فلان طب ليه يعني ما أنت شعرك؟ قال لي: لا، أصل هو في حديث: «من كان له شعر فليكرمه»، فهو فاكر يكرمه دي، هو فهمها كده، يكرمه يعني كريم، فبقى إيه كل شوية يغرق شعره كريم وبرضه فاكرها السنة. دي يا جماعة فائدة أن يؤخذ العلم على أهله.
كان العلم في صدور الرجال، فصار العلم في الكتب ومفاتحه مع الرجال. زمان ما كانش في كتب، يعني قبل حركة التدوين ما كانش في كتب، أمال كان العلم فين؟ في صدور الرجال. علمي معي حيث رحت ينفعني، العلم في الصدر لا في بطن صندوق. مين بيقول كده؟ الشافعي: علمي معي حيث رحت ينفعني في أي حتة، أنا مش محتاج كتب، العلم في الصدر لا في بطن صندوقي، إن كنت في بيت كان العلم فيه معي، أو كنت في السوق كان العلم في السوق. فكان العلم في صدور الرجال، فصار العلم أو فأصبح العلم في الكتب ومفاتحه مع الرجال.
ففكر أن إحنا نهجم مباشرة على الأدلة على الكتاب والسنة، هذا مذهب خطأ. بلاش، بلاش نرفع السقف، ما حدش يعمل. طب أنا بروح لحد بيعمل كده؟ ما تروحش لحد بيعمل كده. خلاص، نفهم العلم عن العلماء. العلماء اللي بذلوا أعمارهم في فهم الكتاب والسنة، وصاروا مجتهدين، عندهم علوم اللغة، وعندهم الأصول، وعندهم المصطلح، وعندهم علوم كتير قوي قبل ما يبتدوا يفتحوا بقهم يتكلموا في حاجة. فهي المسألة مش مسألة إني قريت آية وأهجم بقى على تفسير الآية، أو قريت حديث وأهجم على تفسير الحديث بدماغي؛ هتضل وتضل.
خلاص، ولو جيت يوم القيامة قلت يا رب أنا عملت كده عشان مقلد للعالم الفلاني العالم المجتهد، خرجت من العهدة. إنما لو جيت يوم القيامة، حتى لو كان هذا القول ليس هو الصواب في نفسه، إنما لو أنت مقلد وجيت يوم القيامة، مقلد يعني ما عندكش آلات الاجتهاد، جيت يوم القيامة وقلت يا رب أنا عملت كده علشان أنا لقيتك بتقول كده في كتابك، أو النبي عليه الصلاة والسلام بيقول كده في السنة، وأنا بقى فهمتها كده بالفهلوة كده بالحداقة، تأثم، لن تخرج من العهدة بذلك. خلاص، فما نتجرأش يا جماعة، ما نتجرأش على حدود الله عز وجل وشرع الله عز وجل.
ومن أخذ العلوم بغير شيخ يضل عن الصراط المستقيم، وتلتبس العلوم عليه حتى يصير أضل من تومة الحكيم: تصدق بالبنات على رجال يريد بذاك جنات النعيم بيقولوا إن كان في واحد يتعاطى الحكمة، لا حكيم ولا بتاع، كان اسمه تومة أو تومة كده أو كده، فكان من جملة ما يقول من ضلالاته يعني كان يقول إيه: لا الرجالة فقرهمش يتجوزوا، بتاع، قال لك إيه راح مطلع حكمة وهو قاعد كده، قال لك إيه يعني تصدقوا بالبنات على الرجالة يا جماعة، كل واحد عنده بنت يطلع إيه يتصدق بيه على واحد فقير في الشارع! حلوة دي؟ فراح واحد قال إيه: ومن أخذ العلوم بغير شيخ يضل عن الصراط المستقيم، وتلتبس العلوم عليه حتى يصير أضل من تومة الحكيم، تصدق بالبنات على رجال يريد بذاك جنات النعيم.
ومن الطرائف يعني اللي بيقولوها إن وقال حمار الحكيم تومة: لو أنصف الزمان كنت أركبه. يعني لو في إنصاف كنت أنا اللي أركب مش يا عيني حمار متغاظ من اللي راكبه، تومة ده راكبه عمال يضل في الناس. وقال حمار الحكيم تومة: لو أنصف الزمان كنت أركبه، لأني جاهل بسيط، وصاحبي جاهل مركب. عارفين الفرق بين الجهل البسيط والمركب؟ الجهل البسيط اللي هو اللي جاهل وعارف إنه جاهل، ده إشكاله بسيط يعني إشكاله سهل. المصيبة فين؟ بقى اللي جاهل ومش عارف إنه جاهل، جاهل ومش عارف، زي صاحبنا بتاع كان لا يرد الدهن، هو جاهل ومش عارف إنه جاهل، فده جهله مركب من جهلين: جهل المسألة، وجهل أنه جاهل. خلاص، نرجع بقى تاني ليونس عليه السلام.
كنا فين بقى؟ فرفشتم؟ هاه، أه، فإذن يا جماعة لا بد لنا من خبيئة، لا بد لنا من عمل صالح. الدرس الثاني، هاه، عشان نركز بس إحنا فين دلوقتي؟ الدرس اللي هو إيه: ﴿كَذَٰلِكَ نُنجِي الْمُؤْمِنِينَ﴾ [الأنبياء: 88]، بمثل هذه الأعمال ينجي الله عز وجل أولياءه إذا نزل البلاء. وجاء في بعض الآثار أن الملائكة لما سمعت تسبيح يونس عليه السلام في بطن الحوت تعجبوا، قالوا يا رب صوت معروف من مكان غريب، إيه اللي حد بيسبح في بطن حوت في المحيط؟ عجيبة جداً! والصوت كأننا نعرفه، ما كانوش مميزين يعني أن ده يونس عليه السلام، صوت معروف من مكان غريب. قال: أما تعرفونه؟ قالوا لا. قال: ذاك عبد يونس. فقالت الملائكة: الرجل الصالح الذي ما زال له عمل صالح يرفع ودعاء يجاب؟ فقال: نعم. فقالت الملائكة: يا رب أما تفرج عنه ما هو فيه بما كان منه من عمل؟ أو يعني كلام شبه كده، فقال: بلى قد فعلت.
فمحتاجين ده، محتاجين ده يا جماعة، وحديث الصخرة إحنا قلناه قبل كده، أديناه في درس وأديناه في سلسلة خطب، فكرة أن لما وقعت الصخرة وسدت الغار، إيه اللي نجاهم؟ أعمال صالحة كانت في زمان الرخاء، توسلوا لله عز وجل بها في زمان الشدة، ففرج الله عنهم بها تلك الشدة. فإحنا محتاجين ده، بادروا بالأعمال. فتن كقطع الليل المظلم، يصبح الرجل مؤمناً ويمسي كافراً، ويمسي مؤمناً ويصبح كافراً، يبيع دينه بعرض من الدنيا، عياذاً بالله. يا جماعة الحديث ده مرعب، مرعب! يصبح مؤمناً ويمسي كافراً، أنتم متخيلين المعنى؟ واحد صبح مؤمن، لا يأتي عليه الليل إلا وقد كفر بالله، فتن دي شكلها إيه؟ والعكس ويمسي مؤمناً ويصبح كافراً، يبيع دينه بعرض من الدنيا. العلاج فين؟ بادروا بالأعمال، بادروا بالأعمال، تعرفوا إلى الله في الرخاء.
يبقى أنتم قاعدين فاضيين، ما عندكم وقت وعندكم قوة وعندكم الإمكانيات، بادروا بالأعمال. ختمات للقرآن، قراءة، بداية من النهاردة، بداية في الحفظ، اللي مقصر يرجع تاني لشيخ ويحفظ، مراجعة، ده كله في جانب القرآن، أورادك شكلها إيه؟ صلاتك عاملة إيه؟ وفين بتصلي؟ فين أنت أيها الرجل بتصلي فين؟ في بيت ربنا ولا بتصلي في بيتك؟ نحسن كل هذه الأمور، بادروا بالأعمال بنية إيه؟ أن يا رب لما ينزل بينا البلاء يبقى لنا أعمال يرفع بها البلاء عنا بها. فدي الفائدة الثانية من قصة يونس عليه السلام.
قال الله عز وجل: ﴿وَإِنَّ يُونُسَ لَمِنَ الْمُرْسَلِينَ * إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنَ الْمُدْحَضِينَ﴾ [الصافات: 139-141]. يعني إيه؟ يعني أن يونس عليه السلام لما ذهب زي ما قلنا لكم على الروايتين بقى، يا إما قبل يا إما بعد وخرج إلى ذلك الفلك السفينة. إذ أَبَقَ، العبد الآبق هو الهارب من سيده، والعبد إذا أبق من سيده يكون عاصياً، ماشي؟ ولذلك لا تقبل له صلاة، ده في أحكام الدنيا، يعني لو واحد عنده عبد زمان يعني، عبد ده مش خادم ولا أجير، مش زي دلوقتي، عبد يعني ده ملكه، ممكن يبيعه، فأبق العبد لا تقبل له صلاة هذا الآبق حتى يعود إلى سيده مرة أخرى.
خلاص، فأذ أبق إلى الفلك المشحون، لأنه خرج من غير أن يأذن الله عز وجل له في الخروج. يا جماعة، هذه أيضاً من الفوائد، وهي من الفوائد التي ينخلع لها القلب في قصة يونس. يونس ما هوش راجل عادي يعني، ما هوش راجل عاصي مخلط زينا، ولا راجل ولي لله عز وجل، ده نبي! نبي، ومع ذلك لما خالف الله مخالفة واحدة، مش عشر مخالفات ولا مئة مخالفة، ولا مخالفة واحدة وخالفه متأولاً، يعني مش هو عارف أن ده حرام وهروح أعمله، يونس ما عملش كده، يونس لما خالف خالف متأولاً. في على الرواية الأولى أول حاجة سألها: أنا اسمي اتقال؟ وكان المعنى إيه لو قال اسمي سمعاً وطاعة، فلما قال له لا ما اتقالش، فظن أن الأمر فيه سعة، فخرج متأولاً.
خلاص، وعلى الرواية الثانية النص القرآني واضح: ﴿فَظَنَّ أَن لَّن نَّقْدِرَ عَلَيْهِ﴾ [الأنبياء: 87]، ما كانش متخيل أن اللي عمله ده هيكون سبب في أن هو يضيق عليه، وأن هو يعاقب، مش متخيل ده، مش متخيل أنه عمل الحاجة اللي تؤدي به إلى هذا. إحنا لا، إحنا عارفين ده حرام ونروح نعمله كبيرة ونروح عادي، تشوح في أمك عادي جداً! طب يا فلان ده من أكبر الكبائر، يا راجل يا ملتحي ولا يا ست يا منتقبة، ولا فارقة معاك عادي جداً، أشوح وأقل أدبي وأزعق، أنت بتقتحم الكبائر اللي أنت عارف أنها كبائر!
يونس عليه السلام خالف مخالفة واحدة متأولاً فعوقب. ربنا ما فيش حد عزيز عليه إن خالف وعصى. الكلام ده من عندي؟ لا، مش من عندي، ده في القرآن، يا نساء النبي في بعض نساء النبي، يا جماعة ما فيش، ﴿مَن يَأْتِ مِنكُنَّ بِفَاحِشَةٍ مُّبَيِّنَةٍ يُضَاعَفْ لَهَا الْعَذَابُ ضِعْفَيْنِ﴾ [الأحزاب: 30]، لغاية هنا ما فيش مشكلة، يعني إيه مش هتتعاقبوا زي غيركم، يضاعف لها العذاب ضعفين، لغات هنا ماشي. ختام الآية مرعب: ﴿وَكَانَ ذَٰلِكَ عَلَى اللَّهِ يَسِيرًا﴾ [الأحزاب: 30]. مش عشان أنتِ عائشة رضي الله عنها ولا عشان أنتِ حفصة ولا عشان أنتِ أم سلمة، وكان ذلك على الله يسيراً، هتخلفوا تسقطوا على طول. اللي أعلى من كده: ﴿وَلَقَدْ أُوحِيَ إِلَيْكَ وَإِلَى الَّذِينَ مِن قَبْلِكَ لَئِنْ أَشْرَكْتَ لَيَحْبَطَنَّ عَمَلُكَ﴾ [الزمر: 65]، مش عشان أنت النبي صلى الله عليه وسلم، وحاشاه أن يشرك، ولذلك قالوا هذا مما خطب به النبي وأريد به الأمة، وإلا فلا يتصور النبي عليه الصلاه والسلام يشرك، مفهومه، فالمراد الأمة، لكن الشاهد شوفوا الخطاب هنا يا جماعة إزاي حازم، حازم!
بلاش آدم عليه السلام، ما تأكلش من الشجرة دي، كل مخالفة واحدة، وإحنا عارفين حيثيات المخالفة، يعني مش اقتحم الأكل وهو عارف بقى أن أنا بعصي ربنا ومتذكر للمعصية ومصر خالص، ده وقاسمهما إني لكما لمن الناصحين فدلاهما بغرور، ومع ذلك العقاب ما فيش مجاملة، خلاص، عشان أكلة. تصل الذنوب إلى الذنوب وترتجي درج الجنان ونيل فوز العابد أنسيت ربك حين أخرج آدم منها إلى الدنيا بذنب واحد
فدي من الفوائد أصلاً في قصة يونس عليه السلام أن لا نأمن مكر الله عز وجل. ولما أخرج، أظن في هذا الموطن، لما أخرج الله عز وجل آدم من الجنة فبكى، مما روي يعني بكى جبريل وميكائيل، جلس يبكيان، فقال الله عز وجل لهما: ما يبكيكما؟ فقالا: سبحانك لا نأمن مكرك. قال: هكذا فكونا، هكذا فكونا.
فنحن لا نأمن مكر الله عز وجل، وأن إحنا إذا خالفنا الله عز وجل، ما يا جماعة إحنا عندنا إشكال كبير جداً هنا، وهو مرعب الحقيقة، مخيف، أن برضه إحنا لا نأمن أن من كتر معاصينا دي، أصل الجرأة بتاعتنا عجيبة، السامع المتكلم أنا أولكم، لا نأمن أن ربنا سبحانه وتعالى يغلق علينا باب التوبة، ويغلق علينا باب حب الصالحات وحب الصالحين. ما هو ربنا قال كده في القرآن يا جماعة، قال إيه؟ ﴿وَلَوْ أَرَادُوا الْخُرُوجَ لَأَعَدُّوا لَهُ عُدَّةً وَلَٰكِن كَرِهَ اللَّهُ انبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]. ففكرة أن أنت ممكن يكره الله عز وجل انبعاثك لأي طاعة، طب هو لو كره انبعاثك، كره انبعاثك لأنه ظالم لك؟ حاشاه. ولا أنت تستاهل؟ لو ده حصل، تستاهل، مش بس تستاهل، ده أنت تستاهل ده من زمان، وهو سبحانه وتعالى يعفو ويصفح ويتجاوز ويمهل.
فإذا كره انبعاثك، أنت عارف يعني كره انبعاثك يا جماعة؟ والله الكلام ده مرعب، ﴿وَلَٰكِن كَرِهَ اللَّهُ انبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]. عارف يعني إيه؟ يعني ممكن ربنا سبحانه وتعالى يكره انبعاثك لحضور مجلس علم زي اللي إحنا قاعدين ده، أنا أو أنتم، يعني ممكن أنا، ما حدش كبير على الحتة دي، فتلاقي نفسك بعد ما كنت حريص على درس العلم، لا، خلي بالك الدرس موجود، أو الفرصة موجودة، مش هنقول الدرس، وقصده ده نوع تاني من العقوبة خلي بالكم، نوع تاني من العقوبة لازم ننتبه ليه برضه، أن نحرم الخير، لكن لا أنا بتكلم في حاجة أعلى من كده، أن الخير موجود، وخير كنت أنت بتعمله ومحافظ عليه، فجأة تكره أو فجأة عفواً تجد قلبك لا ينبعث لهذا الفعل، بعد ما كنت يوم الدرس ده لا ده من قبليها ومحضر ولغي كل حاجة وبتاع، ما فيش انبعاث، طب ما فيش انبعاث لأنك رحت مثلاً كلت بره، ولا خالص قاعد في البيت ما بتعملش أي حاجة، بالعكس ممكن تبقى قاعد في البيت وزهقان ما فيش حاجة تعملها وتبقى مش فاهم ليه. وقلنا لكم قبل كده من الصور دي اللي بتحصل وهي فعلاً آية من آيات الله عز وجل، مش بقى درس ونزول ومروح.
وركوب خالص والمصحف قدامك أو التطبيق في الموبايل بتاعك، وأنت عاوز تقرأ وما فيش شواغل ولا صوارف، وإيديك ما تتمدش تاخذ المصحف. ساعتها كنت دائمًا أقول: أتحدى أن واحدًا بس في المسجد يقول ما حصلتش معايا ولا مرة في حياتي، مش هتلاقوا. ﴿وَلَكِن كَرِهَ اللَّهُ انبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ﴾ [التوبة: 46]. فلا تتجرأ على ربنا سبحانه وتعالى؛ فدي من الفوائد أيضًا أنك تبقى خايف من المعصية الواحدة ومن المخالفة الواحدة ولو بتأويل. لأن فكرة التأويل دي إحنا بنقترحها ومحتاجين نصلحها، مش لاقي بعمل كذا، لا ده أنت عارف أنه حرام وبتعمله.
ما فيش عشان الأولياء ما بيعملوش كده، الأولياء حتى لو وقعوا في مخالفة، لما جرى عليهم من سابق التقدير، إنما بيقعوا في هذه المخالفة في معظم الأوقات متأولين. متأولين زي كده الرماة مثلًا نزلوا من على الجبل متأولين، قالوا: خلاص الحرب خلصت. أيوه ده النبي قال كده عليه الصلاة والسلام، قال لك حتى لو بنغنم ما تجيش، أيوه بس هو الحرب خلصت. مش قالوا أيوه هو قال كده وإحنا مخالفينه، ما بيقولوش كده. ومع ذلك الله عز وجل لا يحابي أحدًا، وسنن الله عز وجل واضحة قدام عينينا، هنخالف هيحصل ده، ما فيش مجاملة.
﴿فَسَاهَمَ فَكَانَ مِنَ الْمُدْحَضِينَ﴾ [الصافات: 141]. إحنا بقى بنحكي القصة باختصار، هاجت بهم الرياح والأمواج وكادت السفينة أن تغرق، فقالوا: نستهم. نستهم يعني إيه؟ يعني نعمل قرعة. القرعة زمان ما كانش ملك وكتابة، كانوا يجيبوا كنانة الأسهم، اللي هو الجراب بتاع الأسهم، والناس تحط الأسهم بتاعتها جوه الكنانة، وكل واحد بيبقى سهمه عارفه من عند رأس السهم، يعني متعلم أن ده سهم فلان، ومن فوق الأسهم شبه بعض. وبعدين يقوموا ساحبين سهمًا، فاللي سهمه يخرج هو ده اللي وقعت عليه القرعة، عشان كده كان بيسموها ساهم. في أحاديث بقى كثيرة وحتى في القرآن هنا ﴿فَسَاهَمَ﴾، ساهم يعني عمل قرعة؛ ليه اسمها ساهم؟ عشان دي صورة القرعة بتاعة زمان. وفي الحديث: «لو يعلم الناس ما في الصف الأول ثم لم يجدوا إلا أن يستهموا عليه لاستهموا عليه». يستهموا يعني عملوا القرعة دي.
أيه اللي حصل بقى؟ حصل حاجة عجيبة جدًا، قالوا خلاص نستهم؛ طب ليه؟ إما أنهم بيتخففوا من الحمولة الزائدة، يعني قالوا خلاص لازم حد بقى ينط عشان المركبة هتغرق بينا كلنا، فلا واحد يترمي، أو على عادتهم حينها أنهم كانوا إذا حصل نوع هيجان للبحر والسفينة تهلك، قالوا: إنما هذا بوجود آبق أو عاص لله عز وجل، في واحد معانا ربنا لا يرضى وجوده. فعملوا حركة القرعة دي، واللي يخرج سهمه خلاص يقولوا هو ده. فاستهموا فخرج سهم يونس عليه السلام، ويونس كان معروف أنه رجل صالح، وديانة أصحاب السفينة مش مذكورة، ما نعرفش هم كانوا إيه، لكن هو معروف أنه راجل كويس، وهم طبعًا في البحر ضل من يدعون إلا هو سبحانه وتعالى كما أخبر القرآن. فهم عارفين هنا في البحر حتى لو هم كانوا كفار عارفين أن هنا ما فيهاش أصنام، إحنا هنا مع ربنا ما فيش غيره، فقالوا: ده هو ده اللي بيدعو إلى ربنا ما ينفعش، قالوا لا نعمل قرعة تاني، فاستهموا فخرج سهم يونس، عملوا قرعة تالتة فاستهموا فخرج سهم يونس، وكأنه هو المراد عليه السلام.
ومن جملة الإسرائيليات التي رويت هنا برضه حاجة عجيبة جدًا، قالوا جم ياخذوه عشان يرموه من جنب السفينة، فلقوا حوتًا، شق على فكرة الحوت ده هو كائن مرعب، عشان كلمة حوت دي إحنا مش بنتخيلها. يكفي أن الحوت ده بلع سيدنا يونس حي، فأنتم فاهمين حجم الحوت ده عامل إزاي، كائن مرعب أنك تشوفه أصلًا. فأنت متخيل حوت جاي بيجري في البحر ناحية سفينتك، ادخلوا على يوتيوب كده وافتحوا فيديوز عشان تشوفوا حجم السفينة بتبقى قد إيه بالنسبة للحوت، ولا لعبة، كائن مرعب. جاي بيشق البحر ثم فغرفاه، راح فاتح بقه كده، بقه ده مش بق، بقه جنب السفينة كله ممكن يبقى بقه أصلًا. ففزعوا وقالوا خلاص مش هنرمي يونس من الناحية دي، راحوا واخدينه على الناحية التانية، فجاء الحوت إلى الجانب الآخر وفغرفه، فقال يونس: إنما جاء لي، خلاص فهم يونس الرسالة، ألقوني.
فأوحى الله عز وجل إلى هذا الحوت أنه لا يهشم له عظمًا ولا يجرح له جلدًا، ابلعه زي ما هو كده، فابتلعه الحوت. ثم نزل به في ظلمات البحر، فنادى في الظلمات، ظلمة بطن الحوت وظلمة البحر وظلمة الليل: ﴿لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ﴾ [الأنبياء: 87]. اعتراف لله عز وجل بالالوهية، وتنزيه لله عز وجل عن النقص: ﴿لَّا إِلَهَ إِلَّا أَنتَ﴾، ﴿سُبْحَانَكَ﴾. واعتراف بالنقص في حق النفس: ﴿إِنِّي كُنتُ مِنَ الظَّالِمِينَ﴾. فنزه الله عز وجل عن النقص وأثبت النقص لنفسه. بعض العلماء قالوا أن هذا الذكر أو هذا الدعاء من دعا به أجيب، وبعضهم قال أن الاسم الأعظم في هذا الدعاء. لكن إحنا ونحن ندعو الله أو نذكر الله عز وجل به لا بد أن نستحضر هذه المشاهد: ﴿لَّا إِلَهَ إِلَّا أَنتَ﴾ إثبات الألوهية، ﴿سُبْحَانَكَ﴾ تنزيه عن كل نقص، ثم اعتراف بالنقص للنفس ﴿إِنِّي كُنتُ مِنَ الظَّالِمِينَ﴾.
فأوحى الله عز وجل للحوت أن هو يروح يلفظ سيدنا يونس عليه السلام على الشط، وبعدين أنبت عليه شجرة من يقطين، اليقطين اللي هو القرع. أشمعنى اليقطين؟ بعض العلماء قال شوية مناسبات، قال أن الورق بتاعها كبير وناعم جدًا. يونس عليه السلام لما لفظ كان عامل زي الفرخ اللي لا ريشة له، والجلد في وسط حمضي، بطن الحوت مش بس مية، الوسط الحمضي ده له تأثير، هو أصلًا ممكن الإنسان يموت لوحده من الوسط الحمضي لولا عناية الله عز وجل، فكان الموت محيطًا به من كل جانب. فكان جسمه على حاله ما ينفعش، فشجرة اليقطين دي ورقها كبير وكثير فهتظلل عليه، وبعدين قالوا برضه أن ملمسها ناعم، فلو لمست جسمه لا يؤذى، وبعدين بتطرد الذباب، فكان من عناية الله عز وجل به أن أنبت هذا النوع بعينه من الشجر عليه.
وأرسله الله عز وجل إلى مائة ألف أو يزيدون، بل يزيد -زيد هنا أو استدراكية-. أنتم عارفين بل معناها إيه في اللغة؟ جاء أحمد بل عمرو، كده تعرف أن عمرو هو اللي جه. وجاءت «أو» استدراكية أيضًا في الحديث اللي هو أخونا قاله: «كن في الدنيا كأنك غريب أو عابر سبيل»، قالوا هنا «أو» بمعنى بل، مش على التخيير. يعني كن في الدنيا كأنك غريب بل عابر سبيل، وده من المعاني الجميلة: الغريب ممكن يقعد سنين في الغربة لكن نفسيته أن دي مش بلدي، فتلاقيه مش باقي على البلد اللي هو فيها. فالنبي عليه الصلاة والسلام يقول لك: كن في الدنيا كأنك غريب، ما تبقاش باقي قوي على الدنيا، بل لا مش غريب بل عابر سبيل، عابر السبيل اللي هو نازل ترانزيت، ما فيش حاجة قلبه متشرف خالص لحاجة هنا. ﴿كَمَا مَثَلُ الْحَيَاةِ الدُّنْيَا كَمَاءٍ أَنزَلْنَاهُ مِنَ السَّمَاءِ فَاخْتَلَطَ بِهِ نَبَاتُ الْأَرْضِ﴾، وده المثل اللي قاله صلى الله عليه وسلم في الدنيا إنما مثلها كراكب استظل تحت شجرة ثم راح وتركها، أهو ده عابر السبيل، واحد معدي حب يقيل لقى شجرة استظل تحتها خلص القيلولة بتاعته قام ومشي، هي دي الدنيا.
﴿وَأَرْسَلْنَاهُ إِلَىٰ مِائَةِ أَلْفٍ أَوْ يَزِيدُونَ﴾ [الصافات: 147] فآمنوا. وهنا يا جماعة فائدة من أعظم فوائد قصة يونس، وهي أن الهداية والغواية بيد الله عز وجل مش في إيد بشر خالص، ونفاها الله عز وجل عن نبيه صلى الله عليه وسلم: ﴿إِنَّكَ لَا تَهْدِي مَنْ أَحْبَبْتَ﴾. فالواجب علينا أننا نتبع ونصبر، ﴿وَاتَّبِعْ مَا يُوحَىٰ إِلَيْكَ وَاصْبِرْ حَتَّىٰ يَحْكُمَ اللَّهُ﴾ [يونس: 109]. اللي حصل أن يونس عليه السلام راح لقومه دعاهم ما آمنوا، فأنذرهم العذاب بعد ثلاث، ودي كانت عادة في بني إسرائيل، مش هتأمنوا طيب يخرج، يخرج بأمر من الله، ويأتيهم العذاب بعد ثلاث. خرج لكن ربنا ما كانش أذن في أنه يخرج، وهنا دي القضية، فسقط في أيديهم وألهمهم الله التوبة، فجأروا إلى الله وذكروا حكايات أنهم خرجوا وأخرجوا الدواب يجارون إلى الله عز وجل خايفين أن ينزل عليهم العذاب.
حصل حاجة عجيبة، العلماء قالوا: لا نعلم قرية آمنت كلها إلا قوم يونس، ما نعرفش أن في قرية بالكامل كده حتى الملك كل الناس آمنت، ما فيش واحد ما آمنش. يعني هم كانوا 100 ألف والزيادة كانت كام؟ اختلفوا فيها، قالوا 7 آلاف، 3 آلاف، 70 ألف، اختلفوا في الزيادة. فأيًا كان عددهم، فمثلاً هم لو 170 ألف، فالـ 170 ألف آمنوا ما فيش واحد فضل كافر، ودي حاجة عجيبة جدًا مش معروفة، ولذلك قال الله عز وجل: ﴿فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْنَاهُمْ إِلَىٰ حِينٍ﴾ [يونس: 98]. طب إيه الفائدة؟ إيه الفائدة اللي هنا؟
احنا قلنا ربنا ما سابناش نستنبط الفوائد، قصة يونس ربنا اللي نص على الفوائد، الآية اللي بعديها على طول في سورة يونس: ﴿وَلَوْ شَاءَ رَبُّكَ لَآمَنَ مَن فِي الْأَرْضِ كُلُّهُمْ جَمِيعًا أَفَأَنتَ تُكْرِهُ النَّاسَ حَتَّىٰ يَكُونُوا مُؤْمِنِينَ﴾ [يونس: 99].
اطمئن لقدر الله عز وجل، لأنه لو شاء ربك لآمن من في الأرض كلهم جميعا، طب الأسباب ولا سبب ولا بتاع أهو، ما فيش نبي وآمنوا، فأنت اطمئن لقدر الله عز وجل ولحكمته سبحانه وتعالى؛ ليه؟ لأنه آخر كلمة في السورة: ﴿خَيْرُ الْحَاكِمِينَ﴾ [يونس: 109].
ولو شاء ربك لآمن من في الأرض، من دي حد يعرفها؟ هي من صيغ العموم، يعني لو قلت: سأكرم من في المسجد، تفهموا من الجملة دي إني هكرم بعض الناس وبعض الناس لا، ولا واحد بعينه ولا كل اللي في المسجد؟ آه، يبقى من صيغ العموم؛ سأكرم من في المسجد أو من أتى المسجد أكرمته، دي من صيغ العموم. يعني إيه من صيغ العموم؟ يعني كان كفاية إن ربنا يقول: ولو شاء ربك لآمن في الأرض، كنا هنفهم على طول إن كل اللي في الأرض يؤمنوا لو ربنا أراد، لم يكتفِ الله عز وجل بذلك، شوفوا يا جماعة التأكيد: ﴿وَلَوْ شَاءَ رَبُّكَ لَآمَنَ مَن فِي الْأَرْضِ كُلُّهُمْ جَمِيعًا﴾، ماهي من صيغ العموم، وكل من صيغ العموم برضو.
خلاص؟ كلهم، بس كده؟ لا، جميعا، شوفوا يا جماعة كام تأكيد على هذا المعنى، ولو شاء ربك لآمن في الأرض كلهم جميعا، كلهم يعني الكل يؤمن، جميعا يعني في نفس واحد، لا يعجزه شيء سبحانه وتعالى، ﴿أَفَأَنتَ تُكْرِهُ النَّاسَ حَتَّىٰ يَكُونُوا مُؤْمِنِينَ﴾ [يونس: 99]، ﴿وَمَا كَانَ لِنَفْسٍ أَن تُؤْمِنَ إِلَّا بِإِذْنِ اللَّهِ﴾ [يونس: 100]. يبقى إحنا نطمئن لذلك، وندعُ ملك الله لله عز وجل، مين يؤمن، مين يكفر، مين يفسق، مين يفضل عاصي، مين يتوب، مش بتاعتنا يا جماعة، دي مهمة لنفسية الداعية.
إحنا عاوزين داعية نفسه متزنة، يعني إيه متزنة؟ لا هو ضاربها صرمة وتطنيش وهو أهم حاجة عنده كم لايك وكم شير وكم فولور، ولا هو من كتر ما هو شايل هم الأمة يقعد ويبقى باخع نفسه أسفًا، يعني قاتل نفسه من التأسف على قومه، فيقعده ذلك ويؤثر على نفسيته. لا عاوزين الصورة دي ولا الصورة دي، إحنا عاوزين صورة وسط، اللي هي إيه؟ واحد شايل الأمة فعلاً، إحنا مفتقدين لده خلوا بالكم، فكرة أنا بقول باخع نفسك دي مش حد يقول لك أنا أقعد إن شاء الله، لا هو مش كده، هو فعلاً المفروض يبقى كده. الداعية إلى الله عز وجل لازم يبقى جواه الشفقة على الناس والرحمة بهم، وإنه متضايق إزاي الناس ما بتصليش، إزاي النساء متبرجات، إزاي الرجال، ما هو الموضوع شاغله فعلاً، القضايا دي شغالاه. عارفين يا جماعة الدعاء؟ لو دي بقت جواه هنعمل إيه؟ هتلاقي نمط الدعوة تغير أصلاً.
هتلاقي نفسك الموضوع مش كاميرا بتتفتح، ما هو كل واحد فينا معاه كاميرا، هي مش كاميرا بتتفتح وبقول كلمتين ولقيت الناس مبسوطة بالكلمتين، لا إنت لو في هم جواك شايل هم الناس هتلاقي أول حاجة هتعمل أولويات؛ أكلم الناس في إيه؟ ما يبقاش الناس ما بتصليش، مضيعة الصلاة اللي هي أعظم أركان هذا الدين بعد التوحيد مثلاً، أنا دلوقتي مش بسفّه من حق لا، وتسيب إنت الصلاة خالص بقالك 10 سنين بتدعو إلى الله ما شفناش بتتكلم عن الصلاة مرة، لا إنت هنا الدنيا ملخبطة معاك، إنت مش فاهم إنت بتعمل إيه. واضح؟ نرجع تاني، فمن الفوائد الكبيرة إن الهداية والغواية بيد الله عز وجل مش بتاعة حد، وما نيأس وما نتضايقش إن نلاقي ده الضيق الشديد اللي يقعدنا.
خلاص، إحنا كده إيه الوقت قد إيه؟ والله فات ساعة، الوقت الحلو بيمر معاكم، طيب، المرة اللي فاتت كان ساعة ونص، كان التابلت المرة اللي فاتت ساعة بايظة فانا عمال ماشي وفرحان وأقول الوقت فيه بركة، وبعدين لقيت ساعة ونص والناس مؤدبة ما حدش قام، طبعا فخلاص نقف هنا، قول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك.
الشيخ أمجد سمير