بسم الله، الحمد لله، والصلاة والسلام على رسول الله، وعلى آله وصحبه ومن والاه. لا شريك له، وأشهد أن محمداً عبده ورسوله. اللهم صلِّ على سيدنا محمد النبي وأزواجه أمهات المؤمنين وذريته وأهل بيته كما صليت على آل إبراهيم إنك حميد مجيد.
الحقيقة كان المفروض اليوم الدرس الخامس في سلسلة تأمل سورة الحجرات، وكان كذلك لغاية ما خلصت صلاة الجمعة وانشرح صدري أن أتكلم في موضوع ثاني، واستخرت واستشرت بعض من أثق في رأيهم، وشجعوني أن أتكلم في هذا الموضوع، فخلونا نتكلم في موضوع آخر اليوم إن شاء الله ونكمل سلسلة الحجرات المرة القادمة، إن لم يطرأ شيء يقتضي درساً استثنائياً.
سورة لقمان سُميت باسم ذلك الرجل الصالح الحكيم لقمان. ولقمان لم يرد ذكره في القرآن إلا في هذه السورة، في سورة لقمان. ولقمان لما ذكر في السورة ذكر مرة بصفة وصفه الله بها، ومر في موقف من مواقف حياته، وهذا ذكر لقمان في القرآن. أما الصفة التي وصف بها فهي صفة الحكمة: ﴿وَلَقَدْ آتَيْنَا لُقْمَانَ الْحِكْمَةَ﴾ [لقمان: 12].
أما الموقف الذي قصه الله عز وجل علينا من خبره ومن قصته ومن حياته فموقف عجيب؛ لأنه موقف لو جئنا بمشهد هكذا، ما هو الداعية الذي قاعد أمام المسجد مثلاً ويدي محاضرة ساعة، ليس هذا الموقف، وما هو النبي الذي يدعو الكفرة ودخلوا في الإسلام وفي قصة ملحمية تحصل، وبعدين اربط بين الذي نقوله هذا وبين أن السورة باسمه أيضاً. وركزوا في الموقف، هذا موقف مهم، وهو موقف الوالد مع الولد، أب وابن: ﴿وَإِذْ قَالَ لُقْمَانُ لِابْنِهِ وَهُوَ يَعِظُهُ يَا بُنَيَّ لَا تُشْرِكْ بِاللَّهِ إِنَّ الشِّرْكَ لَظُلْمٌ عَظِيمٌ﴾ [لقمان: 13].
في آيات سنتعرض لها إن شاء الله، يبقى الموقف المشهد باختصار هو أب، ﴿وَإِذْ قَالَ لُقْمَانُ لِابْنِهِ وَهُوَ يَعِظُهُ﴾، هو أب بيعظ ابنه، هو هذا المشهد باختصار. الأعجب يا جماعة أن ختام السورة، السورة تسمت سورة لقمان، طب ما الموقف الذي لقمان ذكر فيه؟ ما يكون بين الوالد وولده في الدنيا. ختام السورة ما يكون بين الوالد والولد في الآخرة: ﴿يَا أَيُّهَا النَّاسُ اتَّقُوا رَبَّكُمْ وَاخْشَوْا يَوْمًا لَّا يَجْزِي وَالِدٌ عَن وَلَدِهِ وَلَا مَوْلُودٌ هُوَ جَازٍ عَن وَالِدِهِ شَيْئًا﴾ [لقمان: 33]. فكان المعنى أن فرصتك مع ولدك هنا في الدنيا؛ لأنه في الآخرة لا يجزي والد عن ولده ولا مولود هو جاز عن والده، ففرصتك مع ابنك هنا.
الحقيقة فكرة المشهد الذي يجمع بين الأب والابن متكررة في القرآن كثيراً جداً، وكل المواقف ترشدنا أن مسألة التوجيه والإرشاد والنصح والتربية النفسية هي مسؤولية الأب. ومفاجأة، لأن طبعاً دلوقتي البيوت معظم البيوت الأب فاكر كونه شغال وبيجيب فلوس ما حدش يسأله عن حاجة بعد ذلك، كله مرمي على الأم بعد ذلك، والحقيقة هذا غلط. الأب مسؤوليته «كلكم راع وكلكم مسؤول عن رعيته، الرجل راع في بيته وهو مسؤول عن رعيته»، فأنت مسؤول؛ دي ليست تعني أنك رجل مسؤول، لا، مسؤول يعني ستُسأل يوم القيامة عن تلك الرعية عملت معها ماذا.
فلو بصينا في قصص القرآن ما بين الوالد والولد، الأب والابن، سنلاقي القصص كلها تدور في هذا الفلك؛ فلك الأب الذي يوجه، الأب الذي يعظ، الأب الذي يهيئ ابنه نفسياً لأمر كبير، الأب الذي يستخرج الطاعة من ولده. سنمر بسرعة على هذه الأشياء، فمثلاً قصة لقمان: ﴿وَإِذْ قَالَ لُقْمَانُ لِابْنِهِ وَهُوَ يَعِظُهُ يَا بُنَيَّ﴾ في إرشادات وعظ. طيب قصة يعقوب مع يوسف: ﴿إِذْ قَالَ يُوسُفُ لِأَبِيهِ يَا أَبَتِ إِنِّي رَأَيْتُ أَحَدَ عَشَرَ كَوْكَبًا وَالشَّمْسَ وَالْقَمَرَ رَأَيْتُهُمْ لِي سَاجِدِينَ * قَالَ يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا﴾ [يوسف: 4-5] إلى آخر الآيات.
نقف وقفة سريعة مع قصة يوسف مع أبيه، طبعاً نحن تأملنا سورة يوسف في هذا المسجد، لا أتذكر في كم مجلس، خمس أو ست مجالس، لكن بسرعة عاوزين نأخذ حتة مهمة وهي أن يعقوب يا جماعة كان نبي الزمان. عارفين يعني نبي الزمان؟ يعني أولاً هو رجل، فعليه الأعباء التي تكون على الرجال، أعباء أنه يوفر ما يوفره الرجال للأهل، عليه أعباء مشاكل البيت نفسه. وبعدين يعقوب كان مخلف عيلاً ولا اثنين؟ لا، 12 أو 13 المهم عدد كبير من الأولاد، وكل ابن له مشاكله، وكل ابن له طلباته. وبعدين هو نبي الزمان، فعنده مشاكل الدعوة إلى الله، وعنده فئة مؤمنة مسؤول عنها وعن احتياجاتها وعن تعليمها الدين وعن مشاكلها النفسية وعن تحدياتها في الدنيا، يستوعبها ويرشدهم، ومجموعة كافرة فعنده واجبات تجاههم ويمكن يكيدون له، فعينه في وسط رأسه. وبعدين عنده حق ربه، هو نبي، فحق ربنا فين من عبادته ومن كذا ومن كذا.
في كل هذا يجيء له ابن يوسف الذي عنده سبع سنين يقول له أنا شفت حلم عاوز أحكيه لك. أنت بقى لو ابنك هتعمل مع ماذا؟ طب أنت ما أعباؤك أصلاً وما مشاغلك التي تأخذك عن ابنك؟ ولا حاجة، ولا حاجة، ليس استخفافاً، لا، أنا عارف أن في شغل وفي شقاء، الله يكون في عون الرجال في هذه الآونة، إنما لا، في وقت كبير بنسكرول على الفيسبوك، ووقت كبير عمالين نقلب في الريلز والشورتس والتيك توك، وفي الغالب ابنك لما يجيء لك بتكون أنت على الحالة هذه؛ لأنك في البيت في الغالب. والناس التي سنها كبير شوية في الخمسينات ممكن يبقى قاعد على برامج التوك شو، أو ناس قاعدة على القهوة. طب فين ابنك؟
جاء له الطفل الذي عنده سبع سنين: أنا شفت حلم عاوز أحكيه لك. يعقوب ليس فقط شايف، يا جماعة يعقوب عليه السلام كان رجلاً مسؤولاً. هو نصيبك أنك طلعت راجل، نصيبك عشان ما تقولش ما أنا شقيان طول اليوم، هو نصيبك أنك راجل، يعني ماذا راجل؟ يعني ستشقى طول اليوم وستأتي ولن تنسى حقوق التي في رقبتك، لن تنسى هذا لأنك راجل. اليوم كان المفروض درس الحجرات وكنا في آية: ﴿لَا يَسْخَرْ قَومٌ مِّن قَوْمٍ عَسَىٰ أَن يَكُونُوا خَيْرًا مِّنْهُمْ وَلَا نِسَاءٌ مِّن نِّسَاءٍ عَسَىٰ أَن يَكُنَّ خَيْرًا مِّنْهُنَّ﴾ [الحجرات: 11]، وكنا المفروض نتكلم. سنقول حاجة بسرعة ونرجع ثاني، القوم لا تطلق إلا على الرجال، والنساء طبعاً على النساء واضحة هذه. ليه الرجال اتسموا قوم؟ من التأويلات أن قوم هي جمع قائم مثل صوم وصائم، طيب لماذا تسموا قوم أيضاً؟ علشان هم من يقومون على شؤون الحياة، ومنها القوامة. والنساء من النسأ والنساء التأخر. فهو نصيبك أنك تطلع راجل، راجل يعني قد المسؤولية، ومن المسؤولية مسؤولية ابنك الصغير هذا لما يحب يحكي يلاقي الذي يحكي له.
يوسف لما حب يحكي وراح لأبيه، أبوه ساب الذي في يده وقعد، ولما قعد ما قعدش بدماغ مشغولة في الدعوة والكفار الذين يكيدون لي والمؤمنين الذين آمنوا بي وإخوته الآخرين، لا، لا خالص، هذا قاعد مركز مع الولد، وبعدين سيبتدئ يدي نصائح وإرشادات للولد لأنه فهم تأويل الرؤية. يبقى هذا راجل قاعد مركز مع الابن، لماذا مركز مع الابن؟ لأن ابنك وهو يحكي لك ممكن يبقى عاوز يحكي لك حاجة وخايف يقولها، عاوز يحكي لك حاجة ومكسوف يقولها، عاوز يحكي لك حاجة ومتهدد يقولها. لو حضرتك قاعد بتسمع ابنك ولا بنتك وأنت بتسكرول على الفيسبوك، ابنك ضاع، ضاع. تكتشف متى؟ بعد سنة إن شاء الله، سنة يكون ابنك عاوز يحكي لك حاجة ومش قادر، وكان ممكن بصه منك في عينيه تعرف أن في مشكلة كبيرة، لكن عينك ما بتجيش في عينيه أصلاً، ليه؟ مشغول، مشغول فين؟ أصل أنا شغال بره. طب والأم؟ أم واقفة في المطبخ، قاعدة على التليفون بتكلم جارتها، طب الابن يجيء يحكي لها بتسمعه؟ خلص، ضيعنا الأمانة، ضيعناها.
إنما لو قعدت وركزت وأعطيت ابنك كل تركيزك هتشوف بصه في عينيه تفهمك حاجات، هتشوف اضطراب في جسمه في أعضائه، يبين خوف من حاجة ومش قادر يتكلم، الولد مثلاً ستبتدئ تمسك طرف خيط تمشي وراءه. الكلام الذي نقوله الآن هذا بالنسبة لـ.. كلام غريب، رفاهية، أنا أقعد مع ابني وأركز مع هذا؟ فين ومتى؟ فين ومتى سيب الجهاز الذي في يديك هذا. لما تجيئ بعد سنة أو اثنتين أو أكثر تكتشف أن ابنك كان في مشكلة وفي أولها كنت ممكن تلحقها، اليوم ابنك غرز في مشكلة، أنت مش عارف تعمل فيها حاجة. هو يا جماعة، هو الشاب المدمن نام كويس وأصبح مدمناً؟ الشاب الذي راح زنى نام عمره ما عمل أي حاجة أصبح راح زنى؟ يعني هي بتيجي هكذا؟ ولا في تغيرات بتحصل والأب والأم مش.. أنا طبعاً هنا عشان بس نحن بنحمل الأب والأم المسؤوليات، كل واحد عليه مسؤوليات، هل معنى كذا أن هذا يمنع؟ ما بنقولش هذا يمنع ولا ما يمنعش، أقول هذه مسؤوليتك فتعملها، النتيجة بتاعة ربنا سبحانه وتعالى، النتائج ليست بتاعتنا، إنما لا تبقى حضرتك مهملاً في مسؤولياتك وبعدين تجيئ بعد سنة تقول ابني بقاله سنة مش عارف بيحصل فيه ماذا، بنتي بقالها سنة متعرفة على مش عارف مين، طب وأنت فين؟ وأنت فين؟ يعني أفتش؟ أنا ما قلتش فتش، بس أنت قطعت الصلة بينك وبين ابنك. ابنك هذا الذي عنده 11 أو 12 أو 15 سنة وما بيجيش يكلمك وأنت بتقول له ما تجيئ تقعد تكلمني، أنت الذي قطعت الصلة هذه، العلاقة بينك وبينه؛ لأنه جاء لك من وهو عنده خمس سنين في الوقت الذي هو الابن يتمنى أنه يكون لصيقاً بالأب، مالكش، ولو لقاك لقاك بدن بلا عقل وبلا قلب وبلا توجيه وبلا أي حاجة.
يعقوب يا جماعة يترك كل حاجة ويقعد للابن السبع سنين ويسمع الرؤية ويبتدئ ينصح: ﴿لَا تَقْصُصْ رُؤْيَاكَ عَلَىٰ إِخْوَتِكَ فَيَكِيدُوا لَكَ كَيْدًا﴾ إلى آخر الآيات، ودي شرحناها يمكن في درس لوحده. طيب يعقوب يا جماعة فضل مركز مع عياله لغاية متى؟ مين يقول؟ ﴿أَمْ كُنتُمْ شُهَدَاءَ إِذْ حَضَرَ يَعْقُوبَ الْمَوْتُ إِذْ قَالَ لِبَنِيهِ مَا تَعْبُدُونَ مِن بَعْدِي﴾ [البقرة: 133]. وهو على فراش الموت مركز مع عياله، عياله هؤلاء الذين هم رجالة كبار. فين هذا؟ نحن سنرجع بقى نشوف التركيز على ماذا؟ نحن اليوم نتكلم على فكرة التركيز من الآباء على تربية الأبناء، طب بيركزوا على ماذا؟ سنرجع نستقرئ الآيات هذه ثاني، سنرجع لها كمان شوية إن شاء الله. ادي سيدنا يعقوب مع ولديه.
إبراهيم عليه السلام موقف ثالث في القرآن مع ولده الذبيح، وموقف عجيب، وهنا إبراهيم عليه السلام شوفوا يا جماعة الأب، الأب ليس آمراً ناهياً، الجزء هذا مهم؟ نعم مهم، لكن الأب موجه، مربي، واعظ، ناصح. إبراهيم يقول، نحن برضوا الآيات هذه شرحناها من قبل في المسجد فمش هندخل فيها، لكن هناخد كلمة واحدة وإن شاء الله تكونوا برضوا فاكرينها: ﴿يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾ [الصافات: 102]. قراءتين: ترى وتري، وقلنا الاثنتين نحن طولنا جداً في الآيات هذه ومسكنا الكلمتين هاتين فصصناهما. لكن بسرعة هكذا: ﴿فَانظُرْ مَاذَا تَرَىٰ﴾، طب لو كان الابن قال له لا لا تذبحني، كان إبراهيم عليه السلام سيمتثل أمر الابن؟ أمال هو بيعمل ماذا إبراهيم؟ إبراهيم بيربي راجل، سيدنا إبراهيم عليه السلام بيربي راجل، ليس ابنك يوصل لـ 11 و13 و15 و17 و20 سنة لا يعرف يأخذ قرار في حياته، وبعض الشباب يشتكي لي أنه مهزوز لدرجة لا يعرف يشتري حذاءً لنفسه، لا يعرف. لماذا؟ ما ترباش على هذا. إبراهيم عليه السلام خلاص أمر من ربنا وحي ومع ذلك يربي ابنه: ﴿يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانظُرْ مَاذَا تَرَىٰ﴾، ما رأيك؟ عجيب، تربية عجيبة. القراءة الثانية ﴿فَانظُرْ مَاذَا تُرِي اللَّهَ مِنْكَ﴾، إني أرى في المنام أني أذبحك وهو أمر الله عز وجل، فانظر ماذا تري الله منك، من الطاعة ومن قبول الأمر.
تربية فين هذا اليوم؟ فين؟ فين الأب الذي يربي ابنه؟ تربية نفسية وتربية إيمانية؟ شوف في كلمة واحدة أهي، تربية نفسية تخرج لنا رجلاً. ما هو ابنك الصغير هذا كيف يعرف يأخذ قرار في حياته؟ أنك شاركته في اتخاذ قرارات من وهو صغير، متدرب معك، بيتدرب: ما رأيكم؟ تعال يا ابني سننقل الشقة الفلانية، تعال نذهب نراها سوياً، يجيء يقول لك لا يا بابا، عيل بقى صغير فيقول لك ماذا؟ سيقول لك أي حاجة، لا يا بابا مثلاً أوكرة الباب مكسورة، أي حاجة، بلاش الشقة هذه، فتبتدئ أنت تفهمه لا هذه الأوكرة دي حاجة بسيطة وبنشتريها ونركبها، بس نحن بنبص على ماذا في الشقق، تعال أفهمك واحد، اثنين، موقف في الثاني في الثالث، الولد بيكتسب خبرات. ﴿فَانظُرْ مَاذَا تَرَىٰ﴾، ما قال له تعالى نم سأذبحك، ما عملش كذا، ﴿فَانظُرْ مَاذَا تَرَىٰ﴾.
موقف رابع في القرآن: موقف نوح مع ولده ﴿يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ﴾ [هود: 42]. هو كذلك موقف الوالد مع الولد، متى؟ في آخر لحظة في الحياة. الأب مش سايب ابنه يا جماعة، ويا رجال والشباب اللي قدامي برضه اللي هيتجوزوا، دي مسؤوليتكم. يعني إيه مسؤوليتكم؟ يعني يوم القيامة هتسأل عن هذا الولد، ربيته على إيه؟ هتسأل عن هذا. بلاش أسهل حاجة نرمي الحمل على المرأة، إحنا هنيجي للمرأة كمان شوية، إنما بلاش يبقى دي أسهل حاجة عندنا. أنت مش ماكينة صراف آلي، الفلوس اللي عاوزينها أهي وخلاص، شكراً. ليه بقى؟ لأن المرأة في الأصل، في طبيعة في جبلة المرأة، لا تصلح لهذا الدور. نعم يوجد نساء يصلحن، ربينا رجالاً، عارف ده كويس جداً، لكن طبيعة المرأة مش كده. طبيعة المرأة يا جماعة أن العاطفة تغلب، واللي عاطفتها تغلب دي تفسد أكثر من أنها تصلح في التربية، إذا غلبت العاطفة في مواقف محتاجة حزم. فالعاطفة لو غلبت تفسد.
ولذلك الموقف الذي يحضرني الوحيد في القرآن -ممكن يبقى فيه غيره بس أنا مش مستقرئ القرآن كله من الحتة دي دلوقتي- إنما الموقف الوحيد الذي يحضرني في القرآن لأم مع الابن، كان موقف الأم فيه هتبقى سبب في أن ابنها يموت، موقف أم موسى، ليه؟ لغلبة العاطفة. تخيلوا كده فرعون بيذبح أي بني آدم، أي طفل يتولد بيتذبح، وبعدين القصة حصلت ورمته، بقى ربنا سبحانه وتعالى أوحى إليها، وربط على قلبها إلى أن ألقته في هذا النهر. عرفت أنه وصل لفرعون، خلاص، إيه اللي حصل بقى؟ ﴿وَأَصْبَحَ فُؤَادُ أُمِّ مُوسَىٰ فَارِغًا ۖ إِن كَادَتْ لَتُبْدِي بِهِ﴾ [القصص: 10]، يعني ما تفكرش غير في حد غير موسى. ﴿إِن كَادَتْ لَتُبْدِي بِهِ﴾، هتروح تقول لهم ده ابني هاتوه. ده معناه إيه؟ لو راحت قالت كده هيحصل إيه؟ هيتقتل. أنتم شايفين عاطفة المرأة وديتها أنها ممكن تاخذ قرار شكله إيه؟ لولا أن ربطنا على قلبها.
طب هنا إحنا بنذم في المرأة؟ لا مش بنذم، إحنا بنقول لنا أدوار بنكمل بها بعض. المرأة العاطفة غالبة، الحب يغلب عليها، فممكن ده يخليها أضعف من أنها تعرف تاخذ قرارات حاسمة في حياة الابن أو البنت، دي مسألة. المسألة الثانية: الأصل أن الرجل أكثر انتباهاً لتفاصيل المرأة. إحنا طبعاً بنتكلم عن البيوت اللي هي المفروض كما ينبغي أن يكون عليها البيت. أنتم عارفين المرأة الصالحة اللي اتربت تربية معينة، ونشأت نشأة معينة، ما تلقطش إشارات، الرجل يلقطها بسرعة، ليه؟ هي ما شافتش الحاجات دي، ما عاشتش ده، ما تعرفش ده. أنا نساء كانت تقول: والله العظيم، أنا ما أعرف أن في في الدنيا ده أصلاً! يجي مثلاً جوزها يقول لها: أهو شفتي زي ما قلت لك، عمل واحد. تقول له: والله ما أعرف أن في كده في الدنيا، مش متخيلة أن في ده في الدنيا كلها، ما شافتش ده قبل كده. تلقط إيه هي بقى؟ الابن أو البنت تلقطها إزاي دي؟ فده دورك أنك تقعد وتسمع.
طيب أنا كده أعفي المرأة من كل حاجة؟ لا طبعاً، المرأة لها دور برضه، لكن الرجل أنت دورك في هذا التوجيه، هذا النصح، هذا الوعظ. أنا هسأل سؤال للأب أو الشاب المقبل على الزواج -يعني ده سؤال مش ليك-، يا أب، قولي كده آخر مرة قعدت مع ابنك علشان تكلمه عن ربنا؟ ما هو لو رجعنا نشوف تفاصيل قصص القرآن بتاعتنا دي، هتلاقي بتدور في فلك إيه؟ لقمان ﴿لَا تُشْرِكْ بِاللَّهِ﴾ [لقمان: 13]، أول كلمة لا تشرك بالله. آخر مرة كلمت ابنك فيه على، بلاش أنا قلت لك تعال أمسك المايك ده وكلمنا عن ربنا ثلاث أربع دقائق، هتقول إيه؟ هتعرف؟ ما هو أنت عشان أنت تعرف توصل الرسالة، لابد أن أنت أولاً تؤهل، أنت نفسك تؤهل لده، تؤهل ده، تبقى داعية، تقعد كده لا مش لازم، بس تتربى على ده، تربي نفسك على ده، وإلا هنبقى جيل خاوي بيطلع جيل خاوي قوي. أنت هتتكلم عن ربنا وأنت ما تعرفش؟ هتكلم ابنك عن ربنا وأنت ما تعرفش تتكلم عن ربنا لوحدك؟ ما تعرفش حاجة عن ربنا، هتتكلم تقول له إيه؟ فـ هذا دور الأب، وهو مسؤول عن هذا الدور قولاً واحداً.
وإلا لو أنت حضرتك ما عملتش الدور ده -وهنتكلم عن حاجة واحدة بس في الدور ده علشان ما نطولش في المسألة دي-، لما تيجي تقعد مع ابنك لازم تبقى منتبه للتفاصيل الصغيرة اللي إحنا لسه قايلينها من شويه دي. يعني ما يكفيش إحنا بنقول أن الأب بيقعد ينصح ويعظ وكذا وكذا، ماشي. إنما اللي إحنا عاوزين نقف عليه دلوقتي والنهارده بالذات في اليومين دول، أن ابنك محتاج منك تركيز. محتاج ده ليه؟ محتاج ده لأن ابنك ممكن يبقى واقع في مشكلة كبيرة ومش عارف يتكلم، مش عارف أو مش عاوز يتكلم. مش عاوز ليه؟ مش قضيتنا دلوقتي، مش عاوز ليه لأن أنت اللي قافل الباب بينك وبينه، لأن أنت اللي مخوفه منك، لأن أنت اللي ما بيلاقيش عندك حلول أصلاً، لأن أنت اللي بتبين له عدم اهتمام، أتكلم وأنا باصص في الموبايل! في الآخر هو مش عاوز يتكلم. طب هنعرف منين الولد فيه مشكلة أو البنت فيها مشكلة؟ من الاهتمام بالتفاصيل الصغيرة، وده هيجي إزاي؟ أن نبقى مركزين مع الولاد ببساطة، الولد جاي يتكلم هسيب أي حاجة في إيدي وأقعد أركز مع ابني في الشويه اللي عاوز يتكلم فيهم، طول خير وبركة، أنت وراك إيه؟ أقعد وربي في ابنك معاني. يبقى الولد يوم عن التاني مخه بيكبر بس أنت مطمن هو بيكبر صح.
يا جماعة قلت لكم ده قبل كده، زمان كان آباؤنا يخافوا علينا إمتى؟ لما ننزل من البيت، الواد راح فين؟ تأخر ليه؟ كده. النهارده الأب الواعي اللي واعي على الدنيا وفاهم كويس، هيبقى خايف على ابنه وابنه مش جوه في أوضة النوم، وابنه قاعد قدامه، الجهاز اللي ابنه ماسكه ده، يعني أنا ابني قاعد قدامي ماسك الجهاز كده أنا قلقان، بيعمل إيه؟ بيكلم مين؟ دماغه بتتحشي إيه دلوقتي؟ شهوات ولا شبهات ولا إلحاد؟ وما أعرفش وده هو فين ده؟ قدامي! طب ده محتاج إيه؟ محتاج تركيز أكبر بكثير من زمان. تركيز في سلوكيات الولد، في تصرفات الولد، في أفعاله، في كلامه، محتاجة دي، وإلا الأولاد هتضيع، هتضيع.
طيب ولما تضيع الأولاد، مسؤول، عندنا مسألة في الفقه كده دلوقتي، ابنك اللي عنده سبع سنين ده، المفروض ﴿مُرُوا أَبْنَاءَكُمْ بِالصَّلَاةِ وَهُمْ أَبْنَاءُ سَبْعٍ﴾، طب حضرتك ما أمرتوش بالصلاة، هل تعرف أنك آثم؟ طب الولد يأثم إن ما صلاش؟ الولد لا يأثم، الصلاة في حقه نفل وهو لا يأثم، هو غير مكلف، أنت تأثم إن لم تأمره بالصلاة. متخيل ليه؟ لأنك خالفت الأمر، والأمر يقتضي الوجوب، ﴿مُرُوا أَبْنَاءَكُمْ﴾، هذا أمر على الوجوب عند طائفة من الفقهاء، فيؤثمون الأب الذي لا يأمر ولده بالصلاة وهو عنده سبع سنين وثمان سنين. قولي أنت كده بقى ولادك -مش اللي عندهم سبع وثمان سنين، الكبار والبالغين- أخبارهم إيه في صلاة الفجر؟ ما هو الولد لو ما صلاش صلاة الفجر إلى أن تشرق الشمس يأثم طالما بالغ، حرام عليه، خرج الصلاة عن وقتها. آه، دي مسؤوليتك، أنت المفروض تربي ابنك على كده. لأن حضرتك لو الشروق مثلاً دلوقتي 6:11، 6:10، وابنك قايم عشان عنده امتحان، فالمفروض يقوم 6:20، حضرتك مش هتصحيه 6:00 عشان يصلي قبل الشروق، وهتصحيه 6:20 عشان الامتحان. الدنيا اتقلبت يا جماعة، المقاييس اتقلبت.
ودي مسألة تانية بقى، إحنا استعرضنا قصص القرآن، الآباء مع الأبناء أن هم مركزين في النصح والإرشاد والوعظ والتربية النفسية والعلاقة بالرب سبحانه وتعالى، كانوا بقى بيتكلموا في إيه؟ في الدين! أنت نسبة كلامك في الدين مع ابنك قد إيه؟ إيه أصلاً؟ لا ده إحنا دلوقتي مش بس إحنا ما بنكلمش الولاد في الدين، ده كمان شوف البيئة اللي أنت بتروح تحط ابنك فيها، سواء اختيار مدرسة، أولاً بداية اختيار شريك حياتك، يعني الشباب الصغير رايح يتجوز، شوف البيئة اللي بتكونها لأولادك، ما هي البيئة دي هتبقى مين؟ أنت والأم، بداية البيت شكله إيه، فهتختار امرأة عاملة إزاي، وكذلك يقال للمرأة شوف الزوج اللي هتختاريه، لأن هي دي البيئة اللي هيتربى فيها الولاد.
هي فيه حاجة ولا إيه؟ بيجي لنا بعد كده مشاكل: "أصل أنا يا شيخ زوجي ما بيصليش، وابني جيت بقى أدخله مدرسة مش عارف عاملة إزاي فهو قال لي لا مش هيدخل غير المدرسة الفلانية". طب هو يعني جوزي ما يصليش ده، يعني هو واخدة بيصلي؟ الحقيقة لا، بس هو كان مستواه الاجتماعي مش عارف إيه وشغال فين، وأنت جاية تشتكي ليه دلوقتي؟ والعكس، يعني سواء الشكوى من المرأة أو من الرجل، فينك وقت الاختيار؟ والحقيقة يا جماعة، يعني دي همسة في أذن الشباب والنساء، يعني مما عمت به البلوى الآن أن يجي لي شاب وعنده قدر من الدين، وبعدين جاي يقول لي أنا عاوز اتجوز واحدة هي أقل في الدين، يعني أقل منه بكثير، ليه بقى؟ برضه مش وقته، سواء بقى يعني أي حاجة مش لازم بقى نخش في تفاصيل. طيب المتدينات بقى مين هيتجوزهم؟ مين هيتجوز دول؟ فيوم يجي بعد شوية المتدينات مش لاقيين اللي يتجوزهم، يوم يقبلوا بأي حد، والبيوت بعد شوية كله بيخرب، كله بيخرب. ما فيش كده يا شباب، أول بيئة حاضنة للولد البيت، ولذلك تربيتك للولد تبدأ من اختيار الأم، وأنت تربيتك لابنك أو لبنتك تبدأ من اختيار الأب.
المدرسة هتاخد ابنك تحطه في مدرسة إيه؟ هتحطه في مدرسة إيه اللي يروح ياخد عياله ويرميهم في مدرسة راهبات ويبوظوا دين العيل؟ الدين بيبوظ، أنا ما بتكلمش أنا أنتم عارفين الراجل بتاع عواطف ولا بتاع يعني حتى مش دروس وعظ بقى فنقول كلمتين حلوين يسخنوا ده أنا مش كده خالص، أي حرف بيطلع مني فأنا واثق منه 100%. أنا كان معايا شباب في دروسي من كثير، يعني 18 سنة أو أكثر، وكانوا في مدارس راهبات، وكان يجي الشاب ده الولد ده جاي قاعد قدامي بينهنه، بيعيط عياط، ليه هو بقى متدين زين جديد فهو يعني حابب الجو وبتاع، يعاقب لو اتمسك بيقرأ في مصحف، يعاقب لو اتمسك قاعد على المصلية في الوقت، في البريك بتاعهم، في الفسحة بتاعتهم وما فيش مسجد طبعاً، هي مصلية كده مفروشة تحت سلم، يعاقب لو قاعد عليها، الصلبان في كل فصل، صلاة النصارى يصلوها في أول ما بيجبروش المسلمين يصلوا طبعاً لكن من وهم صغيرين هم متربيين على كده. وقل مثل ذلك كثير، طب ليه يا ابن الحلال رحت حطيت ابنك بإيديك في المدرسة دي؟ ليه؟ أصل هم بيربوا الولاد على الأخلاق. طب والدين؟ طب دين ابنك ده هتعمل فيه إيه؟ أنت مسؤول عن ده.
يا جماعة جاء في بعض الإسرائيليات أن يعقوب عليه السلام لما ابيضت عيناه من الحزن بكاءً على يوسف ولامه بنوه، قال: لي شعري مؤمن هو أم كافر؟ شايفين دماغ يعقوب فين؟ أعرف بس هو مؤمن ولا كافر. دين ابنك، داخل من بره جاي من امتحان، أول سؤال يتسأل: صليت الظهر؟ مش إيه عملت إيه في الامتحان يا بطل؟ صليت الظهر؟ دين يا جماعة هو يعني أنتم متخيلين كده؟ ﴿كُلُّكُمْ رَاعٍ وَكُلُّكُمْ مَسْئُولٌ عَنْ رَعِيَّتِهِ﴾، أنت متخيل أن أنت هتيجي يوم القيامة لما ربنا تقف بين يدي الله عز وجل وتيجي بقى فقرة السؤال عن الابن أو البنت، هيقولك هو أنت قولي بقى دخلت مدرسة حكومة ولا إنترناشونال ولا راهبات، أقصد يعني من حيث المستوى العلمي يعني؟ مش قولي بقى دخلتوا جامعة خاصة ولا مدرسة ولا جامعة حكومة؟ يعني هيتقال لك كده؟ يعني هو دي دي أسئلة الآخرة؟ شيء عجيب، لو أنت متخيل كده فلا يعني ده شيء عجيب الحقيقة. لا، أنت هتتوقف وتتسأل دين ابنك كان شكله إيه وأنت عملت إيه. إحنا بإيدينا بنروح نحطهم كده مدرسة راهبات، مدرسة إنترناشونال.
يا جماعة، كل نظام تعليمي بلا شك هو له استراتيجية وله أيديولوجية بيتبنى عليها بلا شك، وأنت مغمض كده يكفي أنك بس تقرأ اسم النظام ده عشان تفهم الأيديولوجية بتاعته إيه والاستراتيجية إيه، حتى لو في بعض يعني إحنا هنا جدعان مصريين، جدعان يمصروا أي حاجة. المدرسة الإنترناشونال مثلاً يعني بره حتى في دول الخليج، بره حتى يعني مش لازم في دول الخليج، لا أنت ممكن تقعد في المدرسة الإنترناشونال، الطفل المسلم جنبيه طفل بوذي، جنبيه طفل هندوسي، جنبيه طفل لا ديني في نفس الفصل، في فصل واحد. أنا رفضت عرض قبل كده شغل في دولة خليجية والعرض كان مناسب جداً ليا عشان دي بس أبنائي هيدخلوا مدرسة إنترناشونال هناك، قلت لهم لا، دخلوني المدارس العادية خالص بتاعة الدولة. قالوا لا، ده الأوفر على بعضه، وإحنا المكان ده كله ما فيهوش غير هي مدرسة إنترناشونال، كله فيها طبعاً المكان ده اللي هو إيه، في بقى أمريكان على إنجليز على هندوس على مكان.
هذا الفصل هو ده تشكيله؟ فما فيش دين، بل بالعكس التربية على أنه كله دايب في بعضه. فدي بيئة، أنت بتقعد مع ابنك قد إيه؟ ده لو قعدت، رايح بإيديك تحطه في مدرسة خمس أيام في الأسبوع، كل يوم ثمان ساعات. طيب، مفكرها إيه المدرسة دي؟ هتحشي دماغ ابنك إيه؟ أصل الأخلاق، أصل التعليم هناك كويس، لا إله إلا الله، طيب والدين؟
هنا يظهر تشوه ثاني في أذهان بعض الآباء والأمهات، تصورهم إيه عن الدين أصلاً؟ لأن بعض الآباء بيرد يقول لك: لا، ما هو الدين ده بقى في البيت، الدين ده في البيت. فأنت تلاقي أن التصور عن الدين مشوه أصلاً. ورقة فاضية، طبقين الورقة يعني. والله أدي اهو، اقعدوا مع عيالكم علموهم زي ما رأي، طبقوا ورقة، طب إيه الورقة؟ الكلام بره.
فكنت بقول إيه بقى؟ آه، فالدين يا جماعة تصورنا إيه عن الدين؟ أولاً، أصل ممكن يبقى تصورك عن الدين الفلكلور، عارفين اللي هو إيه؟ والله عارفين قصة المرحوم اللي كان عنده عادة بيصلي الفجر؟ عارفين الشيخ أسامة عبد العظيم رحمه الله؟ كان في معرض الكتاب، وكان دايماً يرتاد معرض الكتاب كتير، ويدخل الندوات، وكان في ندوة معموله على أديب كبير مصري متوفى، لامع، وصاحبه بيحكي عنه. فالشيخ أسامة طبعاً ما يعديش، الثاني بيتكلم عن الأدب والبتاع، فالشيخ أسامة قال له: هو المرحوم كان بيصلي؟ قال له: والله المرحوم كان عنده عادة ورثها عن المرحوم أبوه أنه كان بيصلي الصبح. هو دي، هو ده الدين؟
يعني إيه الفلكلور بتاع إحنا بنصلي خمس فروض، ويجي رمضان نصوم؟ ده كويس، ما بقولش ده وحش، إنما هل هو ده الدين؟ يعني يا جماعة كلمة إبراهيم: ﴿فَانظُرْ مَاذَا تَرَىٰ﴾ [الصافات: 102]، على بساطتها لكن انظروا إلى عمقها، اللي هو أنت كل موقف في حياتك هتوري ربنا إيه منك؟ معنى زي ده يتغرس في قلب الولد إزاي؟ أصل الولد رد قال إيه؟ رد عجيب جداً، الولد يا جماعة بيتقال له: تعالى هدبحك، قال له: ﴿يَا أَبَتِ افْعَلْ مَا تُؤْمَرُ﴾ [الصافات: 102]. أي حاجة، أنا معاك. الرد ده عجيب، ما قالوش اذبح، قال له: يعني أنت بتسألني عن إيه؟ مش ربنا قال افعل ما تؤمر؟
ما أصل الولد ده مين أمه؟ أمه اللي لما جريت وراء إبراهيم: إلى من تتركنا في هذا الواد الذي ليس فيه أنس ولا شيء؟ وهو ما بيجاوبش، مرة الثانية الثالثة فهمت: آلله أمرك بهذا؟ قال: نعم. قالت: إذاً لن يضيعنا. انتهت. ساعتها أنا قلت لكم لو تفتكروا، سهل تقول الكلمة دي وأنت قاعد في بيتك، والكارت بتاع البنك فيه رصيد، والعربية تحت البيت، وتقول: إذاً لن يضيعنا، آه دي سهلة، ليه؟ لأن إحنا قلوبنا متكلة ومعتمدة على الأسباب اللي تحت إيدينا. إنما تعال كده في صحرا لوحدك، وأنت شايف كأسباب دنيوية أملك الأخير بيمشي قدام عينيك، إبراهيم مشي وما بيلتفتش، تقول له مرة الثانية الثالثة ما يجاوبش، آلله أمرك بهذا؟ نعم. كان ممكن يبقى الرد بتاع ست إيه؟ طب راجع ربك، مش هتقول له يعني اعصي، راجع ربك، أنا امرأة ضعيفة وابن صغير، أي كلمتين من بتوع الستات. إذاً لن يضيعنا، مش هنضيع. فطلع الولد: ﴿يَا أَبَتِ افْعَلْ مَا تُؤْمَرُ﴾.
ولذلك بنقول الست ما تفرحش أن الرجالة هم اللي، لا أنتِ ليكي دور. مين اللي ربى الشافعي؟ مين اللي ربى أحمد بن حنبل؟ في غيرهم ما كانش في آباء، خلاص ماتوا، هتعملي إيه؟ طلق، هتعملي إيه؟ ابتليتي براجل ما بيسمعش ولا بيشوف، خالص عايش لمزاجه، بتشوفوه في البيت ضيف، العيال تضيع، احتسبي وربي ولادك واهتمي بالأبناء واهتمي بالتفاصيل.
أنا أتعجب بالحقيقة، وطبعاً ربنا سبحانه وتعالى يصبر الأم والأب في تلك الحادثة، لكن فكرة أن ابن صغير خمس سنين ست سنين، والبيت لا منتبه لبصة عين ولا لاضطراب ولا لحزن ولا لأي حاجة، محتاجة وقفة يا جماعة، محتاجة وقفة. ليه محتاجة وقفة؟ أنا ما بتكلمش عن حد، بتكلم عن بيوتنا إحنا، إحنا ممكن يبقى في بيوتنا تفاصيل شبه كده وإحنا ما نعرفش، مش عارفين، هنعرف منين؟
وبلاش السكة دي، سكة المخدرات اللي منتشرة في جيل الشباب. أنت ابنك ده أدمن، زي ما قلت لكم فجأة، الولد نايم كويس ورياضي وبتاع مذاكرة، الصبح الساعة سبعة الصبح أنا أروح أشم؟ هي بتحصل كده، ولا تغيرات بسيطة ضعيفة لو انتبهنا ليها من بدري بقدر الله عز وجل تتلحق؟ بس إحنا ما انتبهناش. طب ليه ما انتبهناش؟ ما إحنا مش فاضيين للعيال. آه، ليه بقى مش فاضيين؟ اسمع بقى الحجج: ما أنا طول النهار في الشغل، والأم ما أنا طول النهار في المطبخ. فأنت لما تقف بين يدي الله عز وجل ويقول لك ابنك ده أدمن ليه؟ ابنك ده بقى بيزني ليه؟ ابنك ده بقى فتقول طول النهار في الشغل، حجة هتخيل على ربنا سبحانه وتعالى؟ مش هتخيل. وهي وأنت لو قعدت مع نفسك مش هتخيل عليك أنت نفسك.
طب أنا لو قعدت معاه يعني ممكن ما يدمنش؟ لا، ممكن يدمن عادي جداً. نوح عليه السلام لا نشك للحظة أنه عمل كل اللي يقدر عليه مع ابنه، ما نشكش للحظة في ده، وفي الآخر قدر الله عز وجل. أنا خلي بالك عملاً أتكلم في محورين، محور نلحق الأبناء، ومحور ثاني الحق نفسك، الحق نفسك لأنك مسؤول. فيوم أن تُسأل تجد جواباً: يا رب أنا عملت اللي علي. يعني نوح عليه السلام نتصور أن يجي يوم القيامة كده ويعاقب على أن ابنه مات كافر، ويتقال له أنت غلطان وأنت مقصر؟ لا نشك أن نوح فعل ما يستطيعه، خلاص، وأنت كذلك افعل ما تستطيعه. الولد بقى لحقته مالحقتوش، بتاع ربنا سبحانه وتعالى.
لكن حتى قبل الآخرة يا جماعة، قبل الآخرة في الدنيا، لو اكتشفت أي ابتلاء ابتلي بيه ولدك أو بنتك وأنت كنت من جواك شايف أنك عامل اللي عليك، وطأة هذا عليك أخف، بدل ما كل يوم وأنت جاي تنام كده تحط رأسك على المخدة تقول: ما هو أنا غلطان، أنا اللي ما أقعدش مع عيالي، أنا كنت ممكن أعمل وأسوي، مش ده هيحصل لو لا قدر الله حصل كده؟
فمحتاجين تربية الأبناء على أولويات الدين فين في حياتنا يا جماعة؟ الدين فين؟ لجنة، ابنك هيفوته هيجي عليه صلاتين، رب ابنك على كده، سيب اللجنة وروح صلي، ما فيهاش هزار. وإحنا كنا بنعمل كده، يعني إحنا في الجامعة كان كده، ما فيش مشكلة نعمل أي حاجة عشان الصلاة، المحاضرة بنسيبها عشان نلحق الجماعة في المسجد ونسيب المحاضرة عادي جداً. طبعاً دي مستويات، يعني إيه مستويات؟ يعني أقل شيء حرص الشاب على الصلاة في وقتها، دي أقل شيء. ماشي، طب لقينا الشاب، لا أنا في بقى مرحلة ثانية، يبقى حريص على أنه يلحق الجماعة الأولى في المسجد، ما تجيش أنت بقى تبقى الأب اللي بيثبط الولد، لا يا ابني أقعد في المحاضرة وأما تخلص بقى أصلي جماعة ثانية، ابنك جاي بيقول لك أنا بصلي الجماعة الأولى، خير وبركة، إيه المشكلة يعني؟
فعاوزين نربي الناس على كده، شوفوا يا جماعة وصية لقمان: ﴿يَا بُنَيَّ لَا تُشْرِكْ بِاللَّهِ ۖ إِنَّ الشِّرْكَ لَظُلْمٌ عَظِيمٌ﴾ [لقمان: 13]. وبعدين آيات عن بر الوالدين، وبعدين كلام عن ربنا يا جماعة: ﴿يَا بُنَيَّ إِنَّهَا إِن تَكُ مِثْقَالَ حَبَّةٍ مِّنْ خَرْدَلٍ فَتَكُن فِي صَخْرَةٍ أَوْ فِي السَّمَاوَاتِ أَوْ فِي الْأَرْضِ يَأْتِ بِهَا اللَّهُ ۚ إِنَّ اللَّهَ لَطِيفٌ خَبِيرٌ * يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَىٰ مَا أَصَابَكَ ۖ إِنَّ ذَٰلِكَ مِنْ عَزْمِ الْأُمُورِ﴾ [لقمان: 16-17]. فين ده دلوقتي؟ أؤمر بالمعروف وانهى عن المنكر واصبر على ما أصابك، يا متدينون يا اللي بتقول لابنك مالكش دعوة، شفت؟ مالكش دعوة، هيعورك لو رحت له. ﴿وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَىٰ مَا أَصَابَكَ﴾.
خلاص، إحنا ربينا أجيال طلعت في تطبيع مع المعاصي، في ألفة للمعاصي. إزاي الولد ده اللي تربى على كده أنه يشوف كل حاجة وما بنتكلمش؟ لا شاف أبوه بيتكلم ولا شاف أمه بتتكلم، ولما جه هو يتكلم اتقال له اسكت. زعلان من إيه؟ كنت مستني إيه الخطوة اللي بعديها؟ ما هو الخطوة اللي بعديها أنه هيعمل ده، أنت ما عملتلوش حصانة أنه يبغض تلك المعاصي. أنت كنت بتاخد ابنك من إيده عشان تروح بيه الشط اللي عليه ما عليه، أنت اللي بتاخده وبتدفع ألوفات، مستني إيه منه أما يكبر يعني؟ مستني منه إيه؟
الغريب بقى أن إحنا بنبقى شايفين نفسنا لما بنعمل ده أن أنا أب كويس. صح يا جماعة ولا لا؟ أنا أب كويس جداً، أنا ما فيش صيف بيعدي غير لما لازم صيف مش عارف فين. لا أنت مش أب كويس، أنت أب ضيع دين ولاده، أقمت لهم دنيا وضاع دينهم، وعين الأبناء ألفت عادي جداً تلك المناظر، عادي. ده أنا كل أسبوع لازم خروجة نروح السينما اللي مش عارف إيه، أنت مش أب، أنت كده مش أب. يعني بلاش صالح مش أب كويس، اللي هو اللفظ اللي هو بيبقى خارج هو حاسس بنفسه أنه قد أديت الرسالة، خلاص الحمد لله أنا كده عملت اللي عليّ مع العيال، سينما وبوديهم بلاج وبوديه، هعمل إيه تاني؟ أجيب لهم خيرة في البيت!
خلاص لا، أنت مش أب كويس. ماشي أب كويس يعني دين ابنك عامل إيه؟ صلاة ابنك عاملة إزاي؟ قرآنه؟ ذكره؟ يا جماعة من أعظم الأمور التي تحفظ أبناءنا الأذكار الموظفة، ذكر النوم ابنك بيقول ولا ما بيقولوش؟ يا شيخ أنا ما بقولوش، يا شيخ ابني، مين؟ ماشي ابتدي من النهارده أنت وابنك، أنت وبنتك، يلا تعالوا يا جماعة. افتح بقى كتاب أذكار، وكله على الأب دلوقتي. نزل أب، يعني إيه حجتنا يا جماعة قدام ربنا؟
والله اللي هحكيه لكم ده يعني ده اتحكى لنا، أنا شخصياً كنت في سفرة مش فاكر فين، مش فاكر المجر، ألمانيا، مش فاكر بالظبط. المهم واحد روسي، واحد روسي وهو شافني ملتحي جالي، مسلم روسي، جالي، هو لا بيفهم إنجليزي ولا أنا بفهم روسي، ما بيفهمش أي حاجة، يعني هو مسلم محب كده، والمهم بالإشارة كده عادي، كان بالإشارة لغاية ما جه واحد يعرف يترجم، بقى في بينا مترجم. إيه بقى القصة؟ وراني إيديه من هنا اللي أنا عاوز أحكيه لكم يعني متشرحة، إيديه متشرحة، هي طبعاً خف، بس باين آثار. ليه؟ دي مسكوا معاه كتاب أذكار صغير، فاتخد وتعذب هناك.
ماشي، أنت هنا النهارده كل شيء موجود، كتاب أذكار موجود، أب هتنزله على التليفون موجود، إيه حجتك قدام ربنا سبحانه وتعالى؟ الأذكار الموظفة تحفظ لك ولدك، يبقى ابنك وهو نازل رايح المدرسة الصبح، أذكار الصباح. دي يا جماعة البيئة بقى، البيئة الإيمانية. المدارس اللي هي معتنية بالدين، بتلاقوا في أتوبيس المدرسة وهم موديينهم الصبح بيقولوا أذكار الصباح في الأتوبيس. يعني أنا ولادي حفظوا أذكار الصباح من أتوبيس المدرسة. ده معنى أنك تحط ابنك في بيئة، أنت بتختار بيئة لابنك قبل ما توديه مدرسة، عشان تعليم وعشان أخلاق، وديه مدرسة عشان دين.
وهنا برضه عشان اللي هيشوف الفيديو بعد كده، ولا لو حد قاعد معانا، المدارس بقى بتاعت الدين تتقي الله في التعليم والأخلاق. يعني هي دلوقتي الأزمة فين دلوقتي؟ يقول لك طب نودي فين؟ نودي كذا، يقول لك دول بتوع سبوبة مثلاً، أو يا شيخ ما بيعلموش، وخليتوا رقبتنا قد السمسمة، طب ما تعلموا. يبقى إحنا يا جماعة، أي واحد بقى مدرس هنا، ولا مدرسة فوق، ولا مدير مدرسة، ولا أنتم على ثغر. لو السمعة اللي زي الزفت دي ما راحتش وما قدرتوش أن هي تتحول، لا يبعد أن تكونوا بتصدوا عن سبيل الله.
ما خلاص إحنا بنتعامل مع واقع، سيبوكم من المثاليات، إحنا بنتعامل مع واقع، يعني إيه مع واقع؟ يعني الناس الأب والأم كتير من الآباء والأمهات مسألة التعليم عندهم أهم من الدين خالص، تعامل مع واقع، خلاص. فلو حضرتك قدرت توفر لي بيئة فيها دين وتعليم كويس، هودي ما فيش مشكلة، ما قدرتش حط لسانك في بقك ما تتكلمش معايا. مش ده الواقع يا جماعة؟ طب ده الواقع، نتعامل بقى مع واقع ولا هنحط رجل على رجل ونقول إيه إحنا الجمهور بتاعنا معروف اللي هم عاوزين الدين فكده كده بيجوا لنا، نجهد نفسنا ليه بقى نعلم العيال كويس؟ ده دين يعني؟ الفكر ده فكر دنيء. أنتم على ثغر، فخليكم قد الثغر اللي أنتم عليه ده. البيئة اللي بيحط فيها ابنك، بيتك شكله إيه؟ المدرسة اللي بتوديها له شكلها إيه؟ أصحابك أنت اللي بتخرج معاهم شكلهم إيه؟ عشان ابنك هيتعرف على.
أولادهم محتاجين يبقى الولد في كل حتة في محضن للولد، ده دور مين بالأساس؟ دور الأب بالأساس. الأم يأتي دورها في إيه بقى؟ في إعطاء الولد ما يحتاجه من عاطفة، من حب، من رعاية، هو ده دور الأم الأساسي؛ لأن الولد محتاج الاثنين، محتاج توجيه وإرشاد في الدنيا ومحتاج العاطفة، محتاج الحب، محتاج الحنان.
الأب ما يديش حب؟ لا يدي حب ويدي حنان، يعني الأم ما تديش توجيه وإرشاد؟ لا تدي توجيه وإرشاد. أنا بقول هي مسؤولية مشتركة، في الأساس ده دور الأب وده دور الأم.
خلاص فلا أنت ترمي دورك على الست، ولا الست ترمي دورها عليك، بهذا نخرج جيلاً إن شاء الله يشرفنا في الدنيا قبل الآخرة. أقول قولي هذا وأستغفر الله العظيم لي ولكم. سبحانك اللهم وبحمدك، أشهد أن لا إله إلا أنت، نستغفرك ونتوب إليك، والسلام عليكم ورحمة الله.
الشيخ أمجد سمير