دخولتسجيل الدخول

الغربلة

أمجد سميرالشيخ أمجد سمير
  • مدة الدرس:
  • قراءة

بسم الله الحمد لله، والصلاة والسلام على رسول الله، وعلى آله وصحبه ومن والاه. وأشهد أن لا إله إلا الله وحده لا شريك له، وأشهد أن محمدا عبده ورسوله. اللهم صل على سيدنا محمد النبي، وأزواجه أمهات المؤمنين، وذريته وأهل بيته، كما صليت على آل إبراهيم، إنك حميد مجيد. أما بعد:

ففي المسند وفي السنن حديث عجيب، ونأخذ صدر الحديث لأن هذا هو الذي يعنينا؛ أن النبي صلى الله عليه وسلم قال: «يوشك أن يأتي زمان يغربل الناس فيه غربلة، تبقى حثالة من الناس»، إلى آخر الحديث. الحقيقة يا جماعة، الحديث ده مهم جدا إن إحنا نتأمله ونتدبره في هذه الآونة. خلونا كده يعني نستشعر أو نتأمل ألفاظ هذا الحديث؛ يوشك أن يأتي زمان تغربل الناس فيه غربلة. عارفين الغربال؟ الغربال ده أو الـ أو الغربال، إيه خلوني أسألكم سؤال؛ دلوقتي الغربال ده إيه بيتحط فيه الحاجة اللي إحنا عاوزين نغربلها، وبعدين يمسك الراجل الـ أو الست اللي هتغربل، وبتدي يحرك الغربال ده.

بالنسبة للراجل أو الست اللي بيحرك الغربال ده عشان يغربل، الحركة دي حركة خفيفة سهلة، ولا حركة شديدة عليه؟ إيه رأيكم؟ الراجل أنت لما تمسك حاجة بتغربلها، بتـ- حد غربل حاجة هنا قبل كده؟ طيب ولا حركة بسيطة جدا؟ أنت بتقعد بتهز كده إيه، إيديك هزة خفيفة جدا، مش كده؟ عشان تغربل الحاجة، يعني مش إيه مش مجهود، يعني الغربلة دي مش مجهود، مش كده؟

طيب، خلونا كده نتأمل للحظة، إني لو إحنا مثلا بنغربل دقيق مثلا، خلونا نتأمل إن كل ذرة دقيق من هذا الدقيق لها إدراك، يعني حط نفسك أنت مكان الدقيق ده، يعني إيه كل ذرة دقيق لها إدراك؟ يعني بتدرك ما يحدث لها. بالنسبة لـ- لـ- لحبات الدقيق، الحركة دي بالنسبة لها إيه؟ كأنها إيه بالظبط؟ زلزال، مش كده؟ فجأة لقت نفسها بتتهز هزة شديدة جدا، صح؟ زلـ- زلزال، زلزال عادي ولا زلزال قوي؟ زلزال شديد، مش كده؟ هو ده اللفظ القرآني الذي جاء: ﴿إِذ جَاءُوكُم مِّن فَوْقِكُمْ وَمِنْ أَسْفَلَ مِنكُمْ وَإِذ زاغَتِ الْأَبْصَارُ وَبَلَغَتِ الْقُلُوبُ الْحَنَاجِرَ وَتَظُنُّونَ بِاللَّهِ الظُّنُونَا * هُنَالِكَ ابْتُلِيَ الْمُؤْمِنُونَ وَزُلْزِلُوا زِلْزَالًا شَدِيدًا﴾ [الأحزاب: 10-11].

يبقى بالنسبة للمغربل، حركة الغربال دي حركة خفيفة جدا لدرجة إن ممكن مهمة زي دي الأم إيه توكلها إلى ابـ- بنتها الصغيرة: خذي غربليهم. ليه؟ مش محتاجة مجهود، حركة خفيفة بالنسبة للمغربل. بالنسبة لكل حبة دقيق في الغربال، ده زلزال شديد. يبقى يوشك أن يأتي زمان تغربل الناس فيه غربلة. إدراك الناس لهذه الغربلة أنه زلزال شديد.

الناس دول اللي هم مين؟ الكفار يعني والفسقة؟ اللي هم المؤمنين نص نص؟ اللي هم الأولياء؟ اللي هم الصحابة؟ لا، ده نبي الزمان، يعني الزلزال ده هيؤثر في نفسية أنبياء، ده فين في القرآن؟ ﴿حَتَّى يَقُولَ الرَّسُولُ وَالَّذِينَ آمَنُوكِ مَتَى نَصْرُ اللَّهِ أَلَا إِنَّ نَصْرَ اللَّهِ قَرِيبٌ﴾ [البقرة: 214]. أم حسبتم أن تدخلوا الجنة ولما يأتيكم مثل الذين خلوا من قبلكم مستهم البأساء والضراء وزلزلوا حتى يقول الرسول نبي الزمان هيقول: إمتى بقى نصر ربنا؟

ولو دي واحدة من الأمور التي إيه هي مفيدة لأهل الإيمان؛ أن يروا فعل الرب عز وجل، وده إحنا ندندن حوله كثيرا؛ أن نرى فعل الله عز وجل في كل شيء. إنما في الـ- في المعنى ده، إنك تتأمل فعل الله عز وجل كيف هو، يعني هل كيف هو بالنسبة له سبحانه وتعالى مش كيفيته، يعني مش سؤال عن الكيفية؟ هو فعل خفيف. افتكروا على طول ده اللفظ النبوي: «يغربل الناس فيه غربلة»، يعني بالنسبة لله عز وجل، وهو الذي يفعل هذه الغربلة في أهل الإيمان، بالنسبة له سبحانه وتعالى الفعل خفيف جدا بسيط. نعم، في إدراكنا نحن ما يصنع بأهل الإيمان فعل شديد. وده عيب فينا؟ لا، مش عيب، لأن ده إدراكنا البشري المحدود. ده إدراكنا البشري المحدود.

ففي إدراكنا البشري المحدود، زي إدراك بالظبط حبة كل حبة قمح أو حبة دقيق في هذا الغربال، شايفينه زلزال شديد، وده اللفظ القرآني.

طيب، هسألكم سؤال تاني؛ دلوقتي لما حطينا الدقيق ده بالحثالة اللي في الدقيق، الحثالة اللي هي الحاجات اللي غير مرغوب فيها، يعني إذا كان بقى إيه شوية إيه حصى على زلط على قشر بتاع القمح على الحاجات اللي غير مرغوب فيها دي، فحطيناها في الـ- في الغربال، وابتدأ المغربل يـ- يغربل هذا الـ- الذي في الـ- في الغربال، يعني الغربال ده الـ- إيه الكـ- كده الضبط صحيح، يعني إيه الغربال ده إيه؟ إيه من المشتقات حد يعرف؟ لا، هو إيه إيه نوعه إيه من المشتقات؟ اسم آلة، مش كده؟ أحسنت.

طيب، فـ- اللي بيغربل ده، بعد ما بيغربل، أو قبل بقى ما بيغربل كمان؟ دلوقتي أ- أو ماشي خلينا بعد ما بيغربل. خلاص، الحصى ما طلعت بعد ما بيغربل، إيه اللي بيفضل في الغربال وإيه اللي بيقع من الغربال؟ يعني اللي في الغربال هو الحثالة ولا القمح النظيف أو الدقيق النظيف؟ النظيف هو اللي بيفضل في الغربال، وبتقع الحثالة؟ إحنا عاوزين ناس مخلصة، شغل التجمع ده مش ناس غربلت ومسكت غربال وكده. ها، إيه اللي بيفضل؟ الحثالة هي اللي بتفضل، مش كده؟ أيوة، والدقيق هو اللي بينزل.

طيب، نرجع تاني، وكأن لكل حبة دقيق إدراك، هي دلوقتي أول ما اتحطت في الغربال، كأن ده المكان الآمن لهم، يعني هم إيه لسه ما تغربلوش ولا حاجة، فشايفين خلاص إحنا مرتاحين في حتة حلوة، والحياة زي الفل. فجأة لاقوا زلزال شديد، حط نفسك مكان الـ- حبات القمح دي ولا حبات دقيق دي، كل حبة لها إدراك، ابتدأ يحصل زلزال شديد، وابتدأ القمح يتساقط في الهواء، الدقيق هو اللي نازل في الهواء، وكأنه في إدراكه هو يفارق مكانه الآمن ويغادره إلى المجهول، هو مش عارف رايح فين! ده في إدراك حبة الـ- إيه الدقيق؛ هي تفارق مكانها الآمن اللي هي استقرت فيه شوية وخلاص والدنيا هادية، فجأة حصل زلزال شديد وابتدأ حاجات بتفضل في المكان اللي هي كانت شايفاه آمن، وحاجات تانية بتقع. طب، اللي بتقع دي رايحة فين؟ إلى المجهول، هي ما تعرفش رايحة فين. المغربل يدرك قطعا دي رايحة فين ودي رايحة فين؛ الحثالة اللي هتفضل رايحة فين؟ في الزبالة. الحثالة اللي هتفضل في الغربال دي هت- الست تقعد تعمل كده وفي الآخر تروح عاملة إيه؟ مش كده، في الزبالة.

يبقى المغربل يعلم قبل أن يغربل أن الطيب هينزل من الغربال، وخبيث هيمكث في الغربال اللي هو الحثالة، وأن الطيب مآله إلى أن نستفيد منه بعد هذه الغربلة، والخبيث مآله إلى الزبالة. لكن حبة كل حبة دقيق في هذا الـ- الـ- الغربال، وهي تسقط من الغربال من فتحات الغربال وتهوي إلى المجهول مش عارفة رايحة فين، كأني بها كأني بهذه الحبة تتشبث بالغربال، مش عاوزة تقع، مش عاوزة، عاوزة تفضل في مكانها الآمن. وكأني بها تتشبث بأختها وجارتها من حبات الدقيق، أو ربما من الحثالة. خايفة. مش عاوزة تقع، عاوزة تفضل في مكانها الآمن. وكأن المغربل يريد لها شيئًا آخر؛ يريد أن ينتفع بها، ويععلم أنه لن ينتفع بها إلا إذا تمايزت. مش هينفع ننتفع بهذا الطيب، بالدقيق الطيب ده، طول ما هو معاه الحثالة، مش هينفع. لابد من التمايز، والتمايز لفظ قرآني.

قال الله عز وجل: ليميز الله دي بتاعت الأنفال، التانية: ﴿حَتَّى يَمِيزَ اللَّهَ الْخَبِيثَ مِنَ الطَّيِّبِ﴾ [آل عمران: 179]. ما كان الله ليذر المؤمنين على ما أنتم عليه حتى يميز الخبيث من الطيب. يعني إيه؟ ما كان الله بالمناسبة، الآية دي في سورة إيه؟ آل عمران، بنتكلم في غزوة إيه؟ أحد. الآية التانية: ليميز الله الخبيث من الطيب في سورة إيه؟ الأنفال، بنتكلم في سورة إيه؟ في في إيه؟ في غزوة بدر. بصوا حتة التمايز دي موجودة إزاي في الجهاد؟ في ساحة الجهاد.

﴿مَّا كَانَ اللَّهُ لِيَذَرَ الْمُؤْمِنِينَ عَلَى مَا أَنتُمْ عَلَيْهِ حَتَّى يَمِيزَ الْخَبِيثَ مِنَ الطَّيِّبِ﴾ [آل عمران: 179]. يعني إيه الآية دي؟ يعني ما كان الله ليذر المؤمنين على ما هم عليه، يعني من اختلاطهم بأهل النفاق وأهل الريب، حتى يميز الخبيث من الطيب. طيب، ما بسهولة يطلع نبيه على مين؟ على أهل النفاق. ويطلع أهل الإيمان على أهل النفاق ونخلص، يعني لازم ده كله؟

بعديها إيه؟ ﴿وَمَا كَانَ اللَّهُ لِيُطْلِعَكُمْ عَلَى الْغَيْبِ﴾ [آل عمران: 179]. فهمتوا الآية؟ ما كان الله ليذر المؤمنين على ما أنتم عليه حتى يميز الخبيث من الطيب، وما كان الله ليطلعكم على الغيب.

طيب، إزاي يميز طالما مش هيطلعنا على الغيب؟ بالغربلة، بالزلزال الشديد. هذه الزلازل الشديدة والمحن تغربل الناس. فـ حبات الدقيق وهي بتقع كأني بها في الهواء تصيح: ليه يا رب؟ ليه بتعمل فيا كده؟ إشمعنى أنا؟ طيب ما ده الحثالة يا رب معاهم كذا وكذا وكذا، وفي الـ- المكان الآمن، ومعاهم من الأموال قد كده، ومعاهم من الدول مش عارف إيه، ليه إحنا يا رب؟ ولا تدري المسكينة ما أريد لها، وما هيئ لها، وما تعد له.

مهم جدا اللفظ ده: ما تعد له النهارده في خطبة الجمعة! كنا بنتكلم عن حديث: «ما بعث الله نبيا إلا ورعى الغنم». فقلنا أول فايدة من فوايد الحديث -مين حضر الجمعة؟- أول فايدة كانت إيه؟ قول، أي حد. أول فايدة في الحديث إيه؟ اللي إحنا قلناه من شوية، اللي هو قلنا ساعتها هذا النبي -ما بعث الله من نبي إلا ورعى الغنم- ساعتها فصلنا إيه الحكم يعني في إنه يرعى الغنم، بس المهم في الآخر عشان يعرف يقود الأمم، كان لازم يرعى غنم.

قلنا أول فايدة من فوايد الحديث إيه بقى؟ أن هذا النبي، طبعا هو ما كانش نبي وهو بيرعى الغنم، هو ده قبل البعثة. كأني بأحدهم، أو بأكثر من واحد وهو بيرعى الغنم، وبعدين رعاية الغنم دي يعني إيه؟ يعني فضلات بقى الغنم، ويعني غنمة تشرد تروح تجيبها، ويعني هتسيب بلدك ومدينتك عشان تطلع للصحرا ترعى، وتقعد طول اليوم وتتأخر. وعارفين حديث الـ- الـ- صخـ- الـ- صخرة؟ ما هو أول واحد إيه؟ نأى به طلب الشجر يومًا حتى نام إيه؟ الأبوين، مش كده؟

المهم يعني شغلانة ما هي، يعني إيه؟ ممكن يتمنى إن تبقى شغلانته في المدينة، يعني إيه اللي خرجني بره المدينة في الصحرا وأقعد لوحدي؟ فكأني ممكن بأحدهم إيه؟ يعني متضايق من الشغلانة، مش كده؟ يعني إشمعنى غنم يعني، وأنا يعني ما فيش غـ- الدنيا ضاقت عليا، ومش عارف أجيب شغلانة تانية، ولا يدري أنه يهيأ لأمر جلل. ولأجل هذا الأمـ- الأمر، لابد أن يرعى الغنم.

وما يعرفش الغيب هذا النبي، ما كان لسه نبي ولا غيره، وما من ما من نبي، ما بعث الله نبيا إلا رعى الغنم. فهو ما يعرفش وقت ما بيرعى الغنم، مش فاهم إنه بيهيأ لأمر كبير، بس لازم عشان يبقى مناسب لهذا الـ- المقام، لابد من صفات نفسية وصفات. فلا، تعالى بقى ارعى غنم عشان تتعلم الصبر، عشان تتعلم التواضع، عشان تتعلم الرأفة والرحمة، وحاجات كتير إحنا قلناها بقى في الخطبة، اسمعوا الخطبة يعني.

نفس الكلام هنا؛ حباية الـ- الدقيق دي اللي واقعة من الـ- اللي بتقع من الغربال، بتصيح: ليه يا رب؟ ليه بتعمل فينا كده؟ وبعدين تبص يمينها وشمالها، وهي بتهوي في الهواء، تجد إن كل اللي بيقعوا معاها ناس نضيفة، مش كده؟ حبات بقى نضيفة، حبات، حبات دقيق يعني، ورايحين فين؟ للمجهول، مش عارفين إحنا رايحين فين. وبعدين كأني بهم، بـ- بهذه الحبات من الدقيق، تنظر كده فوق في الـ- المكان الآمن، في إدراكها، خلي بالكم، هو الـ- الـ- الغربال ده مكان آمن ولا لأ؟ هو في إدراكها كان المكان الآمن، بقى كنا قاعدين ومرتاحين قبل ما يحصل الزلزال.

ما هو ده يا جماعة أهل الإيمان؛ شايفين إن الدنيا دي هي المكان الآمن. إحنا إحنا دلوقتي معظم معظم تأسف وتحسر أهل الإيمان على إيه؟ على دنيا، أيوة، ما هو على على إيه؟ على إيه في أهل غزة؟ يعني لو لو حطينا الحاجات اللي إيه؟ تأسفنا في ميزان الشرع، هنتأسف عليهم ولا علينا؟ لو لو لو وزنا بميزان الشرع، ما هو اللي ماتوا دول نحسبهم إيه عند الله؟ طب، يعني لو قعدوا هيـ- إيه؟ يعني هيبقوا هيبقوا إيه في الدنيا؟ هيبقوا إيه؟ يعني لو لو أحدهم ما ماتش، ومش بس ما ماتش، لأ، ده حاز الدنيا، يعني ما ماتش وقعد سنة اتنين، بقى ملك الدنيا، مش ملك دولة، كده كسبان يعني؟ ولا موته شهيد مربوحة؟ مربوحة، مش كده؟ تأسفنا على الدنيا.

ليه؟ لأننا في إدراكنا نحن، إن الدنيا دي هي المكان الإيه؟ المكان الآمن، ما الدنيا حلوة أهي وهدوء. وبعدين تنظر بقى حـ- حبات الدقيق حواليها، تلاقي إن كل اللي واقع الطيب، تقوم تبص تبص كده لفوق، تنظر للغربال، فجت إن اللي الـ- اللي تبقى في الـ- في المكان الآمن الحثالة، وبتدي بقى الاعتراضات: ليه يا رب؟ إشمعنى إحنا؟ يعني يا رب، الحثالة هي اللي تفضل ممكن لها، هي اللي تفضل في الـ- في الغربال، وإحنا يا رب اللي نقع؟! ولا تدري كل حبة أنها إنما خلقت لشيء آخر.

وأن ما خُلقت من أجله لن يكون أبدًا إلا بعد التمايز، لن يكون. مش هينفع يا جماعة، مش هينفع؛ دي سنة ربنا سبحانه وتعالى، وده قانون العقل. عشان نستفيد من الدقيق مش هينفع نستفيد منه غير بعد الغربلة، وإلا هنكون دمرنا أي شيء بنعمله بالدقيق ده. هات الدقيق ده اللي ما تغربلش واعمل بيه أحلى كيكة في الدنيا، واعزم الناس عليها، ومع أول قطمة زلطة تيجي تحت درس واحد، يتكسر درسه؛ هتترمي الكيكة في الزبالة. ليه؟ كنت لازم تغربل، لازم.

ممكن الناس تقول: إيه لزمة الغربلة؟ ما إحنا الدقيق يخش الفرن مع الحثالة، أهو النتيجة أهي. فالمغربِل أعلم من حباية الدقيق بما يصلح هذه الحبة. المغربِل أعلم، حباية الدقيق متضايقة، إيه الفرهدة دي والزلزال ده ونقع ونتعمل؟ والمغربِل يعلم أنها لو بقيت مع الحثالة لن ينتفع بها، مش هنعرف ننتفع بها.

أنتم عارفين يا جماعة، أصل الدقيق لو فضل مع الحثالة، لو المسألة إن بعد كده لو دخلوا هم الاتنين في مهمة واحدة زي مهمة الكيكة دي، هنعرف نستفيد من الجزء اللي فيه الدقيق ونرمي الجزء اللي فيه الحثالة، يعني مش هيتأثر هذا الاختلاط ولا يؤثر بعضهم على بعض، كنا قلنا ماشي، سهلة. لكن هو مش هيحصل كده؛ خلطة الدقيق بالحثالة بتخلي الدقيق يتأثر بالحثالة.

ده فين في القرآن؟ ﴿لَوْ خَرَجُوا فِيكُم مَّا زَادُوكُمْ إِلَّا خَبَالًا وَلَأَوْضَعُوا خِلَالَكُمْ يَبْغُونَكُمُ الْفِتْنَةَ وَفِيكُمْ سَمَّاعُونَ لَهُمْ﴾ [التوبة: 47]. عشان الناس اللي بتحسبها بالقوى وبالعدد ومش عارف وكده؛ لأ، إحنا عندنا معنى أهم وأعلى من مجرد العدد. الآية دي نزلت فين؟ أنتم عارفين النبي عليه الصلاة والسلام راح حارب في خيبر، ورجع وبعدين هيطلع تاني طلعة تانية، يوم يقول لهم ما حدش يطلع معايا غير اللي طلع خيبر. طيب ليه؟ ما إحنا الأحسن نزود العدد، والجيش يبقى بدل ما هو ألف يبقى عشرة آلاف. فأنزل الله عز وجل ﴿لَوْ خَرَجُوا فِيكُم مَّا زَادُوكُمْ إِلَّا خَبَالًا وَلَأَوْضَعُوا خِلَالَكُمْ يَبْغُونَكُمُ الْفِتْنَةَ وَفِيكُمْ سَمَّاعُونَ لَهُمْ﴾ [التوبة: 47].

ففيكم سماعون لهم. طيب إيه الحل؟ الحل إنه يحصل هذا التمايز، لابد أن يحدث، ويحصل هذا التمحيص؛ يبقى لفظ التمايز لفظ قرآني، ويحدث تمحيص للفئة المؤمنة، وده برضه لفظ قرآني ﴿وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ وَاللَّهُ لَا يُحِبُّ الظَّالِمِينَ * وَلِيُمَحِّصَ اللَّهُ الَّذِينَ آمَنُوا وَيَمْحَقَ الْكَافِرِينَ﴾ [آل عمران: 140-141]. فدي كلها فوائد في هزة الغربال.

يوشك أن يأتي زمان يُغربل الناس فيه غربلة. المشكلة فين؟ الإشكال فين؟ إني حبات الدقيق وهي بتقع في الهوا مش مدركة للمآلات دي، فهي بتحكم على الواقع؛ اللي إحنا سميناه قبل كده الاستغراق في اللحظة الحاضرة. الاستغراق في اللحظات الحاضرة مؤذي نفسيًا جدًا، مؤذي.

خلي بالكم الاستغراق في اللحظة الحاضرة طالما محدش جاوب فأكيد الناس ناسيين، فنرجع تاني لحتة ما كانش المفروض تتقال في المحاضرة دي بس مهم. حباية الدقيق وهي بتقع دلوقتي هي مش شايفة الغيب، ولا عندها علم بالغيب. ولذلك يا جماعة هذا كان مقبولًا في عهد الصحابة الأوائل، إنه يحصل لهم ده في غزوة بدر وأحد، ليه ربنا لسه بيربي؟ وبعدين آيات القرآن تنزل فتبين. لكن العجيب إنه في هذه الأزمان الغابرة إحنا زي ما نكون مش شايفين سنن ربنا في ده، ما إحنا عندنا آيات شرعية متلوة وآيات قدرية حصلت عبر التاريخ، من أول جيل الصحابة لمن بعدهم، فعندنا ده وده، وكما قيل ليس تحت الشمس جديد، هي دايرة وبتتكرر.

فلما أول هزة تحصل ترجع تاني القلوب تضطرب؛ ليه؟ طب إذا كان الجيل الأول اللي هو أول عملية غربلة لسه مش عارفين إن في حاجة اسمها غربال ولسه مش عارفين إن في حاجة اسمها حثالة؟ إنما مئة شوال اتغربلوا ولسه الاضطراب بيصيب الناس! وشوفنا نتيجة إنه إزاي تم تنقية الطيب من الخبيث، وعرفنا إن مآل الخبيث في الزبالة، وعرفنا إن مآل الطيب أن ينتفع به بعد ذلك؛ عرفنا ده كله، ومش مرة ولا اتنين، آلاف المرات. وياريت بس كده لأ، ده إحنا كمان عندنا منشور كده متعلق على الحيطة إن عملية الغربلة واحد اتنين تلاتة أربعة وعشان واحد اتنين تلاتة أربعة كمان، وفي الآخر مع أي هزة تحصل نرجع تاني لنفس المربع. الاستغراق في اللحظات الحاضرة مؤذي.

طيب هو ده بيصيب الفساق والمذنبين؟ لأ مش بس دول. طب المؤمنين اللي هم نص نص زينا كده؟ لأ برضه، يصيب الأولياء. الاستغراق في اللحظة الحاضرة يصيب الأولياء؛ أصاب مين؟ خلينا في الغزوات قبل ما نشوف، غزوة أحد، وشاع أن النبي صلى الله عليه وسلم مات. طيب، إيه الأمر الشرعي للفئة المؤمنة؟ ترمي السلاح وتقعد؟ ده مش الأمر الشرعي، فئة عملت كده وشاع أنه قد مات، سابوا السلاح وقعدوا.

طيب ليه قعدتوا؟ يمر عليهم واحد يقول: مات النبي صلى الله عليه وسلم؟ قال: فقوموا فموتوا على ما مات عليه. فالاستغراق في اللحظة الحاضرة ممكن يعمل حاجة من اتنين: إما إنه يقعدك، خلاص تكتئب وتقفل عليك بابك ولا عاوز تكلم حد ولا عاوز تعمل حاجة، يقعدك زي دول كده؛ أو يخرجك إلى فعل ما لا ينبغي فعله، تبتدي تكفر اللي ما يستحقش التكفير، وتقتل اللي ما يستحقش القتل، وتهدد اللي ما يستحقش التهديد وتلوش. ليه؟ استغراق في اللحظة الحاضرة، والاتنين حصلوا في موقف لأولياء الأمة لما مات فعلًا النبي عليه الصلاة والسلام.

في ناس استغرقتهم اللحظة الحاضرة، لإن أي حد من اللي هحكي عليهم دول لو جبته كده لوحده وقلت له هو النبي خالد مخلد؟ هيقولك لأ. هتقوله طيب هو بشر يعني هيموت؟ يقولك آه طبعًا لازم يموت. وده اللي حصل، يعني أبو بكر لما تلا الآية ﴿وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ﴾ [آل عمران: 144]. عمر يقول إيه؟ والله لكأنها أنزلت الساعة.

في الموقف ده حصل حاجتين: منهم من أُقعد، ده اللي إحنا بنقول عليه، الاستغراق في اللحظة الحاضرة ممكن تقعدك، مش عارف أعمل حاجة، مش عارف، تقعدك عن الأمور الشرعية اللي لازم تعملها، بعضهم ممكن تقعده عن الدنيا كمان يعني عن حياته العادية. ومنهم من خرج إلى فعل ما لا ينبغي فعله زي سيدنا عمر، عمل إيه؟ كان هيقتل، خرج سيفه وقال: ما مات، والله ما مات، ولقد ذهب ليكلم ربه كما ذهب موسى، وسيعود ويقطع أيدي وأرجل أقوام يزعمون أنه قد مات، من قال أنه قد مات قطعت عنقه بهذا السيف. يعني خرج إلى فعل ما لا ينبغي فعله من إيه؟ من الاستغراق في اللحظة الحاضرة، اللي إحنا بنسميها بلفظ تاني، عاوزين نبقى بنعرف نحتوي الأزمة مش بتحتوينا الأزمة.

الكلام ده نظريًا وإحنا بنقوله سهل، تطبيقه لأ، محتاج مجاهدة وتوفيق من الله عز وجل شديد، ونبقى عارفين إنه ده طريق الأولياء، يعني ما هوش طريق سهل، مش إحنا اتكلمنا كلمتين النهارده فإحنا هنخرج نعرف نحتوي الأزمة ولا تحتوينا الأزمة، الموضوع محتاج مجاهدة ومحتاج توفيق من الله عز وجل. وبعد كده ممكن نقع؟ آه ممكن نقع، أولياء الأمة وقعوا في بعض المواقف. فحباية الدقيق دي بقى لما تخرج من اللحظة الحاضرة واستغراقها في هذه اللحظة وتشوف مآلات ما كان، هتطمئن؛ لكن في وقتها القلوب مضطربة والألسن ربما خرجت إلى كلام لا ينبغي أن يقال، وكذا وكذا، ده اللي إحنا يا جماعة لازم نشوفه.

طيب، هذه الحثالة التي تبقى في هذا الغربال، ممكن يقدر الرب سبحانه وتعالى إنه يفضل معاها شوية طيب برضه خلي بالكم، عارفين الحديث ده؟ الحديث بتاع الغربلة ده، فيه رواية تانية. الراوي هو عبد الله بن عمرو بن العاص رضي الله عنه وعن أبيه، في رواية إن النبي عليه الصلاة والسلام قال له: كيف بك يا عبد الله؟ وكيف بك وأنت إذا كنت في حثالة؟ يعني تعمل إيه لو بصيت حواليك لقيت نفسك في حثالة؟ هتعمل إيه؟ إيه ده، هو ممكن ده يحصل؟ آه ممكن يحصل، أنا ليه بقول الكلام ده؟ علشان في بعض الناس إحنا لينا طبعًا كلمة كده مشهورة إنه لن يستقيم لك دين إلا باتهام النفس، تتهم نفسك دائمًا عشان يصلح لك دينك، لكن في بعض الناس من كثرة اتهامها لنفسها ربما خرج إلى إنه دائمًا يصل إلى درجة القنوط من رحمة ربنا سبحانه وتعالى، أنا وحش، أنا سيء، أنا أهو الناس بتجاهد وأنا ما فيش سبيل للجهاد، ده كويس إنك تتهم نفسك، إنما يخرج بقى لدرجة إن إيه؟ خلاص أنا ضايع، أنا في النار، أنا ما فيش فايدة مني، لا مش مش كده.

لما تلاقي نفسك وحواليك الحثالة، الحثالة هنا اللي هو إيه؟ اللي هو الطيبين عمالين يروحوا. طب خلينا ندي مثال عشان ما يبقاش ده حدث في الصحابة، حد يعرف أو حد يتوقع فين؟ كعب بن مالك، توبة كعب وصاحبيه. المكان الآمن في غزوة تبوك هو إيه؟ المدينة. تبوك مكان بعيد، وبعدين في شدة الحر، والغزوة في شدة الحر، والثمار في المدينة طابت ووقت جني الثمار؛ فالمكان الآمن فين؟ المدينة. وخروج الفئة الخارجة هي دي اللي بتقع من الغربال، يعني رايحة حيث المجهول، ما هو معركة وسفر ومشقة، هنقع فين؟ هنكسب ولا نخسر؟ مين هيموت؟ مين هيرجع؟ المدينة مكان آمن. طيب مين اللي اتبقى في المدينة؟ المعظم مين؟ الحثالة، ده بكلام كعب رضي الله عنه. بقى يخرج يمشي في طرقات المدينة فلا يرى إلا منافقًا مغموسًا في النفاق، مش بس منافق، ده منافق وهم عارفين إنه منافق، فعشان كده هخرج معاهم وأنا أصلًا معروف إني منافق؟ حثالة، أو واحد من أصحاب الأعذار بقى، فكان كعب في وسط الحثالة.

طب فين الدقيق؟ لأ الدقيق مش هنا، ما تلاقيهوش هنا، الدقيق ما تلاقيهوش في المكان الآمن أبدًا. حديث النبي عليه الصلاة والسلام الرجل اللي على فرسه، أول ما يسمع الهيعة يجري بالفرس ناحية الهيعة، يعني صوت شديد في حتة، هو مش عاوز يقعد في المكان الآمن، ده هو بيروح لمظان القتل يريد الشهادة. فينظر يمينًا وشمالًا كعب وصاحباه قاعدين وسط الحثالة، خلاص. وهذا كان ذنبًا من كعب رضي الله عنه، لكنه تدارك رضي الله عنه.

ممكن بقى الله عز وجل يقدر قدرًا إني يبقى فئة من أهل الإيمان وسط الحثالة، قدر ربنا سبحانه وتعالى. يعني يا جماعة مثال، الغزوات اللي راحها النبي صلى الله عليه وسلم واجتبى الله عز وجل فيها أناسًا ماتوا، دول خلاص بقى الدقيق اللي بيقع. معنى كده مش هقول الباقي حثالة طبعًا، بس معنى كده إن دول أفضل من اللي اتبقى؟ ها إيه رأيكم؟ قطعًا لا. ليه قطعًا؟ لإن كده بدايةً من اللي اتبقوا مين؟ بدايةً النبي عليه الصلاة والسلام، ما هو النبي ما ماتش في ولا غزوة، رجع؛ فبدايةً النبي عليه الصلاة والسلام ممن تبقى، وبعدين الأربعة اللي هم أحسن أربعة في الأمة، ما هو كلهم بقوا خلفاء بعد كده، يبقى في كل الغزوات الأربعة رجعوا منها سالمين؛ أبو بكر وعمر وعثمان وعلي رضي الله عنهم. وقطعًا أي واحد من دول أفضل من أي واحد مات في أي غزوة، يعني مسألة إني ناس تروح وناس تعيش مش معنى كده إن اللي راحوا أحسن من اللي عاشوا، ولا تشغل بالك بده.

احفظوا الجملة اللي جاية دي: إذا أقامك الله عز وجل في حال فلا تنشغل بالحال، انشغل بما عليك في هذه الحال. حفظتوها؟ إذا أقامك الله في حال فلا تنشغل بالحال، ولكن انشغل بما عليك في هذه الحال. يعني إيه؟ يعني ربنا سبحانه وتعالى أقامك في صف المجاهدين، ما تنشغلش بقى إيه أنا مجاهد وأنا أحسن من غيري وأنا خالص؛ يا رب أنت أقمتني هنا، فما الذي يرضيك عني هنا؟ أقامك الله عز وجل في صفوف المنفقين، أقامك الله عز وجل في صفوف طلاب العلم، في صفوف محفظي القرآن، في صفوف العابدين، في صفوف أي صف، أغلق الله عز وجل عنك باب الجهاد وأنت جواك بتحترق، تقوم تقول إيه؟ يا رب، ماذا تريد مني وقد أغلقت علي هذا الباب؟ إيه اللي يرضيك عني يا رب؟ ما تنشغلش بالحال اللي هو إيه أنا مقفول.

أنا كده أبقى وحش. أنا كده مش عارف إيه. يا سيدي، إيه اللي أنت بتعمله ده؟ اللي أنت بتعمله ده هيعمل إيه يعني؟ ولا حاجة. يعني أنت بتقعد تعمل إيه؟ يبقى ليك ورد من تأنيب الضمير كده كل يوم؟ تقعد تندب. بعد كام يوم هيفتح لك ما كان مغلقاً؟ مش هيحصل. مش كده؟

لكن تروح على طول تشوف يا رب إيه أمرك الشرعي فيّ أنا؟ أنا أعمل إيه دلوقتي؟ وده الكلام اللي اتكلمنا عنه كتير هنا قبل كده. يعني محاضرات كتير اتكلمنا في الموضوع ده. خلاص. ولو تفتكروا قلنا لكم الآية التي أحبها كثيراً: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77].

وقلنا لكم ساعتها كفوا أيديكم ده قد يكون أمراً شرعياً وقد يكون أمراً قدرياً. قيل لهم كفوا أيديكم، يعني شرعاً لا يجوز لكم القتال الآن. وقد يكون في بعض الأوقات كفوا أيديكم قدراً. يعني إيه قدراً؟ يعني عاوزينه بس ما فيش سبيل. ليه ما فيش سبيل؟ ﴿إِنَّمَا أَمْرُهُ إِذَا أَرَادَ شَيْئًا أَنْ يَقُولَ لَهُ كُنْ فَيَكُونُ﴾ [يس: 82]. خلاص، الله عز وجل منع السبيل الآن بأي طريق. إيه واجبك؟ طب يا رب إيه المراد مني يا رب؟ ما ربنا قالها في الآية: ﴿كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ﴾ [النساء: 77].

يعني انشغلوا بما يصلح أنفسكم، وانشغلوا بإصلاح الآخرين. أقيموا الصلاة؛ يبقى ده نص في الصلاة، ويفهم منه أي عبادة أخرى لازمة النفع، هي نفعها يعود عليك أنت. وآتوا الزكاة؛ نص في الزكاة والصدقات، ويفهم منها أي عبادة نفعها متعدٍ. من قيل لهم هذا كفوا أيديكم وأقيموا الصلاة وآتوا الزكاة، فضلوا مستعجلين، طيب ربنا عمل إيه؟ كتب عليهم القتال.

إيه اللي حصل؟ يحكي الله عز وجل لنا ما حصل: ﴿أَلَمْ تَرَ إِلَى الَّذِينَ قِيلَ لَهُمْ كُفُّوا أَيْدِيَكُمْ وَأَقِيمُوا الصَّلَاةَ وَآتُوا الزَّكَاةَ فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ﴾ [النساء: 77]. طب ما أنا قلت لكم كفوا أيديكم وأقيموا الصلاة وآتوا الزكاة، ما عملتوش كده. كففتم أيديكم قدراً فاتسحلتوا في الفيسبوك، واتسحلتوا في المواقع الإباحية، واتسحلتوا في تحصيل دنيا زائدة ما أنتم مش محتاجين ليها، واتسحلتوا في الوقوف في الشوارع والقعاد في النوادي. لم نكف أيديكم قدراً لهذا، بل قلناها لكم كفوا أيديكم وأقيموا الصلاة وآتوا الزكاة. انشغلوا بما يصلحكم ويصلح إخوانكم.

فلما يكتب عليكم القتال وترفع بقى هذه القيود، يا جماعة أنا دائماً أقول الجهاد أمر خطير. ليه أمر خطير؟ لأنه ذروة سنام الإسلام، والشهيد معلومة له، وفي نفس الوقت من أكبر الكبائر الفرار يوم الزحف. فإحنا لازم نزن المسألة كده. هو مين اللي قال لحضرتك إنك هتكون من الفئة الأولى مش الثانية؟ مين؟ خلي بالكم يا جماعة، هو الفرار يوم الزحف ده عارفين حصل من مين؟ من الصحابة في بعض الغزوات، بعض الصحابة فروا، ولم يبقَ حول النبي عليه الصلاة والسلام إلا رقم قليل جداً، يعني يمكن مئات. الـ ١٢ ألف فروا.

أنت جاي تخذلنا؟ لا، مش جاي أخذلكم، جاي أوريكم الصورة من بعيد، الصورة كاملة. أنت مطلوب منك الآن أن تكون فيما إذا كنت فيه ثبتك الله عز وجل، إذا رفعت تلك القيود. أما أن تهجر كلام الله عز وجل وتجعله وراءك ظهرياً، وربنا يقول لك أقم الصلاة وآت الزكاة وأنت ولا هنا، وزي ما أنت على الفيسبوك بتسكرول، وزي ما أنت على الشورتس والريلز مضيع عمرك، وزي ما أنت في النوادي وعلى النواصي، وزي ما أنت في مجالس الغيبة، ومستنيين إيه بقى؟ لما هذه الآية تتكلم عن صحابة؛ ﴿فَلَمَّا كُتِبَ عَلَيْهِمُ الْقِتَالُ إِذَا فَرِيقٌ مِّنْهُمْ يَخْشَوْنَ النَّاسَ كَخَشْيَةِ اللَّهِ أَوْ أَشَدَّ خَشْيَةً وَقَالُوا رَبَّنَا لِمَ كَتَبْتَ عَلَيْنَا الْقِتَالَ﴾ [النساء: 77].

قلنا لكم قبل كده جواب هذا السؤال إيه؟ لو سألتك أي واحد أقول له إيه هو أنت ليه عملت كذا؟ هتقول إيه الجواب؟ عملت كذا عشان ١ ٢ ٣ ٤، مش ده الجواب؟ قالوا ربنا لم كتبت علينا القتال، منتظرين بقى ربنا يقول إيه، كتبت عليكم القتال للأسباب التالية ١ ٢ ٣ ٤. وقالوا ربنا لم كتبت علينا القتال، قل متاع الدنيا قليل. ربنا ما جاوبش السؤال، ربنا فضح القلوب، وكأن المعنى أنتم ما سألتم هذا السؤال إلا لأن الدنيا ما زالت في قلوبكم. لما كتبت علينا القتال؟ قل لهم متاع الدنيا قليل. فما تنشغلوش بالدنيا، وما تعظموش الدنيا، لأن هذه الدنيا هي التي دفعتكم لأن تسألوا هذا السؤال أصلاً.

يعني هب ما أمرناكم بإقامة الصلاة ولا بإيتاء الزكاة، وكتب عليكم القتال، وقد عرفتم أن من قاتل فقتل هو في الجنة، وله كذا وكذا من الثواب، إيه الإشكال؟ ليه تسألوا بقى ربنا لم كتبت علينا القتال؟ ليه تسألوا السؤال ده؟ ما تقاتلوا، قل متاع الدنيا قليل. يعني الصحابة كان في منهم من يريد الدنيا؟ آه، وربنا قال كده: ﴿مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ﴾ [آل عمران: 152].

كالعادة يا جماعة، وإحنا بنتكلم عن جيل الصحابة لا نتوهم ولا يقع في القلوب تنقص الصحابة، بشر، ربنا بيربيهم. دي تربية من ربنا سبحانه وتعالى، خلاص ما هو الصحابي ما اتخلقش عالٍ في كل الصفات، لا ما فيش كده، هو بشر، عادي وأسلم، وتيجي التربية بقى، دور التربية. بل الله فعل ذلك مع أنبيائه ونص على ذلك ﴿وَلِتُصْنَعَ عَلَىٰ عَيْنِي﴾ [طه: 39]. واحدة واحدة ربنا بيربي أولياءه، يربي أنبياءه كمان. مش كده؟ يعني موسى أول مرة يرمي العصا تتحول ثعبان يجري، مش كده؟ يجري ﴿وَلَّىٰ مُدْبِرًا وَلَمْ يُعَقِّبْ﴾ [النمل: 10]. وبعدين ربنا يربي.

وبعدين يجي الموقف قدام السحرة، يقوموا يرموا كل العصيان تتحول ثعابين في عينيه هو، أنهي موقف أشد؟ ثعبان واحد ولا مثلاً ألف ثعبان؟ ﴿فَأَوْجَسَ فِي نَفْسِهِ خِيفَةً مُّوسَىٰ﴾ [طه: 67]، ما جريش، من أثر إيه ده؟ التربية، مش كده؟ أوجس بس في نفسه خيفة موسى، وبعدين ربنا بيربي. وبعدين يخرج ببني إسرائيل، البحر قدامهم وفرعون وراهم ﴿إِنَّا لَمُدْرَكُونَ﴾ [الشعراء: 61]، قال ﴿كَلَّا ۖ إِنَّ مَعِيَ رَبِّي سَيَهْدِينِ﴾ [الشعراء: 62]، موسى مش عارف إيه اللي هيحصل. والموقف ده أشد المواقف كلها خلي بالكم. ثعبان أو عدة ثعابين هنجري وخلاص بالثعابين والموضوع يخلص، ده فرعون وجيشه، هتجري تروح فين؟ والبحر قدامك. شوفوا أثر التربية، وبعدين اللي معاك عارف أنت لو لوحدك أحسن ما يبقى معاك حد بيخوفك، مش كده؟

أنت لو لوحدك، لما إيه كل شوية حاسب هيحصل، يا عم إهدأ، طب إهدأ، هو ده اللي مع موسى عليه السلام، يعني لو لوحده لا، ده الناس دول يقولوا إنا لمدركون، خلاص خلصنا، يا ننزل البحر ونغرق، يا فرعون هيجي يقتلنا، قال كلا إن معي ربي، ومش إيه، ممكن سيهدين. فدي تربية ربنا لأوليائه. فالصحابة ربنا قال لك كده عنهم ﴿مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ﴾ [آل عمران: 152]، وكان ابن مسعود أظن كان يقسم بالله إنه ما كان يظن إن حد من الصحابة يريد الدنيا حتى نزلت هذه الآية.

فمين بقى هنا يرفع إيده؟ اللي بيزكي نفسه يقول لا، أنا مش بتاع، أنا عارف نفسي، أنا مش عاوز دنيا، مين يعرف يعملها دي؟ أو مين هنا يرفع إيده ويقول إيه، لا لا، أنا عارف بس أول ما أبقى في صف المجاهدين ولا في، مش عارف إيه، أنا لن أفر، مين يعرفها دي؟ يعني إيه؟ يعني أنت جاي تخذل للمرة الثانية، مش بأخذل، أنا بقول لك دورك إيه دلوقتي؟ أنت عمال شاغل نفسك بدور أنت مكفوف عنه قدراً، ممنوع منه قدراً مش شرعاً. وفي المقابل ما بتعملش اللي عليك. المستطاع لك الآن بتعمله بنسبة قد إيه؟ بتعمله بنسبة قد إيه؟ فانشغل بهذا، انشغل بإصلاح نفسك، وإصلاح من حولك.

زي ما قلنا لكم إقامة الصلاة نص في الصلاة ومعنى الصلاة يعني أي عبادة نفعها لازم، وإيتاء الزكاة نص في الزكاة وأي عبادة نفعها متعدٍ للغير، انشغل بهذا. ثم أمر آخر في مسألة الغربلة دي، تحدثه الغربلة، حديث النبي عليه الصلاة والسلام: «يوشك أن تداعى عليكم الأمم كما تداعى الأكلة إلى قصعتها»، قالوا أو من قلة نحن يومئذ يا رسول الله؟ قال: «لا، بل أنتم يومئذ كثير، ولكن غثاء كغثاء السيل، ولينزعن الله المهابة من صدور أعدائكم، وليقذفن في قلوبكم الوهن»، قيل وما الوهن؟ قال: «حب الدنيا وكراهية الموت». حب الدنيا رأس كل خطيئة.

والصحابة رضوان الله عليهم يكفينا نأخذ موقفين بسرعة، غزوة بدر وغزوة أحد. غزوة بدر، قلنا لكم إحنا هنا تأملنا سورة الأنفال في أكثر من مجلس، في أول مجلس من تأملاتنا في سورة الأنفال، قلنا لو أنا قلت لك تعالى اقعد خد المايك أهو، احكي لي غزوة بدر، هتمسك المايك وتحكي، هتبتدي بإيه أول حاجة؟ أسباب الغزوة، مش كده؟ تاني حاجة وقائع الغزوة، يعني الغزوة كان فيها إيه، ومين راح، ومين جه، ومين اتقتل، تالت حاجة اللي هي بتختم بيها، نتائج الغزوة، ده الترتيب المنطقي لأي واحد هيحكي لنا غزوة بدر. صح كده؟

ربنا سبحانه وتعالى نزل سورة في غزوة بدر، سورة إيه؟ الأنفال. أول آية في الأنفال ﴿يَسْأَلُونَكَ عَنِ الْأَنفَالِ﴾ [الأنفال: 1]. الأنفال أنهي واحدة في الثلاث حاجات دول؟ النتائج، اللي هو في الآخر. أول آية في سورة الأنفال ﴿يَسْأَلُونَكَ عَنِ الْأَنفَالِ ۖ قُلِ الْأَنفَالُ لِلَّهِ وَالرَّسُولِ ۖ فَاتَّقُوا اللَّهَ وَأَصْلِحُوا ذَاتَ بَيْنِكُمْ﴾ [الأنفال: 1]. أول آية، وبعدين شوية آيات بتوصف المؤمنين وبعدين نبتدي بقى نحكي الغزوة من الأول، مش كده؟ إيه أول آية في وقائع الغزوة بقى؟ ﴿كَمَا أَخْرَجَكَ رَبُّكَ مِن بَيْتِكَ بِالْحَقِّ وَإِنَّ فَرِيقًا مِّنَ الْمُؤْمِنِينَ لَكَارِهُونَ * يُجَادِلُونَكَ فِي الْحَقِّ بَعْدَمَا تَبَيَّنَ كَأَنَّمَا يُسَاقُونَ إِلَى الْمَوْتِ وَهُمْ يَنظُرُونَ﴾ [الأنفال: 5-6].

نبتدي من هنا، طب إيه ده؟ طب ليه الأنفال في الأول؟ ليه؟ عشان هو ده الدرس، أعظم درس في غزوة بدر ﴿يَسْأَلُونَكَ عَنِ الْأَنفَالِ﴾ [الأنفال: 1]، السؤال ده كان سؤال إيه، يعني هنعمل إيه في الأنفال وكده، لأ، دول اختلفوا في الأنفال، ثلاث فرق من الصحابة، كل فرقة بتقول الأنفال بتاعتنا لوحدنا ومحدش ليه في الأنفال دي حاجة، فنزعها الله من أيديهم وجعلها إلى رسول الله صلى الله عليه وسلم. ﴿يَسْأَلُونَكَ عَنِ الْأَنفَالِ ۖ قُلِ الْأَنفَالُ لِلَّهِ وَالرَّسُولِ ۖ فَاتَّقُوا اللَّهَ وَأَصْلِحُوا ذَاتَ بَيْنِكُمْ﴾ [الأنفال: 1]، أنتوا بقى فاتقوا الله وأصلحوا ذات بينكم. دنيا، دنيا. اتعلموا الدرس؟ أهو درس قاسي على فكرة على الصحابة، قاسي جداً، إن ربنا ينزل فيهم قرآناً يعاتبهم، لكن الإنسان حتى المؤمن حتى الولي ممكن يبقى محتاج يتربى مرة واثنين وثلاثة.

يا جماعة احنا ما هو ده اللي بقوله، احنا إزاي عاوزين نقرأ الآيات تاني بالنفسية دي عشان نفهم اللي بيحصل فينا احنا ليه، وعلاجه إيه؟ اتعلموا الدرس؟ تمر السنين وتيجي غزوة أحد، ونخسر، ليه؟ ليه؟ عشان الأنفال، نكسب والكفار يفروا، والنبي يقولها واضحة صلى الله عليه وسلم للرماة، ما تنزلوش، أنتوا هنا ما تسيبوش الجبل، غانمنا ما تشاركوناش، قتلنا ما تلحقوناش، أنتوا على الجبل، ما تنزلوش. يحصل إيه؟ يكسب المسلمون، ويبتدوا في جمع الغنائم، ويدخل الشيطان، وتظهر آفة النفوس حب الدنيا، ﴿مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ﴾ [آل عمران: 152] في سورة آل عمران، في وقائع تلك الغزوة غزوة أحد، كانوا ٥٠ واحد، كام واحد ينزل؟ ٤٠ ينزلوا، الأكثر، ويتبقى ١٠، فنخسر، تاني دنيا، أنفال، غنائم.

خلي بالكم يا جماعة احتياج الصحابة للغنائم والأنفال مش زينا كده، مش زينا، احنا لسه كنا بنقرأ في رياض الصالحين اللي بيحضر معانا دروس بتاعة الفجر والعصر، النبي عليه الصلاة والسلام عشان تفهموا كان حياة الناس دي عاملة إزاي، كان يرسلهم في السرية يقوم يدي للجيش جراب تمر، جراب فيه تمر. طيب تعيين كل واحد فيهم قد إيه في اليوم، حد فاكر من اللي بيحضر الدروس؟ تمرة في اليوم، تمرة في اليوم، يعملوا بيها إيه؟ ما ينفعش يأكلها، ما ينفعش، نمصها كالصبيان، نفضل اليوم نمص في التمرة ونشرب عليها الماء، دي ناس مش قلنا لهم اقعدوا في الجامع لغاية ما أجيلكم، دي ناس رايحة تجاهد، يعني عاوزة قوة، يعني اللي عاوز أقوله إيه، يعني النبي عليه الصلاة والسلام لما يدي ده للمجاهدين اللي طالعين يجاهدوا يبقى اللي في المدينة معاهم إيه؟ لما دي ناس طالعة في سفر وجهاد مش لاقي حاجة يديها لهم، فكل واحد معاه تمرة في اليوم كله، لدرجة في الآخر بيعملوا إيه؟ يأكلوا ورق الشجر، حتى يضع أحدنا كما يضع البعير، يعني بقى الغائط بتاعهم شبه البعير، ما هو أكلهم بقى زي أكل البهائم. فدول لما يلاقوا الغنائم ويلاقوا الأنفال، يعني أقصد أقول إيه، كنا ممكن نعديها ما الناس يعني شقيانة والناس تعبانة، لأ ربنا ما يعملش كده سبحانه وتعالى. طب ده وقت فرحة ونصر وننزل نشيد النصر وندي.

يسألونك عن الأنفال قل الأنفال لله والرسول فاتقوا الله وأصلحوا ذات بينكم. فالدنيا إذا دخلت على أهل الإيمان دمرتهم. مين فينا دلوقتي يزكي نفسه ويقول أنا مش بتاع دنيا؟ أنت تعرف إنك بتاع دنيا ولا مش بتاع دنيا لما تقع في الفتنة. يعني إيه تقع في الفتنة؟ مش إنك تلاقي، فتنة إنك تحرم؛ أتصبرون؟ هتصبر ولا مش هتصبر؟ مش هتعرف طول ما أنت ما وقعتش في الفتنة دي. وبعدين إزاي بقى لما تحرم؟ تحرم حرمان اللي في ميدان الجهاد؛ فمحدش يزكي نفسه.

دلوقتي نرجع لحديث النبي عليه الصلاة والسلام: «ولينزعن الله المهابة من صدور أعدائكم ولا يقذفن في قلوبكم الوهن». قيل وما الوهن؟ قال: «حب الدنيا وكراهية الموت». يبقى حب الدنيا مش مطلوب، وإذا وجد أثر في الأمة تأثيرًا يجعل الكفار يتسلطون عليها. حد عنده مشكلة في ده؟ ده كلام النبي عليه الصلاة والسلام. بنفصل الحديث بشكل تاني وبنقرأه بشكل مختلف. يبقى إذا الحل فين عشان الأمم ما تتداعى علينا؟ الحل إن الوهن ده يتشال من قلوبنا، طب إزاي الوهن يتشال من قلوبنا؟ إننا ما نبقاش بنحب الدنيا.

إزاي ما نحبش الدنيا؟ ده السؤال. هقولكم معنى واحد لأن الغربلة بتعمله. واحد معاه دنيا وموسع عليه في الدنيا، الطبيعي في البشر إنه يكون محبًا للدنيا ومؤثرًا لها وراكنًا إليها بقلبه، ده الطبيعي في البشر. لو واحد فتحت له الدنيا فلم يكن مؤثرًا لها ولم يكن راكنًا إليها نقول ده اللي مختلف، هو ده شذوذ القاعدة. فلو الواحد عاوز ما يركنش إلى الدنيا ما يبقاش محبًا للدنيا؛ فحاجة من اثنين: يا إما بإيديه واحدة واحدة يصيب دنياه بنوع خلل، ما تبقاش الدنيا أكمل وجه في كل حاجة.

أنا عاوزكم تقرؤوا حياة النبي عليه الصلاة والسلام كانت عاملة إزاي، وحياة الصحابة كانت عاملة إزاي. بقالنا ثلاث أربع مرات في دروس الفجر والعصر بنقرأ بس الناس دي كانت عايشة إزاي. النبي عليه الصلاة والسلام هلال ورا هلال ورا هلال، ثلاثة أهلة في شهرين، ما فيش ولا بيت من بيوت النبي عليه الصلاة والسلام بيتولع فيها نار، ما فيش طبيخ، ما فيش أكل شهرين متتابعين. طب بتأكلوا إيه؟ الأسودان: التمر والماء. والحديث الثاني: «ما ملأ النبي صلى الله عليه وسلم بطنه من الدقل» -والدقل هو رديء التمر- عمره ما ملأ بطنه منه.

يموت النبي عليه الصلاة والسلام وفي بيته نص رغيف من شعير، فتعيش عائشة تأكله أيامًا، وفي الرواية اللي قرأناها في رياض الصالحين تصدقت منه. دي حياتهم. في مرة يجيء له واحد عاوز يأكل، فيبعث لبيت من بيوته، عندكم حاجة؟ لأ. الثاني، الثالث، كل بيوت النبي عليه الصلاة والسلام ما فيهاش حاجة. يقوم صحابي يقول: أنا هأضيفه عندي. دخل على امرأته، عندنا إيه؟ قالت له أكل العيال. قال لها تلهي العيال وتطفئ النور عشان الضيف ما يحسش إن إحنا ما بنأكلش، ونعمل إزعاج ونخبط في الأطباق، وكله نام طاوياً، ولا واحد أكل من البيت عشان الضيف يأكل.

نرجع ثاني: «وليقذفن الله في قلوبكم الوهن»، قيل وما الوهن؟ قال: «حب الدنيا وكراهية الموت». إحنا عرفنا خلاص إن نفوسنا أضعف من إن هي تبقى في سعة من الدنيا وما نركنش إليها. طب نعمل إيه؟ نربي نفسنا على إننا ننزل بالمستوى شوية واحدة واحدة، عشان نفسنا ما تركنش للدنيا. فلما يتقال سيبوا الدنيا نقوم تبقى سهلة، ما إحنا مدربين نفسنا إن إحنا نسيب الدنيا. واللي بأقوله ده معاني شرعية موجودة: «طعام الواحد يكفي الاثنين، وطعام الاثنين يكفي الأربعة، وطعام الأربعة يكفي الثمانية».

لو إحنا متعودين كل واحد بيأكل قد كده، ما تيجوا نقلل شوية، يبقى في دماغنا المعنى ده إن إحنا بنعرف نخل شيئاً ما بأمور الدنيا. لأن في ناس لو اختل أي شيء يزعق ويتنرفز ويهدد بطلاق، بس عشان ما عملتش سلطة وهي عارفة إني بأحبها، رغم إن معاه الرز والخضار واللحمة أو الفراخ. وقل مثل ذلك بقى في كل حاجة، اللباس. النبي عليه الصلاة والسلام في بعض الأوقات ما عندهوش غير إزار، ما عندهوش رداء أصلاً.

يبقى عشان حب الدنيا يخرج، وطول ما الدنيا على سنجة عشرة مية فل، غصب عنا إحنا بشر هنركن. الحل إيه؟ يا إما بأيدينا نحاول واحدة واحدة نتقلل من الدنيا. حتى لو معاك؛ أبو بكر كان معه. طب إيه يعني كان معه؟ خروج العظماء، اللي بيحضر الدرس عارف أنا بأتكلم عن إيه. في قصة كده في السيرة بأسميها خروج العظماء: النبي خرج من بيته لمح أبا بكر وعمر خارجين، إيه اللي خرجكم؟ الجوع. بيسأل أبا بكر وعمر: خرجتوا ليه؟ جعان وما فيش حاجة في بيتي. فالنبي يقول لهم: «ما أخرجني إلا ما أخرجكما».

أبو بكر التاجر اللي معه فلوس، ينفق ماله كله في وقت، وأنا مش بأقول نعمل كده يا جماعة، والنبي عليه الصلاة والسلام قبل من أبي بكر ذلك. فده على حسب يقيننا، لكن يبقى المعنى في دماغنا. إحنا دلوقتي بنعمل العكس كلنا، لو قدرتي أبقى في الحتة دي بأدوس على نفسي عشان أطلع للحتة اللي بعدها. وتيجي بعد كده تقول إيه؟ المشكلة فين؟ ما هو المشكلة إن إحنا بنحب الدنيا. طب ليه بنحب الدنيا؟ لأننا ركنا إليها. طب ليه ركنا إليها؟ لأن الدنيا بتاعتنا زي ما أنتم شايفين.

طيب الحل؟ إن إحنا نعمل ده بأيدينا، لو ما عملناهوش بأيدينا وأراد الله عز وجل أن يخرج جيلاً ينتصر، يعمل إيه بقى؟ يعمله هو سبحانه وتعالى. يعمله هو بالغربلة. لكن هيبقى اختلال شديد بقى، ربنا سبحانه وتعالى فعله على غير ذلك؛ الغربلة زلزال شديد. في غزوة الخندق اللي فيها سورة الأحزاب، اللي فيها لفظ ﴿زُلْزِلُوا زِلْزَالًا شَدِيدًا﴾ [الأحزاب: 11]، النبي عليه الصلاة والسلام كل الصحابة رابطين على بطنهم حجر من الجوع، والنبي كان جوعه أشد فربط حجرين.

فواحد في الهيئة دي والأحوال دي لا ده يعمل إيه؟ يفرم، أنا باقي على إيه؟ ما أنا مش باقي على حاجة خلاص، ما عنديش حاجة أخسرها. إيه اللي بيخلينا نتوكأ أو نفكر؟ في حاجات سايبينها، وعشان كده النبي عليه الصلاة والسلام أمر ثلاثة ما يخرجوش معه في الغزو؛ واحد اتجوز ولم يبن، واحد رفع البيت ولم يسقف بيته، والثالث عنده ثمر وعاوز يجنيه. والأسماء دي أظن موجودة حتى في التوراة، فهذا مما اتفقت عليه الشرائع.

ليه ما يخرجوش؟ علشان هيبقى متعلق، قلبه متعلق. يقوم يعمل إيه ربنا سبحانه وتعالى بهذه الغربلة؟ يجعل دنيا أهل الإيمان تختل، دي فائدة من فوائد الغربلة، فلما تختل دنياهم ما يتعلقوش بها، فلما ما يتعلقوش بها ما يبقوش بيحبوها، فلما ما يبقوش بيحبوها ما يبقاش في قلوبهم الوهن، فلما ده يحصل مش هتتداعى الأمم بقى علينا. نريد أن نطمئن لأقدار الله عز وجل، ونرى أقداره سبحانه وتعالى هي أجمل الأقدار وألطف الأقدار.

وننشغل بما علينا أن نفعله في أحوالنا التي وضعنا الله عز وجل فيها، ما يبقاش شغلنا فلان ما عملش وفلان ما سواش والحكومة الفلانية والشعب مش عارف إيه. يا عم أنت يوم القيامة ما هتتسأل عن فلان ولا عن الحكومة، أنت هتتسأل عن نفسك. ودائماً بقولكم كلمة وبكررها لكم كتير: يوم القيامة أصغر ذنب أنت عملته أكبر عليك من أكبر ذنب عمله غيرك. ساعة ما قلت لكم لو هنشيل كلمة واحدة في الجملة دي هتبقى غلط هي كلمة «عليك»، هو أصغر ذنب أنت عملته مش أكبر من أكبر ذنب عمله غيرك، إنما أكبر عليك أنت.

لأنك يوم القيامة مش هيتقالك فلان كفر. ليه بقى كفر؟ وأنت مالك؟ ليه كفر؟ هو كفر، هو يروح النار. لكن أنت هيتقالك إيه؟ نظرت نظرة حرام، ليه نظرت النظرة الحرام؟ هتكون النظرة الحرام دي أشد عليك أنت من كفر فرعون. صح ولا لأ يا جماعة؟ ما هو كفر فرعون على مين؟ على فرعون، في داهية، أنت مالك؟ إنما نظرتك الحرام عليك أشد من كفر فرعون.

ما صليتش سنة الجمعة. صليت الجمعة؟ أه. طب صليت السنة بعد الجمعة؟ ما صليتهاش. ده مش ذنب، لكن نقص خلل. فوتت صلاة الفجر لغاية الشروق ما طلع، ذنب. وهأعد بقى. أنت هتتسأل عن نفسك، أنت عملت إيه وما عملتش إيه. فما تنشغلش بغيرك، هذا من الخذلان إنك تفضل طول وقتك شاغل نفسك بغيرك.

ذكره النبي عليه الصلاة والسلام «يرى أحدكم القذى في عين أخيه ولا يرى الجذع في عينه». القذى الحاجات اللي هي البسيطة أوي دي. عين المية بتاعة أخوك، لو أنت ليك عين مية وأخوك ليه عين مية، بركة مية كده بتاعتك وأنت بتقوله بص القذارة عندك قذى، اللي هو الحاجات ما تتشافش، وأنت في عينك في إيه؟ جذع شجرة ولا دريان. «يرى أحدكم القذى في عين أخيه ولا يرى الجذع في عينه». ده من الخذلان.

فاهتم لنفسك، واسأل نفسك إيه الواجب اللي علي أعمله دلوقتي، وكن فيه، ولا تكن في غيره. واعرف إن أي حاجة تانية بتشغلك مؤخرة عن النصر. كنا عملنا درس اسمه نصر هنا نصر هناك، بيتهيألي كان في المسجد هنا مش فاكر ولا كان أونلاين مش فاكر، المهم اسمعوه برضه، نصر هنا ونصر هناك. ننتصر إحنا هنا وهم هينتصروا هناك، ببركة نصرنا ببركة النصر هنا على أنفسنا وعلى شهواتنا. خلاص؟

أقول قولي هذا وأستغفر الله العظيم لي ولكم. سبحانك اللهم وبحمدك نشهد أن لا إله إلا أنت، نستغفرك ونتوب إليك. والسلام عليكم ورحمة الله وبركاته.