دخولتسجيل الدخول

إني عبدك

أمجد سميرالشيخ أمجد سمير
  • مدة الدرس:
  • قراءة

مرض العصر هو الاكتئاب، وأسباب ده كتير إنه يكون يعني مرض هذا العصر وينتشر انتشاراً لم يعهد من قبل، ونسمع كتير عن ألفاظ زي: أنا مغموم، أنا مهموم، أنا حزين، هذه الألفاظ نسمعها كثيراً.

وفي أكثر من طريق للعلاج، علاج طبعا لو واحد بقى مريض يعني يتشخص فبيبقى فيه علاج دوائي، لكن احنا عندنا بقى في الدين علاج روحي، وفي علاج عقلي إن إنا نغير عقليتنا نفكر بشكل مختلف.

الحقيقة من أجمل أحاديث الكرب والتي تشمل الأمرين جميعاً؛ جزء وهو آخر الحديث بيتكلم عن هذا العلاج الروحي، وأوله الحديث وده الناس ما بتنتبهش ليه يتكلم عن فكرة إن إنا نفكر بطريقة مختلفة نغير طريقة نمط التفكير، وفي آخر الحديث ما يدل على ذلك.

قال صلى الله عليه وسلم والحديث في المسند من حديث ابن مسعود رضي الله عنه أن النبي صلى الله عليه وسلم قال: «ما أصاب عبداً قط هم ولا حزن فقال: اللهم إني عبدك وابن عبدك وابن أمتك، ناصيتي بيدك، ماض في حكمك، عدل في قضاؤك، أسألك بكل اسم هو لك سميت به نفسك، أو علمته أحداً من خلقك، أو استأثرت به في علم الغيب عندك، أن تجعل القرآن ربيع قلبي، ونور صدري، وذهاب همي وحزني، إلا أذهب الله همه وحزنه وأبدله بهما فرحاً».

فقالوا: يا رسول الله أفلا نتعلمهن؟ وهذا هو الشاهد، قال: «بلى، ينبغي على من يسمعهن أن يتعلمهن».

هنا النبي عليه الصلاة والسلام أمر بشيء زائد على الحفظ يعني ما قالش ينبغي أن يحفظن، لا، لابد أن نتعلم تلك الكلمات، والتعلم شيء زائد على مجرد الحفظ. عاوزين نفهم، نفهم هذا الحديث يا جماعة، وهو حديث مبارك واحنا على غير عاد يعني طبعا أنا لم أجد من شرح هذا الحديث شرحاً وافياً، فبني نسأل الله عز وجل بقى السداد إن إنا نحاول نعمل حاجة يعني قريبة من ده، ما نقدرش نقول طبعا هنوفي الحديث حقه يعني.

فيَبقى أول مسألة إن إنا لابد أن نتعلم هذا الحديث، ولما نقول هذه الكلمات هل مجرد إن إنا ما نقول هذه الكلمات يذهب الهم ويذهب الغم ويذهب الحزن وياتي الفرح بمجرد ما نقول هذه الكلمات، ولا لابد أن نحرز معاني تلك الكلمات وأن تعمل تلك المعاني في قلوبنا عملها؟ الظاهر إن ده لازم ينبغي على من يسمعهن أن يتعلمهن.

فأول ذلك أن النبي صلى الله عليه وسلم قال معلما إيانا أن نقول: اللهم إني عبدك وابن عبدك وابن أمتك.

طبعا لفظ العبد يطلق إطلاقان، قبل ما قبل ما نبتدي الحديث احنا عندنا ثلاث ألفاظ جم في الحديث يا جماعة؛ الحزن، والغم، والهم. إيه الفرق بين الثلاثة؟ قالوا: إن الحزن يكون على شيء فات، تقول أنا حزين مثلا إني إيه إني سقطت في المادة الفلانية ماشي. الغم يكون على شيء حاضر حاصل دلوقتي، والهم يكون على شيء مستقبلي، وده إنا بنستخدمه كتير يقول لك إنا يعني إيه مهموم إنه هيحصل كذا وكذا مثلا ماشي فده الفرق، فيَبقى ده الحزن وده الغم وده الهم، وده مهم عشان واحنا بنتكلم إن شاء الله نشوف إزاي الحديث ده هريحنا في الثلاثة دول.

العبودية: اللهم إني عبدك ابن عبدك وابن أمتك. العبودية لها إطلاقان والاطلاقان موجودين في القرآن؛ إطلاق عام وإطلاق خاص.

إطلاق عام وإطلاق خاص ركزوا عشان هذا الحديث فعلا لو أحرزناه لو تعلمناه ذهب عنا الحزن والغم والهم. فعندنا إطلاق عام، يعني إيه إطلاق عام؟ يعني كل الناس عباد الله مش كده وعبيد الله سبحانه وتعالى؛ مؤمن، فاسق، مسلم، كافر، ملحد، كلنا عبيد لله عز وجل، ده اسمه إطلاق عام للفظ العبد خلاص. ومعنى إن كلنا عبيد لله إن إنا لم نخرج عن سلطانه ولا عن تدبيره ولا عن قهره وهو القاهر فوق عباده. عباده بقى اللي هم مين يعني المؤمنين ولا هنا لفظ العبد يشمل كل الناس؟ كل الناس مش كده، اه قال وفي سورة مريم قال إيه: ﴿إِن كُلُّ مَن فِي السَّمَاوَاتِ وَالأَرْضِ إِلا آتِي الرَّحْمَنِ عَبْدًا﴾ [مريم: 93]. فيَبقى كل من في السماوات والأرض آتي الرحمن عبده سبحانه وتعالى، يبقى ده إطلاق عام.

وعندنا إطلاق خاص للعبد، وهو العبد حقاً، العبد يعني المطيع لسيده الممتثل لأوامره، فده إطلاق خاص، زي ايه كده؟ ﴿إِنَّ عِبَادِي لَيْسَ لَكَ عَلَيْهِمْ سُلْطَانٌ﴾ [الحجر: 42]، يبقى عباد الله الذين ليس للشيطان عليهم سلطان عباده المطيعون الممتثلون، فده إطلاق خاص للفظ العبد، فهمنا دي كده؟ يلا نرجع للحديث تاني، أول الجملة: اللهم إني عبدك وابن عبدك وابن أمتك، لو قلنا إن هو الإطلاق العام.

لو قلنا إن هو الإطلاق العام، نحرز إيه في هذه الكلمات؟ أول أول شيء لابد أن نحرزه وأن نشهده في تلك الكلمات هو معنى أنك عبد الله له سبحانه وتعالى. لو قلنا إنك عبد للعبودية العامة (يعني زيك زي أي عبد، زيك زي أي حد يعني) ففيه معنى أنك تأصل في تلك العبودية ومتجذر فيها، فأنا عبد وابن عبد وابن أمة، وهكذا إلى آدم عليه السلام.

طيب فده معناه إيه؟ معناه أن يفعل بك ما يشاء سبحانه وتعالى لأنك عبده، فيفعل بك ما يشاء. يبقى دي أول معنى، أول معنى أنك طالما عبد له سبحانه وتعالى خلاص فأنت تراعي أدب العبودية؛ العبد سيده يفعل به ما يشاء، روح هنا، حاضر، تعال هنا، حاضر، ولله المثل الأعلى، وله تصرفات ممكن لا يجوز مثلها للبشر، إنما هو بقى يبتليك، حاضر، يأخذ صفيك وخليلك من أهل الدنيا، حاضر، ليه؟ أنا عبدك، أنا عبدك، فأفعل بي ما تشاء اللهم إني عبدك.

ومش بس كده وابن عبدك وابن أمتك (يعني إنا تأصل في العبودية مش اتخذت أسير فبقيت عبد، لا لا خالص) إنا في تلك العبودية تأصل ومتجذر فيها، وكانك لا تصلح إلا ما تعرفش تبقى حاجة تانية أصلاً. أنتم عارفين لما يجي واحد يبقى اتولد لأبوه فلاح وجده كان فلاح وأبو جده كان عندهم أرض يعني بيزرعوا، فتولد في الغيط وكبر في الغيط بيزرع ويفلح ويعمل الحاجات دي، هو لا يتصور أن يكون إلا هذا (يعني هو مش متصور ما ينفعش أبقى غير كده يعني)، ليه؟ أنا فلاح ابن فلاح، جدي فلاح، أبو جدي فلاح، وهكذا، هو لا يتصور أن ممكن ينفك عن هذه المهنة. أهو ده بالضبط: اللهم إني عبدك وابن عبدك وابن أمتك، وقالوا هنا ابن عبدك وابن أمتك يعني من الاب إلى آدم عليه السلام، فأنا تأصل في العبودية، ما أعرفش أبقى غير كده، لا أصلح إلا لهذا، فلتفعل بي ما تشاء يا رب.

وبعدين: اللهم إني عبدك وابن عبدك وابن أمتك على أول معنى اللي هو المعنى العام، فيه إشارة إلى أن إذا كنت أنا عبدك فكل الناس عبادك، يعني أنا مانيش بدع من الناس، إنا عبد والكل عبد لك، فترى كل عباده سبحانه وتعالى مقهورين له، مربوبين له، لا يخرجون عن قضائه ولا عن قدره.

يبقى لما تقول كده اللهم إني عبدك وابن عبدك وابن أمتك، تاني مشهد هتشوفه (احنا أول مشهد هتشوفه أنك عبد تأصل في العبودية، فليفعل بك ما يشاء، هو مولاك وسيدك، أنت مالكش أصلاً حق الاعتراض أصلاً، ليه؟ عبد، مالكش أنك تعترض). المعنى اللي تشهده ولسه في معنى العبودية العام، أن تلحظ أنك إن كنت عبداً له فالكل عباد له، لأنك ما أنتش بدع من الناس، ولسه قايلين الآيات بقى مش كده، وهو القاهر فوق عباده، كل الناس عباده، يبقى معنى كده أن كل الناس أيضاً غير خارجين عن سلطانه ولا عن قهره ولا عن تدبيره ولا عن ملكه إلى آخره.

طيب دي تفيدك إيه؟ أنك لما حد يكيد لك، حد يأذيك، حد يظلمك، فتشهد في هذا فعل الله، ليه؟ ما هو أنا عبد وهو عبد، ولن يكون في ملكه إلا ما أراد سبحانه، فهو غير خارج عن تقديره. فلما ينالك أذى من حد، أنتم عارفين يا جماعة اهل الإيمان الناس المتدينة ممكن قوي يلحظوا المعنى ده إذا لم يجري المكروه على يد البشر (يعني واحد يصاب بمرض خبيث، ده سهل على أهل الديانة أن هم يلحظوا فيه فعل ربي عز وجل، ويشوفوا أن ده ابتلاء من ربنا ويشوفوا أن كذا). أول ما الموضوع يجري على يد بشر، شر، تلاقي المعنى ده صعب جداً استحضاره، هو دايما مركز في إيه؟ في ظلم هذا الإنسان له. كم في الناس إذا وقع عليه شيء من مكروه، شيء لا يحبه على يد بشر، لم يلحظ البشر أصلاً مش شايف مش شايف البني آدم، هو شايف إيه؟ هو شايف فعل ربي عز وجل، ليه؟ أصل ده عبد، يعني إيه عبد؟ يعني هو واقع تحت قهر الرب سبحانه وتعالى، وهو القاهر فوق عباده. وقلت لكم آيتين بحبهم جداً في هذا الموطن، مين يقولهم بقى؟ المفروض أنتم متدربين على الكلام ده ها، آيتين يخلصوا القصة دي كلها، قال سبحانه وتعالى: ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112]، والآية الثانية: ﴿وَلَوْ شَاءَ اللَّهُ لَسَلَّطَهُمْ عَلَيْكُمْ﴾ [النساء: 90].

حد فاهم حاجة؟ آيتين هيطمنوك على الآخر، وهيخلوا أي كرب، أي حزن، أي هم لشيء أصابك أو تتوقع إنه يصيبك (ما احنا قلنا بقى الفرق بين الحزن والغم والهم، يا أما شيء أصابك على يد مخلوق، أو شيء خايف يصيبك على يد مخلوق)، حط الآيتين دول قدامك: ولو شاء ربك ما فعلوه، ولو شاء الله لسلطهم عليكم، فيهنتفي تماماً من قلبك رؤية المخلوق تماماً، ولا هتشوفه، شبح هوا. أمَالَ مين اللي عمل فيك ده؟ هو سبحانه وتعالى، هو أجراه على يد مخلوق، لكن هو سبحانه وتعالى من أوصل إليك هذا.

يبقى ده تاني معنى نشهد فيه اللهم إني عبدك وابن عبدك وابن أمتك، أن الكل عباد له، أن الكل مقهورون له، أن الكل مربوبون له، أن الكل لا يخرجون عن قضائه ولا عن قدره سبحانه وتعالى، فينتفي في قلبك رؤية البشر.

ده تاني معنى، يبقى دول مشهدين يا جماعة في إني عبدك ابن عبدك وابن أمتك، أنك عبد له العبودية العامة وأن الكل عبيد له، دول مشهدين.

طب نرجع تاني اللهم إني عبدك وابن عبدك وابن أمتك، لو خدنا هذا اللفظ على معنى العبودية الخاصة، فكانك تتوسل إلى الله عز وجل بامتثالك أمره واجتنابك نهيه ووقوفك عند حدوده: اللهم إني عبدك، أنا يا رب عبدك، أنا من يمتثل أمرك ويجتنب نهيك ويقف عند حدودك ففرج عني ما أنا فيه. كانك تتوسل إلى الله عز وجل بأعمالك الصالحة وبتركك المنكرات. وابن عبدك وابن أمتك، وتخيلوا بقى المشهد ده أنك عبد سبحانه وتعالى وهو من هو سبحانه وتعالى بصفاته الجميلة، فيسئك؟ لا طبعا، لا يسئك أبدا، فكانك تتوسل إليه بهذا، تتوسل إليه بهذا. طيب هو ليه من الأول بقى عمل كده؟ طيب طالما لا يسئك ليه يصيبك الهم والحزن والغم؟ ليه؟ ببلاوينا، مش كده؟ صحيح عباد له، لكن مين العبد يعني الكامل 100%؟ ما فيش، فبمعاصينا وذنوبنا يسلط علينا منغصات، منغصات علشان نفوق ونرجع، طبعا لو حد غيرنا كان ممكن يبقى في حاجات تانية، زي مثلا رفعة في الدرجات، بس ده مش احنا، بذنوبنا.

المعنى الثاني اللهم إني عبدك وابن عبدك وابن أمتك، فأنت عبده وهو من هو بصفاته الجميلة سبحانه وتعالى، فهو لا يسئك ولا يسلمك ولا يخذلك سبحانه وتعالى، وإن فعل فعل شيئاً من ذلك فبذنوبنا.

يفعل ذلك سبحانه وتعالى، وهذا اللفظ فيه الطمأنينة والراحة. أنت عبده، سبحانه وتعالى، فهو لا يضيعك. وخذ المثل ده على الدنيا: واحد ملك من الملوك، وصفاته جميلة مع العبيد بتوعه، هيسلم عبيده دول لغيرهم، لأعدائهم؟ مستحيل، مستحيل. طب إن فعل الملك شيئاً من ذلك، العبد بتاعه يبقى عارف إن ده لحكمة معينة، بيعمل كده، إنما الأصل مش كده، مش كده، بيربيه، بيعلمه.

فتشهد هذا في قولك: اللهم إني عبدك وابن عبدك وابن أمتك، فيطمئن قلبك وينفرج همك. حقيقة يا جماعة، أنتوا، أنتوا لو استحضرنا المعاني اللي إحنا بنقولها دي، خلاص، ناصيتي بيدك؛ الناصية مقدم الرأس الحتة دي، ناصيتي بيدك، ناصيتك بيد من؟ بيد من هو أرحم منك، من أمك. أنتم عارفين كده؟ تخيلوا أم وماسكة إيد ابنها الصغير وماشي معاه، الأم دي متخيلين ممكن في لحظة تورده المهالك، يعني تاخده من إيديه كده تروح ترميه قدام عربية، أو تروح توقعه في حفرة؟ أو طول ما الأم ماسكة إيد الابن، الابن مطمئن تماماً، حتى لو عربيات وأتوبيسات ونقل، طول ما الأم ماسكة إيد الابن هو مطمئن، ليه؟ أمي فمش هتضيعني، مش هتاخدني من إيدي ترميني في التهلكة، مستحيل.

قال صلى الله عليه وسلم: «لله أرحم بعباده من هذه بولدها». فناصيتك بيد من هو أرحم بك من أمك، ناصيتي بيدك، تطمن ولا ما تطمنش؟ مهما كان أصابك، مهما كان حصل، مهما كنت فقدت، تطمن ولا لا؟ ما هي الأم دي يا جماعة اللي ماسكة ابنها دي هي ممكن تكون واخداه من إيديه موديه للدكتور، والدكتور هيدي له حقنة والحقنة هتوجعه، بس في الآخر مصلحته ولا لا؟ ولو ما أخدش الحقنة دي ممكن يموت، ممكن يصاب بمرض شديد، ممكن، ففي الآخر مصلحته، حتى وإن كان في نوع ألم شوية بس مصلحته. عمر ما الولد يظن أن الأم واخداه تأذيه، عمره ما يظن كده، ولله المثل الأعلى.

فحتى لو في شيء مؤلم شوية بيحصل لك، أنت ناصيتك بيده، اطمئن. ليه اطمئن؟ لأنه أرحم بك من أمك، فاطمئن. ولما تستشعر المعنى ده، معنى أن ناصيتك بيد الله عز وجل بجميل صفاته، تسلم لمقاديره وترضى بها أكثر من اقتراح عقلك. إحنا يا جماعة بنزعل ليه وبنشيل هم ليه وبنغتم ليه؟ لو قلنا حاجة يعني مظلة عامة لكل ده هو أن المقادير ما بتمشي وفق عقولنا، صح؟ يعني كنا عاوزين حاجة وما خدناهاش، كنا عاوزين حاجة ما تصيبناش وصابتنا، عقولنا بتقول كده، بتقول إن الحاجة دي ما عاوزينها، عقولنا بتقول الحاجة دي مش عاوزين تصيبنا ويحصل العكس، فيا نحزن، يا نغتم، يا نهتم.

أول ما تعرف أن ناصيتك بيد الله عز وجل، والله لو أعطيت هذه الكلمة حقها من التفكر لآثرت، آثرت المقادير على اقتراحات عقلك. الطفل الصغير ده اللي أم واخداه من إيديه وداخله بيه للدكتور، فدخل له الحقنة والحقنة وجعته ومش عارف إيه، وقعد بعد يومين بيعيط، لما يكبر ويعي هيشكر لامه صنيعها ولا هيفضل شايل لها أنها خدته للدكتور وادى له الحقنة؟ أول ما يعقل ويعي هيشكر لها الصنيع ده، مش كده؟ ولله المثل الأعلى، إحنا بس إحنا في غفلاتنا وفي سكراتنا فمش شايفين تدبير الله لنا سبحانه وتعالى.

فأول ما تقول: ناصيتي بيدك، يعني إيه؟ أنت مساق، الحتة دي اللي أصابك فيها كذا، جميل. ناصيتي بيدك، وطالما ناصيتك بيده فيبقى نواصي العباد فين؟ بيده. فأول ما تقول: ناصيتي بيدك، تقوم على طول تفهم أن نواصي العباد أيضاً بيده، فزي ما بيسوقك بيسوقهم سبحانه وتعالى. فنرجع لنفس المعنى، شوفوا يا جماعة الالحاح على نفس المعنى، نواصي العباد بيده سبحانه وتعالى، فلما جاء فلان ففعل بك ما فعل، هو ناصيته بيده سبحانه وتعالى. أو إنه خرج عن تدبيره؟ أو إنه خرج عن قهره وسلطانه؟ ممكن؟ مستحيل. ليه؟ ناصيته بيده، إيش معنى الناصية؟ قالوا إن فيها نوع ذل، إذلال، ونحن كلنا هذا الرجل، وكذلك فيها، فيها نوع تمكن، يعني لما واحد يمسكك من راسك كده يمشيك زي ما هو عايز.

وفي بقى معنى تاني، في معنى تاني، وبعني، أثبتوه، يعني أنتم عارفين المخ متقسم لفصوص، منها الفص الأمامي أو القشرة الأمامية، وقالوا إن القشرة دي مسؤولة عن عدة وظائف، منها الأفعال أصلاً، يعني الإرادات والأفعال في القشرة الأمامية دي، وعلشان كده ربنا في القرآن قال إيه: ﴿لَنَسْفَعًا بِالنَّاصِيَةِ * نَاصِيَةٍ كَاذِبَةٍ خَاطِئَةٍ﴾ [العليق: 15-16]. طبعا زمان المفسرون قالوا إن الناصية يعني ذكرت الناصية والمراد صاحب الناصية، خلاص، هو ده المعنى اللي اللغة يعني تحتمله، الطب أثبت اللي إحنا بنقوله، فالله أعلم يعني، لكن على كل حال ناصيتي بيدك، يعني إراداتي وتحركاتي وسكناتي وكل ده في إيدك يا رب، وده معنى صحيح، يعني ده معنى صحيح. وكذلك البشر كلنا، ناصيتي بيدك.

وهذا المعنى موجود بقى في القرآن، قال سبحانه وتعالى: ﴿مَا مِنْ دَابَّةٍ إِلَّا هُوَ آخِذٌ بِنَاصِيَتِهَا﴾ [هود: 56]. أول آية بقى ها؟ «إني توكلت على الله ربي وربكم» أحسنت، ﴿إِنِّي تَوَكَّلْتُ عَلَى اللَّهِ رَبِّي وَرَبِّكُمْ مَا مِنْ دَابَّةٍ إِلَّا هُوَ آخِذٌ بِنَاصِيَتِهَا إِنَّ رَبِّي عَلَى صِرَاطٍ مُسْتَقِيمٍ﴾ [هود: 56].

إني توكلت على الله ربي وربكم، معتمد عليه، ليه؟ أصله ما من دابة إلا هو آخذ بناصيتها، تروح تعتمد على غيره ليه؟ تتوكل على غيره ليه؟ يا ابني اللي أنت رايح قلبك معتمد عليه ده ولا متوكل عليه ناصيته بيد الله عز وجل، ﴿مَا مِنْ دَابَّةٍ إِلَّا هُوَ آخِذٌ بِنَاصِيَتِهَا﴾، فهو وحده الذي يستحق أن يتوكل عليه سبحانه وتعالى. خايف من غيره ليه؟ ﴿مَا مِنْ دَابَّةٍ إِلَّا هُوَ آخِذٌ بِنَاصِيَتِهَا﴾، خايف ليه من البشر؟ شايل هم ليه من فلان الفلاني، ذيك ولا ليه؟ ﴿مَا مِنْ دَابَّةٍ إِلَّا هُوَ آخِذٌ بِنَاصِيَتِهَا﴾، فالنتيجة: إني توكلت على الله ربي وربكم.

ناصيتي بيدك، ماضٍ في حكمك، عدل في قضاؤك. ماضٍ في حكمك القدري، فمهما احتلت على حكم الله عز وجل القدري هتغلبه؟ مش هيحصل. من هنا لبكره بقى احتال على الحكم القدري إنه ما يصيبكش، هيصيبك، أقول لك أكتر من كده: حيلتك هتكون في إنفاذ حكمه القدري. يعني أنت بقى فاكر نفسك حادق وبتهرب وأنت إيه؟ ﴿قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ﴾ إيه؟ جاي وراكم، ﴿فَإِنَّهُ مُلَاقِيكُمْ﴾ [الجمعة: 8] أنت رايح له.

عارفين قصة سليمان عليه السلام وكان ملك الموت بيجي له يقعد معاه ويزوره يعني فكان بيقول على هيئة بشر وبعدين دخل مرة فلقى واحد قاعد مع سليمان وطبعا اللي قاعد مع سليمان ما عرفش مين ده جاي في صورة بشر عادي ففضل يحدق فيه ملك الموت عمال يبرق له وده ما يعرفش مين ده وبعدين مشي ملك الموت فالراجل بيسال سليمان مين ده؟ قال له ده ملك الموت، قال له يا ويل، قال له في إيه؟ قال له في أنت شفت كان بيسب لي إزاي؟ قال له أسألك بالله أن تأمر الريح أن تحملني إلى بلدي كذا وكذا، أبعد بلد. فسليمان أمر الريح أن تحمله ومرت الأيام وجاء ملك الموت مرة ثانية لسليمان عليه السلام فسليمان بيسأله أنت كنت عمال تبرق للراجل ده ليه؟ قال له: أمرت أن أقبض روحه بعد لحظات في بلدي كذا اللي هو راحها ثم وجدته عندك. هيروح هناك إزاي ده وهيلحق يروح؟ روح، أنا نازل أصلاً في مهمة رسمية بعد لحظات، خلاص، يعني عدد أنفاسه هتنتهي في الحتة الفلانية فهو أشكل عليه يعني هروح ألاقيه إزاي؟ ثم قلت: ما من أمر الله بد، ما فيش مفر، قال: فذهبت فوجدته فقبضت روحه، ﴿قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ﴾ [الجمعة: 8].

فأنت احتيالك ده يكون في إنفاذ القدر، مش بتهرب من القدر. ماضٍ في حكمك، فلما تعرف أن ما أصابك هو حكمه سبحانه وتعالى ترضى ولا ما ترضاش؟ وتطمن ولا ما تطمنش؟ أصل يا جماعة ماضٍ فيها حكم جديد فيها يعني معنى تاني عاوزين ناخد بالنا منه، وكان المعنى: ماضٍ في حكمك، لا حكم غيرك، يعني الذي يمضي فيا يا رب هو حكمك مش حكم حد تاني، فاهمين دي؟

طيب لو إحنا شايفين في رأي العين أن هو حكم حد تاني؟ على طول: ﴿وَلَوْ شَاءَ رَبُّكَ مَا فَعَلُوهُ﴾ [الأنعام: 112] ما كانوش حكموا. فالقاضي يقعد وبقى كان مرتشي، ولا كان مسيس، ولا كان أي حاجة، فيطلق، يطلق أحكاماً نراها نحن جائرة، نراها جائرة، هذا حكم من؟ هذا حكم الله عز وجل ما هواش حكم القاضي، ﴿وَلَوْ شَاءَ رَبُّكَ مَا فَعَلُوهُ﴾ هذا حكم الله عز وجل. اه، هو الحكم بالنسبة للقاضي هو حكم جائر والقاضي هيحاسب عليه يوم القيامة، دي قضية تانية مش قضيتي دلوقتي، أنا بقول لك أنت إزاي تتعامل مع الموقف، إزاي ترى الموقف، القاضي حسابه على الله عز وجل يحاسبه، إنما من أنطقه بذلك الحكم؟ الله سبحانه وتعالى، فترى حكم القاضي على الحقيقة هو حكم الله فيك، أو هو حكم الله في فلان. خلي بالك، ده مش معناها أن فلان ده وحش أو أنت مش لازم، ممكن يبقى ده رفع في الدرجات، ممكن، ممكن يبقى ده بيشيل سيئات، هذا الحكم في الآخر حكم القاضي ده الذي نطق به القاضي حكم الله عز وجل، حكم الله. أنت تراه هكذا يعني القاضي ده يعني مليش دعوة بالقاضي، القاضي ده حسابه على الله عز وجل لو ظلم ولا جار ولا كذا يحاسب، لكن ببساطة: ﴿وَلَوْ شَاءَ رَبُّكَ مَا فَعَلُوهُ﴾.

ماضٍ في حكمك، لا حكم غيرك، ولو أراد غيرك ما أراد لن يكون عندك هم بقى، إحنا بنقول إيه؟ ده بيشيل الهم، هم، خايف من بكره، خايف من مديرك، خايف من ذي سلطان، خايف من ذي بطش، ذي جبروت، ظالم، ماضٍ في حكمك، لا حكم غيرك. واعلم أن الأمة لو اجتمعت على أن ينفعوك بشيء لن ينفعوك إلا بشيء قد كتبه الله لك، والعكس: لو اجتمعت على أن يضروك بشيء لن يضروك إلا بشيء قد كتبه الله عليك، رفعت الأقلام وجفت الصحف. ماضٍ في حكمك، لا حكم غيرك، هم إيه اللي يفضل جواك بقى؟ هم إيه اللي يفضل جواك خوف من بكره؟ إيه اللي يفضل جواك خوف من فلان ده؟ اللي يفضل جواك: ماضٍ في حكمك أنت يا رب، ماضٍ في حكمك.

عدل في قضاؤك، وإن كان هذا القضاء في دنيا الناس نراه ظلماً وجوراً، زي مسألة مثلاً القاضي اللي قلناها من شوية تلاقي الناس مسحولة في إيه؟ مسحولة في ظلم القاضي وجور القاضي، سبحان الملك، أين الله؟ يعني يا شيخ أنت إيه؟ أنت قاضي يعني نسيبه؟ ما بقولكش سيب القاضي لو أنت تراه ظالماً جائراً، إيه الموقف الشرعي منه؟ لو في إيديك حاجة اعملها، ما فيش ادعي على الظالم، ما عنديش مشكلة، ده كله دي قضية مفروغ منها، لكن ترى ذلك فعل الله. هو يا جماعة هو إحنا بندرس عقيدة عشان ننجح نعمل امتحان وننجح في آخر الدورة؟ إحنا مش إحنا بندرس عقيدة بنقول إيه: ما شاء الله كان وما لم يشأ لم يكن؟ طيب اللي كان ده شاءه الله وأراده ولا لا؟ شاءه وأراده وإلا ما كانش زمانه حصل، يبقى هذا الفعل فعل الرب وهذا الحكم حكم الرب وهذا القضاء قضاء الرب سبحانه وتعالى.

ماضٍ في حكمك، عدل في قضاؤك، يبقى إذن بالنسبة هذا الحكم للقاضي أو لغير القاضي، يعني إحنا أخدنا عشان قاضي مثال فمكمل معانا، ماضٍ في حكمك، عدل في قضاؤك. فإذا نسبت القضاء لغيره سبحانه وتعالى اه، ترى بقى الظلم وترى الجور وترى كذا وترى كذا، لكن بانتفاء المخلوق من نظرك بفناء هذا المخلوق من نظرك أنت مش شايفه أصلاً ترى القضاء أعدل القضاء، خلاص، ليه؟ لأنه قضاؤه سبحانه وتعالى. ماضٍ في حكمك، عدل في قضاؤك، ماضٍ في حكمك الحكم القدري، وبعض العلماء قال أن ممكن ماضٍ في حكمك هنا هو الحكم الشرعي، ماضٍ في حكمك، يعني كأنك يا رب مهما تأمر هيحصل، يبقى ماضٍ في حكمك، وكأنك أيضاً قبل أن تسأل الله عز وجل تتوسل إليه بامتثالك الأوامر. ماضٍ في حكمك، يعني مهما تأمر يا رب حكمك ماضٍ سيحصل، ده الحكم إيه؟ الشرعي، يعني افعل ولا تفعل، فإذا قلت: افعل فعلت يا رب، وإذا قلت: لا تفعل لن أفعله يا رب. ماضٍ في حكمك، أمرني وأنا هنفذ. وكأن كل ذلك توطئة لأن تسأل الله عز وجل شيئاً، عمال تتوسل لله عز وجل بعبوديتك العامة وعبوديتك الخاصة وكون ناصيتك بيده تتودد إليه بذلك وتطمئن نفسك. يا جماعة، حصلوا هذه المعاني، يعني الناس دايما تيجي إيه شايفه الحل في آخر الحديث؟ لا، هو الحديث كله ينبغي على من سمع تلك الكلمات أو ينبغي على من يسمعهن أن يتعلمهن، نحفظ هذه الألفاظ، هذه الكلمات، هذه الأدعية، ونفهمها، نعيها، نعيش بيها، لا هتلاقي لا حزن ولا غم ولا هم بإذن الله عز وجل.

ماضٍ في حكمك، عدل في قضاؤك، أسألك بكل اسم هو لك سميت به نفسك، أو أنزلته في كتابك، أو علمته أحداً من خلقك، أو استأثرت به في علم الغيب عندك. هنا توسل بأسمائها الله عز وجل، يبقى كأنك توسلت له سبحانه وتعالى أولاً بعبوديتك وبنفاذ حكمه الشرعي أني هنفذ يا رب أي حاجة، ثم توسلت باسمائه وصفاته: أسألك بكل اسم هو لك إلى آخر الدعاء أن تجعل القرآن ربيع قلبي ونور صدري. قالوا ربيع قلبي، الربيع يعني المقصود به هنا المطر؛ لأن في الربيع تنزل الأمطار وتزدهر يعني الحدائق وهكذا. أن تجعل القرآن ربيع

قلب قلبي ونور صدري، إيه ده؟ احنا فجأة كده لقينا في قرآن! يبقى عندنا حل تاني اهو لذهاب الهم والغم، هو يا جماعة أن تجعل القرآن ربيع قلبي ونور صدري والمصحف على الرف والآب في التليفون ما بيتفتحش! يعني هو كده هيبقى؟ يعني ولا أن تجعل القرآن ربيع قلبي ونور صدري؟ يعني فيه تفاعل مع هذا القرآن، في تفاعل مع القرآن يبقى وأنت بتقرا هذه الكلمات وعارف هذه الكلمات لعلاج الهم والغم والحزن.

يبقى في قرآن في حياتك، أن تجعل القرآن ربيع قلبي ونور صدري، فيبقى لك ورد قراءة، وورد مراجعة، وورد تدبر، وورد عمل، وورد حفظ. وهنا في المثال المائي والمثال مثال النور ومثال الماء، أو زي ما بيسموهم القيم مثال النار والمائي زي كده في سورة البقرة، مش كده؟ ﴿مَثَلُهُمْ كَمَثَلِ الَّذِي اسْتَوْقَدَ نَارًا﴾ [البقرة: 17] ده المثال الناري، وبعدين ها، ﴿أَوْ كَصَيِّبٍ مِّنَ السَّمَاءِ﴾ [البقرة: 19] ده المثال المائي. سورة النور ﴿اللَّهُ نُورُ السَّمَاوَاتِ وَالْأَرْضِ﴾ [النور: 35] المثال النوري اهو، وبعديها، لا مش بعديها، ألم تر أن الله يزجي سحابا، بعديها بايات! فده المثال المائي، فدي يعني مش عاوز أدخل بقى في المثال الناري والمائي بس اللي عاوز يقرا فيها ابن القيم له كلام في تلك الأمثلة.

فالقرآن به حياة القلب، ربيع القلب ونور الصدر. ومسألة مسألة النور دي يا جماعة احنا ادينا عليها مثال قبل كده مهم جدا فنقوله دلوقتي، مهم الحقيقة يا جماعة ويا شباب نور الله عز وجل إذا جاء فلينطفئ كل نور، ما تشغلش مع نور ربنا نور عقل ونور فطرة اقفل كل الأنوار ساعتها. ضربنا مثال اللي كان بيحضر معانا زمان يعني قلنا إيه؟ قلنا حضرتك قاعد في البيت النور قطع، تقوم عامل إيه؟ الموبايل في إيديك أول حاجة تروح عامل إيه؟ مولع الكشاف بتاع الموبايل صح، وتمشي كده لغايه ما تروح تجيب لو أنت عندك يعني لمبة طوارئ ولا البتاع ده كشاف وكده تولع الكشاف، أول ما هتولع الكشاف هتعمل إيه في الموبايل؟ هتطفيه صح كده، ولعت الكشاف هتطفي الموبايل، نور الموبايل هتطفيه على طول فضل الكشاف مولع لغايه ما الكهرباء جت، أول ما الكهرباء تيجي هتعمل إيه في الكشاف؟ هتطفيه، الكهرباء جت، نمت، صحيت فالشمس طلعت فأول ما الشمس طلعت وفتحت الشبابيك هتعمل إيه في النور بتاع البيت؟ هتطفيه. وكان كل نور أقوى بيجي بيلغي عمل النور الأضعف.

ما فيش معنى أبدا إنك مع الكشاف تبقى مولع كشاف الموبايل ملوش معنى، ولا في معنى إن النور لما يجي تفضل مولع الكشاف، ولا في معنى إن نور الشمس طالع ومولع نور البيت، ملوش معنى، سفه! وكان كل ما يجي نور أقوى ما ينفعش نعتمد على النور الأضعف، ما ينفعش يعني يا جماعة بالضبط كأن الشمس طالعة رحت أنا قافل كل الشبابيك ومولع إيه كشاف الموبايل وماشي إيه بكشاف الموبايل، طب يعني ده هيسعفني في الرؤية زي نور الشمس؟ مستحيل! ماشي بالعربية حضرتك في الشمس هتلاقيك مولع العالي خالص، أول ما تدخل نفق ضلمه تقيد إيه؟ لأن ما فيش نور شمس، تولع كشافاتك، أول ما تطلع بالنفق تطفي الكشافات، مش كده؟ ولله المثل الأعلى، نور الله عز وجل إذا جاء ما تشغليش بقى نور عقلك ولا تشغل لي نور فطرتك ولا نور إحساسك، نور الله غالب، خلاص اطفي كل الأنوار.

هديكم مثال عشان تفهموا اللي أنا بقوله ده: المسيح الدجال يأتي في آخر الزمان ومعه جنة ونار، جنته نار وناره جنة، عارفين الحديث مش كده؟ فالنبي عليه الصلاة والسلام ده نور الشرع اهو، نور الشرع بيقول لك إيه؟ بيقول لك لو حضرت الموقف روح ناحية النار، وغمض عينيك واطقطق راسك واشرب. طب شغل أي نور تاني كده، شغل بقى نور عقل، نور فطرة، نور إحساس، هتعمل إيه؟ هترروح فين؟ ناحية الذي تراه الجنة مش كده؟ لو شغلت ده هتضيع هتضيع! نور الشرع بيقول لك إيه؟ اللي المفروض نرى به، لأن خلاص أول ما يجي نور الشرع اطفي اطفي، نور الشرع بيقول لك إيه؟ روح ناحية اللي أنت شايفه نار واطرق راسك واشرب ده جنة، ده نور الشرع.

الفرات هينحسر عن جبل من ذهب، والناس هتقتتل عليه، وبعض العلماء قال يظهر أن ده كان في وقت شدة حاجة وفاقة وكده ماشي فنور العقل يقول لك إيه؟ الناس هتهطل عليه، ومن كل مئة وتسعة وتسعين هيموت واحد هينجو، ماشي هنا الناس هتتكالب عليه وكأني وقتها نور العقول بتقول كده على فكرة ده ممكن يحصل، يعني يعني ممكن عقلك يقول لك مع أن النسبة واحد في المية نجاة لكن مع شدة الفاقة وشدة الحاجة وشدة ممكن يحصل، إنما الشرع هنا بيقول لك نور الشرع، النبي عليه الصلاة والسلام يقول لك إيه؟ إن اللي يحضر الموقف ده ما يروحش، ما يروحش.

طيب الفتنة، ناس بتقتل في ناس، طيب اعمل؟ النبي عليه الصلاة والسلام يسأل الصحابي: تعمل إيه؟ يقول لك يعني لو دخل أو جالي هقتله. قال: «تكون قد شاركت إذاً». وده نور الفطرة، يعني إيه فطرتي؟ أن أدفع عن نفسي. إنما في زمان الفتن الشرع نور الشرع يقول لك حاجة تاني خالص، آه طب اعمل إيه؟ لا، اكسر سيفك، ولما يدخل عليك سيبه يقتلك، ولو خفت أن يبهرك شعاع السيف القي ثوبك على وجهك، اقفل عينيك، غمض عينيك لغايه ما تتقتل، الشرع بيقول كده، ده نور الشرع ده في زمان الفتن عشان بس ما حدش ياخد القضية دي مش دلوقتي مش حرامي دخل عليك تروح دافع؟ قصة تانية يعني. بس المهم ده نور الشرع، نور الفطرة هنا يقول غير كده، أن تدفع عن نفسك عن حياتك.

فالقران نور، نور احنا اتكلمنا بقى أسهبنا في قصة النور دي في سورة النور في آية النور، فممكن ترجعوا للدرس بتاع ﴿اللَّهُ نُورُ السَّمَاوَاتِ وَالْأَرْضِ﴾ [النور: 35]. أن تجعل القرآن ربيع قلبي ونور صدري وجلاء حزني وذهاب همي وغمي. فان فعلت إن أحرزت تلك الكلمات إن تعلمت تلك الكلمات ذهب عنك الحزن والغم والهم، وهذا مصداقا لقوله صلى الله عليه وسلم: «إلا أذهبه الله عنه الهم والغم وأبدله بهما فرجاً».

أقول قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك.