دخولتسجيل الدخول

الشكر

أمجد سميرالشيخ أمجد سمير
  • مدة الدرس:
  • قراءة

الشكر من أجل منازل هذا الدين. بعض الناس بيظن أن الشكر يعني هي مسألة ثانوية، يعني رفاهية، يعني تشكر تثاب، لم تشكر فالدنيا ماشية، وهو الموضوع مش كده يا جماعة. ذلك أن الله عز وجل رتب العذاب على ترك الشكر، قال سبحانه وتعالى: ﴿وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ﴾ [إبراهيم: 7]. ولذلك الانسان لابد أنه ينتبه لمسألة الشكر، شكر النعم أو خلينا نقول الشكر مطلقا عشان هنشوف احنا هنشكر على إيه لسه.

والله عز وجل ذكر آيتين في كتابه؛ واحدة على لسان إبليس، والثانية تصدق إبليس. قال إبليس: ﴿وَلَا تَجِدُ أَكْثَرَهُمْ شَاكِرِينَ﴾ [الأعراف: 17]. وقال الله عز وجل مصدقا لقول إبليس: ﴿وَقَلِيلٌ مِّنْ عِبَادِي الشَّكُورُ﴾ [سبأ: 13]. فتقول إيه ده؟ ده احنا كتير بيشكر ربنا، وربنا سبحانه وتعالى يحكم على الناس بالعكس: ﴿وَقَلِيلٌ مِّنْ عِبَادِي الشَّكُورُ﴾. يبقى لابد أن احنا ننظر في الشكر؛ إيه هو الشكر عشان نشوف احنا فعلا بنشكر ولا ما بنشكرش؟

طيب، علشان نخش في الموضوع على طول، الشكر يا شباب إنما ينتظم من علم وحال وعمل. ركزوا بقى في الكلام ده لأنه كلام خطير جدا؛ الشكر ينتظم من علم وحال وعمل؛ علم يقودك إلى الحال، وحال يقودك إلى العمل. وغالبا غالبا معلوماتنا عن الشكر هو الثلث بتاع العمل اللي احنا أصلا ممكن ما نتكلمش عنه النهارده أصلا. خلاص، يعني فكرة أن الشكر لو جبنا أي حد يقول يلا أديكم المايك كده وكلمنا على الشكر هيقول إيه؟ إن الشكر أركانه ثلاثة: اليد واللسان والقلب، اللي هو الكلام اللي حافظينه ده كلنا: أفادتكم النعماء مني ثلاثة: يدي ولساني والضمير المحجبا. ده الكلام اللي احنا عارفينه.

كل اللي احنا هنقعد نتكلم فيه ده، أو اللي الناس عارفااه عن الشكر ده هو ثلث، والثلث الأخير كمان في الشكر اللي هو العمل. بداية الشكر العلم؛ بداية الشكر، وهذا العلم هيقودك إلى حال، وهذا الحال ينبعث منه العمل. علم بأيه بقى بداية الشكر؟ علم بالنعمة من المنعم. يبقى احنا عاوزين نعرف كم حاجة كده؟ ها، كم حاجة؟ العلم؛ علم بالنعمة من المنعم، يبقى كم حاجة؟ حاجتين. حد يزود؟ هم ثلاث حاجات؛ أول حاجة أنك تشوف الحاجة دي اللي بعد كده هنسميها نعمة، أول حاجة أصلا أنك تشوفها، وبعد ما تشوفها تشوفها نعمة، وبعد ما تشوفها نعمة تشوفها أنها من المنعم جل وعلا. دول ثلاث حاجات ما ينفعش حاجة تسقط.

فأول حاجة بدايه العلم أن ترى أصلا النعمة؛ تراها، وبعدين أن تراها نعمة، وبعدين أن ترى المنعم فيها سبحانه وتعالى. طيب، لا عاوزين أمثلة عشان احنا كده مش مش واخدين بالنا من الموضوع يعني. يعني هل يا جماعة حد منكم عمره انتبه -انتبه بس، يعني مش بنقول إن هو شايفها نعمة لسه، هو بس انتبه- لمسألة الريق اللي في بقك ده مثلا؟ الريق ده -يعني واحد من العلماء في كتاب أسهب في فائدة هذا الريق- ولو حجب عنا الريق ده، إزاي عمليات حيوية كتير ستتوقف في أجسادنا؟ أولها الغذاء. أنت متخيل أن الريق ده واللعاب اللي هو بيسهل نزول اللقمة للمعدة، لو مش موجود، اللقيمة دي هتنزل أصلا؟ مش هتنزل أصلا، مش هتنزل.

فاحنا دلوقتي بنقول لك: أنت منتبه أصلا للريق أصلا، مش إنه نعمة لسه؟ فستلاقي ممكن ناس كتير مش منتبهه لده، مش منتبهه للريق. أعزكم الله، كنت عملت أنا فيديو عن مسألة الطهارة من الاستنجاء وكذا، وتكلمنا عن مسألة المادة الرطبة اللزجة التي تفرز حين في البراز، بس في عملية البراز، وأن هي إزاي بتسهل خروج الخارج. حد انتبه للمادة دي أصلا مش للبراز نفسه؟ عملية البراز، لا، للمادة اللزجة التي تسهل هذا. احنا لسه مش بنقول لك أنت شايفها نعمة، أنت منتبه لوجودها ها؟ يبقى أول حاجة أن ترى النعمة، أول شيء، وبعدين هنخاطبك بقى بعلم آخر، وهو أن تراها نعمة.

أن تراها نعمة، يعني إيه أن تراها نعمة؟ يعني مسألة النفس اللي أنت عمال تاخده ده؛ يعني واحنا قاعدين دلوقتي في الدقيقة الواحدة بتاخد كم نفس وتطلعه؟ كم شهيق وزفير عادي؟ أولا: أنت شايفه، وبعد ما شفته شايفه نعمة. فمعظم الناس مش شايفة النعمة دي أصلا، يعني مش شايفه أن هو أنت قاعد عادي كده بتاخد شهيق وزفير، أن نعمة، مش منتبه لكونه نعمة. طيب، احنا ليه مش منتبهين لكون النعمة؟ احنا هنقف على معنى واحد بيحول بيننا وبين رؤية النعم؛ معنى واحد، هو في عده معاني، بس هناخد أكبر معنى بيحول بين رؤيتنا ورؤية النعمة كنعمة، اللي هو إيه؟ الاشتراك في النعمة. الحاجة اللي الناس كلها بتشاركك فيها، أنت ما بتنتبهش، ممكن ما تنتبهش ليها أصلا ليها من بابها كده، وممكن تبقى منتبه ليها، لكن مش شايفها نعمة. ليه؟ ما اصل كل الناس بتشاركك فيها، يعني كل الناس عادي، واحنا قاعدين كلنا بناخد شهيق وزفير، فانت مش منتبه أنها نعمة.

عارف امتى منتبه أنها نعمة؟ لو رحت لمستشفى الصدر مثلا، وادخل كده، وشوف إزاي في وقت الجائحة مثلا، جائحة كورونا، مش لاقيين أنابيب أكسجين، فكانوا ممكن في بعض المستشفيات بيشوفوا مين أولى إنه يعيش ومين يموت. الدكاترة بيوصلوا لحالة أن مين يعيش ومين يموت، احنا بنختار دلوقتي مين اللي هنركب له أجهزة ومين هنسيبه يموت. اللي على فكرة اللي بقوله ده حصل وقت كورونا، يعني مش عارف الناس فاكرة ده ولا لا، وابتدوا نسيب الكبير هو اللي يعيش ولا لا نخلي الشاب والكبير يموت؟ أنتوا فاهمين دكاترة وصلوا لمرحلة إيه؟ النفس اللي أنت بتاخده ببساطة وأنت مش حاسس بيه ده، كان بيتدفع فيه فلوس، كان بيتشاف له وسايط، والوسايط وصلت لمرحلة أنها تكبر؛ لأن أنت لازم لك وزير علشان تلاقي مكان في مستشفى. احنا عشنا ده يا جماعة، احنا ما بنتكلمش عن حاجة ما عشناهاش. حينها هبتدي تنتبه: ده دي نعمة، اللي أنت ما كنتش شايفها أصلا، مش مش شايفها نعمة، ما كنتش منتبه لأن أنت قاعد تاخد شهيق وزفير، ابتديت تنتبه لأنها نعمة امتى؟ لما تلمحت فاقدها.

إنما لأننا شايفين كلنا عادي بناخد شهيق وزفير، الاشتراك في النعمة يحول بيننا وبين رؤية النعمة كنعمة. واقس على ذلك فكرة أن الشهيق والزفير ده، النوم؛ انتبهت عمرك للنوم، وبعدين انتبهت للنوم أنه نعمة؟ احنا ليه بنتكلم في ده؟ لأن النعمة كل نعمة لابد لها من شكر. يعني أنا عاوز أقول لك حاجة؛ عمرك كده تقول أنا أشكر ربنا بقى على نعمة، فرفعت إيديك: الحمد لله على نعمة الشهيق والزفير، الحمد لله على نعمة النوم. نعمة عجيبة النوم دي، يعني شوف كده اللي بيجي له أرق ويروح لدكاترة ويدفع فلوس ليه؟ عشان عاوز... مش عارف ينام. الجهاز العصبي بينهار بعد مدة، مش عارف ينام.

نعمة، بلاش، نعمة خروج الخارج. أنت لو جاي في طريق سفر ولا بتاع، ومش عارف إيه، وعاوز تدخل الحمام وما فيش حمام، بس يحبس فيك البول أو الغائط لمده وجيزة، بعد ما تبتدي تحس بالموضوع ده، حينها تستشعر أنت بسهولة كده بتخش عشان تعمل عملية الإخراج بسهولة. يا جماعة، دي نعمة عجيبة، نعمة عظيمة جدا! غيرك لا يتركب له القسطره ومش عارف يخرج البول. عارفين قصة الملك اللي طلب من غلام له شربة ماء، كوباية مية، وكان غلاما فقيها؟ العبد ده كان يعني دين وعنده فقه، فجاء للملك بكوب الماء، فالملك هيشرب، قال له: انتظر. فقال: مالك؟ قال: إن حبس عنك هذا الكوب إلا بنصف مالك؟ يعني يتقال لك ما فيش، مش هتنول هذا الكوب من الماء، خلاص ما فيش مية عاوزها؛ تدفع فيه نص ثروتك، نص مملكتك؟ فتردد الملك، ثم قال: والله كنت أدفعه فيه نصف مالي. فقال: اشرب. فشرب. قال: إن حبس فيك إلا بمالك كله؟ قال: والله كنت أدفعه فيه مالي كله. فقال الغلام: لا خير في ملك لا يساوي بوله ماء؛ ملكك بقى اللي أنت فرحان بيه ده ما يساويش بوله ماء!

فأنت بقى عمرك شفت النعم دي؟ لا، ما شفناهاش غالبا، يعني غالبا معظم الناس ما شافتش النعم دي قبل كده، ما شافتهاش كنعمة، وبعضنا ما شافهاش أصلا، يعني مش حاسس أنه بياخد نفس ليه؟ للاشتراك في النعمة، للاشتراك في النعمة. فكل نعمة من دي محتاجة شكر، ولذلك كان دعاء الخروج من الخلاء إيه؟ غفرانك. ليه؟ ليه واحنا خارجين من الخلاء بنقول غفرانك؟ ليه؟ قالوا ثلاث حكم في قول غفرانك؛ منهم حكمه منهم أنك بتستغفر ربنا سبحانه وتعالى من التقصير في شكر نعمة الإخراج. فانت بتقول غفرانك، يعني يا رب أنا ما قدرت شكر النعمة دي كما ينبغي؛ غفرانك، اغفر لي تقصيري في الشكر. دي واحدة من ثلاث حكم. حد عارف الاتنين تانيين؟

ماشي، والتانية؟ ها، ما هو قالها التانية بقى، طيب. من الحكم في غفرانك -عشان احنا برضه بنقول الذكر ده نستحضر هذه الحكم- أنك لما دخلت الخلاء احتجبت أو امتنعت عن ذكر الله عز وجل في الخلاء، فانت خارج بتستغفر ربنا من هذا الوقت الذي قضيته بلا ذكر. عارفين ده معناه إيه؟ أن أنت وقتك كله بره إيه؟ في ذكر، فلما امتنعت عن الذكر ده استغفرت الله عز وجل: يا رب استغفرك إني قعدت مدة ما بذكرش.

والمعنى الثالث اللي قالوه: أنك لما دخلت ثقيلا وخرجت خفيفا، تذكرت ثقل الذنوب عليك يوم القيامة، فاستغفرت الله منها. فدول ثلاث حكم قالوها العلماء في قول غفرانك. الحكمة اللي احنا عاوزينها دلوقتي: أنك لما دخلت فقضيت حاجتك كده بسهولة جدا -أنا ممكن النعمة دي احنا ممكن استشعرها شوية؛ لأن احنا ما فيناش حد ما تزنقش قبل كده وما كانش مش لاقي مكان، فابتديت إيه ده، هو بسهولة كده النعمة دي يعني؟- فطب أنت ما شكرتش النعمة دي كما ينبغي، فبتستغفر ربنا: غفرانك يا رب لتقصيري في شكر هذه النعمة.

يبقى أول علم أن ترى النعمة، وثاني العلم أن تراها نعمة، وقلنا إنه أعظم معوق أن ترى النعمة وأن تراها نعمة الاشتراك في النعمة. يبقى لازم ننتبه بقى، يبقى احنا عاوزين نقعد كده ونشوف، وهنكتشف نعمة عجيبة عجيبة؛ يعني احنا لو قعدنا نتامل في كل تفصيلة -باقول لكم الريق- فاحنا في كل تفصيلة في حياتنا نعمة. أنت عارف نعمة بس أن أنا إيدي اللي عمال أحركها دي، أن هو يعني إشارة تخرج من المخ، إشارة كهربية أو عصا تخرج من المخ بسهولة جدا؛ عشان في ناس ما عندهاش ده. وعد بقى عد النعم، أنت بقى روح مثلا مستشفى الصدر عشان تعرف النعم اللي عليك، وروح مستشفى الحميات، وروح مستشفى مش عارف إيه. احنا عايشين في نعم لا تعد ولا تحصى: ﴿وَإِن تَعُدُّوا نِعْمَتَ اللَّهِ لَا تُحْصُوهَا﴾ [إبراهيم: 34].

طب احنا ليه مش شايفين معظمها؟ للاشتراك في النعمة، ده أعظم معوق. طيب، علمت النعمة أو رايت النعمة ورايت كونها نعمة؛ يبقى أن تراها من المنعم جل وعلا. لا، ثواني بقى، يعني أنا ممكن أشوفها وأشوفها نعمة، بس ما انتبهش أن ربنا هو اللي منعم بها؟ أه، بيحصل، أه بيحصل. أعظم معوق إيه اللي يخليك ما تشوفش فعل الرب عز وجل في هذه النعمة، أو ترى نعمة ترى هذه النعمة منه سبحانه وتعالى؟ عارفين إيه؟ ها؟ ألف النعمة؟ إيه تاني؟ هو طبعا في حاجات كتير، بس أنا عاوز أجيب لكم الحاجة الأعظم، يعني أعظم شيء... لا، مش العصيان، ده هيجي بعدين. قول. الاستحقاق؟ لا، مش الاستحقاق، هو مش الأعظم، يعني ماشي.

أعظم شيء أن يجري الله عز وجل النعمة على غير على يد غيره من البشر. هديكم مثال عشان تفهموا اللي أنا عايز أقوله: تخيل كده أن أنت ماشي، وبعدين إيه في الصحراء مثلا ولقيت إيه شنطة بتفتحها لقيت فيها خمسة مليون جنيه في الصحراء، أول حاجة تعملها تعمل إيه؟ ترفع إيدك: أحمدك يا رب، مش كده؟ طيب، تخيل أن صفقة وبتبيع ومش عارف إيه، والحاجة تساوي عشرة مليون، فراح جاي الراجل قال لك إيه ده؟ أنا حبيتك والله ومش عارف إيه، ده أنا هازودك خمسة مليون، فادك خمس عشرة مكان العشرة. حينها يذهل المرء عن رؤية الرب، وابتدي تشوف أن إيه؟ أن دي جميلة في رقبتك، وأنا ده جميلة في رقبتك ليوم الدين، وأنت بس أؤمرني بعد كده. زهلت عن ربنا خالص، ليه؟ لمجرد أن ربنا أوصل إليك هذا المال على يد غيره من البشر.

تعالوا كده يا جماعة أديكم مثال عشان نفهم احنا بنعمل إيه، وهنضحك على نفسنا كلنا، أنت عارفين احنا بنعمل إيه؟ احنا بالضبط كده كأن واحد دخل على ملك من الملوك، وبعدين سأله شيئا، فراح الملك مطلع القلم وابتدى يكتب على ورقة إنه إيه -يعني ورقة أن فلان الفلان يصرف له المبلغ الفلاني، خلينا في خمسة مليون- الخمسة مليون من خزينة المملكه، فأنت زهلت عن الملك، وسرحت مع القلم والورقة، ورايت أن السبب في حصولك على خمسة مليون أو... يعني مش السبب أنك

ما حصلت على الخمسة مليون دول إلا بسبب القلم والورقة اللي في إيد الملك، ورحت قعدت تشكر في القلم وتذكر في الورقة: أنا كتر خيرك يا قلم والله أنا كتبت خمسة مليون، وكتر خيرك يا ورقة أنك قبلت اكتبي خمسة مليون. ده اللي احنا بنعمله يا جماعة، العباد؛ كل العباد مقهورون مربوبون، يعني اللي أداك الخمسة مليون ده، ولو شاء ربك ما فعلوه، ربنا هو اللي سخره وعطف قلبه عليك عشان يجي يديك الفلوس. احنا بنعمل كده بالضبط، المثل ده مثل بعيد شوية، خلونا نقرب المثال: رحت للملك أنا عاوز إيه مزنوق في خمسة مليون، راح الملك وافق وراح منادي الحاجب ولا الوزير بتاعه قال له: يا وزير تعال روح للخازن وقول له الملك بيأمرك أنك تدي فلان خمسة مليون، فراح الوزير خارج من عند الملك راح للخازن وأنت مع الوزير وشايف ده كله بيحصل قدام عينيك وقال له: يا خازن الملك بيأمرك أنك تديله فلوس، فراح الخازن راح فتح الخزنة وجاب خمسة مليون، فتعلق قلبك بالوزير والخازن ونسيت الملك.

هو العاقل يعمل كده؟ هو الوزير ده لولا أن الملك أمر كان اتحرك؟ والخازن ده لولا الملك أمر كان فتح خزنة؟ والله ما كان يحصل، الأمر كله من الملك. كذلك مع الله سبحانه وتعالى، كذلك مع الله أن ترى كل نعمة منه جل وعلا وإن أجرى على يد غيره من البشر، فاللي بقى ينسى الملك ويقعد يشكر في الخازن ويشكر في الوزير وأنا من غيركم ما كنتش مش عارف إيه وكان من غيركم ما كانش حصل اللي حصل، ومن غير مين يا ابني؟ من غير مين ده؟ لولا أمر الملك ما تحرك وزير ولا فتح الخزنة، ما كانش هيحصل كل ده هو جل وعلا لولا أنه أمر كن ما كان. فأنت ليه مشغول بفلان وعلان؟ مشكر الناس أجر الله عز وجل بفضله وكرمه ومنه أن يشكر الناس بعضهم بعضا، ورتب ثوابا على ذلك لأنه يحب ذلك بس.

يعني لو لم يأمرنا الله عز وجل أن نشكر الناس ما شكرنا، ليه؟ لأننا مش شايفينهم أصلا، مش شايفينهم؛ نرى الله عز وجل في كل شيء، في كل فعل، في كل جميل وصلنا، نراه هو سبحانه وتعالى، طب وفلان اللي عمل؟ لولا أن الله أمر أن نشكره ما شكرناه، لكن النبي صلى الله عليه وسلم قال: «من لم يشكر الناس لم يشكر الله». يحب ذلك يا جماعة، يحب ليه؟ علشان ده هينمي بين روح الألفة والتعاون والبر والكرم، والله يحب الكرم، كريم يحب الكرم جل وعلا، وقل مثل ذلك بقى في كل الصفات، فيحب الله عز وجل أن يرى منا ذلك.

اشفعوا تؤجروا، طب ليه نشفع نؤجر؟ هو أنا لو شفعت يعني أنا اللي هبقى عملت تكملة الحديث إيه؟ ويقضي الله على لسان رسوله ما شاء. اشفعوا تؤجروا، إنما اشفعوا هو هنا ليه بيقول: ويقضي الله على لسان رسوله ما شاء؟ عشان أشفع عند النبي عليه الصلاة والسلام، النبي عليه الصلاة والسلام كان بيعمل حاجة، كان يجي واحد يطلب منه الحاجة فيمنعه رجاء أن يأتي آخر فيشفع، لأن الله يحب أن يشفع العباد بعضهم لبعض، النبي قال كده عليه الصلاة والسلام، ربما يمنع الحاجة عن أحدهم رجاء أن يشفع فيه آخر فقال: «اشفعوا تؤجروا». وأوعى تفتكر أنك لما شفعت أنت اللي عملت، أنت ولا حاجة ولا حاجة، ويقضي الله على لسان رسوله ما شاء.

طب ليه نشفع؟ لأن الله عز وجل يحب منا ذلك فبنشفّع، طب ليه نشكر الناس؟ لأن الله عز وجل يحب منا ذلك، أما نحن فلا نرى البشر لا نراهم أشباح. احنا متعودين دايما بنقول لكم الكلام ده على إيه؟ على موضوع البلاء، أنك ما تشوفش البشر في البلاء، لا أنت لا تشوف البشر لا في بلاء، لا في سراء ولا في ضراء؛ الحاجة اللي جات لك جات لك لأن الله عز وجل أمر أن تاتيك.

الشيخ أسامة عبد العظيم رحمه الله كان وهو في السجن (مين اتحبس هنا؟ الحبس للجدعان يعني)، فكان الضابط بيحب الشيخ، هو الشيخ يتحب يعني طبعا، كان بيحب الشيخ رحمه الله، وبعدين فكان إيه يسهل له بقى دخول الأكل كده، فمرة جه بيقول لي الشيخ إيه، بيقول له: يعني لو أنا بقى مش موجود يا شيخ كنت هتعمل إيه؟ قال له: والله ربنا كان يبعت راجل طيب زي حضرتك كده برده يدخل لي الحاجة.

هو احنا يا جماعة، اصل احنا بنقعد ندرس عقيدة وتوحيد ونمتحن ونطلع الدرجة النهائية وخلصت المعهد وخلصت الدورة، هي دي العقيدة؟ هو ده التوحيد؟ أن فلان جه آذاك؟ مين سلطه؟ الله، ولو شاء الله لا سلطهم عليكم، مش كده؟ ربنا اللي سلط، طب فلان جه أوصل لك حاجة خير وبتاع، من الذي؟ الله جل وعلا، طب فلان ده مش موجود؟ ما هي الحاجة دي خلاص قدرك، ده نصيبك، هتوصل لك. أنت رزقك بيجري وراك وأجلك بيجري وراك، يعني أنت كده كده ماشي، والناس الطيبة الجميل، يقول لك إيه: المكتوب على الجبين لازم تشوفه العين، مش كده؟ اه، هو ده معنى صحيح يعني سيبكم من الجبين ومش بس معنى صحيح، مش كده الحديث بتاع ابن عباس إيه: «واعلم أن الأمة لو اجتمعت على» مش عارف إيه، ولا عارفين حديث في الآخر: «رفعت الأقلام وجفت الصحف» اللي هو ده اللي مكتوب على الجبين هتشوفه العين.

إذن العلم أن ترى النعمة هذا أول العلم، ثم أن تراها نعمة وهذا ثاني العلم، وقلنا أكبر إشكال هنا هو الاشتراك في النعمة، فننتبه للنعم التي يشترك فيها الجميع. طبعا احنا اتكلمنا عن نعم دنيوية في الحتة دي، من النعم نعم الدين بقى، لأن أصلا قالوا إن شكر العوام على الأكل والشرب والصحة والعيال والزوجة (الزوجة بتشكره ولا بتعملوا إيه؟ الضحك، طبعا الزوجة طبعا نشكر ربنا وبعدين الضحك).

نعم الدين بقى هي النعم الأعظم، نعم الدين هي النعم الأعظم، يعني تشكر ربنا أنك في مجلس مثل هذا المجلس، وغيرك ممكن النهارده الخميس بقى وفين، أنتم عارفين، لا، وأنت قاعد في مجلس كهذا، ليه بقى؟ عشان أنت الجدع وأنت اللي عندك عزيمة وأنت اللي عندك إرادة؟ أبدا والله، الله حملك إلى هنا، طب حملك بإيه؟ يعني ولا حاجة، لو علينا احنا كلنا ما نستحقش نكون في المكان ده، لكنه سبحانه وتعالى يتفضل علينا ويمن ويعفو ويصفح ويغفر ويستر ويجيبنا مرة وأتنين وثلاثة.

قولنا لكم قبل كده نعمة الإسلام، بدايه كده من نعمة الإسلام قلنا لكم الحسبة البسيطة: احنا العالم دلوقتي ثمانية مليار، المسلمين اثنين مليار، يعني خمسة وعشرين بالمئة صح كده يعني من العالم اللي احنا عايشين فيه دلوقتي، يوم القيامة من كل أربعة ثلاثة مخلدين في النار، وواحد ناجي من الخلود (يعني ممكن يدخل ويطلع). ده الحسبة البدائية: ثمانية مليار، اثنين مليار مسلمين، الباقي كلهم كفار باختلاف الملل بقى والنحل والكذا والكذا، يعني بحسبه بسيطة من كل أربعة في العصر اللي احنا عايشين فيه ده (مش من أول آدم، لا)، من كل أربعة يوم القيامة ثلاثة مخلدين في النار وواحد ناجي.

لو دخلنا في الاثنين مليار هتلاقي نصف مليار شيعي بقى رافضة يشتموا الصحابه ومش عارف إيه، اتبقى مليار ونصف سني باختلاف برده المذاهب ومش عارف إيه، من جوه المليار ونصف شوف كم واحد ما بيصليش أصلا، يعني هو مسلم في البطاقة، محمد ومحمود وعلي وبتاع في البطاقة، طب من جوه بقى كم واحد الدين في دماغه يعني مصلي، فهيحضر في درس، فهيقرا، فهيقعد؟ أنت من دول بإيه؟ بإيه؟ ولا حاجة، ولا حاجة، هو اجتباء الله لك واصطفاؤه لك.

طب لو بأحوالنا؟ كان زماننا إيه؟ رحنا في داهية، لكنه سبحانه وتعالى رحيم وغفور وكريم وحليم وقل ما شئت. طيب، عمرك بقى أنت شكرت ربنا على النعمة؟ أنت أصلا شايفها نعمة؟ عمرك شفتها؟ وبعدين شفتها نعمة؟ وبعد ما شفتها شفتها من المنعم؟ يعني مش عشان أنا ذاكرتي مش عارف إيه فحافظت القرآن في شهرين، هو ده معنى أنك مش هيفهم من المنعم، فاهمين يا جماعه؟ لا اصل أنا، أنت ما تعرفش أنا أخدت كورسات إيه عشان ما أقعد أدي كلمة للناس، الناس مش عارف إيه أبقى لبق وأبقى بهزر وأبقى. احنا كده إيه قارون على طول مش كده: ﴿إِنَّمَا أُوتِيتُهُ عَلَى عِلْمٍ عِندِي﴾ [القصص: 78] ما هو ده في الدين وفي الدنيا. فأنت صحيح شايفها لكن مش رابطها بربنا، فقل مثل ذلك على الدين كمان.

مش هينفع بقى نقعد نفصل في مسائل، فهيبقى ده تكليفكم أنتم، أن كل واحد يروح محتاجين نقعد نشوف النعم عشان نشكر. هنشكر إزاي؟ احنا لسه ما خلي بالكوا احنا في الأول إحنا ما وصلناش للعمل ها، ده كله احنا بنتعلم شكر لسه، علم! بالمناسبة يا جماعة احنا أصلا لو حققنا العلم كله هيجي لوحده، يعني مش محتاج أجي أكلمك لا في الحال ولا في العمل، وعشان كده الإمام الهروي في منازل السائرين لما جه عرف الشكر (مين حافظ بقى منازل السائرين؟ سمع)، عرف الشكر قال إيه؟ الشكر قال: الشكر معرفة النعمة بس كده، مع أن هو ده مش الشكر، بس هو قال لك الشكر معرفة النعمة، وكان الإمام الهروي عاوز ينبهك لمعنى أنك لو عرفت النعمة خلاص كله جاي بقى، كله جاي ورا بعضه خلاص، بس اعرف النعمة بالشكل اللي احنا عمالين نحكي فيه ده، فقال: الشكر معرفة النعمة. عارفين كده لما نقول: الحج عرفة، هو الحج عرفة بس ولا حاجات كتير قوي؟ بس أهم حاجه إيه؟ عرفة، مفهوم؟

فخلاص رايناها ورايناها نعمة ورايناها من المنعم سبحانه وتعالى، فحققنا العلم. قلنا بقى الشكر ينتظم من علم وحال وعمل، إيه الحال بقى؟ الحال أن تفرح؛ يبقى أنت رايتها ورايتها نعمة ورايتها من المنعم تفرح. تفرح بإيه بقى ها؟ بالنعمة صح؟ تخيلوا أن في علماء بيقولوا اللي يفرح بالنعمة ما شكرش. شفتوا بقى المفاجأة؟ نرجع بقى: ﴿وَقَلِيلٌ مِّن عِبَادِي الشَّكُورُ﴾ [سبأ: 13]، ﴿وَلَا تَجِدُ أَكْثَرَهُمْ شَاكِرِينَ﴾ [الأعراف: 17]. فبنقول لكم تعالوا بقى نفهم يعني إيه شكر عشان هنكتشف أن فعلا احنا ممكن ما نكونش بنشكر. بعض العلماء قالوا ده مش شكر أصلا أنك تفرح بالنعمة، ده مش الشكر، أمال هفرح بإيه؟ هفرح بإيه؟

احنا عندنا هنا يا جماعة مسألة النعمة دي فيها ثلاث حاجات: نعمة ومنعم وإنعام. ركزوا، عندنا نعمة ومنعم وإنعام، ففي ناس تفرح بالنعمة، وناس تفرح بالإنعام، وناس تفرح بالمنعم. مش فاهمين؟ تعالوا نفهم: ملك تعبان، الملك معانا، ملك طالع في سفر مسافر، فجاه لقيت باب بيتك المتواضع، أنت راجل بقى فقير من الرعية كده غلبان، لقيت باب بيتك بيخبط، فتحت لقيت جندي من جنود الملك واقف بحصان من أفخم بقى الأحصنة (بلاش، خلونا دلوقتي عربية، إيه، موديل إيه، عاوزين إيه؟ يعني كل واحد بقى يسرح بخياله العربية اللي في واقفة واقفة دلوقتي) والجندي بيقول لك إيه؟ الملك بعت لك، الملك طالع في سفر في سفاري سفاري وبعت لك العربية دي هدية ليك لو عاوز إيه تكون معاه.

خلاص كده، هنا الراجل المسكين ده اللي من الرعية حاجة من ثلاثة: واحد، أول ما هيفتح هيشوف العربية اللي كانت حلم حياته هينسى الملك وينسى هو إيه فرح بالعربيه، هو فرح بالعربية دي فرحة كأنه بالضبط جات له من عند الملك زي كأنه لقاها في الصحرا، هو كل اللي شاغله في دماغه لايه ده؟ فرحان بالايه كده؟ فرحان بالنعمة، ده فرحان بالنعمة، خلاص، انتبهوا يا.. هي ناقصاك؟ يعني هو الليلة كلها؟ يعني اسمك إيه؟ اسمه إيه ده؟ اسمك إيه؟ ازيك يا حموكشة، عندك كم سنة؟ أربع سنين، تعالى شنطتي فين؟ نادر سرق الشنطة، خد يا حموكص، لا أنا وريت الدلعة، امسك. (طبعا كله هيجي يخبط في الكاميرا دلوقتي اه).

فصاحبنا ده بقى اللي فرح بالعربيه ده فرح بالنعمة، هو زاهل عن الملك وذاهل عن العربية الهامر واقفه ولا أيا كان بقى الموديل اللي أنتم عاوزينه. واحد تاني، أول ما فتح الباب ولقى الجندي بيقول له: الملك طالع في سفاري وبعت لك العربية دي، هو ما جاش في دماغه العربية خالص، قال: الملك بعت لي أنا! خلي بالك يا جماعة هو دلوقتي مش مركز هو اللي اتبعت خالص، هو مركز في الانعام، وكانه استدل على وصول تلك النعمة إليه بعناية الملك (يعني هو كده الملك إيه منتبه لي، بعت لي)، مش مهم بقى بعت لي إيه (يعني عربية، بونبوناية، أي حاجة)، المهم الملك بعت لنا أنا، فهو كده منتبه لمسألة الانعام. وبعدين بقى يبتدي باعت لي إيه بقى؟ نشوف بعت لي إيه، بس أنا مش شاغلني باعت لي إيه، هو فكرة أنه باعت لي.

فاكرين يا جماعة لما قلنا نرجع تاني شوية: الاشتراك في النعمة بيخلينا مش شايفين النعمة. أنت منتبه أن دلوقتي وأنا بتكلم أنا دلوقتي أخدت نفس اللحظة دي، حد منتبه أن شوية الهوا اللي أخدتهم دول خلقوا يوم خلقوا لي؟ يا جماعة فكرة الاشتراك في النعمة بتخلينا ما ناخدش بالنا ليه، بق المية اللي أنت لسه شاربه من نص ساعة خلق يوم خلق لك، هو في عناية خاصة بيك، يعني الحاجات دي مش مخلوقة كده يعني مش مخلوق خلقنا مية فاللي يشرب يشرب، خلقنا هوا فاللي يشم يشم، هو مش كده، علم الله سبحانه وتعالى وجل.

وتقدس، لا ده يعلم تفاصيل الأمور. يعني احنا عارفين يقول لك إيه؟ ويعلم مش عارف عدد مش عارف حبات الرمال ومش عارف قطرة المطر اللي نازلة، عارف هتنزل فين. عشنا ده قبل كده.

يعني بق المية اللي أنت لسه شاربه ده هو بتاعك منذ خلقت وخلق، مش بتحد تاني، يعني أنت مختص به، معني به. ففيه عناية من الله عز وجل بك، أن خلق لك هذا القدر من الماء، وخلق لك هذا القدر من الهواء اللي اللي اتنفذته دلوقتي، واللي هتنفذه كمان ربع ساعة ولا هتنفذه كمان 10 سنين، هو بتاعك. النفس اللي أنا أخدته مش بتاع حد تاني، ولو كان بتاع حد تاني كان زمان هو اللي خده مش أنا.

فهو انتبه لإيه بقى الله جل جل وعلا، أو بلاش الله يعني الملك بقى في مثالنا، باعت لنا عارفين كده اللي هو مين؟ أبي وسماني لك ربي. القضية دلوقتي مش في إيه؟ أقرأ عليك خالص. هو النبي عليه الصلاة والسلام قال له إيه؟ ربنا أمرني أن أعرض عليك القرآن. أبي راح في حته تانية: «سماني لك ربي».

فكرة أنا يا رب أنا باعت لي ده؟ أنا في عنايتك. فده شايف إيه بقى؟ هو ده شايف النعمة؟ هو ذهل عن النعمة أصلاً، ذهل عن النعمة يعني ده يستوي في في عنده لو الجند ده خبط وقال له العربية الهمر، ولو خبط وقال له باعت لك سلام الاتنين عنده سيان. هو زاهل عن النعمة، هو مش في دماغه النعمة أصلاً. فهمتوا دي؟

واحد ثالث بقى لما الجندي خبط وقال له عربية همر والراجل طالع سفاري، هو ذهل عن النعمة وعن الأنعام، ورأى أن العربية دي هي المطية اللي هتخليه بقرب الملك. فهو كده منتبه لإيه؟ للمنعم. يعني هو لما اتخبط عليه ما فرحش بالعربية العربية للرعيبة خالص، ولا انتبه لفكرة أن الملك سماني وفاكر خالص، وكل اللي في ذهنه أنا هكون بعد شوية بقرب الملك.

يمكن احنا ما نحسهاش قوي دي، بس نحسها لو طبعا احنا عشان قلوبنا ملوثة بالشهوات وبتاع، يعني المفروض نتكلم عن ربنا نحس ده على طول. فاحنا عشان يعني محجوبون سمع المتكلم، يعني أنا أولكم، فمحتاجين الأمثلة الدنيوية دي عشان تقرب بس. في الحته دي يمكن مش هنحس قوي مع الملك، بس هنحس قوي مع إيه بقى؟ مع المحبوب، اللي هو مش مهم أروح على حمار ولا أروح ماشي ولا أروح على في توك توك ولا أروح في ليموزين، المهم بعد خمس دقائق هبقى من أحبه. تتبetي ساعتها: آه، فهمنا المثال.

يا جماعة، المشاعر دي موجودة ولا مش موجودة؟ ساعتها أنت مش هفرق معاك أنت راكب إيه ولا ماشي ازاي ولا هنقعد فين ولا. فدي الحالة التالثة، اللي هو لما ينعم عليك بنعمة أنت زاهل عن النعمة وعن الأنعام، وكل شغلك أنها مطية لأن تقترب من الملك، هكون معاه. ده ممكن يبقى طماع كمان صاحبنا ده يقول إيه؟ أخرج معاه بقى في السفاري، أضرب معاه صحبية وأدنو منه وأتزللف إليه وبتاع، يمكن أتعاين وزير، ويبقى كل خير بعد كده خارج للرعية من خلالي. مش من خلال عشان أحب الوزارة، لا أنا أحب القرب من الملك. فكده هبقى على طول إيه ملاصق ليه، ده أعلى المقامات.

أعلى المقامات أنك تشوف أي حاجة جاية لك هي بتقربك فانت مش في دماغك، يعني إيه مش في دماغك بقى؟ يعني السيدة عائشة رضي الله عنها يجيلها فلوس تقوم تقسمها وتوزعها كلها، فيجي المغرب يأذن وهي صايمة ما عندهاش حاجة تفطر بيها، فتجي الجارية تقول لها: لو أبقيت لنا درهماً نفطر به، كنت سيبي درهم نفطر عليه، نفطر به، حاجة نفطر بيها. فتقول لها عائشة رضي الله عنها: لو ذكرتيني لفعلت.

أنتوا فاهمين سيد عائشة فين؟ هي شافت الحاجة اللي جت دي هي وسيلة مطية أنها تقرب من الملك جل وعلا. ده اللي في دماغها! ولذلك فاكرين لما قلنا في أول الدرس قلنا جينا كده على الشكر: إيه أن تشكر النعمة؟ قلت لك معلش النعمة دي عشان نشوف هنشكر على إيه بعدين. لذلك بعض العلماء الإمام الهروي مثلاً في منازل السائرين قال: إن شكر الله على النعم يشارك فيه المسلمون واليهود والنصارى والمجوس. إيه رايكم؟ ده كلام الإمام الهروي في منازل السائرين.

أمال المسألة فين بقى؟ أن تشكره على البلاء، مش مش انك تصبر، تشكر على البلاء. وممكن الناس يعني أنا ليه أشكر على البلاء؟ ليه؟ لو فهمت قصة النعمة والإنعام والمنعم هتفهم ليه؟ لأن البلاء ده بيعمل إيه؟ بيقربك. فانت أصلاً، ولذلك الهروي قال إيه؟ قال مين أصلاً بيوصل لحته أنه يشكر على البلاء ده؟ اللي هو بيستوي عنده الأحوال.

معلش هو الكلام عالي شوية، يعني لما نتكلم عن، على فكرة أنا الدرس النهارده من عند اثنين هما أصلاً تقال جداً: الهروي والغزالي، فالكلام تقيل. مين اللي بيشكر على البلاء ده؟ قال لك: من يستوي عنده الأحوال. يعني إيه؟ يعني هو في سراء زي في ضراء، الاتنين عند واحد أصلاً سيان. ليه؟ كلمة عمر تلخص الموضوع رضي الله عنه قال: الغنى والفقر مطيتان لا أبالي أيهما ركبْتُ. فهمتوها دي؟ سيدنا عمر بيقول إيه؟ الغنى والفقر ركوبتين بقرب، هركب أي واحدة هقرب بيها لربنا. والله ركبت الفقر هصبر عشان أقرب لربنا، ركبت الغنى هشكر عشان أقرب لربنا، فمش فارقة معايا. جعلني في الغنى شكرت واقتربت منه جل وعلا، جعلني في الفقر صبرت واقتربت منه جل وعلا.

طبعا الأعلى من كده أنه جعلني في الفقر شكرت، قلت الحمد مش الحمد لله. هو الإمام الهروي بعد كده ذكر أن اللي ما يستويش في حقه عنده الأحوال دي في مرتبة أدنى منها بقى، اللي هو اللي احنا بنتكلم عليها دي، اللي هي مرتبة أنك يبقى الشكر في حقك اللي هو الصبر والكدده يعني. المعاني دي بس مش عاوزين ندخلها دلوقتي، مش عاوزين نوسع في الكلام. خلينا في أول إيه؟ المنزلة المنزلة العليا دي بقى.

فرايتها نعمة ورايتها ورايتها نعمة ورايتها من المنعم، ففرح قلبك فرح قلبك بايه؟ أديكم عرفتوا بقى اللي هيفرح قلبه بالنعمة، ده أدنى المنازل. أنا بقول لكم بعض العلماء قال لك ده لسه ما يعرفش حاجة اسمها شكر ده، لأن ده يستوي عنده أنه لو لقاها زي ما قلنا كده في المثال بتاعنا العربية الهمر، لو لقاها جاية من الملك زي لوها في الصحرا، فهو ده أصلاً مش منتبه لربنا. صاحبنا ده اللي فرح بالفلوس، فرح بالسيارة، فرح هو مش منتبه أصلاً ازاي يبقى اسمه شاكر، ازاي يعني؟

فاهمين دي يا جماعة؟ يعني الكلام ده سهل ولا إيه ولا نفصل فيه زيادة؟ ماشي، نفصل. الفرح الثاني بالإنعام وأنه يتلمح في الإنعام أنه إيه؟ في عناية الرب جل وعلا. يعني إيه؟ يعني إيه يا جماعة المسألة دي؟ يعني جالك شيء، يعني حدث لك، هو طبعا الصح يعني الأعلى من ده بس صعب فعلاً على آحاد البشر، يعني ممكن بقى الأولياء يوصلوا له ولا حاجة، العارفين بالله: أن ترى ده في كل نعمة. عارفين إيه؟ ترى ده في كل في كل، يعني كل نفس، يعني كل نفس جواك، معنى أنا يا رب أنا ترسل إلي النفس كده، يعني أنا يا رب ترسل إلي الـ.

عارفين يا جماعة فكرة أن الاشتراك في النعمة ما بنشوفهاش دي، وكأن الشرع بيلح على هذا المعنى أنه يخليك تشكر بعد النعم المشترك فيها؟ يعني مثلاً: ﴿ٱلْحَمْدُ لِلَّهِ ٱلَّذِي أَطْعَمَنِي هَٰذَا﴾. فكرة أن إيه؟ أنك بتاكل ف الناس كلها بتاكل، إيه الجديد يعني؟ فتلاقي بعديها على طول: الحمد لله الذي أطعمني هذا بس لا ورزقني بس من غير حول مني ولا قوة.

طب هتلبس ثوب: الحمد لله الذي كساني هذا ورزقني بس من غير حول مني ولا قوة. وكان المعنى هنا إيه؟ النعم اللي الناس بتشترك فيها الشرع بينبهك أنك تشكر ربنا عليها فتبتدي تنتبه لده أنها نعمة من الله عز وجل أنت مختص بها.

تنام وتصحى: الحمد لله الذي أحياني بعدما أماتني وإليه النشور. هنا أنت بتشكر ربنا على نعمة مش بس النوم، ده في نعمة تانية هنا هي نعمة إيه؟ الإمهال. بلاش يا جماعة حد عمره انتبه لنعمة الإمهال دي؟ يعني أنت بتفتح عينيك كده الصبح قبل ما تديك على الموبايل عشان تفر في الفيسبوك والانستغرام والتيك توك والبلاوي، طبعا أنت، تقعد كده تستشعر نعمة الإمهال. يعني كم واحد نام وما صحيش؟ طب ما انت ممكن يجي عليك اليوم اللي هتنام ما تصحاش. فربنا أمهلك، الحمد لله الذي أحياني بعدما أماتني.

نعمة يا جماعة، والله نعمة أنك تمهل عشان تتوب، تمهل عشان تستعتب، تمهل علشان تزود في حسناتك. كم واحد ما حدش منتبه ليها خالص ليه؟ للاشتراك، كلنا بننام ونصحى، يعني فين وفين اما نسمع عن واحد إيه نام نام ما صحيش؟ ويمكن لما تصبح عندها الليلة دي تقلق، ويمكن تقوم تصلي، ويمكن تصلي بالذات لو قريب بقى ليك ولا، يا سلام بقى لو كان اللي نام ده اللي كان نايم جنبك، صحيت أنت وهو ما صحيش، يعني مالك الموت كان معاك وفي الأوضة. يعني تخيل كده مثلاً إيه صحيت 2 الفجر بتصحى الراجل ده راجل بقى أو ست أو أياً كان، ما بيصحاش. هترجع بقى تكمل، الليلة دي هتقضيها ازاي؟

هتنتبه وقتها إيه ده هو أنا ممكن؟ هو أنا النصحة دي لوحدها نعمة؟ فتلاقي الشرع بينبهك على المعاني دي بأنه إيه؟ بيشرع لك أن تحمد الله عز وجل في هذه المواطن. فالحال عاوزين بقى كلنا إيه نحاول نجتهد أن احنا واحنا بنفرح، ما نفرحش بالنعمة للنعمة، ما نفرحش بالنعمة للنعمة، لا عاوزين نرتقي: نفرح بالإنعام، أن طالما ربنا سبحانه وتعالى أوصل لك كذا فانت في عنايته.

واللي أعلى من ده أنك يفنى عندك النعمة والإنعام، لا أنا شايف نعمة ولا شايف إنعام، أنا مش شايف غير ربنا، مش شايف غيره خلاص. وعشان كده السلف ده هيبتدي بقى يترجم لنا حاجات ونفهم حاجات، أن السلف لما كانوا يجي لهم حاجة هتبعدهم يكتئبوا. واحنا النهارده يا جماعة لو جيت قلت لك إيه لو وقفت كل المسجد ده كده بس بصدق يعني جالك 5 مليون جنيه حد هنا هيكتئب؟ حد هيزعل؟ لو صدقنا هنقول: ما حدش. ماشي، فتيجي مثلاً سعيد بن عامر الجمحي مثلاً، وكان أمير وبعد كانت حالة حال، طبعا سعيد بن عامر عشان بس إيه أما نقول الكلام الجاي ما تفتكروش إيه أمير بقى فثري، فما جاله فلوس عادي يعني لا. سعيد بن عامر كان يعني حالته ضنك، كان أمير وبعدين سيدنا عمر يزوجه يقول: ما تيجي ما تاخدني بيتك؟ قال له: أنت عاوز إيه؟ تعصر عينيك عليا يعني هتعيط؟ قال له: بس خدني.

يروح بيته يلاقي إيه بقى؟ مالهاش حاجة، لقى فرشة كده وقال له طب أكلك، بتاكل إيه؟ راح مطلع له خرقة وماشي فتحها، لقى كسر من الخبز، عيش ناشف! ده الأمير ها! فبكى عمر، قال له: قلت لك أنت جاي بيتي تعمل إيه؟ وعارفين قصته أن هو كان اشتكوه، فسيدنا عمر جاي بقى بيحقق. اشتكوه ثلاث حاجات، الرعية ما هو الرعية ما يعجبهاش العجب، مش بتقعد دلوقتي يعني عموماً يعني.

اشتكون ثلاث حاجات في سعيد بن عامر، قالوا إيه؟ يوم في الشهر ما بيخرجش لينا، بياجز يوم في مش يوم في الأسبوع، يوم في الشهر ليه؟ ما بيخرجش بقى إن شاء الله، عاوزين يخرج كل يوم مجلس الحكم. وبعدين بيخرج بالنهار بس، يعني هما عاوزين إيه؟ آه 24/7 يعني احنا عاوزين إيه؟ الشهر كله، كل يوم 24 ساعة ما بيخرجش. ما بيخرجنا بالنهار، ما بيخرجش بالليل ليه؟ إن شاء الله ما بيخرجش بالليل دي.

تاني حاجة، كل ما يقعد في مجلس الحكم بيجي له غفوة كده، يقعد إيه يقوم يجي له حالة كده، بيدخل في حالة ما احناش فاهمينها، يعني حتى دي مش عاوزها، طب غصب عن الراجل! فج سيدنا عمر بقى بيحقق في الموضوع، فقال له: يعني ما كنتش أحب أحكي بس ماشي، اليوم اللي في الشهر ما بخرجوش قال له: والله ما عندي إلا ثوبي هذا، عنده جلابية قفطان واحد، قميص واحد أفضل لابسه طول الشهر، وبغسله يوم في الشهر وأستني ينشف وألبسه وأطلع لهم تاني. ده الأمير يا جماعة ها!

أنا ليه بقى أنا بحكي ده كله ليه؟ عشان لما نعرف حالته بقى، يعني ما وبعدين نحكي قصتنا بقى. وقال له: النهار وماطلعش بالليل؟ قال: فأنقسمت اليوم بينه وبين ربي، فجعلت النهار والليل لله، بدخل ده وقت ربنا. والغفوة أنتو عارفين كان هو سعيد بن عامر حضر مقتل خبيب، وكان سعيد مشرك وقتها رضي الله عنه، فلم يدفع عن خبيب. فكل ما يفتكر الموقف ده تصيبه تلك الحال.

فشايفين بقى اللي حالته ده كده؟ داخل على مراته بقى في يوم مغموم وحزين ومكتئب، مالك؟ قال لها: أمر جلل. قالت: مات أمير المؤمنين؟ قال: أشد. قالت: أخلص إلى المسلمين يعني يعني جتيحت البلاد؟ قال: أشد. قالت: فمه؟ قال: دخلت علي دخلت علي الدنيا. والله يا جماعة ده كلام فقيه، يعني مات أمير المؤمنين طبعا دي طامة كبرى، مش كده. بس في خاصة نفسي أن تدخل علي الدنيا أشد. يوم القيامة ربنا مش هيحاسبني هو ليه مات أمير المؤمنين؟ مش هيحاسبني على دي، هيحاسبني على الدنيا اللي دخلت عليا وأفسدت عليا ديني دي.

فده كلام رجل فقيه، قال: دخلت علي الدنيا. قال: تخلص منها. قال: وتعينني؟ هي طبعا لسه ما تعرفش في إيه، هو كان جاله فلوس، وطبعا مراته برده فقيرة زيها زيّه، فقال: وتعينني؟ قالت: أجل. راح مطلع الفلوس بقى، قال لها: الفلوس دي اتلبعت لي من أمير المؤمنين. راح مقسّمها، وأرسل إلى فلان وإلى فلان وإلى فلان، لم يُبْقِ له شيئاً منها.

السؤال بقى، السؤال هنا: ليه عمل ده؟ لأنه ببساطة هو شايف إيه؟ هو شايف النعمة، ولا الإنعام، ولا المنعم؟ المنعم. وانسى كده من نفسه أن ممكن دي تبعدني. ما هو لو كان شايف النعمة كان فرح زينا كده، كلنا كده أول ما بتجيلك حاجة بتزقطط وتطير وتخبط راسك في السقف. ليه؟ أنت لو شايف أنعم ولا شايف منعم؟ أنت الفلوس دي اللي في دماغك، ففرحت. طب يا ابني، هي دي لو دخلت عليك هتقرب ولا تبعد؟ لا، تقرب بعدين. بس يا عم الشيخ الله يكرمك، ما تقرب ولا نبعد الدين يعني بعدين، لنا دلوقتي في إيه؟ ما تنكدش علينا اللحظة.

هو ده اللي قاله، إيه؟ يستوي في حقه النعمة دي جابها له الملك ولا لقاها في الصحرا؟ ده مش منتبه لربنا أصلاً. أنا بكلم مين؟ بكلم اللي بتقون وبخمارات وب... مش منتبه لربنا، لأن لو منتبه لربنا أول سؤال هيساله: هو أنا هي دي إيه؟ يقعد كده قلقان، أنت إيه؟ أنت جاية ليه؟ أنت نعمة ولا فتنة ولا إيه ظروفك؟ أول سؤال يساله لنفسه. ولو شك، تتصوروا واحد زي ده لو شك هيعمل إيه؟ هياخد ولا يسيب؟ ما هو المسألة إيه؟ يا قرب زيادة، يا هبعد، يا هترمى. لا يا عم، على إيه؟ وبعدين، خلي بالك إنه يسيب برده بقى فيها قرب، ما دي لوحدها أصلاً أنه أتته الدنيا فرفضها، ده لوحده قرب. أنا مش بقول، طبعا، كل واحد يجي له دنيا يرفض، ما أقصدش كده، أقصد نلمح أو يعني تفنى عندنا النعمة ويفنى الإنعام وما نشوفش غير المنعم الله جل وعلا.

ده اللي حصل مع السيدة عائشة بالضبط، جالها الفلوس كلها لله، ليه؟ ما هي مطية جتي ركبت الفلوس دي عشان أقرب زيادة. طب احنا جعانين وما فيش؟ لو فكرتين كنت هسيب يعني، بس أنا مش فاكرة ليه؟ ما هو أنا مش شايفه، أنا فنا فنية في نظري كل شيء، فانا لا أرى إلا جل وعلا. هذا هو الحال، يبقى الحال هو الفرح، نفرح بإيه؟ حاجة من ثلاثة، عرفتوها؟ أعلاها الفرح بالمنعم، أوسطها الفرح بالإنعام، وأدناها الفرح بالنعمة، وبعضهم رأى ذلك ليس شكراً أصلاً.

خلصنا العلم والحال، يبقى إيه العمل اللي كلنا بقى شطار فيه؟ يعني إيه عمل بقى؟ يعني أشكر ربنا إزاي؟ بثلاث حاجات، بسرعة بقى: بالقلب أن تعترف بالنعمة باطناً، هنقولهم بعدين نرجع ليهم بقى يعني في دقيقتين ثلاثة إن شاء الله، وباللسان يبقى أن تعتبر بنعمة باطنة وأن تتحدث بها ظاهراً، وبالجوارح أن تُصْرَف في طاعة الله عز وجل. دول ثلاث حاجات أحفظوهم لازم.

يبقى أول حاجة: أن تعترف بالنعمة باطناً. يعني إيه تعترف بالنعمة باطناً؟ أن تعترف بكونها... كملوا، من المنعم. يبقى يعني إيه تعترف بنعمة باطن؟ أن تعترف بكونها نعمة من المنعم، دي الجملة كده خلصت. لو قلت نعمة ووقفت لسه، ممكن تبقى شايفها من منعم واضح. اعترفت بالنعمة باطnaً هي نعمة ومن الله جل وعلا.

أن تتحدث بها ظاهراً، يعني إيه بقى؟ تمشي تتنطط على مخالق ربنا؟ لا، العكس. يعني إيه العكس؟ يعني أجي أقول لك إيه: ما شاء الله، جبت عام 95%، إيه الذكاء ده؟ تقول له: والله ما ذكاء ولا هي نعمة، ده معنى انك تتحدث، يعني تتحدث بكونها إيه؟ نعمة. أنا لا ذكي، أنا لا بفهم، أنا لا واخد ماجستير ودكتوراه في الإدارة فالمشروع نجح، أنا لا عملت دراسة، أنا ولا حاجة، هي نعمة منه جل وعلا. لا بحداقتي ولا بذكائي ولا بفهلوتي ولا بقوتي ولا بأي حاجة، تتبرا من كل ده، ولذلك كان كنز من كنوز الجنة: لا حول ولا قوة إلا بالله. أنت يا ابني لا ليك حول ولا قوة في أنك تجلب شيء أو تدفع شيء إلا به جل وعلا.

فأوعى تشوف نفسك، أوعى هتضيع، هتضيع. قال سبحانه وتعالى: ﴿وَيَوْمَ حُنَيْنِ إِذْ أَعْجَبَتْكُمْ كَثْرَتُكُمْ﴾ [التوبة: 25]، فحصل إيه؟ ﴿فَلَمْ تُغْنِ عَنكُمْ شَيْئًا﴾ [التوبة: 25]. أول ما تشوف، اعرف انك رايح هتلبس في حيط. والحديث النبي عليه الصلاة والسلام كان يقعد يتم بكلمات بعد الصلاة ما هماش فاهمين بيقول إيه، فسُئل: أنت بتتم تقول إيه؟ فحكى لهم نبياً من الأنبياء، يعني فيما مضى، قاعد واقف كده في الجيش فحس أن الجيش كبير، فقال: من يقوم لهؤلاء؟

شوف يا جماعة، شوف يا جماعة الحتة دي، تدخل على الأولياء، تدخل على الأنبياء، اللي هو إيه؟ أن تشوف كده إيه، لكن ربنا سبحانه وتعالى يربي أولياءه ويربي أنبيائه. حتة صعب الصراحة، يعني صعب انك تتخلص منها، اللي هو إيه؟ ما شاء الله، جبت مش عارف مجموع إيه، فتلاقي في نفسك جواك إيه، انتشة كده، ولو قلت: لا، ده ربنا وبتاع، قال يعني بتبين التواضع، يعني إيه؟ ذكي ومتواضع كمان ما شاء الله، يعني... يعني أنت مش جواك أن فعلاً لا، هو مش ذكي؟ مش أنا، والله ما أنا، والله ما أنا، يعني هو أنا الذكي اللي في اللي في؟ لا أبداً، أنا أذكي أبداً؟ طب كم واحد ذكي وذاكر وعمل، ويوم الامتحان جت له حمى رقدته ما راحش الامتحان، راح ناسي كل حاجة، سهر، راح الامتحان بيفتح الورقة، شاف السؤال غلط؟ كل ده، كل ده احنا مش مش متوقع عقلاً، سمعناه من الناس، مقفل المادة، شاف السؤال غلط فجاوب غلط، ما شافش السؤال اللي في ظهر الورقة فراح عليه 20 درجة، بنسمع ده ولا ما بنسمعوش يا جماعة؟ فمش مش أنت، مش أنت.

قال: من يقوم لهؤلاء؟ فاوحى الله عز وجل أن يختار لقومك إحدى ثلاث عقوبات بقى. المهم، ثلاث عقوبات، اختار منهم أنه إيه؟ أنه الموت. يعني اختار هذا النبي لقومه الموت، وكانت أدنى العقوبات الثلاثة، فمات منهم كم واحد؟ 70 ألف. ربنا قضى بالموت على 70 ألف واحد من هؤلاء الجند. طب ما تقولش: يا حرام، وعملوا وعملوا، راحوا راحوا لربنا سبحانه... يعني احنا برده مسألة الشفقة الزيادة دي على اللي بيموت يعني مش فاهم ليه الصراحة يعني، الشفقة على اللي بيعيش. أنا ده في القران، ها. في القرآن في دليل على أني احنا ما نزعلش على اللي مات، احنا هو احنا... المصيبة مش في اللي مات، المصيبة للي عايش.

قال الله عز وجل مخاطباً الصحابه في غزوة أحد: ﴿أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا﴾ [آل عمران: 165]، إيه المصيبة اللي أصابت الصحابة؟ أن قتل منهم كام؟ سبعون في غزوة أحد، صح كده؟ ربنا بيقول: أولما أصابتكم مصيبة، بيخاطب اللي ماتوا ولا اللي عايشين؟ اللي ماتوا ماتوا خلاص، اللي ماتوا دول راحوا فين؟ دول شهداء في الجنة، المصيبة أصابت مين؟ اللي عايش. فربنا بيخاطب اللي عايشين: أولما أصابتكم مصيبة في فقد هؤلاء بقى، صاحب وحبيب وصديق وأخ وأب وزوج، فدي مصيبة على الأحياء.

المهم، مات 70 ألف من جيش هذا النبي، فكان سيدنا النبي عليه الصلاة والسلام بقى يتمم بالكلمات دي، يقول إيه: اللهم بك أصول وبك أدول ولا حول ولا قوة إلا بك. يتبرا من الحول والقوة، خائف صلى الله عليه وسلم.

يبقى أول حاجة: الاعتراف بالنعمة باطناً، شايفها، شايفها نعمة، شايفها من المنعم مش مني، مش بدكتوراه، مش بالدكتوراه بتاعتي، مش بأني عملت دراسة جدوى، مش أني شقيان في الشارع ليل نهار فلازم أكسب، خالص.

التحدث بها ظاهراً، يعني التحدث بكونها نعمة، تقول بقى الكلام اللي أنا بقوله ده، ربنا ما هو ربنا، بس انت ما فيش، بس ما تودينيش في داهية الله يكرمك، هو جل وعلا. التحدث بها ظاهراً، ثم تصريفها في مرضاته سبحانه وتعالى، يعني ما تبقاش معترف بها باطناً وتحدث بها ظاهراً، وبعدين خلاص أنت شايف عينك نعمة، آه والله نعمة، ليل نهار متبرجات، تبص على المتبرجات عادي، بتشغل إباحيات بتعمل، مش أنت كده بتشكر النعمة؟ تصريفها في رضا الله عز وجل، بلاش مقضيها في الغفلة اللي هو بتتفرج على ولا حاجة، هو ده شكر النعمة؟

يعني قلت لك: العين دي من أعظم النعم، وشوف كده أنتم عارفين النبي عليه الصلاة والسلام في الحديث، وهو استخدم اللفظ اللي بيستخدمه العرب: إذا ابتلى الله العبد بإيه؟ بحبيبتيه، وفي رواية: بكريمتيه. اللي معنية إيه؟ ليه بكريمتيه؟ لأن بهما يكرم المرء. من ابتلي بالعُما تلاقيه دايماً إيه في في عوز، يعني محتاج اللي يعمل له مش عارف، محتاج اللي يساعده في إيه، يعني غالب الناس كده يعني، فيكرم بهما. هما نعمة عظيمة جداً.

أنا عاوز اقول لك بس عشان يا جماعه نستشعر نعمة ربنا علينا، حاول تعمل اللي أنا هقوله لك ده: اربط عينك بقماشه في بيتك، مش هقول لك بقى في مكان ما تعرفوش، أنت أول ما أنت لمدة ساعة وتصرف، أنت أصلاً أول ما هتربط عينك بعد دقيقتين هتحس بوحشة عجيبة، وحشة عجيبة وخوف من كل حاجة ومن كل اتجاه، ما أنتش عارف في إيه، فين؟ أنت في بيتك، في بيتك اللي هو أكتر مكان أنت عارفه، ما قلتلكش أنزل، ما قلتلكش امشي في شارع وعربيات وتكاتك و... شفت نعمة العين دي؟

السؤال بقى اللي بعديه: اليوم 24 ساعة، وأديك عرفت أن شكر النعمة أن تُصْرَف النعمة في مرضات الله عز وجل، كم ساعة من الـ24 بتستخدم عينك في مرضات الله عز وجل؟ شوف أنت بقى. قل مثل ذلك على الأذن، قل مثل ذلك على الفم والأنف، كل حاجة فيك تصريفها في مرضات الله عز وجل بدائي. يبقى أديت الشكر.

«أفادتكم النعماء مني ثلاثة»، يدي اللي هو الجوارح، ولساني اللي هو التحدث بها ظاهراً، والضمير المحجبة اللي هو الاعتراف بالنعمة باطناً. قول قولي هذا، أستغفر الله العظيم لي ولكم، سبحانك اللهم وبحمدك، أشهد أن لا إله إلا أنت، نستغفرك ونتوب إليك.