بسم الله، الحمد لله، والصلاة والسلام على رسول الله وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذرياته وآل بيته كما صليت على آل إبراهيم، إنك حميد مجيد.
أما بعد؛ فاليوم درس استثنائي، سورة الحجرات طولت معنا معلش، بس هو الأحداث كثيرة، نسأل الله السلامة. الله عز وجل له آيات شرعية وله آيات قدرية، وهذا المعنى تكلمنا فيه كثيراً ومرَّ في هذا المسجد. ربنا سبحانه وتعالى له آيات شرعية وهي آياته المتلوة في كتابه، وله آيات قدرية وهي آياته المشاهدة في كونه. وكما أن أهل الإيمان لهم اهتمام أو ينبغي أن يكون لهم اهتمام بآياته الشرعية، تلاقي الناس المتدينة تحفظ قرآناً، تراجع قرآناً، تقرأ تفسيراً، تتدبر، لها اهتمام بالآيات الشرعية؛ فلا بد أن يكون لهم كذلك اهتمام بآياته القدرية سبحانه وتعالى. اللي هي الآيات القدرية: كل ما يجريه الرب سبحانه وتعالى في الكون هو من آياته القدرية، دقَّ أو عظم، حقر أو جل. أي حاجة بتحصل في الكون يا جماعة هي رسالة من الله عز وجل لنا، سواء بقى في عموم الكون، في خصوص بلادنا، في خصوصك أنت، أي حاجة.
زمان في عصر النبوة، آيات الله عز وجل الشرعية التي كانت تنزل يا إما آيات مخصوصة، يعني إيه؟ يعني يحدث أمر فيحدث الله عز وجل له إنزالاً لكلامه سبحانه وتعالى يناسب هذا الأمر الذي حدث. فمثلاً تحصل حادثة الإفك فينزل الله عز وجل آيات سورة النور، تحدث غزوة بدر فينزل الله عز وجل آيات سورة الأنفال، تحدث غزوة أحد فينزل الله عز وجل آيات سورة آل عمران، وهكذا. يبقى كلما حدث حدث، أحدث الله عز وجل له إنزالاً لكلام يناسب هذا الحدث.
الآن وقد انتهى عصر النبوة، يعني إيه انتهى عصر النبوة؟ يعني ما فيش حدث سيحدث ونتخيل أننا نصبح الصبح نلاقي آيتين جديدتين في المصحف، يعني مش موجودة، خلاص ما فيش، ده مش هيحصل. طيب إيه اللي تبقى؟ حاجتين؛ أول حاجة أن نسقط الآيات الشرعية على واقعنا، ده معنى. والمعنى الثاني بقى أن يرسل الله عز وجل آيات قدرية، أن يرسل الله عز وجل آيات قدرية. يعني إيه آيات قدرية؟ يعني الله عز وجل يريد أن يستعتبنا، فيرسل لنا آية قدرية يستعتبنا بها. عظم الفساد وكثرت المعاصي وانتشرت الكبائر وكذا وكذا، لو كان النبي عليه الصلاة والسلام عايش كان ممكن ينزل آيات أو يجي جبريل عليه السلام للنبي محمد صلى الله عليه وسلم ويخبره بوحي أن حدث كذا وكذا، ولا بد من إحداث كذا وكذا من توبة أو أي حاجة، ما هو دلوقتي ما فيش ده، فيحصل إيه؟ الله عز وجل يرسل لنا آية قدرية.
إزاي هنتعامل بقى مع الآية القدرية دي؟ أهل الإيمان زي ما قلنا، زي ما لهم اهتمام ولهم عناية بالآيات الشرعية، ينبغي أن يكونوا كذلك مع آيات الله القدرية، وهذا الكلام دندنا حوله كثيراً في هذا المسجد، وهذا أول الأمر، وكل حاجة بعد كده فرع عن هذا الأصل الذي ينبغي أن نتحقق به. من أكثر الرسائل التي تأتيني بكثرة، يعني عاوزين نشرح عقيدة، وأنا أزعم أن معظم دروسنا هنا هي في الاعتقاد، أزعم، ده زعم مني. ما هو ده أصل التوحيد يا جماعة؛ أن كل ما يكون في كون الله إنما يكون بقدره سبحانه وتعالى، ده أصل التوحيد أهو، أو أصل من أصول التوحيد. فالكلام سهل، إنما وقت التطبيق قد تجد القلوب، لا، يعني مثلاً قلبك في اعتمادك على ربك حاله، هو لو أنت نايم في بيتك وعربيتك راكنة تحت والفيزا في جيبك وحسابك في البنك فيه فلوس، هل قلبك في الوقت ده في اعتمادك وتوكلك على الله سبحانه وتعالى زي قلبك لو أنت متداين والديانة عاملين عليك محاضر في القسم، واترفع عليك قضايا، وأخذت حكماً وهربان؟ تخيلوا بقى أنك لو أحرزت هذا الأصل الذي ذكرناه لكان حال قلبك هو أنت في الحالتين؛ قلبك لا يلتفت للسبب أصلاً، غير ملتفت، لا ملتفت لا لحساب في بنك، ولا لمحفظة فيها فلوس، ولا لعربية راكنة تحت البيت، ولا لأي حاجة، قلبك مش ملتفت للسبب.
وهذا موجود كثيراً، يعني سواء في سيرة النبي عليه الصلاة والسلام، أو في قصص السلف، أو حتى في العصر الحديث. الشيخ أسامة عبد العظيم رحمه الله، في مرة الضابط بيقول له إيه يعني أكرمه كده وبتاع في الثمانينات، وبعدين بيقول فجاء الضابط رأى أن له يداً على الشيخ، وضابط فعلاً كان مكرماً للشيخ رحمه الله، فقال له مرة بقى كان جاء له فرخة ولا بتاع دخلها له، فانتهز الفرصة وبيقول له: لو أنا بقى ما كنتش هنا يا شيخ؟ فالشيخ قال له: كان ربنا يبعت لي واحد طيب زي حضرتك كده برضه ويدخل لي الحاجة. القلب ما هو معتمد على فلان ولا علان ولا أي حاجة من الحاجات دي، بل يا جماعة عكس ذلك خذلان، ولما قالوا: {لَنْ نُهْزَمَ الْيَوْمَ مِنْ قِلَّةٍ} حصل فيهم إيه؟ ويوم حنين إذ أعجبتكم كثرتكم، يعني إيه أعجبتكم كثرتكم؟ يعني التفتت قلوبكم للأسباب باختصار، مش كده؟ فلم تغني عنكم شيئاً، الجيش كله فروا، ما تبقاش غير شوية كده حوالين النبي عليه الصلاة والسلام. والنبي صلى الله عليه وسلم حكى أن نبياً من الأنبياء نظر يوماً في جيشه، فقال: "من يقوم لهؤلاء؟" مين يقدر يقف في وش دول؟ يعني أعجب بكثرة أتباعه، فأوحى الله إليه أن اختر لقومك إحدى ثلاث، واختار لهم بقى حاجة من ثلاثة، وكان ثلاث حاجات فيهم هلاك، خلاص. فالاعتماد، اعتماد قلبك على الأسباب وعدم رؤية الرب عز وجل في كل صغير وكبير، أهو ده الخلل في التوحيد، عاوزين نضبط هذا الأصل؛ أن كل ما يكون في كون الله لا يكون إلا بقدر الله عز وجل.
خلاص، وزي ما قلنا الكلام ده سهل واحنا بنقوله في وقت الراحة، إنما وقت ما تحصل الأزمة أو بعد ما تحصل الأزمة تلاقي الكلام ممكن ما يبقاش كده قوي، هتلاقي وقت الأزمة ممكن تلاقي نفسك عمال تفكر في كل حاجة إلا ربنا سبحانه وتعالى، ممكن يحصل كده. طيب اتصل لي بفلان، طيب شوف لي علان، وتتصل بفلان تليفونه مقفول فتتوتر، طيب يا ابني فين ربنا؟ يا ابني فين ربنا؟ يمكن ربنا بيغلق في وجهك كل الأبواب لترجع إليه سبحانه وتعالى، فيبقى ده الأصل الأول؛ أن الله عز وجل له آيات قدرية، وهذه الآيات رسائل من الله عز وجل لعباده، زي ما قلنا سواء الآيات دي آيات عامة في العالم، آيات خاصة في دولة، آيات أخص من هذا في حي، أخص من هذا في خاصة نفسك، لازم تقعد تتدبر تلك الآيات، يا رب ما الذي تريده مني؟ مش سؤال اعتراض، لا ما الذي تريده مني؟ يعني يا رب هذه الآية القدرية التي أرسلتها ما رسالتك لي أنا؟ ما لكش دعوة في هذه الآية القدرية. هذا هو الأصل الأول الذي ينبني عليه أي كلام هيجي بعد كده، وهذا الأصل كثير بنقوله في المسجد هنا وهو من أهم الأصول التي إن أحرزناها أحرزنا الخير الكثير.
خلاص، من جملة آيات الله عز وجل القدرية الزلازل، فهذه من جملة آياته القدرية. يبقى لما يحصل زلزال، أول معنى نحرزه في حصول الزلزال أنه من الله سبحانه وتعالى، هنصبح الصبح هنلاقي القنوات الإخبارية ومواقع التواصل وكل حاجة بتقول أصل حصل مش عارف إيه في القشرة الأرضية في جزيرة إيه، فحصل إيه، فتمدد لفين، أنت تقعد تسمع الكلام ده كله ولا يلتفت قلبك لشيء منه. لا يا شيخ الكلام ده غلط، دي مش الأسباب، ما قلتش كده، زي ما بالضبط قلت لك من شوية، لا يلتفت قلبك لا لفلوسك اللي في البنك ولا لعربيتك اللي تحت البيت ولا لشقتك اللي أنت نايم فيها، وهي أسباب الراحة، لكن قلبك إذا التفت إليها خذلت، هي دي سهلة؟ لا مش سهلة، هي صعبة، هي صعبة مش سهلة، احنا عارفين ده كويس.
ولذلك يا جماعة حدوث الآية بسبب، ربما كان من جملة البلاء أصلاً، حدوث البلاء أو الآية القدرية دي بسبب، ربما كان من جملة البلاء. تخيلوا كده لو أن الله عز وجل ضرب الأرض بآية غريبة عجيبة والعلماء قعدوا يبحثوا ما لقوش سبباً، هنا الرقاب ستخضع لله قولا واحداً، ما هو العلماء بيقولوا إحنا علماء الدنيا في الفيزياء وفي الجيولوجيا ومش ما فيش سبب، ما نعرفش اللي حصل ده حصل ليه، حينها تذعن خلاص القلوب والرقاب وستطأطئ الرؤوس، صح؟ إنما من جملة الخذلان بقى أن يكون لتلك الآيات أسباب، وهنا بقى ينقسم الناس، ينقسم الناس لناس التفتت بقلوبها إلى الأسباب، وناس رأت الأسباب، شايفة الأسباب مش ألغت الأسباب، هي شايفة الأسباب وكل حاجة لكن قلوبها مع الله سبحانه وتعالى. فيجي يقول لك يا عم ربنا إيه بيقول لك القشرة، أقول له ما هي القشرة دي إيه؟ ما هي مربوبة مخلوقة برضه. طب وحركة، حركة مش عارف الطبقات، أقول له ما هي الطبقات دي إيه؟ ما هي مربوبة مخلوقة، وحركاتها مربوبة مخلوقة. ببساطة يعني مين اللي خلق الطبقات ومين اللي خلق القشرة ومين حرك الطبقات ومين؟ هو الله سبحانه وتعالى، آه فإحنا شايفين الأسباب، آه شايفين الأسباب، لكن قلوبنا ملتفتة إليها، لا تلتفت قلوبنا لأي سبب.
وعشان يا جماعة ربنا سبحانه وتعالى، لأن الموضوع ده صعب على القلوب، آه صعب، والله عز وجل أعلم بنا منه، {أَلَا يَعْلَمُ مَنْ خَلَقَ}، فعمل إيه سبحانه وتعالى؟ ضرب لنا أمثلة لمواقف تعطلت فيها الأسباب، ولمواقف لم يؤثر فيها غياب الأسباب عشان نخلص بقى من القصة دي تماماً. يبقى في مواقف تتعطل فيها الأسباب، فتلاقي النار قدامك أهي ولا تحرق، ما هي النار سبب الإحراق، وبعدين مش لا تحرق، يا ريت لا تحرق، لا، ده الطير يطير فوق النار يحصل فيه إيه؟ يتحرق وينزل مشوي. وبعدين سيدنا إبراهيم يترمي في النار فالحبال بتاعته إيده تتحرق ويتفك، وهو ما يتحرقش، يعني مش مثلاً سلبت النار الخاصية بالكلية، بقى عندنا نار كده مولعة ما بتحرقش، وعندنا سكين لا تذبح، على قول من قال إن إبراهيم أمر السكين على رقبة الذبيح، فعندنا سكين لا تذبح، وعندنا سم لا يقتل، مين شرب السم؟ خالد، سم لا يقتل، رايح في الغزوة وبعدين بتاع الملك الكفار قال له بقول لك إيه طيب، بدل ما حرب وفرهدة ودم وبتاع، خد سم أهو اشربوا مش أنتم بقى بتوع ربنا، واشرب السم ده والله لو ما أصابكش في حاجة خلاص كفيتهم القتال وخد البلد وهنسيب لك البلد. فأخذ خالد السم وسمى الله وشرب ولم يضر، هنا يا جماعة تعطلت الأسباب، ودايماً أقول للشباب وتعطل حاجة تانية، حد عارف إيه؟ تعطلت أحكام الفقه الظاهرة. هنا لو جبت مائة فقيه وخالد لسه ما شافش السم وسألت المائة فقيه هل جائز هذا الفعل؟ ولا فقيه هيقول لك جائز، المائة هيقولوا لا يجوز شرب السم، هنا ما فيش، طب خالد يعني ما هواش فقيه؟ مش عارف إن ده حرام؟ هو تعطلت تلك، هنا يا جماعة في يقين بيحصل في القلب، ما خلاص، زي مين كده شيخ الإسلام ابن تيمية، يُحكى عنه مع الراجل بتاع الرفاعية ده.
كان الرفاعية دول في ضلالة وكانوا يموّهوا على الناس أن هم يدخلوا النار وما يتحرقوش، وكانوا فعلاً بيعملوا كده، يدخلوا النار وما يتحرقوش فعلاً، وكان ليهم حيلة كده أن هم بيدهنوا جسمهم دهن معين يعمل زي طبقة عازلة بينهم وبين النار، قالوا إن دهن بتاع الضفادع أو حاجة زي كده يعني، المهم دهن معين ما هواش سهل أن هو يتأثر بالنار، طبعاً مش بيدخلوا يقعدوا يعني بيعدوا مثلاً من النار أي حاجة كده يعني وما يحصلهمش حاجة. فشيخ الإسلام عارف الملعوب ده، فجاء له الراجل بتاع الطريقة الرفاعية دي وقال له أنا بيحصل معايا كذا وكذا، فقال له طب تمام، طبعاً أنتم عارفين الدهن الماية ما تأثرش فيه، أو إيه اللي يأثر فيه؟ مادة عضو زي الخل زي كده، فراح جاي ابن تيمية قال له: طيب أنا وأنت هنغتسل قدام الناس بالخل ده وندخل أنا وأنت النار، أنا وأنت هنخش مع بعض النار. ابن تيمية بقى بقى فقيه، ولا على ماؤوسهم كده يعني إيه رأيكم؟ اتغسلوا الاثنين بالخل، قعد الراجل، قعد ابن تيمية بقى، الغريب مش في كده، الغريبة ابن تيمية راح ماسك إيديه وقال هلم إلى النار ويشد في الراجل عاوز يدخل بيه النار، ما تحركش، ما هو ده فقه، فقه إيه؟ أنت بتعمل إيه؟ أنت داخل تموت نفسك، غيره جائز، خلص الموقف وكل واحد راح لحاله، وجاء تلاميذ ابن تيمية قال له: طب لو كان قام؟ قال ابن تيمية: كنت على يقين أن الله سيجعلها عليَّ برداً وسلاماً كما جعلها على إبراهيم. طب اليقين ده جه منين؟ ما نعرفش بقى يعني هنا تعطلت الأحكام خلاص، وقفت الأحكام. سيبكم من دي، تعال بقى نرجع تاني، يبقى ربنا سبحانه وتعالى ضرب لنا أمثلة في القرآن يا جماعة أهو لحاجات.
السبب قدام عينيك ومؤدى إلى المسبب وحاجات السبب مش موجود وحدث المسبب، فيولد ولد لغير أب وربنا يقص علينا ده في القرآن، ويولد ولد لشيخ كبير وامرأة عاقر وربنا يقص عليك ده في القرآن، هات بقى كده أطباء الدنيا واحكي لهم الحكاية دي، سيب الحكاية الثانية خليك في الحكاية الأولى، قول لهم ولد اتولد من غير أب، هيقولوا مستحيل، مستحيل.
حدث وبعدين في نفس القصة ما هي القصة كلها عجيبة بس الناس مش واخدة بالها، في نفس القصة المرأة، أولاً امرأة يعني ضعيفة أصلاً، وبعدين جاءها المخاض، أضطرها المخاض إلى جذع النخلة، يعني المرأة في وقت المخاض أشد ضعفاً، وبعدين تقوم هزة النخلة تنزل الرطب، ده مين ده؟ طب هات أنت كده اثنين رجالة وقول لهم هزوا النخلة هتنزل رطب؟ مش هتنزل رطب. هنا يا جماعة القصة كلها أصلاً هي قصة عجيبة من حيث فكرة الأسباب وتأدية الأسباب إلى المسببات.
وبعدين الطفل الرضيع الصغير هل عنده الآلة؟ كان طفلاً صغيراً في اللفة ويتكلم، ده مش، ما هو لسه ما عندوش الآلة دي، لم تنمو تلك الآلة قال الكلام، فيتكلم أهو من غير سبب، يعني مع عدم وجود السبب حصل أنه اتكلم، أشارت إليه قالوا: ﴿كَيْفَ نُكَلِّمُ مَن كَانَ فِي الْمَهْدِ صَبِيًّا * قَالَ إِنِّي عَبْدُ اللَّهِ﴾ [مريم: 29-30]. ده كله ليه يعني؟ القرآن ليه يقص علينا كل هذه القصص؟ عشان يا سلام شايف! لا مش كده خالص يا جماعة، عشان الأسباب تخرج من قلوبنا تماماً تماماً، يعني ما تاخدش بالأسباب؟ خد بالأسباب لكن قلبك ما يعتمدش على الأسباب.
سيدنا النبي عليه الصلاة والسلام من أجمل المواقف اللي بحبها جداً أن جاية له الدابة البراق وبعدين يركبها ويوصل لبيت المقدس، يقوم يعمل إيه؟ أول حاجة يعملها يربط البراق. طب هو يعني هيجري؟ ده هو الدابة جاية لك من فوق لكده يعني مش هيجري، لكنه المعلم صلى الله عليه وسلم أول ما ينزل على البراق يروح رابط البراق في حلقة باب بيت المقدس، معلمنا صلى الله عليه وسلم، اعقلها وتوكل، فاه خد بالأسباب لكن قلبك خدت بكل الأسباب فلازم بقى، لا مش لازم إيه اللي لازمه؟ مش لازم، لا لازم تنجح ولا لازم الصفقة تتم ولا لازم الجوازة تتم ولا تبقى رئيس الشركة، مع كل الأسباب اللي أخدت بيها، واحد تاني ما خدش بأي سبب ويبقى رئيس الشركة والصفقة تتم والجوازة تتم، هو رزقه سبحانه وتعالى رزقه.
فأول الأمر بقى أن هذا الزلزال الذي حدث وغيره من الآيات منه سبحانه وتعالى، منه، فإذا استقر في قلبك هذا، رحت بقى تبحث عن حكمة هذا الأمر بخصوصي بقى إحنا في زلزال حصل. وبعدين يا جماعة الزلزال بالذات يعني كآية من الآيات، الزلزال بالذات ما هياش أي آية، ليه ما هياش أي آية؟ لسببين؛ أول سبب أن الآية دي بالذات ربنا سبحانه وتعالى أخبر عنها أنها بيرسلها سبحانه وتعالى عقوبة للأقوام، يعني دي وغيرها طبعاً في بس هقصد يعني دي ليها خصيصة كده في وسط الآيات الكونية القدرية أن ربنا أهلك بها أقواماً.
وبعدين فهم الصحابة للمعنى أنه هذا على عمومه، يعني أول ربنا أهلك أقواماً بهذه الآية، زي مين؟ قوم صالح، مش كده؟ ﴿فَعَقَرُوا النَّاقَةَ وَعَتَوْا عَنْ أَمْرِ رَبِّهِمْ وَقَالُوا يَا صَالِحُ ائْتِنَا بِمَا تَعِدُنَا إِن كُنتَ مِنَ الْمُرْسَلِينَ * فَأَخَذَتْهُمُ الرَّجْفَةُ فَأَصْبَحُوا فِي دَارِهِمْ جَاثِمِينَ﴾ [الأعراف: 77-78]. فقوم صالح أهلكوا بالرجفة، وقوم شعيب ﴿وَقَالَ الْمَلَأُ الَّذِينَ كَفَرُوا مِن قَوْمِهِ لَئِنِ اتَّبَعْتُمْ شُعَيْبًا إِنَّكُمْ إِذًا لَّخَاسِرُونَ * فَأَخَذَتْهُمُ الرَّجْفَةُ فَأَصْبَحُوا فِي دَارِهِمْ جَاثِمِينَ﴾ [الأعراف: 90-91].
بل ربنا سبحانه وتعالى يا جماعة أرسل زلزالاً رجفة على قوم في قصة عجيبة جداً سواء في أشخاصهم أو في الظرف اللي هم رايحين فيه، يعني لما نقرأ القصة وهي آية أيضاً في كتاب الله عز وجل حاجة عجيبة، ربنا عاقب قوماً على رأسهم نبي من أولي العزم من الرسل، طب والناس دي كانت الخلص في قومه اللي هم النقاوه، إيه رأيكم؟ قال سبحانه وتعالى: ﴿وَاخْتَارَ مُوسَىٰ قَوْمَهُ سَبْعِينَ رَجُلًا لِّمِيقَاتِنَا فَلَمَّا أَخَذَتْهُمُ الرَّجْفَةُ﴾ [الأعراف: 155]. إيه ده؟ الأول بس في هنا حاجة، اختار موسى، يبقى موسى أول أهو نبي من أولي العزم من الرسل، ماشي، وبعدين اختار موسى من قومه سبعين رجلاً، كده الآية كده اختار موسى قومه، يعني إيه اختار موسى قومه سبعين؟ يعني إيه؟ قالوا إن هؤلاء هم الخلص، فكأن ما فيش غيرهم أصلاً، اختار موسى قومه سبعين رجلاً لميقاتنا، مش من قومه يعني يبقى في بقية قوم ودول لا، ده هو ما فيش غيرهم، عارفين كده مدرس مثلاً يقوم منادي على واحد أحمد تعالى يقول له جيب أحمد كده، وحاطط طالع للنظر له الفصل بتاعي ما فيهوش غير أحمد، هل معنى كده أن الفصل بتاعه هو فيه طالب واحد؟ يعني ما حدش يفهم كده من الجملة خالص، مش كده؟ أهو ده المعنى اختار موسى قومه، دول الخلا النقاوه، إيه اللي حصل لهم؟ أصابتهم الراجفة، زلزال.
طيب ليه؟ إيه الحكمة في ده؟ يعني ليه؟ هنعرف إن شاء الله كمان شوية. يبقى ده أول معنى أن الله عز وجل يعاقب أقواماً بالزلزال. وبعدين بقى كيف فهم الصحابة ذلك؟ فهموها على عمومها، يعني إيه؟ يعني مش الزلزال ممكن يجي عقاب وممكن كده، يعني إيه صدفة كده؟ لا الصحابة ما فهموش كده، بل كلما حدث زلزال أحدثوا كلاماً، يعني الصحابة يحدثوا كلاماً يفهمنا هم شايفين الزلزال ده إزاي.
فمثلاً يحصل زلزال في الكوفة، فابن مسعود يقول إيه؟ هي يا جماعة القشرة الأرضية ومعلش بقى يعني نستحمل اتحركت وبتاع، يقول كده ابن مسعود؟ ما يقولش كده، يا أيها الناس إن ربكم يستعتبكم فأعتبوه. فهم الأولياء أهو، ده الفهم، يعني دول بيفهموا أكتر من بتوع الجيولوجيا، آه بيفهموا أكتر، ليه بيفهموا أكتر؟ لأن هم خلاص عرفوا قول بتوع الجيولوجيا، ما هو ما بينفوش قول بتوع الجيولوجيا، بيقولوا ده طبقة أرض، هنقول طب جزاكم الله خيراً وإحنا عرفنا قولكم، إحنا بقى عندنا قول زيادة على قولكم كمان، هو فعل الرب سبحانه وتعالى.
طب وليه بقى طبقات الأرض فتنة؟ والله فتنة، يعني إيه فتنة؟ عشان ناس تنصرف قلوبها لطبقات الأرض وتحرك طبقات الأرض فتبقى الآية سبحان الله فتنة، وناس تنبعث قلوبها للرب سبحانه وتعالى ولا ترى غيره، لا ترى غيره، مش يعني هو ربنا وطبقات الأرض، لا، هو ربنا وما فيش طبقات أرض، ربنا اللي زلزل، هو اللي زلزل سبحانه وتعالى، طب ده في طبقات أرض؟ ما هو اللي حرك سبحانه وتعالى، بسيطة جداً، يا أيها الناس إن ربكم يستعتبكم فأعتبوه.
وبعدين يحصل زلزال في المدينة في عهد عمر يقول إيه؟ يقول ما حدث هذا إلا لشيء أحدثتموه، والله إن عاد لأسأكنكم فيها أبداً. المدينة دي دار الخلافة، وعمر ده مين؟ الخليفة، ما فيش مجاملة، دار الخلافة عمر رضي الله عنه كان تحتيه بيقولوا 26 دولة مش 26 محافظة، خليفة المسلمين كان تحتيه بيقولوا 26 دولة، يعمل الخليفة يقول لو حصل زلزال تاني مش هقعد في دار الخلافة، يعني هسيب القصر الرئاسي وهمشي، مش هتلاقوني، دوروا لي بقى على طريق جره بقى، لا أسأكنكم فيها. فكان الصحابة يا جماعة فهموا إيه؟ أن الآية دي بخصوصها إيه؟ الزلزال دي لما تحصل فإنما حصلت لشيء أحدثناه، ﴿ذَٰلِكَ بِأَنَّ اللَّهَ لَمْ يَكُ مُغَيِّرًا نِّعْمَةً أَنْعَمَهَا عَلَىٰ قَوْمٍ حَتَّىٰ يُغَيِّرُوا مَا بِأَنفُسِهِمْ﴾ [الأنفال: 53]. فلو إحنا في نعمة الأمان من هذه الزلازل وفجأة يحصل زلزال، إحنا نفكر في إيه أول حاجة؟ إحنا كنا في نعمة وسلب بعض هذه النعمة، خلي بالكم إحنا هنتكلم دلوقتي بقى في قوة الزلزال وهنتكلم في الحتة دي إن شاء الله، فقمنا مفزوعين من النوم.
فأول معنى يجي في دماغنا الآية دي ﴿حَتَّىٰ يُغَيِّرُوا مَا بِأَنفُسِهِمْ﴾ [الأنفال: 53]. ﴿ذَٰلِكَ بِأَنَّ اللَّهَ لَمْ يَكُ مُغَيِّرًا نِّعْمَةً أَنْعَمَهَا عَلَىٰ قَوْمٍ حَتَّىٰ يُغَيِّرُوا مَا بِأَنفُسِهِمْ﴾ [الأنفال: 53]. أي يغيروا طاعته بمعصيته وشكره بكفره وأسباب رضاه بأسباب سخطه، حينها تتبدل الأحوال، وتبدل الأحوال ده يا جماعة مش لازم يحصل في سنة واثنين، ممكن يحصل في لحظة، في لحظة عقوبة من الله عز وجل. عارفين يا شباب عشان ما ننساش، إيه هي أشد عقوبة في اللي حصل؟ أشد عقوبة في اللي حصل غفلتنا مش الزلزال، أشد عقوبة غفلتنا.
ما هو المفروض لو دلوقتي لفينا المايك وأنا أولكم أهو، وكل واحد يقول بأي شيء عاهد ربه بعد الزلزال، أو كل واحد فينا وأنا أولكم حاله اتغيرت إزاي بعد الزلزال، هنلاقي نسبة كام في المئة حصل له حاجة زي دي؟ السامع والمتكلم أقل القليل، ليه؟ غفلة، غفلة يا جماعة. ابن نوح مع كل الآيات اللي شافها وهو في غفلة، يعني اللي أنا عاوز أقوله إيه، أنت ممكن تكون بتشوف، ده إحنا دلوقتي بنشوف آيات كبيرة ومش شايفينها، أنتم فاهمين المعنى ده؟ يعني ممكن ما حدث يكون آية كبيرة على مثلها يؤمن الناس وإحنا مش شايفينها، مش شايفينها، هو ابن نوح ده يا جماعة لما سيدنا نوح بيقول له تعال اركب معانا كان هو شايف هو طالع الجبل أنه هيموت؟ طب أنا دلوقتي بقول لكم الموقف اللي إحنا اللي القرآن بيحكيه لنا ده، أي عاقل لو اتحكى له الموقف يقول في أمل في النجاة؟
ما هو الموقف ده بقى مش زي الزلزال، عارفين ليه؟ الموقف ده ملوش أسباب، أنتم يا جماعة متخيلين الموقف، موقف سيدنا نوح ده أن السماء مش مطرت، ربنا وصف الماء بماء منهمر، والأرض انفجرت عيوناً، أنتم فاهمين المعنى ده؟ أن فجأة كده فجأة بتبص حواليك لقيت الأرض كل الأرض تنفجر عيوناً والسماء بتنزل ماء منهمر، حتى أن المية تطلع من مكان عجيب، تطلع منين؟ من التنور، التنور ده اللي هو الفرن مكان النار، فارت التنور، المية بقت تطلع من كل حتة، فدي حاجة ملهاش سبب، وحاجة غريبة وحاجة ما سمعناش عنها قبل كدة.
طب المنظر ده، وبعدين المنظر الأكثر رعباً بقى من ده، وصف الأمواج التي ذكرها الله، أنتم يا جماعة حد مدرك الوصف ده؟ ﴿وَهِيَ تَجْرِي بِهِمْ فِي مَوْجٍ كَالْجِبَالِ﴾ [هود: 42]. أنا عاوز لحظة معلش يعني، أصل إحنا ريتم حياتنا مخلينا مش مركزين في حاجة، أنا عاوزك للحظة تتخيل مشهد موجة واحدة بعلو بارتفاع جبل، وهي مش موجة، لا هي تجري بهم في موج، خلاص ده بقى إيه طبيعة الموج في الوقت ده؟ كالجبال. وفي هذا الوقت ينادي نوح ابنه اركب معنا، قال سآوي إلى جبل يعصمني من الماء.
إحنا ممكن نكون في الغفلة دي والله العظيم ومش داريين، ليه؟ لأن الغفلة شملتنا، فإحنا عارفين لما يبقى كل الناس، أما كل الناس ريحتها وحشة فمش حاسين أن حد ريحته وحشة، إحنا كلنا نفس الريحة، هو كده، إحنا الغفلة قد شملتنا، فصاحين الصبح عادي جداً، اللي وراه شغل راح شغله، واللي وراه جامعة راح جامعته، واللي بيكلم واحدة كلمها، واللي مش عارف إيه كله عادي، وكله على نفس الروتين اليومي، يعني أنا متعود أحط السماعات في ودني عشان بسمع أغاني وأنا عادي، اتحطت السماعات واتسمعت الأغاني، أنا متعود بصطبح بمش عادي، اصطبحت عادي، أنا متعود بقوم 7 الصبح عشان الشغل والفجر أما بصحى ما بقولش ما بيصليش، أما أصحى أصليه بعد الشروق، عادي، عملت كده برده، عادي جداً. هذه العقوبة والله أشد من الزلزال، أشد من الزلزال، أن يرسل الله عز وجل لنا آية كالزلزال وممكن بعضنا دلوقتي يبقى مستغرب أن إحنا عاملين درس عن الزلزال، هذه عقوبة أشد.
فربنا سبحانه وتعالى عاقب رسولاً من أولي العزم من الرسل، عفواً عاقب قوماً على رأسهم هذا النبي عليه السلام موسى، ليه عاقب القوم دول؟ ليه هم عملوا إيه؟ ده دول الخلص، يعني نقاوة النقاوه اللي في بني إسرائيل، عملوا إيه دول عشان يعاقبوا بزلزال برجفة؟ العلماء قالوا حاجتين، ركزوا بقى يا شباب، ليه؟ ليه ركزوا؟ لأننا بنكلم الفئة المتدينة دلوقتي، إحنا مش بنتكلم الفسقة الفجرة، بنتكلم الفئة المتدينة، فدول عملوا إيه دول؟ الناس الخلص دي عملت إيه عشان تأخذهم الراجفة؟
مما قيل أول معنى أنهم رأوا بني إسرائيل يعبدون العجل فلم يذايلوهم، ده أول معنى، اللي هو إيه؟ شافوا الناس بتعبد العجل مش عبدوا العجل معاهم، لا عشانهم بيعبدوا العجل فلم يذايلوهم، ما بعدوش عنهم بقى، عادي جداً، بيؤاكلوهم ويشاربوهم ويجالسوهم عادي جداً، عادي. المعنى ده بعينه ذكره الله عن بني إسرائيل: ﴿لُعِنَ الَّذِينَ كَفَرُوا مِن بَنِي إِسْرَائِيلَ عَلَىٰ لِسَانِ دَاوُودَ وَعِيسَى ابْنِ مَرْيَمَ ۚ ذَٰلِكَ بِمَا عَصَوا وَّكَانُوا يَعْتَدُونَ * كَانُوا لَا يَتَنَاهَوْنَ عَن مُّنكَرٍ فَعَلُوهُ ۚ لَبِئْسَ مَا كَانُوا يَفْعَلُونَ﴾ [المائدة: 78-79].
مما قيل في هذه الآية، خلي بالكم كانوا لا يتناهون عن المنكر فعلوه، اسمعوا الكلمتين دول، إحنا في درك أسفل من اللي كان فيه بني إسرائيل، تخيلوا الدركة اللي إحنا فيها أخس وأحقر وأسفل من الدركة التي كان فيها بنو إسرائيل، كانوا لا يتناهون عن منكر فعلوه، مما قيل في تأويل هذه الآية أن أحدهم كان يرى يرى أخاه على ذنب فيقول له اتق الله، إيه ده؟ ما هو بيقولوا اتق الله اللي إحنا ما بنقولهاش، إحنا ما بنقولهاش خلاص، فين شعيرة الأمر بالمعروف والنهي عن المنكر دلوقتي؟ فين؟ وهي سبب خيرية هذه الأمة: ﴿كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ﴾ [آل عمران: 110]. لتأمرن بالمعروف ولتنهون عن المنكر أو، أهو اللي إحنا كنا فيه عذاب عام.
ينزل كان واحد يشوف أخاه على الذنب فيقول له: يا فلان، اتق الله. ثم لا يمنعه ذلك أن يكون أكيله وشريبه وجليسه. أهي دي اللي الآية نزلت فيهم يا جماعة؟ إيه رأيكم؟ ﴿لُعِنَ الَّذِينَ كَفَرُوا مِن بَنِي إِسْرَائِيلَ عَلَىٰ لِسَانِ دَاوُودَ وَعِيسَى ابْنِ مَرْيَمَ ۚ ذَٰلِكَ بِمَا عَصَوا وَّكَانُوا يَعْتَدُونَ * كَانُوا لَا يَتَنَاهَوْنَ عَن مُّنكَرٍ فَعَلُوهُ ۚ لَبِئْسَ مَا كَانُوا يَفْعَلُونَ﴾ [المائدة: 78-79].
يقول له: اتق الله، خلي بالك، ما بيعملش الذنب وقال اتق الله. وذمه الله ليه؟ لأنه لا يمنعه أن يكون أكيله وشريبه وجليسه وشريكه وزوجه وكل حاجة عادي جداً. طيب فين إنكار المنكر؟ فين إن قلبك يبغض هذا الذي تراه؟ يا جماعة قلنا لكم الخطورة في أن النبي صلى الله عليه وسلم أخبر أن من لم ينكر المنكر بقلبه الموضوع خطير، قال: «وذلك أضعف الإيمان»، وليس وراء ذلك في رواية مثقال حبة خردل من إيمان. أنك ما تنكرش المنكر بقلبك، أنت فاهم يعني إيه؟
يعني إحنا داخلين على شهر سبعة وثمانية أهو، يعني تروح الساحل فتلاقي التبرج على الشواطئ وفي القرى، فتلاقي قلبك حابب ده. أنت عارف لو قلبك عادي، وجوده زي عدمه، تبقى مصيبة. لو عادي حتى مش حابب، لو عادي تبقى مصيبة لأنك لم تنكر المنكر بالقلب. كده تخيل بقى أنك حابب ده، دعكم الآن من الكلام، أنت ممكن تقول استغفر الله بس أنت جواك مزقطط، حابب ده، وإذا غاب تتضايق.
ليه عارفين الحالة دي؟ حالة مين وصفها النبي صلى الله عليه وسلم: «تعرض الفتن على القلوب كعرض الحصير عوداً عوداً، فأيما قلب أشربها نكتت فيه نكتة سوداء، وأيما قلب أنكرها نكتت فيه نكتة بيضاء، حتى تصير القلوب على قلبين: قلب أبيض كالصفا لا تضره فتنة، وقلب أسود مرباداً كالكوز مجخياً». لا يعرف معروفاً ولا... هنعرف هنيجي لدي، كالكوز مجخياً.
القلب ده يا جماعة للنبي صلى الله عليه وسلم وصفه بالكوز المجخي، يعني إيه؟ إيه الشبه بالكوز ولا الكوباية؟ الكوباية دي عشان ننتفع بها، ينفع ننتفع بها وهي مقلوبة؟ مستحيل، مستحيل. الكوباية عشان تنتفع بها فيما خلقت لها، أقصد تقول لي ممكن أطبل عليها، أنا عارف الحركات بتاعتي، لا، يعني فيما خلقت لها؛ الكوباية خلقت عشان تملأ وتشرب، مش كده؟ عشان تنتفع بالكوباية طول ما هي مقلوبة انسى أنك تنتفع بالكوباية. فقلبك لو صار لتلك الحال انسى أنك تنتفع بقلبك، انسى كالكوز مجخياً.
طيب الحالة بقى اللي وصلت لها بنقول إيه؟ للي هو لما يشوف المعصية يفرح، ولما تغيب المعصية يزعل. قال صلى الله عليه وسلم: «كالكوز مجخياً، لا يعرف معروفاً ولا ينكر منكراً، إلا ما أشرب من هواه». وقبل كده قلنا لكم علامة فاضحة في حتة البحر والبلاج والحاجات دي، حد فاكر قلنا لكم إيه؟ وأنت قاعد كده لقيت واحد داخل نازل البحر بتيشيرت وشورت لغاية الركبة، أنا بكلم المتدينين ها، مش بكلم الفسقة، بكلم المتدينين، هتشمئز من المنظر، بعض الناس يعني، مع أن ده في ميزان الشرع إيه؟ مش حلال برضه؟ إيه اللي وداه هناك ده؟ ده حرام برضه. بس يعني في حاجة حلال، يعني فانت ما أذيتلي الحلال اللي في الموضوع، يعني إيه؟ يعني الدنيا كلها حرام في حرام، فانت جاي تعمل إيه هنا؟ فالشدة دي يا جماعة دي كلها علامات بتفضح، بتفضح القلوب، أنت إيه الميزان اللي بتقيس بيه دلوقتي؟
فأما لما شافوا الناس في المعاصي ولم يأمروا ولم ينهوا أخذتهم الرجفة. دول اللي هم مين؟ دول الخلص من الناس المتدينة. أخذتهم الرجفة ليه؟ لقوا الناس بيعبدوا العجل، فلم يزايلوهم. العجل ده بقى يعني مش لازم يبقى عجل، مش لازم، ممكن يبقى قانون وضعي، ممكن يبقى منهج أرضي، ديمقراطية ولا غيرها، ممكن يبقى أي حاجة. طيب إيه الواجب؟ أمر ونهي، وأنت نازل كمان يبقى في معاصي في كبائر بتحصل، أمر بالمعروف ونهي عن المنكر.
السبب الثاني الذي ذكره العلماء في هذه الآية، واختار موسى قومه سبعين رجلاً لميقاتنا، أن الرجفة أخذتهم ليه بقى؟ لأن موسى عليه السلام أخذهم وخرج بهم إلى الله يسألون الله سؤال المسكنة، أن يرفع الله عز وجل عنهم ما لحق بهم، يعني كان أصابهم الله عز وجل بنوع بلاء أو كده، فهم خرجوا يجارون إلى الله ويسألونه سؤال مسكنة. واضح أن سؤال المسكنة ده هيبقى سؤال إيه؟ يعني متخيلين أنه إيه؟ استغفار وتوبة وإنابة واعتراف بظلم النفس، واعتراف بفضل الرب عز وجل وتضرع بين يديه، هو ده سؤال المسكنة اللي إحنا خارجين نسأل ربنا إياه.
عملوا إيه بقى؟ لما خرجوا ورفعوا أيديهم قالوا: اللهم آتنا ما لم تؤت أحداً من الأولين ولا تؤتيه أحداً من الآخرين، فأخذتهم الرجفة. ده دعاء إيه؟ دعاء استحقاق، ده واحد خارج عنده اللي اتكلمنا عليها المرة اللي فاتت: أنا أستحق. فلما عملوا كده أخذتهم الرجفة. أنا دلوقتي مش هقول مين بيعمل كده، مين ما بيعملش كده، مين فينا اللي لما الدنيا تمر معاه يومين تلاتة حلوين، يعني إيه حلوين؟ يعني صلواتنا في المسجد، سنننا بتُجاب، ما بيسألش اليوم الرابع.
خلي بالكم مش بيسأل اللي هو إيه؟ مش سؤال ذل وتضرع، لا ده سؤال استحقاق، حتى لو ما قالش ده بلسانه، أنا ده أنا بقالي تلات أيام بصلي الفجر في الجامع، يعني لو ما دخلش الفردوس الأعلى مين هيخش؟ ده مين ما بيعملش كده فينا؟ ما هو إحنا يا جماعة لازم بقى نفضح أنفسنا، اللي هو آخر رمضان أول ما قلنا إيه، السيدة عائشة رضي الله عنها لو تفتكروا: يا رسول الله، لو وافقت ليلة القدر هقول إيه بقى أنا ليلة القدر؟ وساعتها وقفنا وقلنا لكم إيه، السيدة عائشة نظنها عبدت عبادة شكلها إيه؟ زي عبادة أي حد فينا كده؟ لا طبعاً، عبادة. وبعدين بقى ها أقول إيه بقى في ليلة القدر؟ «اللهم إنك عفو تحب العفو فاعف عني».
قلنا لكم ساعتها ده بيسموه دخول المفلس، ده دخول واحد مش شايف نفسه أصلاً، لا شايف لنفسه لا حال ولا مقام ولا عمل ولا أي حاجة. ساعتها قلنا لكم يعني أنت هتعبد ربنا وهتصوم وهتختم وهتقيم وهتروح تعمل عمرة وهترجع تقول لربنا: يا رب إنك عفو تحب العفو فاعف عني. ساعتها لو تفتكروا قلت لكم آخر الدعاء مرعب، الأكثر رعباً أول الدعاء، حد فاكر ليه؟ حد فاكر آخر دعاء إيه؟ اعف عني، ما سألتش فردوس أعلى ولا... صح كده، ما مش عاوز أدخل فردوس أعلى بقى، طب هنسأل إمتى؟ لو ما كانش في ليلة القدر هنسأل إمتى؟ ما هو المفلس مش شايف لنفسه حاجة أصلاً يسأل بيها، حاجة أنا عاوز يُعفى عني بس.
قلنا لكم أول الدعاء أكثر رعباً ليه؟ لأنها ما قالتش يا رب أنا صمت لك وختمت لك المصحف وقمت واعتمرت فاعف عني، حتى لو كان كده كان برضه سؤال العفو لا يا رب اعف عني، آه ليه؟ لأنك عفو تحب العفو، بس يعني مش عشان صمت، أنا مش شايفه الصوم أصلاً. يا جماعة أما بنقول كده هي فعلاً مش شايفه الصوم، أنتوا عارفين يا جماعة عشان بس نفهم لأن إحنا على قلوبنا حجب، أنا أنا أولكم سامع المتكلم، عشان نفهم المعنى: تخيلوا كده بالضبط التشبيه اللي أنا هقوله ده، حضرتك قُدّر ليك أنك هتخش تقابل أغنى راجل في الكوكب، خلاص كده، قُدّر ليك ده، هتدخل تقعد معاه دقيقة، رحت أنت ناصح بقى قلت إيه؟ أجيب له هدية.
فأنت ماشي كده لقيت إيه، شوف بقى الهدية اللي أنت جبتها له كمان، لقيت زي جنينة كده فرحت داخل عشان بقى تجيب له هدية، ما رحتش اشتريتها، رحت داخل الجنينة وأنت داخل لقيت مكتوب على الجنينة على البوابة بتاعة الجنينة ملك فلان الفلاني، اللي هو مين؟ اللي أنت رايح له دلوقتي. فروحت داخل جنينته، قلت أجيب له وردة بقى من الجنينة عشان أديها له هدية من جنينته، رحت رايح مختار وردة بقى حلوة كده ومفتحة وحمراء، لا خالص، رحت رايح لوردة دبلانة ميتة وقطعتها، وجيه ميعاد الموعد، رحت داخل عليه قلت له أنا جايب لك الهدية دي لحضرتك يا ريت تقبلها مني.
العجيب أنه قبلها، العجيب أنه قبلها، فبعد ما قبلها بدقيقة قلت له بقى أنا عاوز مليون دولار، والله يعني حق الوردة اللي أنا جايبها لك دي، أنا أستاهل والله، أنا أستحق المليون دولار. أو ده اللي إحنا بنعمله مع ربنا، إحنا بنعمله مع ربنا سبحانه وتعالى، إحنا بنعبده بأعضاء هو اللي خلقها، وبهمة هو اللي بعثها سبحانه وتعالى، وهو الذي أتى بنا إلى هذا المسجد عشان نقف، وهو اللي وفقنا لفتح المصحف عشان نختم، وهو اللي وفقنا لإتمام اليوم عشان نصوم، وبعد كل ده لا صمنا عدل ولا قمنا عدل ولا صلينا عدل ولا أي حاجة، وجينا بنقول له إيه: خُد بقى يا رب العبادة اللي هي ما تساويش أي حاجة دي، وفي المقابل أدينا فردوس أعلى.
فلما آجي أقول لكم دلوقتي عائشة ما كانتش شايفة الصوم، هي فعلاً مش شايفة الصوم، مش شايفاه ولا شايفة القرآن، هي فعلاً مش شايفة القرآن ولا شايفة صلاة، هي فعلاً مش شايفة الصلاة، مش شايفة الحاجات دي. ما هو صاحبنا اللي من شوية ده لو هو فاكر أن الوردة دي هو هينال بها حظوة عند هذا الرجل يبقى مخبول، يعني أنت يا ابني داخل جنينتي، جنينتي اللي أنا أبحتها لك وكان ممكن ببساطة أقول للحراس ده ما تخش، ما يخشش الجنينة ببساطة، فدخلت الجنينة وأبيت إلا أنك تجي لي بوردة زي دي، يعني اهتممت أنك تجيبها وردة لونها كويس ولا مفتحة ولا جايب لي الوردة دي، وبعدين بعد كل ده وبعدين قابلتها، يعني مش مثلاً رميتها في وشك، قبلتها ليه؟ أهو بقى كرم مني وتجاوزت وكذا وكذا، قبلت الوردة تقوم ترى لنفسك عليّ حقاً؟ أنت مجنون.
فهو "اللهم إنك عفو تحب العفو فاعف عني"، دخول المفلس ده هو ده نفس الكلام يعمله مع مين؟ سيدنا النبي عليه الصلاة والسلام مع أبوها، يعني السيدة عائشة ها أقول إيه، اللهم إنك عفو تحب العفو فاعف عني، نفس الكلام يعمله مع أبيها أبو بكر يجي له رضي الله عنه، أبو بكر بقى يعني لو أنت شاكك مثلاً في عبادة عائشة، طب أبو بكر؟ وبعدين يسأل النبي صلى الله عليه وسلم دعاء يدعو به في آخر صلاته، فالنبي يقول له إيه عليه الصلاة والسلام؟ أبو بكر، أبو بكر اللي هيدعي، أبو بكر اللي جاي يسأل: أنا عاوز دعاء مخصوص ليا كده، أبو بكر، فالنبي يقول له إيه عليه الصلاة والسلام: «قل اللهم إني ظلمت نفسي ظلماً كثيراً كبيراً»، روايتين في قول بعض أهل العلم ممكن نجمع بينهم، «ظلماً كثيراً كبيراً، ولا يغفر الذنوب إلا أنت، فاغفر لي مغفرة من عندك وارحمني، إنك أنت الغفور الرحيم».
نفس الكلام، لا بقى أنا صليت ولا أنا صمت ولا أي حاجة، ففكرة الاستحقاق عشان ما نسرحش، فكرة الاستحقاق مجلبة للرجفة للزلزال. إحنا بنكلم مين؟ الفسقة؟ لا والله، الناس اللي بتضرب على النواصي؟ والله أبداً، إحنا بنتكلم الناس المتدينة. فأخذتهم الرجفة، ليه؟ سألوا سؤال مستحق، أنتوا طالعين في موطن تطأطأ فيه الرؤوس وتُسكب فيه العبرات، هتقولوا لي بقى أديني اللي ما أديتهوش لحد؟ لا، خدوها رجفة. فوقوا، أنتوا عارفين معنى الزلزلة ده في معنى الآية، الفوقان. عارف أما تهز تمسك واحد تهزه كده بتفوقه، أو في معنى بتفوق أهل الإيمان، فوقوا اصحوا، المصيبة فين أن ما صحيناش؟ المصيبة أن إحنا ما صحيناش يا جماعة.
هذا الزلزال كان زلزالاً قوياً، كان زلزال قوي، مش زلزال بسيط، إحنا عدى علينا زلازل بعد 92 كان زلزال وممكن يروحوا نايمين ما حدش بيصحى، لا ده زلزال صحانا من النوم، فهو زلزال قوي مش بسيط، ومع قوته لم يكن مدمراً، يعني هو زلزال قوي بقدر الله وحكمته ولم يكن مدمراً برحمته سبحانه وتعالى. فنحن نشاهد في هذا الزلزال الأمرين جميعاً، نشاهد قدرته ورحمته، لازم نخرج من هذا المشهد الذي حدث بالأمرين: ﴿قُلْ هُوَ الْقَادِرُ عَلَىٰ أَن يَبْعَثَ عَلَيْكُمْ عَذَابًا مِّن فَوْقِكُمْ أَوْ مِن تَحْتِ أَرْجُلِكُمْ﴾ [الأنعام: 65]. ومن جملة العذاب الذي يُبعث علينا من تحت الأرجل الزلازل.
﴿قُلْ هُوَ الْقَادِرُ﴾ فنشاهد القدرة، وكان صلى الله عليه وسلم إذا قرأ الآية قال: «أعوذ بوجهك». نشاهد القدرة ونشاهد الرحمة، أنه إذ أرسل علينا هذا الزلزال القوي اللي شعرنا به وقمنا من جرائه ما فيش خسائر، ليه ما فيش خسائر؟ صدفة؟ أصل زلزال مركزه في جزيرة مش عارف إيه، فعبال ما إيه؟ ده إيه ده؟ سبنا إيه للملحد؟ ده إحنا يعني لما نكرر هذا الكلام يا جماعة، ولا ننقله على صفحاتنا حتى لو بننقل الخبر كخبر، يعني عملنا شير للصفحة الفلانية اللي هي بتاعة أخبار إيه ده؟ هو إحنا يعني ربنا سبحانه وتعالى ضربنا بهذا الزلزال عشان دي نوعية الأخبار اللي نتناقلها فيما بيننا أهل التدين؟ "أهوه زلزال كان مركزه فين فعبال ما وصلت لنا"، إيه ده؟ إيه ده؟ طب لو ملحد يعني لما إحنا بنعمل ده الملحد ده هيعملوا إيه؟ طب معلش يعني صعبنا عليهم.
الدنيا إحنا قوي كده، ما تسيبوا لهم الحتة دي. هو ده غلط يا ابني؟ هو أنا بقولك غلط وصح؟ بقولك هي دي رسالة ربنا لينا سبحانه وتعالى، إن تبقى دي نوعية الأخبار، فضلاً عن الكوميكس. بنهزر إيه ده؟ إيه ده؟ قوم لوط خلاص خرج المنشور يا جماعة، الناس دي مهلكة. وهم إيه الوصف اللي ربنا ذكره في القرآن؟ ﴿فِي سَكْرَتِهِمْ يَعْمَهُونَ﴾ [الحجر: 72]. والمنشور خرج، دول تاني يوم هيحصل فيهم حاجة ما حصلتش لأحد قبلهم؛ القرى هتترفع للسماء حتى سمعت ملائكة السماء نباح كلابهم، وهتتقلب، وهم نازلين هترسل عليهم حجارة من سجيل مسومة، كل واحد حجرته وراه، عذاب عجيب.
منشور العذاب خرج، الملائكة نزلت، ما فيش فرق بينهم وبين العذاب إلا سويعات، وهم بيعملوا إيه؟ بينزلوا كوميكس على الفيسبوك وبيهزروا ويضحكوا، ﴿فِي سَكْرَتِهِمْ يَعْمَهُونَ﴾. هي دي رسالة ربنا لينا، لأهل الإيمان لأهل التدين، سؤال استحقاق، سألوا سؤال استحقاق أخذتهم الرجفة.
السؤال الآن، في سؤال اتكرر في الفترة دي من إخواننا الدعاة جزاهم الله خيراً، سؤال مهم الحقيقة، لكن أنا مش عايز أقف معاه كتير، هقوله وهو اتكرر وقتل بحثاً من كذا حد، اللي هو: أنت كنت بتعمل إيه وقتها؟ سؤال مهم فعلاً، بس أنا مش شاغلني قوي السؤال ده على قد سؤال تاني: هو أنت حالك إيه بعدها؟
يعني كنت وقتها ما خلاص هي رسالة ربنا لينا يا جماعة، أنتم في غفلة يلا فوقوا بقى. فخلاص إحنا معترفون إن إحنا كنا في غفلة. السؤال دلوقتي الملح: حالك إيه بعدها؟ هو ده السؤال؛ لأن هي دي الرسالة في تلك الآية القدرية الكونية. فأصبحت ثاني يوم عامل إيه؟ بلاش ثاني يوم، أنا وأنتم برضه سامع متكلم، إلا من رحم الله، الزلزال حصل؛ فحضرتك صحيت من النوم اتفزعت أو كنت صاحي أو أي حاجة فما عملتش حاجة. فعملت إيه وقتها بقى في عز خوفك؟ عملت إيه وقتها؟
من اللي رجع نام تاني عادي؛ زلزال خلص، طب رجع نام عادي. أنا بقول أنا وأنتم، مش بنقول اللي جري على الفيسبوك، ومنا اللي خلاص وعدى الموضوع. لو خدنا نسبة مئوية لمن فزع إلى الله سبحانه وتعالى، وده في شريحة فيها تحيز. إحنا لو بناخد شريحة من المجتمع ما ينفعش نيجي ناخد شريحة من المسجد ونسأل سؤال في الدين؛ لأن دي شريحة العينة بايظة، هتطلع بايظة؛ لأن المفروض معظم الناس عارفة السؤال أو عملت صح، فيقولوا إن العينة دي فيها تحيز. لا، خد من هنا ومن هنا، ده إحنا هناخد العينة من بتوع المسجد بتوع الدرس، فنلاقي كام في المية فزع إلى الله؟ ونسبة الفزع قد إيه إلى الله؟ يعني كم في المية اللي من الساعة اتنين للفجر قائم بين يدي الله؟ مش لأنه خايف، مش خايف من الزلزال اللي خلص، لأنه فهم رسالة الله؛ يستعتبكم فأعتبوه. بلاش إنه راح صلى، منا قبل بس ما يحط رأسه على المخدة ويرجع ينام، تاب إلى الله؛ يا رب خلاص الذنب الفلاني آخر مرة. كام؟ هي دي يا جماعة رسالة ربنا سبحانه وتعالى، إن الله يستعتبكم فأعتبوه.
رسالة اليوم أيها الناس أن الله يستعتبكم فأعتبوه. أقول قولي هذا وأستغفر الله العظيم لي ولكم، سبحانك اللهم وبحمدك، نشهد أن لا إله إلا أنت، نستغفرك ونتوب إليك، والسلام عليكم ورحمة الله.
الشيخ أمجد سمير